පුවත්

ශ්‍රී ලංකාවේ ණය ප්‍රතිකර්ම වැඩසටහන වෙනත් රටවල ක්‍රියාත්මක කරන වැඩසටහන්වලට සාපේක්ෂව ඉතා වේගයෙන් සිදුවන බව ඉන්දීය මුදල් අමාත්‍ය නිර්මලා සීතාරාමන් පවසයි.

ඇය මේ බව සඳහන් කර සිටියේ මොරොක්කෝවේ, මරකේෂ් හී පැවැත්වෙන ජාත්‍යන්තර මූල්‍ය අරමුදලේ සහ ලෝක බැංකුවේ වාර්ෂික සමුළුවට සමගාමීව පැවැත්වු මාධ්‍ය හමුවක් අමතමින් ය.

එහිදී අදහස් දැක්වූ ඉන්දීය මුදල් අමාත්‍ය නිර්මලා සීතාරාමන්, මෙසේද සඳහන් කළාය.

"ශ්‍රී ලංකාව දුෂ්කරතාවයට මුහුණ දෙද්දි එය මැදි ආදායම් ලබන රටක්. නමුත් කොවිඩ් බලපෑම් සහ ඇතිවූ අස්ථාවරයන් හමුවේ එම තත්ත්වය පහතට වැටුණා. ශ්‍රී ලංකාව අඩු ආදායම් ලබන රටක් බවට පත්වුණා. මැදි ආදායම් රටක් වූ ශ්‍රී ලංකාව මුහුණ පෑ අර්බුදය නිසා එය පොදු රාමුවක් තුළ විසඳාගත නොහැකි තත්ත්වයක් බවට පත්වුණා. ඒ නිසයි පොදු රාමුවක් තුළ මෙම අර්බුදය ආමන්ත්‍රණය කිරීමට සුදුසුකම් ලැබිය නොහැකි තත්ත්වයකට පත්වුණේ."

"මම සිතන්නේ අනෙක් බොහෝ ඒවාට සාපේක්ෂව, ජාත්‍යන්තර මූල්‍ය අරමුදල හරහා ශ්‍රී ලංකාව ලබාගන්න විසඳුම් ඉතා යහපත් මට්ටමක පවතිනවා වගේම ඉතා වේගවත්. මම අන් අයට එරෙහිව පොදු රාමුව ගැන තීන්දුවක් ලබාදෙන්නේ නැත. නමුත් පොදුවේ අද ජාත්‍යන්තර මූල්‍ය අරමුදලේ සහ තවත් බොහෝ ආයතනවල එම ක්‍රම්වේදය වේගවත් විය යුතු බවට පැවැසෙනවා. එහිදී ශ්‍රී ලංකාවේ යෝජනා වඩා වේගයෙන් සිදුවෙමින් පවතිනවා."

"ජාත්‍යන්තර මූල්‍ය අරමුදල සමග හා ඉන්දීය සභාපතිත්වය හිමි ලෝක බැංකුව සමග ස්වෛරීත්ව ණය සම්බන්ධයෙන් ණයහිමි කමිටු පිහිටුවීමේදී, ශ්‍රී ලංකාවේ ණය අර්බුද ගැටලුව පිළිබඳව අප සාකච්ඡා කළා. ඒ වගේම එම තත්ත්වය ඉදිරි අනාගතයේ ඕනෑම රටක් සඳහා යොදාගත හැකි ආකාරයෙන් සැලකිල්ලට ගත යුතුයි. එම ක්‍රමවේදය මගින් ඉතා වේගවත් ලෙස විසඳුම් ලබාදෙමින් ක්‍රියාවට නැංවිය හැකි බවයි මම සිතන්නේ."

ඉන්දියාවේ නාගපට්ටිනම් වරාය හා ශ්‍රී ලංකාවේ කන්කසන්තුරේ වරාය අතර මගී යාත්‍රා සේවාව අද (14) සිට ආරම්භ විය.

වරාය හා නාවික අමාත්‍යාංශය සඳහන් කරන ආකාරයට නාගපට්ටිනම් වරායෙන් අද පෙරවරුවේ මගීන් 50 දෙනකු රැගෙන පිටත් වූ පළමු යාත්‍රාව දහවල් වන විට කන්කසන්තුරේ වරායට ළඟාවී තිබේ .

අනතුරුව පැය කීහිපයකට පසු මගින් 30 දෙනකු පමණ රැගත් යාත්‍රාව පස්වරු 2.00 ට පමණ කන්කසන්තුරේ වරායෙන් ඉන්දියාවේ නාගපට්ටිනම් වරාය වෙත පිටත්ව ගොස් තිබේ.

ඉන්දියාවේ රාජ්‍ය නැව් සමාගම මගින් සුඛෝපභෝගී යාත්‍රාවක් මේ සදහා යොදවා ඇති අතර එහි එකවර මගීන් 150 කට පමණ ගමන් කිරීමට හැකි බව ද අමාත්‍යාංශය සඳහන් කරයි.

ඉන්දියාවේ සිට කන්කසන්තුරේ වරාය වෙත ළගා වූ මගී යාත්‍රාව පිළිගැනීම වරාය, නාවික හා ගුවන් සේවා අමාත්‍ය නිමල් සිරිපාල ද සිල්වා විසින් සිදු කෙරිණ.

අද පස්වරු 2.30 සිට අද රාත්‍රී 11.30 දක්වා වලංගු වන පරිදි කාලගුණ විද්‍යා දෙපාර්තමේන්තුවෙන් ප්‍රබල අකුණු පිළිබඳව අවවාදාත්මක නිවේදනයක් නිකුත් කර තිබේ.

ඊට අනුව උතුරු, උතුරු-මැද, මධ්‍යම, ඌව සහ සබරගමුව පළාත්වල සවස් කාලයේදී හෝ රාත්‍රී කාලයේදී තැනින්තැන ගිගුරුම් සහිත වැසි සමග ප්‍රබල අකුණු ඇතිවීමේ වැඩි හැකියාවත් පවතී.

ගිගුරුම් සහිත වැසි ඇති වනවිට එම ප්‍රදේශවල තද සුළං ඇතිවිය හැකි අතර අකුණු මගින් සිදුවන අනතුර අවම කරගැනීමට අවශ්‍ය පියවරගන්නා ලෙස කාලගුණ විද්‍යා දෙපාර්තමේන්තුව ජනතාවගෙන් ඉල්ලීමක් ද කරයි.

කොළඹ, කොටුව මහේස්ත්‍රාත් අධිකරණයේ රෙජිස්ට්‍රාර්වරිය අපරාධ පරීක්ෂණ දෙපාර්තමේන්තුවේ නිලධාරීන් විසින් අත්අඩංගුවට ගනු ලැබ තිබේ.

ඒ, විදෙස් ගමන් තහනමකට ලක්ව සිටි සැකකරුවෙකුට රටින් පිටවීම සඳහා ආගමන විගමන පාලකවරයා වෙත අදාළ සැකකරුගේ විදෙස් ගමන් තහනම ඉවත් කළ බව පවසමින් ව්‍යාජ ලේඛන සැකසීමේ චෝදනාව මත ය.

කොටුව මහේස්ත්‍රාත් තිළිණ ගමගේ මේ සම්බන්ධයෙන් අපරාධ පරීක්ෂණ දෙපාර්තමේන්තුවට කළ පැමිණිල්ලකට අනුව මෙම අත්අඩංගුවට ගැනීම සිදුකර තිබේ.

අදාළ ලිපිය යතුරුලියනය කළ, නඩු ගොනු රඳවා තබන ස්ථානයේ නිලධාරීන් ඇතුළු පිරිසකගෙන් ද අපරාධ පරීක්ෂණ දෙපාර්තමේන්තුව ප්‍රකාශ ලබා ගෙන ඇතැයි සඳහන් ය.

ඒ අනුව ඇයව ඔක්තෝබර් 25 වනදා දක්වා රක්ෂිත බන්ධනාගාරගත කර ඇති බවද වාර්තා වෙයි.

ජපාන - ශ්‍රී ලංකා නිදහස් වෙළෙඳ කලාපයක් මෙරට ඇති කිරීමට අවශ්‍ය කටයුතු සූදානම් කරමින් පවතින බව ආයෝජන ප්‍රවර්ධන රාජ්‍ය අමාත්‍ය දිලුම් අමුණුගම  පැවසීය.

