විදෙස්

ඉන්දියාවේ නවදිල්ලි දුම්රිය ස්ථානයේ ඇති වූ තෙරපුමකින් පුද්ගලයින් 18 දෙනෙකු මියගොස් තිබේ.

සිද්ධියෙන් තවත් පුද්ගලයින් රැසක් තුවාල ලබා ඇතැයිද ඉන්දීය මාධ්‍ය වාර්තා කර ඇත.

ප්‍රයාග්‍රාජ් හී මේ දිනවල පවතින මහා කුම්භමේලා උත්සවය සදහා පැමිණි දුම්රිය දෙකක් ප්‍රමාද වීමෙන් දුම්රිය ස්ථානයේ හටගත් නොසන්සුන්තාව හේතුවෙන් තෙරපීමට ලක්ව මෙම අනතුර සිදුව ඇති බව ඉන්දීය මාධ්‍ය වාර්තා කරයි.

මියගිය පිරිස අතර කාන්තාවන් 10 දෙනෙකු සහ කුඩා ළමයින් 04 දෙනෙකුද ඇතුළත් බව සදහන්වේ.

කෙසේ වෙතත්, දුම්රිය ස්ථානයේ තත්ත්වය පාලනය කිරීම සදහා ආරක්ෂක හමුදා යොදවා ඇති බව ඉන්දීය මාධ්‍ය වාර්තා කර ඇත.

එසේම මෙම අනතුර සම්බන්ධයෙන් දුම්රිය දෙපාර්තමේන්තුව පරීක්ෂණයක් පැවැත්වීමට නියෝග කර ඇති අතර ඉන්දීය අගමැති නරේන්ද්‍ර මෝදී සිය ශෝකය පළ කර ඇත.

ටිබෙටයේ දුෂ්කර කඳුකර ප්‍රදේශයක අද (07) අලුයම ඇති වූ ප්‍රබල භූමිකම්පාවෙන් අවම වශයෙන් පුද්ගලයින් 53 දෙනෙකු මිය ගොස් ඇති බව චීන රාජ්‍ය පුවත් ඒජන්සිය වන Xinhua වාර්තා කරයි.

මෙම භූ කම්පන තත්ත්වය අසල්වැසි නේපාලයේ සහ උතුරු ඉන්දියාවේ ඇතැම් ප්‍රදේශවලට දැනී තිබේ.

එක්සත් ජනපද භූ විද්‍යා සංගමය (USGS) ප්‍රකාශ කළේ රිච්ටර් මාපකයේ 7.1 ක ප්‍රබල භූ කම්පනය එරට වේලාවෙන් පෙරවරු 9.05 ට සිදු වූ අතර ඉන් අනතුරුව විවිධ පසු කම්පන ඇති වූ බවයි.

භූමිකම්පාවෙන් තවත් පුද්ගලයින් 62 දෙනෙකු තුවාල ලබා ඇති අතර, කම්පනය ඇති ටින්ග්‍රි ප්‍රාන්තයේ නිවාස 1,000 කට වැඩි ප්‍රමාණයකට හානි සිදුවී ඇති බව Xinhua වාර්තා කර ඇත.

භූමිකම්පාවේ අපිකේන්ද්‍රයේ සිට කිලෝමීටර් 86 ක් (සැතපුම් 53) පමණ දුරින් ලාට්සේ ප්‍රාන්තයේ වීදිවල හානියට පත් වහලවල්, සාප්පු ඉදිරිපස සහ සුන්බුන් ගොඩගැසී ඇති බව පෙන්නුම් කළේය. මාර්ගයේ නවතා තිබූ මෝටර් රථ සහ යතුරුපැදි කිහිපයකට ද හානි සිදුව ඇති බව දර්ශනවල දැක්වේ.

සමාජ මාධ්‍ය ඔස්සේ සංසරණය වන විඩියෝ සහ ඡායාරූප මගින් කම්පනයේ බලපෑමෙන් අර්ධ වශයෙන් කඩාවැටී ඇති ගොඩනැගිලි පෙන්නුම් කෙරේ.

එවරස්ට් කඳු පාමුල පිහිටා ඇති සහ උෂ්ණත්වය ඉතා අඩු ආපදා ප්‍රදේශයට ගලවා ගැනීමේ මෙහෙයුම් සඳහා චීන ගුවන් හමුදාව යොදවා ඇතැයි වාර්තා වේ.

මේ වන විට එම කලාපයේ විදුලිය හා ජලය සැපයුම් විසන්ධි වී ඇති බව ද චීන රාජ්‍ය මාධ්‍ය පවසයි.

අසනීප තත්ත්වයක් හේතුවෙන් ශුද්ධෝත්තම ෆ්‍රැන්සිස් පාප්වහන්සේ රෝමයේ රෝහලකට ඇතුළත් කර ඇති බව විදෙස් මාධ්‍ය වාර්තා කරයි.

