පුවත්

ජාතික හෙද පුහුණු කිරීමේ නිලධාරිනී පුෂ්පා රම්‍යාද සොයිසා ජාත්‍යන්තර සම්මානයක් හිමි කර ගත් ප්‍රථම හෙද නිලධාරිනිය බවට පත්වෙමින් එම සම්මානය ද රැගෙන ඊයේ (02) රාත්‍රියේ කටුනායක ගුවන් තොටුපොළ වෙත පැමිණියාය.

ඉන්දුනීසියාවේ ජකර්තා නුවර ට්‍රැවිස් හෝටලයේ දී ඉකුත්දා(28) ලොව රටවල් 52ක නියෝජිතයන්ගේ සහභාගිත්වයෙන් පැවති ලෝක සාම සමුළුවේ දී පුෂ්පා රම්‍යානි ද සොයිසා වෙත (King Sany Wijaya International Award ) මේ සම්මානය පිරිනමා තිබුණි.

මීට අමතරව තවත් ශ්‍රී ලාංකිකයන් තිදෙනකු වන කලාවේදිනී ජානකී හිල්, ආචාර්ය අයි.වයි.එම්.අනීෆ් සහ අජිත් ආරියරත්න ද මේ සමුළුවේ දී සම්මානයට බඳුන් වී තිබූ අතර ඔවුන් ශ්‍රී ලංකාවේ දිගුකාලීනව කළ සමාජ සේවා කටයුතු අගය කිරීමට මේ සම්මාන ඔවුන් වෙත ලබා දී තිබුණි.

ඉන්දුනීසියාවේ සැනී විජය රජතුමාගේ 95 වැනි උපන් දින උත්සවය ලෝකයේ ආරාධිත රාජ්‍යතාන්ත්‍රිකයන් 2,500කගේ සහභාගිත්වයෙන් මේ ලෝක සමුළුවට සමගාමීව පවත්වා තිබූ අතර, ඒ සඳහා මේ ශ්‍රී ලාංකිකයන් වෙත ආරාධනා හිමි වී තිබුණි.

මේ සම්මාන දිනා ගත් පිරිස ඊයේ (02) පස්වරු 5.30ට ඉන්දුනීසියාවේ ජකර්තා නුවර සිට ශ්‍රී ලන්කන් ගුවන් යානයකින් කටුනායක ගුවන් තොටුපොළ වෙත පැමිණියහ. ඔවුන් වෙත ආශීර්වාද කිරීමට සර්ව ආගමික පූජා ප්‍රසාදීන් වහන්සේ පිරිසක් ද කටුනායක ගුවන් තොටුපොළ පැමිණීමේ පර්යන්තයේ ලොබි ශාලාව වෙත පැමිණ සිටියහ.

| කටුනායක ටී.කේ.ජී.කපිල

ශ්‍රී ලංකාවේ ප්‍රමුඛතම ව්‍යාපාරික නායකයෙකු වන දේශමාන්‍ය හැරී ජයවර්ධන  අභාවප්‍රාප්ත වී තිබේ.

කලක සිට රෝගාතුරව සිටි ඔහු මිය යන විට 82 වන වියේ පසු විය.

දොන් හැරල්ඩ් ස්ටැසන් ජයවර්ධන හෙවත් හැරී ජයවර්ධන මහතා 1942 අගෝස්තු 17 වැනි දින ජා-ඇළ ප්‍රදේශයේ දී උපත ලබා ඇත.

2008 වසරේදී ශ්‍රී ලංකාවේ පොහොසත්ම පුද්ගලයා ලෙස ලැයිස්තු අතරට එක්ව ඇති එතුමා මෙරට ඩෙන්මාර්කය සඳහා ගරු කොන්සල් ජනරාල්වරයෙකු ලෙසද කටයුතු කර ඇත.

ප්‍රසිද්ධ කර්මාන්තකරුවෙකු මෙන්නම ප්‍රබල ව්‍යාපරිකයෙකු වූ ජයවර්ධන මහතා මිය යන විට මෙල්ස්ටාකෝප් පීඑල්සී හි සභාපතිවරයා ලෙස මෙන්ම ඩිස්ටිලරීස්, ශ්‍රී ලංකා පීඑල්සී, ලංකා බෙල් සහ එයිට්කන් ස්පෙන්ස් පීඑල්සී යන සමාගම්වල ද සභාපතිත්වය දැරීය.

