පුවත්

ජනාධිපතිවරයාගේ හා පාර්ලිමේන්තුවේ ධූර කාලය තවත් වසර දෙකකට දික් කළ යුතු බවට එක්සත් ජාතික පක්ෂයේ මහ ලේකම් සිදුකර ඇති

ප්‍රකාශය පක්ෂයේ මතය නොවනබව එම පක්ෂයේ කොළඹ දිස්ත්‍රික් නායක හිටපු මුදල් අමාත්‍ය රවී කරුණානායක පවසයි.

ව්‍යවස්ථානුකුලව නියමිත කල වකවානුවේ අනිවාර්යයෙන්ම ජනාධිපතිවරණය පැවැත්වෙන අතර නිර්දේශපාලනික අපේක්ෂකයා ලෙස රනිල් වික්‍රමසිංහ එම මැතිවරණයට ඉදිරිපත් වන බව රවී කරුණානායක සඳහන් කරයි.

ඔහු මේ බව ප්‍රකාශ කරන්නේ ඊයේ පෙරවරුවේ පැවති මාධ්‍ය හමුවක දී එජාප මහ ලේකම් රංගේ බණ්ඩාර විසින් “ජාතිය බේරා ගැනීම සඳහා” ජනාධිපතිවරයාගේ සහ පාර්ලිමේන්තුවේ ධුර කාලය තවත් වසර දෙකකින් දීර්ඝ කිරීම සඳහා ජනමත විචාරණයක් පැවැත්විය යුතු බවට එක්සත් ජාතික පක්ෂය යෝජනා කළේ යැයි කළ ප්‍රකාශයට පිළිතුරු දෙමිනි.

එහිදී රංගේ බණ්ඩාර තවදුරටත් පැවසුවේ ආර්ථික ප්‍රතිසංස්කරණ සම්බන්ධයෙන් ජාත්‍යන්තර මූල්‍ය අරමුදල, ලෝක බැංකුව සහ අනෙකුත් පරිත්‍යාගශීලීන් සමඟ රජය ගිවිසුම්වලට එළඹ ඇති බවත්, මෙම අභ්‍යාසය සාර්ථක කර ගැනීම සඳහා ජනාධිපතිවරයාගේ සහ පාර්ලිමේන්තුවේ කාලසීමාව දීර්ඝ කිරීම අත්‍යවශ්‍ය බවත්ය.

ආර්ථිකය ස්ථාවර කිරීම හැමදේටම වඩා වැදගත් යැයි රංගේ බණ්ඩාර අවධාරණය කළේය.

“ජනාධිපතිවරයාගේ සහ පාර්ලිමේන්තුවේ කාලසීමාව දීර්ඝ කිරීම සඳහා ජනමත විචාරණයක් අපි යෝජනා කරනවා, එය කළ හැකි වඩාත්ම ප්‍රජාතන්ත්‍රවාදී ක්‍රමය එයයි,” ඔහු වැඩිදුරටත් පැවසීය.

මෙම ප්‍රකාශය නිකුත් වීමත් සමඟම සියලු දේශපාලන පක්ෂ තුළ අවුල් සහගත තත්ත්වයක් ඇති වී තිබිණි.

මෙම ප්‍රකාශය තම මහලේකම්වරයා හරහා ඉදිරියට දමා මහජනතාවගේ ප්‍රතිචාරය පරීක්ෂා කිරීමට රනිල් වික්‍රමසිංහ උත්සාහ කළේ දැයි දේශපාලන පක්ෂ තුළ බරපතල සැකයක් මතුව ඇත.

එහෙත් කොළඹ දිස්ත්‍රික් එජාප නායක රවී කරුණානායක මාධ්‍ය ඔස්සේ අවධාරණය කර තිබුණේ එය රංගේ බණ්ඩාරගේ පුද්ගලික ප්‍රකාශයක් මිස වෙන දෙයක් නොවන බවය.

“මේක ජනාධිපතිතුමාගේ තීරණයක් නෙවෙයි” රවී කරුණානායක කීවේය.

ජනතා විශ්වාසය රැකගෙන කටයුතු කිරීම මිස වෙනත් ක්‍රමවලට වැඩකර පලක් නැති බව ද රවී කරුණානායක අවධාරණය කළේය.

ජනාධිපතිවරණය සඳහා ඉදිරිපත් වන බව පවසන කිසිදු අපේක්ෂකයෙකු එම ධුරය සතු විධායක බලය අහෝසි කරන බවට මෙතෙක් ප්‍රකාශ ක‍ර නොමැති බව ජනාධිපති රනිල් වික්‍රමසිංහ සඳහන් කළේය.

විධායක ජනාධිපති ක්‍රමයේ වාසි මෙන්ම අවාසි පවතින බවත්, ජනාධිපති ධූරය සතු විධායක බලය නිසා ශ්‍රී ලංකාවේ ආර්ථිකය ගොඩනැඟීමට මෙන්ම තිස්වසරක යුද්ධය නිමා කිරිමට හැකි වූ බවත් ජනාධිපතිවරයා පෙන්වා දුන්නේය.

ජනාධිපති රනිල් වික්‍රමසිංහ  මේ බව සඳහන් කර සිටියේ ‘What’s New” තරුණ නීති වෘත්තිකයන් සමඟ නීති ප්‍රතිසංස්කරණ පිළිබඳ ජනාධිපති කාර්යාලයේදී ඊයේ (28) පවැති වැඩමුළුවට එක්වෙමිනි.

ජනාධිපතිවරයා පාර්ලිමේන්තුවට වගකිවයුතු බවට නීති සම්මත කර ගැනීම අවශ්‍ය බව මෙහිදී පැවසූ ජනාධිපති රනිල් වික්‍රමසිංහ  මේ වන විටත් ජනාධිපති ධූරයේ විධායක බලතලවලින් ප්‍රමාණයක් පළාත් සභාවලටත්, පාර්ලිමේන්තු අධීක්ෂණ කාරක සභා වෙතත් ලබාදී ඇති බව සඳහන් කළ අතර ඉදිරියේ දී ගෙන එන නව පනත් කෙටුම්පත් මගින් ජනාධිපතිවරයාගේ බලතල පාර්ලිමේන්තුවට බෙදී යන බව ද පෙන්වා දුන්නේය.

ඉදිරියේදී අනිවාර්යෙන්ම ජනාධිපතිවරණය පැවැත්වීමට කටයුතු කරන බවත් ඒ සඳහා මූල්‍ය ප්‍රතිපාදන මේ වන විටත් වෙන් කර ඇති බවත් ජනාධිපතිවරයා සඳහන් කළේය.

එහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය,

එංගලන්ත පාර්ලිමේන්තුව තුළ යම් නීතියක් සම්මත වූ පසු ඒ පිළිබඳ කිසිවෙකුට ප්‍රශ්න කළ නොහැකියි. පාර්ලිමේන්තුවේ උත්තරීතරභාවයේ පදනම එයයි. උත්තරීතර වන්නේ පාර්ලිමේන්තුවයි.

ඇමරිකානු ක්‍රමවේදය මීට වෙනස්. ඇමරිකානු ක්‍රමවේදය මගින්, ඔවුන් යම් නීතියක් කෙටුම්පත් කරන විට, විධායක බලතල ජනාධිපතිටත්, ව්‍යවස්ථාදායක බලතල කොන්ග්‍රසයටත් සහ අධිකරණ බලතල අධිකරණයටත් ලබා දුන්නා.

අපේ රට ෆෙඩරල් ක්‍රමයක් අනුගමනය නොකරන නිසා අප පවත්වාගෙන යන්නේ ඉංග්‍රීසි ක්‍රමයයි.ෆෙඩරල් ක්‍රමයට යාමට ඉන්දියාවට සිදු වූයේ ඔවුන් ෆෙඩරල් රටක් වූ නිසායි. නමුත් අපි ෆෙඩරල් රටක් නොවේ. අපේ රටේ නීති සම්පාදනය පිළිබඳ අවසාන බලතල තිබෙන්නේ පාර්ලිමේන්තුවටයි.

ශ්‍රී ලංකාවේ පාලන ක්‍රම කිහිපයක් තිබුණා. එක් ක්‍රමයක් එංගලන්ත ක්‍රමය, එයින් කැබිනට් මණ්ඩලය නියෝජනය කරනවා. අනෙක විධායක ජනාධිපති ක්‍රමයයි. විධායක බලතල තිබෙන්නේ ජනාධිපතිවරයාටයි. ව්‍යවස්ථාදායක බලතල තිබෙන්නේ ව්‍යවස්ථාදායකයටයි. එවිට ජනාධිපති එක පක්ෂයකින් සහ ව්‍යවස්ථාදායකය තවත් පක්ෂයකින් පත් වෙන්න පුළුවන්. ස්විස් පාර්ලිමේන්තු ක්‍රමයට අවධානය යොමු කළහොත් එහිදි පාර්ලිමේන්තුවෙන් ෆෙඩරල් කාරක සභාවට හත් දෙනෙක් පත් කරනවා. විධායක බලතල තිබෙන්නේ ෆෙඩරල් කවුන්සිලයටයි.

එහි සම්ප්‍රදායක් තිබෙනවා. ඒ අනුව ප්‍රධාන පක්ෂ දෙකට මන්ත්‍රී ධූර දෙක බැගින් ලබා දෙනවා. සෙසු පක්ෂවලට එක් මන්ත්‍රී ධූරයක් බැගින් ලබා දෙනවා. ඒ අය පත් කළාට පසුව ආයතන බෙදා ගන්නා ආකාරය පිළිබඳව සාකච්ඡා කිරීමට ඒ මන්ත්‍රීවරුන්ට හැකියාව තිබෙනවා. විධායක බලය යොදවන්නේ ඒ සියලු දෙනා එකතු වෙලා. කැබිනට් මණ්ඩලයට ඇමතිවරු පත් කිරීමට සහ ඉවත් කිරීමට අගමැතිවරයාට බලතල තිබෙනවා. වසරකට වරක් එම හත්දෙනාගෙන් කෙනෙක් සභාපති වෙනවා.

