පුවත්

පොදුජන පෙරමුණේ රාජපක්ෂ හිතවාදී පාර්ලිමේන්තු මන්ත්‍රීවරුන් කණ්ඩායම ආණ්ඩුවෙන් ඉවත් කිරීමට තීරණය කර ඇති බව වාර්තා වෙයි.

ආණ්ඩුක්‍රම ව්‍යවස්ථාවේ 47(3)(අ) ව්‍යවස්ථාව මඟින් ජනාධිපතිවරයාට ලැබී ඇති බලතල ප්‍රකාරව රාජ්‍ය අමාත්‍යවරු සිව්දෙනෙකු වහාම ක්‍රියාත්මක වන පරිදි සිය ධුරවලින් ඉවත් කිරීමට ජනාධිපතිවරයා ඊයේ (05) දිනයේ පියවර ගනු ලැබිණ.

ඒ අනුව ප්‍රේමලාල් ජයසේකර (වරාය සහ ගුවන් සේවා), ඉන්දික අනුරුද්ධ (විදුලි බල හා බලශක්ති), මොහාන් ප්‍රියදර්ශන ද සිල්වා (කෘෂිකර්ම) සහ සිරිපාල ගම්ලත් (මහාමාර්ග) යන රාජ්‍ය අමාත්‍යවරුන් මෙලෙස ඔවුන්ගේ ධුරවලින් ඉවත් කෙරිණ.

එමෙන්ම මෙවර ජනාධිපතිවරණයේදී ජනාධිපති රනිල් වික්‍රමසිංහට සහාය නොදෙන ආණ්ඩු පාර්ශ්වය නාමිකව නියෝජනය කරන සියලු මැති ඇමතිවරුන්ට ඉවත්ව යන ලෙස දැනුම්දී ඇති බව වාර්තා වෙයි

දේශපාලන ආරංචි මාර්ග සඳහන් කරන ආකාරයට ජනාධිපති රනිල් වික්‍රමසිංහ මෙම තීරණය ගෙන තිබෙන්නේ ඔහුට සහාය දක්වන මැති ඇමතිවරුන් ඇතුළු පක්ෂ සංවිධාන රැසක ඉල්ලීමක් සලකා බැලීමෙන් අනතුරුවය .

එහිදී ඔවුන් පෙන්වාදී ඇත්තේ මේ මොහොතේ තීරණාත්මකව ජනාධිපතිවරයාට සහාය නොදක්වන දක්වන පිරිස් ආණ්ඩුවේ නමින් තබාගෙන සිටීම කිසිඳු ප්‍රයෝජනයක් නොමැති බවත් ඔවුන් තමන් මැතිවරණය සම්බන්ධව ගන්නා තීන්දු තීරණ විරුද්ධ පාර්ශව වෙත ලබාදෙමින් දේශපාලන සූදුවක නිරතවන බවයි .

එබැවින් තීරණාත්මක මොහොතේ සහාය නොදක්වන පිරිස ඉවත්කර ජනාධිපතිවරණයේ ඉදිරි කටයුතු තමන්ට නිදහසේ කරගෙන යාමට අවස්ථාව සලසන ලෙස මේ පිරිස ජනාධිපතිවරයා වෙතින් ඉල්ලා තිබේ .

එසේම තවත් රාජ්‍ය මාත්යවරුන් කිහිප දෙනෙකු මෙන්ම හඳුනාගත් මන්ත්‍රීවරුන් පිරිසකට අවවාදාත්මක දැනුම්දීමක් සිදුකර ඇති බවද දැනගන්නට ඇති අතර ඒ ජනාධිපතිවරණය තීරණාත්මක අදියරකට පැමිණ ඇති මොහොතේ ආණ්ඩුවේ කියා වැනෙමින් නොසිට තීන්දුවක් ගන්නා ලෙසයි . මෙම දැනුම්දීම අනුව රාජ්‍ය අමාත්‍යවරුන් කිහිපදෙනෙකු තමන්ව ධුර වලින් ඉවත් නොකරන ලෙසත් ඒ වෙනුවට ඉල්ලා අස්වීමට අවස්ථාව ඉල්ලා ඇති බවද දැනගන්නට ඇත.

ඒ අනුව ආණ්ඩුවෙන් ඉවත්කළ රාජපක්ෂවාදී මන්ත්‍රී කණ්ඩායම පහත පරිදී වේ.

1. මහින්ද රාජපක්ෂ
2. චමල් රාජපක්ෂ
3. නාමල් රාජපක්ෂ
4. ශෂින්ද්‍ර රාජපක්ෂ
5. සාගර කාරියවසම්
6. ජොන්ස්ටන් ප්‍රනාන්දු
7. ජයන්ත කැටගොඩ
8. සංජීව එදිරිමාන්න
9. රංජිත් බණ්ඩාර
10. ඩබ්. ඩී. වීරසිංහ
11. යූ. කේ. සුමිත්
12. තිස්ස කුට්ටිආරච්චි
13. නිපුන රණවක
14. ඩී. වී චානක
15. ඉන්දික අනුරුද්ධ
16. ප්‍රසන්න රණවීර
17. ඉසුරු දොඩංගොඩ
18. ගාමිණී ලොකුගේ
19. මර්ජාන් ෆලීල්
20. සිරිපාල ගම්ලත්
21. සරත් වීරසේකර
22. තේනුක විදානගමගේ
23. සමන්ප්‍රිය හේරත්
24. මංජු ලලිත් වර්ණ කුමාර
25. නාලක කෝට්ටේගොඩ
26. මොහාන් සිල්වා
27. සී.බී. රත්නායක

මියන්මාරයේ සන්නද්ධ කණ්ඩායමක් ග්‍රහණයේ පරිගණක අපරාධ සඳහා යොදවා සිටි ශ්‍රී ලාංකීය තරුණ තරුණියන් 20 දෙනෙකු ඊයේ (05) දිවයිනට පැමිණියේ ය.

මීට දින කිහිපයකට පෙර ඔවුන් මුදවා ගැනුණු අතර තායිලන්තයේ බැංකොක් සිට ඔවුන් ශ්‍රී ලංකාවට රැගෙන ආවේ ජාත්‍යන්තර සරණාගතයින් පිළිබඳ සංවිධානයේ අනුග්‍රහය යටතේ යි.

ශ්‍රී ලාංකික තරුණ තරුණියන් 50කට වැඩි පිරිසක් මියන්මාරයේ සන්නද්ධ කණ්ඩායමක් ග්‍රහණයේ චීන අපරාධ කණ්ඩායම් විසින් විවිධ පරිගණක අපරාධ සඳහා යොදවා ගෙන සිටී.

ඉන් 08 දෙනෙකු මීට පෙර මුදවා ගැනුණි.

තවත් 33 දෙනෙකු මියන්මාරයේ මියාවඩි නගරයේ සිට කිලෝමීටර 26 ක දුරකින් එම අපරාධ කල්ලි ග්‍රහණයේ රැඳී සිටී.

නව අභියාචනාධිකරණ විනිසුරුවරුන් සිව් දෙනෙක් අද (06) පෙරවරුවේ ජනාධිපති කාර්යාලයේ දී ජනාධිපති රනිල් වික්‍රමසිංහ  ඉදිරියේ දිවුරුම් දුන්හ.

මහාධිකරණ විනිසුරුවරුන් වන කේ. එම්. ජී. එච්. කුලතුංග, ඩී. තොටවත්ත සහ ආර්.ඒ. රණරාජා යන  සහ හිටපු ජ්‍යෙෂ්ඨ නියෝජ්‍ය සොලිසිටර් ජනරාල් එම්.සී.එල්.බී. ගොපල්ලව  මෙලෙස නව අභියාචනාධිකරණ විනිසුරුවරුන් ලෙස පත් කර තිබේ.

ආණ්ඩුක්‍රම ව්‍යවස්ථාවේ 107 වැනි වගන්තිය ප්‍රකාරව 2024 සැප්තැම්බර් 6 වැනිදා සිට ක්‍රියාත්මක වන පරිදි ජනාධිපති රනිල් වික්‍රමසිංහ  විසින් මෙම පත්කිරීම් සිදු කර ඇත.

ජනාධිපති ලේකම් සමන් ඒකනායක  ද මෙම අවස්ථාවන්ට එක්ව සිටියේය.

ඊශ්‍රායලයේ සාත්තු සේවක (caregiver) රැකියා සඳහා මේ වන විට ශ්‍රමිකයින් 749 දෙනෙක් පිටත්ව ගොස් ඇති බව ශ්‍රී ලංකා විදේශ සේවා නියුක්ති කාර්යාංශය සඳහන් කරයි.

මේ අතර, ඊශ්‍රායල් සාත්තු සේවක රැකියා සඳහා පිටත්ව යන 131 වන කණ්ඩායමට අයත් තවත් 21 දෙනෙකුට වීසා, ගුවන්ටිකට්පත් ඇතුළු ලියකිවිලි භාරදීම අද (06) ශ්‍රී ලංකා විදේශ සේවා නියුක්ති කාර්යාංශයේ දී සිදු කරන ලදී. එම කණ්ඩායමට තරුණියන් 18 දෙනෙකු හා තරුණයින් 3 ඇතුළත් වේ. මෙම පිරිස මේ මස 09 වෙනිදා ඊශ්‍රායලය බලා පිටත්ව යාමට නියමිතව ඇත.

ඊශ්‍රායලය, දකුණු කොරියාව, ජපානය වැනි රටවල් ශ්‍රී ලංකා විදේශ සේවා නියුක්ති කාර්යාංශය සමග ඇතිකරගත් අවබෝධතා ගිවිසුම් වලට අනුව ඉහළ වැටුප් සහිත රැකියා අවස්ථා ශ්‍රී ලංකාවට හිමිව තිබේ. ඊශ්‍රායලයේ සාත්තු සේවා රැකියා සඳහා කාර්යාංශයේ www.slbfe.lk වෙබ් අඩවියට පිවිස ලියාපදිංචි වීමේ අවස්ථාව ද තිබේ.

ස්වාධීන ජනාධිපති අපේක්ෂක රනිල් වික්‍රමසිංහට සහය පළ කරන ශ්‍රී ලංකා පොදුජන පෙරමුණේ මැති ඇමතිවරුන් රැසකගේ සහභාගීත්වයෙන් පොදුජන එක්සත් නිදහස් පෙරමුණ නමින් නව දේශපාලන සන්ධානයක් අද (05) ආරම්භ කෙරිණි.

බත්තරමුල්ලේ පැවති උත්සවයට ශ්‍රී ලංකා පොදුජන පෙරමුණේ මැති ඇමතිවරුන් ඇතුළු පාර්ශ්ව රැසක් එක්ව සිටියහ.

අග්‍රාමාත්‍ය දිනේශ් ගුණවර්ධන  විසින් පොදුජන එක්සත් නිදහස් පෙරමුණේ සභාපතීත්වය දරනු ලැබේ.

ලේකම්වරයා වශයෙන් අමාත්‍ය රමේෂ් පතිරණ  කටයුතු කරනු ලැබේ.

සන්ධානයේ නාමය සහ නිල ලාංජනය එළිදී ඒළි දැක්වූ අතර අනතුරුව පොදුජන එක්සත් නිදහස් පෙරමුණට සහය පල කරන දේශපාලන පක්ෂ නියෝජිතයින් ඊට අදාල ගිවිසුමට අත්සන් තැබුවේය.

රාජ්‍ය හා පෞද්ගලික අංශයේ සේවයේ නියුතු අයවලුන්ට, ඡන්ද විමසීම්වල දී වැටුප් හෝ පෞද්ගලික නිවාඩු අහිමි වීමකින් තොරව ස්වකීය ඡන්දය දීමට හැකිවනු පිණිස නිවාඩු ලබා දීම සම්බන්ධව මැතිවරණ කොමිෂන් සභාව නිවේදනයක් නිකුත් කර තිබේ.

රාජ්‍ය අංශයේ නිලධරයන්ගේ විශේෂ නිවාඩු පිළිබඳ ආයතන සංග්‍රහයේ ජනාධිපතිවරණයක් සඳහා ඡන්දය ප්‍රකාශ කිරීමට යාම පිණිස අවම කාලය පැය 4ක් ලෙස දැක්වේ.

නමුත් පෞද්ගලික අංශයේ සේවා නියුක්තිකයන්ට ලිඛිත නියමයකින් පැනවූ එවැනි විශේෂ නිවාඩු නොමැති හෙයින් සේවා යෝජකයන් සේවකයන්ට ඡන්දය පාවිච්චි කිරීම සඳහා නිවාඩු නොදෙන බවට පැමිණිලි ලැබී තිබෙන බව මැතිවරණ කොමිෂන් සභාව පවසයි.

ඒ අනුව පෞද්ගලික අංශයේ සේවකයින්ට ඡන්දය ප්‍රකාශ කිරීමට යෑමට සහ ඒමට නිවාඩු ලබා දීම සඳහා දුර හා කාලය අතර සම්බන්ධතාවක් මානව හිමිකම් කොමිෂන් සභාව විසින් සකස් කර තිබෙනවා. එය පහතින් දැක්වේ.

සේවා ස්ථානයේ සිට ඡන්ද පොළට ඇති දුර කිලෝමීටර් 40ක් හෝ ඊට අඩු – දින භාගයක නිවාඩුවක්

සේවා ස්ථානයේ සිට ඡන්ද පොළට ඇති දුර කිලෝමීටර් 40ත් කිලෝමීටර් 100ත් අතර – දින එකයි

සේවා ස්ථානයේ සිට ඡන්ද පොළට ඇති දුර කිලෝමීටර් 100ත් කිලෝමීටර් 150ත් අතර – දින 1 1/2

සේවා ස්ථානයේ සිට ඡන්ද පොළට ඇති දුර කිලෝමීටර් 150ට වැඩි – දින 2යි

සේවා නියුක්තිකයන් විසින් ලිඛිත ඉල්ලීමක් මඟින් නිවාඩු ඉල්ලුම් කළ යුතු අතර, සෑම සේවා යෝජකයෙකු විසින්ම විශේෂ නිවාඩු ඉල්ලුම් කළ තැනැත්තන් හා නිවාඩු ප්‍රදානය කරන කාල සීමාව දැක්වෙන ලේඛනයක් පිළියෙළ කර සේවා ස්ථානයේ ප්‍රදර්ශනය කළ යුතු බවත් එම නිවේදනයේ වැඩිදුරටත් සඳහන්ය.

රටේ තුනෙන් එකක් දරුවන් මන්දපෝෂණයෙන් (පාණ්ඩුව) පෙළෙන බව සමගි ජන බලවේගයේ මාතලේ දිස්ත්‍රික් මන්ත්‍රි රෝහිණී කුමාරි විජේරත්න පාර්ලිමේන්තුවේදී ඊයේ (සැප් .4) අනාවරණය කළා ය.

ඊට ප්‍රධාන හේතුව පෝෂ්‍යදායි ආහාර වේලක් නොමැතිකම බව ත් විශේෂයෙන් ම මධ්‍යම පළාතේ හා වතුකරයේ මේ තත්ත්වය බරපතළ බව ත් විජේරත්න  පැවැසුවා ය.

මේ පිළිබඳව අවධානය යොමු කරමින් තමන් ගේන ප්‍රතිපත්ති මොනව ද? යන්නත් ඊට තිබෙන ප්‍රතිපත්ති කුමක්දැයි අදාළ බලධාරීන්ට යොමු කළ යුතු බව ද ඇය ප්‍රකාශ කළා ය.

මන්දපෝෂණය පිළිබඳ යුනිසෙෆ් වාර්තාව එදා හිටපු සෞඛ්‍ය ඇමති කෙහෙළිය රඹුක්වැල්ල ප්‍රතික්ෂේප කළ බවට ඇය චෝදනා කළා ය.

ළමා මන්දපෝෂණය වැඩි වන්නේ කෙසේ ද? යන්නත් ඊට ගත යුතු කෙටිකාලීන මාර්ග සම්බන්ධ වාර්තාව ඉදිරිපත් කරමින් මන්ත්‍රීවරිය මේ බව පැවැසුවා ය.

ඉදිරි ජනාධිපතිවරණයේදී කිසිදු අපේක්ෂකයෙකුට සහාය පළ නොකර සිටිමට තීරණය කළ බව හිටපු ජනාධිපතිනි චන්ද්‍රිකා බණ්ඩාරනායක කුමාරතුංග පවසයි.

ඇය මේ බව සඳහන් කළේ, විශේෂ නිවේදනයක් නිකුත් කරමිනි.

ජනාධිපතිවරණයේ දී තම ස්ථාවරය සම්බන්ධයෙන් ඇතැම් මාධ්‍ය විසින් විවිධ වාර්තා පළ කර තිබේ.

ඒ සම්බන්ධයෙන් ද සිය අවධානය යොමු කර ඇති බව හිටපු ජනාධිපතිනි කුමාරතුංග  කියා සිටියාය.

ඇතැම් ජනාධිපතිධුර අපේක්ෂකයින් විසින් අවස්ථා කිහිපයකදී සිය සහය ඉල්ලා සිටි බව ද ඇය අවධාරණය කළාය.

කෙසේ වෙතත් මෙම අවස්ථාවේදී මධ්‍යස්ථව සිටීමට තමන් තීරණය කර ඇති බවට අදාළ සියලු පාර්ශ්වයන් වෙත දැනුම්දීමට ඇති බව හිටපු ජනාධිපතිනි චන්ද්‍රිකා බණ්ඩාරනායක කුමාරතුංග වැඩිදුරටත් කියා සිටියාය.

උපුටාගැනීම..!

2024 ජනාධිපතිවරණයේදී කිසිම අපේක්ෂකයෙකුට සහයෝගය ලබා දීමට මම කටයුතු කර නොමැති අතර, ඉදිරියේ දී හෝ එසේ කිරීමට මා තුළ බලාපොරොත්තුවක් නොමැති බව අවධාරණය කරනු කැමැත්තෙමි.

