පුවත්

පාසල් සිසුන්, පිරිවෙන්වල ගිහිපැවිදි සිසුන් හා සීලමාතාවන් සඳහා පාවහන් මිලදී ගැනීමට රුපියල් 3,000ක් බැගින් තිළිණ පතක් ලබාදීමට අමාත්‍ය මණ්ඩල අනුමැතිය හිමිවී තිබෙයි.

ඒ, අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය ලෙස අග්‍රාමාත්‍ය ආචාර්ය හරිනි අමරසූරිය ඉදිරිපත් කළ කැබිනට් පත්‍රිකාව සඳහායි.

විශ්‍රාමික ජනාධිපතිවරයෙකු වෙනුවෙන් නීත්‍යානුකූලව ලබා දී තිබෙන නිවාසයක මාසික කුළිය මෙන් 140 ගුණයකට ආසන්න අයුතු වරප්‍රසාද හිටපු ජනාධිපති මහින්ද රාජපක්ෂ විසින් මහජන බදු මුදලින් භුක්ති විඳ ඇති බව අනාවරණය කර ගෙන තිබේ.

ඔහු මේ වනවිට පදිංචි වී සිටින නිවසේ මාසික කුළිය රුපියල් ලක්ෂ 46ක් වන බව රජයේ තක්සේරුකරුවන් ජනාධිපති අනුර කුමාර දිසානායක වෙත ලබා දුන් වාර්තාවකින් පෙන්වා දී තිබේ.

එහෙත්, විශ්‍රාමික ජනාධිපතිවරයෙකුගේ නීත්‍යානුකූල හිමිකම වී තිබෙන්නේ විශ්‍රාම වැටුපෙන් 1/3කට සමාන නිවාස කුළියක් මහජන මුදලින් ලබා දීම බව හෙළිකර ගෙන ඇත.

මේ ආකාරයෙන් නීති විරෝධී ලෙස ලබා ගෙන තිබෙන වරප්‍රසාද ඉවත් කරන බව ජනාධිපති අනුර කුමාර දිසානායක, කළුතර, කටුකුරුන්ද වෙට්ටුමකඩ පාකිස්ථාන් ක්‍රීඩා පිටියේ ඊයේ (19) පැවති සුහද හමුවකදී ප්‍රකාශ කළේය.

පාර්ලිමේන්තු මන්ත්‍රීවරුන්ගේ විශ්‍රාම වැටුප් අහෝසි කිරීමේ යෝජනාවක් ද ළඟදී ම සම්මත කරන බව ජනාධිපතිවරයා වැඩිදුරටත් පැවසීය.

''දූෂිත දේශපාලනය මුලිනුපුටා දැමීමට කටයුතු කරනවා''

ජනතාවට පොරොන්දු වූ අයුරින්ම දූෂිත දේශපාලනය මුලිනුපුටා දැමීමට කටයුතු කරන බව ද ජනාධිපති අනුර කුමාර දිසානායක එම ජන හමුවේදී අවධාරණය කළේය.

එහිදී ඔහු මෙසේද පැවසිය.

"අපි නොවැම්බර් මාසේ 21 වනදා දිවුරුම් දුන්නා කැබිනට් මණ්ඩලයේ ඇමතිවරු 21යි. රාජ්‍ය ඇමතිවරු කියලා කෑලි නැහැ. ඉස්සර අමාත්‍යධුර ඇඟේ හැප්පෙනවා මේ කළුතර. අපිට කළුතර මන්ත්‍රීවරු 8යි, ඇමතිධුර 1යි. රටක් හදන්න ඕනකම තියෙන්නේ මන්ත්‍රීවරුන්ට වරප්‍රසාද දීලා නෙවෙයි. ඉස්සර හැදුවේ එහෙම නෙවෙයි, සතුටු කරන්න. අන්න එහෙම ආණ්ඩුවක් හදන්නේ අපි විතරයි වෙන කවුරුත් හදන්නෙත් නෑ."

"වෙනදා අමාත්‍ය ධුර බෙදන්නේ කොහොමද? මේ අමාත්‍ය ධුර ඥාති වර්ගයාට බෙදාගත්තේ. වෙනදා අමාත්‍යවරුන්ගේ කාර්යමණ්ඩලයට බඳවා ගත්තේ කවුද? බිරිඳ පුද්ගලික ලේකම්තුමිය. මට මතකයි කතානායක මහින්ද යාපා එතුමාගේ කාර්යමණ්ඩලය මහින්ද යාපා යායක්. ඔක්කොම වෙනස් කරලා තියෙන්නේ.

අද කිසිදු අමාත්‍යවරයෙක් පස්සේ වාහනත් නැහැ, පොලිස් රථත් නැහැ. ආණ්ඩුවේ අයට විතරක් නෙමෙයි විපක්ෂයට දෙන්නෙත් නෑ. මොකද පොලීසියට 21,000ක් මදි. ඒ මහත්වරු බොහොම අමාරුවෙන් වැඩ කරන්නේ."

''නෝනගේ හැට්ටේ කටු ගහන්නත් නාවික හමුදාවේ නිලධාරීන් පාවිච්චි කළා''

"සමහරු නාවික හමුදාවේ නිලධාරීන් පාවිච්චි කළා නෝනගේ හැට්ටේ කටු ගහන්න. එහෙම රටක් වෙනස් කළේ අපි. එක ජනාධිපතිවරයෙකුට ආරක්ෂාව සඳහා වසරකට මිලියන 700ක් වියදම් කළා. පොලීසිය, හමුදාව, STF දහස් ගණනක්. ඔක්කොම අයින් කළා, හැටයි.

තව කෙඳිරි ගෑවොත් හැටත් අයින් කරනවා. හැට තියාගෙන ඉන්න මහත්තයෝ කෙඳිරි ගෑවොත් වෙන දේ කියන්නම්. අපි කිසිදු අමාත්‍යවරයෙකුට ආණ්ඩුවේ ගෙවල් දෙන්නේ නැහැ. හිටපු ජනපතිවරුන්ට ගෙවල් දෙන්නෙත් නැහැ. මම දැන්මම ලියුමක් දෙනවා මට නම් ගෙයක් එපා කියලා. හැබැයි අනිත් අය නම් දෙන්නේ නැහැ."

''මහින්දගේ ගෙදර මාසික කුලිය ලක්ෂ 46 යි''

"මහින්ද මහත්තයාගේ ගෙදර තක්සේරු කරන්න යැව්වා. කීයක් වටිනවාද, තවම ඉඩම තක්සේරු කරලා නැහැ. ගේ විතරක් තක්සේරු කළා, තක්සේරුව අනුව මාසික කුලිය ලක්ෂ 46යි. තවම ඉඩම කළේ නැහැ, බෞද්ධාලෝක මාවතේ. අපි ගේ ගන්නවා, පඩියෙන් තුනෙන් එකක් දෙනවා. එහෙම නැත්නම් ඉතිරි සල්ලි ටික දීලා ඒ ගෙයි ඉන්න පුළුවන් . කුලිය දුන්නේ නැත්නම් එළියේ කරන්න ඕනේ, මේ රටක් හදන්න ඕනේ.

