පුවත්

ජනලේඛන සහ සංඛ්‍යාලේඛන දෙපාර්තමේන්තුව 2023 සැප්තැම්බර් මාසය සඳහා ශ්‍රී ලංකාවේ ජාතික පාරිභෝගික මිල දර්ශකය (ජා.පා.මි.ද.) සහ මාසික පාරිභෝගික උද්ධමනය ප්‍රකාශයට පත් කර ඇති අතර ඊට අනුව 2023 අගෝස්තු මාසයේ දී 2.1 % ක් ලෙස වාර්තා වූ මෙරට උද්ධමනය 2023 සැප්තැම්බර් මාසය සඳහා 0.8 % ක් දක්වා අඩු වී ඇත.

2023 අගෝස්තු මාසයේ දී -5.4 % ක් ලෙස වාර්තා වූ ආහාර කාණ්ඩයේ ලක්‍ෂ්‍යමය උද්ධමනය 2023 සැප්තැම්බර් මාසය සඳහා -5.2 % ක් දක්වා වැඩි වී ඇත.

එමෙන්ම, අගෝස්තු මාසයේ දී 9.0 % ක් වූ ආහාර නොවන කාණ්ඩයේ ලක්‍ෂ්‍යමය උද්ධමනය ද සැප්තැම්බර් මාසයේ දී 5.9 % ක් දක්වා පහළ වැටී ඇත.

වී අලෙවි මණ්ඩලයේ ගබඩා පහක තිබූ රුපියල් ලක්ෂ දහසක් වටිනා වී තොග අතුරුදන්ව ඇති බව වාර්තා වෙයි .

අදාල සොරකම සම්බන්ධයෙන් වී අලෙවි මණ්ඩලයේ අභ්‍යන්තර සේවක පිරිසක් කෘෂිකර්ම අමාත්‍ය මහින්ද අමරවීරට පැමිණිලි කර තිබෙන බවත් වාර්තා වෙයි .

වැඩිදුරටත් වාර්තා වන ආකාරයට කුරුණෑගල දිස්ත්‍රික්කයේ වී ගබඩා පහක අදාළ සොරකම සිදුව ඇත.

මෙම සොරකම සම්බන්ධයෙන් සම්පූර්ණ වාර්තාවක් දින තුනක් ඇතුළත ලබා දෙන ලෙස කෘෂිකර්ම කෘෂිකර්ම අමාත්‍ය මහින්ද අමරවීර විසින් වී අලෙවි මණ්ඩලයේ සභාපතිවරයාට නියෝග කර ඇති බව කෘෂිකර්ම අමාත්‍යංශය පවසයි .

අදාළ වාර්තාව ලැබුණු වහාම මේ සම්බන්ධයෙන් පූර්ණ විමර්ශනයක් කිරීම සඳහා රහස් පොලිසියට බාරදෙන බව කෘෂිකර්ම අමාත්‍යවරයා එහිදී සඳහන් කර තිබේ.

2020 -2021 කාල පරිච්ඡේදයේ මිලදී ගත් වී තොගයක් මෙලෙස අස්ථානගත වී ඇති බව කෘෂිකර්ම අමාත්‍යංශය පවසයි.

දිගින් දිගටම සෞඛ්‍ය සේවයේ අර්බුද මතුවීම හමුවේ සෞඛ්‍ය අමාත්‍ය කෙහෙලිය රඹුක්වැල්ල එම ධූරය දැරීමට නොසුදුසු බවට පක්ෂ විපක්ෂ කොටස් වල ඉල්ලීමට ප්‍රතිචාර දැක්වීමක් අද (23) ජනාධිපති රනිල් වික්‍රමසිංහ විසින් සිදුකළ අමාත්‍ය මණ්ඩල සංශෝධනයේදී සිදුවිය.

එහිදී කැබිනට් අමාත්‍ය ධුර 03ක් සඳහා පත් කෙරුණු අමාත්‍යවරු අද පෙරවරුවේ ජනාධිපති කාර්යාලයේ දී ජනාධිපති රනිල් වික්‍රමසිංහ ඉදිරියේ දිවුරුම් දුන්හ.

ඒ අනුව පරිසර අමාත්‍යවරයා ලෙස කෙහෙළිය රඹුක්වැල්ල ද, වැවිලි කර්මාන්ත අමාත්‍යවරයා ලෙස මහින්ද අමරවීර ද, සෞඛ්‍ය අමාත්‍යවරයා ලෙස වෛද්‍ය රමේෂ් පතිරණ ද පත් කර තිබේ.

මහින්ද අමරවීර වැවිලි කර්මාන්ත අමාත්‍ය ධුරයට පත් කර ඇත්තේ ඔහු හොඹවන කෘෂිකර්ම අමාත්‍ය ධුරයට අමතරවය.

එසේම වෛද්‍ය රමේෂ් පතිරණ හොඹවන කර්මාන්ත අමාත්‍ය ධුරයට අමතරව ඔහු සෞඛ්‍ය අමාත්‍ය ධුරයට පත් කර තිබේ.

දැනට මුදල් රාජ්‍ය අමාත්‍ය ධුරයේ කටයුතු කරන රංජිත් සියඹලාපිටිය රාජ්‍ය වැවිලි ව්‍යවසාය ප්‍රතිසංස්කරණ කැබිනට් නොවන අමාත්‍යවරයා ලෙස පත් කර ඇත.

පොහොට්ටුවේ විරෝධය !

කෙසේ වුවත් එහිදී සෞඛ්‍ය අමාත්‍ය ධූරයෙන් කෙහෙලිය රඹුක්වැල්ල ඉවත් කිරීම සම්බන්ධයෙන් පොදුජන පෙරමුණ පක්ෂයේ විරෝධය පළව ඇති අතර ඒ බව දක්වමින් එම පක්ෂයේ මහලේකම් සාගර කාරියවසම් පවසා සිටියේ සිදුකළ සංශෝධනය සම්බන්ධයෙන් තම පක්ෂය කනස්සල්ල පළකරන බවය.

මාධ්‍ය හමුවකට එක්වෙමින් ඔහු වැඩිදුරටත් පවසා සිටියේ එම තීරණය ජනාධිපතිවරයා ගත් වැරදි තීරණයක් බවය.

එහිදී ඔහු වැඩිදුරටත් මෙසේද පැවසීය .

“කෙහෙළිය ඇමතිතුමාට විරුද්ධව බොරු චෝදනා නැගුවා. ඒ සියල්ල බොරුවක් බව ඔප්පු වුණා. නමුත් ජනාධිපතිතුමා තීරණය කරන්න ඇති මෙවැනි තත්ත්වයක් යටතේ ඒ සම්බන්ධයෙන් යම්කිසි වෙනසක් සිදුකරන එක හොඳයි කියලා. ඒ අනුව රමේෂ් පතිරණ මහතා වෘත්තීයෙන් වෛද්‍යවරයෙක් වන එතුමා සෞඛ්‍ය ඇමති ලෙස පත්කරලා තියෙනවා. කෙසේ වෙතත් අපේ යම්කිසි කනස්සල්ලක් තියෙනවා. ඒ සම්බන්ධයෙන් ජනාධිපතිතුමාව අපි දැනුවත් කළා. මොකද පාර්ලිමේන්තුවේ ජනාධිපතිතුමාට රජය ගෙනියන්න ශක්තිය දෙන්නේ ශ්‍රී ලංකා පොදුජන පෙරමුණ. ශ්‍රී ලංකා පොදුජන පෙරමුණේ මන්ත්‍රීවරු තමා අති බහුතරයක් මේ ශක්තිය ලබාදෙන්නේ. ශ්‍රී ලංකා නිදහස් පක්ෂයේ මන්ත්‍රීවරු 5දෙනයි ඉන්නේ. නමුත් මෙතනිනුත් ඇමති ධුරයක් ගලවලා ශ්‍රී ලංකා නිදහස් පක්ෂයට දීලා රාජ්‍ය ඇමති ධුරයකුත් අලුතින් ඒකට දීම ගැන අපි සතුටු නෑ. ඒක වැරදි දෙයක්. වැරදි දෙයට වැරදියි කියන්නත් අපි බය වෙන්නේ නෑ. ජනාධිපතිතුමා වුණත් වැරදි දේ කරනවා නම් වැරදියි. ඒක වැරදියි කියලා අපි ප්‍රකාශ කරනවා. ජනාධිපතිතුමාට ඒක නොකර ඉන්න තිබුණා. ඒ ගැන අපි පක්ෂය විදියට දැඩි විරෝධය පළ කරනවා.”