අනෙක් ක්‍රමය වන්නේ ශ්‍රී ලංකාවේ පැවතුණු ඩොනමෝර් ක්‍රමය. එම ක්‍රමයේදී විධායක ක්‍රමය කොටස් හතකට බෙදුණා. එයින් කෙනෙක් කථානායකවරයා ලෙස කටයුතු කළා. ඒ හත්දෙනාගෙන් කෙනෙක් සභාපති ලෙස තෝරා පත් කර ගත්තා. ඒ සභාපති ඇමති ලෙස දිවුරුම් දුන්නා. ඒ ඇමතිවරුන්ගෙන් කෙනෙක් සභානායකවරයා ලෙස තෝරා පත් කර ගත්තා. ආණ්ඩුකාරවරයා තවත් ලේකම්වරු තුන්දෙනෙක් පත් කරගත්තා. ඇමති මණ්ඩලය ලෙස කටයුතු කළේ දහදෙනයි. මේ දහ දෙනාගෙන් ප්‍රධාන ලේකම් සභාපතිවරයා ලෙස කටයුතු කළා. තීරණ ගනු ලැබුවේ මේ මණ්ඩලය රැස්වෙලා.

ඉන් පසුව ප්‍රංශ ක්‍රමය පැමිණියා. එහිදී මහජන ඡන්දයෙන් විධායක ජනාධිපතිවරයා තෝරාපත් කර ගනු ලබනවා. පාර්ලිමේන්තුවට නියෝජිතයන් පත් කරනු ලබන්නේ මහජනතාව විසිනුයි. ලංකාවේ බොහෝ දුරට ක්‍රියාත්මක වෙන්නේ මේ ක්‍රමයයි. මෙම ක්‍රමයේ වාසි සහ අවාසි දෙකම තිබෙනවා. ජේ. ආර්. ජයවර්ධන ජනාධිපතිවරයා විධායක ජනාධිපති ධූරය හොඹවමින් රට වෙනුවෙන් විශාල වැඩ කොටසක් සිදු කළා. මහවැලිය, සමනල වැව, ලුණුගම්වෙහෙර වැනි විශාල ව්‍යාපෘති ඉදි කළා. කෝට්ටේ අගනුවරක් බවට පත් කළා.

වෙළඳ කලාප දෙකක් ආරම්භ කළා. වසර 11 ක කාලයක් තුළ යුද්ධයක් කරන අතරතුර මේ සියලු සංවර්ධන ව්‍යාපෘති ක්‍රියාත්මක කළා.

ඒ වගේම ප්‍රේමදාස ජනාධිපතිවරයා ඇඟලුම් කර්මාන්තශාලා දෙසීයක් පමණ ආරම්භ කළා. විධායක ජනාධිපති ධූරය නොතිබුනා නම් ශ්‍රී ලංකාවට යුද්ධය ජය ගැනීමට ලැබෙන්නේ නෑ. විදේශ රටවල් බලාපොරොත්තු වුණේ ලංකාව ඇතුලේ අර්බුදයක් ඇතිවී ආණ්ඩුව කඩා වැටෙයි කියලා. ජනාධිපතිවරයෙක් හිටපු නිසා ඒ බලය කිසි කෙනෙකුට ගන්න බැහැ. මහින්ද රාජපක්ෂ ජනාධිපතිවරයාට එම බලය තිබුණ නිසා තමයි හමුදාව යොදවලා යුද්ධය ජය ගැනීමට හැකිවුණේ.

යහපාලන ආණ්ඩුව සමයේ එය නිසි ලෙස සිදුවුයේ නැහැ. විධායක ජනාධිපතිවරයා වෙනමත්, අප වෙනමත් වැඩ කටයුතු කරගෙන ගියා. අරගලය අවස්ථාවේදී විධායක බලතල තිබු නිසා රටේ ස්ථාවර බව ඇති කරන්න පුළුවන් වුණා. එදා අගමැතිකම බාර ගැනීමට කිසිවෙක් හිටියේ නැහැ. එවකට ජනාධිපතිවරයා නැවට නැගලා ත්‍රිකුණාමලයට යනවිට සමහරු මට කිව්වා අගමැති ධූරයෙන් ඉල්ලා අස් වෙන්න කියලා.

එහිදී බහුතරයක් තිබෙන අයෙකු පාර්ලිමේන්තුවේ සිටිය යුතු බවත්, නැතිනම් මට ඉල්ලා අස්විය නොහැකි බවත් මා සඳහන් කළා. ඉල්ලා අස්වීමේ ලිපිය ලිව්වත් මම එය ජනාධිපතිවරයාට ලබා දිය යුතුයි. ජනාධිපති නැවක සිටිද්දි, රටින් පිටවී මාලදිවයිනට යන විට මට ඉල්ලා අස්වීම ලබා දීමට හැකියාවක් නැහැ. කිසිවෙකුගේ බලපෑමට හෝ, මගේ නිවස ගිනි තැබු නිසා හෝ මා ඉල්ලා අස්වූයේ නම් ප්‍රජාතන්ත්‍රවාදී ප්‍රවාහයෙන් පිට කවුරුන් හෝ බලය ලබා ගන්නවා.

ඉදිරියේදී අප ජනාධිපතිවරණය පත්වනවා. ජනාධිපතිවරණය සඳහා ඉදිරිපත් වන බව පවසන කිසිදු අපේක්ෂයෙකු එම ධුරය සතු විධායක බලය අහෝසි කරන බවට මෙතෙක් ප්‍රකාශ ක‍ර නැහැ. පාර්ලිමේන්තුව ශක්තිමත් කරන වැඩපිළිවෙළක් අප සකස් කළ යුතුයි. මේ වන විටත් විධායක බලතලවලින් ප්‍රමාණයක් පළාත් සභාවට ලබා දී තිබෙනවා. තවත් කොටසක් කොමිෂන් සභාවලට ලබා දී තිබෙනවා. එසේම පාර්ලිමේන්තුවේ අධීක්ෂණ කාරක සභා යොදවා තිබෙනවා. තව පනත් කෙටුම්පත් කිහිපයක් පාර්ලිමේන්තුවට ගෙන ආ පසු ජනාධිපතිවරයාගේ බලතල පාර්ලිමේන්තුවට බෙදී යනවා.

ජනාධිපතිවරයා පාර්ලිමේන්තුවට වගකිවයුතු බවට නීති සම්මත කර ගැනීම අවශ්‍යයි. අලුතෙන් ගෙන එන ආර්ථික පරිවර්තන පනත මගින් ආණ්ඩුවේ ඉදිරි වසර 04ක සැලැස්ම ඉදිරිපත් කළ යුතුයි. එක් එක් වසර තුළ ක්‍රියාත්මක කළ වැඩසටහන්වලට අදාළ ප්‍රගතිය වසර අවසානයේදී පාර්ලිමේන්තුවට කිව යුතුයි. කරු ජයසූරිය මහතා යෝජනා කර තිබෙන ජන සභා ක්‍රමය ඉතා ප්‍රායෝගිකයි. ඉදිරියේදී පැමිණීමට නියමිත ස්ත්‍රී පුරුෂ සමානාත්මතා නීතියත් ඉතාම ප්‍රායෝගික බව කිවයුතුයි.

මෙහිදී මතු කළ ප්‍රශ්න සහ ජනාධිපති රනිල් වික්‍රමසිංහ  ඊට ලබාදුන් පිළිතුරු මෙසේය.

ප්‍රශ්නය,

ඔබතුමා සතුව පවතින අත්දැකීම් අනුව ජාතික ක්‍රියාකාරී සැලසුම් අසාර්ථක වීමට බලපෑ හේතු මොනවාද ?

පිළිතුර,

මෙහි ප්‍රශ්නය වන්නේ බොහෝ රජයන්ට ප්‍රතිපත්ති නොතිබීමයි. මේ තත්ත්වය සමඟ අවුරුදු හැත්තෑ හතක් අප ගත කර තිබෙනවා. 2015 වසර වන තෙක් යුද්ධය ප්‍රධාන ප්‍රශ්නයක් බවට පත්ව තිබුණා. ඒ නිසා ප්‍රතිපත්ති සකස් කළේ නැහැ. ඒ වගේම අපගේ ආර්ථික ක්‍රමය වෙනස් වුයේ ද නැහැ. ඒ නිසා අපට පසුගිය වසර කිහිපය තුළ විශාල පීඩාවකට ලක්වීමට සිදු වුණා.

යුද්ධය ආර්ථිකයට විශාල බලපෑමක් එල්ල කළා. 2001 වසරේද රටේ ආර්ථිකය කඩා වැටීමකට ලක් වුණා. ඉන් පසුව සුනාමිය ආවා. යුද්ධය අවසන් වුවත් ඉන් පසුව අපට කිසිදු සැලැස්මක් තිබුණේ නැහැ.

2015 වසරේදී අග්‍රාමාත්‍යවරයා ලෙස මම ඒ පිළිබඳ විශේෂ අවධානයක් යොමු කළා. ප්‍රාථමික අයවැයෙන් අතිරික්තයක් ඇති බවත් එයින් ඔබ්බට නොයන බවට සහතික වීමටත් මට හැකි වුණා. අප තවමත් ආනයන මත යැපෙන ආර්ථිකයක් බවට පත්ව සිටිනවා.

කෘෂිකර්මාන්තය වෙනුවෙන් අපට ප්‍රතිපත්තියක් තිබුණේ නැහැ. අනුරාධපුර රජ දවස සිට අප කුරුඳු, තේ, රබර්, පොල් අපනයනය කළා. 1948 වසරෙන් පසු අප මහවැලි සහ ගල්ඔය වැනි ව්‍යාපාර විවෘත කළා. නමුත් කෘෂිකර්මාන්තය වෙනුවෙන් ප්‍රතිපත්තියක් සකස් කළේ නැහැ. ඒ නිසා මේ රට ගොඩනැගීමේදී කෘෂිකර්මාන්තය නවීකරණය කර අපනයන ආර්ථිකයක් ඇති කිරීම හැර අපට වෙනත් විකල්පයක් නැහැ.

