පුවත්

ආර්ථිකය ස්ථායීකරණයට අදාළ කෙටි සහ මධ්‍ය කාලීන වැඩසටහන් හඳුනා ගැනීම සඳහා ජාතික සභාව යටතේ සාමාජිකයන් පත් කරන ලද ආර්ථික ස්ථායීකරණ අනු කමිටුවේ සභාපතිවරයා ලෙස පාර්ලිමේන්තු මන්ත්‍රී පාඨලී චම්පික රණවක අද (07) පාර්ලිමේන්තුවේ දී නිතරගයෙන් පත් විය.

මසක් ඇතුලත ශ්‍රී ලංකාවේ ආර්ථික ස්ථායිකරණ වැඩපිළිවෙල හඳුන්වා දීම අනු කමිටුවේ අරමුණ වී තිබේ.

රණවක මන්ත්‍රීවරයා ගේ නම යෝජනා කරන ලද්දේ පාර්ලිමේන්තු මන්ත්‍රී වජිර අබේවර්ධන වන අතර, යෝජනාව ස්ථිර කරන ලද්දේ නසීර් අහමඩ් සහ මනෝ ගනේෂන් යන පාර්ලිමේන්තු මන්ත්‍රීවරුන් විසිනි.

– media unit

ආර්ථිකය සහ පරිසරය නිරන්තරයෙන් බැඳී පවතින බැවින් වැඩි වෙමින් පවත්නා කාලගුණික සහ දේශගුණික විපර්යාස වළක්වා ගැනීමට දිගු කාලීන සැලැස්මක් ඉදිරිපත් කිරීමට අපේක්ෂා කරන බව දේශගුණික විපර්යාස පිළිබඳ ජනාධිපති ජ්‍යෙෂ්ඨ උපදේශක රුවන් විජයවර්ධන පැවසීය.

ජනාධිපති ජ්‍යෙෂ්ඨ උපදේශක රුවන් විජයවර්ධන මේ බව සඳහන් කළේ පසුගියදා තායිලන්තයේ බැංකොක් නුවරදී පැවැති “දේශගුණික මූල්‍යකරණය” (Climate Finance) පිළිබඳ සංවාදයේ සමාරම්භක සැසිය අමතමිනි.

දේශගුණික විපර්යාසයන් හා ආර්ථිකයට අදාළ ජාත්‍යන්තර රාජ්‍ය හා රාජ්‍ය නොවන සංවිධාන රැසක සාමාජිකයන්ගේ සහභාගීත්වයෙන් මෙම සංවාදය පැවැත්විණි.

කාලගුණික සහ දේශගුණික විපර්යාසයන් ජය ගැනීමේ ක්‍රියාවලියේදී සියලුදෙනා සාමූහිකව එක් විය යුතු බව පැවසූ ජනාධිපති ජ්‍යෙෂ්ඨ උපදේශක රුවන් විජයවර්ධන ශ්‍රී ලංකාව දැනටමත් පරිසර සහ වායු දූෂණය අවම කර ගැනීමට වැඩපිළිවෙළ රැසක් ආරම්භ කර ඇතැයි ද පැවසිය.

එහිදී තවදුරටත් අදහස් දැක්වු ඔහු මෙසේද පැවසීය.

ශ්‍රී ලංකාව දැනට ඉතාම දුෂ්කර ආර්ථික තත්වයක් පසු කරමින් සිටිනවා. එය අප නිදහස ලැබුවාට පසු හටගත් විශාල ම ආර්ථික අර්බුදයයි. සමාජ ආර්ථික වශයෙන් ඉතාමත් ඉක්මනින් මේ තත්ත්වය ප්‍රතිසංස්කරණය කර ගත යුතුව තිබෙනවා.

අපේ රට දූපතක්. ඒ නිසාම අපි කාලගුණික සහ දේශගුණික විපර්යාස වලට ඉක්මනින්ම ගොදුරු වෙනවා. මේ තත්ත්වය කාලයෙන් කාලයට වර්ධනය වෙමින් යනවා. විශේෂයෙන්ම ජලය මූලික කර ගත් ව්‍යසනවලට අපි මුහුණ දෙමින් සිටිනවා.

ලෝකයේ වැඩියෙන්ම කාලගුණික සහ දේශගුණික අවදානම්වලට ලක්විය හැකි රටවල් දහය අතරේ අප සිටින බව ගෝලීය කාලගුණික අවධානම් දත්ත පොතේ 2018 නිකුත් කළ වාර්තාවන්ට අනුව සඳහන් වෙනවා.

රටේ මෙවැනි අර්බුදකාරී වාතාවරණයක් පවතින මොහොතකදී දේශගුණික විපර්යාසත් සිදුවීමේදී පවතින තත්වය කළමනාකරණය කර ගැනීමට අපහසු වෙනවා. විශේෂයෙන්ම දේශීය සම්පත් මත යැපීමේ අවශ්‍යතාවය අපේ අනාගතය සුරක්ෂිත කරගැනීම සඳහා අවශ්‍යව තිබෙනවා.

උදාහරණයක් වශයෙන් කෘෂිකර්මාන්තය,ධීවර කර්මාන්තය සහ සංචාරක කර්මාන්තය වැනි අංශවල දී මේ තත්ත්වය ඉතාමත් වැදගත් වෙනවා. මේ තත්ත්වයන් තුළ දී කාලගුණය මගින් හටගන්නා විවිධ දුෂ්කරතා නිසා, අපේ ජන ජීවිතයට හානි වන අතරම ආර්ථිකය ආපස්සට යෑමක් සිදුව තිබෙනවා.

හරිතාගාර වායු විමෝචන ක්ෂේත්‍රයේදී ශ්‍රී ලංකාවේ දායකත්වය පිළිබඳ ප්‍රශ්නයක් මතුව තිබෙනවා. පසුගිය වසරේ වායු විමෝචනය අවම කරගැනීම සඳහා අපි විශේෂ වැඩසටහනක් ක්‍රියාත්මක කර තිබෙනවා. 2030 වර්ෂය වන විට ශ්‍රී ලංකාව තම බල ශක්ති අවශ්‍යතාවයෙන් සියයට හැත්තෑවක් පමණ පුනර්ජනනීය බලශක්ති ප්‍රභවයෙන් ලබා ගැනීමට අපේක්ෂා කරනවා. ඒ වගේම 2050 වර්ෂය වන විට ගල් අඟුරුවලින් ක්‍රියාත්මක වන විදුලි බලාගාර සම්පූර්ණයෙන්ම නවත්වන්නට තීරණය කර තිබෙනවා. මේ ඉතාම වගකිව යුතු තත්ත්වයක්. මේ සඳහා ඉතා ශක්තිමත් සම්බන්ධීකරණ වැඩපිළිවෙළක් සහ මුදල් ප්‍රමාණයක් අවශ්‍යයි.

තවද එක්සත් ජාතීන්ගේ සංවර්ධන වැඩසටහන යටතේ අප කාබන් ශූන්‍ය කිරීමේ වැඩසටහනක් සහ ඒ සඳහා වූ ක්‍රමෝපායික වැඩපිළිවෙළක් සකස් කරමින් සිටිනවා. ඒ තුළින් තමයි අපි අපේ පරිසරය සම්බන්ධව තිරසාර වැඩපිළිවෙළක් ක්‍රියාත්මක කිරීමට බලාපොරොත්තු වන්නේ.
මෙම කාබන් ශූන්‍ය කිරීමේ වැඩපිළිවෙළේ දී බලශක්ති නිෂ්පාදන අංශයට විශාල වැඩ කොටසක් පැවරී තිබෙනවා. ඒ වගේම ජාතික කාලගුණික වෙනස්කම් ප්‍රතිපත්තියක් එක්සත් ජාතීන්ගේ සංවර්ධන වැඩසටහන යටතේ ක්‍රියාත්මක කිරීමට අපි බලාපොරොත්තු වෙනවා.

කාලගුණය සහ දේශගුණය සම්බන්ධව ගන්නා හැම තීරණයක්ම ප්‍රතිපත්ති මත තීරණය විය යුතු බව අප තරයේ විශ්වාස කරනවා. එසේ වුවත් තවත් විශාල කාර්යභාරයක් ඉටු කරන්නට අපට ඉතිරි වෙලා තිබෙනවා.

මෙතැනදී තමයි මේ දේශගුණික මූල්‍ය සංකල්පය වැදගත් වන්නේ. සියල්ලක් වෙනුවෙන්ම මුදල් අවශ්‍යයි. එනිසා මේ මොහොතේ වඩා වැදගත් වෙලා තියෙන්නේ දේශගුණික මූල්‍යකරණය කියන ප්‍රතිපත්තිය ක්‍රියාත්මක කිරීමයි. මේ කාරණය සම්බන්ධයෙන් ක්‍රියාත්මක වීම අපි දැනටමත් ආරම්භ කර තිබෙනවා.

මේ කරුණ වෙනුවෙන් එක්සත් ජාතීන්ගේ සංවර්ධන වැඩසටහන සමඟ අපි දැනටමත් එකතු වෙලා ඉන්නවා. මේ වන විට ශ්‍රී ලංකා මහ බැංකුව තිරසාර ජාතික මූල්‍ය වැඩපිළිවෙළක් සඳහා යොමු වෙමින් ඉන්නවා. මේ සඳහා "බයෝ ෆින්" (BIOFIN) සහයෝගය ලැබෙනවා.

මා මේ දක්වා පැහැදිලි කළ කරුණු සමග තවත් එක් අවසන් කාරණයක් සඳහන් කරන්නට තිබෙනවා. දේශගුණ විපර්යාස ගැන සාකච්ඡා කිරීමේදී අඩු කාබන් ප්‍රතිශතයක් පවත්වාගෙන යෑම, අවදානම් දැනුම් දීමේ ජාතික මට්ටමේ වැඩපිළිවෙළක් ක්‍රියාත්මක කිරීම, යන කරුණු සඳහා අරමුදල් සම්පාදනය කර ගැනීම යන කාරණා සම්බන්ධව අවධානය යොමු කරන බව සඳහන් කරන්නට කැමතියි.

වත්මන් අභියෝගයෙන් රට ගොඩගැනීමට නම් රට තුළ ස්ථාවරභාවයක් ඇති කළයුතු බවත්, ඒ සඳහා නිවැරදි තොරතුරු ජනගත කිරීම අත්‍යවශ්‍ය බවත් ජනාධිපති රනිල් වික්‍රමසිංහ අවධාරණය කළේය.

ප්‍රචාරණයක් නොමැතිව කිසිවක් සාර්ථක කරගත නොහැකි බව පෙන්වා දුන් ජනාධිපතිවරයා රට ගොඩගැනීමේ රජයේ වැඩපිළිවෙළ නොපමාව ජනතාවට හෙළි කිරීමට කැපවන්නැයි සියලු මාධ්‍ය ලේකම්වරුන්ට පැවසීය.

ජනාධිපති රනිල් වික්‍රමසිංහ මේ බව සඳහන් කළේ රාජ්‍ය සන්නිවේදන යාන්ත්‍රණය පිළිබඳ සියලු කැබිනට් අමාත්‍යවරුන්ගේ, රාජ්‍ය අමාත්‍යවරුන්ගේ සහ ආණ්ඩුකාවරුන්ගේ මාධ්‍ය ලේකම්වරුන් දැනුවත් කිරීම සඳහා අද (07) රජයේ ප්‍රවෘත්ති දෙපාර්තමේන්තුවේ දී පැවැත්වුණු වැඩමුළුව අමතමිනි.

පෙර දැනුම්දීමකින් තොරව හදිසියේම ජනාධිපතිවරයා මෙම අවස්ථාවට එක්වීම විශේෂත්වයකි.

රජයේ සංවර්ධන හා ප්‍රතිපත්තිමය වැඩපිළිවෙළ ජනගත කිරීමේ දී ප්‍රමුඛ වගකීමක් අමාත්‍යාංශ මාධ්‍ය ලේකම්වරුන්ට පැවරෙන අතර එහිදී රාජ්‍ය සන්නිවේදන යාන්ත්‍රණය ශක්තිමත්ව පවත්වා ගෙනයාමට රජයේ ප්‍රවෘත්ති දෙපාර්තමේන්තුව, ජනාධිපති මාධ්‍ය අංශය හා අමාත්‍යාංශ අතර ප්‍රශස්ත සම්බන්ධීකරණයක් පවත්වාගැනීමේ වැදගත්කම පිළිබඳ මෙම වැඩමුළුවේදී මාධ්‍ය ලේකම්වරුන් දැනුවත් කෙරිණි.

එහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය ,

මෙවැනි වැඩමුළු පැවැත්වීම කාලෝචිත පියවරක් බව කිව යුතුයි. මෙහිදී දීර්ඝ වශයෙන් අදහස් දැක්වීමට මම බලාපොරොත්තු වෙන්නේ නැහැ. මම දැන් කතා කළා ඇති. ඒ කතාවල හරය රටට ලබාදීමයි දැන් තිබෙන්නේ.

