පුවත්

උද්වේගකර තරගයකින් පසු, ලෝක ශුර ප්‍රංශය පරදවමින් ආර්ජන්ටිනාව 2022 ලෝක පාපන්දු කුසලානය දිනා ගත්තේය.

තරගයේ ජය පරාජය තීරණය කිරීමට මිනිත්තු 90 ක කාලය මෙන්ම මිනිත්තු 30 ක අමතර කාලයක් සහ දඬුවම් පහර එල්ල කිරීමේ වටයක්ද විය.

තරගය නිමාවට පත්වුයේ දඬුවම් පහර 4ට 2ක් ලෙස ආර්ජන්ටිනාවට තරගයේ ජය හිමිකර දෙමින්ය.

ආර්ජන්ටිනාව 2022 ලෝක කුසලානය දිනා ගත්තේ මෑත ඉතිහාසයේ වඩාත් උද්වේගකර අවසන් මහා තරගය මෙය බවට පත් කරමිනි.

මෙවර ආර්ජන්ටිනාව ලෝක පාපන්දු කුසලානය ජය ලබන්නේ වසර 36කට පසුවය.

1986 දී ඔවුන් අවසන් වරට ලෝක පාපන්දු කුසලාන ජය ලැබීය. 1978 දී ද ලෝක කුසලාන පාපන්දු තරගාවලියේ ජය ලැබුවේ ආර්ජන්ටිනාවය.

ලයනල් මෙසී අවසානයේ ඔහුගේ ලෝක කුසලාන සිහිනය සාක්ෂාත් කර ගත්තේ ආර්ජන්ටිනාව ඔවුන්ගේ තුන්වන පාපන්දු කිරුළ දඩුවම් පහරින් දිනා ගැනීමත් සමඟය.

කටාර්හි ලුසේල් ක්‍රීඩාංගනයේ පැවති මෙම තරගය පාපන්දු තරගාවලි ඉතිහාසයේ විශිෂ්ටතම අවසන් තරගය බව විචාරකයෝ පවසති.

ආර්ජන්ටිනාව 1986 න් පසු පළමු ශූරතාව හමිකර ගැනීමේ අරමුණින් තරග බිමට පිවිසුණු අතර ප්‍රංශය උත්සාහ කරනු ලැබුවේ පිට පිට ලෝක කුසලාන දිනා ගන්නා තුන්වැනි රට බවට පත්වීමටය.

35 හැවිරිදි මෙසීගේ ප්‍රතිවිරුද්ධ ක්‍රීඩක කෙලියන් එම්බාපේ ගෝල ත්‍රිත්වයක් ලබා ගැනීම අවසන් මහා තරගයේ කැපී පෙනිණි.

ලෝක කුසලාන අවසන් මහා තරගයක ගෝල ත්‍රිත්වයක් වාර්තා වන්නේ 1966 වසරට පසුව වුවත් ප්‍රංශයේ ජයග්‍රහණය සඳහා එය ප්‍රමාණවත් නොවීය.

අවසන් මහා තරගයේදී මෙසී ගෝල දෙකක් සහ ඩි මරියා ලබාගත් ගෝලයක් සමගින් ආර්ජන්ටිනාව ගෝල 3ක් රැස් කළේය.

ප්‍රංශය වෙනුවෙන් කෙලියන් එම්බාපේ ගෝල ත්‍රිත්වයක් ලබා ගත්තේය.

ආජන්ටිනාව වෙනුවෙන් ලයනල් මෙසී 22 වැනි මිනිත්තුවේදී දඬුවම් පහරක් වාර්තා කළ අතර ඩි මරියා 36 වැනි මිනිත්තුවේදී ගෝලයක් රැස් කිරීමත් සමග ආර්ජන්ටිනාව ගෝල 2-0ක් ලෙස තරගයේ මුල් කාලසීමාව තුළම පෙරමුණ ගෙන සිටියේය.

එහෙත් අනපෙක්ෂිත ලෙස එම්බාපේ හදිසි ගෝල 2ක් රැසක් කිරීමත් සමග 82 වැනි මිනිත්තුව වන විට කණ්ඩායම් දෙකම ගෝල 2ට 2ක් ලෙස සම තත්ත්වයේ පසුවිය.

අනතුරුව තරගයේ ජයග්‍රහණය සඳහා මිනිත්තු 15 බැගින් අතිරේක කාල 2ක් ලබා දුන් අතර එහිදී දෙපිලම ගෝලය බැගින් රැස් කිරීම හේතුවෙන් ලකුණු සටහන ගෝල 3ට 3ක් ලෙස දැක්විණ.

අනතුරුව ජයග්‍රහණය තීරණය කරනු ලැබුවේ දඬුවම් පහර වලිනි.

එහිදී ගෝල 4ට 2ක් ලෙස තරගයේ ජය හිමි කර ගැනීමට ප්‍රබල ආර්ජන්ටිනාව සමත්විය.

ආර්ජන්ටිනාවේ ජනප්‍රිය ක්‍රීඩක ලයනල් මෙසීට තරගාවලියේ හොඳම ක්‍රීඩකයාට පිරිනැමෙන රන් පාපන්දුව පිරිනමන ලදී.

ලෝක කුසලාන ඉතිහාසයේ රන් පාපන්දුව දෙවරක් දිනාගත් එකම ක්‍රීඩකයා බවට මෙසී පත්විය.

තරගාවලියේ වැඩිම ගෝල හිමිකරගත් ක්‍රීඩකයාට පිරිනැමෙන රන් සපත්තුව (2022 FIFA World Cup Golden Boot award ) හිමි කර ගැනීමට ප්‍රංශයේ එම්බාපේ සමත්විය.

තරගාවලිය තුළ එම්බාපේ ගෝල 8 ක් රැස්කළ අතර ලයනල් මෙසී (ආජන්ටිනාව) ගෝල 7ක් රැසක් කර තිබුණි.

2022 ලෝක කුසලාන පාපන්දු කුසලානය හිමි කර ගත් ආර්ජන්ටිනා කණ්ඩායමට හිමිවූ ත්‍යාග මුදල ඩොලර් මිලියන 42කි.

බීබීසී - සිංහල

ජ්‍යෙෂ්ඨ මාධ්‍යවේදියකු මෙන්ම ප්‍රබල සමාජ ක්‍රියාකාරිකයකු වන වික්ටර් අයිවන් මහතා සහ පොහොට්ටුවේ නිර්මාතෘ බැසිල් රාජපක්ෂ මහතා අතර විශේෂ සාකච්ඡාවක් පසුගියදා පැවැත්විණි.