වැඩබලන අභියාචනාධිකරණ සභාපති විනිසුරු ලෙස මෙම අධිකරණයේ දැනට සිටින ජ්‍යෙෂ්ඨතම විනිසුරුවරයා වන විනිසුරු මොහොමඩ් ලෆාර් තාහිර්  පත් කර තිබේ.

ඒ අනුව වැඩබලන අභියාචනාධිකරණ සභාපති විනිසුරු ලෙස විනිසුරු මොහොමඩ් ලෆාර් තාහිර්  ජනාධිපති අනුර කුමාර දිසානායක  ඉදිරියේ ජනාධිපති ලේකම් කාර්යාලයේදී දිවුරුම් දීම අද (02) සිදු විය.

අභියාචනාධිකරණ සභාපති විනිසුරු බන්දුල කරුණාරත්න  විශ්‍රාම පූර්ව නිවාඩු ලබා ගෙන ඇති අතර, එය ජනාධිපති අනුර කුමාර දිසානායක  විසින් පිළිගෙන ඇත.

ආණ්ඩුක්‍රම ව්‍යවස්ථානුකූලව නව වැඩබලන අභියාචනාධිකරණ සභාපති විනිසුරුවරයෙකු පත් කරන තෙක් මෙම පත්වීම වලංගු වනු ඇත.

2025 වර්ෂය සඳහා ඉදිරිපත් කරන ලද ඉන්දියානු අයවැය මගින් ශ්‍රී ලංකාව සඳහා ගිය වසරට සාපේක්ෂව වැඩි මුදලක් වෙන් කර ඇතැයි ඉන්දීය මාධ්‍ය වාර්තා සදහන් කරයි.

මෙම වසර සඳහා ඉන්දීය රජය ඊයේ දිනයේ අයවැය ඉදිරිපත් කරනු ලැබූ අතර, ඉන්දිය මධ්‍යම රජයේ මුදල් අමාත්‍ය නිර්මලා සීතාරාමන් විසින් අය වැය ඉදිරිපත් කරන ලදී.

මෙවර ඉන්දියාවේ අයවැයෙන් විදේශ රටවලට ආධාර සැපයීම සඳහා වෙන් කර ඇති මුදල ඉන්දීය රුපියල් කෝටි 5483කි.

ප්‍රධාන වශයෙන් මෙලෙස ප්‍රතිපාදන වෙන් කර ඇත්තේ අසල්වැසි රටවල ජලවිදුලි බලාගාර ,නිවාස පහසුකම් වැඩිදියුණු කිරීම, මාර්ග සහ පාලම් ඉදිකිරීම ඇතුළු ව්‍යාපෘති සම්බන්ධයෙනි.

එහිදී ශ්‍රී ලංකාව වෙනුවෙන් ඉන්දීය රුපියල් කෝටි 300ක් මේ වසරේ වෙන් කර ඇත.

එය ශ්‍රී ලංකා මුදලින් රුපියල් කෝටි 1032ක් වේ.

ගිය වසරේ මෙම අගය ඉන්දීය රුපියල් කෝටි 245ක් ලෙස සදහන් වේ.

ශ්‍රී ලංකාව ආර්ථික අවපාතයෙන් යථා තත්ත්වයට පත්වන තෙක් ආර්ථික ස්ථාවරත්වය ඇති කිරීම වෙනුවෙන් මෙම ප්‍රතිපාදන වෙන් කර තිබෙන බවයි ඉන්දිය රජය ඉදිරිපත් කළ අයවැය ලේඛෙනයේ සඳහන් වෙයි.

මෙවර විදෙස් රටවල් සඳහා වෙන් කර ඇති සමස්ත මුදලින් වැඩිම මුදලක් වෙන්කර ඇත්තේ භූතානය සඳහායි.

ඒ ඉන්දීය රුපියල් කෝටි 2150කි.

ගිය වසරේ එම අගය දැක්වූයේ ඉන්දීය රුපියල් කෝටි 2068ක් ලෙසයි.

මෙරට තරුණ ප්‍රජාව තුළ HIV සහ ලිංගාශ්‍රිත රෝග ඉහළ යමින් පවතින බව ප්‍රජා වෛද්‍ය විශේෂඥවරන්ගේ සංගමය පවසයි.