1977 වන තෙක් අප නිදහස් වෙළෙඳ කලාප වෙත ආයෝජන ලබා ගැනීමට කටයුතු කළද ඉන් පසුව ඒවා ගැන උනන්දු වුණේ නැහැ. එහිදී අපට පිටුපසින් සිටි රටවල් අපව පසුකරගෙන ඉදිරියට ගියා. තායිලන්තය අපට සමාන ආර්ථික මට්ටමක සිටියා, ඔවුන් අප පසුකර ඉදිරියට ගියා. මැලේසියාව, වියට්නාමය, බංග්ලාදේශය වැනි මේ සියලු රටවල් ද ඉදිරියට ගියා. ඒ නිසා පළමුව අපේ දේශපාලනික අවධානය යොමු කළ යුත්තේ ප්‍රතිපත්ති අධ්‍යයනය පිළිබඳවයි.

අධ්‍යාපන ක්ෂේත්‍රයේ නව ප්‍රතිසංස්කරණ අවශ්‍යයි. විදේශ රටවල්වලට ගොස් විශාල මුදලක් වැය කර ලබා ගන්නා උපාධි මේ රට තුළම ලබා ගැනීමට තරුණ පරපුරට අවස්ථාව හිමි විය යුතුයි. ඒ වගේම කෘත්‍රීම බුද්ධිය (AI) වැනි නවීන තාක්ෂණය සමඟ අප ඉදිරියට යා යුතුයි. අවදුරුදු 75ක මගේ ජීවිතය තුළ මම බොහෝ අත්දැකීම් ලබා තිබෙනවා. ඔබ සියලුදෙනා අයිති Z පරම්පරාවට. ඔබ මේ තරගය තුළ ඉදිරියට යා යුතුයි. ඔබගේ අනාගතය පිළිබඳ ඔබ සිතා බැලිය යුතුයි. ලෝකය සමග තරගකාරීව ඉදිරියට යා හැකි දියුණු රටක් අප ගොඩනැඟිය යුතුයි.

ප්‍රශ්නය,

ජනාධිපතිතුමනි, දේශගුණික විපර්යාස පිළිබඳව මෙන්ම සියලු සතුන්ගේ ආරක්ෂාව පිළිබඳ ඔබ දක්වන විශේෂ අවධානය අප අගය කරනවා. යෝජිත සත්ත්ව සුබසාධන පනත් කෙටුම්පත පිළිබඳ ඔබේ අදහස සහ එය සම්මත කිරීමට ගතවන කාලය පිළිබඳ දැන ගැනීමට කැමතියි ?

පිළිතුර,

සත්ව සුභසාධන පනත මේ වන විට අධීක්ෂණ කමිටුව තුළ සාකච්ඡා වෙමින් තිබෙනවා. මෙම අගෝස්තු මාසය වන විට සම්මත කර ගැනීමට පනත් කෙටුම් පත් බොහෝ ප්‍රමාණයක් තිබෙනවා. එබැවින් එය මෙම සැසිවාරයේදී සම්මත කර ගැනීමට හැකි වෙයිද කියා කිව නොහැකියි. එම නිසා එය ලබන වසරට කල් දැමීමට සිදු වෙනවා. කාන්තාවන්ගේ ආරක්ෂාව වෙනුවෙන් නව නීති කෙටුම්පත් කිහිපයක් සම්මත කර ගැනීමට අප ප්‍රමුඛත්වය දී තිබෙනවා. ඉන් පසුව දණ්ඩ නීති සංග්‍රහයට සංශෝධනයක් ගෙන එනවා. ඒ වගේම ආර්ථික පරිවර්තන පනත ගෙන ඒමට තිබෙනවා.

බොහෝ විට අපරාධයකින් උපයාගත් ආදායම පිළිබඳ පනතත් ඉදිරිපත් වනු ඇතියි. අපි දූෂණ විරෝධී පනත සම්මත කළා. අපරාධවලින් ලැබෙන ආදායම පිළිබඳ පනතත් ඉදිරිපත් කළා. ජනාධිපතිවරණයෙන් පසු ඉතිරි ඒවා ද සම්මත කර ගැනීමට බලාපොරොත්තු වෙනවා. ඒ නිසා ව්‍යවස්ථාදායකයේ කටයුතු තරමක් වැඩි වී තිබෙනවා.

නමුත් කෘෂිකර්ම අධීක්ෂණ කමිටුව සත්ව සුභසාධන පනත අධ්‍යයනය කරමින් සිටිනවා. මොකද එයාලගේ පැත්තෙන් බැලු විට මොනරුන්, වල් ඌරන්, මුවන් නිසා වගාවන් විශාල ලෙස විනාශ වන බව පැවසෙනවා. ඉතින් මේ තත්ත්වය සමබර කරගෙන ඉදිරියට යන්නේ කෙසේද කියා අවධානය යොමු කළ යුතුයි.

පාර්ලිමේන්තු මන්ත්‍රී නිතීඥ ප්‍රේමනාත් .සී. දොළවත්ත, හිටපු පාර්ලිමේන්තු මහ ලේකම් ආචාර්ය ප්‍රියානි වි‍ජේසිංහ, තරුණ කටයුතු හා තිරසර සංවර්ධනය පිළිබඳ ජනාධිපති අධ්‍යක්ෂ රන්දුල අබේවීර යන  ඇතුළු පිරිසක් මෙම අවස්ථාවට එක්ව සිටියහ.

හිටපු අමාත්‍ය ආචාර්ය සරත් අමුණුගම, ව්‍යවසායක දිලිත් ජයවීර නායකත්වය දරන 'මව්බිම ජනතා පක්ෂයේ' සභාපති ධූරයෙන් ඉල්ලා අස්විය.

ඔහු සිය ඉල්ලා අස්වීමේ ලිපිය දිලිත් ජයවීර ට යවා ඇත.

කෙසේ වෙතත් ඉල්ලා අස්වීමට හේතුවක් ඔහු එම ලිපියේ සඳහන් කර නොමැත.

දිලිත් ජයවීර ගේ දේශපාලන කටයුතු වලට එම ලිපියෙන් ඔහු සුබ පතා ඇතැයිද දැනගන්නට ඇත.

මේ සම්බන්ධයෙන් අප ආචාර්ය සරත් අමුණුගම ගෙන් කළ විමසුමකදී ඔහු පැවසුවේ, තමා මව්බිම ජනතා පක්ෂයේ සභාපති ධූරයෙන් ඉල්ලා අස්වූ බවයි.

ආචාර්ය සරත් අමුණුගම, ජාතික නිදහස් පෙරමුණේ නායක විමල් වීරවංශ, පිවිතුරු හෙළ උරුමය නායක උදය ගම්මන්පිල, පාර්ලිමේන්තු මන්ත්‍රී මහාචාර්ය චන්න ජයසුමන ඇතුළු පිරිසක් සමග සන්ධාන ගතවීමේ පැවැති උත්සවයට ද සහභාගී නොවීම විශේෂත්වයක් විය.

කෙසේ වෙතත් එම උත්සවයට ඔහුගේ දියණිය වරුණි අමුණුගම සහභාගි වූවාය.

මේ අතර සරත් අමුණුගම මහතා විමල් වීරවංශ ඇතුළු පිරිස සමග සන්ධානගතවීම සම්බන්ධයෙන් මනාපයක් නොදක්වන බව දේශපාලන ආරංචි මාර්ගවලින් පැවැසේ.

( lankadeepa.lk - සුජිත් හේවාජුලිගේ)

ශ්‍රී ලංකා නිදහස් පක්ෂයේ සභාපතිවරයා ලෙස හිටපු ජනාධිපති, මෛත්‍රීපාල සිරිසේන  කටයුතු කිරීම වළක්වාලමින් පනවා තිබෙන වාරණ නියෝගය ලබන මස 12 වැනිදා දක්වා තවදුරටත් දීර්ඝ කරන ලෙස කොළඹ දිසා අධිකරණය විසින් අද (29) නියම කරන ලදී.

හිටපු ජනාධිපතිනි චන්ද්‍රිකා බණ්ඩාරනායක කුමාරතුංග  විසින් ගොනුකර තිබූ මෙම පැමිණිල්ල අද කොළඹ දිසා විනිසුරු සඳුන් විතාන  ඉදිරියේ යළි කැඳවනු ලැබීය.

එහිදී විනිසුරුවරයා අදාළ වාරණ නියෝගය ලබන 12 වැනිදා දක්වා දීර්ඝ කිරීමට නියෝග කළේය.

හිටපු ජනාධිපති චන්ද්‍රිකා බණ්ඩාරනායක කුමාරතුංග  සිය පැමිණිල්ල මඟින් පවසන්නේ ශ්‍රී ලංකා නිදහස් පක්ෂ ව්‍යවස්ථාව යටතේ හිටපු ජනාධිපති මෛත්‍රීපාල සිරිසේනට පක්ෂයේ සභාපතිවරයා ලෙස කටයුතු කිරීමට කිසිදු නීත්‍යානුකූල හිමිකමක් නොමැති බවයි.

ඒ අනුව මෛත්‍රීපාල සිරිසේන අදාළ තනතුරේ කටයුතු කිරීම වළක්වාලමින් වාරණ නියෝගයක් නිකුත් කරන ලෙස ඉල්ලා මෙම පැමිණිල්ල ඉදිරිපත් කර තිබුණි.

පොදුජන පෙරමුණේ මංගල ආසන සමුළුව පහුගිය 26 වෙනිදා අනුරාධපුර තලාව නගරයේදී පැවැත්වුණු නමුත් ඒ සඳහා රාජ්‍ය අමාත්‍ය ෂෙහාන් සේමසිංහ වෙත ආරාධනා කර නොමැති බව වාර්තා වෙයි.