ඒ සඳහා බිංගිරිය හා ඉරණවිල යන ප්‍රදේශ තෝරාගෙන තිබෙන බවත් අමාත්‍යවරයා සඳහන් කළේය.

ආයෝජන ප්‍රවර්ධන රාජ්‍ය අමාත්‍ය දිලුම් අමුණුගම මේ බව සඳහන් කර සිටියේ 'ස්ථාවර රටකට සැවොම එක මඟකට' මැයෙන් ඊයේ (13) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

එහිදී වැඩිදුරටත් අදහස් දැක්වූ රාජ්‍ය අමාත්‍ය දිලුම් අමුණුගම  ‍මෙසේ ද පැවසීය.

මේ වන විට වරාය නගරය ආශ්‍රිත ඉදිකිරීම්වල ප්‍රගතියක් පෙනෙන්නට තිබෙනවා. වරාය නගරය තාවකාලිකව මහජනතාවටත් විවෘත කිරීමට පසුගිය සමයේ අප කටයුතු කළා.

තෙවැනි පාර්ශ්වීය ගිවිසුමක් යටතේ මෙම වරාය නගරයේ ඉදිකිරීම් කටයුතු සිදු වෙමින් පවතින බව කිවයුතුයි. ඇමරිකානු ඩොලර් බිලියන 15ක් මේ සඳහා වෙන් කර තිබෙන අතර චයිනා හාබර් සමාගමෙන් සිදුකරන ඉදිකිරීම්වලින් 80%ක වැඩ කටයුතු දැනටමත් අවසන් කර තිබෙනවා.

වරාය නගරය තුළ ව්‍යපාරයක් කිරීමට අවශ්‍ය නීතිමය රාමුව මේ වන විට සකස් කර අවසන්. මෙහෙයුම් රෙගුලාසි කිහිපයක් සඳහා ද පාර්ලිමේන්තුවේ අනුමැතිය ලබා ගැනීමට නියමිතව තිබෙන බව ද සඳහන් කළ යුතුයි.

මේ වන විටත් ඇමරිකානු ඩොලර් බිලියන 1.6ක පමණ ආයෝජන ලැබී තිබෙන නමුත් නීතිමය රාමුව සකස් කරන තුරු ඔවුන්ට බලා සිටීමට සිදු වුණා. ඒ අනුව ඉදිරියේ දී මෙම ආයෝජන ආරම්භ කිරීමට සැලසුම කර තිබෙනවා.

සම්පූර්ණ ව්‍යාපාර කටයුතු සඳහා අළෙවි කළ හැකි බිම් කොටස් ගණන 74ක් මෙම ව්‍යාපෘතියට ඇතුළත් වනවා. එමෙන්ම පොදු කටයුතු සඳහා භාවිතා කරන බිම් කැබලි 44 ක් මෙහි තිබෙනවා. ඒ අනුව සම්පුර්ණ ඉඩම් කොටස් 118ක ආයෝජන මෙහි තිබෙනවා.

මීට අමතරව ජපන් - ශ්‍රී ලංකා නිදහස් වෙළෙඳ කලාපයක් සඳහා අවශ්‍ය කටයුතු මේ වන විට සිදු වෙමින් පවතිනවා. බිංගිරිය ප්‍රදේශය හා ඉරණවිල ආශ්‍රිතව මෙම ව්‍යාපෘතිය සිදු කිරීම රජයේ සැලසුමයි.

ජපානයේ ශ්‍රී ලංකා ව්‍යාපාරික සභාව තුළ ඉහළ පෙළේ ව්‍යාපාරිකයන් විශාල පිරිසක් සිටිනවා. ශ්‍රී ලංකාව තුළ නිදහස් වෙළෙඳ කලාප ඇති කිරීමට ඔවුන් කැමැත්ත ප්‍රකාශ කර තිබෙනවා. ඒ සඳහා අවශ්‍ය කටයුතු සිදු කිරීමට අප පියවර ගෙන තිබෙන බව ද සඳහන් කළයුතුයි.

මහින්ද රාජපක්ෂ පාලන සමයේ (2010-2015) ඉදිකිරීම් ඇරඹූ යාපනය ජනාධිපති මන්දිර පරිශ්‍රය ශ්‍රී ලංකා තොරතුරු තාක්ෂණ ආයතනයට (SLIIT) බදුදීමට රජය තීරණය කර තිබේ.

මෙම මන්දිර පරිශ්‍රය කන්කසන්තුරේ අක්කර 29ක භූමි භාගයක පිහිටා තිබෙන අතර ඉන් අක්කර 12ක් තුළ ගොඩනැගිලි සංකීර්ණ පිහිටා ඇත.

ජනාධිපති මන්දිර පරිශ්‍රයේ ඉතිරි භූමි ප්‍රමාණය ප්‍රදේශයේ ජනතාවගෙන් පවරාගනු ලැබූ ඉඩම්වලින් සමන්විත වෙයි.

ජනාධිපති කාර්ය මණ්ඩල ප්‍රධානි හා ජාතික ආරක්ෂාව පිළිබඳ ජනාධිපති උපදේශක සාගල රත්නායකගේ ප්‍රධානත්වයෙන් පැවැති සාකච්ඡාවකදී මෙම සම්පූර්ණ ඉඩම බදු දීමේ තීරණයට එළඹ තිබේ.

කන්කසන්තුරේ පිහිටි මෙම මන්දිර පරිශ්‍රයට අක්කර 29 ක භූමියක් අයත් වන අතර එයින් අක්කර 12ක ගොඩනැගිලි සංකීර්ණ පිහිටා තිබේ.

ඉතිරි ප්‍රමාණය ප්‍රදේශයේ ජනතාවගෙන් පවරා ගනු ලැබූ ඉඩම් වන අතර රජයට අයත් අක්කර 12ක ප්‍රමාණය මුලින් SLIIT ආයතනයට බදු දීමට තීරණය කෙරිණි.

ජනතාවගෙන් පවරා ගනු ලැබූ ඉතිරි අක්කර 17ක භූමි ප්‍රදේශය ද එම ජනතාවට ආදායමක් ලැබෙන පදනමක් මත SLIIT ආයතනයට බදු පදනමට ලබා දීමට තීරණය කෙරිණි.

දැනට මෙම ඉඩම නාවික හමුදා භාරයේ පවතින අතර අදාල බදු ගිවිසුම අත්සන් කළ පසුව එම පරිශ්‍රය ශ්‍රී ලංකා තොරතුරු තාක්ෂණ ආයතනය වෙත මුදා හැරීමට නියමිතය.

පොලිස්පති ධූරයේ වැඩ බැලීම සඳහා සී. ඩී. වික්‍රරමරත්නට තවදුරටත් සති තුනක කාලයක් ලබාදීමට ජනාධිපතිවරයා තීරණය කර ඇතැයි ජනාධිපති කාර්යාල ආරංචිමාර්ග පවසයි.

මහජන ආරක්ෂක අමාත්‍ය ටිරාන් අලස් මේවනවිට විදේශ නිල සංචාරයක නිරතව සිටින නිසාත්, ජනාධිපතිවරයා නිල සංචාරයක් සඳහා හෙට දිනයේ චීනය වෙත යාමට නියමිත නිසාත් ඔවුන් යළි දිවයිනට පැමිණ නිශ්චිත තීන්දුවක් ගන්න තෙක්, මෙම තීන්දුව ගෙන ඇතැයි පැවසේ.

පොලිස්පති ධූරයේ වැඩ බැලීම සඳහා සී. ඩී. වික්‍රරමරත්නට දෙවැනි වරට ලබා දී තිබු මාස 3ක කාලය ඔක්තෝම්බර් 09 දා අවසන් විය.

පසුගිය ජුනි මස 09 දින සිට බැලපැවැත්වෙන පරිදි ජනාධිපති රනිල් වික්‍රමසිංහ මෙම සේවා දිගුව ලබා දී තිබුණි.

ශ්‍රි ලංකාවේ 35 වැනි පොලිස්පතිවරයා වශයෙන් 2020 නොවැම්බර් මස පත් වු පොලිස්පති සී. ඩී. වික්‍රමරත්න පසුගිය මාර්තු මස 25 වැනි දින පොලිස්පති ධුරයෙන් විශ්‍රාම යාමට නියමිතව තිබු අතර ජනාධිපති රනිල් වික්‍රමසිංහ ඔහුට මාස 3 ක සේවා දිගුවක් ලබා දුන්නේය.

