පුවත්

2024 ජනාධිපතිවරණය මුල් කරගනිමින් ජාතික ජනබලවේගය පක්ෂය සහ සමගි ජනබලවේගය පක්ෂය අතර පැවැත්වීමට නියමිත විවාදයට අදාළ තවත් දින කිහිපයක් සමගි ජනබලවේගය පක්ෂය විසින් නියම කර ඇත.

එම ලිපිය අනුව එම ලිපිය අනුව දෙපාර්ශ්වයේ ආර්ථික කමිටු අතර විවාදය 2024 මැයි මස 27, 28, 29, 30, 31 යන දිනවලින් එකකදීද නායකයින් අතර විවාදය 2024 ජුනි මස 03, 04, 05, 06 හෝ 07 යන දිනවලින් එක් දිනයකදී පැවැත්වීමටත් යෝජනා කර ඇත.

නමුත් ගැටලුව වී තිබෙන්නේ මේකී විවාදය සඳහා ජාතික ජනබලවේගය නියම කළ අවසන් දිනය හෙට (20) වීමය. එම දිනය ප්‍රකාශයට පත්කරමින් ජාතික ජනබලවේගය පක්ෂය දැනුම්දී සිටියේ මැයි 20 ට පෙර ඕනෑම මොහොතක ඕනෑම විවාදයකට තම පාර්ශ්වය සූදානම් බවත් ඉන් අනතුරුව විවාද සම්බන්ධ කතා අවසන් කරන බවය.

මේ අතර දේශපාලන විචාරකයන් පවසන්නේ ජාතික ජනබලවේගය නියම කළ දිනය අවසන් වන මොහොතේ තවත් දින නියම කිරීම සජබ විසින් සිදුකළ අපරිණත දේශපාලන ක්‍රියාවක් බවයි. අවසාන දිනයට පෙර අදාළ දිනය සංශෝධනය කර ගැනීමට අවස්ථාව පැවති බවත් එහිදේ පෙන්වාදෙන විචාරකයන් වැඩිදුරටත් පවසන්නේ දෙපාර්ශ්වයම අදාළ විවාදය සඳහා සත්භාවයෙන් කැපවූ බවක් නොපෙන්නු බවයි. එබැවින් දැන් මෙය හරවත් විවාදයකට වඩා නාඩගමක් බවද ඔවුන් පවසයි.

දිස්ත්‍රික්ක 07ක් සඳහා බලපැවැත්වෙන පරිදි නායයෑමේ අනතුරු ඇඟවීම් නිකුත් කර ඇති බව ජාතික ගොඩනැගිලි පර්යේෂණ සංවිධානය පවසයි.

එහි  ජ්‍යෙෂ්ඨ භූ විද්‍යාඥ වසන්ත සේනාධීර සඳහන් කරන ආකාරයට අද  (19) අලුයම 03.00 සිට හෙට (20) අලුයම 03.00 දක්වා බලපැවැත්වෙන පරිදි එම අනතුරු ඇඟවීම් නිකුත් කර ඇත. 

ඒ අනුව අදියර 02 යටතේ වන අනතුරු ඇගවීමේ නිවේදන බදුල්ල දිස්ත්‍රික්කයේ ඇල්ල ප්‍රාදේශීය ලේකම් කොට්ඨාස වෙත නිකුත් කර තිබේ.

බදුල්ල දිස්ත්‍රික්කයේ තවත් ප්‍රාදේශීය ලේකම් කොට්ඨාස 04ක් සඳහා මෙන්ම මහනුවර, කෑගල්ල, රත්නපුර, කළුතර, කොළඹ සහ ගම්පහ යන දිස්ත්‍රික්කවල ප්‍රාදේශීය ලේකම් කොට්ඨාස 33ක් සඳහා අදියර 1 යටතේ වන එම නායයෑම් අනතුරු ඇඟවීමේ නිවේදනය නිකුත් කළ බව  ගොඩනැගිලි පර්යේෂණ සංවිධානයේ ජ්‍යෙෂ්ඨ භූ විද්‍යාඥ වසන්ත සේනාධීර පැවසීය.

🚨 අනතුරු ඇඟවීමේ මට්ටම 2 - අවදානයෙන් සිටින්න (ඇම්බර්)        

බදුල්ල දිස්ත්‍රික්කය: 
- ඇල්ල
                    
🚨 අනතුරු ඇඟවීමේ මට්ටම 1 - විමසිලිමත් වන්න (කහ)     

බදුල්ල දිස්ත්‍රික්කය: 
- හල්දුම්මුල්ල
- ⁠හපුතලේ
- ⁠හාලි ඇල
- ⁠බදුල්ල

කොළඹ දිස්ත්‍රික්කය: 
- සීතාවක

ගම්පහ දිස්ත්‍රික්කය: 
- අත්තනගල්ල

කළුතර දිස්ත්‍රික්කය: 
- පාලින්දනුවර
- ⁠බුලත්සිංහල
- ⁠අගලවත්ත
- ⁠මතුගම
- ⁠වලල්ලාවිට

මහනුවර දිස්ත්‍රික්කය: 
- ගඟවට කෝරළය
- ⁠උඩුදුම්බර
- යටිනුවර
- උඩපළාත
- ⁠උඩුනුවර
- ⁠ගඟ ඉහළ කෝරළය
- ⁠පස්බාගේ කෝරළය

කෑගල්ල දිස්ත්‍රික්කය: 
- යටියන්තොට
- මාවනැල්ල
- ⁠දෙහිඹ්විට
- ⁠බුලත්කොහුපිටිය
- ⁠ගලිගමුව
- ⁠වරකාපොල
- ⁠කෑගල්ල
- ⁠දැරණියගල
- ⁠රුවන්වැල්ල

රත්නපුර දිස්ත්‍රික්කය: 
- ⁠බලංගොඩ
- ⁠රත්නපුර
- ⁠ඉඹුල්පේ
- ⁠කලවාන
- ⁠කිරිඇල්ල
- ⁠කුරුවිට
- ⁠ඇහැළියගොඩ
- ⁠අයගම
- ⁠ඇලපාත

ආර්ථික ගැටළුකාරී තත්ත්වය හේතුවෙන් තාවකාලිකව අත්හිටුවන ලද “සුරක්ෂා” සිසු රක්ෂණාවරණය යළි ආරම්භ කිරීමට ජනාධිපති රනිල් වික්‍රමසිංහ උපදෙස් දී තිබේ.

ඒ අනුව දිවයින පුරා සියලුම පාසල් සිසුන්ට මෙම රක්ෂණාවරණය යටතේ ප්‍රතිලාභ ලබා ගැනීමේ හැකියාව ජුනි මස මුල් සතියේ සිට උදා වේ.

මීට අදාළව මුදල්, ආර්ථික ස්ථායීකරණ හා ජාතික ප්‍රතිපත්ති අමාත්‍යවරයා ලෙස ජනාධිපති රනිල් වික්‍රමසිංහ  සහ අධ්‍යාපන අමාත්‍ය ආචාර්ය සුසිල් ප්‍රේමජයන්ත විසින් ඉදිරිපත් කරන ලද ඒකාබද්ධ අමාත්‍ය මණ්ඩල සංදේශය සඳහා පසුගියදා අමාත්‍ය මණ්ඩලයේ අනුමැතිය හිමි විය.

“සුරක්ෂා” සිසු රක්ෂණාවරණය, සෞඛ්‍ය ගැටළු හේතුවෙන් අධ්‍යාපනය ලබා ගැනීමට නොහැකි සිසුන්ට අඛණ්ඩ අධ්‍යාපනයක් ලබාදීම සහ ඔවුන්ගේ සුරක්ෂිතභාවය තහවුරු කරමින් පාසල් සිසුන් දෛනිකව පාසල් පැමිණීම වර්ධනය කිරීමේ අරමුණ ඇතිව 2017 වර්ෂයේ එවක අග්‍රාමාත්‍යවරයා වශයෙන් වත්මන් ජනාධිපති රනිල් වික්‍රමසිංහ ගේ සංකල්පයක් මත ක්‍රියාත්මක කරන ලද වැඩසටහනකි.

මෙම වැඩසටහන 2022.12.01 දින දක්වා අඛණ්ඩව ක්‍රියාත්මක වූ අතර පැවති ආර්ථික අර්බුදය හේතුවෙන් ඉන් පසු කාල සීමාවේදී මේ සඳහා අවශ්‍ය අරමුදල් සපයා ගැනීමේ දුෂ්කරතා මත තාවකාලිකව අත්හිටුවීමට සිදුවිය.