එම සංගමයේ විශේෂඥ වෛද්‍ය වින්ද්‍යා කුමාරප්පේලි පැවසුවේ මේ සඳහා ප්‍රධාන වශයෙන් සමාජ මාධ්‍ය භාවිතය හේතුවක් වී ඇති බවය.

එමෙන්ම අවුරුදු 15 සිට 24 දක්වා වූ වයස් කාණ්ඩය මේ සම්බන්ධව ඉතා දැඩි අවධානමකට ලක්ව ඇති බවත් මේ හේතුවෙන් ලිංගාශ්‍රිත රෝග මෙන්ම අනාරක්ෂිත ගැබ් ගැනීම් ද සිදුවන බවත් විශේෂඥ වෛද්‍යවරිය මෙහිදී පැවසුවාය.

විශේෂඥ වෛද්‍යවරිය මෙම අදහස් පලකළේ පසුගිය දා කොළඹ විජේරාම පිහිටි ශ්‍රී ලංකා වෛද්‍ය සංගම් ශ්‍රවණාගාරයේ පැවැති මාධ්‍ය හමුවකට එක්වෙමිනි.

එහිදී වැඩිදුරටත් අදහස් දැක්වූ විශේෂඥ වෛද්‍ය වින්ද්‍යා කුමාරප්පේලි,

"විශේෂයෙන්ම ලිංගාශ්‍රිත රෝග සහ HIV රෝග ගත්තොත් ඒකේ ගොඩක්ම බලපෑමට ලක්වෙලා තියෙන්නේ තරුණ වයසේ අය. අවුරුදු 15 සිට 24 දක්වා කාණ්ඩය ඉතා දැඩි අවධානමකට ලක්වෙනවා. විශේෂයෙන්ම මේ ගැන වැඩිදුරටත් තොරතුරු හොයද්දි සමාජ මාධ්‍ය භාවිතය ඒකට විශාල හේතුවක්. මේ සමාජ මාධ්‍ය හරහා නොයෙකුත් තරුණ තරුණියන් තමන්ට සහකාරයෝ සහකාරියෝ සොයාගන්නවා. සමහරවිට එක්කෙනෙකුත් නෙමේ සමාජ මාධ්‍ය කිව්වාම සමහර ඩේටින් ඇප් තියෙනවා ඉතිං ඒවා හරහා තරුණ තරුණියන් විවිධ සම්බන්ධතා ගොඩනගා ගන්නවා. ඒ විතරක් නෙමෙයි මත්පැන් භාවිතය, මත්ද්‍රව්‍ය භාවිතයට යොමුවෙලා තමා සමහර අය ඒ ක්‍රියාවන්ට යොමු වෙලා තියෙන්නේ මේ ආශ්‍රිත හේතු නිසා තමා ලිංගාශ්‍රිත රෝග HIV වැනි වෛරස් වගේම අනාරක්ෂිත ගැබ් ගැනීම් සිදුවන්නේ."

ජ්‍යෙෂ්ඨ නියෝජ්‍ය පොලිස්පතිවරු දෙදෙනෙකුට සහ නියෝජ්‍ය පොලිස්පතිවරු දෙදෙනෙකුට ස්ථාන මරු ලබා දී තිබේ.

නිවේදනයක් නිකුත් කරමින් පොලිස් මාධ්‍ය කොට්ඨාසය මේ බව දැනුම් දෙයි.

ජනාධිපති ලේකම් කාර්යාලයට අයත් ඩිෆෙන්ඩර් රථයක් තලාව ප්‍රදේශයේදී අද (1) අළුයම 1ට පමණ අනතුරකට ලක්වී සිවුදෙනෙකු රෝහල් ගතකර ඇති බවට තලාව පොලීසිය පවසයි.

ඊයේ (31) යාපනයේ පැවති උත්සවයකට සහභාගි වී නැවත කොළඹ බලා පැමිණෙමින් සිටියදී මෙම අනතුර සිදුව ඇත.

ඒ අනුව අනතුරින් තුවාල ලැබූවන් ඔවුන් සමග පැමිණි වෙනත් වාහනයකින් තලාව රෝහලට ඇතුළත් කිරීමෙන් අනතුරුව වැඩි ප්‍රතිකාර සඳහා අනුරාධපුර රෝහලට ඇතුළත් කර තිබේ.