පළමු සේවා දිගුව අවසන් වීමෙන් පසුව දෙවන සේවා දිගුව ඉකුත් ජුනි මස 09 දින සිට බලපැවැත්වෙන පරිදි මාස තුනක කාලයක් සදහා ලබා දී තිබුණි.

රජයේ ආදායම් ඉහළ දැමීම සඳහා මෙරට ජනතාවට නව බදු පැනවීමක් සිදුකළ නොහැකි බවට ජනාධිපතිවරයා ප්‍රකාශ කළ බව මුදල් රාජ්‍ය අමාත්‍ය රංජිත් සියඹලාපිටිය පවසයි.

ඔහු ඒ බව දැනුම් දී ඇත්තේ, රාජ්‍ය ආදායම් ඉහළ නැංවීමේ අරමුණින් ආදායම් උපයනු ලබන දෙපාර්තමේන්තුවල ප්‍රධානීන් සමග අද මුදල් අමාත්‍යාංශයේදී පැවති සාකච්ඡාවකදී ය.

ආදායම් උපයන දෙපාර්තමේන්තුවල ආදායම් ඉලක්ක සපුරා ගැනීම කඩිනම් කිරීම සඳහා එම සාකච්ඡාව පැවතිණි.

රාජ්‍ය අදායම ඉහළ නංවා ගත යුතු අතර අදායම් ඉලක්ක වෙත කඩිනමින් යා යුතු වුව ද, ජනතාවට නව බදු පැනවීමක් සිදුකළ නොහැකි බව ය.

පවතින ක්‍රමවේදය තුළ ආදායම් බදු නොගෙවන්නන්ගෙන් බදු අය කර ගත යුතු බව ද අමාත්‍යවරයා පෙන්වා දී තිබේ.

ගාසා තීරයේ උතුරු කොටසේ සිටින සියලු ම ජනතාවට ඉදිරි පැය 24ක් තුළ ගාසා තීරයේ දකුණු දෙසට ගමන් කරන ලෙස ඊශ්‍රායල බලධාරීන් දැනුම් දී ඇතැයි එක්සත් ජාතීන්ගේ සංවිධානය පවසයි.

විදෙස් මාධ්‍ය වාර්තා කරන්නේ, ගාසා තීරයේ උතුරු කොටසේ මිලියන 1.1ක ජනතාවක් ජීවත් වන බව ත් එය ගාසා තීරයේ ජනගහනයෙන් හරි අඩක් බව ත් ය.

ඊශ්‍රායල හමුදාව ඍජුව ම ගාසා නගරයේ වැසියන් අමතා ඔවුන්ට පවසා ඇත්තේ, ඔවුන්ගේ “ආරක්ෂාව” සඳහා ඉන් පිටත්ව යන ලෙස ය.

උතුරු ගාසා තීරයේ ජනතාව මෙම දේශසීමා පසු කිරීමේදී ඔවුන්ට දැඩි විනාශකාරී හානියක් සිදුවනු ඇති බවට බලාපොරොත්තු විය හැකි බැවින් මෙම නියෝගය අවලංගු කරන ලෙස ඊශ්‍රායලයෙන් එක්සත් ජාතීන්ගේ සංවිධානය ඉල්ලීමක් ද සිදු කර තිබේ.

හමාස් සටන්කාමී කණ්ඩායම මුලිනුපුටා දැමීම සඳහා ඊශ්‍රායලය ගාසා තීරයට ගොඩබිම ඔස්සේ ප්‍රහාරයක් එල්ල කිරීමට අපේක්ෂා කරන අතරතුර මෙම අනතුරු ඇඟවීම සිදු කර ඇති බව විදෙස් මාධ්‍ය වාර්තා කර ඇත.

හමාස් සටන්කාමී කණ්ඩායම ඊශ්‍රායලයේ අවම වශයෙන් පුද්ගලයන් 150 දෙනෙක් පැහැරගෙන ගාසා තීරයට ගෙන ගොස් ඇති අතර ඊශ්‍රායල වැසියන් 1,300ක් පමණ ඔවුන් එල්ල කළ ප්‍රහාරයවලින් ජීවිතක්ෂයට පත්ව තිබේ.

ඊශ්‍රායලය එල්ල කළ ප්‍රතිප්‍රහාරවලින් ගාසා තීරයේ පුද්ගලයන් 1400කට වැඩි පිරිසක් මිය ගොස් ඇති බව පලස්තීන සෞඛ්‍ය බලධාරීහු සඳහන් කරති.

නසීර් අහමඩ්  දැරූ පරිසර අමාත්‍ය ධුරය ජනාධිපතිවරයා යටතට පවරා ගෙන තිබේ.

ඒ, අතිවිශේෂ ගැසට් නිවේදනක් නිකුත් කරමිනි.

ශ්‍රී ලංකා මුස්ලිම් කොංග්‍රසයේ සමාජිකයෙකු වූ නසීර් අහමඩ් පක්ෂයේ ස්ථාවරයෙන් බැහැරව අමාත්‍ය ධුරයක් ලබා ගැනීම හේතුවෙන් එම පක්ෂය නිතිමය ක්‍රියාමාර්ග ගනු ලැබීය.

එහිදී ඔහුට අධිකරණය දුන් නියෝගයක් හේතුවෙන් පාර්ලිමේන්තු අසුන ද අහිමි විය.

මාර්ගගත ක්‍රමවල සුරක්ෂිතභාවය පිළිබඳ පනතේ තිබෙන කරුණු බොහෝමයක් අධිකරණයේදී ප්‍රතික්ෂේප වන බවත් මේ පනත ව්‍යවස්ථාවට පටහැනි බව අධිකරණය ප්‍රකාශ කරන බවත් රටේ තිබෙන ප්‍රජාතන්ත්‍රවාදී ජීවන රටාවට මේ පනත පටහැනි බවත් එනිසා මේ පනත වහාම ඉල්ලා අස්කර ගන්නා ලෙස රජයට බලකර සිටින බවත් සමගි ජනබලවේගයේ පාර්ලිමේන්තු මන්ත්‍රී ඉරාන් වික්‍රමරත්න පැවැසීය.

අදහස් ප්‍රකාශ කිරීමට සිවිල් සමාජයට අයිතියක් තිබෙන බවත් ඒ අයිතිය අඩු කිරීමේ වැඩපිළිවෙලක් මේ පනත හරහා සිදුකරගෙන යන බවත් මෙම පනත හරහා පුරවැසි අරගල පාලනය කරන්න ආණ්ඩුව උත්සහ කරන බවත් ඔහු සඳහන් කළේය.

සමාජ මාධ්‍ය හරහා සිදුකරන අකටයුතු ක්‍රියාවලට දඩුවම් ලබාදීමට මාර්ගගත ක්‍රමවල සුරක්ෂිතභාවය පිළිබඳ පනත අවශ්‍ය නොවන බවත් එවැනි ක්‍රියාවලට දඩුවම් ලබාදෙන්න ඕනෑතරම් නීති රීති රටේ තිබෙන බවත් ඔහු ප්‍රකාශ කළේය.

ඉරාන් වික්‍රමරත්න මන්ත්‍රීවරයා මේ බව ප්‍රකාශ කළේ අද (11) කොළඹ විපක්ෂ නායක කාර්යාලයේ පැවැති මාධ්‍ය හමුවකදීය.

එහිදී වැඩිදුරටත් අදහස් දැක්වූ ඉරාන් වික්‍රමරත්න මෙසේ ද පැවැසීය.

‘‘ මාර්ගගත ක්‍රමවල සුරක්ෂිතභාවය පිළිබඳ පනත රජය ඉදිරිපත් කරලා තියෙන්නේ රටේ කාන්තාවන් රටේ දරුවන් ආරක්ෂා කරන්න නෙවෙයි. මේ පනත රජය ඉදිරිපත් කරලා තියෙන්නේ වෙනත් අරමුණකින්. සමාජ මාධ්‍ය පමණක් නෙවෙයි සමස්ථ මාධ්‍ය පාලනය කිරීම සඳහා යොදා ගන්නා පනතක්.''