නෙළුම් මාවත පොහොට්ටුව කාර්යාලයේ පැවති මෙම විශේෂ හමුවට වික්ටර් අයිවන් මහතා සහ තවත් සමාජ ක්‍රියාකාරීන් දෙදෙනෙක් එක්වූහ. බැසිල් රාජපක්ෂ මහතා සමඟ පොහොට්ටු මහලේකම් සාගර කාරියවසම්, මන්ත්‍රී රංජිත් බණ්ඩාර සහ සංජීව එදිරිමාන්න ඇතුළු පිරිසක් පැමිණ සිටියහ.

පසුගියදා සිදු වූ ආණ්ඩු පෙරළියට මූලික වූ අරගලය සම්බන්ධයෙන් බැසිල් රාජපක්ෂ හා වික්ටර් අයිවන් මහත්වරු විශේෂ අදහස් හුවමාරුවක් කර ගත්හ. අරගලයට බලපෑ සමාජ ප්‍රශ්න අතර වැඩි දෙනකුගේ අවධානයට යොමු නොවූ කුල පීඩනය ද වන බව මෙහිදී අයිවන් මහතා පෙන්වා දී තිබිණි.

තමන් අරගලය ගැන විශේෂ අධ්‍යයනයක් කළ බව වැඩිදුරටත් පැවසූ හෙතෙම ලංකාවේ ප්‍රබල සමාජ ප්‍රශ්නයක් වන කුල පීඩනය තුරන් කිරීමට දේශපාලන පක්ෂ මැදිහත් විය යුතු බව සඳහන් කර තිබිණි.

පොහොට්ටුවේ ප්‍රබල විවේචකයකු වන වික්ටර් අයිවන් මහතා සහ බැසිල් රාජපක්ෂ මහතා අතර වූ හමුව පැය 1 ½ක් පුරා ඉතා සුහදව පැවැත්විණි.

-deshaya

යෝජිත පළාත් පාලන මැතිවරණය මාස කිහිපයකින් කල් දමන ලෙස ඉල්ලීමක් පළාත් පාලන ආයතන ප්‍රධානීන් වෙතින් ජනාධිපති රනිල් වික්‍රමසිංහ වෙත යොමුව ඇති බව වාර්තා වෙයි .

දේශපාලන ආරංචි මාර්ග සඳහන් කරන්නේ පොදුජන පෙරමුණේ ප්‍රාදේශීය සභා සහ නගර සභා සභාපතිවරුන් පිරිසක් ජනාධිපතිවරයාගෙන් මෙම ඉල්ලීම සිදුකර ඇති බවය.

එම ආරංචි මාර්ග වැඩිදුරටත් සඳහන් කරන ආකාරයට පසුගිය බදාදා මීට අදාළ හමුව සිදුව ඇත. ඊට පොදුජන පෙරමුණට සම්බන්ධ පළාත් පාලන ආයතන ප්‍රධානීන් 47 දෙනකු එක්ව තිබේ.

එහිදී ඔවුන් පෙන්වා දී ඇත්තේ පවත්නා ආර්ථික තත්ත්වය යටතේ ජනතාව ඡන්දයකට මුහුණ දීමට තරම් සුදුසු වාතාවරණයක නොමැති බවය. මැතිවරණය සඳහා රජයට මෙන්ම තමන්ටත් විශාල වියදමක් දැරීම අපහසු බවද ඔවුන් පෙන්වා දී ඇත.

ඔවුන්ගේ ඉල්ලීමට ප්‍රතිචාර දක්වා ඇති ජනාධිපතිවරයා පවසා ඇත්තේ පවත්නා ආර්ථික තත්ත්වය ගැන ද සලකා බලා අදාළ අංශ මැතිවරණය සම්බන්ධයෙන් තීන්දුවක් ගනු ඇතැයි අපේක්ෂා කරන බවය.

මෙම අවස්ථාව සඳහා අග්‍රාමාත්‍ය දිනේෂ් ගුණවර්ධන, පොදුජන පෙරමුණේ මහලේකම් පාර්ලිමේන්තු මන්ත්‍රී සාගර කාරියවසම් , පළාත් පාලන රාජ්‍ය අමාත්‍ය ජානක වක්කුඹුර එක්ව ඇති බවත් වාර්තා වෙයි .

මෙරට 25 වැනි නාවික හමුදාධිපතිවරයා ලෙස වයිස් අද්මිරාල් ප්‍රියන්ත පෙරේරා පත්කර තිබේ.

නව නාවික හමුදාපති ප්‍රියන්ත පෙරේරාට හිටපු නාවික හමුදාපති අද්මිරාල් නිශාන්ත උළුගේතැන්න විසින් නාවික හමුදා චාරිත්‍රානුකූලව රාජකාරීන් භාරදුන් බවත් වාර්තා වෙයි .

හමුදාවෙන් සේවයෙන් විශ්‍රාම ලැබූ අද්මිරාල් නිශාන්ත උළුගේතැන්න වෙත සම්මාන ආචාර මුරයක් ද නාවික හමුදා මූලස්ථානයේදී පවත්වා ඇත .

ඇමෙරිකානු සංචාරකයන් 108 දෙනෙකු රැගත් ‘ඕෂන් ඔඩිසි’ නැමැති අධික සුඛෝපභෝගි නෞකාව අද (18) පස්වරුවේ කොළඹ වරායට සේන්දුව තිබේ.

ඉන්දියාවේ කොචින් වරායේ සිට කොළඹ වරායට ළගාවූ මෙම නෞකාව හෙට (19) ත්‍රිකුණාමලය වරායට යාත්‍රා කිරීමට නියමිත බවත් වාර්තා වෙයි.

වැඩිදුරටත් වාර්තා වන ආකාරයට මෙම නෞකාවේ පැමිණි සංචාරකයින් කොළඹ වරායේ බැස දින දෙකහමාරක් පමණ කොළඹ, කුරුණෑගල, හබරණ, සීගිරිය සහ ත්‍රිකුණාමලය යන ප්‍රදේශවල සංචාරය කර මේ මස 21 වැනිදා ත්‍රිකුණාමලය වරායෙන් පිටත්වීමට නියමිතය.

අමෙරිකානු ධජය සහිත මෙම නෞකාව දිගින් මීටර් 105 හා පළලින් මීටර් 18.5 කි.