තුවාලකරුවන්ගෙන් දෙදෙනකුගේ තත්ත්වය බරපතළ බැවින් ඔවුන් දැඩි සත්කාර ඒකකයට ඇතුළත් කළ බව අනුරාධපුර රෝහල් ආරංචි මාර්ග පවසයි.

තුවාලකරුවන්ගෙන් රියදුරු ජනාධිපති ලේකම් කාර්යාලයට අයත් බවත්, අනෙකුත් අයට ශ්‍රී ලංකා පොලීසියට අනියුක්තවය සේවය කරන ජනාධිපති ආරක්ෂක අංශයේ නිලධාරීන් බව වාර්තා වේ.

රියැදුරුට නින්ද යාම අනතුරට හේතුව බව පොලීසිය සැක කරයි.

අනතුර සම්බන්ධයෙන් තලාව පොලීසිය වැඩිදුර විමර්ශන ආරම්භ කර ඇත.

මත්ද්‍රව්‍ය ජාවාරම් ඇතුළු නීති විරෝධී ක්‍රියා පිළිබඳ දැනුම් දීමට පොලිසිය කෙටි දුරකතන අංකයක් හඳුන්වා දී තිබේ.

එම අංකය වන්නේ 1997 වන අතර, පැය 24 පුරා විවෘතව පවතියි.

එහි ප්‍රධාන මෙහෙයුම් මැදිරිය, පොලිස් මූලස්ථානයට අනුයුක්තව විශේෂ කාර්යාංශ මූලස්ථානයේ ස්ථාපිත කර තිබේ.

වැඩබලන පොලිස්පතිවරයා සියලුම නිලධාරීන්ට උපදෙස් ලබා දී ඇත්තේ, එම දුරකතන අංකයට ලැබෙන තොරතුරු පිළිබඳව පූර්ණ රහස්‍යභාවය ආරක්ෂා කිරීමට කටයුතු කරන ලෙසටයි.

ඒ අනුව 1997 කෙටි දුරකතන අංකයට විෂ මත්ද්‍රව්‍ය, අපරාධ, මහා පරිමාණ දූෂණ ක්‍රියා, ජාතික ආරක්ෂාවට තර්ජනයක් විය හැකි ක්‍රියා, රජයේ වාහන හා දේපොළ අවභාවිතා කිරීම, සැඟවීම හෝ පැහැර ගැනීම සම්බන්ධව තොරතුරු දැනුම් දිය හැකියි.

විදේශ සංචාරකයින්ට සිදු වන හිරිහැර, කරදර හෝ ආරක්ෂාවට බලපාන කරුණු, විශ්වවිද්‍යාල හා උසස් අධ්‍යාපන ආයතන තුළ ක්‍රියාත්මක නවක වද සිදුවීම්, පොලිස් නිලධාරීන් විසින් සිදු කරනු ලබන වංචා, අල්ලස් ලබා ගැනීම වැනි අකටයුතුකම් හා පරිසර වැරදි පිළිබඳ තොරතුරුද එම අංකයට දැනුම්දිය හැකි බව පොලිසිය දැනුම් දෙයි.

පොලිසිය පැවසුවේ, උතුරු නැගෙනහිර ප්‍රදේශවල සිටින මහ ජනතාවට දමිළ බසින් "107" කෙටි දුරකතන අංකය ඔස්සේ තොරතුරු ලබා දිය හැකි බවයි.

පූර්ව ළමා විය සංවර්ධන ජාතික ප්‍රතිපත්තියක් සැකසීමේ සාකච්ඡාවල මූලික වටය අග්‍රාමාත්‍ය ආචාර්ය හරිනි අමරසූරියගේ ප්‍රධානත්වයෙන් ඉසුරුපායේදී පැවැත්වුණි.

කාන්තා හා ළමා කටයුතු අමාත්‍යාංශයේ නිලධාරීන්ගේ ද සහාය මේ සදහා සහභාගී කර ගන්නා ලදී.

රටපුරා දැනට ක්‍රියාත්මක පූර්ව ළමා විය සංවර්ධන මධ්‍යස්ථාන සියල්ල ඒකාබද්ධකරමින් එකම ප්‍රතිපත්තියක් මත ක්‍රියාත්මක කිරීම අවශ්‍ය බව මෙහිදී අවධාරණය කර ඇති අතර, මේ සඳහා එකම ප්‍රතිපත්තියක් ගෙන ඒමට අවශ්‍ය කැබිනට් අනුමැතිය ලබා ගැනීමට කටයුතු සම්පාදනය කරන ලෙසට අග්‍රාමාත්‍යවරිය නිලධාරීන්ට උපදෙස් දී ඇත.

