පුවත්

ජන මතයට ඉඩක් – මර්දනයට තිතත් මැයෙන් ජනතා විමුක්ති පෙරමුණ සංවිධාන කරන ජන රැලියක් ලබන 27 වැනිදා කොළඹදී පැවැත්වීමට නියමිත බව වාර්තා වෙයි .

මේ අතර අන්තර් විශ්වවිද්‍යාලයී ශිෂ්‍ය බලමණ්ඩලය සංවිධාන කරන ජන රැලියක් 18 වැනිදා කොළඹදී පැවැත්වීමට කටයුතු යොදා තිබෙන බවත් වාර්තා වෙයි .

ඒ "සියලු අරගලකරුවන් නිදහස් කරනු! ත්‍රස්ත පනත ඇතුළු සියලු මර්දන නීති අහෝසි කරනු!" මැයෙන් එම රැලිය පැවැත්වෙන බවත් වාර්තා වෙයි .

මේ සම්බන්ධයෙන් අදහස් දක්වමින් දේශපාලන විචාරකයන් පවසන්නේ මේ වන විට අරගලයේ පීතෲත්වය ගැනීමට ජවිපෙ සහ පෙරටුගාමීන් අතර ඇතිව තිබෙන සීතල යුද්ධය තුළ මේ ආකාරයට තරගයට මෙන් විරෝධතා දියත්කරන බවක් නිරීක්ෂණය වන බවය.

නමුත් විරෝධතා උද්ඝෝෂණ දැක්වීමට ජනතාවට අයිතිවාසිකමක් ඇතත් මේ ආකාරයට අඛණ්ඩව සිදුකරන විරෝධතා හේතුවෙන් මෙරට වෙත ආයෝජන ආකර්ශනයට සහ සංචාරක කර්මාන්තයට බලපෑම් එල්ලවන බව විචාරක මතය වී තිබේ.

විශේෂයෙන් පසුගිය සමයේ ලොවම අවධානය දිනාගත් සාමකාමී නිර්පාක්ෂික අරගලය පසුව ප්‍රචණ්ඩත්වය දක්වා ගමන් කළ බව සිහිපත් කරන විචාරකයන් පවසන්නේ රට තුළ සාමකාමී තත්ත්වය සම්බන්ධයෙන් සැකසංකා මතුවීම මේ නව විරෝධතා රැල්ල හමුවේ ප්‍රතිකේෂ්ප කළ නොහැකි බවත් දේශපාලන විචාරකයන් පවසයි .

රට දරුණු ආර්ථික අර්බුදයකට මුහුණදී ඇති වත්මන් තත්ත්වය හමුවේ පොදුජනතාව පීඩාවට පත්වීම මේ විරෝධතා උද්ඝෝෂණ විසින් තීව්‍ර කරනවා හැර වෙනත් කිසිදු වාසියක් නොලැබෙන බවත් ඔවුන් පෙන්වා දෙයි.

මේ මොහොතේ දේශපාලනය විය යුතුව ඇත්තේ ආර්ථික අර්බුදය විසඳීමට පොදු වැඩපිළිවෙළක් වෙනුවෙන් එක්වීමට සියලු දේශපාලන පක්ෂ වෙත බලපෑම් කිරීම බවත් මතුව ඇති අර්බුදයට ක්‍රියාකාරී දේශපාලනයේ නිරත සියලු පාර්ශ්ව අඩුවැඩි ලෙස සම්මාදම් වී ඇති බවත් විචාරක මතය වී තිබේ.

22 වන ආණ්ඩුක්‍රම ව්‍යවස්ථා සංශෝධනය පාර්ලිමේන්තුවටඉදිරිපත් කිරීමෙන් පසුව පැවැත්වීමට නියමිත විවාදය සංවිධානය කිරීමේ වගකීම පාර්ලිමේන්තුවේ ආණ්ඩු පක්ෂ නියෝජ්‍ය සංවිධායක සාගර කාරියවසම් මන්ත්‍රීවරයාට පැවරෙනු ඇති බව දේශපාලන ආරංචිමාර්ග පවසයි.

ඒ ආණ්ඩු පක්ෂ ප්‍රධාන සංවිධායක අමාත්‍ය ප්‍රසන්න රණතුංග පෞද්ගලික විදෙස් සංචාරයක් යොදාගෙන ඇති නිසා බවත් එම ආරංචිමාර්ග පවසයි.

ප්‍රසන්න රණතුංග අමාත්‍යවරයා යලිත් පැමිණීමට නියමිතව තිබෙන්නේ ව්‍යවස්ථා විවාදය හමාර වූ පසුව බවත් දැනගන්නට ඇත.

කෙසේවුවත් සාගර කාරියවසම් මන්ත්‍රීවරයා පොදුජන පෙරමුණේ මහ ලේකම්වරයා වන අතර ඔහු 22 ව්‍යවස්ථාවේ ඇතැම් වගන්ති සඳහා කිසිසේත්ම සිය පක්ෂය සහයෝගය නොදෙන බව මේ වන විටත් ප්‍රසිද්ධියේ ප්‍රකාශකර ඇත.

22 වන ආණ්ඩුක්‍රම ව්‍යවස්ථා සංශෝධන පනත් කෙටුම්පත දෙවන වර කියවීමේ විවාදය ඔක්තෝබර් 20 හා 21 යන දෙදින පැවැත්වීමට ඔක්තෝම්බර් 07 දින පැවති පක්ෂ නායක රැස්වීමේදී තීරණය කර ඇත.

ආණ්ඩුව දියත් කරමින් සිටින මර්ධනකාරී වැඩපිළිවෙල හමුවේ ජනතා අරගලය සන්නද්ධ වීමට ඉඩ ඇති බව පාර්ලිමේන්තු මන්ත්‍රී ෆීල්ඩ් මාෂල් සරත් ෆොන්ස්කා පවසයි.

පසුගිය වර අරගලයට නිසි නායකත්වයක් නොමැති වීම හේතුවෙන් අරගලය මර්ධනය කිරීමට රජයට හැකි වූ බවත් මෙවර එය එසේ නොවීම සඳහා තම කාලය ශ්‍රමය සහ ධනය කැප කරමින් මේ වන විට තමන් අරගලයේ අඩිතාලම සකසමින් සිටින බව ඔහු සඳහන් කරයි.

ආණ්ඩුවේ මර්ධනය ඉතා අසාධාරණ ලෙස ජනතාව ඉලක්ක කර ගනිමින් ක්‍රියාත්මක වන්නේ නම් අරගලය ඊට මුහුණ දීම සඳහා සන්නද්ධ වීමට බොහෝදුරට ඉඩ ඇති බවද සඳහන් කර ඇත.

පාර්ලිමේන්තු මන්ත්‍රී සරත් ෆොන්සේකා මේ අදහස් දක්වා ඇත්තේ youtube නාලිකාවක් සමඟ සිදුකර ඇති සම්මුඛ සාකච්ඡාවක දී අදහස් දක්වමින්ය.

ෆොනී කිව්වට ජනතාව එන්නේ නෑ !

කෙසේ වුවත් මේ සම්බන්ධයෙන් අදහස් දක්වන දේශපාලන විචාරකයන් පවසන්නේ වගකිව යුතු දේශපාලන නියෝජිතයෙක් ලෙස මෙවැනි ප්‍රකාශ සිදුකිරීම සම්බන්ධයෙන් හෙළාදැකිය යුතු බවය.

දේශපාලන ජීවිතය ආරම්භ කළ මොහොතේ පටන්ම ෆොන්සේකා මන්ත්‍රීවරයා සිය ශික්ෂණයක් නොමැති කට හේතුවෙන් බොහෝ අකරතැබ්බ වලට මුහුණදුන් බවත් විචාරකයන් සිහිපත් කරයි.

මේ සම්බන්ධයෙන් වැඩිදුරටත් අදහස් දක්වන දේශපාලන විචාරකයන් පවසන්නේ ෆොන්සේකා මන්ත්‍රීවරයා කියන ආකාරයේ සන්නද්ධ නැගිටීමක් තරුණයන් වෙතින් කිසිසේත් අපේක්ෂා කළ නොහැකි බවය. විශේෂයෙන් ගෝඨාභය රාජපක්ෂ පාලන සමයේ බංකොලොත් වූ රට මේ වන විට රනිල් වික්‍රමසිංහ ජනාධිපති යටතේ යළිත් සාමාන්‍ය තත්ත්වයට පත්ව ඇති බවත්, ඒ සියල්ල සිදුවන්නේ ලංකා ඉතිහාසය මුහුණදුන් දරුණුතම ආර්ථික අර්බුදයේ කරවටක් ගිලී සිටියදී බවද පවසයි.

පෝලිම් යුගය අවසන් කළ ජනාධිපතිවරයා ආර්ථික අර්බුදය විසඳීම වෙනුවෙන් මේ වන විට පැහැදිළි සහ විධිමත් වැඩපිළිවෙලක් ක්‍රියාවට නංවා ඇති බවත් ඒ පසුබිමේ රට අරාජික කර ජීවිත අවධානමේ දමා ගැනීමට තරම් තරුණ පරපුර අපරිණත නොවනු ඇති බවත් විචාරක මතය වී තිබේ.

ප්‍රජාතන්ත්‍රවාදී දේශපාලනය තුල මිස ආණ්ඩු පෙරළීමක් වෙනුවෙන් කිසිඳු ජනසහභාගීත්වයක් නොලැබෙනු ඇති නමුත් කුඩා කුඩා දේශපාලන කල්ලි කිහිපයක් ගෝඨාභය ජනාධිපතිගේ පසුගිය පළයාමෙන් නොමගගොස් අමාරුවේ වැටීමේ අවධානම ප්‍රතික්ෂේප නොකරන බවද විචාරකයන් සඳහන් කරයි.