රාජ්‍ය ව්‍යවසාය ඇතුළු ආයතන 52ක් වාර්ෂිකව රුපියල් කෝටි 86000ක පාඩුවක් ලබන රජයේ ආරංචි මාර්ග පෙන්වා දෙයි.

වාර්තා වන ආකාරයට ඛනිජ තෙල් නීතිගත සංස්ථාව, විදුලිබල මණ්ඩලය සහ ශ්‍රී ලංකන් ගුවන් සමාගම ඇතුළු ප්‍රධාන රාජ්‍ය ආයතන පනස් දෙකක් මේ ආකාරයට පාඩු ලබන අතර එය පියවීමට සිදුව ඇත්තේ ජනතා බදු මුදල්වලින් මූලිකව යැපෙන රාජ්‍ය භාණ්ඩාගාරයට ය.

රාජ්‍ය ආයතන අතුරින් දූෂිත ආයතන තිස් දෙකක් පවතින බව කෝප් කමිටුව පසුගියදා අනාවරණය කළේය. එහි වාර්තාවකට අනුව පසුගිය වසර පහේදී එම ආයතන 32 ලබූ පාඩුව රුපියල් කෝටි 46,500කි.

එම ආයතන අතර වැඩිම පාඩු ලබන ආයතන ලෙස පිළිවෙලින් ඛනිජ තෙල් නීතිගත සංස්ථාව, ශ්‍රී ලංකන් ගුවන් සමාගම සහ ලංකා විදුලිබල මණ්ඩලය, හඳුනාගෙන ඇති බවත් එම ආයතන පසුගිය තෙවසර තුළ ලැබූ පාඩුව රුපියල් කෝටි තිස් දාහක් බවත් සඳහන් වේ.

ඛනිජ තෙල් නීතිගත සංස්ථාව මේ වසරේ මුල් මාස හතර තුළ රුපියල් කෝටි 62,800 ක පාඩුවක් ලබා ඇත.

ඉන්පසු ශ්‍රී ලංකන් ගුවන් සේවය රුපියල් කෝටි 24,800ක්ද ලංකා විදුලිබල මණ්ඩලය කෝටි 4700ක්ද පාඩු ලබා ඇත.

මේ අතර පාඩු ලබන රජයේ ආයතන 39 ක් ප්‍රතිව්‍යුගත ලයිස්තුවේ පවතින බව රජය පවසයි.

එසේම රාජ්‍ය ආයතන සහ ව්‍යවසාය 420ක් රජයෙන් නඩත්තු කරන බව රජය නිකුත් කළ වාර්තාවක සඳහන් වේ.

 ඉන්ෆ්ලුවෙන්සා වෛරසය සීඝ්‍රයෙන් පැතිර යාම හේතුවෙන් අවදානම් කාණ්ඩවල පසුවන පුද්ගලයින් ආරක්ෂාකාරී විය යුතු බව සෞඛ්‍ය විශේෂඥයින් පවසති.

ශ්‍රී ලංකා ක්ෂුද්‍ර ජීව වෛද්‍ය විශේෂඥයින්ගේ විද්‍යායතනයේ සභාපති, විශේෂඥ වෛද්‍ය රෝහිණී වඩනම්බි ප්‍රකාශ කළේ ඉන් වැඩිම බලපෑමක් පවතින්නේ කුඩා ළමුන්ට සහ වැඩිහිටියන්ට බවයි.

මෙම ඉන්ෆ්ලුවෙන්සා වෛරස ව්‍යාප්තියත් සමග පුද්ගලයින් තුළ දැඩි උගුරේ වේදනාවක් හා උණ රෝගී තත්ත්වයක් නීරීක්ෂණය කළ හැකි බවත් මෙනිසා සෑම විටම මුව ආවරණ පැළැදීම හා දෑත් පිරිසිදුව තබා ගැනීම වැදගත් බව ද ඇය අවධාරණය කළාය.

සර්ව පාක්ෂික සමුළුව ශ්‍රී ලංකාවේ දේශපාලන ගැටලු බොහෝමයකට විසඳුම් ගෙන එන වැදගත් පියවරක් බව ජාත්‍යන්තර දේශගුණය පිළිබඳව ජනාධිපති උපදේශක එරික් සෝල්හයිම් පවසයි .

ඔහු මේ බව සඳහන් කර සිටියේ ද්‍රවිඩ ප්‍රගතිශීලී සන්ධානයේ නායක පාර්ලිමේන්තු මන්ත්‍රී මනෝ ගනේෂන් සමග පැවති හමුවකින් අනතුරුව ය.

එහිදී අදහස් දැක්වූ ජාත්‍යන්තර දේශගුණය පිළිබඳව ජනාධිපති උපදේශක එරික් සෝල්හයිම් මෙසේද පැවසීය .

‘ජනාධිපති රනිල් වික්‍රමසිංහගේ ආරාධනයෙන් මම ශ්‍රී ලංකාවට පැමිණියේ ආර්ථික අර්බුදය සඳහා හරිත තිරසාර විසඳුම් ලබාදිය හැකි ආකාරය පිළිබඳව සොයා බැලීමටයි. සුළං හා සූර්ය විදුලිබල ක්ෂේත්‍රවල නව ආයෝජනයන් ගෙන ඒමටත් මම බලාපොරොත්තු වෙනවා.

අද පැවති සාකච්ඡාවේදී මනෝ ගනේෂන් මන්ත්‍රීවරයා මට දැනුම් දුන්නා.. පැවති සර්ව පාක්ෂික සමුළුව පිළිබඳව. එය ශ්‍රී ලංකාවේ දේශපාලන ගැටලු බොහොමයකට විසඳුම් ගෙන එන වැදගත් පියවරක්. එහිදී ඉන්දීය සම්භවයක් සහිත මෙරට දෙමළ ජනතාව නැත්නම් උඩරට දෙමළ ජනතාවට සිංහල හා මුස්ලිම් ජනතාව සමග සාමයෙන් ජීවත්වීමට ඇති අභිලාෂයත් ඔහු පැහැදිලි කළා.

ඒ වගේම ශ්‍රී ලංකාවේ දුප්පත්ම ජනකොටස් වන වතුකරයේ ජනතාවට ආහාර ආධාර සහ අනෙකුත් අත්‍යවශ්‍ය දෑ සැපයීමේ අවශ්‍යතාවයත් මෙහිදී අවධාරණය කෙරුණා. ඉතා දුෂ්කර කාලයක් පසුකරන ශ්‍රී ලාංකික ජනතාව වෙත මගේ සහාය මම පළ කරනවා.