උන්වහන්සේට උදරය ආශ්‍රිතව සැත්කම් රැසක් සිදු කර ඇති බව වැඩිදුරටත් වාර්තා වෙයි.

එමෙන්ම පාප්වහන්සේ මීට පෙර බ්‍රෝන්කයිටිස් රෝගයට ප්‍රතිකාර ලබා ඇත.

විදෙස් මාධ්‍යවල වැඩිදුරටත් සඳහන් වන්නේ උන්වහන්සේව මෙලෙස රෝහල්ගත කිරීම හේතුවෙන් ඉදිරි දින 03 සඳහා සංවිධානය කර තිබූ රැස්වීම් සියල්ලම අවලංගු කර ඇති බවයි.

ඩොනල්ඩ් ට්‍රම්ප්ට එරෙහිව ඇති මුදල් වංචා කිරීමේ නඩුවකට අදාළ දඬුවම ජනවාරි 10 වැනිදා නියම කරන බව නිව්යෝර්ක්හි විනිසුරු ජුවාන් මර්චන් නියෝග කර තිබේ.

ඒ ඔහු ජනාධිපතිවරයා ලෙස දිවුරුම් දීමට සති දෙකකටත් අඩු කාලයකට පෙර වීම විශේෂත්වයකි.

කෙසේ වෙතත් මෙම සිද්ධියට අදාළව නිව්යෝර්ක් විනිසුරු ජුවාන් මර්චන් ට්‍රම්ප්ට සිර දඬුවමක්, පරිවාස කාලයක් හෝ දඩයක් නියම නොකරන බව සඳහන් කර ඇත.

ඒ වෙනුවට ඔහුට “කොන්දේසි විරහිත නිදහස් කිරීමක්” ලබා දෙන බවත්, තේරී පත් වූ ජනාධිපතිවරයාට පෞද්ගලිකව නඩු විභාගය සඳහා පෙනී සිටිය හැකි බවත් ඔහුගේ නියෝගයේ සඳහන් කර ඇති බව විදෙස් වාර්තා සදහන් කරයි.

කෙසේ වෙතත් ඩොනල්ඩ් ට්‍රම්ප් තම ජනාධිපතිවරණ ජයග්‍රහණය යොදාගෙන ඔහුට එරෙහි මෙම නඩුව නිෂ්ප්‍රභ කිරීමට උත්සාහ කර තිබුණි.

නමුත් විනිසුරුවරයා තීරණය කළේ දඬුවම් නියම කිරීම සඳහා නඩුව ඉදිරියට ගෙන යාමටය.

ට්‍රම්ප්ගේ කණ්ඩායම විනිසුරුවරයා ගත් එම තීරණය විවේචනය කළේ එය නීති විරෝධී නඩුවක් නිසා වහාම නිෂ්ප්‍රභ කළ යුතු බව පවසමින්ය.

වැඩිහිටි චිත්‍රපට තරුවක් වන ස්ටෝමි ඩැනියෙල්ස්ට ඩොලර් 130,000 (£105,000) ක ගෙවීමක් සම්බන්ධ ව්‍යාපාරික වාර්තා ව්‍යාජ ලෙස සකස් කිරීම සම්බන්ධයෙන් ට්‍රම්ප් පසුගිය මැයි මාසයේදී වරදකරු කෙරුණි.

2016 මැතිවරණ ව්‍යාපාරයේ අවසාන දිනවල වැඩිහිටි චිත්‍රපට තරුවක් වන ස්ටෝමි ඩැනියෙල්ස්ට ට්‍රම්ප් සමඟ සිදු වූ බව කියන ලිංගික හමුවීමක් පිළිබඳව නිහඬව සිටීමට මෙම මුදල් ගෙවීම කර තිබුණි.

කෙසේ වෙතත් තේරී පත් වූ ජනාධිපතිවරයා සියලු වැරදි ප්‍රතික්ෂේප කරන අතර, තවදුරටත් තර්ක කරන්නේ මෙම නඩුව ඔහුගේ 2024 ජනාධිපතිවරණ ව්‍යාපාරයට හානි කිරීමේ ප්‍රයත්නයක් බවයි.

එක්සත් ජනපද වෙරළාරක්ෂක බලකාය විසින් පසුගිය බ්‍රහස්පතින්දා ඇලස්කාවේදී අතුරුදහන් වූ කුඩා මගී ගුවන්යානයේ සුන්බුන් සොයාගෙන තිබේ.

එම යානයේ සිටි පුද්ගලයන් තිදෙනෙක් මියගොස් ඇති බවත් තවත් මළ සිරුරු 07ක් ගුවන්යානය තුළ ඇති බවට විශ්වාස කරන බවත් වෙරළාරක්ෂක බලකාය සදහන් කර ඇතැයි විදෙස් මාධ්‍ය වාර්තා කරයි.