අයහපත් කාලගුණ තත්ත්වයෙන් විපතට පත්වූවන් සඳහා ආපදා කළමනාකරණ මධ්‍යස්ථානයේ සහාය ඇතිව සහන කටයුතු කඩිනමින් සම්බන්ධීකරණය කරන ලෙස ජනාධිපති රනිල් වික්‍රමසිංහ මහතා සියලු දිස්ත්‍රික් ලේකම්වරුන්ට උපදෙස් දුන්නේය.

ඊට අවශ්‍ය සියලු ප්‍රතිපාදන, මුදල් අමාත්‍යාංශය හරහා වෙන් කර තිබෙන බවත් පීඩාවට පත්වූ ජනතාවට අවශ්‍ය ආහාර, ඖෂධ ඇතුළු සියලු පහසුකම් කඩිනමින් සපයන ලෙසත් එම ජනතාවගේ සනීපාරක්ෂක පහසුකම් පිළිබඳ විශේෂ අවධානයක් යොමු කරන ලෙසත් ජනාධිපතිවරයා නිලධාරීන්ට උපදෙස් දෙනු ලැබීය.

මෙහිදී සියලු ප්‍රාදේශීය ලේකම්වරු සහ රේඛීය අමාත්‍යාංශ සම්බන්ධීකරණය කරමින් කටයුතු කරන ලෙසත්, සහන වැඩපිළිවෙළේදී රාජ්‍ය නිලධාරින්ගේ සහ ත්‍රිවිධ හමුදාවේ සහාය ලබා ගන්නා ලෙසත් ජනාධිපති රනිල් වික්‍රමසිංහ මහතා දිස්ත්‍රික් ලේකම්වරුන්ට වැඩිදුරටත් උපදෙස් දී ඇත.

ත්‍රිකුණාමලය, හම්බන්තොට, ගාල්ල, කිලිනොච්චිය, කළුතර, ගම්පහ, කොළඹ, පුත්තලම, රත්නපුර, මහනුවර සහ කෑගල්ල යන දිස්ත්‍රික්ක 11කට බලපෑ තද සුළං, නාය යෑම් සහ ගංවතුර තත්ත්වය හේතුවෙන් මේ වන විට ප්‍රාදේශීය ලේකම් කොට්ඨාස 52ක පවුල් 15,404ක් පීඩාවට පත්ව තිබෙන බව ආපදා කළමනාකරණ මධ්‍යස්ථානය 2022 ඔක්තෝබර් 16 දින නිකුත් කළ වාර්තාවේ සඳහන් වේ.

පවතින අයහපත් කාලගුණ තත්ත්වය හේතුවෙන් දිවයින පුරා ජීවිත හානි 03ක් වාර්තා වන අතර පුද්ගලයන් දෙදෙනෙකු තුවාල ලබා ඇත. පූර්ණ නිවාස හානි 05ක් ද, අර්ධ නිවාස හානි 193ක් ද සිදුව ඇති බව එම වාර්තාවේ සඳහන් කර ඇත.

අයහපත් කාලගුණ තත්ත්වයෙන් විපතට පත් පවුල් 439ක පුද්ගලයන් 1927 දෙනෙක් දිවයින පුරා සුරක්ෂිත මධ්‍යස්ථාන 21ක රඳවා සිටින බවත් එහි සඳහන් වේ.

සාම්ප්‍රදායික පක්ෂ දේශපාලනය ඉවත දමා, ආහාර සුරක්ෂිතතාව ඇති කර ජනතාවගේ ආහාර ගැටලුව විසඳන වැඩපිළිවෙලට සියලුදෙනා එක්විය යුතු බව ජනාධිපති රනිල් වික්‍රමසිංහ පවසයි.

ජනාධිපතිවරයා මේ බව සඳහන් කළේ ඊයේ (15) අම්පාර හාඩි උසස් තාක්ෂණ ආයතන ශ්‍රවණාගාරයේ පැවති ආහාර සුරක්ෂිතතාව සහ පෝෂණය සහතික කිරීම සඳහා ග්‍රාමීය ආර්ථික කේන්ද්‍ර සවිබල ගැන්වීමේ බහුආංශික ඒකාබද්ධ යාන්ත්‍රණය පිළිබඳ රාජ්‍ය නිලධාරීන් දැනුවත් කිරීමේ අම්පාර දිස්ත්‍රික් වැඩසටහනට එක්වෙමිනි.

මේ වන විට ඉතා අසීරු කාලයක් පසු කරමින් සිටියත්, කිසිවෙකු කුසගින්නේ නොතබන බව අවධාරණය කළ ජනාධිපතිවරයා ජාතික ආහාර නිෂ්පාදන වැඩපිළිවෙළ සාර්ථකව ඉදිරියට ගෙන යමින් 2023 ඇතිවිය හැකි ගෝලිය ආහාර අර්බුදයට ශක්තිමත්ව මුහුණදීමේ වැදගත්කම ද පෙන්වා දුන්නේය.

ආහාර සුරක්ෂිතතා වැඩපිළිවෙළ ක්‍රියාත්මක කරන අතරතුරදී ලබන වසරේ සිට කෘෂිකර්මාන්තය නවීකරණය කිරීමේ වැඩසටහන ක්‍රියාවට නංවන බව ද ජනාධිපතිවරයා කීය.

විකසිත ප්‍රජාවකින් හෙබි ඉසුරු පිරි දිස්ත්‍රික්කයක් බවට අම්පාර දිස්ත්‍රික්කය පරිවර්තනය කරමින් ආහාර සුරක්ෂිතතාව සහ පෝෂණය සහතික කිරීම, ග්‍රාමීය ආර්ථික පුනර්ජීවන කේන්ද්‍ර සවිබල ගැන්වීමේ බහුආශික ඒකාබද්ධ යාන්ත්‍රණය ක්‍රියාවට නැංවීම පිළිබඳව මෙහිදී දීර්ඝ ලෙස සාකච්ඡා කෙරිණි.

මෙරට වී නිෂ්පාදනයෙන් 22% ක් අම්පාර දිස්ත්‍රික්කයේ ගොවි ජනතාව විසින් නිෂ්පාදනය කරන අතර ඉදිරි යල සහ මහ කන්නවල අස්වැන්න සාර්ථක කර ගැනීම පිළිබඳව ද සාකච්ඡා විය.

මෙම සාකච්ඡාව සඳහා සහභාගීවී සිටි රාජ්‍ය නිලධාරීන් අතරට ගිය ජනාධිපතිවරයා ක්ෂේත්‍ර කටයුතුවලදී ඔවුන් හඳුනාගත් ගැටලු සහ දුෂ්කරතා පිළිබඳ ඝෘජුවම ඇහුම්කන් දීම ද විශේෂත්වයක් විය.

අම්පාර දිස්ත්‍රික්කයේ කෘෂිකාර්මික සහ ධීවර ගැටලු රැසක් පිළිබඳ එහිදී ජනාධිපති රනිල් වික්‍රමසිංහ මහතා දැනුවත් කෙරණු අතර ඒ පිළිබඳ සොයා බලා කඩිනම් පියවර ගැනීමට රාජ්‍ය නිලධාරීන්ට උපදෙස් දුන් ජනාධිපතිවරයා ඒ සඳහා විශේෂ කමිටුවක් පිහිටුවීමට ද උපදෙස් දුන්නේය. .

මෙම සාකච්ඡාවෙන් අනතුරුව හාඩි ගොවිපොළේ නිරීක්ෂණ චාරිකාවකට එක් වූ ජනාධිපතිවරයා එම අවස්ථාව සනිටුහන් කරමින් ගොවිපොළ පරිශ්‍රයේ පැළයක් රෝපණය කිරීමට ද කටයුතු කළේය.

අම්පාර හාඩි උසස් තාක්ෂණ ආයතන ශ්‍රවණාගාරයේ පැවති සාකච්ඡාවේ දී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මහතා
ආහාර සුරක්ෂිතතා වැඩසටහන අම්පාර දිස්ත්‍රික්කයේ ක්‍රියාත්මක වීම ගැන සමලෝචනය සඳහා මම මෙතනට පැමිණියේ. වැඩසටහන ග්‍රාමීය මට්ටමින් ක්‍රියාත්මක වීමේ දී තිබෙන අඩු පාඩු පිළිබඳවත් අපි හඳුනා ගත්තා. කාබනික පොහොර ගැටලුව ඉදිරිපත් වුණා. පසුගිය වසරේ කාබනික පොහොර බෙදාදීම සිදු කළේ අමාත්‍යාංශයෙන්. නමුත් මේ වසරේ අපි එය භාර දි තිබෙන්නේ සමාගම්වලට. ඉතින් ඒ සමාගම් පොහොර ලබාදීම සිදු කරයි.

එක ගැටලුවක් තිබෙනවා, පසුගිය වසරේ රුපියල් බිලියන 08ක බිල්පත් තිබෙනවා සමාගම් සඳහා ගෙවීමට. අපි ඒවා ගෙවීම දැන් ආරම්භ කරලා තිබෙනවා. ඉන් බිලියන 04ක් විතර අපි මේ වන විට ගෙවා තිබෙනවා.

දෙවනුව සිවිල් ආරක්ෂක දෙපාර්තමේන්තුව මේ සඳහා සම්බන්ධ කර ගැනීම පිළිබඳ සාකච්ඡා කරලා අවශ්‍ය නිලධාරීන් ලබා දෙනවා. අපි මේ වැඩපිළිවෙළේදී එක කණ්ඩායමක් ගැන සඳහන් කළේ නැහැ. ඒ ත්‍රිවිධ හමුදාව. ඔවුන්ගේ ගොවිපොළවල්වලින් විශාල නිෂ්පාදනයක් සිදු වෙනවා. ඒ නිසා ත්‍රිවිධ හමුදාවත් අපි මේකට සම්බන්ධ කර ගත යුතුයි.