සාමාන්‍යයෙන් පනතක් ඉදිරිපත්කරන විට රටේ ලොකු සාකච්ඡාවක් තිබෙනවා. ජන සමාජ එක්ක සිවිල් සමාජ ආයතන සමඟ පාර්ලිමේන්තුවේ සාකච්ඡා කරනවා කැබිනට් මණ්ඩලයේ සාකච්ඡා කරනවා නීතිපති දෙපාර්තමේන්තුවට ඒ පනත යොමු කරනවා නැවත පාර්ලිමේන්තුවට යොමුකරනවා පාර්ලිමේන්තු කමිටු වලට යොමුකරනවා අවසානයේ තමයි ගැසට් කරන්නේ. සති දෙකක් තුළ අධිකරණයට යොමුකරලා ව්‍යවස්ථාවට පටහැනිද නැද්ද කියලා සොයාබලා නැවත පාර්ලිමේන්තුවට යොමුකරලා තමයි ඡන්දයක් තියන්නේ.

මාර්ගගත ක්‍රමවල සුරක්ෂිතභාවය පිළිබඳ පනත හරහා කොමිසමක් පිහිටුවන්න අවශ්‍ය බව ප්‍රකාශ කරනවා. කොමිසම කියන වචනය භාවිතා කරපු ගමන් සියලුදෙනා හිතන්නේ මේක ස්වාධීන දෙයක් කියලා. මාර්ගගත ක්‍රමවල සුරක්ෂිතභාවය පිළිබඳ පනත හරහා පත් කරන කොමිසමේ සමාජිකයන් පත් කරන්නේ ජනාධිපතිවරයා. මේ කොමිසම ව්‍යවස්ථාදායක සභාවට එන්නේ නෑ. මේක ඒකාධිකාර වැඩපිළිවෙලක්.

මේ වැඩපිළිවෙලන් විධායක ව්‍යවස්ථාදායක අධිකරණ බලතල සියල්ල එක තැනකට ගන්නවා. ජනාධිපතිවරයාට ඕන අය තමයි මේ කොමිසමට දාන්නේ. කාටවත් මේ ගැන ප්‍රශ්න කරන්න බෑ. ඒ පත්කරන කොමිසන් සභාව තමයි නීති රීති හදන්නේ.

මේ පනතට අධිකරණයට අරගෙන ගියාම අධිකරණය බලන්නේ ව්‍යවස්ථාවට පටහැනිද නැද්ද කියලා. මාර්ගගත ක්‍රමවල සුරක්ෂිතභාවය පිළිබඳ පනතේ කරුණු බොහෝමයක් අධිකරණයේදී ප්‍රතික්ෂේප වෙනවා. අධිකරණය ප්‍රකාශ කරයි මේ පනත ව්‍යවස්ථාවට පටහැනියි ඒ නිසා මේ පනතේ වෙනස්කම් කළ යුතුයි කියලා. රටේ තිබෙන ප්‍රජාතන්ත්‍රවාදී ජීවන රටාවට මේ පනත පටහැනියි. අපි කියන්නේ රජයට මේ පනත වහාම ඉල්ලා අස්කර ගන්න කියලා.

අදහස් ප්‍රකාශ කරන්න සිවිල් සමාජයට අයිතියක් තියෙනවා. ඒ අයිතිය අඩු කිරීමේ වැඩපිළිවෙලක් මේ පනත හරහා සිදුකරගෙන යනවා.කතා කිරීමේ අදහස් ප්‍රකාශ කිරීමේ අවකාශය අඩු කිරීමේ වැඩපිළිවෙලක් මේ පනත හරහා සිදුකරනවා. ප්‍රජාතන්ත්‍රවාදී ජීවන රටාවක් තුළ විරුද්ධවීම අයිතිවාසිකමක්.මාර්ගගත ක්‍රමවල සුරක්ෂිතභාවය පිළිබඳ පනත හරහා කරන්න හදන්නේ පුරවැසි අරගල පාලනය කරන්න හදන එක.

දරුවන්ට කාන්තාවන්ට සමාජ මාධ්‍ය හරහා හිංසනයන් සිදුවෙනවා. අපි ඒ ක්‍රියා අනුමත කරන්නේ නෑ. නමුත් එවැනි ක්‍රියාවලට දඩුවම් දෙන්න මාර්ගගත ක්‍රමවල සුරක්ෂිතභාවය පිළිබඳ පනත අවශ්‍ය වෙන්නේ නෑ. ඒවගේ දේවල් වලට දඩුවම් දෙන්න ඇතිවෙනකන් නීති රීති රටේ තිබෙනවා. අසභ්‍ය ප්‍රකාශන පනත යටතේ එවැනි ක්‍රියා වලට දඩුවම් දෙන්න පුලුවන්.

අයවැයෙන් අදායම වෙනුවට වැඩි කරලා තිබෙන්නේ වියදම. ආරක්ෂ අමාත්‍යාංශයේ මුදල් අමාත්‍යාංශයේ වියදම් අයවැයෙන් වැඩි කරලා තියෙනවා. අධ්‍යාපනයට සහ සෞඛ්‍යට සුලු වැඩිවීමක් කරලා තියෙනවා. අනිත් අමාත්‍යාංශවල වියදම් වැඩි කරලා අධ්‍යාපනයට සහ සෞඛ්‍යට යන වියදම වැඩි කරලා වැඩක් නෑ. අනිත් අමාත්‍යාංශවල වියදම් කපලා අධ්‍යාපනයට සහ සෞඛ්‍යට යන වියදම වැඩි කරන්න ඕන.

ආසියාවේ රටවලින් වැඩිම ආරක්ෂක වියදමක් තියෙන්නේ ලංකාවේ. ලංකාව ආරක්ෂක වියදම් සඳහා සියයට 10 ක් වෙන් කරනවා. ඉන්දියාවේ වෙන් කරන්නෙත් සියයට 9 යි. මේක පාලනය කළ යුතුයි. ඒ වියදම් පාලනය කරලා අධ්‍යාපනයට සහ සෞඛ්‍යට යන වියදම වැඩි කළ යුතුයි.

ජාත්‍යන්තර මූල්‍ය අරමුදල ප්‍රකාශ කළා ලංකාවේ දූෂිත පාලනය පිළිබඳ ප්‍රශ්නයක් තිබෙනවා කියලා. ජාත්‍යන්තර මූල්‍ය අරමුදල එලෙස ප්‍රකාශයක් කළ ආසියාවේ පළමු රට වෙන්නේ ලංකාව.

විශේෂ වෙළඳ බද්ද යොදාගන්නේ පාර්ලිමේන්තුවේ අනුමැතියක් නැතිව බව ජාත්‍යන්තර මූල්‍ය අරමුදල ඉදිරිපත් කළ කරුණු වල සඳහන් වෙනවා. බදු ගන්නවානම් පාර්ලිමේන්තු අනුමැතියක් තියෙන්න ඕන. බදු අඩු වැඩි කරනවානම් පාර්ලිමේන්තු අනුමැතියක් තිබිය යුතුයි යනුවෙන් ජාත්‍යන්තර මූල්‍ය අරමුදල ඉදිරිපත් කළ වාර්තාවේ සදහන් වෙනවා.

ශ්‍රී ලංකා ගුවන් සේවයේ ආහාර සැපයීමේ ආයතනය සහ බඩු භාණ්ඩ පාලනය කිරීමේ ආයතනය ලාභ ලබනවා නමුත් ශ්‍රී ලංකා ගුවන් සේවාව බිලියන 400 කට වැඩි මුදලක් අලාභ ලබලා තියෙනවා. නිමල් සිරිපාල ද සිල්වා ඇමැතිවරයා සිවිල් ගුවන් සේවා සංශෝධන පනන පාර්ලිමේන්තුවට ඉදිරිපත් කරමින් කියනවා මේ ආයතන සියල්ල රජයට අයිති වෙන්න අවශ්‍ය නෑ. මේවා පුද්ගලික අංශයට ලබාදෙන්න පුලුවන් කියලා. තව කියනවා තරගකාරීත්වයක් ඇති කරන්න පුද්ගලික අංශයට ආහාර සැපයීමේ ආයතනයක් සහ බඩු භාණ්ඩ පාලනය කිරීමේ ආයතනයක් ආරම්භ කරන්න පුලුවන් කියලත් ඇමැතිවරයා කියනවා.