ගුවන් යානය ඇලස්කා මුහුදේ අයිස් මතට කඩා වැටී තිබේ.

යානය සම්පූර්ණයෙන්ම විනාශ වී ඇති හෙයින් දැනට එයට ප්‍රවේශ විය නොහැකි බව ඔවුන් පවසයි.

ඉන්දීය හිටපු අග්‍රාමාත්‍ය ආචාර්ය මන්මෝහන් සිං මහතා අභාවප්‍රාප්ත වේ.

1932 වසරේ සැප්තැම්බර් 26 වැනිදා වත්මන් පාකිස්තානයට අයත් කොටසක් වන පංජාබ්හිදී උපත ලැබූ ඒ මහතා, මිය යන විට 92 වැනි වියේ පසුවිය.

2004 වසරේ සිට 2014 වසර දක්වා ඉන්දීය අග්‍රාමාත්‍යවරයා ලෙස කටයුතු කළ ආචාර්ය මන්මෝහන් සිං මහතා හදිසියේ ඇතිවූ රෝගී තත්ත්වයක් හේතුවෙන් ඉන්දියාවේ නවදිල්ලි නුවර රෝහලක ප්‍රතිකාර ලබමින් සිටියදී ඊයේ (26) පස්වරුවේ අභාවප්‍රාප්ත වූ බව ඉන්දීය මාධ්‍ය වාර්තා කළේය.

ඉන්දියාවේ 13 වැනි අග්‍රාමාත්‍යවරයා වන මන්මෝහන් සිං මහතා දෙවරක් ඉන්දීය අගමැති ලෙසින් කටයුතු කර තිබේ.

සතියක ශෝක කාලයක්

ඉන්දියාවේ හිටපු අග්‍රාමාත්‍යවරයෙකු වන ආචාර්ය මන්මෝහන් සිංගේ අභාවය හේතුවෙන් එරට සතියක ජාතික ශෝක කාලයක් ප්‍රකාශයට පත් කර තිබේ.

හිටපු අග්‍රාමාත්‍යවරයාගේ අවසන් කටයුතු පූර්ණ රාජ්‍ය ගෞරව සහිතව සිදු කිරීමට නියමිතව ඇත.

මීට අමතරව අද දිනට නියමිත සියලු රාජ්‍ය වැඩසටහන් අවලංගු කිරීමටද ඉන්දීය බලධාරීන් තීරණය කර ඇතැයි එරට මාධ්‍ය වාර්තා කරයි.

අමෙරිකානු ජනපති ඩොනල්ඩ් ට්‍රම්ප් විසින් කැනඩාව ,මෙක්සිකෝව හා චීනයෙන් ආනයනය කරන භාණ්ඩ සඳහා තීරු බදු පනවා තිබේ.

කැනඩාව ,මෙක්සිකෝව යන රටවලට අද (02) සිටම එම තීරු බදු ක්‍රියාත්මක බව විදෙස් මාධ්‍ය සදහන් කරයි.

චීනයෙන් ආනයනය කරන භාණ්ඩ සඳහා ලබන අඟහරුවාදා සිට තීරු බදු ක්‍රියාත්මක වනු ඇත.

ඒ අනුව ඩොනල්ඩ් ට්‍රම්ප් විසින් කැනඩාව හා මෙක්සිකෝව යන රටවලින් ආනයනය කරන භාණ්ඩ සඳහා 25 % තීරු බද්දක් හා චීනයෙන් ආනයනය කරන භාණ්ඩ සඳහා 10% ක තීරු බද්දක් එලෙස පනවා ඇත.

ධවල මන්දිරය ප්‍රකාශ කළේ අමෙරිකානු ෆෙන්ටැනයිල් මත්ද්‍රව්‍ය අර්බුදය විසඳීම සඳහා මෙලෙස තීරුබදු ක්‍රියාත්මක බවයි.

තීරු බදු ක්‍රියාත්මක කිරීමත් සමග චීන වාණිජ අමාත්‍යාංශ පවසන්නේ මෙලෙස තීරුබදු පැනවීම චීනයට හා ලෝකයේ සෙසු රටවලට හිතකර නොවන බවයි.

මේ අතර කැනේඩියානු වාණිජ මණ්ඩලය විසින් ද තීරුබදු සම්බන්ධයෙන් ප්‍රකාශයක් නිකුත් කර ඇත.

ඔවුන් සඳහන් කළේ තීරු බදු වැඩිවීමත් සමග සෑම අංශයකම පිරිවැය ඉතා ඉක්මනින් වැඩි වන බව හා එය සෑම මිනිසෙක්ටම හා සෑම ව්‍යාපාරයක් සඳහාම බලපැමක් එල්ල කරන බවයි.

