පුවත්

රාජ්‍ය පරිපාලන, ස්වදේශ කටයුතු, අධිකරණ පළාත් සභා, පළාත් පාලන සහ කම්කරු අමාත්‍යාංශයේ ලේකම් ප්‍රදීප් යසරත්න එම තනතුරින් අද දින (30) විශ්‍රම ගොස් ඇත.

ප්‍රදීප් යසරත්න එම අමාත්‍යාංශයේ ලේකම්වරයා ලෙස පසුගියදා පත් කරනු ලැබුවේ වත්මන් ජනපති අනුර කුමාර දිසානායක විසිනි.

ඔහු කොළඹ දිස්ත්‍රික් ලේකම්වරයා ලෙසද, බස්නාහිර පළාත් ලේකම්වරයා ලෙසද මීට පෙර කටයුතු කර ඇත.

අද දින විශ්‍රාම ගියද ඔහුට විශ්‍රාම යාමට නියමිතව ඇත්තේ දෙසැම්බර් 03 වැනි දින බව වැඩිදුරටත් වාර්තා වෙයි.

අද (30) මධ්‍යම රාත්‍රියේ සිට ඉන්ධන මිල ගණන් සංශෝධනය කිරීමට ඛනිජ තෙල් නීතිගත සංස්ථාව තීරණය කර තිබේ.

නව සංශෝධනය අනුව ඔක්ටේන් 92 පෙට්‍රල් ලීටරයක් රු.21 කින් පහළ දමා තිබේ.

ඒ අනුව එහි නව මිල රුපියල් 311කි.

රුපියල් 307 පැවති සුදු ඩීසල් ලීටරයක මිල රුපියල් 24 පහළ දමා ඇති අතර ඒ අනුව සුදු ඩීසල් ලීටරයක නව මිල රු. 283 ලෙස සටහන් වනු ඇත.

ලංකා සුපිිරි ඩීසල් ලීටරයක මිල රුපියල් 33කින් පහළ දමා ඇති අතර එහි නව මිල රුපියල් 319කි.

රුපියල් 202 පැවති භූමිතෙල් මිල රුපියල් 19 කින් පහළ දමා ඇති අතර එහි නව මිල වනුයේ රුපියල් 183කි.

ජනාධිපතිවරණයේදී පක්ෂය පාවාදුන් කිසිවෙකුට ඉදිරි මහ මැතිවරණයට ඉදිරිපත් වීම සඳහා ශ්‍රී ලංකා පොදුජන පෙරමුණෙන් නාමයෝජනා ලබානොදෙන බව එම පක්ෂය පවසයි.

එහි මහ ලේකම්, හිටපු පාර්ලිමේන්තු මන්ත්‍රී සාගර කාරියවසම් අද (30) කොළඹ දී කැඳවා තිබූ ප්‍රවෘත්ති සාකච්ඡාවකදී මේ බව කියා සිටියේය.

"අපේ පක්ෂය පාවා දීපු කොටසක් ඉන්නවා. ඒ කොටසට දේශපාලන වශයෙන් පත්වෙලා තියෙන තත්ත්වය ගැන මම කතා කරන්න කැමති නැහැ. පක්ෂය පාවාදුන් කිසිම කෙනෙක් නැවත පක්ෂයේ ඉහළ නිලතල ලබාදීමක් හෝ නාමයෝජනා ලබාදීමක් කරන්නේ නැහැ. කිසිම ආකාරයකින් පක්ෂය පාවා දීලා ගිය අයව නම් අපි මේ පක්ෂයට ගන්නේ නැහැ. පක්ෂය තීන්දුවක් ගත්තා. ඉදිරි මහ මැතිවරණයට ලංකාවේ තියෙන සියලුම දිස්ත්‍රික්ක සඳහා පොහොට්ටුව ලකුණ යටතේ තරග කරනවා."

වයස අවුරදු 12ට අඩු ළමුන්ට හෙට (01) දිවයිනේ සියලු සත්වෝද්‍යාන නොමිලේ නැරඹීමට අවස්ථාව හිමි වේ.

හෙටට යෙදෙන ලෝක ළමා දිනය නිමිත්තෙන් එම තීරණය ගෙන ඇති බව සත්වෝද්‍යාන දෙපාර්තමේන්තුවේ මෙහෙයුම් අධ්‍යක්ෂ අනෝමා ප්‍රියදර්ශනී  සදහන් කළා ය.

ඒ අනුව, දෙහිවල සත්වෝද්‍යානය, පින්නවල අලි සුරැකුම් මධ්‍යස්ථානය, පින්නවල සත්වෝද්‍යානය සහ හම්බන්තොට රීදිගම සෆාරී උද්‍යානය නොමිලේ නැරඹීමට ළමුන්ට අවස්ථාව උදා වේ.

5 ශ්‍රේණිය ශිෂ්‍යත්ව විභාගය යළි නොපවත්වා ගැටලුකාරී ප්‍රශ්න තුනටම සියලු දරුවන්ට ලකුණු ලබාදීමට අධ්‍යාපන අමාත්‍යාංශය තීරණය කර තිබේ.