ආණ්ඩුවේ වැඩපිළිවෙළ රටට දන්වන්න තිබෙනවා. අපි ඉතා අසීරු කාලයක ඉන්නේ. මම හිතන්නේ 20 වන ශතවර්ෂයේ නෙවෙයි ඊට පෙරවත් මෙවැනි තත්ත්වයකට අප මුහුණ දී නැහැ. අපිට මෙයින් ගොඩඑන්න තිබෙනවා. ජනතාව බොහෝ දෙනෙක්ට බලාපොරොත්තු නැති වෙලා තිබෙනවා. අපි ඒ තත්ත්වය නිවැරදි කළ යුතුයි. ආණ්ඩුවේ වැඩපිළිවෙළ කුමක්ද කියා සඳහන් කළයුතුයි.

රටේ තිබෙන ප්‍රශ්න ගැන අපි අවධානයෙන් ඉන්නේ, හැම ප්‍රශ්නයකටම දැනට විසඳුම් සොයන්න බැරි වුණත් අපි ඒ ප්‍රශ්න ගැන දන්නවා. ඒ පිළිබඳ ජනතාවට පණිවිඩයක් ලබා දිය යුතුයි. හැමකෙනාම දැන ගන්න ඕන මොකක්ද ආණ්ඩුව කරන්නේ කියලා. වැරදි මත තිබෙනවනම් ඒවා නිවැරදි කරගන්න ඕන. මේ අසීරු කාලයෙන් අපි ගොඩඑන්න ඕන. රටේ අස්ථාවර භාවයක් තිබුණොත් ගොඩඑන්න බැහැ. රටේ ස්ථාවර භාවයක් තිබෙන්න ඕන. ඒ ස්ථාවර භාවය ඇති කරන්න ඕන නිවැරදි තොරතුරු ලබා දීලා.

අද විද්‍යුත් මාධ්‍යයෙන්, මුද්‍රිත මාධ්‍යයෙන් නොවෙයි ගැටලුකාරී තත්ත්වයක් මතුව තිබෙන්නේ සමාජ මාධ්‍යයෙන්. එහි හොදයි, නරකයි දෙකම තිබෙනවා. ඒක මුළු ලෝකයේම තිබෙන ප්‍රශ්නයක්. අපිට එය විශේෂයෙන්ම බලපාන්නේ මේ අවස්ථාවේදී. ඉතින් ඔබ සියලුදෙනාට මේ වගකීම ඉෂ්ට කරන්න තිබෙනවා.
ඔබේ වගකීම නිසි ලෙස ඉටු නොකළහොත් මුළු රටටම තවත් ප්‍රශ්නවලට මුහුණ දෙන්න වෙනවා. ඔබ අද හමුවන්නේ ඒ පණිවිඩය ලබාදීමටයි. මෙම වැඩමුළුවට සියලු මාධ්‍ය ලේකම්වරුන්ට ආරාධනා කර තිබෙන බව මට දැන ගන්න ලැබුණා. නමුත් පැමිණීමේ ලේඛනය අනුව අද මේ සඳහා සහභාගී වී සිටින්නේ 83%ක පමණ පිරිසක්. ආවේ නැත්තේ කවුද කියලත් හොයන්න ඕන. මොකද මේ අයට වගකීමක් පැවරී තිබෙනවා. කොහොමද මාධ්‍යයට කරුණු පැහැදිළි කරන්නේ, කොහොමද වැරදි මත නිවැරදි කරන්නේ, ඒ සඳහා විශාල ප්‍රචාරන ව්‍යාපාරයක් ගෙනියන්න තිබෙනවා. ප්‍රචාරය නැතිව කිසිවක් සාර්ථක වෙන්නේ නැහැ.

මීට අමතරව තවත් වැඩසටහන් තිබෙනවා. ඒ පිළිබඳවත් ඔබ දැනුවත් විය යුතුයි. ඒ තමයි නිදහසින් පසු 75 වන සංවත්සරය පවත්වන්නේ ලබන වසරේ. ඒ වගේම ලබන සතියේ සිට හිටපු කතානායකතුමාගේ අදහසක් අනුව ජනසභා ඇති කිරීමේ වැඩපිළිවෙල සැලසුම් කරලා තිබෙනවා. මෙලෙස විශාල වැඩකොටසක් තිබෙනවා. ඒ ගැන ප්‍රචාරයක් ලබා ගැනීමට තමයි මෙවැනි වැඩසටහන් සංවිධාන කරන්නේ.

ඒ වාගේම මම යෝජනා කරලා තිබෙන්නේ මාස 03කට පමණ සැරයක් මෙම පිරිස කැඳවලා සාකච්ඡා කරන්න. මේ වැඩසටහන කරන අපේ මාධ්‍ය අංශ භාර ප්‍රධානීන්ට මෙන්ම ලංකාදීප ප්‍රධාන කර්තෘතුමාට මම ස්තූතිවන්ත වෙනවා.

රජයේ ප්‍රවෘත්ති අධ්‍යක්ෂ ජනරාල් දිනිත් චින්තක කරුණාරත්නගේ මගපෙන්වීමෙන් සංවිධාන කර තිබූ මෙම අවස්ථාවට අමාත්‍ය බන්දුල ගුණවර්ධන, රාජ්‍ය අමාත්‍ය ශාන්ත බණ්ඩාර, ජනාධිපති ජ්‍යෙෂ්ඨ මාධ්‍ය උපදේශක මහාචාර්ය සුනන්ද මද්දුමබණ්ඩාර, ජනාධිපති මාධ්‍ය අධ්‍යක්ෂ ජනරාල් ධනුෂ්ක රාමනායක සහ ස්වාධීන රූපවාහිනි ආයතනයේ සභාපති නීතිඥ සුදර්ශන ගුණවර්ධන, ලංකාදීප ප්‍රධාන කර්තෘ සිරි රණසිංහ ඇතුළු පිරිසක් එක්ව සිටියහ.

විසි දෙවැනි ආණ්ඩුක්‍රම ව්‍යවස්ථා සංශෝධන කෙටුම්පත පිළිබඳ දෙවනවර කියවීමේ විවාදය ලබන 20 සහ 21 දෙදින පැවැත්වීමට අද (7) තීරණය කර ඇත .

ඒ පාර්ලිමේන්තු කටයුතු පිළිබඳ කාරක සභාව කතානායක මහින්ද යාපා අබේවර්ධනගේ ප්‍රධානත්වයෙන් පාර්ලිමේන්තු සංකීර්ණයේදී රැස්වූ අවස්ථාවේ ය.

මෙම පනත් කෙටුම්පත පිළිබඳ විවාදය ඔක්තෝබර් 6-7 දෙදින පැවැත්වීමට පෙර තීරණය කර තිබිණ.

නමුත් පක්ෂ නායක රැස්වීමේදී ගනුලැබූ තීන්දුවක් අනුව එය කල්තැබිණ.

එසේම 2023 වර්ෂය සදහා වන විසර්ජන පනත් කෙටුම්පත (අයවැය) ලබන 18 වැනිදා ඉදිරිපත් කිරීමට කිරීමටද( පළමු වර කියවීම) එම කාරක සභාව තීරණය කර ඇත.

දරුණු ආර්ථික අර්බුදයකට මුහුණ දී සිටින ශ්‍රී ලංකාවේ සැබෑ දළ දේශීය නිෂ්පාදිතය මේ වසරේ සියයට 9.2කින් සහ 2023 වසරේදී තවත් සියයට 4.2කින් පහත වැටෙනු ඇතැයි අපේක්ෂා කරන බව ලෝක බැංකුව පවසයි.

දකුණු ආසියානු රටවල්වල ආර්ථිකය සම්බන්ධයෙන් ලෝක බැංකුව වසරකට දෙවරක් වාර්තා නිකුත් කරන අතර ඊයේ (ඔක්. 6) නිකුත් කළ ඔවුන්ගේ නවතම වාර්තාව වන Coping with Shocks: Migration and the Road to Resilience මේ බව සඳහන් කර තිබේ.

COVID-19 වසංගතය සහ යුක්‍රේන යුද්ධය හේතුවෙන් වාර්තාගත ලෙස ඉහළ ගිය භාණ්ඩ මිල ශ්‍රී ලංකාවට විශාල හානියක් සිදු කළ බව එම වාර්තාවේ දැක්වේ.

ලෝක බැංකුව පෙන්වා දෙන්නේ, ණය ප්‍රතිව්‍යුහගත කිරීම සහ ගැඹුරු ප්‍රතිසංස්කරණ වැඩසටහනක් ක්‍රියාත්මක කිරීම ශ්‍රී ලංකාවේ ආර්ථික ස්ථාවරත්වය සඳහා ඉතා වැදගත් වන බව ය.

එමෙන් ම, ආර්ථික අර්බුදය හේතුවෙන් අවදානමට ලක්වූවන් ආරක්ෂා කිරීම ඉතා වැදගත් බව ත් සමාජ ආරක්ෂණ පද්ධතිය ශක්තිමත් කිරීම කෙරෙහි අවධානය යොමු කරන අතර ම දිළිඳුම සහ වඩාත් ම අවශ්‍යතා ඇති අය ආරක්ෂා කිරීමට කඩිනම් ක්‍රියාමාර්ගයක් ගත යුතු බව ත් එහි සඳහන් කර ඇත.

අදාළ වාර්තාව මගින් පෙන්වා දෙන්නේ, ගෝලීය ආහාර හා බලශක්ති මිල ඉහළ යාම සහ කලාපයේ ආහාර අනාරක්ෂිතභාවය අයහපත් අතට හැරවූ වෙළඳ සීමා කිරීම් හේතුවෙන් දකුණු ආසියාවේ උද්ධමනය මේ වසරේ සියයට 9.2 දක්වා ඉහළ යනු ඇතැයි අපේක්ෂා කරන බව ය.

ඒ හේතුවෙන්, කලාපයේ වර්ධනය අඩාල වෙමින් පවතින බව ත් රටවල්වලට ඔරොත්තු දීමේ හැකියාව ගොඩනැගීමේ අවශ්‍යතාව ලෝක බැංකුව සිය වාර්තාව මගින් අවධාරණය කර ඇත.

ආර්ථික අර්බුදය හමුවේ, ශ්‍රී ලංකාවේ 2021 සහ 2022 වසර අතර දරිද්‍රතා ඇස්තමේන්තු සියයට 25.6 දක්වා දෙගුණ වී ඇති අතර, දරිද්‍රතාවයෙන් පෙළෙන පුද්ගලයින්ගේ සංඛ්‍යාව මිලියන 2.7කින් ඉහළ ගිය බව මාලදිවයින, නේපාලය සහ ශ්‍රී ලංකාව සඳහා වන ලෝක බැංකුවේ අධ්‍යක්ෂ Faris H. Hadad-Zervos අදාළ වාර්තාව පදනම් කරගනිමින් ප්‍රකාශ කර තිබේ.

ඔහු සඳහන් කර ඇත්තේ, අර්බුදයේ බලපෑම් අවම කර ගැනීමට සහ ජනතාවගේ දිගුකාලීන ඔරොත්තු දීමේ හැකියාව ගොඩනැගීම සඳහා කර්මාන්ත හා සේවාවල රැකියා ව්‍යාප්ත කිරීම ත් ආදායමේ සැබෑ වටිනාකම නැවත ඇති කර ගැනීම ත් ශ්‍රී ලංකාවට අවශ්‍ය වනු ඇති බව ය.

නැගෙනහිර සහ අග්නිදිග ආසියානු රටවල් සිය ආර්ථිකය ප්‍රකෘතිමත් වීම වේගවත් කිරීම සඳහා සිදු කළ සාර්ථක ප්‍රතිසංස්කරණ, ශ්‍රී ලංකාවට වඩා හොඳින් ගොඩනැගීමට පාඩම් සපයන බව ද ඔහු පෙන්වා දී තිබේ.

ඒ අනුව පළමුව, ව්‍යුහාත්මක දුර්වලතා ආමන්ත්‍රණය කිරීමට අවශ්‍ය කෙටි කාලීන ක්‍රියාමාර්ග, බාහිර බලපෑම් අවම කිරීමට සහ අනාගත බලපෑම්වලට ඔරොත්තු දීමේ හැකියාව ගොඩනැගීම මෙන් ම දෙවනුව, අනාගත වර්ධනය ප්‍රවර්ධනය කිරීම සඳහා තීරණාත්මක ප්‍රතිපත්ති ගැනීම එයින් ශ්‍රී ලංකාවට උගත හැකි බව ලෝක බැංකුව වැඩිදුරටත් සඳහන් කර ඇත.

-mawbima

මෙරට උද්ධමනය මේ මාසයේ දී තවදුරටත් ඉහළ ගොස් ඉන් පසු ව පහළ යනු ඇතැයි ශ්‍රී ලංකා මහ බැංකුවේ අධිපති ආචාර්ය පී. නන්දලාල් වීරසිංහ පවසයි.

2022 හි 7 වැනි මුදල් ප්‍රතිපත්ති විවරණය දැනුම් දීමේ අවස්ථාවට එක්වෙමින් මහ බැංකු අධිපතිවරයා ඊයේ (06) මේ බව සඳහන් කර ඇත.

සැප්තැම්බර් මාසයේ දී උද්ධමනය ශ්‍රී ලංකා මහ බැංකුව අපේක්ෂා කළා ට වඩා ඉහළ ගිය බව ද අධිපතිවරයා එහිදී පවසා ඇත.