කෙසේ නමුත් මේ වන විට රට තුළ ඇති වී තිබෙන ආර්ථික ප්‍රකෘතිමත්භාවයත් සමඟ”සුරක්ෂා” සිසු රක්ෂණාවරණය යළි ක්‍රියාත්මක කිරීම සඳහා ජනාධිපති රනිල් වික්‍රමසිංහ මහතා විසින් 2024 වර්ෂයේ අයවැය යෝජනා මගින් රුපියල් මිලියන 2000ක මුදලක් වෙන් කරන ලදී. 2048 වන විට දියුණු ශ්‍රී ලංකාවක් ගොඩනැගීම වෙනුවෙන් අවශ්‍ය මානව සම්පත නිර්මාණය කිරීමේ වැඩපිළිවෙළ ශක්තිමත් කිරීම එහි අරමුණයි.

ඒ අනුව ලක්ෂ 45කට ආසන්න මෙරට රජයේ පාසල්, රජයේ අනුමත පෞද්ගලික පාසල් හා පිරිවෙන්හි ඉගෙනුම ලබන 1 ශ්‍රේණියේ සිට 13 වන ශ්‍රේණිය දක්වා ශ්‍රේණිවල වයස අවුරුදු 5ත් 21ත් අතර සිසුන් සහ උපකෘත විශේෂ පාසල්වල ඉගෙනුම ලබන අවුරුදු 4ත් 21ත් අතර වයස සීමාවේ පසුවන සිසුන් සඳහා සෞඛ්‍ය රක්ෂණාවරණය සහ අනතුරු රක්ෂණාවරණය යටතේ වූ සියලු ප්‍රතිලාභ ලබාදීමට යෝජනා වී තිබේ.

එසේම අඩු ආදායම්ලාභී එනම් වාර්ෂික ආදායම රු. 180,000/= කට වඩා අඩු පවුල්වල සිසුන් සඳහා ජීවිත රක්ෂණ ආවරණය යටතේ වූ දෙමාපිය මරණ සඳහා ද ප්‍රතිලාභ ලබා දීමට යෝජනා කර ඇත.

මෙම වැඩසටහන යටතේ සියලුම සිසුන්ට ලබා දීමට අපේක්ෂිත ප්‍රතිලාභ මෙසේය.

1. සෞඛ්‍ය රක්ෂණාවරණය.

නේවාසික ප්‍රතිකාර ප්‍රතිලාභ – රු. 300,000/= දක්වා (රජයේ/පෞද්ගලික රෝහල්වල).
මෙහිදී දරුවා ප්‍රතිකාර ලබා ගැනිම සඳහා රජයේ රෝහලක නතර වී ගතකරනු ලබන එක් රාත්‍රියක් සඳහා රු.2500/= බැගින් ද (රජයේ රෝහලකට ඇතුළත් වූවද මෙහිදී එක් රාත්‍රියක් සඳහා රු.2500/=ක මුදලක් ලබාදීම සිදු කරනුයේ දරුවෙකු අසනීප වූ විට සාමන්‍ය පවුලක දෙමාපියන්ට රැකියාවේ නිරතවීම සම්බන්ධයෙන් මතුවන අපහසුතා හේතුවෙනි.) පෞද්ගලික රෝහලක නතර වී ගතකරනු ලබන එක් රාත්‍රියක් සඳහා රු7500/= බැගින් ද ප්‍රතිලාභ හිමි වේ.

බාහිර ප්‍රතිකාර ප්‍රතිලාභ – රු. 20,000/= දක්වා.
මෙම කාණ්ඩය යටතේ පෙර පැවති අක්ෂි දෝෂ සඳහා ඇස් කණ්නාඩි සඳහා ප්‍රතිලාභ ගෙවීමට අමතරව ශ්‍රවණාබාධ සඳහා ශ්‍රවණාධාර උපකරණ සඳහා ද ප්‍රතිලාභ ගෙවීම ඇතුළත් කර ඇත. එමෙන්ම දරුවන්ගේ අසනීප තත්ත්වයකදී බාහිර රෝහල් මඟින් සිදු කරනු ලබන රසායනාගාර පරීක්ෂණ ගාස්තු ද මෙම කාණ්ඩයේ ප්‍රතිලාභ යටතේ ආවරණය වේ.

බරපතල රෝගාබාධ සඳහා ප්‍රතිලාභ – රු. 200,000/= සිට රු. 1,500,000/= දක්වා.

      2. අනතුරු රක්ෂණාවරණය
පූර්ණ සදාකාලික අකර්මණ්‍යතා සඳහා – රු.200,000/=.

සදාකාලික අර්ධ අකර්මණ්‍යතා සඳහා – රු. 150,000/= සිට රු. 200,000/= දක්වා.

තාවකාලික අකර්මණ්‍යතා සඳහා – රු.25,000/= සිට රු.100,000/= දක්වා.

     3. ජීවිත රක්ෂණාවරණය.
දෙමාපියන්ගේ මරණයකදී.

අඩු ආදායම්ලාභී පවුල්වල සිසුන්ගේ දෙමව්පියන්ගෙන් එක් අයෙකු වෙනුවෙන් එක් සිසුවෙකු සඳහා රු.75,000/= ක් දෙමාපියන් දෙදෙනාම ආවරණය වන පරිදි ප්‍රතිලාභ හිමිවේ.

පවුලේ සියලු පාසල් යන ළමුන්ට ප්‍රතිලාභ හිමිවන නමුත් එක් සිද්ධියක් වෙනුවෙන් වෙන් කරනු ලබන උපරිම මුදල රු.225,000/= කි. (රු.75,000/= බැගින් උපරිම දරුවන් 3 දෙනෙකු සඳහා)

මෙම රක්ෂණාවරණ වැඩසටහන ක්‍රියාත්මක කිරීම සම්බන්ධයෙන් අධ්‍යාපන අමාත්‍යංශය ශ්‍රී ලංකා රක්ෂණ සංස්ථාව සමඟ ගිවිසුම් ගත වීමට නියමිත අතර පාසල් සිසුන් සඳහා වූ මෙම සියලුම ප්‍රතිලාභ සතියක් ඇතුළත ශ්‍රී ලංකා රක්ෂණ සංස්ථාව විසින් සලසා ඇති මාර්ගගත ක්‍රමවේදය ඔස්සේ කඩිනමින් ලබා ගැනීම සඳහා විශේෂ ක්‍රමවේදයක් ද සකස් කිරීමට නියමිතය.

ඒ අනුව “සුරක්ෂා” රක්ෂණාවරණය යටතේ දරුවන්ට හිමිවන ප්‍රතිලාභ මුදල් එම දරුවන්ගේ දෙමාපියන්ගේ අදාළ බැංකු ගිණුම් වෙත බැර කිරීමට ශ්‍රී ලංකා රක්ෂණ සංස්ථාව කටයුතු කරනු ඇත.

මෙම වැඩසටහන සාර්ථක කර ගැනීම සඳහා ජනාධිපති ලේකම් කාර්යාලයේ රාජ්‍ය ආදායම් ඒකකයේ පූර්ණ අධීක්ෂණය යටතේ පාසල්වල විදුහල්පතිවරුන්, ග්‍රාම නිලධාරීවරුන් ඇතුළු රාජ්‍ය නිලධාරීන් අතර විශේෂ සම්බන්ධීකරණ යාන්ත්‍රණයක් ද සකස් කිරීමට නියමිත අතර ඊට අදාළ චක්‍ර ලේඛය ද ඉදිරියේ දී නිකුත් කිරීමට නියමිතය.

මෙම වැඩසටහන අධ්‍යාපන අමාත්‍යාංශය හා ශ්‍රී ලංකා රක්ෂණ සංස්ථාව ඒකාබද්ධව ජනාධිපති ලේකම් කාර්යාලයේ රාජ්‍ය ආදායම් ඒකකයේ සම්බන්ධීකරණයෙන් ක්‍රියාත්මක වේ.

ඉන්දුනීසියාවේ නිල සංචාරයක නිරත ජනාධිපති රනිල් වික්‍රමසිංහ  සහ ඉන්දුනීසියානු ජනරජයේ සමුද්‍රීය කටයුතු සහ ආයෝජන පිළිබඳ සම්බන්ධීකරණ අමාත්‍ය ලුහුත් බින්සාර් පන්ඩ්ජායිටන් (Luhut Binsar Pandjaitan)  අතර හමුවක් අද (19) කුරා කුරා බාලි දූපතේ (Kura Kura Bali island) පිහිටි “United In Diversity” හි බාලි මණ්ඩපයේදී පැවැත්විණි.