ඒ, ශිෂ්‍යත්ව විභාගයේ ගැටලුකාරී ප්‍රශ්න විමර්ශනයට පත් කළ විද්වත් කමිටුවේ නිර්දේශ අනුවයි.

විභාගයට පෙර සාකච්ඡා වූ බවට හඳුනාගෙන ඇති ප්‍රශ්න තුන සඳහා විභාගයට පෙනීසිටි සියලුම දරුවන්ට ලකුණු ලබාදීම සුදුසු බව එම කමිටුව නිර්දේශ කර ඇත.

එමෙන්ම ඔවුන් පෙන්වා දී ඇත්තේ විභාගය නැවත පැවැත්වීම ගුරුවරුන්ටත්, මව්පියන්ටත්, පාසල් පද්ධතියටත් දැඩි පීඩාවක් ගෙන දෙන බවය.

ඒ අනුව විද්වත් කමිටුවේ නිර්දේශ අනුව කටයුතු කිරීමට අධ්‍යාපන අමාත්‍යාංශය තීරණය කර තිබේ.

එම අමාත්‍යාංශය නිකුත් කළ නිවේදනයේ දැක්වෙන්නේ කඩිනමින් ප්‍රශ්න පත්‍ර ඇගයීම් අප්‍රමාදව ප්‍රතිඵල නිකුත් කිරීමට කටයුතු කරන බවය.

අදාළ සම්පූර්ණ නිවේදනය පහතින්,

ශ්‍රී ලංකා ක්‍රිකට් කණ්ඩායමේ තාවකාලික ප්‍රධාන පුහුණුකරු ලෙස කටයුතු කරන සනත් ජයසූරියගේ ධූර කාලය තවත් වසරකින් දීර්ඝ කර තිබෙයි.

සනත් ජයසූරියව ශ්‍රී ලංකා ක්‍රිකට් කණ්ඩායමේ ප්‍රධාන පුහුණුකරු ලෙස පසුගියදා පත් කෙරුණේ ඉන්දියාව සහ එංගලන්තය සමඟ පැවැත්වුණු ක්‍රිකට් තරගාවලි සඳහාය.

ශ්‍රී ලංකා ක්‍රිකට් කණ්ඩායමේ ප්‍රධාන පුහුණුකරු ලෙස කටයුතු කළ ක්‍රිස් සිල්වර්වුඩ් ගේ කොන්ත්‍රාත් කාලය අවසන් වීමෙන් පසුවයි සනත් ජයසූරිය ප්‍රධාන පුහුණුකරු ලෙස තාවකාලිකව පත් කෙරුණි.

රාජ්‍ය ආයතනවලට අයත් වාහනවලට රාජ්‍ය ලාංඡනය යොදා එම අමාත්‍යාංශයේ, දෙපාර්තමේන්තුවේ හෝ ආයතනයේ නම යෙදවීමට අදාළ චක්‍රලේඛය යළි බලාත්මක කිරීමට රජය අවධානය යොමුකර තිබේ.

මේ සම්බන්ධයෙන් එවැනි අවධානයක් යොමුකර ඇත්තේ වාහන අවභාවිතය වැළැක්වීම සඳහා ය.

වාහනවලට රාජ්‍ය ලාංඡනය සහ අදාළ රාජ්‍ය ආයතනයේ නම යෙදීමේ චක්‍රලේඛය රාජ්‍ය පරිපාලන, කළමනාකරණ සහ ප්‍රතිසංස්කරණ අමාත්‍යාංශය නිකුත් කර ඇත්තේ 2002 වසරේදී ය.

එම චක්‍රලේඛය නිකුත්කර ඇත්තේ රාජ්‍ය ලාංඡන යෙදීම සම්බන්ධයෙන් 1992 වසරේ නිකුත් කර තිබූ චක්‍රලේඛය සංශෝධනය කරමිනි.

1992 වසරේ චක්‍රලේඛයෙන් උපදෙස් දී තිබී ඇත්තේ වාහන වලට රාජ්‍ය ලංඡනය යෙදීම සම්බන්ධයෙන් පමණි.

එම උපදෙස් ද නිසි ලෙස අනුගමනය කර නොමැති බව පෙනී ගොස් තිබෙන බව 2002 වසරේ නිකුත්කර තිබෙන චක්‍රලේඛයේ සඳහන් වෙයි.

සංශෝධිත චක්‍රලේඛයෙන් උපදෙස් දී ඇත්තේ රාජ්‍ය ලාංඡනයට අමතරව අමාත්‍යාංශයේ, දෙපාර්තමේන්තුවේ හෝ ආයතනයේ නම ද සටහන් කරන ලෙස ය.

දිවයිනේ බොහෝ ප්‍රදේශවල සවස් කාලයේදී හෝ රාත්‍රී කාලයේදී වැසි හෝ ගිගුරුම් සහිත වැසි ඇතිවන බව කාලගුණ විද්‍යා දෙපාර්තුමේන්තුව නිවේදනය කරයි.