රටේ ජනතාව රවටලා ඔවුන් මහජනයාගේ ධනයෙන් විරාජමානව වැජඹෙනවා. මන්ත්‍රී විශ්‍රාම වැටුප අහිමි කිරීමේ යෝජනාව ඉක්මනින් ගෙනඑනවා. පාර්ලිමේන්තුවේ කැන්ටින් එක ගැන විවාදයක් තියෙනවානේ. තව සතියක් දෙකකින් වෙන වැඩේ මං කියන්නම්. කෑම එක ගන්නවා නම් හරි ගාන ගෙවන්න ඕනේ, ඒක කරනවා. ජාතික ජන බලවේගයේ ආණ්ඩුව මන්ත්‍රීවරුන්ට පර්මිට් දෙන්නේ නැහැ ."

(මුලාශ්‍රය | lankatruth)

අම්පාර ගල් ඔයෙහි ඉවුරු නේන කාඩු ප්‍රදේශයෙන් කැඩී ගොස් තිබේ.

මේ නිසා ඇති වූ ගංවතුර තත්ත්වය හේතුවෙන් දීඝවාපිය ජනපදය සතු කුඹුරු අක්කර 1000ක් පමණ ජලයෙන් යටවී ඇති බව වාර්තා වෙයි.

මෙම කුඹුරු බොහොමයක ගොයම පීදී තිබූ අතර අස්වැන්න නෙළීමට ආසන්නයේ තිබූ කුඹුරු රැසක්ද තිබූ බව වාර්තා වේ.

ගම්වාසින් චෝදනා කරන්නේ, නේනකාඩු ප්‍රදේශයේ ගල්ඔයේ ඉවුරු විනාශකර වගා කටයුතු සිදු කිරීම හේතුවෙන් තමන්ට මෙම ඛේදවාචකයට මුහුණ පෑමට සිදුවූ බවයි.

කෙසේ වෙතත් ඉවුර කැඩීයාමෙන් ජීවිත හානි කිසිවක් සිදුව නොමැත.

රජය සතු ආයතන රජයට බරක් ලෙස නොව රටට ඵලදායී අත්‍යවශම ආයතන ලෙස පවත්වාගෙන යාමට කටයුතු කිරීම රජයේ අරමුණ බව සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස පැවසීය.

සෞඛ්‍ය හා ජනමාධ්‍ය අමාත්‍යවරයා මේ බව සඳහන් කරණු ලැබුවේ රජයේ මුද්‍රණ දෙපාර්තමේන්තුවේ ඉදිරි සංවර්ධන කටයුතු සැලසුම් කිරීම පිළිබඳව රජයේ නව මුද්‍රණාලාධිපති කේ.ජී.ප්‍රදීප් පුෂ්පකුමාර  ඇතුළු රජයේ මුද්‍රණ දෙපාර්තමේන්තුවේ සියළුම මාණ්ඩලික නිලධාරීන් සහ අංශ ප්‍රධානීන්ගේ සහභාගීත්වයෙන් බොරැල්ලේ පිහිටි රජයේ මුද්‍රණ දෙපාර්තමේන්තුවේ දී පැවති විශේෂ සාකච්ඡාවක දී ය.

අමාත්‍යවරයා සාකච්ඡාවට සමඟාමීව රජයේ මුද්‍රණාලයට අයත් සියළුම අංශ වෙත පෞද්ගලිකවම ගොස් කරුණූ සොයා බැලු අතර, එහි දී නවක මෙන්ම දශක තුනකටත් වඩා වැඩි සේවා කාලයක් රජයේ මුද්‍රණාලයේම සේවය කර ඇති පලපුරුදු සේවකයන් මුණගැසී මුද්‍රණාලයේ ප්‍රගතිය වැඩිදියුණු කළයුතු අංශ පිළිබඳවත්, එමෙන්ම දුර්වලතා සහ අඩුපාඩු පිළිබඳවත්, කරුණූ සොයා බැලීම සුවිශේෂී සිද්ධියක් විය.

පැය 24 පුරා අඛණ්ඩව සේවා සපයන රජයේ මුද්‍රණාලයේ කටයුතු කිසිදු බිඳවැටීමකින් තොරව ක්‍රියාත්මක කිරීම වැදගත් බව මෙහි දී අවධාරණය කළ අමාත්‍යවරයා, රටේ පවතින ආර්ථික තත්ත්වයන් පිළිබඳව ද සැලකිල්ලට ගනිමින් මනා කලමණාකරණයකින් හා මනා සැලැස්මකට අනුව සියළු වෘත්තිය සමිති වල ද අදහස් එම සැලැස්මට අනුගත කර ගනිමින් ඉදිරි කටයුතු සිදු විය යුතු බව මෙහිදි පැවසීය.

තම ආයතනයේ ප්‍රතිරූපය ඉහළ නංවාගැනීමට පමණක් නොව සමස්තයක් ලෙස සියළු ආයතනවල ප්‍රතිරූපය ඉහළ නැංවීමට සහ ලබාදෙන සේවාවන් විධිමත් කිරිමට කටයුතු කළ යුතු බවත් මෙහි දී තවදුරටත් පැවසු අමාත්‍යවරයා සියළු ආයතන අතර මනා සම්බන්ධීකරණයක් සහිතව කටයුතු කිරීම තුලින් පෞද්ගලික ආයතන මෙන් ලාභ උත්පාදනය කල හැකි ක්ෂේත්‍රවලට අදාළව විවෘත වෙළෙදපොල සමග තරඟ කිරිමට උත්සාහ කල යුතු බව ද පැවසීය. ඉතා දීර්ඝ ඉතිහාසයක් සහිත රජයේ මුද්‍රණ දෙපාර්තුමේන්තුව මෙරට තරුණ ප්‍රජාවට මුද්‍රණ ක්ෂේත්‍රය පිළිබඳ දැනුම බෙදා දීමේ පෙර ගමන්කරුවක් විය යුතු බව මෙහි දී අවධාරණය කළ අමාත්‍යවරයා තරුණ ප්‍රජාව මුද්‍රණ ක්ෂේත්‍රයට ආකර්ශණය කර ගත හැකි වැඩපිළිවෙලක් සකසන ලෙස ද වැඩිදුරටත් පැවසීය.

