පුවත්

චීන ජනාධිපති ෂී ජින් පිං (Xi Jinping) ගේ ආරාධනයකට අනුව චීනයේ රාජ්‍ය සංචාරයකට පිටත්ව ගිය ජනාධිපති අනුර කුමාර දිසානායක  එරට වේලාවෙන් අද (14) පෙරවරු 10.25ට පමණ චීනයේ බීජිං ජාත්‍යන්තර ගුවන් තොටුපොළ වෙත ළඟා වී ඇත.

එහිදී චීන හමුදාවේ උත්කර්ෂවත් බුහුමන් සහිතව චීන නියෝජ්‍ය විදේශ අමාත්‍ය චෙන් ශියාඩොන්  විසින් ජනාධිපතිවරයා පිළිගෙන ඇත.

ජනාධිපති අනුර කුමාර දිසානායක  ගමන් ගත් මාර්ගය දෙපස දෙරටේ ජාතික ධජවලින් සරසා තිබුණු අතර, මෙම රාජ්‍ය සංචාරයේදී තාක්ෂණික හා කෘෂිකාර්මික සංවර්ධනය මෙන්ම දිළිඳුකම පිටුදැකීම ආදී අරමුණු පෙරටු කරගත් ක්ෂේත්‍ර චාරිකා කිහිපයකට මෙන්ම ඉහළ පෙළේ ව්‍යාපාරික හමු කිහිපයකට ද ජනාධිපතිවරයා එක්වීමට නියමිතය.

තවද මෙම සංචාරය අතරතුර දෙරට අතර අවබෝධතා ගිවිසුම් කිහිපයකට අත්සන් තැබෙනු ඇත.

විදේශ කටයුතු, විදේශ රැකියා සහ සංචාරක අමාත්‍ය විජිත හේරත්, ප්‍රවාහන, මහාමාර්ග, වරාය සහ සිවිල් ගුවන්සේවා අමාත්‍ය බිමල් රත්නායක, ශ්‍රී ලංකාවේ චීන තානාපති චී ජෙන්හොන්ග්, චීනයේ ශ්‍රී ලංකා තානාපති මජින්ත ජයසිංහ යන ද මෙම අවස්ථාවට එක්ව සිටියහ.

clean sri lanka වැඩසටහන සදහා රාජ්‍ය නොවන සංවිධානවල අදහස් විමසිමේ වැඩසටහනක් පසුගිය 10 වැනිදා මහජන ආරක්ෂක හා පාර්ලිමේන්තු කටයුතු අමාත්‍යාංශ ශ්‍රවණාගාරයේදී පැවැත්විණි.

රාජ්‍ය නොවන සංවිධාන පිළිබඳ ජාතික ලේකම් කාර්යාලයේ කැඳවීමකට අනුව, අමාත්‍යංශයේ අතිරේක ලේකම් දමයන්ති කරුණාරත්න ගේ ප්‍රධානත්වයෙන්, “ක්ලීන් ශ්‍රී ලංකා” සඳහා වූ ජනාධිපති විශේෂ කාර්ය සාධක බලකායේ සහභාගිත්වයෙන් සාකච්ඡාව පැය දෙක හමාරකට අධික කාලයක් පැවැත්වුණි.

වැඩසටහන අවසාන භාගයේදී මහජන ආරක්ෂක හා පාර්ලිමේන්තු කටයුතු පිළිබඳ නියෝජ්‍ය අමාත්‍ය නීතිඥ සුළිල් වටගල  ද එක් වූ අතර clean sri lanka වැඩසටහන සඳහා රාජ්‍ය නොවන සංවිධානවල සහභාගිත්වය හා සහයෝගය ලබා දෙන ලෙස ඉල්ලීමක් ද කෙරිණි.

එයට සහභාගි වූ රාජ්‍ය නොවන සංවිධානවල නියෝජිතයින්, මෙවැනි වැඩසහනක් ඉමහත් බලාපොරොත්තුවෙන් සිටි වැඩසටහනක් බවත්, එම වැඩසටහන තුළින් සමාජයට විශාල බලපෑමක් සිදු කිරීමේ හැකියාවක් පවතින බවත්, එහෙත් වැඩසටහන පිලිබද පූර්ව දැනුවත් කිරීම් සිදු කොට ක්‍රියාත්මක කිරීමේ අවශ්‍යතාවයද ඔවුන් විසින් දන්වන ලදී.

රාජ්‍ය නොවන සංවිධාන හා සිවිල් සංවිධාන ජාතික එකමුතුව, ජාත්‍යන්තර රාජ්‍ය නොවන සංවිධාන සාමූහිකය හා එම කණ්ඩායම් දෙකටම අයත් නොවන රාජ්‍ය නොවන සංවිධාන නියෝජනය කරමින් නියෝජිතයන්ද මෙම අවස්ථාවට සහභාගි වී සිටියේය.

බන්ධනාගාර දෙපාර්තමේන්තුව විසින් බන්ධනාගාරගතව සිටින හින්දු ආගමික රැඳවියන්ට අමුත්තන් බැලීම සඳහා හෙට (14) දිනයේ විශේෂ අවස්ථාවක් සලසා දී තිබේ.

ඒ, තෛපොංගල් උත්සවය නිමිත්තෙනි.

එමෙන්ම, එදිනට හින්දු ආගමික රැඳවියන්ගේ ඥාතීන් විසින් රැගෙන එන ආහාර හා රසකැවිලි එක් රැඳවියෙකුට පමණක් ප්‍රමාණවත්වන පරිදි ලබාදීමටද අවස්ථාව සලසා දී ඇතැයි බන්ධනාගාර කොමසාරිස් (මාධ්‍ය ප්‍රකාශක) ගාමිණී බී. දිසානායක  පවසයි.

සියලු සෞඛ්‍ය මාර්ගෝපදේශයන්ට අනුකූලව හා බන්ධනාගාර නිතීරීතී අනුව මෙම අමුත්තන් පෙන්වීමේ කටයුතු දිවයිනේ සියලුම බන්ධනාගාර තුළ සිදුකරනු ඇත.

ශ්‍රී ලංකා පොලිසිය විසින් රුපියල් මිලියන 91 කට වැඩි වටිනාකමකින් යුත් තත්ත්වයෙන් උසස් වේග මාපක උපකරණ 30ක් බෙදාදීම සිදු විය.

ඒ, වැඩබලන පොලිස්පති ප්‍රියන්ත වීරසූරියගේ ප්‍රධානත්වයෙන් පොලිස් මූලස්ථානයේ ඊයේ(11) පැවති උත්සවයකදීය.