ලංකාවේ මෙවැනි වැඩසටහනක් ක්‍රියාත්මක කරන පළමු අවස්ථාව මෙය. මෙහෙම තත්ත්වයක් මීට පෙර ලංකාවේ ඇතිවී තිබුණේ නැහැ. දෙවන ලෝක යුද්ධයේදී ආහාර ගේන්න බැරි වුණාට ආර්ථිකය කඩාගෙන වැටුණේ නැහැ. දැන් ආර්ථිකය කඩා වැටිලා තිබෙන්නේ. පසුගිය වසරට වඩා මේ වසරේ මේ ආර්ථිකය ගොඩ අරගෙන තිබෙනවා. තවම ගැටලු තිබෙනවා. අපි මුදල් මුද්‍රණය කරන්න ගියොත් උද්ධමනය වැඩි වෙනවා. තිබෙන මුදල් එක්ක වැඩ කරද්දි සීමා ඇති වෙනවා. කෙසේ හෝ අපි සියලුදෙනා එකතු වෙලා මේ ප්‍රශ්නවලට විසඳුම් සෙවිය යුතුයි.
දැනට තිබෙන්නේ තමන්ගේ ප්‍රදේශවල මේ වගා කටයුතු ආරම්භ කරන්න. ඒ ගැන වාර්තා කරන්න. දෙවනුව අපිට වැඩිපුර අවශ්‍ය ආහාර වර්ග ගැන අපේ ආහාර සුරක්ෂිතතා කාර්යාංශයෙන් දැනුම් දෙයි.

වී වගාව ගැන ප්‍රශ්නයක් නැහැ. මේ කන්නය සාර්ථක වුණොත් අපිට අතිරික්තයක් තිබෙනවා. බඩඉරිගු වැනි බෝග වගාවන් වැඩිකරගන්න ඕන. ඒ සඳහා ඉඩ කඩ ලබා ගනිමින් ඒ කටයුතු සිදු කරන ලෙස මම ඔබෙන් ඉල්ලා සිටිනවා.

බිම් මට්ටමේ සිට මේ වැඩකටයුතු කරන නිලධාරීන් සියලුදෙනාම අපි මේ වැඩසටහනට එකතු කරලා තිබෙනවා. පළමුව අපි ආහාර සුරක්ෂිතාව ඇති කළ යුතුයි. දෙවනුව මන්ද පෝෂණය තුරන් කිරීම සඳහා ආහාර ලබාදීමේ වැඩසටහන ආරම්භ කර තිබෙනවා. අපිත් ඒවට ආධාර උපකාර කරනවා. ඒ සඳහා ආහාර බැංකු, ප්‍රජා මුලුතැන්ගෙය මෙම වැඩසටහන් ඇති කරලා තිබෙනවා.

මොකද අපි මේ ගත කරන්නේ අසීරු කාලයක්. ඒත් කාටවත් ආහාර නැතිව ඉන්න අපි ඉඩ දෙන්න හොඳ නැහැ. ඉදිරියේ දි මහ කන්නය සාර්ථක වුණහාම මේ තත්ත්වයෙන් අපිට ඉදිරියට යන්න පුලුවන්. මේ වැඩපිළිවෙළ 2023 අවසන් වෙනකන් අපි ඉදිරියට ගෙන යන්න ඕන. මොකද අපේ මේ ප්‍රශ්නය විසඳුනත් ගෝලීය ආහාර අර්බුදයක් මතු විය හැකි නිසා මේ රටේ ආහාර සුරක්ෂිතතාව සඳහා මේ වැඩසටහන ඉදිරියට ගෙන යන්න වෙනවා.

ඒ වගේම මෙම ආහාර සුරක්ෂිතතා යාන්ත්‍රණය මෙතතින් නතර කරන්නේ නැහැ. මෙය ක්‍රියාත්මක කරන ගමන් ලබන වසරේ සිට කෘෂිකර්මාන්තය නවීකරණය කරන වැඩසටහන් අපි ආරම්භ කරනවා. එහෙම නම් අපි අලුත් වැඩකටයුත්තක් භාරගෙන තිබෙන්නේ. ඒ සඳහා අපි සියලුදෙනා එකට එකතු වෙලා වැඩ කරන්න ඕන.

මේ වැඩකටයුත්තේ දී අපට තිබෙන්නේ පක්ෂ දේශපාලනය නෙවේ, සම්ප්‍රදායික දේශපාලනය මේකට වැඩක් නැහැ.පක්ෂ දේශපාලනය පැත්තකට දාන්න. ජනතාවගේ ආහාර ගැටලුව විසඳන දේශපාලනයට අපි යන්න ඕන.ඒ වැඩපිළිවෙළට අපි එකතු වෙමු. මහ කන්නයේ සාර්ථක අස්වැන්නක් ලබන්න දැන් සිට අප්‍රේල් දක්වා නිෂ්පාදන වැඩසටහන ක්‍රියාත්මක කළ යුතුයි.

නිදහසින් පසු ආරම්භ කළ පළවෙනි වාරි ව්‍යාපෘතිය තිබෙන්නේ අම්පාර දිස්ත්‍රික්කයේ ඩී.එස්. සේනානායක මහතා ආරම්භ කළ ගල්ඔය ව්‍යාපාරය. එම ව්‍යාපෘතියට කාගෙන්වත් ණය ගත්තේ නැහැ. අධාර ගත්තෙත් නැහැ. යුද්ධයෙන් පස්සේ අපි එංගලන්තයට ණය දීලා ඉතිරි මුදල් තමයි ගල්ඔය ව්‍යාපාරය හැදුවේ.

මම බලාපොරොත්තු වෙනවා අම්පාර දිස්ත්‍රික්කයෙන් රටට වුවමනා ආහාරවලින් වැඩි ප්‍රමාණයක් ලබා දෙයි කියල.මේ කටයුත්තේ දී දේශපාලන බේදයක් නැතිව සියලු මන්ත්‍රීවරු, සංවිධායකවරු එකතුවෙලා මේ වැඩසටහන කරන්න. කෘෂිකර්ම අමාත්‍යවරයා සහ අග්‍රාමාත්‍යවරයා ඉදිරියේදී මේ ප්‍රදේශයට පැමිණෙයි මේ වැඩසටහනේ ප්‍රගතිය ගැන බලන්න.
ඔබ සියලුදෙනා මේ වැඩකටයුතුවල නිරත වෙයි කියා මම බලාපොරොත්තු වෙනවා. අපි මුහුණ දී සිටින මේ අභියෝගය මීට පෙර අපි මුහුණ දුන් එකක් නොවේ, අපේ දෙමාපියන් මුහුණ දුන්නෙත් නැහැ. අපේ මුතුන් මිත්තන් මුහුණ දුන්නෙත් නැහැ. මේ අලුත් තත්ත්වයක්. අපි මෙය නිසි ලෙස හදුනාගෙන වැඩ කළොත් මේ අභියෝගය ජයගෙන ශක්තිමත්ව ඉදිරියට යන්න පුළුවන්. ඒ සඳහා සියලුදෙනාගේ සහයෝගය ඉල්ලා සිටිනවා.

ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක, ජනාධිපති ලේකම් සමන් ඒකනායක, නැගෙනහිර පළාත් ආණ්ඩුකාර අනුරාධා යහම්පත්, පාර්ලිමේන්තු මන්ත්‍රී අම්පාර දිස්ත්‍රික් සංවර්ධන කමිටු සභාපති ඩබ්ලිව්.ඩී. වීරසිංහ, පාර්ලිමේන්තු මන්ත්‍රීවරුන් වන ඒ.එල්.එම්. අතාවුල්ලා, එච්.එම්.එම්. හාරිස්, ෆයිසාල් කාසිම්, වෛද්‍ය තිලක් රාජපක්ෂ, එන්.එම්.එම් මුසාරොෆ්, ටී කෛලයි අර්සන්, සරත් වීරසේකර, හිටපු අමාත්‍ය දයා ගමගේ, හිටපු රාජ්‍ය අමාත්‍ය අනෝමා ගමගේ, ජාතික ආහාර සුරක්ෂිතතාව පිළිබඳ ජනාධිපති උපදේශක ආචාර්ය සුරේන් බටගොඩ සහ ත්‍රිකුණාමල දිස්ත්‍රික් ලේකම්, නැගෙනහිර පළාත් ප්‍රධාන ලේකම්, අම්පාර දිස්ත්‍රික් ලේකම්, නැගෙනහිර පළාත් කෘෂිකර්ම අමාත්‍යාංශයේ ලේකම්, නැගෙනහිර පළාත් සභාවේ සභාපති සහ අම්පාර දිස්ත්‍රික්කය නියෝජනය කරන කෘෂිකර්ම, වාරිමාර්ග, සමෘද්ධි ඇතුළු රාජ්‍ය නිලධාරීහු මීට එක්ව සිටියහ.

ගිනි ගැනීමට ලක්වූ මෝදර, මාදම්පිටිය, කජීමා වත්තෙහි පදිංචිකරුවන් අතරින් 214 දෙනෙකු නිවසක් ලබාගැනීමට අවශ්‍ය අවම සුදුසුකම්වත් සපුරා නොමැති බවට හඳුනා ගෙන ඇති බව වාර්තා වෙයි.

මේ බව අනාවරණය කර ඇත්තේ කජීමා වත්ත ගිනි ගැනීම සම්බන්දයෙන් නාගරික සංවර්ධන අධිකාරිය නාගරික සංවර්ධන හා නිවාස අමාත්‍යංශයේ ලේකම්වරයා වෙත ලබාදුන් වාර්තාවේය.

ඒ අනුව නාගරික පුනර්ජීවන ව්‍යාපෘතිය යටතේ අනුමත ප්‍රතිපත්තීන්වලට අනුව ඔවුන්ට නිවාස ලබාදීමේ හැකියාවක් නැති බවත් එම වාර්තාවේ සඳහන් වෙයි.