කාර්ය මණ්ඩල සංඛ්‍යා සමාලෝචනය, තාක්ෂණික කාර්ය මණ්ඩලයේ පුරප්පාඩු සම්පූර්ණ කිරීම, රජයේ මුද්‍රණ දෙපාර්මේන්තුවට සංශෝධිත දිරි දීමනා ක්‍රමවේදයක් ක්‍රියාත්මක කිරීම, දෙපාර්තමේන්තුවට නවීන තාක්ෂණය අත්පත් කරගනිමින් සංවර්ධනය කිරීම සඳහා සියලුම ක්ෂේත්‍ර ආවරණය වන පරිදි සංයුක්ත සැලැස්මක් ක්‍රියාත්මක කිරීම, සියලුම ප්‍රකාශන කටයුතු යුනිකෝඩ් මඟින් සිදු කිරීම, සයිබර් ආරක්ෂණ වැඩපිළිවෙලක් ක්‍රියාත්මක කිරීම යන කරුණු පිළිබදව ද මෙහිදී සාකච්ඡාවට ගැනුණි.

“කෘතහස්ත කාර්ය මණ්ඩලය නවීන තාක්ෂණය උපයෝගී කරගෙන කලට වේලාවට ගුණාත්මක නිමාවකින් යුතුව සේවාලාභීන් තෘප්තිමත් වන අයුරින් මුද්‍රණ හා ප්‍රකාශන සේවා සැපයීම” මෙහෙවර කර ගනිමින් ක්‍රියාත්මක රජයේ මුද්‍රණ දෙපාර්තමේන්තුව රාජ්‍ය සහ අර්ධ රාජ්‍ය ආයතනයන්හි රහස්‍ය, හදිසි, අත්‍යවශ්‍ය මුද්‍රණ ඇතුළු මුද්‍රණ හා ප්‍රකාශන සේවා සැපයීම, අන්තර්ජාලය හරහා සෘජුවම ගැසට් පත්‍ර මඟින් තොරතුරු සන්නිවේදනය කිරීම, මුද්‍රණ කටයුතු සම්බන්ධ තාක්ෂණික සේවාවන් සැපයීම යන කාර්යයන් සිදු කරනු ලබයි.

වරප්‍රසාද සහ අනුග්‍රහන මත යුක්තිය ඉටු නොවීමෙන් දුක්විදින ජනතාවට, සාධාරණය ඉටු කිරීම රජයේ අභිප්‍රාය බව අග්‍රාමාත්‍ය ආචාර්ය හරිනි අමරසූරිය පැවසුවාය.

මහජන චීන සමූහාණ්ඩුවේ පුර්ණ ප්‍රදානයක් ලෙස නවීකරණය කරන ලද අභියාචනාධිකරණ ගොඩනැගිල්ල ජනතා අයිතියට පත්කිරීමේ අවස්ථාවට එක්වෙමින් පසුගියදා පැවති උත්සවයේදී අග්‍රාමාත්‍යවරිය මේ බව සඳහන් කළාය.

මෙහිදී වැඩි දුරටත් අදහස් දැක් වූ අග්‍රාමාත්‍ය ආචාර්ය හරිනි අමරසූරිය,

රටක අධිකරණ පද්ධතිය තුළ සහ ජනතාවට යුක්තිය පසිඳලීම සඳහා පහසුකම් වෙනුවෙන් කරන ආයෝජනය රට කෙරෙහි, එහි ජනතාව කෙරෙහි ඇති කැපවීම පිළිබිඹු කිරීමක්.

මෙය හුදෙක් ගොඩනැගිල්ලක් පමණක් නෙමෙයි, යුක්තිය පසිඳලීම, නීතියේ සාධාරණත්වය, සමානාත්මතාවය සහ අභිමානය පෙන්නුම් කරන සංඛේතයක්.

වරප්‍රසාද සහ අනුග්‍රාහක ක්‍රම යටතේ බොහෝ දෙනෙකුට යුක්තිය ප්‍රතික්ෂේප වීම නිසා අපේ රට දශක ගණනාවක් දුක් වින්දා, අපගේ අභිප්‍රාය වන්නේ එම වැරදි නිවැරදි කිරීම, අතීතයේ සිදු වූ අසාධාරණයන් නිවැරදි කිරීම සහ සෑම කෙනෙකුටම යුක්තිය සඳහා ඉඩප්‍රස්ථාව ඇති බව සහතික කිරීමයි.

ආණ්ඩුක්‍රම ව්‍යවස්ථාවෙන් විනිසුරුවරුවරුන්ට ලබා දී ඇති නීතිමය බලය සාධාරණව සිදු කිරීමත්, අදාළ පාර්ශව වලට ස්වාධිනව සහ සාධාරණ විනිශ්චයක් ලබා දීමත් තුලින් ජනතාව තුල අධිකරණ පද්ධතිය ගැන විශ්වාසයක් ඇති විය යුතුයි.

කාන්තාවන්, දරුවන්, ආබාධිත ප්‍රජාව ඇතුළු සියලු දෙනාම බලාපොරොත්තු වන්නේ සාධාරණයයි.එහිදී කිසිවකුට දුෂ්කරතා ඇති නොවන බව සහතික කිරීම. මානසික තත්වයන් පිළිබඳ අවධානය ලබා දීම, ඔවුන් වෙනුවෙන් යුක්තිය ඉටු කර ගැනීමේදී හෝ ඔවුන්ගේ අයිතිවාසිකම් ආරක්ෂා කිරීමේදී මුහුණ දිය හැකි ප්‍රතිවිපාකවලින් ආරක්ෂාව සැපයීම ජනතාව බලාපොරොත්තු වෙනවා. මේ ක්‍රියාවලියේ සියලුම ක්‍රියාකාරීන්ට ගෞරවාන්විතව සැලකීම අවශ්‍යයි. යුක්තියේ සාධාරණය වෙනුවෙන් වසර ගණනාවක් දුෂ්කරතාවන්ට මුහුණ දෙන පිරිස් සිටිනවා. ඔවුන්ගේ සාධාරණය වෙනුවෙන් ඔවුන්ට ලැබෙන සැලකීම අපි සහතික කරනවා. යුක්තියේ සාධාරණය හඹා යාමේදී ඇතිවන බිය ගැන්වීමක් හෝ පීඩාවක් හෝ හිරිහැරයක් ඔවුන්ට සිදු නොවිය යුතුයි.
මහජන චීන සමූහාණ්ඩුවේ ඔවුන්ගේ ත්‍යාගශීලීභාවය සහ මේ රටේ ජනතාවට යුක්තිය ඉටු කිරීම වෙනුවෙන් ඔවුන් දැක්වූ සහයෝගයට ස්තූති පුද කරන බව අග්‍රාමාත්‍ය ආචාර්ය හරිනි අමරසූරිය පැවසුවාය.

මෙම අවස්ථාවට චීන මහජන සමූහාණ්ඩුවේ මෙරට තානාපති Qi Zhenhong, අගවිනිසුරු මුර්දු ප්‍රනාන්දු යන මහත්ම මහත්මීන් ඇතුළු පිරිසක් සහභාගී වූහ.