එහි පළමු අදියරේ කොටසක් ලෙස මීගමුව, කැලණිය, සහ ගම්පහ යන ප්‍රදේශවල මෙන්ම බස්නාහිර පළාතේ දකුණු රථවාහන අංශයේ ප්‍රාදේශීය නිළධාරීන් සඳහා මෙම උපකරණ බෙදා දී තිබේ.

අමෙරිකාවේ නිෂ්පාදනය කරන ලද වේග මාපක උපකරණ සඳහා ලේසර් තාක්ෂණය භාවිත කරන අතර රාත්‍රී මෙහෙයුම් සඳහා එම වේග මාපක උපකරණ ඵලදායී බව පැවසේ.

2024 වසරේදී මෙරට තුළ රථවාහන අනතුරු 24,589ක් වාර්තා වී ඇත.

ඉන් 2,242ක් මාරක අනතුරුවන අතර වාර්තා වූ මරණ සංඛ්‍යාව 2,253ක් වේ.

අධික වේගයෙන් රිය පැදවීමේ සිද්ධීන් 31,182 ක් එම කාලය තුළදී පොලිසිය විසින් හඳුනාගෙන ඇති අතර, ඉකුත් වසරේ සිදුවූ රිය අනතුරුවලින් අනතුරු 731 ක්ම සිදුව ඇත්තේ අධික වේගය නිසා බව පොලිසිය පවසයි.

මෙම නව ක්‍රියාමාර්ග හරහා එවැනි සිදුවීම් අවම කිරීම පොලිසියේ අරමුණ වී තිබේ.

ආයතන සහ වෛද්‍ය ක්‍රම කොතරම් පවත්වාගෙන ගිය ද එම සෑම අංශයකම හා වෛද්‍ය ක්‍රමයකම අවසාන අරමුණ විය යුත්තේ පුරවැසියා නිරෝගී සම්පන්නව තබාගැනීම බව සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස  පවසයි.

අමාත්‍යරයා මෙම අදහස් දැක්වූයේ රජයට අයත් එකම හෝමියෝපති රෝහල වන වැලිසර හෝමියෝපති රෝහලේ සිදු කළ නිරික්ෂණ චාරිකාවකින් අනතුරුව රෝහලේ කාර්ය මණ්ඩලය සහ හෝමියෝපති වෛද්‍ය සභාවේ නියෝජිතයින්ගේ සහභාගීත්වයෙන් පැවැති රැස්වීමක් අමතමිනි.

වැලිසර රජයේ හෝමියෝපති රෝහල සෞඛ්‍ය සම්පන්න ජනතාවක් බිහිකිරීම දැක්ම කර ගනිමින් සියලුම ළමා හා කාන්තා රෝග, ඇදුම හා ස්වසන ආබාධ, සමේ රෝග, ආමාශගත රෝග, ස්නායු රෝග, දීර්ඝ කාලින හිසරදය, ගලගණ්ඩය, දියවැඩියාව, අධිරුධිර පීඩනය, අධික කොලෙස්ටරෝල් තත්ත්ව, සන්ධි ආබාධ සහ ආතරයිටිස් රෝග සදහා දිනපතා ප්‍රතිකාර ලබාදෙනු ලබයි. මෙරට සියළු ජනතාවට අඩු වියදමකින් යුතුව රෝග සමනය හා රෝග වලක්වා ගැනීමට පහසු හා ලාභදායි වෛද්‍ය ක්‍රමයක් ලෙස හෝමියෝපති වෛද්‍ය ක්‍රමය ප්‍රචලිත කිරීම සදහා ද ක්‍රියාකාරි වැඩසටහන් රැසක් රෝහල මගින් ජනතාව අතරට ගෙනයනු ලබයි.

වසර 200 කටත් වඩා ඉපැරණි ඉතිහාසයක් සහිත වෛද්‍ය ක්‍රමයක් වන සහ බටහිර වෛද්‍ය ක්‍රමය හැරුණුවිට ලොව වැඩිපුරම ප්‍රචලිත වෛද්‍ය ක්‍රමයක් වූ හෝමියෝපති වෛද්‍ය ප්‍රතිකාරයන් හි මෙරට ප්‍රතිකාර සේවාවන්වල වත්මන් තත්ත්වය සහ හෝමියෝපති වෛද්‍ය ප්‍රතිකාර සේවාවන් හි මෙරට ඉදිරි ඉලක්ක පිළිබඳව සොයාබැලීමට මෙහිදී සෞඛ්‍ය හා ජනමාධ්‍ය අමාත්‍යවරයා කටයුතු කරනු ලැබූ අතර, වැලිසර හෝමියෝපති රෝහලේ බාහිර රෝගී අංශය, නේවාසික ප්‍රතිකාර වාට්ටු, ඖෂධ ගබඩාව ඇතුළු ප්‍රතිකාර සේවා කටයුතු ද ඇමැතිවරයා නිරීක්ෂණය කළේය.

වැලිසර පිහිටි හෝමියෝපති රෝහලේ බාහිර රෝගී අංශය මගින් දිනකට රෝගීන් 200 ක් පමණ ප්‍රතිකාර ලබාගන්නා අතර, පැය 24 පුරා නේවාසික රෝගී අංශය ක්‍රියාත්මක වේ.

මෙම තත්ත්වය සැලකිල්ලට ගනිමින් අතුරු ආබාධවලින් තොරව රෝග නිට්ටාවටම සුව කිරීමේ හැකියාව ඇති මෙම හෝමියෝපති වෛද්‍ය ප්‍රතිකාර ක්‍රමය මෙරට ප්‍රවර්ධනයට අදාල සැලසුම් සකස් කිරීමට කටයුතු කරන බව අමාත්‍යවරයා මෙහිදී වැඩිදුරටත් පැවසීය. එමෙන්ම ආයතන සහ වෛද්‍ය ක්‍රම කොතරම් පවත්වාගෙන ගිය ද සෑම අංශයකම අවසාන අරමුණ විය යුත්තේ පුරවැසියා නිරෝගී සම්පන්නව තබා ගැනීම බව ද අමාත්‍යවරයා මෙහිදී හෝමියෝපති රෝහලේ කාර්ය මණ්ඩලයට හා හෝමියෝපති වෛද්‍ය සභාවට අවධාරණය කළේය.