ඔවුන් අතරින් සමහර පිරිස්වලට ප්‍රමාණවත් ආහාර වේලක් නොලැබෙන බවත්, දෛනික ආහාර වේල් ප්‍රමාණය අඩු කිරීමටත් සිදුව ඇති බව දැනගන්න ලැබිලා තිබෙනවා. මේ දුෂ්කරතාවලින් මිදෙන මඟක් පිළිබඳව සොයා ගැනීම සඳහා ජාත්‍යන්තර ප්‍රජාව සමග කටයුතු කරන්න මම සූදානම්.

එමෙන්ම ජාත්‍යන්තර මූල්‍ය අරමුදල සමග එකඟතාවයකට පැමිණීමට ජනාධිපතිවරයා දැඩි පරිශ්‍රමයක් දරනවා. චීනය සහ ඉන්දියාව සමගත් එලෙසමයි. මේ හරහා නැවතත් ආර්ථිකය ප්‍රකෘති කිරීමට හැකිවුවහොත් එය සියලු දෙනාටම මීට වඩා හොඳ කාලයක් උදාවේවි’

රජය විසින් රටේ සෑම වගා නොකළ ඉඩමක්ම වගා කිරීමට තීරණය කර ඇති බැවින් පුරන් කුඹුරු සියල්ල වසර 05ක් සඳහා රජයට පවරාගෙන ඒවා වගා කිරීමට ඉඩම් නොමැති තරුණ ප්‍රජාවට පවරා දිය හැකි පරිදි ගොවිජන පනත කඩිනමින් සංශෝධනය කරන බව කෘෂිකර්ම අමාත්‍ය මහින්ද අමරවීර පවසයි.

වසර 05කට පසු එම ඉඩම් අයිතිකරුවන්ට අදාළ ඉඩම් වගා කළ පිරිස් සමඟ එකඟතාවයක් යටතේ අවශ්‍යනම් වගා කිරීමට හැකි බවත් එසේ නොකරන්නේ නම් ඉඩම් අයිතියට බිම් කුලිය වශයෙන් ලබන අස්වැන්නෙන් කොටසක් ලබා දීමට පියවර ගන්නා බවත් අමාත්‍යවරයා සඳහන් කරයි.

දැනට රට තුළ වගා කළ හැකි කුඹුරු ලක්ෂයක් පමණ පුරන් වීමට ඉඩ හැර තිබෙන බවත් එම කුඹුරුවලින් වැඩි ප්‍රමාණයක් බස්නාහිර පළාත තුළ පිහිටා ඇති බවත් අමාත්‍යවරයා පවසයි .

එසේම ඇතැම් ඉඩම් අයිතිකරුවන් විදේශගත වී ඇති බව ද අනාවරණ වී ඇති බවත් අමාත්‍යවරයා වැඩිදුරටත් සඳහන් කළේය.

දූපත් රාජ්‍යයක් ලෙස ශ්‍රී ලංකාව ජාත්‍යන්තරය සමග කටයුතු කිරිමේ දී සියලු රටවල් සමග මිත්‍රශීලි පිළිවෙතක් අනුගමනය කළ යුතු බව ජනාධිපති රනිල් වික්‍රමසිංහ පැවසීය.
ලෝක බලවතුන්ගේ අරගලවලදී එක් පිළකට බෙදී වෙන් නොවී, සියලු රටවල් සමග මිත්‍රශීලිව කටයුතු කිරීම තුළින් ශ්‍රී ලංකාව ජාත්‍යන්තරයේ යහපත් තලයකට ඔසවා තැබිය හැකි බව ද ජනාධිපතිවරයා පෙන්වා දුන්නේය.

ජනාධිපති රනිල් වික්‍රමසිංහ  මේ බව සඳහන් කළේ දියතලාව යුද හමුදා විද්‍යාපීඨයේ කැඩෙට් නිලධාරීන්ගේ 97 වන විසිරයාමේ පෙළපාලියට අද (17) පෙරවරුවේ එක්වෙමිනි.

දියතලාව යුද හමුදා විද්‍යාපීඨයේ පුහුණුව නිම කළ කැඩෙට් නිලධාරීන් තුන්සිය පනස් එක් දෙනෙකු (351) අධිකාරියට පත් කිරීම අද දින සිදු කෙරිණි.

විදේශ රටවල් හතරක කැඩෙට් නිලධාරීන් ද පුහුණුව ලබා අධිකාරියට පත්වීම විශේෂත්වයකි.

යුද හමුදා විද්‍යාපීඨය වෙත පැමිණි සේනාධිනායක ජනාධිපති රනිල් වික්‍රමසිංහ  ඉතා අභිමානවත් අයුරින් පිළිගැනිණි.

ප්‍රථමයෙන් එම පරිශ්‍රයේ ඇති රණවිරු ස්මාරකය වෙත ගිය ජනාධිපතිවරයා ඊට පුෂ්පෝපහාර දැක්වීය.

අනතුරුව කැඩෙට් නිලධාරීන්ගේ පෙළපාලිය පරීක්ෂා කළ ජනාධිපති රනිල් වික්‍රමසිංහ  දක්ෂතම කැඩෙට් කණ්ඩායම වෙත ශූරතා ධජය පිළිගැන්වීම හා කැඩෙට් නිලධාරීන් වෙත අසිපත පිළිගැන්වීම සිදු කළේය.

අද දින අධිකාරි ලත් කැ‍‍‍ඩෙට් නිලධාරීන් සමග සමූහ ඡායාරුපයකට පෙනි සිටි ජනාධිපතිවරයා සිය සංචාරය සනිටුහන් කරමින් විද්‍යාපීඨ භූමියේ නා පැලයක් රෝපණය කළේය.

එහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ,

අද ඔබට ඉතා වැදගත් දිනයක්. අද ඔබ දියතලාව යුද හමුදා විද්‍යාපීඨයේ පුහුණුව අවසන් කරනවා. නමුත් එය ඔබගේ ජීවිතයේ අලුත් ආරම්භයක්. අද ඔබ සියලු දෙනාම යුද්ධ හමුදාවේ නිත්‍ය සාමාජිකයන් ලෙස සේවය ආරම්භ කරනවා .