ගිනි ගැනීමට ලක්වූ මෙම කජීමා වත්ත ජාතික නිවාස සංවර්ධන අධිකාරියට අයත් අතර අක්කර පහක පමණ විශාලත්වයකින් යුතුය. 2011 වසරේදී ආරම්භකළ නාගරික පුනර්ජීවන ව්‍යාපෘතිය යටතේ එම ඉඩම්වල පදිංචි පවුල්වෙත ස්ථීර නිවාස ලබාදෙන තෙක් තාවකාලික අතරමැඳි කඳවුරක් පවත්වාගෙන යෑමට තාවකාලික පදනම මත කජීමා වත්ත නාගරික සංවර්ධන අධිකාරියට පවරා ගත් බවද අදාළ වාර්තාවේ සඳහන්වෙයි.

නාගරික සංවර්ධන අධිකාරිය මහල් නිවාස සංකීර්ණ ඉදිකිරීමට ඉඩම් නිදහස් කර ගැනීමේදී අවතැන්වන පවුල් මෙම කජීමා වත්තෙහි තාවකාලිකව පදිංචි කර ඇත. එලෙස පදිංචි කරන ලද පවුල් සංඛ්‍යාව 275කි. අනතුරුව එම පිරිසට විකල්ප නිවාස ලබාදී කජීමා වත්ත නිදහස් කර ගෙන ඇත.

ඉන් පසුවද අවස්ථා කිහිපයකදීම මෙම අතරමැදි කඳවුර තුළ පවුල් ඒකක 50ක් පමණ පදිංචිකරවා ඇති අතර 214 වසරින් පසුව දේශපාලන මැදිහත්වීම මත මෙම ඉඩමෙහි අනවසර පවුල් 291 පමණ පදිංචිකරවා ඇත.

එමෙන්ම 2015 ජනාධිපතිවරණයෙන් පසුව දේශපාලන මැදිහත්වීම මත යළි අවස්ථා කිහිපයකදීම විවිධ ප්‍රදේශවලින් පැමිණි පිරිස් මෙහි අනවසරයෙන් පදිංචිකරවා ඇති බවද එම වාර්තාවේ වැඩිදුරටත් සඳහන් කර ඇත.

ආණ්ඩුවේ ඇමතිධුර හොබවන,, පොහොට්ටු පක්ෂයේ ප්‍රබලයන් කිහිප දෙනක්, UNP එකට ඈඳගන්න, පොහොට්ටුවෙන් ස්වාධීන වෙච්ච මන්ත්‍රීවරයෙක්,, මේ දවස්වල ලොකු ට්‍රයි එක්ක දෙනවා කියල ජනාධිපති රනිල්ගේ මාමාගේ,, ලංකාදීප පත්තරේ වාර්තා කරලා තියනවා.

බස්නාහිර පළාත නියෝජනය කරන ඔය කියන මන්ත්‍රීතුමා පොහොට්ටු පක්ෂයෙන් අයින්වෙලා , ස්වාධීන මන්ත්‍රීවරයකු විදියට, මේදවස්වල ජනාධිපති කාර්‍යාලයට වෙලා,, ලොකු වැඩ කොටසක් කරනව ලු..

ආරංචියේ හැටියට, ඒ මන්ත්‍රීතුමා ආණ්ඩුවේ ඇමතිධුර හොබවන පොහොට්ටුවේ ලොක්කෝ කිහිදෙනෙක්ව, පසුගිය දවස්වල වෙන වෙනම හම්බෙලා , මේ සම්බන්ධයෙන් සාකච්ඡා කරල කියලත් ලංකාදීප වාර්තාවේ තියනවා..

ඔය කියන විදියට මේ මන්ත්‍රීතුමා,, ආණ්ඩුවේ ප්‍රබල අමාත්‍ය ධුර හොබවන, කොළඹ , ගම්පහ, මහනුවර, ගාල්ල, මාතර ඇතුළු දිස්ත්‍රික්ක ගණනාවක,, පොදුජන පෙරමුණේ ඇමැතිවරුන් කිහිප දෙනකුම හමුවෙලා, කියල තමයි දැනගන්න තියන්නේ..

කොහොමටත් දැන් තියන ආරංචිවල හැටියට, නිමල් ලන්සා, ඇමති නලින් ප්‍රනාන්දු , ජනාධිපති රනිල් එක්ක සෙට් වෙලා කියල තමයි කියන්නේ.

ඒ විතරක් නෙමෙයි.. ඇමති රොෂාන් රණසිංහත් , මේ වෙනකොට ජනාධිපති තුමාගේ පාර්ශවය සමග, සමීපව කටයුතු කරමින් ලු ඉන්නේ.. රොෂාන් පොහොට්ටුවේ දිස්ත්‍රීක් නායකකමෙන් අස්වෙන්න යනවා කියල කතාවකුත් යනවා.

ඔය කතාව ආරංචි වෙලද කොහෙද , ඇමති රොෂාන් රණසිංහ,, පොලොන්නරුව දිස්ත්‍රික් නායකත්වයෙන් ඉවත් කරලා , සිරිපාල ගම්ලත්, දිස්ත්‍රික් නායකයා කරන්න BR තීරණේ කරලා කියලත් කියනවා.

ඔන්න ඒ නිසාම මෙච්චර කාලයක් සද්ද නැතුව හිටපු සිරිපාල ගම්ලත් උන්නැහෙත් කට ඇරලා . බැසිල් රාජපක්ෂ අද හෙටම නැවතත් පැමිණ ශ්‍රී ලංකා පොදුජන පෙරමුණට නායකත්වය ලබාදෙන බව බව මීඩියා වලට කියලා. ඒ විතරක් නෙවෙයි, රොෂාන්ටත් ෂොට් එකක් දීලා. ඒ මෛත්‍රිපාල සිරිසේන සමග නොගිය ජනතාව රොෂාන් රණසිංහ සමග යාවිදැයි බලාපොරොත්තු වෙන්න බෑ කියලා.

මේවා ගැන පොහොට්ටුවේ උදවිය නම් කියන්නේ "අපේ සමහරුන්ගේ කට ඇරවන්න පට්ටමක් දෙන්නම වෙලා " කියලා.

- දේශපාලන වාර්තාකරු

දිවයිනට බලපා ඇති කාලගුණික තත්ත්වය, තවදුරටත් පැවතිය හැකි බව කාලගුණ විද්‍යා දෙපාර්තමේන්තුව සඳහන් කරයි.

ඒ අනුව බස්නාහිර, සබරගමුව, මධ්‍යම සහ වයඹ පළාත්වලත් ගාල්ල සහ මාතර දිස්ත්‍රික්කවලටත් විටින් විට වැසි හෝ ගිඟුරුම් සහිත වැසි ඇති විය හැකිය.

බස්නාහිර, සබරගමු සහ මධ්‍යම පළාත්වලටත් ගාල්ල සහ මාතර දිස්ත්‍රික්කවල ඇතැම් ස්ථානවලට මිලිමීටර 100 ඉක්මවූ තද වැසි ඇති විය හැකියි.

එසේම දිවයිනේ සෙසු ප්‍රදේශ සඳහා රාත්‍රී කාලයේ හෝ සවස් කාලයේ ගිඟුරුම් සහිත වැසි ඇතිවිය හැකියි.

නිවේදනයක් නිකුත් කරමින් කාලගුණ විද්‍යා දෙපාර්තමේන්තුව වැඩිදුරටත් සඳහන් කරන්නේ, තාවකාලිකව ඇතිවිය හැකි තද සුළංවලින් සහ අකුණු මගින් සිදුවන අනතුරු අවම කරගැනීම සඳහා අවශය පියවර ගන්නා ලෙසය.

නාය යෑම් පිළිබඳ පූර්ව අනතුරු අඟවීම්

තවද, දිස්ත්‍රික්ක 6ක් සඳහා නාය යෑම් පිළිබඳ පූර්ව අනතුරු අඟවීම් නිකුත් කර තිබේ.

ඒ, ජාතික ගොඩනැගිලි හා පර්යේෂණ සංවිධාන විසිනි.

ඒ අනුව එම දිස්ත්‍රික්ක මෙසේය.

කොළඹ, ගාල්ල, කළුතර, නුවරඑළිය, රත්නපුර, කෑගල්ල

විදුලිබල හා බලශක්ති, ජනමාධ්‍ය, ප්‍රවාහන හා මහා මාර්ග සහ සෞඛ්‍ය යන රාජ්‍ය අමාත්‍යාංශවලට අදාළ විෂය පථයන් ගැසට් කර ඇත.

විදුලිබල හා බලශක්ති රාජ්‍ය අමාත්‍යාංශය යටතට ලංකා ඛනිජ තෙල් නීතිගත සංස්ථාව, ලංකා ඛනිජ තෙල් තොග පර්යන්ත සමාගම, ත්‍රීකුණාමලය ඛනිජ තෙල් පර්යන්ත සමාගම, ශ්‍රී ලංකා ඛනිජ තෙල් සංවර්ධන අධිකාරිය ඇතුළු ආයතන කිහිපයකට අදාළ විෂය පථයන් ඇතුළත් ය.

තැපැල් දෙපාර්තමේන්තුව, රජයේ මුද්‍රණ දෙපාර්තමේන්තුව සහ ශ්‍රී ලංකා මුද්‍රණ ආයතනය, ජනමාධ්‍ය රාජ්‍ය අමාත්‍යාංශය යටතට පවරා ඇත.

සෞඛ්‍ය රාජ්‍ය අමාත්‍යාංශය යටතට පෞද්ගලික වෛද්‍ය නියාමන සභාව, 1990 සුවසැරිය පදනම, දුම්කොළ සහ මධ්‍යසාර පිළිබඳ ජාතික අධිකාරිය යන ආයතන අයත් වේ.

මීට අමතරව සෞඛ්‍ය රාජ්‍ය අමාත්‍යාංශය යටතට ආයුර්වේද දෙපාර්තමේන්තුව, ආයුර්වේද වෛද්‍ය සභාව, ශ්‍රී ලංකා ආයුර්වේද ඖෂධ සංස්ථාව යන ආයතනවලට අයත් විෂයන් නව ගැසට් නිවේදනය මගින් ප්‍රකාශයට පත්කර තිබේ.