කාර්ය මණ්ඩල පුරප්පාඩු පිරවීම, ප්‍රමාණවත් ඖෂධ තොග වෛද්‍ය සායන සහ ජංගම සායන සදහා සැපයීම, රසායනාගාර සේවාව ස්ථාපිත කිරීම, බාහිර රෝගී අංශයේ ප්‍රතිකාර සේවා ශක්තිමත් කිරීම, අභ්‍යන්තර රෝගී අංශය ඇඳන් 50 කින් යුතු නේවාසික අංශයක් ලෙස වැඩිදියුණු කිරීම, පරිපුරක වෛද්‍ය සේවාවන් වන වෛද්‍ය රසායනාගාර සේවාව, එක්ස් කිරණ හා භෞතචිකිත්සක සේවා සහ උපදේශන අංශ ස්ථාපිත කිරීම, ශික්ෂණ රෝහලක් දක්වා වැඩිදියුණූ කිරීම ආදී කරුණු රැසක් ඉලක්කගතව මෙම වසරේ ඉදිරි සැළසුම් සකස් කිරීමට මෙහිදී රෝහල් කාර්ය මණ්ඩලය හා අමාත්‍යවරයා අතර ඉතා දීර්ඝ සාකච්ඡාවක් සිදු විය.

හෝමියෝපති වෛද්‍ය සභාවේ සභාපති ඇතුළු නිලධාරීන් විසින් සිය අනාගත අරමුණු ලෙස මෙරට හෝමියෝපති වෛද්‍ය විද්‍යාලයක් ආරම්භ කිරීම, හෝමියෝපති ඖෂධ මෙරට නිෂ්පාදනය කිරීම, සෑම පළාතක්ම ආවරණය වන පරිදි හෝමියෝපති රෝහල් ආරම්භ කිරීම, සෑම දිස්ත්‍රික්කයක්ම ආවරණය වන පරිදි රජයේ හෝමියෝපති සායන ස්ථාපිත කිරීම සහ ක්ෂේත්‍රයේ මානව සම්පත සංවර්ධනය යන කරුණූ පෙන්වා දෙන ලදි. ඉදිරියේ දී හෝමියෝපති වෛද්‍ය පාඨමාලාව හැදීරීම සදහා මෙරට ශිෂ්‍යයින් වැඩි පිරිසක් ඉන්දියාවේ හෝමියෝපති වෛද්‍ය විද්‍යාල වෙත යැවීමේ හැකියාව සොයා බලන ලෙස මෙහිදී අමාත්‍යවරයා වෛද්‍ය සභාවට උපදෙස් ලබාදෙන ලදි.

සංචාරකයින් මෙරටට ගෙන්වා ගැනීමට මෙරටට ම අනන්‍ය වූ සාධක වැඩිදියුණූ කරමින් වර්තමාන රජය ගෙනයන වැඩපිළිවෙල යටතේ හොමියෝපති ප්‍රතිකාර වැනි සෞඛ්‍ය වෛද්‍ය ක්‍රම මගින් ද සංචාරකයින් ආකර්ශණය කර ගත හැකි බවත්, අවශ්‍ය පහසුකම් ලබාදෙමින් සහ ක්ෂේත්‍රයේ ප්‍රවීණයින් ලබාදෙන යෝජනා ක්‍රියාත්මක කරමින් ජාතික සැලැස්මක් යටතේ මෙවැනි වෛද්‍ය ප්‍රතිකාර ක්ෂේත්‍ර වර්ධනය කිරීමට කටයුතු කරන බව ද අමාත්‍යවරයා මෙහිදී පැවසීය.

මෙම අවස්ථාවට වැලිසර හෝමියෝපති රෝහලේ කාර්යභාර වෛද්‍ය නිලධාරී චාන්දනී හේරත්  ඇතුලු රෝහල් කාර්ය මණ්ඩලය, හෝමියෝපති වෛද්‍ය සභාවේ සභාපති වෛද්‍ය අශාන් නිලංක දුණුකාර  ඇතුලු එම වෛද්‍ය සභාවේ සාමාජිකයන් සහ හෝමියෝපති වෛද්‍යවරුන් ඇතුළු පිරිසක් එක්ව සිටියහ.

නව ශ්‍රේෂ්ඨාධිකරණ විනිශ්චයකාරවරු හතර දෙනෙක් ජනාධිපති අනුර කුමාර දිසානායක  ඉදිරියේ ජනාධිපති කාර්යාලයේදී අද (12) පෙරවරුවේ දිවුරුම් දුන්හ.

ඒ අනුව අභියාචනාධිකරණ විනිශ්චයකාරවරුන් වන ආර්.එම්.එස්.රාජකරුණා, මේනකා විජේසුන්දර, සම්පත් බී. අබේකෝන්  සහ එම්.එස්.කේ.බී.විජේරත්න  ජනාධිපතිවරයා ඉදිරියේ මෙලෙස නව ශ්‍රේෂ්ඨාධිකරණ විනිශ්චයකාරවරුන් ලෙස දිවුරුම් දුන්හ.

ජනාධිපති ලේකම් ආචාර්ය නන්දික සනත් කුමානායකද මෙම අවස්ථාවට එක්ව සිටියේය.

පෙබරවාරි මාසයේ සිට ආනයනය කරනු ලබන වාහන සඳහා වන ආනයන බදු ප්‍රතිශතය රජය විසින් ප්‍රකාශයට පත් කර තිබේ.

ඒ, විශේෂ ගැසට් නිවේදනයක් මඟිනි.

එම නිවේදනයට අනුට නිෂ්පාදිත දිනයේ සිට අවුරුදු 10ට නොවැඩි වාහන සඳහා 200%-300%ක ප්‍රමාණයක බදු පැනවීමට මුදල් අමාත්‍යවරයා වන ජනාධිපතිවරයා පියවර ගෙන ඇත.

එමෙන්ම, ඇතැම් වාහන කාණ්ඩ ඒවායේ එන්ජින් සිලින්ඩර ධාරිතාව සහ කිලෝවොට්වලින් මනිනු ලබන මෝටර් බලය මත පදනම්ව බදුවලට යටත් කර තිබේ.

අදාළ ගැසට් නිවේදනය පහතින්

අද සිට ක්‍රියාත්මක වන පරිදි මත්පැන් සඳහා වන නිෂ්පාදන බද්ද 6 % කින් වැඩි කර තිබේ.

මුදල් අමාත්‍යාංශය ඒ බව නිවේදනය කළේ, අතිවිශේෂ ගැසට් නිවේදනයකින් ය.

ඒ අනුව ශ්‍රී ලංකාව තුළ නිෂ්පාදිත විශේෂ අරක්කු සඳහා යොදාගන්නා මධ්‍යසාර ලීටරයක් මත පැනවෙන බද්ද රුපියල් 7,244කි.

මෙරට තුළ නිෂ්පාදිත මොලෑෂස්, තල්, පොල් සහ පදම් කළ අරක්කු සඳහා යොදා ගැනෙන මධ්‍යසාර ලීටරයක් මත පැනවෙන බද්ද රුපියල් 7,752ක් වේ.

