පුවත්

ශ්‍රී ලංකාවේ රාජ්‍ය ආදායම ඉහළ නැංවීමේ පියවරක් වශයෙන් 2025 අප්‍රේල් 01 වනදා සිට ක්‍රියාත්මක වන පරිදි පදිංචිව සිටින සහ හිස්ව තිබෙන නේවාසික දේපොළ සඳහා ආරෝපිත කුලී ආදායම් බද්දක් හඳුන්වාදීමට ජාත්‍යන්තර මූල්‍ය අරමුදල යෝජනා කර ඇත.

ජාත්‍යන්තර මූල්‍ය අරමුදල ශ්‍රී ලංකාව පිළිබඳව නිකුත් කර ඇති නවතම සවිස්තරාත්මක වාර්තාවක මේ පිළිබඳව දක්වා තිබේ.

ජාත්‍යන්තර මූල්‍ය අරමුදලේ ශ්‍රී ලංකාව සඳහා වන සිව් අවුරුදු විස්තීර්ණ මූල්‍ය පහසුකම් වැඩසටහනේ දෙවන සමාලෝචනයෙන් අනතුරුව  IMF Country Report 24/161 වාර්තාව ප්‍රකාශයට පත් කෙරුණු අතර මෙවැනි  බද්දක් හඳුන්වා දීමේ වැදගත්කම එම වාර්තාවෙහි දැක්වෙයි.

රජයේ ආදායම ඉහළ දැමීම සඳහා මෙවැනි බද්දක් හඳුන්වා දීම ඉතා වැදගත් බව ජාත්‍යන්තර මූල්‍ය අරමුදල පෙන්වා දෙයි.

මෙම බදු ක්‍රමය 2026 වසර වනවිට සම්පූර්ණයෙන් ක්‍රියාත්මක කිරීමට ශ්‍රී ලංකාව ඉලක්ක කරගෙන ඇති බව ද එම වාර්තාවේ සඳහන් වේ.

ආරෝපණය කළ කුලී ආදායම් බද්දක් යනු නිවසක හිමිකරුවෙකු සිය නිවස කුලියට ලබාදුන්නේ නම් ඔහුට හෝ ඇයට ලබාගත හැකි ආදායම ඇස්තමේන්තු කර ඒ සඳහා බදු මුදලක් අය කිරීමය.

මෙම බද්ද නිවසේ වටිනාකම මත නොව ඉන් ලැබිය හැකි අදායම මත පදනම් වේ.

මෙම බදු ක්‍රමය ක්‍රියාත්මක කිරීම සඳහා පළාත් පාලන ආයතන මට්ටමින් දත්ත ගබඩාවක් පිහිටුවීමට ශ්‍රී ලංකාව අවධානය යොමු කළයුතු බවත් එම දත්ත ගබඩාවට මෙරට දේපොළ හිමියන් සතුව ඇති දේපොළ සම්බන්ධයෙන් යාවත්කාලීන කළ ඇස්තමේන්තුවක් ඇතුළත් විය යුතු බවත් ජාත්‍යන්තර මූල්‍ය අරමුදල පෙන්වා දෙයි.

එම දත්ත ගබඩාව නිර්මාණය කිරීම මෙම වසරේ අගෝස්තු මාසය වන විට අවසන් විය යුතු බවද එම වාර්තාවේ සඳහන් වේ.

මීට පෙර ජාත්‍යන්තර මූල්‍ය අරමුදල විසින් හඳුන්වාදීමට සූදානම් වූ දේපොළ බදු සහ තෑගි හා ප්‍රවේණි බදු ක්‍රමය ක්‍රියාවට නැංවීම විවිධ ව්‍යවස්ථාමය සීමාකම් හේතුවෙන් ප්‍රමාදවීම හේතුකොට ගෙන මෙලෙස නව ‘ආරෝපිත කුලී ආදායම් බද්දක්‘ හඳුන්වාදීමට ජාත්‍යන්තර මූල්‍ය අරමුදල පියවර ගෙන ඇත.

ශ්‍රී ලංකා ක්‍රිකට් ආයතනය සඳහා නව ව්‍යවස්ථාවක් කෙටුම්පත් කිරීමට පත්කළ විනිසුරු චිත්‍රසිරි කමිටුව විසින් සකස්කළ පනත් කෙටුම්පත අද (15) ජනාධිපති කාර්යාලයේ දී ජනාධිපති රනිල් වික්‍රමසිංහ  වෙත බාර දෙනු ලැබීය.

කමිටුවේ සභාපති විශ්‍රාමික ශ්‍රේෂ්ඨාධිකරණ විනිසුරු කේ.ටී. චිත්‍රසිරි  විසින් පනත් කෙටුම්පත ජනාධිපතිවරයා වෙත භාර දුන් අතර කමිටුවේ සෙසු සාමාජිකයන් ද ඊට එක්ව සිටියහ.

ශ්‍රී ලංකාවේ ක්‍රිකට් ක්‍රීඩාව මුහුණ දෙන ගැටළු පිළිබඳ සොයා බලා ඒ පිළිබද නිර්දේශ ඉදිරිපත් කිරීම පිණිස අමාත්‍ය මණ්ඩලය විසින් 2023.11.06 දින විදේශ අමාත්‍ය ජනාධිපති නීතිඥ අලි සබ්‍ගේ ප්‍රධානත්වයෙන් හා විදුලිබල හා බලශක්ති අමාත්‍ය කංචන විජේසේකර, කම්කරු හා විදේශ රැකියා අමාත්‍ය මනූෂ නානායක්කාර, මහජන ආරක්ෂක අමාත්‍ය ටිරාන් අලස් යන අමාත්‍යවරුන්ගෙන් සමන්විතව අමාත්‍ය මණ්ඩල අනුකමිටුවක් පත් කරන ලදී. එම අනුකමිටුව විසින් ක්‍රිකට් ක්‍රීඩාවට අදාළ සියළු පාර්ශ්ව සමඟ සාකච්ඡා කිරීමෙන් පසු සිය නිර්දේශ ඇතුළත් වාර්තාව 2024.01.08 දින අමාත්‍ය මණ්ඩලය වෙත ඉදිරිපත් කරනු ලැබීය.

එම නිර්දේශ මඟින් ශ්‍රී ලංකා ක්‍රිකට් ආයතනයේ සංයුතිය හා ව්‍යූහය ප්‍රතිව්‍යුහගත කිරීම පිළිබඳවත්, ජාතික පිරිමි හා කාන්තා කණ්ඩායම්, 19න් පහළ හා 17න් පහළ වයස් කාණ්ඩ ඇතුළු විවිධ මට්ටම්වල ක්‍රීඩකයන්ගේ පරිපාලනය, පුහුණුව හා සමස්ත යහපැවැත්ම පිළිබඳවත්, ශ්‍රී ලංකා ක්‍රිකට් ක්‍රීඩාව තුළ විනිවිදභාවය, වෘත්තීයභාවය වගවීම ආදී යහපාලනයන් හා යහ භාවිතයන් ප්‍රවර්ධනය පි‍ළිබඳවත්, කුසලතාවය, සමානාත්මතාවය හා සාධාරණත්වය වැළඳ ගනිමින් ශ්‍රී ලංකා ක්‍රිකට් හි පෝෂණ ව්‍යූහය එනම් පාසල්, දිස්ත්‍රික්,

පළාත් හා සමාජ මට්ටමේ ක්‍රිකට් ක්‍රීඩාව ප්‍රතිසංස්කරණය කිරීම පිළිබඳවත් යෝජනා ඉදිරිපත් කරන ලදී.

ඒ අනුව එම අමාත්‍ය මණ්ඩල අනුකමිටුවේ නිර්දේශ සහිත වාර්තාව පදනම් කරගනිමින් අමාත්‍ය මණ්ඩලය විසින් 2024 පෙබරවාරි 13 වන දින පැවති අමාත්‍ය මණ්ඩල රැස්වීමේදී ශ්‍රී ලංකා ක්‍රිකට් ආයතනය සඳහා නව ව්‍යවස්ථාවක් කෙටුම්පත් කිරීම පිණිස විශ්‍රාමික ශ්‍රේෂ්ඨාධිකරණ විනිසුරු කේ.ටි. චිත්‍රසිරි මහතාගේ ප්‍රධානත්වයෙන් යුතුව ජනාධිපති නීතී‍‍‍‍‍‍ඥ හර්ෂ අමරසේකර, නීතිඥ ආචාර්ය අරිත්ත වික්‍රමනායක, ශ්‍රී ලංකා වාණිජ මණ්ඩලයේ සභාපති දුමින්ද හුලංගමුව යන මහත්වරු සහ අධිකරණ අමාත්‍යවරයා විසින් නාම යෝජිත පරිදි නිතිපති දෙපාර්තමේන්තුව නියෝජනය කරමින් නියෝජ්‍ය සොලිසිටර් ජනරාල් මනෝහර ජයසිංහ මහතා සහ නීති කෙටුම්පත් සම්පාදක දෙපාර්තමේන්තුව නියෝජනය කරමින් සහකාර නීති කෙටුම්පත් සම්පාදක ශමිලා ක්‍රිෂාන්ති මහත්මිය යන පිරිසගෙන් සමන්විතව විද්වත් කමිටුවක් පත් කරන ලදී.

ජනාධිපති ලේකම් විසින් එම කමිටුවේ ලේකම්/කැඳවුම්කරු ලෙස ජනාධිපති අතිරේක ලේකම් ලෝෂිණී පීරිස්  පත්කරන ලදී.

පනත් කෙටුම්පත භාරදීමේ අවස්ථාවට ජාතික ආරක්ෂාව පිළිබද ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක, ජනාධිපති සහකාර ලේකම් (අමාත්‍ය මණ්ඩල කටයුතු) සමිත් තලකිරියාව යන මහත්වරුන් ද එක්ව සිටියහ.

වාහන ආනයනය පිළිබඳව රජයේ සැලසුම් මෙම සතිය තුළ රජය විසින් ඉදිරිපත් කරනු ඇති බව ත් ඒ අනුව ශ්‍රී ලංකාවට මෝටර් රථ ගෙන්වීමේ අවසරය 2025 ආරම්භයේදී ලබා දෙනු ඇති බව ත් ජාත්‍යන්තර මූල්‍ය අරමුදල විසින් නිකුත් කරන ලද වාර්තාව පෙන්වා දෙයි.

එම අරමුදල සිය විස්තීරණ මූල්‍ය පහසුකම යටතේ ලබා දුන් ණය වාරිකය පිළිබඳව සමාලෝචන වාර්තාව එළිදක්වමින් මේ බව සඳහන් කර තිබේ.

ඒ අනුව, රාජ්‍ය බදු ආදායම දළ දේශීය නිෂ්පාදිතයෙන් සියයට 1.9කට ආසන්න මට්ටමකින් ඉහළ නංවා ගැනීම සඳහා අනුගමනය කළ යුතු බවට එකඟ වී ඇති පියවර අතර වාහන ඇතුළු ආනයන භාණ්ඩ සඳහා පවතින ආනයන සීමා ඉවත් කිරීම ද ඇතුළත් කර ඇත.

ඒ අනුව සියලු ම වාහන සඳහා සම්පූර්ණ ආනයන අවසරය ජනවාරි මාසයේ සිට හිමිවනු ඇති බව සඳහන් වේ.

මුදල් අමාත්‍යංශය විසින් මේ සම්බන්ධයෙන් නිර්දේශ කිරීම සඳහා පත් කරන ලද කමිටුව සිය වාර්තාව ජනාධිපතිවරයා වෙත ලබා දී ඇති අතර ඒ අනුව නුදුරේදී ම වාණිජ වාහන සඳහා ආනයන සීමා ඉවත් වනු ඇති බවත් දෙවනුව පොදු ප්‍රවාහන සේවා සඳහා එම සීමා ඉවත් වනු ඇති බව ත් වාර්තා වේ.

අනාගතයට ගැළපෙන දකුණු ආසියාවේ හොඳම අධ්‍යාපන ක්‍රමය රට තුළ නිර්මාණය කිරීමට කටයුතු කරන බව ජනාධිපති රනිල් වික්‍රමසිංහ  පැවසීය.

ජනාධිපතිවරයා මේ බව සඳහන් කළේ හලාවත කිරිමැටියාන බෞද්ධ බාලිකා ජාතික පාසලේ අභිනවයෙන් ඉදිකරන ලද තෙමහල් ගොඩනැඟිල්ලේ පළමු අදියර සිසු අයිතියට පත් කිරීමේ උත්සවයට අද (14) පස්වරුවේ එක්වෙමිනි.

දුෂ්කර ආර්ථික තත්ත්වයක් හමුවේ වුවද අධ්‍යාපනය වෙනුවෙන් ලබාදිය යුතු ප්‍රතිපාදන වෙන් කිරීමට රජය කටයුතු කළ බව මෙහිදී පැවසූ ජනාධිපතිවරයා රටේ ශක්තිය අධ්‍යාපනය වන බවද අවධාරණය කළේය.

අද පස්වරුවේ කිරිමැටියාන බෞද්ධ බාලිකා ජාතික පාසල වෙත පැමිණි ජනාධිපති රනිල් වික්‍රමසිංහ මහතාව සිසු දරුවන් විසින් මහත් හරසරින් පිළිගනු ලැබීය.

විදුහල් භූමියේ පිහිටි බුදු මැදුර වෙත ගොස් මල් පූජාකර ආශිර්වාද ලබා ගත් ජනාධිපතිවරයා අනතුරුව සමරු ඵලකය නිරාවරණය කර අභිනව ගොඩනැගිල්ල සිසු අයිතියට පත් කළේය.

නව පන්තිකාමර නිරීක්ෂණය කිරීමට ද එක් වු ජනාධිපතිවරයා සිසු දරුවන් සමඟ සුහද කථා බහක ද නිරත විය.

අපොස උසස් පෙළ විභාගයෙන් ඉහළ දක්ෂතා දැක්වූ විද්‍යාලයේ සිසුවියන් වෙත තිළිණ ප්‍රදානය කිරීමද ජනාධිපතිවරයා අතින් සිදු වූ අතර ජනාධිපති රනිල් වික්‍රමසිංහ  වෙනුවෙන් ද සිහිවටන තිළිණයක් පිළිගැන්විණ.

මෙම නව ගොඩනැඟිල්ලේ පළමු අදියර වෙනුවෙන් රුපියල් මිලියන 450ක මුදලක් වැය කර තිබෙන අතර, එම මුදල රජය සහ දෙමාපියන් විසින් ලබා දී තිබිණි.

ගොඩනැඟිල්ලේ ඉදිකිරීම් සම්පූර්ණ කර දෙන ලෙස සිසුවියන් කළ ඉල්ලීම අනුව අදියර දෙකක් යටතේ ගොඩනැගිල්ලේ ඉදිකිරීම් සම්පූර්ණ කර දීමට කටයුතු කරන බව ද ජනාධිපතිවරයා මෙහිදී සඳහන් කළේය.

ආණ්ඩුවක වගකීම වන්නේ රට සංවර්ධනය කිරීම බව මෙහිදී පෙන්වා දුන් ජනාධිපති රනිල් වික්‍රමසිංහ  මෙය සටන් පාඨ කියමින් කාලය ගත කිරීමට හැකි යුගයක් නොවන බවද අවධාරණය කළේය.