මෙම පොදු ප්‍රතිපත්තිය මධ්‍යම රජයට මෙන්ම සියලු පළාත්වලටද අදාළ විය යුතු අතර, පූර්ව ළමාවිය සංවර්ධනයට අදාළ ගුරු මාර්ගෝපදේශන බඳවාගැනීමේ විභාග, වැටුප්, පුහුණුව ආදි සියල්ල නව මාර්ගෝපදේශයට ඇතුළත් විය යුතු බවද අග්‍රාමාත්‍යවරිය වැඩිදුරටත් පවසා ඇත.

ඉන්ධන මිල සංශෝධනය කිරීමට ලංකා ඛණිජ තෙල් නීතිගත සංස්ථාව පියර ගෙන තිබේ.

ඒ අනුව ලංකා සුපිරි ඩීසල් මිල රුපියල් 18කින් වැඩි කිරීමට තීරණය කර ඇති අතර එහි නව මිල රුපියල් 331කි.

කෙසේ වෙතත් අනෙකුත් මිල ගණන් නොවෙනස්ව පවතින බවත් ඛණිජ තෙල් සංස්ථාව පවසයි.

ජාතික තරුණ සේවා සභාවේ හිටපු සභාපති චින්තක ධර්ශන හේවාපතිරණ  එම තනතුරෙන් ඉවත් ව තිබේ.

ඔහු ජාතික තරුණ සේවා සභාවේ 32වන සභාපතිවරයාද වේ.

පසුගිය වසරේ ඔක්තෝම්බර් මස 4 වැනිදා ඔහු එම ධුරයට පත්විය.

චින්තක  ධර්ශන හේවාපතිරණ  වත්මන් රජය බලයට පත් වීමෙන් පසු සභාපති ධූරයකින් ඉවත් වූ සිව්වැනි පුද්ගලයා ද වේ.

බස්නාහිර පළාත් ආණ්ඩුකාර හනීෆ් යූසුෆ් විසින් අපරාධ පරීක්ෂණ දෙපාර්තමේන්තුව වෙත පැමිණිල්ලක් ඉදිරිපත් කර ඇත.

හනීෆ් යූසුෆ් මෙම පැමිණිල්ල ඉදිරිපත් කර ඇත්තේ ශ්‍රී ලංකා රේගුව විසින් නිදහස් කරන ලදැයි පවසන කන්ටේනර් 323ක් සම්බන්ධයෙන් ඔහු ඉලක්ක කර හිටපු මහජන නියෝජිතයින් කිහිපදෙනෙක් සහ ඇතැම් සමාජ මාධ්‍ය ක්‍රියාකාරීන් කිහිපදෙනෙක් ඍජුව සහ වක්‍රව එල්ල කොට ඇති චෝදනා පිළිබඳව විමර්ශනයක් සිදු කරන ලෙස ඉල්ලමිනි.

ඉකුත් දින කිහිපය තුළ එලෙස පදනම් විරහිතව සහ සිය කීර්ති නාමයට කැළලක් ඇති වන ලෙස ඇතැම් දේශපාලඥයින් විසින් ප්‍රවෘත්ති සාකච්ඡාවලදීත්, ඇතැම් පුද්ගලයින් සමාජ මාධ්‍යය තුළත් සමාජගත කර තිබූ තොරතුරද ආණ්ඩුකාරවරයා විසින් අපරාධ පරීක්ෂණ දෙපාර්තමේන්තුව වෙත භාරදෙනු දී ඇත.

ඉන් අනතුරුව මාධ්‍ය වෙත විශේෂ ප්‍රකාශයක් කළ ඔහු: මේ එල්ල වී ඇති චෝදනා තරයේ ප්‍රතික්ෂේප කරන බවත්, අදාළ චෝදනා පිළිබඳව විමර්ශනයක් සිදු කර තමන්ට සාධාරණය ඉටු කර දෙන ලෙසත් අපරාධ පරීක්ෂණ දෙපාර්තමේන්තුවෙන් ඉල්ලා සිටි බව පැවසී ය.

තමන්ට අවශ්‍ය වන්නේ වැඩක් කිරීමට බවත්, පරාජිත කණ්ඩායම් විසින් කරනු ලබන චෝදනා හෙලා දකින බවත්, ආණ්ඩුකාරවරයා පැවසී ය.