හිටපු අමාත්‍ය විජිත් විජයමුණි ද සොයිසා, වලාන මධ්‍යම දූෂණ මර්ධන ප්‍රහාරක ඒකකය විසින් අද (19) අත්අඩංගුවට ගෙන ඇත.

නීති විරෝධීව ආනයනය කරන ලද වාහන අමතර කොටස් භාවිතා කර ලොරි රථයක් එකලස්කර, ඒ සඳහා ව්‍යාජ ලේඛන සකස්කරගැනීමේ වරද මත මෙම අත්අඩංගුවට ගැනීම සිදුකළ බව පොලීසිය පවසයි.

ඒ අනුව අත්අඩංගුවට ගත් විජිත් විජයමුණි ද සොයිසා, හෙට (20) බණ්ඩාරවෙල අධිකරණය වෙත ඉතිරිපත් කිරීමට නියමිතව ඇත.

එමෙන්ම වලාන මධ්‍යම දූෂණ මර්ධන ප්‍රහාරක ඒකකය විසින් විජිත් විජයමුණි ද සොයිසා විසින් මෙලෙස වෙනත් වාහනද එකලස් කිරීමක් සිදුකර ඇත්දැයි සොයා තවදුරටත් විමර්ශන සිදුකරමින් පවතින බවද පොලීසිය පවසයි.

එකලස් කරන ලද ලොරි රථයක් සම්බන්ධයෙන් වලාන මධ්‍යම දූෂණ මර්ධන ප්‍රහාරක ඒකකය වෙත ප්‍රකාශයක් ලබාදීමට පැමිණි අවස්ථාවේ මෙම අත්අඩංගුවට ගැනීමට සිදුකර ඇත.

එහිදී ඔහු ඔහු පැය 5කට ආසන්න කාලයක් ප්‍රකාශ ලබාදීමෙන් අනතුරුව මෙලෙස අත්අඩංගුවට පත්ව තිබේ.

ජ්‍යෙෂ්ඨ මාධ්‍යවේදී වික්ටර් අයිවන් මහතා අද (19) පස්වරුවේ අභාවප්‍රාප්ත විය.

කලක් රෝගාතුරව සිටි ඒ මහතා ගාල්ල, කපුහෙන්පොළ නිවසේදී අභාවප්‍රාප්ත වී ඇති බව පවුලේ ආරංචි මාර්ග සඳහන් කළේය.

1949 වසරේ ජුනි 26 වනදා උපත ලැබූ අයිවන් මහතා මියයන විට 75වන වියේ පසුවිය.

අයිවන් මහතා කටුගස්තොට ශාන්ත අන්තෝනි විද්‍යාලයේ ආදි ශිෂ්‍යයෙකු වේ.

80 දශකය අගභාගයේ බිහි වූ රාවය පුවත්පතේ සමාරම්භක කතෘවරයා වූ වික්ටර් අයිවන් මහතා, ජනතා විමුක්ති පෙරමුණේ ආරම්භක සාමාජිකයෙකු ද වේ.

මෙරට දේශපාලනික කෘතින් ගණනාවකම කතෘවරයා ද වන ඔහු, දේශකයෙකු ලෙස සමාජ, ආර්ථික, දේශපාලන හා සංස්කෘතික ක්ෂේත්‍රය සම්බන්ධයෙන් සුවිශාල මතවාදී මැදිහත්වීමක් සිදුකළ අයෙක්ය.

ඔහු විසින් රචිත දේශපාලනික කෘතින් අතර 71 කැරැල්ල, නොනිමි අරගලය, චෞර රැජින සහ දේශපාලනයේ පවුල හා කුලය යන ග්‍රන්ථ පාඨකයන් අතර වඩාත් ප්‍රචලිත විය.

අද දෙරණ

ශ්‍රී ලංකා පොලිසියට නව නිලධාරින් 9,000ක් බඳවා ගැනීමට පියවර ගෙන තිබේ.

මේ වනවිට පොලිසියේ රාජකාරියේ නිරත නිලධාරින් සංඛ්‍යාව 75,000කට ආසන්නය.

එම නිලධාරින් රථවාහන පාලනය, අපරාධ හා මත්ද්‍රව්‍ය පාලනය යන මෙහෙයුම් වල නිරතව සිටි.

ඒ සියලු කටයුතු සිදුකිරීමට දැනට සිටින නිලධාරින් සංඛ්‍යාව ප්‍රමාණවත් නොවීම හේතුවෙන් අලුතින් පොලිස් නිලධාරින් බඳවා ගැනීමට තීරණය කළ බව පොලිසිය සඳහන් කරයි.

අධ්‍යයන පොදු සහතික පත්‍ර උසස් පෙළ උත්තර පත්‍ර අගැයීම් කරනු ලබන ගුරුවරියන් සාරියක් හෝ ඔසරියකින් සැරසී නොපැමිණීම හේතුවෙන් කොළඹට නුදුරු ප්‍රධාන පාසලකට ඇතුළු වීම තහනම් කර තිබේ.

උසස් පෙළ සංයුක්ත ගණිතය උත්තර පත්‍ර අගැයීමට පෙරේදා (ජනවාරි 16) වැනි දා පන්නිපිටිය ධර්මපාල විදුහලේ පිහිටා ඇති මධ්‍යස්ථානයට ගිය ගුරුවරියන් මෙලෙස එම පාසලෙන් හරවා යවා ඇති බව ලංකා ගුරු සංගමයේ ප්‍රධාන ලේකම් ජෝසෆ් ස්ටාලින් බීබීසී සිංහල සේවයට පැවසීය.

අදාළ සිදුවීම වූ අවස්ථාවේදී එම ස්ථානයට පොලිසිය කැඳවා ඇති අතර මෙම සිදුවීම තමන්ට අදාළ නැති බව පොලිසිය පවසා තිබූ බව ද ඔහු සඳහන් කළේ ය.