මධ්‍යම, සබරගමුව, දකුණු සහ වයඹ පළාත්වලත් කළුතර දිස්ත්‍රික්කයේත් ඇතැම් ස්ථානවලට මි.මී. 100 පමණ තද වැසිද ඇති විය හැක.

දකුණු පළාතේත් මඩකළපුව සහ අම්පාර දිස්ත්‍රික්කවලත් උදෑසන කාලයේදීත් වැසි ඇති විය හැක.

ගිගුරුම් සහිත වැසි සමග ඇතිවිය හැකි තාවකාලික තද සුළංවලින් සහ අකුණු මඟින් සිදු වන අනතුරු අවම කර ගැනීමට අවශ්‍ය පියවර ගන්නා ලෙස ජනතාවගෙන් කාරුණිකව ඉල්ලා සිටිනු ලැබේ.

බලයට පත් ආණ්ඩුවට සහයෝගයක් වශයෙන් අද දින සිට (28) සියළුම සහල් පාලන මිලට ලබා දීමට කටයුතු කරන බව අරලිය සහල් අධිපති ඩඩ්ලි සිරිසේන පවසයි.

පොළොන්නරුවේදී අද (28)  පෙරවරුවේ මාධ්‍ය සාකච්ඡාවකට එක් වෙමින් ඔහු මේ පිළිබද පැවසීය.

එහිදී අදහස් දැක්වූ ඩඩ්ල් සිරිසේන,

වත්මන් බලයට පත්ව ඇති අනුර කුමාර දිසානායක ජනාධිපතිවරයාගේ වැඩපිළිවෙලට තමා සහයෝගය දක්වන බවත්, ලබන ජනවාරි දක්වා පාලන මිලට සහල් ලබාදීමෙන් පාරිභෝගික ජනතාවත්, ගොවියත් රැක ගැනීමේ වැඩපිළිවෙළට තමාද සහයෝගය දක්වන බවත්ය.

තවද, සම්බා, නාඩු, කීරි සම්බා වගා කිරීමේ වාසි අවාසි සහ ගොවීන්ට කුඹුරෙහි විවිධ වී වර්ග වගා කිරීමට රජය වැඩපිළිවෙලක් සකස් කළ යුතු බව ද ඔහු මෙහිදී පැවසීය.

මෙහිදී අදහස් දැක්වූ නිපුණ සහල් ව්‍යාපාරයේ අධිපති,

''නිව් රත්න අධිපතිතුමා සමගත් මං සාකච්ඡා කළා. ඔවුන් එකඟතාවයක් පත් කළා. සමස්ත වෙළෙඳ ප්‍රජාවගෙන්ම මම ඉල්ලා සිටින්නේ අද සිට රජයේ පාලන මිලට සහල් විකුණන්න පුළුවන් විදියට අපේ සහල් ටික අපි නිකුත් කරන්නම්. ජනවාරි 20 වෙනකම් පමණක් මේ විදියට අපි සහයෝගයක් දෙමු."

"මේ දිනය දා ගත්තේ... නව අස්වැන්න වෙළෙඳපොළට පැමිණෙනවා. මාස් කන්නයේ වී සඳහා නව මිලක්, සහල් සඳහා නව මිලක් අපිට අවශ්‍යයි. ඒකයි."

රැකියාවට පමණක් නොව ගුණ ගරුක සමාජයක් බිහි කිරීමට හැකි වන පරිදි අධ්‍යාපන පද්ධතිය ප්‍රතිසංස්කරණ සිදු කළ යුතු බවත්, දේශපාලනීයකරණය වී ඇති අධ්‍යාපන පද්ධතිය ඉන් මුදවා ගත යුතු බවත් අධ්‍යාපනය පිළිබඳව විශ්වාසය ගොඩනැගීම ජාතික ජන බලවේග රජයේ ප්‍රමුඛ වගකීමක් බවත් අගමැති, අධ්‍යාපන ඇමති ආචාර්ය හරිනි අමරසූරිය අවධාරණය කරයි.

එමෙන්ම පවුලේ ආර්ථික මට්ටම දරුවන්ට ගුණාත්මක අධ්‍යාපනයක් ලැබීමට බාධාවක් නොවිය යුතු බවත් ජාතික ජන බලවේගයේ ප්‍රතිපත්තියේ සඳහන් වී ඇත්තේ අධ්‍යාපනය සදහා දළ ජාතික නිෂ්පාදනයෙන් 6%ක් වෙන් විය යුතුයි යන පදනම බවත් ඇය සඳහන් කරයි.

අගමැති, අධ්‍යාපන ඇමති ආචාර්ය හරිනි අමරසූරිය මේ බව අවධාරණය කළේ දිවයින පුරා පිහිටි ජාතික පාසල් 396හි විදුහල්පතිවරුන්ගේ සහභාගීත්වයෙන් අද (28) කොළඹ ආනන්ද විද්‍යාලයේදී පැවති විශේෂ වැඩමුළුවකදීය.

මෙම වැඩමුළුව පවත්වා ඇත්තේ වසර 05කට පසුවය.