තීරු බදු සම්බන්ධයෙන් කැනේඩියානු අග්‍රාමාත්‍යවරයා අද රාත්‍රියේදී ප්‍රකාශක් නියමිත බව ද, විදෙස් මාධ්‍ය වැඩිදුරටත් සඳහන් කරයි.

අමෙරිකා ජනාධිපතිවරණයෙන් හිටපු ජනාධිපති රිපබ්ලිකන් පක්ෂ අපේක්ෂක ඩොනල්ඩ් ට්‍රම්ප් ජයගෙන ඇතැයි විදෙස් මාධ්‍ය වාර්තා කරයි.

ෆ්ලොරීඩාවේ සිට සිය පාක්ෂිකයන් අමතමින් මීට සුලු මොහොතකට පෙර ට්‍රම්ප් පැවසුවේ තමන් මැතිවරණය ජයගෙන ඇති බවයි.

“ඇමරිකාව අපට පෙර නොවූ විරූ සහ බලගතු වරමක් ලබා දී ඇත,” ඔහු ප්‍රීති ඝෝෂා නඟමින් සිටි පිරිසට පැවසීය.

ජනාධිපතිවරණය ජයගැනීම සඳහා අපේක්ෂකයකු අමෙරිකාවේ මැතිවරණ විද්‍යාල 538 න් 270 ක බහුතර බලය හිමිකර ගත යුතුය.

ට්‍රම්ප් මේවනවිට එම ආසන 266 ක බලය හිමිකර ගෙන තිබේ.

ඩිමොක්‍රටික් පක්ෂ අපේක්ෂිකා කමලා හැරිස් හිමිකර ගෙන ඇත්තේ ආසන 219 ක් පමණකි.

කෙසේවෙතත් තවමත් අවසන් ප්‍රතිපල ප්‍රකාශයට පත්ව නොමැත.

අමෙරිකාවේ 47 වැනි ජනාධිපතිවරයා ලෙස ඊයේ(20) රාත්‍රියේ ඩොනල්ඩ් ට්‍රම්ප් දිවුරුම් දී තිබේ.

ඒ, එරට අගවිනිසුරු ජෝන් රොබට්ස් ඉදිරියේදීයි.

අමෙරිකානු කොංග්‍රසය රැස්වන, වොෂින්ටන් අගනුවර පිහිටි කැපිටල් ගොඩනැගිල්ලේ රොටුන්ඩා ශාලාවේදී පදවි ප්‍රාප්ති උත්සවය පැවැත්විය.

බැරැක් ඔබාමා, බිල් ක්ලින්ටන් සහ ජෝර්ජ් ඩබ්ලිව් බුෂ් ඇතුළු අමෙරිකාවේ හිටපු ජනාධිපතිවරුන් මෙන්ම, එලෝන් මස්ක්, ජෙෆ් බේසොස් සහ මාක් සකර්බර්ග් වැනි තාක්ෂණ ලෝකයේ දැවැන්තයින් සහ සුපිරි ධනවතුන් පිරිසක් ද එම අවස්ථාවට එක්ව සිටියේ ය.

ඩොනල්ඩ් ට්‍රම්ප්ගේ බිරිඳ වන මෙලානියා ට්‍රම්ප් ඇතුළු ඔහුගේ පවුලේ සමීපතමයින් ද ඊට එක් වූ බව විදෙස් වාර්තාවල සඳහන් විය.

අමෙරිකාවේ නව උපජනාධිපතිවරයා ලෙස ජේ ඩී වෑන්ස් දිවුරුම් දීමෙන් අනතුරුව, ඩොනල්ඩ් ට්‍රම්ප්ගේ දිවුරුම් දීම සිදුවිය.

ඉන් අනතුරුව අමෙරිකාවේ 47 වැනි ජනාධිපතිවරයා ලෙස ඩොනල්ඩ් ට්‍රම්ප් පළමු වරට සිය ජනතාව ආමන්ත්‍රණය කළේ ය.

පසුව ඩොනල්ඩ් ට්‍රම්ප්, ජනාධිපති ආර්යාව සහ නව උපජනාධිපති ජේ ඩී වෑන්ස් සහ ඔහුගේ බිරිඳ කැපිටල් ගොඩනැගිල්ලෙන් පිටතට පැමිණියේ හිටපු ජනාධිපතිවරයාගේ නික්ම යෑම වෙනුවෙනි.

මුලින්ම පසුගිය ජනාධිපතිවරණයේ ඩොනල්ඩ් ට්‍රම්ප්ගේ ප්‍රතිවාදියා වූ හිටපු උපජනාධිපතිනී කමලා හැරිස් සහ ඇයගේ සැමියා කැපිටල් ගොඩනැගිල්ලෙන් පිටව ගිය අතර ඉන් අනතුරුව හිටපු ජනාධිපති ජෝ බයිඩන් සහ ජිල් බයිඩන් නව ජනාධිපතිවරයාට සමුදී කැපිටල් ගොඩනැගිල්ලෙන් පිටව ගියේ ය.

