පුවත්

විදුලි ගාස්තු සංශෝධන අනිවාර්යෙන්ම ලබන ජනවාරි මස ක්‍රියාත්මක කරන බවත් විදුලි ගාස්තු සංශෝධනය අවස්ථා 20 ක් යටතේ සකස් කර ඇති බවත් විදුලිබල හා බලශක්ති අමාත්‍ය කංචන විජේසේකර පවසයි.

අද (21) මාධ්‍ය වෙත අදහස් දක්වමින් අමාත්‍යවරයා මේ බව සඳහන් කළ අතර විදුලි ගාස්තු සංශෝධන කිරීම සඳහා අවශ්‍ය කටයුතු කිරීමට නීතිපතිවරයා නිර්දේශ ලබාදී ඇති බවත් එම නිර්දේශ අනුව කැබිනට් මණ්ඩලය සහ විෂය භාර අමාත්‍යවරයා ලෙස තමන් කටයුතු කර මහජන උපයෝගීතා කොමිසමට ඉදිරිපත් කරන බවත් පැවසීය.

විදුලි සැපයුම පවත්වාගෙන යෑම සඳහා ලබන වසරට අවශ්‍ය රුපියල් බිලියන 270 ත් 300 ත් අතර මුදල පූර්ණය කිරීමට අවශ්‍ය ආකාරයට විදුලි ගාස්තු සංශෝධනය කරන බව ද අමාත්‍යවරයා වැඩි දුරටත් සඳහන් කළේය.

අනාගතයේදී ඇති විය හැකි ගෝලීය ගැටලුවලට මුහුණදීමට නම් ඉන්දියානු සාගරය මෙන්ම ආසියානු සහ අප්‍රිකානු රටවල් අතර සමගිය සහතික කළ යුතු බව ජනාධිපති රනිල් වික්‍රමසිංහ ප්‍රකාශ කරයි.

යුක්‍රරේන - රුසියානු යුද්ධයේ බලපෑම ඉදිරියේදී මෙරටට ද දැනිය හැකි බැවින් ආහාර සුරක්ෂිතතාව ඇති කර ගනිමින් ස්වයංපෝෂිත වීමට කටයුතු කළ යුතු බවත් ජනාධිපතිවරයා පෙන්වා දෙයි.

ජනාධිපති රනිල් වික්‍රමසිංහ මේ බව සඳහන් කළේ දියතලාව යුද හමුදා විද්‍යාපීඨයේ 97 වන කණ්ඩාය‍මේ පාඨමාලාව අවසන් කළ කැඩෙට් නිලධාරීන්ගේ අවසාන ඉදිරිපත් කිරීමේ අවස්ථාවට පසුගියදා 16 වනදා එම විද්‍යාපීඨ ශ්‍රවණාගාරයේ දී එක් වෙමිනි.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය .

ඉතා ගැඹුරු අධ්‍යයන පාඨමාලාවක් අවසන් කළ ඔබට යුක්‍රේනයේ තත්ත්වය පිළිබඳව අදහස් දැක්වීමට මට ආරාධනා කර අපේ හමුදාපතිතුමා මාව අපහසු තත්ත්වයකට පත් කර තිබෙනවා.

ඔබ මෙම විෂය සම්බන්ධයෙන් සිදුකර ඇති අධ්‍යයනය පිළිබඳවත් සිදු කළ ඉදිරිපත් කිරීම් පිළිබඳවත් මම අගය කරනවා. එය ඔබගේ අධ්‍යයන සහ පර්යේෂණ කිරීමට ඇති කැපකිරීම මනාව පැහැදිළි කරනවා. කිසිම යුද්ධයක එහි තිබෙන වාතාවරණය පිළිබඳ නිවැරදි අධ්‍යයනයක් හෝ පර්යේෂණයක් නොකර ජයග්‍රහණය කළ නොහැකියි.

ඔබ එය නොකඩවා කළ යුත්තේ අද යුද්ධය හුදු ආයුධ මගින් කෙරෙන ගැටීමක් නොවන නිසයි. එය සෙවණැලි යුද්ධයක් විය හැකියි. ඒ වගේම ප්‍රොක්සි යුද්ධ පවා තිබෙනවා. මේ සියල්ල ඔබ අධ්‍යයනය කළයුතුයි. යුද්ධයක් හට ගන්නේ රාජ්‍ය තාන්ත්‍රික සබඳතා බිඳී යන අවස්ථාවකයි. එවිට ඔවුන් යුද ආයුධමය ගැටුමකට මුලපුරනවා.

ගෙන්ජිස් ඛාන් සහ ඊට පසුව සිදුවු දේත් සෝවියට් සංගමය සහ ඔවුන්ගෙන් පසුව ඇති වූ රුසියානු අධිරාජ්‍ය එම රටවල්වල ජනගහණයේ සිදුකළ වෙනස්කම් පිළිබඳවත් ඔබ ඉතිහාසයේ දී අධ්‍යයනය කර තිබෙනවා.

මෙම රටවලට පවතින්නේ පොදු උරුමයක්. ඔබ මතක තබා ගත යුතු තවත් කරුණක් තිබෙනවා. ඒ දෙවැනි ලෝක යුද්ධයේ දී ස්ටාලින්ග්‍රෑඩ් සිට ඉදිරියට සිදු කළ රුසියානු යුද්ධයන් සිදු කරන ලද්දේ යුක්‍රේන භූමියේ බවයි. ඒ වගේම සෝවියට් සංගමයේ ස්ටාලින්ගෙන් පසු බිහි වූ නායකයන් දෙදෙනෙක් වන කෟෂෙව් (Khrushchev) සහ බ්‍රෙෂ්නෙව් (Brezhnev) බිහි වූයේ යුක්‍රේනයෙන්. මේ කාරණාත් මෙම රුසියාවේ උග්‍ර බේදීයාමට හේතු සාධක වූ බව පෙනී යනවා.

යුද හමුදාපතිවරයා පවසන අන්දමට මෙයින් අපට සෘජු හමුදාමය බලපෑමක් සිදු වන්නේ නැහැ. නමුත් මෙහිදී අධ්‍යයනය කළ හැකි දේ තිබෙනවා. මේ පිළිබඳ මට එක්සත් ජාතින්ගේ සංගමයේ මහලේකම් සහ තවත් රටවල නායකයන් කිහිප දෙනෙකු සමග ඊජිප්තුවේ දී කතා කිරීමට අවස්ථාව ලැබුණා.

එම සාකච්ඡාවේ සාරාංශය වූයේ රුසියාව සාම්ප්‍රදායික නොවන, උපායමාර්ගික යුද්ධයකට යොමූ වූයේ ඇයි ද යන්නයි. එම නිසා රුසියාවට ඒකාබද්ධ විධානයකට පැමිණිය නොහැකි වීම පුදුමයට කාරණකාවක් නොවන අතර, යුක්‍රේනයටත් එසේ කළ නොහැකි වුණා.