රට දියුණු කිරීමට නම් අලුත් මාර්ගයක ගමන් කළයුතු බවත් ඒ සඳහා අවශ්‍ය ආර්ථික පරිවර්තනය ඇති කරමින් රට සීග්‍ර දියුණුවක් කරා ගෙන යාමට රජය ඉදිරිපත් කර ඇති වැඩපිළිවෙල සමඟ දේශපාලනයෙන් තොරව සියලුදෙනා එක්විය යුතු බව ද සඳහන් කළේය.

මාදම්පේ ආර්ථික කලාපය නැවත ආරම්භ කිරීමටත්, සංචාරක, ආර්ථික සහ තොරතුරු තාක්ෂණ නගරයක් ලෙස එම ප්‍රදේශය සංවර්ධනය කිරීමටත් රජය සැලසුම් කර ඇති බව ජනාධිපතිවරයා මෙහිදී පෙන්වා දුන්නේය.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ  මෙසේද පැවසීය :

දුෂ්කර ආර්ථික තත්ත්වයක් හමුවේ වුවද රටේ දරුවන් වෙනුවෙන් නවීන අධ්‍යාපනයක් ලබා දීමට රජය කැපවී කටයුතු කර තිබෙනවා. අතීතයේ අධ්‍යාපන ක්‍රම පිළිබඳ දැන් කථා කර ඵලක් නැහැ. අප අනාගතය දෙස බලමින් දකුණු ආසියාවේ හොඳ අධ්‍යාපන ක්‍රමයක් මේ රට තුළ ඇති කළයුතුයි. අපේ රටේ ශක්තිය අධ්‍යාපනයයි. සෑම විටම අපේ රට තුළ හොඳ අධ්‍යාපන ක්‍රමයක් පැවතුණා. පසුගිය කාලය තුළ අධ්‍යාපනය වෙනුවෙන් අප හැකි අයුරින් ප්‍රතිපාදන ලබාදී තිබෙනවා.

මම භාරගනු ලැබුවේ බංකොළොත් රටක්. ඒ වන විට දේශපාලන පක්ෂ කැඩී ගොස් තිබුණා. ඒ නිසා අප කණ්ඩායමක් එක් වී ආණ්ඩුවක් නිර්මාණය කර රටේ ආර්ථිකය ඉදිරියට ගෙන ආවා. දැන් අප අනාගතය පිළිබඳව සිතිය යුතුයි. දැන් අපි ආර්ථික ප්‍රශ්න ක්‍රමයෙන් විසඳා ගනිමින් ඉදිරියට පැමිණෙමින් සිටිනවා.

ජාත්‍යන්තර මූල්‍ය අරමුදල ඊයේ සිදු කළ ප්‍රකාශය අනුව අපට සාර්ථක ලෙස ඊළග කාර්තුවේ මුදල් ලැබී තිබෙනවා. ඒ වගේම ශ්‍රී ලංකාවට නිල වශයෙන් ණය ලබා දී තිබෙන රටවල කමිටුව ලබන සතියේ රැස් වෙනවා. එම රැස්වීමෙන් පසු අපට බංකොළොත්භාවෙයන් ඉවත්වීමට හැකියාව ලැබෙනවා. වසර දෙකක් ගතවීමට පෙර මෙම තත්ත්වය උදාකර ගැනීමට හැකිවීම පිළිබඳ මම ආඩම්බර වෙනවා.

අපට එයින් සෑහීමකට පත් විය නොහැකියි. අප ජාත්‍යන්තර මූල්‍ය අරමුදල සමඟ වන එකඟතාවත් සමඟ ඉදිරියට යා යුතුව තිබෙනවා.

තව වසර දෙකකින් විරැකියාව 5%ක් දක්වා අඩු කරගත යුතුයි. ඒ වගේම අපේ ආදායම් ද වැඩිකර යුතුයි. ඒ වෙනුවෙන් ක්‍රියාත්මක කිරීමට වැඩසටහනක් ඉදිරිපත් කර තිබෙනවා. මේ රට දියුණු කළ හැකිවන්නේ එම වැඩසටහන ඉදිරියට ගෙන ගියහොත් පමණයි. අපි අලුතින් සිතිය යුතුයි. එහිදී අලුත් තාක්ෂණය අධ්‍යාපනයට ඇතුළත් කිරීමට අප කටයුතු කර තිබෙනවා.

ආණ්ඩුවක වගකීම වන්නේ රට සංවර්ධනය කිරීමයි. සටන් පාඨ කියමින් කාලය ගත කළ යුගය දැන් අවසන්. අපට නැවතත් එම යුගයකට යන්න බැහැ.

මාදම්පේ ආර්ථික කලාපය නැවත ආරම්භ කිරීමට අප තීරණය කර තිබෙනවා. ඒ වගේම වෙළඳ කලාපයක් සහ ආයෝජන කලාපයක් ආරම්භ කිරීමට බිංගිරිය ප්‍රදේශයේ අක්කර දාහක් ලබාගෙන තිබෙනවා. ඒ වගේම ඉරණවිල සංචාරක කලාපයක් ආරම්භ කිරීමට සැලසුම් කර තිබෙනවා. එවිට සංචාරක ආර්ථිකය සහ කර්මාන්ත ආර්ථිකය මේ ප්‍රදේශයට ලැබෙනවා. ඒ වගේම තොරතුරු තාක්ෂණ අධ්‍යාපනය ලැබුවන්ට අවස්ථාව ලබාදීම වෙනුවෙන් තොරතුරු තාක්ෂණ නගරයක් මාදම්පේ ප්‍රදේශයේ ඇති කිරීමට ද බලාපොරොත්තු වෙනවා.

ඒ වගේම රජය ආරම්භ කර ඇති කෘෂි නවීකරණ වැඩපිළිවෙළ අනුව ගම්මානවලට නවීන කෘෂිකර්මාන්තය හදුන්වා දෙනවා වගේම එම කටයුතු කරගෙන යාමට තරුණ තරුණියන්ට අවශ්‍ය මුදල් ලබා දෙනවා. ඒ සමග ධීවර කර්මාන්තය ද දියුණු කළ විට මේ ප්‍රදේශයේ නව ආර්ථිකයක් ඇති කළ හැකියි. අප 1977 දී ගම්පහ ප්‍රදේශයට අලුත් ආර්ථිකයක් ලබා දුන්නා. දැන් එම වැඩසටහන මෙම ප්‍රදේශයේ ක්‍රියාත්මක කිරීමට බලාපොරොත්තු වෙනවා. ඒ අනුව හලාවත සිට කුලියාපිටිය දක්වා විශාල දියුණුවක් ඇති වෙනවා.

රට දියුණු කිරීමට නම් අප අලුත් මාර්ගයක ගමන් කළයුතුයි. ඒ සඳහා අවශ්‍ය ආර්ථික පරිවර්තනය ඇති කර, රට තුළ සීග්‍ර දියුණුවක් ඇති කිරීම වෙනුවෙන් ආර්ථික පරිවර්තන නීතිය ගෙනවිත් තිබෙනවා. ඒ නිසා දේශපාලනයෙන් තොරව මෙය සම්මත කර ගැනීම සඳහා සියලුදෙනාගේ සහාය අපේක්ෂා කරනවා. මේ කාලයේ සාම්ප්‍රදායික දේශපාලනය කරන්න බැහැ. කුමන දේශපාලන පක්ෂයකට අයත් වුවත් සියලුදෙනා එකතු වී රටේ සහ දරු පරපුරේ අනාගතය වෙනුවෙන් මෙම ප්‍රතිපත්ති ක්‍රියාත්මක කිරීමට වැඩ කළයුතුයි.

රුසියාවේ හමුදා කටයුතු සඳහා යොදාගෙන සිටින ශ්‍රී ලාංකික හිටපු හමුදා සාමාජිකයන් නැවත මෙරටට ගෙන්වා ගැනීම සඳහා කටයුතු කිරීමට විදේශ කටයුතු රාජ්‍ය අමාත්‍ය තාරක බාලසූරිය ප්‍රමුඛ දූත පිරිසක් රුසියාවේ සංචාරය කිරීමට නියමිත බවත් ඊට අදාළ සාකච්ඡා ජූනි මස 26 සහ 27 යන දිනවල පැවැත්වෙන බවත් විදේශ කටයුතු අමාත්‍ය ජනාධිපති නීතිඥ අලි සබ්‍රි  පැවසීය.

බ්‍රික්ස් සංවිධානයට ශ්‍රී ලංකාව සම්බන්ධ විය යුතු ද යන්න පිළිබඳව තීරණයක් ගැනීම සඳහා ඉදිරිපත් කළ අමාත්‍ය මණ්ඩල පත්‍රිකාව සම්බන්ධයෙන් අධ්‍යයනය කිරීමට නිලධාරීන් පිරිසක් පත්කර තිබෙන අතර ඔවුන්ගේ වාර්තාව මෙම මස ලැබීමට නියමිත බව ද අමාත්‍යවරයා සඳහන් කළේය.

විදේශ කටයුතු අමාත්‍ය ජනාධිපති නීතිඥ අලි සබ්‍රි මේ බව සඳහන් කර සිටියේ ‘ස්ථාවර රටකට සැවොම එක මඟකට’ මැයෙන් අද (14) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

මෙහිදී වැඩිදුරටත් අදහස් දැක්වූ අමාත්‍යවරයා මෙසේද පැවසීය,

ජනාධිපති රනිල් වික්‍රමසිංහ මහතා පසුගියදා ඉන්දීය අග්‍රාමාත්‍ය නරේන්ද්‍ර මෝදි මහතාගේ පදවි ප්‍රාප්තියට සහභාගී වුණා. ඒ අනුව ඉන්දීය විදේශ කටයුතු අමාත්‍යවරයා මෙම මාසයේ දී ශ්‍රී ලංකාවේ සංචාරයක නිරත වනු ඇති බවට අප බලාපොරොත්තු වනවා. අනතුරුව ඉන්දීය අග්‍රාමාත්‍යවරයාගේ සංචාරය නුදුරේදීම සිදුවනු ඇති බවට විශ්වාස කරනවා.

ඒ වගේම අප රජයට මෙම කාලය තුළ විශාල ජයග්‍රහණයන් ප්‍රමාණයක් අත්කර ගැනීමට හැකි වුණා. ජාත්‍යන්තර මූල්‍ය අරමුදල සමඟ වන වැඩසටහනට අදාළ දෙවන සමාලෝචනය සාර්ථක නිම කිරීම පිළිබඳව ජාත්‍යන්තර මූල්‍ය අරමුදලේ ප්‍රසාදය පල කෙරුණා. ඒ අනුව ජාත්‍යන්තර මූල්‍ය අරමුදලේ විස්තීරණ ණය පහසුකමට අදාළ තුන්වන වාරිකය නිකුත් කෙරුණා. ඉන් අදහස් කෙරෙන්නේ, ජාත්‍යන්තර මූල්‍ය අරමුදල සමඟ එකඟ වු කරුණු සම්බන්ධයෙන් අප විසින් ඉතා නිවැරදිව කටයුතු කර තිබෙන බවයි.

එමෙන්ම විදේශිය ණය කළමනාකරණය කිරීම සහ ප්‍රතිව්‍යුහගත කරගැනීම අවසන් අදියරට පැමිණ තිබෙනවා. විදේශිය රටවල් සමඟ ණය කළමනාකරණය පිළිබඳව අවබෝධතා ගිවිසුම අත්සන් කරගත හැකි බව අප විශ්වාස කරනවා. විදේශීය බැඳුම්කර හිමියන් සමඟ සිදුකළ සාකච්ඡා ඉතාමත් ධනාත්මකයි. එය සාර්ථක වුවහොත් ලංකාව නැවත ණය නොගෙවන තත්ත්වයෙන් මිදී ණය ගෙවන තත්ත්වයේ රටක් බවට පත්වීමට හැකි වනවා.

ඒ වගේම ජපාන විදේශ අමාත්‍යවරියගේ ඉල්ලීමක් මත මා ලබන මාසයේ දී ජපානයේ සංචාරයක නිරත වනවා. ද්වී පාර්ශ්වීය නිල ණය හිමියන් සමඟ එකඟතාවයකට පැමිණි පසු ජපානයේ සහාය ඇතිව මෙරට ආරම්භ කර තිබූ නමුත් මේ වන විට වැඩ නවත්වා තිබෙන සංවර්ධන ව්‍යාපෘති සියල්ලම යළි ආරම්භ කරන බව ජපානය අපට පොරොන්දු වී තිබෙනවා.

රුසියාවේ පැවති බ්‍රික්ස් රටවල විදේශ අමාත්‍යවරුන්ගේ සමුළුවට ශ්‍රි ලංකාව නියෝජනය කරමින් පසුගියදා මම සහභාගී වුණා. බ්‍රික්ස් සංවිධානයට ශ්‍රී ලංකාව සම්බන්ධ විය යුතු ද යන්න පිළිබඳව සාකච්ඡා කිරීම සඳහා විදේශ කටයුතු අමාත්‍යාංශය විසින් අමාත්‍ය මණ්ඩල පත්‍රිකාවක් ඉදිරිපත් කළා. ඒ සම්බන්ධව සළකා බැලීමට විදේශ අමාත්‍යංශය, මහා භාණ්ඩාගාරය, මුදල් අමාත්‍යාංශය සහ මහ බැංකුව නියෝජනය වන පරිදි නිලධාරීන් පිරිසක් පත්කර තිබෙනවා. එහි වාර්තාව මෙම මස ලැබීමෙන් පසු කැබිනට් මණ්ඩලයට ඉදිරිපත් කරනවා.

ඒ වගේම රුසියානු හමුදාවට බඳවාගෙන සිටින හිටපු හමුදා සාමාජිකයන් සම්බන්ධයෙන් අප විසින් රුසියානු විදේශ අමාත්‍ය සර්ජි ලැව්රෝව් මහතා සමඟ වැඩිදුරටත් සාකච්ඡා කළා. එම ගැටළුව විසදීම සඳහා විදේශ කටයුතු රාජ්‍ය අමාත්‍ය තාරක බාලසූරිය ඇතුළු පිරිසක් රුසියාවේ සංචාරය කිරීමට නියමිතයි. ඊට අදාළ සාකච්ඡා ජූනි මස 26 සහ 27 වනදා රුසියාවේ දී පැවැත්වෙනවා. මේ අතර මියන්මාරයේ සිරවී සිටින ශ්‍රි ලාංකිකයන් බේරා ගැනීම සඳහා ද මේ දිනවල සාකච්ඡා ආරම්භ කර තිබෙනවා.

දහතුන් වන ව්‍යවස්ථා සංශෝධනය සම්බන්ධයෙන් දකුණේ කොතරම් විරෝධතා ක්‍රියාත්මක වුවත් තමන් එය ක්‍රියාත්මක කරන බව සමගි ජන බලවේගය පක්ෂයේ  නායක , විපක්ෂ නායක සජිත් ප්‍රේමදාස  සඳහන් කරයි.

තමා මෙම ප්‍රකාශය කරන්නේ මැතිවරණය ඉලක්ක කරනු නොව තම ප්‍රතිපත්තිය මත පිහිටා බවද ඔහු සඳහන් කර ඇත.