කැපිටල් ගොඩනැගිල්ලේම පිහිටි ජනාධිපති කාර්යාලයේ සිට ඩොනල්ඩ් ට්‍රම්ප් නිල වශයෙන් සිය වැඩ භාරගැනීමේ පත්‍රිකාවලට අත්සන් තැබුවේ ඉන් අනතුරුවයි.

දැඩි ශීත කාලගුණය හේතුවෙන් මෙවර කැපිටල් ගොඩනැගිල්ල ඉදිරිපිටට පාක්ෂිකයින්ට රැස්වීමට අවස්ථාව හිමිවුයේ නැත.

ඒ හේතුවෙන් සිය පාක්ෂිකයින් හමුවීමට ජනාධිපතිවරයාට "කැපිටල් වන් අ'රීනා" ක්‍රීඩාගාරය වෙත යාමට සිදු විය.

එහිදී ජනාධිපතිවරයාට ලැබුණේ, උණුසුම් පිළිගැනීමක් සහ අලංකාර පෙළපාලියකින් ද සැමරුම් උත්සවය වර්ණවත් විය.

ඉන් අනතුරුව ඩොනල්ඩ් ට්‍රම්ප් සිය ආධාරකරුවන් ඉදිරියේ විධායක නියෝග කිහිපයකට අත්සන් තැබුවේ ය.

එක්සත් ජාතීන්ගේ පැරිස් සම්මුතියෙන් අමෙරිකාව යළිත් ඉවත් කරගැනීම ඒ අතරින් සුවිශේෂී.

1902 වසරෙන් පසු අඛණ්ඩ "නොවන" වාර දෙකකදී අමෙරිකානු ජනාධිපතිවරයා ලෙස පත්වුණු පළමු පුද්ගලයා ලෙස ඩොනල්ඩ් ට්‍රම්ප් ඉතිහාස ගත වේ.

අපරාධ නඩු විභාගයකින් වරදකරු වූ පුද්ගලයෙකු අමෙරිකානු ජනාධිපතිවරයා ලෙස දිවුරුම් දුන් පළමු අවස්ථාව ලෙස මෙය දේශපාලන ඉතිහාසයට එක්වීම ද විශේෂත්වයකි.

පළමු ධුර කාලයේදී දෝශාභියෝග දෙකකට මුහුණ දුන් ඔහු ඝාතන ප්‍රයත්න දෙකකින්ද දිවි ගලවා ගෙන ඇත.

ස්පාඤ්ඤයේ නැඟෙනහිරෙන් පිහිටි වැලෙන්සියා ප්‍රාන්තයට පෙරේදා බලපෑ ධාරානිපාත වර්ෂාවෙන් හටගත් දරුණු ගංවතුර හේතුවෙන් පුද්ගලයන් 158දෙනකු ජීවිතක්ෂයට පත්වී ඇතැයි විදෙස් මාධ්‍ය වාර්තා කළේය.

තවත් පුද්ගලයන් රැසක් අතුරුදන් වූ බවට තොරතුරු වාර්තා වන බැවින් මරණ ගණන තවත් ඉහළ යනු ඇතැයිද විදෙස් මාධ්‍ය වැඩිදුරටත් වාර්තා කළේය.

වැලෙන්සියා ප්‍රාන්තයේ නගර ගණනාවකට මේ ගංවතුර තත්ත්වය බලපා ඇති අතර, නිවාස, ගොඩනැඟිලි, මහාමාර්ග,පාලම් හා රථ වාහන සිය ගණනක් ද ගංවතුරට හසුවී විනාශ වී ඇතැයි වාර්තාවේ. මේ වන විටත් එරට ආපදා සහන සැලසීමේ කණ්ඩායම්, යුද හමුදාව සහ පොලිසිය ඒකාබද්ධව අතුරුදන්වුවන් සොයා දැවැන්ත මෙහෙයුමක් ආරම්භ කර ඇති බවත්, ඒ සඳහා දසදහසකට වැඩි පුද්ගලයන් පිරිසක් යොදවා ඇති බවත් විදෙස් මාධ්‍ය සඳහන් කළේය.

එක දිගට අඛණ්ඩව පැය අටකට වැඩි කාලයක් ඇද හැලුණු වර්ෂාව ගංවතුර තත්ත්වයට හේතු වී ඇති අතර, ඇසින් දුටු පුද්ගලයන් වාර්තාකරුවන්ට ප්‍රකාශ කර ඇත්තේ එය ‘සුනාමියකට සමාන වූ ගංවතුර තත්ත්වයක් බවය.අධික වැසි තත්ත්වය හේතුවෙන් දුම්රිය හා පොදු ප්‍රවාහන සේවා අත්හිටුවා ඇති අතර, ප්‍රාන්තයේ සියලු පාසල් ද වසා දැමීමට බලධාරීන් පියවර ගෙන තිබේ.මෙවැනි දරුණු ගංවතුර තත්ත්වයක් ස්පාඤ්ඤයට බලපා ඇත්තේ වසර 51කට පසුව බවත්, මීට පෙර 1973 දී ඇති වූ ගංවතුර තත්ත්වයෙන් ජීවිත 150ක් පමණ අහිමිවූ බවද වාර්තා වේ.