ලංකා විදුලි බල මණ්ඩලය ප්‍රතිව්‍යුහගත කිරීමට අදාළ යෝජනාව ලබන සතියේ අමාත්‍ය මණ්ඩලයට ඉදිරිපත් කිරීමට නියමිත බව විදුලි බල හා බලශක්ති අමාත්‍ය කංචන විජේසේකර පවසයි.

මෙතෙක් මාස හයකට වරක් සංශෝධනය කෙරුණු විදුලි ගාස්තු මින් ඉදිරියට මාස 3කට වරක් සංශෝධනය කිරීමේ යාන්ත්‍රණයක් සකස් කරන බව ද අමාත්‍යවරයා සඳහන් කළේ ය.

විජේසේකර  මේ බව සඳහන් කළේ, ‘ස්ථාවර රටකට සැවොම එක මගකට’ මැයෙන් අද (ඔක්. 23) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

එහිදී වැඩිදුරටත් අදහස් දැක්වූ රාජ්‍ය අමාත්‍යවරයා මෙසේ ද පැවසීය.

“පසුගිය සතියේ මහජන උපයෝගිතා කොමිසම විසින් විදුලි ගාස්තු සංශෝධනය සඳහා විදුලි බල මණ්ඩලයට අනුමැතිය ලබා දෙනු ලැබුවා. ඒ අනුව ඔක්තෝබර් 21 වන දා සිට, ඉදිරි මාස කිහිපය සඳහා පැවති ගාස්තු සංසන්දනය කර සියයට 18කට ආසන්න සංඛ්‍යාවකින් ගාස්තු සංශෝධනය කළා.

මෙම මිල සංශෝධනය සඳහා රජයේ ප්‍රතිපත්තිය තීරණය වුණේ, ජාත්‍යන්තර මූල්‍ය අරමුදල සමඟ ඇති කර ගත් ගිවිසුම අනුව යි. ඊට අනුව කිසි ම රාජ්‍ය ව්‍යාපාරයක් මහාභාණ්ඩාගාරය මගින් මුදල් ආයෝජනය කර එහි අලාභ පියවීමට හැකියාවක් නැහැ. ඒ අනුව විදුලි බල මණ්ඩලය සහ ඛණිජ තෙල් සංස්ථාව සඳහා විශේෂ මිල සූත්‍රයක් සකස් කෙරුණා.

එසේ ම, විදුලි බල මණ්ඩලයට ගාස්තු සංශෝධන කළ හැකි වන්නේ, අවුරුද්දට දෙවතාවක් පමණක් බවට සමාජයේ වැරදි මතයක් තිබෙනවා. නමුත් හදිසි අවස්ථාවලදී ගාස්තු සංශෝධන කරන ලෙස ඉල්ලීමේ හැකියාව විදුලි බල මණ්ඩලයට තිබුණා. කැබිනට් මණ්ඩලයේ අනුමැතිය මේ සඳහා හිමිවුණේ ඒ අනුව යි.

ඒ වගේ ම විදුලි බල මණ්ඩලයේ ප්‍රතිව්‍යුහගත කිරීමේ කාර්යය ගැනත් සඳහන් කළ යුතු යි. පසුගිය සමයේ ඒ සඳහා වන අපගේ යෝජනා නීති කෙටුම්පත් කාර්යාලයට ලබා දුන්නා‍. නීති කෙටුම්පත් කාර්යාලය එය සකස් කර නීතිපතිවරයාට යොමු කර තිබෙනවා.

මෙම සතිය තුළ ඒ සඳහා අවශ්‍ය නිශ්කාෂණය ලබා දීම සඳහා කටයුතු කරන බව පසුගිය අඟහරුවාදා නීතිපතිවරයා විසින් මා වෙත දැනුම් දුන්නා. ඒ අනුව එළඹෙන සතියේ එය කැබිනට් මණ්ඩලයට ඉදිරිපත් කර ප්‍රතිව්‍යුහගත කිරීමේ වැඩපිළිවෙල ඉදිරියට ගෙන යාමට බලාපොරොත්තු වෙනවා.

ඒ වගේ ම, මේ වන විට අධික වැසි තත්ත්වයක් ඇතිව තිබෙන නිසා ගාස්තු සංශෝධනයක් අවශ්‍ය ද යන්න පිළිබඳව සමාජයේ මතයක් පවතිනවා. මම නියෝජනය කරන මාතර දිස්ත්‍රික්කය වගේ ම ඊට ආසන්න ගාල්ල දිස්ත්‍රික්කය ද ගංවතුර තත්ත්වයත් ගම්පහ දිස්ත්‍රික්කයත් ගංවතුර තත්ත්වයට මුහුණ දුන්නා.

නමුත් ජල විදුලිය නිෂ්පාදනය කරන සමනල වැව, වික්ටෝරියා සහ රන්දෙණිගල වැනි ප්‍රධාන ජලාශ තවමත් තිබෙන්නේ පැවති සීමාවලයි. අපි වෙනදට දකින වර්ෂාපතනය එම ප්‍රදේශවලට ලැබී නැ. අද වන විට ජලාශවල තිබෙන ධාරිතාවෙන් අපට භාවිත කිරීමට හැකියාව ඇත්තේ 65.81%ක් පමණයි. නමුත් 2022 ඔක්තෝබර් මාසයේ 22 වන දා වනවිට ජලාශ වල පැවති ජල ධාරිතාවෙන් 84.41% භාවිත කිරීමට හැකියාව තිබුණා. මේ තත්ත්වය සංසන්දනය කිරීමේදී 20% ක පමණ පරතරයක පවතිනවා.

ඒ වගේ ම 2022 වර්ෂය වනවිට අපට අයත් ජලාශවලින් පමණක් ජල – විදුලිය ගිගාවොට් පැය 5364 ජනනය කර තිබෙනවා. 2021 වර්ෂයේ දී ගිගාවොට් පැය 5,639ක් ජනනය කර තිබෙනවා. නමුත් මේ වසරේදී ඔක්තෝම්බර් මාසයේ 22 වන දා වන විට අප ජනනය කර ඇති ගිගාවොට් ප්‍රමාණය 2893ක් පමණයි. පසුගිය වර්ෂ දෙකට සාපේක්ෂව බැලුවහොත් මේ වසරේ ජනනය කර ඇත්තේ එම ප්‍රමාණයෙන් අඩක් පමණ යි. මේ වසර අවසන් වීමට තවත් ඇත්තේ දින 70ක් පමණයි. දැන් එම ප්‍රදේශවලට වැසි ලැබුණත් එම ඉලක්ක සපුරා ගැනීමේ හැකියාවක් අපට තවමත් නැහැ. ඒ අනුව, අවශ්‍ය විදුලිය ප්‍රමාණය සැපයීමට නම් විකල්ප වෙත යොමු වීමට සිදුවෙනවා.”

ඉදිරි ජනාධිපතිවරණයේදී රනිල් වික්‍රමසිංහ ඡන්ද ලක්ෂ 100 ක් ලබාගෙන නැවතත් ජනපති පුටුවේ වාඩි වන බව එක්සත් ජාතික පක්ෂයේ සභාපති වජිර අබේවර්ධන සඳහන් කළේය .

කවුරුත් එකතු වුණොත් ඒ කාර්යය කළ හැකි බවද මන්ත්‍රීවරයා පැවසීය.

එජාප සභාපති වජිර අබේවර්ධන මේ බව සඳහන් කර සිටියේ ඊයේ (21) කොළඹ සුගතදාස ගෘහස්ථ ක්‍රීඩාංගණයේ පැවති එක්සත් ජාතික පක්ෂයේ විශේෂ මහ සම්මේලනය අමතමින් ය.