” සටන අරඹමු රජ රටින් ” යන තේමාව යටතේ මෙම ආසන සමුළුව පවත්වනු ලැබුවේ පොදුජන පෙරමුණේ නායක හිටපු ජනාධිපති මහින්ද රාජපක්ෂ ගේ ප්‍රධානත්වයෙනි.

මේ සම්බන්ධයෙන් මාධ්‍ය රාජ්‍ය අමාත්‍ය ෂෙහාන් සේමසිංහ වෙතින් විමසා ඇති අතර ඊට ප්‍රතිචාර දක්වමින් රාජ්‍ය අමාත්‍යවරයා පවසා ඇත්තේ රැස්වීමේ සංවිධායකයන් තමන්ට ඒ සඳහා ආරාධනා නොකළ හෙයින් තමා ඊට සහභාගී නොවූ බවය.

අවමගුල් උත්සවයකට ආරාධනයක් නැතිව යා හැකි වුවත් රැස්වීමකට එසේ යා නොහැකි බව ද එහිදී රාජ්‍ය අමාත්‍යවරයා පවසා ඇත.

මේ අතර සමුළුවේ ප්‍රධාන ආරාධිතයා ලෙස හිටපු ජනාධිපති මහින්ද රාජපක්ෂ ඊට සහභාගී වූවත් ඔහු එහිදී කිසිඳු අදහස් දැක්වීමක් සිදුකර නොමැති වීමද විශේෂත්වයකි.

උද්ඝෝෂණය කරන ඇතැම් සිවිල් සංවිධාන ක්‍රියාකාරීන්ට අවශ්‍ය වී ඇත්තේ රට අරාජික කිරීමට බව නාගරික සංවර්ධන හා නිවාස අමාත්‍ය ප්‍රසන්න රණතුංග අවධාරණය කරයි.

ඔහු පෙන්වා දෙන්නේ ඔවුන් උද්ඝෝෂණය කරන්නේ කීයක් හරි සොයා ගැනීමට බවයි.

“රට වනසන පනත් පරාජය කරමු” මැයෙන් නෙළුම් පොහොට්ටු කාර්යාලය ඉදිරිපිට සිවිල් සංවිධාන නියෝජිතයන් කිහිප දෙනෙකු සංවිධානය කර තිබූ උද්ඝෝෂණය අවස්ථාවේදී එම ස්ථානයේ සිටි මාධ්‍යවේදීන් නැගූ ප්‍රශ්නවලට පිළිතුරු දෙමින් ඇමතිවරයා මේ බව සඳහන් කළේය.

අද (28) පෙරවරුවේ උද්ඝෝෂණය සංවිධානය කර තිබුණේ රට වනසන පනත් සඳහා ශ්‍රි ලංකා පොදුජන පෙරමුණේ මන්ත්‍රීවරුන් විරුද්ධ විය යුතු බව පවසමිනි.

“රට වනසන පනත් පරාජය කරමු” මැයෙන් සඳහන් විරෝධතා පුවරු රැගෙන මෙලෙස විරෝධතා පා ගමනේ පැමිණ ඇත්තේ “මගෙන් රටට සංවිධානයේ” නියෝජිත සංජය මහවත්ත, කාමන්ත තුෂාර, අජන්තා පෙරේරා ඇතුළු සිවිල් සංවිධාන කිහිපයක නියෝජිතයන් කිහිප දෙනෙකි.

මේ අවස්ථාව වන විට ආණ්ඩු පක්ෂ ප්‍රධාන සංවිධායක, නාගරික සංවර්ධන හා නිවාස අමාත්‍ය ප්‍රසන්න රණතුංග ද පක්ෂ කාර්යාලයේ සිටියේය.

අමාත්‍යවරයා පක්ෂ කාර්යාලය තුළට ඇතුළු වනවිට එම ස්ථානයේ විරෝධතාවක් නොපැවැත්විණි.

අමාත්‍ය ප්‍රසන්න රණතුංග පක්ෂ කාර්යාලයේ සිය කටයුතු අවසන් කර පිටතට පැමිණෙන විට එම ස්ථානයේ සිටි පොලිස් නිළධාරියකු අමාත්‍යවරයාට පැවසුවේ විරෝධතාවක් පැවැත්වෙන නිසා එම මාර්ගයේ ගමන් කිරීමෙන් වලකින ලෙසයි.

එහෙත් අමාත්‍යවරයා පැවසුවේ එම විරෝධතාවය තමන්ට කිසිඳු ප්‍රශ්නයක් නොවන බැවින් තමන් එම මාර්ගයෙන්ම ගමන් කරන බවයි. විරෝධතාකරුවන් මාර්ගයේ ඉඩදෙන තුරු එම ස්ථානයේම මදක් නතර වී සිටීමට ඇමතිවරයාට සිදු විය. ඒ මොහොතේ එම ස්ථානයේ සිටි මාධ්‍යවේදීන් ඇමතිවරයා අසලට පැමිණ උද්ඝෝෂණය පිළිබඳව ඇමතිවරයාගෙන් විමසූවේය.

එහිදී ඇමතිවරයා ලබා දුන් පිළිතුරු මෙසේය,

ප්‍රශ්නය – උද්ඝෝෂකයින්ට කියන්න තියෙන පණිවිඩය මොකක්ද ආණ්ඩුවේ ප්‍රබලයෙක් විදියට?

පිළිතුර – මේ රට අරාජික කරන්න හදන කණ්ඩායමක්. සල්ලිවලට කීයක් හරි හොයන්න හදන කණ්ඩායමක්. ඔන්න ඕහේ කෑ ගහපුදෙන්. ඒ අයට අයිතියක් තියෙනවා. රටේ ප්‍රජාතන්ත්‍රවාදයක් තියෙනවා.

ප්‍රශ්නය – මේවාට ආණ්ඩුව සැලෙනවද?

පිළිතුර – අනේ පස් හය දෙනෙක් කෑ ගැහුවට. රටේ බහුතර මතය තියෙන්නේ මේ ආණ්ඩුව මේ රටේ මිනිස්සුන්ට ස්ථාවරයක් හදලා තියෙනවා කියලා. කෑ ගහපු එක්කෙනෙක් හරි පොහොට්ටුවට ඡන්දය දුන්න මිනිස්සු ඉන්නවද?ඔය එක එක්කෙනාගේ ගොට්ටොනේ වැඩ කරන්නේ. කෑ ගහන්න අයිතියක් තියෙනවනේ.

ප්‍රශ්නය – ඔබතුමා හිතන්නේ කාගේ ගොට්ටෝ කියලද?

පිළිතුර – කාගේ ගොට්ටෝ වුනත් ඔය එන්නේ කාගෙද කියලා ඔයාලා දන්නවනේ. නොදන්නවා නෙමෙයිනේ මාධ්‍ය ආයතන.

ප්‍රශ්නය – පොහොට්ටුවේ කොහොමද ඉදිරි සැලැස්ම

පිළිතුර – අපි අපේ දේශපාලන වැඩපිළිවෙල අපි කරගෙන යනවා. අපිට එහෙම ගැටළුවක් නෑ.

ප්‍රශ්නය – වර්තමාන ජනාධිපතිතුමාද එන්නේ ජනාධිපති අපේක්ෂකයා විදියට

පිළිතුර – කියන්න බෑනේ තව කල් තියෙනවනේ. නිවේදනයට ලක් කරාට පස්සේ ඒ ගැන කතා කරන්න පුළුවන්.

ප්‍රශ්නය – ඔබතුමාට හිතෙන්නේ නැද්ද පොහොට්ටුවේ අපේක්ෂකයා ප්‍රමාදයි කියලා

පිළිතුර – අපි ගෝඨාභය මහත්තයා ගෙනල්ලා දින 45කින් ජනාධිපති කළේ. සංවිධාන ශක්තියක් තියෙනවා නම් මාසයකිනුත් අපිට කරන්න පුළුවන්.

ප්‍රශ්නය – ළග ගෙනාවොත් ප්‍රශ්නයක් ඇති වෙන්නේ නැද්ද? ගෝඨාභය මහත්තයාටත් ඒක නේද වුනේ.

පිළිතුර – දේශපාලන අත්දැකීම් තියෙන කෙනෙකුයි දේශපාලන අත්දැකීම් නැති කෙනෙකුයි අතර වෙනසනේ තියෙන්නේ. ඒකයි ඒ.

ප්‍රශ්නය – තාම පොහොට්ටුවේ තීරණයක් නැද්ද රනිල් වික්‍රමසිංහ මහත්තයා සමඟම ඉදිරි ගමන යමු කියලා.

පිළිතුර – නෑ එහෙම නෑ. ඉදිරියේදී ජනාධිපතිවරණය නිවේදනය කළාට පස්සේ ඒක කියන්න පුළුවන් වෙයි.

මාධ්‍යවේදීන්ගේ ප්‍රශ්නවලට පිළිතුරු දුන් ඇමතිවරයා, ඇමතිවරයාගේ රථයෙන් එම ස්ථානයෙන් පිටව යද්දි විරෝධතාකරුවන් අමාත්‍යවරයාගේ ගමනට බාධා කරමින් රථයේ දොර ඇරීමට උත්සාහ ගත්හ. එහෙත් විරෝධතාකරුවන්ගේ උත්සාහය ව්‍යර්ථ විය.

අනතුරුව විරෝධතාකරුවන් පාර්ලිමේන්තු මන්ත්‍රී නාමල් රාජපක්ෂ හා හිටපු අමාත්‍ය බැසිල් රාජපක්ෂ මහත්වරුන්ගේ නම් සඳහන් කරමින් පොල් ගෙඩි දෙකක් පොලෙවේ ගසා විසිර ගියහ.