පන්නිපිටිය ධර්මපාල විදුහලේ ඇති අගැයීම් මධ්‍යස්ථානයට ගිය ගුරුවරියන් මෙලෙස එම පාසලෙන් හරවා යවා ඇති බව ලංකා ගුරු සංගමයේ ප්‍රධාන ලේකම් ජෝසෆ් ස්ටාලින් පැවසීය

'ගුරුවරියන්ට නිල ඇඳුමක් නෑ'

"ගුරුවරියන්ට කොහෙවත් නිල ඇඳුමක් දීලා නැහැ සාරි අඳින්න කියලා. කැමති අය සාරි අඳිනවා වෙනත් සුදුසු ඇඳුමක් අඳින්න කියලා පහුගිය කාලේ ඉඳන් ම තිබුණේ. නමුත් අගැයීම් මධ්‍යස්ථානවලට යනකොට ඒවා වෙනත් රාජකාරි, ඉගැන්වීමේ කාර්යයක් නෙමෙයි. මේ මධ්‍යස්ථානයේ, ⁣මේ ශාලාවේ එක ෆෑන් එකයි තිබුණේ. එතන ⁣ඔක්කොට ම ඉන්න බෑ, සංයුක්ත ගණිතය කියන්නේ සංකීර්ණ ප්‍රශ්න පත්‍රයක් ඒක නිවැරදි මානසිකත්වයෙන් කරන්න ඕනේ. දැන් උත්තර පත්‍ර අගැයීම් කරන්න දෙන දීමනාවත් ප්‍රමණාවත් නැහැ ගුරුවරුන්ට, නමුත් ළමයි වෙනුවෙන් මේ කටයුත්ත කරන්නේ. එහෙම තියෙද්දි මේ ආකාරයෙන් පීඩාවට පත් කිරීම වැරදියි."
වෙළෙඳ දැන්වීමක්

ගුරුවරියන්ට සාරි ඇඳීම අනිවාර්ය කර නොමැති පසුබිමක පන්නිපිටිය ධර්මපාල විදුහලේ විදුහල්පතිවරයා විභාග මධ්‍යස්ථානයේ ගුරුවරුන් හරවා යැවීම ගැන පරීක්ෂණයක් පැවැත්විය යුතු බව ලංකා ගුරු සංගමයේ ලේකම්වරයා අවධාරණය කළේ ය.

අදාළ සිදුවීම වූ අවස්ථාවේදී එම ස්ථානයට පොලිසිය කැඳවා තිබිණි

කිංස්වුඩ් විදුහලෙත් මෙවැනි ම සිදුවීමක්

පසුගිය සතිඅන්ත නිවාඩු දිනවලදී මහනුවර කිංස්වුඩ් විදුහලේ පිහිටා ඇති උත්තර පත්‍ර අගැයීම් මධ්‍යස්ථානයේ ගුරුවරියන් ද මෙවැනි ම සිදුවීමකට මුහුණ දී ඇතැයි ජෝසෆ් ස්ටාලීන් සඳහන් කළේය.

"මහනුවර කිංස්වුඩ් එකෙත් ඔහොම වුණා. ඒ සතිඅන්තයේ සාරි ඇඳන් ගියේ නෑ කියලා. සතිඅන්තයෙත් සාරි පටලවන් යන්න ඕනේ කියලා නේ කියන්නේ."
"⁣කිංස්වුඩ් එකේ ගේට්ටුවෙන් ඇතුළට අරන් නැහැ. සාරි ඇඳන් එන්න කියලා."

ගුරුවරුන්ගේ ඇඳුම කෙසේ විය යුතු ද?

අධ්‍යාපන අමාත්‍යංශයෙන් නිකුත් කරන ලද 2012/37 අංක දරන 'ගුරුවරුන්ගේ සදාචාරාත්මක හැසිරීම පිළිබඳ ආචාරධර්ම පද්ධතිය හා පොදු නීති මාලාව' නම් චක්‍රලේඛයෙහි ගුරුවරුන්ගේ ඇඳුම් සම්බන්ධයෙන් මෙසේ සඳහන් කර ඇත;

"සැමවිට ම විනීත හා සංවරභාවය රැකෙන පරිදි සංස්කෘතියට අනුකූල වූ, පිරිසිදු, චාම්, මනා පිළිවෙලට සැකසූ ඇඳුමින් සැරසී සිටීම."

"සාමාන්‍යයෙන් උත්තර පත්‍ර අගැයීම් කටයුතු පහුගිය කාලෙම කළේ ඉස්කෝලේ නිවාඩු දීලා. උත්තර පත්‍ර අගැයීම් මධ්‍යස්ථානය තියෙන ඉස්කෝල නිවාඩු දෙනවා. ඉස්කෝලෙත් පවත්ගෙන මේ කටයුතු කරන නිසා තමයි මේ ඔක්කොම ගැටලු එන්නේ. අනිත් එක ගුරුවරියන්ට නිල ඇඳුමක් නෑ. සම්ප්‍රාදායිකව තමයි මේක එන්නේ."

සාරි අඳින ලෙස බලපෑම් කරන බවට චෝදනා

 මේ වනවිට විභාග දෙපාර්තුමේන්තුව විසින් පන්නිපිටිය ධර්මපාල විදුහලේ පිහිටුවා ඇති මධ්‍යස්ථානයේ අගැයීම් කටයුතු තාවකාලිකව නැවතීමට පියවර ගනු ලැබ ඇත.

විභාග දෙපාර්තුමේන්තුව මෙලෙස අගැයීම් කටයුතු නවතා දැමීම හරහා ඔවුන්ගේ "කුහකත්වය" සහ "දීන මානසිකත්වය" පෙන්නුම් කරන බවට ද වෘත්තීය සමිති නායකයා චෝදනා කළේ ය.

විභාග කෙමසාරිස් ජනරාල්වරයාගෙන් මෙන් ම අධ්‍යාපන ලේකම්වරයාගෙන් මෙම ගැටලුව සඳහා දිනයක් ඇතුළත විසඳුමක් ලබා දෙන ලෙස ඉල්ලා සිටි බව ජෝසෆ් ස්ටාලින් බීබීසි සිංහල වෙත පැවසීය.

"අද දවස ඇතුළත මේ ගැන තීන්දුවක් ගන්න ගමන් වටින් යම් යම් විදිහට ගුරුවරුන්ට බලපෑම් කරවනවා සාරි ඇඳන් එන්න කියලා. මොකට ද මෙහෙම කරන්නේ, මොකද්ද බලාපොරොත්තු වෙන සාදාචාරය මේකෙන්."

අද සිට අගැයීම් කටයුතු විභාග දෙපාර්තුමේන්තුවේ

අදාළ සිදුවීම සම්බන්ධයෙන් විභාග කොමසාරිස් ජනරාල් අමිත් ජයසුන්දරගෙන් බීබීසී සිංහල විමසීමක් කළේ ය.

එහිදී ඔහු සඳහන් කළේ අදාළ කණ්ඩායම් දෙක විභාග දෙපාර්තුමේන්තුවේ ස්ථාපනය කර ඇති අගැයීම් මධ්‍යස්ථානයට කැඳවා ජනවාරි 18 සිට යළි උත්තර පත්‍ර අගැයීම් කටයුතු ආරම්භ කරන බව ය.

"ඒ පැනල්ස් දෙක හෙට ඉඳලා පටන් ගන්නවා මම විභාග දෙපාර්තුමේන්තුවේ. එතනින් ඒ ප්‍රශ්නය ඉවරයි. මම හිතනවා මාධ්‍යයෙන් මේ ප්‍රශ්නය වැඩිය ම හයිලයිට් වෙන්න ඕනේ නැහැ කියලා."