මින් පෙර කිසිදාක, අප දේශයේ අනාගතය අද වැනි අවිනිශ්චිතභාවයකට සහ අභියෝගාත්මක ඉරණමකට මුහුණ පා නොමැත.

සියලුම ඡන්ද දායකයින් තම ඡන්දය ප්‍රකාශ කිරීමේදී බැරෑරුම් ලෙස මෙම තත්ත්වය කල්පනා කළ යුතුව ඇත. පුද්ගලයා දෙස නොව, එක් එක් අපේක්ෂකයා විසින් ඉදිරිපත් කරන වැඩපිළිවෙල හා ප්‍රතිපත්ති, එම ප්‍රතිපත්ති ක්‍රියාත්මක කිරීම සඳහා ඔවුන් සතු වැඩපිළිවෙළ හා ක්‍රියාපටිපාටින් මෙන්ම ඒවා ක්‍රියාත්මක කිරීම භාරව සිටින පුද්ගලයින්ගේ ධාරිතාව පිළිබඳව ද මෙහිදී මැනවින් අවධානයට ලක්‌කළ යුතු යැයි මම යෝජනා කරමි. විධායක ජනාධිපති ධුරය අහෝසි කිරීමට ප්‍රමුඛත්වය ලබා දීම, අධ්‍යාපන, සෞඛ්‍ය, කෘෂිකර්මය(විශේෂයෙන් සුළු ගොවිතැන), සළු හා මධ්‍ය පරිමාණ කර්මාන්ත සහ ව්‍යවසායන්, ප්‍රධාන කර්මාන්ත සහ අපනයන මෙන් ම වැවිලි කර්මාන්ත විවිධාංගීකරණය, ජාත්‍යන්තර වෙළඳාම සහ සංචාරක ව්‍යාපාරය පුළුල් කිරීම යන ප්‍රතිපත්තිවලට ප්‍රමුඛත්වය ලබා දිය යුතු ය.

අවංක සහ යහ පාලනය, රාජ්‍ය දූෂණය පිටු දැකීම මෙන් ම පොරොන්දු වූ ප්‍රතිපත්ති නිසි ලෙස ක්‍රියාත්මක කිරීම පිළිබඳ සහතිකයක් ජනාධිපති අපේක්ෂකයන් වෙතින් ඉල්ලා සිටීමට ඡන්දදායකයින් වන අපට අනුලලංඝනීය අයිතියක් ඇත. මෙයින් අදහස් කරන්නේ ව්‍යවස්ථාදායකය, විධායකය සහ අධිකරණය ඇතුළු රජයේ සියලුම ඉහළ තනතුරු සඳහා අවංකභාවයෙන් හෙබි කුසලතා සහ සුදුසුකම් පරිපුර්ණ පුද්ගලයින් පත් කිරීමයි. යහපාලනය සහතික කිරීම සඳහා අපගේ දේශයෙන් දුෂණය නැමැති ශාපය අතුගා දැමිය හැකි ආකාරයේ නීති, ක්‍රමවේද සහ ක්‍රියාපටිපාටි ස්ථාපිත කිරීමේ අවශ්‍යතාවයයි.

ආණ්ඩුකරණ ක්‍රියාවලිය තුළ අවංකභාවය සහ වගවීම ඉල්ලා අදින් වසර දෙක හමාරකට පෙර, 2022 දී ඇරඹි දැවැන්ත ජනතා ව්‍යාපාරය විසින් රැඩිකල් ක්‍රම වෙනසක් උදෙසා කළ ප්‍රබල ඉල්ලීම අප විසින් අමතක නොකළයුත්තේය.

යම් රජයක් පිහිටුවීම සඳහා පුරවැසියන් වසර පහකට වරක් ඡන්දය භාවිත කරන නමුත් එම වසර පහ තුළ රාජ්‍ය පාලනය පිළිබඳ කිසිදු පුරවැසි සබඳතාවයක් හෝ සහභාගීත්වයක් නොමැති වත්මන් ක්‍රමය හරහා මෙම අරමුණ ළඟා කරගත නොහැකි බව මම විශ්වාස කරමි.

අප රටේ ක්‍රම වෙනසක් ඇති කිරීම පිළිබඳ අපගේ සිහිනය සඵල කරගැනීමට එකම විසඳුම ආණ්ඩුකරණයේ දී තීරණ ගැනීමේ සහ ක්‍රියාත්මක කිරීමේදී පූර්ණ පුරවැසි සහභාගීත්වය ඇතුළත් රාජ්‍ය ව්‍යුහයක් නිර්මාණය කිරීම බව

මාගේ විශ්වාසයයි. ඒ සඳහා ආණ්ඩුක්‍රම ව්‍යවස්ථාව හරහා මහජන සභාවක් ඇති කළ යුතු බවට මම යෝජනා කරමි. මෙම සභාව ආණ්ඩුව සමග සමාන්තරව ක්‍රියා කරමින්, යෝජිත සියලු රාජ්‍ය ප්‍රතිපත්ති පාර්ලිමේන්තුවට ඉදිරිපත් කිරීමට පෙර සමාලෝචනය කර එම සභාවේ අදහස් කැබිනට් මණ්ඩලයට ඉදිරිපත් කරනු ලැබේ.

මෙම ප්‍රතිපත්ති ක්‍රියාත්මක කිරීම සමාලෝචනය කර පාර්ලිමේන්තුවට මෙන්ම දිස්ත්‍රික් මහජන කමිටු වෙත වාර්තා කිරීමේ බලය ද මෙම සභාවට ඇත.

පහත සඳහන් සිදිල් සංවිධානවල නායකයින්ගෙන් මහජන සභාව සමන්විත වේ

සිවිල් සමාජීය සංවිධාන, වෘත්තීයවේදින්ගේ සංවිධාන, ව්‍යාපාරික ක්ෂේත්‍රයේ සංවිධාන, විශ්වවිද්‍යාල ආචාර්යවරුන්ගේ සහ ගුරු සංවිධාන, වෘත්තීය සමිති සහ ගොවි සංවිධාන, විශ්‍රාමික රාජ්‍ය සේවකයන්ගේ සංවිධාන, කලාකරුවන්ගේ සංගම් සහ රාජ්‍ය නොවන සංවිධාන සහ සිවිල් සමාජයේ නායකයන්.

මෙහි මුළු සාමාජිකත්වයෙන් 40% තරුණයන් වන අතර 40% කාන්තාවන් වනු ඇත. මේ ක්‍රමවේදය මගින් මහජනතාවගේ නියෝජිතයන් හරහා ආණ්ඩුකරණ ක්‍රියාවලිය තුළ වඩාත් පුළුල් සහ සෘජු සහභාගීත්වයක් මහජනතාව වෙත ලැබෙනු ඇත.

මෙය ශ්‍රී ලංකාවේ මහජන සහභාගීත්වයෙන් යුතු ප්‍රජාතන්ත්‍රවාදී පාලනය සහතික කිරීම සඳහා නිර්මාණය කර ඇති සුවිශේෂී පාලන ක්‍රමයක් වනු ඇත. මෙය දූෂණය සහ නාස්තිය අවම කිරීමට සහ රාජ්‍ය සේවයේ කාර්‍යාක්ෂමතාව ඉහළ නැංවීමට ඵලදායී විසඳුමක් ද වනු ඇත.

අප දේශයේ අනාගතය රැඳී ඇත්තේ ඔබ මතය.

ඉහත ඉදිරිපත් කර ඇති යෝජනාව කෙරෙහි බැරෑරුම් ලෙස මෙනෙහි කරන ලෙසත්, අඳුරු අනාගතයක එළිපත්තේ ඇති අප දේශය නැවත වරක් ප්‍රබුද්ධ හා ශ්‍රේෂ්ඨ දේශයක් ලෙස නැඟී සිටීමටත් ඔබේ වටිනා ඡන්දය භාවිත කරන ලෙස මගේ සහෝදර පුරවැසි ප්‍රජාවගෙන් සහෝදරත්වයෙන් ඉල්ලා සිටිමි.

උපුටාගැනීම අවසන්..!

ලංකා දේශපාලනයේ නව දිශානතියක් වෙනුවෙන් පුළුල් වූ නව දේශපාලන සන්ධානයක් එළිදැක්වීම ශ්‍රී ලංකා පොදුජන පෙරමුණ ඇතුළු අනෙකු දේශපාලන පක්ෂ නියෝජිතයන් විශාල පිරිසකගේ සහභාගීත්වයෙන් හෙට (05) දිනයේදී සිදු කරන බව සෞඛ්‍ය හා කර්මාන්ත අමාත්‍ය වෛද්‍ය රමේෂ් පතිරණ පවසයි.

ඔහු අවධාරණය කරන්නේ අනාගතවාදීව නව දේශපාලන ව්‍යාපාරයක් ආරම්භ කිරීමේ අරමුණින් එම සංධානය එළි දක්වන බවයි.

ඔහු මේ බව කියා සිටියේ බත්තරමුල්ලේ පැවැති මාධ්‍ය සාකච්ඡාවකට අද (04) දින එක්වෙමිණි.

මෙහිදී වැඩිදුරටත් අදහස් දැක්වූ අමාත්‍ය රමේෂ් පතිරණ මෙසේද පැවසීය,

ශ්‍රී ලංකාවේ මධ්‍යස්ථ දේශපාලන මතවාද නියෝජනය කරන පක්ෂ රැසක සහභාගිත්වයෙන් ගොඩනැගෙන පුළුල් සංධානය එළි දැක්වීමේ කටයුත්ත හෙට උදෑසන 09ට වෝටර්ස් ඒජ් හෝටලේදී සිදු කරනවා.

වර්තමානයේ ඇතිව තිබෙන දේශපාලන තත්ත්වයන් එක්ක ශ්‍රී ලංකා පොදුජන පෙරමුණ නියෝජනය කරන බහුතර මන්ත්‍රීවරු තවත් පක්ෂ ගණනාවක් මේ සඳහා එක්ව අනාගතවාදීව නව දේශපාලන ව්‍යාපාරයක් ආරම්භ කිරීම අරමුණින් සංධානගත වෙනවා.

ශ්‍රී ලංකා පොදුජන පෙරමුණේ බහුතරයක් මන්ත්‍රීවරු, පළාත් සභා මන්ත්‍රීවරු සහ පළාත් පාලන මන්ත්‍රීවරු ඉදිරියේදී ගන්නා දේශපාලන ස්ථාවරය පිළිබඳව කුකුසක් මේ රටේ ජනතාවට තිබුණා. ශ්‍රී ලංකා නිදහස් පක්ෂය සමඟ කටයුතු කළ බහුතරයක් පසුගිය කාලයේදී ශ්‍රී ලංකා පොදුජන පෙරමුණ සමඟ එක්ව කටයුතු කළා. ඔවුන් වාමවාදී මධ්‍යස්ථ මත දරණ පිරිසක්. ඒ සියළු දෙනා අනාගතයේදීත් එම මධ්‍යස්ථ දේශපාලන මතය දරමින් ශ්‍රී ලාංකික ජනතාවට සේවය කිරීමට කටයුතු කරනවා. ඒ සඳහා දේශපාලන වේදිකාවක අත්‍යවශ්‍යතාවයක් ඇතිවුණා. ඒ වේදිකාව නිර්මාණය කර ගැනීමේ අරමුණින් තමයි මේ පුළුල් සංධානය ගොඩනැගීමට තීරණය කළේ. ඉදිරි මැතිවරණවලදී එක කණ්ඩායමක් ලෙස සමාන අදහස් හා ප්‍රතිපත්ති ඒ කණ්ඩායම සමඟ එකතු වෙලා කටයුතු කිරීම අරමුණ වෙනවා.

ජනධිපතිවරණ මැතිවරණ සටන දැනටමත් ඇරඹිලා තිබෙන නිසා අපේ ඊළග ඉලක්කය අපිට මැතිවරණය සහ ස්ථාවර දේශපාලන පදනමක් දීර්ඝ වශයෙන් ගොඩනගා ගැනීමයි. සමාන මතයන් සහිත පිරිසක් එකට එකතු වෙලා ඉන්නවා. ඉදිරියේදී පොදුජන එක්සත් පෙරමුණේ කැමති අය අපි සමග එකතු වෙන්නත් පුළුවන්. මේ සන්ධානයේ සෑම කෙනෙක්ම වත්මන් ජනාධිපතිවරයාගේ ජයග්‍රහණයට කටයුතු කරන අය. මේක අනාගතවාදීන්ගෙන් සැදුම්ලත් කණ්ඩායමක්. අනාගත දේශපාලන ප්‍රවාහයන් නියෝජනය කරන කණ්ඩායමක්. යම් දේශපාලන පක්ෂවල ප්‍රජාතන්ත්‍රවාදය අවුල් සහගත වෙලා තියෙනවා. ඒ නිසා අපේ බලාපොරොත්තුව නූතන ජනවාදීන්ගෙන් යුක්ත ප්‍රජාතන්ත්‍රවාදී දේශපාලන ව්‍යූහයක් නිර්මාණය කිරීම.

පැවැත්වීමට නියමිත පලාත් පාලන මැතිවරණයේ පරණ නාමයෝජනා අවලංගු කිරීමට කැබිනට් තීන්දුවක් ගත්තා. ඒ තීන්දුවේ මූලික හරය තමයි මැතිවරණය පවත්වන වර්ෂයට පෙර වර්ෂයේ ඡන්ද නාමලේඛනය අනුව මැතිවරණය පැවැත්විය යුතුයි කියන කාරණය. වර්තමානයේ පවතින තත්ත්වය යටතේ පරණ නාමයෝජනා පැරණි ඡන්ද ලයිස්තුව යටතේ ඡන්ද පැවැත්වුවහොත් ලක්ෂ නවයකට ආසන්න පිරිසකට ඡන්ද අයිතිය අහිමි වෙනවා. ඡන්ද අයිතිය වගේම තරුණ ප්‍රජාවට මැතිවරණ තරග කිරීමත් අහිමි වෙනවා. ඒක මානව අයිතිවාසිකම් කඩකිරීමක් හා ප්‍රජාතන්ත්‍රවාදය උල්ලංඝණය කිරීමක්. මේ කාරණා සැලකිල්ලට ගෙන එම පණත සංශෝධනය කර එම මැතිවරණ නාමයෝජනා අවලංගු කිරීමට කැබිනට් අනුමැතිය හිමි වුනා. මේ සදහා කිසිදු නීතිමය බාධාවක් නෑ.”

අධිකරණ හා බන්ධනාගාර කටයුතු රාජ්‍ය අමාත්‍ය අනුරාධ ජයරත්න,

“රටේ පොදුජනතාවගේ අවශ්‍යතාවයක් හෙට දිනයේදී සම්පූර්ණ කරනවා. සියලු ජාතීන්ට එකට එකතුවෙලා මේ රටේ යුගය වෙනස් කිරීමට හැකි නව දේශපාලන බලවේගයක් ගොඩනැගීම තමයි හෙට සිදු කරන්නේ. වැඩිම පාර්ලිමේන්තු මන්ත්‍රීවරු පිරිසක් හා හිටපු පළාත් පාලන නියෝජිතයන් බහුතරය නියෝජනය කරන සංධානය මෙය වෙනවා.”

ආරක්ෂක රාජ්‍ය අමාත්‍ය ප්‍රමිත බණ්ඩාර තෙන්නකෝන්,

“මේ දේශපාලන රාමුවෙන් ඔබ්බට ඇවිල්ලා රට ඉල්ලන රට දිනවන ශක්තිමත් එකමුතුවක ආරම්භය හෙට දිනයේදී සනිටුහන් කරන්න බලාපොරොත්තු වෙනවා. අපි අලුත් පරම්පරාව නියෝජනය කරන දේශපාලඥයින් පිරිසක්. රටේ නව දේශපාලන සංස්කෘතියක් ඉල්ලනවා. ඒ සඳහා ලොකු අවස්ථාවක් තියෙනවා. දේශපාලන පක්ෂ ගණනාවක් සහ පාර්ලිමේන්තුව නියෝජනය කරන විශාලම පිරිස ඒ සමඟ සිටිනවා. රටේ ජනතාව ඉල්ලන මැද නියෝජනය කරන දේශපාලන වටපිටාවක් නිර්මාණය කිරීමේ වගකීමක් අපිට තිබෙනවා. ඒ වගකීම ඉටු කරන්න අපි හෙට දිනයේදී කටයුතු කරනවා

මෙරට විවිධ ප්‍රදේශවල සිටින මහා පරිමාණ ගල්කොරි ව්‍යාපාරිකයන් පිරිසක් එකතු වී මහනුවර තරු හෝටලයක ජාතික ජන බලවේගයේ විධායක සභික කේ.ඩී. ලාල්කාන්ත ඇතුළු නායකයන් කිහිප දෙනෙකු හමුවී සාකච්ඡාවක් පවත්වන අතරතුර ඔවුන්ට දිවා ආහාරය ලබාදීමට සැලසුම් කොට තිබියදී එය වැළැක්වීමට මහනුවර මැතිවරණ කාර්යාලයේ නිරීක්ෂණ නිලධාරීන් පිරිසක් කටයුතු කොට තිබේ.

මැතිවරණ නිරීක්ෂණ නිලධාරීන් එම ස්ථානයට කඩා පනින අවස්ථා වේදී මෙරට මහා පරිමාණ ගල්කොරි ව්‍යාපාරිකයන් 25 දෙනෙකු පමණ වීම ස්ථානයේ සිට ඇති අතර, මැතිවරණයක් ප්‍රකාශයට පත්කර තිබියදී මේ ආකාරයෙන් සංග්‍රහ පැවැත්වීම වරදක් බව ජාතික ජාතික ජන බලවේගයේ නියෝජිතයන්ට සහ හෝටල් කළමනාකාර්ශ්වයට දැනුම් දීමට මැතිවරණ නිරීක්ෂණ නිලධාරීන් පියවර ගෙන තිබේ.