සිවිල් ගුවන් සේවා සංශෝධන පනන හරහා ආහාර සැපයීමේ ආයතනය සහ බඩු භාණ්ඩ පාලනය කිරීමේ ආයතනය විකුණලා ශ්‍රී ලංකා ගුවන් සේවයේ ප්‍රශ්නය විසදුවේ නැත්නම් දුෂණ ඇතිවෙන්න පුලුවන්. තරගකාරීත්වයට අපි එකඟයි. හොරකමට වංචාවට අපි එකඟ නෑ. ‘‘

ඊශ්‍රායලය සහ හමාස් සංවිධානය අතර ඇතිවී තිබෙන දරුණු ගැටුම්කාරී තත්ත්වය හමුවේ ඊශ්‍රායලයේ වෙසෙන ශ්‍රී ලාංකිකයන්ගේ ජීවිතාරක්ෂාව ඇතුළු හදිසි අවශ්‍යතා සම්බන්ධව විශේෂ අවධානයකින් කටයුතු කරන ලෙස ජනාධිපති රනිල් වික්‍රමසිංහ  නිලධාරීන්ට උපදෙස් නිකුත්කර ඇත.

ඒ අනුව මේ වන විටත් ඊශ්‍රායලයේ ශ්‍රී ලංකා තානාපති කාර්යාලය සහ මෙරට රජයේ වගකිවයුතු අංශ එක්ව ඊශ්‍රායලයේ වෙසෙන ශ්‍රී ලාංකික ජනතාවගේ අවශ්‍යතා සම්බන්ධව ගත හැකි උපරිම මැදිහත්වීම සිදුකිරීම සඳහා විශේෂ වැඩපිළිවෙලක් ක්‍රියාවට නංවා තිබේ.

එහිදී ඊශ්‍රායලයේ රැකියාවල නියුතු හෝ වෙනත් කරුණක් වෙනුවෙන් රැඳී සිටින ශ්‍රී ලාංකිකයන් හට තම ජීවිත පිළිබඳ අවධානමක් මතුව ඇත්නම් ඒ සම්බන්ධව හෝ වෙනත් දුෂ්කරතා කිසිවක් ඇත්නම් ඒ පිළිබඳ සෘජුව මෙරට බලධාරීන් දැනුවත් කිරීම සඳහා පහසුකම් සළසා තිබේ.

ඒ අනුව (+94) 117966396 යන දුරකථන අංකය, (+94) 767463391 යන WhatsApp අංකය හෝ This email address is being protected from spambots. You need JavaScript enabled to view it. යන Email ලිපිනය හරහා සිය අවශ්‍යතා ඉදිරිපත් කිරීමේ හෝ අවශ්‍ය තොරතුරු දැනගැනීමේ හැකියාව පවතී.

පිළිගත් ආගමන විගමන පටිපාටිය ඔස්සේ මෙන්ම වෙනත් කවර හෝ ක්‍රමයක් ඔස්සේ ඊශ්‍රායලයේ රැඳී සිටින ඕනෑම ශ්‍රී ලාංකිකයකු හට මෙම සේවාව ලබා ගැනීමට හැකියාව තිබෙන බව රජය අවධාරණය කර සිටියි.

මේ දිනයන්හි දරුවන් අතර පැතිරෙන ඇස් රතු වීමේ රෝගය කැස්ස, සෙම්ප්‍රතිශ්‍යාව හදන වෛරසය නිසා බෝවන්නක් විය හැකි බව කොළඹ රිජ්වේ ආර්යා ළමා රෝහලේ විශේෂඥ වෛද්‍ය දීපාල් පෙරේරා  පැවසීය.

තවද මෙය වෛරසයක් ද විය හැකි බවත්, අපිරිසුදු දෑතින් දෑස් ඇල්ලීමෙන් වැළකී සිටීමෙන් වෛරසය පැතිරීම වළක්වාගත හැකි බව ද ඔහු පැවසීය.

කාලයෙන් කාලයට ඇස් රෝග පැතිරෙන බවත් වෛරස් උණ සමඟ පැතිරෙන ඇස් රෝග පවතින බවත් ඔහු පැවසුවේය.

ඇස් රතු වීම, කබ ගැලීම, ඇසේ වේදනාව ලෙස රෝග ලක්ෂණ මතු විය හැකි බව ද හෙතෙම පැවසීය.

මෙම ඇස් රෝගය වෛරසයක් නිසා ප්‍රතිජීවක ඖෂධ අවශ්‍ය නොවන අතර දින පහකට වඩා මේ රෝගය පැවතුණහොත් ප්‍රතිකාර සඳහා යොමු විය යුතු බව ද ඔහු ප්‍රකාශ කළේය.

අත් දෙක සබන් දමා සේදිය යුතු අතර අපිරිසුදු අතින් ඇස් ඇල්ලීම සිදු නොකළ යුතු බවත් ඉතා පහසුවෙන් මේ වයිරසය බෝ විය හැකි බවත්, දරුවකුට ඇස් රෝගය පවතින්නේ නම් එය සුවපත් වන තෙක් නිවෙසෙහි තබාගත යුතු අතර පාසල් නොයවා සිටීමට මවුපියන් සැලකිලිමත් විය යුතු බව ද වෛද්‍ය දීපාල් පෙරේරා පැවසීය.

ඉදිරි පැය 36ක් සඳහා කාලගුණ විද්‍යා දෙපාර්තමේන්තුව විසින් නිවේදනයක් නිකුත් කර තිබේ.

ඉන් එම දෙපාර්තමේන්තු පෙන්වා දෙන්නේ දිවයිනේ බොහෝ ප්‍රදේශවලට අද (12) සවස් කාලයේදී හෝ රාත්‍රී කාලයේදී වැසි හෝ ගිගුරුම් සහිත වැසි ඇතිවිය හැකි බවයි.

ඌව, මධ්‍යම සහ නැගෙනහිර පළාත්වල ඇතැම් ස්ථානවලට මී.මී 75 ට වැඩි තරමක තද වැසි ද ඇතිවිය හැකි බව එම දෙපාර්තමේන්තුව සඳහන් කරයි.

එමෙන්ම බස්නාහිර සහ දකුණ පළාත්වල උදෑසන කාලයේ දී ද වැසි ඇතිවිය හැකි බව එම නිවේදනයේ සඳහන් වෙයි.

තවද, අකුරැස්ස, මාලිම්බඩ, තිහගොඩ,කඹුරුපිටිය සහ මාතර ප්‍රාදේශීය ලේකම් කොට්ඨාසවල පවතින ගංවතුර යළි ඉහළ යා හැකි බව වාරිමාර්ග දෙපාර්තමේන්තුව පවසයි.

එම දෙපාර්තමේන්තුව එම ප්‍රදේශවල ජනතාවට දැනුම් දෙන්නේ, අවධානයෙන් කටයුතු කරන ලෙසයි.

තව ද බෝපේ පොද්දල, නාගොඩ සහ බද්දේගම ආශ්‍රිත ගංවතුර තත්ත්වය සුළු වශයෙන් වර්ධනය විය හැකි බැවින් විමසිලිමත්වන ලෙස ද එම ප්‍රදේශවල ජනතාවට වාරිමාර්ග දෙපාර්තමේන්තුව දැනුම් දී සිටී.

මධ්‍යම, සබරගමුව සහ ඌව පළාත්වල සමහර ස්ථානවල උදෑසන කාලයේදී මීදුම් සහිත තත්ත්වයක් පැවතිය හැකි බව කාලගුණ විද්‍යා දෙපාර්තමේන්තුව වැඩිදුරටත් පැවසීය.

තාක්ෂණ හා හරිත ආර්ථිකයක් කරා රට ගෙන යාමේ වැඩපිළිවෙල සමඟ සක්‍රීයව එක්වන ලෙස තමන් පෞද්ගලික අංශයට විවෘත ආරාධනයක් සිදු කරන බව ජනාධිපති රනිල් වික්‍රමසිංහ  පැවසීය.

ජනාධිපතිවරයා මේ බව සඳහන් කළේ ජාතික තොරතුරු තාක්ෂණ හා ව්‍යාපාරික ක්‍රියාවලි කළමණාකරන වෘත්තීය ප්‍රදර්ශනයේ සමාරම්භක අවස්ථාවට අද (11) පෙරවරුවේ එක් වෙමිනි.

