පුවත්

ජනාධිපති රනිල් වික්‍රමසිංහ විසින් පරීක්ෂණ කොමිෂන් සභාවක් පත් කර ඇති අතර ඊට අදාළ ගැසට් නිවේදනය 2023 නොවැම්බර් 02 දිනැතිව ජනාධිපති ලේකම් සමන් ඒකනායක  විසින් නිකුත් කර තිබේ.

පවත්නා මැතිවරණ නීති පිළිබඳව පරීක්ෂා කර බලා මැතිවරණ නීති සංශෝධනය කිරීමට අවශ්‍ය නිර්දේශ ඉදිරිපත් කිරීම, දේශපාලන පක්ෂ, ස්වාධීන කණ්ඩායම් විසින් නිසි පරිදි මාධ්‍ය භාවිතා කළ යුතු ආකාරය පිළිබඳව මාධ්‍ය උපමාන සකස් කිරීම පිළිබඳව නිර්දේශ ඉදිරිපත් කිරීම, දේශපාලන පක්ෂ, ස්වාධීන කණ්ඩායම් හා ඔවුන්ගේ සාමාජිකත්වය දේශපාලන හා පොදු කටයුතු ඉටුකිරීමේදී හැසිරිය යුතු ආකාරය සම්බන්ධව චර්යාධර්ම පද්ධතියක් හඳුන්වාදීම පිළිබඳව නිර්දේශ ඉදිරිපත් කිරීම, දේශපාලන පක්ෂ ලියාපදිංචි කිරීම සහ විශ්වාසනීයව හා මහජනතාවට වගකියන අයුරින් ඒවායෙහි කටයුතු කිරීම සම්බන්ධව නීති රීති ශක්තිමත් කිරීම පිළිබඳව නිර්දේශ ඉදිරිපත් කිරීම පිළිබඳව තොරතුරු ලබා ගැනීම, විමර්ශනය සහ පරීක්ෂා කර වාර්තා කිරීම මෙම කොමිෂන් සභාවට පැවරේ.

ජනාධිපතිවරයා වෙත පැවරී ඇති 1948 අංක 17 දරන පරීක්ෂණ කොමිෂන් සභා පනතෙහි 2 වන සහ 3 වන වගන්ති වල විධිවිධාන ප්‍රකාරව මෙම කොමිෂන් සභාව පත් කර ඇති අතර විශ්‍රාමික අගවිනිසුරු ජනාධිපති නීතිඥ වැවගේ ප්‍රියසත් ජෙරාර්ඩ් ඩෙප් මහතාගේ ප්‍රධානත්වයෙන් යුත් කොමිෂමේ සෙසු කොමසාරිස්වරුන් ලෙස සුන්දරම් අරුමෛනායගම් සේනානායක අලිසැන්ඩ්‍රලාගේ, ජනාධිපති නීතිඥ නලින් ජයන්ත අබේසේකර,රජිත නවීන් ක්‍රිස්ටෝපර් සේනාරත්න, අහමඩ් ලෙබ්බෙ මොහොමඩ් සලීම්, සාගරිකා දෙල්ගොඩ, එස්තර් ශ්‍රියාණි නිමල්කා ප්‍රනාන්දු, විතාරණගේ දීපානි සමන්ත රොඩ්රිගෝ යන අය පත් කර ඇත.

එසේම කාන්තා හා තරුණ නියෝජනය වැඩිකිරීම, මැතිවරණයක් ප්‍රකාශයට පත් කළ දින සිට එකී මැතිවරණය පවත්වා ප්‍රතිඵල නිකුත් කරනු ලබන දින දක්වා වන කාලය අඩුකිරීම, ඡන්දය භාවිතා කිරීමේදී මුද්‍රිත ඡන්ද පත්‍රිකාවක් භාවිතා කිරීම වෙනුවට නවීන තාක්ෂණය යොදා ගනිමින් ඉලෙක්ට්‍රොනිකව ඡන්දය භාවිතා කිරීම සඳහා අවස්ථාව සැලසීම ඇතුළු කරුණු කිහිපයක් පිළිබඳ අවධානය යොමු කිරීමට ද කොමිෂමට උපදෙස් දී ඇත.

එසේම දේශපාලන පක්ෂ, ස්වාධීන කණ්ඩායම් විසින් නිසි පරිදි මාධ්‍ය භාවිතා කළ යුතු ආකාරය පිළිබඳව මාධ්‍ය උපමාන සකස් කිරීම පිළිබඳව නිර්දේශ ඉදිරිපත් කිරීම, දේශපාලන පක්ෂ, ස්වාධීන කණ්ඩායම් හා ඔවුන්ගේ සාමාජිකත්වය දේශපාලන හා පොදු කටයුතු ඉටුකිරීමේදී හැසිරිය යුතු ආකාරය සම්බන්ධව චර්යාධර්ම පද්ධතියක් හඳුන්වාදීම පිළිබඳව නිර්දේශ ඉදිරිපත් කිරීම, දේශපාලන පක්ෂ ලියාපදිංචි කිරීම සහ විශ්වාසනීයව හා මහජනතාවට වගකියන අයුරින් ඒවායෙහි කටයුතු කිරීම සම්බන්ධව නීති රීති ශක්තිමත් කිරීම පිළිබඳව නිර්දේශ ඉදිරිපත් කිරීම, යෝජිත ව්‍යවස්ථාව ද ඇතුළත්ව පහත කරුණු පිළිබඳව නිර්දේශයන් ඉදිරිපත් කිරීම මෙම කොමිසමට පැවරේ.

තවද ශ්‍රී ලංකාවේ ඡන්ද දායකයා සහ දේශපාලන පක්ෂ අතර අන්‍යෝන්‍ය විශ්වාසයක් තහවුරු කර පවත්වාගෙන යාමේ අවශ්‍යතාවය හඳුනාගනිමින් සහ අන්තර් පාර්ලිමේන්තු සංගමයද ඇතුලත්ව ගෝලීය වශයෙන් පිළිගත් සංවිධාන ගණනාවක් විසින් දේශපාලන පක්ෂවල විනිවිදභාවය සහ වගවීම සඳහා නිර්ණායක ඉදිරිපත් කිරීම කෙරෙහිද මෙහිදී අවධානය යොමු කර ඇත.

මැතිවරණද ඇතුළත්ව මැතිවරණ ව්‍යාපාරයන්හි මූල්‍ය පිරිවැය සීඝ්‍රයෙන් ඉහළ යාම, දේශපාලනය තුළ මුදලෙහි භූමිකාව සහ ප්‍රතිපත්ති ග්‍රහණයට ඇති අවස්ථාවන් සම්බන්ධයෙන් මෙහිදී පුළුල් අවධානයකට ලක් කර තිබෙන අතර අපරාධ වලට සම්බන්ධ වූවන් දේශපාලන පක්ෂවලට ඇතුළු වීම, ස්ථාවර දේශපාලන පක්ෂ වෙනුවට දේශපාලන අස්ථාවරභාවයට තුඩු දෙන පරිදි කෙටි කාලීන දේශපාලනික පෙරමුණු ආදේශ වෙමින් පැවතීම ද කෙරෙහිද විශේෂ අවධානය යොමු කර තිබේ.

කොමිෂන් සභා වර්තාව මාස 06ක් තුළ ලබාදීමට නියමිතය.

ගාසා තීරයේ මතුවී තිබෙන ගැටළුව සම්බන්ධව එක් ආකාරයකට සලකමින්, එක්සත් ජාතීන්ගේ මානව හිමිකම් කවුන්සිලය තුළ ශ්‍රී ලංකාව වෙනත් ආකාරයකට විනිශ්චය කිරීම සාධාරණ නොවන බවත්, ලබන සැප්තැම්බර් මස පැවැත්වෙන මානව හිමිකම් කවුන්සිලයේ මීළඟ සැසිවාරයේදී පිරිසිදු දෑතින් පැමිණෙන ලෙස එක්සත් ජාතීන්ගෙන් සංවිධානයෙන් ඉල්ලා සිටින බවත් පැවසූ ජනාධිපති රනිල් වික්‍රමසිංහ එවිට ශ්‍රී ලංකාව ඊට පිළිතුරු ලබා දෙන බවද කියා සිටියේය.

