පුවත්

ආසියානු සංවර්ධන බැංකුව මෙරට සියලුම ගොවීන් වෙනුවෙන් පිරිනමන ලද රුපියල් බිලියන අටක මූදල ගොවි ගිණුම්වලටම බැර කිරීම අද( 29) නිල වශයෙන් සිදු කෙරෙන බව කෘෂිකර්ම අමාත්‍ය මහින්ද අමරවීර පවසයි.

මෙවර මහ කන්නයේදී වී වගා කරන භූමි ප්‍රමාණය හෙක්ටෙයාර් ලක්ෂ 08ක් බවත් මේ වනවිටත් වගා කටයුතු ආරම්භ කර ඇති හා අවසන් කර ඇති කුඹුරු බිම් ප්‍රමාණය හෙක්ටෙයාර් 7,60,000 ඉක්මවා තිබෙන බවත් අමාත්‍යාංශය පවසයි.

එම කුඹුරු ප්‍රමාණය අයත් ගොවි පවුල් සංඛ්‍යාව මිලියන 1.2ක් වන අතර පසුගිය මහ කන්නයේදී සිදුවූ අස්වනු හානිය සැලකිල්ලට ගනිමින් ජනාධිපතිවරයාගේ ඉල්ලීම පරිදි ආසියා සංවර්ධන බැංකුව රුපියල් බිලියන අටක මුදලක් මෙරටට ලබා දුන් බවද අමාත්‍යවරයා පවසයි.

ඒ අනුව එම මුදල් කුඹුරු හෙක්ටෙයාර් එකක් ඇති ගොවීන් සඳහා රුපියල් 10,000ක් හා කුඹුරු හෙක්ටෙයාර් දෙකක් ඇති ගොවීන්ට රුපියල් 20,000ක් වශයෙන් ගොවි ගිණුම්වලටම බැර කරන ලෙස අමාත්‍යවරයා විසින් ගොවිජන සංවර්ධන දෙපාර්තමේන්තුවට උපදෙස් නිකුත්කර තිබේ.

එළඹෙන 2023 වසරේ සිංහල හා දෙමළ අලුත් අවුරුද්ද වන විට බිත්තරයක් රුපියල් 35 - 40 අතර මිලකට අලෙවි කිරීමට පියවර ගන්නා බව සමස්ත ලංකා බිත්තර නිෂ්පාදකයන්ගේ සංගමය පවසයි.

සමස්ත ලංකා බිත්තර නිෂ්පාදකයන්ගේ සංගමයේ සභාපති ආර්.එම්. සරත් රත්නායක සඳහන් කර සිටින්නේ බිත්තරයක් මිල දී ගැනීමට නොහැකි දිළිඳු පවුල්වලට නොමිලේ බිත්තර ලබාදීමට ද සංගමය සූදානම් බවයි.

මේ අතර ඊයේ (28) බිත්තරයක් රුපියල් 55 බැගින් බිත්තර ලක්ෂ හතරක් කොළඹ නගරයේදී අලෙවි කිරීමට කටයුතු කළ බව සමස්ථ ලංකා කුකුළු ගොවිපොළ සම්මේලනය පවසයි.

සිල්ලර වෙළෙඳපොලේ වැඩි මිලට අලෙවි වන බැවින්, පාරිභෝගිකයන්ට බිත්තර අඩු මිලට ලබාදීම සඳහා බිත්තර නිෂ්පාදකයන් ලොරි රථ යොදාගෙන ප්‍රධාන නගරවලදී බිත්තර අලෙවි කිරීමට පසුගියදා තීරණය කර තිබිණ.

එළඹෙන වසරේ සිට ජංගම දුරකථන මාදිලි කිහිපයක් සඳහා WhatsApp සමාජ මාධ්‍ය ජාල ක්‍රියාකාරීත්වයේ දුර්වලතා ඇතිවිය හැකි බව එම සමාගම පවසයි.

ඒ අනුව Apple, Samsung සහ Huawei මාදිලිවල පැරණි ජංගම දුරකථනවල එළඹෙන වසරේ සිට WhatsApp භාවිත කිරීමේදී බාධා එල්ලවිය හැකිය.

මෙම තීරණයට අනුව අදාළ ජංගම දුරකථන මාදිලි නව මෙහෙයුම් පද්ධතියකට යාවත්කාලීන කළ නොහැකි වුවහොත් WhatsApp ඉතා හොඳින් භාවිත කිරීම සඳහා පාරිභෝගිකයින්ට නව දුරකතථනයක් මිලදීගැනීමට සිදුවනු ඇති.

එම සමාගම වැඩිදුරටත් පවසන්නේ ඒ අනුව ස්මාට් ජංගම දුරකථන වර්ග 49ක් සඳහා එම සේවා සැපයීම අඩාල විය හැකි බවය.