ගෝලීය මිශ්‍ර මූල්‍ය සන්ධානය (Global Blended Finance Alliance), ශ්‍රී ලංකාවේ නිවර්තන කලාපීය මුලපිරීම (Tropical Belt Initiative), නීල ආර්ථිකය (Blue Economy) මෙන්ම මුහුදු පැලෑටි කර්මාන්තය පිළිබඳව මෙහිදී දීර්ඝ ලෙස සාකච්ඡාවට ලක් කෙරිණි.

එමෙන්ම ගෝලීය දකුණේ රටවල් අතර සහයෝගීතාව වර්ධනය කර ගැනීමේ අවශ්‍යතාව ද මෙහිදී අවධාරණය කෙරුණු අතර කඩොලාන වගා කිරීම පිළිබඳ පර්යේෂණ කටයුතු වෙනුවෙන් සහයෝගීතා වැඩපිළිවෙළක් ඇති කර ගැනීම පිළිබඳව සොයා බැලීම කෙරෙහි ද අවධානය යොමු විය.

මෙම කටයුතු සම්බන්ධීකරණය වෙනුවෙන් ද්විපාර්ශ්වික කාර්ය සාධක බලකායක් පිහිටුවීම සහ ඉන්දියානු සාගර කලාපීය වටද්දර රටවල සංගමයේ (IORA) වත්මන් සභාපතිවරයා ලෙස ඒ සඳහා ශ්‍රී ලංකාවේ භූමිකාව පිළිබඳ ද සාකච්ඡා විය.

ශ්‍රී ලංකාව නියෝජනය කරමින් ජලසම්පාදන හා වතු යටිතල පහසුකම් අමාත්‍ය ජීවන් තොණ්ඩමන්, දේශගුණික විපර්යාස පිළිබඳ ජනාධිපති ජ්‍යෙෂ්ඨ උපදේශක රුවන් විජේවර්ධන, විදේශ කටයුතු අමාත්‍යාංශයේ ලේකම් අරුණි විජේවර්ධන, ඉන්දුනීසියාවේ ශ්‍රී ලංකා තානාපති අද්මිරාල් මහාචාර්ය ජයනාත් කොළඹගේ, දේශගුණික විපර්යාස පිළිබඳ කාර්යාලයේ ප්‍රධාන විධායක නිලධාරී, ජ්‍යෙෂ්ඨ අතිරේක ලේකම් වෛද්‍ය අනිල් ජාසිංහ යන මහත්ම මහත්මින් මීට එක්ව සිටී අතර, ඉන්දුනීසියානු රජය නියෝජනය කරමින් එරට සමුද්‍රීය කටයුතු සහ ආයෝජන පිළිබඳ සම්බන්ධීකරණ අමාත්‍යාංශයේ ලේකම් අයෝධායි ජී. එල්. කලාකේ (Ayodhia G.L Kalake), වන හා පරිසර කළමනාකරණය පිළිබඳ නියෝජ්‍ය සම්බන්ධීකරණ අමාත්‍ය නානි හෙන්ඩියාර්ට් (Nani Hendiarti), යටිතල පහසුකම් සහ ප්‍රවාහනය පිළිබඳ නියෝජ්‍ය සම්බන්ධීකරණ අමාත්‍ය රහ්මත් කයිමුද්දීන් (Rahmat Kaimuddin), සමුද්‍රීය සම්පත් පිළිබඳ නියෝජ්‍ය සම්බන්ධීකරණ අමාත්‍ය ෆිර්මාන් හිදායත් (Firman Hidayat), දේශගුණික විපර්යාස පිළිබඳ විශේෂ උපදේශක චෙරී නුර් සලිම් (Cherie Nur Salim) යන මහත්ම මහත්මීන් එක්ව සිටියහ.

ෆෝබ්ස් සඟරාව නවවැනි වරටත් පසුගියදා ප්‍රකාශයට පත් කළ "30 අන්ඩර් 30 ඒෂියා" ලැයිස්තුවට  ශ්‍රී ලාංකික රංගන ශිල්පිනියක සහ චිත්‍රපට නිෂ්පාදිකාවක වන ඩිනාරා පුංචිහේවා මහත්මිය ඇතුළත්වීමට සමත්ව ඇත.

ආසියා පැසිෆික් කාලාපයේ වෙනසක් ඇතිකළ ව්‍යවසායකයන්, නායකයන් සහ විවිධ ක්ෂේත්‍රවල පුරෝගාමීන් 300 දෙනෙකු මෙම ලැයිස්තුවට ඇතුලත් වී ඇති අතර ඒ සියලු දෙනාම වයස අවුරුදු 30 ට අඩුවීම විශේෂත්වයකි. ආසියා පැසිෆික් කාලාපයේ අවධානය යොමුකළ යුතු පුද්ගලයන් "30 අන්ඩර් 30 ඒෂියා"ලැයිස්තුව මගින් ෆෝබ්ස් සඟරාව ප්‍රකාශයට පත් කරනු ලබයි.

කාණ්ඩ 10ක් යටතේ මෙම ලැයිස්තුවට පුද්ගලයන් තෝරාගෙන ඇති අතර රසවින්දන සහ ක්‍රීඩා අංශයෙන් ඩිනාරා පුංචිහේවා මහත්මිය මෙම ලැයිස්තුවට ඇතුලත් වූවාය. ඩිනාරා පුංචිහේවා මහත්මිය 2018 වසරේදී ඇයගේම චිත්‍රපටයක් වන මාලා ඔස්සේ චිත්‍රපට ක්ෂේත්‍රයට පැමිණියාය.මාලා චිත්‍රපටය ජාත්‍යන්තර සිනමා උළෙලකදී ප්‍රදර්ශනයවීමත් සමඟ චිත්‍රපට නිෂ්පාදක ප්‍රසන්න විතාන මහතාගේ අවධානය එම චිත්‍රපටය සඳහා යොමු වී ඇති අතර එහි දැක්වු කුසලතාවය හේතුවෙන් ගාඩි චිත්‍රපටයට රංගන දායකත්වය ලබා දීමට ඩිනාරා මහත්මියට ප්‍රසන්න විතානගේ ආරාධනා කර තිබිණි.

ඩිනාරා මහත්මිය ලන්ඩනයේ ක්වීන් මේරි විශ්ව විද්‍යාලයේ උපාධිධාරිණියක් වන අතර ඇය අඩු ආදායම්ලාභී පවුල්වල ළමුන් නාට්‍ය හා රංගනයට අවතීර්ණ වීමට අවස්ථාව ලබා දෙන  Punchi Actors නම් ලාභ නොලබන ආයතනයේ නිර්මාතෘවරියද වූවාය.

ඔන්න සජබේ ඇතුලෙ ලොකු අර්බුදයක් ඇතිවෙලා.

ජනාධිපති වික්‍රමසිංහ සජබේ කුට්ටියක් කඩාගන්න යනවා කියන කතාවත් එක්ක , සජිත්ගේ හිතවත්තු ඔය යනවයි කියන හැමොන්ම දිහා බලන්නේ සැකෙන් ලු..

මෙතනදී වැඩිම සැකය යොමුවෙලා තියන්නේ හර්ෂ, කබීර්, තලතා ල වගේ සජබේ ඉන්න කීපදෙනෙක් ගැන. ගම්පහ පැත්තේ දෙතුන් දෙනෙක් ගැනත් ලකීලා, ඇහැගහගෙන ලු ඉන්නවයි කියන්නේ.

මෙතනදී වැඩිම අවධානය යොමුවෙලා තියන්නේ ආචාර්ය හර්ෂ ද සිල්වා මන්ත්‍රීතුමා ගැන.

GL ලා - නාලක ලා සජබෙට එද්දී හර්ෂ ලොකු බාල්දියක් පෙරලුව.. ඒ GL ට නෙමෙයි, තවත් ආරථික විශේෂඥයකු  වෙච්ච මහාචාර්ය නාලක ගොඩහේවා ට.. සජිත්ගේ ආණ්ඩුවක මුදල් ඇමතිකම ගොඩහේවා ට දෙන්න යනවා කියන කතාවට හර්ෂ හිටියේ මල පැනල ලු..

ඒ අවුලේදී  '' චන්දෙන් පස්සේ බලාගන්නම් කියලා .. සජිත් , ගොඩහේවා ව බැලන්ස් කරගෙන තිබුනා.

ඔන්න දැන් හර්ෂ - සජබ මහ ලේකම් රන්ජිත් මද්දුම බණ්ඩාරත් එක්ක පැටලිලා.