පැමිණි පිරිසට දිවා ආහාරය බුෆේ ක්‍රමයට සූදානම් කොට තිබී ඇති අතර, හෝටලයේ නවාතැන් ගෙන සිටි පිරිස් සහ විදේශිකයන්ද විශාල ප්‍රමාණයක් ආහාර ලබා ගැනීමට සිටි බැවින් ආහාරවලට සිල් තැබීමට මැතිවරණ නිරීක්ෂණ නිලධාරීන් පියවර ගෙන නොතිබුණි.

රට ඉදිරියට ගෙන යා හැකි හොඳම කණ්ඩායම ආර්ථික අභියෝගය හමුවේ රට භාරගත් කණ්ඩායම බවත් සැප්තැම්බර් 21 වනදා ගැස් සිලින්ඩරය ඉදිරිපස කතිරය ගසා අසීරුවෙන් ගොඩනැගු රටේ ආර්ථිකය බේරා ගන්නා ලෙස තමා සියලු ජනතාවගෙන් ඉල්ලා සිටින බවත් ජනාධිපති රනිල් වික්‍රමසිංහ පැවසීය.

ජනාධිපති රනිල් වික්‍රමසිංහ මහතා මේ බව සඳහන් කර සිටියේ අද (04) පස්වරුවේ යාපහුවේ පැවති “පුළුවන් ශ්‍රී ලංකා” විජයග්‍රාහී ජන රැලිය අමතමිනි.

ඉදිරි ජනාධිපතිවරණයේ දී ජනාධිපති රනිල් වික්‍රමසිංහ මහතාගේ විජයග්‍රහණය තහවුරු කිරීම වෙනුවෙන් සංවිධානය කර තිබු මෙම ජන රැලියට අතිවිශාල ජනතාවක් එක්ව සිටියහ.

මෙහිදී එම ජනතාව මහත් හරසරින් යුතුව ජනාධිපතිවරයාව පිළිගනු ලැබූහ.

ජන රැලිය ඇමතු ජනාධිපති රනිල් වික්‍රමසිංහ වැඩිදුරටත් සඳහන් කළේ ආර්ථික අර්බුදයෙන් රට බේරගත්තේ මෙරට ගොවි ජනතාව මිස ජනාධිපතිවරණයට ඉදිරිපත්ව සිටින 38 දෙනා නොවන බවයි.

වයඹ ගොවි ජනතාව වෙනුවෙන් වයඹ ඇළ ව්‍යාපෘතියේ ඉතිරි කටයුතු ද කඩිනමින් නිම කරන බව ජනාධිපතිවරයා මෙහිදී පැවසීය.

ජන රැලිය ඇමතු ජනාධිපති රනිල් වික්‍රමසිංහ  වැඩිදුරටත් මෙසේද පැවසීය.

අද මෙම වේදිකාව සියලු දේශපාලන පක්ෂ නියෝජනය කරන වේදිකාවක් වී තිබෙනවා. මෙවන් වේදිකාවක් පිළිබඳ මා හෝ ඔබ කිසිදා සිතුවෙන් නැහැ. නමුත් මේ රටේ ජනතාව ජීවත් කරවීම වෙනුවෙන් අපට එකම වේදිකාවකට පැමිණීමට සිදු වුණා.

අද තැපැල් ඡන්දය ආරම්භ වුණා. ඒ පිළිබඳ සුබ ආරංචි තිබෙනවා. ඒ සමඟ මට ඡන්දය ලබාදුන් සියලු ජනතාවට මා ස්තුතිවන්ත වෙනවා. අද මෙවැනි මැතිවරණයක් පැවැත්වීමට හැකිවනු ඇතැයි මීට වසර දෙකකට පෙර කිසිවෙකු සිතුවේ නැහැ.

අපට මෙම මැතිවරණය පැවැත්වීමට හැකිවුණේ අප සියලුදෙනා එකට එක්ව මේ රටේ ආර්ථිකය ස්ථාවර කළ නිසයි. එදා මේ රටේ ආර්ථිකය කඩා වැටී තිබු අවස්ථාවේ හොඳ වී අස්වැන්නක් ලබා ගැනීම පිළිබද මගේ අවධානය යොමු වුණා. එහිදී ඇමරිකාවට සහ ලෝක බැංකුවට කථා කර පොහොර ලබාගෙන ගොවි ජනතාවට ලබා දුන්නා. ගොවි ජනතාව 2023 මහ කන්නයේ දී හොඳ අස්වැන්නක් ලබා දුන්නා. ඒ අනුව රටේ වී නිෂ්පාදනය ඉහළ යාමට පටන් ගත්තා. ඒ සමගම නැවත රටට සංචාරකයන් පැමිණීම ආරම්භ වුණා. මේ තුළින් තමයි අපි රටේ ආර්ථිකය ස්ථාවර මට්ටමකට ගෙන ආවේ. ඒ වෙනුවෙන් මම සියලු ගොවි ජනතාවට ස්තූතිවන්ත වෙනවා.

වයඹ ගොවි ජනතාව වෙනුවෙන් වයඹ ඇල ව්‍යාපෘතිය ක්‍රියාත්මක කිරීමට අවශ්‍ය මුදල් ලබාදීමට මම කටයුතු කරන බව ද මෙහිදී ප්‍රකාශ කරවා.

ආර්ථික අර්බුදය හමුවේ රට බේරුවේ ගොවි ජනතාවයි. ඒ හැර ජනාධිපතිවණයට ඉදිරිපත්ව සිටින 38 දෙනා නොවෙයි. ඔවුන් මේ රට ගොඩගන්න බැහැ කිව්වා. නමුත් අපි රටේ ආර්ථිකය ගොඩනගා දුන්නා. දැන් අප මෙම ආර්ථිකය ඉදිරියට ගෙන යා යුතුයි. අප ණය වී සිටි රටක්. බංකොළොත් වූ රටක්. පසුගිය වසර දෙකේ ජාත්‍යන්තර මූල්‍ය අරමුදල, ලෝක බැංකුව, ආසියානු සංවර්ධන බැංකුව සහ අපට ණය ලබා දී තිබු රටවල් 18ට කථා කර සහන ලබා ගනීමට අපට හැකි වුණා.

රටේ ආර්ථික ස්ථාවරභාවය ඇති කර අපට නැවත ණය ගෙවිය හැකි ශක්තිය ලබාගත් විට අපට ඉදිරියට යාම සඳහා දැන් එම රටවල් සහාය ලබා දෙනවා. ඔවුන්ගේ ආධාර නැත්නම් අප වැටෙනවා. ‍ ඒ නිසා අප මෙම ස්ථාවරත්වය ආරක්ෂාකරගෙන ඉදිරියට යා යුතුයි.

නායකයෝ පැන ගිය විට රට ගොඩගත්තේ අපේ කණ්ඩායමයි. ඒ නිසා රට ඉදිරියට ගෙන යා හැකි හොදම කණ්ඩායම අප සමග සිටින බව කිව යුතුයි. ඒ සමඟ එක්සත් ජාතික පාක්ෂිකයන්ටද කරුණක් පැවසිය යුතුයි.

තමන්ගේ සැබෑ උරුමය ආරක්ෂා කර ගනිමින් ඉදිරියට යාමට මෙවර ජනාධිපතිවරණයේ දී මා සමග එක්වලෙස මම කරුණෑගල පුරවරයේ සියලු එක්සත් ජාතික පාක්ෂිකයන්ගෙන් ඉල්ලා සිටිනවා. ජේ.ආර්. ජයවර්ධන මැතිතුමා 1977 රට භාරගෙන රටේ ආර්ථිකය ගොඩනැගුවා. පසුගිය වසර දෙක තුළ රට ගොඩනැගීමට මා ආරම්භ කළ වැඩපිළිවෙළ ඉදිරියට ගෙන යාමේ ජනවරම මෙවර ජනාධිපතිවරණයේ දී මා ඉල්ලා සිටිනවා.

අප පක්ෂයේ සිටි නායකයන් අතරින් ඩී.එස්. සේනානායක මැතිතුමා හැර අනෙක් සියලු නායකයන් මම දැන සිටියා. ඒ පක්ෂයේ වත්මන් නායකයා මමයි. සජිත් ප්‍රේමදාස දැන් එක්සත්ජාතික පක්ෂයේ නොවෙයි. ඔහුට අනුර කුමාරව පරද්දන්න බැහැ. අනුර කුමාර දිසානායකව නිර්මාණය කළේ සජිත් ප්‍රේමදාසයි. හැමදාම මේ රටේ තරගය තිබුණේ දෙදෙනෙකු අතරයි. ආණ්ඩුවේ සහ විපක්ෂයේ ලෙස දෙදෙනෙක් අතර තරගය පැවතුණා. ආණ්ඩුවේ කෙනා දැන ගන්න ඕන දෙවැනියෙකුට ඉඩ නොදෙන්න. ඒ වගේම අනෙක් පක්ෂ පාලනය කිරීමට විපක්ෂනායකයා දැන ගත යුතුයි. ජේ.ආර්. ජයවර්ධන මැතිතුමා විපක්ෂනායකවරයාව සිටියදී වෙන කාටවත් එන්න ඉඩ දුන්නේ නැහැ. එතුමා අගමැති වුණා. බණ්ඩාරනායක මැතිණිය විපක්ෂනායක වුණාම වෙන කාටවත් එන්න ඉඩ දුන්නේ නැහැ. එතුමිය විපක්ෂනායිකාව වුණා. සජිත් කළේ හැමදාම පාර්ලිමේන්තුවේ දොඩවන එකයි. ඒ නිසා 2%ක් තිබු අනුර කුමාර නැගිටලා ආවා. දැන් අනුර කුමාර සජිත්ට තර්ජනයක් වී තිබෙනවා. සජිත් දිනන්නේ නැහැ. සජිත්ට දෙන හැම ඡන්දයම අනුර කුමාරට සහායක් වෙනවා. ඒ නිසා සජිත්ට ඡන්දය දෙන්න එපා කියලා මම සියලු එක්සත්ජාතික පාක්ෂිකයන්ගෙන් ඉල්ලා සිටිනවා. ඔබ සැප්තැම්බර් 21 වනදා ගිහින් ගෑස් සිලින්ඩරය ළගින් කතිරය ගහන්න.

මුදල් රාජ්‍ය අමාත්‍ය ශෙහාන් සේමසිංහ

සැප්තැම්බර් 21 වෙනදා පැවැත්වෙන්නේ අප රටේ ඉතිහාසයේ තීරණාත්මක මැතිවරණයක්. මීට වසර දෙකකට පෙර බිඳ වැටී තිබූ රට නැවත ගොඩනැගුවේ ජනාධිපති රනිල් වික්‍රමසිංහ ප්‍රමුඛ රජය බව පැවසිය යුතුයි. එදා සිට මේ පැවති ගමන් මඟ ඉතා සුවිශේෂී එකක් බව කිව යුතුයි.

අද ඡන්දය ඉල්ලන සජිත් - අනුර එදා රට ගිනි තිබ්බා. නමුත් ඒ ගිනිදැල්ල නිවා දැමීමේ වගකීම රනිල් වික්‍රමසිංහ මැතිතුමා බාරගත්තා. මේ රටේ අනාගතය සහ ස්ථාවර රටක් බිහිවන්නේ රනිල් වික්‍රමසිංහ මහතා නැවත වරක් ජනාධිපති වුවහොත් පමණයි.

එදා බින්දුවෙන් පටන් ගත් මේ රටේ ආර්ථිකය ගොඩනැගීම ක්‍රමානුකූලව සිදුවුණා. ඒ නිසා අපි නැවතත් 2022 පැවති තත්ත්වයට යනවාද, ඉදිරියට යනවාද කියා ඔබ තීරණය කළ යුතුයි.

වත්මන් රජය මේ රටේ ගොවි ජනතාව අමතක කළේ නැහැ. මේ වසර ස්ථාවර ආර්ථිකයක් බවට රට පත් කිරීමට ගොවි ජනතාව සුවිශේෂි දායකත්වයක් ලබා දුන්නා. ඉදිරියේ පොහොර සහනාධාරය රුපියල් 25000 දක්වා වැඩි කිරීමට අවශ්‍ය පියවර ගෙන තිබෙනවා.

එනිසා ඊළඟ වසර පහ මේ රටට තීරණාත්මකයි. රනිල් වික්‍රමසිංහ මැතිතුමාගේ වැඩසටහන වන්නේ රටේ සමස්ත ජනතාවගේ ජීවන බර අඩු කිරීමටයි. මේ වැඩසටහන ඉදිරියට යනතෙක් මේ රට නැවත වැටෙන්නේ නැහැ.

ජනතා විමුක්ති පෙරමුණ නැවතත් 88 - 89 යුගයක් ක්‍රියාත්මක කරමින් සිටිනවා. ගෙයින් ගෙට ගොස් ජනතාව බිය ගන්වමින් සිටිනවා. නමුත් ඒ කිසිදු බිය ගැන්වීමකට යටත් නොවී ජනතාව රනිල් වික්‍රමසිංහ  ඉදිරියේ ඡන්දය භාවිතා කරන බව පැවසිය යුතුයි.

රාජ්‍ය අමාත්‍ය ඩී. බී. හේරත්

අපේ දේශපාලන භූමිකාව තුළ රාජ්‍ය නායකයන් තිදෙනෙක් බලයට පත් කරන්න සහාය ලබා දුන්නා. අද නැවත වරක් මේ රට බේරාගත් ජනාධිපති රනිල් වික්‍රමසිංහ මහතා වටා අප එකතු වී සිටිනවා.

එදා අන්තවාදී දේශපාලන කඳවුරු රට ගිනි තිබ්බා. එක් මන්ත්‍රීවරයෙක් ඝාතනය කලා. මැති ඇමතිවරුන්ගේ නිවාස ගිනි තිබ්බා. එපමණක් නොව ජනාධිපති රනිල් වික්‍රමසිංහගේ නිවස පවා ගින තිබ්බා.

එතුමා මේ රටේ අනාගතය භාරගෙන රටට නැවත වරක් හුස්ම ගැනීමට අවස්ථාව උදාකර දුන්නා. එදා මේ රටට සංචාරකයන් ආවේ නැහැ. අද ලෝකයේ හොඳම ගමනාන්ත පහ අතරට ශ්‍රී ලංකාව පත්ව තිබෙනවා.

ඒ වගේම ජනාධිපති රනිල් වික්‍රමසිංහ මේ රට නිවැරදි ස්ථානයකට ගෙනාවා. අප පක්ෂ පාට භේදයෙන් තොරව රටේ දරුවන්ගේ අනාගතය වෙනුවෙන් සියලු දෙනා එකට එකතු වෙමු.

රාජ්‍ය අමාත්‍ය ශාන්ත බණ්ඩාර

අද සජිත් ප්‍රේමදාස මහතා දේශපාලන වේදිකාවල බොරු පොරොන්දු දෙමින් සිටිනවා. නමුත් එතුමා අරගල භූමියේදී දුවපු දිවිල්ල මතකද? එදා මේ රට ගිනිගන්න වෙලාවේ අග්‍රාමාත්‍ය ධුරය බාරගන්න කොන්දේසි දැම්මා. නමුත් රනිල් වික්‍රමසිංහ මහතා කොන්දේසි විරහිතව රට ගොඩනැගීමේ අභියෝගය භාරගත්තා
.
අද මෙරට සිටින්නේ කඳවුරු දෙකයි. එකක් පුළුවන් කියන කඳවුර. අනෙක් කඳවුර බෑ බෑ කියන කඳවුරයි. අද මේ වේදිකාව ඉදිරියේ සිටින්නේ පුළුවන් කියන කණ්ඩායමයි.මේ කඳවුරට ‘පුළුවන්’ කියලා ගත වූ අවුරුදු දෙක තුළ ජනාධිපතිතුමා ක්‍රියාවෙන් ඔප්පු කර තිබෙනවා.
ජනතා විමුක්ති පෙරමුණ බොරු කියමින් අද ජනතාව මුලා කරනවා. උමාඔය හිලක් බව කියමින් එම ව්‍යාපෘතිය අවසන් කරන්න දුන්නේ නැහැ. අද ඔවුන්ට කියන්න දේවල් නැහැ. එදා අරගලේදී ඒ අන්තවාදී දේශපාලන ක්‍රියාකාරීන් 88 -89 අපට නැවත වරක් මතක් කර දුන්නා. ගෙවල් ගිණි තිබ්බා. අපේ මන්ත්‍රීවරුයෙක් මහමඟ මරා දැමුවා රට මහා විනාශයට ගෙන ගියා.
අප රට ඉදිරියේ තිබෙන අනතුර හඳුනාගත යුතුයි. ඒ අනතුරින් රට බේරාගත යුතුව තිබෙනවා. එම නිසා ලබන 21 වැනිදා ගෑස් ටැංකිය ඉදිරියේ ඡන්දය භාවිතා කර මේ රට බේරා ගනිමු.

පාර්ලිමේන්තු මන්ත්‍රී අනුර ප්‍රියදර්ශන යාපා

එදා අරගලය වෙලාවේ ජනාධිපති ඉල්ලා අස්වුණා. නමුත් රනිල් වික්‍රමසිංහ  ආත්මවිශ්වාසයකින් යුතුව මේ රට භාරගත්තා. ඒ නිසා තමයි අප කණ්ඩායමක් විදියට පක්ෂ පැත්තකින් තබා එතුමාට සහාය ලබා දෙන්නේ.

අද වන විට බංග්ලාදේශ රජයට රාජ්‍ය සේවකයන්ගේ වැටුප් ගෙවා ගන්න විදිහක් නෑ. රනිල් වික්‍රමසිංහ මහතා රට භාර නොගත්තා නම් අපේ රටත් ඒ තැනට තල්ලු වෙනවා. නමුත් එතුමා මේ රට සහ ජනතාව ආරක්ෂා කළා.