විපක්ෂ නායකවරයා  මෙම අදහස් පළ කළේ යාපනයේ ප්‍රදේශයේදී පැවති සාකච්ඡාවකදීය.

වෙනත් අපේක්ෂකයන්ද දහතුන්වෙනි සංශෝධනය ක්‍රියාත්මක කරන බව පැවසුවද ජනතාව විශ්වාස කරන්නේ තමන් කියන දේ පමණක් බවද ඔහු වැඩිදුරටත් සඳහන් කර තිබේ.

එළැඹෙන ජනාධිපතිවරණය ඔක්තෝබර් මස 5 වන දින පැවැත්වෙන බව සංචාරක, ක්‍රීඩා හා යෞවන කටයුතු අමාත්‍ය හරීන් ප්‍රනාන්දු  පවසයි.

අද (14) ගාල්ලේ දී මාධ්‍යවේදීන් ඇසූ පැනයකට පිළිතුරු දෙමින් අමාත්‍යවරයා මේ බව කියා සිටියේය.

එම ජනාධිපතිවරණයට ජනාධිපති රනිල් වික්‍රමසිංහ ඉදිරිපත් වන බව මෙන්ම ඔහුව ජයග්‍රහණය කරවා පෙන්වන බවද අමාත්‍යවරයා සඳහන් කළේය.

කරන්න බැරි බොහෝ දේවල් මේ වනවිට ලංකාව තුළ සිදුකර ඇති බවත්, ඒ පිළිබඳව බුද්ධිමත්ව සිතා ජනාධිපතිවරණයේ දී ජනතාව කටයුතු කරනු ඇති බවත්  අමාත්‍යවරයා වැඩිදුරටත් සඳහන් කළේය.

ශ්‍රී ලාංකීය තරුණ ප්‍රජාව සඳහා වන පොදු ඉගෙනුම් අධ්‍යාපන වේදිකාව (Public Learn Education Platform) www.publiclearn.lk නිල වශයෙන් එළිදැක්වීම ජනාධිපති රනිල් වික්‍රමසිංහ ගේ ප්‍රධානත්වයෙන් ඊයේ (13) පස්වරුවේ ජනාධිපති කාර්යාලයේ දී සිදු විය.

“Public Learn” යනු ලොව ප්‍රමුඛ පෙළේ විශ්වවිද්‍යාල වලින් නොමිලේ පාඨමාලා හැදෑරීම සඳහා පරිශීලකයින් යොමු කරවනු ලබන වේදිකාවකි.

මෙම වේදිකාව රීජන්ට් ග්ලෝබල් ආයතනය (Regent Global) විසින් ක්‍රියාත්මක කරනු ලබන අතර එය ශ්‍රී ලංකාව සඳහා හඳුන්වා දීමට එක්සත් රාජධානියේ ශ්‍රී ලාංකික ඩයස්පෝරාව විසින් අරමුදල් සපයා තිබේ.

ශ්‍රී ලාංකීය තරුණ ප්‍රජාව සඳහා වන පොදු ඉගෙනුම් අධ්‍යාපන වේදිකාව (Public Learn Education Platform)  www.publiclearn.lk නිල වශයෙන් දියත් කිරීම මෙහිදී ජනාධිපතිවරයා අතින් සිදු කෙරිණි.

අනතුරුව පැවති උත්සව සභාව ඇමතූ ජනාධිපති රනිල් වික්‍රමසිංහ  සඳහන් කළේ නව ආර්ථික පරිවර්තනය වෙනුවෙන් ශ්‍රී ලංකාවද ඩිජිටල්කරණය සමඟ වේගයෙන් ඉදිරියට යා යුතු බවයි.

මිහිඳු මහරහතන් වහන්සේගේ ආගමනයත් සමඟ බිහි වූ මෙරට අධ්‍යාපනය අදියර 03ක් යටතේ ක්‍රමිකව විකාශය වූ බව පෙන්වා දුන් ජනාධිපතිවරයා මේ වන විට ඩිජිටල්කරණය සමග විවෘත වේදිකාවක දැනුම බෙදා හදා ගැනීම දක්වා එය ඉදිරියට පැමිණ ඇති බවද සඳහන් කළේය.

ශ්‍රී ලාංකික ජනතාව වෙනුවෙන් මෙම ප්‍රතිලාභය හිමි කර දීම වෙනුවෙන් රීජන්ට් ග්ලෝබල් ආයතනයේ ප්‍රධාන විධායක නිලධාරී ආචාර්ය සෙල්වා පන්කජ්  ඇතුළු පිරිස වෙත සිය ස්තූතිය පිරිනැමීමට ද ජනාධිපතිවරයා කටයුතු කළේය.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ  මෙසේද පැවසීය :

ආචාර්ය සෙල්වා පන්කජ් මහතා ශ්‍රී ලංකාවට ලබා දී ඇති මෙම ත්‍යාගය වෙනුවෙන් පළමුවෙන්ම මම ස්තුතිවන්ත වෙනවා. අප අද ජීවත් වන්නේ දැනුමෙන් පිරුණු සමාජයකයි. එම සමාජය තුළ තරගකාරීව ඉදිරියට යා යුතුව තිබෙනවා. අප අධ්‍යාපනය අතින් ඉදිරියෙන් සිටින රටක් බැවින් එය අසීරු කාර්යයක් නොවන බව මම විශ්වාස කරනවා.

අධ්‍යාපන ක්ෂේත්‍රයේ පවතින අඩු පාඩු කඩිනමින් නිවැරදි කර ගැනීමට අප මේ වන විට කටයුතු කරමින් සිටින බව කිවයුතුයි. මෙම නව වැඩසටහන එම වැඩපිළිවෙළට මනා දායකත්වයක් සපයනු ඇතියි. ශ්‍රීමත් ගැවින් මහතා මෙවන් වැඩපිළිවෙලක ඇති වැදගත්කම සහ එහි අරමුණු පිළිබඳ හොඳින් විස්තර කළා.කෙසේ නමුත්, නව ආර්ථික පරිවර්තනයක් වෙනුවෙන් අපේ ආකල්පමය වෙනසක් අවශ්‍යයි. නිසැකවම අපට එය කළ හැකි දෙයක් බව කිවයුතුයි.

පන්ති කාමර නොමැතිව සහ බිත්ති නොමැතිව පාසලෙන් පිටත වැඩි වැඩියෙන් ඉගෙනීමේ අවස්ථා සඳහා යොමු වීමට ඉදිරියේදී අපට සිදු වෙනවා. අද මේ ආරම්භ වන්නේ එම වැඩපිළිවෙළයි. පන්ති කාමර තුළ පවතින අත්දැකීම් සහිත දක්ෂ ගුරුවරුන්ගේ හිඟය පිළිබඳ අභියෝගය ද ජය ගැනීමටද මෙය අවස්ථාවක් වනු ඇතැයි මම විශ්වාස කරනවා.

එසේම මෙම වැඩපිළිවෙළ ශ්‍රී ලාංකික ජනතාවගේ ජීවිත ඉදිරියට ගෙන යාමේ මෙන්ම රටේ ඩිජිටල් පරිවර්තනයක් ඇති කිරීමේ ගමන් මගේ සුවිශේෂී අවස්ථාවක් වනු ඇතියි.

අපේ රටේ අධ්‍යාපනයේ විකාශය අදියර 03ක් යටතේ සිදු වී තිබෙනවා. පළමුව මිහිඳු මහරහතන් වහන්සේ බුදුදහම රැගෙන මෙරටට පැමිණිමත් සමඟ පිරිවෙන් අධ්‍යාපනය ආරම්භ කෙරුණා. සෙනරත් පරණවිතාන මහතා පැවසුවේ රහත් වීමට අසමත් වූවන් ඇළ මාර්ග, දාගැබ්, සීගිරිය සහ අප සතු අනෙකුත් ගොඩනැගිලි මෙන්ම සෞඛ්‍ය පද්ධතිය සැලසුම් කිරීමට කාලය ගත කළ බවයි.

දෙවනුව බ්‍රිතාන්‍යයන් පැමිණ රජයේ පාසල් පද්ධතිය ආරම්භ කළා. එය දැන් රට පුරා ව්‍යාප්ත වෙමින් පවතිනවා. ඒවා අප මහ විද්‍යාල, මධ්‍ය මහා විද්‍යාල යනාදී වශයෙන් හඳුන්වනවා. ඉන් පසුව අප කීර්තිමත් සහ ජාතික පාසල් සංකල්පය ගෙන ඒමෙන් පසුව සමස්ත පාසල් පද්ධතිය අද පවතින තත්ත්වයට වැඩි දියුණු වී තිබෙනවා.

දැන් අප අධ්‍යාපනයේ තුන්වන අදියරට පැමිණ තිබෙනවා. ඒ තමයි අධ්‍යාපන පද්ධතිය ඩිජිටල්කරණය කර විවෘත වේදිකාවක දැනුම භාවිතා කිරීම. අප ඩිජිටල් ආර්ථිකයක් පිළිබඳ අවධානය යොමු කර තිබෙනවා. එහිදී නවීන දැනුම භාවිතා කිරීමට බලාපොරොත්තු වෙනවා. මොකද ශ්‍රී ලංකාවට ඉදිරියට යාමට හැකි වන්නේ දැනුම භාවිතා කිරීම තුළින් පමණයි.

රීජන්ට් ග්ලෝබල් ආයතනයේ ප්‍රධාන විධායක නිලධාරී ආචාර්ය සෙල්වා පන්කජ් :

ජනාධිපති රනිල් වික්‍රමසිංහ මහතා ශ්‍රී ලංකාවේ නව ආර්ථික පරිවර්තනයක් ඇති කිරීමට ගෙන යන වැඩපිළිවෙළ වෙනුවෙන් සහාය ලබාදීමට මෙහි පැමිණීමට ලැබීම පිළිබඳ සතුටු වෙනවා. හිටපු අග්‍රමාත්‍යවරයෙකු ලෙස මෙන්ම වත්මන් ජනාධිපතිවරයා ලෙස ශ්‍රී ලාංකීක ජනතාවට සේවය කිරීමට තම ජීවිතයෙන් වැඩි කාලයක් කැප කළ ජනාධිපතිතුමා අපට ආදර්ශයක් බව කිවයුතුයි.

2022 දී වසරේදී වාර්තා වූ 70%ක උද්ධමනයේ සිට අප සැවොම දුටු කැළඹිලි සහිත තත්ත්වය හරහා ශ්‍රී ලංකාව සාර්ථකව ඉදිරියට මෙහෙයවීමට ඔහුට හැකියාව ලැබී තිබෙනවා. ශ්‍රී ලාංකිකයන්ගේ ජීවන තත්ත්වය උසස් කිරීමේ ජනාධිපතිතුමාගේ වැඩපිළිවෙළට සුළු වශයෙන් හෝ දායක වීමට ලැබීම ගැන අප ආඩම්බර වෙනවා. මා සහ මගේ බිරිඳගේ ජීවිතයේ මුල් කාලය ගත කළේ ශ්‍රී ලංකාවේ බවද මෙහිදී සිහිපත් කළ යුතුයි.සිවිල් යුද්ධයට පෙර අපට වයස අවුරුදු 13 සහ 19 දී එක්සත් රාජධානියට බලා යාමට අපට සිදු වුණා. නමුත් අපි අපේ මාතෘභූමිය කිසිදා අමතක කළේ නැහැ. ශ්‍රී ලංකාවේ අනාගත අභිවෘද්ධියට දායක වීමට අපට සැමවිටම අවශ්‍ය වුණා. ඉතින් ජනාධිපතිතුමා අද අපට ඒ සඳහා අවස්ථාවක් උදා කර දී තිබෙනවා.

මාර්ගගත ක්‍රමවේදය ඔස්සේ මෙම අවස්ථාවට එක් වූ එක්සත් රාජධානියේ හිටපු අධ්‍යාපන ලේකම් ශ්‍රීමත් ගැවින් විලියම්සන්  (Sir Gravin Williamson) :

පොදු ඉගෙනීමේ සංවර්ධනය සෑම වයස් කාණ්ඩයකම ප්‍රජාවට අවශ්‍ය රැකියා සඳහා අවශ්‍ය කුසලතා ගොඩනඟා ගැනීමට, ඔවුන්ට වැඩි මුදලක් උපයා ගැනීමට මෙන්ම ගෝලීය වශයෙන් පුළුල් ලෙස සමාජයට වඩාත් ඵලදායී දායකත්වයක් ලබා දීමට අවශ්‍ය අධ්‍යාපනය වැඩිදියුණු කර ගැනීමට මහගු අවස්ථාවක් සපයනවා.

ජන ජීවිතයේ පරිවර්තනයක් ඇති කරමින් අනාගත දියුණු ශ්‍රී ලංකාව ගොඩනැඟීම සඳහා අවශ්‍ය වේදිකාව අද ශ්‍රී ලාංකික ජනතාවට මෙමගින් සපයා දී තිබෙනවා.

ඒ අනුව ගෝලීය වේදිකාවේ තරග කිරීමට අවශ්‍ය දැනුම් සම්භාරය ඔබ සතුව ඇති බවට ඔබ වග බලා ගත යුතුයි.

මෙම අවස්ථාවට එක්වීමට අවස්ථාවක් ලබාදීම පිළිබඳ මම සියලුදෙනාට ස්තූතිවන්ත වන අතර ශ්‍රී ලාංකික ජනතාවගේ ජීවිත නව පරිවර්තනයක් කරා ගෙන යාමට මෙම වැඩපිළිවෙළ ඉවහල් වේවායි කියා ප්‍රාර්ථනා කරනවා.

තාක්ෂණ රාජ්‍ය අමාත්‍ය කනක හේරත්, අග්‍රාමාත්‍ය ලේකම් අනුර දිසානායක, විශ්වවිද්‍යාල ප්‍රතිපාදන කොමිෂන් සභාවේ සභාපති මහාචාර්ය සම්පත් අමරතුංග, එක්සත් රාජධානියේ ශ්‍රී ලංකා මහ කොමසාරිස් රෝහිත බෝගොල්ලාගම, ශ්‍රී ලංකාවේ එක්සත් රාජධානියේ මහ කොමසාරිස් ඇන්ඩෘ පැට්‍රික් (Andrew Patrick), නැගෙනහිර පළාත් ආණ්ඩුකාර සෙන්තිල් තොන්ඩමන්, හිටපු අමාත්‍ය ජොන් අමරතුංග, ආයෝජන මණ්ඩලයේ සභාපති දිනේෂ් වීරක්කොඩි, ජනාධිපති විශේෂ ව්‍යාපෘති අධ්‍යක්ෂ තීක්ෂණ අබේවර්ධන, තර්ශනී පංකජ් යන මහත්ම මහත්මීන් ඇතුළු විදෙස් රටවල තානාපතිවරු මහ කොමසාරිස්වරුන් රාජ්‍යතාන්ත්‍රික නිලධාරීන් ඇතුළු සම්භාවනීය ආරාධිතයින් පිරිසක් මෙම අවස්ථාවට එක්ව සිටියහ.