රාජ්‍ය පරිපාලන අමාත්‍යාංශයේ හිටපු ලේකම්වරයෙකු වූ ප්‍රියන්ත මායාදුන්නේව අද (30) දහවල් අත්අඩංගුවට ගෙන ඇති අතර, අධිකරණය වෙත ඉදිරිපත් කිරීමෙන් පසු ඇප මත මුදාහැර තිබේ.

සැකකරුව කොටුව මහෙස්ත්‍රාත් අධිකරණය වෙත ඉදිරිපත් කර තිබූ අතර එහිදී රුපියල් ලක්ෂ 2ක ශරීර ඇපයක් මත මුදා හැරීමට නියෝග කර ඇත.

2011 වසරේදී ජාත්‍යන්තර සමූපකාර දිනය සැමරීම වෙනුවෙන් කුරුණෑගල පවත්වා ඇති ඉසුරු සවිය නම් සැමරුම් උත්සවය සඳහා සමූපකාර අරමුදලින් මුදල් වැය කිරීම සම්බන්ධයෙන් අපරාධ පරීක්ෂණ දෙපාර්තමේන්තුව විසින් ඔහු සම්බන්ධයෙන් විමර්ශනයක් සිදුකර තිබුණි.

පොලිස් මාධ්‍ය ප්‍රකාශක, ජ්‍යෙෂ්ඨ පොලිස් අධිකාරී බුද්ධික මනතුංග  සඳහන් කළේ, එහි විමර්ශන උදෘත නීතිපතිවරයා වෙත යොමු කිරීමෙන් අනතුරුව නීතිපතිවරයා විසින් සැකකරුට එරෙහිව චෝදනා ගොනු කිරීමට තරම් ප්‍රමාණවත් කරුණු අනාවරණය වී ඇති බව අපරාධ පරීක්ෂණ දෙපාර්තමේන්තුවට දන්වා තිබූ බවය.

ඒ අනුව, එවක සමූපකාර සහ අභ්‍යන්තර වෙළෙඳ අමාත්‍යාංශයේ අතිරේක ලේකම්වරයෙකු වශයෙන් කටයුතු කළ ප්‍රියන්ත කුමාර මායාදුන්නේ අද දිනයේදී අපරාධ පරීක්ෂණ දෙපාර්තමේන්තුව මගින් අත්අඩංගුවට ගත්තේය.

අපරාධ පරීක්ෂණ දෙපාර්තමේන්තුව සිද්ධිය පිළිබඳ ඉදිරි විමර්ශන සිදුකරයි.

“සුවසැරිය” ගිලන්රථ සේවාව තවදුරටත් පුළුල් සේවාවක් ලෙස ප්‍රවර්ධනය කිරීමටත්, එම සේවාවේ පවතින ගැටළුවලට කඩිනම් විසඳුම් ලබාදෙමින් කාර්යක්ෂම සේවාවක් ලෙස ඉදිරියටත් පවත්වාගෙන යාම සඳහා නව සැලැස්මක් යටතේ ක්‍රියාකරන බව සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස පවසයි.

අමාත්‍යවරයා මෙම අදහස් ප්‍රකාශ කළේ පසුගියදා රාජගිරියේ පිහිටි සුවසැරිය ගිලන් රථ සේවා මධ්‍යස්ථානයේ දී පැවැති සාකච්ඡාවකට එක් වෙමින්.

ආරම්භයේදී ඉන්දීය රජයේ ප්‍රදානයක් ලෙස ක්‍රියාත්මක වූ “සුවසැරිය” ගිලන්රථ සේවාව මේ වනවිට ශ්‍රී ලංකා රජය පවත්වාගෙන යනු ලැබේ.

මෙහිදී සුවසැරිය ගිලන් රථ සේවාවේ වත්මන් ක්‍රියාකාරීත්වය සෞඛ්‍ය හා ජනමාධ්‍ය අමාත්‍යවරයාගේ පරීක්ෂාවට ලක්වූ අතර, එහිදී හදිසි විදාන සහ පාලන අංශය, දුරකථන ඇමතුම් සම්බන්ධතා ඒකකය ඇතුලු අංශ කිහිපයක් මෙන්ම “සුවසැරිය” ගිලන් රථයක් ද අමාත්‍යවරයාගේ පුළුල් නීරීක්ෂණයට ලක් විය.