මෙම සිදුවීමට අදාළ විදුහලේ විදුහල්පතිනිය සම්බන්ධව ක්‍රියාමාර්ගයක් ගන්නේ දැයි අප විභාග කොමසාරිස් ජනරාල්වරයාගේ විමසනු ලැබීය.

"විදුහල්පතිනිය සම්බන්ධයෙන් ක්‍රියාමාර්ගයක් ගන්න මට පුළුවන් කමකුත් නැහැ. මට අවශ්‍යතාවයකුත් නැහැ නේ. විදුහල්පතිනිය පාසල් පාලනය කරගෙන යන කෙනෙක් නේ. මම දකින්නේ නැහැ එයා කරපු වැරැද්දක් සම්බන්ධයෙන්," යැයි විභාග කොමසාරිස් ජනරාල් අමිත් ජයසුන්දර වැඩිදුරටත් පැවසීය.

| BBC සිංහල සේවය

නව රජයේ ප්‍රතිපත්ති සමඟ සංවිධානාත්මක අපරාධකරුවන්ට තවදුරටත් දේශපාලන රැකවරණය හිමි නොවන බව වැඩබලන පොලිස්පති ප්‍රියන්ත වීරසූරිය අවධාරණය කරයි.

ඔහු මේ බව සඳහන් කළේ ‘නව රජයේ වැඩපිළිවෙල සමග පොලීසියේ කාර්යභාරය’ යන තේමාව යටතේ රජයේ ප්‍රවෘත්ති දෙපාර්තමේන්තුවේ පැවැති විශේෂ මාධ්‍ය හමවුකට ඊයේ (17) එක්වෙමිනි.

විදෙස් රටවල සිටින අපරාධකරුවන් පිළිබඳව රතු නිවේදන ලබාගෙන ඉතා ඉක්මණින් ලංකාවට රැගෙන ඒමට කටයුතු කරන බවයි වැඩබලන පොලිස්පතිවරයා මෙහිදී කියා සිටියේය.

අපරාධකරුවන් නීතිය ඉදිරියට ගෙන ඒමට පොලීසියට වගකීමක් ඇති බවද අවධාරණය කළ ඒ මහතා අපරාධ මර්දනය පිළිබඳව පසුගිය කාලයේ නිසි ලෙස ක්‍රියාමාර්ග ගැනීමට නොහැකි වීම හේතුවෙන් අපරාධකරුවන් වැඩි වශයෙන් බිහිවූ බවද සඳහන් කළේය.

මේ අතර මේ දිනවල අපරාධ වැඩිවීමක් දක්නට ලැබීම පිළිබඳ අදහස් දක්වමින් වැඩබලන පොලිස්පතිවරයා සඳහන් කළේ, එම අපරාධ මෙහෙයවන පුද්ගලයින් විදෙස්ගතව සිටි එම අපරාධ මෙහෙයවන බවයි.

“ඒ වගේම අපි දකින අනෙක් තිත්ත ඇත්ත තමා මේ අපරාධකරුවන් බන්ධනාගාරය තුළ ඉඳන් අපරාධ මෙහෙයවමින් ඉන්නවා. මේවා සම්බන්ධයෙන් අපි අඛණ්ඩව කටයුතු කරන අතර එම අපරාධ අවම කිරීමට කටයුතු කරනවා.” යනුවෙන් ද වැඩබලන පොලිස්පතිවරයා වැඩිදුරටත් සදහන් කළේය.

එක්සත් ජාතීන්ගේ ව්‍යාපෘති සේවා සඳහා වන කාර්යාලයේ (UNOPS) දකුණු ආසියානු කාර්යාලයේ අධ්‍යක්ෂ චාල්ස් කැලනන් අග්‍රාමාත්‍ය කාර්යාලයේදී ශ්‍රී ලංකා අග්‍රාමාත්‍ය ආචාර්ය හරිනි අමරසූරිය  හමුවී ඇත.

මෙහිදී ප්‍රධාන සංවර්ධන ක්ෂේත්‍රවල UNOPS සහ ශ්‍රී ලංකා රජය අතර සහයෝගීතාව ශක්තිමත් කිරීම පිළිබඳව සාකච්ඡාවේදී අවධානය යොමු ඇත.

මෙරට තීරණාත්මක සහ වැදගත් අංශ ගණනාවක් ඩිජිටල්කරණයට ලක් කිරීම, පාලනය වැඩිදියුණු කිරීම සහ පාරිසරික හා සැපයුම් අභියෝගවලට විසඳුම් සෙවීම පිළිබඳව මෙම හමුවේදී වැඩිදුරටත් සාකච්ඡා කර ඇත.

ප්‍රවේශ්‍යතාව සහ කාර්යක්ෂමතාව වැඩි දියුණු කිරීම සඳහා ඩිජිටල් විසඳුම් හරහා ශ්‍රී ලංකාවේ සෞඛ්‍ය ක්ෂේත්‍රය නවීකරණය කිරීමේ අවශ්‍යතාවයයි අග්‍රාමාත්‍යවරිය මෙහිදී අවධාරණය කර ඇත.

සෞඛ්‍ය සේවා සැපයීම වැඩිදියුණු කිරීමට ඇති හැකියාව ඉස්මතු කරමින් මෙම මුලපිරීම සඳහා UNOPS හි සහය ලබා දෙන බවට කැලනන් මහතා මෙහිදී සහතික වී ඇත.

ශ්‍රී ලංකා රජයේ විවිධ ව්‍යාපෘති සඳහා UNOPS හි දායකත්වය ලබාදීම සම්බන්ධයෙන් ආචාර්ය අමරසූරිය සිය කෘතවේදීත්වය පළ කර තිබේ.

අග්‍රාමාත්‍ය අතිරේක ලේකම් සාගරිකා බෝගහවත්ත, සහ විදේශ කටයුතු අමාත්‍යාංශයේ එක්සත් ජාතීන්ගේ සහ මානව හිමිකම් අංශයේ නියෝජ්‍ය අධ්‍යක්ෂ සුභාෂිනි සිල්වා ද මෙම හමුවට එක් ව ඇත.

දුම්රිය ආසන වෙන් කිරීමේ දී දුම්රියේ ගමන් කිරීමට නියමිත මඟියාගේ ජාතික හැඳුනුම්පත් අංකය හෝ විදෙස් ගමන් බලපත්‍ර අංකය ඇතුළත් කිරීම අනිවාර්ය කර ඇති බව දුම්රිය දෙපාර්තමේන්තුව නිවේදනය කරයි.