එහෙත් යුක්‍රේනය බ්‍රිතාන්‍ය මගින් ගොඩනගන ලද ඒකාබද්ධ විධානයකට දැන් යොමු වී තිබෙනවා. යුක්‍රේනයට ශක්තිය ලැබුනේ ඔවුන්ගෙන්. එහි ප්‍රතිඵලයක් ලෙස රුසියාව බලාපොරොත්තු වෙන්නේ කියෙව් නගරය අත්පත් කර ගැනීම සහ ඉක්මණින් යුද්ධය අවසන් කිරීමයි. රුසියාව කියෙව් නගරයට අවතීරණ වීමේ දී මුහුණ දුන් විශාලම ගැටලුව වූයේ ඔවුන් ක්‍රමෝපායික යුද්ධයක් සම්බන්ධයෙන් අවධානය යොමු කිරීම හේතුවෙන් ඔවුනට ලැබෙන උපකරණ ඇතුළු සැපයුම් ප්‍රමණවත් නොවීමයි.
සාම්ප්‍රදායික යුද්ධ සඳහා ඔවුන් සතුව තිබූ උපකරණ පිළිබඳ බැලුවේ නැහැ. එමෙන්ම ඔවුන්ට සැපයුම් ලැබුණ මාර්ගය දූෂිත ක්‍රම‍වේදයක් වූ නිසා අත්බෝම්බ 100ක් අවශ්‍ය තැනට ලැබුණේ 90ක් පමණයි. ඔවුන්ට ආයුධ හා පතරොම් හිඟයකට පවා මුහුණදීමට සිදු වුණා. ඊට අමතරව එහි පුපුරා නොයන අත්බෝම්බ ද ක්‍රියාත්මක නොවන තුවක්කු ද ඔවුන්ට ගැටලුවක් වුණා.

එහිදී අවංකභාවය සහතිකවීම සහ යහපත් සැපයුම් ක්‍රියාවලියක් පවතින බව සහතිකවීම අත්‍යාවශ්‍ය බව පෙනී යන්නක්. මෙලෙස කියෙව් නගරය අත්පත් කර ගැනීමට ඇති නොහැකියාව නිසා එක පාර්ශවයකටත්, තවත් ජයගත නොහැකි යුද්ධයක නවමු ආරම්භයක් අපට පෙනෙන්න තිබෙනවා. ඔබ දකින්න ඇති යුක්‍රේනය ඔවුන්‍ගේ යුද ටැංකි ආයුධ සහ මිසයිල භාවිතා කළේ කොහොමද කියලා.

ඔබ අපට ලබාදුන් දත්ත අනුව යුක්‍රේනය සතු අවි ආයුධ මෙන් දෙතුන් ගුණයක් ‍රුසියාව සතු බව පෙනී යනවා. නමුත් සන්නද්ධ යුදමය වාහන ගැන අවධානය යොමු කිරීමේ දී යුක්‍රේනයට තිබුණේ රුසියාව මෙන් අඩක ප්‍රමාණයක් බවත් පෙනී යනවා.

ඒ නිසා කල්පනා කළ යුතු කාරණය වන්නේ, රුසියාවේ හමුදාවෙන් අඩක් හෝ ඊටත් වඩා රුසියාවෙන් පිටත යුක්‍රේනයේ ‍යොදවා තිබෙන බවයි. එහි ඔවුන්ට වාසිසහගත තත්ත්වයක් තිබුණා.

මෙම උපාය මාර්ගයෙන්ගෙන් ඔබට අධ්‍යයනය කිරීමට ඇත්තේ කුමක්ද, එහි පළවිපාකයන් මොනවාද? අපි ආර්ථිකයෙන් අරඹමු. අපිට මෙහිදී ගැටලු දෙකක් පවතිනවා. පළමුවැන්න විදේශ විනිමය අර්බුදය, දෙවැන්න ආහාර අර්බුදය. යුක්‍රේන තත්ත්වය නිසා ඇති වූ ආහාර අර්බුදයේ බලපෑම අපට මෙම වසරේ දැනුනේ නෑ. නමුත් ලබන වස‍රේදී එය අපට දැනෙන්නට පටන් ගනීවි. එසේ වන්නේ ඔවුන් ලෝකයේ ධාන්‍යාගාරය වන යුක්‍රේනය බිඳ දැමීම නිසයි. අපි රුසියාවෙන් හාල් ඇටයක්වත් මිලට ගන්නේ නැහැ. අපිට දැනට තිබෙන්නේ දේශීය වශයෙන් ඇති වූ අර්බුදකාරී තත්ත්වයක්. නමුත් මෙය අනාගතයේ දී උග්‍ර විය හැකියි. ඒ නිසා ලංකාව ආහාර සුරක්ෂිතතාව ඇති කර ගැනීම සඳහා පියවර ගෙන තිබෙනවා. ඒ නිසා අපි ලබන වසරටත් ඉන් පසුවටත් ආහාරවලින් ස්වයංපෝෂිත වීමට උත්සාහ දරමු.

හාල් සම්බන්ධයෙන් ගත් කළ අප දැනට මහ කන්නය නිසා ස්වයංපෝෂිත තත්ත්වයක් ලබා තිබෙනවා. නමුත් ලබන වසරේ දීර්ඝකාලීන නියඟයක් ඇතිවුවහොත් ඇතිවන තත්ත්වය පිළිබඳව කණගාටුවට පත් වෙන්න වෙයි. ඒ නිසා අපි ආහාර සුරක්ෂිතතාව සහ දැනට ඇති තත්ත්වය වඩා හොද තත්ත්වයකට පත්කර ගැනීම සඳහා අවධානය යොමු කළයුතුයි.

අනෙක් ගැටලුව වන්නේ රුසියානු උපායමාර්ගයයි. ඔවුන් උත්සාහය වන යුක්‍රේන ආර්ථිකය බිඳ දැමීම දැනටමත් ඔවුන් සාර්ථකව සිදු කරමින් සිටිනවා. යුක්‍රේනයේ ධාන්‍ය වගා කිරීම සඳහා භාවිතා කළ සියලු ඉඩ කඩම් දැන් යුද පිටියක්. එහි වපුරා ඇති බිම් බෝම්බ ඉවත් කිරීමට වසර ගණනාවක් ගතවෙයි. ඇති අතර ශ්‍රී ලංකාවේ බිම්බෝම්බ වළලා ඇති ප්‍රදේශ පවිත්‍ර කිරීම තවමත් සිදුවන බව අප අමතක කළයුතු නැහැ.