එම ජංගම දුරකථන මාදිලි පහතින්.

iPhone 5
Phone 5c
Archos 53 Platinum
Grand S Flex ZTE
Grand X Quad V987 ZTE
HTC Desire 500
Huawei Ascend D
Huawei Ascend D1
Huawei Ascend D2
Huawei Ascend G740
Huawei Ascend Mate
Huawei Ascend P1
Quad XL
Lenovo A820
LG Enact
LG Lucid 2
LG Optimus 4X HD
LG Optimus F3
LG Optimus F3Q
LG Optimus F5
LG Optimus F6
LG Optimus F7
LG Optimus L2 II
LG Optimus L3 II
LG Optimus L3 II Dual
LG Optimus L4 II
LG Optimus L4 II Dual
LG Optimus L5
LG Optimus L5 Dual
LG Optimus L5 II
LG Optimus L7
LG Optimus L7 II
LG Optimus L7 II Dual
LG Optimus Nitro HD
Memo ZTE V956
Samsung Galaxy Ace 2
Samsung Galaxy Core
Samsung Galaxy S2
Samsung Galaxy S3 mini
Samsung Galaxy Trend II
Samsung Galaxy Trend Lite
Samsung Galaxy Xcover 2
Sony Xperia Arc S
Sony Xperia miro
Sony Xperia Neo L
Wiko Cink Five
Wiko Darknight ZT

දෙරණ

වසර ගණනක් තිස්සේ මෙරට කෘෂිකාර්මික ක්ෂේත්‍රවේ අඩුපාඩුවක්ව පැවැති ජාතික කෘෂිකාර්මික ප්‍රතිපත්තිය මේ වනවිට අවසන් කෙටුම්පත සකස් කර අවසන් කර ඇති බව එම ප්‍රතිපත්තිය සකස් කිරීම සඳහා පත් කළ විද්වත් කමිටුව කෘෂිකර්ම අමාත්‍ය මහින්ද අමරවීරට දැනුම් දුන්නේය.

සෑම අංශයක්ම නියෝජනය වන පරිදි විද්වතුන්ගෙන් සමන්විත කමිටුවක් මේ සඳහා පත් කෙරුණු අතර ජ්‍යෙෂ්ඨ මහාචාර්ය බුද්ධි මාරඹේ, මහාචාර්ය උදිත් ජයසිංහ, මහාචාර්ය පාලිත වීරක්කොඩි, මහාචාර්ය එම් බී. රත්නතිලක, ආචාර්ය බී.වී.ආර් පුණ්‍යවර්ධන, ආචාර්ය ඩී. ඇස් . කුරුප්පුආරච්චි, හිටපු කෘෂිකර්ම අධ්‍යක්ෂ ජනරාල්වරුන් වන ආචාර්ය අජන්ත ද සිල්වා හා හා ආචාර්ය ඩබ්. එම්. එම් වීරකෝන් යන අය මෙම කමිටුවට අයත් වූහ.

සෑම අංශයක්ම නියෝජනය වන පරිදි කෘෂිකර්ම ක්ෂේත්‍රයේ සංවර්ධනය සඳහා අදහස් හා යෝජනා ලබා ගත් බව ද විද්වත් කමිටුව කෘෂිකර්ම අමාත්‍යවරයාට දැනුම් දුන්නේය.

ආණ්ඩුක්‍රම ව්‍යවස්ථා සභාවට සිවිල් නියෝජිතයින් පත්කිරීම සම්බන්ධයෙන් අවසන් තීරණය හෙට (29) ගැනීමට නියමිතව ඇතැයි වාර්තා වේ.

විසි එක් වැනි ආණ්ඩුක්‍රම ව්‍යවස්ථා සංශෝධනය අනුව ස්ථාපිත කෙරෙන ආණ්ඩුක්‍රම ව්‍යවස්ථා සභාවට සාමාජිකයෝ දස දෙනෙක් ඇතුළත් වෙති.

සිවිල් සමාජයේ නියෝජිතයන් පත් කිරීම සඳහා පසුගියදා අයදුම්පත් කැඳවූ අතර අයදුම්පත් එකසිය විස්සකට ආසන්න සංඛ්‍යාවක් ලැබී ඇතැයි කතානායක මහින්ද යාපා අබේවර්ධන පැවසීය.

ඉතිහාසයේ දරුණුතම ආර්ථික අර්බුදයට රට මුහුණ පා සිටින බවත්, මේ වන විට රාජ්‍ය මාසික ආදායම ප්‍රමාණවත් වන්නේ රාජ්‍ය සේවක වැටුප්, විශ්‍රාම වැටුප් සහ සමෘද්ධි දීමනා සඳහා පමණක් බවත් මුදල් අමාත්‍යාංශයේ ‍ජ්‍යෙෂ්ඨ නිලධාරියෙක් පැවසීය.

පවතින මූල්‍ය අර්බුදය විසඳීම සඳහා මේ වන විට ක්‍රමානුකූලව පියවර ගෙන තිබෙන බව පෙන්වා දෙන එම නිලධාරියා ලබන වසරේ මාර්තු මාසය පමණ වන විට එහි සාර්ථක ප්‍රතිඵල ලබාගැනීමට හැකිවනු ඇති බව පැවසීය.