මෙම මාසයේ දී උද්ධමනය ඉහළ ගොස් ඉන් පසුව පහළ යනු ඇතැයි ශ්‍රී ලංකා මහ බැංකුව පුරෝකථනය කළ බවත් සත්‍ය තත්ත්වය ද ඒ දෙසට ගමන් කරමින් තිබුණත් සැප්තැම්බර් මාසයේ දී අපේක්ෂා කළාට වඩා උද්ධමනය ඉහළ ගිය බවත් පහු සඳහන් කරයි.

සැප්තැම්බර් මාසයේ දී උද්ධමනය 67.8 ක් වනු ඇතැයි අපේක්ෂා කළ බවත් කෙසේ නමුත් උද්ධමනය ගණනය කළ පසු 69.8ක් වූ බවත් හෙතෙම කීවේ ය.

කොළඹ පාරි‌භෝගික මිල දර්ශකයට අනුව උද්ධමනය ලබන මාසයේ දී මෙම මාසයට වඩා අඩුවනු ඇතැයි ද එසේ වුවත් ජාතික පාරිභෝගික මිල දර්ශකයට අනුව මේ මාසයේ උද්ධමනය තවදුරටත් වැඩි වනු ඇතැයි ද පැවසු මහ බැංකු අධිපතිවරයා වැඩිදුරටත් සඳහන් කර සිටියේ
මෙම ප්‍රවණතාව ඉදිරියටත් පවතිනු ඇති බවත් ඒ අනුව දෙසැම්බර් මාසය වනවිට උද්ධමනය අඩු වී ලබන වසරේ දී තවදුරටත් උද්ධමනය අඩු වනු ඇති බවත්ය.

ශ්‍රී ලංකාව මහ බැංකුව මුදල් ප්‍රතිපත්තිය දැඩි කිරීම හේතුවෙන් මෙලෙස උද්ධමනය අඩු වනු ඇතැයි ද ඔහු කීවේ ය.

ඉහළ පොලී අනුපාත නිසා ව්‍යාපාරික කටයුතු යනාදිය කරගත නොහැකි වී ඇතැයි ඇතැම් පාර්ශව චෝදනා කරන බව කී අධිපතිවරයා එසේ ව්‍යාපාරික කටයුතු යනාදිය කරගත නොහැකි වී ඇත්තේ පොලී අනුපාත ඉහළ යෑම නිසා නොව උද්ධමනය ඉහළ යෑම නිසා යැයි ද කීවේ ය.

උද්ධමනය තවදුරටත් ඉහළ ගියහොත් ව්‍යාපාර කඩා වැටෙනු ඇතැයි ද ඔහු කීය.

පොලී අනුපාත ඉහළයක පවත්වාගෙන යන්නේ උද්ධමනය පාලනය කරගනිමින් අඩු කරගැනීමට යැයි ද ඔහු කීවේ ය.

උද්ධමනය පාලනය වී අඩු වීමේ ප්‍රවණාතවක් අඩු වූ පසු පොලී අනුපාත අඩු කිරීමට ඉඩ සැලසෙනු ඇතැයි ද අධිපතිවරයා කීය.

සියලු කර් මාන්ත, සියලු ව්‍යාපාර, සියලු සේවාවලට වඩාත් වැදගත්ම දෙය වනුයේ උද්ධමනය පාලනය කරගැනීම යැයි ද හෙතෙම පැවැසීය.

පසුගිය කාලයේ දී එය කරගත නොහැකි වූ බවත් පසුගිය කාලයේ දී ප්‍රමාණයට වඩා අඩුවෙන් තබාගැනීමත් මුදල් අච්චු ගැසීමත් යනාදියේ ප්‍රතිඵල අද අත්විඳින්නට සිදු වී ඇති බවත් ඔහු කීවේ ය.

නැවත වරක් පොලී අනුපාත අඩු කළහොත් නැවත වරක් ඒ සමාන ප්‍රතිඵල, ප්‍රතිවිපාකවලට මුහුණ දීමට සිදුවනු ඇති බවත් හෙතෙම කීය.

සියලු දේ පවත්වාගෙන යා හැක්කේ පොලී අනුපාත ඉහළ අගයක පවත්වා ගැනීමෙන් පමණක් බව කී අධිපතිවරයා උද්ධමනය තවදුරටත් ඉහළ ගියහොත් සියල්ල ඉක්මනින් කඩා වැටෙනු ඇතැයි ද අධිපතිවරයා පැවැසීය.

ජීනිවා හි එක්සත් ජාතීන්ගේ මානව හිමිකම් කවුන්සිලයේ දී ශ්‍රී ලංකාව පිළිබඳ මූලික කණ්ඩායම් යෝජනාව බ්‍රහස්පතින්දා (ඔක්තෝම්බර් 6) සම්මත විය. යෝජනාව නම්කර ඇත්තේ ශ්‍රී ලංකාව තුළ සංහිඳියාව, වගවීම සහ මානව හිමිකම් ප්‍රවර්ධනය කිරීම යනුවෙනි. එහෙත් ශ්‍රී ලංකාව එම යෝජනාව තරයේ ප්‍රතික්ෂේප කර ඇත.

යෝජනාවට පක්ෂව ඡන්ද 20 ක් ලැබුණු අතර විරුද්ධ ලැබුණේ ඡන්ද 07 ක් පමණි.

ඡන්දය දීමෙන් වැළකී සිටි රටවල් සංඛ්‍යාව 20කි.

යෝජනාවට පක්ෂව ඡන්දය දුන් රටවල්:

ආර්ජන්ටිනාව
ආර්මේනියාව
චෙක් ජනරජය
ෆින්ලන්තය
ප්‍රංශය
ජර්මනිය
හොන්ඩුරාස්
ලිතුවේනියාව
ලක්සම්බර්ග්
මලාවි
මාෂල් දූපත්
මෙක්සිකෝව
මෙන්ටිනිග්රෝ
නෙදර්ලන්තය
පැරගුවේ
පෝලන්තය
කොරියානු ජනරජය
යුක්රේනය
මහා බ්‍රිතාන්‍යයේ සහ උතුරු අයර්ලන්තයේ එක්සත් රාජධානිය
ඇමරිකා එක්සත් ජනපදය

විරුද්ධ ඡන්දය දුන් රටවල්:

බොලිවියාව
චීනය
කියුබාව
එරිත්‍රියාව
පකිස්ථානය
උස්බෙකිස්තානය
වෙනිසියුලාව

ඡන්දය දීමෙන් වැළකී සිටි රටවල්:

බෙනින්
බ්‍රසීලය
කැමරූන්
අයිවරි කෝස්ට්
ගැබොන්
ගැම්බියාව
ඉන්දියාව
ඉන්දුනීසියාව
ජපානය
කසකස්තානය
ලිබියාව
මැලේසියාව
මොරිටේනියාව
නැමීබියාව
නේපාලය
කටාරය
සෙනගල්
සෝමාලියාව
සුඩානය
එක්සත් අරාබි එමීර් රාජ්‍යය

ශ්‍රී ලංකාවට අද අභියෝගාත්මක දවස ක් විය. ඒ, අද පැවැත්වූ ඡන්ද විමසීම ශ්‍රී ලංකාවට ඉතා අසීරු එකක් වූ බවට ජාත්‍යන්තර සබඳතා පිළිබඳ විශේෂඥයින් පවසයි.

යෝජනාව නම්කර ඇත්තේ ශ්‍රී ලංකාව තුළ සංහිඳියාව, වගවීම සහ මානව හිමිකම් ප්‍රවර්ධනය කිරීම යනුවෙනි.

අමෙරිකාව, එංගලන්තය, කැනඩාව, උතුරු අයර්ලන්තය, උතුරු මැසඩෝනියාව, ජර්මනිය, මලාවි සහ ලක්සර්ම්බර්ග් යන රටවලින් සමන්විත මූලික කණ්ඩායම විසින් මේ යෝජනාවේ ගෙන ආ අතර ශ්‍රී ලංකාව වෙනුවෙන් මානව හිමිකම් කවුන්සිලයේ 51 වන සැසිවාරය හමුවේ විදේශ අමාත්‍ය ජනාධිපති නීතිඥ අලි සබ්‍රි එම යෝජනාවට තම විරෝධය දැක්විය.

මෙවර සම්මත වූ යෝජනාවේ සඳහන් වන්නේ මොනවාද?

ශ්‍රී ලංකාව තුළ සංහිඳියාව, වගවීම සහ මානව හිමිකම් ප්‍රවර්ධනය කිරීම වෙනුවෙන් ඉදිරිපත් කර ඇති යෝජනා කෙටුම්පතට කරුණු 19 ක් ඇතුළත් ය.

ඉන් මුල් කරුණු දෙකෙන්ම මානව හිමකම් සුරක්ෂිත කිරීම සඳහා ශ්‍රී ලංකාව ගෙන ඇති පියවර අගය කර ඇත.

යෝජනාවේ ඇතුළත් කරුණු 19 න් 9 ක්ම වෙන්කර ඇත්තේ ආර්ථික අර්බුදය හා මෑත කාලීනව සිදුවූ මානව හිමිකම් කඩවීම් සම්බන්ධයෙන් ය.

ආහාර සුරක්ෂිතාවය බිඳ වැටීම, බරපතල ඉන්ධන හිඟය, ඖෂධ හිඟය සහ පවුල් ඒකකවල ආදායම් අඩුවීම වැනි කරුණු කෙරෙහි යෝජනාවලියෙන් දැඩි අවදානයක් යොමු කර ඇත.

ආර්ථික අවපාතය හේතුවෙන් මානව අයිතිවාසිකම්වලට දැඩි බලපෑමක් එල්ලවී ඇති බවද එහි දැක්වෙයි.

සාමකාමී විරෝධතාවලට එල්ල වූ බාධා ඊට සහභාගී වූවන් අත්අඩංගුවට ගැනීම මෙන්ම ආණ්ඩුවට සහය දක්වන්නන්ට එරෙහිව උද්ගත වූ ප්‍රචණ්ඩ ක්‍රියාවලදී සිදුවූ මරණ, තුවාලවීම් හා දේපළ විනාශ කිරීම පිළිබඳව ද මේ යෝජනාවේ අවධානය යොමුකර තිබේ.

මානව හිමිකම් කවුන්සිලයට මෙම රටවල් කණ්ඩායම යෝජනා කරන්නේ, වත්මන් ආර්ථික අර්බුදය වහා විමර්ශනය කර ඊට වගකිව යුතු වත්මන් හා හිටපු රාජ්‍ය නිලධාරීන් පිළිබඳව ස්වාධීන අපක්ෂපාතී පරීක්ෂණයක් පවත්වා නිසි ක්‍රියාමාර්ග ගත යුතු බවටයි.

මානව හිමිකම් ආරක්ෂා කිරීමට කැපවී සිටින සිවිල් ක්‍රියාකාරීන් පසුපස ලුහුබැදීම නවත්වා ඔවුන්ට එරෙහිව ගෙන යන ප්‍රහාරයන් පිළිබඳව ද වහා විමර්ශනය කරන ලෙස මේ යෝජනාවේ ඉල්ලා ඇත.

51 වැනි සැසිවාරයට එක්සත් ජාතීන්ගේ මානව හිමිකම් පිළිබඳ මහ කොමසාරිස්වරිය ඉදිරිපත් කළ වාර්තාවේ අවධාරණය කර තිබුණේ, ශ්‍රී ලංකාවේ ආර්ථික අපරාධ පිළිබඳව දැඩි අවධානයක් යොමු කළ යුතුව ඇති බවයි.

කෙසේවෙතත් විදේශ අමාත්‍ය අලී සබ්‍රි සඳහන් කළේ, ආර්ථික අපරාධ සිදුවී ඇත්නම් ශ්‍රී ලංකාවේ නීතිය අනුව ඔවුන්ට එරෙහිව පියවර ගත යුතු බවයි.

දැනටමත් විවිධ පාර්ශව ඒ සම්බන්ධයෙන් අධිකරණ තුළ නඩු දමා ඇති බවද ඔහු සඳහන් කළේය.

අමාත්‍ය අලි සබ්‍රි කියා සිටියේ "මානව හිමිකම් කොමිසම කළ යුත්තේ මානව හිමිකම් කොමිසමට අදාළ දේවල්. ඒ හින්දා තමයි අපි කියන්නේ, අපට මෙතනින් ගැලවෙන්න දෙන්නේ නැතිව බිලී කොක්කක් දාගෙන ඉන්නවා, සදාකාලිකව මෙතන හිර කරන්න. ඔවුන්ට අවශ්‍ය දේවලටයි අවශ්‍ය නැති දේවල්වලටයි හැම දේටම ඇඟිලි ගහනවා"

"මානව හිමිකම් ආයුධයක් ලෙස යොදාගෙන"

ජිනීවා නුවර සිට විදේශ කටයුතු අමාත්‍ය ජනාධිපති නීතිඥ අලි සබ්‍රි ඔක්තෝබර් 05 වැනිදා මාධ්‍ය හමුවකට සහභාගී වෙමින් ප්‍රකාශ කළේ, බලවත් රටවල් රැසක් එක්ව මේ යෝජනාව ඉදිරිපත් කර ඇති බවය.