මෙම වැඩමුළුවේදී පාසල් මූල්‍ය කළමණාකරණය, ජාතික පාසල්හි ඉදිකිරීම් හා අලුත්වැඩියා කටයුතු, ජාතික පාසල් අධීක්ෂණය කිරීමේදී හඳුනාගත් පොදු කරුණු ඇතුළත්ව ජාතික පාසල් ශාඛාව විසින් සිදු කරන දැනුවත් කිරීම් සිදු කර ඇත.

මෙම අවස්ථාව සඳහා ප්‍රධාන ආරාධිතයා ලෙස සහභාගී වූ අගමැති, අධ්‍යාපන ඇමති ආචාර්ය හරිනි අමරසූරිය වැඩිදුරටත් සඳහන් කර සිටියේ.

“පුනරුද යුගයක – පොහොසත් රටක් තුළ අපි සියලුදෙනාටම ලස්සන ජීවිත ලබා ගැනීමට, මෙම දැක්ම යථාර්තයක් බවට පත් කර ගැනීමට අධ්‍යාපනයේ ඇති වටිනාකම මෙම විදුහල්පතිවරුන් හොඳින් දන්නා දෙයක්. රජයක් ලෙස අධ්‍යාපනය වෙනුවෙන් දැක්විය යුතු සියලු සහයෝගයන්, මගපෙන්වීම් ලබා දීමට අප සූදානම්. අධ්‍යාපනය යනුවෙන් අපි බලාපොරොත්තු වෙන්නේ දැනුම පමණක් ලබා දීම නොවෙයි. ඉන් එහාට ගිය විශාල දැක්මක් අධ්‍යාපනය තුළ තිබෙනවා. රැකියාවක් කිරීමට පමණක් අධ්‍යාපනය ලබා නොදී ගුණගරුක සමාජයක් බිහි කිරීමට මෙන්ම මේ රට භාරගත හැකි, මේ රට වෙනස් කළ හැකි මේ රට හදන්න නායකත්වය දිය හැකි පුරවැසියන් බිහි විය යුතුයි කියන විශ්වාසය සමග අපි අපේ අධ්‍යාපන ප්‍රතිපත්තිය සකස් කර තිබෙනවා.

පොහොසත් රටක් යනුවෙන් අපේ රජය හඳුන්වා දෙන්නේ ආර්ථික මට්ටමින් පොහොසත් වීම පමණක් නොවෙයි. සංස්කෘතික, සාරධර්ම, ආකල්ප සමග සෑම අතින්ම අපි පොහොසත් විය යුතුයි. එවැනි සමාජ තුළ අප සැමට ලස්සන ජීවිත ගත කරන් පුලුවන්. අපි පුනරුද යුගයක් යනුවෙන් අදහස් කරන්නේ අලුත් ආරම්භයක් මේ රටට අවශ්‍යයි කියන එක. සාමූහිකත්වය, සහකම්පනය සහ නූතන ලෝකය තුළ අභිමානවත්ව ඉදිරියට යා හැකි පුරවැසියන් අපි බිහිකළ යුතුයි. අපි යෝජනා කරන අධ්‍යාපන ප්‍රතිපත්තිය ඉලක්ක කර ගන්නේ මෙම අභිලාෂයන් ලගා කර ගැනීමටයි.

මේ වන විට සමාජය තුළ අධ්‍යාපනය පිළිබඳව විශ්වාසයක් නැහැ. අධ්‍යාපනය පිළිබඳව විශ්වාසය ගොඩ නැගීම අතිශයින්ම වැදගත්. කළකිරීමකින් සිටින ස්වභාවයක් තමයි දකින්න තිබෙන්නේ. පවතින අධ්‍යාපන ක්‍රමය තුළ දරුවන්, දෙමාපියන්, සමාජය සෑහීමකට පත් වනවාද, මේ සියල්ල ප්‍රශ්න බවට පත් වී තිබෙනවා. විභාගයක් නියමිත පරිදි පවත්වාගෙන යා හැකිද? විභාග ප්‍රථිපල පිළිබඳ විශ්වාසයක් ඇති කර ගත හැකිද? අධ්‍යාන ක්ෂේත්‍රයේ පත්වීම් හා ස්ථාන මාරුවීම් පිළිබඳව විශ්වාසය තබා ගත හැකිද? දරුවන් පාසලට ඇතුලත් කර ගැනීම සම්බන්ධව ඇති ක්‍රමවේදය සමාජයට විශ්වාසය තැබිය හැකිද? ක්‍රියාවලිය හා පද්ධතිය පිළිබඳව විශ්වාසයක් නැති වන අන්දමට දුර්වල කර තිබෙනවා. දේශපාලනීයකරණය වී තිබෙනවා.