මෙවැනි පසුබිමක මැතිවරණයක් සඳහා මුදල් වෙන් කිරීම සිදු කළ නොහැකි අතර ‍එලෙස මුදල් වෙන් කිරීමට සිදුවුවහොත් ආර්ථිකය ගොඩගැනීම සඳහා පසුගිය මාස 06ක් තුළ දියත් කළ වැඩපිළිවෙළ විනාශ වී රටේ උද්ගතව තිබෙන ආර්ථික අර්බුදය තවත් තිව්‍ර වනු ඇති බවත් ඔහු පෙන්වා දුන්නේය.

මේ පිළිබඳ වැඩිදුරටත් දැක්වූ එම නිලධාරියා මෙසේ ද කීය.

මේ වන විට රජයේ මාසික ආදයම ප්‍රමාණවත් වන්නේ රාජ්‍ය සේවක වැටුප් සඳහා රුපියල් මිලියන 93,000ක්, විශ්‍රාම වැටුප් රුපියල් මිලියන 26,500ක්, සමෘද්ධි දීමනා සඳහා රුපියල් මිලියන 6,000ක් වෙන් කිරීම සඳහා පමණයි.

ඊට අමතරව සමාජ සුබසාධක ප්‍රතිලාභ සඳහා රුපියල් මිලියන 3,500ක්, ඖෂධ හා සෞඛ්‍ය සේවා සඳහා රුපියල් මිලියන 3,000ක් , හමුදා සලාක සඳහා රුපියල් මිලියන 2,000ක් ,පොහොර සඳහා රුපියල් මිලියන 2,000ක්, ඉන්ධන, විදුලිය, ජලය සහ රක්ෂණ සඳහා රුපියල් මිලියන 7,000ක් අනෙකුත් පුනරාවර්තන වියදම් සඳහා රුපියල් මිලියන 3,000ක් මෙන්ම ණය ගෙවීම් ආදී සියලු කටයුතු සඳහා ණය ගත යුතුව තිබෙනවා. මෙහිදී රජය වෙත බැංකුවලින් ලබා දෙන ණය අයිරාද අඩු කර ඇති බැවින් ඇති එකම විකල්පය මහ බැංකුවෙන් මුදල් ලබා ගැනීමයි.

ඒ අනුව මැතිවරණයකට මුදල් ලබා ගත යුත්තේද මහ බැංකුවෙන් වන අතර මුදල් නෝට්ටු මුද්‍රණය හේතුවෙන් තවදුරටත් උද්ධමනය ඉහළ යෑම වැළැක්විය නොහැකියි. එසේ වුවහොත් ජනතාවට දැඩි පීඩනයකට මුහුණ දීමට සිදු වනවා.

රට යම් ස්ථාවරත්වයකට පත් වීමට අවම වශයෙන් තවත් වසරක පමණ කාලයක් අවශ්‍ය වෙනවා. මේ වන විට රටේ ආර්ථික පීඩනය යම් දුරකට සමනය කරගෙන තිබෙනවා.පසුගිය කාලයේ කෘෂිකර්මාන්තය හා වී ගොවිතැන සඳහා ලබාදුන් සහන සහ රාජ්‍ය අනුග්‍රහය මත මේ වන විට සහල් අතිරික්තයක් ඇතිවීම දක්වා එම ක්ෂේත්‍රයේ ප්‍රතිඵල ලැබී තිබෙනවා.
නමුත් මැතිවරණයක් සඳහා අතිවිශාල ධනස්කන්ධයක් වැය කළහොත් රටේ යළි ආර්ථික කඩා වැටීමක් සිදුවීම නොවැළැක්විය හැකියි. රට තුළ එවැනි ආර්ථික පසුබැසීමක් යළි සිදුවුවහොත් නැවත ආර්ථිකය ගොඩනැගිය හැකි පසුබිමක් ද රට තුළ නැහැ.

විශේෂයෙන් ලබන වසරේ මාර්තු මාසය පමණ වන විට ජාත්‍යන්තර මූල්‍ය අරමුදලේ වැඩසටහනේ සහය ලැබීමෙන් පසු බැංකුවලින් ණය ලබා ගැනීමට හැකියාව ලැබෙනවා. එසේම නව බදු ප්‍රතිපත්ති හරහා රජයේ ආදායම් තත්ත්වය වර්ධනය වෙනවා. එවිට ආර්ථිකයට පීඩනයක් එල්ල නොවන අයුරින් මැතිවරණයක් පැවැත්විය හැකියි.

හිමිකරු විරුද්ධ වන්නේ නම්, කල්බදු හෝ මූල්‍ය සමාගම්වලට වාහන අත්පත් කරගැනීමට නොහැකි බව පොලිස්පත් සී.ඩී. වික්‍රමරත්න නිකුත්කළ චක්‍රලේකය ක සඳහන් වෙයි.