යුක්‍රේන ආර්ථිකයට මෙමගින් වූ බලපෑම ඩොලර් ට්‍රිලියනයක් පමණ වූ බව විශ්වාස කෙරෙනවා. යුක්‍රේනයට යථා තත්ත්වයට පත්වීමට වසර ගණනාවක් ගතවනුඇති අතර රුසියාවත් එපමණ නොවුනත් යම් ආකාරයක හානියකට මුහුණ දී සිටිනවා. නමුත් ඔවුන්ට යුක්‍රේනයට වඩා ඉක්මණින් යථා තත්ත්වයට පත්විය හැකියි.

රුසියාවේ ශක්තිය වන්නේ ඔවුන් සතුවන තෙල් සහ ඉන්ධනයි. මේ වන විට රුසියාව සහ සෞදි අරාබිය ලොව සිටින ප්‍රමුඛ පෙළේ ඉන්ධන නිෂ්පාදනකරුවන් වනවා. ඔවුන් මේ වන විට ඔවුන්ගේ නිෂ්පාදන අඩු කිරීමට අදිටන් කර ගෙන සිටිනවා. මෙලෙස තෙල් මිල වැඩිවන විට ඒ සඳහා මුදල් නැති වන්නේ අපිටයි. මෙම තත්ත්වයටත් අපට ලබන වසරේදී මුහුණ දීමට සිදු වෙනවා.

මෙම යුද්ධය දැන් යුද පිටියෙන් ආර්ථිකයට, ආහාර සැපයුමට, පොහොරවලට සහ ඉන්ධන වෙතට විතැන් වෙමින් පවතිනවා. ඉතින් මේ තත්ත්වය කුමන ආකාරයකින් බලපායිද යන්න විවෘත ප්‍රශ්නයක්. එයට අපි ප්‍රතිචාර දක්වන්නේ කොහොමද ද යන්න සම්බන්ධයෙන් දැන් සිටම අපි සූදානම් විය යුතුයි. පෙබරවාරි සහ මාර්තු මාසවල දී තෙල් මිල ඉහළ යාමක් සිදු විය හැකියි. අතර අප එයට මුහුණ දිය යුතුයි.

එසේ වන්නේ නරක ආර්ථික කළමනාකරණය නිසා සිදුවී ඇති ණය ගෙවීම් අර්බුදයට අමතරවයි. එය අපට අර්බුදයකට මුහුණදීමට සිදුවන තවත් තත්ත්වයක්. අපි මේ වන විට එම අර්බුදයන්ට මුහුණදිම සඳහා සැලසුම් සකස් කරමින් සිටිනවා. එමෙන්ම අපේ කලාපයට බලපාන තවත් ක්ෂේත්‍රයක් වන්නේ නිෂ්පාදන බලපෑමයි. අප එයට මුහුණ දෙන්නේ කොහොමද?

අපි මේ අත්දකිමින් සිටින්නේ දෙවන ලෝක යුද්ධයෙන් පසුව තිබුණු රුසියාව සහ ඇමරිකාව බලවතුන් වූ ලෝක තත්ත්වයෙහි බිඳ වැටීමයි. මෙම නවමු තත්ත්වය කොමියුනිට්ස්වාදයේ බිඳවැටීම දක්වා පැවතුණා. ප්‍රථමයෙන් එය ඇමරිකාව සහ රුසියාව බිඳවැටීම ලෙස පෙනී ගිය අතර, දැන් එය යුරෝපය සහ රුසියාව ලෙස පෙනී යනවා.

දෙවනුව ඇමරිකාව සහ චීනය අතර ද එවන් තත්ත්වයක් දැකිය හැකියි. එමෙන්ම ඇමරිකාව තුළ ජනාධිපති ට්‍රම්ප්ට රුසියාව උපකාර කළ බව මතක තබාගත යුතුයි. එය රුසියාවේ ප්‍රතිපත්ති සම්පාදනයේ දී පෙනෙන්නට තිබුණා. එය අපට ඩිමොක්‍රටික් පක්ෂය සහ රිපබ්ලිකන් පක්ෂය යුද්ධය දෙස බැලූ ආකාරයෙන් පෙනී යනවා. ඒ නිසා මේ තත්ත්වය යටතේ අපට දක්නට තිබෙන්නේ ලෝකයේ පැවතුම් පිළිවෙළ බිඳි යන බවත්, එහි අධිකාරිත්වය ඉන්පසුව ලබන්නේ කවුරුන්ද යන්නත් ගැටලුවක්. මෑතකදී ජනාධිපති බයිඩින් සහ ජනාධිපති ෂී අතර සාකච්ඡාවක් පැවතුණ අතර තාවකාලික ‍අන්‍යොන්‍ය අවබෝධයකට පැමිණ බවක් පෙ‍නෙන්නට තිබෙනවා.

ඒ වගේම මේ තත්ත්වය තවත් යුරෝපීය ගැටලුවක් වෙමින් යුරෝපය යුද්ධයකට යොමුවන බවකුත් පෙනී යනවා. ලෝකයේ අනෙක් කොටස් එයින් ඉවත් කර තැබෙන අතර ආසියාව විශේෂයෙන්ම දකුණු ආසියාව සහ අප්‍රිකාව එයින් ඉවත් වී ඇත්තේ මෙම ගැටළුව සම්පුර්ණයෙන්ම යුරෝපීය ගැටළුවක් බවට පරිවර්තනය කරමින්.
මෙම යුද්ධයට අපිව සම්බන්ධ කර ගැනීමට ගැණුනු උත්සාහයක් සාර්ථක වී නැහැ. නමුත් මේ පිළිබඳ අපි අවධානයෙන් නොසිටියහොත් මෙය ලබන වසරේදී ගෝලීය ගැටලුවක් බවට පත්වනු නොඅනුමානයි. ඒ නිසා ආසියාව විශේෂයෙන් ඉන්දියානු සාගරය එමෙන්ම ආසියානු සහ අප්‍රිකානු රටවල් අතර සමගියක් පවතින බවට අපි සහතික විය යුතුයි.

අ.පො.ස.(සා.පෙළ) විභාගය සඳහා 2021 (2022) වර්ෂයේ දී පළමුවරට පෙනී සිට විභාගය සමත්ව 2024 වර්ෂයේ දී අ.පො.ස (උ.පෙළ) විභාගයට පෙනී සිටීමට නියමිත, ආර්ථික දුෂ්කරතා ඇති සිසුන්ට ජනාධිපති අරමුදල මගින් ශිෂ්‍යත්ව පිරිනැමීමේ වැඩසටහන සඳහා අයදුම්පත් කැඳවීම දෙසැම්බර් 23 වනදායින් අවසන් කෙරේ.