එසේ සාධාරණත්වයක් නොමැති නම් ශ්‍රී ලංකාව විසින් ඊට පිළිතුරු සැපයිය යුතුදැයි ජනාධිපතිවරයා වැඩිදුරටත් ප්‍රශ්න කර සිටියේය.

ජනාධිපති රනිල් වික්‍රමසිංහ මේ බව සඳහන් කර සිටියේ වැලිමඩ අධිකරණ සංකීර්ණය විවෘත කිරීමේ අවස්ථාවට අද (03) පස්වරුවේ එක්වෙමිනි.

මානව හිමිකම් පිළිබඳ විශ්ව ප්‍රකාශනය පිළිබඳ සඳහන් කරමින් ජනාධිපති රනිල් වික්‍රමසිංහ අවධාරණය කර සිටියේ සෑම රටක්ම මෙම තීරණාත්මක ප්‍රකාශය සමඟ අනුගත විය යුතු බවයි.

ඔක්‌තෝබර් 7 වැනිදා හමාස්‌ සංවිධානය ඊශ්‍රායලයට ප්‍රහාරයක්‌ එල්ල කළ අවස්‌ථාවේ ශ්‍රී ලංකා රජය එම ක්‍රියාව කඩිනමින් හෙළා දුටු බව සිහිපත් කළ ජනාධිපතිවරයා, ත්‍රස්‌තවාදය හෙළා දකින අතරම පලස්‌තීන රාජ්‍යත්වය පිළිබඳ මූලධර්මයට ශ්‍රී ලංකාවේ සහයෝගය යළිත් තහවුරු කළ බවත් පෙන්වා දුන්නේය. ජාත්‍යන්තර ප්‍රජාව තුළ සිදු වූ මෙම හෙළා දැකීම, ජාත්‍යන්තර නීති සහ රීති රාමුව තුළ ඊශ්‍රායලයට පළිගැනීමේ අයිතියට ඉඩ සැලසූ බවත් ජනාධිපතිවරයා සඳහන් කළේය.

කෙසේ වෙතත්, එවැනි මූලධර්ම විශ්වීය වශයෙන් ක්‍රියාත්මක වන බවක් පෙනෙන්නට නොතිබීම පිළිබඳව සිය කනස්සල්ල පළ කළ ජනාධිපතිවරයා එක්සත් ජාතීන්ගේ නියෝජිතායතනවලට අනුව ගාසා තීරයේ මිනිසුන් 10,000 කට වැඩි පිරිසක් ඝාතනය කිරීම, යම් අයෙකු තමාගේ රට තුළ පවතින යුද්ධයේ සාධාරණත්වය සහ ජාත්‍යන්තර ප්‍රජාව විසින් ඊට දක්වනු ලබන ප්‍රතිචාර පිළිබඳ ප්‍රශ්න මතු කරන බව ද සඳහන් කළේය.

එක්සත් ජනපදය ඇතුළු බටහිර රටවල් මානව හිමිකම් සම්බන්ධයෙන් ශ්‍රී ලංකාවට එරෙහිව යෝජනා සම්මත කර ඇති බව ද පෙන්වා දුන් ජනාධිපතිවරයා එක හා සමාන ප්‍රශ්න පවතින ශ්‍රී ලංකාව සහ ගාසා තීරය සම්බන්ධයෙන් මෙම ජාතීන් අනුගමනය කරන ප්‍රවේශයේ වෙනසක් ඇත්තේ මන්දැයි ද ප්‍රශ්න කළේය. ඒ අනුව කලාප දෙකටම එකම නීති ක්‍රියාත්මක විය යුතු බව ජනාධිපතිවරයා අවධාරණය කළේය.

ජාත්‍යන්තර නීතියට අනුව ත්‍රස්තවාදය මැඩලීම සඳහා ගනු ලබන ක්‍රියාමාර්ග මූලික නිදහස ආරක්ෂා කිරීම ඇතුළු ජාත්‍යන්තර මානව හිමිකම් නීතිය යටතේ රාජ්‍යයන්ගේ බැඳීම්වලට පූර්ණ ලෙස අනුකූල විය යුතු බව ද ජනාධිපතිවරයා අවධාරණය කළේය. කෙසේ වුවත් මෙම මූලධර්ම ක්‍රියාවට නැංවීමේදී පවතින නොගැලපීම පිළිබඳව ද ජනාධිපතිවරයා ප්‍රශ්න කළේය.

එමෙන්ම, ගාසා තීරයෙහි මතුවී තිබෙන ආර්ථික අර්බුදයේ මානව හිමිකම් බලපෑම ගැන කනස්සල්ල පළ කළ ජනාධිපති රනිල් වික්‍රමසිංහ මහතා ආහාර සුක්ෂිතභාවය නොමැතිවීම, ඉන්ධන හිඟය, අත්‍යවශ්‍ය ඖෂධ නොමැතිකම සහ ගෘහාශ්‍රිත ආදායම අඩු වීම ශ්‍රී ලංකාව පසුගිය වසරේ මුහුණ දුන් අත්දැකීමට වඩා දරුණු බව ද පැවසීය.

අවසන් වශයෙන් දෙමළ සහ මුස්ලිම් ජනතාවගේ පැමිණිලි හා ඉල්ලීම් වලට පිළිතුරු සැපයීමේ වැදගත්කම අවධාරණය කරමින්, සීමාකරණයට ලක්කිරීම සහ වෙනස්කොට සැලකීමට එරෙහිව සටන් කිරීමට පියවර ගන්නා ලෙස ද ඉල්ලා සිටියේය.

බටහිර රටවල් විසින් ශ්‍රී ලංකාව සහ ගාසා තීරය වෙත යොදා ගන්නා විවිධ නිර්නායකයන්ගේ වෙනස පිළිබඳ ප්‍රශ්න කළ ජනාධිපතිවරයා ජාත්‍යන්තර කටයුතුවලදී ද පිරිසිදු දෑත් වලින් කටයුතු කිරීම විශ්වීය අවශ්‍යතාවයක් විය යුතු බවත් ප්‍රකාශ කළේය.

වැලිමඩ ජනතාවගේ අධිකරණ කටයුතු පහසු කිරීම සඳහා දිසා අධිකරණයක්, මහෙස්ත්‍රාත් අධිකරණයක්, කාර්යාල පහසුකම් ඇතුළු සියලු පොදු පහසුකම්වලින් සමන්විතව ඉදිකර ඇති මෙම තුන් මහල් අධිකරණ සංකීර්ණය සඳහා වැය කර ඇති මුදල රුපියල් මිලියන 460 කි.

මෙම අධිකරණ සංකීර්ණය ඉදිකිරීම මඟින් ඉතා අවම පහසුකම් යටතේ දිසා/මහේස්ත්‍රාත් සං‍යුක්ත අධිකරණයක් ලෙස පැවති වැලිමඩ අධිකරණය, දිසා හා මහේස්ත්‍රාත් අධිකරණ කටයුතු සඳහා විවෘත වනු ඇත.

සර්ව ආගමික වතාවත් මධ්‍යයේ සමරු ඵලකය නිරාවරණය කර අධිකරණ සංකිර්ණය විවෘත කිරීම ජනාධිපතිවරයා අතින් සිදු විය.

වැලිමඩ නිතිඥ සංගමය විසින් ජනාධිපති රනිල් වික්‍රමසිංහ වෙත විශේෂ උපහාර තිළිණයක් ද මෙහිදී පිළිගැන්වීය.