එහිදී පොලිස්පති පවසන්නේ , අදාළ සමාගම් වාහන අත්පත් කරගැනීමට අධිකරණයේ නඩු පවරා නීත්‍යානුකූල පියවර ගත යුතු බවය.

කෙසේ වුවත් මීට පෙර කල්බදු සහ මූල්‍ය සමාගම් වාහන අත්පත් කරගැනීම සම්බන්ධ වාහන හිමිකරුවන්ගේ පැමිණිලි ඇතැම් පොලිස් ස්ථාන බාරගෙන තිබුණේ නැහැ.

එහෙත්, සියලුම පොලිස් ස්ථාන වෙත චක්‍රලේඛයක් නිකුත් කරමින් පොලිස්පතිවරයා නියෝග කර ඇත්තේ, එම පැමිණිලි බාරගෙන නිසි විමර්ශනයක් කළ යුතු බව ය.

එමෙන්ම, වාහන පැහැරගැනීම හෝ සොරකම් කිරීම පිළිබඳ පැමිණිලි ද විමර්ශනය කළ යුතු බව පොලිස්පතිවරයා නිකුත් කළ චක්‍රලේඛයේ සඳහන්ය

කිලෝවොට් 5ක සූර්යබල ඒකකයක් සෑම ආගමික සිද්ධස්ථානයකට ම නොමිලේ ලබාදීමට කටයුතු කරන බව විදුලිබල හා බලශක්ති අමාත්‍ය කාංචන විජේසේකර පවසයි .

අමාත්‍යවරයා මේ බව සඳහන් කර සිටියේ අද (27) පැවති මාධ්‍ය හමුවකට එක්වෙමින්ය.

ඉන්දීය ණය සහනාධාර යටතේ, මාස තුනක් ඇතුළත එම සූර්යබල ඒකක ලබාදීමට කටයුතු කරන බවත් එහිදී අමාත්‍යවරයා පැවසීය .

ශ්‍රී ලංකාව සහ කාම්බෝජය අතර රාජ්‍යතාන්ත්‍රික සහ නිල විදේශ ගමන් බලපත්‍ර දරන පුද්ගලයන් වීසා බලපත්‍ර පිළිබඳ අවශ්‍යතාවලින් නිදහස් කර ඇත .

ඒ අනුව ශ්‍රී ලංකා තානාපති කාර්යාලය සහ බැංකොක් හි නිත්‍ය දූත මණ්ඩලය නිවේදනයක් නිකුත් කරමින් සඳහන් කර ඇත්තේ 2022 දෙසැම්බර් 24 වැනි දින සිට බලපැවැත්වෙන පරිදි මෙය සිදුකළ බවය.

ඒ සඳහා අදාළ ගිවිසුමට ශ්‍රී ලංකා තානාපති සහ නිත්‍ය නියෝජිත සී. ඒ. චාමින්දා අයි කොළොන්නේ සහ කාම්බෝජ රාජධානියේ විදේශ කටයුතු සහ ජාත්‍යන්තර සහයෝගිතා අමාත්‍යංශයේ රාජ්‍ය ලේකම් කොයි කුවෝන්ග් අතර අත්සන් කර තිබේ.

විදුලි බිල ඉහළ දැමීම සිදුනොකළහොත් ඒ වෙනුවෙන් පැය කිහිපයක විදුලි කප්පාදුවකට ජන ජීවිතය හුරුකර ගැනීමට සිදුවන බව විදුලිබල හා බලශක්ති අමාත්‍ය කංචන විජේසේකර පවසයි.

අමාත්‍යවරයා මේ බව සඳහන් කර සිටියේ විශේෂ මාධ්‍ය හමුවකදී අදහස් දක්වමින් ය.

එහිදී වැඩිදුරටත් අදහස් දක්වමින් අමාත්‍යවරයා මෙසේද පැවසීය .

"මේක මම පෞද්ගලිකවත්, ජනාධිපතිවරයා පෞද්ගලිකවත් එහෙම නැත්නම් කැබිනට් මණ්ඩලය පෞද්ගලිකවත්, දේශපාලන වශයෙන්වත් හිතලා ගත්ත තීන්දුවක් නෙමෙයි. මේක විදුලිබල මණ්ඩලයේ සාමාන්‍යාධිකාරීවරයා තනියමවත් සභාපතිවරයා තනියමවත් එහෙම නැත්නම් කවුරු හරි එක ඉංජිනේරුවරයෙක් තනියම ගත්ත තීන්දුවක් නෙමෙයි. මේක පාලන පද්ධතියක් තියෙනවා. විදුලිබල මණ්ඩලයේ ඉංජිනේරුවන් ඉන්නවා විශාල ප්‍රමාණයක් ඔවුන් සැලකිල්ලට ගත්තා එළැඹෙන අවුරුද්දේ මම මුලිකව කිව්වා උපකල්පනය කරපු අවස්ථා 12ක් සංසන්ඳනය කරා. ඒ 12 උච්චතම අවස්ථාව තමා අපිට වැඩිම වශයෙන් වැඩිකරන්න වුණොත් රු 56.90ක උත්පාදන වියදමක් හැටියට ඒකකයක් කිව්වේ නියඟයක් ඇති වුණොත් කියලා. අපි ක්‍රම 12ක් කිව්වා. විදුලිබල මණ්ඩලය නැවත වතාවක් පරීක්ෂා කරලා ක්‍රම 12, 20කට පරිශීලනය කරලා තියෙනවා.