ප්‍රවාහන රාජ්‍ය අමාත්‍යාංශය යටතට මෝටර් රථ ප්‍රවාහන දෙපාර්තමේන්තුව, මාර්ග ආරක්ෂාව පිළිබඳ ජාතික සභාව හා ජාතික ප්‍රවාහන වෛද්‍ය ආයතනය ඇතුළු ආයතන 4 ක් පවරා ඇත.

මහාමාර්ග රාජ්‍ය අමාත්‍යාංශයට පවරා ඇත්තේ, මාර්ග සංවර්ධන අධිකාරිය යටතේ ඇති පාලිත සමාගම් හා සහස්යා ඉන්වෙස්ට්මනට් ලිමිටඩ් ආයතනයයි.

ග්‍රාමීය මාර්ග සංවර්ධන රාජ්‍ය අමාත්‍යාංශය යටතට මග නැගුම අංශය හා රාජ්‍ය සංවර්ධන හා නිර්මාණ නීතිගත සංස්ථාව පවරා ඇත.

මීට අදාළ ගැසට් නිවේදන නිකුත් කර ඇත්තේ, එක් එක් විෂයට අදාළ කැබිනට් අමාත්‍යවරුන් විසිනි.

නාරාහෙන්පිට අභයාරාමාධිපති, මුරුත්තෙට්ටුවේ ආනන්ද හිමි සතුව තිබූ රුපියල් කෝටි තුනකට වැඩි වටිනාකමක් ඇති ප්‍රාඩෝ V8 වර්ගයේ සුපිරි ජිප් රථය සොරකම් කරන ලද්දේ, රක්ෂිත බන්ධනාගාර ගත කර සිටින තිළිණි ප‍්‍රියමාලි නමැති ව්‍යාපාරික කාන්තාව නොවන බව එම හිමිනම පවසා සිටී .

කොළඹ නගර සභාවේ පොදුජන පෙරමුණේ නාගරික මන්ත්‍රීනි ප්‍රියංකා ජයසේකර විසින් තම රථය හොර රහසේ විකුණා දමා ඇතැයි ද මුරුත්තෙට්ටුවේ හිමියෝ පවසති.

මුරුත්තෙට්ටුවේ හිමි පවසන ආකාරයට අදාළ සුපිරී ජීප් රථය දායකයෙකුගෙන් පරිත්‍යාගයක් ලෙස ලැබී ඇති අතර එය විකිණීමට සූදානම් වූ අවස්ථාවේ ප්‍රියංකා ජයසේකර මන්ත්‍රීවරිය විසින් පසුව මුදල් ලබා දීමේ පදනමින් එය රැගෙන ගොස් ඇත .

එහෙත් ප්‍රියංකා ජයසේකර මන්ත්‍රීවරිය විසින් ජිප් රථයේ මුදල් ලබා නොදීම නිසා උන්වහන්සේ ඒ පිළිබද කළ සොයා බැලීමක දී එය විකුණා තිබූ බැවින් කොළඹ අපරාධ කොට්ඨාශය පැමිණිලි කිරීමට උන්වහන්සේ කටයුතු කර ඇත.

එසේ පැමිණිලි කිරීමෙන් පසු සැකකාර මන්ත්‍රීවරියට නඩු පවරා අධිකරණයට ඉදිරිපත් කර දැනට ඇප මත මුදාහැර ඇති බව හිමිනම පවසයි .

තමන් වහන්සේගේ ජීප් රථය සොරකම් කළේ දැනට රක්ෂිත බන්ධනාගාර ගත කර සිටින තිළිණි ප‍්‍රියමාලි යන්න අසත්‍යක් බවත් පවසයි .

ශ්‍රී ලංකාව ඇතුළු රටවලට ලබාදෙන ආධාර හා පහසුකම් පුළුල් කරන බව ජාත්‍යන්තර මූල්‍ය අරමුදල (IMF) පවසයි.

එම අරමුදලේ කළමනාකරණ අධ්‍යක්ෂ ක්‍රිස්ටලීනා ජෝර්ජියාවා මේ බව ප්‍රකාශ කළා ය.

ජාත්‍යන්තර මූල්‍ය අරමුදලේ කළමනාකරණ අධ්‍යක්ෂ, ක්‍රිස්ටලීනා ජෝර්ජියාවා,

ආහාර අර්බුදයෙන් පෙලෙන රටවල් සඳහා ජාත්‍යන්තර මූල්‍ය අරමුදල විසින් හදිසි මුල්‍යමය පහසුකම් ලබාදීමට කටයුතු කරලා තියෙනවා. ණය ගැන කතා කරන විට අපි G 20 සමුළුව හරහා විවිධ රටවල්වල ණය ප්‍රශ්නය විසඳීමට ක්‍රියාදාමයක් ස්ථාපිත කරමින් සිටිනවා. අපි සියලුම රාජ්‍ය හා රාජ්‍ය නොවන ණය හිමියන් සමග එකම ක්‍රියාපටිපාටියක් අනුගමනය කිරීමට බලාපොරොත්තු වෙනවා. අපි ශ්‍රී ලංකාව වැනි මැදි අදායම් ලබන රටවල්වලට ලබාදෙන ආධාර හා පහසුකම් පුළුල් කිරීමට බලාපොරොත්තු වෙනවා.

ජාත්‍යන්තර මූල්‍ය අරමුල හා ලෝක බැංකුවේ වාර්ෂික රැස්වීමට සමගාමීව පැවති මාධ්‍ය හමුවකදී ජාත්‍යන්තර මූල්‍ය අරමුදලේ කළමනාකරණ අධ්‍යක්ෂ ක්‍රිස්ටලීනා ජෝර්ජියාවා මහත්මිය මේ බව ප්‍රකාශ කළා ය.

මේ අතර එම වාර්ෂික සමුළුවට එක්වීමට වොෂින්ටන් නුවරට ගොස් සිටින මුදල් රාජ්‍ය අමාත්‍ය ෂෙහාන් සේමසිංහ මහතා ලෝක බැංකුවේ දකුණු ආසියානු කලාපීය උපසභාපති මාර්ටින් රයිසර් මහතා ඇතුළු නියෝජිතයින් පිරිසක් හමුවී තිබේ.

ශ්‍රී ලංකාවට ණය පහසුකම් ලබා ගැනීමේ ඇති හැකියාව විමසා බැලීම පිළිබඳව මෙහිදී මුලික අවධානය යොමු වූ බව මුදල් රාජ්‍ය අමාත්‍යවරයාගේ මාධ්‍ය අංශය නිවේදනයක් නිකුත් කරමින් ප්‍රකාශ කළේ ය.

ප්‍රතිසංස්කරණය හා සංවර්ධනය සඳහා වන ජාත්‍යන්තර බැංකුව මගින් ණය පහසුකම් ලබාගැනීමට ශ්‍රී ලංකාවට හැකියාවක් නොමැති බවත් ජාත්‍යන්තර සංවර්ධන සංගමයේ සහය ඒ සඳහා ලබාගත යුතු බවත් මෙහිදී අවධාරණය වූ බව සඳහන් ය.

අතරමැදි සහනදායි ණය වැඩසටහන් ක්‍රමවේදය යටතේ ජාත්‍යන්තර සංවර්ධන සංගමයෙන් සහනදායී ණය පහසුකම් ලබාගැනීමට ශ්‍රී ලංකාවට සුදුසුකම් ඇතැයි ද එහි දැක්වේ.

එම ණය පහසුකම් ලබාගැනීමට නම් ශ්‍රී ලංකා රජය විසින් නව ආර්ථික ප්‍රතිස්සංකරණ සිදු කිරීම, ජාත්‍යන්තර මූල්‍ය අරමුදලේ විස්තීරණ ණය පහසුකමට අදාළ ක්‍රමවේදයන් ක්‍රියාත්මක කිරීම ඇතුළු පියවරගත යුතු බව ලෝක බැංකු නියෝජිතයින් මෙහිදී පෙන්වා දී තිබේ.

මේ අතර පැරිස් ක්ලබ් ණයහිමි රටවල් සමූහය පසුගිය මාසයේ ශ්‍රී ලංකාවේ ණය ප්‍රතිව්‍යුහගතකරණය සම්බන්ධයෙන් චීනය හා ඉන්දියාව සමග සාකච්ජා කර ඇති බව රොයිටර් පුවත් සේවය වාර්තා කළේ ය.

එම රටවලින් මේ සඳහා මෙතෙක් පිළිතුරක් ලැබි නොමැති බව රොයිටර් වාර්තාවේ සඳහන් ය.

පසුගිය සැප්තැම්බර් මාසයේ ශ්‍රී ලංකාවට ඩොලර් බිලියන 2.9 ක විස්තීරණ ණය පහසුකමක් ලබාදීමට ජාත්‍යන්තර මූල්‍ය අරමුදල මාණ්ඩලීක මට්ටමේ එකඟතාවට එළැඹීමෙන් පසුව පැරිස් ක්ලබ් නයෝජිතයින් ශ්‍රී ලංකාවේ විශාලතම ද්විපාර්ශ්වික ණය දෙන්නන් වන චීනය හා ඉන්දියාව සමග සාකච්ජා ආරම්භ කළ බව රොයිටර් පුවත් සේවය වාර්තා කර තිබේ.

News 1st

හිටපු ජනාධිපති ගෝඨාභය රාජපක්ෂ විසින් එක රටක් එක නීතියක් කාර්ය සාධක බළකායේ සභාපතිවරයා වශයෙන් පත්කළ ගලගොඩඅත්තේ ඥානසාර හිමි වහාම අත්අඩංගුවට ගන්නා ලෙස අධිකරණය අද (14) වරෙන්තු නිකුත්කර ඇත .

ඒ එම හිමිනම අධිකරණය හමුවේ පෙනී නොසිටීම නිසාය.