අනතුරුව 1990 “සුවසැරිය” පදනම අධ්‍යක්ෂ මණ්ඩලය සමග ගිලන් රථ සේවාවේ වත්මන් ක්‍රියාකාරීත්වය, ඉදිරි මෙහෙයුම් කටයුතු සහ යෝජිත සැලසුම් මෙන්ම පවතින ගැටළු පිළිබඳවද විශේෂ සාකච්ඡාවක් පවත්වා තිබෙනවා.

විශේෂ පොලිස් කණ්ඩායමක් විසින් යාපනයේදී අත්අඩංගුවට ගත් පාර්ලිමේන්තු මන්ත්‍රී වෛද්‍ය අර්චුනා රාමනාදන් ඇප මත මුදාහැර තිබේ.

රුපියල් ලක්ෂ 2 බැගින් වූ ශරීර ඇප දෙකක් මත ඔහුව මුදාහැරීමට අනුරාධපුර මහෙස්ත්‍රාත් අධිකරණය තීරණය කර ඇත.

ඒ අනුව මෙම නඩුව පෙබරවාරි මස 03 වනදා යළි කැඳවීමට නියමිතය.

මන්ත්‍රී අර්ච්චුනා රාමනාදන් මෙම මස ඉකුත් 20 වනදා රාත්‍රී කාලයේ අනුරාධපුර තලාව ප්‍රදේශයේදී රථවාහන රාජකාරිවල නිරතව සිටි පොලිස් නිලධාරීන්ට සාපරාධී බලහත්කාරය පා රාජකාරියට බාධා කිරීමේ චෝදනාව යටතේ මෙම අත්අඩංගුවට ගැනීම සිදුළ බවට තොරතුරු වාර්තා විය.

ඉලංකෙයි තමිල් අරුසු කච්චි පක්ෂයේ දේශපාලන ප්‍රධානී මාවෙයි සේනාධිරාජා මහතා අද (29) පස්වරුවේ අභාවප්‍රාප්ත විය.

මිය යනවිට ඒ මහතා 82වියේ පසුවිය.

හිටපු පාර්ලිමේන්තු මන්ත්‍රීවරයකෙු වන සේනාධිරාජා මහතා යාපනයේ සිය නිවසේදී ඊයේ ඇති වූ හදිසි රෝගී තත්ත්වයක් හේතුවෙන් ඊයේ පස්වරුවේ යාපනය ශික්ෂණ රෝහලට ඇතුළත්ව ප්‍රතිකාර ලබමින් සිටියේය.

පාර්ලිමේන්තු මන්ත්‍රී වෛද්‍ය අර්චුනා රාමනාදන්  විශේෂ පොලිස් කණ්ඩායමක් විසින් යාපනයේදී අත්අඩංගුවට ගත් බව පොලිසිය පවසයි.

පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී බුද්ධික මනතුංග  සඳහන් කළේ සැකකාර මන්ත්‍රීවරයාව අනුරාධපුර මහෙස්ත්‍රාත් අධිකරණය වෙත ඉදිරිපත් කිරීමට නියමිත බවය.

සැකකාර මන්ත්‍රීවරයා විසින් 2025 ජනවාරි 20 වනදා රාත්‍රී කාලයේ අනුරාධපුර තලාව ප්‍රදේශයේදී රථවාහන රාජකාරිවල නිරතව සිටි පොලිස් නිලධාරීන්ට සාපරාධී බලහත්කාරය පා රාජකාරියට බාධා කිරීමේ සිදුවීමක් වාර්තා වුණා.

පසුව අනුරාධපුර පොලීසිය මගින් මේ පිළිබඳව විමර්ශන ආරම්භ කර අනුරාධපුර මහෙස්ත්‍රාත් අධිකරණය වෙත කරුණු වාර්තා කළේය.

ආරක්ෂක මාණ්ඩලික තනතුර පවත්වාගෙන යාමට වත්මන් රජය කටයුතු නොකරන බව ආරක්‍ෂක ලේකම් එයාර් වයිස් මාර්ෂල් සම්පත් තුයියකොන්තා (විශ්‍රාමික) ප්‍රකාශ කළේය.

ඒ අද (29) රජයේ ප්‍රවෘත්ති දෙපාර්තමේන්තුවේ පැවති මාධ්‍ය හමුවකදීයි.