ශ්‍රී ලංකා යුද හමුදාවේ නායකන් ලෙස අද සිට ඔබටත් වගකීමක් තිබෙනවා. යුද හමුදාව හා එහි සෙබළුන් ආරක්ෂා කිරීමේ වගකිම ඒ අනුව ඔබට පැවරෙනවා. අද ඔබට මෙම වගකීම පවරන්නේ ජන රජයක් ලෙසයි. එය ආරක්ෂා කිරීම ඔබේ වගකීමක්. ජනරජය සතුරාගෙන් ආරක්ෂා කිරීමේ වගකීමත් ඔබට පැවරී තිබෙනවා. සෑමවිටම ඔබ පුහුණු කරන ආයතනයේ ගෞරවය සහ කීර්ති නාමය ආරක්ෂා කළයුතුයි.

රටක් ලෙස අපි ලෝක බලවතුන් සමඟ එක පිලකට වෙන් වී නෑ. ලොව බලවතුන් සමග අපි ගිවිසුම්ගත වෙලා නෑ. මොකද අපි දූපත් රාජ්‍යයක්. අපි සියලු රටවල් සමඟ මිත්‍රශිලිව කටයුතු කළයුතුයි.

මේ රට ආරක්ෂා කර ගැනීමේ වගකීම ඔබට පැවරෙනවා. අභ්‍යන්තර මෙන්ම බාහිර බලපෑම්වලින් රට ආරක්ෂා කර ගැනිමේ හැකියාව ඔබට තිබෙනවා. ඔබ ඇතුලත් වන අපගේ යුද හමුදාවට යුධ අත්දැකීම් තිබෙනවා. ඒ වගේම ජාත්‍යන්තර යුද අත්දැකීම් ඔවුන් සතුයි. එක්සත් ජාතීන්ගේ හමුදාව සමග එක්ව මාලි රාජ්‍යයේ මෙහෙයුම්වලට අපේ ආරක්ෂා හමුදා ද සහභාගී වී සිටිනවා.

එම නිසා ඔබට අභියෝග ජය ගත හැකියි. ඉදිරියේ දී පැමිණිය හැකි කුමන හෝ අන්දමේ අභියෝග භාරගෙන ඒවාට ශක්තිමත්ව මුහුණ දීමේ හැකියාව ඔබ සතු‍ වෙනවා. එබැවින් එම වගකීම මා ඔබට භාරදෙන අතර ශක්තිමත්ව ඉදිරියට කටයුතු කරන ලෙස ඔබ සියලුදෙනාගෙන් ඉල්ලා සිටිනවා.

ආරක්ෂක රාජ්‍ය අමාත්‍ය ප්‍රමිත බණ්ඩාර තෙන්නකෝන්, ජනාධිපති කාර්ය මණ්ඩල ප්‍රධානී හා ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සාගල රත්නායක, ආරක්ෂක අමාත්‍යංශයේ ලේකම් විශ්‍රාමික ජෙනරාල් කමල් ගුණරත්න, ආරක්ෂක මාණ්ඩලික ප්‍රධානී ජෙනරාල් ශවේන්ද සිල්වා, යුද හමුදාපති ලූතිනන් ජෙනරාල් විකුම් ලියනගේ, දියතලාව යුද හමුදා විද්‍යාපීඨයේ සේනාවිධායක මේජර් ජෙනරාල් නියන්ගොඩ යන මහත්වරු ඇතුළු පිරිසක් මෙම අවස්ථාවට එක්ව සිටියහ.

ඕස්ට්‍රේලියාවේදී ලිංගික දූෂණ චෝදනා ලබා සිටින ශ්‍රී ලංකා ක්‍රිකට් ක්‍රීඩක ධනුෂ්ක ගුණතිලක දැනට පදිංචි වී සිටින නිවසින් ඉවත්ව තනි කාමරයක් සහිත මහල් නිවසකට යාමට සිඩ්නි මහේස්ත්‍රාත් අධිකරණයේ මහේස්ත්‍රාත් ක්ලෙයාර් ෆර්නන් අවසරදී ඇති බව වාර්තා වෙයි.

විදෙස් මාධ්‍ය වාර්තාවක සඳහන් ආකාඑයට හැවිරිදි ධනුෂ්ක ගුණතිලක  ඊයේ (16) අධිකරණය හමුවේ පෙනී සිටි අවස්ථාවේ මහේස්ත්‍රාත් අධිකරණයේ ඔහු වෙනුවෙන් පෙනී සිටි නීතීඥවරයා මෙම ඉල්ලීම සිදු කර ඇත.

එහිදී නීතිඥවරයා ඉල්ලා ඇත්තේ දැනට ධනුෂ්ක ගුණතිලකට උදව් කිරීමට ඉදිරිපත් වූ පුද්ගලයකුගේ නිවසේ ඔහු ජීවත්වන බවත් නීතිමය ක්‍රියාවලිය ඉතා දීර්ඝ එකක් වනු ඇති බැවින් මෙසේ නව නිවසකට යාමට ඉඩ දෙන ලෙසය.

සිඩ්නි මහේස්ත්‍රාත් අධිකරණය එම ඉල්ලීම පිළිගෙන ඇති අතර ඒ අනුව ධනුෂ්ක ගුණතිලකට නව නිවසකට යාමට අවසර ලබා දී ඇත.

මේ වන වුට ඇප මත මුදාහැර සිටින ධනුෂ්ක ගුණතිලකට පහත කොන්දේසි අධිකරණය විසින් පනවා ඇති අතර , සෑම දිනකම පොලිසියට වාර්තා කිරීම, සෑම දිනකම රාත්‍රී 9 සිට පසුදා උදෑසන 6 දක්වා ඔහුට සංචරණ සීමා, පැමිණිලිකාර පාර්ශවය සමග සබඳතා පැවැත්වීම තහනම් වීම මෙන්ම Tinder හා අනෙකුත් Dating App ඇප් භාවිතයද තහනමද වෙයි.

කාන්තාවක සමග කැමැත්තෙන් තොරව ලිංගිකව එක්වීම සම්බන්ධයෙන් ධනුෂ්ක ගුණතිලකට එරෙහිව චෝදනා හතරක් යටතේ නඩු පවරා ඇති අතර අදාළ නඩුව නැවත කැඳවීමට නියමිතව තිබෙන්නේ ලබන වසරේ ජනවාරි 12 වැනිදාය.