''ලැජ්ජ නැද්ද අයිසෙ.. පුළුවන් එකෙක් ඉන්නවනං නවත්තන්න..'' - මාධ්‍ය හමුවකදී හර්ෂගෙන් ඒ විදියට බර අවි ප්‍රහාරයක් එල්ලවුණේ කාටද කියලා හුඟදෙනෙකුට  කුතුහලයක්..

ඒත් සජිත්ට හිතවත් සමහර සමාජ මාධ්‍යවලින් කියලා, තියන විදියට ඒ බර අවි ප්‍රහාරය , ආණ්ඩුවේ කෙනෙකුට නෙමෙයි සජබේ මහා ලේකම් රන්ජිත් මද්දුම බණ්ඩාරට

සමගි ජන බලවේග මහලේකම් පාර්ලිමේන්තු මන්ත්‍රී රංජිත් මද්දුම බණ්ඩාර  විසින් කරන ලද ප්‍රකාශයක් සම්බන්ධයෙන් එම පක්ෂයේ පාර්ලිමේන්තු මන්ත්‍රී හර්ෂ ද සිල්වා මහතා දැඩි ප්‍රතිචාර දක්වා තියනවා කියලයි සමහර මධ්‍ය වාර්තාකර තියන්නේ..

ඒ කියන විදියට හර්ෂ ඔය විදියට පරලවෙලා තියෙන්නේ , පාර්ලිමේන්තු මන්ත්‍රීවරුන්ට වෙන්වන විමධ්‍යගත අරමුදල් සම්බන්ධයෙන් රංජිත් මද්දුම්බණ්ඩාර, හිරු රූපවාහිනිය කළ ප්‍රකාශයකට.. කොහොම නමුත් තමන් ජනාධිපතිවරයා සමග ඩීල් එකක් දමා ඇති බවට ඇතැමුන් ගෙන යන ප්‍රචාරවලට පිළිතුරු ලබා දීමට පසුගියදා හර්ෂ ද සිල්වා පියවර අරගෙන..

හර්ෂ ඒ ගැන කියන්නේ වෙනම කතාවක්..

තමන් ඉදිරිපත් කළ ව්‍යාපෘතිවලට විමධ්‍යගත අරමුදල් ලැබුණා විනා තමන්ට මුදල් නොලැබුණු බවක් තමයි හර්ෂ කියන්නේ..

එසේම මන්ත්‍රීවරුන් තෝරාගෙන විමධ්‍යගත අරමුදල් ලබා දීම වැරදි ක්‍රියාවක් බවත් ආචාර්ය හර්ෂ ද සිල්වා කියනවා.  

දශක ගණනාවක් පුරාවට අතුරුදන් කිරීමට ලක්වූ දහස් ගණනකගේ ඉරණම පිළිබඳව සහ ඔවුන් සිටින ස්ථාන හෙළි කිරීමටත් එම අපරාධවලට වගකිව යුත්තන්ට දඬුවම් පැනවීමටත් ශ්‍රී ලංකා රජය අර්ථාන්විත පියවර අනුගමනය කළ යුතු බවට එක්සත් ජාතීන්ගේ මානව හිමිකම් කොමිසම ඊයේ (17) වාර්තාවක් නිකුත් කරමින් අවධාරණය කර ඇත.

ලංකාව අදාළ  අපරාධ සඳහා රාජ්‍ය ආරක්ෂක අංශවල සහ අනුබද්ධ සන්නද්ධ කණ්ඩායම්වල මැදිහත්වීම පිළිගෙන ප්‍රසිද්ධියේ සමාව අයැද සිටිය යුතු බවද එහි සඳහන් බවත් වාර්තාවෙයි.

අතුරුදන් කිරීම්වලට ලක්වූ සියලුම ශ්‍රී ලාංකිකයින් කිසිදා අමතක නොකළ යුතු බවට මෙම වාර්තා මගින් යළිත් සිහිකැඳවන බව එක්සත් ජාතීන්ගේ මානව හිමිකම් පිළිබඳ මහකොමසාරිස් වෝල්කර් ටර්ක් පවසයි.

බොහෝ කාලයක සිටි අතුරුදන් කිරීම්වලට ලක්වූවන් පිළිබඳව තොරතුරු දැනගැනීමට බලා සිටින ඥාතීන්ට සත්‍ය දැනගැනීමේ අයිතියක් පවතින බවත් අතුරුදන් කිරීම්වලට ලක් වූවන්ට රජය ණයගැති බවත් වෝල්කර් ටර්ක්  එම වාර්තාව හරහා දන්වා තිබේ.

මෙවැනි අපරාධ ඒවාට මුහුණ දුන් පිරිසට පමණක් නොව සමාජයක් ලෙස සමස්ත ශ්‍රී ලාංකීය ප්‍රජාවටම කම්පනය දනවන සුළු බව වාර්තාවේ දැක්වෙයි.

අතුරුදන් කිරීම්වලින් සියලුම පුද්ගලයින් ආරක්ෂා කිරීම සඳහා වූ ජාත්‍යන්තර සම්මුතිය අනුමත කිරීම වැනි ධනාත්මක පියවර අනුගමනය කර තිබුණත් ඒක පුද්ගල අතුරුදන්වීම් පිළිබඳව විමර්ශන කිරීම් සීමිත බව එක්සත් ජාතීන්ගේ මානව හිමිකම් කොමිසමේ වාර්තාවේ අවධාරණය කර ඇත.

අතුරුදන් කිරීම්වලට ලක්වූවන් පිළිබඳව සෑම තොරතුරක්ම අනාවරණය වන තෙක් විමර්ශන සිදුකිරීමට රජය බැඳී සිටින බවට වන ජාත්‍යන්තර නීතිය දිගින් දිගටම උල්ලංඝනය වෙමින් පවතින බව එක්සත් ජාතීන්ගේ මානව හිමිකම් කොමිසමේ මතය බව සඳහන් ය.

සිවිල් යුද්ධය අවසන් වී වසර 15ක් ගතවී තිබුණත්, අතුරුදන් කිරීමේ පළමු රැල්ල ආරම්භ වී දශක ගණනාවක් ගතවී තිබුණත්, එම ප්‍රචණ්ඩ ක්‍රියාවලට වගවීම තහවුරු කිරීමට ශ්‍රී ලංකා බලධාරීන් අපොහොසත් වී ඇති බව වාර්තාවේ දැක්වෙයි.

ඒ අනුව එක්සත් ජාතීන්ගේ මානව හිමිකම් පිළිබඳ කොමිසම අවධාරණය කරන්නේ දශක ගණනාවක් පුරා සිදුවූ අතුරුදන් කිරීම් සම්බන්ධයෙන් ශ්‍රී ලංකාව වගවීම සහතික කළ යුතු බවය.

මැයි  19 වන ඉරිදා දින සවස පාර්ලිමේන්තු ක්‍රීඩාංගණයේ දී පැවැත්වීමට නියමිත රණවිරු දින සැමරුම් උත්සවය වෙනුවෙන් විශේෂ  රථවාහන සැලැස්මක් ක්‍රියාත්මක බව පොලිසිය පවසයි.

 ඒ අනුව එදින සවස 3 සිට පොල්දූව හංදිය සහ කියැන්හෑම් හංදියෙන් පාර්ලිමේන්තු මාර්ගයට ඇතුළු වීමේ මංතීරුව සහ පිටවීමේ මංතීරුව වසා  තැබීමට ක්‍රියාකරනු ඇත.

ඉහත මාර්ග භාවිත කරන රියදුරන්ට පහත විකල්ප මාර්ගයන් භාවිත කරන ලෙස පොලීසිය දැනුම් දෙයි.

වැලිවේරිය නගරයේදී රතුපස්වල ප්‍රදේශයේ ජනතාව පැවැත්වූ විරෝධතාවක් අතරතුර වෙඩි වැදීමෙන් පුද්ගලයින් තිදෙනෙකු ජීවිතක්ෂයට පත්වීමේ සිද්ධියට අදාළ නඩුවෙන් හිටපු හමුදා මේජර්වරයෙකු ඇතුළු සැකකරුවන් සිව්දෙනෙකු නිදොස්කොට නිදහස් කිරීමට ගම්පහ මහාධිකරණය අද (17) නියෝග කළේය.

ගම්පහ, රතුපස්වල ප්‍රදේශයේ ක්‍රියාත්මක වූ පෞද්ගලික කර්මාන්ත ශාලාවකින් පිටවන අපද්‍රව්‍ය මගින් සිය පානීය ජලය අපවිත්‍ර වී ඇති බව පවසමින් පිරිසිදු පානීය ජලය ඉල්ලා එම ප්‍රදේශයේ ජනතාව වැලිවේරිය ප්‍රදේශයේදී විරෝධතාවයක් පැවැත්වූයේ 2013 වසරේ අගෝස්තු 01 වනදාය.