ප්‍රදීප් අනුර කුමාර

යුක්‍රේන - රුසියා යුද්ධය ට එක්වී අසරණ වී ඇති ශ්‍රී ලාංකිකයින්ගේ ප්‍රශ්නය සමහර පුද්ගලයන් දේශපාලනීකරණය කිරීමට උත්සාහ ගනිමින් සිටින අතර එය නොකළ යුතු දෙයක් බව ආරක්ෂක රාජ්‍ය අමාත්‍ය, ප්‍රමිත බණ්ඩාර තෙන්නකෝන් පවසයි.

මෙසේ අසරණ වී සිටින පුද්ගලයන් ගෙන්වා ගැනීම සඳහා රජය උපරිම වශයෙන් මැදිහත් වන බවද රාජ්‍ය අමාත්‍යවරයා සඳහන් කළේය.

මාධ්‍ය වෙත අදහස් දක්වමින් ඔහු මේ බව සඳහන් කල අතර මේ ආකාරයට ප්‍රශ්නය දේශපාලනීකරණය කිරීමට උත්සාහ කරන කිහිපදෙනෙකු ඒ වෙනුවෙන් මේ වන විට විනෝද චාරිකාවකට එක්ව සිටින බවද රාජ්‍ය අමාත්‍යවරයා සඳහන් කළේය.

රුසියාවට හෝ යුක්‍රේනයට ගිය පුද්ගලයින්ගේ තොරතුරු ලබාදීම සඳහා ආරක්ෂක අමාත්‍යංශය විසින් දුරකථන අංකයක් හඳුන්වාදුන් බවත් ඒ ඔස්සේ මේ වනවිට පැමිණිලි 451ක් ලැබී ඇති බවත් සඳහන් කරන රාජ්‍ය අමාත්‍යවරයා ලැබී ඇති පැමිණිලි වලට අදාළව පොලීසිය විසින් 301 දෙනෙකුගෙන් කටඋත්තර ලබාගෙන ඇති බවද පැවසීය.

සීමාසහිත ලංකා පොහොර සමාගම හා සීමාසහිත කොළඹ කොමර්ෂල් පොහොර සමාගම ඒකාබද්ධ කිරීමට අදාළව යෝජිත අනිවාර්ය විශ්‍රාම ගැන්වීමේ යෝජනා ක්‍රමය ක්‍රියාත්මක කිරීම සඳහා අදාළ සමාගම් දෙකෙහි අරමුදල්වලින් රුපියල් මිලියන 844ක් වැය කිරීමට කැබිනට් අනුමැතිය හිමිව ඇත.

මීට අදාළ අමාත්‍ය මණ්ඩල සංදේශය කෘෂිකර්ම සහ වැවිලි කර්මාන්ත අමාත්‍යවරයා විසින් ඉදිරිපත් කර තිබු අතර එහි වැඩිදුරටත් සඳහන් වන්නේ අනිවාර්ය විශ්‍රාම වන්දි ක්‍රමය යටතේ විශ්‍රාම ලැබීමට මේ වන විටත් සේවකයින් 267 දෙනෙකු කැමැත්ත පළ කර ඇති බවය.

ඒ අනුව, රාජ්‍ය ව්‍යවසායයන්හි අතිරික්ත සේවකයින් ස්වේච්ඡා විශ්‍රාම ගැන්වීමේ යෝජනා ක්‍රමය යටතේ විශ්‍රාම ගැන්වීම සම්බන්ධයෙන් අග්‍රාමාත්‍ය ලේකම්ගේ ප්‍රධානත්වයෙන් පත් කරන ලද නිලධාරි කමිටුවේ නිර්දේශයන්ට යටත්ව, සීමාසහිත ලංකා පොහොර සමාගම හා සීමාසහිත කොළඹ කොමර්ෂල් පොහොර සමාගම ඒකාබද්ධ කිරීමට අදාළව සේවකයින් සඳහා ක්‍රියාත්මක කළ යුතු අනිවාර්ය විශ්‍රාම වන්දි ක්‍රමය ක්‍රියාත්මක කිරීමට කැබිනට් අනුමැතිය හිමිව තිබේ.

රාජ්‍ය සේවයේ අනෙකුත් සේවාවන් සමඟ ගැටීමක් ඇති නොවන ආකාරයට ග්‍රාම නිලධාරී සේවයේ පවතින ගැටළු සඳහා ලබා දිය හැකි විසඳුම් ඉදිරිපත් කරන ලෙස ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක අදාළ නිලධාරීන්ට උපදෙස් දුන්නේය.

එසේම පවතින ගැටළු සාකච්ඡා කර පොදු එකඟතාවකට පැමිණීමට කටයුතු කරන ලෙසද ඔහු නිලධාරීන්ට වැඩිදුරටත් දැනුම් දුන්නේය.

සාගල රත්නායක  මෙම උපදෙස් ලබා දෙනු ලැබුවේ ග්‍රාම නිලධාරී සේවයේ පවතින ගැටලු පිළිබඳව ග්‍රාම නිලධාරී වෘත්තීය සමිති සම්මේලනය හා අදාළ රේඛීය ආයතනවල නිලධාරීන් සමඟ ජනාධිපති කාර්යාලයේදී අද (28) පැවති සාකච්ඡාවේදීය.

ග්‍රාම නිලධාරී සේවා ව්‍යවස්ථාව පිළිබඳව ඇති ගැටළු මෙන්ම වැටුප් තලය සම්බන්ධයෙන් පැන නැගී ඇති ගැටළු පිළිබඳවද මෙහිදී දීර්ඝ වශයෙන් සාකච්ඡාවට ලක් විය.

මෙහිදී ග්‍රාම නිලධාරී වෘත්තීය සමිති සම්මේලනය පෙන්වා දුන්නේ ග්‍රාම නිලධාරී සේවයේ උසස් වීම් පිළිබඳව ගැටළු රැසක් මතුවී ඇති බැවින් ඒවා විසඳමින් සේවා ව්‍යවස්ථාව කෙටුම්පත් කළ යුතු බවය.

ඒ අනුව මේ වන විට කෙටුම්පත් කර රාජ්‍ය සේවා කොමිසමෙහි අනුමැතිය සඳහා ඉදිරිපත් කර තිබෙන සේවා ව්‍යවස්ථාව සම්බන්ධයෙන් සාධනීය යෝජනා ඉදිපත් කරන ලෙස සාගල රත්නායක දැනුම් දුන්නේය.

එසේම ග්‍රාම නිලධාරී සේවය ග්‍රාමීය මට්ටම තුළ වැදගත් කාර්යභාරයක් ඉටු කරන වසර හැට එකක් පැරණි සේවාවක් බැවින් ඒ සඳහා සේවා ව්‍යවස්ථාවක අවශ්‍යතාවය ඇති බව ද ඒ  සඳහන් කළේය.

විවිධ ගැටළු මධ්‍යයේ වුවද ග්‍රාම නිලධාරී සේවය රාජ්‍ය කටයුතු වෙනුවෙන් ලබා දෙන දායකත්වයද සාගල රත්නායකගේ ඇගයීමට ලක් විය.

ආර්ථික කටයුතු පිළිබඳ ජනාධිපති ජ්‍යෙෂ්ඨ උපදේශක ආචාර්ය ආර්.එච්.එස් සමරතුංග  ඇතුළු රේඛීය ආයතනවල නිලධාරීන් සහ ග්‍රාම නිලධාරී වෘත්තිය සමිති සම්මේලනයේ නියෝජිතයින් පිරිසක් මෙම සාකච්ඡාවට එක්ව සිටියහ.

විවිධ කර්මාන්තවල සේවයේ යෙදෙන වයස අවුරුදු 55 සපිරුණු සියලු ශ්‍රමිකයන්ට සමාජ ආරක්ෂණ ප්‍රතිලාභයක් ලබාදිය හැකි වන පරිදි සකස් කෙරුණු යෝජනාවට කැබිනට් අනුමැතිය හිමි වී තිබෙන බව කම්කරු සහ විදේශ රැකියා අමාත්‍ය මනූෂ නානායක්කාර පැවසීය.

“ගරුසරු” වැඩසහනට සමගාමීව සකස් කෙරෙන මෙම ක්‍රියාවලිය සඳහා නීතිමය ප්‍රතිපාදන සකස් කිරීම ද මේ වන විට ආරම්භ කර තිබෙන බව ද අමාත්‍යවරයා සඳහන් කළේය.

කම්කරු සහ විදේශ රැකියා අමාත්‍ය මනූෂ නානායක්කාර මේ බව සඳහන් කර සිටියේ ‘ස්ථාවර රටකට සැවොම එක මඟකට’ මැයෙන් අද (28) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

එහිදී වැඩිදුරටත් අදහස් දැක්වූ කම්කරු සහ විදේශ රැකියා අමාත්‍ය මනූෂ නානායක්කාර මෙසේද පැවසීය,

උත්සව සමරන්න ජනතාවට මානසික නිදහසක් නැති බවට ඇතැමුන් චෝදනා කරනවා. නමුත් වෙසක්, පොසොන් පමණක් නෙවෙයි ඇසළ වගේම නත්තල සැමරීමටත් අවශ්‍ය වාතාවරණය ජනාධිපති රනිල් වික්‍රමසිංහ මහතා ප්‍රමුඛ රජය විසින් නිර්මාණය කර තිබෙන බව සඳහන් කළ යුතුයි. මේ සම්න්ධයෙන් චෝදනා කරන අයට පසුගිය වසරක කාලය හා සසඳන ලෙස මා ආරාධනා කරනවා. ජනතාවගේ නැති වෙලා තිබුණු මානසික නිදහස මේ වන විට නැවත ඇති කරලා තියෙනවා.

රජයට චෝදනා කරන කිසිවෙකුටත් තවමත් නිෂ්චිත ආර්ථික වැඩපිළිවෙළක් නැහැ. එවැනි වැඩපිළිවෙළක් ඇත්නම් රට හමුවේ කරුණු ඉදිරිපත් කරන්න. අප දැනටමත් රට හමුවේ කියූ දේ ප්‍රායෝගිකව සිදු කරමින් සිටිනවා. අස්වැසුම සහ උරුමය වැනි වැඩසටහන් මඟින් ජනතාවට සහන ලබා දෙමින් සිටිනවා.