එහිදී මන්ත්‍රීවරයා මෙසේද පැවසීය .

දැන් ඕනම දේශපාලන පක්ෂයක කෙනෙකුට මේ රට ගොඩගන්න පුළුවන් නම් හංදිවල කතා පවත්වන්න ඕනෙ නෑ, එයා දැන් ඉදිරිපත් කරන්න ඕනෙ ඒක කරන විදිය. රනිල් වික්‍රමසිංහ ජනාධිපතිතුමා කරන විදිය ජාත්‍යන්තර මූල්‍ය අරමුදලට කියලා තියෙනවා. එතුමා ඒක ප්‍රංශය, ජපානයට, ඇමරිකාවට, චීනයට කියලා තියෙනවා. වැඩිම ණය සම්භාරයක්, 42%ක් චීනයට. ඒගොල්ලන්ට කියලා තියෙනවා කොහොමද මේ ණය ගෙවන්නෙ, කොහොමද මේ රට ගොඩගන්නෙ කියලා.

අපට පේනවා ඒ අතරේ සමහර බාලාංශ අපේක්ෂකයොත් ජනාධිපතිවරණයට එන්න හදනවා. ඒ අයට දොස් කියන්න හොඳ නෑ, ඒ අය ඔක්කොම එකතු කරගන්න ඕනෙ. ඔබ හිටියෙ පෝලිමේ, අද ඔබ තෙල් ගහගෙන මේ ශාලාවට ඇවිල්ලා ඉන්නවා. ඇත්ත වශයෙන්ම ජනාධිපතිතුමාට පින් දෙන්න ඕනෙ. හැමෝටම වීරකම් කතා කරන්න පුළුවන්, වීරකම් කරන්න බෑ.

රනිල් පාර්ලිමේන්තු මන්ත්‍රී ධුරයට පත්ව අගමැති වී ඉන් පසු ජනපති වන බව තමා වසරකට පෙර අනාවැකි කියා තිබූ බව කී අබේවර්ධන මන්ත්‍රීවරයා මීළඟ ජනාධිපතිවරණයේදී ඉතිහාසයේ ලක්ෂ 100ක වාර්තා ගත වැඩි ඡන්ද ප්‍රමාණයක් ගෙන රනිල් වික්‍රමසිංහ නියත වශයෙන්ම නැවතත් ජනාධිපති ධුරයට පත් වන බවත් කවුරුත් සහය දුන්නොත් ඒ කාර්‍යය කළ හැකි බව ද සඳහන් කළේය.

සෑම ආගමකටම සමානව සැලකීම සහ සෑම පුරවැසියෙකුටම සමාන අයිතිවාසිකම් ලබාදීම වත්මන් රජයේ ප්‍රතිපත්තිය බව ජනාධිපති රනිල් වික්‍රමසිංහ පැවසීය.

ඊශ්‍රායල - හමාස් ගැටුමේ දී පලස්තීන ජනතාව ගොදුරක් කර ගැනීම තමා කිසිසේත් අනුමත නොකරන බවත්, ගැටුම් නවත්වා එම ප්‍රදේශවල සාමය ස්ථාපිත කිරීමට එක්සත් ජාතීන්ගේ මහලේකම්වරයා ගෙන යන වැඩපිළිවෙළට තම පූර්ණ සහාය ලබාදෙන බවත් ජනාධිපතිවරයා පැවසීය.

ජනාධිපති රනිල් වික්‍රමසිංහ  මේ බව සඳහන් කළේ අද (22) පෙරවරුවේ මන්නාරම මුසලි ජාතික පාසල් ක්‍රීඩාංගණයේ පැවති ජාතික මීලාදුන් නබි උත්සවය අමතමිනි.

ආගමික හා සංස්කෘතික කටයුතු අමාත්‍යාංශය සහ මුස්ලිම් ආගමික හා සංස්කෘතික කටයුතු දෙපාර්තමේන්තුව එක්ව මෙය සංවිධානය කර තිබිණි.

උත්සව භූමිය වෙත පැමිණි ජනාධිපති රනිල් වික්‍රමසිංහව මුස්ලිම් ආගමික සංස්කෘතිකාංගයන්ගෙන් සමන්විතව හරසරින් පිළිගනු ලැබීය.

ජාතික මීලාදුන් නබි සැමරුම් උත්සවයේ ප්‍රධාන දේශනය අෂේක් බී. නිහමතුල්ලාහ් මව්ලවිතුමා විසින් සිදු කරන ලදි.

ජාතික මීලාදුන් නබි සැමරුම 2023 වෙනුවෙන් සමරු මුද්දරයක් හා මුල්දින කවරයක් ද නිකුත් කෙරුණු අතර තැපැල්පති රුවන් සත්කුමාර විසින් එහි පළමු මුද්දරය සහ මුල්දින කවරය ජනාධිපතිවරයා වෙත පිළිගන්වන ලදී.

ජාතික මීලාදුන් නබි සැමරුම වෙනුවෙන් නිකුත් කරන ලද විශේෂ සමරු කලාපය සහ “මන්නාරම දිස්ත්‍රික් ඉතිහාසය” ග්‍රන්ථය ද ජනාධිපතිවරයා වෙත පිළිගැන්විණි.

නබිනායකතුමාගේ උපන්දින සැමරුමට සමගාමීව පැවැත්වූ නිර්මාණ තරගවලින් ජයග්‍රහණය කළ සිසු සිසුවියන්ට ත්‍යාග හා සහතිකපත් පිරිනැමීම ද සිදු කෙරුණේ ජනාධිපති රනිල් වික්‍රමසිංහ  අතිනි.

දීර්ඝකාලයක් මුස්ලිම් පල්ලිවල සේවය කළ මව්ලවිතුමන්ලාට ගෞරව සම්මාන පිරිනැමීමද මෙහිදී සිදු කළ අතර ප්‍රදේශය වෙනුවෙන් සුවිශේෂී සේවයක් ඉටු කළ මහාචාර්යවරයෙකු වන අභාවප්‍රාප්ත හස්බුල්ලා  වෙනුවෙන් සිහිවටන තිළිණයක් පිළිගැන්වීම ද සිදු විය.

පුත්තලම මුස්ලිම් පල්ලි සංගමයේ සභාපතිවරයා වෙත සහ පුත්තලම දිස්ත්‍රික් ජමෙයිතුල් උලමා සංවිධානයේ සභාපතිවරයා වෙත ජනාධිපතිතුමා අතින් සිහිවටන තිළිණ පිළිගැන්විණි.

මුස්ලිම් ආගමික හා සංස්කෘතික දෙපාර්තමේන්තුව වෙනුවෙන් ජනාධිපති රනිල් වික්‍රමසිංහ  වෙත ද සිහිවටන තිළිණයක් පිළිගැන්වීය.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ  මෙසේද පැවසීය.

අද අපි නබි නායකතුමාගේ උපන්දිනය සමරනවා. මම මන්නාරම දිස්ත්‍රික්කයට පැමිණ සහභාගිවන දෙවන ආගමික උත්සවය මෙයයි. මාස කිහිපයකට පෙර අපි මඩු පල්ලියේ පැවති උත්සවයට සහභාගී වුණා.

මෙම උත්සවය උත්කර්ෂවත්ව සංවිධානය කිරීම පිළිබඳ මම ආගමික හා සංස්කෘතික කටයුතු අමාත්‍යාංශය සහ මුස්ලිම් ආගමික හා සංස්කෘතික කටයුතු දෙපාර්තමේන්තුව වෙත ස්තූතිවන්ත වෙනවා.

මෙම උත්සවය වගේම නව පාසල් ගොඩනැගිල්ලක් විවෘත කිරීම, නිවාස ව්‍යාපෘති ආදි සංවර්ධන වැඩසටහන් මෙහි ක්‍රියාත්මක කර තිබෙනවා. මෙම සංවර්ධනය මන්නාරම දිස්ත්‍රික්කයට අවශ්‍යයි. මෙම ප්‍රදේශය යුද්ධයෙන් හානි වූ ප්‍රදේශයක්. ඒ නිසා මෙම ප්‍රදේශවල අවතැන්වූවන් නැවත පදිංචි කිරීමේ වැඩසටහන් අපි ක්‍රියාත්මක කරගෙන යනවා.