එහිදී විරෝධතාකරුවන් විසුරුවා හැරීමට හමුදා නිලධාරින් වෙඩි තැබීම් සිදුකර තිබූ අතර වෙඩි වැදීමෙන් පාසල් සිසුන් දෙදෙනෙකු සහ තවත් පුද්ගලයෙකු ජීවිතක්ෂයට පත්වී පුද්ගලයින් 50කට වැඩි පිරිසක් තුවාල ලබා තිබුණි.

අනතුරුව අදාළ සිදුවීම සම්බන්ධයෙන් එවකට යුද්ධ හමුදා බ්‍රිගේඩියර්වරයෙකු ඇතුළු හමුදා සාමාජිකයන් සිව්දෙනෙකුට එරෙහිව නීතිපතිවරයා ගම්පහ මහාධිකරණය හමුවේ අධිචෝදනා 94ක් යටතේ නඩු පවරනු ලැබීය.

මේ මොහොතේ පක්ෂයට වඩා රට වැදගත් බවත් ජනාධිපති රනිල් වික්‍රමසිංහට නැවත අවස්ථාවක් දිය යුතුමයැයි තමන් යෝජනා කරන්නේ ඒ නිසා බවත් නාගරික සංවර්ධන හා නිවාස අමාත්‍ය ප්‍රසන්න රණතුංග අවධාරණය කරයි.

ඔහු පෙන්වා දෙන්නේ ජනාධිපතිවරණයට පෙර පාර්ලිමේන්තු මැතිවරණය පැවැත්වීම මේ මොහොතේ නුසුදුසු බවයි.

රට මුහුණ දී තිබෙන ආර්ථික අර්බුදයෙන් ගොඩ ඒමට නම් ස්ථාවර ආණ්ඩුවක් තිබිය යුතු බවත් පවතින තත්වය තුළ පාර්ලිමේන්තු මැතිවරණයකින් මේ මොහොතේ ස්ථාවර ආණ්ඩුවක් බිහි නොවන බවත් ඇමතිවරයා පෙන්වා දෙයි. එහෙත් ජනාධිපතිවරණයෙන් පසුව මහමැතිවරණය පැවැත්වීමෙන් යලිත් ස්ථාවර ආණ්ඩුවක් රටට බිහිකර ගත හැකිවනු බව ඇමතිවරයාගේ අදහසයි.

නාගරික සංවර්ධන හා නිවාස අමාත්‍ය ප්‍රසන්න රණතුංග මේ බව කියා සිටියේ පක්ෂය සවි බල ගැන්වීම සහ ඉදිරි දේශපාලන කටයුතු පිළිබඳව මීරිගම ආසනයේ මන්ත්‍රීවරුන් දැනුවත් කිරීමේ වැඩසටහනකට සහභාගී වෙමිණි.

තමන් රනිල්ගේ ගොට්ටෙක් නොවන බව මෙහි දී අවධාරණය කළ ඇමති ප්‍රසන්න රණතුංග මහතා තමන් කිසිසේත් එක්සත් ජාතික පක්ෂයට නොයන බවත් ගම්පහ දිස්ත්‍රික්කයේ ජනතාවට අසාධාරණයක් නොකරන බවත් සහතික වූයේය.

මෙහිදී වැඩිදුරටත් අදහස් දැක්වූ ඇමති ප්‍රසන්න රණතුංග මෙසේද පැවසීය.

“මැතිවරණයක් එනකොට එක එක කාලෙට එක එක මතවාද හැදෙනවා. එක කාලෙක “ඩඩ්ලිගේ බඩේ මසල වඩේ” කියලා හැදුවා. දැන් අලුත්ම මත වාදය තමයි “75 වසරක සාපය”. ජනතා විමුක්ති පෙරමුණ හදන කතාවක් තමයි මේ අවුරුදු 75ම කෑවා මුන්ට එක පාරක් හරි දිලා බලන්න කියලා මතයක් හදනවා. මේ වෙලාවේදී මේ රටේ බහුතරයක් ලක්ෂ 05 ලක්ෂ 45ක් කරන්න හදනවා. එහෙම කරන්න සියයට 400කින් වැඩි වෙන්න වෙනවා. ඒ අය දන්නවා ඒකට යන්න අමාරුයි ඒ නිසා එක එක කණ්ඩායම් ඉලක්ක කරගෙන මතවාද හදනවා. අවුරුදු 75ක සාපය ගැන කියන කොට අපේ පාක්ෂිකයන්ට මේවාට උත්තර දුන්නේ නැත්තම් ඔලුව වන වන අහගෙන ඉන්නවා මිසක් ප්‍රතිවිරුද්ධ මතවාද ඇති කරන්නේ නෑ. අපි ඒකට වැඩ පිළිවෙලක් හදන්න ඕනේ.

දේශපාලනය කරනකොට සෙනඟ පෙන්නලා රැලි ඇති කරන එක ක්‍රමයක් වෙනවා. ඒ රැල්ල වැල්ලට ගහපුවම නැතිවෙලා යනවා. ඒක තාවකාලිකයි. ගම් මට්ටමින් හොඳ සංවිධාන ශක්තියක් ඇති කර ගත්තොත් අපිට දේශපාලනය කරලා අවශ්‍යතාවය අනුව තීන්දු තීරණ ගැනීමේ හැකියාව තියෙනවා. මැයි 09 වැනිදා මගේ ගේ ගිනි තිබ්බා. 77දී මගේ පියාගේ ගේ ගිනි තිබ්බා. අපි බයවෙලා හිටියොත් අපිට අපේ පාක්ෂිකයෝ රැක ගන්න බැරි වෙනවා. අපිත් එක්ක වැඩ කරන මිනිස්සුන්ව අපිට අතාරින්න බෑ. 2022 මැයි 09 වැනිදා සිද්ධියත් එක්ක අපේ මිනිස්සු දැන් බයවෙල ඉන්නවා. මොකද මිනිස්සු මැරුවා, ගෙවල් ගිනි තිබ්බා. අපි කතා කරන්නේ අමරකීර්ති ගැන විතරයි. නමුත් ලංකාව පුරාම මිනිස්සු 20කට වැඩි ප්‍රමාණයක් මැරුවා. අපිව ගම්වලින් එළෙව්වා. අපි ගමට ආවේ නෑ මාස දෙක තුනක් යනකන්. උන්ගේ අරමුණ ඉෂ්ඨ වුණා. අපි කණ්ඩායමක් ලෙස මේකට මුහුණ දෙනවා කියලා තීන්දුවක් ගත්තා. අපේ මතවාද පහළ මට්ටමට යන්න ඕනේ. ඒකයි අපි අපේ සංවිධාන ශක්තිය වැඩි කරන්න කටයුතු කරමින් යන්නේ.

අවුරුදු 75ක සාපය ගැන කතා කරනකොට ඇත්තටම මේ රටේ වැඩක් වෙලා නැද්ද? නිදහස ලබද්දි අපේ රටේ මිනිස්සුන්ගේ ආයු කාලය අවුරුදු 42යි. දැන් මේ වනවිට ආයු කාලය අවුරුදු 77-80 අතර කාලයට ගිහින් තියෙනවා. මාතෘ මරණ අඩු වෙලා. රෝහල් දියුණු වෙලා තියෙනවා. සෑම කිලෝමීටර් 05කටම ප්‍රාථමික වෛද්‍ය ඒකකයක් තියෙනවා. දැන් දිස්ත්‍රික් රෝහල්, මූලික රෝහල් ආරම්භ කර නිදහස් සෞඛ්‍ය මේ රටේ ඉහල මට්ටමකට ගෙනවිත් තියෙනවා. යටත් විජිතයක් වෙලා රෝහල් වල ඇදන් 18යි. අවුරුදු 75ක කාල සීමාව තුළ දැන් ඇදවල් 90,000යි.