ජනාධිපති රනිල් වික්‍රමසිංහ මහතා පාර්ලිමේන්තුවේ හිටියත් මීට පෙර ජනාධිපති ධූරයේ කටයුතු කර නැහැ. මෙවර ඔහු පත්වූ පළමු අවස්ථාවේ සිටම රටේ විශාල පරිවර්තනයක් සිදු කළා. 25% ක පමණ මට්ටමක පැවති බැංකු පොළිය අද වන විට 12% සිට 08% දක්වා අඩු කර තිබෙනවා.

ඒ වගේම දූෂණ විරෝධී පනත, මැතිවරණ වියදම් නියාමන පනත සහ වත්කම් බැරකම් පනතට සංශෝධන ගෙනවිත් තිබෙනවා.

එමෙන්ම ආර්ථික පරිවර්තනය පිළිබඳ පනත් කෙටුම්පත සහ රාජ්‍ය මූල්‍ය කළමනාකරණ පනත් කෙටුම්පත ද පාර්ලිමේන්තුවට ගෙනැවිත් තිබෙනවා. මේ සියල්ල හරහා රට ගොඩනඟනවා වගේම, සොරකම් කිරීම අවසන් කිරීමටත් පියවර ගන්නවා.

තව ද විවිධ කර්මාන්තවල යෙදෙන වයස අවුරුදු 55 සපිරුණු සියලුම ශ්‍රමිකයන්ට සමාජ ආරක්ෂණ ප්‍රතිලාභයක් ලබාදිය හැකි වන පරිදි සකස් කෙරුණු යෝජනාවට කැබිනට් අනුමැතිය හිමි වී තිබෙනවා. “ගරුසරු” වැඩසහනට සමගාමීව සැලසුම් කෙරෙන මෙම ක්‍රියාවලියේ නීතිමය ප්‍රතිපාදන සකස් කිරීම මේ වන විටත් ආරම්භ කර තිබෙනවා.

ඒ වගේම අප රජය වතු කම්කරුවන්ගේ වැටුප් සම්බන්ධයෙන් විශේෂ අවධානයක් යොමු කළා. රජය විසින් නිවේදනය කරන ලද රුපියල් 1700ක දිනක වැටුප ගෙවීමට අපහසු යම් හාම්පුතෙකු සිටී නම් ඔවුන් විසින් බද්දට ගෙන ඇති රජයේ වතු නැවත රජයට පවරා ගැනීමට කටයුතු කරනවා. අනතුරුව පවරා ගන්නා ලද වතු දීර්ඝ කාලීන බදු පදනම මත ඒවා නිසි ලෙස කළමනාකරණය කළ හැකි පාර්ශ්වයන්ට ලබාදීමට කටයුතු කරනවා. ඒ සඳහා නීතියක් නිර්මාණය කිරීම සඳහා ජනාධිපතිතුමා විසින් කැබිනට් අනුමැතිය ලබා ගෙන තිබෙනවා.

අයහපත් කාලගුණය හේතුවෙන් විපතට පත් ජනතාවට කඩිනම් සහන සලසන ලෙසත්, ආපදා තත්ත්වය පහව යන තුරු සහන සේවා කටයුතු අඛණ්ඩව ක්‍රියාත්මක කරන ලෙසත් ජනාධිපති රනිල් වික්‍රමසිංහ අදාළ නිලධාරීන්ට උපදෙස් දුන්නේය.

පසුගිය දිනවල පැවති අයහපත් කාලගුණය හේතුවෙන් ඊයේ (27) දිනය වන විට දිවයින පුරා පුද්ගල මරණ 08ක් වාර්තා වී තිබෙන අතර අධික සුළං හේතුවෙන් සිදු වූ අනතුරුවලින් පුද්ගලයන් 07 දෙනෙකුද, බෝට්ටුවක් පෙරළීමෙන් එක් පුද්ගලයෙකු ද මියගොස් ඇතැයි ආපදා සහන සේවා මධ්‍යස්ථානය සඳහන් කරයි.

ඔවුන් වෙනුවෙන් කඩිනමින් වන්දි ලබා දෙන ලෙස ද ජනාධිපතිවරයා අදාළ පාර්ශ්ව වෙත දැනුම් දෙනු ලැබීය.

ඒ අනුව මිය ගිය එක් අයෙකු වෙනුවෙන් ආපදා සහන සේවා මධ්‍යස්ථානය මගින් රුපියල් දෙලක්ෂ පනස්දහස බැගින් වන්දි මුදලක් ලබාදීමට නියමිත අතර එහි අත්තිකාරම් වශයෙන් මේ වන විටත් රුපියල් විසිපන්දහස බැගින් ලබා දීමට කටයුතු කර තිබේ.

අයහපත් කාලගුණය හේතුවෙන් ඊයේ (27) දිනය වන විට දිවයින පුරා පවුල් 11,326ක පුද්ගලයන් 42,640ක් පීඩාවට පත්ව සිටී.

ඔවුන්ට අවශ්‍ය සියලු පහසුකම් සැලසීමට කටයුතු කරන ලෙස ආපදා සහන සේවා මධ්‍යස්ථානය වෙත දැනුම් දී ඇති ජනාධිපතිවරයා එම ජනතාවගේ සෞඛ්‍ය සහ සනීපාරක්ෂක පහසුකම් පිළිබද විශේෂ අවධානයක් යොමු කරන ලෙසද උපදෙස් දුන්නේය.

ජනාධිපතිවරයාගේ හා පාර්ලිමේන්තුවේ ධූර කාලය තවත් වසර දෙකකට දික් කළ යුතු බවට එක්සත් ජාතික පක්ෂයෙන් යෝජනාවක් ඉදිරිපත් වී තිබේ.

එක්සත් ජාතික පක්ෂ මහලේකම් පාලිත රංගේ බණ්ඩාර මැයි 28 වැනිදා පැවති මාධ්‍ය සාකච්ඡාවක දී මේ බව පැවසීය.

විපක්ෂ නායක සජිත් ප්‍රේමදාස මෙම යෝජනාව පාර්ලිමේන්තුවට ඉදිරිපත් කිරීම යෝග්‍ය බව ත්, ජාතික ජන බලවේගයේ නායක අනුර කුමාර දිසානායක ඇතුළු සෙසු මන්ත්‍රීවරුන් ඊට සහය දැක්විය යුතු බවත් ඔහු එහිදී පැවසීය.

මෙම යෝජනාව සම්මත කරගෙන, එය ජනමත විචාරණයකින් තහවුරු කරගැනීම වඩා ත් ප්‍රායෝගික හා ප්‍රජාතන්ත්‍රවාදී බව පැවසූ මහලේකම්වරයා මෙය මැතිවරණ සිතියම අකුලා දැමීමක් හෝ ප්‍රජාතන්ත්‍රවාදී අයිතිය අහිමි කිරීමක් නොවන බව ද පැවසීය.

තව ද මෙම අවස්ථාව මගහැරීමෙන් වළකින ලෙසට සියලු දේශපාලන පක්ෂවලින් ඉල්ලීමක් කරන බව ද ඔහු සඳහන් කළේ ය.

පිටකෝට්ටේ පිහිටි සිරිකොත එජාප මූලස්ථානයේ පැවති ප්‍රවෘත්ති සාකච්ඡාවකදී හෙතෙම ඔහු මේ බව කීවේ ය.

මෙම අසීරු අවස්ථාවේදී මහමැතිවරණයක් හෝ ජනාධිපතිවරණයක් පැවැත්වීමෙන් පරිසරය දූෂණය වීම, රජයේ මුදල් නාස්ති වීම සහ රට බංකොලොත්භාවයෙන් මුදාගැනීමේ ජනාධිපති රනිල් වික්‍රමසිංහගේ වැඩපිළිවෙලට හානියක් වීම සිදුවන බව රංගේ බණ්ඩාර මහතා පැවසීය.

මේ වනවිට ජනාධිපතිවරයා ණය ගෙවීම හා රට බංකොලොත්භාවයෙන් මුදාගැනීම ආරම්භ කිරීම, ජාත්‍යන්තර මූල්‍ය අරමුදල, ආසියානු සංවර්ධන බැංකුව ඇතුළු ජාත්‍යන්තර සංවිධාන සමග එකගතාවයන්ට පැමිණෙමින් සිටීම, රනිල් වික්‍රමසිංහට පමණක් එම එකඟතාවන් ක්‍රියාත්මක කිරීමට උවමනාව, හැකියාව හා දැනුම තිබීම යන කරුණු සලකා බලා මෙම ඉල්ලීම කරන බව ද මහලේකම්වරයා සදහන් කළේ ය.

රනිල් වික්‍රමසිංහ යටතේ ජාත්‍යන්තරය දිනා ගැනීම, ජනතාවට ආර්ථිකමය වශයෙන් සැහැල්ලුවක් ලබා දීම, සහනාධාර ලබා දීම, පරිපාලනය විධිමත්වීම, අධ්‍යාපනය යථාවත්වීම සිදුව ඇති මෙවැනි අවස්ථාවක රටේ ජනාධිපතිවරණයක් හෝ මහ මැතිවරණයක් පැවැත්වීම නුසුදුසු බව ද ඔහු කීය.

තද සුළං සහ රළු මුහුද පිළිබඳ රතු නිවේදනයක් කාලගුණවිද්‍යා දෙපාර්තමේන්තුව විසින් නිකුත් කර තිබේ.

අද (28) උදෑසන 10.30ට නිකුත් කර ඇති එම නිවේදනය ඉදිරි පැය 24 දක්වා බලපැවැත්වේ.