ගංවතුර හා වැසි තත්ත්වය තවදුරටත් පවතින අතර, මියගිය පුද්ගලයන් වෙනුවෙන් දින තුනක ජාතික ශෝක කාලයක් ප්‍රකාශයට පත් කිරීමට ස්පාඤ්ඤ අගමැති පෙඩ්රෝ සැන්චෙස් පියවර ගෙන ඇතැයි වාර්තා වේ.

විපතට පත් වූවන් සඳහා යුරෝ මිලියන 250 ($ 270m) ආධාර ප්‍රකාශයට පත් කර ඇත.

පාකිස්තානයේ හිටපු අග්‍රාමාත්‍ය ඉම්රාන් ඛාන්ට වසර 14ක සිර දඬුවමක් එරට අධිකරණයක් නියම කර ඇත.

ඒ ඉම්රාන් ඛාන්ට එරෙහිව පවතින ඉඩම් දූෂණ නඩුවක් අද (17) කැඳවූ අවස්ථාවේදී මෙම නියමය ලබා දී තිබේ.

ඉම්රාන් ඛාන්ට අයත් අල්-කදර් විශ්වවිද්‍යාල ව්‍යාපෘති භාරයට සම්බන්ධ අධිකාරිය අනිසි ලෙස භාවිතා කිරීම සහ දූෂණය සම්බන්ධ නඩුවක් මෙලෙස විභාග කර ඇතැයි වාර්තා වේ. මෙය ඉම්රාන් ඛාන්ට එරෙහිව පවතින බරපතළම චෝදනාව ලෙස සැලකේ.

මේ වන විට ඉම්රාන් ඛාන් 72වැනි වියෙහි පසුවේ.

ඉම්රාන් ඛාන් අගමැතිවරයා ලෙස කටයුතු කළ අවධියේ පාකිස්තානය මුහුණ දුන් මූල්‍යම කඩා වැටීම ඇතුළු චෝදනා කිහිපයක් වෙනුවෙන් ඔහු 2023 වසරේ අගෝස්තු මාසයේ සිට මේ වනවිට සිරගතව සිටියි.

මේ අතර, ඔහුගේ බිරිඳ බුෂ්රා බීබීට ද වසර හතක සිර දඬුවමක් නියම  වී තිබේ.

හිස්බුල්ලා සංවිධානයේ නව ප්‍රධානියා ලෙස නයිම් කාසීම් නම් කර තිබේ.

ඒ , පසුගිය සැප්තැම්බර් මාසයේ දී ඊශ්‍රායල ප්‍රහාරයකින් හිස්බුල්ලා සංවිධානයේ හිටපු ප්‍රධානී හසන් නසරල්ලා මිය යෑමෙන් ඇති වූ පුරප්පාඩුව සඳහා ය.

71 හැවිරිදි නයිම් කාසීම් 1980 දී හිස්බුල්ලා සංවිධානය ආරම්භ කළ ආගමික විද්වතුන් අතර සිටින පුද්ගලයෙකි.

අමෙරිකා ජනාධිපති ජෝ බයිඩ්න් සිව් වසරකට පසු සිය ධුර කාලය අවසන් කරමින් ධවල මන්දිරයට සමුදී තිබේ.

විනාඩි 19ක් පුරා ජාතිය ඇමතීමෙන් අනතුරුව මෙලෙස සමු දුන් බව විදෙස් මාධ්‍ය වාර්තා කරයි.

එම වාර්තාවල සඳහන් වන පරිදි අවසන් වරට ඕවල් කාර්යාලයේ සිට ජාතිය අමතමින් ඔහු කියා සිටියේ විශාල කනස්සල්ලක් ඇති කරන ඇතැම් දේවල් ගැන රටට අනතුරු ඇගවීමට අවශ්‍ය බවයි.

බලය සහ ලාභ ප්‍රයෝජන තකා සමාජ මාධ්‍ය පවසන බොරුවලින් සත්‍ය යටපත්වී ඇති බව ඔහු පවසා තිබුණි.

අපගේ දරුවන් අපගේ පවුල් සහ අපගේ ප්‍රජාතන්ත්‍රවාදය බලය අනිසි ලෙස භාවිත කිරීමෙන් ආරක්ෂා කර ගැනීමට සඳහා සමාජ වේදිකා වගකිව යුතු බව ද ඔහු පවසා තිබේ.