ශිෂ්‍යත්ව අපේක්ෂකයන් අදාළ අයදුම්පත්‍ර විදුහල්පති මගින් ලබාගෙන එය නිසි පරිදි සම්පූර්ණ කර ආදායම් තත්ත්වය පිළිබඳ ග්‍රාම නිලධාරී නිර්දේශය සහිතව 2022-12-23 වන දිනට පෙර විදුහල්පති වෙත භාරදීම විධිමත් ක්‍රමවේදය වන අතර එම අයදුම්පත්‍ර විදුහල්පතිවරු විසින් කලාප අධ්‍යාපන කාර්යාල හරහා ජනාධිපති කාර්යාලය වෙත භාර දීම සිදු කරනු ලබයි.

නමුත් අයදුම්පත් ඉදිරිපත් කිරීමේ ක්‍රමවේදය පිළිබඳ අවබෝධයක් නොමැතිකම හේතුවෙන් අයදුම් පත් විශාල සංඛ්‍යාවක් සෘජුව ජනාධිපති අරමුදල වෙත ද යොමු කර තිබිණි.

එබැවින් ශිෂ්‍යත්ව පිරිනැමීමේ කටයුතු ප්‍රමාදයකින් ‍තොරව විධිමත්ව ඉටුකර ගැනීම සඳහා එම අයදුම් පත් සෘජුව ජනාධිපති අරමුදල වෙත යොමු නොකොට, අදාළ විදුහල්පතිවරු වෙත භාරදෙන ලෙස සියලු ශිෂ්‍යත්ව අපේක්ෂකයින් වෙත දැනුම් දී සිටියි.

ශිෂ්‍යත්ව සුදුසුකම් ලැබීමට අයදුම්කරුවන්ගේ පවුලේ මාසික ආදායම රු. 75,000/- නොඉක්මවිය යුතු අතර රජයේ පාසලක හෝ ගාස්තු අය නොකරන පෞද්ගලික පාසලක හෝ ඉගෙනුම ලබන ශිෂ්‍යයෙක් විය යුතුය.

අයදුම්කරු 2021 (2022) වර්ෂයේදී පවත්වන ලද අ.පො.ස (සා.පෙළ) විභාගයට පළමුවරට පෙනී සිට 2024 වර්ෂයේ දී අ.පො.ස (උ.පෙළ) හැදෑරීම සඳහා සම්පූර්ණ සුදුසුකම් ලැබ සිටිය යුතුය.

එක් අධ්‍යාපන කලාපයකට හිමිවන ශිෂ්‍යත්ව ප්‍රමාණය 30ක් වන අතර, එලෙස ‍තෝරා ගන්නා ශිෂ්‍යත්වලාභීන්ට අ.පො.ස (උ.පෙළ) විභාගයට පෙනී සිටින තෙක් මසකට රු. 5,000.00 බැගින් මාස 24ක උපරිම කාලසීමාවක් සඳහා ශිෂ්‍යාධාරය පිරිනමනු ලැබේ.

පොල් වගාව ආශ්‍රිතව මේ දිනවල සීග්‍රයෙන් ව්‍යාප්ත වන "සුදු මැස්සා" (Whitefly) කෘමි උවදුර මර්දනය තිරසරව කළමනාකරණය කිරීම පිළිබඳ සාකච්ඡාවක් ජනාධිපති ලේකම් සමන් ඒකනායක සහ ජනාධිපති අධ්‍යක්ෂ ජනරාල් (ප්‍රජා කටයුතු) රජිත් කීර්ති තෙන්නකෝන් යන මහත්වරුන්ගේ ප්‍රධානත්වයේ ඊයේ (19) පස්වරුවේ ජනාධිපති කාර්යාලයේ දී පැවැත්විණි.

මෙම කෘමි උවදුර පිළිබඳ පොල් වගා කරුවන් දැනුවත් කිරීම සඳහා විවිධ දැනුවත් කිරීමේ වැඩසටහන් පොල් පර්යේෂණ ආයතනය ඇතුළු වගකිවයුතු ආයතන විසින් මේ වන විටත් ග්‍රාමීය මට්ටමින් ක්‍රියාවට නංවා තිබෙන අතර, ඒවා ක්‍රියාත්මක කිරීමේ දී මතුව ඇති ගැටලු පිළිබඳ මෙහිදී අවධානය යොමු විය.

මෙම දැනුවත් කිරීමේ වැඩසටහන් ක්‍රියාවට නැංවීමේ දී විද්‍යුත් හා මුද්‍රිත මාධ්‍ය ඇතුළු සමාජ මාධ්‍යයන්හි දායකත්වය විධිමත්ව ලබා ගැනීම පිළිබඳව ද සාකච්ඡාවට ලක් කෙරිණි.

මෙහිදී නිලධාරීන් පෙන්වා දුන්නේ කාළගුණික වෙනස්කම්, නීත්‍යානුකූල නොවන මාර්ගවලින් ගෙන ආ පොල් පැළ වගා කිරීම සහ ස්වභාවික පරපෝෂිතයන් එකවර අඩුවී යාම වැනි හේතු මෙම කෘමි උවදුර ව්‍යාප්තවීමට බලපා ඇති බවත්, කොළඹ, ගම්පහ, කෑගල්ල, කළුතර ඇතුළු දිවයිනේ ප්‍රදේශ රැසක පොල් වගාකරුවන් මේ වන විට මෙම කෘමි උවදුරේ බලපෑමට ලක්ව සිටින බවය.

මෙම තත්ත්වය මර්දනය කිරීම සඳහා අදාළ ආයතන මගින් ගෙන ඇති පියවර ප්‍රායෝගිකව ක්‍රියාත්මක කිරීමේ දී නිලධාරීන්ගේ හිඟය ප්‍රධාන ගැටලුවක් වී ඇති බව මෙහිදී සඳහන් කෙරුණු අතර, ඊට විසඳුමක් ලෙස ප්‍රාදේශීය ලේකම්වරුන්ගේ සිට ග්‍රාමීය නිලධාරින් දක්වා සියලු දෙනා මීට දායක කර ගැනීමේ වැඩපිළිවෙළක් සකස් කරන ලෙස ජනාධිපති ලේකම්වරයා උපදෙස් දුන්නේය.

එසේම “සුදු මැස්සා" කෘමි උවදුරෙන් හානි වූ වගාවන් පිළිබඳ නිවැරදි තොරතුරු රැස් කිරීමේ වැදගත්කම පෙන්වා දුන් ජනාධිපති ලේකම්වරයා කෘමි උවදුර මර්දනය කිරීම සඳහා මෙම විෂය සම්බන්ධ කටයුතු කරන විශ්වවිද්‍යාල ප්‍රජාවගේ සහාය ලබා ගැනීමට ද උපදෙස් දුන්නේය.