ඒ අනුව දිවයින වටා මුහුදු ප්‍රදේශවල සුළඟේ වේගය විටින් විට පැ.කි.මී 60 - 70ත් දක්වා වැඩි වන අතර එම ප්‍රදේශයේ මුහුද ඉතා රළු වන බව කාලගුණවිද්‍යා දෙපාර්තමේන්තුව නිවේදනය කරයි.

මෙම මුහුදු ප්‍රදේශයට නැවත දැනුම්දෙන තුරු යාත්‍රා නොකරන ලෙසත් නාවික හා ධීවර ප්‍රජාවන්ට දැනුම්දී ඇත.

කල්පිටිය සිට කොළඹ, ගාල්ල සහ හම්බන්තොට හරහා පොතුවිල් දක්වා වන වෙරළට ඔබ්බෙන් වෙන මුහුදු ප්‍රදේශවල මුහුදු රළ උස මීටර් 2.5 - 3 දක්වා ඉහළ යා හැකිය.

මේ හේතුවෙන් කල්පිටිය සිට කොළඹ, ගාල්ල හරහා මාතර දක්වා ප්‍රදේශවල මුහුදු රළ ගොඩබිමට පැමිණීමේ හැකියාව පවතී.

ඔන්න මෙච්චර දවසක් හැංගි හැංගි වෙසමුණු බැන්ද ජාතිකවාදී සෙට් එක ජාතිකවාදී අපේක්ෂකයෙක් ඉදිරිපත් කරන්නලු යන්නේ.

විමල් වීරවංශ, උදය ගම්මන්පිල, තිස්ස විතාරණ ඇතුළු ස්වාධීන මන්ත්‍රී කණ්ඩායම පහුගිය දිනවල එච්චර පුවත් මැව්වේ නැති වුණත් ඔවුන් අද දේශපාලන කරලියේ කාගේත් අවධානය දිනා ගත්තා. ඒ 'එක්ව නංවන රටක් - සතුටු පිරුණු දැයක්' තේමා කරගනිමින් දිලිත් ජයවීරගේ මව්බිම ජනතා පක්ෂය එක්ක සන්ධානගතවීම සමඟයි. 'සර්ව ජන බලය' කියලයි, මේ දේශපාලන ව්‍යාපාරය නම් කරලා තියෙන්නේ.

මව්බිම ජනතා පක්ෂය, පිවිතුරු හෙළ උරුමය, ජාතික නිදහස් පෙරමුණ, ප්‍රජාතන්ත්‍රවාදී වාමාංශික පෙරමුණ, ශ්‍රී ලංකා කොමියුනිස්ට් පක්ෂය, යුතුකම ජාතික සංවාද කවය සහ පාර්ලිමේන්තු මන්ත්‍රී මහාචාර්ය චන්න ජයසුමන මහතා ප්‍රමුඛ ස්වාධීන මන්ත්‍රී සංසදය තමයි මේ විදිහට එක සන්ධානයකට අද (27) කොළඹදී ගිවිසුම්ගත වුනේ.

ඔය ගැන අදහස් දක්වමින් දේශපාලන විචාරකයන් කියන්නේ ජාතිවාදී , ජාතිකවාදී , වාමාංශික කියලා බෝර්ඩ් ගහගෙන හිටපු මේ කවුරුත් කෝටිපති ව්‍යාපාරික දිලිත් ජයවීර හමුවේ දමනය වෙලා කියලයි .

ඒ විතරක් නෙමෙයි, ඔය ජාතික කඳවුරේ ජනාධිපති අපේක්ෂිකාව විදියට, නැගෙනහිර හිටපු ආණ්ඩුකාර අනුරාධා යහම්පත් දාමු කියලත් යෝජනාවක් ඇවිත් ..

අද දිවයින පත්තරේ ඒ ගැන පොඩි ඉඟියක් තිබුනා.

රාජ්‍ය ඇමතිනි විශේඥ වෛද්‍ය සීතා අරඹේපොල ඍජුව ම ජනාධිපති රනිල් වික්‍රමසිංහ ගේ ප්‍රචාරක කටයුතුවලට සම්බන්ධ වන බව වාර්තාවීමත් සමඟ, දැඩි රාජපක්ෂවාදීනියක වන අනුරාධා යහම්පත් , ජාතිකවාදී නව සන්ධානය වෙනුවෙන් ක්‍රියාකාරීව සහභාගී කර ගැනීමට සාකච්ඡා පවත්වන බව දිවයින වාර්තාකර තියනවා.

දේශපාලන වාර්තාකරු

ශ්‍රී ලංකා නිදහස් පක්ෂයේ වැඩබලන සභාපතිවරයා ලෙස අමාත්‍ය විජයදාස රාජපක්ෂ කටයුතු කිරීම වළක්වාලමින් පනවා තිබෙන වාරණ නියෝගය ජුනි මස 27 වනදා දක්වා තවදුරටත් දීර්ඝ කරන ලෙස කොළඹ දිසා අධිකරණය අද (27) නියෝග කළේය.

කොළඹ දිසා විනිසුරු සඳුන් විතාන මෙම නියෝගය නිකුත්කර සිටියේ අදාළ නඩුව අද කැඳවූ අවස්ථාවේය.

එසේම තමන් මීට සමාන තවත් නඩුකරයක් විභාග කරන බැවින් මෙම නඩුව කොළඹ දිසා අධිකරණයේ අංක 07 අධිකරණ ශාලාවේ විනිසුරුවරයා වෙත යොමු කරන බවද දිසා විනිසුරු සඳුන් විතාන නියෝග කළේය.

අනතුරුව කොළඹ දිසා අධිකරණයේ අංක 07 ශාලාවේ අතිරේක දිසා විනිසුරුවරයා ඉදිරියේ මෙම නඩුව කැඳවනු ලැබීය.

එහිදී මෙම නඩුවට අදාළ විරෝධතා ගොනු කිරීම සඳහා කල් ලබාදෙන ලෙස වගඋත්තරකාර පාර්ශ්වයේ නීතිඥවරුන් අධිකරණයෙන් ඉල්ලා සිටි අතර ඒ අනුව අදාළ විරෝධතා ඉදිරිපත් කිරීම සඳහා කල් ලබාදුන් විනිසුරුවරයා නඩුව නැවත ජුනි මස 27 වනදා කැඳවන ලෙස නියෝග කෙරුණි.

අමාත්‍ය මහින්ද අමරවීර , රාජ්‍ය අමාත්‍ය ලසන්ත අලගියවන්න, පාර්ලිමේන්තු මන්ත්‍රී දුමින්ද දිසානායක විසින් මෙම නඩුව අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍යවරයා වන විජේදාස රාජපක්ෂ ට එරෙහිව ගොනුකර ඇත.

සමගි ජනබලවේගය විසින් පොළොන්නරුව ප්‍රදේශයේ පැවති ජනහමුවකට ජනතා විමුක්ති පෙරමුණේ ප්‍රාදේශීය සභා අපේක්ෂකයෙක් බව පවසමින් ගොඩ වූ පුද්ගලයා ශ‍්‍රී ලංකා නිදහස් පක්ෂයේ අපේක්ෂකයෙක් බව අනාවරණය වී තිබේ.

සජිත් ප්‍රේමදාස ට සහාය දෙන බව පවසමින් එසේ වේදිකාවට ගොඩවී ඇති සමන් බණ්ඩාර නම් මේ තැනැත්තා ජවිපෙ පොළොන්නරුව නගර සභා අපේක්ෂකයකු යැයි පැවසුවත් ඔහු පසුගිය පළාත් පාලන මැතිවරණයට නාමයෝජනා භාර දී ඇත්තේ ශ්‍රී ලංකා නිදහස් පක්ෂයෙන් ය.

ජාතික ජන බලවේගයේ නායක අනුර දිසානායක ද මන්නාරම් ප්‍රදේශයේ පැවැති රැස්වීමකදී කියා සිටියේ සමගි ජන බලවේගයට එක් වූ පුද්ගලයා තම පක්‍ෂයේ අයෙකු නොවන බවය.

මේ සම්බන්ධයෙන් අදහස් දක්වමින් දේශපාලන විචාරකයන් පවසන්නේ සජිත් ජනාධිපති කිරීමට සෑම දේශපාලන පක්ෂයකම පිරිස එක්වන බව රටට පෙන්වීමට ගොස් අවසානයේ සජිත්ම රැවටී ඇති බව තහවුරු වී ඇති බව යි.

"උරුමය ” වැඩසටහන යටතේ වවුනියාව දිස්ත්‍රික්කයේ ප්‍රාදේශීය ලේකම් කොට්ඨාස 04ක් හා මන්නාරම දිස්ත්‍රික්කයේ ප්‍රාදේශීය ලේකම් කොට්ඨාස 05 ක් ආවරණය වන පරිදි සින්නක්කර ඉඩම් ඔප්පු 700ක් ලබාදීම ජනාධිපති රනිල් වික්‍රමසිංහ ගේ ප්‍රධානත්වයෙන් අද (26) පෙරවරුවේ වවුනියාව මෝජෝ උත්සව ශාලාවේ දී සිදු විය.

“උරුමය” වැඩසටහන යටතේ වවුනියාව හා මන්නාරම දිස්ත්‍රික්කවලට සින්නක්කර ඔප්පු 5400ක් ලබාදීමට නියමිත අතර එහි පළමු අදියර යටතේ මෙම ඔප්පු ප්‍රදානය සිදු කෙරිණි.

මෙම උත්සව සභාව ඇමතූ ජනාධිපති රනිල් වික්‍රමසිංහ සඳහන් කර සිටියේ උරුමය සින්නක්කර ඉඩම් ඔප්පු ලබාදීම කෘෂි නවීකරණ වැඩපිළිවෙළේ ආරම්භක අවස්ථාව බවයි.