මේ ආකාරයට උන්වහන්සේ අධිකරණය හමුවේ පෙනී සිට නැත්තේ මුස්ලිම් ප්‍රජාවගේ සිත රිදවීමට කටයුතු කොට ඇති බවට එල්ල වූ චෝදනාවක් සම්බන්ධයෙන් ගොනුකර ඇති නඩුවකට අදාළවය .

වගා කළ හැකි සියලු ඉඩම් වගා කරමින් රටේ ආහාර සුරක්ෂිතතාව තහවුරු කිරීමේ වැදගත්කම ජනාධිපති රනිල් වික්‍රමසිංහ අවධාරණය කළේය.

ජනාධිපතිවරයා මේ බව සඳහන් කළේ ත්‍රිකුණාමලය දිස්ත්‍රික්කයේ ගොවි ජනතාව මුහුණ පා සිටින ඉඩම් ගැටලුව පිළිබඳ අද (14) පස්වරුවේ නැගෙනහිර පළාත් ආණ්ඩුකාර කාර්යාලයේ දී පැවැත්වුණු සාකච්ඡාවට එක් වෙමිනි.

පාරම්පරිකව ගොවීන් විසින් වගාකරන ලද එහෙත් යුද්ධය නිසා අතහැර ගොස් තිබී යුද්ධය නිමවීමෙන් පසුව වනජීවි හා වනරක්ෂිත ලෙස මායිම්ගල් දමා ඇති පාරම්පරික ඉඩම් නැවත ගොවීන් වෙත ලබාදීම සම්බන්ධයෙන් මෙහිදී දීර්ඝ ලෙස සාකච්ඡාවට ලක් කෙරිණි.

ගොවි ජනතාවගේ ගැටලු කඩිනමින් නිරාකරණය කිරීමේ අවශ්‍යතාව අවධාරණය කළ ජනාධිපතිවරයා ඉදිරි යල මහ කන්න සාර්ථක කර ගනිමින් 2023 ඇති විය හැකි ආහාර අර්බුදයට සූදානම් වීමේ අවශ්‍යාතාව පැහැදිළි කළේය.

එමෙන්ම ජනාධිපති රනිල් වික්‍රමසිංහගේ ප්‍රධානත්වයෙන් පසුගියදා හඳුන්වා දුන් ආහාර සුරක්ෂිතතාවය හා පෝෂණය පිළිබඳ වැඩසටහන ත්‍රිකුණාමලය දිස්ත්‍රික්කය තුළ ක්‍රියාත්මක වීමේ ප්‍රගතිය පිළිබඳව ද මෙහිදී විමසා බැලිණි.

අමාත්‍ය නිමල් සිරිපාල ද සිල්වා, රාජ්‍ය අමාත්‍ය දිලුම් අමුණුගම, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක, ජනාධිපති ලේකම් සමන් ඒකනායක, නැගෙනහිර පළාත් ආණ්ඩුකාර අනුරාධා යහම්පත් සහ ත්‍රිකුණාමලය දිස්ත්‍රික් ලේකම්, පළාත් ප්‍රධාන ලේකම්, ආණ්ඩුකාර ලේකම් ඇතුළු රාජ්‍ය නිලධාරිහු ද, ආරක්ෂක අංශ ප්‍රධානීන් ඇතුළු පිරිසක් මෙම අවස්ථාවට එක්ව සිටියහ.

බදු කතා සේරම සද්ද යටකරගෙන, තිළිණි ප්‍රියමාලි ගැන ඕපාදුප කතා,, නැගලම යනවා හිටු කියලා .

එයාගේ කොම්පියුටර් එකේ හැංඟුණු ඒවා,, එළියට ඇදලා ? දැන් බලාගන්නකෝ වෙන දේ..”

- රටම කැළඹූ ප්‍රියමාලිගේ පැටිකිරිය මෙන්න! වංචාව දැනට කෝටි 1000ට කිට්ටුයි! මුල් ගම කලුතර! ‌ඉගෙනගෙන තියෙන්නේ අටේ පංතියට විතරයි! කසාද 3ක් කරගෙන! පියා වඩු කාර්මිකයෙක්! ''

බලාගෙන යනකොට ඔන්න ඕවා තමයි, මාධ්‍ය ඔස්තාර්ලා හිතන, ජනතාවගේ දැවෙන ප්‍රශ්න ...

කොළඹ වර්ල්ඩ් ට්‍රේඩ් සෙන්ටර් එකේ , 34 වැනි තට්ටුවේ කාර්යාලයක් පවත්වාගෙන යන, තිළිණි ප්‍රියමාලි ගේ වංචාවලට අහුවෙලා කියලා , දැනට තහවුරු කරගෙන ඉන්න පිරිස විසින්, සැබෑ ලෙස අහිමි කර ගෙන ඇති මුදල, රුපියල් කෝටි 500 ඉක්මවන බව, සමහර මාධ්‍ය කියනවා ..

ඇයගේ වංචාවට හසු වී ඇති, මෙතෙක් පැමිණිලි නොකළ පිරිසකගේ ද මුදල් එක්ක, ඇය සිදු කර ඇති සමස්ත මූල්‍ය වංචාව, රුපියල් කෝටි 1000කට ආසන්න වේවි කියලා , තවත් මාධ්‍ය කියනවා.

අවට ගියාට නෙමෙයි ඒවා කියන්නේ , රහස් පොලිසියත් කෝට් කරලා.

තිළිණි ප්‍රියමාලි, මෙරට ජනප්‍රිය නළු නිළියන් ගායකයන් ඇතුළු, ප්‍රසිද්ධ පුද්ගලයින් වෙනුවෙන් , විශාල වශයෙන් මුදල් වියදම් කරල ලු.. ඇතැම් කලාකරුවන්ගේ උපන්දින සාද පවා,, ඇය ලෝක වෙ‍ෙළඳ මධ්‍යස්ථානයේ, 34 වෙනි මහලේදී සමරලා තියනවා ලු.. ඒ උත්සව වලට, මිලියන ගණනක මුදල් වැයකරලා ලු..

ඒ විතරක් නෙමෙයි , තරු පංතියේ හෝටල්වලත්, ඇය ඇතැම් කලාකරුවන් , දේශපාලකයන් , ආරක්ෂක අංශ නිලධාරීන් වෙනුවෙන් , සාද සංවිධානය කරල තියනවා ලු..

ඔය කියන විදියට, තිලිනි , සමහර කලාකරුවෝ , දේශපාලකයෝ , ආරක්ෂක අංශ ලොක්කෝ එක්ක, ඔය උත්සව වලදී ගත්තු, ෆොටෝ, වීඩියෝ එයාගේ ගනුදෙනු ප්‍රවර්ධනය කරන ප්‍රචාරක කටයුතුවලට යොදා ගෙන.

ඒ විදියට දැනට හඳුනාගෙන ඉන්න නළු නිළියන් ඇතුළු කලාකරුවන්ව, හෙට අනිද්දා වෙනකොට රහස් පොලිසියට ගෙනත්, ප්‍රශ්න කරන්න ලු යන්නේ..

ඔය මොන කතා කිව්වත්, තිලිනිට විරුද්ධව , රහස් පොලිසියට මෙතෙක් ලැබිලා තියන , මුල් පැමිණිලි ගාන, 08 යි. ඒ පැමිණිලි වලට අනුව, ඇය විසින් වංචාකර ඇති මුදල, රුපියල් කෝටි 251යි..

ඇයට හසුවී රුපියල් කෝටි 75ක වංචාවකට ලක්වූ වෛද්‍යවරයෙක්, පැමිණිල්ලක් ඉදිරිපත් කිරීමට ඉදිරිපත් වුනත්, ඔහු ඊයේ දිනයේත්, ඒ පැමිණිල්ල ඉදිරිපත්කර නැහැ කියලා , පොලිස් මාධ්‍ය ප්‍රකාශක, ජ්‍යෙෂ්ඨ පොලිස් අධිකාරී නීතිඥ නිහාල් තල්දූව කියනවා.

දේශපාලනයට සම්බන්ධ, ප්‍රසිද්ධ නළුවෙක්, ව්‍යාපාර කටයුතුවල නිරතව සිටින නිළියන් දෙදෙනෙක් වගේම , හිටපු ආණ්ඩුකාරවරයෙකුත්, මේ කාන්තාවගේ වංචාවට හසුවී ඇති බව අනාවරණය වූවත්, ඒ කිසි කෙනෙක් මෙතෙක් ඒ ගැන පැමිණිලි කරල නම් නෑ ...
මොනවා වුනත්, ඇය අත්අඩංගුවට ගැනීමෙන් පස්සේ , සමාජ මාධ්‍ය ජාල ඇතුලේ ,ඇගේ ව්‍යාපාරවල මුදල් ආයෝජනය කළ අයගේ යැයි කියන, පුද්ගල ලැයිස්තුවක් හුවමාරු වුනා. .

ඒ පුද්ගල ලැයිස්තුවේ ඉන්න අය පෙරේදා ඉඳන්, රහස් පොලිසියට ගිහින් පැමිණිලි කරන්න පටන් අරන්.. මොකද , තමන් ඇගේ ව්‍යාපාරවල මුදල් ආයෝජනය කෙරුවේ නෑමයි කියලා. ඒ විදියට ඊයේ වෙනකොට රහස් පොලිසියට ලැබී තිබුණු පැමිණිලි ගණන 06 ක්..

ඒ කතා මොනවා වුනත්, තිළිණිගේ වංචාවලට අහුවෙලා කියල,, රහස් පොලිසිය විසින් හඳුනාගෙන ඉන්න පිරිස් ඇවිත්,, පැමිණිලි කලොත් , වංචාවේ ප්‍රමාණය, රුපියල් කෝටි 500 පනියි කියලා , රහස් පොලිසිය කියනවා.

ඔය විදියට මෙතෙක් හෙළි නොවූ විශාල පිරිසක්, මේ කාන්තාවගේ වංචාවට හසුවී ඇති අය අතර ඉන්න පුළුවන් කියල තමයි, රහස් පොලිසිය කියන්නේ..