ඔවුන් මානව හිමිකම් ආයුධයක් ලෙස යොදාගෙන ශ්‍රී ලංකාව ජීවිතාන්තය දක්වා පාලනය කිරීමට උත්සාහ කරන බවට විදේශ කටයුතු අමාත්‍යවරයා චෝදනා කර සිටියේය.

"මේකෙන් උත්සාහ කරන්නේ මානව හිමිකම් කියන මේ ආයුධය උපයෝගී කරගෙන ජීවිතාන්තය දක්වා අපිව පාලනය කිරීමට යොදා ගැනීම."යනුවෙන් පැවසීය.

දිගින් දිගටම ඔවුන් මානව හිමිකම් ආයුධයක් ලෙස භාවිත කරමින් මෙරට ස්වාධිපත්‍යට හා ස්වාධීනත්වයට හානි කිරිමට යොදා ගන්නා බවද ඔහු සඳහන් කළේය.

"අවාසනාවට වගේ රට තුළ පත්වෙලා තියන මේ ව්‍යාකූලත්වය තුළ ශ්‍රී ලාංකිකයෝ බෙදුම්වාදී ඇජෙන්ඩාවක් ඉදිරියට ගෙන යන අයට විරුද්ධව පෙල ගැහෙන ශ්‍රී ලාංකිකයෝ තුළ වෙනසක් බෙදීමක් වෙලා තියනවා. අපට නෑ කියන්න බෑනේ. ඒ බෙදීම ඉතාමත් ලස්සනට බෙදුම්වාදී ප්‍රවාහයේ සිටින අය ප්‍රයෝජනයට අරන් තියනවා." විදේශ අමාත්‍යවරයා පැවසීය.

"8 වැනි ජේදය බරපතලයි"

මානව හිමිකම් උල්ලංඝනය කිරීම ඇතුලු අපරාධ විමර්ශනය කර වගවීම ඉටුකර ගැනීම සඳහා එක්සත් ජාතීන්ගේ මානව හිමිකම් කොමසාරිස් කාර්යාලයට සාක්ෂි රැස් කිරීමට හා විශ්ලේෂණය කිරීමට ශ්‍රී ලංකාව අවසර දිය යුතු බව යෝජනා කෙටුම්පතේ 8 වැනි කරුණේ සඳහන් වෙයි.

ශ්‍රී ලංකාවේ සිදුවු බව කියන ජාත්‍යන්තර මානව හිමිකම් උල්ලංඝනය වීම් විමර්ශනය කර ඊට අනුබද්ධව කරනු ලබන අධිකරණමය හෝ ඒ ආශ්‍රිත ක්‍රියාවලියට සාමාජික රටවල් සහය දිය යුතු බව එහි දැක්වේ.

යෝජනාවේ 8 වෙනි ඡේදය මඟින් ශ්‍රී ලංකාව තුළ ජාත්‍යන්තර අධිකරණ බලය ක්‍රියාත්මක කරමින් රණවිරුවන්ව ඉලක්ක කර ඇති බව අමාත්‍ය අලි සබ්‍රි පෙන්වා දුන්නේය.

"අට වැනි පැරග්‍රාප් එකට අපි සම්පූර්ණයෙන්ම විරුද්ධ වුණා. මේකේ භයානකම කොටස තමයි, ලංකාවේ ඔවුන් කියන ආකාරයට සිදුවුණා කියන මානූෂිය මෙහෙයුමේදී යම් යම් දේවල් සම්බන්ධයෙන් ලංකාවේ ක්‍රියාදාමයෙන් එලියට ගිහිල්ලා පිටරටවල නඩු අහලා ඒ සම්පූර්ණ ක්‍රියාවලිය තුළ දඬුවම් කිරීම තුළ මේ හදන්නේ අපේ රණවිරුවන්ව ටාගට් කරලා ඔවුන්ට කරදර කරන්න." අමාත්‍යවරයා පැවසීය.

පිටරටවල නඩු ඇසීම මෙරට ව්‍යවස්ථාව සම්පූර්ණයෙන්ම උල්ලංඝනය කිරීමක් බවද අලි සබ්‍රි ප්‍රකාශ කළේය.

"මේකට අපිට එකඟ වෙන්න බැහැ. ව්‍යවස්ථාව සම්පූර්ණයෙන්ම උල්ලංඝනය කිරීමක්. ඒකට අපි එකඟ වුණත් මං හිතන්නේ නැහැ අපේ අධිකරණය ඒකට ඉඩ දෙයි කියලා."

යෝජනාව පරාජය කිරීමට හැකිවෙයිද?

එක්සත් ජාතීන්ගේ මානව හිමිකම් කවුන්සිලයේ සාමාජික රටවල් සංඛ්‍යාව 47කි. ඉන් රටවල් 30ක් දැනටමත් යෝජනාවට සහය දෙන බව ප්‍රකාශ කර ඇත.

මෙම පසුබිම තුළ යෝජනාව පරාජය කිරීමට ශ්‍රී ලංකාවට හැකිවෙයිද?

මානව හිමිකම් කවුන්සිලයේ බලවත් සාමාජික රාජ්‍යයන් එල්ල කරන බලපෑම් හමුවේ මානව හිමිකම් කවුන්සිලයට ඉදිරිපත් වූ යෝජනාව සම්බන්ධයෙන් පැවැත්වෙන ඡන්ද විමසීම ජයග්‍රහණය කිරීම ඉතාමත් අපහසු කාර්යයක් බව සබ්‍රි පෙන්වා දුන්නේය.

"අමෙරිකාව, එංගලන්තය, ජර්මනිය, කැනඩාව කියන්නේ ලෝකයේ ඉතාම බලවත් රටවල්. ඉතින් ඔවුන් හැමෝටම කතා කරගෙන යනවා. සම්පූර්ණයෙන්ම බටහිර ලෝකයම ඔවුන් සතු කරගෙන තිස් දෙනෙකුගෙන් යුක්තව යෝජනා සම්මුතියක් ඉදිරිපත් කරලා තියෙනවා." අමාත්‍යවරයා පැවසීය.

"මේක රජයකට විරුද්ධව, නායකයෙකුට විරුද්ධව, පක්ෂයකට විරුද්ධව ගෙන යන එකක් නොවෙයි." විදේශ අමාත්‍යවරයා සඳහන් කළේය.

"කව්ද අපිත් එක්ක ඉන්නේ කියන එක පිළිබඳව මම දැනට කිව්වත් අපිට ඡන්දය දෙන්න ඉන්න කිහිප දෙනා පිටිපස්සේ ගිහිල්ලා ලොබි කරයි."

"ගිය සැරේ තරම් ඡන්ද අපිට ලැබෙන්නේ නැහැ. ඊට වඩා අඩුවෙන් තමයි තියෙන්නේ." විදේශ අමාත්‍යවරයා සඳහන් කළේය.

අසල්වැසි ඉන්දියාව හෝ මෙම යෝජනාව සම්බන්ධයෙන් ශ්‍රී ලංකාවට සහය දෙන්නේ දැයි මෙතෙක් පැහැදිලි ප්‍රකාශයක් කර නොමැත.

හිටපු විදේශ අමාත්‍ය මහාචාර්ය ජී.එල් පීරිස් කියා සිටියේ මානව හිමිකම් කවුන්සිලය තුළ සම්මත කිරීමට සූදානම් වන යෝජනාව ජී.එස්.පී සහනයට සහ IMF සාකච්ඡාවලටද බලපානු ඇති බවයි.

"ප්‍රධාන විවේචනයක් වන්නේ ජනතාවගේ අයිතිවාසිකම් අමු අමුවේ උල්ලංඝනය වන පරිදි ත්‍රස්තවාදය වැළැක්වීමේ පනත හා ඊට සම්බන්ධ නොයෙක් නීති පාවිච්චි කරයි කියන එක." මහාචාර්යවරයා පෙන්වා දුන්නේය.

මහාචාර්ය ජී.එල් පීරිස් අවධාරණය කළේ "මේක සම්මත වුනොත් බොහොම දරුණූ ප්‍රතිඵල ජනිත වෙනවා. මේක අනිවාර්යෙන් බලපානවා ජාත්‍යන්තර මුල්‍ය අරමුදල සමඟ අපි කරන සාකච්ඡාවලට. ඒ විතරක් නෙමේ ජී.එස්.පී ප්ලස් සහනයටත්."

ජාත්‍යන්තර රාජ්‍යතාන්ත්‍රික පරාජයක්

කොළඹ විශ්වවිද්‍යාලයයේ ජාත්‍යන්තර සම්බන්ධතා අංශයේ ජ්‍යෙෂ්ඨ කථිකාචාර්ය, ආචාර්ය හසිත කන්දඋඩහේවා කියා සිටියේ මෙය ශ්‍රී ලංකාවට ජාත්‍යන්තර රාජ්‍යතාන්ත්‍රික පරාජයක් බවයි.

ඔහු පෙන්වා දුන්නේ, මෙය ආර්ථික අර්බුදය තවත් තිව්‍රවීමට බලපා හැකි බවද ඔහු සඳහන් කළේය.

"ගොඩක් රටවල් අපිට සහයෝගය දක්වන්නේ නැහැ. ඒකට හේතුව තමා PTA (ත්‍රස්තවාදය වැළැක්වීමේ පනත ), සහ පාස්කු ප්‍රහාරයෙන් පස්සේ ඇතිවෙච්ච ප්‍රචණ්ඩත්වය.ඒක හින්ද අපි ජාත්‍යන්තරව රාජ්‍යතාන්ත්‍රිකව පරාදයි." ආචාර්ය හසිත කන්දඋඩහේවා පැවසීය.

"මෙම තත්ත්වය සමඟ අපිට විදේශ ආයෝජන, යුරෝපා ආධාර, සෘජු විදේශ ආයෝජන අඩුවෙන්න පුළුවන්. විශේෂයෙන්ම ආයෝජන අඩුවෙන්න පුලුවන්." ඔහු පෙන්වා දුන්නේ.

ජ්‍යෙෂ්ඨ කථිකාචාර්යවරයා වැඩිදුරටත් පැවසුවේ, "IMF එකටත් මේක එච්චර හොඳ සිග්නල් එකක් වෙන එකක් නැහැ."

ජනාධිපති රනිල් වික්‍රමසිංහ මහතාගේ උපදෙස් මත සැලසුම් කර තිබෙන ශ්‍රී ලංකාවේ අඩු ආදායම්ලාභී පවුල් ලක්ෂ 31කට සුබසාධක ප්‍රතිලාභ ලබාදීමේ වැඩපිළිවෙළ කඩිනමින් ආරම්භ කරන බව මුදල් රාජ්‍ය අමාත්‍ය ෂෙහාන් සේමසිංහ පැවසීය.

‘කිසිවෙක් අතහැරෙන්න දෙන්න එපා’ යන තේමාව යටතේ රටේ සියලුම දිස්ත්‍රික්ක ආවරණය වන පරිදි මෙම වැඩපිළිවෙළ ක්‍රියාත්මක කිරීමට සැලසුම් කර ඇති බව ද රාජ්‍ය අමාත්‍යාවරයා සඳහන් කළේය.

මේ යටතේ සමෘද්ධි, වැඩිහිටි පුද්ගල, ආබාධිත පුද්ගල සහ වකුගඩු රෝගී ජීවනාධාර වැඩසටහන යටතේ ප්‍රතිලාභ ලබන පවුල් හෝ පුද්ගලයන් , සහනාධාර අපේක්ෂාවෙන් පොරොත්තු ලේඛනවල සිටින පුද්ගලයන් මෙන්ම වත්මන් ආර්ථික අර්බුදයේ බලපෑමට ලක්ව රජයේ සුභසාධන ප්‍රතිලාභ අපේක්ෂා කරන පුද්ගලයන්ට මෙම ප්‍රතිලාභ හිමි වන බවත් අමාත්‍යවරයා අනාවරණය කළේය.

අමාත්‍යවරයා මේ බව සඳහන් කර සිටියේ, රජයේ ප්‍රවෘත්ති දෙපාර්තමේන්තුවේ අද (06) පැවැති මාධ්‍ය සාකච්ඡාවකට එක්වෙමිනි.
මේ වන විටත් ප්‍රතිලාභ අපේක්ෂකයින් වෙතින් අයදුම්පත් කැඳවීම ආරම්භ කර ඇති අතර, එහි අවසන් දිනය ඔක්තෝබර් මස 15 දින දක්වා දීර්ඝ කිරීමට කටයුතු කළ බව ද සේමසිංහ අමාත්‍යවරයා පැවසීය.

සුභසාධන ප්‍රතිලාභ මණ්ඩලයේ වෙබ් අඩවියෙන් (www.wbb.gov.lk) මීට අදාළ අයදුම්පත ඕනෑම අයෙකුට බාගත කරගැනීමට අවස්ථාව තිබේ.

එහිදී වැඩිදුරටත් අදහස් දැක්වූ මුදල් රාජ්‍ය අමාත්‍යවරයා මෙසේද පැවසීය .

නව අයදුම්පත් කැඳවීමෙන් අපි බලාපොරොත්තු වන්නේ ප්‍රතිලාභ ලැබීමට සුදුසුකම් තිබෙන සියලුම පුද්ගලයන් මීට ඇතුළත් කර ගැනීමටයි. සමාජ සුභසාධක ප්‍රතිලාභ මණ්ඩලය මගින් ප්‍රතිලාභ ලැබිය යුතු සියලු දෙනාටම දීමනා ලබා දීමට රජය කටයුතු කරනවා.