මෙම අවස්ථාව ඇමතූ අධිකරණ බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍ය ජනාධිපති නීතිඥ ආචාර්ය විජයදාස රාජපක්ෂ

මේ දක්වා වැලිමඩ උසාවි සංකීර්ණය පවත්වාගෙන පැමිණියේ ඉතාම අසීරු ස්ථානයක සිටයි. එම ගොඩනැගිල්ල නායයාමේ අවදානම් තත්ත්වයක තිබියදීත් නීතිය පසිඳලීමේ කාර්යය සිදු කළා.

මෙම උසාවි සංකීර්ණය සඳහා මුල්ගල තැබුවේ 2019 පෙබරවාරි මාසයේදීයි. 2015 -2019 කාලයේදී වත්මන් ජනාධිපතිවරයා අගමැතිවරයා ලෙස අධිකරණ සංකීර්ණ ඇතුළු ගොඩනැගිලි 85ක් ඉදිකිරීම සඳහා මුල්ගල තැබුවා. එයින් ව්‍යාපෘති 45 ක් විවෘත කිරීමට හැකි වුණා. පසුගිය වසරේ පැවති ආර්ථික අර්බුදය නිසා මේ වසරේදී මෙවැනි අධිකරණ සංකීර්ණයක් විවෘත වන්නේ දෙවැනි වතාවටයි. ඉන් පළමුවැන්න රත්නපුර දිස්ත්‍රික්කයේ ජනාධිපතිවරයා අතින් විවෘත වුණා. දෙවැනි විවෘත කිරීම අද සිදුකරනු ලබනවා. තෙල්දෙණිය උසාවි සංකීර්ණය ලබන මාසයේදී අවසන් කර විවෘත කිරීමට අප බලාපොරොත්තු වෙනවා.

පසුගිය කාලයේ රටේ සියලු ජනතාවට අවාසනාවන්ත තත්ත්වයක් උදා වූ බව අප දන්නවා. රටක ව්‍යවස්ථාව සහ විධායකය අකර්මණ්‍ය වූ විට ජනතාවට කිසිඳු සහනයක් ලැබෙන්නේ නැහැ. පසුගිය වසරේදී විධායකය සහ ව්‍යවස්ථාදායකය අර්බුදයට ලක් වූණා.

එම අර්බුදකාරී තත්ත්වය අධිකරණයටත් පැමිණියා නම් රට මීට වඩා අර්බුදයකට පත්වීමට ඉඩ තිබුණා. පාස්කු ප්‍රහාරය, කෝවිඩ් වසංගතය වැනි තත්ත්වයන් රාජ්‍යයේ පැවැත්මට අභියෝගය වූ නිසාම ජනතාව විශාල වශයෙන් පීඩාවට පත්වුණා.

නිදහසින් පසු වසර 75ක් මේරට පාලනය කළේ ජනතාව විසින් බලය ලබාදුන් කණ්ඩායමක්. නීතියට අනුව මැතිවරණ පවත්වා මැතිවරණයෙන් ජයගත් කණ්ඩායම් පාලන බලය ක්‍රියාත්මක කළා.

නමුත් වසර 75ක් රට පාලනය කළ ක්‍රමවේදය සහ පසුගිය මාස 15 තුළ මේ රටේ ක්‍රියාත්මක වු පාලන ක්‍රමවේදය කිසිසේත්ම සන්සන්දනය කරන්න බැහැ.ජනාධිපති රනිල් වික්‍රමසිංහගේ නිවැරදි දේශපාලන නායකත්වය නිසා රට නැවත යථා තත්ත්වයට පත් කිරීමට අද වන විට හැකියාව ලැබී තිබෙනවා.

වරාය, නාවික හා ගුවන් සේවා අමාත්‍ය නීතිඥ නිමල් සිරිපාල ද සිල්වා

සුදු අධිරාජ්‍යවාදීන් නිසා ඌව පළාතට විශාල සමාජ අසාධාරණයක් සිදු වුණා. එම නිසාම ඌව පළාත අනෙක් පළාත්වලට වඩා පසුගාමි තැනකට පත් වුණා . අනෙකුත් රාජ්‍ය පාලකයන් අනෙක් දිස්ත්‍රික් සංවර්ධනය වේගයෙන් ඉදිරියට ගෙන ගියත් ඌව පළාතට එවැනි සංවර්ධනයක් උදා කළේ නැහැ. නමුත් වත්මන් ජනාධිපතිතුමා ඌව විශ්වවිද්‍යාලයට වෛද්‍ය පීඨයක් ලබාදීමට මේ වන විටත් කටයුතු කර තිබෙනවා. මහනුවර සිට බදුල්ලට පැමිණෙන රජ මාවත සංවර්ධනය කිරීම සඳහා අයවැයෙන් රුපියල් මිලියන 685ක් වෙන් කර තිබෙනවා. අද මේ විවෘත කරන අධිකරණ සංකීර්ණය සඳහා රුපියල් මිලියන 460 ක් ලබාදී තිබෙනවා. එම සියලු සංවර්ධන කාර්යයන් නිසා ඌව පලාත බදුල්ල දිස්ත්‍රික්කය අනෙකුත් පළාත් වලට සාපේක්ෂව ඉදිරියට පැමිණෙමින් තිබෙනවා.

ඌව පළාතට විදේශ ආයෝජකයන්ගේ ආකර්ෂණය වැඩිවෙමින් තිබෙනවා. නමුත් එම ආයෝජන ඇති කිරීමට අධිකරණ පහසුකම්වල ගුණාත්මක භාවය වැඩි කළ යුතුය. අද මේ විවෘත කරන අධිකරණ සංකීර්ණය නිසා ආයෝජන අවස්ථාවන් පවා ඉහළ මට්ටමක් දක්වා වර්ධනය කර ගත හැකියි. ගොඩනැගිලි ඉදි කළ පමණින් ජනතාවට එහි ප්‍රතිඵල ලැබෙන්නේ නැහැ. ඒ සඳහා අධිකරණයේ සිටින සහ ඊට අදාළ අංශ එකට එක්ව සාමූහිකව කටයුතු කළ යුතුයි.

රාජ්‍ය අමාත්‍යවරුන් වන අනුරාධ ජයරත්න, තේනුක විදානගමගේ, චාමර සම්පත් දසනායක, අරවින්ද කුමාර්, පාර්ලිමේන්තු මන්ත්‍රී සුදර්ශන දෙනිපිටිය, ඌව පළාත් ආණ්ඩුකාර ඒ ජේ එම් එල් මුසම්මිල්, අගවිනිසුරු ජයන්ත ජයසූරිය, මහාධිකරණ විනිසුරුවරුන්, දිසා අධිකරණ විනිසුරුවරුන්, මහෙස්ත්‍රාත් අධිකරණ විනිසුරුවරුන් සහ වැලිමඩ නීතිඥ සංගමයේ සභාපති කලානි පී. පතිරණ මහත්මිය සහ එහි සාමාජිකයන් ඇතුළු පිරිසක් මෙම අවස්ථාවට එක්ව සිටියහ.

ශ්‍රී ලංකා ක්‍රිකට් කණ්ඩායමේ පරාජය සම්බන්ධයෙන් වගකීම ශ්‍රී ලංකා ක්‍රිකට් ආයතනය සහ ක්‍රිකට් තේරීම් කමිටුව බාරගත යුතු බව ක්‍රීඩා අමාත්‍ය රොෂාන් රණසිංහ පවසයි.

ලෝක කුසලාන තරගාවලියේ ඉන්දියාව සමග ඊයේ (02) වන්කඩේ ක්‍රීඩාංගණයේ පැවති තරගයෙන් ශ්‍රී ලංකා කණ්ඩායම ලකුණු 302කින් පරාජයවීමත් සමඟ අමාත්‍යවරයා මෙම නිවේදනය නිකුත්කර ඇත.