විශේෂයෙන් මන්නාරම දිස්ත්‍රික්කයේ මාර්ග ඉදිකිරීම පිළිබඳ අපි සාකච්ඡා කරගෙන යනවා. ඇමතිතුමා මට එය පාර්ලිමේන්තුවේදීත් මතක් කරනවා.
විශේෂයෙන් මේ ප්‍රදේශයේ නිවාස ඉදිකිරීම වගේම මෙහි අධ්‍යාපනය දියුණු කළයුතුව තිබෙනවා.

මන්නාරම නගරයේ අධ්‍යාපනය යහපත් මට්ටමක තිබෙනවා. නමුත් දිස්ත්‍රික්කයේ අනෙක් ප්‍රදේශවල අධ්‍යාපනය පිළිබඳ සෑහීමකට පත් වෙන්න බැහැ.

ඒ වගේම මේ ප්‍රදේශයේ විශාල සංවර්ධන වැඩසටහනක් අප සැලසුම් කර තිබනවා. දැනටමත් ඉන්දියාව සහ මන්නාරම අතර මුහුදු මාර්ගයෙන් ප්‍රවාහන සේවාවක් ඇති කිරීමට කටයුතු කරගෙන යනවා. අපි කංකසන්තුරේ එය ආරම්භ කළා. ඊළඟට තලෙයිමන්නාරමේ එය ආරම්භ කරනවා. ඒ සමඟම ඉන්දියාව සහ ලංකාව එක්ව විදුලිබල පද්ධතිය දියුණු කිරීමට සැලසුම් කර තිබෙනවා. එය සිදුවන්නෙත් මෙම මන්නාරම හරහා බව මම කියන්න කැමතියි.

මෙය ආරම්භය පමණයි. මේ සමඟ ඉදිරියේ දී මන්නාරම දියුණු වෙනවා. විශේෂයෙන්ම මෙම ප්‍රදේශයේ හරිත ආර්ථිකය සහ හරිත බලශක්තිය සඳහා ඉහළ විභවයක් පවතිනවා. මෙහි තිබෙන සූර්ය බලයෙන් මෙම ප්‍රදේශය දියුණු කළ හැකියි. පුත්තලමේ සිට මන්නාරම යාපනය අර්ධද්වීපය හරහා මුලතිව් වන තෙක් එම හැකියාව තිබෙනවා. එසේම මෙහි කේන්ද්‍රස්ථානය බවට පුනරින් නගරය පත් කිරීමට අප බලාපොරොත්තු වෙනවා.

ඒ වගේම අපි මන්නාරම සංචාරක කේන්ද්‍රස්ථානයක් බවට පත් කිරීමට අපේක්ෂා කරනවා. ඒ හා සමගාමීව ධීවර කර්මාන්තය දියුණු කළ විට මෙම මන්නාරමට අලුත් ආර්ථිකයක් ලැබෙනවා.

අද අප මෙතනට පැමිණ සිටින්නේ නබි නායකතුමා සිහිපත් කිරීම සඳහායි. නබි නායකතුමා දේශනා කළ එම ධර්මය තමයි අද ලංකාවේ තිබෙන්නේ. ඒ නිසා අප මෙම උත්සවය ජාතික උත්සවයක් ලෙස සළකනවා. අපේ ප්‍රතිපත්තිය සෑම ආගමකටම සමානව සැලකීමයි.

ඒ වගේම සෑම කෙනෙකුටම සමාන අයිතිවාසිකම් ලබාදීම අපේ අරමුණයි. මෙහි සිටින මුස්ලිම් ජනතාවට යම් යම් ගැටලු තිබෙනවා. ඒවා විසඳීමටත් ආණ්ඩුව කටයුතු කරන බව මම මෙහිදී ප්‍රකාශ කිරීමට කැමතියි. මම භාරගත්තේ බංකොළොත් රටක්. අපි තවම එම බංකොළොත්භාවයෙන් ගොඩඑමිනුයි සිටින්නේ. එම නිසා එම වැඩකටයුතු අපි ක්‍රමානුකූලව කරගෙන යමු.

නබි නායකතුමාගේ ඉස්ලාම් ධර්මය අද මොරොක්කෝවේ සිට ඉන්දුනිසියාව දක්වා අප්‍රිකාවේ, යුරෝපයේ මේ සෑම තැනම පැතිරී තිබෙනවා.

නබිනායකතුමා මෙම ධර්මය දේශනා කරද්දි ඒ ප්‍රදේශයේ ක්‍රිස්තියානු යුදෙව්වන් සියලුදෙනා ජීවත් වුණා. ප්‍රශ්න තිබුණේ නැහැ. නමුත් අද එහෙම නොවයි විශාල ප්‍රශ්න තිබෙනවා. විශේෂයෙන්ම පසුගිය සිකුරාදා පලස්තීන ප්‍රශ්නය පිළිබඳ පාර්ලිමේන්තුවේ විවාද කළා. ඊට ප්‍රථම ආණ්ඩුවත් අදහස් ප්‍රකාශ කර තිබුණා. පාර්ලිමේන්තුවේත් අදහස් ප්‍රකාශ කර තිබෙනවා.

ගාසා තීරයට ආහාර ලොරි 20 ගෙන ගොස් තිබෙන බව අපට අහන්න ලැබුණා. නමුත් එය ප්‍රමාණවත්ද යන ප්‍රශ්නය මතු වෙනවා.

ඊශ්‍රායල - හමාස් සටන නිසා ගාසා තීරයේ පලස්තීන ජනතාව සිර වී සිටිනවා. එම ජනතාව දුක් විඳීම අප අනුමත කරන්නේ නැහැ. එම ජනතාවට අවශ්‍ය ආහාර ලබා දෙන්න කියා අප ඉල්ලා සිටිනවා. ඊශ්‍රාලය පැත්තෙන් පමණක් නොවෙයි ඊජිප්තුව පැත්තෙනුත් එම ආහාර සපයා දිය යුතුයි. ඒ වගේම ජලය ලබා දිය යුතුයි.

ඊශ්‍රායල - හමාස් සටන එක ප්‍රශ්නයක්. නමුත් මෙම අරගලයේ දී සාමාන්‍ය පලස්තීන ජනතාව ඊට ගොදුරු නොවිය යුතුයි. ඒ නිසා එය විසදාගැනීමට ඊජිප්තුව ඇතුළු අරාබි රටවල් පියවර ගනිමින් සිටිනවා. එසේම අනෙක් රටවල් ඒ සඳහා එකඟ වී තිබෙනවා. විශේෂයෙන්ම මෙම ප්‍රශ්නය විසඳලා එම ප්‍රදේශවල සාමය ඇති කිරීමට එක්සත් ජාතින්ගේ මණ්ඩලයේ මහලේකම්වරයා ගෙන යන කටයුතුවලට අපේ සම්පූර්ණ සහාය ලබාදෙන බව මම සඳහන් කරන්න කැමතියි. එසේම පලස්තීන රජයකුත් බිහි වීමට අවශ්‍ය බව ප්‍රකාශ කළයුතුයි.

මෙහිදී අදහස් දැක්වූ රාජ්‍ය අමාත්‍ය සහ මන්නාරම හා මුලතිව් සංවර්ධන කමිටු සභාපති කාදර් මස්තාන් :

ජාතික මීලාදුන් උත්සවයට සහභාගි වීමට ජනාධිපතිතුමා මන්නාරමට පැමිණීම අපේ ජනතාවට කළ ගෞරවයක් ලෙසයි අපි සලකන්නේ. යුද්ධය අවසන් වුණාට පස්සේ මේ ප්‍රදේශය දියුණු වුණේ නැහැ.නැවත පදිංචි කිරීමේ කටයුතු නිසි සැලසුමකින් තොරව සිදු කර තිබීම හේතුවෙන් එම ප්‍රදේශයේ සංවර්ධනයට හා ආයෝජන සඳහා ඉඩම් අත්පත් කර ගැනීමට නොහැකි තත්ත්වයක් උද්ගත වී තිබෙනවා.