මෙතනදී අධ්‍යාපන පද්ධතිය තුළ සේවය කරන ඔබ තුළ නොවේ එම වැරැද්ද තිබෙන්නේ. කාලයක් පුරා අධ්‍යාපනයට ලබා දී තිබෙන අඩු සැලකිල්ල, අධ්‍යාපනයේ වැදගත්කම, අධ්‍යාපනය රටක සංවර්ධනයේ මූලික තැනක් ගත යුතුයි කියන වගකීම තුළින් ක්‍රමානුකූලව රජය ඈත් වීම නිසා මෙම අර්බුදය නිර්මාණය වී තිබෙනවා. අධ්‍යාපනය දේශපාලනීයකරණය වී ඇති නිසා මෙම ක්ෂේත්‍රයේ සියලුම දෙනා පීඩාවට පත්ව ඇති බව අප දන්නවා. අපිට අවශ්‍යයි ඔබේ වෘත්තීමය ගෞරවය රැකෙන ආකාරයේ අධ්‍යාපන පද්ධතියක් ගොඩ නැගීමට. ඔබේ කාර්‍යභාරය ස්වාධීනව ඉටු කිරීමට අවශ්‍ය පරිසරය නිර්මාණය කර දීම අපේ අරමුණයි.

සෑම ආණ්ඩුවක්ම අධ්‍යාපන ප්‍රතිසංස්කරණ ගැන කතා කළා. එම ප්‍රතිසංස්කරණ ක්‍රියාවට නැංවීම තුළින්ම අධ්‍යාපන පද්ධතිය විශාල ව්‍යාකූලත්වයකට පත් වෙලා තිබෙනවා. අධ්‍යාපන පද්ධතිය බිද වැටීමට තවත් කාරණයක් වන්නේ එක් තැනකින් නියාමනය නොවීමයි. අධ්‍යාපන අමාත්‍යාංශය එකක් කියනවා. අධ්‍යාපන කොමිෂම තව එකක් කියනවා. ඇතැම් විට ජනාධිපති කාර්යාලයෙන් තවත් දේවල් කියනවා. මොන ප්‍රතිපත්තියද ප්‍රමුඛ විය යුත්තේ, මොන ප්‍රතිපත්තියද ක්‍රියාත්මක කළ යුත්තේ යන අපහැදිලිතාවය පහුගිය වසර ගණනාව තුළම තිබුණා. අපිට අවශ්‍යයි එම අපහැදිලිතාවයෙන් තොර අපි සියලුදෙනාට එකග වෙන්න පුලුවන්, සාමූහිකව ක්‍රියාත්මක කළ හැකි ප්‍රතිපත්තියක් ක්‍රියාත්මක කරන්න.

අපේ දේශපාලන ව්‍යාපාරය සාකච්ඡාවලට විවෘතයි, ඔබේ අදහස් වලට විවෘතයි. අපිට අවශ්‍යයි මේ රටේ තිබෙන අර්බුද සදහා කඩිනම් විසඳුම් සොයන ගමන් හොඳම අධ්‍යාපන ප්‍රතිපත්තියක් ක්‍රියාත්මක කිරීමටයි. නැවත මේ රට අර්බුදයකට නොයා ලෝකය තුළ පිළිගත් රටක් බවට පත් කිරීමට හැකි වන අධ්‍යාපන ක්‍රමයක් අපි සකස් කිරීමට කටයුතු කළ යුතුයි. අධ්‍යාපන ක්‍රමය තුළින් තමයි රටට අවශ්‍ය වටිනා පුරවැසියන් බිහි වෙන්නේ. රජයක් ලෙස අපි විශාල අවධානයක් අධ්‍යාපනය වෙත යොමු කරනවා. සංකල්පයක් පමණක් නොව ඒ සඳහා අවශ්‍ය මූල්‍යමය දායකත්වය අපේ රජයෙන් ලබා දෙනවා. ඒ සඳහා අපි බැදී සිටිනවා. අපේ ප්‍රතිපත්තියේම සඳහන් වී තිබෙන්නේ අධ්‍යාපනය සඳහා දළ ජාතික නිෂ්පාදනයෙන් 6% ක් වෙන් විය යුතුයි කියන පදනමයි. බිඳවැටුණු ආර්ථික අර්බුදය තුළ එකවර මෙය ක්‍රියාවට නැන්වීමට අපහසු වුවද ක්‍රමාණුකූලව අපි ඒ ඉලක්කය වෙත යනවා. අපේ අය වැය තුළ අධ්‍යාපනය සදහා විශේෂ අවධානයක් ලබා දෙනවා.