ඉන්දීය කණ්ඩායම හමුවේ ඊයේ ශ්‍රීලංකා කණ්ඩායම ලකුණු 55 කට දැවීගිය අතර ලෝක කුසලාන ඉතිහාසයේ ශ්‍රී ලංකා කණ්ඩායමක් දැවී ගිය අඩුම ලකුණු ගණන ලෙස එය වාර්තා පොතට එක්විය.

මෙහිදී අමාත්‍යවරයා ගේ නිවේදනයේ සඳහන් වන්නේ ශ්‍රී ලංකා කණ්ඩායම දිගින් දිගටම ලබන පරාජයන් හමුවේ ක්‍රිකට් ක්‍රීඩාවට ආදරය කරන සියලු දෙනා කනගාටුවට සහ කනස්සල්ලට පත්ව සිටින බවය.

එසේම සුදුස්සාට සුදුසු තැන දී ක්‍රිකට් පරිපාලනයේ ඉවත් නොවී බහිරවයන් සේ නොසිට දැඩි ක්‍රියාමාර්ග ගැනීමට ඉඩ නොතබා වගකිවයුත්තන් ඉල්ලා අස්විය යුතු බව ක්‍රීඩා අමාත්‍යවරයා සිය නිවේදනය හරහා අවධාරණය කරයි.

2024 වර්ෂය සඳහා ප්‍රාථමික සහ ද්විතීයික අධ්‍යාපනය වෙනුවෙන් රුපියල් බිලියන 255ක් වෙන් කිරීමට සහ උසස් අධ්‍යාපනය වෙනුවෙන් තවත් රුපියල් බිලියන 210ක් වෙන් කිරීමට අපේක්ෂා කරන බව උසස් අධ්‍යාපන රාජ්‍ය අමාත්‍ය සුරේන් රාඝවන් පැවසීය.

ලබන වසර අවසන් වන විට සියළුම සරසවි සඳහා උපකුලපතිවරයාට අමතරව නියෝජ්‍ය උපකුලපතිවරුන් පත් කිරීමට නියමිත බව ද රාජ්‍ය අමාත්‍යවරයා සඳහන් කලේය.

උසස් අධ්‍යාපන රාජ්‍ය අමාත්‍ය සුරේන් රාඝවන් මහතා මේ බව සඳහන් කළේ 'ස්ථාවර රටකට සැවොම එක මඟකට' මැයෙන් අද (03) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

ශ්‍රි ලංකාවේ ඉගෙනගන්නා ක්‍රමය මෙන්ම උගන්වන ක්‍රමය යන ද්විත්වයම වෙනස් විය යුතු බව ද රාජ්‍ය අමාත්‍යවරයා පැවසීය.

එහිදී වැඩිදුරටත් අදහස් දැක්වූ උසස් අධ්‍යාපන රාජ්‍ය අමාත්‍ය සුරේන් රාඝවන් ‍මෙසේද පැවසීය.

ලලිත කලා, මානව ශාස්ත්‍ර සහ සමාජ විද්‍යා විෂයන් පිලිබඳව ශ්‍රී ලංකාවේ ප්‍රථම වතාවට විශ්ලේෂණයක් කිරීම මේ වනවිටත් අප ආරම්භ කර තිබෙනවා. මෙම වසර අවසන්වීමට පෙර එම ඉක්කය වෙත ගමන් කිරීමට කටයුතු කරනවා. මෙම වැඩපිළිවෙලෙහි අරමුණ වන්නේ ඒකීය උපාධි වෙනුවට ප්‍රායෝගික දැනුම ලබාදෙමින් කලා උපාධිදාරීන් බල සම්පන්න කිරීමයි.

විසි එක්වන සියවසේ තුන්වන කාර්තුවේ සිටින අප උසස් අධ්‍යාපන ජාතික කොමිසමක් හෝ අධිකාරියක් ආරම්භ කිරීමට ද කටයුතු කරනවා. එමඟින් අප බලාපොරොත්තු වන්නේ විවිධ තැන්වල සිරවී ඇති පරිපාලන කටයුතු එක් තැනකට රැගෙන ඒමයි.

ඒ වගේම පුරවැසියා බලගැන්වීම සඳහා 2025 වසරේ සිට, රජයේ විශ්වවිද්‍යාලයක උපාධි ලබන ඕනෑම සිසුවෙකුට රජය ආයෝජනය කරන මුළු මුදලම සෘජුවම ශිෂ්‍යත්වයක් ලෙස ලබා දීමට ද අප පියවර ගන්නවා. එමඟින් ඕනෑම සිසුවෙකුට තමන්ට කැමති විශ්වවිද්‍යාලයක් තෝරාගැනීමේ හැකියාව ද ලැබෙනවා. ජනාධිපති රනිල් වික්‍රමසිංහ මහතාගේ දැක්ම යටතේ, මෙරට රාජ්‍ය විශ්වවිද්‍යාල තුළ තීරණාත්මක වෙනසක් ඇති වෙන බවට අපට විශ්වාසයි.

ශ්‍රි ලංකාවේ ඉගෙනගන්නා ක්‍රමය මෙන්ම උගන්වන ක්‍රමය යන ද්විත්වයම වෙනස් විය යුතුයි. ප්‍රාථමික සහ ද්විතීයික අධ්‍යාපනය වෙනුවෙන් 2024 වර්ෂය සඳහා රුපියල් බිලියන 255ක් වෙන් කිරීමට යෝජනා කර තිබෙනවා. උසස් අධ්‍යාපනය වෙනුවෙන් තවත් රුපියල් බිලියන 210ක් ලබාදීමට කටයුතු කරනවා.

ඒ වගේම ලබන වසර අවසන් වන විට සියළුම සරසවි සඳහා උපකුලපතිවරයාට අමතරව නියෝජ්‍ය උපකුලපතිවරුන් පත් කිරීමට නියමිතයි. විශ්වවිද්‍යාලවල පරිපාලන ක්‍රියාවලිය ශක්තිමක් කිරීම එහි අරමුණ වනවා. එමෙන්ම විශ්වවිද්‍යාල ආචාර්යවරුන්ගේ වැටුප් වැඩිකල හැක්කේ කෙසේ ද යන්න පිළිබඳව මේ වන විට සාකච්ඡා ආරම්භ කර තිබෙනවා.

එමෙන්ම විශ්විද්‍යාල ජාත්‍යන්තරීකරණය කිරීමේ ව්‍යාපෘතියට අනුව ශ්‍රී ලාංකීය සම්භවයක් ඇති විදේශයන්හී සේවය කරන ආචාර්ය මහාචාර්යවරුන්ට මෙරට රාජ්‍ය විශ්වවිද්‍යාල තුළ ඉගැන්වීමට හා පර්යේෂණ සිදුකිරීමට ආරාධනා කර තිබෙනවා.

රජයේ වෛද්‍ය නිලධාරීන්ගේ සංගමය පළාත් මට්ටමෙන් දියත් කර ඇති වැඩවර්ජන මාලාව තාවකාලිකව නතර කිරීමට එම සංගමය තීරණය කර තිබේ.

රජය පාර්ශ්වයෙන් සුබවාදී ප්‍රතිචාරයක් ලැබීම හේතුවෙන් මෙම පියවර ගත් බව රජයේ වෛද්‍ය නිලධාරීන්ගේ සංගමයේ ලේකම් හරිත අලුත්ගේ මාධ්‍ය වෙත සඳහන් කළේය.

කෙසේ වුවත් අද (03) දිනයේ උතුරු පළාතේ රෝහල්වල වර්ජනය ක්‍රියාත්මක කර තිබුණි.