මගේ දිස්ත්‍රික්කයේ ජනතාවගේ අපේක්ෂාවන් ඔබතුමාගේ නායකත්වය යටතේ ඉටුවන බව සඳහන් කළයුතුයි. ඔබතුමා ආර්ථිකය කඩාවැටීමකට ලක්ව තිබූ රටේ වගකීම භාරගෙන ආර්ථිකය ගොඩනැගීමට කටයුතු කළා. ජනතාවගේ දුෂ්කරතා හොඳින් හඳුනන ජනාධිපතිවරයකු ලෙස ඔබ මෙම ප්‍රදේශවල පවතින නැවත පදිංචි කිරීමේ ප්‍රශ්නයට විසඳුමක් ලබා දෙනු ඇතැයි අප බලාපොරොත්තු වෙනවා.

සංස්කෘතික හා ආගමික කටයුතු අමාත්‍ය විදුර වික්‍රමනායක, උතුර පළාත් ආණ්ඩුකාර පී.එස්.එම් චාර්ල්ස්, පාර්ලිමේන්තු මන්ත්‍රී කේ. තිලීපන්, බුද්ධශාසන හා ආගමික කටයුතු අමාත්‍යාංශයේ ලේකම් සෝමරත්න විදානපතිරණ, මුස්ලිම් ආගමික හා සංස්කෘතික කටයුතු දෙපාර්තමේන්තුවේ අධ්‍යක්ෂ ඒ.එම්. ෆයිසල් යන මහත්වරුන් ද, මහා සංඝරත්නය ප්‍රමුඛ අන්‍යාගමික නායකයන්, තානාපතිවරුන්, ආරක්ෂක අංශ ප්‍රධානීන්, පාසල් දරු දැරියන්, ප්‍රදේශවාසීන් ඇතුළු විශාල පිරිසක් මෙම අවස්ථාවට එක්ව සිටියහ.

මහාචාර්ය ගාමිණී රණසිංහ පුරාවිද්‍යා අධ්‍යක්ෂ ජනරාල් තනතුරේ වැඩ බැලීමට පත් කරනු ලැබ ඇත.

ඔහු එම තනතුරට පත්කර ඇත්තේ දැනට දරන මධ්‍යම සංස්කෘතික අරමුදලේ අධ්‍යක්ෂ ජනරාල් තනතුරට අමතරවය.

පුරාවිද්‍යා අධ්‍යක්ෂ ජනරාල් තනතුරේ කටයුතු කළ ආචාර්ය ප්‍රදීපා සේරසිංහ මිය පසුගියදා විශ්‍රාම ලැබුවාය.

එළැඹෙන ජනාධිපතිවරණය සඳහා නිර්පාක්ෂික අපේක්ෂකයා ලෙස එක්සත් ජාතික පක්ෂයේ නායක , ජනාධිපති රනිල් වික්‍රමසිංහ ඉදිරිපත් කරන බව එක්සත් ජාතික පක්ෂයේ කොළඹ දිස්ත්‍රික් නායක , හිටපු මුදල් අමාත්‍ය රවී කරුණානායක සඳහන් කළේය.

පසුගිය සමයේ තමන් ඇතුළු පිරිසක් නිහඬ කාර්‍යයක නිරතවූ බවත් ඒ අනුව මේ වන විට එක්සත් ජාතික පක්ෂය ඇතුළු පක්ෂ සංවිධාන රැසකින් සමන්විත ඉතිහාසයේ පුළුල්තම දේශපාලන සන්ධානය ගොඩනැගීමට සූදානම් කර ඇති බවත් ඔහු පැවසීය .

එක්සත් ජාතික පක්ෂයේ කොළඹ දිස්ත්‍රික් නායක , හිටපු මුදල් අමාත්‍ය රවී කරුණානායක මේ බව සඳහන් කර සිටියේ ඊයේ (21) කොළඹ සුගතදාස ගෘහස්ථ ක්‍රිඩාංගණයේ දී පැවැත්වුණු එක්සත් ජාතික පක්ෂයේ විශේෂ මහා සම්මේලනයේ පිළිගැනීමේ කතාව සිදුකරමිනි.

පක්ෂ නායක ජනාධිපති රනිල් වික්‍රමසිංහ ඇතුළු එජාප නායකත්ව මණ්ඩලය ප්‍රධාන පාක්ෂිකයින් රැසක් මෙම විශේෂ මහ සමුළුවට සහභාගි ව සිටි අතර එළැඹෙන වසරේ සිට ක්‍රියාත්මක වන පක්ෂයේ නව ව්‍යවස්ථාව සම්මත කිරීමද එහිදී සිදුවිණ .

මෙම අවස්ථාව අමතමින් එක්සත් ජාතික පක්ෂයේ කොළඹ දිස්ත්‍රික් නායක , හිටපු මුදල් අමාත්‍ය රවී කරුණානායක මෙසේද සඳහන් කළේය .

අද දවස කියන්නේ ඓතිහාසික දවසක් අපි මේ පවත්වන්නේ 77 වෙනි සම්මේලන පමණක් නොවේ මේ විශේෂ සම්මේලනයේ පක්ෂය අලුත් ව්‍යවස්ථාවක් හඳුන්වාදෙනවා. ඇත්ත වශයෙන්ම අපි යූඑන්පී කියන්නේ පවුලේ පක්ෂයක් නෙමෙයි මේකේ වටිනාකම කියන්නේ අපේ පක්ෂය පවුලක් ලෙස කටයුතු කිරීමයි. ඒ නිසයි අපි එක්සත් ජාතික පක්ෂය කියලා කියන්නේ. පක්ෂය ගැන කිවුවහම අපට එකමුතුභාවය,දර්ශනයක් වැඩපිළිවෙළක්, බලය ගැනීම සඳහා පක්ෂ යාන්ත්‍රණයක් පාක්ෂිකයන් අත්‍යවශ්‍ය වෙනවා. ඒ අනුව රටේ බලගතුම පක්ෂය ඇති කිරීම සඳහා මම විශේෂ ආරාධනයක් කරනවා. ඒ තමයි කුමන හෝ හේතුවක් මත එක්සත් පක්ෂය හැරදමා ගොස් සිටින සියලු දෙනාට යළි මහ ගෙදරට පැමිණෙන ලෙසයි.

අපේ එකමුතුභාවය සමගියට අත්‍යවශ්‍ය වෙනවා හැර ගිය පවුලේ සාමාජිකයන්ට පමණක් නොවේ මේ රටේ අනාගතය බාරගන්නා ඉන්න තරුණ තරුණියන්ට සහ වැඩිහිටියන් සියලු දෙනාට විවෘත ආරාධනාවක් කරනවා.

රටේ ආර්ථිකය වගේම ජනතාවගේ ආර්ථිකයත් පහත වැටුණු හැම අවස්ථාවකම යළිත් නඟා සිටුවීමේ කාර්යභාරය හැම අවස්ථාවකම සිදු කරන ලද්දේ එක්සත් ජාතික පක්ෂයයි.
යූඇම්පී කියන්නේ හැමදාමත් ඇත්ත කියපු පක්ෂයක්. දුරදිග දැකපු පක්ෂයක්. නිවැරදි දේ හරි ආකාරව කියපු පක්ෂයක්. අමිහිරි වුවත් ජනප්‍රිය දේශපාලනයෙන් බැහැර වූ පක්ෂයක්.

UNP කියන්නේ රට හදන පක්ෂයක්. අපට මහවැලි වෙන්න පුළුවන්, විශ්වවිද්‍යාල වෙන්න පුළුවන්,වරායවල්, මහපොළ,ගෙවල්,වෙළඳ කලාප,කර්මාන්තපුර, නව තාක්ෂණය ආදී විශේෂ දේවල් රටට හඳුන්වා දී තිබෙන්නේ එක්සත් ජාතික පක්ෂයයි.