මෙරට නිෂ්පාදිත විදෙස් මත්පැන් සඳහා යොදාගන්නා මධ්‍යසාර ලීටරයක් සඳහා රුපියල් 7,969ක බද්දක් පනවා තිබේ.

ඒ අනුව මෙලස මධ්‍යසාර කාණ්ඩ 09ක් සඳහා අය කෙරෙන බදු අද සිට සංශෝධනය කර ඇත.

මෙම නව බදු සංශෝධනත් සමග රුපියල් 3,580ක් වූ ගල් අරක්කු බෝතලයක මිල රුපියල් 102කින් ඉහළ නැංවේ.

රුපියල් 3,850ක් වූ පොල් අරක්කු බෝතලයක මිල ඉහළ නැංවෙන්නේ රුපියල් 109කිනි.

එමෙන්ම පරණ අරක්කු බෝතලයක මිල රුපියල් 4,000ක්ව පැවති අතර, එහි මිල රුපියල් 109කින් ඉහළ නංවා තිබේ.

රුපියල් 4,250ක් වූ අති විශේෂ පරණ අරක්කු බෝතලයක මිල ද රුපියල් 109කින් වැඩිවනු ඇත.

මේ අතර සැර අඩු බියර් බෝතලයක් රුපියල් 30කින් වැඩිවන අතර, සැර වැඩි බියර් බෝතලයක් රුපියල් 40කින් වැඩිවනු ඇත.

දේශීයව නිපදවන විදේශීය විස්කි බෝතලයක මිල ද රුපියල් 100කින් ඉහළ නංවා ඇත.

එමෙන්ම විදේශීය මත්පැන් වර්ග ඒවායේ සැර ප්‍රමාණය අනුව මිල ඉහළ නැංවෙනු ඇත.

අනුරාධපුර භික්ෂු විශ්වවිද්‍යාලය දින නියමයක් ⁣නොමැතිව වසා දමා ඇති බව එහි පාලනාධිකාරිය පවසයි.

ඒ අනුව හෙට (11) දහවල් 12.00න් පසු විශ්වවිද්‍යාලය වසා දැමීමට ශ්‍රී ලංකා භික්ෂු විශ්වවිද්‍යාලයේ පාලක සභාව තීරණය කර තිබේ.

සියම් මහා නිකායේ මල්වතු පාර්ශ්වයේ අනුනායක අතිපූජ්‍ය නියංගොඩ විජිතසිරි නාහිමිපාණන් වහන්සේ විසින් මේ බව පවසන ලදී.

එක්සත් ජාතික පක්ෂයේ නව මහ ලේකම් ලෙස පත් වූ හිටපු මන්ත්‍රිනී තලතා අතුකෝරළ මහත්මිය සිය ධුරයේ වැඩ කටයුතු  සිරිකොත පක්ෂ මූලස්ථානයේ දී අරඹ කළාය.

ඇයව මෙම ධුරය සඳහා පසුගියදා පත්කළේ හිටපු ජනාධිපති, එජාප නායක රනිල් වික්‍රමසිංහ විසිනි.

එක්සත් ජාතික පක්ෂ මහලේකම් ධුරයට කාන්තාවක් පත් වූ පළමු අවස්ථාව ලෙස ඇය වාර්තා අතරට එක් වෙයි.

එක්සත් ජාතික පක්ෂයේ මහ ලේකම්වරයා ලෙස මීට පෙර කටයුතු කළේ හිටපු මන්ත්‍රී රංගේ බණ්ඩාරයි.

මෙම අවස්ථාවට එම පක්ෂයේ ප්‍රබලයින් රැසක් එක්ව සිටියහ.

මෙහිදී මාධ්‍ය වෙත අදහස් දක්වමින් ඇය පැවසුවේ සමගි ජන බලවේගය හා සාකච්ඡා පවත්වමින් කැඩී වෙන් වී ගිය පාර්ශ්වයින් එක් රැස් කිරීමේ කටයුතු ආරම්භ කරන බවය.

"මම ඒ කටයුත්ත අතහරින්නේ නෑ. මොකද සමගි ජන බලවේගය කියන්නේ අමුතු පක්ෂයක් නෙමේ එකේ හිටපු සියලු දෙනාම එක්සත් ජාතික පක්ෂයේ හිටපු අය.  අපි ඒ අයට විවෘත ආරාධනයක් කරනවා මොකද රනිල් වික්‍රමසිංහ නායකතුමාගේ පූර්ණ ආශිර්වාදය තියෙනවා. නායකතුමා කිසිම විදිහකට තහංචි දාලා නෑ එහෙම නම් එතුමා මාව ගන්නෙත් නෑනේ.

මේ තනතුර මට අභියෝගයක්. මොකද මේ අභියෝගය භාර ගන්න මම කැමතියි. එක අතකින් මම සන්තෝෂ වෙනවා කාලෙකට ඉස්සෙල්ලා මගේ එකම සහෝදරයා මේ නතතුර දරමින් රටේ සියලුම පාක්ෂිකයින්ගේ විශ්වාසය දිනාගෙන වැඩකටයුතු කළා. මම දැක්කේ එයා දේශපාලනය කරනවා විතරයි එතකොට ඒ ගමන් මගේ ගිහිල්ලා සියලු දෙනාම එකතු වෙලා මේ පක්ෂය ජයග්‍රහණය කරනවා කියන්නේ මේ රටේ ජයග්‍රහණය සහ රටේ ජනතාව ජයග්‍රහණය කරනවා කියන එක."

විදුලි සංදේශ නියාමන කොමිෂන් සභාවේ ලියාපදිංචි නොවූ ජංගම දුරකතන ඇතුළු සන්නිවේදන උපකරණ මෙරටදී භාවිතය තහනම් කරන බව එම කොමිෂන් සභාව පවසයි.

නීති විරෝධී ආකාරයෙන් සන්නිවේදන උපකරණ මෙරටට රැගෙන ඒම වැළැක්වීම මෙහි අරමුණ බව විදුලි සංදේශ නියාමන කොමිෂන් සභාවේ අධ්‍යක්ෂ ජනරාල් විශ්‍රාමික එයාර් වයිස් මාර්ෂල් බන්දුල හේරත්  පවසයි.

ජනවාරි මාසය අවසන් වන විට ඒ සඳහා විශේෂ ස්වයංක්‍රිය පද්ධතියක් හඳුන්වාදීමට ශ්‍රී ලංකා විදුලි සංදේශ නියාමන කොමිෂන් සභාව සැලසුම් කර තිබේ.