ජාත්‍යන්තර මූල්‍ය අරමුදල සමඟ ගිවිසුම් ඇති කරගෙන, රජය දීමනා කප්පාදු කරනවා කියා ඇතැමුන් අසත්‍ය ප්‍රචාර කරනවා. රජයට අවශ්‍ය දැනට සුබසාධන දීමනා ලැබෙන කණ්ඩායම මෙන්ම සුබසාධන දීමනා නොලබන නමුත් එය අපේක්ෂා කරන කණ්ඩායම නිවැරැදි ක්‍රමවේදයට ඇතුළත් කර ගැනීමයි.

මෙය හැකි ඉක්මනින් සිදු කරනවා. මේ වසර අවසානය වෙද්දි සියලු තොරතුරු එක්රැස් කරලා අවශ්‍ය, සුදුසු, නිවැරැදි කොනාට දීමනාව ලබාදීම අපේ අපේක්ෂාවයි.

කිසිවෙක් අතහැරෙන්න දෙන්න එපා, කියන ජාතික වගකීමට අපි එකතු වෙලා ඉන්නේ. දැනට මහජන ආධාර, සුබසාධන දීමනා ලැබෙන, ආබාධිත දීමනා ලැබෙන කණ්ඩායමක් ඉන්නවා. ඔවුන් ප්‍රාදේශීය ලේකම් කාර්යාලයේ ලියාපදිංච් වීම අනිවාර්ය වෙනවා. දැනට සුළු ප්‍රතිලාභීන් පිරිස ලියාපදිංච් වී තිබෙන්නේ. ඒ නිසයි අපි ලියාපදිංචිය දීර්ඝ කරලා තිබෙන්නේ. මේ දිනය තවත් දීර්ඝ කරනවා කියන්නේ ප්‍රතිලාභ ලැබෙන දිනයත් කල් යනවා. මෙය කඩිනමින් සිදු කළ යුතුයි.

ඒ සඳහා අපට දත්ත පද්ධතියක් අවශ්‍ය වෙනවා. මෙම අයදුම්පත් ලබාගැනීම මගින් සිදු කරන්නේ එම දත්ත පද්ධතිය සකස් කිරීමයි. දැනට ප්‍රතිලාභ ලැබෙන ජනතාවත් මේ සඳහා ලියාපදිංචි වීම අනිවාර්ය යි. මෙම කාරණාව විනිවිදභාවයකින් සිදු කිරීමට අපි දත්ත පද්ධතික් සකස් කරලා තිබෙන්නේ. මේ සඳහා ගමේ තරුණ තරුණියන්ට විශාල වගකීමක් තිබෙනවා.

ගමේ අසරණ ජනතාව පිළිබඳ සොයා බලා ඔවුන් පිළිබඳව දැනුවත් කිරීමටත් හැකියාව තිබෙනවා. වැඩිහිටියන්, ආබාධ සහිත පුද්ගලයින්, වකුගඩු රෝගීන්, අසරණභාවයට පත්වූ පවුල් සමහර ගම් පළාත්වල සිටිනවා . ඒ සියලු දෙනාම මෙම දත්ත පද්ධතියට ඇතුළත් කර ඔවුන්ව රැක බලා ගැනීම සුභසාධක ප්‍රතිලාභ මණ්ඩලය මගින් සිදු කරනවා.

මේ අයදුම්පත්‍රය ලබා දුන් පසුව, ප්‍රාදේශීය ලේකම් කාර්යාලයේ නිලධාරීන් ගොස් එම පවුල් පිළිබඳ සොයා බලා ඉදිරි කටයුතු සිදු කරනවා. මෙහි ලකුණු ලබාදීමේ ක්‍රමවේදයක් තිබෙනවා. ඒ අනුව ඔවුන් දත්ත පද්ධතියට ඇතුළත් වෙනවා. මේ ක්‍රියාවලියේදී තමන් තෝරා නොගත හොත් අභියාචනාවක් ඉදිරිපත් කිරීමටත්, නුසුදුස්සෙක් පද්ධතියට ඇතුළත් වී තිබෙනවා නම් විරෝධතාවක් ගොනු කිරීමටත් හැකියාව තිබෙනවා. මේ සියලු කාරණා සිදු කරන්නේ කිසිදු කෙනකුගේ දීමනා කප්පාදු කිරීමට නොවෙයි. විනිවිදභාවයකින් ප්‍රතිලාභ දීමනා ලබාදීම සඳහායි.

මෙම අවස්ථාවට සුබසාධක ප්‍රතිලාභ මණ්ඩලයේ සභාපති බී. විජයරත්න, ආබාධිතයන් පිළිබඳ මහලේකම් කාර්යාලය අධ්‍යක්ෂ අනුරාධා හේරත්, වැඩිහිටි ලේකම් කාර්යාලයේ අධ්‍යක්ෂ කේ.ජී ලැනරෝල් ඇතුළු පිරිසක් එක්ව සිටියහ.

ජාත්‍යන්තර මූල්‍ය අරමුදලේ සාකච්ඡා පිළිබඳව ඉදිරි සති දෙකක් ඇතුළත විපක්ෂයේ මන්ත්‍රීවරුන් සහ අමාත්‍ය මණ්ඩලය දැනුවත් කරන බව ජනාධිපති රනිල් වික්‍රමසිංහ අද (06) පාර්ලිමේන්තුවේ දී පැවසීය.

අයි.එම්.එෆ් මණ්ඩලය සහතික කරන තුරු මූල්‍ය අරමුදලේ එකඟතාවයන් ඉදිරිපත් කිරීමට නොහැකි බවද ජනාධිපතිවරයා පැවසීය.

ජනාධිපතිවරයා පාර්ලිමේන්තුවේ විශේෂ ප්‍රකාශය කිරීමෙන් පසු දෙමළ ජාතික සන්ධානයේ පාර්ලිමේන්තු මන්ත්‍රී එම්.ඒ. සුමන්තිරන් ඇසූ ප්‍රශ්නයකට පිළිතුරු දෙමින් ජනාධිපතිවරයා මේ බව සඳහන් කළේය.

එහිදී සුමන්තිරන් මන්ත්‍රීවරයා විමසා සිටියේ ශ්‍රී ලංකාවේ පවතින දූෂණ වංචා රට ඉදිරියට යාමට අභියෝගයක් බව අයි.එම්.එෆ් සංවිධානය ප්‍රකාශ කර තිබෙන බවත් එම දූෂණ නතර කිරීමට රජයේ සැලසුම කුමක්ද යන්න සහ ජාත්‍යන්තර මූල්‍ය අරමුදලේ මූලික මට්ටමේ සාකච්ඡා පිළිබඳව පාර්ලිමේන්තුව දැනුවත් කරන්නේ නැතිදැයි කියාය.

එහිදී ප්‍රතිචාර දක්වමින් ජනාධිපති රනිල් වික්‍රමසිංහ පැවැසූයේ අයි.එම්.එෆ් සංවිධානය දූෂණ සම්බන්ධයෙන් ගෙනා යෝජනාව පිළිබඳ අධිකරණ අමාත්‍යවරයා විසින් අලුත් දූෂණ නීතියක් ඉදිරිපත් කරන බවත් පාර්ලිමේන්තුවේදී එය සාකච්ඡා කරන්න අවස්ථාවක් ලැබෙන බවත්ය.

අමාත්‍යාංශ කිහිපයක විෂය පථයන් සංශෝධනය කරමින් ජනාධිපති රනිල් වික්‍රමසිංහ විසින් අති විශේෂ ගැසට් නිවේදනයක් නිකුත් කර ඇත.

ඊට අනුව පුද්ගලයින් ලියාපදිංචි කිරීමේ දෙපාර්තමේන්තුව, ආගමන හා විගමන දෙපාර්තමේන්තුව, අන්තරායකර ඖෂධ පාලක මණ්ඩලය, මහජන ආරක්ෂක අමාත්‍යාංශය යටතට පවරා ඇත.

එම විෂය පථයන් ඊයේ (05) දිනයේ සිට ක්‍රියාත්මක වන පරිදි සංශෝධනය කර තිබේ.

මීට පෙර පුද්ගලයින් ලියාපදිංචි කිරීමේ දෙපාර්තමේන්තුව තාක්ෂණ අමාත්‍යාංශය යටතේ පැවති අතර ආගමන හා විගමන දෙපාර්තමේන්තුව පැවතුණේ ආයෝජන ප්‍රවර්ධන අමාත්‍යාංශය යටතේය.

අන්තරායකර ඖෂධ පාලක මණ්ඩලය ආරක්ෂක අමාත්‍යාංශය යටතේ පැවතිණ.

ඊට අමතරව තාක්ෂණ අමාත්‍යාංශය යටතේ පැවති කාර්මික තාක්ෂණ ආයතනය අද (06) දිනයේ සිට ක්‍රියාත්මක වන පරිදි කර්මාන්ත අමාත්‍යාංශය යටතට පවරා ඇත.

පාර්ලිමේන්තුවේ විපක්ෂය ඇතුලේ දැන් ඉන්න කන්ඩායම් කිහිපයක්ම මේ වෙනකොට විපක්ෂ නායක සජිත් ප්‍රේමදාසත් එක්ක සහයෝගෙන් වැඩ...

එලියේ මිනිස්සු මොනවා කිව්වත්, සජිත්ට පාර්ලිමේන්තුව ඇතුලේ, තමුන්ගේ කන්ඩායම එකට තියාගන්න පුලුවන් වෙලා තියෙන්නේ, සජිත්ගේ හැමෝටම ඇහුම්කම් දීලා එකට තීරණ ගන්න නිසා කියලා, ඩලසුත් මේ ළඟදී 'නිදහසේ ' කට්ටියත් එක්ක කියල තිබුන ලු..

" මයික් එකක් ඉස්සරහ හිටගත්තහම ලොකු කයිවාරු කාරයෙක්, ආඩම්බර කාරයෙක් කියල සමාජයට පෙනුනට, බලාගෙන ගියාම මේ මනුස්සයා බොහොම නිහතමානි මිනිහෙක්නේ " කියලා මහාචාර්ය GL පීරිසුත්, මේ ලඟදී සජිත්ට පොඩි රෙකමන්ඩේශන් එකක් දීල තියෙනවා. ප්‍රසිද්ද නීතීඥ මහත්තුරු කිහිපදෙනෙක් එක්කලු GL එහෙම කිව්වේ.

ඒ කතාවල ඇත්තකුත් තියනවා. මොකද රනිල් ජනාධිපති උනාට පස්සෙ සජබ කඩලා කිහිපදෙනෙක්ව ආන්ඩුවට ගන්න හැදුවට, අද වන තුරු එක්කෙනෙක්වත් ගන්න බැරි උනා....

ඉතින් ඕවයින් පේන්නේ රනිල්ට ජනාධිපති නිසා සජබ කඩලා , UNP එක හදන්න පුලුවන් වෙයි කියලා මිනිස්සු හිතුවට මොකද, ඒක හිතන තරම් ලේසි නෑ කියලයි.

ඒ කතා මොනවා වුණත් රනිලුත් තාම ට්‍රයි එක අතෑරලා නෑ .

සජබේ මරික්කාර් පෙරේදා පාර්ලිමේන්තු කොරිඩෝරුවේදී තව මන්ත්‍රීවරුන් කිහිපදෙනෙකුට කියල තියෙන විදියට , මරික්කර්ට ආන්ඩුවට එන්න කියල රනිල් වඳින්නේ නැති එක විතරලු නොකරන්නේ.

ඒ කතාව මරික්කර් කියල හැරෙන පමාවෙන් රනිල් පාර්ලිමේන්තු කතාවකදීම මරික්කර්ට කිව්වා ඔබතුමා හිරුනිකා යන පාරේ යන්නේ නැත්නම් මම යන පාරේ යන්න එන්න කියල.

වැඳුම් නොවැඳුම් කොහොම වුණත් , පෙරේදා වුණ දේ මරික්කාර්ට සෑහෙන්ඩ දැනිලා වගේ කියලයි කට්ටිය කියන්නේ .

ඔය කතා අස්සේ පාර්ලිමේන්තුවේ ස්වාධීන වෙලා ඉන්න, අනුර යාපාගේ කන්ඩායම දෙලොවක් අතරලු !
කොහෙටද හේත්තුවෙන්නේ කියලා.

මෙයාලට GL ලගේ නිදහස මන්ත්‍රී කන්ඩායමෙන් වගේම , චන්ද්‍රිකා ලොක්කි එක්ක එකතුවෙලා, කුමාර වෙල්ගම හදපු අලුත් පක්ෂෙනුත් ආරාධනා ලැබිලලු.

වෙල්ගමගේ පක්ෂෙට වඩා, නිදහස කන්ඩායමට දැනටමත් රටේ පිලිගැනීමක් තියෙන නිසා, යාපගෙ කන්ඩායමේ ඉන්න සුදර්ශිණී ප්‍රනාන්දු පුල්ලේ , චන්දිම
වීරක්කොඩි වගේ අය වඩා කැමති නිදහස කන්ඩායමට එකතු වෙන්නලු.