පෝලිම් යුගයක සිටි ජනතාවට ඉන්ධන, ගෑස්, පොහොර ඇතුළු අත්‍යවශ්‍ය භාණ්ඩ අඛන්ඩව ලබාදීමට ජනාධිපති රනිල් වික්‍රමසිංහ මහතා පියවර ගත්තා. එනිසා අප සියලු දෙනා එළඹෙන 21 වැනිදා එතුමා වෙනුවෙන් කෘතගුණ සලකමු.

ශ්‍රී ලංකා මහජන පක්ෂයේ නායක, පාර්ලිමේන්තු මන්ත්‍රී අසංක නවරත්න

රනිල් වික්‍රමසිංහ මහතා එදා රට කඩාවැටී තිබූ අවස්ථාවේ රට ගොඩනැගීමේ වගකීම බාරගෙන සිය රාජකාරිය නිසි පරිදි ඉටු කළ නායකයෙක්. රනිල් වික්‍රමසිංහ මහතා රට ගොඩනගන වැඩසටහනට එදා විපක්ෂය කිසිදු සහායක් ලබාදුන්නේ නැහැ. ඒ වෙනුවට ඔවුන් කලේ උද්ඝෝෂණ, වැඩවර්ජන පමණයි. ඔවුන් රජය ගෙනයන වැඩපිළිවෙළ කඩාකප්පල් කිරීමට උත්සාහ ගත්තා.

රට නැවත යථා තත්ත්වයට පත් කළ ජනාධිපති රනිල් වික්‍රමසිංහ මහතා සමග පක්ෂ බේදයකින් තොරව අද එකතු වී සිටිනවා. මේ රට නැවත වැටෙන්න දෙන්න බැහැ. ශ්‍රී ලංකාව ලෝකය ඉදිරියේ බබලවන්න අවශ්‍යයි.

එනිසා මේ දින කිහිපය තුළ ගමින් ගමට ගොස් අපේ මතය ප්‍රකාශ කරන්න. ඉදිරි ජනාධිපතිවරණය පක්ෂයක්, පුද්ගලයෙක් දිනවන මැතිවරණයක් නෙමෙයි. එනිසා රට දිනවන සටන ජයග්‍රහණය කිරීමට සියලු දෙනා කැපවීමෙන් කටයුතු කළ යුතුයි. ඒ සටන අපට ජයගන්න බැරි වුනොත් සැප්තැම්බර් 21 දිනෙන් පසු නැවත මේ රට පෝලිම් යුගයකට තල්ලු වීම වැළැක්විය නොහැකියි.

එක්සත් ජාතික පක්ෂයේ උප නායක අකිල විරාජ් කාරියවසම්

අද මේ රටේ සිටින්නේ කණ්ඩායම් දෙකයි. එකක් මේ රට ගොඩනැගීමට සහය දෙන කණ්ඩායම සහ රට ඇදවැට්ටවීමට කටයුතු කරන කණ්ඩායමයි.

එනිසා මේ රට ගොඩනැගූ ජනාධිපති රනිල් වික්‍රමසිංහ මහතාට සහාය ලබාදිය යුතුයි. එසේ නොමැති නම් නැවතත් පරණ යුගය ඇති කරන කණ්ඩායම් වලට සහය දෙනවාද?
අද ඇතැමුන් සමාජ වෙබ් අඩවිවලින් දිනල ඉවරයි. නමුත් ලබන 21 වෙනදා මේ රටේ නියත වශයෙන්ම ජයග්‍රහණය කරන්නේ රනිල් වික්‍රමසිංහ  බව පැවසිය යුතුයි.

එදා යුද්ධය අවසන් කළ මහින්ද රාජපක්ෂ මහතාට මේ රටේ ජනතාව කෘතගුණ සැලකුවා. ඒ වගේම මීට වසර දෙකකට පෙර මෙරට භාරගෙන රට ගොඩනැගූ රනිල් වික්‍රමසිංහ මැතිතුමාට අප කෘතගුණ දැක්විය යුතුයි.

මහා සංඝරත්නය, පාර්ලිමේන්තු මන්ත්‍රී මංජුලා දිසානායක, හිටපු නියෝජ්‍යා අමාත්‍ය සාරානාත් බස්නායක, හිටපු අමාත්‍ය එස්. බී. නාවින්න, හිටපු පාර්ලිමේන්තු මන්ත්‍රී අමරා පියසීලි රත්නායක, යාපහුව එක්සත් ජාතික පක්ෂ සංවිධායක අරුණ අඹහැර, කුරුණෑගල ශ්‍රී ලංකා නිදහස් පක්ෂ සංවිධායක ලක්ෂ්මන් වෙඩරුව යන මහත්ම මහත්මීන්, ප්‍රාදේශීය දේශපාලන නායකයන්, ආසන සංවිධායකවරුන් ඇතුළු විශාලි පිරිසක් මෙම අවස්ථාවට එක්ව සිටියහ.

රාජ්‍ය සේවයේ වැටුප් වැඩි කිරීම සඳහා ජනාධිපති රනිල් වික්‍රමසිංහ  විසින් ඉදිරිපත් කර තිබෙන යෝජනාව ඡන්ද පොරොන්දු ඇතුළත් හුදු ලියවිල්ලක් නොවන බවත් ඊට මහා භාණ්ඩාගාරයේ මෙන්ම අමාත්‍ය මණ්ඩලයේද අනුමැතිය ලබා දී ඇති බැවින් එම ප්‍රතිලාභය ලැබීමට තවත් තිබෙන්නේ ජනවාරි 01 වෙනිදා උදා වීම පමණක් බවත් මුදල් රාජ්‍ය අමාත්‍ය රංජිත් සියඹලාපිටිය  පැවසීය.

ආර්ථික අර්බුදය උග්‍ර වූ අවස්ථාවේ රාජ්‍ය සේවකයන්ගේ වැටුප් කප්පාදු කිරීමට යෝජනා ඉදිරිපත් වූ නමුත් රාජ්‍ය සේවක වැටුප නිශ්චිත බැවින් එය කිසි සේත් කප්පාදු නොකළ යුතු බව පවසමින් ජනාධිපති රනිල් වික්‍රමසිංහ මහතා එම යෝජනාව දැඩිව ප්‍රතික්ෂේප කළ බවත්ඔහු සඳහන් කළේය.

මුදල් රාජ්‍ය අමාත්‍ය රංජිත් සියඹලාපිටිය  මේ බව සඳහන් කර සිටියේ කොළඹ මල්පාරේ පිහිටි රනිල් වික්‍රමසිංහගේ දේශපාලන කාර්යාලයේ අද (04) පැවැති මාධ්‍ය හමුවේදීය.

විරුද්ධ පාර්ශ්ව කුමන චෝදනා එල්ල කළත් ආර්ථික වශයෙන් දුෂ්කරම අවස්ථාවේ පවා ජනාධිපති රනිල් වික්‍රමසිංහ  රාජ්‍ය සේවකයන්ට රුපියල් දස දහසක් ලබා දෙමින් සහනයක් සැලසීමට කටයුතු කළ බව ද රාජ්‍ය අමාත්‍යවරයා පෙන්වා දුන්නේය.

මෙහිදි වැඩිදුරටත් අදහස් දැක්වූ මුදල් රාජ්‍ය අමාත්‍ය රංජිත් සියඹලාපිටිය මෙසේද පැවසීය

මේ රට ආර්ථික ආර්බුදයකට මුහුණ දුන් 2022 වසර වන විට රාජ්‍ය සේවකයින් දහතුන් ලක්ෂ අසූ දහසක් සිටියා. එම සංඛ්‍යාව සඳහා වැටුප් බිල රුපියල් බිලියන 95ක් වුණා. ජනාධිපති රනිල් වික්‍රමසිංහ මහතා මුදල් අමාත්‍යවරයා ලෙස පත් වන විට රාජ්‍ය සේවකයින්ට වැටුප් ගෙවා ගැනීමට නොහැකි තත්ත්වයක් පැවතුණා. ඒ අනුව එම ගැටළුව විසඳා ගැනීමට යෝජනා ගණනාවක් ඉදිරිපත් වී තිබුණා.

ඉන් එක් යෝජනාවක් වන්නේ රාජ්‍ය සේවකයින්ගේ වැටුප් කපා හැරීමයි. නමුත් ජනාධිපතිතුමා එය දැඩි සේ ප්‍රතික්ෂේප කරනු ලැබුවා. ඉන්පසු දෙවතාවකට වැටුප් ගෙවීම් සිදු කරමින් මාස දෙක තුනක් තත්ත්වය කළමණාකරණය කර ගනු ලැබුවා. ඒ අනුව නියමිත දිනයේදී සාමාන්‍ය සේවකයින්ටත්, ඊළඟ සතියේ විධායක ශ්‍රේණියටත් වැටුප් ගෙවනු ලැබුවා. එවන් කාලයක් පසු කළ බව අද ඇතැමුන්ට අමතකයි.

2023 වසරේදී ජනාධිපති රනිල් වික්‍රමසිංහ මහතා මහා භාණ්ඩාගාරය සමඟ කළ සාකච්ඡාවේදීත් රාජ්‍ය සේවකයින්ට වැටුප් වැඩි විය යුතු බවට සඳහන් කළා. නමුත් ඒ අවස්ථාවේ සුබවාදී පිළිතුරක් ලබා දීමට හැකියාවක් මහා භාණ්ඩාගාරයට තිබුණේ නැහැ. නමුත් මෙවන් ආර්ථික අර්බුදයක් හමුවේ පීඩාවට පත්වන පිරිස අතර ප්‍රධානතම කණ්ඩායම නිශ්චිත ආදායමක් ලබන රාජ්‍ය සේවකයින් බව ජනාධිපතිතුමා ‍නිතරම පෙන්වා දුන්නා. ඒ අනුව ලැබුණ පළවෙනි අවස්ථාවේදීම රාජ්‍ය සේවකයින් ගේ වැටුප් රුපියල් දස දහසකින් වැඩි කිරීමට ජනාධිපති රනිල් වික්‍රමසිංහ මහතා පියවර ගත්තා. එමඟින් මහා භාණ්ඩාගාරයේ මාසික වැය බර රුපියල් බිලියන 12කට වැඩි ප්‍රමාණයකින් ඉහළ ගියා. නමුත් ජනාධිපතිතුමාගේ අදහස වුණේ එම වැටුප් වැඩි වීමද ප්‍රමාණවත් නොවන බවයි.

ඒ වගේම රාජ්‍ය සේවයේ වැටුප් විෂමතාවය, විශ්‍රාම වැටුප් විෂමතාව වගේම ඵලදායීතාව ඉහළ නැංවීම යන කරුණු රාජ්‍ය සේවයේ පවතින කඩිනම් විසඳුම් ලබා දිය යුතු ප්‍රශ්න ලෙස හඳුනා ගෙන තිබුණා. ඒ අනුව මෙම ගැටළු පිළිබඳ සොයා බලා ඒවා විසඳීමට නිර්දේශ ඉදිරිපත් කිරීම සඳහා ජනාධිපති රනිල් වික්‍රමසිංහ මහතා විසින් උදය ආර්. සෙනවිරත්න මහතාගේ ප්‍රධානත්වයෙන් කමිටුවක් පත් කරනු ලැබුවා.

එම කමිටුවේ සෙසු සාමාජිකයන් ලෙස ජාතික අයවැය දෙපාර්තමේන්තුවේ අධ්‍යක්ෂ ජනරාල් ජූඩ් නිලුක්ෂාන්, කළමනාකරණ සේවා දෙපාර්තමේන්තුවේ අධ්‍යක්ෂ ජනරාල් හිරන්සා කලුතන්ත්‍රි, ඒකාබද්ධ සේවා අධ්‍යක්ෂ ජනරාල් එස්. ආලෝක බණ්ඩාර, ආයතන අධ්‍යක්ෂ ජනරාල් එච්.ඒ. චන්දන කුමාරසිංහ, සෞඛ්‍ය අමාත්‍යාංශයේ විශ්‍රාමික නියෝජ්‍ය අධ්‍යක්ෂ ජනරාල්, වෛද්‍ය ටෙරන්ස් ගාමිණී ද සිල්වා, ලංකා වාණිජ මණ්ඩලයේ සභාපති දුමින්ද හුලංගමුව, BCS International Technology PTY LTD හි ප්‍රධාන මහජන නිලධාරි චන්දි එච්. ධර්මරත්න, කොමර්ෂල් බැංකුවේ නියෝජ්‍ය සාමාන්‍යාධිකාරී (මානව සම්පත්) ඉසුරු තිලකවර්ධන, ජනාධිපති අතිරේක ලේකම් ජී.එල්. වර්ණන් පෙරේරා යන මහත්ම මහත්මීන් කටයුතු කරනු ලැබුවා. ඒ වගේම මෙම සාමාජියන් 10 දෙනාගෙන් තුන් දෙනෙක්ම පෞද්ගලික අංශය නියෝජනය කිරීමද විශේෂත්වයක් වන බව පෙන්වා දිය යුතුයි.

මෙම කමිටුව විසින් ලබා දුන් අතුරු වාර්තාවේ නිර්දේශ ජනාධිපති රනිල් වික්‍රමසිංහ මහතා විසින් කැබිනට් මණ්ඩලය වෙත ඉදිරිපත් කරනු ලැබුවා. එහිදී නිර්දේශ 18ක් අමාත්‍ය මණ්ඩලය විසින් අනුමත කළා. රාජ්‍ය සේවයට සෘජුව බලපාන වැදගත් නි‍ර්දේශ රැසක් ඊට ඇතුළත් වුණා.

ඒ අනුව 2025 පාදක වර්ෂය ලෙස සළකා රාජ්‍ය සේවයේ ජීවන වියදම් දීමනාව රුපියල් විසි පන්දහස දක්වා වැඩි කිරීම, අවම ආරම්භක මාසික වැටුප 24% සිට 50% දක්වා වැඩි කිරීමත්, ඒ මත ඔවුන්ගේ අවම වැටුප රුපියල් පනස් පන් දහස දක්වා වැඩි කිරීමත් මෙහි ප්‍රධාන නිර්දේශ වුණා. ඒ වගේම මෙම වැඩි වීම ව්‍යාපාරික රාජ්‍ය සමාගම් සහ බැංකු හැර අන් සියළු රාජ්‍ය ආයතන සඳහා ක්‍රියාත්ම කිරීමද, රාජ්‍ය අංශයේ සියලු සේවකයින් හා විශ්‍රාමිකයින් ඇතුළත්ව මාසිකව රුපියල් දහසක මාසික දායකත්වයක් සහිත පූර්ණ වෛද්‍ය රක්ෂණ යෝජනා ක්‍රමයක් ක්‍රියාත්මක කිරීමටද නිර්දේශ කර තිබුණා. එසේම 2020 වසරට පෙර විශ්‍රාම ලැබූ රාජ්‍ය නිලධාරීන්හට හිමිකම් ලැබූ වැටුප් වර්ධක ලබා දී විශ්‍රාම වැටුප් සංශෝධනය කිරීමද නිර්දේශවල ඇතුළත් වෙනවා. මේ සියළු නිර්දේශ 2025 වර්ෂයේ අයවැය ලේඛනයට ඇතුළත් වෙනවා.

මෙය රජය සහතික වූ වැඩපිළිවෙළක් මිස නිකන් ලියවිල්ලක් නොවෙයි. මෙම ප්‍රතිලාභ ලැබීමට නම් තවත් තිබෙන්නේ 2025 වසරේ ජනවාරි 01 වෙනිදා වීම පමණයි. ඒ වගේම මෙය මෙරට රාජ්‍ය සේවකයින්ට කාලයකට පසු ලැබුණු විශාල ප්‍රතිලාභයක් බව කිව යුතුයි. මෙය මැතිවරණය ඉලක්ක කර සිදු කළ දෙයක් බවට කෙනෙක් මෙය ලඝු කරනවා නම් එය පදනම් විරහිත බව කිව යුතුයි. ඒ වගේම ඉතා අසීරු කාලයක් තුළ පවා රුපියල් දස දහසක් ලබා දී අපි රාජ්‍ය සේවයකයන්ට සළකන බවට සංඥාවක් ලබා දුන් රජයක් බවද විශේෂයෙන් සඳහන් කළ යුතුයි.

මේ අතර අප විසින් රාජ්‍ය සේවකයන් වෙනුවෙන් ලබා දෙන අවම වැටුප වන රුපියල් පනස් පන් දහස වෙනුවට රුපියල් පනස් හත් දහසක් ලබා දෙන බව සමගි ජනබලවේගය පක්ෂය ප්‍රකාශ කරනවා. ඒක නම් සාමාන්‍ය දේශපාලනික කතාවක් බව කිව හැකියි. ජාතික ජන බලවේගය පක්ෂයේ ප්‍රතිපත්ති ප්‍රකාශයේ සඳහන්ව නැතත් මාස 6කට වරක් ජීවන වියදම අනුව ජීවන වියදම් දීමනාව වැඩි කරන බව කිහිප තැනකම ප්‍රකාශ කරනවා දැක්කා. ඒ අනුව සෑම මාස 6කට වරක්ම ඔවුන් අයවැයක් ඉදිරිපත් කළ යුතු වෙනවා. එසේත් නැත්නම් විසර්ජන පනත වෙනස් කළ යුතුයි. නමුත් වැදගත්ම දේ අපි රුපියල් 10,000 ක් වැඩි කරන විට ඔවුන් කිව්වා රුපියල් 20,000ක් ලබා දෙනවා කියලා. ඒ ගැන දැන් කිසිම කතාවක් නැහැ.