මතුව ඇති තත්ත්වය පාලනය කිරීම සහ මර්දනය සඳහා පරපෝෂිතයන් වගා කිරීම, අවශ්‍ය යන්ත්‍රෝපකරණ මිලදී ගැනීම වැනි කඩිනම් විසඳුම්වලට යොමු වන ලෙස ද ජනාධිපති ලේකම්වරයා වැඩිදුරටත් උ‍පදෙස් දෙනු ලැබීය.

අදාළ ආයතනවල ප්‍රධානීන් ඇතුළු රාජ්‍ය නිලධාරීහූ මෙම සාකච්ඡාවට එක්ව සිටියහ.

සුරාබදු දෙපාර්තමේන්තුව විසින් 2022 ජනවාරි 01 වනදා සිට 2022 නොවැම්බර් 30 වනදා දක්වා දිවයින පුරා වැටලීම් 31,342ක් සිදුකිරීමට සමත්වී ඇති බව වාර්තා වෙයි.

මේ පිළිබඳ සුරාබදු දෙපාර්තමේන්තුව විසින් නිවේදනයක් නිකුත්කර ඇති අතර ඊට අනුව අදාළ වැටලීම්වලදී අදාළ වරද සම්බන්ධයෙන් පුද්ගලයන් 31,342ක් අත්අඩංගුවට ගෙන ඇති අතර ඒ අතරින් 4,559ක් කාන්තාවන් වේ.

එසේම මෙම වැටලීම්/ග්‍රහණවලදී අත්අඩංගුවට ගන්නා ලද නඩු භාණ්ඩවල මුලු වටිනාකම රුපියල් මිලියන 350 ඉක්මවන බව ශ්‍රී ලංකා සුරාබදු දෙපාර්තමේන්තුව සඳහන් කරයි.

මෙම සුරා, මත්ද්‍රව්‍ය හා දුම්කොල අපරාධ පිළිබඳව අධිකරණය ඉදිරියේ නඩු පැවරීමෙන් අනතුරුව අධිකරණය මගින් රුපියල් මිලියන 118ක් දඩ මුදල් ලෙස පනවා ඇත.

සුරාබදු දෙපාර්තමේන්තුව නිකුත් කළ නිවේදනය පහත දැක්වෙයි.

මරණ දඬුවම්, ජීවිතාන්තය දක්වා සහ බරපතළ අපරාධවලට බන්ධනාගාරගතව සිටින බරපතළ රෝගාබාධවලට සහ වයස්ගත වූ රැඳවියන් විශේෂඥ වෛද්‍ය කමිටුවලට යොමු කර සහන සැපයීමේ ක්‍රමවේදයක් හඳුන්වාදීමට අධිකරණ අමාත්‍යවරයාගේ අවධානය යොමුව තිබේ.

නිවේදනයක් නිකුත් කරමින් අධිකරණ අමාත්‍යාංශය වැඩිදුරටත් පවසන්නේ කාර්යක්ෂම බන්ධනාගාර පද්ධතියක් පවත්වාගෙන යාම අරමුණු කරගනිමින් අධිකරණ ආමාත්‍යවරයා විසින් මෙම තීරණය ගනු ඇති බවය.

එහිදී දිවයිනේ බන්ධනාගාර පද්ධතිය තුළ පවතින අධික තදබදය, සිරකරුවන් පුනරුත්ථාපනය සහ යහපත් පුරවැසියන් ලෙස යළි සමාජගත කිරීමේ අභියෝගය ද සැලකිල්ලට ගෙන බන්ධනාගාර ප්‍රතිසංස්කරණ වැඩපිළිවෙල යටතේ සමාජ අපරාධ අවම කිරීම පිළිබඳවද අමාත්‍යවරයාගේ අවධානය යොමුව තිබේ.

යල් පැනගිය නීති සහ රෙගුලාසි සංශෝධනය කරමින් බන්ධනාගාර පද්ධතිය රටට සහ ජන සමාජයට බරක් නොමැතිව පවත්වාගෙන යාමද මෙහි අරමුණක් වී ඇත.

දිවයිනේ බන්ධනාගාර පද්ධතිය තුළ දඬුවම් ලැබූ සිරකරුවන් 10,200 අධික පිරිසක් සිටින අතර 16,000 අධික පිරිසක් විවිධ සුළු අපරාධ හා වැරදි යටතේ රිමාන්ඩ් සිරකරුවන් ලෙස රැඳවුම් නියෝග ලැබ තිබේ.

ලෝකයේ දියුණු රටවල සහ ආසියාතික ඇතැම් රටවල ද බන්ධනාගාර පද්ධතිය සමාජ අපරාධ පාලනය කරමින් යහපත් පුරවැසියන් ලෙස සමාජගත වීම සඳහා විශේෂ පුනරුත්ථාපන වැඩසටහන් ක්‍රියාත්මක වුවද, ශ්‍රී ලංකාවේ බන්ධනාගාර පද්ධතිය තුළ සමාජ විද්‍යාත්මක පර්යේෂණවලින් සිරකරුවන්ගේ ආකල්ප එතරම් දියුණු මට්ටමින් සංවර්ධනය නොවන බව හඳුනාගෙන තිබේ .

ඒ අනුව සිරකරුවන්ගේ සුබසාධනය, සමාජ ආරක්ෂාව සහ ආකල්ප පෝෂණය පිළිබඳව ද අවධානය යොමු කරමින් දැනට බන්ධනාගාරගත රෝග සංකූලතා හා වෙනත් ශාරීරික සහ මානසික රෝග සැලකිල්ලට ගෙන බන්ධනාගාර පද්ධතිය තුළ ගුණාත්මක වෙනසක් සිදු කිරීම සඳහා මෙම පියවර කඩිනමින් ගැනීමට අධිකරණ අමාත්‍යංශය කටයුතු කරන බවද අධිකරණ අමාත්‍යවරයා පවසයි.

මැල්කම් රංජිත් කාදිනල් හිමි කොළඹ අගරදගුරු තනතුරෙන් විශ්‍රාම යාමට සූදානම් වෙයි.

ඒ බව දන්වමින් ශුද්ධෝත්තම ප්‍රැන්සිස් පාප් වහන්සේ වෙත කාදිනල් හිමියන් විසින් ලිපියක් යොමු කර තිබේ.

වයස අවුරුදු 75 ඉක්මවන අගරදගුරු තුමන්ලා ධුරයෙන් ඉල්ලා අස්වන බව දැනුම් දීම ක්‍රිස්තියානි ආගමේ සම්ප්‍රදාය වෙයි.