තමන් බීජ රෝපණය කර ඇති අතර ඒවා වර්ධනය වී දශක ගණනාවක් තිස්සේ මල්පිපෙනු ඇතැයි ඔහු සිය සමුගැනිමේ දේශනය අතරතුර සඳහන් කර ඇත.

ප්‍රජාතන්ත්‍රවාදයට ගරු කරන ලෙස ඉල්ලා සිටි ජෝ බයිඩ්න්, තමන් අමෙරිකාවට ආදරය කරන බව ද වැඩි දුරටත් ප්‍රකාශ කර තිබේ.

පසුගිය දින කිහිපය තුළ ඉන්දියාවේ දිල්ලි අගනුවර වායු ගුණාත්මකභාවය පහළ ගොස් තිබේ.

විදෙස් මාධ්‍ය වාර්තා කළේ කාලගුණික බලපෑම්, ආගමික උත්සවවලදී රතිඤ්ඤා භාවිතය, වගා අවශේෂ ගිනි තැබීම් ඊට හේතු වී ඇති බවයි.

දිල්ලි අගනුවර පවතින වායු ගුණාත්මක දර්ශක අගය 400 සහ 500 සීමාව අතර හෙවත් ඉතා දුර්වල මට්ටමක පවතින බවත් විදෙස් වාර්තාවල සඳහන් වේ.

එරට කාලගුණ අංශ අනතුරු අඟවන්නේ මෙම තත්ත්වය තවදුරටත් උග්‍ර වනු ඇති බවයි.

දෝෂාභියෝගයට දකුණු කොරියානු ජනාධිපති යූන් සුක් යෝල් (Yoon Suk Yeo) දකුණු කොරියානු දූෂණ විරෝධී විමර්ශකයින් විසින් අත්අඩංගුවට ගෙන ඇත.

යූන් සොක් යෝල් රැගත් රථ කිහිපයක් ඔහුගේ නිවසින් පිටව ගිය බව විදෙස් මාධ්‍ය වාර්තා කර යි.

අද(15) උදෑසන යුන් සොක් යෝල් අත්අඩංගුවට ගැනීමේ වරෙන්තුව ක්‍රියාත්මක කිරීම සඳහා දෙවනවරටත් විමර්ශකයින් ඔහුගේ නිල නිවසට ඇතුළු වූ බව වාර්තා වේ.

යූන් ගැන විමර්ශනය කිරීම සඳහා පොලිසිය සහ ආරක්ෂක අමාත්‍යාංශය සමඟ කටයුතු කරන දූෂණ විමර්ශන කාර්යාලයේ (CIO)විසින් පසුගිය දෙසැම්බර 03 වන දින යුද නීතිය පැනවීමට කෙටිකාලීන උත්සාහයකින් පසුව කැරැල්ලේ චෝදනා මත විමර්ශනය කරමින් සිටියදී මෙලෙස අත්අඩංගුවට පත්ව ඇත.

ජනාධිපතිවරයා මුල් වරට අත්අඩංගුවට ගැනීමට යාමේදී ඔහුගේ ආරක්ෂක අංශ හා පාක්ෂිකයන් විසින් වලක්විමත් සමඟ අධිකරණය විසින් කලින් වරෙන්තුවක් දීර්ඝ කිරීමට අවසර ලබා දී තිබුණි.

මෙම වරෙන්තුව මඟින් විමර්ශකයන්ට පැය 48ක් දක්වා යූන් රඳවා තබා ගැනීමට ඉඩ සලසයි. ඔහු තවදුරටත් රඳවා තබා ගැනීම සඳහා එම කාලය තුළ CIO අත්අඩංගුවට ගැනීමේ වරෙන්තුවක් සඳහා ඉල්ලුම් කළ යුතුය.

ජනාධිපතිවරයා අත්අඩංගුවට ගැනීමත් සමඟ නිල නිවසින් පිටත ජනකායක් සිටින අතර, යූන්ගේ ආධාරකරුවන් සහ විවේචකයන්ගෙන් පිරී ඇති අතර, පොලිසිය නිලධාරීන් 1,000 ක් පමණ යොදවා ඇත.

පසුගිය 31වැනි දා දෝෂාභියෝගයක් හේතුවෙන් සිය ධුරය අහිමි වූ දකුණු කොරියානු ජනාධිපති යූන් සුක් යෝල් අත්අඩංගුවට ගැනීමේ වරෙන්තුවකට එරට අධිකරණය අනුමැතිය ලබා දුන්නේ ය.

ඊශ්‍රායලය අග්‍රාමාත්‍ය බෙන්ජමින් නෙතන්යාහුගේ නිවස දෙසට ඩ්‍රෝන ප්‍රහාරයක් එල්ලවී ඇතැයි විදෙස් මාධ්‍ය වාර්තා කරයි.