ජාතික තොරතුරු තාක්ෂණ සහ ව්‍යාපාර ක්‍රියාවලි කළමණාකරන සතිය (National IT and BPM Week) ආරම්භ කරමින් මෙම ප්‍රදර්ශනය ඔක්තෝබර් 11,12 සහ 13 යන තෙදින කොළඹ සිරිමාවෝ බණ්ඩාරනායක අනුස්මරණ ප්‍රදර්ශන ශාලාවේ දී පැවැත්වේ.

රට ඩිජිටල් ආර්ථිකයක් කරා ගෙන යාමේ වැඩපිළිවෙළ වේගවත් කරමින් මෙම වැඩසටහන ක්‍රියාවට නංවා තිබෙන අතර තොරතුරු තාක්ෂණ ව්‍යවසායකත්වය දිරිගැන්වීම වෙනුවෙන් නව තාක්ෂණය පිළිබඳ දැනුමක් ලබාදීම, කුසලතා වර්ධනය, වෘත්තීය උපදේශනය සහ වෘත්තීය අවස්ථා ලබාදීම මෙහි අරමුණයි.

බස්නාහිර පළාතේ (සා/පෙළ සහ උ/පෙළ) හදාරන පාසල් සිසුන්, රාජ්‍ය හා පෞද්ගලික විශ්වවිද්‍යාල සහ වෘත්තීය අධ්‍යාපන ආයතන සිසුන්, රැකියා අපේක්ෂකයන් මෙන්ම ව්‍යවසායකයින්, දැනුවත් කිරීම මෙමඟින් අපේක්ෂා කෙරේ.

දින 03ක් පුරා පැවැත්වෙන මෙම වැඩසටහනේ දී කර්මාන්ත සහ වෘත්තීය උපදේශන, තොරතුරු තාක්ෂණ සහ ව්‍යාපාර ක්‍රියාවලිය, සීමාවාසික පුහුණුව සහ රැකියා අවස්ථා සඳහා වේදිකාවක් සපයනු ලබන අතර තාක්ෂණික අධ්‍යාපන ආයතන මගින් තොරතුරු තාක්ෂණ සහ ව්‍යපාර ක්‍රියාවලි පිළිබඳ වැඩමුළු පැවැත්වීමට ද නියමිතය.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ  මෙසේ ද පැවසීය.

මෙම ප්‍රදර්ශනයට සහභාගිවන බොහෝ දෙනෙක් බලාපොරොත්තු වන්නේ තමන්ගේ විදේශගත වීමේ අපේක්ෂාව මේ හරහා සාර්ථක කරගන්නේ කෙසේද කියලයි. එය සෑම කෙනෙක්ගේම සිහිනයක්. නමුත් මම අවධානය යොමු කළේ මෙම ප්‍රදර්ශනයෙන් අපේ රටට ප්‍රයෝජනයක් ලබා ගන්නේ කොහොමද කියලයි.

අද අප සිටින්නේ රටේ කඩා වැටුණු ආර්ථිකය නැවත ගොඩගනිමින් සිටින අවස්ථාවකයි. රට තුළ ආර්ථික ස්ථාවරත්වයක් ඇති කිරීම පමණක් ප්‍රමාණවත් වන්නේ නැහැ. අප ලබාගත් ණය ආපසු ගෙවිය යුතුයි. අපට අවශ්‍ය භාණ්ඩ ආනයනය කළ යුතුයි. ඒ සඳහා ද මුදල් ගෙවීමට අවශ්‍යයි. ඒ සඳහා ප්‍රමාණවත් විදේශ විනිමය අපට නැහැ. ඒ නිසා නැවත ණය ලබා ගැනීමට සිදු වෙනවා.

අපි ණය චක්‍රයේ සිටිනවද ඉන් ඉවත්වී ඉදිරියට යනවද කියන එක පිළිබඳ අප අවධානය යොමු කළ යුතුයි. ඒ නිසා මේ රටේ ඉතා තරගකාරි ආර්ථිකයක් සමඟ ලෝක වෙළෙඳපොළ වෙත ගමන් කර වෙළෙඳ භාණ්ඩවලින් සහ සේවාවලින් අපට ලැබෙන ආදායම වැඩි කර ගෙන අතිරික්තයක් පවත්වාගත යුතුය. ඒ ආකාරයට කටයුතු කිරීමෙන් මේ රට හැර ගිය පිරිසත් නැවත ලංකාවට එනු ඇතැයි අප විශ්වාස කරනවා.

මෙම වැඩසටහනේ ප්‍රධාන අංගයක් වන්නේ අපේ ආර්ථික නවීකරණයයි. ඉතා තරගකාරී ආර්ථිකයක්, හරිත ආර්ථිකයක් සහ ඩිජිටල් ආර්ථිකයක් එහි ප්‍රධාන කොටස් වෙනවා.ඩිජිටල් ආර්ථිකය ගැන කතා කළොත් අප ඉන් ඉදිරියට යන විට කරුණු ගණනාවක් සම්පූර්ණ කළයුතුව තිබෙනවා.

එහිදී තොරතුරු තාක්ෂණය පිළිබඳ දැනුමක් හා පුහුණුවක් තිබෙන මිනිස් බලකායක් අවශ්‍ය වෙනවා. එම බලකාය ගොඩනැගීම වෙනුවෙන් අප පියවර ගණනාවක් ගෙන තිබෙනවා.

අප අලුත් විශ්වවිද්‍යාල පද්ධතියක් ආරම්භ කරනවා. එහිදී කොතලාවල ආරක්ෂක විශ්වවිද්‍යාලයේ ක්‍රමවේදය අනුව රජයෙනුත් විශ්වවිද්‍යාල 03ක් ආරම්භ කිරීමට සැලසුම් කර තිබෙනවා. ඒ වගේම රාජ්‍ය නොවන විශ්වවිද්‍යාල ආරම්භ කිරීම සඳහා ද අවස්ථාව ලබා දෙනවා. හාවඩ් සහ කේම්බ්‍රිජ් විශ්වවිද්‍යාලවල වගේ ලබන ලාභය නැවත විශ්වවිද්‍යාලයට ආයෝජනය කරන කණ්ඩායමක් සමග එම කටයුතු කරගෙන යාම අපේ බලාපොරොත්තුවයි.

කෙසේ හෝ මෙම නව තාක්ෂණ දැනුම ලබාදීම වෙනුවෙන් අලුත් විශ්වවිද්‍යාල ගණනාවක් ඇති කිරීමට අප බලාපොරොත්තු වෙනවා. දෙවනුව දැන් තිබෙන වෘත්තීය පුහුණු මධ්‍යස්ථාන 450 එක් කර වෘත්තීය විද්‍යාල ආරම්භ කිරීමට සැලසුම් කර තිබෙනවා. ඒ වගේම වෘත්තිය පුහුණුව නවීකරණය කරනවා. මේ සියල්ල කරන අතරතුර පාසල් සඳහාද මෙම නව තාක්ෂණය ලබාදීමට පියවර ගෙන තිබෙනවා.

රටේ අනාගතය තිබෙන්නේ තාක්ෂණ සහ හරිත ක්ෂේත්‍ර යන අංශ දෙක තුළයි. එසේනම් අප ඒ සඳහා ඇතුළත් විය යුතුයි.

වී වගාව අසාර්ථක වූ විට අප කුරුඳු වගාවට යොමු වුණා. කුරුදු වගාව නැති වූ විට කෝපි වගා කළා. කෝපි නැති වු විට තේ, රබර් පොල් වගා කළා. දැන් අප සංචාරක ව්‍යාපාරය සහ ඇඟළුම කර්මාන්තය සිදු කරනවා. මේ සියල්ල අයත් අතීතයටයි. නමුත් අප අනාගතයට යා යුතුයි. ඒ සඳහා අප හැකි තරම් කණ්ඩායම් පුහුණු කළයුතුයි. මෙරට අවශ්‍යතාව මෙන් දෙගුණයක පිරිසක් බිහි කළයුතුයි. ඇතැම් පිරිස් විදේශ රැකියා සඳහා යනවා. ඔවුන් අපේ රටට විදේශ විනිමය එවනවා.