සෞඛ්‍ය පද්ධතියේ බිඳවැටීම යම් මට්ටමකින් හෝ සමනය කරගැනීම සඳහා වෛද්‍යවරුන් රට තුළ රඳවා ගැනීමට රජය මෙතෙක් කටයුතු නොකිරීමක් ගැන කියමින් රජයේ වෛද්‍ය නිලධාරීන්ගේ සංගමය පළාත් මට්ටමින් මෙම වැඩවර්ජනය ආරම්භ කර තිබුණි.

ගෑස් මිල යළිත් වරක් හෙට (නොවැ. 4) මධ්‍යම රාත්‍රියේ සිට ඉහළ දමන බව ලිට්‍රෝ ගෑස් සමාගම පවසයි.

 රු. 75ත් 90ත් අතර මුදලකින් කිලෝ ග්‍රෑම් 12.5 ගෑස් සිලින්ඩරයක මිල ඉහළ දැමීමට නියමිත බවත්, අදාළ මිල ගණන් පිළිබඳව හෙට දිනයේ දැනුම් දෙන බව එම සමාගම පවසයි.

අවසන් වරට ගෑස් මිල සංශෝධනය කෙරුණේ ඔක්. 4 වන දා ය.

එම මිල වැඩි වීමත් සමග කිලෝග්‍රෑම් 12.5ක ගෘහස්ථ ගෑස් සිලින්ඩරයක මිල රුපියල් 343කින් ඉහළ දැමූ අතර එය මේ වන විට වෙළෙඳපොළේ රුපියල් 3,470ක මිලකට අලෙවි වෙයි.

ඉන්දීය මුදල් අමාත්‍ය එස්. නිර්මලා සීතාරාමන් හා අග්‍රාමාත්‍ය දිනේෂ් ගුණවර්ධන අතර හමුවක් ඊයේ (02) අරලියගහ මන්දිරයේදී සිදුවිය.

ඉන්දීය මුදල් අමාත්‍යවරියගේ සංචාරයේදී අත්සන් කරන ලද අවබෝධතා ගිවිසුම යටතේ බෞද්ධ සබඳතා ප්‍රවර්ධනය සඳහා ඉන්දීය රුපියල් බිලියන 1.0747 ක ඉන්දීය ප්‍රදාන ආධාරයෙන් ආගමික ස්ථානවල සූර්ය විදුලි ව්‍යාපෘති සඳහා පමණක් ඉන්දීය රුපියල් මිලියන 824 ක් වෙන් කිරීම පිළිබඳව අග්‍රාමාත්‍යවරයා මෙහිදී ඉන්දියාවට ස්තූති කළේය.

ඉන්දු-ලංකා මිත්‍රත්වය සහ සහයෝගීතාව ප්‍රවර්ධනය කිරීම සඳහා අග්‍රාමාත්‍ය දිනේෂ් ගුණවර්ධනගේ අසීමිත උත්සාහයන් ඉන්දියාව ඉතා අගය කරන බව ඉන්දීය මුදල් අමාත්‍යවරිය සඳහන් කළාය.

“දශක ගණනාවකට පෙර අපි අපේ නිදහස සඳහා සටන් කරන විට, ඔබේ දෙමාපියන් ඉන්දීය නිදහස් අරගලයට සම්බන්ධ වූ අතර දැන් අගමැති ලෙස ඔබ දෙරට අතර ද්විපාර්ශ්වික මිත්‍රත්වය සහ සහයෝගීතාව තවදුරටත් ශක්තිමත් කිරීම සඳහා අඛණ්ඩව කටයුතු කරන බැවින් අපි ඔබට ඉතා ඉහළ ගෞරවයක් දක්වනවා,” යැයි ඇය මෙහිදී පැවසුවාය.

මෙම අවස්ථාවට ඉන්දීය මහ කොමසාරිස් ගෝපාල් බාග්ලේ, පාර්ලිමේන්තු මන්ත්‍රී යදාමිණි ගුණවර්ධන, අග්‍රාමාත්‍ය ලේකම් අනුර දිසානායක යන අය ඇතුළු දෙරටේ නියෝජිතයින් ද එක්ව සිටියහ.

ඉන්දියානු ණය සහනාධාර යටතේ ඉන්ධන ආනයනය කිරීමට ලබාගත් ණය පියවීම සඳහා රුපියල් කෝටි විසි තුන් දහස් එකසිය පනහක ප්‍රතිපාදන අනුමත කර ගැනීමට පරිපූරක ඇස්තමේන්තුවක් ඉදිරිපත් කිරීමට රජය තීරණය කර ඇත.

මෙම පරිපූරක ඇස්තමේන්තුවට කැබිනට් මණ්ඩලයේ සහ රජයේ මුදල් පිළිබඳ පිළිබඳ පාර්ලිමේන්තු කාරක සභාවේ ද අනුමැතිය ලැබී ඇත.

රජයේ මුදල් පිළිබඳ පාර්ලිමේන්තු කාරක සභාව එහි සභාපති පාර්ලිමේන්තු මන්ත්‍රී ආචාර්ය හර්ෂ ද සිල්වා ගේ ප්‍රධානත්වයෙන් පාර්ලිමේන්තුවේදී පසුගිය 31 වැනිදා රැස්වු ූූඅතර පරිපූරක ඇස්තමේන්තුවට අනුමැතිය හිමි වූයේ එහිදී ය.

මේ අනුව මෙම මුදල් ලංකා ඛනිජ තෙල් සංස්ථාව මහා භාණ්ඩාගාරයෙන් ගත් ණය පියවීමටත් මහා භාණ්ඩාගාරය ඉන්දියානු ණය සහනාධාර යටතේ ගත් ණය පියවීමටත් භාවිතා කරන බව මුදල් අමාත්‍යංශයේ නිලධාරීහු එහිදී පැවසූහ.

මෙම මුදලින් රුපියල් කෝටි 12900ක් ශ්‍රී ලංකා විදුලිබල විදුලි බල මණ්ඩලය වෙනුවෙන් ලබා ගන්නා බවත් ඉතිරි රුපියල් කෝටි 10200 ශ්‍රී ලංකන් ගුවන් සමාගම වෙනුවෙන් ලබා ගන්නා බවත් එහිදී සඳහන් විය.

ශ්‍රී ලන්කන් ගුවන් සේවයේ ඩොලර් කෝටි 100ක පාඩුවක් ලබා ඇති බවත් මෙම අතිරේකය ප්‍රමාණවත් වන්නේ මුළු ණය ප්‍රමාණයෙන් සියයට 30 ක් පියවීමට පමණක් බවත් සඳහන් විය.

එසේම මෙම පරිපූරක ඇස්තමේන්තු මුදල ලැබීමෙන් පසුවද ශ්‍රී ලංකා විදුලි බල මණ්ඩලය ගෙවිය යුතු ණය ප්‍රමාණය රුපියල් කෝටි 30000ත් 40000ත් අතර ප්‍රමාණයක් බවද එහිදී සඳහන් විය.

සුරාබදු දෙපාර්තුමේන්තුව විසින් බදු නොගෙවන ලද මත්පැන් නිෂ්පාදන සමාගම් පහක බලපත්‍ර අහෝසි කර ඇත.

ඩබ්ලිව්.එම්. මෙන්ඩිස්, රන්දෙණිගල, වයඹ ඩිස්ටිලරීස් සිනර්ජි ඩිස්ටිලරීස්, සහ ෆින්ලන්ඩ් ඩිස්ටිලරීස් යන සමාගම්වල මෙලෙස බලපත්‍ර අහෝසි කර ඇත.

ආර්ථිකය ගොඩනැඟීම සඳහා පෞද්ගලික අංශයෙන් ලබාදෙන යෝජනා ද මෙවර අයවැයට ඇතුළත් කිරීමට අවධානය යොමු කරන බවත් ඊට අදාළ ක්ෂේත්‍ර පිළිබඳ වෙන වෙනම සොයා බලන බවත් ජනාධිපති රනිල් වික්‍රමසිංහ ප්‍රකාශ කළේය.