මේ 20 තුළ ඔවුන් විශේෂයෙන්ම විදුලිබල මණ්ඩලයේ පරිභෝජනය ගැන තියෙන දත්ත, ආර්ථික වශයෙන් තියෙන දත්ත පරිශීලනය කිරීමෙන් පසුව මෙය සුදුසුම ක්‍රමවේදය කියලා යෝජනා කළා. ඒ අනුව ජනවාරි 2 වනදා කැබිනට් මණ්ඩලයට ඉදිරිපත් කරන්න මේ ක්‍රමවේද 20 ඇතුළේ අඛණ්ඩව විදුලිය ලබාදීම වෙනුවෙන්, විශේෂයෙන්ම ජල විදුලියෙන් ඔවුන් බලාපොරොත්තු වෙනවා 27%ක ප්‍රමාණයක් උත්පාදනය කරන්න පුළුවන් කියලා සම්පූර්ණ අවශ්‍යතාවයනේ, 28%ක් ගල්අඟුරුවලින් උත්පාදනය කරන්න පුළුවන් කියලා උපකල්පනය කරලා තියෙනවා. ඒ වගේම විදුලිබල මණ්ඩලය සතු ඩීසල් සහ දැවිතෙල් බලාගාරවලින් 13%ක්, විදුලිබල මණ්ඩලය සතු සුළං බලාගාරයෙන් 2%ක්, අනෙකුත් පෞද්ගලික ඩීසල් බලාගාර හා දැවිතෙල් බලාගාරවලින් 12%ක්, ඒ වගේම පුනර්ජනනීය බලශක්තිවලින් 13%ක් හා වහළය මත සවිකළ සූර්ය පැනල මගින් 4%ක්. ඒ අනුව ඔවුන් ගණනය කරලා තියෙනවා වියදම පමණක් ඒකකයක් 48.42ක් බවට පත්වෙයි කියලා උපකල්පනය කරනවා. එහෙම වුණොත් පසුගිය අගෝස්තු මාසයේ මහජන උපයෝගීතා කොමිසමෙන් ලබාදුන්න මිල සංශෝධනය තුළ ලැබෙන්නේ රු 29.14යි ඒකකයකට. ඒ අනුව ගණනය කරලා තියෙනවා රුපියල් බිලියන 278කට ආසන්න මුදලක් හිඟතාවයක් පවතිනවා කියලා. ඒ මුදල පියවා ගැනීම වෙනුවෙන් පමණයි මේ ගාස්තු සංශෝධනය සිදුකරන්නේ.

මේක නොකර ඉන්න පුළුවන්කමකුත් තියෙනවා. එහෙම නම් අපිට පුරුදු වෙන්න වෙනවා පැය කිහිපයක විදුලි කප්පාදුවක් එක්ක අපේ ජන ජීවිතය හදාගන්න. මොකද දිගින් දිගටම ජනතාව ඉල්ලුවේ අඛණ්ඩව විදුලිය ලබාදෙන ක්‍රමවේදයකට යන්න කියලා. එහෙම යනවා නම් අනිවාර්යයෙන්ම අපිට තියෙන විදුලි බලාගාර පාවිච්චි කරනවා වගේම පෞද්ගලික විදුලිබලාගාරත් ලබාගන්න වෙනවා.

බරපතළ මූල්‍ය වංචාවක් සම්බන්ධයෙන් චෝදනා ලබා සිටින තිකෝ සමූහ ව්‍යාපාරයේ කළමනාකරණ අධ්‍යක්ෂිකා තිළිණි ප්‍රියමාලි අද(27) පස්වරුවේ රක්ෂිත බන්ධනාගාරයෙන් පිටව ගොස් ඇති බව වාර්තා වෙයි .

ඒ කොළඹ ප්‍රධාන මහේස්ත්‍රාත්වරයා විසින් නියම කරන ලද සියලුම ඇප කොන්දේසි සම්පූර්ණ කිරීමෙන් අනතුරුවයි.

වාර්තා වන ආකාරයට ඇය විසින් ඇප කොන්දේසි සපුරන ලද නඩු සංඛ්‍යාව 08කි.

එහිදී එක් නඩුවකට රුපියල් 50,000 බැගින් වන ශරීර ඇප 08ක් සහ රුපියල් මිලියන 10 බැගින් වන ශරීර ඇප 20ක් තබන ලෙස අධිකරණය නියෝග කර තිබුණි.