මොකද එහෙම උනොත්, චන්දිමට ගාල්ලේ දිස්ත්‍රික් නායක වෙන්න පුලුවන්.

ගම්පහ දැනටමත් නාලක ගොඩහේවා හිටියට, එතෙන්ට එකතු වෙන්න සුදර්ශිනී නෝනගේ අකමැත්තක් නැතිලු.

මොකද දෙන්නම උගත් දේශපාලනඥයෝ නිසා, වැඩ කරන්න පහසුයි කියල සුදර්ශිනී තමුන්ගේ කන්ඩායමත් එක්ක කියලා තියෙනවා.

කට්ටියට තාමත් තීන්දුවක් ගන්න බැරුව ඉන්නේ, අනුර යාපා වැනෙන නිසාලු.

අනුර එක දවසක සජබට යන්න කතා කරනවලු, තව දවසක ශ්‍රී ලංකා නිදහස් පක්ෂෙට යන්න කතා කරනවලු, ඊට පස්සේ නිදහස කන්ඩායම එක්ක සාකච්චා කරනවලු. චම්පිකත් එක්ක වගේම වෙල්ගම එක්කත් ප්ලෑන් ගහනවලු. එක විකාරයයිලු.

" ඔහොම ගිහිල්ලා ගිහිල්ලා මේ මනුස්සයා අන්තිමට රනිල් ගාව නතර වෙයිද දන්නේ නෑ" කියල එයාලගේ ගෘප් එක ඇතුලේ පොඩි කතාවකුත් ගියා කියන්නේ ඒ නිසා ..

- දේශපාලන වාර්තාකරු

ආණ්ඩුක්‍රම ව්‍යවස්ථාවේ 22 වන සංශෝධන පනත් කෙටුම්පත සම්බන්ධයෙන් වූ විවාදය මීළඟ පාර්ලිමේන්තු සැසිවාරයකදී පැවැත්වීමට පක්ෂ නායකයන් තීරණය කර ඇත.

කතානායක මහින්ද යාපා අබේවර්ධන අද (06) පාර්ලිමේන්තුවේදී මේ බව සඳහන් කරනු ලැබීය.

කෙසේ වුවත් පාර්ලිමේන්තු උපදේශක කාරක සභාව පසුගියදා රැස් වූ අවස්ථාවේ 22 වැනි ආණ්ඩුක්‍රම ව්‍යවස්ථා සංශෝධන පනත් කෙටුම්පත අද (06) පාර්ලිමේන්තුවේදී විවාදයට ගැනීමට මීට පෙර එකඟතාව පළ කර තිබුණි.

එසේම පාර්ලිමේන්තුවේ මීළඟ සැසිවාරය ආරම්භ වීමට නියමිතව ඇත්තේ ලබන 18 වැනි දා ය.

ඉතිහාසයේ දරුණුතම ආර්ථික අර්බුදයට රට මුහුණ දී සිටින බවත්, ලෝක ආර්ථික හා ආහාර අර්බුද හමුවේ වුවද එම අභියෝගය ජය ගැනිමට සූදානම් බව ජනාධිපති රනිල් වික්‍රමසිංහ ප්‍රකාශ කළේය.
 
ජනාධිපතිවරයා මේ බව සඳහන් කළේ වත්මන් ආර්ථික තත්ත්වය සම්බන්ධයෙන් අද (06) පාර්ලිමේන්තුවේදී විශේෂ ප්‍රකාශයක් සිදුකරමිනි.
 
පැරණි කෝන්තර අමතක කර, රට ගොඩනැගීමේ වැඩපිළිවෙළ සමග එක්වන ලෙස ජනාධිපති රනිල් වික්‍රමසිංහ මෙහිදී සියලු පාර්ශ්වයන්ට යළි ආරාධනා කළේය.
 
අර්බුදයෙන් ගොඩ ඒම සඳහා  සිව් වැදෑරුම් උපාය මාර්ගික සැලැස්මක් හඳුන්වාදීමට කටයුතු කළ ජනාධිපතිවරයා එහි  පළමු පියවර මේ වන විට සාර්ථක කරගෙන ඇති බවත් දෙවන පියවර සාර්ථක කර ගැනීමට අවශ්‍ය පදනම සකස් කරගෙන යන බවත් සඳහන් කළේය
 
මෙහිදී ජනාධිපති රනිල් වික්‍රමසිංහ  කළ සම්පූර්ණ කතාව
 
පසුගිය සති කිහිපය තුළ එංගලන්තයේත්, ජපානයේත් කළ සංචාරයන්වලදී ලෝක රාජ්‍ය නායක නායිකාවන් ගණනාවක් සමග අදහස් හුවමාරු කර ගැනීමට මම අවස්ථාව සලසා ගත්තා.

ශ්‍රී ලංකා පාපන්දු සම්මේලන නිලවරණය නිසි වේලාවට නොපවත්වා ගැටළුකාරී තත්ත්වයක් ඇතිවීමට ඉඩදීම සම්බන්ධයෙන් ජාතික ජනබලවේගය පක්ෂයේ නායක පාර්ලිමේන්තු මන්ත්‍රී අනුර කුමාර දිසානායක ප්‍රශ්න කර ඇත .

ඒ (05) පාර්ලිමේන්තුවේදී අදහස් දක්වමින් ය.

එහිදී මන්ත්‍රීවරයා දැක්වූ අදහස් පහත දැක්වෙයි .

ශ්‍රී ලංකා පාපන්දු සම්මේලනයේ ව්‍යවස්ථාවට අනුව එහි නිලධාරී මණ්ඩලය වාර්ෂිකව නිල වරණයක් පවත්වා තෝරාගත යුතුව තිබෙනවා. එසේ වුව ද මේ වනවිට නිල වරණයක් නොපවත්වා එහි කටයුතු පවත්වාගෙන යාම තුල සම්මේලනය තුල අරාජිකත්වයක් ගොඩනැඟී තිබෙනවා."

මේ තත්වය තුල සම්මේලනය යථාවත් කිරීම වෙනුවෙන් කඩිනම් නිල වරණයක් පවත්වා සුදුසු නිලධාරී මණ්ඩලයක් පත්කරගැනීමේ අවස්ථාව ලබා දී තිබෙනවා. එසේ වුව ද ක්‍රීඩා අමාත්‍යතුමා විසින් පසුගිය සැප්තැම්බර් මාසය තුල දී එකිනෙකට පරස්පර අතිවිශේෂ ගැසට් නිවේදන තුනක් නිකුත් කර තිබෙනවා. 2022 සැප්තැම්බර් 8 වැනි දින ගැසට් නිවේදනය මගින් නිලවරණය පැවැත්විය යුතු දින මැයි 31ට පෙර නොව සැප්තැම්බර් 15 බව දක්වමින් කල්දමා තිබෙනවා.

අනතුරුව 2022.9.17 නිකුත් කළ ගැසට් නිවේදනය මගින් නිල වරණය පැවැත්විය යුතු දින ඔක්තෝබර් 31ට බවට ප්‍රකාශයට පත් කළා. ඉන් අනතුරුව 2022.9.22 නිකුත් කළ ගැසට් නිවේදනය මගින් 2022 වර්ෂයට පමණක් අදාලව නිකුත් කර ඇති 2022.9.17 දිනැති අති විශේෂ ගැසට් නිවේදනය අවලංගු කළා.

දැන් වලංගු වන දිනය කතානායකතුමනි පසුගිය සැප්තැම්බර් මාසේ 15 වැනිදා. එසේ නම් සැප්තැම්බර් 15 වැනිදාට පෙර නිලවරණය පැවැත්විය යුතුව තිබුණා. දැන් නිලවරණය පවත්වා නැහැ. එහෙයින් මේ වනවිට පාපන්දු සම්මේලනය මුළුමනින්ම අකර්මණ්‍ය වී තිබෙනවා,"

ඩලස්ලගෙ සෙට් එකට පාර්ලිමේන්තුවේ කතා කරන්න වෙලාව දෙන්නෙ නෑ කියල, මේ දවස්වල ලොකු වාදයක් යනවා.

ආණ්ඩුව කියන්නෙ විපක්ෂෙට ගියා නම්, විපක්ෂයෙන් වෙලාව ඉල්ල ගන්න කියල. ඒත් ඩලස්ල ජී එල් ල කියන්නෙ ආණ්ඩුවෙන් වෙලාව ඕන කියල .

ඊයෙත් (04) පාර්ලිමේන්තුවේ දි මේ කතාව ඇදුන.

දයාසිරියි විමලුයි දෙන්නම ඩලස්ලගෙ ටයිම් ඇලොකේෂන් සටනට සපෝර්ට් කරමින් කතා කලා.

ඒ ගාලගෝට්ටියෙන් පස්සෙ දිනට නියමිත පනත් කෙටුම්පත් ගැන විවාදය පටන් ගත්ත.

උණුසුම් වාද විවාද සමග විවාදය පැවැත් උණා. වෙලාව හතරහමාරට විතර ඇති. මූලසනයේ හිටියේ නියෝජ්‍ය කතානායක අජිත් රාජපක්ෂ.

""මීළඟට ගරු ඩලස් අලහප්පෙරුම මැතිතුමා .ඔබතුමාට විනාඩි 7 ක කාලයක් තියෙනවා." එසේ කියමින් නියෝජ්‍ය කතානායකතුමා ඊළග කතිකයට ආරාධනා කලා.

මලකෙළියයි ඩලස් ලොක්ක පාර්ලිමේන්තුවේ නෑ . ඉතින් නියෝජ්‍ය කතානායක ඊළග කතිකයට කතාවට ආරාධනා කලා.

උදේ කතා කරන්න වෙලාව දෙන්න නෑ කියල රණ්ඩු කරපු ඩලස් ගැන පාර්ලිමේන්තුවේ කට්ටිය මොනව හිතුව ද මන්දා.. කට අරින්න ඉල්ලනවා.. දෙනකොට වාෂ්ප වෙනවා..!

- දේශපාලන වාර්තාකරු

නීති විරෝධී ලෙස මෙරටට ආනයනය කෙරුණු හමර් (Hummer) වර්ගයේ රථයක් රාජ සන්තක කිරීමෙන් අනතුරු පැවැති වෙන්දේසියක දී එය ආනයනය කළ පුද්ගලයාට ම ලබා දීමත් ටෙන්ඩර් පටිපාටි උල්ලංඝනය කිරීමත් සම්බන්ධයෙන් සතියක් ඇතුළත වාර්තාවක් ලබා දෙන ලෙස මුදල් රාජ්‍ය අමාත්‍ය රංජිත් සියඹලාපිටිය රේගු දෙපාර්තමේන්තුවට නියෝග කර ඇති බව වාර්තා වෙයි.

මෙකී රථය තවත් රථ තුනක් සමග මෙම වසරේ පෙබරවාරි මස 22 වැනි දා ශ්‍රී ලංකාවට ආයනයක කර ඇති අතර පසුව ඒවා රාජසන්තක කර ප්‍රසිද්ධ වෙන්දේසියේ දී විකුණා ඇත.

අමාත්‍යවරයා පවසන්නේ එහෙත් එම වාහන අතර තිබූ හමර් වර්ගයේ රථය වෙන්දේසි කිරීමේදී අනුගමනය කර ඇති ක්‍රමවේදය සම්බන්ධයෙන් රේගු නිලධාරීන් නිශ්චිත පිළිතුරක් ලබා දීමට අපොහොසත් වූ බවය.

අදාළ වාහනයේ තක්සේරු මිල රුපියල් මිලියන 40ක් ලෙස සඳහන්ව තිබුණ ද එය දෙවැනි අවස්ථාවේ වෙන්දේසි වී ඇත්තේ රුපියල් මිලියන 27.5කට ය. එනම් තක්සේරු වටිනාකමින් 33.75%ක අඩු මිලක් යටතේ ය. නමුත් අමාත්‍යවරයා පවසා ඇත්තේ රේගු අඥා පනත යටතේ ටෙන්ඩර් මණ්ඩලයකට බලය ඇත්තේ තක්සේරු වටිනාකිමින් 10%ක් නොඉක්ම වූ අඩු මිලක් යටතේ වෙන්දේසි කිරීමට පමණක් බවයි.

රාජ්‍ය ආදායම් ඉහළ නැංවීම පිළිබඳ දැඩි අවධානයක් යොමු කර ඇති මෙවැනි අවස්ථාවක රජයට අය විය යුතු මුදල් අය නොවීම සම්බන්ධයෙන් සොයා බැලිය යුතු බව අමාත්‍යවරයා වැඩිදුරටත් සඳහන් කළේ ය.

ජනතාව කුසගින්න, පුළුල්ව පැතිරුණු මන්දපෝෂණය සහ ගැඹුරු දරිද්‍රතාවයට මුහුණ පා සිටීම හේතුවෙන් ශ්‍රී ලංකා බලධාරීන් සහ ජාත්‍යන්තර ප්‍රජාව රටේ ආර්ථික අර්බුදයට දක්වන ප්‍රතිචාරවලට මානව හිමිකම් සම්පූර්ණයෙන්ම ඇතුළත් කළ යුතු බව ජාත්‍යන්තර ක්ෂමා සංවිධානය නව වාර්තාවක් නිකුත් කරමින් අවධාරණය කළේය.