එම සම්ප්‍රදාය අනුව යමින් මැල්කම් රංජිත් කාදිනල් හිමියන් මේ බව පාප් වහන්සේට දන්වා ඇති අතර කාදිනල් හිමිව තවදුරටත් අගරදගුරු තනතුරේ තබා ගන්නවා ද නැද්ද යන්න පාප් වහන්සේ විසින් තීරණය කරනු ලැබීමට නියමිතය.

කෙසේ වුවත් තනතුරේ වෙනසක් වුවද මැල්කම් රන්ජිත් හිමියන්ගෙ කාදිනල් ධුරය එලෙසින්ම පවතී.

කොළඹ වරාය නගරය සඳහා නව වීසා වර්ගයක් හඳුන්වා දීමට කැබිනට් මණ්ඩලයේ අනුමැතිය හිමි වූ බව කැබිනට් ප්‍රකාශක ජනමාධ්‍ය අමාත්‍ය ආචාර්ය බන්දුල ගුණවර්ධන පවසයි.

කොළඹ වරායේ නගරයේ ස්ථාපිත කිරීමට නියමිත ජාත්‍යන්තර වෙළෙඳ, නාවික හා මෙහෙයුම්,මූල්‍ය,තොරතුරු තාක්ෂණය හා සංචාරක,වැනි සේවාවන් සඳහා පැමිණෙන ආයෝජකයින් සහ අනෙක් පාර්ශවයන් සඳහා මෙම නව වීසා වර්ගය හඳුන්වා දී තිබේ.

අමාත්‍යවරයා මේ බව සඳහන් කර සිටියේ රජයේ ප්‍රවෘත්ති දෙපාර්තමේන්තුවේ අද (20) පැවති කැබිනට් තීරණ දැනුම් දීමේ මාධ්‍ය හමුවට එක්වෙමින් ය.

ඒ අනුව අනුමත වීසා කාණ්ඩ පහතින් දැක්වේ.

* වාස වීසා කාණ්ඩය යටතේ ආයෝජකයින් සඳහා “ආයෝජක වීසා” කාණ්ඩය

* සේවා නියුක්තිකයින් වෙනුවෙන් “සේවා නියුක්ත වීසා” කාණ්ඩය

*කොළඹ වරාය නගරය තුළ බදු පදනම මත වාසය කරනු ලබන විදේශකයින් සඳහා “සීපීසී නේවාසික දේපළ බදු ගැනුම්කරු” වීසා කාණ්ඩය

සංචාරක, ආරක්ෂක සහ ක්‍රීඩා ක්ෂේත්‍රයට අදාළ තවත් භාණ්ඩ වර්ග 10ක ආනයන සීමා ඉවත් කිරීමට පියවර ගෙන ඇතැයි මුදල් රාජ්‍ය අමාත්‍ය රංජිත් සියඹලාපිටිය පවසයි.

අමාත්‍යවරයා පෙන්වා දෙන්නේ සංචාරක කර්මාන්තය සඳහා අවශ්‍ය ශක්තිජනක පාන, ආවේෂන කැමරා පද්ධති (CCTV) සඳහා අවශ්‍ය උපකරණ, ගෘහ භාණ්ඩ නිෂ්පාදනය සඳහා අවශ්‍ය තුනී ලෑලි (MDF) සහ ක්‍රීඩා උපකරණ ඊට අයත් බවයි. ආනයන සීමා ලිහිල් කළ තුන් වැනි අවස්ථාව මෙය බවත් අමාත්‍යවරයා පවසයි.

“රට මුහුණ දී ඇති විනිමය ගැටලුවට විසඳුම් ලෙස ආනයන වියදම් සීමා කිරීමට රජය පියවර ගත්තා. 2020 වසරේ දී ආනයන වියදම දැක්වුණේ රුපියල් මිලියන 16055ක් ලෙසයි. එය 2021 වසරේ දී එය ඩොලර් මිලියන 20637ක් ලෙස දැක් වුණා."

2022 අගෝස්තු 23 වැනි දා භාණ්ඩ 1465ක ආනයනය සීමා කිරීමට රජය තීරණය කළා. ඒ අනුව ආනයන සීමා පැනවූ දා සිට නොවැම්බර් මස 23 දා දක්වා ගත වූ මාස තුනක කාලය තුළ ඉතිරි කර ගත හැකිව තිබෙන ඩොලර් ප්‍රමාණය මිලියන 1211ක්. මේ මුදල අපි සංසන්ධනාත්මකව සලකා බලමු. අපි 2021 වසරේ ආහාර පාන ආයනයන වෙනුවෙන් ඩොලර් මිලියන 1666.5ක් වැය කරල තියෙනවා. ඖෂධ වෙනුවෙන් ඩොලර් මිලියන 882.5ක් වැය කළා. දිගු තෙල් පෝලිම්වල ඉන්න කාලෙ අපි ඉන්ධන වෙනුවෙන් වැය කළ මුදල ඩොලර් මිලියන 3742.9ක්. පොහොර වෙනුවෙන් ඩොලර් මිලියන 158.2ක් වෙන් කරල තියෙනවා” යයිද අමාත්‍යවරයා සඳහන් කරයි.

වාණිජ මණ්ඩලය, කර්මාන්ත අංශයේ ව්‍යවසායකයන්, ආයෝජන මණ්ඩලය ඇතුළු පාර්ශ්වවල ඉල්ලීම් මත භාණ්ඩ ආනයනය සීමා කළ දා සිට මේ දක්වා කාලය තුළ අවස්ථා තුනක දී සීමා ලිහිල් කිරීමට රජය තීරණය කළේ ය. ඒ අනුව සැප්තැම්බර් 9 දින භාණ්ඩ 708ක, නොවැම්බර් මස 23 දින භාණ්ඩ 77ක සහ දෙසැම්බර් මස 19 දින භාණ්ඩ වර්ග 10ක සීමා ඉවත් කෙරිණි. මෙලෙස ආනයන සීමා ලිහිල් කරන භාණ්ඩ ආනයනය පිළිබඳව විධිමත් පසු විපරමක් සිදු කරන බව ද අමාත්‍යවරයා වැඩිදුරටත් පවසයි.

පෙබරවාරි මාසය වන විට ලංකාවෙි මූල්‍ය තත්ත්වය මීට වඩා යහපත් විය හැකි බව හිටපු අමාත්‍ය නවීන් දිසානායක පවසයි.

ඡන්දය යනු රටේ ජනතාවගේ ස්වර්ණමය අයිතිය බැවින් ඡන්දය නිසි කලට වේලාවට පවත්වන බවත් රටට අවශ්‍ය වී තිබෙන්නේ වෘත්තීයමය දේශපාලනඥයෙක් මෙන්ම රටට ආදරය කරන අර්බුද කළමනාකරණය කළ හැකි නායකයෙක් බවත් සඳහන් කර සිටියි.