එක්සත් ජාතික පක්ෂයේ වැදගත්ම සංධිස්ථානය ලෙස හැරී බලනකොට 1948 අපි නිදහස ලබා ගත්තට පසු 1977 දිවංගත ජනාධිපති ජේ ආර් ජයවර්ධන මහතා විසින් විවෘත ආර්ථිකය හඳුන්වා දෙමින් අපේ රට ලෝකයට එක්සත් කිරීමට කටයුතු කරනු ලැබුවා. ඒ වගේම 2015 රට වැටී තිබුණු ආර්ථිකය යළි ගොඩනැගීම සඳහා එවක අගමැති ලෙස කටයුතු කළ රනිල් වික්‍රමසිංහ මහතා ශක්තිමත් ආර්ථික වැඩපිළිවෙලක් ක්‍රියාත්මක කළා. ඒ වගේම 2022 රට බංකොලොත් වුන අවස්ථාවේ යලි රට ඔසවා තැබීමේ භාරදූර කාර්යභාරය පැවරුණේ එක්සත් ජාතික පක්ෂ නායකයාටයි.

එක්සත් ජාතික පක්ෂය කියන්නේ හැමදෙනාම එකතු කරන්න පුළුවන් පක්ෂයක්. වර්තමානයේ විපක්ෂය සුරංගනා කතා කියන්න පුළුවන් විවිධ බිල්ලො මවන්න පුළුවන්,අන්තවාදය වපුරන්න පුළුවන්,මෙවැනි නොමඟ යවන ක්‍රියා සිදු කළත් හැමදාමත් එක්සත් ජාතික පක්ෂය වට්ටන්න පුළුවන් වුණේ නෑ.

මේ රටේ වැටුණු ආර්ථිකය නඟා සිටුවන්න පුළුවන් එක්සත් ජාතික පක්ෂයට බව අපි 2015 වර්ෂයේදී ක්‍රියාවෙන් ඔප්පු කර පෙන්නලා දුන්නා. එවක මුදල් ඇමැතිවරයා වශයෙන් මම ආර්ථිකය ශක්තිමත් කිරීම සඳහා විශේෂ වැඩපිළිවෙළක් සිදු කරනු ලැබුවා.

රාජ්‍ය සේවකයාගේ අවම වැටුප රුපියල් 10000 කින් වැඩිකිරීමටත්, ගෑස් ඉන්ධන සහ ජනතාවගේ අත්‍යවශ්‍ය ජීවන වියදම පහත හෙලීමට අපට හැකි වුණා.
ඒ වගේම තමයි අපි නව තාක්ෂණය රටට හඳුන්වලා රට පුරා ක්‍රියාත්මක කිරීමට කටයුතු කළේ 2015 වර්ෂයේ දී. නමුත් ඇතැම් අයගේ බාධා නිසා එය කඩාකප්පල් වුණා.යහපාලන ආණ්ඩුව අමාරුවෙන් හදපු රටේ ආර්ථිකය යළි 2022දී බංකොලොත් භාවයට පත් කළා. ගෑස් නැතුව, තෙල් නැතුව,විදුලිය නැතුව, ආහාර නැතිව, පොහොර නැතුව,ඩොලර් නැතුව, තිබුණු අවස්ථාවක තමයි රනිල් වික්‍රමසිංහ මහතා ජනාධිපති ධූරයට පත්වෙලා ජනතාව මුහුණ දී සිටි ආර්ථික අර්බුදයෙන් ගොඩ ඒමට ක්‍රියා කළේ.

මාස දෙකක් වැනි කෙටි කාලයකදී පාර්ලිමේන්තුවේ සහෝදර පක්ෂ සමඟ එකට හිඳිමින් මේ තනි අලියට හැකි වුණා.අද හැමතැනින්ම කතාවට ලක් වන්නේ එතුමා කළ විශිෂ්ට ක්‍රියාව පිළිබඳවයි.

අද හන්දි ගානේ කයිවාරු ගහන සියලු දෙනාමත් නිහඩව පිලිගන්නවා ඉදිරි දැක්මක් ඇතිව වැඩ කරන්න පුළුවන් එකම නායකයා රනිල් වික්‍රමසිංහ මහතා බව.

එක්සත් ජාතික පක්ෂය හැමදාම කළේ වැටුණු ආර්ථිකය හදන වැඩේ නමුත් ඒ හැම අවස්ථාවකම අපිට බලය අහිමි වුණා. ඒක එහෙම වුණේ අපි හැමදාමත් රට ගැන හිතුවට අපි පාක්ෂිකයා ගැන යම් ප්‍රමාණයකට අමතක කරලා තිබුණ නිසයි.තිත්ත වුණත් ඇත්ත ඒකයි. අන්න ඒ නිසා තමයි අපිට පසුගිය මැතිවරණයේදී ලක්ෂ තිහකට ආසන්න පාක්ෂිකයන් පිරිසක් ඡන්දපොළට එන්නැතුව බලාගෙන සිටියේ. අන්න ඒ නිසා තමයි අපි අලුත් ගමනක් සඳහා පක්ෂයේ නව ව්‍යවස්ථාවක් ඇති කරමින් සියලු දෙනාටම එකට එකතු වෙන්න පුළුවන් පුළුල් සන්ධානයක් නිර්මාණය කරන්න යන්නේ. අපි ඒ තුළින් බලාපොරොත්තු වන්නේ 2024 වර්ෂයේදී ජයග්‍රහණයේ මාවතකට ගෙන ගොස් එක්සත් ජාතික පක්ෂය ප්‍රමුඛ කරගත් ආණ්ඩුවක් බිහි කිරීමටයි.

අපේ අඩුපාඩු තිබෙන්න පුළුවන් හැබැයි දැන් වෙලාව එම අඩුපාඩු හදාගෙන නිහඬව සිටීම පාක්ෂිකයන් අවදි කරගෙන රට සංවර්ධනය කරන්න පුළුවන් මාවත කරා ගෙන යෑමේ වැඩපිළිවෙලට සහාය දෙන ලෙස මම සියලු දෙනාගෙන්ම ඉල්ලීමක් කරනවා. අපි රට හදන වැඩේ සිදු කරන ගමන් එක්සත් ජාතික පක්ෂ පාක්ෂිකයා ශක්තිමත් කරන යාන්ත්‍රණයක් සිදුකල යුතුයි. මෙම ඓතිහාසික සම්මේලනය සිට මම සියලු පාක්ෂිකයන්ට පොරොන්දුවක් දෙනවා අපේ ආණ්ඩුවක් බිහි වුණු දාට සියලුම පාක්ෂිකයාට ප්‍රමුඛතාවය ලබා දී කටයුතු කරන බවට. එක්සත් ජාතික පාක්ෂිකයා හැමදාමත් දර දිය අදින තැන තියන් නැතුව පෙරහරේ යන මාවත කරා රැගෙන යාමටයි අපි කටයුතු කරන්නේ.

අපි මේ වන විට සියලු සියළු පක්ෂ සමඟ සාකච්ඡා කර පුළුල්ම සන්ධානය නිර්මාණය කිරීමේ කටයුතු සිදුකරමින් පවතින මොහොතක් මේ සඳහා සියලුම ජනතාව ඒකරාශී කරන වැඩපිළිවෙළක් අපි මේ වන විට ක්‍රියාත්මක කරමින් පවතිනවා සමහරු අපෙන් අහනවා කෝ ඡන්දෙ කියලා අපි නියම වෙලාවට ඡන්දය තියන්න ලෑස්තියි.

2024 පැවැත්වීමට නියමිත ජනාධිපතිවරණයේ නිර්පාක්ෂික අපේක්ෂකයා ලෙස අපේ නායක රනිල් වික්‍රමසිංහ මහතා ඉදිරිපත් කරන බවත් ඒ තුළින් ලබාගන්නා ජයග්‍රහණයක් එක්ක රට සීඝ්‍ර සංවර්ධනයක් කරා රැගෙන යාමට අපි කටයුතු කරනවා.

පටු දේශපාලන අරමුණු වෙනුවෙන් එක් එක්කෙනා තැන් තැන්වල භේද භින්න ඇතිකරගත යුතු වෙලාවක් නෙමෙයි මේ, හැමදෙනාම එකාමෙන් එකට එකතු වී රට වැටී තිබෙන අර්බුද වලින් ගොඩ ගැනීමට සමගියෙන් සහ සංහිඳියාවෙන් කටයුතු කරන්න මේ විශේෂ සමුළුවේදී අදිටන් කරගමු.