ආන්දෝලනයකට තුඩු දී ඇති ඉමියුනෝග්ලොබියුලීන් සිද්ධිය සම්බන්ධයෙන් රක්ෂිත බන්ධනාගාර ගත කර සිටි හිටපු සෞඛ්‍ය අමාත්‍ය කෙහෙළිය රඹුක්වැල්ල ඇතුළු 07 දෙනෙකු මාලිගාකන්ද මහෙස්ත්‍රාත් අධිකරණය විසින් ජුනි 28 දක්වා යළි රක්ෂිත බන්ධනාගාර ගත කිරීමට නියෝග කර තිබේ.

ජනාධිපති රනිල් වික්‍රමසිංහ ගේ වැඩපිළිවෙළ සම්බන්ධයෙන් ප්‍රශංසනාත්මකව අදහස් පළ නොකරන ලෙස සමගි ජන බලවේග පාර්ලිමේන්තු මන්ත්‍රී රාජිත සේනාරත්නට අවවාද කිරීමට  එම පක්‍ෂය  නායකයන් විසින්  තීරණය කර ඇති බව වාර්තා වෙයි .

දේශපාලන ආරංචි මාර්ග සඳහන් කරන ආකාරයට වත්මන් ජනාධිපතිවරයාගේ ආර්ථික වැඩපිළිවෙලට ලෝක නායකයන් ප්‍රශංසා කරන බවට රාජිත සේනාරත්න මන්ත්‍රීවරයා  විසින් සිදුකළ ප්‍රකාශයක් මේ තීරණයට  හේතුවී තිබේ.

මේ පිළිබඳව දීර්ඝ වශයෙන් සාකච්ඡා කරන ලද එම පක්ෂයේ කෘත්‍යාධිකාරි මණ්ඩලය  රාජිත සේනාරත්න මන්ත්‍රීවරයා ට ඒ සම්බන්ධයෙන් අවවාද කිරීමට තීරණය කර ඇති බව වාර්තා වෙයි.

කෙසේ වෙතත් සමගි ජනබලවේගය පක්ෂයේ පාර්ලිමේන්තු මන්ත්‍රී අජිත් මාන්නප්පෙරුම පවසන්නේ ගෝඨාභය වට්ටපු රට ජනාධිපති රනිල් වික්‍රමසිංහ අද තිබෙන තත්ත්වයට ගෙනවිත් තිබීම සම්බන්ධයෙන්  අගය කිරීමට කුහක නොවිය යුතු බවය.

අජිත් මානප්පෙරුම මන්ත්‍රිවරයා ඒ බව පවසා සිටියේ  පරිසර සහ ස්භාවික සම්පත් තිරසර සංවර්ධන කමිටුවේ කටයුත්තක් සඳහා  අද (13) හැටන්  හැටන් දුම්රිය ස්ථානයට අයත් ඉඩමක නාගරික සංවර්ධන අධිකාරිය මගින් රු මිලියන 400 ප්‍රතිපාදන වැය කර ඉදි කරන ලද තුන් මහල් ගොඩනගැල්ලක නිරීක්ෂණ චාරිකාවක් සඳහා පැමිණි අවස්ථාවේය .

මේ රටේ ගොඩාක් ගැටළු ඇති වෙලා තියෙන්නේ දේශපාලනිකරණය නිසා. මේ වන විට වැරදි යෝජනා නිසා රට වැටිලා තියෙන්නේ. ආණ්ඩුවේ ඇතැම් තිරණය නිසා රට වැටුණත් ජනතාව විපක්ෂයේ ඉන්න අපිටත් බනිනවා.

ඒ නිසා ජනාධිපතිවරයා ආංශික අධික්ෂණ කමිටු 17 ක් පාර්ලිමේන්තුවේ හැදුවා. ඒකෙන් අටක් විපක්ෂයට භාර දුන්නා. එතකොට විපක්ෂයත් වැඩ සඳහා  ක්‍රියාකාරි වෙනවා .

රට වැටුණා නෙවෙයි රට වැට්ටුවා. ගෝඨාභය රාජපක්ෂ වගේ කිසිදු පලපුරුද්දක් නොමැති නායකයෙක් බලයට පත්වුණොත් රට කඩා වැටෙනවා.

අපි ජනාධිපතිතුමාගේ පක්ෂයේ හිටපු අය. ඒ නිසා අපි අතර  කිසිදු අමනාපයක් නෑ .  ජනාධිපතිවරයාගේ වැඩ පිළිවෙළ  තරමක් දුරට හොඳයි කියලා අපි දකිනවා. 100% හොදයි කියන්නේ නෑ . මොකද පීඩිත  පන්තිය ගැන ජනාධිපතිවරයා කතා කරන්නේ නෑ .

මහින්ද රාජපක්ෂ සහ ගෝඨාභය රාජපක්ෂ දෙන්නට වඩා ජනාධිපතිවරයගේ වැඩපිලිවෙල හොඳයි.   ගෝඨාභය කාපු රට මෙතෙන්ට හරි ගෙනාපු  එක ගැන  අපි කුහක වෙන්න හොද නෑ .

රසායනික පොහොර නතර කරනකොට පේරාදෙණිය විශ්ව විද්‍යාලයේ මහචාර්ය බුද්ධි මාරබේ පවා කිව්වා එක් නොකල යුතුයි කියලා. ඒක අහපු නැති නිසා ඔහු ඉවත් වුණා , අයි.එම්.එෆ් එකට මුලින්ම යන්න අවශ්‍යයි කිව්වේ සජිත් ප්‍රේමදාස මහතා.

අයි.එම්.එෆ් කියන්නේ සල්ලි නෙවෙයි යෝජනා , ඒ යෝජනා රටට ගෝචරයි. ඒවා ක්‍රියාත්මක නොවිම නිසා තමයි රට මේ තත්ත්වයට වැටුණේ.

වැටිලා තියෙන රටට නායකත්වයක් දෙන්න සජිත් ප්‍රේමදාස මහතාට සහ රනිල් වික්‍රමසිංහ මහතාට පුළුවන් , දෙන්නටම අත්දැකිම් තියෙනවා.

ජාත්‍යන්තර මුල්‍ය අරමුදල ශ්‍රී ලංකාවට ලබා දෙන විස්තීර්ණ ණය පහසුකමේ තෙවැනි වැනි වාරිකය වන ඇමරිකානු ඩොලර් මිලියන 335 නිදහස් කිරීමට එම අරමුදල තීරණය කර ඇත්තේ ජනාධිපති රනිල් වික්‍රමසිංහ ගේ මුල්‍ය විනය සහ කැප වීම මතය යැයි එක්සත් ජාතික පක්ෂයේ ජාතික  ලේකම් සහ හිටපු මුදල් අමාත්‍ය රවී කරුණානායක  විශේෂ "Twitter" පණිවිඩයක් නිකුත් කරමින් කියා සිටියි.

මේ තත්ත්වයනේ පැහැදිලි වන්නේ ජනතාවගේ ඔරොත්තු දීමේ හැකියාව මත ජනාධිපති රනිල් වික්‍රමසිංහ  යටතේ රටක් ලෙස ශ්‍රී ලංකාව සෞභාග්‍යමත් සහ දීප්තිමත් අනාගතයක් කරා වේගයෙන් ගමන් කරමින් සිටින බව යැයි ද එක්සත් ජාතික පක්ෂ ජාතික ලේකම්වරයා පෙන්වා දෙයි.

ජාත්‍යන්තර මුල්‍ය අරමුදලේ තෙවැනි වාරිකය මෙසේ අනුමත වීම ශ්‍රී ලංකාවේ ආර්ථික ප්‍රකෘත්තිය සඳහා අතිශය වැදගත් සහ තීරණාත්මක වන අතර මේ සම්බන්ධයෙන් ජනාධිපති රනිල් වික්‍රමසිංහ වෙත සිය සුභ පැතුම් එක් කර සිටින බවද  ඔහු වැඩිදුරටත් සඳහන් කරයි.

රටේ පවතින ප්‍රජාතාන්ත්‍රික සමාජවාදී මූලධර්මවලින් තමා කිසිවිටෙකත් ඉවත් වී නැති බවත්, සියලුම පුරවැසියන්ට ප්‍රමාණවත් ජීවන තත්ත්වයක් ඇති බව සහතික කිරීම සහ මහජන යහපත සඳහා රාජ්‍ය හා පෞද්ගලික ආර්ථික ක්‍රියාකාරකම් මඟින් සමස්ථ රටේම වේගවත් සංවර්ධනයක් ඇති කිරීම යන අරමුණු සාක්ෂාත් කර ගැනීම වෙනුවෙන් කැපවී කටයුතු කරන බවත් ජනාධිපති රනිල් වික්‍රමසිංහ මහතා පැවසීය.

එම ප්‍රතිපත්තීන් දෙක ශ්‍රී ලංකාවේ ආර්ථික ප්‍රතිපත්තිය නැවත ලිවීමට බෙහෙවින් ප්‍රමාණවත් බව පැවසු ජනාධිපතිවරයා එම ප්‍රතිපත්තින් ආණ්ඩුක්‍රම ව්‍යවස්ථාවේ ද සඳහන් වන බැවින් තමා ව්‍යවස්ථාවෙන් පිට කටයුතු කරන බවට කිසිවෙකුට චෝදනා කළ නොහැකි බවද පෙන්වා දුන්නේය.

ජනාධිපති රනිල් වික්‍රමසිංහ මහතා මේ බව සඳහන් කළේ අද (13) පෙරවරුවේ කොළඹ හිල්ටන් හෝටලයේ ආරම්භ වූ සාර්ක් කලාපීය රටවල මහබැංකු අධිපතිවරුන්ගේ සමුළුවේ “SAARCFINANCE” සමාරම්භක සැසියේ ප්‍රධාන දේශනය සිදු කරමිනි.

මේ වන විට කලාපයේ බොහෝ රටවල මැතිවරණ ජයග්‍රහණය කර අලුත් ආණ්ඩු පත්වී තිබෙන බව මෙහිදී පැවසු ජනාධිපතිවරයා ශ්‍රී ලංකාවද මැතිවරණයක් කරා ගමන් කරමින් සිටින බවත් සුපුරුදු ක්‍රමයට සෑම වසර පහකට වරක් ආණ්ඩුව වෙනස් කිරීමට උත්සාහ කරනවාද, නැතහොත් රට ජයග්‍රහණය කරනවාද යන්න මෙවර මැතිවරණයේ දී තීරණය කළ යුතු බවත් පැවසීය.

ආර්ථිකය නැවත ගොඩනැගීම සම්බන්ධයෙන් ශ්‍රී ලංකාවේ කාර්ය සාධනය ශක්තිමත් බව ජාත්‍යන්තර මුල්‍ය අරමුදල ප්‍රකාශ කර ඇතැයි මෙහිදී වැඩිදුරටත් සඳහන් කළ ජනාධිපති රනිල් වික්‍රමසිංහ මහතා 2023 දෙසැම්බර් මාසය අවසානය වන සිට සමාජ සුබසාධන වියදම් හැර සියලුම ප්‍රමාණාත්මක ඉලක්ක ශ්‍රී ලංකාව විසින් සපුරා ඇති බවත් 2024 අප්‍රේල් මාසය අවසන් වන විට බොහෝ ව්‍යුහාත්මක ඉලක්ක ප්‍රමාදයකින් යුතුව හෝ සම්පූර්ණ කර ක්‍රියාත්මක කර ඇති බව ජාත්‍යන්තර මූල්‍ය අරමුදල සඳහන් කර තිබෙන බවද අනාවරණය කළේය.

ශ්‍රී ලංකාව මෙතරම් ඉක්මනින් මෙම අර්බුදයෙන් ගොඩ එනු ඇතැයි බොහෝ අය නොසිතූ අවස්ථාවක මෙම තත්ත්වය තමා බලාපොරොත්තු වූවාට වඩා යහපත් තත්ත්වයක් බව සඳහන් කළ ජනාධිපතිවරයා මෙම ප්‍රතිඵල ලබා ගැනීම වෙනුවෙන් තමන් සමඟ විශ්වාසයෙන් කටයුතු කළ සියලුදෙනාට ස්තූතිවන බවද සඳහන් කළේය.

බහුවිධ ගෝලීය ආර්ථික අභියෝග මධ්‍යයේ මහ බැංකුකරණය” යන තේමාව යටතේ 45 වන වරටත් සංවිධානය කර තිබූ මෙම සමුළුව දෙදිනක් පුරා පැවැත්වේ.

සමුළුව ඇමතූ ජනාධිපති රනිල් වික්‍රමසිංහ මහතා කළ සම්පූර්ණ කතාව මෙසේය,

මහබැංකු අධිපතිතුමා සඳහන් කළ ආකාරයට අද උදෑසන අපට සුභ ආරංචියක් අසන්න ලැබුණා. ජාත්‍යන්තර මූල්‍ය අරමුදල සමඟ වන වැඩසටහන යටතේ අපගේ කාර්ය සාධනය ශක්තිමත් බව ප්‍රකාශ කර තිබෙනවා. ඇත්ත වශයෙන්ම, එය මා බලාපොරොත්තු වූවාට වඩා හොඳ තත්ත්වයක්. 2023 දෙසැම්බර් මාසය අවසානය වන සිට සමාජ වියදම් පිළිබඳ දක්වන ඉලක්කය හැර සියලුම ප්‍රමාණාත්මක ඉලක්ක සපුරා ඇති බවත් 2024 අප්‍රේල් මාසය අවසන් වන විට බොහෝ ව්‍යුහාත්මක ඉලක්ක ප්‍රමාදයකින් යුතුව හෝ සම්පූර්ණ කර ක්‍රියාත්මක කර ඇති බව ජාත්‍යන්තර මූල්‍ය අරමුදල සඳහන් කර තිබෙනවා.

ශ්‍රී ලංකාව මෙතරම් ඉක්මනින් මේ අර්බුදයෙන් ගොඩ එනු ඇතැයි බොහෝ අය නොසිතූ අවස්ථාවක, පසුගිය වසර දෙක තුළ අප ඒ වෙනුවෙන් විශිෂ්ට කාර්යයක් ඉටු කර තිබෙනවා. මම මේ පිළිබද දැඩි විශ්වාසයකින් කටයුතු කළා. ඒ වගේම මගේ මේ විශ්වාසය මා සමඟ බෙදාගත් කණ්ඩායමක් සිටීම ද මට වාසනාවක් බවට පත්වුණා. විශේෂයෙන්ම ඉතා දුෂ්කර තත්ත්වයන් යටතේ වූවත් මෙම කණ්ඩායමට මගපෙන්වීම සඳහා ශ්‍රී ලංකා මහ බැංකුව ඉටුකළ කාර්යභාරය මා අගය කළ යුතුයි. ඔවුන් දිගු කලක් තිස්සේ ශ්‍රී ලංකාවට නුහුරු නුපුරුදු දෙයක් වූ වියදම් සීමා කිරීමට අවශ්‍ය ප්‍රතිපත්ති අනුගමනය කළා.