හමාස් නායක යාහියා සින්වාර් ඝාතනය කර පැය කිහිපයකට පසු සෙනසුරාදා ඊශ්‍රායලයේ සිසේරියා හි පිහිටි ඊශ්‍රායල අගමැතිවරයා‌ගේ පෞද්ගලික නිවස දෙසට මෙලෙස ප්‍රහාර එල්ල වී තිබේ.

ලෙබනන් ප්‍රහාර වලින් මෙලෙස නෙතන්යාහුගේ නිවස විනාශ වී ඇති බව අග්‍රාමාත්‍ය කාර්යාලය පවසයි.

“අග්‍රාමාත්‍යවරයා සහ ඔහුගේ බිරිඳ එම ස්ථානයේ නොසිටි අතර, සිද්ධියෙන් කිසිදු තුවාලයක් සිදුවී නොමැත” යනුවෙන් නිවේදනයක් නිකුත් කරමින් අග්‍රාමාත්‍ය කාර්යාලය සදහන් කර ඇත.

නෙතන්යාහු, සිසේරියා සහ ජෙරුසලමේ පෞද්ගලික නිවාස දෙකක් භාවිතා කරන අතර දැනට ප්‍රතිසංස්කරණය වෙමින් පවතින ජෙරුසලමේ අගමැතිගේ නිල නිවස වන Beit Aghion හි මෙම ප්‍රහාරය එල්ලවන අවස්ථාවේ කාලය ගත කර ඇතැයි ද සදහන් වේ.

කෙසේ නමුත් ප්‍රහාර එල්ල වූ මෙම ගොඩනැගිල්ල අග්‍රාමාත්‍යවරයාගේ නිවසේ කොටසක්ද යන්න හෝ හානියේ ප්‍රමාණය ඊශ්‍රායල රජය මෙතෙක් ප්‍රකාශ කර නොමැත.

අමෙරිකාවේ කැලිෆෝනියා ප්‍රාන්තය ලැව්ගිනි හේතුවෙන් දැඩි ව්‍යසනකාරී තත්ත්වයකට පත්ව සිටින මොහොතක සිකුරාදා උදෑසන සැන් ෆ්‍රැන්සිස්කෝ වෙරළට ඔබ්බෙන් රික්ටර් මාපක 3.7 ක භූමිකම්පාවක් ඇතිව තිබෙන බව එක්සත් ජනපද භූ විද්‍යා සමීක්ෂණ ආයතනය සදහන් කරයි.

සැන් ෆ්‍රැන්සිස්කෝ ගිනි නිවන දෙපාර්තමේන්තුවට අනුව හානි හෝ තුවාල පිළිබඳ මෙතෙක් වාර්තා නොමැත.

භූමිකම්පාව ප්‍රධාන වශයෙන් සැන් ෆ්‍රැන්සිස්කෝ සහ අර්ධද්වීපයේ දැනී ඇති අතර එය මැරින් ප්‍රාන්තය දක්වා උතුරින් සහ සැන් ජෝස් දක්වා ද දැනුණු බව සදහන් වේ.

කම්පනයේ කේන්ද්‍රය ගෝල්ඩන් ගේට් පාලමට සැතපුම් 5ක් පමණ නිරිත දෙසින් සහ අධිවේගී මාර්ගයට සැතපුම් 2ක් පමණ බටහිරින් වාර්තා වී ඇත.

විදෙස් මාධ්‍ය වාර්තා කර සිටියේ ලොස් ඇන්ජලීස් හි ළැව් ගිනි පැතිර ප්‍රදේශයේ සිට සැතපුම් 350ක පමණ දුරකින් මෙම භූමිකම්පාව ඇතිව ඇති බවයි.

අමෙරිකාවේ වේලාවෙන් ඊයේ උදෑසන 7:02ට පමණ සැන් ෆ්‍රැන්සිස්කෝ බොක්ක ප්‍රදේශය අසල මෙම භූකම්පන තත්ත්වය ඇතිව ඇත.

ඉන්දියාවේ තමිල්නාඩු ප්‍රාන්තයේ සිදුවූ දුම්රිය අනතුරකින් පුද්ගලයින් 19 දෙනෙකු තුවාල ලබා තිබේ.

අනතුර සිදුව ඇත්තේ, මගී ප්‍රවාහන දුම්රියක් සහ භාණ්ඩ ප්‍රවාහන දුම්රියක ගැටීමෙනි.

එම අවස්ථාවේ මගී දුම්රිය තුළ සිටි පුද්ගලයින් සංඛ්‍යාව 1360කි.

අනතුරින් දුම්රිය මැදිරි 12ක් පීලී පැනීමට ලක්ව, මෝටර් රථයක් ද ගිනි ගෙන තිබේ.

ඒ හේතුවෙන් තමිල්නාඩුව හරහා ධාවනය වීමට නියමිත දුම්රිය 18 ක් අවලංගු කර ඇතැයි ඉන්දීය මාධ්‍ය වාර්තා කළේය.