රජ්‍ය සේවකයාට මෙම ප්‍රතිලාභ ලැබෙන අතරම රාජ්‍ය සේවයේ කාර්යක්ෂමතාව වැඩි කිරීම, බඳවා ගැනීමේ ක්‍රමවේදය වඩාත් ක්‍රමාණුකූලව සිදු කිරීම පිළිබඳවත් අප අවධානය යොමු කර තිබෙනවා. එය අගෝස්තු මාසයේ 12 වෙනිදා කැබිනට් මණ්ඩලය අනුමත කර, විධායකය අනුමත කළ වැඩපිළිවෙළක් බවට පත් කර තිබෙනවා. මේ ගැන අධ්‍යයනය කර කටයුතු කිරීමට රාජ්‍ය සේවකයාට හැකියාව තිබෙනවා.

එළැඹෙන ජනාධිපතිවරණයට අදාළ තැපැල් ඡන්ද විමසීම අද ආරම්භ වූ බවත් ඒ සම්බන්ධව සුබ ආරංචි ලැබෙමින් තිබෙන බවත් සඳහන් කළ ජනාධිපති රනිල් වික්‍රමසිංහ  රජයේ රට ගොඩනගන වැඩපිළිවෙළ වෙනුවෙන් තැපැල් ඡන්දය භාවිතා කළ සියලු රාජ්‍ය සේවකයන්ට තම ස්තූතිය පිරිනමන බව පැවසීය.

සජිත් ප්‍රේමදාසට මෙවර ජනාධිපතිවරණය ජයග්‍රහණය කළ නොහැකි බවත්, ඔහු කරන මෝඩ වැඩවලින් සිදු වන්නේ අනුරට සහාය ලැබීම බවත් පෙන්වා දුන් ජනාධිපතිවරයා රට රැක ගැනීමේ එක්සත් ජාතික පක්ෂයේ වගකීම ඉටු කරමින් රට වෙනුවෙන් එකට වැඩ කිරීමට එක්වන ලෙස සියලු එක්සත් ජාතික පාක්ෂිකයන්ට ආරාධනා කරන බවද සඳහන් කළේය.

ජනාධිපති රනිල් වික්‍රමසිංහ  මේ බව සඳහන් කර සිටියේ මහියංගනය මහජන ක්‍රීඩාංගනයේදී අද (04) පැවති " පුළුවන් ශ්‍රී ලංකා" විජයග්‍රාහී ජන රැලිය අමතමිනි.

එළැඹෙන ජනාධිපතිවරණයේ දී ජනාධිපති රනිල් වික්‍රමසිංහගේ විජයග්‍රහණය තහවුරු කිරීම වෙනුවෙන් සංවිධානය කර තිබු මෙම ජන රැලියට අතිවිශාල ජනතාවක් එක්ව සිටි අතර එම ජනතාව මහත් හරසරින් යුතුව ජනාධිපතිවරයාව පිළිගත්හ.

මෙහිදී අදහස් දැක්වු ජනාධිපති රනිල් වික්‍රමසිංහ  වැඩිදුරටත් සඳහන් කළේ පක්ෂ වශයෙන් බෙදී වෙන් නොවී ස්වාධීන අපේක්ෂකයෙකු ලෙස තමා මෙවර ජනාධිපතිවරණයට ඉදිරිපත් වුණේ රට තුළ ආරම්භ කළ වැඩපිළිවෙළ සාර්ථකව ඉදිරියට ගෙන යමින් රටේ ජනතාවට එදාට වඩා හොඳ අනාගතයක් උදා කර දීම වෙනුවෙන් බවයි.

ජන රැලිය ඇමතු ජනාධිපති රනිල් වික්‍රමසිංහ වැඩිදුරටත් මෙසේද පැවසීය

අද තැපැල් ඡන්දය ආරම්භ වුණා. සුභ ආරංචි ලැබී තිබෙනවා. මා වෙනුවෙන් ඡන්දය ලබා දුන් සියලුදෙනාට මම ස්තුතිවන්ත වෙනවා. වසර දෙකකට පෙර මේ ආකාරයට ඡන්දයක් පැවැත්වීමට හැකි වනු ඇතැයි කිසිවෙකු සිතුවේ නැහැ.

එදා මේ රටේ තිබු අවුල්සහගත තත්ත්වය මා අමුතුවෙන් සිහිපත් කළ යුතු නැහැ. ඉන්ධන, ගෑස් හා ඖෂධ පොලිම් තිබුණා. රට පුරා ප්‍රචණ්ඩත්වය වපුරා තිබුණා. ආර්ථික අසීරුතා හමුවේ ජනතාව මහත් පීඩාවට පත්ව සිටියා.

මෙවන් තත්ත්වයක් හමුවේ මැතිවරණයක් පැවැත්වීමට හැකිවනු ඇතැයි කවුරුවත් සිතුවේ නැහැ. නමුත් මම සෑම විටම මෙම මැතිවරණය පැවැත්විය යුතු බව සිතුවා. ඒ වගේම මෙම මැතිවරණය පැවැත්විය යුතු බව මා සමඟ සිටි කණ්ඩායම ද සිතුවා. ඒ අනුව මැතිවරණයක් පැවැත්විය හැකි පසුබිමක් සකසා පුළුවන් ශ්‍රී ලංකා තේමාව යටතේ අපේ වැඩකටයුතු ආරම්භ කළා.

අද අප ජනතාව ඉදිරියට පැමිණ තිබෙන්නේ රටේ ආර්ථික ස්ථාවරභාවයක් ඇතිකරලයි. දැන් රටේ ගෑස්,ඉන්ධන, ඖෂධ තිබෙනවා. ඒ වගේම භාණ්ඩ මිල අඩු වෙලා තිබෙනවා. භාණ්ඩවල හිඟයක් නැහැ. ඒ පිළිබඳ අපට සැහීමකට පත්වීමට හැකියාව ලැබී තිබෙනවා.

අප මෙම ආර්ථික ස්ථාවරත්වය ස්ථීර කර ගනිමින් රටේ නව අර්ථික ක්‍රමවේදයක් ඇති කළයුතුයි. අප ජාත්‍යන්තර මූල්‍ය අරමුදල, ලෝක බැංකුව, ආසියානු සංවර්ධන බැංකුව සහ අපට ණය ලබාදුන් රටවල් 18ක් සමඟ සාකච්ඡා කර එම වැඩසටහන මේ වන විට සකස් කර තිබෙනවා. මෙම වැඩපිළිවෙළ ඉදිරියට ගෙන යනවද නැද්ද කියා මෙවර ජනාධිපතිවරණයේ දී ජනතාව තීරණ කළ යුතුයි.

මේ රටේ ජනතාව විඳි දුක ගැන මට අවබෝධයක් තිබෙනවා. අප බඩු මිල අඩු කර ජනතාවට සහන ලබා දුන්නා. නමුත් තවදුරටත් ජිවන බර සැහැල්ලු කළයුතුයි. එම කටයුතු ඉදිරියට ගෙන යාමේ ජනවරම මෙවර මා ඉල්ලා සිටිනවා.

පක්ෂ වශයෙන් බෙදී වෙන් නොවී ස්වාධීන අපේක්ෂකයෙකු ලෙස මා මෙවර ජනාධිපතිවරණයට ඉදිරිපත් වුණේ මේ රටේ ආරම්භ කළ වැඩපිළිවෙළ සාර්ථකව අවසන් කර රටේ ජනතාවට එදාට වඩා හොඳ අනාගතයක් උදා කර දීම වෙනුවෙන් බව කිවයුතුයි.

ජනතාවගේ ජීවන බර සහ බදු බර තවදුරටත් සැහැල්ලු කළ යුතු බව අප විශ්වාස කරනවා නමුත් මෙය එකවර සිදු කළ නොහැකියි. කැඩුණු ආර්ථිකය පියවරෙන් පියවර ඉදිරියට ගෙන යා යුතුයි. ඒ සඳහා ජාත්‍යන්තර සහාය ලබාගත යුතුයි. ඒ වෙනුවෙන් අනාගත වැඩසටහන අප “පුළුවන් ශ්‍රී ලංකා” වැඩපිළිවෙළ තුළින් ඉදිරිපත් කර තිබෙනවා.

කෘෂිකර්ම නවීකරණ වැඩසටහන හරහා මේ රටේ ගොවි ජනතාව නගා සිටුවීමේ වැඩපිළිවෙළ අප ආරම්භ කර තිබෙනවා. නමුත් සජබෙ සහ මාලිමාවෙන් පොරොන්දු වී තිබෙන්නේ ආහාර සුරක්ෂිතභාවය වැඩි කරනවා කියලයි. අප එම වැඩපිළිවෙළ මේ වන විට ආරම්භ කර තිබෙනවා. ඔවුන් සහනාධාර දෙන්නේ දුප්පත්කම පවත්වාගෙන යාම සඳහායි. නමුත් මම සහනාධාර ලබා දෙන්නේ දුප්පත්කම නැති කර ගොවි ජනතාව පොහොසත් කර රට අපනයන කෘෂිකර්මාන්තයට යොමු කිරීම සඳහායි. ඒ නිසා රටට අවශ්‍ය වෙනස කරන්නේ අපියි.
ඕස්ටේ්‍රලියාව, නවසිලන්තයේ වගේ අපේ ගොවි ජනතතාව අපනයන ආර්ථිකයකට යොමු කර අපේ අහාර පිට රට යවා විදේශ විනිමය උපයා ගමු. අනෙක් අපේක්ෂකයන් රට ගැන හිතන්නේ නැහැ. ඔවුන් තවමත් කටයුතු කරන්නේ පැරණි දේශපාලනය අනුවයි. නමුත් අප අලුතින් සිතා ඉදිරියට යනවා. ඒ නිසා මෙම ගමන යාමට අප සමග එක්වන ලෙස මම සියලු ජනතාවට ආරාධනා කරනවා.

සජිත් ප්‍රේමදාසට කිසි දිනක අනුර කුමාර දිසානායකව පරාජය කරන්න බැහැ. හැමදාම මේ රටේ තරගය තිබුණේ දෙදෙනෙකු අතරයි. ආණ්ඩුවේ සහ විපක්ෂයේ ලෙස දෙදෙනෙක් අතර තරගය පැවතුණා. අතීතයේ අගමැතිවරයා වීමටත් දැන් ජනාධිපතිවරයා වීමටත් එම තරගය පැවැත්වෙනවා. අගමැතිවරයා තමන්ගේ පක්ෂය බලා ගන්නවා. විපක්ෂ නායකයා තමන් හැර වෙන අයෙක් අපේක්ෂකයා නොවිය යුතුයි යන්න පිළිබඳ බලාගත යුතුයි.

මම විපක්ෂනායකයාව සිටියදී ඒ සඳහා ඉඩක් ලබා දුන්නේ නැහැ. ඒ වගේම මහින්ද රාජපක්ෂ  ඉඩ ලබා දුන්නෙත් නැහැ. අපි යහපාලන ආණ්ඩුව සමඟ එක් වුණා. සජිත් ප්‍රේමදාසයත් සිදු කළයුතුව තිබුණේ එයයි. හැමදාමත් පාර්ලිමේන්තුවේ පැය දෙක, තුන කථා කරලා කාලය නාස්ති කරපු සජිත්ට දැන් අනුර දිසානායක තර්ජනයක් වෙලා. සජිත්ට අනුර දිසානායකව පරද්දන්න බැහැ. සජිත් ඔය කරන මෝඩ වැඩවලින් අනුර දිසානායකට සහාය ලැබෙනවා. ඒ නිසා සැබෑ එක්සත් ජාතික පක්ෂයේ වගකීම ඉටු කරමින් අප සියලුදෙනා රට වෙනුවෙන් එකට වැඩ කරමු කියා මම එක්සත් ජාතික පක්ෂයේ සියලුදෙනාගෙන් ඉල්ලා සිටිනවා.

මෙරට සංවර්ධනයේ ගාමක බලවේගය වන රාජ්‍ය සේවයේ වැටුප් වැඩිකිරීමට ජනාධිපති රනිල් වික්‍රමසිංහ  කටයුතු කළේ රටේ ආර්ථිකය ශක්තිමත් කිරීමේ තවත් පියවරක් වශයෙන් බවත් එය කිසිසේත්ම ඡන්ද ලබා ගැනීමේ අරමුණින් සිදු කළ කටයුත්තක් නොවන බවත් එක්සත් ජාතික පක්ෂයේ සභාපති, පාර්ලිමේන්තු මන්ත්‍රී වජිර අබේවර්ධන  අවධාරණය කළේය.

ජනාධිපති රනිල් වික්‍රමසිංහ බලය ලැබූ සෑම අවස්ථාවකදීම රාජ්‍ය අංශය ශක්තිමත් කරමින් රට ඉදිරියට ගෙනගිය බව සිහිපත් කළ ඒ මහතා වැඩිදුරටත් සඳහන් කර සිටියේ 2024 ජනාධිපතිවරණය කුලයට හෝ ආගම්වාදයකට නායකයෙක් සොයන මැතිවරණයක් නොව, මේ රටට ශක්තිමත් ආර්ථිකයක් ඇතිකර දී ලෝකයේ බලගතු රටක් බිහිකරන නායකත්වය තෝරාගන්නා මැතිවරණයක් වන බැවින් රාජ්‍ය සේවක සැම තම අනාගතය ගැන සිතා නිවැරදි තීන්දුවක් ගත යුතුව ඇති බවයි .

‘උරුමය’ සහ ‘අස්වැසුම’ ද මෙරට ආර්ථිකය ගොඩ නැංවීම වෙනුවෙන් ක්‍රියාත්මක කරන වැඩසටහන් මිස විවිධ දේශපාලනඥයින් පවසන පරිදි ජන්දය අපේක්ෂාවෙන් ක්‍රියාවට නඟනු ලැබූ වැඩසටහන් නොවන බව පැවසූ වජිර අබේවර්ධන, මේ සියල්ල ජනාධිපති රනිල් වික්‍රමසිංහ  විසින් මේ රටේ ආර්ථිකය හැසිරවීමෙන් ජනතාව ලබන ප්‍රතිලාභ බව පෙන්වා දුන්නේය.

එක්සත් ජාතික පක්ෂයේ සභාපති, පාර්ලිමේන්තු මන්ත්‍රී වජිර අබේවර්ධන  මේ බව සඳහන් කර සිටියේ කොළඹ මල්පාරේ පිහිටි රනිල් වික්‍රමසිංහගේ දේශපාලන කාර්යාලයේ පැවැති මාධ්‍ය හමුවේදීය.

මෙහිදි වැඩිදුරටත් අදහස් දැක්වූ වජිර අබේවර්ධන මෙසේද පැවසීය

මෙරට රාජ්‍ය සේවකයන් ලක්‍ෂ පහළොවක් පමණ සිටින අතර සහ විශ්‍රාමිකයන් ලක්ෂ පහක් පමණ ඉන්නවා. ඊට අමතරව පුද්ගලික අංශයේ ඊ.ටී.එෆ් ලබන ලක්ෂ හැට පහකට ආසන්න සංඛ්‍යාවක් ඉන්නවා. මේ කණ්ඩායම් දෙකේම එකතුව ලක්ෂ අසූපහක් වෙනවා. මේ රටේ ආර්ථික වර්ධන වේගය වැඩිකර ගැනීමට සිටින පිරිස වශයෙන් මේ කණ්ඩායම හඳුන්වන්න පුළුවන්. ඒ වගේම මැතිවරණ කොමසාරිස්ගේ වාර්තාවට අනුව වයස අවුරුදු 18 ට වැඩි එක්කෝටි හැත්ත එක් ලක්ෂයක් මෙවර ඡන්දය භාවිතා කිරීමට සුදුසුකම් ලබා තිබෙනවා. මෙරට නීති පද්ධතිය ක්‍රියාත්මක කිරීමට සිටින්නේ මේ පිරිසයි. මෙහි තිබෙන අසමානතාවයන් වෙනස් නොකර අප බලාපෙරොත්තු වන ආර්ථික සංවර්ධන වේගය ළඟා කර ගැනීමය හැකියාවක් නැහැ.

රටේ පැවැත්වෙන මැතිවරණයක් හේතුවෙන් මේ රට තවත් මාස කීපයක් ආපස්සට යාම සිදු විය ‍නොහැකියි. මේ රට නොනැවතී වේගයෙන් ඉදිරියට යා යුතුව තිබෙනවා. කෙසේ වුවත් පසුගිය සමයේ රාජ්‍ය සේවකයන් ඇතුළු සමස්ත රට වැසියා මුහුණ දුන් ප්‍රධානම අභියෝගය වන්නේ රට බංකොලොත්භාවයට පත්වීමයි.

ඉතිහාසය දෙස හැරී බැලුවොත් 2000 වර්ෂයේ පාර්ලිමේන්තු මැතිවරණයක් පැවතුණා. රට බංකොලොත් වීම නිසා එම වර්ෂයේ දී එම රජය කඩාගෙන වැටෙනවා. 2001 වර්ෂයේ දෙසැම්බර් මාසයේදී නැවත නව රජයක් පිහිටුවනවා. එසේ පත් වූ රජයටද රට ගෙනයාමට නොහැකි වෙනවා . ඒ අවස්ථාවේදීත් රනිල් වික්‍රමසිංහ මහතා අගමැතිවරයා ලෙස රටේ වගකීම භාරගත්තා. රටේ මූල්‍ය පාලනය පවත්වා ගැනීමට හැකි නොවුණොත් , රටේ ආර්ථිකය අනාගතයේදී ද පාලනය කර ගත නොහැකි වන බව පෙන්වා දෙමින් ඒ අවස්ථාවේ දී ‘යළි පුබුදමු ශ්‍රී ලංකා’ වැඩසටහන හඳුන්වා දුන්නා. 2001 වසරේ රනිල් වික්‍රමසිංහ අගමැතිතුමා ඒ නව වැඩසටහන ඉදිරිපත් කරන්නේ මෙරට ආර්ථික වර්ධන වේගය කඩාගෙන වැටෙන බවත් ණය ගෙවා ගැනීමට නොහැකි වන බවත් සඳහන් කරමින් බව සිහිපත් කළ යුතුයි . නමුත් ජනතාව එය ප්‍රතික්ෂේප කළා. ජාතිවාදය ආගම්වාදය කුලවාදය පතුරවා එදා රට වෙනත් මානයකට ගෙන ගියා .