මහ බැංකුවට මුහුණ දීමට සිදු නොවූ අයවැය සීමාවන් තුළ ප්‍රතිපත්ති සැකසීමට සහ ඒවාට මුහුණ දීම සඳහා මහ බැංකුව සමඟ එක්ව කටයුතු කළ මුදල් අමාත්‍යාංශ ලේකම්වරයාට සහ මුදල් අමාත්‍යාංශයේ කාර්ය මණ්ඩලයට ද මගේ ස්තූතිය පුද කළ යුතුයි. ඒ වගේම, මම ඉන්දීය රජයට සහ එහි සංචිත බැංකුවට මෙන්ම බංග්ලාදේශ රජයට සහ එහි මහ බැංකුවට ද ස්තූතිවන්ත විය යුතුයි. ඔවුන් ලබාදුන් ඩොලර් බිලියන තුනහමාරක මුදල සහ ඩොලර් මිලියන 200ක මුදල ශ්‍රී ලංකාවට ජීවිතාරක්ෂකයක් බවට පත්වුණා. එසේ නොවන්නට අද අපට මෙම ස්ථාවරත්වය ලබන්නට හැකි වන්නේ නැහැ.

ඔවුන්ගේ සහයෝගය නිසා අපට පොහොර ලබාගැනීමට හැකියාව ලැබුණා. ඒ සඳහා ජාත්‍යන්තර සංවර්ධනය පිළිබඳ එක්සත් ජනපද නියෝජිතායතනයෙන් (USAID) සහ ලෝක බැංකුවෙන් ආධාර ලබාගැනීමටත් හැකි වුණා. එය දුෂ්කර වසරක් බවට පත් වුණා. ඒ පිළිබඳ මා මෙහිදී සඳහන් කරන්න බලාපොරොත්තු වන්නේ නැහැ. ඒ කතාව හුදෙක් පැයක සාකච්ඡාවක් සඳහා නොවෙයි, පොතක් ලිවීමට සුදුසුයි.

අද අප මෙහි රැස්වන්නේ බහුවිධ ගෝලීය ආර්ථික අභියෝග මධ්‍යයේ බැංකුකරණයේ ගැටලු සාකච්ඡා කිරීමටයි. මෙම මාතෘකාව සඳහා මෙම කලාපය තුළ ගැඹුරු සාකච්ඡාවක් අවශ්‍ය වෙනවා. 2009 වසරේ යුද්ධය අවසන් වීමෙන් පසු මුදල් ප්‍රතිපත්තිය ඉටු කර ඇති කාර්යභාරය සහ COVID වසංගතයෙන් පසු යථා තත්ත්වයට පත්වීම සඳහා ගත යුතුව තිබූ ක්‍රියාමාර්ග පිළිබඳව මා විස්තර කළ යුතු නැහැ.

ඔබ ප්‍රශ්න දෙකකට ද මුහුණ දී සිටිනවා. මොන්ට්‍රියල්හි බලය පවතින්නේ කොතැනද? එය වත්මන් ඡන්ද රටාව සමඟ ජාත්‍යන්තර මූල්‍ය අරමුදල විසින් ක්‍රියාත්මක කරන්නේද? එසේ නොවේ නම්, බ්‍රික්ස් සංවිධානය (BRICS) වෙතින් එල්ල විය හැකි අභියෝගය කුමක්ද? මේවා අප සැමගේ අවධානය යොමු වන කරුණු බවට පත් වෙනවා. විශේෂයෙන්ම ගෝලීයකරණයට යොමු වීමත් සමඟ දකුණු ආසියාව ද ඒ හා සමාන ස්ථාවරයක් ගත යුතුයි. ජාත්‍යන්තර මූල්‍ය පද්ධතියට සිදුවන්නේ කුමක්ද? නමුත් මම ඒවා ගැන මේ අවස්ථාවේ විස්තර කරන්න යන්නේ නැහැ.

නමුත් ශ්‍රී ලංකාව අත්කර ගෙන ඇති දේ සහ ඉදිරි වසරවලදී අප කිරීමට අදහස් කරන දේ ගැන වචන කිහිපයක් කතා කිරීමට මම සිතුවා. අර්බුදයේ ගැඹුර පැහැදිලි කිරීම සඳහා, මම කරුණු කිහිපයක් ඉදිරිපත් කරන්නම්. මම ඉපදුනේ 1949 වර්ෂයේදීයි. ඒ කාලයේදී ස්ථාවර විනිමය අනුපාතය රුපියල් 3යි ශත 32යි. 1978 දී ස්ථාවර විනිමය අනුපාතිකය ඉවත් කර ඩොලරයට රුපියල් 16ක් වූ පාවෙන විනිමය අනුපාතිකයකට අප යොමුවුණා.

මුදල් මුද්‍රණය කිරීම අවශ්‍ය වූ මහවැලි සංවර්ධන යෝජනා ක්‍රමය වැනි පුළුල් යෝජනා ක්‍රම තිබියදීත්, 2009 වන විට අපි ඩොලරයක් සඳහා රුපියල් 116 ක් ගෙවිය යුතු මට්ටම දක්වා ළඟා වී සිටියා. එවකට ජාත්‍යන්තර මූල්‍ය අරමුදල ප්‍රකාශ කර තිබුණේ විදේශ ණය අර්බුදයේ මධ්‍යස්ථ අවදානමක් පවතින බවයි.

2009 වසරේදී යුද්ධය අවසන් වූ පසු මහවැලි යෝජනා ක්‍රමය මඟින් විදේශ විනිමය ඉතිරි කරමින් රට සහලින් ස්වයංපෝෂිත කළා. අපගේ නිදහස් වෙළඳ කලාප අපගේ නිෂ්පාදිත භාණ්ඩ අපනයනය කිරීම සහතික කළ අතර අපට දියුණු සංචාරක කර්මාන්තයක් පැවතුණා. 2024 වන විට ඩොලරයක මිල රුපියල් 400 දක්වා ඉහළ යනු ඇතැයි ජනතාව අපේක්ෂා කළා.

නමුත් අද එය රුපියල් 300යි. ඉතින්, 1949 වසරේ සිට 2024 වසර දක්වා කතාවෙන් ඉස්මතු කරන්නේ ආර්ථිකයේ වර්ධනය බොහෝ විට මහ බැංකු ප්‍රතිපත්තිවලට වඩා මුදල් මුද්‍රණය කිරීම මත සිදුවී ඇති බවයි. ණය ගැණුම්කරුවෙකු ලෙස, අපි මුදල් ණයට ගැනීම හෝ මුද්‍රණය කිරීම සිදුකළා.

අප ඉදිරිපත් කර ඇති නව මහ බැංකු පනතේ අරමුණ වන්නේ මූල්‍ය ස්ථාවරත්වය සහතික කිරීමයි. එහිදී මහ බැංකුවෙන් ණය ගන්න හෝ මුදල් මුද්‍රණය කරන්න හැකියාවක් නැහැ වගේම රාජ්‍ය බැංකුවලින් ගන්නත් බැහැ. ආදායම වැඩි කර ගන්නේ කෙසේද යන්න සොයා බැලීමට මෙය අපට බලපෑමක් ඇති කරනවා. මීට අමතරව, උද්ධමනය පිළිබඳ ඉලක්ක ද පවතිනවා.

අපට නීති තුනක් තිබෙනවා. ඒ මහ බැංකු පනත, රාජ්‍ය ණය කළමනාකරණ පනත් කෙටුම්පත සහ රාජ්‍ය මූල්‍ය පනත් කෙටුම්පතයි. මේ කෙටුම්පත් දෙකම පාර්ලිමේන්තුවෙන් සම්මත විය යුතුයි. මේවා අපගේ මූල්‍ය හා මුදල් ස්ථාවරත්වයේ රාමුව සකස් කරනවා. අපි මෙය සිදු කළ පසු, ඉදිරි දශකය හෝ ඊට වැඩි කාලයක් සඳහා ශ්‍රී ලංකාව මූල්‍ය හා මුදල් කටයුතුවල ස්ථාවරත්වයක් අත්කර ගන්නා බව මම දකිනවා.

දෙවැනි කාරණය දූෂණයයි. දූෂණය ශ්‍රී ලංකාව තුළ සැලකිය යුතු ප්‍රශ්නයක් වී ඇති අතර, එය විසඳිය යුතු ආකාරය පිළිබඳ සෑම දෙනාම කතා කරනවා.නමුත් ඔවුන් හසුකරගන්නේ කෙසේද යන්න කවුරුත් කියන්නේ නැහැ. ගැටලුව එයයි. ඒ නිසා මගේ රජය එකඟතාවකට පැමිණ මේ පිළිබඳව ජාත්‍යන්තර මූල්‍ය අරමුදල සමඟ සාකච්ඡා කර තිබෙනවා. අපට ඔවුන්ගේ උපකාර ද අවශ්‍ය වූ අතර, අප ඔවුන්ගෙන් ශ්‍රී ලංකාවේ රාජ්‍ය පාලන විනිශ්චය පිළිබඳ වාර්තාව ලබාගෙන තිබෙනවා.

අප බොහෝ නීති සම්මත කළ යුතුයි. ඒ අතුරින් දූෂණ විරෝධී පනත සම්මත වී තිබෙනවා. දෙවැන්න, අපරාධයකින් උපයාගත් ආදායම පිළිබඳ පනත පාර්ලිමේන්තුවට ඉදිරිපත් කිරීම සඳහා කෙටුම්පත් කරමින් පවතිනවා. අවශ්‍ය වෙනත් නීති මාලාවක් තිබෙනවා. මා සිතන ආකාරයට 2025 වසර වන විට රටවල් එකක් හෝ දෙකක් හැරුණු කොට දකුණු ආසියාව හා අග්නිදිග ආසියාව තුළ පවතින ශක්තිමත්ම දූෂණ විරෝධී යාන්ත්‍රණය අප සතු වෙනවා.

මීළඟ ප්‍රශ්නය වන්නේ සියලුම දේශපාලනඥයන් කනස්සල්ලට පත් කරනු ලබන ප්‍රශ්නයයි. ඒ රැකියා පිළිබඳ ප්‍රශ්නයයි. ඔබ රැකියා උත්පාදනය කරන්නේ කෙසේද? අපේ රටේ රැකියා බලාපොරොත්තුවෙන් විශාල පිරිසක් සිටිනවා. අධ්‍යාපන මට්ටම ඉහළ යන විට, ඔවුන් හුදෙක් පහළ මට්ටමේ රැකියාවකින් සෑහීමකට පත් වන්නේ නැහැ.

ඔවුන් සතුටුදායක රැකියා බලාපොරොත්තු වෙනවා. අපේ රටේ, සෑම කෙනෙකුම සතුව ජංගම දුරකථනයක් හෝ දෙකක් තිබෙනවා. නමුත් රැකියාවක අපේක්ෂාව කුමක්ද? මේ කලාපය තුළ රැකියා උත්පාදනයත් සමඟ අපේ ඒක පුද්ගල ආදායමත් ඉහළ යා යුතු බව අප තේරුම් ගත යුතුයි.

2024 වසර සඳහා වන වර්ධනය පිළිබඳ ලෝක බැංකු වාර්තාවක සඳහන් වන්නේ දකුණු ආසියාවේ වර්ධනය 2024 වසර සඳහා 6%ක් වනු ඇති බවට අපේක්ෂා කරන බවයි. එය ඉතා ඉහළ අගයක් වන නමුත් ව්‍යුහාත්මක අභියෝගයන් රැකියා උත්පාදනය කිරීමට මෙන්ම දේශගුණික විපර්යාසවලට ප්‍රතිචාර දැක්වීමට ද බාධා ඇති කරනවා. පද්ධතිය අස්ථාවර කරමින් රැකියා විරහිත වර්ධනයක් සමඟ අපි හිරවී සිටිනවාද නැත්නම් අපි වර්ධනය දෙස අවධානය යොමු කරනවාද? මෙය ලංකාවේ අප අවධානය යොමු කළ යුතු තත්ත්වයක්.

අප සියලුදෙනාම සිටින්නේ මෙම සාම්ප්‍රදායික බ්‍රිතාන්‍ය ක්‍රමයකයි. එහිදී අප අවශ්‍ය ප්‍රධාන ප්‍රතිපත්ති වෙනස්කම් සිදු කරන්නේ නැහැ. අපි එක අධිකාරියක් ඇතිකරමින් හෝ එය අහෝසි කර තවත් එකක් නිර්මාණය කරමින් විවිධ පනත් සම්මත කරනවා. නමුත් අප විසින් සම්පූර්ණ රාමුව නිර්මාණය කරන්නේ නැහැ. වෙනත් බොහෝ රටවල, ආර්ථික සංවර්ධනය සහ මූල්‍ය පද්ධතිය නියාමනය කිරීම පිළිබඳ ඇතැම් නීති පවතින බව දක්නට ලැබෙනවා. නමුත් අප එම තත්ත්වයට පත්ව නැහැ. එය එලෙස නොකිරීමේ බ්‍රිතාන්‍ය ප්‍රතිපත්තිය මත අප රැඳී සිටිනවා.

බ්‍රිතාන්‍යය නිදහස් වෙළෙඳපොළ ආර්ථිකයක් පිළිගනු ලබනවා. අපි ජීවත්වන්නේ ඒ සියල්ල විවාදයට ලක්වන රටවලයි. ඔබට අවශ්‍ය වන්නේ නිදහස් වෙළඳපොල ආර්ථිකයක් ද, සමාජවාදී ආර්ථිකයක් ද, මාක්ස්වාදී ආර්ථිකයක් ද, පාලිත ආර්ථිකයක් ද එසේත් නොමැති නම් චීන හෝ වියට්නාම ලක්ෂණ සහිත සමාජවාදයක් ද? අපට අවශ්‍ය දේ සහ අපගේ ඉලක්ක මොනවාද යන්න ගැන අපට සිතාගත නොහැකියි.

අප නීති සම්පාදනයේ තුන්වෙනි කොටස ක්‍රියාත්මක කළ යුතු බව මම සිතුවා. මට අනුව වැදගත්ම දේ වන්නේ එයයි. අපි ආර්ථික වර්ධනය තහවුරු කරන්නේ කොහොමද? ශ්‍රී ලංකාවට වර්ධනයක් අත් කරගැනීමට නම් ආනයන පදනම් කරගත් ආර්ථිකය, අපනයන පදනම් කරගත් ආර්ථිකයක් බවට පරිවර්තනය කළ යුතුයි.

ජාත්‍යන්තර මූල්‍ය අරමුදලේ වාර්තාවේ සඳහන් වන පරිදි, “කෙසේ නමුත්, ආර්ථිකය තවමත් අවදානමට ලක්ව පවතින අතර, ණය තිරසාරභාවය කරා යන මාර්ගය පිහියක දාරයක් මත ගමන් කිරීම වැනිය. ප්‍රතිසංස්කරණ සිදුකිරීමේ වේගය පවත්වාගෙන යාම සහ ණය ප්‍රතිව්‍යුහගත කිරීමේ ක්‍රියාමාර්ග, ආර්ථිකය කල් පවතින ප්‍රකෘතිමත් වීමක් සහ ණය තිරසාරභාවයක් කරා යන මාවතකට ගෙන ඒමට ඉතා වැදගත් වෙනවා”. එහි ප්‍රතිඵලයක් ලෙස, අප ආර්ථික පරිවර්තන පනත නමින් නව නීතියක් ගෙන ඒමට තීරණය කළා.