ඒ අනුව, දුම්රිය ස්ථානයට ඇතුළු වීමේ දී හා දුම්රිය තුළ දී ප්‍රවේශ පත්‍රය පරීක්ෂා කිරීමේ දී ප්‍රවේශ පත්‍රයේ සඳහන් ජාතික හැඳුනුම්පත් අංකය හෝ විදෙස් ගමන් බලපත්‍ර අංකය පරීක්ෂා කර තහවුරු කර ගත යුතු බවයි සඳහන් වෙයි.

එමෙන්ම, 2025.01.01 දින සිට වෙන් කළ ආසන ප්‍රවේශපත්‍ර මුදල් ආපසු ඉල්ලුම් කිරීමේ දී ප්‍රවේශ පත්‍ර හිමිකරුගේ අනන්‍යතාවය තහවුරු කර ගැනීම සඳහා අනිවාර්යෙන්ම මඟියාගේ ජාතික හැඳුනුම්පතෙ හෝ විදේශ ගමන් බලපත්‍රයේ පිටපතක් දුම්රිය ස්ථානය වෙත ඉදිරිපත් කළ යුතු බව එම දෙපාර්තමේන්තුව වැඩිදුරටත් දන්වා සිටී.

අද (17) මධ්‍යම රාත්‍රියේ සිට ක්‍රියාත්මක වන පරිදි ශ්‍රී ලංකා මහජන උපයෝගීතා කොමිෂන් සභාව සියයට 20ක ප්‍රතිශතයකින් විදුලි ගාස්තුව අඩු කිරීමට පියවර ගෙන ඇත.

මේ සඳහා මහජන උපයෝගිතා කොමිසමේ අනුමැතිය ලැබුණු බව ලංකා විදුලිබල මණ්ඩලය පවසයි.

එහිදී ගෘහස්ථ කාණ්ඩය යටතේ 0-30ත් අතර ඒකකයට තිබූ ගණන රුපියල් 6ක් දක්වා පැවැති ගාස්තුව රුපියල් 4ක් දක්වාත්, 31-60ත් අතර තිබූ රුපියල් 9 සිට ගාස්තුව 6 දක්වාත් අඩු කිරීමට පියවර ගෙන තිබේ.

ජනාධිපති අනුර කුමාර දිසානායකගේ සිව් දින චීන රාජ්‍ය සංචාරයේ දී මෙරටට හිමි වූ විශාලතම ආයෝජනය සනිටුහන් කරමින් හම්බන්තොට ප්‍රදේශයේ නව තෙල් පිරිපහදුවක් ඉදිකිරීමට අදාළව ශ්‍රී ලංකාවේ බලශක්ති අමාත්‍යාංශය සහ චීනයේ සයිනොපෙක් සමාගම අතර ගිවිසුමකට අත්සන් තැබීම අද (16) පෙරවරුවේ සිදුවිය.

ප්‍රමුඛ පෙළේ ජාත්‍යන්තර ඛනිජ තෙල් සමාගමක් වන සයිනොපෙක් සමාගම ඩොලර් බිලියන 3.7ක සෘජු විදේශ ආයෝජනයක් යටතේ මෙරට ඉදිකිරීමට නියමිත මෙම තෙල් පිරිපහදුව තෙල් බැරල් ලක්ෂ 02ක ධාරිතාවකින් යුක්ත අතර ඉන් අතිවිශාල ප්‍රමාණයක් අපනයනය කිරීමට සැලසුම් කර ඇත.

චීනයෙන් ශ්‍රී ලංකාවට හිමි වු මෙම දැවැන්ත ආයෝජනය මෙරට ආර්ථික වර්ධනයට මෙන්ම හම්බන්තොට ප්‍රදේශයේ අඩු අදායම්ලාභී ජනතාවගේ ජීවනෝපායමාර්ග ද ශක්තිමත් කිරීමට දායක වන අතර,  ඉතා ඉක්මණින් මෙහි ප්‍රතිලාභ සමස්ත ශ්‍රී ලාංකික ජනතාවට හිමිවිමට නියමිතයි.

විදේශ කටයුතු, විදේශ රැකියා සහ සංචාරක අමාත්‍ය විජිත හේරත්, ප්‍රවාහන, මහා මාර්ග, වරාය හා සිවිල් ගුවන් සේවා අමාත්‍ය බිමල් රත්නායක, ශ්‍රී ලංකාවේ චීන තානාපති චී ජෙන්හොන්ග්, චීනයේ ශ්‍රී ලංකා තානාපති මජින්ත ජයසිංහ යන ද මෙම අවස්ථාවට සහභාගි වුණා.

සෞඛ්‍ය අමාත්‍යාංශය සහ සෞඛ්‍ය අමාත්‍යාංශයට අදාළ ආයතන හා නිලධාරීන් ඉලක්ක කරගනිමින් අසත්‍ය, පදනම් විරහිත සහ අදාළ නොවන චෝදනා මාධ්‍ය මගින් එල්ල කිරීම සම්බන්ධයෙන් රාජ්‍ය ඖෂධ නීතිගත සංස්ථාවේ සභාපති ආචාර්ය මනුජ් සී වීරසිංහ  කොළඹ අපරාධ පරීක්ෂණ දෙපාර්තමේන්තුව වෙත පැමිණිල්ලක් ඉදිරිපත් කර තිබේ.

මෙහි දී සෞඛ්‍ය අමාත්‍යාංශය යටතේ ක්‍රියාත්මක රාජ්‍ය ඖෂධ නීතිගත සංස්ථාවේ ඖෂධ සැපයුම් ජාලය මෙන්ම සෞඛ්‍ය සේවාවේ නිරත නිලධාරීන් ඉලක්ක කර අසත්‍ය, පදනම් විරහිත සහ අදාළ නොවන චෝදනා මාධ්‍ය මගින් එල්ල කරන බව අපරාධ පරීක්ෂණ දෙපාර්තමේන්තුව වෙත පැමිණිල්ල ඉදිරිපත් කිරීමෙන් පසු අදහස් දක්වමින් ආචාර්ය මනුජ් සී වීරසිංහ මහතා පැවසීය.

පසුගිය සති කිහිපයක සිට මෙලෙස අඛණ්ඩව අසත්‍ය චෝදනා එල්ල කරමින් සිටින බවත්, එය නිවැරදි ව තීන්දු තීරණ ගැනීමට මෙන් ම ක්‍රියාකිරීමට ද මහත් බාධාවක් බවත් පැවසු ආචාර්ය මනුජ් සී වීරසිංහ මහතා රජයේ සෞඛ්‍ය සේවාවන් බිද වැට්ටවීම හෝ කඩාකප්පල් කිරීමේ අවශ්‍යතාවයක් මත මෙලෙස කටයුතු කරන්නේ ද යන සැකය මතුවී ඇති බැවින් මෙම කරුණූ සම්බන්ධව පූර්ණ පරීක්ෂණයක් සිදු කරන ලෙස ඉල්ලා මෙලෙස පැමිණිල්ලක් ඉදිරිපත් කළ බව ද වැඩිදුරටත් පැවසීය.