කෝටිපති ව්‍යාපාරිකයකු වන දිනේෂ් ෂාෆ්ටර්ගේ ඝාතනය සම්බන්ධයෙන් ලැබී ඇති තොරතුරු කිහිපයක් ගැන විශේෂ අවධානය යොමුවී ඇති බව පොලිස් ආරංචිමාර්ග පවසයි.

එසේම තොරතුරු සොයා බැලීම සඳහා ඔහු ගමන් කළ මාර්ගය අවට සීසීටීවී කැමරා විස්සකට අධික සංඛ්‍යාවක පටිගතවූ දර්ශන පරීක්ෂාවට ලක් කර ඇති බවද පොලිස් ආරංචිමාර්ග සඳහන් කරයි.

මෙම සීසීටීවී දර්ශන පරීක්ෂාව සඳහා පොලිස් නිලධාරීන් කණ්ඩායම් පහක් යොදවා ඇති බවත් දැනගන්නට ඇත.

මෙයට අමතරව ඔහුගේ ජංගම දුරකථනයේ සඳහන්ව ඇති තොරතුරු සම්බන්ධයෙන් දුරකතන සමාගම්වල සහාය ඇතුව වෙනම විමර්ශනයක් පවත්වන බවත් පොලිස් ආරංචිමාර්ග පවසයි.

මෙරට ගුවන් ගමන් පාලකවරුන් 38 දෙනකු ආර්ථික ප්‍රශ්න හේතුවෙන් මෑත කාලයේදී රට හැර ගොස් තිබෙන බව වාර්තා වෙයි.

වරාය නාවික සහ ගුවන් සේවා අමාත්‍යාංශ ආරංචි මාර්ග සඳහන් කරන ආකාරයට ඔවුන් මෙසේ විදෙස්ගතව ඇත්තේ වෙනත් රටවල සිවිල් ගුවන් සේවා ආයතනයන්හි ඉහළ වැටුප් සහ පහසුකම් ලබාගනිමින්ය.

මේ තත්වය නිසා ශ්‍රී ලංකාවේ ගුවන් ගමන් පාලකවරුන්ගේ දැඩි හිඟයක් මතුව තිබෙන බව වාර්තා වේ.

මේ සම්බන්ධයෙන් අදහස් දක්වන වරාය නාවික සහ ගුවන් සේවා අමාත්‍ය නිමල් සිරිපාල ද සිල්වා පවසන්නේ මෙය අද රටේ සෑම ක්ෂේත්‍රයකටම පොදු වූ ප්‍රශ්නයක් බවයි.

මේ හේතුවෙන් ගුවන් ගමන් පාලකවරුන් විසිපස් දෙනෙකු අලුතින් බදවා ගැනීමට සිදුව ඇති බවත් අමාත්‍යවරයා පවසයි.

එසේම ගුවන් නියමුවන් රැසක්ද පසුගිය කාලයේදී රට හැර ගොස් තිබෙන බවත් දැනගන්නට ඇත.

ලොව විශාලතම ද්වි පාර්ශ්වික ණය හිමියා ලෙස ගෝලීය ප්‍රජාව මුහුණ දී සිටින ණය අර්බුදය සම්බන්ධයෙන් සාකච්ඡා කිරීමට වට මේස සාකච්ඡාවකට පැමිණීමට චීනය කැමැත්ත පළ කළ බව ජාත්‍යන්තර මූල්‍ය අරමුදලේ කළමණාකාර අධ්‍යක්ෂිකා ක්‍රිස්ටලිනා ජෝර්ජීවා පවසා ඇත.

මෙම වට මේස සාකච්ඡාව ඉහළම මට්ටමින් පැවැත්විය යුතු බවත් එයට ණය හිමියන්, ණය ලබාගත් ඇතැම් පාර්ශ්ව සහ පුද්ගලික ණය හිමියන් සමඟ ලෝක බැංකුව, ජාත්‍යන්තර මූල්‍ය අරමුදල, ජී20 සමුළුවේ සභාපතීත්වයද එක්විය යුතු බවත් ඇය සඳහන් කර තිබේ.

පසුගියදා චීන බාලධාරීන් සමඟ පැවති සාකච්ඡා වලින් පසුව දුප්පත් සහ සංවර්ධනය වෙමින් පවතින රටවල් මුහුණ දී සිටින ණය අර්බුදයට විසඳුම් සෙවීමට හැකි වෙතැයි අපේක්ෂා ඉහළ ගිය බවත් ජාත්‍යන්තර මූල්‍ය අරමුදලේ කළමණාකාර අධ්‍යක්ෂිකා ක්‍රිස්ටිනා ජෝර්ජීවා වැඩිදුරටත් සඳහන් කර ඇත.

අද (17) මධ්‍යම රාත්‍රියේ සිට ග්‍රෑම් 450ක පාන් රාත්තලක මිල සංශෝධනය කිරීමට බේකරි හිමියන්ගේ සංගමය තීරණය කර තිබේ.

ඒ අනුව පාන් රාත්තලක මිල රුපියල් 10කින් අඩුවෙනු ඇත.

සමස්ත ලංකා බේකරි හිමියන්ගේ සංගමයේ සභාපති එන්. කේ ජයවර්ධන  අද පැවති මාධ්‍ය හමුවකදී සඳහන් කළේ අනෙකුත් බේකරි නිෂ්පාදනවල මිල ගණන් ද හැකි අයුරින් අඩු කරන්නැයි ඉල්ලීමක් කරන බවය.

ඉදිරියේදී පැවැත්වීමට නියමිත පළාත් පාලන මැතිවරණය සඳහා දේශපාලන සන්ධාන තුනක් තරග බිමට පැමිණීමට නියමිතව ඇතැයි දේශපාලන ආරංචි මාර්ග සඳහන් කරයි.

ශ්‍රී ලංකා පොදුජන පෙරමුණ සහ එක්සත් ජාතික පක්ෂය එක්ව එක් සන්ධානයක් ද, ශ්‍රී ලංකා නිදහස් පක්ෂය, හවුල් පක්ෂවල ලංකා උත්තර සභාගය සහ ඩලස් අලහප්පෙරුම ගේ නායකත්වයෙන් යුත් නිදහස ජනතා සභාව එක් එක්ව එක් සන්ධානයක් ද, ජාතික ජන බලවේගය වෙනම ද මැතිවරණ බිමට පිවිසීමට නියමිතව ඇතැයි එම ආරංචි මාර්ග වලින් පැවසේ.