බ්‍රිතාන්‍ය පාලන සමයේ සිටම අපට වතු වගාවන් මත යැපෙන යටත් විජිත වෙළෙඳපොළ ආර්ථිකයක් නිර්මාණය කරන නීති පැවතුණා. 1972 වසරේ දී, ප්‍රාග්ධනය ගොඩනැඟීමේ බිඳවැටීමක් සහ දැඩි ලෙස පාලනය කරන ලද ආර්ථිකයක් ඇති වුනා. 1977 වසරෙන් පසුව අපි ක්‍රමයෙන් ආර්ථිකය විවෘත කිරීමට පටන් ගත්තා. නමුත් අපි ඊට අවශ්‍ය නීති සම්පාදනය කරගත්තේ නැහැ. 1972 වසරේආර්ථිකය මගින් නීති මාලාවක් ගෙනාවා, නමුත් අපි එයින් පසු ඉවත් වෙමින් සිටියා. අපි එයින් ඉවත්වෙන සෑම අවස්ථාවකම, එතැන කුමක් හෝ විරෝධතාවක් ඇතිවුණා. නැත්නම් ඒකට විරුද්ධව උද්ඝෝෂණයක් ඇතිවුණා. කොහොම නමුත්, අපි එයින් ඉවත් වුණා.

නමුත් දැන් අප නව ආර්ථිකය ක්‍රියාත්මක කළ යුතුයි. අප කරන දේ ගැන ලැජ්ජා වීමට අවශ්‍ය නැහැ. අප එය සිදු කර අවසන් කළ යුතුයි. එර්හාර්ඩ් ජර්මනියේ සිදු කළේ එයයි, ජපන් ජාතිකයින් යුද්ධයෙන් පස්සේ සිදු කළේ එයයි, චීන ජාතිකයින් සිදු කළේ ද එයයි. වියට්නාම ජාතිකයින් සිදු කළේ එයයි. එහි බය වෙන්න දෙයක් නැහැ.

අපේ රටේ පවතින ප්‍රජාතන්ත්‍රවාදී සමාජවාදී ක්‍රමයේ මූලධර්මවලින් මම කිසිවිටෙක ඉවත් වී නැහැ.. සියලුම පුරවැසියන්ට ප්‍රමාණවත් ජීවන තත්ත්වයක් ඇති බව සහතික කිරීම සහ මහජන යහපත සඳහා රාජ්‍ය හා පෞද්ගලික ආර්ථික ක්‍රියාකාරකම් මගින් මුළු රටේම වේගවත් සංවර්ධනයක් ඇති කිරීම යන අරමුණු දෙක පෙරදැරි කර ගනිමින් අප කටයුතු කරනවා.

මේ ප්‍රතිපාදන දෙක ශ්‍රී ලංකාවේ ආර්ථික ප්‍රතිපත්තිය නැවත ලිවීමට ඕනෑවටත් වඩා ප්‍රමාණවත්. මුලින්ම මම මේ ව්‍යවස්ථාව ඇතුලත වැඩ කරනවා කියලා නීතියට ඇතුළත් කළා. ඒ නිසා මම ව්‍යවස්ථාවේ සඳහන් අරමුණුවලට පිටින් යනවා කියලා කාටවත් කියන්න බැහැ.

3 වන කොටසේ 3 වන වගන්තියේ තුළ ආර්ථික පරිවර්තනය පිළිබඳ ජාතික ප්‍රතිපත්තිය මගින් රජය විසින් ගෙවිය යුතු ණය ප්‍රතිව්‍යුහගත කිරීම සඳහා ඉඩ සැලැස්විය යුතු බව මම සඳහන් කර තිබෙනවා. 2032 වන විට දළ දේශීය නිෂ්පාදිතයට සාපේක්ෂව රාජ්‍ය ණය අනුපාතය 95% ට වඩා අඩු විය යුතුයි. මේවා ජාත්‍යන්තර මූලය අරමුදලේ ඉලක්කයි. 2032 වසර වන විට දළ දේශීය නිෂ්පාදිතයට සාපේක්ෂව මධ්‍යම රජයේ වාර්ෂික දළ මූල්‍යකරණ අවශ්‍යතාවය 13% ට වඩා අඩු විය යුතුයි. දැන් ඒක නීතියේ සඳහන් වෙනවා.

2027 වසර වන විට සහ ඉන් පසුව දළ දේශීය නිෂ්පාදිතයට සාපේක්ෂව මධ්‍යම රජයේ වාර්ෂික ණය සේවාකරණය 4.5% ට වඩා අඩු විය යුතුයි. මෙය ජාතික ආර්ථික පරිවර්තනයේ එක් කොටසක්. ජාතික ආර්ථික පරිවර්තනයේ දී ලබාදෙන්නට අවශ්‍ය සාධක කිහිපයක් තිබෙනවා.

දෙවන කොටස නම් ශ්‍රී ලංකාව ඉතා තරගකාරී අපනයන ඉලක්ක කරගත් ඩිජිටල් ආර්ථිකයක් බවට පරිවර්තනය කිරීමයි. මෙය තරගකාරිත්වය ඉහළ නැංවීම සඳහා ජාතික ආර්ථිකයේ විවිධාංගීකරණය සහ ගැඹුරු ව්‍යුහාත්මක වෙනස්කම් ඇතුළුව නීතිමය වගකීමක් වෙනවා. අපට ගැඹුරු ව්‍යුහාත්මක වෙනස්කම් තිබිය යුතු බව පනතේ සඳහන් වෙනවා. අප මේ ගැඹුරු ව්‍යුහාත්මක වෙනස්කම් සිදු නොකළහොත් කිසියම් කෙනෙකුට අධිකරණය ඉදිරියට යාමට හැකියාව තිබෙවා. 2050 වසර වන විට ශුන්‍ය විමෝචන මට්ටම ළඟා කර ගැනීම, ගෝලීය ආර්ථිකය සමඟ ඒකාබද්ධ වීම, ස්ථාවර සාර්ව ආර්ථික ශේෂයන් සහ ණය තිරසර බව සාක්ෂාත් කර ගැනීම, ගොවි ඵලදායිතාව, ආදායම් සහ කෘෂිකාර්මික අපනයන ඉහළ නැංවීම සඳහා කෘෂිකර්මාන්තය නවීකරණය කිරීම සහ සියල්ල ඇතුළත් ආර්ථික වර්ධනය සහ සමාජ ප්‍රගතිය ප්‍රවර්ධනය කිරීම ද මේ සැලැස්මේ කොටසක් බවට පත්වෙනවා.

ආර්ථික පරිවර්තනය පිළිබඳ ජාතික ප්‍රතිපත්තිය සම්පාදනය කිරීමේදී අමාත්‍ය මණ්ඩලය විසින් පහත සඳහන් ඉලක්ක සහතික කළ යුතු වෙනවා. දළ දේශීය නිෂ්පාදිතයේ වර්ධනය 2027 වන විට වාර්ෂිකව 5% දක්වා සහ ඉන් පසුව 5%ට වඩා වැඩි කළ යුතුයි. 2025 වසර වන විට රටේ විරැකියාව, ශ්‍රම බලකායෙන් 5% ට වඩා අඩු විය යුතුයි.

කාන්තා ශ්‍රම බලකායේ සහභාගීත්වය 2030 වසර වන විට 40% ට නොඅඩු සහ 2040 වන විට 50% ට නොඅඩු විය යුතුයි. ජංගම ගිණුමේ ගෙවුම් ශේෂයේ හිඟය වාර්ෂිකව දළ දේශීය නිෂ්පාදිතයෙන් 1% නොඉක්මවිය යුතුයි. 2025 වසර වන විට භාණ්ඩ හා සේවා අපනයන දළ දේශීය නිෂ්පාදිතයේ ප්‍රතිශතයක් ලෙස 25% ට නොඅඩු විය යුතුයි, 2030 වසර වන විට 40% ට නොඅඩු වියයුතුයි සහ 2040 වසර වන විට 60% දක්වා ළඟා විය යුතුයි. ශුද්ධ සෘජු විදේශ ආයෝජන දළ දේශීය නිෂ්පාදිතයේ ප්‍රතිශතයක් ලෙස 5% ට නොඅඩු විය යුතුයි. 2030 වසර වන විට සහ 2030 වසරෙන් පසු එය 40% ට නොඅඩු විය යුතුයි. රාජ්‍ය අයවැයේ ප්‍රාථමික ශේෂය 2032 දක්වා දළ දේශීය නිෂ්පාදිතයෙන් 2.3% ක් දක්වා සහ 2032 වසරේ සිට අවම වශයෙන් 2%ක් දක්වා ළඟා විය යුතුයි. රාජ්‍ය ආදායම 2027 වසරෙන් ඔබ්බට දළ දේශීය නිෂ්පාදිතයෙන් අවම වශයෙන් 15% දක්වා ළඟා විය යුතුයි. බහුමාන දරිද්‍රතා ප්‍රමාණයේ අනුපාතය 2027 වසර වන විට 15%ටත් 2035 වන විට 10%ටත් වඩා අඩු විය යුතුයි.

මේවා දුෂ්කර ඉලක්කයන් වෙනවා. නමුත් අප මේ දුෂ්කර දේ ඉටු නොකළහොත් සාර්ථක වීමට හැකියාවක් නැහැ. යම් ආණ්ඩුවකට මෙය සිදු කළ නොහැකි බව සිතුණහොත් ඔවුන් පාර්ලිමේන්තුවට ගොස් මේ පනත සංශෝධනය කරගත යුතුයි. එසේ නොමැතිනම්, ඔබ මෙම රාමුව තුළ ක්‍රියා කළ යුතුයි.

මෙම අරමුණ සාක්ෂාත් කර ගැනීම සඳහා මහ බැංකුව, භාණ්ඩාගාරය සහ ආර්ථික උපදේශකයින් සියලු දෙනා එක්ව කටයුතු කරනවා.

මේ සියල්ල ආරම්භයේදීම ජාත්‍යන්තර මූල්‍ය අරමුදල සමඟ එක්ව අප ගෙන ඇති ක්‍රියාමාර්ගවල මූලික ප්‍රතිලාභීන් ශ්‍රී ලංකාවේ සාමාන්‍ය ජනතාව බව සහතික කිරීමට මට අවශ්‍යයි. වැඩිපුරම දුක් වින්දේ ඒ අයයි. රැකියා අහිමි වූයේ, දේපළ උකස් කර ඉඩම් විකිණීමට සිදු වූයේ ඒ අයටයි. ඒ සඳහා, මුදල් පහළට ගලා යන බව සහතික කළ යුතු බව මම සඳහන් කළා. රුපියල ස්ථාවර කිරීම සහ පොලී අනුපාත පහත දැමීම එක් වාසියක් බවට පත්වී තිබෙනවා. ලෝක බැංකු ආධාර ඇතිව අප සමාජ සුබසාධන ප්‍රතිලාභ තුන් ගුණයකින් වැඩි කර තිබෙනවා. පවුල් ලක්ෂ 18ක සිට එය පවුල් ලක්ෂ 24 දක්වා එය වැඩිකර තිබෙනවා. ඒ ඉතාම පහළ මට්ටටම දක්වා විහිදී තිබෙනවා. අප රජයේ සේවකයන්ට රුපියල් 10,000 දීමනාවක් ලබාදුන් අතර පෞද්ගලික අංශයද ඊට අනුගත වී තිබෙනවා. වතු කම්කරුවන්ගේ දෛනික වැටුප ඉහළ නැංවීමට ද රජය නියෝග කළා. එය වතු සමාගම් විසින් අධිකරණය ඉදිරියේ අභියෝගයට ලක්කල අතර අධිකරණය එම අභියෝගය ඉවත දැමූවා. ඒ නිසා පහළම මුදල් ලැබෙන බව අපි සහතික කර තිබෙනවා.

අප දිස්ත්‍රික් සංවර්ධනය සඳහාද අරමුදල් වෙන් කළා. මේවා විමධ්‍යගත අරමුදල් මගින් ගම්වල පාරවල් හදන්න හෝ ගොඩනැගිලි ඉදිකිරීමට ලබාදී තිබෙනවා. ඒ ප්‍රදේශයේ කුඩා කොන්ත්‍රාත්කරුවන්ට සහ වෙනත් අයට මුදල් ගලා ඒම සඳහායි. සාධාරණ මුදලක් ජනතාවට ලබාදී තිබෙනවා.

1935 වසරේ සිට රජය මිනිසුන්ට වගා කිරීමට ඉඩම් ලබා දී තිබෙන නමුත් කිසි විටෙක ඔවුන්ට එහි නීත්‍යානුකූල අයිතියක් ලබාදුන්නේ නැහැ. ලබාදී තිබුණේ බලපත්‍රයක් පමණයි. ඒ වගේ ම අපි කොළඹ නගරයේ සහ ඒ අවට අඩු ආදායම්ලාභී පවුල් සඳහා කුලී පදනම මත නිවාස ඉදිකර දී තිබෙනවා. සාමාන්‍ය ජනතාවට නිවාස සෑදීමට හෝ වගා කිරීමට දී ඇති සියලුම ඉඩම් දැන් සින්නක්කර ඉඩම් ලෙස ඔවුන්ට ලබාදීම සඳහා අප ප්‍රතිපත්තිමය තීරණයක් ගත්තා. අප දැන් එය ක්‍රියාත්මක කරනවා. එසේම අඩු ආදායම්ලාභී මහල් නිවාස හිමියන්ට අපි හිමිකම් ඔප්පු ලබා දෙනවා. ඒ කියන්නේ අමතර පවුල් ලක්ෂ 20කට මේ මුදල් ගලා යනවා. මේවා බැංකුගත කළ හැකි වත්කම් බව පැවසිය යුතුයි.

වෘත්තීය පුහුණු අධ්‍යාපන ක්‍රමය වෙනස් කිරීමටත් අප අලුත් නීති ගෙන එනවා. මොකද විශ්වවිද්‍යාලයට වඩා විශාල පිරිසක් රැකියාවක් සොයමින් වෘත්තීය පුහුණු අධ්‍යාපනයට යොමු වන නිසයි. මේවා අප ජනගහනයේ පහළ අන්තයට ප්‍රතිලාභ ලැබෙන බව සහතික කිරීම සඳහා ගන්නා ක්‍රියාමාර්ග කිහිපයක්. එය සමාජයේ ඉහළින් සිටින කිහිප දෙනෙකුට සීමා කළ නොහැකියි. අපට විශාල සමාගම් තවදුරටත් පුළුල් කිරීමට අවශ්‍යයි. ඒවායින් බොහොමයක් ව්‍යාප්ත වීම දැකීමට මම කැමැත්තෙන් පසුවෙනවා. අපට දැනටමත් මාලදිවයිනේ හෝටල් පවතින අතර දැන් අපට බංග්ලාදේශය තුළ ද සිදු කිරීමට ආයෝජන තිබෙනවා. ඉන්දියානු ආයෝජන ලංකාවට එනවා අපි දකිනවා. අප පුළුල් වන විට, සහයෝගීතාවයට අදාළ ආර්ථික ගැටළු සමඟ කටයුතු කළ හැකි යැයි මම සිතනවා.

අප සිටින්නේ ඉතා වැදගත් අවස්ථාවකයි. කලාපයේ බොහෝ රටවල මැතිවරණ ජයග්‍රහණය කර අලුත් ආණ්ඩු පත්වී තිබෙනවා. ශ්‍රී ලංකාවේ අප මැතිවරණයක් කරා ගමන් කරමින් සිටිනවා. බලාපොරොත්තු ඉහළ මට්ටමක පවතිනවා. සුපුරුදු ක්‍රමයට සෑම වසර පහකට වරක් අප ආණ්ඩුව වෙනස් කරන්න යනවාද, නැතහොත් අපි සැබවින්ම වැඩ කර පෙන්නනවාද? කියා තීරණය කළ යතුයි.