කෙසේ වෙතත් රට වැටුණු තත්ත්වයෙන් ගොඩ ගැනීමට නම් ණය ගෙවීමට ක්‍රමවේදයක් අවශ්‍යයි. ජනාධිපති රනිල් වික්‍රමසිංහ  2022 මැයි 12 වැනිදා අග්‍රාමාත්‍යධූරය භාරගෙන එතුමා පාර්ලිමේන්තුවේ දී කතාවක් පවත්වමින් පැවසුවේ, තනි මන්ත්‍රීවරයෙක් වන තමන්ට සියළු දෙනාගේ සහයෝගය දෙනවා නම් ගැටළුව විසඳීමට හැකියාව ඇති බවයි .

ඒ අනුව එතුමා නව නීති රීති නව අණ පනත් සියයකට වැඩි ප්‍රමාණයක් පාර්ලිමේන්තුවේ සම්මත කිරීමට කටයුතු කළා. ඒවගේම එතුමා යෝජනා කළා, "අපි බෙදී සිටියා ඇති, අපේ වෙනස්කම් ඒ අයුරින්ම තබා ගනිමින්, සංස්කෘතින් ඒ අයුරින්ම තබා ගනිමින් ජාතික වශයෙන් එකමුතුව ක්‍රියා කරමු" කියලා. ඒ අනුව තමයි ජාතික සභා කීපයක් පිහිටුවන්නේ. ඒ පිහිටුවන ජාතික සභා කීපයට සමගාමීව ණය පියවන ආකාරය පිළිබඳව නීතියෙන් පොරොන්දු වෙනවා. ඒ අනුව, රාජ්‍ය ණය කළමනාකරණය කරගන්නේ කෙසේද කියා පාර්ලිමේන්තුවේ නීතියක් සම්මත කර ගන්නවා. එමෙන්ම රනිල් වික්‍රමසිංහ ජනාධිපතිතුමා මැදිහත්ව මැතිවරණ වියදම් පාලනය කිරීමේ පනත ද සම්මත කරගන්නවා. අපේ රටේ දේශපාලනය සඳහා දෙස් විදෙස් මුදල් ප්‍රවාහ බලපෑම් කිරීම සම්බන්ධව විමසිල්ලෙන් සිටීම ලංකාවේ ආරක්ෂාවට ඉතා වැදගත් බව මෙහිදී තේරුම් ගත යුතුව තිබෙනවා .

ඒ වගේම එතුමා තව පනත් කිහිපයක් සම්මත කරගන්නවා. ඒ අතරින් ආර්ථික පරිවර්තන පනත විශේෂයි. එහි සඳහන් වෙන්නේ මින් ඉදිරියට රට බංකොලොත් නොවන ලෙස ආර්ථිකය හසුරුවන ආකාරයයි. ඒ අනුව 5%ක ආර්ථික වර්ධන වේගයක් තබා ගත යුතුයි. 2027 වර්ෂය වන විට 5%ක ආර්ථික වර්ධන වේගයක් ලඟා කර ගැනීම සඳහා අවශ්‍ය කරන ආර්ථික උපාය මාර්ග හඳුන්වාදීම, ජනාධිපති රනිල් වික්‍රමසිංහ මහතාගේ මේ ආර්ථික පරිවර්තන පනත හරහා ඉදිරිපත් කරනවා. මේ ආර්ථික පරිවර්තන පනත සකස් කර තිබෙන්නේ ජාත්‍යන්තර මූල්‍ය අරමුදලට, ලෝක බැංකුවට, ආසියානු සංවර්ධන බැංකුවට, ජයිකා , ඉන්දියාවට සහ චීනයට අප විසින් ණය ගෙවීම සඳහා ඉලක්ක සහගත වැඩපිළිවෙල ආවරණය වන ආකාරයටයි. .

එදා 2001 වසරේ ඉදිරිපත් කළ ‘යළි පුබුදමු ශ්‍රී ලංකා’ ප්‍රතිපත්ති ප්‍රකාශනයේත් ආර්ථික වර්ධන වේගයක් සඳහා රාජ්‍ය සේවකයන්ගේ දායකත්වය ලබා ගන්නා ආකාරය සඳහන් වී තිබුණා. 2002 වසරේදී දි රනිල් වික්‍රමසිංහ අග්‍රාමාත්‍යවරයා ප්‍රමුඛ රජය, රාජ්‍ය සේවයේ සේවා කණ්ඩායම් එක් කර ‘මැනේජ්මන්ට් සර්විස්’ ක්‍රියාවලිය හඳුන්වා දුන්නා. ඒ ආකාරයට රාජ්‍ය පරිපාලන යන්ත්‍රණයේ සම්පූර්ණ පරිවර්තනයක් සිදු කිරීමට එදාත් ජනාධිපති රනිල් වික්‍රමසිංහට අවශ්‍ය වුණා. ඒ පරිවර්තනය සඳහා අවශ්‍ය මූල්‍ය ආධාර ලබා දීමට ලෝක බැංකුව පො‍රොන්දු වුණා. නමුත් මේ කටයුතු ඉදිරියට ගෙනයාමට අවස්ථාව ලැබුණේ නෑ .

කොහොම නමුත් නැවතත් රාජ්‍ය සේවය නැංවීම කෙරෙහි ජනාධිපති රනිල් වික්‍රමසිංහගේ අවධානය යොමුව තිබෙනවා . ඒ යටතේ නව ලෝක ප්‍රවණාතාවයන් සමඟ රාජ්‍ය යාන්ත්‍රණයේ පරිවර්තනයක අවශ්‍යතාව වෙනුවෙන් රාජ්‍ය ප්‍රතිපත්ති සහ රාජ්‍ය පරිපාලන විශ්ව විද්‍යාලයක් ඇති කිරීමට ද අපේක්ෂිතයි. ඒ වගේම රාජ්‍ය සේවක අවම වැටුප රු. 55000ක දක්වා ඉහළ නැංවීමට ‘පුළුවන් ශ්‍රී ලංකා’ප්‍රතිපත්ති ප්‍රකාශනය තුළි ජනාධිපති රනිල් වික්‍රමසිංහ මහතා කටයුතු කර තිබෙනවා .

රාජ්‍ය සේවයේ වැටුප් වැඩි කිරීම ඡන්ද ඉලක්ක කර ගෙන සිදු කරනු ලැබුවක් බවට ඇතැම් පාර්ශව චෝදනා කරනවා. නමුත් මෙරට සංවර්ධනයේ ගාමක බලවේගය වන රාජ්‍ය සේවයේ වැටුප් වැඩිකිරීමට ජනාධිපති රනිල් වික්‍රමසිංහ කටයුතු කළේ රටේ ආර්ථිකය ශක්තිමත් කිරීමේ තවත් පියවරක් වශයෙන් බව කිව යුතුයි. එය කිසිසේත්ම ඡන්ද ලබා ගැනීමේ අරමුණින් සිදු කරනු ලැබුවක් නොවෙයි.

ජනාධිපති රනිල් වික්‍රමසිංහ  යතාර්ථවාදී ලෙස වැටුප් වැඩිකිරීම සිදුකර තිබෙනවා. ඒ සමඟ අනෙක් අපේක්ෂකයන්ද විවිධ පොරොන්දු ලබාදීම ආරම්භ කර තිබෙනවා . නමුත් ඒ පොරොන්දු ඉටුකළ හැකිද යන ප්‍රශ්නය තිබෙනවා .

ඒ වගේම ‘උරුමය’ සහ ‘අස්වැසුම’ ද මෙරට ආර්ථිකය ගොඩ නැංවීම වෙනුවෙන් ක්‍රියාත්මක කරන වැඩසටහන් මිස විවිධ දේශපාලනඥයින් පවසන පරිදි, ඒ කිසිවක් ජන්ද බලාගෙන දියත්කළ වැඩසටහන් නොවෙයි . මේ සියල්ල ජනාධිපති රනිල් වික්‍රමසිංහ මහතා විසින් මේ රටේ ආර්ථිකය නිවැරදි හැසිරවීමෙන් ජනතාවට ලබා දුන් ප්‍රතිලාභ බව කිව යුතුයි. ජනාධපතිතුමා මෙම වැඩසටහන් ක්‍රියාත්මක කළේ අපට ලෝකයේ ආධාර දෙන කණ්ඩායම් වල එකඟතාවය මතයි.

ජනාධිපති රනිල් වික්‍රමසිංහ මැතිතුමා අවිධිමත් ශ්‍රම වෙළෙඳපොල ලෙසින් තම ප්‍රතිපත්ති ප්‍රකාශනයේ විශේෂ සටහනක් තබා තිබෙනවා. එහිදී එතුමා සඳහන් කරනවා , විශාල පිරිසක් අවිධිමත් ශ්‍රම වෙළඳපොළෙහි රැකියා කරන අතර, ඒ සියලු දෙනා ශක්තිමත් ආර්ථිකයක කොටස්කරුවන් ලෙස පරිවර්තනය කරගත යුතුයි කියලා. එසේනම් සැප්තැම්බර් 21 වනදාට රනිල් වික්‍රමසිංහ ජනාධිපතිතුමාට ශ්‍රී ලාංකික මහජනතාව ඡන්දයක් භාවිතා කරනවා කියලා කියන්නේ, අවිධිමත් ශ්‍රම වෙළෙඳපොළේ සහ විධිමත් රාජ්‍ය යාන්ත්‍රණයේ තිබෙන ප්‍රශ්න මාලාව විසඳාගෙන ආර්ථිකය ශක්තිමත්භාවයක් ඇති කරගැනීම සඳහා සහයෝගය ලබා දීමයි.

රටේ ආර්ථික වර්ධන වේගය වැඩිවෙනවා නම් විශ්‍රාමිකයෝ ලක්ෂ පහක් ආර්ථික වර්ධන වේගයේ කොටස්කරුවන් බවට පත් කළ යුතුව තිබෙනවා ඔවුන්ගේ දැනුම, පලපුරුද්ද, අත්දැකීම්, හැකියාවත් සහිතව ඉදිරියට ගැනීමට රනිල් වික්‍රමසිංහ ජනාධිපතිතුමා සැලසුම් කර තිබෙනවා.

ඒ නිසා මෙම ජනාධිපතිවරණය ‘ශ්‍රී ලාංකික කෘතවේදීත්වය දැක්වීමේ මැතිවරණයක්’ ලෙස හැඳින්විය හැකියි. රාජ්‍යසේවක ඔබ කවුරුත් තැපැල් ජන්දය භාවිතා කිරීමේදී රාජ්‍ය සේවය ශක්තිමත් කිරීමට , ඔබේ ආර්ථිකය ශක්තිමත් කිරීමට , විධිමත් සහ ප්‍රායෝගික වැඩපිළිවෙලක් ක්‍රියාත්මක කර තිබෙන , ජනාධිපති රනිල් වික්‍රමසිංහට ජන්දය ලබාදිය යුතුව තිබෙනවා.

මෙහිදී අපි සොයන්නේ සංස්කෘතියට නායකයෙක් නොවෙයි. ආගමකට නායකයෙක් නොවෙයි. කුලයකට නායකයෙක් නොවෙයි. අපි සොයන්නේ රටට රාජ්‍යතාන්ත්‍රික නායකයකුයි. ඒ බව ශ්‍රී ලාංකික සමස්ථ රාජ්‍ය යාන්ත්‍රණය වගේම සමස්ත ශ්‍රී ලාංකික වැඩ කරන ජනතාවත් සිහියේ තබාගත යුතුයි. වැටුණු රටක් ගොඩගත් , ඒ වෙනුවෙන් කටයුතු කළ ජනාධිපතිවරයා ලෙස වසර දෙකක ධුරයේ පළපුරුද්දක් ඇති, ඒ වගේම වසර හතළිස් දෙකක පළපුරුද්දක් තිබෙන, ඒ වගේම වසර දෙකක ජනාධිපතිධුරයේ පලපුරුද්දක් සහිත නායකයකු ඉදිරිපත් වී තිබෙන අවස්ථාවක වෙනත් අපේක්ෂකයින් අපේක්ෂකයන් ලෙස ඉදිරිපත් වීමත් ජාතියේ අවාසනාවක් හැටියටයි මම දකින්නේ.

මේ ජනාධිපතිවරණයේදී කුලවාදයට නායකයකු, ආගම් වාදයට, නායකයකු හොයන්න එපා. මේ මැතිවරණයේදී ශ්‍රී ලාංකික අනන්‍යතාවය ආරක්ෂා කර ගැනීම සඳහා, මේ රට ආසියාවේ බලවත් රටක් බවට පත්කර ගැනීම සඳහා, ලෝකයේ බලවත් රටක් ලෙස නැගී සිටීම සඳහා, සියලු වෙනස්කම් ඒ අයුරින්ම තබා ගනිමින් ජාතියේත්, අනාගත තරුණ පරම්පරාවේත් ආරක්ෂාව වෙනුවෙන් සිය ඡන්දය භාවිතා කිරීමට මේ රටේ ජනතාව කටයුතු කරන බව විශ්වාසයි.

පාර්ලිමේන්තුවෙන් පසුගියදා ඉල්ලා අස්වූ නීතිඥ තලතා අතුකෝරල මෙවර ජනාධිපතිවරණ ස්වාධින අපේක්ෂක ජනාධිපති රනිල් වික්‍රමසිංහට සහය පළකරමින් හෙට (05) මතුගම නගරයේ පැවැත්වෙන ජන රැලියට සහභාගී වීමට නියමිව ඇතයි වාර්තාවේ.

තමාට අවශ්‍ය වී ඇත්තේ තනතුරු හෝ වරප්‍රසාද නොව, තවත් ගෝඨාභය කෙනෙකුගෙන් රට බේරා ගැනීම බව හිටපු පාර්ලිමේන්තු මන්ත්‍රීනි තලතා අතුකෝරළ පසුගිය 30 දා විශේෂ මාධ්‍ය නිවේදනයක් නිකුත් කරමින් කියා සිටියාය.

තමා එදා පාර්ලිමේන්තුවේදී දැඩිව අවධාරණය කළේ ගෝඨාභය රාජපක්ෂ විසින් වරක් තහවුරු කළ ඒ භයානක අත්දැකීම නැවත වරක් වෙනත් නමකින් අප ලඟාකර ගතයුතු නැති බව ද ඇය අවධාරණය කර සිටියි.

මේ රටේ ජනතාවට යළිත් ඒ කාලකන්නි අත්දැකීමට ඔරොත්තු දිය හැකිද? තමාට සජිත් ප්‍රේමදාස සමග පෞද්ගලික ගැටළුවක් නැතත්, ඔහුගේ දේශපාලන දැක්ම හා වත්මන් ජනාධිපතිවරණයට අදාළව ඔහුගේ උපාය මාර්ගය ඉතා ගැඹුරින් අධ්‍යනය කිරීමේදී එම භයානක සත්‍යය අවබෝධ වූබව මන්ත්‍රීවරිය පවසයි

නාගරික සංවර්ධන හා නිවාස රාජ්‍ය අමාත්‍ය අරුන්දික ප්‍රනාන්දු  පාර්ලිමේන්තුවේ දී ස්වාධීනව කටයුතු කරන බව දැනුම් දුනි.

පාර්ලිමේන්තුවේ දී අද (04)විශේෂ ප්‍රකාශයක් සිදුකරමින් ඔහු සඳහන් කර සිටියේ ජනාධිපතිවරයාට සහ විපක්ෂ නායක සජිත් ප්‍රේමදාසට හැකිනම් එක්ව කටයුතු කරන ලෙසය.

වැඩිදුරටත් අදහස් දැක්වු අරුන්දික ප්‍රනාන්දු,

“අද රාජ්‍ය නිලධාරීන් තැපැල් ඡන්දයට යනවා. ලක්ෂ 14ක් රාජ්‍ය නිලධාරීන් ඉන්නවා. රාජ්‍ය නිලධාරීන්ගේ ඔළුව සම්පූර්ණයෙන්ම හෝදලා. රාජ්‍ය සේවකයින් ළඟ බොරුව වපුරලා. මේ රටේ කැරලි දෙකක් නිසා 1971 සහ 1989 දී. විශේෂයෙන් 89 දී 60,000ක් තරුණයින් විනාශ වුණා. උතුරෙත් එහෙමයි. ආදරණීය උතුරේ තරුණ පිරිසක් එල්.ටීටී.ඊ එක එක්ක රට විනාශකාරී තැනකට අරන් යන්න යද්දි විශාල තරුණ සංහාරයක් වුණා. දැන් ඉලක්කය තරුණයින්. සමාජ මාධ්‍ය ජාලා හරහා මේ විදියට තරුණයින්ගේ මනස විනාශ කරන තැනකට මේක අරගෙන යනවා.