ශ්‍රී ලංකා පොදුජන පෙරමුණ සහ එක්සත් ජාතික පක්ෂය එක්ව මැතිවරණයට මුහුණදීම සඳහා මේ වන විට මූලික වටයේ සාකච්ඡා ආරම්භ වී තිබේ.

මේ අතර ශ්‍රී ලංකා නිදහස් පක්ෂය, උත්තර සභාගය හා නිදහස ජනතා සභාව එක්ව නව සන්ධානයක් යටතේ මැතිවරණයට තරග කිරීම සම්බන්ධයෙන් මූලික සාකච්ඡා දැනටමත් ආරම්භ වී ඇතැයි වාර්තා වේ.

උත්තර සභාගයේ විධායක සභාව ඉකුත් සතියේදී කොමියුනිස්ට් පක්ෂ මූලස්ථානයේ දී රැස් වී ඇති අතර, නව දේශපාලන සන්ධානයක් ගොඩ නැගීම සම්බන්ධයෙන් ශ්‍රීලනිපය හා ඩලස් අලහප්පෙරුම කණ්ඩායම සමඟ සාකච්ඡා කිරීමට තීරණය කර ඇතැයි වාර්තා වේ. එතෙක් එම පක්ෂයෙන් ඉදිරිපත් කරන අපේක්ෂක ලැයිස්තු සකස් කිරීම ද දිගටම කරගෙන යාමට ඔවුන් තීරණය කර ඇතැයි එහි ප්‍රකාශකයෙක් සඳහන් කළේය

මේ අතර, නිදහස ජනතා සභාවේ ප්‍රකාශකයකු සදහන් කළේ, පළාත් පාලන මැතිවරණයට පුළුල් සන්ධානයකින් තරග කිරීම සදහා ශ්‍රී ලංකා නිදහස් පක්ෂය සහ උත්තරය සභාගය සමඟ සාකච්ඡා කරගෙන යන බවය.

අලුතින් ම පිහිටුවන සන්ධානයක් ලෙස මැතිවරණයට තරග කිරීමට බලාපොරොත්තු වන බවද ඔහු කීවේය.

මේ අතර ආචාර්ය නාලක ගොඩහේවා විසින් 'වියත් පෙරමුණ' නමින් දේශපාලන පක්ෂයක් ද අලුතින් ලියා පදිංචි කරනු ලැබ ඇති අතර අපේක්ෂක lලැයිස්තු සකස් කිරීම ද කරගෙන යන බව හෙතෙම සඳහන් කළේය

ශ්‍රී ලංකා නිදහස් පක්ෂයේ නායක, හිටපු ජනාධිපති මෛත්‍රිපාල සිරිසේන ඉකුත් සතියේ සඳහන් කළේ, මැතිවරණය සඳහා අලුත් දේශපාලන සන්ධානයක් ගොඩනැගීමට කටයුතු කරගෙන යන බවය.

මේ අතර, පළාත් පාලන මැතිවරණය සඳහා නාමයෝජනා කැඳවීම ලබන සතියේ සිදුකරන බව මැතිවරණ කොමිෂන් කමිෂන් සභාව දැනටමත් ප්‍රකාශයට පත් කර ඇත. එසේ වුවහොත් මැතිවරණය පෙබරවාරි මාසයේ පැවත්වීමට නියමිත බව දැනගන්නට තිබේ. පළාත් පාලන පනත අනුව, පළාත් පාලන ආයතන, ලබන මාර්තු මස 20 වැනිදාට පෙර ස්ථාපිත කළ යුතුව ඇත.

ලංකාදීප

ඇල්ල සංචාරක කලාපය සුවිසල් සැලැස්මක් යටතේ සංවර්ධනය කිරීමට කඩිනම් පියවර ගන්නා ලෙස ජනාධිපති රනිල් වික්‍රමසිංහ නිලධාරීන්ට උපදෙස් දුන්නේය.

සංචාරක අමාත්‍යාංශය, නාගරික සංවර්ධන අමාත්‍යාංශය සහ පරිසර අමාත්‍යාංශය එක්ව මාස 4ක් තුළ අදාළ සංවර්ධන සැලැස්ම සකස් කර තමා වෙත භාර දෙන ලෙස ද ජනාධිපතිවරයා නිලධාරීන්ට දැනුම් දුන්නේය.

ජනාධිපති රනිල් වික්‍රමසිංහ මෙම උපදෙස් ලබා දුන්නේ ඇල්ල ව්‍යාපාරිකයන්ගේ සංගමය සමග අද (16) පෙරවරුවේ ඇල්ල ෆලවර් ගාර්ඩ්න් හෝටලයේ පැවැති සාකච්ඡාවේ දී ය.

සංචාරක ආකර්ශණයට ලක්ව ඇති ඇල්ල සංචාරක කලාපය විධිමත්ව හා නිසි සැලැස්මකට අනුව සංවර්ධනය කිරීමේ අවශ්‍යතාව පෙන්වා දුන් ජනාධිපතිවරයා සංචාරක ආකර්ශනයට බාධා නොවන අයුරින්, සෞන්දර්යාත්මක පරිසරය ආරක්ෂා කර ගනිමින් එහි ඉදිකිරීම් කටයුතු සිදුකිරිමේ වැදගත්කම ද පැහැදිළි කළේය.

පළමු අදියර යටතේ ඇල්ල සංචාරක කලාපය මෙරටට පැමිණෙන සංචාරකයන්ගේ ආකර්ශණීය ගමනාන්තයක් බවට පත් කරන බවත් අනතුරුව සමස්ත ඌව පළාතම සංචාරක ආකර්ශණය දිනාගත් තෝතැන්නක් බවට පත්කිරීමට පියවර ගන්නා බවත් ජනාධිපති රනිල් වික්‍රමසිංහ වැඩිදුරටත් සඳහන් කළේය.

ඇල්ල ප්‍රදේශය වෙත පැමිණ සිටී දෙස්, විදෙස් සංචාරකයන්ගේ සුව දුක් විමසමින් ඔවුන් සමග සුහද කථා බහක නිරත වීමට ද ජනාධිපතිවරයා අමතක නොකළේය.