අවුරුදු 75ක සාපය ගැන කතා කරන අය ඒ අවුරුදු 75ක කාල සීමාව තුළ කිසිදු දේශපාලන පක්ෂයකට දායකත්වය දීලා නැද්ද? මට මතකයි එදා ජේ ආර් ජයවර්ධනව බලයට ගේන්න ජනතා විමුක්ති පෙරමුණ උදව් කළා. එදා සිරිසේන කුරේ එක්ක සම්බන්ධ වෙලා ජේ ආර්ව මරන්න හදලා ප්‍රේමදාසව බලයට ගෙනාවෙත් ජවිපෙමයි. විහාරමහා දේවි ලෙස චන්ද්‍රිකාව ගේන්නත් වේදිකාවල්වල කතා කරෙත් ජනතා විමුක්ති පෙරමුණයි. මහින්ද මහත්තයාව ගෙනාවේ අපි කියලා ඔවුන් කියනවා. ඊට පස්සේ සරත් ෆෙන්සේකා එක්ක එකතු වුණා. මෛත්‍රීපාල දිනවන්නත් එකතු වුණා. ඔවුන් ඇමතිකම් අරගෙන කටයුතු කළා. ඔවුන් කතා කරන්නේ මේ අවුරුදු 75 තුළ කිසිදු දේශපාලන සම්බන්ධයක් නැති ගාණටයි.

ආර්ථික අර්බුදය ගෝඨාභය මහත්තයා ඇවිල්ලා අවුරුදු දෙකකින් ඇති වුණ දෙයක් නෙමෙයි. සුනාමිය වැනි ස්භාවික විපත්, 71 කැරැල්ල, 83 කලු ජූලිය, 88/89 කැරැල්ල ඇති වුණා. අවුරුදු 30ක යුද්ධයක් තිබුණා. ඒ සෑම දෙයක්ම ආර්ථිකයට බලපෑවා.

83 කලු ජූලිය නිසා ජනතා විමුක්ති පෙරමුණ ඇතුලු පක්ෂ කිහිපයක් තහනම් කළා. පස්සේ පුනරුත්තාපනය වෙලා පස්සේ පක්ෂ නායකයෝ නැවත දේශපාලන කරලියට ආවා. ජනතා විමුක්ති පෙරමුණ දේශපාලනයට ආවේ නෑ. ඔවුන් හැංගිලා ඉදලා 88/89 වෙනකොට මිනිස්සු මරලා තමන්ගේ කැලෑ නීතිය ක්‍රියාත්මක කරන්න ගත්තා. ලාල් කාන්ත මේ ලගදි කිව්වා අපි ජයග්‍රහණය කළොත් ගමේ අපේ සාමාජිකයන්ට දෙනවා ගමේ නීතිය ක්‍රියාත්මක කරන්න කියලා. අධිකරණ බලය කාටද ගමට දෙන්න පුළුවන්. පාර්ලිමේන්තුවෙන් අධිකරණයට දුන්න බලයක් ගමට දෙන්න බෑ. කාටවත් එක එහෙම කරන්න අයිතියක් නෑ. ඔවුන් මේවා නිකන් කියන කතාවන් නෙමෙයි.

අද වනවිට ආර්ථික අර්බුදයෙන් රට ගොඩ එමින් තියෙනවා. සංචාරකයෝ සහ ආයෝජකයෝ අද ලංකාවට එනවා. විදේශ ශ්‍රමිකයෝ රට යනවා. මොකද මේ රටේ මිනිස්සුන්ට විදෙස් ශ්‍රමිකයින්ට වැඩි අවස්ථාව උදා වෙලා තිබෙනවා. දැන් සංචාරකයෝ එන එක නවත්වන්න කඩා කප්පල්කාරී ක්‍රියාවන් සිදු කරනවා. රට අර්බුදකාරී තත්ත්වයක තියෙනවා නම් සංචාරකයෝ ආයෝජකයෝ මේ රටට එන්නේ නෑ. කොවිඩ් වසංගතය, අරගලයත් එක්ක මේ තත්ත්වයට අපි මුහුණ දුන්නා. නමුත් දැන් අපි හිතුවට වඩා ආර්ථික අර්බුදයෙන් ගොඩ එමින් තියෙනවා.

ජනාධිපතිවරණයට පොහොට්ටුවෙන් කෙනෙක් නැති නිසයි මම ප්‍රකාශයක් කළේ මේ වෙලාවේ විසදුම අභියෝග භාර ගත් නායකයෙක්, අභියෝග වලට මුහුණ දෙන්න පුළුවන් නායකයෙක් අපි තෝර ගන්න ඕනේ කියලා. 2022 අපේ ජනාධිපති අපේ අගමැති අයින් වුණා. ඊට පස්සේ මේක කරගෙන යන්න ආරාධනා කළා අපි උදව් කරන්නම් කියලා. කවුරුත් භාර ගත්තේ නෑ. රනිල් වික්‍රමසිංහ මහත්තයා මේක භාර ගත්තා.

පක්ෂයක් කියන්නේ සාමාජිකයන්ගෙන් සැදුම් ලත් කණ්ඩායමක්. රටක් කියන්නේ මුළු පුරවැසියෝ සියලු දෙනාම. අපිට ලොකු වෙන්න ඕනේ රටට පක්ෂයද? පක්ෂයේ වැඩ පිළිවෙල අපි ගෙනියනවා. රට එක පක්ෂය දෙක. රට ගැන හිතලයි මම රනිල් වික්‍රමසිංහ මහත්තයට උදව් කරන්න තීන්දු කළේ. ඒක මගේ පෞද්ගලික මතයයි.

කෙටි කාලයක් තුළ ගොඩ ආපු රටක් ලෙස ලංකාව කියලා අයි එම් එෆ් එක, ලෝක බැංකුව අද කියනවා. ඒක කරන්න පුළුවන් වුණේ මේ රටේ මිනිස්සු කරපු කැප කිරීම් නිසයි. අරගල වලට මිනිස්සු ගියේ නෑ. නායකයෝ පෙළඹුවා මිනිස්සු අරගල කරවන්න. මිනිස්සු තේරුම් ගත්තා මේ රටේ මොකක්ද වෙන්නේ කියලා. වත්මන් ජනාධිපතිතුමාට උදව් කරනවා මිනිස්සු කැප කිරීම් කරලා. ජනාධිපතිතුමා ඇතුළු ආණ්ඩුව ගත්තේ ජනප්‍රිය තීන්දු නෙමෙයි. මින්ස්සුන්ගේ දායකත්වය නොලැබුණා නම් අපිට මේක සාර්ථික කර ගන්න බැරි වෙනවා.

පාර්ලිමේන්තු මැතිවරණයකට ගියොත් කාටවත් බහුතරයක් ගන්න බෑ. බහුතරයක් ගන්න බැරි වුනොත් මොකද වෙන්නේ අපි ආපු ක්‍රමවේදය ඉදිරියට ගෙන යන්න නොහැකි වෙනවා. මහින්ද මහත්තයා යුද්ධය දින්නේ කරු ජයසූරිය මහත්තයත් එක්ක කණ්ඩායමක් ඇවිල්ලා පාර්ලිමේන්තු බලය ශක්තිමත් කරපු නිසයි. බහුතරයක් නැත්තම් අපිය ආර්ථික අර්බුදයෙන් ගොඩ එන්න වෙන්නේ නෑ. ඒ නිසා පාර්ලිමේන්තු ඡන්දයක් තියෙනවාට වඩා හොඳයි ජනාධිපතිවරයක් තියෙන එක. රනිල් වික්‍රමසිංහ මහත්තයා වැඩක් කරලා පෙන්නපු නිසයි මිනිස්සු ඔහුව නැවත බලයට ගෙන්න ඕනේ කියන මතයේ ඉන්නේ. එතුමා එන්න ඕනේ පොදු ලකුණකින් පොදු සංධානයකින්.

අද කියන්න අරගෙන මම රනිල්ගේ ගොට්ටෙක් වෙලා. මම යූ එන් පී එකට යන්න යනවා කියලා සමහරු කියනවා. අපි අතරෙම ඉන්න මිනිස්සුයි එහෙම කියන්නේ පිට මිනිස්සු නෙමෙයි. මම කවදාවත් ගම්පහ දිස්ත්‍රික්කයේ මිනිස්සුන්ට ආසාධාරණයක් වෙන තීන්දුවක් ගන්නේ නෑ. මම තීන්දු ගන්නේ ජනතාව ගැන හිතලයි. පක්ෂ එනවා යනවා. දේශපාලනය කරනකොට දිනනවා පරදිනවා. රටක් කඩන් වැටුනොත් අපි හැමෝම වගකියන්න ඕනේ.

ප්‍රදීප් අනුර කුමාර

කල්පිටිය සිට කොළඹ, ගාල්ල, හම්බන්තොට සිට පොතුවිල් දක්වා වෙරළ ට ඔබ්බෙන් වන මුහුදු තීරයේ සුළඟේ වේගය විටින් විට පැයට කිමී 60-70 දක්වා වැඩිවන බවත් මුහුද රළු වන බවත් කාලගුණවිද්‍යා දෙපාර්තමේන්තුව නිවේදනය කරයි.