අපි අද ඉඳලා අපි බලනවා මේකේ දිනන්න බැරිනම් කථානායකතුමනි, දිනනවා ද ? පරදිනවා ද ? කියන ප්‍රජාතන්ත්‍රවාදය. හැබැයි පැරදුනාට කියනවා නම් නැවත වතාවක් විනාශකාරී තැනකට ගේන්න අරගල කරන්න, පාර්ලිමේන්තු ගිනිතියන්න කතා කරනවා නම්, මම අද ඉඳලා ස්වාධීන මන්ත්‍රීවරයෙක් විදියට මේ රට විනාශකාරී කණ්ඩායම පරාජයට පත්කරන්න පුළුවන්, අයත් එක්ක කතා කරන්න පටන් ගන්නවා. මම කවදාවත් මම සජිත් ප්‍රේමදාස මහත්තයාව හම්බවෙලාවත් නෑ. අග්‍රාමාත්‍යතුමා දන්නවා අපි මේ වැඩ කරන්නේ සත්භාවයෙන්. මේ විනාශයෙන් වෙන වෙලාවේ මම අත්දෙක එකතු කරලා ඉල්ලනවා පුළුවන් නම් විපක්ෂ නායකතුමයි ජනාධිපතිතුමයි එකතු වෙන්න. පුළුවන් නම් මේ කණ්ඩායම් දෙක එකතු කරන්න. මම අවසාන වශයෙන් එකක් කියනවා මම අද ඉඳලා ස්වාධීන මන්ත්‍රීවරයෙක් වශයෙන් මේ අශුද්ධ සංවිධානයට විරුද්ධව පරාජයට පත්කරන්න පුළුවන් ඕනෑම කෙනෙක් එක්ක සාකච්ඡා කරනවා කියලා කියනවා.”

ජනාධිපතිවරණයට ඉදිරිපත් වන අපේක්ෂකයන්ගේ ආරක්ෂාව පිළිබඳ ව කමිටුවක නිර්දේශ මත කටයුතු සිදු කරන බව පොලිස් මාධ්‍ය ප්‍රකාශක නියෝජ්‍ය පොලිස්පති නීතීඥ නිහාල් තල්දූව මාධ්‍ය හමුවකට එක්වෙමින් පැවසීය.

කැබිනට් මණ්ඩලයේ පූර්ණ අනුමැතියකින් යුතුව ජනාධිපති අපේක්ෂකයින්ගේ ආරක්ෂාව තහවුරු කිරීම වෙනුවෙන් කමිටුවක් පත් කර තිබේ.

එම කමිටුවට උපදෙස් ලබාදීම, අධීක්ෂණය සිදු කිරීම ආදිය මහජන ආරක්ෂක අමාත්‍යාංශයේ ලේකම්වරයාගේ ප්‍රධානත්වයෙන් සිදු කෙරේ.

හෙට (04) තැපැල් ඡන්ද සලකුණු කිරීමේ කටයුතු ආරම්භ වේ.

ඒ අනුව දිවයින පුරා සෑම පොලිස් ස්ථානයක ම වෙන ම ඒකකයක් මැතිවරණ පැමිණිලි ලබා ගැනීම සහ ඒ සම්බන්ධව ක්‍රියා කිරීමට පත් කර තිබේ.

මේ වනවිට මැතිවරණයට අදාළ ව පැමිණිලි 144ක් පොලිසියට ලැබී තිබේ.

පුද්ගලයින් 22 දෙදෙනකු ඊට අදාළව අත්අඩංගුවට ගෙන ඇතිබව පැවසීය.

මැතිවරණ ප්‍රචාරක පුවරු ලක්ෂ 02ක් ඉවත් කිරීමට පොලිසිය කටයුතු කර ඇතිබව පැවසීය.

මේ අතර වාහනවල මැතිවරණයට අදාළ ස්ටිකර්ස්, පෝස්ටර්ස් වැනි ප්‍රචාරණ පුවරු වාහනය නවතා ඉවත් කිරීමට පොලිස් නිලධාරීන්ට උපදෙස් ලබා දී ඇතිබව පැවසීය.

මැතිවරණ කාල සීමාවේ දී උපරිම සාමය පවත්වාගෙන යාමට අවශ්‍ය පියවර ගෙන තිබේ.

කිසිවෙකු ප්‍රචණ්ඩකාරී හෝ මැතිවරණ නීති උල්ලංඝනය කිරීමක් සිදු කළහොත් නීතිය දැඩි ව ක්‍රියාත්මක කරන බව පොලිස් මාධ්‍ය ප්‍රකාශකවරයා වැඩිදුරටත් පැවසීය.

දේශපාලන පක්ෂ ලෙස එකතුව රට වෙනුවෙන් වැඩ කළ හැකි බව වත්මන් ආණ්ඩුව පෙන්වා දී ඇති බවත්, ඒ අනුව යමින් අලුත් ශ්‍රී ලංකාවක් බිහි කිරීමේ අරගලය මේ වන විට ක්‍රියාත්මක කරමින් සිටින බවත් ජනාධිපති රනිල් වික්‍රමසිංහ පැවසීය.

සමගි ජනබලවේගය පක්ෂය ඡන්ද හොරකමේ යන තැනට පහත වැටී ඇති බව පෙන්වා දුන් ජනාධිපතිවරයා, ජාතික ජනබලවේගය පක්ෂය අතීතය අමතක වූ පක්ෂයක් බවට පත්ව ඇති අතර, අතීතය නොදැන අනාගතයට යා නොහැකි බවද පෙන්වා දුන්නේය.

ජනාධිපති රනිල් වික්‍රමසිංහ මේ බව සඳහන් කළේ බත්තරමුල්ල මොනාජ් ඉම්පීරියල් හෝටලයේ අද (02) පැවති ශ්‍රී ලංකා නිදහස් පක්ෂයේ 73 වැනි සංවත්සර උළෙලට එක්වෙමිනි.

පසුගිය දෙවසර තුළ වැටුණු රට ගොඩනැඟීම වෙනුවෙන් ශ්‍රී ලංකා නිදහස් පක්ෂය ලබා දුන් සහාය තමන් කිසිදා අමතක නොකරන බව ද ජනාධිපතිවරයා සඳහන් කළේය.

නිර්පාක්ෂික අපේක්ෂකයෙක් වශයෙන් ඉදිරි ජනාධිපතිවරණයට ඉදිරිපත්ව සිටින රනිල් වික්‍රමසිංහ මහතාට සහාය ලබාදිය යුතු යැයි ශ්‍රී ලංකා නිදහස් පක්ෂයේ මධ්‍යම කාරක සභාව, විධායක කාරක සභාව සහ දේශපාලන මණ්ඩලය ගනු ලැබූ යෝජනාව මෙහිදී ඒකමතිකව සම්මත කර ගනු ලැබීය.

 එහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය.

පළමු වතාවට ශ්‍රී ලංකා නිදහස් පක්ෂයේ සම්මේලනය ඇමතීමේ ගෞරවය මට ලැබී තිබෙනවා. එක්සත් ජාතික පක්ෂය ආරම්භ කරන විට එස්. ඩබ්ලිව්. ආර්. ඩී. බණ්ඩාරනායක මැතිතුමා එහි ආරම්භක සාමාජිකයෙක් වුණා. පසුව එතුමා ඉන් වෙන් වී ශ්‍රී ලංකා නිදහස් පක්ෂය ආරම්භ කළා. ඒ වන විට මා වයස අවුරුදු 10යේ පසුවූ අතර, එස්. ඩබ්ලිව්. ආර්. ඩී. බණ්ඩාරනායක මැතිතුමාව දැනගෙන හිටියා. ඒ වගේම අවස්ථා කිහිපයකදී එතුමාව හමුවීමට ද මට අවස්ථාව ලැබුණා.

අපි පක්ෂ දෙක දෙපැත්තක සිට රට දියුණු කිරීමට කටයුතු කළා වගේම අප අතර බෙදීමක් ද තිබුණා. එහිදී හොඳ හා නරක අප වෙතින් සිදු වුණා. අද අතැමුන් අපෙන් අහනවා ගතවූ වසර 75ක කාලය තුළ මොනවද කළේ කියලා. අප කළ කී දේ පිළිබඳ ලැයිස්තුවක්ම අප සතුව තිබෙනවා. ඒ ගැන පසුවට කියන්නම්. එදා පැවති රජයන් මේ රටේ සෞඛ්‍ය මෙන්ම අධ්‍යාපනය දියුණු කළා. අප කළ හොද වගේම නරකත් භාර ගැනීමට සූදානම්. සමහරුන්ට වාගේ අපට අතීතය අමතක වෙන්නේ නැහැ. සම්පූර්ණයෙන්ම අපේ ඉතිහාසය හිස් වෙන්නේත් නැහැ.

අපට විවිධ මත තිබුණා. නමුත් අප නිරතුරුවම රට ගැන හිතුවා. 2022 වසරේදී ද රට ගැන හිතන්න සිදුවුණා. සාම්ප්‍රදායික දේශපාලනය අනුව නායකයන් නැති වුණා. එක පැත්තකින් අග්‍රාමාත්‍ය මහින්ද රාජපක්ෂ ඉල්ලා අස්වුණා. ඊට පසුව කුමක්ද සිදුවුණේ? විපක්ෂ නායකවරයා වගේම අනුර දිසානායක ද අග්‍රාමාත්‍ය ධූරය බාර ගත්තේ නැහැ. ඒ අය පැනලා ගියා. නමුත් අපි කෙසේ හෝ එක්ව ආණ්ඩුවක් පිහිටවනු ලැබුවා. 2022 ජූලි 09 වැනිදා ගෝඨාභය ජනාධිපතිතුමා තනතුරෙන් ඉවත් වුණා. එතැන් සිට රටට නායකයෙක් හිටියේ නැහැ. රට අරාජිකව තිබුණා. එහිදී රට ගැන සිතා අප සියලුම දෙනා එකතු වුණා. ඒ ගැන මට ආඩම්බරයක් තිබෙනවා.

අප එක්ව රට සහ ප්‍රජාතන්ත්‍රවාදය බේරා ගත්තා. රටේ ප්‍රජාතන්ත්‍රවාදය බේරා ගත් නිසා තමයි අද වන විට ජනාධිපතිවරණයක් පැවැත්වීමට හැකියාව ලැබී තිබෙනවා. අපට රට ගොඩනඟන්න, ආර්ථිකය නඟාසිටුවන්න පුළුවන් වෙයි කියා කවුරුත් හිතුවේ නැහැ. මාසයක් දෙකක් ඇතුළත අවශ්‍ය වර්ධනය ඇති කරන්න අපට පුළුවන්කම ලැබුණා. ශ්‍රීලනිපයේ සාමාජිකයන්ට මේ අවස්ථාවේදී මම ස්තුතිවන්න වෙනවා. ඔබ සියලුම දෙනා පක්ෂයත් බේරා ගෙන, එක්සත්ව තබාගෙන මා හට සහාය ලබා දුන්නා.

ගත වූ වසර දෙකක කාලය තුළ අප සිදුකළ වැඩසටහන ගැන මෙම අවස්ථාවේ කතා කළ යුතු නැහැ. අපි කෙසේ හෝ රට තුළ ආර්ථිකය ස්ථාවරයත්වයක් ඇති කළා. අපට ඒ ආර්ථික ස්ථාවරයත්වය තහවුරු කිරීමට අවශ්‍යයි. ඒ වගේම මේ රට ශක්තිමත්ව ඉදිරියට ගෙනියන්න ද අවශ්‍යයි. තරුණ තරුණියන්ට යහපත් අනාගතයක් ලබාදීමට අවශ්‍යයි. අප කැපවී සිටින්නේ රට වෙනුවෙන්. ඇතැමුන් රට ගැන කතා කරලා හිතන්නේ තමන් ගැන විතරයි. අපි රට ගැන කතා කර, හිතන්නේ ද රට ගැන පමණයි. මේ වන විට අපේ අරගලය අලුත් ශ්‍රී ලංකාවක් ඇති කිරීමටයි.

දේශපාලන පක්ෂ ලෙස එකතුව රට වෙනුවෙන් වැඩ කළ හැකි බව අප පෙන්වා දී තිබෙනවා. අපි අරගල කරන්නේ එම වෙනස සහ දියුණුව සඳහායි. තරුණ තරුණියන්ට අනාගතයක් ඇති කිරීම වෙනුවෙන් ඒ අරගලය අප සිදු කරනවා. මේ රට හැමදාම හිඟන රටක් වෙන්න බැහැ. හැමදාමත් රටවල්වලින් විදේශ විනිමය ඉල්ලන්න බැහැ. අපට අවශ්‍ය මුදල් අප සෙවිය යුතුයි. රට තුළ ශක්තිමත් ආර්ථිකයක් ඇති කළ යුතුයි. ඒ ආර්ථිකය තුළින් මේ රටේ ජනතාවට මීට වඩා හොඳ ජීවිතයක් හිමිකර දිය යුතුයි.

කෘෂිකර්ම නවීකරණ වැඩසටහන මේ වන විටත් ගම්මාන වෙත පැමිණ තිබෙනවා. දැනටමත් මහින්ද අමරවීර අමාත්‍යතුමා ඊට අදාළ අත්හදා බැලීම් ආරම්භ කර තිබෙනවා. ඒ වගේම අපි සංචාරක ව්‍යාපාරය දියුණු කිරීමට ද ගමට එනවා. සංචාරකයන්ගේ පැමිණීම ද දෙගුණයක් කරනවා. මේ සෑම දෙයකින්ම ගමට මුදල් ගලා එනවා. සූර්ය බලශක්තිය ගම්මානවලට ගෙන එනවා. අලුතින් ආයෝජන කලාප ඇති කරමින් රට ඉදිරියට ගෙන යනවා.

අප සියලුම දෙනාම එක්ව වෙලා ලක්ෂ 20කට සින්නක්කර ඉඩම් අයිතිය ලබාදීමට කටයුතු කරමින් සිටිනවා. කොළඹ අඩු ආදායම්ලාභීන්ට තට්ටු නිවාස අයිතිය ද ලබා දෙනවා. වතු නිවාසවලට ගම්මාන සමඟ නිවාස ලබාදීමට ද කටයුතු කරනවා. මෙම කටයුතු මේ රට තුළ පළමු වතාවට අප කළ විප්ලව බව කිව යුතුයි. අස්වැසුම ලබා දීමත් විප්ලවයක් නොවෙයිද කියා මා අහනවා.

දුරකථනය සහ මාලිමාව රටට මොනවද කළේ? සමගි ජන බලවේගය දෙමළ පක්ෂවලින් ඡන්දය හොරකම් කරන්න ගිහින් ඒ මොහොතේම අහුවුණා. අද ඔවුන්ට යාපනයටවත් යන්න බැරි තත්ත්වයක් ඇතිව තිබෙනවා. දේශපාලන පක්ෂ එවැනි තත්ත්වයකට වැටිය යුතු නැහැ. ඒ වගේම මාලිමාව අතීතය අමතක වූ පක්ෂයක්. අතීතය ගැන නොදැන අනාගතයට යන්න බැහැ. තමන් කුමක්ද කළේ කියා ඔවුන්ට අමතක වෙලා. ඔවුන්ගේ කැලැන්ඩරයේ 1971 කියන වසර නැහැ. 1971 කියන වසරක් ඔවුන්ට තිබෙනවාද කියා පුළුවන් නම් පෙන්වන්න. අපට කටයුතු කිරීමට සිදුව තිබෙන්නේ මෙවැනි පිරිසක් සමඟයි.

අප සියලුම දෙනාම එකතු වෙලා ගම දියුණු කරමු. ඇතැමුන් පක්ෂ ගැන කතා කරන නමුත් තරුණ තරුණියන් ගැන කතා කරන්නේ නැහැ. නමුත් අප තරුණ තරුණියන් ලක්ෂයකට රැකියා ලබා දීමට පියවර ගන්නවා. ස්වයං රැකියා අවස්ථා බිහි කරනවා. නවීන කෘෂිකර්මාන්තය ගමට ගෙන එනවා. එපමණක් නොව තවත් තරුණ තරුණියන් 50000කට වෘත්තීය පුහුණුව ලැබීම සඳහා මුදල් ලබා දෙනවා. ඔවුන්ට කැමති වෘත්තියක පුහුණුව ලැබිය හැකියි. විදෙස් රටවලට වුවද යෑමට අවස්ථාව තිබෙනවා. විදෙස් රටවල ද සෞඛ්‍ය අංශයේ රැකියා අවස්ථා විශාල ප්‍රමාණයක් තිබෙනවා. ඒ අවස්ථා හඳුනාගෙන ඒ සඳහා තරුණ තරුණියන් යොමු කිරීමට අප උදව් කරනවා.

අපි මෙතැන සිටින්නේ ජනතාවගේ ජීවිතය තව තවත් දියුණු කිරීමටයි. අපට අවශ්‍ය රට දියුණු කිරීමටයි. අද ගෑස්, ඉන්ධන, ඖෂධ පෝලිම් නැහැ. නමුත් මම එක පෝලිමක් ඇති කරන බව සඳහන් කරනවා. ඒ සැප්තැම්බර් 21 වැනිදා ඡන්ද පොළට යන පෝලිමයි. ඒක නවත්වන්න මම ඉඩ තියන්නේ නැහැ.

මේ ගමන යන අවස්ථාවේදී මා ශ්‍රී ලංකා නිදහස් පක්ෂයට ස්තුති කරනවා. එදා අපි දේශපාලන වශයෙන් දෙපැත්තක හිටියත් අප අතර මිත්‍රකම තිබුණා. මේ සෑම කෙනෙක් ගැනම දැනගෙන හිටියා. සියනෑ කෝරළේ අයගෙන් පාර්ලිමේන්තුවට එන්න කලිනුත් දැනගෙන හිටියා. ඒ වගේම නිමල් සිරිපාල ද සිල්වා ද වගකීම් සහගත නායකයෙක් බව පැවසිය යුතුයි. එතුමා වරායත්, ගුවන් තොටුපළත් සංවර්ධනය කරා ගෙන යමින් සිටිනවා. මෙවැනි අවස්ථාවක එම ආයතන ඉදිරියට ගෙන යෑම දක්ෂතාවක් බව කිව යුතුයි.