සාර්ක් සංවිධානයේ මහලේකම් ගොලාම් සර්වාර් (Ambassodor. MD Golam Sarwar), මුදල් අමාත්‍යාංශයේ ලේකම් කේ. එම්. මහින්ද සිරිවර්ධන, ශ්‍රී ලංකා මහ බැංකුවේ අධිපති ආචාර්ය නන්දලාල් වීරසිංහ, ඉන්දීය සංචිත බැංකුවේ අධිපති ශක්තිකාන්ත දාස් (Shaktikanta Das), භූතාන රාජකීය මූල්‍ය අධිකාරියේ අධිපති දෂෝ පෙන්ජොර් (Dasho Penjore), මාලදිවයින් මූල්‍ය අධිකාරියේ අධිපති අලි හසීම් (Ali Hashim), නේපාල මහ බැංකුවේ අධිපති මහා ප්‍රසාද් අධිකාරි (Maha Prasad Adhikari), පාකිස්තාන රාජ්‍ය බැංකුවේ අධිපති සලීම් උල්ලාහ් (Saleem Ullah) යන මහත්මවරුන් සහ සාර්ක් කලාපීය රටවල මහාභාණ්ඩාගාර ලේකම්වරුන් ඇතුළු සාර්ක් කලාපීය රටවල මහබැංකු නිලධාරීන් මෙම අවස්ථාවට එක්ව සිටියහ.

රුපියල් කෝටි 07කට ආසන්න මුදල් සාවද්‍ය පරිහරණය කිරීමක් සම්බන්ධයෙන් සැකකරුවකු වශයෙන් නම් කර සිටින ව්‍යාපාරික විරංජිත් තාඹුගල විසින් රහස්‍ය ප්‍රකාශයක් සිදු කිරීමට සූදානම් බවට කර තිබෙන ඉල්ලීම ලබන 18 වනදා සිදු කරන ලෙස කොළඹ මහේස්ත්‍රාත් අධිකරණය අද නියම කළේය.

ඒ, එම පැමිණිල්ල කොළඹ අතිරේක මහේස්ත්‍රාත් පවිත්‍රා පතිරාජ ඉදිරියේ කැඳවූ අවස්ථාවේදීයි.

එම අවස්ථාවේදී අපරාධ පරීක්ෂණ දෙපාර්තමේන්තුවේ නිලධාරීන් අධිකරණයේ පෙනී සි‍ට නැත.

ඒ අනුව තමන්ට මහේස්ත්‍රාත්වරිය ඉදිරියේ රහස්‍ය ප්‍රකාශයක් සිදු කිරීමට අවශ්‍ය බවට සැකකරු විසින් සිදුකර තිබෙන ඉල්ලීම මීළඟ නඩු දිනයේ ඉදිරිපත් කරන ලෙස මහේස්ත්‍රාත්වරිය එහිදී නියම කර ඇත.

ජනතාව වෙනුවෙන් රජය ක්‍රියාත්මක කර ඇති සුබසාධන වැඩසටහන් කාර්යක්ෂම කර ඒවායේ ප්‍රතිලාභ ජනතාවට ලබාදීම වෙනුවෙන් ආණ්ඩුකාරවරුන් මැදිහත් වී කටයුතු කළයුතු බව ජනාධිපති රනිල් වික්‍රමසිංහ  පැවසීය.

ජනාධිපතිවරයා මේ බව සඳහන් කළේ පළාත් ආණ්ඩුකාරවරුන් සමඟ ඊයේ (12) ජනාධිපති කාර්යාලයේ පැවති සාකච්ඡාවේදීය.

පළාත් මට්ටමින් පවතින ගුරු හිඟය කඩිනමින් පියවා ගැනීමට ගත යුතු පියවර මෙන්ම උරුමය සින්නක්කර ඉඩම් ඔප්පු ලබාදිමේ වැඩසටහන කාර්යක්ෂම කිරීම පිළිබඳව ද මෙහිදී පුළුල් ලෙස සාකච්ඡා කෙරිණි.

උරුමය සින්නක්කර ඉඩම් ඔප්පු ලබාදීමේ වැඩසටහන කාර්යක්ෂම කිරීම වෙනුවෙන් ග්‍රාම නිලධාරීන්ට අමතරව තවත් කණ්ඩායමක් වෙතද බලය පවරා ජංගම සේවා ක්‍රියාත්මක කිරිමේ හැකියාව ජනාධිපතිවරයා මෙහිදී පෙන්වා දුන්නේය.

ජනතාව මේ කෙරෙහි උනන්දු කරවමින් එම ප්‍රතිලාභය ඔවුන් වෙත ලබාදීමට ප්‍රාදේශීය ලේකම්වරුන්ට පැවරී ඇති වගකීම ද ජනාධිපති රනිල් වික්‍රමසිංහ  සිහිපත් කළේය.

පළාත් මට්ටමින් පවතින ගුරු හිඟය කඩිනමින් පියවා ගැනීමට රජය කැපවී කටයුතු කරන බව අධ්‍යාපන අමාත්‍ය ආචාර්ය සුසිල් ප්‍රේම්ජයන්ත  මෙහිදී සඳහන් කළ අතර එළැඹෙන ජූලි 03 වනදා ජාතික පාසල් සඳහා නව ගුරු පත්වීම් 2500ක් ලබා දීමට කටයුතු සූදානම් කර ඇති බව ද ඒ මහතා සඳහන් කළේය. ඒ යටතේ රසායනික විද්‍යාව,භෞතික විද්‍යාව, ජිව විද්‍යාව, ගණිතය, තාක්ෂණවේදය, විදේශ භාෂා යන විෂයයන් සඳහා ගුරු පත්විම් 2100ක් සහ 2021 වසරේ දී පවත්වන ලද ඉංග්‍රීසි මාධ්‍ය උසස් ඩිප්ලෝමා විභාග ප්‍රතිඵල මත ගුරුවරුන් 500ක් බඳවා ගැනීමට කටයුතු සුදානම් කර ඇති බවත් ඒ සමඟ එම විෂය ධාරාවන්ට අදාළව ජාතික පාසල්වල පවතින ගුරු පුරප්පාඩු බොහෝ දුරට මඟ හැරෙනු ඇති බවත් අමාත්‍යවරයා පෙන්වා දුන්නේය.

එසේම ඉංග්‍රීසි මාධ්‍ය ගුරු හිඟය පියවා ගැනීම වෙනුවෙන් දැනට විශ්‍රාම ගොස් සිටින ඉංග්‍රීසි මාධ්‍ය ගුරුවරුන්ගෙන් අයදුම්පත් කැඳවා ඔවුන්ව කොන්ත්‍රාත් පදනම මත බදවා ගැනීමේ කටයුතු සිදු වෙමින් පවතින බව ද පෙන්වා දුන් අමාත්‍යවරයා අධ්‍යාපන පරිපාලන සේවයේ හා ගුරු අධ්‍යාපන සේවයේ නිලධාරින්ගේ හිඟය පියවා ගැනීම සඳහා ද කඩිනම් වැඩපිළිවෙළක් ක්‍රියාත්මක බව සඳහන් කළේය.

මේ අතර අඩු ආදායම්ලාභී පවුල්වල දරුවන් වෙනුවෙන් ජනාධිපති අරමුදල මඟින් ක්‍රියාත්මක ජනාධිපති ශිෂ්‍යත්ව වැඩපිළිවෙළ කඩිනම් කිරීම පිළිබඳව ද සාකච්ඡා කෙරිණි.

පළමු ශ්‍රේණියේ සිට 11 වන ශ්‍රේණිය දක්වා අධ්‍යාපනය ලබන සිසුන් ලක්ෂයක් වෙනුවෙන් ජනාධිපති ශිෂ්‍යත්ව ලබාදිමේ වැඩසටහන යටතේ බස්නාහිර පළාතට ශිෂ්‍යත්ව 16,152ක්, උතුරු පළාතට ශිෂ්‍යත්ව 8,636ක් සහ අනෙකුත් සෑම පළාතකටම ශිෂ්‍යත්ව 10,000 පමණ හිමිවන බව මෙහිදී අනාවරණය කෙරිණි.

එම ශිෂ්‍යත්ව වැඩසටහන යටතේ මසකට රුපියල් 3,000/- බැගින් මාස 12ක කාලයක් ශිෂ්‍යත්ව පිරිනැමේ. එසේම අ.පො.ස උසස් පෙළ හදාරන අඩු ආදායම්ලාභී පවුල්වල දරුවන් වෙනුවෙන් මසකට රුපියල් 6,000/- බැගින් මාස 24ක් ක්‍රියාත්මක ශිෂ්‍යත්ව වැඩසටහනේ කටයුතු ද මේ වන විට අවසන්ව ඇති බවත් කොළඹ දිස්ත්‍රික්කයේ සිසුන් 2000ක් වෙනුවෙන් එම ශිෂ්‍යත්ව ප්‍රදානය කිරීම එළැඹෙන ජූනි 19 වනදා අරලියගහ මන්දිරයේ දී ජනාධිපතිවරයාගේ ප්‍රධානත්වයෙන් පැවැත්වෙන බවත් සඳහන් කෙරිණි.

ඊට සමගාමීව දිස්ත්‍රික් මට්ටමින් ශිෂ්‍යත්ව වැඩසටහන ක්‍රියාත්මක වන අතර ශිෂ්‍යත්ව ප්‍රදානය කරන දිනයේදීම හිඟ වාරික ද සමඟ සිසුන්ගේ ගිණුම්වලට අදාළ මුදල් බැර කෙරෙනු ඇත. ඉන් පසුව සෑම මසකම පළමු සතියේ online ක්‍රමවේදය යටතේ අදාළ ශිෂ්‍යත්ව මුදල් සිසුන්ගේ ගිණුම වෙත සෘජුව බැර කෙරේ.

පිරිවෙන් හා සිල්මතා අධ්‍යාපන ආයතනවල ඉගෙනුම ලබන ශිෂ්‍ය භික්ෂුන් වහන්සේලා, සීලමාතාවන් හා ගිහි ශිෂ්‍ය ශිෂ්‍යාවන් වෙනුවෙන් ඉතිහාසයේ පළමු වරට ශිෂ්‍යත්ව ලබාදීමේ වැඩසටහනක් ක්‍රියාත්මක කර ඇති අතර ඒ සඳහා අයදුම්පත් කැඳවීම අවසන් වු වහාම ශිෂ්‍යත්ව ප්‍රදානය ආරම්භ කෙරෙන බවත්, අ.පොස උසස් පෙළ තොරතුරු හා සන්නිවේදන තාක්ෂණ විෂයය හදාරනු ලබන ශිෂ්‍ය ශිෂ්‍යාවන් සඳහා ශිෂ්‍යත්ව ප්‍රදානය කිරීමේ වැඩසටහන වෙනුවෙන් ද අයදුම් පත් කැදවීම මේ වන විටත් ආරම්භ කර ඇති බවත් සඳහන් කෙරිණි.

මේ සියලු ශිෂ්‍යත්ව ප්‍රදානයන් වෙනුවෙන් වසරකට රුපියල් මිලියන 5100ක පමණ මුදලක් වැය වන අතර එම සම්පූර්ණ මුදල ජනාධිපති අරමුදලින් මේ වන විටත් වෙන් කර ඇති බවද මෙහිදී අනාවරණය කෙරුණු අතර දිස්ත්‍රික් මට්ටමින් මෙම ශිෂ්‍යත්ව ලබාදිමේ වැඩසටහන් සාර්ථක කර ගැනීමේදී ආණ්ඩුකාරවරුන් වෙත පැවරී ඇති වගකීම ද සාකච්ඡා කෙරිණි.

අග්‍රාමාත්‍ය දිනේෂ් ගුණවර්ධන, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක යන මහත්වරුන් ද ජනාධිපති ලේකම් සමන් ඒකනායක මහතා ඇතුළු අදාළ අමාත්‍යාංශ ලේකම්වරුන් සහ ආයතන ප්‍රධානිහු මෙම සාකච්ඡාවට එක්ව සිටියහ.

පොදු ජන පෙරමුණේ අනුරාධපුර දිස්ත්‍රික් හිටපු පාර්ලිමේන්තු මන්ත්‍රී රංගන ශිල්පී උද්දික ප්‍රේමරත්නගේ අනුරාධපුරයේ පිහිටි නිවස අසලදී ඔහුගේ වාහනයට වෙඩි තබා තිබෙන්නේ පොලිස් ප්‍රධානියකු බවට තොරතුරු අනාවරණය වී ඇති බව  පොලිස් මාධ්‍ය ප්‍රකාශක නියෝජ්‍ය පොලිස්පති නීතිඥ නිහාල් තල්දුව පැවසීය.

ශ්‍රී ලංකා පොදු ජන පෙරමුණේ අනුරාධපුර දිස්ත්‍රික් හිටපු පාර්ලිමේන්තු මන්ත්‍රී රංගන ශිල්පී උද්දික ප්‍රේමරත්නගේ අනුරාධපුරයේ පිහිටි නිවස අසලදී ඔහුගේ වාහනයට වෙඩි තබා ඇත්තේ පොලිස් ප්‍රධානියකු බවට තොරතුරු අනාවරණය වී ඇතැයි පොලිස් මාධ්‍ය ප්‍රකාශක නියෝජ්‍ය පොලිස්පති නීතිඥ නිහාල් තල්දුව  පැවසීය.

2023 වර්ෂයේ සැප්තැම්බර් 17 වැනිදා සිදුවූ මෙම වෙඩි තැබීමේ සිදුවීම හිටපු මන්ත්‍රීවරයා සහකාර පොලිස් අධිකාරීවරයකු සමග එක්ව සැලසුම් සහගතව සිදුකර ඇති බවද ඔහු  සඳහන් කළේය.

මෙම  වෙඩි ප්‍රහාරයෙන් හිටපු මන්ත්‍රීවරයා ගේ මෝටර් රථයේ පැති වීදුරුවට අලාභ හානි සිදු වූ නමුත් මන්ත්‍රීවරයාට කිසිදු හානියක් සිදුව තිබුණේ නැත.

මෙහි විමර්ශන සිදුකළ   අපරාධ පරීක්ෂණ දෙපාර්තමේන්තුව පවසා තිබෙන්නේ ඊට  සම්බන්ධ සැකකරුවන් මේ වන විට හඳුනාගෙන ඇති බවයි.

සංජීව මහානාම නමැති එම සැකකාර සහකාර පොලිස් අධිකාරිවරයා විදේශගත වී ඇති බවත් ඔහු විදේශගතවී ඇත්තේ පොලිසියට දැනුම්දී නිසි අවසරයකින් නොවන බවත් පොලිස් මාධ්‍ය ප්‍රකාශකවරයා සඳහන් කළේය.

ඒ සම්බන්ධයෙන් වෙනම පරීක්ෂණයක් සිදු කරන බවද ඔහු  ප්‍රකාශ කළේය.