නිසි ප්‍රමිතියකින් තොර වූ, නීත්‍යනුකූල නොවන සන්නිවේදන උපකරණ මිල දී ගැනීමෙන් ජනතාවට අපහසුතා හා අවහිරතාවලට මුහුණදීමට සිදුව ඇති හෙයින් එවැනි උපකරණ පාරිභෝගිකයන්ට විකිණීම වැළැක්වීම කොමිෂන් සභාවේ වගකීමකි.

දැනට භාවිත කරන ජංගම දුරකතනවලට හා විදේශිකයන්ට මෙම නව වැඩපිළිවෙළ මඟින් ජංගම දුරකතන භාවිතයට අවහිරයක් සිදු නොවන බව ද ඒ මහතා වැඩිදුරටත් සඳහන් කරයි.

රුසියාවේ හිටපු ශ්‍රී ලංකා තානාපති උදයංග වීරතුංග මිරිහාන පොලීසිය විසින් අත්අඩංගුවට ගෙන ඇත.

ඒ අසල්වැසියෙකුට පහරදීමේ චෝදනාවකටය.

ඔහු අද අධිකරණයට ඉදිරිපත් කිරීමට නියමිත බව වාර්තා වේ.

තුවාල ලැබූ පුද්ගලයා මේ වනවිට ශ්‍රී ජයවර්ධනපුර මහ රෝහලට ඇතුළත් කර ඇත.

2025 වර්ෂය සඳහා වන විසර්ජන පනත් කෙටුම්පත අද (09) පාර්ලිමේන්තුවට ඉදිරිපත් කෙරුණි.

ඒ අනුව මේ වසරේ ජනවාරි මස 1 වනදා සිට දෙසැම්බර් මස 31 වනදා දක්වා වු කාලසීමාව සඳහා ආණ්ඩුවේ වියදම් ලෙස රු බි 4,616ක් ලෙස ඇස්තමේන්තු ගත කර තිබේ.

ඒ අනුව 2025 වසරේ අමාත්‍යාංශ සඳහා සිදුකර ඇති මුදල් වෙන්කිරීම් වලින් වැඩිම මුදලක් වෙන්කර ඇත්තේ මුදල් සහ ක්‍රමසම්පාදන සහ ආර්ථික සංවර්ධන අමාත්‍යාංශය වෙතය. එය රුපියල් බිලියන 713කි.
අමාත්‍යාංශ අනුව සම්පූර්ණ වියදම් පිළිබඳ විස්තරය,
බුද්ධශාසන, ආගමික සහ සංස්කෘතික කටයුතු අමාත්‍යාංශය
පුනරාවර්තන - රු. බි 8.3
මූලධන - රු. බි 5.4

මුදල් සහ ක්‍රමසම්පාදන සහ ආර්ථික සංවර්ධන අමාත්‍යාංශය
පුනරාවර්තන - රු. බි 484
මූලධන - රු. බි 229

ආරක්ෂක අමාත්‍යාංශය
පුනරාවර්තන - රු. බි 382
මූලධන - රු. බි 60

අධිකරණ හා ජාතික ඒකාබද්ධතා අමාත්‍යාංශය
පුනරාවර්තන - රු. බි 38
මූලධන - රු. බි 16

සෞඛ්‍ය හා ජනමාධ්‍ය අමාත්‍යාංශය
පුනරාවර්තන - රු. බි 412
මූලධන - රු. බි 95

විදේශ කටයුතු, විදේශ රැකියා සහ සංචාරක අමාත්‍යාංශය
පුනරාවර්තන - රු. බි 19.4
මූලධන - රු. බි 2

වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්‍යාංශය
පුනරාවර්තන - රු. බි 2.16
මූලධන - රු. මි 397

ප්‍රවාහන, මහාමාර්ග, වරාය සහ සිවිල් ගුවන්සේවා අමාත්‍යාංශය
පුනරාවර්තන - රු. බි 52.4
මූලධන - රු. බි 421

කෘෂිකර්ම, පශු සම්පත්, ඉඩම් සහ වාරිමාර්ග අමාත්‍යාංශය
පුනරාවර්තන - රු. බි 83
මූලධන - රු. බි 124

බලශක්ති අමාත්‍යාංශය
පුනරාවර්තන - රු. බි 1
මූලධන - රු. බි 20

නාගරික සංවර්ධන, ඉදිකිරීම් සහ නිවාස අමාත්‍යාංශය
පුනරාවර්තන - රු. බි 3
මූලධන - රු. බි 98

ග්‍රාමීය සංවර්ධන, සමාජ ආරක්ෂණ හා ප්‍රජාව සවිබලගැන්වීමේ අමාත්‍යාංශය
පුනරාවර්තන - රු. බි 24
මූලධන - රු. බි 05

අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යාංශය
පුනරාවර්තන - රු. බි 206
මූලධන - රු. බි 65

රාජ්‍ය පරිපාලන, පළාත් සභා සහ පළාත් පාලන අමාත්‍යාංශය
පුනරාවර්තන - රු. බි 463
මූලධන - රු. බි 33

වැවිලි සහ ප්‍රජා යටිතල පහසුකම් අමාත්‍යාංශය
පුනරාවර්තන - රු. බි 5.4
මූලධන - රු. බි 11

කර්මාන්ත සහ ව්‍යවසායකත්ව සංවර්ධන අමාත්‍යාංශය
පුනරාවර්තන - රු. බි 04
මූලධන - රු. බි 08

ධීවර, ජලජ සහ සාගර සම්පත් අමාත්‍යාංශය
පුනරාවර්තන - රු. බි 6.2
මූලධන - රු. බි 5.2

පරිසර අමාත්‍යාංශය
පුනරාවර්තන - රු. බි 12
මූලධන - රු. බි 3.5

කාන්තා සහ ළමා කටයුතු අමාත්‍යාංශය
පුනරාවර්තන - රු. බි 14
මූලධන - රු. මි 392

ඩිජිටල් අමාත්‍යාංශය
පුනරාවර්තන - රු. බි 6.7
මූලධන - රු. බි 6.8

මහජන ආරක්ෂක සහ පාර්ලිමේන්තු කටයුතු අමාත්‍යාංශය
පුනරාවර්තන - රු. බි 159
මූලධන - රු. බි 16

කම්කරු අමාත්‍යාංශය
පුනරාවර්තන - රු. බි 4.3
මූලධන - රු. බි 1.7

තරුණ කටයුතු සහ ක්‍රීඩා අමාත්‍යාංශය
පුනරාවර්තන - රු. බි 7.1
මූලධන - රු. බි 5

විද්‍යා සහ තාක්ෂණ අමාත්‍යාංශය
පුනරාවර්තන - රු. බි 2.8
මූලධන - රු. බි 2.2

මේ අතර විශේෂ වියදම් ඒකකය යටතේ පහත පරිදි වියදම් සැකසී ඇත.