පවුලේ ආර්ථික මට්ටම දරුවන්ට ගුණාත්මක අධ්‍යාපනයක් ලැබීමට බාධාවක් නොවිය යුතුයි. දෙමාපියන්ට දරුවන්ගේ අධ්‍යාපනය වෙනුවෙන් වියදම් කරන්න තිබෙන මුදල එන්න එන්නම වැඩි වෙලා තිබෙනවා. නිදහස් අධ්‍යාපනය ඇති රටක මෙය කිසිසේත්ම පිළිගත හැකි දෙයක් නොවෙයි. නිදහස් අධ්‍යාපනය තිබුනද දෙමාපියන්ගේ ආදායමෙන් විශාල මුදලක් අධ්‍යාපනය වෙනුවෙන් වැය කිරීමට සිදුවී තිබෙනවා. අපි නිදහස් අධ්‍යාපනය තුළින් බලාපොරොත්තු වූ ප්‍රධානම දේ සිදු වන්නේ නැහැ. එනම් තමන්ගේ ආදායම දරුවන්ගේ අධ්‍යාපනයට සාධකයක් නොවිය යුතුයි කියන දේ ගිලිහී ගිහින්. නිදහස් අධ්‍යාපනය තුළින් මේ රටේ දහස් ගණන් බුද්ධිමතුන් බිහි වූවා. බොහෝ පිරිසකට ලෝකයේ ඉහළම තැන් සඳහා යාමට හැකි වූවා. නමුත් නැවත වතාවත් මුදල්, ගුණාත්මක අධ්‍යාපනයක් ලබා ගන්න සාධකයක් බවට පත් වී තිබෙනවා. එබැවින් අපි පාසල් අතර අසමානතා වෙනස් කළ යුතුයි. දරුවන්ගේ අධ්‍යාපනය සඳහා වැය වන අධික මුදල් බරින් දෙමාපියන් නිදහස් කළ යුතුයි. දරුවා අධ්‍යාපනය සඳහා පාසලට භාර දුන් පසු දෙමාපියන් මැදිහත්වීම අවම කල යුතුයි. ඔවුන් නිදහස් කළ යුතුයි. මෙම ඉලක්ක වෙත යාමට දායක වන අධ්‍යාපන පරිපාලනය, විදුහල්පතිවරුන්, ගුරුවරුන් වෙත ලැබිය යුතු පහසුකම් හා අවශ්‍ය පුහුණුව ලබා දීමට විශේෂ අවධානයක් ලබා දෙනවා. ලෝකයේ හොඳම අධ්‍යාපන ව්‍යුහය මෙහි හඳුන්වා දුන්නද එය ක්‍රියාත්මක විය යුත්තේ ඔබ හරහා. එය ඉටු කිරීමට නොහැකි බාධක ඉවත් කිරීම අපේ ප්‍රමුඛ අරමුණක්. මෙය සාමූහික ගමනක්. එක් පක්ෂයක්, එක් ආණ්ඩුවක් තනියම කළ හැකි දෙයක් නොවෙයි. ඒ සඳහා මම ඔබ සැමගේම සහයෝගය අපේක්ෂා කරනවා.”

මෙම අවස්ථාවට අධ්‍යාපන, විද්‍යා හා තාක්ෂණ අමාත්‍යාංශයේ ජේ.එම්. ලේකම් තිලකා ජයසුන්දර, ජාතික පාසල් අධ්‍යක්ෂ හසිනි තලගල ඇතුළු අධ්‍යාපන අමාත්‍යාංශයේ ජ්‍යේෂ්ඨ නිළධාරීන් පිරිසක් සහභාගී වී තිබේ.

ජනාධිපති නිතීඥ අනුර මැද්දෙගොඩ  ශ්‍රී ලංකා නීතිඥ සංගමයේ නව සභාපති ලෙස තේරී පත්වී තිබේ.

මීට පෙර එම ධුරය දැරූ ජනාධිපති නීතිඥ කෞෂල්‍ය නවරත්න  ධුරයෙන් ඉවත් වීමෙන් පසුව එම ධුරය හිස්ව පැවතුණි.

මේ අතර ශ්‍රී ලංකා නීතිඥ සංගමයේ නියෝජ්‍ය සභාපති ලෙස ජනාධිපති නීතිඥ රාසික් සාරූක්  පත්වී ඇත.

2023/2024 තක්සේරු වර්ෂයට අදාළ සියලුම ආදායම් බදු මුදල් ලබන සඳුදාට හෝ ඊට පෙර ගෙවා අවසන් කළ යුතුව ඇතැයි දේශීය ආදායම් දෙපාර්තමේන්තුව පවසයි.

දේශීය ආදායම් කොමසාරිස් ජනරාල් සේපාලිකා චන්ද්‍රසේකර  සඳහන් කළේ, යම් තැනැත්තෙක් නොගෙවන හෝ ප්‍රමාද වී ගෙවන ආදායම් බදු වෙනුවෙන් නීති ප්‍රකාරව දණ්ඩනයකට සහ පොලියකට යටත්වනු ඇති බවයි.

එමෙන්ම ඕනෑම බදු වර්ගයක් සඳහා යම් තැනැත්තෙකු විසින් ගෙවිය යුතු බදු මුදල් නොගෙවා සිටීමෙන් ඇතිවූ හිඟ බදු පවතී නම් ඒ සියල්ලම ලබන සඳුදාට හෝ එදිනට පෙර ගෙවා අවසන් කළ යුතු බව ඇය පැවසුවාය.

දේශීය ආදායම් කොමසාරිස් ජනරාල් සේපාලිකා චන්ද්‍රසේකර  කියා සිටියේ, සඳුදාට පසුව තවදුරටත් නොගෙවා සිටින හිඟ බදු පවතී නම්, ඒවා අයකර ගැනීමට දේශීය ආදායම් පනතේ සඳහන් නීතිමය ක්‍රියාමාර්ග ගන්නා බවයි.