කාලගුණ විද්‍යා දෙපාර්තමේන්තුවේ, ස්වභාවික විපත් පිළිබඳ පූර්ව අනතුරු ඇඟවීමේ මධ්‍යස්ථානය විසින් තද සුළං සහ මුහුද රළු වීම පිළිබඳ අවවාදාත්මක නිවේදනයක් නිකුත් කර තිබේ.

හෙට (23) පස්වරු 02.30 දක්වා මෙම නිවේදනය වලංගු වන බව එහි සඳහන්ය.

එමඟින් දැනුම් දී ඇත්තේ, නිරිතදිග සහ ඊට යාබද - බටහිර බොක්ක ප්‍රදේශයේ යාත්‍රා කරන බහුදින ධීවර යාත්‍රා සඳහා සැලකිලිමත් වෙන ලෙස‍යි.

මධ්‍ය - බටහිර බෙංගාල බොක්ක මුහුදු ප්‍රදේශයේ පැවති අඩු පීඩන කලාපය පීඩන අවපාතයක් දක්වා වර්ධනය වී ඇති අතර, ඉදිරි පැය 24 තුළ දී තවදුරත් ගැඹුරු පීඩන අවපාතයක් දක්වා වර්ධනය වෙමින් බංග්ලාදේශ වෙරළ වෙත (ශ්‍රී ලංකාවෙන් ඉවතට) ගමන් කරනු ඇති බවට බලාපොරොත්තු විය හැකි බව දැනුම් දී තිබේ.

උතුරු අක්ෂාංශ 12 සහ 20ත් නැගෙනහිර දේශාංශ 83 සහ 90ත් අතර මුහුදු ප්‍රදේශවල සුළගේ වේගය පැයට කිලෝ මීටර් (40-45) පමණ වන අතර, විටින් විට පැ‍යට කිලෝ මීටර් (50-60) දක්වා වැඩි විය හැකි බව සඳහන් වේ.

ඉහත කී මුහුදු ප්‍රදේශ රළු හෝ ඉතා රළු වන අතර, තද වැසි හෝ ගිගුරුම් සහිත වැසි ද ඇති විය හැක.

ඒ අනුව, උතුරු අක්ෂාංශ 12 සහ 20ත් සහ නැගෙනහිර දේශාංශ 83 සහ 90ත් අතර මුහුදු ප්‍රදේශවල ධීවර සහ නාවික කටයුතුවල යෙදීමේ දී අවධානයෙන් කටයුතු කරන ලෙස ද දැනුම් දී තිබේ.

එමෙන්ම කාලගුණවිද්‍යා දෙපාර්තමේන්තුව මඟින් මේ සම්බන්ධ ව නිකුත් කරන ඉදිරි නිවේදන පිළිබඳ සිය අවධානය යොමු කරන ‍ලෙස ද ධීවර හා නාවික ප්‍රජාවගෙන් ඉල්ලා ඇත.

ශ්‍රී ලංකාව ලෝකයේ අඩුම බදු අය කරන රටවල් අතරින් එකක් බව ජාත්‍යන්තර මූල්‍ය අරමුදල පවසා ඇත.

වර්තමානයේ රට මුහුණ පා සිටින මූල්‍ය අර්බුදයට එය ප්‍රධාන දායකත්වයක් දක්වා ඇති බවයි ජාත්‍යන්තර මූල්‍ය අරමුදලේ ශ්‍රී ලංකාව සඳහා ජ්‍යෙෂ්ඨ මෙහෙයුම් ප්‍රධානී පීටර් බෲවර් මේ බව ප්‍රකාශ කර ඇත.

ශ්‍රී ලංකාවේ විස්තීර්ණ අරමුදල් පහසුකම් විධි විධාන පිළීබඳ පළමු සමාලෝචනය සම්බන්ධයෙන් පැවති මාධ්‍ය හමුවකදී මෙරට ණය වැඩසටහන සහ ණය ප්‍රතිව්‍යුහගත කිරීමේ ක්‍රියාවලියේ ඇති සංවර්ධනයන් පිළිබඳ මාධ්‍යවේදියෙකු නැගූ ප්‍රශ්නයකට පිළිතුරු දෙමින් ඔහු ඒ බව පවසා ඇත.

2009 වසරේදී සිදු කළ බදු කිරීම් රටට දරාගත නොහැකි වී ඇති බව ඔහු එහිදි පවසා ඇති අතර, රාජ්‍ය ආදායම ඉහළ නැංවීම ණය වැඩසටහනනේ ප්‍රධාන අංගයක් ලෙස ඔහු පැහැදිලි කර ඇත.

ඒ අනුව, ජාත්‍යන්තර මූල්‍ය අරමුදල පෙන්වා දෙන්නේ 2025 වසරේදී දේපළ බද්ද එම වසරේ රජයේ අතිරේක ආදායමේ ප්‍රදාන මූලාශ්‍රයක් වනු ඇති බවයි.

ප්‍රවීණ රූපලාවණ්‍ය ශිල්පි ප්‍රේමසිරි හේවාවසම් අභාවප්‍රාප්ත වී තිබේ.

 අද (22) අලුයම ඇතිවූ හදිසි රෝග තත්ත්වයක් හේතුවෙන් ඔහු හෝමාගම මූලික රෝහලට ඇතුළත් කිරීමෙන් පසු මියගොස් ඇති බව වාර්තාවේ.

මියයන විට ඔහු 64 වන වියෙහි පසුවිය.

ජාතික තරුණ සේවා සභාවෙන් බිහි වූ ප්‍රේමසිරි හේවාවසම්  මෙරට රූපලාවණ්‍ය ක්ෂේත්‍රයේ කැපී පෙනෙන දායකත්වයක් දැක්වූ අයෙකු වන අතර තිස් දහසකට අධික සිසු සිසුවියන් පිරිසකට රූපලාවණ්‍ය ශිල්පය බෙදා දී තිබේ.

තරුණි පුවත්පත මෙන්ම ජාතික රූපවාහිනී නුග සෙවන හරහා තම දැනුම බෙදා දුන් අපූරු නිර්මාණ ශිල්පියෙකු ලෙසට ප්‍රේමසිරි හේවාවසම්  සැලකේ.

දිවයිනේ බොහෝ ප්‍රදේශවල අද (ඔක්. 22) පස්වරු 1:00න් පමණ පසු වැසි හෝ ගිගුරුම් සහිත වැසි ඇති වන බව කාලගුණ විද්‍යා දෙපාර්තමේන්තුව පවසයි.

බස්නාහිර, දකුණ, උතුරු සහ උතුරුමැද පළාත්වල උදෑසන කාලයේදී ද වැසි හෝ ගිගුරුම් සහිත වැසි ඇති විය හැක.

බස්නාහිර, සබරගමුව, ඌව, මධ්‍යම, නැගෙනහිර සහ දකුණු පළාත්වල ඇතැම් ස්ථානවලට මි.මී. 100ක පමණ තද වැසි ද ඇති විය හැකි බව එම දෙපාර්තමේන්තුව වැඩිදුරටත් පැවසීය.

ආණ්ඩුක්‍රම ව්‍යවස්ථාවට අනුව 2024දී ජනාධිපතිවරණය පැවැත්වෙන බව ජනාධිපති රනිල් වික්‍රමසිංහ  පවසයි.

ඉන් අනතුරුව මහමැතිවරණයක් පැවැත්වෙන බවත් ජනාධිපතිවරයා සඳහන් කළේය.

ජනාධිපති රනිල් වික්‍රමසිංහ  අද (21) මේ බව සඳහන් කළේ එක්සත් ජාතික පක්ෂයේ පක්ෂ සම්මේලනය අමතමින්ය.

කොළඹ සුගතදාස ගෘහස්ත ක්‍රීඩාංගණයේදී පක්ෂ සම්මේලනය පැවැත්වුණි.

දුම්රිය ගමන් වාර එක් ලක්ෂ විසි දහස් නවසිය අනූ තුනක් (120993) පසුගිය වසරේ ධාවනයට නියමව ඇතත් ඉන් නියමිත වේලාවට ධාවනයවී ඇත්තේ දුම්රියන් 32,844 ක් පමණක් බව ජාතික විගණන කාර්යාලය නිකුත් කළ වාර්තාවක සඳහන් වේ.