ජනාධිපති

• මෙහෙයුම් වැඩසටහන

පුනරාවර්ථන වියදම් රු බි 2.5
මූලධන රු මි 354

• සංවර්ධන වැඩසටහන

පුනරාවර්ථන - රු මි 20
මූලධන - රු මි 100

අග්‍රාමාත්‍ය කාර්යාලය

• මෙහෙයුම් වැඩසටහන

පුනරාවර්ථන වියදම් රු බි 1
මූලධන රු බි 71

උපරිමාධිකරණවල විනිශ්චයකාරවරු

• මෙහෙයුම් වැඩසටහන

පුනරාවර්ථන වියදම් රු මි 451
මූලධන රු මි 30

අමාත්‍ය මණ්ඩල කාර්යාලය

• මෙහෙයුම් වැඩසටහන

පුනරාවර්ථන වියදම් රු මි 205
මූලධන රු මි 25

විදුලිය බිල අඩු කිරීම දවසින් දෙකෙන් කළ නොහැකි බවත් විදුලිය බිල අඩු කරන්නේ වසර තුනක් ඇතුළත බවත් බලශක්තිය අමාත්‍ය ඉංජිනේරු කුමාර ජයකොඩි පාර්ලිමේන්තුවේදී අද (9) පැවසීය.

විදුලි බලය අඩු කරනවා කියලා කොහේවත් කියා නැතැයිද ඔහු සඳහන් කළේය.

අමාත්‍යවරයා මෙසේ පැවසුවේ සමගි ජන බලවේගයේ කුරුණෑගල දිස්ත්‍රික් මන්ත්‍රී නීතිඥ දයාසිරි ජයසේකර, විදුලි බිල සම්බන්ධයෙන් මතු කළ ප්‍රශ්නයකට පිළිතුරු දෙමිනි.

කුමාර ජයකොඩි ඇමතිවරයා මෙසේද සඳහන් කළේය.

''විදුලි බිල අඩු කිරීම තමයි අපේ අරමුණ. අපි විදුලි බිල අඩු කිරීම දවසින් දෙකෙන් කරනවා කියලා කියලා නැහැ. අවුරුදු තුනක් ඇතුළත තමයි කරන්න වෙන්නේ. පසුගිය පාලනය කරපු දූෂණවල ප්‍රතිඵල ජනතාවට අද විඳින්න සිදුවෙලා. විදුලිබල මණ්ඩලය මේ වන විට බිලියන 332 ක ණයකින් පෙළෙනවා. වැඩුමිලට විදුලිය මිලදී ගැනීම සිදුවුණා. විදුලිය මිලදී ගන්න වැය වන මුදල වැඩියි. මේක වැඩපිළිවෙලක් ඇතුව හැදීම තමයි අරමුණයි. මේකෙ පැටලිල්ලි ගොඩක් තියෙනවා. ඒවා නිවැරදි කරන්න ඕන. විදුලි බල මණ්ඩලයෙන් අපිට යෝජනා ලැබුනේ සියයට 37 ක් වැඩි කරන්න. අපි ඒක පැත්තක තියලා සකසුරුවම් කරලා තමයි මේ ගෙනියන්නේ. මේකෙ තියෙන පරණ පව් ටික හෝදන්න වෙලා තියෙනවා. අපි අපේ හිතවතුන්ට ප්‍රොජෙක්ට් දෙන්නේ නැහැ. විදුලි බිල අඩු කිරීමට අවශ්‍ය සැලසුම් ගනිමින් පවතිනවා.''

දයාසිරි ජයසේකර,

''අනුර කුමාර දිසානායක මහතා ජනාධිපතිවරයා වෙන්න කලින් විදුලි බිල ඉතාම කෙටි කාලයක් ඇතුලත ඇතුළත සියයට 35 කින් විදුලිබිල අඩු කරනවා කිව්වා. පන්දාහේ මිල 3000 කරනවා කිව්වා නමදා බිල 6000 කරනවා කිව්වා. ඒවා අහල තමයි මේ රටේ මිනිස්සු ඡන්දය දුන්නේ විදුලි බල මණ්ඩලය දැන් කියනවා ජුනි මාසය වෙනකන් විදුලිය බිල අඩු කරන්න බැහැ කියලා.

ඔබතුමාලා මෙච්චර පොරොන්දු දීල ලොවෙත් නැති පොරොන්දු දීල ලොවෙත් නැති ජයග්‍රහණයක් ගත්තා. මේක තනිකරම පනත උල්ලංඝනය කිරීමක්. විදුලි බල සංශෝධනය ජුනි මාසය දක්වා කල් දැම්මේ ඇයි. මෙච්චර ප්‍රශ්න තියෙද්දී. අධික විදුලි බිල නිසා කුඩා කර්මාන්ත රැසක් වැහිලා. මොකක්ද මේකට හේතුව

උදේ ඉඳලා රෑ වෙනකම් බොරු කියන්නේ. බිලියන 167ක ලාභයක් තියෙනවා මේ කලාප නම් කොච්චරද කියලා කියන්න. සියයට පනස් හයකට වැඩිය ජල විදුලියෙන් තමයි දිව්වේ. කවද්ද මේක ඉවර කරන්නේ. පච ආණ්ඩුවක් නෙ මේ තියෙන්නේ.

බලශක්ති අමාත්‍ය විදුලි බල මණ්ඩලයේ කිසිදු ණයක් රජය පවරගෙන නැහැ.''

ශ්‍රී ලංකාවේ ආර්ථිකය සෙමෙන් නමුත්, ස්ථිර ලෙස ම නැවත වරක් අර්බුදයක් කරා ගමන් කරමින් ඇතැයි මාතලේ දිස්ත්‍රික් පාර්ලිමේන්තු මන්ත්‍රිනී රෝහිණී කවිරත්න පවසන්නී ය.

මන්ත්‍රිවරිය මේ බව ප්‍රකාශ කර ඇත්තේ පුවත්පත් නිවේදනයක් නිකුත් කරමිනි.

මන්ත්‍රිවරිය සඳහන් කරන ආකාරයට: 2024 වසරේ දෙවන කාර්තුවේ ශ්‍රී ලංකා ජංගම ගිණුමේ ඩොලර් මිලියන 432ක් තිබූ අතිරික්ත මුදල, තුන්වන කාර්තුව වන විට ඩොලර් මිලියන 303 දක්වා පහත බැස තිබේ. ඒ අනුව පහත බැස තිබෙන ප්‍රමාණය ඩොලර් මිලියන 129 කි.