ජනාධිපති රනිල් වික්‍රමසිංහ මෙම අදහස් පළ කළේ පෞද්ගලික අංශයේ ආයතන ප්‍රධානීන් සමඟ ජනාධිපති ලේකම් කාර්‍යාලයේදි ඊයේ (01) පැවැති 2024 අයවැය පූර්ව සාකච්ඡාවකට එක්වෙමිනි.

රට මුහුණපා ඇති ආර්ථික අර්බුදයෙන් මිදී ප්‍රකෘතිමත් වීම සහ තිරසාර වර්ධනයක් කරා ගමන් කිරීම අරමුණු කරගත් ප්‍රතිසංස්කරණ වැඩසටහන් පිළිබඳව ද ජනාධිපතිවරයා පෞද්ගලික අංශයේ නියෝජිතයන් සමඟ මෙහිදී සාකච්ඡා කළේය.

එහිදී රාජ්‍ය ආදායම සහ කාර්යක්ෂමතාව ඉහළ නැංවීම සම්බන්ධව මෙන්ම, ආයෝජකයන් ආකර්ෂණය කර ගැනීම, සංචාරක කර්මාන්තය, ඇඟළුම් කර්මාන්තය ඇතුළු විවිධ කර්මාන්ත නඟා සිටුවීමට ගත හැකි ක්‍රියාමාර්ග පිළිබඳ යෝජනා පෞද්ගලික අංශයේ ආයතන ප්‍රධානීන් විසින් ජනාධිපතිවරයා වෙත ඉදිරිපත් කරනු ලැබිණ.

පවතින ආර්ථික අර්බුදයෙන් මිදීමට ගත යුතු පියවර මෙන්ම විවිධ ක්ෂේත්‍රවලදී ව්‍යාපාරිකයන් මුහුණදෙන ගැටළු සම්බන්ධයෙන් මෙවර අය වැයේදී අවධානය යොමු කරන ලෙස ද ඔවුහු ජනාධිපතිවරයාගෙන් ඉල්ලා සිටියහ.

පෞද්ගලික අංශයේ ආයතන ප්‍රධානීන් ඉදිරිපත් කළ මෙම අදහස් හා යෝජනා පිළිබඳව අවධානය යොමු කරන බවත් ඉදිරියේදී එම එක් එක් ක්ෂේත්‍රයන්ට අදාළව වෙන වෙනම සාකච්ඡා කිරීමට බලාපොරොත්තු වන බවත් ජනාධිපතිවරයා මෙහිදී පැවසීය.

මෙරට ආර්ථික ස්ථාවරත්වයක් ඇති කිරීම වෙනුවෙන් ජනාධිපති රනිල් වික්‍රමසිංහ  ගෙන ගිය වැඩපිළිවෙළ ද මෙහිදී පෞද්ගලික ආයතන ප්‍රධානීන්ගේ පැසසුමට ලක් විය.

ආර්ථික කටයුතු පිළිබඳ ජනාධිපති ජ්‍යෙෂ්ඨ උපදේශක ආචාර්ය ආර්. එච්. එස් සමරතුංග, ජනාධිපති උපදේශක චන්ද්‍රා ෂාෆ්ටර්, මුදල් අමාත්‍යාංශයේ ලේකම් මහින්ද සිරිවර්ධන, ශ්‍රී ලංකා අයෝජන මණ්ඩලයේ සභාපති දිනේෂ් වීරක්කොඩි මහත්වරු සහ පුද්ගලික අංශයේ ආයතන රැසක ප්‍රධානීන් මෙම සාකච්ඡාවට එක්ව සිටියහ.

ලෝක කුසලාන තරගාවලියේ ශ්‍රී ලංකා කණ්ඩායම අද (02) ඉන්දීය කණ්ඩායම සමග පැවති මූලික වටයේ තරගයෙන් දරුණු පරාජයකට ලක්විය.

තරගයේ පළමුව පන්දුවට පහරදුන් ඉන්දීය පිල සිය පන්දු වාර 50 අවසානයේ කඩුලු 8ක් දැවී ලකුණු 357ක් ලබා ගත්තේය.

පිළිතුරු ඉනිම ක්‍රීඩා කළ ශ්‍රී ලංකා කණ්ඩායමට පන්දුවාර 19.4කදී සියලු දෙනා දැවී ලබාගත හැකිවූයේ ලකුණු 55ක් පමණි.

ඒ අනුව ශ්‍රී ලංකා කණ්ඩායමට මෙම ලෝක කුසලාන ඉවත් වීමට සිදුවෙයි.

ශ්‍රී ලංකා කණ්ඩායමට තවත් ඉතිරි වී ඇත්තේ තරග දෙකක් පමණි.

ශ්‍රී ලංකා පිල මීළඟ තරඟය නොවැම්බර් 6 වැනිදා බංගලදේශය සමගත් තරගාවලියේ ශ්‍රී ලංකාව සහභාගි වන අවසාන තරගය නොවැම්බර් 09 වැනිදා නවසීලන්ත සමඟත් පැවැත්වීමට නියමිතයි .

ලෝක බැංකු ආධාර යටතේ පළාත් සභා සහ පළාත් පාලන අමාත්‍යංශය විසින් ක්‍රියාත්මක ව්‍යාපෘතියක් මඟින් පළාත් නවයම ආවරණය වන පරිදි සෞඛ්‍ය සහ අධ්‍යාපන ක්ෂේත්‍ර වෙනුවෙන් බිලියන නවයක් ලබාදීමට සැලසුම් කර තිබෙන බව පළාත් සභා සහ පළාත් පාලන රාජ්‍ය අමාත්‍ය ජානක වක්කුඹුර පැවසීය.

පළාත් සභා යටතේ ඇති පළාත් පාලන ආයතනවල සිටින මෙතෙක් ස්ථිර කර නොමැති සේවකයින් 8400ක්, කැබිනට් අනුමැතිය ලැබුණු වහාම රජයේ ස්ථිර සේවයට බඳවා ගැනීමට කටයුතු කරන බව ද රාජ්‍ය අමාත්‍යවරයා සදහන් කලේය.

පළාත් සභා සහ පළාත් පාලන රාජ්‍ය අමාත්‍ය ජානක වක්කුඹුර  මේ බව සඳහන් කළේ 'ස්ථාවර රටකට සැවොම එක මඟකට' මැයෙන් අද (02) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

එහිදී වැඩිදුරටත් අදහස් දැක්වූ පළාත් සභා සහ පළාත් පාලන රාජ්‍ය අමාත්‍ය ජානක වක්කුඹුර මෙසේද පැවසීය.

“GIS” සහ “GPS Mapping” මඟින් පළාත් පාලන ආයතනවල සියම මාර්ග ඛණ්ඩාංක ගත කර මාර්ග ඉන්වෙන්ට්රියක් සකස් කර එම මාර්ග 1987/ අංක 15 දරණ පළාත් පාලන ආයතන පනතේ විධිවිධාන ප්‍රකාරව ගැසට් නිවේදන මඟින් පලකර එහි අයිතිය පළාත් පාලන ආයතන වෙත තහවුරු කිරිමට නියමිතව තිබෙනවා.
අප එම වැඩපිළිවෙල වයඹ පළාත තුළ ක්‍රියාත්මක කරනු ලැබුවා.

එම ක්‍රමවේදය සියළුම පළාත් ආවරණය කිරිම සඳහා වන ප්‍රතිපත්තිමය තීරණය ලබා ගැනීමට අමාත්‍ය මණ්ඩල පත්‍රිකාවක් ඉදිරිපත් කර 2023.10.09 දින ඊට අනුමැතිය ලබා ගෙන තිබෙනවා.