නවීන් දිසානායක මේ බව සඳහන් කර සිටියේ එක්සත් ජාතික පක්ෂයේ සිරිකොත මුලස්ථානයේ පැවති මාධ්‍ය හමුවකදී අදහස් දක්වමින්ය.

සමස්ත චිත්‍රය දෙස බලන්නේ නැතිව එක කෝණයකින් බලා නිගමනයකට නොඑන ලෙසත් සියලුම පාර්ශ්වයන් එකතු වී රට ඉදිරියට ගෙනයෑමේ වගකීම එක්සත් ජාතික පක්ෂයට තිබෙන බවත් ඔහු පැවසීය.

එක්සත් ජාතික පක්ෂය මීට පෙරත් සන්ධානගත වෙලා ඉදිරිපත් වුණු පක්ෂයක් බවද ඒ කාරණය පක්ෂයට වගේම තමාටත් වෙනසක් නැතිබවද නවීන් දිසානායක  කීය .

ශ්‍රී ලංකා පොලිසියේ කොස්තාපල් සිට පොලිස් පරීක්ෂක දක්වා දහදාහකට ආසන්න පිරිසක් ඊළඟ තනතුරට උසස් කිරීමට, අද පැවති කැබිනට් මණ්ඩල රැස්වීමේදී අනුමැතිය ලැබී තිබේ.

ඒ අනුව එම ශ්‍රේණින්ට අදාළ පිරිමි පොලිස් නිලධාරීන් 8312ක් සහ කාන්තා පොලිස් නිලධාරිනියන් 1005 කට උසස්වීම් ලැබීමට නියමිතය.

වසර ගණනාවක් තිස්සේ උසස්වීම් අහිමිව සිටි මෙම නිලධාරීන්ට අදාළ උසස්වීම් ලබාදීම සඳහා වූ කැබිනට් පත්‍රිකාව කැබිනට් මණ්ඩලයට ඉදිරිපත් කර තිබුණේ මහජන ආරක්ෂක අමාත්‍ය ටිරාන් අලස් විසින් ය.

පවතින ආර්ථික අර්බුදය විසඳා ගත හැකි එකම ක්‍රමය ලෙස තමන් දකින්නේ නව ආණ්ඩුවක් නිර්මාණය වීම බව සමගි ජන බලවේගය පාර්ලිමේන්තු මන්ත්‍රී හර්ෂ ද සිල්වා සඳහන් කරයි.

ඔහු මේ බව සඳහන් කර සිටියේ විපක්ෂ නායක කාර්යාලය මාධ්‍ය හමුවකදීය .

අලුත් ආණ්ඩුවක් විසින් ඉදිරිපත් කරන වැඩපිළිවෙළක් ජාත්‍යන්තරය හා රටේ ජනතාව පිළිගත යුතු බව ද එසේ පිළිගැනීම් හරහා ආර්ථික අර්බුදය සමනය කර හැකි බවද මන්ත්‍රීවරයා එහිදී පැවසීය.

හර්ෂ ජෝක් කරන්න අරගෙන !

මන්ත්‍රීවරයා ගේ මේ ප්‍රකාශය සම්බන්ධයෙන් ප්‍රතිචාර දක්වමින් දේශපාලන විචාරකයකු පවසා සිටියේ සජිත් ප්‍රේමදාස විපක්ෂ නායකයා ගේ හිත හැදීමට මන්ත්‍රී හර්ෂ විහිළු සපයන්නෙකු බවට පත්ව ඇති බවය.

ණය ප්‍රතිව්‍යුහගත කිරීම සහ ජාත්‍යන්තර මූල්‍ය අරමුදල සමග වැඩසටහනක් වෙත යාමෙන් මිස වෙනත් විකල්පයක් මේ මොහොතේ රට හමුවේ නොමැති බවත් එම කටයුත්ත සාර්ථක ලෙස ජනාධිපති රනිල් වික්‍රමසිංහ දියත්කර ඇති බවත් ඔහු පවසයි .

එවැනි පසුබිමක විකල්පය කුමක්ද යන්න නොකියා ආණ්ඩු මාරුවක් ගැන කියවීම සම්බන්ධයෙන් මන්ත්‍රීවරයා ලැජ්ජා වියයුතු බවත් විචාරක මතය වී තිබේ.

බෞද්ධ හා පාලි විශ්වවිද්‍යාලයේ අධ්‍යයන හා පරිපාලන කටයුතු පිළිබඳ එකඟතාවකට පැමිණීමට සියලුම මහානායක හිමිවරුන් සමඟ සාකච්ඡා කිරීමටත්, එතෙක් විශ්වවිද්‍යාලය වසා දැමීමටත් කැබිනට් මණ්ඩලය තීරණය කර ඇත .

ජනාධිපති රනිල් වික්‍රමසිංහ ගේ ප්‍රධානත්වයෙන් පැවති කැබිනට් මණ්ඩල හමුවේදී මේ තීන්දුව ගෙන ඇත .

බෞද්ධ හා පාලි විශ්වවිද්‍යාලයේ ශිෂ්‍ය භික්ෂූන් ගේ විනය විරෝධී හැසිරීම පදනම් කරගෙන මේ වන විට තාවකාලිකව වසාදමා ඇත.

ශිෂ්‍ය භික්ෂූන් ගේ විනය විරෝධී හැසිරීම් දැක්වෙන වීඩියෝ කිහිපයක්ම මේ වන විට සමාජ මාධ්‍ය හරහා ප්‍රසිද්ධ වී ඇත.

පාර්ලිමේන්තුවේ දී පසුගියදා විවාදයකින් පසුව සංශෝධන සහිතව වැඩි ඡන්දයෙන් සම්මත වූ දේශීය ආදායම් (සංශෝධන) පනත් කෙටුම්පත සදහා කථානායක මහින්ද යාපා අබේවර්ධන අද (19) සිය සහතිකය සටහන් කළේය.

පසුගියදා (09) පාර්ලිමේන්තුවේදී පැවති මෙම පනත්කෙටුම්පත දෙවනවර කියවීමේ විවාදයෙන් අනතුරුව විරුද්ධ පාර්ශවයෙන් ඡන්ද විමසීමක් ඉල්ලා සිටි අතර එහිදී පනත් කෙටුම්පතට පක්ෂව ඡන්ද 83ක් ලැබුණු අතර විරුද්ධව ඡන්ද 41ලැබිණි.