ජංගම ගිණුමේ ශේෂය මෙලෙස පහත වැටීමට මුලික හේතුව ලෙස මන්ත්‍රීවරිය සදහන් කර ඇත්තේ ආණ්ඩුකරණයේ දුර්වලතාව සහ ආර්ථික සමීපව හැසිරවීමට පාලකයින් අසමත්වීම ය.

මන්ත්‍රිවරිය වැඩි දුරටත් සඳහන් කරන්නී: පසුගිය රජය ජාත්‍යන්තර මුල්‍ය අරමුදල, ලෝක බැංකුව, ආසියානු සංවර්ධන බැංකුව ආදී බහුපාර්ශවික ණයකරුවන්ට ගෙවිය යුතු සියලු ණය සහ පොලිය ගෙවූ නමුත් අඛණ්ඩව විදේශ සංචිත ඉහළ නංවා ගැනීමට ද, ජංගම ගිණුවේ ශේෂය ‘ධන’ අගයක පවත්වාගැනීමට සමත් වී තිබේ. නමුදු වත්මන් රජයේ පළමු දින 100 තුළ එම තත්වය ආපසු හැරවී තිබෙන බවයි.

මතු දැක්වෙන්නේ මාතලේ දිස්ත්‍රික් පාර්ලිමේන්තු මන්ත්‍රිනී රෝහිණී කවිරත්න විසින් නිකුත් කරනු ලැබ ඇති සම්පූර්ණ මාධ්‍ය නිවේදනය යි.

පුවත්පත් නිවේදනය

විදේශ සංචිත, ජංගම ගිණුමේ ශේෂයත් පහළ වැටිලා, ආර්ථිකය නැවත අර්බුදයක් කරා යනවා

ශ්‍රී ලංකා ජංගම ගිණුමේ 2024 දෙවන කාර්තුවේ ඩොලර් මිලියන 432 ක් වූ අතිරික්ත මුදල, තුන්වන කාර්තුවේ දී ඩොලර් මිලියන 303 දක්වා ඩොලර් මිලියන 129 කින් පහත බැස ඇත.

රටේ ආර්ථික බංකොලොත් භාවයක් ඇතිවූ පසුව ජංගම ගිණුමේ ධන ශේෂයක් පවත්වාගෙන යෑමට පසුගිය රජයට හැකි වූ නමුත්, වත්මන් ආණ්ඩුවේ පළමු මාස තුන ඇතුළත එම මුදල ඩොලර් මිලියන 129කින් පහත වැටී ඇත. ප්‍රාථමික ගිණුමේ මුදල් ඉතිරියක් වන්නේ ආයෝජන, දේශීයව වැය කිරීම සඳහා විදේශ ණය ගැනීම් ආදී මුදල් ලැබීම් හේතුවෙනි. ආණ්ඩුකරණයේ දුර්වලතාව සහ ආර්ථික සමීපව හැසිරවීමට අසමත්වීම ජංගම ගිණුමේ ශේෂය පහත වැටීමට මුලික හේතුවයි.

නිල විදේශ සංචිත පහළට

පසුගිය මාස දෙක තුළ රටේ නිල විදේශ සංචිත ද පහත වැටී ඇත. අනුර කුමා දිසානායක මැතිතුමා ජනාධිපති ධූරයට පත්වීමෙන් පළමු මාසයේ (2024 ඔක්තෝබර්) නිල විදේශීය සංචිතය ඩොලර් මිලියන 6,472ක් විය. එය නොවැම්බර් මස නොවැම්බර් මස ඩො. මි. 6,451 ඩොලර් මිලියන 21කින් අඩු විය. 2024 දෙසැම්බර් 31වන දින වන විට මිලියන 6,091ක් දක්වා, එනම් ඩොලර් මිලියන 360කින් පහත වැටී තිබේ. මාස තුනක් තුළ නිල සංචිත පහත වැටීම ඩොලර් මිලියන 381 කි.

පසුගිය රජය ජාත්‍යන්තර මුල්‍ය අරමුදල, ලෝක බැංකුව, ආසියානු සංවර්ධන බැංකුව ආදී බහුපාර්ශවික ණයකරුවන්ට ගෙවිය යුතු සියලු ණය සහ පොලිය ගෙවූ නමුත් අඛණ්ඩව විදේශ සංචිත ඉහළ නංවා ගැනීමට ද, ජංගම ගිණුවේ ශේෂය ‘ධන’ අගයක පවත්වාගැනීමට සමත් විය. වත්මන් රජයේ පළමු දින 100 තුල එම තත්වය ආපසු හැරවී ඇත.

රජය මුදල් ඉතිරි කරන සමාජයේ සියලු ම ස්ථර වෙත බදු බර පැටවීමට මේ වන විටත් පියවර ගෙන ඇත. ළමා, කාන්තා, තරුණ හා වැඩිහිටි බැංකු ගිණුම් ද ඇතුළුව රටේ බැංකු ගිණුම් මිලියන 65ක් පවතින අතර, ඒවායේ තැන්පතු/ස්ථිර තැන්පතු රු. ට්‍රිලියන 17ක් පවතී. මේ සියලු ගිණුම් ආවරණය වන පරිදි, රඳවා ගැනීමේ බද්ද 5% සිට 10% දක්වා වැඩි කිරීම නිසා මේ සියලු ගිණුම් හරහා ලැබෙන පොලී ආදායම දෙගුණ කර ගැනීමට රජය කටයුතු කර ඇත.

රජය සිය බදු ආදායම වැඩි කර ගැනීමට ජනතාව වෙත පීඩනය එල්ල කරමින් සිටින නමුත්, ආර්ථිකය කළමනාකරණය කර ගැනීමට අසමත්ව ඇත. මෙම පීඩනය ලබන අප්‍රේල් මස වන විට ඉතා දැඩි ලෙස සමාජයේ සෑම ස්ථිරයක් වෙතම දැනෙනු ඇත.

රෝහිණී කවිරත්න
මාතලේ දිස්ත්‍රික්ක පාර්ලිමේන්තු මන්ත්‍රීණී

මෝටර් රථ ප්‍රවාහන දෙපාර්තමේන්තුවේ නිර්ණායකයන්ට අනුකූලව අමතර උපාංග සංවිකිරීමට අදාළ ලියාපදිංචි සහතිකය ලබාගෙන ඇත්තේ බස් රථ 35ක් සහ ත්‍රිරෝද රථ 60ක් පමණක් බව මෝටර් රථ ප්‍රවාහන දෙපාර්තමේන්තුව පවසයි.