ඇය රුපියල් බිලියන 04කට අධික මූල්‍ය වංචා සම්බන්ධයෙන් මාස 03කට ආසන්න කාලයක් රක්ෂිත බන්ධනාගාරගතව සිටියාය.

අදාළ මූල්‍ය චෝදනා සම්බන්ධයෙන් තිළිණි ප්‍රියමාලි රිමාන්ඩ් බන්ධනාගාරගතව සිටියදී අවස්ථා දෙකක දී නීතිවිරෝධී ලෙස ජංගම දූරකතන තබාගැනීම සම්බන්ධයෙන් ද චෝදනා එල්ල වී තිබුණි.

ශ්‍රීලන්කන් ගුවන් සමාගම කෙටිකාලීන ණය වශයෙන් රාජ්‍ය බැංකු දෙකකින් ලබාගත් රුපියල් කෝටි 7,162.1ක මුදල ගෙවීමට කටයුතු කර නොමැති බව ජාතික විගණන කාර්යාලය අනාවරණය කර තිබේ.

ඊට අනුව ශ්‍රී ලන්කන් ගුවන් සමාගම මහ භාණ්ඩාගාර ඇප මත 2016/2017 වර්ෂය තුළ කෙටිකාලීන මුදල් අවශ්‍යතා සඳහා අමෙරිකානු ඩොලර් මිලියන 200ක ණය පහසුකම් ලබාගෙන ඇත.

එසේ ම, දෙවන වරටත් 2017/2018 වර්ෂය තුළදී රුපියල් කෝටි 2,944ක්ද පසුගිය ණය මුදල ගෙවීමකින් තොරව ලබාගෙන ඇති බවත් අදාළ වාර්තාව පවසයි .

පසුගිය 2020/2021 වර්ෂය තුළදී ද එම රාජ්‍ය බැංකු 02 මගින් අමෙරිකානු ඩොලර් මිලියන 75ක ණයක් තෙවන වරටත් ලබාගෙන තිබෙන බවත් එහි දක්වා තිබේ.

ඒ අනුව 2021 මාර්තු 31 වන දා වන විට ශ්‍රීලන්කන් ගුවන් සමාගම රාජ්‍ය බැංකු දෙකක් සඳහා රුපියල් මිලියන 7,162.1ක් පියවිය යුතුව ඇතැයි එම වාර්තාවේ සඳහන් වේ.

තෙවතාවකදී මේ ආකාරයට මහ භාණ්ඩාගාරයේ ඇප මත රාජ්‍ය බැංකු දෙකකින් ලබාගනු ලැබූ ශ්‍රී ලන්කන් ගුවන් සමාගම එම කෙටිකාලීන ණය මුදල පියවීමට තවම කටයුතු කර නොමැති බවත් අදාළ වාර්තාවේ දක්වා ඇත.

එසේම ශ්‍රී ලන්කන් ගුවන් සමාගම පවතින ස්වෛරී බැඳුම්කරණ ණයක පොලී ගෙවීම් මාස 12කට අත්හිටුවීම සඳහා අදාළ ණය හිමියන්ගෙන් අවසර ඉල්ලා ඇති බව වාර්තාවේ.

ශ්‍රී ලංකන් ගුවන් සේවය ලබා ගත් ඩොලර් මිලියන 175ක ණය මුදලක් සීයට 7ක පොලියට ලබා ගෙනඇති අතර 2024 දී එම ස්වෛරී බැඳුම්කර ණය කල් පිරීමට නියමිතය.

මීට අදාළව එක් පොලී වාරිකයක් ලෙසින් ඩොලර් මිලියන 6.13ක් 2022 ජූලි මාසයේ දී ගෙවා තිබෙන අතර තවත් පොලී වාරික ගෙවීම් දෙකක් සිදු කිරීමට තිබේ.

එයින් එක් පොලී ගෙවීමක් 2022 දෙසැ 25 වෙනිදාට යෙදී තිබූ අතර අනෙක් ගෙවීම 2023 ජූනි 25 වෙනිදාට යෙදී තිබේ. මේ ණය පොලී ගෙවීම් දෙකම අත්හිටුවීම සඳහා අවසර ඉල්ලා ඇතත් ඒ සඳහා අවසර දෙන්නේ ද නැද්ද තීරණය කිරීම කෙටි කාලයක් ගත වෙනු ඇතැයි ආරංචි මාර්ග සඳහන් කරයි.

මහින්ද රාජපක්ෂ ජනාධිපතිවරයාගේ කාලයේදී, එමිරේට්ස් සමාගම සමඟ තිබූ ගිවිසුම අවලංගු කර යළි ශ්‍රී ලංකන් සේවය ගත්තාට පසු අවශ්‍ය කටයුතු සිදු කර ගැනීම සඳහා මෙම ණය මුදල ලබා ගෙන තිබේ.