ඒ අය ප්‍රියමාලිට එරෙහිව පැමිණිලි කිරීමට මැලිකමක් දක්වනව ලු..

මොකද , ඒ අය ඇගේ ව්‍යාපාරවල ආයෝජනයට ලබාදී ඇති මුදල්, ඒ අය නීත්‍යනුකූලව උපයා ගත් හැටි හෙළි කරන්න, බැරි නිසා වෙන්න ඇති ලු..

"එයාල පැමිණිලි නොකර සිටීම නිසාම ඉදිරියේදී අමාරුවේ වැටෙන්න පුළුවන්. තිළිණි ප්‍රියමාලි එයාට මුදල් දුන්නු අයගේ විස්තර ඇතුලු බොහෝ දේවල්, එයාගේ ජංගම දුරකතනයෙයි, පරිගණකවලයි සටහන් තියාගෙන ඉඳල තියෙන බවයි අපිට දැනගන්න ලැබිල තියෙන්නේ.

ඇගේ ජංගම දුරකතන සහ පරිගණක, දැන් තියෙන්නේ අපේ ගාව. පරිගණ වෝහාරික පරීක්ෂණාගාරයට ඒවා යොමු කරල තියෙනවා. එම අංශයේ අය එම පරිගණකවල තියෙන සැඟවුණු දත්ත ඉදිරියේදී එළියට ගනීවි. එතකොට බලා ගන්න පුළුවන් ඇයට මුදල් දුන්නේ කවුද? මුදල් නොදුන්නේ කවුද? කියල. ඒ විතරක් නෙමෙයි, ඇගේ ව්‍යාපාර නම්වලින් සහ, ඇගේ පෞද්ගලික නම්වලින් ඇති , සියලු බැංකු ගිණුම් පවා, අපි මේ වන විට පරීක්ෂාවට ලක්කරමිනුයි ඉන්නේ. කාට කොහොම ඇය වියදම් කළාද කියල , අපිට එතකොට අනාවරණය කරගන්න පුළුවන් වේවි. පැමිණිලි නොදාපු අය එතකොට තමයි අමාරුවේ වැටෙන්නේ. ඒ නිසා තාමත් ඒ අය ප්‍රමාද නැහැ" කියලා කියන්නේ , පොලිසියේ ආරංචි මාර්ග කිව්වා.

- දේශපාලන වාර්තාකරු

මෙම සති අන්තයේ (15 -16) පැය 1යි මිනිත්තු 20 ක විදුලි කප්පාදුව අවසර දුන් බව මහජන උපයෝගීතා කොමිසම පවසයි .

එසේම එළැඹෙන සඳුදා (17) පෙර පරිදිම පැය දෙකයි මිනිත්තු 20 ක් විදුලිය කප්පාදු කරන බවත් මහජන උපයෝගිතා කොමිසමේ සඳහන් කරයි.

ඒ අනුව ‘ඒ’ සිට ‘ඩබ්ලිව්’ දක්වා කලාප 20 ට හෙට සහ අනිද්දා රාත්‍රී කාලයේ පැයයි මිනිත්තු 20 ක් විදුලිය කප්පාදු කරන බවත් ලබන සඳුදා (17) දහවල් කාලයේ පැයක ද, රාත්‍රී කාලයේ පැයයි විනාඩි 20 ක ද, විදුලි කප්පාදුවක් ක්‍රියාත්මක වන බව මහජන උපයෝගීතා කොමිසමේ සභාපති ජනක රත්නායක පවසයි .

ඉන්දියාවට 2003 වසරේ තෙල් ටැංකි ලබාදීමේ දී මතු වු විරෝධතා පිළිබඳව මෙහිදී සිහිපත් කළ ජනාධිපති රනිල් වික්‍රමසිංහ සදහන් කළේ, එදා එම තෙල් ටැංකි ලබාදීමට ගත් තීරණය මුළුමනින්ම ක්‍රියාත්මක කිරීමට අවස්ථාව ලබා දුන්නේ නම් රට ඉන්ධන අර්බුදයකට මුහුණ නොදෙන බව අවධාරණය කරයි .
ත්‍රිකුණාමලය දිස්ත්‍රික් සංවර්ධන සැලැස්මට අනුකූලව වරාය සංවර්ධනයේ දි සහ තෙල් ටැංකි සංකීර්ණය සංවර්ධනය කිරීමේ දී ඉන්දියාව සමග එක්ව කටයුතු කිරීමේ වැදගත්කම ද ජනාධිපතිවරයා පෙන්වා දුන්නේය.

ජනාධිපති රනිල් වික්‍රමසිංහ මේ බව සඳහන් කළේ ත්‍රිකුණාමල දිස්ත්‍රික් සංවර්ධන සැලැස්ම (Surbana Jurong plan) පිළිබඳ අද (14) ත්‍රිකුණාමල ඔර්ස් හිල් (Orr's Hill) එළිමහන් භූමියේ පැවති විශේෂ සාකච්ඡාවට එක් වෙමිනි.

ත්‍රිකුණාමල දිස්ත්‍රික් සංවර්ධන සැලැස්ම පිළිබඳ සාකච්ඡාවේ දී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය .

අපි මෙම ව්‍යාපෘතිය ක්‍රියාත්මක කරන්නේ ඊළග ඡන්දයට නොවේ, ඊළග පරම්පරාව වෙනුවෙන්. 2023 අපි 75 වන නිදහස් දින සංවත්සරය සමරනවා. තව අවුරුදු 25යි තිබෙන්නේ නිදහස ලබා වසර 100ක් සම්පූර්ණ වෙන්න. ඊට කලින් මේ වැඩකටයුතු කළ යුතුයි.

ඒ නිසා 2018-2050 සැලසුම් අපි 2020-2048 ලෙස අඩු කර ගමු. මේ නැගෙනහිර පළාතේ විශාල දියුණුවක් අපි ඒ කාලය තුළ ඇති කරන්න ඕන. මම කියන්නේ නැහැ ඊළග වසර 05 එය කළ හැකියි කියලා. අපි කියන්නේ එය ආරම්භ කළ යුතුයි කියලා. එතැනින් ඉදිරියට යා යුතුයි.

පොළොන්නරුව අගනුවරව පැවති කාලයේ ත්‍රිකුණාමල වරාය විශාල වරායක් ලෙස පැවතුණා. එදා අපිට ත්‍රිකුණාමලය වටේ පෙන්නුවා බෙංගාල බොක්ක සිතියම. බෙංගාල බොක්ක කලාපය තවම දියුණු වෙලා නැහැ. තව අවුරුදු 10-15 යයි එම දියුණුව ලබන්න. තායිලන්තයේ තිබෙන දියුණුව දැන් බටහිරට එන්න තිබෙනවා.

මියන්මාරයේ තවම එය ආරම්භ වෙලා නැහැ, බංගලාදේශයේ ආරම්භ වුණා විතරයි. ජාවා සුමාත්‍රාවල ඒ වැඩකටයුතු කරගෙන යනවා. ඊළග අවුරුදු 10-15 යනකොට තමයි ඒක වරායක් හැටියට වැදගත් වන්නේ. අපේ උත්සාහය ශ්‍රී ලංකාව වරාය කේන්ද්‍රයක් බවට පත් කිරීමයි.

ත්‍රිකුණාමල වරාය ගැඹුරු වරායක් බවට පත් කළයුතුයි. නැගෙනහිර පළාත නාවික කටයුතු සඳහා වැදගත් කාර්යභාරයක් සිදු කරනවා.

ත්‍රිකුණාමල වරාය ප්‍රමුඛ ක්‍රමෝපායික වරායක් බවට පත් කිරීමට අවශ්‍යයි. ඒ කියන්නේ අපේම නාවික යාත්‍රා මෙහෙයුම් කටයුතු සිදු කළ හැකි අයුරින් එය සංවර්ධනය කිරීමයි. ඒ වෙනකොට දැනට තිබෙනවාට වඩා නාවික යාත්‍රා අපේ නාවික හමුදාවට තියෙයි කියලා මම හිතනවා. අපි මේ කටයුතු සැළසුම් කරන විට ඉන්දියාව සමග එකට වැඩ කළයුතුයි. මන්ද ඉන්දියාව අපිට වඩාත් සමීපව පිහිටා තිබීම නිසා එය ඉතා වැදගත් වෙනවා.

දැනට ඉන්දියාව සමග වැඩසටහන් කිහිපයක් ගැන සාකච්ඡා කරමින් සිටිනවා. ඒ නිසා අපට තිබෙන්නේ මේ සාම්පූර් බලාගාරයේ වැඩකටයුතු ඉදිරියට කරන්න. මෙයට බාධා එල්ල වෙනව නම් කෙළින්ම ආණ්ඩුව යටතට අරගෙන ඒ වැඩකටයුතු කරන්න සිදු වෙයි.

ත්‍රිකුණාමල වරාය ගිවිසුමට අපි 2003 අත්සන් කළා. 2003 සිට තෙල් ටැංකි ලබාදීම ගැන වෘත්තීය සමිතිවල විශාල විරුද්ධත්වයක් තිබුණා. අපි එදා තෙල් ටැංකි ලබා දුන්නා නම් අද තෙලුත් තිබෙනවා, අපිට පෝළිංවල ඉන්න වෙන්නෙත් නැහැ, කෝළහාල කරන්න වෙන්නෙත් නැහැ. තෙල් නැති නිසයි මේ ප්‍රශ්න ඇති වුණේ. ඇයි තෙල් නැති වුණේ, රටේ ආර්ථිකය වැටුණත් තෙල් ටැංකිවල තෙල් තිබෙන්න තිබුණා. ඒත් තෙල් ටැංකි හිස්. ඒ නිසා අපේ වාහනවල තෙල් ටැංකිත් හිස්, අපි එදා මේක කළා නම් අද අපිට කිසිම ප්‍රශ්නයක් ඇති වෙන්නේ නැහැ.