ඇම්නෙස්ටි ඉන්ටර්නැෂනල් හෙවත් ජාත්‍යන්තර ක්ෂමා සංවිධානය නිකුත් කළ එම වාර්තාවේ දැක්වෙන්නේ මෙරට ජනතාව සෞඛ්‍ය සේවයට ප්‍රවේශ වීම සම්බන්ධයෙන් ද බරපතල කනස්සල්ලට පත්ව සිටින බවයි.

"අපි සම්පූර්ණ බිඳවැටීමට ආසන්නයි": යන්න තේමා කර ගත් මෙම වාර්තාව මගින් ශ්‍රී ලංකාවේ ආර්ථික අර්බුදය තුළ සෞඛ්‍ය, ආහාර සහ සමාජ ආරක්‍ෂාව සඳහා වන අයිතිවාසිකම් ආරක්ෂා කිරීම, ශ්‍රී ලංකාවේ ජනතාවගේ ආර්ථික සහ සමාජ අයිතීන් කෙරෙහි අර්බුදයේ ව්‍යසනකාරී බලපෑම ගවේෂණය කරයි.

"දැන් මාස ගණනාවක් තිස්සේ, ශ්‍රී ලංකාවේ ජනතාව දැඩි ආහාර හිඟයකින් පෙළෙන අතර සෞඛ්‍ය සේවයට ප්‍රවේශ වීමට අරගල කරමින් ඇතැයි වාර්තාව අනාවරණය කරයි.

අහස උසට ගොස් ඇති උද්ධමනය දැනටමත් පවතින අසමානතාවයේ රටාවන් උග්‍ර කර ඇත යනුවෙන් එහි වැඩිදුරටත් සඳහන් කරයි.

මිනිසුන්ට ඔවුන්ගේ අයිතිවාසිකම් සඳහා ඇති ප්‍රවේශය කුරිරු ලෙස උදුරා ඇති පසුබිමක අර්බුදයේ පුලුල්ව පැතිරුනු මානව හිමිකම් පිරිවැය අවම කිරීම සඳහා ශ්‍රී ලංකා බලධාරීන් සහ ජාත්‍යන්තර ප්‍රජාව කඩිනමින් ක්‍රියා කළ යුතු බවට ඇම්නෙස්ටි ඉන්ටර්නැෂනල් හි ආර්ථික, සමාජීය සහ සංස්කෘතික අයිතිවාසිකම් පිළිබඳ පර්යේෂක සංහිතා අම්බස්ට් සඳහන් කළේය.

ජාත්‍යන්තර ආධාර ප්‍රමාණය වැඩි කිරීම, පුළුල් සමාජ ආරක්ෂණය සහතික කිරීම සහ ණය අවලංගු කිරීම ඇතුළුව ණය සහන සඳහා ඇති සියලු විකල්පයන් සලකා බැලීම වැනි තත්ත්වයට ප්‍රතිචාර දැක්වීමේදී මානව හිමිකම් ආරක්ෂා කිරීම සඳහා ශ්‍රී ලංකාවේ නායකයින් සහ ජාත්‍යන්තර ප්‍රජාව විසින් ක්‍රියාත්මක කළ යුතු ප්‍රතිසාධන ක්‍රියාමාර්ග මෙම වාර්තාව මගින් විස්තර කර තිබේ.

2022 ජූනි සහ සැප්තැම්බර් අතර, ඇම්නෙස්ටි ඉන්ටර්නැෂනල් විසින් සමාජයේ පුළුල් පරාසයක පුද්ගලයන් 55 දෙනෙකු සමඟ සම්මුඛ සාකච්ඡා ඇසුරින් මෙම වාර්තාව සකස් කර ඇත.

අවිනිශ්චිත රැකියාවල නිරත පුද්ගලයින්; දෛනික වැටුප් කම්කරුවන්; ධීවර අංශයේ සහ වතුකරයේ සේවය කරන අය; විශේෂයෙන් බලපෑමට ලක්විය හැකි මලයහ දෙමළ ප්‍රජාවේ ජනතාව; මහජන සෞඛ්ය සේවකයින්; සිවිල් සමාජ කණ්ඩායම්, මානුෂීය සංවිධාන සහ ජාත්‍යන්තර රාජ්‍ය නොවන සංවිධානවල කාර්ය මණ්ඩල සාමාජිකයින් සහ පුද්ගලික විශේෂඥයින් ඊට අයත්වූහ.

වසරක් තුළ සිල්ලර මිල වැඩිවීම !

[2022 ජූලි සඳහා ශ්‍රී ලංකා මහ බැංකුව විසින් ප්‍රකාශයට පත් කරන ලද ආර්ථික දර්ශකවලට අනුව]

බිත්තර - 124.1%
පරිප්පු - 183.9%
අර්තාපල් - 125.3%
සීනි - 151.1%

උණ තිබ්බත්, වෛද්‍යවරයකු හමුවීමට හැකියාවක් නැහැ !

ආර්ථික අර්බුදය උග්‍ර වීම හමුවේ ශ්‍රී ලංකාව තුළ ජීවිතාරක්ෂක ඖෂධ සහ අත්‍යවශ්‍ය උපකරණ හිඟය ප්‍රධාන අවධානයට ලක් වේ. ගෝස්, අභ්‍යන්තර ප්‍රතිජීවක සහ ඉන්සියුලින් හිඟයේ සිට කැතීටර් හෝ එන්ඩොට්‍රාචල් ටියුබ් නැවත භාවිතා කිරීමට ඉල්ලීම් දක්වා, පසුගිය මාස කිහිපය තුළ ශ්‍රී ලංකාවේ සෞඛ්‍ය සේවා පද්ධතියට කම්පන සහගත අභියෝග ගෙන ආ බවට එම වාර්තාව සඳහන් කරයි.

සෞඛ්‍ය සේවකයෙකු ඇම්නෙස්ටි ඉන්ටර්නැෂනල් වෙත පවසා ඇත්තේ , "හෙදියන් අත්වැසුම් නොමැතිව ලේ ගන්නවා. මෙය හෙදියට සහ රෝගියාට අනතුරුදායකයි." යනුවෙනි.

ඇතැම් අවස්ථාවලදී රජයේ රෝහල්වල සැපයුම් අවසන් වී ඇති බැවින් සෞඛ්‍ය සේවා අවශ්‍ය පුද්ගලයන්ට පෞද්ගලික ඔසුසල්වලින් ඖෂධ හෝ උපකරණ මිලදී ගැනීමට උපදෙස් ලැබෙමින් ඇතැයිද වාර්තාව අනාවරණය කළේය.

එක් වෛද්‍යවරයෙක් ඇම්නෙස්ටි ඉන්ටර්නැෂනල් වෙත මෙසේ පවසා තිබුණි: "නමුත් සෑම කෙනෙකුටම එය දැරිය නොහැකියි. බැරි අය ගෙදර යනවා. ගිහින් එන්නේ තත්ත්වය නරක අතට හැරුණාම."

ඉන්ධන හිඟය නිසා ප්‍රවාහනය නොමැති වීම හෝ අතිශයින් මිල අධික වීම නිසා වතුකරයේ ජනතාවට සෞඛ්‍ය සේවා වෙත ප්‍රවේශ වීම දුෂ්කර හෝ ළඟා වීමට නොහැකි තත්ත්වයකට පත් කර ඇත.

වතු ආශ්‍රිත දෙමළ ප්‍රජාවේ සාමාජිකයෙකු වන පදම් ජාත්‍යන්තර ක්ෂමා ආයතනයට පැවසුවේ තම මව කිලෝමීටර් 15 ක් දුරින් පිහිටි ළඟම ඇති රෝහල වෙත රැගෙන යාමේදී තමා දුෂ්කරතාවන්ට මුහුණ දුන් බවයි.

"අර්බුදයට පෙර මම මගේ පෞද්ගලික වාහනය භාවිතා කළා. ඉන්ධන හිඟය නිසා මෙය වඩාත් අභියෝගාත්මක වුණා. අපි පොදු ප්‍රවාහනය භාවිතා කරන්නේ නම්, අද වන විට එය සම්පූර්ණයෙන්ම මගීන්ගෙන් පිරිලා. මගේ මව වැනි අයට පොදු ප්‍රවාහන සේවයේ ගමන් කළ නොහැකියි, මන්ද ඇය ඉතා වයසයි. ටිකට් [මිල] ද විශාල ලෙස වැඩියි."

"අපට උණ ඇත්නම්, අපට වෛද්‍යවරයකු හමුවීමට හැකියාවක් නැහැ. අපි අපේ අසනීප සඳහා පැනඩෝල් [ඇසිටමිනොෆෙන්] භාවිතා කරනවා."

2022 අප්‍රේල් මාසය තුළ සෞඛ්‍ය අමාත්‍යාංශය විසින් ඖෂධ මිල 40%කින් වැඩි කිරීමට අවසර ලබා දී ඇත.

ශ්‍රී ලංකාවේ සෞඛ්‍ය අංශයේ අඩුපාඩු මොනවාද?

2022 ජූලි මාසයේදී - නිත්‍ය රසායනාගාර අයිතම - 250
2022 ජූලි මාසයේදී අත්‍යවශ්‍ය සහ අත්‍යවශ්‍ය ශල්‍ය පරිභෝජන ද්‍රව්‍ය - 2724
2022 අගෝස්තු මාසයේදී වැදගත් ඖෂධ - 7
2022 අගෝස්තු මාසයේදී අත්‍යාවශ්‍ය ඖෂධ - 188
2022 ජූලි මාසයේදී අනුපූරක අයිතම - 600

'සමහර දවස්වල අපි කොහොමත් කන්නේ නැහැ'

උද්ධමනය සහ කුටුම්භ ආදායම අඩුවීම හේතුවෙන් මිල ඉහළ යාමෙන් අදහස් වන්නේ මිනිසුන්ට තම මූලික ආහාර අවශ්‍යතා සපුරා ගැනීමට වැඩි වැඩියෙන් නොහැකි වීම බව ඇම්නෙස්ට් ඉන්ටර්නැෂනල් ආයතනය පෙන්වා දෙයි.

සම්මුඛ පරීක්ෂණයට සහභාගි වූ කිහිප දෙනෙක් තම දරුවන්ට ප්‍රමාණවත් ආහාර නොමැතිකම ගැන කනස්සල්ල පළ කළහ.

දරුවන් තිදෙනෙකු සිටින අරුණි මෙසේ පැවසුවාය: "අපි දවල්ට උයනවා නම්, අපට රාත්‍රී ආහාරය නැහැ, රාත්‍රී ආහාරය නැත්නම්, උදේටත් කිසිදෙයක් නැහැ. සමහර දවස් වලට අපි කන්නෙත් නෑ..."

සිවිල් සමාජ සංවිධානවල කාර්ය මණ්ඩල සාමාජිකයින් ඇම්නෙස්ටි ඉන්ටර්නැෂනල් වෙත පැවසුවේ පාසල් ආහාර සඳහා රජයෙන් ලැබෙන අරමුදල් සෑම දරුවෙකුටම ආහාර සැපයීමට ප්‍රමාණවත් නොවන බවයි.

තේ වත්තක සේවය කරන 39 හැවිරිදි මලයහ දෙමළ කාන්තාවක් වන සවිතා ඇම්නෙස්ටි ඉන්ටර්නැෂනල් වෙත පැවසුවේ, "අපිට උයන්න දෙයක් නැති නිසා අපි දවස් දෙකක් කෑමක් නැතිව හිටියා... මගේ දරුවන්ට ප්‍රශ්න තේරෙන්නේ නැහැ... බඩගිනි දැනෙනවා, කෑම ඉල්ලනවා, සමහර වෙලාවට කෑම ඉල්ලලා අඬනවා."

මානව හිමිකම්වලට ප්‍රමුඛත්වය දීමේ අවශ්‍යතාවය

ශ්‍රී ලංකා රජය, පරිත්‍යාගශීලී රාජ්‍යයන් සහ ජාත්‍යන්තර මූල්‍ය ආයතන ආර්ථික අර්බුදය විසඳීම සඳහා වැඩසටහන් සහ ආර්ථික ප්‍රතිසංස්කරණ ක්‍රියාත්මක කරයි.

ශ්‍රී ලංකා බලධාරීන් සහ පරිත්‍යාගශීලී රාජ්‍යයන් සියලු ආධාර ගිවිසුම් වල සෞඛ්‍ය සහ ප්‍රමාණවත් ආහාර සඳහා ඇති අයිතිවාසිකම් ආරක්ෂා කරමින් ජාත්‍යන්තර මානව හිමිකම් නීතිය යටතේ තම වගකීම් ඉටු කරන බවට සහතික විය යුතු බව ඇම්නෙස්ටි ඉන්ටර්නැෂනල් අවධාරණ කළේය.

ඔවුන් පෙන්වා දෙන්නේ, ශ්‍රී ලංකා රජය සහ ජාත්‍යන්තර මූල්‍ය ආයතන ආර්ථික ප්‍රතිසංස්කරණ ක්‍රියාත්මක කිරීමට පෙර මානව හිමිකම් බලපෑම් තක්සේරු කිරීම් ද සිදු කළ යුතු බවයි.