කෘෂි නවීකරණ වැඩසටහන යටතේ ඉදිරි වසර තුන තුළ නවීන කෘෂිකර්මාන්තය ගමට ගෙන යාමට කටයුතු කරන බවත්, නවීන තාක්ෂණය භාවිතයෙන් තම නිෂ්පාදන වැඩි කර ගනිමින් ආදායම් ඉහළ නංවා ගැනීමට එමඟින් ජනතාවට අවස්ථාව උදාවන බවත් ජනාධිපතිවරයා මෙහිදී සඳහන් කළේය.

ජනතාවට සින්නක්කර ඉඩම් අයිතිය ලබාදීම යනු රජය සතු දේපල පුද්ගලීකරණය කිරීමක් බවත් එය රටේ ආර්ථිකය නංවාලීම සඳහා සෘජුව දායක කර ගත හැකි බවත් ජනාධිපතිවරයා පෙන්වා දුන්නේය.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය,

1935 වසරේ සිට ජනතාවට ගොවිතැන් කිරීමට හා නිවාස ඉදි කිරීමට ඉඩම් සඳහා බලපත්‍ර ලබා දුන්නා. නමුත් ඉඩමේ අයිතිය ලබාදුන්නේ නැහැ. ඒ නිසා ඔබට සින්නක්කර ඉඩම් අයිතිය ලබාදීමට මා තීන්දු කළා. මේ ආකාරයට සින්නක්කර ඉඩම් ඔප්පු ලබාදීම තුළින් ජනතාව ඉඩම් විකිණීමට කටයුතු කරනු ඇතැයි බොහෝ දෙනෙකු පැවසුවා. නමුත් පරම්පරා දෙකක් භුක්ති විඳී ඉඩම විකිණීමට ඔබ කටයුතු නොකරනු ඇතැයි මම විශ්වාස කරනවා.

පසුගිය කාලයේ ජනතාව ගොඩක් දුක් වින්දා. කොව්ඩ් වසංගතය හා ආර්ථික අර්බුදය නිසා ජනතාව විශාල පීඩාවකට පත්ව සිටියා. එම අර්බුද නිසා මෙරට ජනතාවගෙන් සියයට හැත්තෑවක පමණ දේපළ වටිනාකම පහත වැටුණා. අද මේ ලබාදෙන සින්නක්කර ඔප්පුව මඟින් ඔබලාගේ දේපෙළ වල වටිනාකම ඉහළ යනවා.

මෙම ඉඩම් භාවිතා කර නවීන කෘෂිකර්මාන්තයක් ඇති කිරීමට දායකවෙන්න. එමඟින් රටේ නිෂ්පාදන ආර්ථිකයට දායක විය හැකියි. ආර්ථික අර්බුදයන් රට ගොඩ එන අවස්ථාවේ ඔබට ලබාදිය හැකි ඉහළම දායකත්වය එයයි. මල්වතු ඔය ව්‍යාපෘතිය අවසන් වූ පසු මන්නාරම දිස්ත්‍රික්කයේ වගාකටයුතු මීට වඩා පහසුවෙන් සිදු කරගත හැකි බවද සඳහන් කළයුතුයි.

රාජ්‍ය අමාත්‍ය කාදර් මස්තාන් ,

වව්නියාව සහ මන්නාරම දිස්ත්‍රික්කවල ජනතාවට සින්නක්කර ඉඩම් ඔප්පු ලබාදෙන ස්වර්ණමය දිනය අදයි. කාර්යමණ්ඩලය ප්‍රමාණවත් අයුරින් සිටියානම් අද වැඩි පිරිසකට ඉඩම් ඔප්පු ලබාදීමට හැකියාව තිබුණා. නමුත් ඉදිරියේදී මෙම වැඩපිළිවෙළ වඩා කාර්යක්ෂමව ක්‍රියාත්මක කිරීමට අවශ්‍ය පියවර ජනාධිපතිතුමා විසින් ගෙන තිබෙනවා. ඉදිරියට ද ජනාධිපති රනිල් වික්‍රමසිංහ  මේ රටේ ජනාධිපතිවරයා ලෙස කටයුතු කළයුතුයි. ඒ වෙනුවෙන් අප එතුමාට සහයෝගය ලබා දිය යුතුයි.

උතුරු පළාත් ආණ්ඩුකාර වී.එම්.එස්.චාල්ස් ,

ජනාධිපතිතුමා විසින් උතුරු පළාතේ දිස්ත්‍රික්ක 5ක සංවර්ධන ව්‍යාපෘති රැසක් පසුගිය දින තුන තුළ ක්‍රියාවට නංවනු ලැබුවා. ඒ අතර අධ්‍යාපන, සෞඛ්‍ය, රැකියා, ඉඩම් අයිතිය ලබා දීම වැනි වැඩසටහන් රැසක් තිබෙනවා. එසේම මේ ප්‍රදේශයේ ජනතාවගේ අවශ්‍යතා සපුරාලීම වෙනුවෙන් නිලධාරීන්ට උපදෙස් ලබා දුන්නා වගේම ජනතා නියෝජිතයන්ගේ ඉල්ලීමවලට සවන්දී ඒවා ඉටු කිරීමට පියවර ගනු ලැබුවා.

පාර්ලිමේන්තු මන්ත්‍රී සෙල්වම් අඩෙක්කලනාදන්,

උතුරේ සංවර්ධන කටයුතු ඉදිරියට ගෙන යාමට කටයුතු කිරීම පිළිබඳ අප ජනාධිපතිතුමාට ස්තූතිවන්ත වෙනවා. ජනතාවට ඉඩම් අයිතිය ලබාදීම ඔවුන්ට හිමිවන විශාල සහනයක් බව කිවයුතුයි.ලක්ෂ 20ක ජනතාව වෙනුවෙන් සින්නකර ඉඩම් ඔප්පු ලබාදීම සිදුවුවහොත් වන්නියේ ඉඩම් නොමැති කිසිවෙකු ඉතිරි වන්නේ නැහැ. ඒ වගේම මන්නාරම දිස්ත්‍රික්කයේ ජනතාවගේ ගැටලුවලට ද ජනාධිපතිතුමා විසඳුම් ලබා දෙනු ඇතැයි අප විශ්වාස කරනවා.

වන්නි දිස්ත්‍රික් පාර්ලිමේන්තු මන්ත්‍රී සූ. නෝගරාදලිංගම් ,

උතුරේ තෙදින සංචාරයක නිරත වූ ජනාධිපතිතුමා සංවර්ධන ව්‍යාපෘති රැසක් ජනතා අයිතියට පවරා දෙනු ලැබුවා. මෙම සංවර්ධන ව්‍යාපෘති සාර්ථක කර ගැනීමට දෙමළ ජතික සන්ධානය ලෙස අප සහයෝගය ලබා දීමට සූදානම්. ඉඩම් බලපත්‍රලාභීන් ලෙස ජීවත් වූ ජනතාවට සින්නකර ඉඩම් ඔප්පු ලබාදීම අගය කළ යුතුයි.

වන්නි දිස්ත්‍රික් පාර්ලිමේන්තු මන්ත්‍රී කුලසිංහම් තිලීපන්  ඇතුළු පළාතේ දේශපාලන නියෝජිතයන් සහ වව්නියාව දිස්ත්‍රික් ලේකම් පී.ඒ. සරත්චන්ද්‍ර  ඇතුළු රාජ්‍ය නිලධාරීන් පිරිසක් මෙම අවස්ථාවට එක්ව සිටියහ.

අ.පො.ස. (උසස් පෙළ) සඳහා තොරතුරු හා සන්නිවේදන තාක්ෂණය විෂයයක් ලෙස හදාරන ශිෂ්‍ය ශිෂ්‍යාවන් වෙනුවෙන් ශ්‍රී ලංකා විදුලි සංදේශ නියාමන කොමිෂන් සභාව හා ජනාධිපති අරමුදල ඒකාබද්ධව පිරිනැමෙන ශිෂ්‍යත්ව වැඩසටහන – 2024/2025 සඳහා අයදුම්පත් භාර ගැනීම ජුනි මස 07 වන දා දක්වා දීර්ඝ කර ඇත.

මෙම ශිෂ්‍යත්ව ප්‍රදානය කිරීමේ කටයුතු කඩිනමින් සිදු කිරීමට නියමිත බැවින් සුදුසුකම් සම්පූර්ණ කර ඇති ශිෂ්‍ය ශිෂ්‍යාවන් තම අයදුම්පත්‍රය නිසි පරිදි සම්පූර්ණ කර එදිනට පෙර තම ප්‍රදේශයේ ග්‍රාම නිලධාරී හා ප්‍රාදේශීය ලේකම්ගේ නිර්දේශයද, පන්තිභාර ආචාර්යවරයාගේ, පාසලේ විදුහල්පතිගේ හා කලාප අධ්‍යක්ෂකගේ නිර්දේශයද සහිතව ලේකම්, ජනාධිපති අරමුදල, අංක 35, තුන්වන මහල, ලේක්හවුස් ගොඩනැගිල්ල, ඩී.ආර්.විජේවර්ධන මාවත, කොළඹ 10 යන ලිපිනයට ලියාපදිංචි තැපෑලෙන් පමණක් යොමු කළ යුතු වේ.

ලිපි කවරයේ වම්පස ඉහළ කෙළවරෙහි අදාළ ශිෂ්‍යත්ව වැඩසටහනේ නම සහ පාසල අයත් අධ්‍යාපන කලාපයේ නමද සඳහන් කළ යුතුය.

මෙම ශිෂ්‍යත්ව වැඩසටහනෙහි අයදුම්පත් භාර ගැනීම මැයි මස 22 වනදායින් අවසන් වීමට නියමිතව තිබූ නමුත් , පසුගිය දින කිහිපය තුළ පැවති විවිධ පරිපාලන ගැටළු සහ පවතින අයහපත් කාලගුණික තත්ත්වයත් හේතුවෙන් අයදුම්පත් යොමු කිරීමට නොහැකි වූ සිසුන් විශාල සංඛ්‍යාවකගේ ඉල්ලීම මත මෙම දීර්ඝ කිරීම සිදු කර තිබේ