ශ්‍රී ලංකා නිදහස් පක්ෂය දේශපාලනයෙන් ඉහළට ආ පක්ෂයක්. මේ කාලය වන විට දේශපාලන කේෂත්‍රයේ විප්ලව ඇතිව තිබෙනවා. ගත වූ වසර දෙක තුළ නායකයන් පක්ෂ අත්හැර ගියා. ඔවුන් අලුත් මාර්ගයක ගමන් කරමින් සිටිනවා. ඔබ ලබා දුන් සහයෝගය මම කිසි දිනෙක අමතක කරන්නේ නැහැ. අප ඉදිරියට ගිහින් ප්‍රතිඵල රටට පෙන්වමු. අපි කිසි දිනෙක පැනලා ගියේ නැහැ. එක තැනක සිට ප්‍රශ්නවලට මුහුණ දුන්නා. අනාගතයේදී ද ප්‍රශ්නවලට මුහුණ දී රට හදන්න එකතු වෙමු. අපි ජයග්‍රහණය කරමු.

ශ්‍රී ලංකා නිදහස් පක්ෂයේ සභාපති, අමාත්‍ය නිමල් සිරිපාල ද සිල්වා

මා රනිල් වික්‍රමසිංහ මැතිතුමාව හඳුනා ගත්තේ 1989 වසරේදීයි. අපගේ දේශපාලන මත පිළිබඳ වෙනස්කම් තිබුණා. එදා පැවති ගතානුගතික දේශපාලන මත අනුව මමත් එතුමාව බොහෝම තදින් විවේචනය කර තිබෙනවා. නමුත් රට වැටෙන අවස්ථාවේදී මට එතුමාව පාර්ලිමේන්තුවේ විදුලි සෝපානය අසලදි හමුවුණා. අපි සර්ව පාක්ෂික සම්මේලනයක් පවත්වා රට වැටුණු වෙලාවේ නායකත්වය භාර ගන්න සුදුසු කෙනෙක් හොයන බව කිව්වා. ඔබතුමා ඒ සර්වපාක්ෂික සමුළුවට නිහතමානීව පැමිණියා. ඔබතුමා තනතුරු හොයාගෙන යන කෙනෙක් නෙමෙයි. ඒ වගේම එතුමා පවුල් හදන දේශපාලනඥයෙක්ද නොවෙයි.

අද මේ පෙරළිය සිදුව තිබෙන්නේ එදා අපිව පක්ෂයෙන් ඉවත් කළ නිසා බව පැවසිය යුතුයි. නමුත් අද අපි ශ්‍රී ලංකා නිදහස් පක්ෂ සාමාජිකයන්ගේ දේශපාලන අනාගතය සුරක්ෂිත කර තිබෙනවා. ඉදිරි පළාත් පාලන මැතිවරණයේදී ඒ සැමට අවස්ථාවක් ලබා දෙනවා. වැදගත් දේශපාලනය කළ හැකි තරුණ තරුණියන්ට අපේ පක්ෂය විවෘත කර තිබෙනවා. ශ්‍රී ලංකා නිදහස් පක්ෂයේ පාක්ෂිකයන් ලෙස ඔබ විශාල වශයෙන් කැප කිරීම් කරනවා. ඔබ අප සියලුම දෙනාටම එක අරමුණක් තිබෙනවා. ඒ අප ජනතාව වෙනුවෙන් සේවය කිරීමටයි. පෞද්ගලික න්‍යාය පත්‍රවලින් බැහැරව ගිය වැඩ පිළිවෙළක් ශ්‍රී ලංකා නිදහස් පක්ෂයට තිබෙනවා.

රට වෙනුවෙන් අපි අපේ තීරණ ගත යුතුයි. මධ්‍යම කාරක සභාවේදී මෛත්‍රීපාල සිරිසේන මැතිතුමා ජනාධිපති අපේක්ෂකයා විය යුතු බවට ප්‍රකාශ වුණා. නමුත් ඊට ඉඩ නොදී ජනාධිපති රනිල් වික්‍රමසිංහ මහතාට සහාය ලබාදිය යුතු බවට අප ඉතා ප්‍රායෝගික තීන්දුවක් අරගත්තා. ජනාධිපති අපේක්ෂකත්වයට මා ඉදිරිපත් විය යුතු බවටත් ඇතැමුන් යෝජනා කළා. නමුත් අප යථාර්ථවාදීව ඒ දෙස බලා දැනට තරග බිමේ සිටින අපේක්ෂකයෙක් තෝරාගත යුතු බවට තීන්දුවක් ගත්තා. අනුර කුමාර දිසානායක සමග අපේ ගනුදෙනුවක් නැහැ. ඔහුට රට වෙනුවෙන් වැඩපිළිවෙළක් නැහැ. ඔවුන්ගේ පාක්ෂිකයන් බලා සිටින්නේ අනිකුත් පාක්ෂිකයන්ගේ නිවාස ගිනි තියන්නයි. ඒ තත්ත්වය ඇති කරන්න අප ඉඩදිය යුතු නැහැ. සජිත් ගිරවෙක් වගේ කියනවා පමණයි. බොරු පොරොන්දු ලබා දෙමින් ජනතාව රවටමින් රට වටේ යනවා.

එක්සත් ජනතා නිදහස් සන්ධානයේ මහලේකම්, ශ්‍රී ලංකා නිදහස් පක්ෂයේ ජ්‍යෙෂ්ඨ උප සභාපති, අමාත්‍ය මහින්ද අමරවීර -

ශ්‍රී ලංකා නිදහස් පක්ෂය නිරන්තරයෙන් අභියෝගවලට මුහුණ දුන් පක්ෂයක්. ඒ වගේම සෑමවිටම රට වෙනුවෙන් පෙනී සිටි පක්ෂයක්. මෑත යුගය ගතහොත් මීට වසර දෙකකට පෙර අරගලය අවස්ථාවේදී අප රට වෙනුවෙන් පෙනී සිටියා. අපට අවශ්‍ය වුණේ රටත් ජනතාවත් ආරක්ෂා කර ගෙන ඉදිරියට යෑමටයි.

අද කෑගහන ආර්ථික විශේෂඥයන් එදා කිව්වේ ඩොලර් නොමැතිව රටක් ගෙනි යන්න බැහැ කියලයි. එම අභියෝගාත්මක අවස්ථාවේ විපක්ෂයේ කණ්ඩායම් ඒ වගකීම භාර ගත්තෙ නැහැ. ඒ අවස්ථාවේ අපේ කණ්ඩායම පාර්ලිමේන්තුවේ තනි පුද්ගලයකුව සිටි රනිල් වික්‍රමසිංහ මහතාට අග්‍රාමාත්‍ය ධූරය භාර ගන්නා ලෙස ආරාධනා කළා. අප සමඟ පක්ෂ රැසක් එතුමාට සහාය ලබාදීමට එකඟ වුණා.

පොහොර නොමැතිව පාරට පැමිණ උද්ඝෝෂණ කළ ගොවීන් යළි ගොවි බිමට යැවීමේ වැඩපිළිවෙළ සකස් කිරීමේ අභියෝගය ජනාධිපතිතුමා මට භාර දුන්නා. විපක්ෂයේ කණ්ඩායම් එම වැඩපිළිවෙළ කඩාකප්පල් කිරීමට උත්සාහ ගත්තා. නමුත් පළමු වැඩසටහන ලෙස ගොවි ජනතාවට පොහොර ලබාදීමේ වැඩපිළිවෙළ ගෙන ආවා. රජයේ වැඩපිළිවෙළ විශ්වාස කරමින් ගොවි ජනතාව අද රටට සහල් අතිරික්තයක් ලබාදීමට කටයුතු කර තිබෙනවා. එහි ගෞරවය ගොවි ජනතාවට හිමි වෙනවා.

තෙල් පෝලිම්, ගෑස් පෝලිම් යුගය අවසන් කර අද රට සාමාන්‍ය තත්ත්වයට ගෙනැවිත් තිබෙනවා. ජනාධිපති රනිල් වික්‍රමසිංහ මහතා එදා එම තීන්දුව නොගත්තා නම් අද රටේ ජනතාව මිය යන්නේ ඖෂධ නැතුවයි. කිරිපිටි නොමැතිව දරුවන් මිය යන්න ඉඩ තිබුණා.

එදා තෙල් පෝලිම්වල සිටි පිරිස්වලට වැඩි මිලට තෙල් විකිණූ පිරිස් අද මාලිමාවට සහාය දෙනවා. ඔවුන්ට ඒ නායකයන් හොඳයි. ඒ අන් කිසිවක් නිසා ‍නොවෙයි. මාලිමා පාලනයක් ආවොත් නැවත අරගලයක් එනවා. නැවත තෙල් පෝලිම් එනවා. එතකොට වැඩි මිලට තෙල් විකුණන්න ඔවුන්ට හැකියාව ලැබෙනවා. ඒ නිසා තවදුරටත් අත්හදාබැලීම් කරන්න බැහැ. එල්ටීටීඊ සංවිධානයයි, ජනතා විමුක්ති පෙරමුණයි. මේ රටට කළ විනාශය නොවෙන්න අද මේ රට සංවර්ධිත රටක්. රටක් ලෙස ණය ලබා ගැනීමට සිදු වු‍ණේ ඔවුන් එදා කළ විනාශය නිසයි.

 අනුර කුමාර දිසානායක එදා ඇමැති මණ්ඩලය නියෝජනය කළා. වැව් දසදහසක් ඉදි කිරීමේ ව්‍යාපෘතිය ඔහුට භාර දුන්නා. අඩුම තරමින් වැව් දහයක්වත් හැදුවේ නැහැ. නමුත් පෝස්ටර්, බැනර්වලින් විශාල ප්‍රචාරණයක් ලබා දුන්නා. සංදර්ශන විතරයි. කරපු දෙයක් නැහැ. එදා ඩබල් කැබ්වල ගිය ඔවුන් අද යන්නේ සුපිරි වාහනවලයි. මේ අය ඇමැති වගකීම් දන්නේ නැහැ. ඒ කාලයේ කළ දේවල් හොයාගෙන ගියොත් අනුර දිසානායක කියන්නේ අසාර්ථකම කෘෂිකර්ම අමාත්‍යවරයායි. ඒ වගේ අසාර්ථක වූ නිවාස අමාත්‍යවරයෙකුට රට භාරදීලා රට යළිත් විනාශ කරන්න අවශ්‍යද? අපේ ජනතාවට ජීවත් විය හැකි පරිසරයක් නිර්මාණය කළේ ජනාධිපති රනිල් වික්‍රමසිංහ මහතා බව අමතක කිරීමට තරම් මේ රටේ ජනතාව ගුණමකුවන් නොවන බව කිව යුතුයි.

ශ්‍රී ලංකා නිදහස් පක්ෂයේ භාණ්ඩාගාරික, පොදුජන එක්සත් පෙරමුණේ ප්‍රධාන ලේකම්, රාජ්‍ය අමාත්‍ය ලසන්ත අලගියවන්න :

ශ්‍රී ලංකා නිදහස් පක්ෂයේ 73 වැනි සංවත්සරය අප ඉතා අභිමානයෙන් යුතුව අද සමරනු ලබනවා. ශ්‍රී ලංකා නිදහස් පක්ෂය ආරම්භයේ සිටම අභියෝගවලට මුහුණ දුන් පක්ෂයක්බව කිව යුතුයි. පක්ෂයේ නිර්මාතෘවරයා වන එස්. ඩබ්ලිව්. ආර්. ඩී. බණ්ඩාරනායක මැතිතුමා ඝාතනයට ලක් වුණා. සිරිමාවෝ මැතිනියගේ ප්‍රජා අයිතිය අහිමි කෙරුණා. මේ ගමන් මඟ තුළ ශ්‍රී ලංකා නිදහස් පක්ෂය බාධක කම්කටොලු රැසකට මුහුණ දුන්නා.

නමුත් ඒ සෑම අභියෝගයක්ම සාර්ථකව ජයග්‍රහණය කිරීමට අපට හැකි වුණා. මෑත කාලයේදීත් ශ්‍රීලනිපය යම් අර්බුදකාරී තත්ත්වයන්ට මුහුණ දුන්නා. නමුත් අද වන විට ශ්‍රී ලංකා නිදහස් පක්ෂය ඒ සියලු අර්බුදයන් සමනය කර ගැනීමට සමත්ව සිටිනවා. ඒ වගේම අපෙන් වෙන්වූ සියලු පාර්ශ්වයන් පක්ෂය වටා යළිත් ඒකරාශී වෙමින් සිටිනවා. ශ්‍රී ලංකා නිදහස් පක්ෂය යනු ඉතිහාසයේ සිට යුගයේ අවශ්‍යතාවය ඉටු කළ පක්ෂයක්. ජාතික ප්‍රශ්නවලදී පක්ෂ පාට පසෙකලා අපේ යුතුකම අප ඉටු කර තිබෙනවා.

පක්ෂය තුළ විවිධ මතවාද තිබුණත් රට ගොඩ නැඟීම වෙනුවෙන් පක්ෂ භේද සියල්ල අමතක කර ජනාධිපති රනිල් වික්‍රමසිංහ මහතාට සහාය ලබා දීමට පක්ෂයේ මධ්‍යම කාරක සභාව විසින් තීන්දුවක් ගනු ලැබුවා. ඒ සහාය ලබාදීමේ තීරණය නිවැරදි බව අද අපේ රට තිබෙන තත්ත්වය අනුව පෙනී යනවා. අපගේ මේ සහාය ලබාදීම් සිදු කරන්නේ ශ්‍රී ලංකා නිදහස් පක්ෂයේ ප්‍රතිපත්ති ආරක්ෂා කරමින් ඊට අනුකූලව බවද පැවසිය යුතුයි.

ශ්‍රී ලංකා නිදහස් පක්ෂයේ මහ ලේකම්, පාර්ලිමේන්තු මන්ත්‍රී දුමින්ද දිසානායක

ශ්‍රී ලංකා නිදහස් පක්ෂය මේ රටේ ජනතාවට සිදුකළ කාර්යභාරය ගැන අමුතුවෙන් කිව යුතු නැහැ. එස්.ඩබ්ලිව්.ආර්.ඩී බණ්ඩාරනායක ශ්‍රීමතාණන්, සිරිමාවෝ බණ්ඩාරණායක මැතිනිය, චන්ද්‍රිකා බණ්ඩාරණායක මැතිනිය, මහින්ද රාජපක්ෂ මැතිතුමා, මෛත්‍රීපාල සිරිසේන මැතිතුමා යන ශ්‍රී ලංකා නිදහස් පක්ෂයේ නායකයන් මේ රට වෙනුවෙන් සිදු කළ විශිෂ්ඨ සේවයද මා මේ මොහොතේ ගෞරවයෙන් සිහිපත් කරනවා. වසර 73ක ඉතිහාසය තුළ මේ රටේ අනාගතය වෙනුවෙන් ශ්‍රී ලංකා නිදහස් පක්ෂය සිදු කළ කාර්යභාරය පිළිබඳව අප ආඩම්බර වෙනවා.

එවන් අභිමානවත් ඉතිහාසයක් හිමි ශ්‍රී ලංකා නිදහස් පක්ෂය අද තවත් ඓතිහාසික තීන්දුවක් ගනු ලැබුවා. ඒ මීට වසර දෙකකට පෙර මේ රට ආර්ථික අර්බූදයකට මුහුණ දී සිටි අභියෝගාත්මක අවස්ථාවක ජනාධිපති රනිල් වික්‍රමසිංහ මැතිතුමා සමඟ ආණ්ඩුවක් පිහිටුවා ගැනීමයි. අපි එදා පෙනී සිටියේ පක්ෂයක් හෝ පුද්ගලයෙක් වෙනුවෙන් නොවෙයි. ඉතිහාසයේ සිටම සත්‍යය වෙනුවෙන් පෙනී සිටි ශ්‍රී ලංකා නිදහස් පක්ෂය තීන්දු තීරණ ගන්නේ රටේ ජනතාව වෙනුවෙන් බව කිව යුතුයි.

දේශපාලනය කියන්නේ ඉන්ධන, පොහොර, ඖෂධ නැති වන විට ‘කෝ ඒවා නැහැනෙ’ කියන එක නොවෙයි. සමස්ත ශ්‍රී ලංකා කාරයන්ට අවශ්‍ය වුණේ රට නැවත ගොඩ නැඟීම පමණයි. එහිදී ඇතැම් කණ්ඩායම් ශ්‍රී ලංකා නිදහස් පක්ෂය කඩා දමන්න, විකුණන්න උත්සාහ කළා. රටට ආදරය කරන ශ්‍රී ලංකාකාරයන් නිසා පක්ෂය බේරා ගැනීමට හැකියාව ලැබුණා. ඒ ගෞරවය මේ රටේ සිටින සමස්ත ශ්‍රී ලංකා නිදහස් පාක්ෂිකයන්ට හිමි වෙනවා.

මහා සංඝරත්නය ප්‍රමුඛ සෙසු අන්‍යාගමික නායකයන්, ජ්‍යෙෂ්ඨ උප සභාපති ලෙස්ලි දේවේන්ද්‍ර, නියෝජ්‍ය ලේකම් ජගත් පුෂ්පකුමාර, හිටපු ලේකම් දුෂ්මන්ත මිත්‍රපාල, දේශපාලන මණ්ඩල සභික වීරකුමාර දිසානායක යන මහත්වරුන්, හිටපු පාර්ලිමේන්තු මන්ත්‍රී ජීවන් කුමාරතුංග ඇතුළු දේශපාලන මණ්ඩල සභිකයන්, විධායක සභිකයන්, මධ්‍යම කාරක සභා සාමාජිකයන්, ආසන සංවිධායකවරුන්, දිස්ත්‍රික් සංවිධායකවරුන්, සියලු වෘත්තීය සමිතිවල සාමාජිකයන්, ශ්‍රී ලංකා නිදහස් පක්ෂය ප්‍රමුඛ නව සංධානයේ නියෝජිතයන් ඇතුළු පාක්ෂිකයන් විශාල පිරිසක් මෙම අවස්ථාවට එක්ව සිටියහ.