'හිරු' ප්‍රවෘත්ති සමග විශේෂ සාකච්ඡාවකට එක්වෙමින් එහි සහකාර මෝටර් රථ ප්‍රවාහන කොමසාරිස් සුජීව තෙන්නකෝන් ඒ බව සඳහන් කළේය.

“CLEAN SRI LANKA” වැඩසටහනට සමගාමීව මේ දිනවල මගී බස්රථ සහ ත්‍රිරෝද රථවල සවි කර ඇති මගී ආරක්ෂාවට බලපෑ හැකි උපාංග ඉවත් කිරීමේ කටයුතු සිදුකෙරේ.

ඒ මෝටර් රථ ප්‍රවාහන දෙපාර්තමෙන්තුව 2013 වසරේ නිකුත් කර ඇති චක්‍රලේකයට අනුවයි.

පොදු ප්‍රවාහන බස්රථ හා විනෝද චාරීකා සඳහා යොදා ගනු ලබන විනෝදාස්වාදය වෙනුවෙන් නවීකරණය කරන ලද බස් රථ සම්බන්ධයෙන් මෝටර් රථ ප්‍රවාහන දෙපාර්තමේන්තුව විසින් 2021 වර්ෂයේ දී ඉදිරිපත් කරන ලද යෝජනාවලිය 2024 /06 දරණ දෙපාර්තමේන්තු චක්‍රලේඛය මගින් ප්‍රකාශයට පත්ව ඇත.

එම චක්‍රලේඛය අනුව ත්‍රිරෝද රථවල සහ බස් රථවල අලංකරණය සඳහා අමතරව සවිකර ඇති උපාංග වෙනුවෙන් ගාස්තු ගෙවීමට අදාළ රථවාහන හිමිකරුවන්ට සිදුවනු ඇත.

ඒ අනුව,

• විනෝදාස්වාදය වෙනුවෙන් නවීකරණය කිරීමේ බස්රථ කාණ්ඩයේ වසර 05ක ලියාපදිංචි ගාස්තුව වන්නේ රුපියල් 50,000කි.
• බස්රථ වර්ණ ගැන්වීමේදී තීන්ත ආලේප කිරීම හෝ ස්ටිකර් භාවිත කිරීමට මාදිලි 04ක් යටතේ රුපියල් 20,000 සිට රුපියල් 40,000 දක්වා ගාස්තු අය කෙරේ.
• මීට අමතරව එලෙස නවීකරණය කරන ලද බස් රථවල බඳෙහි අලෝක රටා සහිත විදුලි පහන් සවිකිරීමට රුපියල් 20,000ක් ද ආසන සැලස්ම වෙනස් කිරීම සඳහා රුපියල් 10,000ක් ද අය කෙරේ.
• බස් රථ ඇතුලත ආලෝක රටා පද්ධති සවි කිරීමට රුපියල් 10,000ක ගාස්තුවක් අය කෙරෙන අතර බස් රථ තුළ ඩිජිටල් තිර සවි කිරිම සඳහා අය කෙරෙන ගාස්තුව වන්නේ රුපියල් 5,000කි.

ත්‍රිරෝද රථ නවීකරණ ගාස්තු

• මේ අතර, ත්‍රිරෝද රථ නවීකරණය සඳහා ද ගාස්තු අය කිරීමක් සිදු කෙරේ.

ඒ අනුව,

• තනි ප්‍රධාන පහන් සහිත ආකෘතිය වෙනස් කර ද්විත්ව ප්‍රධාන පහන් සවිකිරීමට රුපියල් 1,000ක් ගාස්තු ලෙස අය කෙරේ.
• ඉදිරි බඳෙහි පහළින් සවිකර ඇති අමතර කොටස් සියල්ල ප්ලාස්ටික් හෝ ෆයිබර් වැනි සැහැල්ලු ද්‍රව්‍යයකින් නිර්මාණය කිරීමට රුපියල් 1,000ක් අය කෙරෙන අතර, ඉදිරියට නෙරා ඇති හැඩතලවලින් තොරව මැද පිහිටි ආරක්ෂක වැඩ සුදු යකඩ ලෝහයෙන් නිර්මාණය කිරිමට රුපියල් 2,000ක මුදලක් ගාස්තු ලෙස අයකෙරේ.

මගී ආරක්ෂාවට තර්ජනය වන අයුරින් බස් රථවල සවිකර ඇති අනවශ්‍ය කොටස් ඉවත් කීරීමට ලබාදුන් සහන කාලය මාස 03 ක් දක්වා දීර්ඝ කිරීමට රජය විසින් එකගතාව පළ වීම හේතුවෙන්, ක්ලීන් ශ්‍රි ලංකා වැඩසටහන යටතේ බස් රථ සම්බන්ධයෙන් ක්‍රියාත්මක ඇතැම් ක්‍රියාමාර්ගවලට විරෝධය පළ කරමින් ආරම්භ කිරීමට සැළසුම්කර තිබූ පෞද්ගලික බස් වර්ජනය අත්හිටුවීමට වෘත්තීය සමිති ඊයේ (08) තීරණය කළේය.

මේ අතර, අග්‍රාමාත්‍ය ආචාර්ය හරිනි අමරසූරිය පාර්ලිමේන්තුවේදී ඊයේ ප්‍රකාශ කර සිටියේ, “CLEAN SRI LANKA” වැඩසටහන පිළිබඳ පාර්ලිමේන්තු විවාදය මේ මස 21 සහ 22 දින තුළ පැවැත්වීමට ද කටයුතු කරන බවයි.

hirunews

පොදු ව්‍යාපාර පිළිබඳ කාරක සභාවේ හෙවත් කෝප් කමිටුවේ සභාපති ලෙස පාර්ලිමේන්තු මන්ත්‍රී වෛද්‍ය නිශාන්ත සමරවීර  ඒකමතිකව ‍තේරී පත්වී තිබේ.

පොදු ව්‍යාපාර පිළිබඳ කාරක සභාව අද (09) පස්වරු 2ට පාර්ලිමේන්තුවේදී රැස්වී තිබුණි.

අභියාචනාධිකරණ නව විනිසුරුවරුන් දෙදෙනෙක් ජනාධිපති අනුර කුමාර දිසානායක  ඉදිරියේ ජනාධිපති කාර්යාලයේදී අද (09) පෙරවරුවේ දිවුරුම් දුන්හ.

ඒ අනුව නීතිඥ කේ. එම්. එස්. දිසානායක සහ නීතිඥ ආර්. පී. හෙට්ටිආරච්චි යන  ජනාධිපතිවරයා ඉදිරියේ දිවුරුම් දෙනු ලැබීය.