වැඩිදුරටත් වාර්තා වන ආකාරයට එම ණය ලබා දුන් සමාගම් ණය ආපසු ගෙවීම සඳහා ශ්‍රී ලංකන් සමාගමේ හා රජයේ වැඩටසහන් සම්බන්ධයෙන් සහතිකයක් ඉල්ලා ඇති බවයි.

මේ මොහොතේ රටට අවශ්‍ය පළාත් පාලන මැතිවරණයක් නොව ආණ්ඩුව වෙනස් කළ හැකි ජාතික මැතිවරණයක් බව පෙරටුගාමී සමාජවාදී පක්ෂය පවසයි .

එම පක්ෂයේ අධ්‍යාපන ලේකම් පුබුදු ජයගොඩ මාධ්‍ය හමුවකදී අදහස් දක්වමින් මේ බව සඳහන් කර ඇත .

කෙසේ වුවත් පොදුජන පෙරමුණ ප්‍රමුඛ දේශපාලන පක්ෂ කිහිපයක් පවසන්නේ පවත්වන ඕනෑම මැතිවරණයක් සඳහා තම පපක්ෂ සූදානම් බවය.

මේ අතර දේශපාලන විචාරකයන් පවසන්නේ පළාත් පාලන මැතිවරණයක් හරහා ජනතාව තුළ ඇති ආණ්ඩු විරෝධය ඉස්මතු කළ හැකි නමුත් ලංකාව මුහුණදී සිටින ආර්ථික අර්බුදය සමනය කිරීමට කිසිදු සහයක් එයින් නොලැබෙන බවයි. පවතින තත්ත්වය අනුව ආසන්න ජාතික මැතිවරණය ජනාධිපතිවරණයක් බවත් ඔවුන් සිහිපත් කරයි.

මේ මොහොතේ රටට අවශ්‍ය පළාත් පාලන මැතිවරණයක් නොව ආණ්ඩුව වෙනස් කළ හැකි ජාතික මැතිවරණයක් බව පෙරටුගාමී සමාජවාදී පක්ෂය පවසයි .

එම පක්ෂයේ අධ්‍යාපන ලේකම් පුබුදු ජයගොඩ මාධ්‍ය හමුවකදී අදහස් දක්වමින් මේ බව සඳහන් කර ඇත .

කෙසේ වුවත් පොදුජන පෙරමුණ ප්‍රමුඛ දේශපාලන පක්ෂ කිහිපයක් පවසන්නේ පවත්වන ඕනෑම මැතිවරණයක් සඳහා තම පපක්ෂ සූදානම් බවය.

මේ අතර දේශපාලන විචාරකයන් පවසන්නේ පළාත් පාලන මැතිවරණයක් හරහා ජනතාව තුළ ඇති ආණ්ඩු විරෝධය ඉස්මතු කළ හැකි නමුත් ලංකාව මුහුණදී සිටින ආර්ථික අර්බුදය සමනය කිරීමට කිසිදු සහයක් එයින් නොලැබෙන බවයි. පවතින තත්ත්වය අනුව ආසන්න ජාතික මැතිවරණය ජනාධිපතිවරණයක් බවත් ඔවුන් සිහිපත් කරයි.

අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍යාංශ‍ය, වාරිමාර්ග සහ අධ්‍යාපන යන අමාත්‍යාංශ 03 හි ලේකම්වරුන්ගේ
ධූර කාලය තවත් වසරකින් දීර්ඝ කෙරේ
කැබිනට් අමාත්‍යාංශ 08ක් සඳහා නව ලේකම්වරුන් පත් කර තිබේ.

ජනාධිපති රනිල් වික්‍රමසිංහ විසින් 2023 ජනවාරි 01 වනදා සිට ක්‍රියාත්මක වන පරිදි මෙම පත් කිරීම් සිදු කර ඇත.
මේ අනුව ප්‍රවාහන හා මහාමාර්ග අමාත්‍යාංශයේ නව ලේකම් ලෙස එම්.එම්.පී.කේ. මායාදුන්නේ පත් කර තිබේ.

මීට පෙර රාජ්‍ය පරිපාලන ස්වදේශ කටයුතු, පළාත් සභා හා පළාත් පාලන අමාත්‍යාංශයේ ‍ලේකම්වරයා ‍ලෙස කටයුතු කළේය.

කාන්තා, ළමා කටයුතු හා සමාජ සවිබල ගැන්වීමේ අමාත්‍යාංශයේ ලේකම් ලෙස කටයුතු කළ එච්.කේ.ඩී.ඩබ්ලිව්. එම්.එන්.බී. හපුහින්න රාජ්‍ය පරිපාලන, ස්වදේශ කටයුතු පළාත් සභා හා පළාත් පාලන අමාත්‍යාංශයේ ලේකම්වරයා ලෙස පත් කර ඇත.