ඒ පිළිබඳ වැඩිදුර තොරතුරු 1944 කෙටි දුරකතන අංකයෙන් හෝ ආසන්නතම දේශීය ආදායම් ප්‍රාදේශීය කාර්යාලයෙන් ලබා ගත හැකියි.

කළුතර දිස්ත්‍රික් හිටපු පාර්ලිමේන්තු මන්ත්‍රී මෙන්ම හිටපු අමාත්‍යවරයෙකු වූ කුමාර වෙල්ගම  අභාවප්‍රාප්ත වේ.

පෞද්ගලික රෝහලක ප්‍රතිකාර ලබමින් සිටියදී ඔහු අභාවප්‍රාප්ත වී ඇති අතර, මිය යනවිට ඔහු 74වැනි වියේ පසු විය.

ශ්‍රී ලංකා නිදහස් පක්ෂයේ දීර්ඝ කාලීන සාමාජිකයෙකු වූ වෙල්ගම පසුව ඉන් ඉවත් වී නව ලංකා නිදහස් පක්ෂයේ නායකයා බවට පත්විය.

ඔහු 2020 මහ මැතිවරණයේදී සමගි ජන බලවේගය සමග එක්ව මැතිවරණයට ඉදිරිපත්ව පාර්ලිමේන්තුවට තේරී පත් වූ අතර කුමාර වෙල්ගම මන්ත්‍රීවරයා කර්මාන්ත සංවර්ධන අමාත්‍යවරයා මෙන්ම ප්‍රවාහන අමාත්‍යවරයා ලෙස ද කටයුතු කර තිබේ.

ඉදිරි මහ මැතිවරණය සඳහා පොදු සන්ධානයකින් ඉදිරිපත්වීමට හිටපු ජනාධිපතිවරුන් වන රනිල් වික්‍රමසිංහ, චන්ද්‍රිකා බණ්ඩාරනායක කුමාරතුංග සහ හිටපු විපක්‍ෂ නායක සජිත් ප්‍රේමදාස සාකච්ඡා ආරම්භ කර ඇත.

ඒ අනුව හිටපු ජනාධිපති රනිල් වික්‍රමසිංහ ගේ කොළඹ පිහිටි නිවසේදී ඊයේ (26දා) ජනාධිපතිවරණයේදී ඔහුට සහාය පළ කළ ශ්‍රී ලංකා පොදුජන පෙරමුණ හිටපු පාර්ලිමේන්තු මන්ත්‍රීවරුන් සාකච්ඡා පවත්වා ඇත.

හිටපු ජනාධිපතිනි චන්‍ද්‍රිකා බණ්ඩාරනායක කුමාරතුංග සමග ශ්‍රී ලංකා නිදහස් පක්‍ෂයේ හිටපු පාර්ලිමේන්තු මන්ත්‍රීවරුන් නිට්ටඹුවේදී ඊයේ සාකච්ඡා පැවැත්වූහ.

සමගි ජන බලවේගය පක්‍ෂය සමග එක්සත් ජාතික පක්‍ෂය ද ඊයේ පොදු සන්ධානයක් ලෙස ඉදිරි මහ මැතිවරණය සඳහා ඉදිරිපත් වීමට සාකච්ඡා ආරම්භ කළ බව ආශු මාරසිංහ පැවසීය.

මෙම පොදු සන්ධානය සම්බන්ධයෙන් අද (27දා) මාධ්‍ය වෙත තොරතුරු ඉදිරිපත් කරන බව හිටපු පාර්ලිමේන්තු මන්ත්‍රී එස්. බී. දිසානායක සඳහන් කළේය.

(divaina.lk - උපාලි ද සේරම්)

ජ්‍යෙෂ්ඨ නියෝජ්‍ය පොලිස්පති ප්‍රියන්ත වීරසුරිය වැඩබලන පොලිස්පතිවරයා ලෙස පත් කර තිබේ.

ඒ, ජනාධිපති අනුර කුමාර දිසානායක විසිනි.

අද (27) සිට බලපැවැත්වෙන පරිදි මෙම පත් කිරීම සිදු කර ඇත.

කොළඹ විශ්වවිද්‍යාලයේ නීතිවේදි උපාධිධාරියෙක් වන ප්‍රියන්ත වීරසුරිය ශ්‍රී ලංකා නීති විද්‍යාලයේ නීතිඥවරයෙකු ලෙස දිවුරුම් දීමෙන් පසු සහාකාර පොලිස් නිලධාරියෙකු ලෙස උසස්වීම් ලැබුවේ ය.

ඔහු මානව සම්පත් කළමනාකරණය පිළිබඳ ව්‍යාපාර පරිපාලනවේදී උපාධිධාරියෙකි.

ප්‍රියන්ත වීරසුරිය, උතුරුමැද පළාත් ජ්‍යෙෂ්ඨ නියෝජ්‍ය පොලිස්පතිවරයා ලෙස ද කටයුතු කළේ ය.