වසර 36කින් සිදුකිරීමට අපොහොසත් වූ මාර්ග සිතියම් ගත කිරීමේ ක්‍රමවේදය අප වසර එක හමාරක් වැනි කෙටි කාලයක් තුළ සිදුකරනවා.

එමෙන්ම උතුරු මැද හා උතුර යන පළාත් මේ වන විට මාර්ග හඳුනාගෙන ඛණ්ඩාංක සලකුණු කිරිම අවසන් කර තිබෙනවා. එය 2023.12.31 දිනට පෙර එම පළාත් දෙකෙහි කටයුතු අවසන් කිරීමට නියමිතයි. ඉතිරි පළාත් 06 සඳහා කාල රාමුවක් සකස් කර පුහුණුවීම් ලබා දී 2024 වසරේදි ඉලක්කය සපුරා ගැනිමට අපේක්ෂා කරනවා.

අප අමාත්‍යංශය යටතේ ලෝක බැංකු ආධාර යටතේ ක්‍රියාත්මක ව්‍යාපෘතියක් හරහා පළාත් නවයම ආවරණය වන පරිදි සෞඛ්‍ය සහ අධ්‍යාපන ක්ෂේත්‍රය වෙනුවෙන් බිලියන නවයක් ලබාදීමට කටයුතු කරනවා. ඉන් සෞඛ්‍ය අංශය වෙනුවෙන් මිලියන 4,500ක් ලබා දීමට කටයුතු කරනවා. ලබන වසරේ ජූනි මාසය අවසන් වන විට අදාළ පළාත්වල සෞඛ්‍ය ගැටළු විසදීමට කටයුතු කරනවා.

එම පළාත්වල තිබෙන පාසැල්වල පවතින අඩුපාඩු පිරිමසා ගැනීම වෙනුවෙන් තවත් මිලියන 4,500ක් ලබාදීමට ද අප කටයුතු කරනවා. ජනවාරී මාසයේ ආරම්භ කෙරෙන මෙම ව්‍යාපෘතිය මාස 06ක් තුළ නිම කිරීමට ද බලාපොරොත්තු වනවා.

ඒ වගේම පළාත් සභා යටතේ ඇති පළාත් පාලන ආයතනවල සිටින ස්ථිර නොකරන ලද සේවකයින් 8400ක් කැබිනට් අනුමැතිය ලැබුණු වහාම රජයේ ස්ථිර සේවයට බදවා ගැනීමට කටයුතු කරනවා. ඔවුන් වසර 15ක හෝ ඊට ආසන්න කාලයක් සේවයේ නියුතු පුද්ගලයින් වනවා. පළාත් සභාවලට සේවකයින් 10,000ක පුරප්පාඩුවක් තිබුණා. ඉන් 6000කට වැඩි පිරිසක් බහුකාර්ය සේවකයින් ලෙස ලබා දී තිබෙනවා. මේ මස 10 වන දින වනවිට ඉතිරි පුරප්පාඩු සඳහා එම බහුකාර්ය සංවර්ධන නිළධාරීන්ගෙන් ආවරණය කිරීමට කටයුතු කරනවා.

එමෙන්ම මාර්ගගත ක්‍රමය ඔස්සේ පළාත් පාලන ආයතනවල වරිපනම් ගෙවීම, කඩකුලි ගෙවීම් සහ ස්ථාන වෙනක්ර ගැනීම් ආදී කටයුතු සිදු කිරිමට අදාළව මෘදුකාංගය සකස් කිරීම ඉදිරි සති 02ක් වැනි කාලයක් තුළ නිම කිරිමට අපේක්ෂා කරනවා. එහි පළමු අදියර යටතේ මධ්‍යම පළාත සහ බස්නාහිර පළාත තුළ මාර්ගගත ක්‍රමවේදය ඔස්සේ ගෙවීම් කිරිම 2023.11.30 දින වන විට ආරම්භ කිරිමට නියමිතයි.

ඒ වගේම ඝන අපද්‍රව්‍ය පිරිසැකසුම් කිරිම සහ සනීපාරක්ෂතා බිම් පිරවුම් ව්‍යාපෘතිය නමින් කොරියානු රජයේ මූල්‍ය ආධාර යටතේ බදුල්ල සහ වව්නියාව යන දිස්ත්‍රික්වල සහ සියලු පළාත් පාලන ආයතනවල කසළ කළමනාකරණ ගැටළු සඳහා විසදුම් ලබා දිම පිණිස වූ ව්‍යාපෘතිය 2024 ජනවාරි මාසයේදි ආරම්භ කිරිමට නියමිතව තිබෙනවා.

සෞඛ්‍ය අමාත්‍ය වෛද්‍ය රමේෂ් පතිරණ සහ ශ්‍රී ලංකා බංග්ලාදේශ මහ කොමසාරිස් (H.E) Tareq Md Ariful Islam අතර හමුවක් පසුගිය දා සෞඛ්‍ය අමාත්‍යංශයේ දී පැවැත්විණි.

එහි දී ඇමරිකානු ඩොලර් 58000 ක් වටිනා ඖෂධ ආධාර තොගයක් ඉදිරි සතිය තුළ දී මෙරටට ලැබෙන බව අනාවරණය විය.

ඒ අතර මෙරටට අත්‍යවශ්‍ය ඖෂධ වර්ග 54 ක් වන බවත්, විශේෂයෙන් පිළිකා හා වකුගඩු ඖෂධ මේ අතර ප්‍රධාන වන බවත් ශ්‍රී ලංකා බංග්ලාදේශ මහ කොමසාරිස්වරයා පැවසීය.

මෙම ඖෂධ ආධාර තොගයට අමතරව බංග්ලාදේශ සෞඛ්‍ය අමාත්‍යංශය හරහා ඇමරිකානු ඩොලර් මිලියනයක් වටිනා තවත් ඖෂධ ආධාර තොගයක් ඉදිරියේ දී ලැබීමට නියමිත බවත් මහ කොමසාරිස්වරයා එහි දී පැවසීය.

ශ්‍රී ලංකා රජය විසින් කරන ලද ඉල්ලීමට කඩිනමින් ප්‍රතිචාර දක්වමින් මෙම ඖෂධ ප්‍රදානයන් සඳහා අවශ්‍ය පියවර ගැනීම සම්බන්ධයෙන් බංග්ලාදේශ මහ කොමසාරිස්වරයාටත්, බංග්ලාදේශ රජයටත් විශේෂ ස්තුතිය පිරිනමන බව සෞඛ්‍ය අමාත්‍ය වෛද්‍ය රමේෂ් පතිරණ  පැවසීය.

මේ අතර පවතින ඖෂධ හිඟයට පිළියමක් වශයෙන් ඉදිරියේ දී ශ්‍රී ලංකා රජය හා බංග්ලාදේශ රජය අතර ඖෂධ ලබා ගැනීම සම්බන්ධයෙන් වන රාජ්‍ය මට්ටමේ දිගු කාලීන වැඩපිළිවෙළක් සැකසීමේ අවශ්‍යතාව ද මෙහි දී වැඩි දුරටත් සාකච්ඡා කෙරිණි.

පාස්කු ඉරිදා ත්‍රස්ත ප්‍රහාර සිද්ධියට අදාළව ගොනු කෙරුණු මූලික අයිතිවාසිකම් පෙත්සම්වලට අදාළ වන්දි සම්පූර්ණයෙන් ගෙවීමට අපොහොසත් වූ හිටපු ජනාධිපති මෛත්‍රීපාල සිරිසේන, හිටපු ආරක්ෂක ලේකම් හේමසිරි ප්‍රනාන්දු, හිටපු පොලිස්පති පූජිත් ජයසුන්දර සහ රාජ්‍ය බුද්ධි සේවයේ හිටපු ප්‍රධානී නිලන්ත ජයවර්ධන යන අයට තම වත්කම් හා බැරකම් දිවුරුම් ප්‍රකාශයක් මාර්ගයෙන් අධිකරණයට ඉදිරිපත් කරන ලෙසට ශ්‍රේෂ්ඨාධිකරණය අද (නොවැ. 2) නියෝග කර තිබේ.