ඉන්පසු පනත් කෙටුම්පත තෙවනවර කියවීම සඳහා ද විරුද්ධ පාර්ශවයෙන් ඡන්ද විමසීමක් ඉල්ලා සිටි අතර එහිදී පනත් කෙටුම්පතට පක්ෂව ඡන්ද 79ක් ලැබුණු අතර විරුද්ධව ඡන්ද 36 ලැබිණි. මේ අනුව මෙම පනත් කෙටුම්පත 2022 අංක 45 දරන දේශීය ආදායම් (සංශෝධන) පනත ලෙස අද සිට බලාත්මක වේ.

අරගලයට සම්බන්ධ වුණේ අයිස් ගසා මත්වුණු පිරිසක් බව අමාත්‍ය ප්‍රසන්න රණතුංග පවසයි.

කුඩු ගංජා අයිස් විකුණන පිරිසක් එම ද්‍රව්‍ය විකුණා ගැනීම සඳහා අරගලකරුවන් පාවිච්චි කළ බව පැවසූ අමාත්‍යවරයා ඇතැම් දේශපාලඥයන්ද සිය අරමුණු ඉටුකර ගැනීම සඳහා අරගලය පහත් ආකාරයෙන් යොදාගත් බවත් ප්‍රකාශ කළේය.

අමාත්‍යවරයා මේ බව සඳහන් කර සිටියේ මිනුවන්ගොඩ වෙළෙඳ පොළ භූමියේ පැවති රැස්වීමකදීය.

අද අරගලකරුවන් සත්‍ය පාපොච්චාරණය කිරීමට පටන් ගෙන ඇතැයිද අමාත්‍යවරයා සඳහන් කළේය.

අරගලය ප්‍රජාතන්ත්‍රවාදී එකක් නොවන බවත් අහිංසක මිනිසුන්ගේ ගෙවල් ගිනි තැබීම ප්‍රජාතන්ත්‍රවාදය දැයි තමා ප්‍රශ්න කරන බවත් ඔහු පැවසීය.

සේවා කාලය නිමා කර සිය රට බලා නික්ම යන එක්සත් ජාතීන්ගේ සංවිධානයේ ශ්‍රී ලංකාවේ නේවාසික සම්බන්ධීකාරක හනා සිංගර් (Hanaa Singer) අද (19) පෙරවරුවේ ජනාධිපති කාර්යාලයේ දී ජනාධිපති රනිල් වික්‍රමසිංහ හමු විය.

හනා සිංගර් මහත්මිය සමග සුහද කතා බහක නරත වූ ජනාධිපතිවරයා එතුමිය ශ්‍රි ලංකාව වෙනුවෙන් කළ සේවය ඇගයීමට ලක් කරමින් ස්තූතිය පිරිනැමූ අතර ඉදිරි කටයුතු වෙනුවෙන් ද සුභාශීංසන පිළිගැන්වීය.

හනා සිංගර් 2018 සැප්තැම්බර් 07 දා සිට එක්සත් ජාතීන්ගේ සංවිධානයේ ශ්‍රී ලංකාවේ නේවාසික සම්බන්ධීකාරකවරිය ලෙස කටයුතු කළාය.

රජයේ සංවර්ධන වැඩසටහන් ක්‍රියාත්මක කිරීමේ දී තරුණ රාජ්‍ය නිලධාරීන්ට වැඩි අවස්ථාවක් ලබාදීමට සූදානම් බව ජනාධිපති ලේකම් සමන් ඒකනායක පැවසීය.

එසේම රජයේ සංවර්ධන වැඩපිළිවෙළ ඉදිරියට ගෙන යෑම සඳහා රාජ්‍ය නිලධාරීන්ට විශාල බලපෑමක් සිදුකළ හැකි බව පෙන්වා දුන් ජනාධිපති ලේකම්වරයා ඒ සඳහා සක්‍රීය දායකත්වයක් ලබාදෙන ලෙස රාජ්‍ය නිලධාරීන්ගෙන් ඉල්ලා සිටියේය.

ජනාධිපති ලේකම් සමන් ඒකනායක මේ බව සඳහන් කර සිටියේ පසුගියදා කොල්ලුපිටිය සමුද්‍රා හෝටලයේදී පැවති ශ්‍රී ලංකා පරිපාලන සේවයේ 2012 කණ්ඩායමේ වාර්ෂික සුහද හමුව අමතමිනි.

අභියෝග රැසක් මධ්‍යයේ වත්මන් ජනාධිපතිවරයා රටේ වගකීම භාරගත් බවත්, මේ වන විට ආර්ථිකය ක්‍රමානුකූලව ගොඩනඟමින් සංවර්ධිත රටක් බිහි කිරීම සඳහා අවශ්‍ය පියවර ගනිමින් තිබෙන බවත් ජනාධිපති ලේකම්වරයා පෙන්වා දුන්නේය.

රටේ අභිවෘද්ධිය වෙනුවෙන් ශ්‍රී ලංකා පරිපාලන සේවයේ 2012 කණ්ඩායම සිදුකරන මෙහෙවර අගය කරන බව ද ජනාධිපති ලේකම් සමන් ඒකනායක වැඩිදුරටත් සඳහන් කළේය.

“Be the impact” යන තේමාව ඔස්සේ මෙවර පැවති ශ්‍රී ලංකා පරිපාලන සේවයේ 2012 කණ්ඩායමේ වාර්ෂික සුහද හමුවට එහි සභාපති සුරංග රණසිංහ ඇතුළු දිවයින පුරා විසිරී සිටින 2012 කණ්ඩායමේ ඉහළ රාජ්‍ය නිලධාරීන් එක්ව සිටියහ.

නව නාවික හමුදාපති වයිස් අද්මිරාල් ප්‍රියන්ත පෙරේරා අද (19) පෙරවරුවේ ජනාධිපති කාර්යාලයේ දී ජනාධිපති රනිල් වික්‍රමසිංහ හමු විය.

වයිස් අද්මිරාල් ප්‍රියන්ත පෙරේරා  ශ්‍රී ලංකා නාවික හමුදාවේ 25 වන නාවික හමුදාපතිවරයා ලෙස ඊයේ (18) සිය ධූරයේ රාජකාරී ආරම්භ කළේය.

ධූරයේ වැඩ භාර ගැනීමෙන් පසු නව නාවික හමුදාපතිවරයා සාම්ප්‍රදායානුකූලව ජනාධිපතිවරයා හමු වූ අතර ජනාධිපතිවරයා වෙත සමරු සිහිවටනයක් ද පිළිගැන්වීය.

මේ අතර නව නාවික හමුදාපති වයිස් අද්මිරාල් ප්‍රියන්ත පෙරේරා  ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සහ ජනාධිපති කාර්ය මණ්ඩල ප්‍රධානී සාගල රත්නායක ද හමු වී සුහද කථා බහක නිරත විය.