ශ්‍රී ලංකා බලධාරීන් මේ වන විට රටේ ණය ප්‍රතිව්‍යුහගත කිරීම සම්බන්ධයෙන් ණය හිමියන් සමඟ සාකච්ඡා කරමින් සිටී.

තීරණාත්මක සෞඛ්‍ය සේවා සහ සමාජ ආරක්ෂණ පද්ධති සඳහා රාජ්‍ය ආයෝජන වැඩි කිරීමට රජයට ඉඩ සලසමින්, ණය අවලංගු කිරීම ඇතුළුව ණය සහන සඳහා වන සියලු විකල්ප සලකා බැලිය යුතු බව ඇම්නෙස්ටි ඉන්ටර්නැෂනල් අවධාරණය කළේය.

ඔවුන් අවධාරණය කළේ, ඕනෑම ණය සහන ගිවිසුමක් මානව හිමිකම් බැඳීම් ඉටු කිරීමට ශ්‍රී ලංකාවට ඇති හැකියාව අඩපණ නොකළ යුතු බවයි.

"ජාත්‍යන්තර ප්‍රජාව විසින් ශ්‍රී ලංකාවට හැකි සෑම මූල්‍යමය සහ තාක්ෂණික සහයක් ලබා දිය යුතු අතර, අසමානුපාතික හානිවලින් ආන්තික කණ්ඩායම් ආරක්ෂා කිරීමට පියවර ගෙන ඇත." සංහිතා ඇම්බස්ට් පැවසුවාය.

නිර්දේශ

ඇම්නෙස්ටි ඉන්ටර්නැෂනල් විසින් සිදුවෙමින් පවතින සන්දර්භය තුළ පුළුල් නිර්දේශ මාලාවක් ඉදිරිපත් කර ඇත.

අදාළ සියලුම ක්‍රියාකාරීන්ට අර්බුදයක්. සම්පූර්ණ ලැයිස්තුව මෙම වාර්තාවේ අවසානයේ දිස්වේ. ප්රධාන නිර්දේශ කිහිපයක් ඇතුළත්:

🔘 ශ්‍රී ලංකා රජය දැනට පවතින සමාජ ආධාර වැඩසටහන් යම් ආකාරයකට ප්‍රතිසංස්කරණය කළ යුතුය. එය විස්තීර්ණ සමාජ ආරක්ෂණ ආවරණයක් ලබා දිය යුතුය.
🔘 ශ්‍රී ලංකා රජය සමාජ සහන වැඩසටහන් සඳහා වන වියදම් වැඩි කළ යුතුය. සෑම කෙනෙකුටම ප්‍රමාණවත් ජීවන තත්ත්වයක් සඳහා ඇති අයිතිය තහවුරු කළ යුතුය.
🔘 ශ්‍රී ලංකාවේ බහුපාර්ශ්වික, ද්විපාර්ශ්වික සහ පෞද්ගලික ණයහිමියන් ඔවුන්ගේ ශ්‍රී ලංකාවේ ණය ප්‍රතිව්‍යුහගත කිරීම, ණය සහන සහතික කිරීම, සහ ණය අවලංගු කිරීම ඇතුළුව සාකච්ඡාවලදී මානව හිමිකම් වගකීම්වලට අනුකූලව ක්‍රියා කළ යුතුය.
🔘 ද්වීපාර්ශ්වික සහ බහුපාර්ශ්වික පරිත්‍යාගශීලීන් ශ්‍රී ලංකාවට හැකි සෑම මුල්‍යමය සහ සහාය ලබා දිය යුතුය. මානව හිමිකම් ශක්තිමත් කිරීමට රජයට ඉඩ සලසන ආකාරයෙන් තාක්ෂණික සහාය ලබාදිය යුතුය.
🔘 ශ්‍රී ලංකා රජය මිනිසුන්ට නොගැලපෙන හානිකර කප්පාදු පියවරයන් වැළැක්විය යුතුය.

ජනගහනයෙන් තුනෙන් එකකට වැඩි ප්‍රමාණයක් උග්‍ර ආහාර අනාරක්ෂිතභාවයක

ලෝක ආහාර වැඩසටහන (WFP) ඇස්තමේන්තු කර ඇත්තේ ජනගහනයෙන් තුනෙන් එකකට වැඩි ප්‍රමාණයක්, එනම් සියයට 37ක් මේ වන විට උග්‍ර ආහාර අනාරක්ෂිතභාවයට මුහුණ දෙන බවයි.

එක්සත් ජාතීන් පෙන්වා දෙන්නේ, ආසියාවේ ඉහළම උද්ධමන අනුපාත සහ පවතින ඉන්ධන හිඟය ශ්‍රී ලංකාවේ ආහාර සුරක්ෂිතතාවට දිගින් දිගටම තර්ජන එල්ල කර ඇති බවයි.

කොළඹ පාරිභෝගික මිල දර්ශකය 2022 අගෝස්තු දක්වා වසර තුළ 64.3% දක්වා ළඟා වූ අතර ආහාර උද්ධමනය 93.7%ක් විය.

2020 යල කන්නයට සාපේක්‍ෂව කෘෂිකාර්මික නිෂ්පාදනය සියයට 40 කින් අඩු වී ඇත.

ඉන්ධන මිල ඉහළ යාම, පොහොර හිඟය සහ සත්ව ආහාර හිඟය හේතුවෙන් ආහාර ද්‍රව්‍යවල මිල ගණන් තවදුරටත් ඉහළ යන බව දර්ශක මගින් පෙන්නුම් කරන බව එක්සත් ජාතීන් අනාවරණය කළේය.

එළැඹෙන මහ කන්නය සඳහා, පොහොර සහ පළිබෝධනාශකවල පවතින සීමිත ප්‍රමාණය සහ අධික මිල සහ අඛණ්ඩ ඉන්ධන හිඟය හේතුවෙන් ප්‍රතිඵලය කෙසේ වේදැයි අනාවැකි කීම අපහසුද ලෝක ආහාර වැඩ සටහන අනාවරණය කරයි.

ලෝක ආහාර වැඩසටහනට (WFP) අනුව, ජනගහනයෙන් තුනෙන් එකකට වඩා (සියයට 37ක්) මේ වන විට මධ්‍යස්ථ උග්‍ර ආහාර අනාරක්‍ෂිතතාවයට මුහුණ දී සිටින අතර, කුටුම්භ දහයෙන් අටක් පමණ නිතිපතා ආහාර මත පදනම් වූ ක්‍රමෝපායන් වෙත යොමු වෙති. නාගරික දුප්පතුන් සහ වතු අංශයේ වැඩ කරන ජනතාව මෙන්ම කාන්තා මූලික නිවාස විශේෂයෙන් දුෂ්කරතාවයට පත්ව සිටිති.

ජාත්‍යන්තර සහය

• ජාත්‍යන්තර සංවර්ධනය සඳහා වූ එක්සත් ජනපද නියෝජිතායතනය (USAID) ශ්‍රී ලංකාවට අතිරේක මානුෂීය ආධාර වශයෙන් ඇමෙරිකානු ඩොලර් මිලියන 20ක් ප්‍රකාශයට පත් කර ඇත.

• IMF කළමනාකාරිත්වය සහ විධායක මණ්ඩලය විසින් ඇමරිකානු ඩොලර් බිලියන 2,9 ක විස්තීරණ අරමුදල් පහසුකම අනුමත කිරීමට නියමිතව ඇත.

• යුරෝපා සංගමය සහ එක්සත් රාජධානිය පිළිවෙලින් යුරෝ මිලියන 1,5 සහ පවුම් මිලියන 3 ක් ලෙස මානුෂීය ආධාර සඳහා අරමුදල් නිකුත් කර ඇත.

• අමෙරිකානු රාජ්‍ය නොවන සංවිධානයක් වන හෝප් වර්ල්ඩ්වයිඩ් විසින් ඩොලර් මිලියන 2.7 ක් වටිනා වෛද්‍ය සැපයුම් පරිත්‍යාග කිරීමට පහසුකම් සලසා ඇත.

• ශ්‍රී ලංකාවට පොහොර සැපයීම සම්බන්ධයෙන් ඉරානය සහ ශ්‍රී ලංකාව සාකච්ඡා පවත්වා ඇති අතර එහි ප්‍රතිඵලය පිළිබඳව තවමත් පැහැදිලි බවක් නොමැත.

ආණ්ඩුව මොකද කරන්නේ...?

සමස්ත ලාංකීය සිසු දරුවන්ගේ පෝෂණ සුරක්ෂිතතාවය වෙනුවෙන් දිවා අහාර ලබා දීමේ වැඩසටහනට අතිරේකව තවත් බිලියන 4 ක් ලබා දීමට කැබිනට් අනුමැතිය හිමිව ඇති බව ජනමාධ්‍ය අමාත්‍ය, ප්‍රවාහන හා මහාමාර්ග අමාත්‍ය, කැබිනට් මාධ්‍ය ප්‍රකාශක ආචාර්ය බන්දුල ගුණවර්ධන පැවසීය.

මේ වන විට පාසල් 7 926 ක මිලියන 1.8 ක් පමණ වන සිසුන් ඉලක්ක කර ගනිමින් රජය විසින් දිවා ආහාර ලබා දීමේවැඩසටහන ක්‍රියාත්මක වෙයි.

නමුත් තවත් මිලියන 1.8 ක සිසුන් වෙනුවෙන් දිවා අහාරය ලබා දීම වෙනුවෙන් මෙම අතිරේකව ලබා දීමට නියමිත රුපියල් බිලියන 4 වෙන් කෙරී ඇති බව හෙතෙම පැවසිය.

මෙමඟින් සමස්ත සිසුන්ගෙන් 51% කට ආහාර සුරක්ෂිතතාවය ඇතිවන බවත්, ග්‍රාමීයව අඩු දියුණු පාසල් වල සිසුදරුවන්ටත් අවශ්‍ය පෝෂණ මට්ටම් රැක ගැනීමට මෙමඟින් හැකිවනු බවත් හෙතෙම කියා සිටින ලදුව මේ සඳහා යුනිසෙෆ් ආයතනය, ලෝක බැංකුව, චීන ආණ්ඩුව සහ වෙනත් පුද්ගලික ආයතන වලින් මේ සඳහා ආධාර උපකාර ලැබී ඇති බවත් අමාත්‍යවරයා සඳහන් කළේය.

ඒ අනුව, මෙරට කිසිඳු පුරවැසියෙකු ආහාර නොමැතිකම හේතුවෙන් කුසගින්නේ නොතිබිය යුතුය යන රජයේ මූලික අරමුණ සාක්ෂාත් කර ගනු වස් ඉලක්ක කර ගත් වැඩසටහන් රජය විසින් කඩිනමින් ක්‍රියාත්මක කිරීමට කටයුතු කරන බවත්, මේ සඳහා මෙරට දිළිඳු කම හා පෝෂණය පිළිබඳව දිස්ත්‍රික්ක මට්ටමින් ලබා ගෙන ඇති දත්ත පදනම් කර ගෙන අවශ්‍ය අරමුදල් හා විදේශ ප්‍රදාන සපයාගනිමින් දැනට ක්‍රියාත්මක වැඩසටහන තවදුරටත් ක්‍රියාත්මක කිරීම රජයේ අරමුණ වන බවත් බන්දුල ගුණවර්ධන අමාත්‍යවරයා මෙහි දී වැඩිදුරටත් සඳහන් කළේය.

බීබීසී - සිංහල

ඛනිජතෙල් නිෂ්පාදන (විශේෂ විධිවිධාන) (සංශෝධන) පනත් කෙටුම්පතට ශ්‍රේෂ්ඨාධිකරණයෙන් ලබාදුන් තීරණ අනුව සංශෝධන සහිතව විදුලිබල හා බලශක්ති කටයුතු පිළිබඳ අමාත්‍යාංශයීය උපදේශක කාරක සභාවේ අනුමැතිය හිමි වී ඇත.

විදුලිබල හා බලශක්ති කටයුතු පිළිබඳ අමාත්‍යාංශයීය උපදේශක කාරක සභාව එහි සභාපති විදුලිබල හා බලශක්ති අමාත්‍ය ගරු කංචන විජේසේකරගේ ප්‍රධානත්වයෙන් ඊයේ (04) පාර්ලිමේන්තුවේදී රැස් වූ අවස්ථාවේදී මෙකී අනුමැතිය හිමිව ඇත.

මෙම ඛනිජතෙල් නිෂ්පාදන (විශේෂ විධිවිධාන) (සංශෝධන) පනත් කෙටුම්පත මගින් ඉන්ධන ආනයනය, සැපයුම සහ බෙදාහැරීමට ලංකා ඛනිජතෙල් නීතිගත සංස්ථාට සහ ලංකා ඉන්දියානු තෙල් සමාගමට අමතරව අනෙකුත් පාර්ශ්ව සඳහා ප්‍රතිපාදන සලසා දීම සිදු වේ.

මෙම කාරක සභාව සඳහා රාජ්‍ය අමාත්‍ය ගරු ඩී. වී. චානක සහ පාර්ලිමේන්තු මන්ත්‍රීවරුන් වන නාලක බණ්ඩාර කෝට්ටේගොඩ සහ එම්. එස්. තවුෆික් සහභාගීව ඇත.