මෙම මුහුදු ප්‍රදේශවල විටින් තද වැසි හෝ ගිගිරුම් සහිත වැසි ඇතිවිය හැකි බවද සදහන් වේ.

ඒ පිළිබඳව අවධානය යොමුකරන ලෙස ධීවර සහ නාවික ප්‍රජාවගෙන් කාලගුණවිද්‍යා දෙපාර්තමේන්තුව ඉල්ලා සිටියි.

රුසියානු – යුක්‍රේන යුද්ධයට මැදි වී සිටින ශ්‍රී ලාංකිකයන් සම්බන්ධයෙන් සොයා බැලීමට විශේෂිත දූත පිරිසක් රුසියාව බලා පිටත් කර යවන ලෙස ජනාධිපති රනිල් වික්‍රමසිංහ  උපදෙස් දුන් බව විදේශ කටයුතු රාජ්‍ය අමාත්‍ය තාරක බාලසූරිය පැවසීය.

ඒ අනුව ආරක්ෂක අමාත්‍යාංශයේ ලේකම්, රුසියාවේ හිටපු තානාපති සහ විදේශ කටයුතු අමාත්‍යාංශයේ නිලධාරීන්ගෙන් සමන්විත දූත පිරිසක් කඩිනමින් රුසියාව බලා පිටත් කෙරෙන බවද රාජ්‍ය අමාත්‍යවරයා සඳහන් කළේය.

රාජ්‍ය අමාත්‍ය තාරක බාලසූරිය මෙම අදහස් පළ කළේ ‘ස්ථාවර රටකට සැවොම එක මඟකට’ මැයෙන් ඊයේ (16) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

එහිදී වැඩිදුරටත් අදහස් දැක්වූ රාජ්‍ය අමාත්‍යවරයා මෙසේද පැවසීය,

මේ වන විට විදේශ කටයුතු අමාත්‍යාංශය සහ ආරක්ෂක අමාත්‍යාංශය එක්ව රුසියානු – යුක්‍රේන යුද්ධයට මැදිව සිටින ශ්‍රී ලාංකිකයන් සම්බන්ධව සංගණනයක් සිදු කරමින් සිටිනවා. ඇතැම් ලාංකිකයන් රුසියාවට යවා තිබෙන්නේ සංචාරක වීසා මඟින් බව ද මේ වන විට හෙළිවී තිබෙනවා. එසේම ඒ අතරින් විශාල පිරිසක් මෙරට ත්‍රිවිධ හමුදා නියෝජනය කළ විශ්‍රාමික හමුදා සාමාජිකයන් වනවා. මෙහිදී අපට තිබෙන ප්‍රධාන ගැටලුවක් වන්නේ කොපමණ ප්‍රමාණයක් රුසියාවට ගොස් සිටිනවාද යන්නයි. නිල නොවන ආරංචි මාර්ගවලට අනුව 600-800ක අතර ප්‍රමාණයක් රුසියාවේ සිටින බවට වාර්තා වී තිබෙනවා. ඇතැම් විට එම ප්‍රමාණය මීට වඩා අඩු හෝ වැඩි විය හැකියි.

කෙසේ වෙතත් රජයක් වශයෙන් රුසියාවේ සිටින මෙරට විශ්‍රාමික හමුදා සාමාජිකයන් සම්බන්ධව ගත යුතු සෑම පියවරක්ම මේ වන විට ගෙන තිබෙන බව සඳහන් කළ යුතුයි. මෙහිදී රුසියාවේ යුද්ධයට මැදි වී සිටින පිරිස් සම්බන්ධව දැනුම්වත් කිරීම ගැන මාධ්‍ය ආයතන වෙත විශේෂයෙන් ස්තුතිවන්ත වෙනවා. ඒ වගේම මෙම පිරිස් රුසියාවේ රැඳී සිටින ප්‍රදේශ පිළිබඳවත් නිශ්චිත තොරතුරු වාර්තා නොවීමත් අපට බරපතල ගැටලුවක් වී තිබෙනවා.

අපට දැන ගන්නට තිබෙන තොරතුරුවලට අනුව ජාවාරම්කරුවන් ‘‘රුසියානු පුරවැසිභාවය ලබාදීම’’ වැනි බොරු පොරොන්දු ඇතුළත් ප්‍රචාර හරහා මේ පිරිස් රුසියාවට ගෙන්වා ගෙන තිබෙනවා. සම්පූර්ණයෙන්ම මෙය මිනිස් ජාවාරමක්. මේ ජාවාරමට ඉහළ හමුදා නිලධාරියෙක් සම්බන්ධ බවට ද තොරතුරු වාර්තා වී තිබෙනවා. පළමුවෙන්ම ඇත්ත තත්ත්වය පෙන්වා දී තවදුරටත් රුසියාවට පිරිස් යැවීම නතර කළ යුතුයි. ඉන් අනතුරුව එහි ගොස් සිටින පිරිස් රාජ්‍ය තාන්ත්‍රික මට්ටමින් සාකච්ඡා කර, යළි මෙරටට ගෙන ඒමට බලාපොරොත්තු වෙනවා. ඒ වෙනුවෙන් රජයක් වශයෙන් අප උපරිම උත්සාහ දරනවා.

විදේශ කටයුතු අමාත්‍යවරයා විදෙස්ගතව සිටියත් රුසියානු – යුක්‍රේන යුද්ධයට මැදිව සිටින ශ්‍රී ලාංකිකයන් සම්බන්ධයෙන් සොයා බැලීම සඳහා දූත පිරිසක් කඩිමින් රුසියාවට යැවීමට කටයුතු කරන ලෙස ජනාධිපති රනිල් වික්‍රමසිංහ මහතා උපදෙස් ලබා දී තිබෙනවා. ඒ අනුව ආරක්ෂක අමාත්‍යාංශයේ ලේකම්, රුසියාවේ හිටපු තානාපති ඇතුළු විදේශ කටයුතු අමාත්‍යාංශයේ නිලධාරීන්ගෙන් සැදුම්ලත් දූත පිරිසක් රුසියාවට යැවීමට බලාපොරොත්තු වෙනවා. ඒ වගේම මේ සම්බන්ධව රුසියානු තානාපති කාර්යාලය නිල වශයෙන් දැනුවත් කිරීමට ද අප බලාපොරොත්තු වෙනවා.

මුදල් රාජ්‍ය අමාත්‍ය ෂෙහාන් සේමසිංහ ඝාතන තර්ජනයක් පිළිබඳව කොටුව පොලිසිය විසින් විමර්ශන ආරම්භ කර ඇත.

වාර්තා වන ආකාරයට අමාත්‍යවරයාව ඝාතනය කරන බවට පවසමින් නිර්නාමික දුරකථන ඇමතුමක් ඔහුගේ කාර්යාලයට ලැබී ඇති අතර විමර්ශන ඇරඹී ඇත්තේ ඒ අනුවය.

අදාළ ඇමතුම ලබාදුන් තැනැත්තා විසින් ඉදිරි මැතිවරණයට තරග කිරීමට අමාත්‍යවරයාට ඉඩ නොතබන බව මෙන්ම තමන් සතුව ආයුධයක් ඇති බවත් තර්ජනය නොසලකා කටයුතු කළහොත් ටයර් දමා පුළුස්සන බවටත් තර්ජනය කර ඇති බවද වාර්තා වෙයි.

මේ සම්බන්ධව වැඩිදුරටත් වාර්තා වන ආකාරයට අදාල දුරකථන ඇමතුම සම්බන්ධයෙන් දුරකථන ජාල විශ්ලේෂණ වාර්තාවක් හරහා පරීක්ෂණ ක්‍රියාත්මක වෙමින් ඇත.

සිදුවීම පිළිබඳ ප්‍රතිචාර දක්වන රාජ්‍ය අමාත්‍යවරයා පවසන්නේ මෙය පැරණි ඝාතන සංස්කෘතියක නව හිස එසවීමක් විය හැකි බවයි.

සංචාරක ව්‍යාපාරය සම්බන්ධයෙන් පමණක් ඊට සහන ලබා දෙන බවද ඔහු සඳහන් කර ඇති බවය.

හිටපු ජනාධිපති මෛත්‍රීපාල සිරිසේනට එරෙහිව අල්ලස් කොමිසම වෙත පැමිණිල්ලක් ඉදිරිපත් කර තිබේ.

ශ්‍රී ලංකා නිදහස් පක්ෂයේ හිටපු විධායක සභිකයකු වන මොන්ටේගු සරච්චන්ද්‍ර විසින් අල්ලස් කොමිසමට ලිපියක් මඟින් මෙම පැමිණිල්ල සිදුකර ඇත.