චීනයේ සිව් දින රාජ්‍ය සංචාරයක නිරත ජනාධිපති අනුර කුමාර දිසානායක  සහ චීන ජනාධිපති ෂී ජින් පිං (Xi Jinping) අතර නිල හමුව අද (15) පස්වරුවේ චීන මහජන ශාලාවේදී පැවැත්විණ.

චීන මහජන ශාලාව වෙත පැමිණි ජනාධිපති අනුර කුමාර දිසානායකව චීන ජනාධිපති ෂී ජින් පිං විසින් ඉතා උණුසුම් ලෙස පිළිගනු ලැබූ අතර ආචාර වෙඩිමුර සහිතව ඉතා අභිමානවත් අයුරින් එම පිළිගැනීමේ උත්සවය සංවිධානය කර තිබුණ බව වාර්තා වෙයි.

අනතුරුව රාජ්‍ය නායක දෙපළ අතර සුහද කථා බහකින් පසු දෙරට අතර ද්විපාර්ශ්වික සාකච්ඡා ආරම්භ කර ඇත.

සංවර්ධනයේ නවයුගයක් සඳහා ශ්‍රී ලංකාව හා එක්ව කටයුතු කිරීමට සූදානම් බව චීන ජනාධිපතිවරයා මෙහිදී අවධාරණය කර තිබේ.

එසේම සමීප මිත්‍ර රාජ්‍යයන් ලෙස චීනය සහ ශ්‍රී ලංකාව අතර පවතින දීර්ඝකාලීන සබඳතාව ද සිහිපත් කළ ජනාධිපති ෂී ජින් පිං මහතා ඉදිරියටද ශ්‍රී ලංකාව සමග නිරන්තර සහයෝගයෙන් කටයුතු කිරීමට සූදානම් බවයි ප්‍රකාශ කර ඇත.

රාජ්‍ය නායක දෙපළ අතර නිල හමුවෙන් පසු දෙරට අතර ආර්ථික, සමාජයිය හා කර්මාන්ත යන ක්ෂේත්‍රවලට අදාළ අවබෝධතා ගිවිසුම් කිහිපයකට අත්සන් තැබීම ද සිදු කර ඇත.

විදේශ කටයුතු, විදේශ රැකියා හා සංචාරක අමාත්‍ය විජිත හේරත්, ප්‍රවාහන හා මහාමාර්ග සහ වරාය හා සිවිල් ගුවන්සේවා අමාත්‍ය බිමල් රත්නායක, රජයේ ප්‍රවෘත්ති අධ්‍යක්ෂ ජනරාල් එච්. එස්. කේ. ජේ බණ්ඩාර යන ද මෙම අවස්ථාවට එක්ව ඇත.

මත්ද්‍රව්‍ය ජාවාරම්කරුවකු බව කියන ගම්පොළ විදානලාගේ සමන්ත කුමාර හෙවත් වෙලේසුදා, ඔහුගේ බිරිඳ සහ තවත් කාන්තාවකට කොළඹ මහාධිකරණය බරපතළ වැඩ සහිත වසර 08 බැගින් සිරදඬුවම් අද(15) නියම කර තිබේ.

ඒ, හෙරොයින් මත්කුඩු ජාවාරම තුළින් උපයාගත් රුපියල් කෝටි ගණනක දේපළ සම්බන්ධයෙන් මුදල් විශුද්ධිකරණය වැළැක්වීමේ පනත යටතේ ගොනු කර තිබූ චෝදනාවලට වරදකරුවන් කරමිනි.

දීර්ඝ නඩු විභාගයකින් අනතුරුව කොළඹ මහාධිකරණ විනිසුරු ආදිත්‍ය පටබැඳිගේ මහතා විසින් මෙම තීන්දුව ලබා දුන්නේ ය.

ඊට අමතරව විත්තිකරුවන්ට දඩ මුදල් ද නියම කෙරුණු අතර නීති විරෝධී ලෙස උපයාගත් දේපළ මුදල් හා රන් භාණ්ඩ රාජසන්තක කිරීමටත් අධිකරණය නියම කළේ ය.

නව සංචාරක කලාප 13 ක් හඳුනාගෙන තිබේ.

සංචාරක සංවර්ධන අධිකාරියේ සභාපති බුද්ධික හේවාවසම්  සඳහන් කළේ, මේ වනවිට මෙරට සංචාරක කලාප 26ක් නම් කර ඇති බවයි.

යාපනය – කුච්චවෙලි, අනුරාධපුර,පොළොන්නරුව,මහනුවර,මාතලේ සහ ත්‍රිකුණාමළය වැනි ප්‍රදේශවල නව සංචාරක කලාප පිහිටුවන බව ද සභාපතිවරයා සදහන් කළේ ය.

බුද්ධික හේවාවසම්  තවදුරටත් සඳහන් කළේ මේ වන විට හෝටල්වලට කාමර වෙන්කරවා ගැනීමේ ප්‍රමාණ නැවත 80% දක්වා ඉහළ යමින් පවතින අතර එය වසර පහකට ආසන්න කාලයක් තිස්සේ සංචාරක ක්ෂේත්‍රයේ නොතිබූ ප්‍රබෝධමත් මට්ටමක් ඉස්මතු කරන බවයි.

සංචාරක ව්‍යාපරයේ හොඳම වසර ඉදිරියෙන් ඇති බවත් මේ වසරේ ශීත සෘතුව, ශ්‍රී ලංකා සංචාරක ව්‍යාපාරයේ නව පරිච්ඡේදයක ආරම්භය සනිටුහන් කරන බවත් ඔහු පවසයි.

ශ්‍රී ලංකාවේ සංචාරක ක්ෂේත්‍රය තුළ 2029 වසර වන විට මීට පෙර ළඟා කර ගැනීමට අපොහොසත්වූ ඉලක්කද සපුරා ගත හැකි බව ශ්‍රී ලංකා සංචාරක සංවර්ධන අධිකාරියේ සභාපති බුද්ධික හේවාවසම්  වැඩිදුරටත් කියා සිටියේය.

මේ අතර, පුරාවිද්‍යාත්මක වටිනාකමක් ඇති ස්ථාන කිහිපයක් රාත්‍රි කාලයේදීත් සංචාරකයින් සඳහා විවෘත කිරීමට රජයේ අවදානය යොමු වී තිබේ.

බුද්ධසාසන ආගමික හා සංස්කෘතික කටයුතු නියෝජ්‍ය අමාත්‍ය ගමගෙදර දිසානායක  සඳහන් කළේ, ලෝක උරුමයක් ලෙස නම් කර ඇති සීගිරිය ඒ සඳහා පළමුව තෝරාගෙන ඇති බවයි.