ජපානය, චිනය, දකුණු කොරියාව වැනි නැගෙනහිර ආසියාවේ අද ජනග්‍රහණය සීග්‍රයෙන් අඩු වෙමින් පවතිනවා. ඉතින් අපි සියලුදෙනා එකතුවෙලා ඉදිරියට යමු. අලුතින් බිහිවන විශ්වවිද්‍යාල සඳහා ඔබට සම්බන්ධවිය හැකියි. ඒ වගේම වෘත්තීය මධ්‍යස්ථාවල මෙම වැඩසටහන් ක්‍රියාත්මක කිරීමට ඔබට අවස්ථාව සළසා දිය හැකියි.

ඒ වගේම මෙම දැනුම පාසල්වලට එක් කිරීම පිළිබඳවත් අපිට එක්වෙලා වැඩ කරන්න පුළුවන්. මගේ ප්‍රශ්නය වන්නේ ඒ සඳහා ඔබ සූදානම්ද, නැද්ද යන්නයි. මෙම වැඩකටයුතුවල ප්‍රධානත්වය අග්‍රාමාත්‍ය ලේකම් අනුර දිසානායක මහතා විසින් ගෙන තිබෙනවා. අදාළ අමාත්‍යාංශ ලේකම්වරුන් ඒ සඳහා සම්බන්ධ වී සිටිනවා.

මෙම තාක්ෂණය සමග නව කර්මාන්තශාලා බිහි වූ විට නව වෘත්තීය අවස්ථා ඇති වෙනවා. අද විශාල පිරිසකට රැකියා අහිමි වී තිබෙනවා. ඒ තරුණ පිරිස් වෙතත් මෙම දැනුම ලබාදී ඔවුන්ට නව රැකියා අවස්ථා විවර කර දිය හැකියි. මේ සඳහා ඔබේ ප්‍රතිචාරය මට දැනුම් දෙන ලෙස මම ඉල්ලා සිටිනවා.

තාක්ෂණ අමාත්‍ය කණක හේරත්, අග්‍රාමාත්‍ය ලේකම් අනුර දිසානායක, තාක්ෂණ අමාත්‍යාංශයේ ලේකම් මහාචාර්ය ඒ.ඩී. ගුණවර්ධන, තාක්ෂණ අමාත්‍යාංශයේ අධ්‍යක්ෂ (සංවර්ධන) ජනක සම්පත් ගීකියනගේ, ජාතික අනාගත කුසලතා මුලපිරීම් ආයතනයේ (NFTI) සභාපති මධු රත්නායක, මෘදුකාංග සේවා සමාගම් සඳහා ශ්‍රී ලංකා සංගමයේ (SLASSCOM) සභාපති ජෙහාන් පෙරින්පනායගම්, DIGIECON 2023 -2030 ව්‍යාපෘති අධ්‍යක්ෂ ප්‍රසාද් සමරවික්‍රම යන මහත්වරුන් ද පාසල් සිසුන් ඇතුළු පිරිසක් මෙම අවස්ථාවට එක්ව සිටියහ.

තාත්තා රටේ ජනාධිපතිවරයකු වූ පමණින් ඔහුගේ දරුවාට බැට්න් එක ප්‍රදානය කිරීමට නොහැකි බවත් නායකත්වය කාලානුරූපීව වෙනස් වන්නක් බවත් පාර්ලිමේන්තු මන්ත්‍රී නාමල් රාජපක්ෂ පැවසූ බව මාධ්‍ය වාර්තාවල සඳහන් වෙයි.

ඊට අනුව නාමල් රාජපක්ෂ මන්ත්‍රීවරයා මේ බව සඳහන් කර ඇත්තේ පොදුජන පෙරමුණ පක්ෂ මූලස්ථානයේ දී මාධ්‍ය අමතමින් ය.

ශ්‍රී ලංකා පොදුජන පෙරමුණේ ජනාධිපති පෙරමුණේ ජනාධිපති අපේක්ෂකයා කවුදැයි පාක්ෂිකයන් විසින් තීරණය කරනු ඇති බවත් ආසන බලමණ්ඩල සාකච්ඡාවලදී ඒ ගැන තීරණ ගැනීමට නියමිත බවත් මන්ත්‍රීවරයා සඳහන් කළ බවද එම මාධ්‍ය වාර්තා පවසයි.

එසේම ධම්මික පෙරේරා  ජනාධිපති අපේක්ෂකත්වයට ඉදිරිපත් වීමට කැමැත්ත පල කිරීම තුළින් පොදුජන පෙරමුණේ ස්ථාවර භාවය පිළිබිඹු වන බවත් මන්ත්‍රීවරයා මෙහිදී පෙන්වා දී ඇති බවත් වැඩිදුරටත් දැක්වෙයි.

ධම්මික පෙන්වා නාමල් ගොඩයවන තැතක් !

පසුගිය සති අන්ත පුවත්පතක් සඳහා ප්‍රකාශයක් කරමින් මෙරට සිටින බිලියනපති ව්‍යාපාරිකයකු වන ධම්මික පෙරේරා ජනාධිපතිවරණය වෙනුවෙන් ඉදිරිපත් වීමේ තම සූදානම ප්‍රකාශ කර තිබිණ.

එහිදී ඔහු පක්ෂයක් සඳහන් කර නොතිබූ නමුත් ඊට පෙර සිට දේශපාලන ක්ෂේත්‍රයේ රාවයක් පැවතියේ ධම්මික පෙරේරාට පොදුජන පෙරමුණ පක්ෂයේ ජනාධිපතිවරණ අපේක්ෂකත්වය ලබාදීමට රාජපක්ෂවරුන් ගේ සූදානමක් ඇති බවය.

අනතුරුව ජනාධිපතිවරණ අපේක්ෂකත්වය ධම්මික පෙරේරා වෙත ලබාදී, පොදුජන පෙරමුණේ නායකත්වයට නාමල් රාජපක්ෂ මන්ත්‍රීවරයා පත්කිරීමට සූදානමක් ඇති බවටත් දේශපාලන ක්ෂේත්‍රයේ රාවයක් ගිය අතර නාමල් රාජපක්ෂ මන්ත්‍රීවරයා ගේ මෙම ප්‍රකාශය ඒ බව තහවුරු කෙරෙන්නක් බව දේශපාලන විචාරකයන් පෙන්වා දෙයි.

කෙසේ වුවත් දේශපාලන විචාරකයන් වැඩිදුරටත් සඳහන් කරන්නේ පොදුජන පෙරමුණේ අපේක්ෂකයකු සඳහා මීළඟ ජනාධිපතිවරණය ජයග්‍රහණය කිරීමට ඉඩක් නොමැති බවයි. එබැවින් ධම්මික පෙරේරා ජනාධිපතිවරණ අපේක්ෂකත්වය සඳහා පෙන්නුම් කර පක්ෂයේ නායකත්වය පහසුවෙන්ම නාමල් රාජපක්ෂ මන්ත්‍රීවරයා වෙත ලබාදී ඔහුව විපක්ෂ නායක ලෙස ඊළඟ වටය සඳහා සූදානම් කිරීම රාජපක්ෂවරුන් ගේ උපක්‍රමය ලෙස තක්සේරු කළ හැකි බව විචාරක මතය වී තිබේ.

ඉන්දියානු සාගර කලාපීය වටද්දර රටවල සංගමයේ (IORA) අමාත්‍ය මණ්ඩල රැස්වීමට සහභාගී වීම සඳහා දිවයිනට පැමිණ සිටින ඉන්දීය විදේශ කටයුතු අමාත්‍ය ආචාර්ය එස්. ජයශංකර්  සහ ජනාධිපති රනිල් වික්‍රමසිංහ  අතර හමුව අද (11) පස්වරුවේ ජනාධිපති කාර්යාලයේදී සිදු විය.

ඉන්දු - ශ්‍රී ලංකා සබඳතා තවදුරටත් ශක්තිමත් කර ගැනීම පිළිබඳ මෙහිදි දීර්ඝ ලෙස සාකච්ඡා පැවැත්වුණු අතර දෙරට අතර සහයෝගීතාව ඉහළ නැංවෙන නව ද්විපාර්ශවික ගිවිසුම් තුනකට එළැඹීම ද සිදු කෙරිණි.