එවැනි බාධකවලට නැවත ඉඩ දෙන්න බැහැ. මේ ප්‍රදේශයේ ජනතාව වෙනුවෙන් එය කළයුතුයි. මම මේ සැලැස්ම පාර්ලිමේන්තුවටත් ඉදිරිපත් කරනවා, පාර්ලිමේන්තුව එකඟ වුණාට පස්සේ එය නීතිගත කරනවා. මොකද ආණ්ඩු මාරු වෙන්න පුළුවන්, පාර්ලිමේන්තු මාරු වෙන්න පුළුවන්. ඒත් ප්‍රතිපත්ති මාරු වෙන්න බැහැ. මේ නිසා බාධක නැතිව අපි ඉදිරියට යන්නයි කටයුතු කළ යුත්තේ.

අපි ඉන්දියාව සමග පුනර්ජනනීය බලශක්තිය පිළිබඳව කටයුතු කරමින් සිටිනවා. එය ක්‍රියාත්මක වන්නේ ත්‍රිකුණාමලයේ, ඉන්දියාව සමග තිබෙන සබඳතා පදනම් කරගෙන ත්‍රිකුණාමලය බලශක්ති කේන්ද්‍රස්ථානයක් බවට පත්කරගත යුතුයි. පුනර්ජනනීය බලශක්තිය දියුණු කිරීමත් සමග එයට හරිත හයිට්‍රජන් සහ හරිත ඇමෝනියා වැනි අගය එකතු කිරීම් සිදු කළයුතුයි. ඉතින් අපට හරිත හයිට්‍රජන් අපනයනය කරන්න වරායක් අවශ්‍යයි. එහිදි මෙතන තිබෙන විභවය සැලකිල්ලට ගත යුතුයි.
උතුරු, උතුරු මැද හා නැගෙනහිර පළාත සැලකිල්ලට ගත්විට එහි කේන්ද්‍රීය වරාය විය යුත්තේ ත්‍රිකුණාමල වරාය. සමහරවිට ඉදිරියේ දී සිංගප්පූරුවටත් අපිට මාර්ගයක් හදාගන්න පුළුවන් වෙයි. ඒ තත්ත්වයට දියුණු කිරීමට විශාල ඉඩ ප්‍රස්ථාවක් තිබෙනවා. මේ පළාතේ ආර්ථික විභවය ඉතා විශාලයි. එය ඉලක්ක කරගෙන තමයි අපි මෙය දියුණු කළයුත්තේ.

ආර්ථික වශයෙන් මෙම වරාය නගරය ත්‍රිකුණාමල දිස්ත්‍රික්කයට සීමා කරන්න බැහැ. මෙය අනුරාධපුර, වව්නියාව, දඹුල්ල නගර සමග සම්බන්ධ විය යුතුයි. වන්නි, නැගෙනහිර, උතුරු මැද තමයි රටේ ආහාර විශාල ප්‍රමාණයක් නිෂ්පාදනය කරන්නේ. ආහාර නිෂ්පාදන අපනයනය කරවා නම් මෙතනින් තමයි එය සිදු කළ යුත්තේ.

අද අපි පිටි අපනයනය කරනවා. අපි තිරිගු වවන්නේ නැහැ, ඒ වුණාට අපි අපනයනය කරනවා. එය කරන්නේ ප්‍රිමා ආයතනය. අපේ ප්‍රධාන අපනයන ද්‍රව්‍යයක් තමයි තිරිගු පිටි. අපි එය පිටින් අරගෙන අපනයනය කරනවා. ඒ වගේ වෙනත් ද්‍රව්‍යයත් එලෙස අපනයනය කළ හැකියි. අපි ඒ පිළිබඳ සලකා බලමු.
මේ පළාතේ කර්මාන්ත දියුණු කිරීමට ඉන්දියාව සමග එකඟව තිබෙනවා. ඒ අනුව කර්මාන්ත කලාපයකුත් ඇති කළ යුතුයි. මම යෝජනා කර තිබෙන්නේ ඒ කටයුතු ලංකාව සහ ඉන්දියාව ඒකාබද්ධව සිදු කිරීමට. එතකොට වරායටත් ඊට සම්බන්ධයක් තිබෙනවා. ඒ පිළිබඳ ඒකාබද්ධ කණ්ඩායමක් පත් කිරීමට සැලසුම් කරනවා.

ඔවුන්ගේ අදහස් ලබා ගැනීමට පෙර අපි ආර්ථික පැත්ත ගැන සැලකිල්ලට ගත යුතුයි. ආර්ථික පැත්තෙන් බලන විට අපිට තිබෙනවා සංචාරක කර්මාන්තය. විශේෂයෙන් අනුරාධපුර, පොළොන්නරුව, දඹුල්ල සංස්කෘතික ත්‍රිකෝණය තිබෙනවා. ඒ නිසා පැමි‍‍ණෙන සංචාරකයින් ප්‍රමාණය වැඩි වෙනවා.

ත්‍රිකුණාමල ගුවන් තොටුපොළ තිබුණත් එහි විශාල අහස් යානා ගොඩ බැස්සවිය නොහැකි. ඒ නිසා හිඟුරක්ගොඩ හෝ වව්නියාව ජාත්‍යන්තර ගුවන් තොටුපොළක් බවට පත් කරන්න සිදු වෙනවා. ත්‍රිකුණාමලයේ සිට මඩකලපුව දක්වා සංචාරක කර්මාන්තය දියුණු කරන්න ඉඩ ප්‍රස්ථාවක් තිබෙනවා.

නැගෙනහිර පළාත දියුණු කිරීමට අපි සම්පූර්ණ සැලැස්මක් ඇති කළ යුතුයි. එමෙන්ම උතුරු පළාත දියුණු කිරීමට වැඩපිළිවෙළක් තිබෙනවා. උතුරයි, නැගෙනහිරයි මැද තිබෙන්නේ ත්‍රිකුණාමලය. ඒ වගේම උතුරු මැද ගත් විට අනුරාධපුර සහ පොළොන්නරුව දිස්ත්‍රික්කවල විශාල කොටසක් අයිති වෙන්නේ මේ පළාතට. මෙම ඒකාබද්ධ වැඩසටහන වසර 05 කින් සිදු කළ නොහැකියි. අවුරුදු 20 – 25 කින් කරන්න පුළුවන්. මහවැලි සංවර්ධන ව්‍යාපෘතිය නිම කරන්න අවුරුදු 10ක් ගත වුණා. මෙම මූලික වැඩ කටයුතු ගැන සාකච්ඡා කරලා ඒ පිළිබඳ, කැබිනට් මණ්ඩලය දැණුවත් කර ඊට පසුව ඉදිරි කටයුතු කිරීමට අපි බලාපොරොත්තු වෙනවා.

ආනයනික තිරිඟු පිටි තොග මිල රුපියල් 85 කින් අඩු කරන බව අත්‍යවශ්‍ය ද්‍රව්‍ය ආනයනකරුවෝ පවසති.

ආනයනික තිරිඟු පිටි කිලෝවක වර්තමාන තොග මිල රුපියල් 375 ක් වන අතර එය රුපියල් 290 ක් දක්වා පහත දමන බවත් එම මිල පහත දැමීම අද (14) මධ්‍යම රාත්‍රීයේ සිට ක්‍රියාත්මක වන බවත් අත්‍යවශ්‍ය ද්‍රව්‍ය ආනයනකරුවෝ සඳහන් කළහ.

ශ්‍රී ලංකාවේ තිරිඟු පිටි ප්‍රධානම ආනයනකරුවන් වන ප්‍රීමා සහ සෙරන්ඩිබ් යන සමාගම් මේ දක්වා පිටි මිල අඩු කරන බවට නිවේදනය කරනොමැත.

මෙරට ජනතාවගේ ඖෂධ අවශ්‍යතාවය සහ එය සපුරාලීමට අත්‍යවශ්‍ය ඖෂධ මොනවාද යන්න හඳුනා ගැනීම සඳහා ඉහළ පෙළේ තාක්ෂණික කමිටුවක් නැවත ස්ථාපනය කිරීම කෙරෙහි ආර්ථික ස්ථායීකරණයට අදාළ කෙටි සහ මධ්‍යකාලීන වැඩසටහන් හඳුනා ගැනීම සඳහා වන ජාතික සභා අනු කමිටුවේ අවධානය යොමුව ඇත .

මෙරටට ආනයනය කරනු ලබන ඖෂධ වර්ග වැඩි සංඛ්‍යාවක් මෙරට ජනතාවගේ භාවිතයට අත්‍යවශ්‍ය ඒ්වා නොවන බවත් එහිදී අනාවරණය වී ඇත .

ආර්ථික ස්ථායීකරණයට අදාළ කෙටි සහ මධ්‍යකාලීන වැඩසටහන් හඳුනා ගැනීම සඳහා වන ජාතික සභා අනු කමිටුව එහි සභාපති පාර්ලිමේන්තු මන්ත්‍රී පාඨලී චම්පික රණවකගේ ප්‍රධානත්වයෙන් අද (14) රැස් වූ අවස්ථාවේ දී මෙම කරුණු සාකච්ඡා විය.

එක් ඖෂධ වර්ගයක් සඳහා සන්නාම විශාල ප්‍රමාණයකින් ඖෂධ ආනයනය කිරීම නිසා ඒ් පිළිබඳ නිසි නියාමනයක් සිදු නොවීම විශාල ගැටළුවක් බවට පත්ව ඇති බව ද එහිදී සාකච්ඡා කෙරිණි.

විශේෂඥ වෛද්‍යවරු,සෞඛ්‍ය අමාත්‍යාංශය ඇතුළු අදාළ අමාත්‍යාංශ සහ රාජ්‍ය ආයතනවල නිලධාරීහු මෙන්ම මුදල් අමාත්‍යාංශයේ නිලධාරීහුද මෙම අවස්ථාවට එක්ව සිටියහ.