එම වාර්තාව සඳහන් කරන ආකාරයට අවලංගුවී තිබූ දුම්රිය වාර ගණන එක් ලක්ෂ හැත්තෑ හතක් (10077) ක් ය.

ඒ අනුව දුම්රියන්ගෙන් 72%ක් නියමිත පරිදි ධාවනයවී නොතිබුණු බව ජාතික විගණන කාර්යාල වාර්තාව සඳහන් කරයි.

මේ අතර දුම්රිය එන්ජින් 23 ක් සහ බලවේග කට්ටල 36 ක් පසුගිය වර්ෂයේදී භාවිතයට නොගෙන පැවතුණු බවද එහි සඳහන් වෙයි.

දීර්ඝ කාලයක සිට ශ්‍රී ලංකාවේ සමස්ත මගී ප්‍රවාහනයෙන් සියයට හයක් හා භාණ්ඩ ප්‍රවාහනයෙන් සියයට 6.5 ක දායකත්වය දෙන දුම්රිය සේවය එකී දායකත්වය ඉහළ නංවා ගැනීමට අපොහොසත් ව තිබූ බව පවසන එම වාර්තාව 1934 දී දුම්රිය මාර්ග ජාලය කිලෝමීටර් 1521 වුවද 2021 වර්ෂය වන විට එය කිලෝමීටර් 1465 ක් දක්වා කිලෝමීටර් 56කින් අඩුවී තිබූ බවද සඳහන් කරයි.

එම අඩුවීම වාර්තාවී ඇත්තේ බෙලඅත්ත දක්වාවූ කිලෝ මීටර් තිස් දෙකක්ද අලුතින් එක්වීමෙන් පසුවවීම විශේෂත්වයක් බවත් විගණන වාර්තාවේ සඳහන් කර ඇත .

ඇහැලියගොඩ පොලිස්ථානාධිපති ප්‍රධාන පොලිස් පරීක්‍ෂක ප්‍රියංකර ද සිල්වා වෙඩි වැදිමෙන් 21දා අලුයම මියගොස් ඇති බව ඇහැළියගොඩ පොලිසියේ ආරංචි මාර්ග සඳහන් කරයි.

වෙඩි තැබීම සිදුව ඇත්තේ පොලිස්ථානාධිපතිවරයා නැවතී සිටි නිලනිවස තුලදී බවත් එහිදී හිසේ දකුණු කණ පැත්තෙන් වෙඩිවැදුන බවට සැකකළ හැකි ලේ වහනය වන තුවාලයක් ඇති බව ද එම ආරංචි මාර්ග පවසයි .

ප්‍රියංකර ද සිල්වා යන ප්‍රධාන පොලිස් පරීක්‍ෂකවරයා මෙසේ මියගොස් ඇති අතර ඔහු කලුතර ප්‍රදේශයේ පදිංචි හතළිස් දෙවැනි වියේ පසු වු දෙදරු පියකු බවත් වාර්තා වෙයි .

මෙම සිදුවීම සිය දිවි නසා ගැනීමක් ද නැත්නම් අපරාධයක් ද යන්න පිළිබඳව වැඩිදුරටත් පොලිස් පරීක්ෂණ සිදුවන බවත් දැනගන්නට ඇත.

එක්සත් ජාතික පක්ෂයේ විශේෂ මහ සම්මේලනය පක්ෂ නායක ජනාධිපති වික්‍රමසිංහ ගේ ප්‍රධානත්වයෙන් සුගතදාස ගෘහස්ථ ක්‍රිඩාංගණයේදී අද (21) පැවැත්වේ.

පක්ෂයට නව ව්‍යවස්ථාවක් හඳුන්වා දීම මෙහිදී සිදු කෙරේ.

මේ සම්මේලනය මුළු රටටම වැදගත් වන බවත්, රට බංකොලොත් වීමෙන් පසු මුළු ලෝකයේම සහයෝගය ගෙන රට යථා තත්ත්වයකට ගෙන ඒමට ජනාධිපතිවරයා ක්‍රියා කරන බවත් පක්ෂයේ සභාපති පාර්ලිමේන්තු මන්ත්‍රී වජිර අබේවර්ධන පැවසීය. චීන සංචාරයෙන් පසු ප්‍රථම වතාවට ජනාධිපතිවරයා මේ සම්මේලනයේදී ජනතාව අමතමින් වැදගත් පණිවිඩයක් රටට දෙනු ඇති බවත් ඔහු සඳහන් කළේය.

සියලු ජාතීන් එක් කරගෙන ශ්‍රී ලංකාව ආසියාවේ බලවත් ජාතිකයක් බවට පත් කිරීමට ජනාධිපති වික්‍රමසිංහ මාර්ගය පෙන්වා දී ඇති බවත්, ඒ මාවතේ ගමන් කිරීමට අවශ්‍ය නව තාක්ෂණය සමඟ ජාතික සහ ආර්ථික නිදහස දිනාගැනීමට මුළු රටේම සහාය ගැනීමට හැකි වන පක්ෂ ව්‍යස්ථාවක් හඳුන්වා දෙන බවත් වජිර අබේවර්ධන තවදුරටත් සඳහන් කළේය.

සම්මේලනයට සහභාගි වීමට වෘත්තියවේදීන්, බහු ජන සංවිධාන, සිවිල් සංවිධාන ඇතුළු පාර්ශ්ව රාශියක් ඉල්ලා ඇති අතර, පක්ෂ ව්‍යවස්ථාව අනුමත කිරීමට හැකි පිරිස්වලට සම්මේලනයට ආරාධනා කර ඇති බව පක්ෂයේ මහ ලේකම් පාලිත රංගේ බණ්ඩාර පැවසීය.

අද පැවැත්වෙන සම්මේලනයේ සංවිධාන කටයුතුවල මුලික වගකීම පැවරී ඇත්තේ අමාත්‍ය හරින් ප්‍රනාන්දු වෙතයි.

අද පැවැත්වෙන සම්මේලනයේදී පක්ෂයේ තනතුරුවල වෙනසක් සිදුනොවන බව 'සිරිකොත' එජාප මුලස්ථාන ආරංචිමාර්ග පවසයි.

සෙලින්කෝ සමූහ ව්‍යාපාරයේ හිටපු සභාපති සහ සෙලාන් බැංකුවේ ආරම්භක සභාපතිවරයා ද වන ලලිත් කොතලාවල අභාවප්‍රාප්ත වී තිබේ.

නාරාහේන්පිට පිහිටි පෞද්ගලික රෝහලක ප්‍රතිකාර ලබමින් සිටියදී අද (ඔක්. 21) උදෑසන ඔහු මියගොස් ඇතැයි වාර්තා වේ.

මිය යන විට ඔහු 84 වන වියේ පසු විය

චීනයේ සිව් දින නිල සංචාරයක නිරත වූ ජනාධිපති රනිල් වික්‍රමසිංහ එම සංචාරය නිමා කර ඊයේ (20) රාත්‍රී කටුනායක ගුවන් තොටුපොළ වෙත පැමිණි බව එහි කාර්යය භාර නිලධාරීවරයා පැවසීය .

එසේම එතුමා සමග මෙම සංචාරය සදහා සහභාගී වූ දූත පිරිස ද කටුනායක ගුවන් තොටුපොළ වෙත පැමිණ තිබුණි .

චීනයේ පැවති ” එක් තීරයක් – එක් මාවතක් ” වැඩසටහනේ දස වන සංවත්සරයට සහභාගී වීම , ශ්‍රී ලංකාව චීනයෙන් ලබා ගෙන ඇති ණය ප්‍රතිව්‍යුහගත කිරීම සහ චීන ජනාධිපතිතුමා ඇතුළු එරට උසස් නිලධාරීන් සමග විශේෂ සාකච්ඡාවක නිරත වීමට ද මෙම ශ්‍රී ලංකා ජනාධිපතිතුමා ඇතුළු දූත පිරිස කටයුතු කර තිබුණි .