එසේම ඉන්දීය ණය ආධාර ක්‍රමය යටතේ මෙරට ක්‍රියාත්මක කරන ලද නිවාස ව්‍යාපෘතියේ තුන්වන අදියර මාර්ගගත ක්‍රමය ඔස්සේ විවෘත කිරීම ද මෙහිදී සිදු විය.

නිවාස දස දහසකින් යුත් මෙහි හතරවන අදියරේ එක් නිවාස ඒකකයක් සඳහා රුපියල් මිලියන 1.026ක මුදලක් වෙන් කර තිබුණද නිවාස ඒකකයක් සඳහා වන පිරිවැය ඉහළ යාම හේතුවෙන් එය රුපියල් මිලියන 2.8ක් දක්වා සංශෝධනය කිරීමට අදාළ ගිවිසුමට එළැඹීම සිදු විය.

ශ්‍රී ලංකාවේ ජන ජීවිත යළි නගා සිටුවීම වෙනුවෙන් ඉන්දීය රජයේ සහාය ඇතිව මෙරට ක්‍රියාත්මක කරනු ලබන විශේෂ ව්‍යාපෘති නවයක් කඩිනමින් අවසන් කිරීම සඳහා අතිරේක ප්‍රතිපාදන සැපයීමට ඉන්දීය රජය කටයුතු කර තිබෙන අතර ඊට අදාළ ගිවිසුමට ද මෙහිදී එළැඹිණි.

මේ යටතේ උතුරු පලාතේ පාසල් 27ක් නවීකරණය කිරීම, මන්නාරම සහ අනුරාධපුර නිවාස ව්‍යාපෘති, හැටන් තොණ්ඩමන් වෘත්තීය පුහුණු මධ්‍යස්ථානය සහ පුස්සැල්ලාව සරස්වතී මධ්‍ය විද්‍යලය වැඩිදියුණු කිරීම, පොළොන්නරුවේ බහු - වාර්ගික ත්‍රෛයි භාෂා පාසලක් ඉදිකිරීම, යාපනය ප්‍රදේශයේ වර්ෂා ජලය රැස් කිරීමේ ව්‍යාපෘති 2889 ක් ඉදිකිරීම, දඹුල්ල ප්‍රදේශයේ එලවලූ සහ පළතුරු කල් තබා ගැනීම සදහා මෙට්‍රේක් ටොන් 5000 ක ධාරිතාවයෙන් යුත් ශිතාගාර පහසුකම් ඉදිකිරීම, මඩකලපුව ශික්ෂණ රෝහල සඳහා නව ශල්‍ය වෛද්‍ය ඒකකයක් ඉදිකිරීම යන ව්‍යාපෘති කඩිනමින් නිම කිරීමට නියමිතය.

ශ්‍රී ලංකාවේ දේශීය කිරි කර්මාන්තය නඟා සිටුවීම සඳහා ඉන්දියාවේ ගුජරාට් සමුපකාර කිරි අලෙවි සම්මේලනය (අමුල් ව්‍යාපාරය) සහ ශ්‍රී ලංකාවේ කාගිල්ස් සමූහ ව්‍යාපාරය, ඉන්දීය ජාතික කිරි සංවර්ධන මණ්ඩලය සමග එක්ව ක්‍රියාත්මක කිරීමට නියමිත ඒකාබද්ධ ව්‍යාපෘතියට අදාළ ගිවිසුමට ද මෙහිදී එළැඹිණි.

ජනාධිපති රනිල් වික්‍රමසිංහ මහතාගේ ඉන්දීය නිල සංචාරයේ ප්‍රතිඵලයක් ලෙස ඇතිකරගත් මෙම ගිවිසුම මගින් මෙරට පශු සම්පත් ක්ෂේත්‍රය නවීකරණය සඳහා අරමුදල් සැපයේ. ඒ අනුව, පළමු වසර 5 තුළ කිරි නිෂ්පාදනය 53% කින් ඉහළ නංවමින් වසර 15ක් තුළ ශ්‍රි ලංකාව කිරිවලින් ස්වයංපෝෂිත කිරීම මෙම නව ව්‍යාපෘතියේ ප්‍රමුඛ අරමුණයි.

ඒ යටතේ සතුන් සඳහා අවශ්‍ය උසස් තත්ත්වයේ ඖෂධ, ආහාර සහ තාක්ෂණික සහයෝගය ඇතුලු පහසුකම් සපයමින් දේශිය කිරි ගොවීන් ලක්ෂ 2ක් සවිබල ගැන්වීම අපේක්ෂා කෙරේ.

ඊට අමතරව පශු සම්පත් ක්ෂේත්‍රය ඩිජිටල්කරණය , කිරි ආශ්‍රිත අතුරු නිෂ්පාදනවල ගුණාත්මක භාවය වැඩි කිරීම වෙනුවෙන් නව තාක්ෂණය සඳහා ආයෝජනය සහ කිරි ආශ්‍රිත නිෂ්පාදන පහසු මිලට ලබා ගැනීමට අවස්ථාව හිමිවීම ඇතුළු ප්‍රතිලාභ රැසක් උදා වේ.

එසේම ඉන්දු - ශ්‍රී ලංකා සබඳතාවලට වසර 75ක් සැපිරීම නිමිත්තෙන් විශේෂ සමරු ලාංඡනයක් එළිදැක්වීමද අද සිදු විය.

ශ්‍රී ලංකාවේ ඉන්දීය මහකොමසාරිස් ගෝපාල් බග්ලේ, ඉන්දීය විදේශ කටයුතු අමාත්‍යාංශයේ සන්ධාන ලේකම්වරුන් වන පුනීත් අග්‍රවාල්, ජේ. පී. සිං, ශ්‍රී ලංකාවේ ඉන්දීය නියෝජ්‍ය මහකොමසාරිස් ආචාර්ය සත්‍යන්ජල් පාන්ඩේ, ඉන්දීය විදේශ කටයුතු අමාත්‍යාංශයේ නියෝජ්‍ය ලේකම් රඝූ පුරි යන මහත්ම මහත්මීන් ඇතුළු පිරිසක් මෙම අවස්ථාවට එක්ව සිටී අතර ශ්‍රී ලංකාව නියෝජනය කරමින් විදේශ කටයුතු අමාත්‍ය ජනාධිපති නීතිඥ අලි සබ්‍රි, අමාත්‍ය ජීවන් තොණ්ඩමන්, රාජ්‍ය අමාත්‍ය තේනුක විදානගමගේ, පාර්ලිමේන්තු මන්ත්‍රී එම්. රාමේෂ්වරන්, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සහ ජනාධිපති කාර්ය මණ්ඩල ප්‍රධානි සාගල රත්නායක, ජනාධිපති ලේකම් සමන් ඒකනායක, ආර්ථික කටයුතු පිළිබඳ ජනාධිපති ජ්‍යෙෂ්ඨ උපදේශක ආචාර්ය ආර්.එච්.එස්. සමරතුංග, විදේශ කටයුතු අමාත්‍යාංශයේ ලේකම් අරුණි විජේවර්ධන, ජනාධිපති ජාත්‍යන්තර කටයුතු පිළිබඳ අධ්‍යක්ෂ දිනුක් කොළඹගේ යන අය ඇතුළු පිරිසක් මීට එක්ව සිටියහ.

මෙරට තුළ පුද්ගලික වෛද්‍ය උපාධි පිළිගැනීම සඳහා අවශ්‍ය නීතිමය විධිවිධාන පැනවීමට කැබිනට් මණ්ඩල අනුමැතිය හිමිව ඇති බව වාර්තා වෙයි.

ජනාධිපති රනිල් වික්‍රමසිංහ සහ සෞඛ්‍ය ඇමැති කෙහෙලිය රඹුක්වැල්ල විසින් ඒකාබද්ධව ඉදිරිපත් කරන යෝජනාවකට මෙම අනුමැතිය ලැබී තිබේ.

ඒ අනුව ජාත්‍යන්තර ශ්‍රේණිගත කිරීම්වල අංක 1000 සීමාව දක්වා වන විදෙස් විශ්වවිද්‍යාල වලින් පිරිනමනු ලබන වෛද්‍ය උපාධි මෙරට පිළිගැනීමට හැකි වන පරිදි නීති සකස් කිරීමට නියමිතව ඇත.