දෙසැම්බර් මස 30 වන දා හෝ ඊට පෙර එම දිවුරුම් ප්‍රකාශ ඉදිරිපත් කරන ලෙස එහිදී නියෝග කර ඇත.

පාස්කු ප්‍රහාරයට අදාළව ගොනු කෙරුණු මූලික අයිතිවාසිකම් පෙත්සම් 13ක් අද කැඳවූ අවස්ථාවේදී අධිකරණය එම නියෝගය නිකුත් කර තිබේ.

ඊට අමතරව පාස්කු ඉරිදා ත්‍රස්ත ප්‍රහාර සිද්ධිය සම්බන්ධයෙන් ගොනු කර තිබෙන මූලික අයිතිවාසිකම් පෙත්සම්වල වගඋත්තරකරු වශයෙන් නම් කර සිටින රාජ්‍ය බුද්ධි සේවයේ හිටපු ප්‍රධානී නිලන්ත ජයවර්ධන සම්බන්ධයෙන් ගනු ලැබූ විනය ක්‍රියාමාර්ග පිළිබඳ සවිස්තර වාර්තාවක් ද දෙසැම්බර් මස 30 වන දාට පෙර ගොනුකරන ලෙස ශ්‍රේෂ්ඨාධිකරණය නීතිපතිවරයාට නියෝග කර ඇත.

සීනි සඳහා පනවා තිබූ විශේෂ භාණ්ඩ බද්ද ඉහළ දැමීමට මුදල් අමාත්‍යංශය පියවර ගෙන තිබේ.

ඒ අනුව, සීනි කිලෝ එකක් සඳහා රුපියල් 50 දක්වා එම බද්ද ඉහළ දමා ඇතැයි එම අමාත්‍යංශය පැවසීය.

එය අද (නොවැ. 2) සිට වසරක කාලයක් බලාත්මක වනු ඇත.

මෙතෙක් සීනි කිලෝ එකක් සඳහා එම බද්ද ශත 25ක්ව පැවතිණි.

අදාළ නිවේදනය පහතින් දැක්වේ.

ගවර්ස් කෝපරේට් සමාගමේ සිද්ධිය සම්බන්ධයෙන් පාර්ලිමේන්තු මන්ත්‍රී නාමල් රාජපක්ෂ ඇතුළු විත්තිකරුවන් පස්දෙනෙක්, සාක්ෂි කැඳවීමකින් තොරව නිදොස් කොට නිදහස් කිරීමට කොළඹ මහාධිකරණය නියෝග කර තිබේ.

පැමිණිල්ලේ සාක්ෂිකරුවන් ලබාදුන් සාක්ෂි අධිකරණයට පිළිගත නොහැකි, විශ්වාසයෙන් තොර සාක්ෂි බවත් අධිකරණය සලකා බලන්නේ විත්තිකරුවන්ගේ තරාතිරම නොව ඔවුන්ට එරෙහිව ගොනුකර ඇති චෝදනා සනාථ කළ හැකි සාක්ෂි පමණක් බව ද අධිකරණය හමුවේ පෙන්වා දුන් කොළඹ මහාධිකරණ විනිසුරු නවරත්න මාරසිංහ විසින් අද (02) එම නියෝගය ලබා දී ඇත.

එමෙන්ම මේ වනවිට අධිකරණය මඟහැර ගොස් සිටින එම නඩුවේ දෙවැනි විත්තිකරු වන ප්‍රභාත් කරුණාජීව ට සහ එම නඩුවේ සිව්වන විත්තිකාරියට පනවා ඇති විදෙස් ගමන් තහනම වහාම ඉවත් කරන ලෙස ද විනිසුරුවරයා මෙහිදී දැනුම් දී තිබේ.

එමෙන්ම ප්‍රභාත් කරුණාජීව අත්අඩංගුවට ගැනීමට නිකුත් කර ඇති විවෘත වරෙන්තු ආපසු කැඳවීමට විනිසුරුවරයා නියෝග කර ඇත.

පාර්ලිමේන්තු මන්ත්‍රීවරයෙකු වශයෙන් කටයුතු කරමින් සිටිය දී අයථා ලෙස උපයා ගත් රුපියල් මිලියන 30ක මුදලක් ගවර්ස් කෝපරේට් සමාගමේ යෙදවීම තුළින් මුදල් විශුද්ධිකරණය වැළැක්වීමේ පනත යටතේ වරදක් සිදුකළේ යැයි නාමල් රාජපක්ෂ ට චෝදනාව එල්ල වී තිබුණි.

ඉන්දීය මුදල් අමාත්‍ය නිර්මලා සීතාරාමන් තෙදින නිල සංචාරයක් සඳහා අද (නොවැ. 1) දිවයිනට පැමිණියාය.

ඉන්දීය විදේශ කටයුතු අමාත්‍යංශය සඳහන් කළේ, කොළඹදී පැවැත්වීමට නියමිත ඉන්දු ශ්‍රී ලංකා ව්‍යාපාරික සමුළුවකට ඉන්දීය මුදල් අමාත්‍යවරිය එක්වීමට නියමිත බව ය.

හෙට (නොවැ. 2) දින පැවැත්වීමට නියමිත එහි ප්‍රධාන දේශනය නිර්මලා සිතාරාමන් විසින් සිදු කරනු ලැබීමට නියමිත බව ද එම අමාත්‍යංශය පැවසීය.

අනතුරුව ඇය ත්‍රිකුණාමල‍යේ පිහිටි තෙල් ටැංකි සංකීරණයේ නිරීක්ෂණ චාරිකාවකට එක්වීමට නියමිතව තිබේ.

ඇය යාපනයේ සහ මහනුවර යන ප්‍රදේශවල ද සංචාරයන්හි නිරත වනු ඇත.

මෙම සංචාරයේදී ජනාධිපති රනිල් වික්‍රමසිංහ, අග්‍රාමාත්‍ය දිනේෂ් ගුණවර්ධන සහ ජල සම්පාදන හා වතු යටිතල පහසුකම් සංවර්ධන අමාත්‍ය ජීවන් තොණ්ඩමන් ඇතුළු දේශපාලන නියෝජිතයින් කිහිප දෙනෙකු සමග නිර්මලා සීතාරාමන් සාකච්ඡා පැවැත්වීමට නියමිත බව ඉන්දීය විදේශ කටයුතු අමාත්‍යංශය පැවසීය.

මෙරට ආගමික ස්ථානවල සූර්ය බලපද්ධති සවිකිරීම සඳහා වූ අවබෝධතා ගිවිසුමක් ශ්‍රී ලංකා රජය සමග අත්සන් කිරීමේ අවස්ථාවට ද ඇය එක් වීමට නියමිත ය.

සබරගමුව විශ්විද්‍යාලයේ නව උපකුලපතිවරයා ලෙස මහාචාර්ය එම්. සුනිල් ශාන්ත  පත් කර තිබේ.

 ජනාධිපති රනිල් වික්‍රමසිංහ  විසින් මෙම පත් කිරීම සිදු කරනු ලැබ ඇත්තේ, හෙට (02) සිට වසර තුනක කාලයක් සඳහා බලපැවැත්වෙන පරිදියි.

මාහාචාර්ය එම්. සුනිල් ශාන්ත  සබරගමුව විශ්වවිද්‍යාලයේ ආර්ථික හා සංඛ්‍යාන විද්‍යා අධ්‍යයනාංශයේ මීට පෙර සේවය කළේ ය.