මෙහිදී අදහස් දැක්වූ ජනාධිපති රනිල් වික්‍රමසිංහ වැඩිදුරටත් මෙසේද පැවසීය.,

ඇල්ල කියන්නේ මේ ප්‍රදේශයේ ජනතාව එකතුව නිර්මාණය කරගත් සංචාරක කලාපයක්. එය දැන් ශ්‍රී ලංකාවේ ආර්ථිකයට පුළුල් දායකත්වයක් ලබා දෙනවා. නව සුවිසල් සංවර්ධන සැලැස්මක් අනුව මේ සංචාරක කලාපය දියුණු කරන්න අපි බලාපොරොත්තු වෙනවා. මෙහි මතුව ඇති ගැටළු සඳහා කෙටි කාලීන විසඳුම් ලබා දීමට අපි කටයුතු කරනවා.

අද මාලදිවයිනට පැමිණෙන සංචාරකයෙක් දිනකට ඩොලර් 500ක් පමණ වියදම් කරනවා . හැබැයි ඇල්ල ප්‍රදේශයට එන විදෙස් සංචාරකයෙක් දිනකට වියදම් කරන්නේ ඩොලර් විස්සයි. මේ තත්ත්වය අපි වෙනස් කළයුතුයි.

සංචාරක කර්මාන්තයේ ප්‍රවර්ධනය සඳහා පුහුණු සේවකයන් අවශ්‍යයි. පසුගිය කොරෝනා වසංගත සමයේ පළපුරුදු සංචාරක සේවකයන් රට අත්හැර ගියා. ඒ අය ඉතා හොඳ අත්දැකීම් තිබෙන ‍සේවකයින්. සංචාරකයින් පැමිණෙන්නේ හොඳ සේවාවක් අපේක්ෂාවෙනුයි. එම සංචාරකයන් වෙනුවෙන් ගුණාත්මක සේවාවක් ලබාදීමට අපට පුහුණු සේවකයින් අවශ්‍ය වෙනවා.

මේ සුවිසල් සංවර්ධන වැඩසටහන යටතේ විශිෂ්ඨ සංචාරක සේවාවක් ඇතිකිරීමට පියවර ගත යුතුයි. ඒ වගේම ඌව පළාතට එන සංචාරකයින් අවම වශයෙන් දින 07ක්වත් මෙහි රඳවා ගැනීමට හැකිවන පරිදි අපි නව සැලසුම් සකස් කළ යුතුයි.

ඒ වගේම නැගෙනහිර පළාතට පැමිණෙන සංචාරකයින් ඉන් අනතුරුව ඇල්ලට ගෙන්වා ගැනීමේ වැඩපිළිවෙළවෙළක් සකස් කළ යුතුයි. මත්තල ගුවන්තොටුපල දියුණු කර මත්තලින් මෙරටට පැමිණෙන සංචාරකයින් කෙලින්ම ඇල්ලට ගෙන්වා ගැනීමේ වැඩපිළිවෙලක් අපගේ නව සංවර්ධන සැලැස්මට ඇතුළත් විය යුතුයි. මෙම සැලසුම් කෙටිකාලිනව සහ දිගුකාලීනවත් මෙරට ආර්ථිකයේ දියුණුවට බලපානවා.

සංචාරක ක්ෂේත්‍රය සංවර්ධනය කරනවා වගේම මෙරට බැංකු ක්ෂේත්‍රය කඩා නොවැටී පවත්වාගෙන යාමටත් අපි කටයුතු කළ යුතුයි. බැංකු පද්ධතිය කඩා වැටුණොත් සංචාරකයන් අපේ රටට එන්නේ නෑ. ඒ නිසා සංචාරක ක්ෂේත්‍රයත්, බැංකු ක්ෂේත්‍රයත් ආරක්ෂා කිරීමේ වැඩපිළිවෙළ ආණ්ඩුව සතුව තිබෙනවා. අපි එය ඉටු කරනවා. ඒ සඳහා සහාය ලබාදෙන ලෙස මම ඔබ සියලුදෙනාගෙන් ඉල්ලා සිටිනවා.

මෙහිදී ඇල්ල ව්‍යාපාරිකයන් ඉදිරිපත් කළ ‍බොහෝ ගැටළුවලට එම මොහොතේම විසඳුම් ලබා දීමට ජනාධිපති රනිල් වික්‍රමසිංහ මහතා කටයුතු කළ අතර ඒ පිළිබඳ ව්‍යාපාරික ප්‍රජාව ජනාධිපතිවරයා වෙත සිය ප්‍රසාදය පළ කළහ.

අමාත්‍යවරුන් වන නිමල් සිරිපාල ද සිල්වා, හරීන් ප්‍රනාන්දු , රාජ්‍ය අමාත්‍ය චාමර සම්පත් දසනායක, ඌව පළාත් ආණ්ඩුකාර ඒ.ජේ.එම් මුසම්මිල් , බදුල්ල දිස්‍ත්‍රික් පාර්ලිමේන්තු මන්ත්‍රී සුදර්ශන දෙනිපිටිය යන මහත්වරු සහ ඇල්ල ප්‍රාදේශීය සභාවේ මහජන නියෝජිතයන් ද, ජනාධිපති කාර්‍ය මණ්ඩල ප්‍රධානී සහ ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සාගල රත්නායක, බදුල්ල දිස්ත්‍රික් ලේකම් දමයන්ති පරණගම ඇතුළු පිරිසක් මෙම අවස්ථාවට එක්ව සිටියහ .

මෙරට නිලි රැජින ලෙස සැළකෙන මාලනී ෆොන්සේකා ඉන්දියාවේදී හදවත් සැත්කමක් සිදුකර ඇති අතර එය සාර්ථක බව වාර්තා වෙයි.

රුපියල් එක්කෝටි දස ලක්ෂයක් පමණ එම සැත්කම සඳහා වැයව ඇති බවත් එම මුදල සොයා ගැනීමට ජනාධිපති රනිල් වික්‍රමසිංහ පෞද්ගලිකව මැදිහත්ව ඇති බවත් දැනගන්නට ඇත.

එසේම සැත්කමේ කටයුතු සාර්ථකව සිදුකර ගැනීමට අවශ්‍ය සියලු පහසුකම් සොයාබලා කටයුතු කරන ලෙස ඉන්දියාවේ පිහිටි මෙරට මහකොමසාරිස් කාර්යාලයට උපදෙස් දීමටද ජනාධිපතිවරයා කටයුතු කර ඇති බවත් වාර්තා වෙයි.

වාර්තා වන වැඩිදුර තොරතුරුවලට අනුව මාලනී ෆොන්සේකා මහත්මිය මේ වන විට පූර්ණ සුවය ලබා ඇති අතර අද දින නැවත මෙරටට පැමිණීමට නියමිතව ඇත.