එහිදී ඔහු සඳහන් කර තිබෙන්නේ හිටපු ජනාධිපති මෛත්‍රීපාල සිරිසේන විසින් ශ්‍රී ලංකා නිදහස් පක්ෂය විකුණා ලබාගත් අත්තිකාරමකින් පාස්කු වින්දිතයන්ගේ වන්දි ගෙවා ඇති බවක් පෙනෙන්නට තිබෙන බවය.

එබැවින් අදාළ මුදල් උපයා ගත්තේ කෙසේද? යන්න සම්බන්ධයෙන් විමර්ශනයක් කරන ලෙස මෙම පැමිණිල්ල හරහා ඉල්ලා තිබේ.

ඉල්ලා මෙම පැමිණිල්ල ගොනු කර තිබේ.

ශ්‍රී ලංකා නිදහස් පක්ෂයේ හිටපු විධායක සභිකයකු වන මොන්ටේගු සරච්චන්ද්‍ර විසින් අල්ලස් කොමිසමට යොමුකළ පැමිණිල්ල පහත දැක්වෙයි.

විශ‍්‍රාමික හමුදා නිලධාරීන් නීතිවිරෝධි ලෙස රුසියාවේ හමුදා රැකියා සඳහා යැවීම සම්බන්ධයෙන් චෝදනා එල්ලවී ඇති සැකකරුවන් 05 දෙනා ලබන 30 වනදා දක්වා රක්ෂිත බන්ධනාගාරගත කිරීමට මීගමුව අධිකරණය ඊයේ (16) නියෝග කළේය.

ඒ අදාළ සිදුවීම සම්බන්ධව සැකපිට අත්අඩංගුවට ගනුලැබූ විශ්‍රාමික හමුදා මේජර්වරයින් දෙදෙනෙකු සහ එම සිද්ධියට සම්බන්ධ තවත් පුද්ගලයින 03 දෙනෙකු අධිකරණය වෙත ඉදිරිපත් කළ අවස්ථාවේය.

සැකකරුවන් මීගමුව අධිකරණය වෙත රැගෙන එන අවස්ථාවේදී වින්දිතයින්ගේ ඥතීන් විසින් මීගමුව අධිකරණය ඉදිරිපිටදී නිහඬ විරෝධතාවයක නිරතවූ බවද වාර්තා වෙයි.

රුසියානු හමුදාවේ සේවය සඳහා ශ්‍රී ලාංකිකයින් යොමු කළ බලපත්‍ර ලාභී විදේශ රැකියා නියෝජිතායතනයක හිමිකරු හා එහි කළමනාකරු විදේශ සේවා නියුක්ති කාර්යාංශයේ විශේෂ විමර්ශන අංශයේ නිලධාරීන් විසින්  (15)  දින අත්අඩංගුවට ගෙන තිබුණි.

සංචාරක වීසා මගින් රුසියානු හමුදාවේ සිවිල් සේවය සඳහා ශ්‍රී ලාංකිකයින් යොමුකරන බව පවසා එක් අයෙකුගෙන් රුපියල් ලක්ෂ 15 බැගින් මුදල් අයකර විදේශගත කර ඇති අතර, එරටදී රුසියානු - යුක්‍රේන යුද්ධයේ යුද පෙරමුණට යාමට මෙම ශ්‍රී ලාංකිකයින්ට සිදුවී ඇත.

මෙම ඒජන්සි ආයතනය විසින් සිදුකළ මෙම ජාවාරම සම්බන්ධයෙන් කාර්යාංශයට පැමිණිලි 7ක් ලැබී ඇති අතර, එම පැමිණිලිවලට අනුව මෙම ආයතනය වංචා කර ඇති මුදල් ප්‍රමාණය රුපියල් කෝටියකට අධික බව පැවසෙයි.

ඒ අනුව, නුගේගොඩ ස්ටැන්ලි තිලකරත්න මාවතේ පවත්වාගෙන ගිය අදාළ ආයතනය ඊයේ දින වටලා තිබුණි.

එහිදී එහි හිමිකරු සහ කළමනාකරු වශයෙන් සේවය කළ පුද්ගලයින් දෙදෙනෙකු විමර්ශන නිලධාරීන් විසින් අත්අඩංගුවට ගන්නා ලදි.

අත්අඩංගුවට ගත් සැකකරුවන් දෙදෙනාගෙන් ප්‍රකාශ සටහන් කරගැනීමෙන් අනතුරුව අද දින මෙලෙස මීගමුව මහෙස්ත්‍රාත් අධිකරණයට ඉදිරිපත් කෙරුණි.

අදාළ රැකියා නියෝජිතායතනයේ බලපත්‍රයද මේ වනවිට අත්හිටුවීමට කාර්යාංශය පියවර ගෙන ඇත.

දේශීය කර්මාන්ත වල නිෂ්පාදන පිරිවැය අඩුකර ගැනීමේ අරමුණින්, “සම්පත් කාර්යක්ෂම පිවිතුරු නිෂ්පාදන (RECP) ඇගයීම සහ ධාරිතා ගොඩනැංවීම” වැඩසටහන යටතේ කළමණාකරණ මට්ටමේ විශේෂඥ පුහුණු වැඩසටහනක් අද (16) කර්මාන්ත අමාත්‍යාංශයේදී පැවැත්වුණි.

කර්මාන්ත හා සෞඛ්‍ය අමාත්‍ය වෛද්‍ය රමේෂ් පතිරණගේ හා අමාත්‍යාංශ ලේකම් ශාන්ත වීරසිංහගේ උපදෙස් පරිදි ජාතික පිවිතුරු නිෂ්පාදන මධ්‍යස්ථානය (NCPC) සමඟ එක්ව කර්මාන්ත අමාත්‍යාංශය මෙම දෙදින විශේෂඥ පුහුණු වැඩසටහන ක්‍රියාත්මක කරයි.

මේ අනුව රබර්, ප්ලාස්ටික්, රූපලාවන්‍ය, රථ වාහන, සැකසූ ආහාර, ඇසුරුම් වැනි කර්මාන්ත ක්ෂේත්‍ර 10 ක් නියෝජනය වන පරිදි බස්නාහිර පළාතේ තෝරාගත් කර්මාන්තකරුවන් 30 ක් සදහා මෙම විශේෂඥ පුහුණු වැඩසටහන පැවැත්වුණි. කර්මාන්ත වල නිෂ්පාදන ක්‍රියාවලියේදී බල ශක්තිය, ජලය , අමුද්‍රව්‍ය වැනි සම්පත් භාවිතාව කාර්යක්ෂම කරමින් අපතේයාම් අවම කර ගැනීමට කර්මාන්තකරුවන් යොමු කරවීම මෙම වැඩසටහනේ මූලික අරමුණවේ. මෙම වැඩසටහන පසු ගිය වර්ෂයේද කර්මාන්ත 20 ක් සඳහා පැවැත්වූ අතර ඉන් ඉතාම සාර්ථක ප්‍රතිඵල කර්මාන්ත ක්ෂේත්‍රයට එක්ව තිබේ.

එක් අවුරුදු වැඩසටහනක් වන මෙම වැඩසටහන සදහා කර්මාන්ත අමාත්‍යාංශය මූල්‍යමය ප්‍රතිපාදන ලබාදෙන අතර තාක්ෂණික සහය ජාතික පිවිතුරු නිෂ්පාදන මධ්‍යස්ථානය ලබාදෙයි. ජාතික පිවිතුරු නිෂ්පාදන මධ්‍යස්ථානහි ප්‍රධාන විධායක නිලධාරී ඉංජිනේරු සමන්ත කුමාරසේන හා ජාතික පිවිතුරු නිෂ්පාදන මධ්‍යස්ථානහි ජේෂ්ඨ උපදේශක චමල් මානගේ මහතුන් විසින් මෙම විශේෂඥ පුහුණු වැඩසටහන සදහා සම්පත් දායකත්වය ලබා දෙයි.

මෙම වැඩසටහන සදහා කර්මාන්ත අමාත්‍යාංශයේ අතිරේක ලේකම් චමින්ද පතිරාජ, කර්මාන්ත අමාත්‍යාංශයේ අධ්‍යක්ෂ (සංවර්ධන අංශ 3) නලිනි බාලසුබ්‍රමනියම් , අමාත්‍යාංශ නිළධාරීන්, ජාතික පිවිතුරු නිෂ්පාදන මධ්‍යස්ථාන නිලධාරීන් හා කර්මාන්තකරුවන් එක්ව සිටියහ.