පොලිස් අපරාධ හා රථවාහන දිශාව භාර නියෝජ්‍ය පොලිස්පතිවරයා ලෙස හා පොලිස් සැපයුම් අධ්‍යක්ෂකවරයා ලෙස ද ඔහු කටයුතු කර තිබේ.

ප්‍රියන්ත වීරසුරිය නැගෙනහිර ටිමෝටය හා හයිටි රාජ්‍යයේද එක්සත් ජාතින්ගේ සාම සාධක කටයුතු සඳහා එක්ව තිබීම විශේෂත්වයකි.

පොලිස් කොස්තාපල්වරයෙකු ලෙස සේවයට එක්වී වසර 158ක පොලිස් ඉතිහාසය තුළ පොලිස්පතිවරයා ලෙස පත්වීම් ලද එම නිලධාරියා ප්‍රියන්ත වීරසුරිය බව ජනාධිපති මාධ්‍ය අංශය නිවේදනය කළේ ය.

මහජන නියෝජිතයින් පාසල් උත්සවවලට ගෙන්වා ගැනීම නතර කරන ලෙස අග්‍රාමාත්‍ය හරිනි අමරසූරිය අධ්‍යාපන අමාත්‍යාංශයේ නිලධාරීන්ට උපදෙස් දී තිබේ.

ඇය මේ බව සඳහන් කර ඇත්තේ, ඊයේ (සැප්. 26) අධ්‍යාපන අමාත්‍යාංශයේ නිලධාරීන් සමග පැවති සාකච්ඡාවේදී ය.

එමෙන් ම, ශිෂ්‍යත්ව ප්‍රශ්නපත්‍ර පිටවීම හේතුවෙන් දරුවන්ට සිදුවූ අසාධාරණයට වහා ම සාධාරණය ඉටුවිය යුතු බව අග්‍රාමාත්‍යවරිය සඳහන් කර තිබේ.

ඇය වැඩිදුරට ත් සඳහන් කර ඇත්තේ, පිට වූ ප්‍රශ්න පිළිබඳ පූර්ණ විමර්ශන වාර්තාවක් ස්වාධීන විශේෂඥයින්ගේ දායකත්වයෙන් සිදු කරන ලෙස ය.

අධ්‍යාපන අමාත්‍යාංශය සහ විභාග දෙපාර්තමේන්තුව සම්බන්ධයෙන් ජනතාව තුළ ඇතිවී තිබෙන අවිශ්වාසය නැති කිරීමට අදාළ ආයතන කටයුතු කළ යුතු බව ත් විශේෂයෙන් විභාග පැවැත්වීම හා ප්‍රතිඵල ලබාදීම කඩිනම් කළ යුතු බව ත් අග්‍රාමාත්‍යවරිය සඳහන් කර තිබේ.

හිටපු පාර්ලිමේන්තු මන්ත්‍රීවරුන්ට ලබා දී තිබූ පොලිස් ආරක්ෂාව ඉවත් කිරීමට කටයුතු කර ඇති බව පොලිස් මාධ්‍ය කොට්ඨාසය පවසයි.

පොලිස් මාධ්‍ය කොට්ඨාසය සඳහන් කළේ, මන්ත්‍රීවරුන්ගේ ආරක්ෂාව සඳහා අනුයුක්ත කර සිටි පොලිස් නිලධාරීන් අද (සැප්. 27) යළි කැඳවා ඇති බව ය.

කෙසේ වෙතත්, හිටපු කතානායක, හිටපු නියෝජ්‍ය කතානායක සහ විපක්ෂ නායකවරයාට ලබා දී ඇති පොලිස් ආරක්ෂාව ඉවත් නොකරන බව පොලිස් මාධ්‍ය කොට්ඨාසය පැවසීය.

පොලිස් මාධ්‍ය කොට්ඨාසය සඳහන් කළේ, තවදුරට ත් ආරක්ෂාව ලබා දියයුතු යැයි බුද්ධි අංශ මගින් තහවුරු කරගෙන ඇති තනතුරු දරන නිලධාරීන්ට පොලිස් ආරක්ෂාව ලබා දීමට කටයුතු කරන බව ය.

ජනාධිපති අනුර කුමාර දිසානායක විසින් සැප්තැම්බර් 24 වන දා පාර්ලිමේන්තුව විසුරුවා හරින ලදී.

ඒ අනුව, මන්ත්‍රීවරුන්ට ලබා දුන් සියලු පහසුකම් පාර්ලිමේන්තුව විසුරුවා හැරීමත් සමග අහෝසි වේ.

පෙර පැවති වීසා නිකුත් කිරීමේ ක්‍රමවේදය යළි ක්‍රියාත්මක කිරීමට රජය තීරණය කර තිබේ.

ඒ අනුව අද (26) මධ්‍යම රාත්‍රී 12.00 සිට ක්‍රියාත්මක වන පරිදි එම ක්‍රමවේදය යළි ක්‍රියාත්මක වන බව ජනාධිපති මාධ්‍ය අංශය සඳහන් කරයි.