සිදුවීමට අදාළ  විමර්ශන පැවැත්වෙන අතරතුර සහකාර පොලිස් අධිකාරිවරයා බිරිය සහ දරුවන් මෙසේ විදේශගතව ඇති බව විමර්ශනයේදී හෙළි වී ඇතැයිද ඔහු  පවසයි.

සැකකාර සහකාර පොලිස් අධිකාරිවරයා කටුනායක ගුවන් තොටුපළට ගොස් සිය ගිනි අවිය කිසිවකු අතේ සේවා ස්ථානයට එවා ඇති බවටද තොරතුරු හෙළි වී ඇතැයි පැවසූ තල්දූව   ඒ සම්බන්ධයෙන්ද පරීක්ෂණ පවත්වන බව පැවසීය .

තම ගිනි අවිය වෙනත් අයෙකුගේ යටතට පත් කිරීම දඩුවම් ලැබිය හැකි වරදක් බවද ඔහු කීවේය.

මේ අතර සැකකාර සහකාර පොලිස් අධිකාරිවරයා පසුගියදා  මැලේසියාව බලා පිටත්ව ගොස් ඇති බවද ඔහු  පවසයි.

උද්ධික ප්‍රේමරත්න 2023 පෙබරවාරි මස 27 වැනිදා  සිය පාර්ලිමේන්තු මන්ත්‍රී ධූරයෙන් ඉල්ලා අස්වූ අතර  ඉල්ලා අස්වීමෙන් පසු  විදේශගත විය.

අනාගත අභියෝගවලට මුහුණදිය හැකි දැනුමින් හා පුහුණුවෙන් සන්නද්ධ  තරුණ පරපුරක් බිහි කළ යුතු බව ජනාධිපති රනිල් වික්‍රමසිංහ  ප්‍රකාශ කළේය.

රටේ තරුණ තරුණියන්ට‌ ඉහළ ආදායම් මාර්ගයක් ඇති කිරීමට අවශ්‍ය ආර්ථික වැඩපිළිවෙළ මේ වන විට  ක්‍රියාත්මක කරමින් සිටන බව ද ජනාධිපතිවරයා පෙන්වා දුන්නේය.

ජනාධිපති රනිල් වික්‍රමසිංහ  මෙම අදහස් පළ කළේ, යොවුන් සේනාංකයේ තරුණ තරුණියන් ජනාධිපති කාර්යාලයේදී ඊයේ (12) හමුවූ අවස්ථාවේදී ය.

යොවුන් සේනාංකයේ අධ්‍යක්ෂ බ්‍රිගේඩියර්  සුජීව රත්නායක   විසින් ජනාධිපති රනිල් වික්‍රමසිංහ  වෙත සමරු තිළිණියක් පිරිනැමීමද මෙහිදී සිදු කෙරිණි.

එහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ  මෙසේද පැවසීය,

යොවුන් සේනාංකය ආරම්භ  වී මේ වන විට  වසර 22ක් ගතව තිබෙනවා. මෙම යොවුන් සේනාංකය ආරම්භ කළේ  එදා තිබුණු ආර්ථික සමාජ ක්‍රමයට ගැලපෙන ආකාරයටයි. කාලය සමඟ යොවුන් සේනාංකයත් වෙනස් විය යුතුයි.

තරුණයින්‌ට හොඳ අනාගතයක් නිර්මාණය කර දීමට මෙන්ම හොඳ ආදායම් තත්ත්යක් නිර්මාණය කරදීම කළ යුතුයි. ඒ සඳහා අවශ්‍ය පරිදි යොවුන් සේනාංකය වෙනස් කිරීමට අවශ්‍ය පියවර ගත යුතුයි.

ඉහළ ආදායම් තත්ත්වයක් ලැබෙන රැකියාවලට තරුණයින් කැමැතියි.  ඒ නිසා එම තත්ත්වය ඇති කිරීමට අප සැලසුම් සකස් කළ යුතුයි.  ඒ වෙනුවෙන් ආර්ථික පරිවර්තන නීතිය පාර්ලිමේන්තුවට ගෙනැවිත් තිබෙනවා. එමඟින් 2027 වසර වන විට විරැකියාව අඩු කර ගැනීමට හැකි වෙනවා වගේම 2035 වසර වනවිට ඉහළ ආදායම් ලබන රැකියා ක්ෂේත්‍ර ගණනාවක් බිහි කළ හැකියි. 2048 වසර වන විට දියුණු රාජ්‍යයක් මෙමඟින් බිහි වෙනවා. අද මෙතන සිටින යොවුන් සේනාංක සිසුන්ට ඒ වනවිට වයස අවුරුදු 50ක්වත් නැහැ. නව ආර්ථිකයක් ඇති කිරීමට අවශ්‍ය වැඩපිළිවෙළ අප ක්‍රියාත්මක කළ යුතුයි. වියට්නාමය, තායිලන්තය, මැලේසියාව වැනි රටවල් අපනයන ආර්ථිකයක් පදනම් කරගෙන සංවර්ධනය  පිළිබඳ  අප අවධානය යොමු කළ යුතුයි. ඒ නිසා අපනයන මත පදනම් වූ ආර්ථිකයක් ගොඩනැඟීමට අප කටයුතු කළ යුතුයි.

ඒ වගේම සීඝ්‍රයෙන් දියුණු කළ හැකි ක්ෂේත්‍ර පිළිබඳ අප අවධානය යොමු කළ යුතුයි. සංචාරක ක්ෂේත්‍රය, සුහුරු කෘෂිකාර්මික ක්ෂේත්‍රය, තොරතුරු තාක්ෂණය වැනි     ක්ෂේත්‍ර දියුණු කිරීමට කඩිනම් වැඩපිළිවෙළක් ක්‍රියාත්මක කළ යුතුයි. යොවුන් සේනාංකයේ සිසුන් මේ සඳහා යොමු කිරීමේ අවශ්‍යතාවයක් තිබෙනවා. හරිත සමාජයක් හරිත ආර්ථිකයක් ඇති කිරීම තුළින් අනාගත අභියෝගවලට මුහුණදිය හැකි දැනුමින් හා පුහුණුවෙන් හෙබි තරුණ පරපුරක් බිහි කිරීමට අවශ්‍ය වැඩපිළිවෙළ සකස් කළ යුතුයි. වෘත්තීය පුහුණුව සහිත තාරුණ්‍යයක් ඇති කර රටේ ආර්ථිකය නව මානයකට ගෙන යාමට කටයුතු කළ යුතුයි.

ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්‍ය මණ්ඩල ප්‍රධානි සාගල රත්නායක :

අනාගතයට සරිලන තරුණයා බිහි කිරීම වෙනුවෙන් එවකට අග්‍රාමාත්‍ය රනිල් වික්‍රමසිංහ මහතාගේ සංකල්පයකට අනුව යොවුන් සේනාංකය 2002 වසරේ බිහි වුණා. එදා  මධ්‍යස්ථාන අටකින්  ආරම්භ වූ යොවුන් සේනාංකය අද වන විට  මධ්‍යස්ථාන 57 දක්වා වර්ධනය කර ගැනීමට හැකි වී තිබෙනවා.  අනාගත ලෝකයට සරිලන තරුණයා තෝරාගෙන ඊට අදාළ මඟ පෙන්වීම සිදු කරමින් අභියෝග බාර ගත හැකි නායකත්වයක් කරා තරුණයාව මෙහෙයවීම යොවුන් සේනාංකය මගින් සිදුකළා.

නමුත් ආණ්ඩු මාරුවීමෙන් පසුව යොවුන් සේනාංක සංකල්පය ඉදිරියට වර්ධනය කෙරුණෙ නැහැ.  යොවුන් සේනාංකවලින් බිහි වූ තරුණයින්ට නිසි වටිනාකම් ලබාදෙමින් ජාතික ආර්ථිකයට ඔවුන් දායක කර ගැනීමට කටයුතු කළා නම් මීට වඩා යහපත් ආර්ථිකයක් බිහි කර ගැනීමට හැකියි. නමුත් 2015 වසරේ  රනිල් වික්‍රමසිංහ මහතා අගමැතිවරයා ලෙස යළිත්  යොවුන් සේනාංකය බලගැන්වුවා. ‍

2020වසරෙන් පසුව රටට  බලපෑ කොවිඩ් වසංගතය මෙන්ම ආර්ථික අර්බුදය සල්ලි තිබෙන අයට හෝ සල්ලි නොමැති අයට කියා විශේෂයක් කළේ නැහැ. එම කාලවකවානුවේදී සියලු දෙනාට එක ලෙස පීඩා විඳීමට සිදුවුණා. එම ආර්ථික අර්බුදයෙන් රට බේරා ගැනීමට කිසිම නායකයෙකු එදා ඉදිරිපත් වුනේ නැහැ. වත්මන් ජනාධිපති රනිල් වික්‍රමසිංහ  මේ තත්ත්වය හමුවේ රට භාරගෙන සැමට ජීවත් විය හැකි ආර්ථිකයක් නිර්මාණය කිරීමට කටයුතු කළා. තරුණයින්ට රැකියා අවස්ථා ඇති කිරීමටත් ඔවුන්ව ශ්‍රී ලංකාවේ ආර්ථිකයට දායක කරගැනීමේ වැඩපිළිවෙළක්  සකස් කිරීමටත්  එතුමා කටයුතු කරමින් සිටිනවා.

රට සංවර්ධනය කිරීමට අවශ්‍ය සෑම ක්ෂේත්‍රයකටම අදාළ දක්ෂතාවයෙන් සහිත තරුණයන් බිහි කර ගැනීමට යොවුන් සේනාංකය හරහා සිදුකළ හැකියි. ඊට අදාල පුහුණු වීම් ලබාදීමට යොවුන් සේනාංකයේ මධ්‍යස්ථාන මඟින් කටයුතු කරමින් තිබෙනවා. වරාය, සංචාරක, පරිගණක  සහ භාෂා ක්ෂේත්‍රවලින් ආර්ථිකය ජය ගැනීම සඳහා

තරුණ පරපුර හැඩගැසීමට කටයුතු කළ යුතුයි. ඒ සඳහා යොවුන් සේනාංකයෙන් මහඟු පිටිවහලක් ලබාගත හැකියි. ඉදිරියේදී ඇතිවිය හැකි දේශගුණ විපර්යාස පිළිබඳව සොයා බැලීමට  එම ක්ෂේත්‍රය සඳහා තරුණයන් යොමු කිරීමටද යොවුන් සේනාංකය හරහා සිදු කළ හැකියි.

සියල්ල වෙනස් වෙමින් අනාගතයට සරිලන කණ්ඩායම් බිහිකිරීමේදී අනාගත අභියෝගය වලට හුරු කිරීමට ශ්‍රී ලංකාවේ ත්‍රිවිධ හමුදාව වෙනසකට ලක් කිරීමට ද බලාපොරොත්තු වෙනවා. ඔවුන්ට අදාළ නවීන තාක්ෂණික හා  භාෂා ඥානය   ලබාදීමට කටයුතු කරනවා. අනාගතයේදී ඇතිවිය හැකි පරිසර තර්ජන පිළිබඳ අවධානයට ලක් කරමින් ඊට විසඳුම් ලබාදීමටද බලාපොරොත්තු වෙනවා. ඉන්දීය සාගර කලාපයේ  භෞමික  අඛණ්ඩතාවය රැකගෙන නැව් ගමනා ගමන මාර්ගයේ ආරක්ෂාව සුරක්ෂිත කිරීමට ශ්‍රී ලංකාව කටයුතු කරනවා.

යොවුන් සේනාංකයේ සභාපති  චතුරංග උඩවත්ත,  යොවුන් සේනාංකයේ හිටපු අධ්‍යක්ෂ මේජර් ජෙනරාල් චන්න ගුණතිලක  යන මහත්වරු ඇතුළු පිරිසක් මෙම අවස්ථාවට එක්ව සිටියහ.

ශ්‍රී ලංකාවට ලබා දෙන විස්තීරණ ණය පහසුකමෙහි 3 වන වාරිකය සඳහා ජාත්‍යන්තර මුල්‍ය අරමුදලේ (IMF) විධායක මණ්ඩලයේ අනුමැතිය හිමිව තිබේ.

ඒ, ශ්‍රී ලංකාව සමග එළෙඹ ඇති මාස 48ක විස්තීරණ අරමුදල් පහසුකමේ දෙවන සමාලෝචනය ජාත්‍යන්තර මූල්‍ය අරමුදලෙහි විධායක මණ්ඩලය විසින් ඊයේ (12) රාත්‍රියේ අවසන් කිරීමත් සමගයි.

නිවේදනයක් නිකුත් කරමින් ජාත්‍යන්තර මූල්‍ය අරමුදල පවසන්නේ, තම වැඩසටහන යටතේ ශ්‍රී ලංකාවේ කාර්යය සාධනය ශක්තිමත් වී ඇති බවය.

2023 දෙසැම්බර් වනවිට සමාජ වියදම් හැර අනෙකුත් ප්‍රමාණාත්මක ඉලක්ක සපුරා ගැනීමට ශ්‍රී ලංකාව සමත්ව ඇති බව ද ඔවුන් පැවසීය.

කෙසේ වෙතත් ජාත්‍යන්තර මුල්‍ය අරමුදල පෙන්වා දෙන්නේ, ණය තිරසරභාවය ඇති කර ගැනීම ප්‍රමාද වීම හේතුවෙන් තවමත් ශ්‍රී ලංකා ආර්ථිකය පවතින්නේ අවදානම් කලාපයේ බවයි.

ආර්ථික නිවැරදි මාවතට ගෙන ඒම සඳහා ණය ප්‍රතිව්‍යුහගත කිරීමේ ක්‍රියාවලිය වේගවත් කිරීමේ අවශ්‍යතාවය ද මෙහිදී ජාත්‍යන්තර මූල්‍ය අරමුද පෙන්වා දී තිබේ.

ජාත්‍යන්තර මූල්‍ය අරමුදලේ දෙවන වාරිකය යටතේ, ශ්‍රී ලංකාවට අමෙරිකානු ඩොලර් මිලියන 336ක් පමණ හිමිවීමට නියමිතයි.

මේ වනවිට ණය මුදලේ වාරික 2ක් ශ්‍රී ලංකාව ලබාගෙන ඇති අතර එහි වටිනාකම ඩොලර් මිලියන 667කි.

2023/2024 අධ්‍යයන වර්ෂයට අදාළව විශ්වවිද්‍යාල ප්‍රවේශය සඳහා ඔන්ලයින් අයදුම්පත් කැඳවීම 2024 ජුනි 14 වැනිදා ආරම්භ කරන බව විශ්වවිද්‍යාල ප්‍රතිපාදන කොමිෂන් සභාව නිවේදනය කරයි.

ඒ අනුව හෙට පෙරවරු 6.00 සිට www.ugc.ac.lk වෙත පිවිස අයදුම්පත් ඉදිරිපත් කිරීමට හැකියාව තිබේ.

අයදුම්පත් කැඳවීමේ අවසාන දිනය 2024 ජුලි 05 වැනිදා බව විශ්වවිද්‍යාල ප්‍රතිපාදන කොමිෂන් සභාවේ සභාපති ජ්‍යේෂ්ඨ මහාචාර්ය සම්පත් අමරතුංග පවසයි.