යාපනය දිස්ත්‍රික් ලේකම්වරයා ලෙස කටයුතු කළ කේ. මහේසන් ක්‍රීඩා හා යෞවන කටයුතු අමාත්‍යාංශයේ ලේකම්වරයා ලෙසත්,

කම්කරු හා විදේශ රැකියා අමාත්‍යාංශයේ අතිරේක ලේකම් වශයෙන් කටයුතු කළ එම්. යමුනා පෙරේරා කාන්තා, ළමා කටයුතු හා සමාජ සවිබලගැන්වීමේ අමාත්‍යාංශයේ ලේකම් ලෙසත්,

රාජ්‍ය පරිපාලන, ස්වදේශ කටයුතු, පළාත් සභා හා පළාත් පාලන අමාත්‍යාංශයේ අතිරේක ලේකම්වරයා ලෙස කටයුතු කළ එම්.එම්. නයිමුදීන් ආයෝජන ප්‍රවර්ධන අමාත්‍යාංශයේ ලේකම්වරයා ලෙසත්,

පුද්ගලයන් ලියාපදිංචි කිරීමේ දෙපාර්තමේන්තුවේ කොමසාරිස් ජනරාල්වරයා ලෙස කටයුතු කළ පී.පී. ගුණතිලක මහජන ආරක්ෂක අමාත්‍යාංශයේ ලේකම්වරයා ලෙසත්,

ජනාධිපති ජ්‍යෙෂ්ඨ අතිරේක ලේකම් ලෙස කටයුතු කළ ඒ.එම්.පී.එම්.බී. අතපත්තු වෙළෙඳ, වාණිජ හා ආහාර සුරක්ෂිතතා අමාත්‍යාංශයේ ලේකම්වරයා ලෙසත්,

කෘෂිකර්ම අමාත්‍යාංශයේ අතිරේක ලේකම්වරයා ලෙස කටයුතු කළ ආර්.එම්.ඩබ්ලිව්.එස්. සමරදිවාකර සංචාරක හා ඉඩම් අමාත්‍යාංශයේ ලේකම්වරයා ලෙසත් පත් කර තිබේ.

එමෙන්ම අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍යාංශයේ ලේකම් වසන්තා පෙරේරා සහ වාරිමාර්ග අමාත්‍යාංශයේ ලේකම් යූ.ඩී.සී. ජයලාල්, අධ්‍යාපන අමාත්‍යාංශයේ ලේකම් එම්.එන්. රණසිංහ නැවත වසරක කාලයක් සඳහා එම ධූරයන්ට පත් කර ඇත.

රාජ්‍ය දේපළ සහ රාජ්‍ය මුදල් අවභාවිත කළ තල් සංවර්ධන මණ්ඩලයේ නියෝජ්‍ය සාමාන්‍යාධිකාරීවරයකු ඇතුළු උසස් නිලධාරීන් දෙදෙනකු සේවයෙන් නෙරපා හැර තිබේ.

ඒ බව තල් සංවර්ධන මණ්ඩලයේ සභාපති ආචාර්ය ක්‍රිශාන්ත පතිරාජ විසින් තහවුරු කර ඇත.

එසේම තල් හකුරු සෑදීමේ උපකරණ මිලදී ගැනීමේදී රුපියල් කෝටි දෙකකට වැඩි මුදලක් අවභාවිතා කළ විගණකවරයකුගේ සහ නිෂ්පාදන කළමනාකරුවකුගේ වැඩ තහනම් කර ස්වාධීන විධිමත් විනය පරීක්ෂණයක් පවත්වන බවද ඔහු සඳහන් කළේය.

මීට අදාළ සිදුවීම ලෙස සභාපතිවරයා පවසන්නේ නියෝජ්‍ය සාමාන්‍යාධිකාරයා සහ විගණන නිලධාරියා තල් සංවර්ධන මණ්ඩලයේ වැටුප් ලබන අතරේ විශ්ව විද්‍යාල දෙකකද සේවය කරමින් වැටුප් ලබා ගෙන ඇති බව විමර්ශනවලදී තොරතුරු අනාවරණයවී ඇති බවය.

මණ්ඩලයේ දූෂණ වංචා වසන් කළ විගණක නිලධාරීන් දෙදෙනෙකු මාරු කර යැවූ බව පැවසූ සභාපතිවරයා ඒ වෙනුවට නව නිලධාරීන් දෙදෙනකු පත්කර වැවිලි කර්මාන්ත රාජ්‍ය අමාත්‍යාංශය නිලධාරීන්ගේද සහය ලබාගෙන අදාල ලියකියවිලි පරීක්ෂාකර දූෂිත නිලධාරීන්ට එරෙහිව විනය පියවර ගත් බවද සඳහන් කළේය.

එසේම නියමිත ක්‍රමවේදයෙන් බැහැරව උසස්වීම් ලැබූ කළමනාකරුවන් අටදෙනාගෙන් ආයතනයට අයවිය යුතු මුදල් අයකර ගැනීමට කටයුතු කළ බවද තල් සංස්ථා සභාපතිවරයා පැවසීය.

විගණන වාර්තා වලින් අනාවරණය කෙරුණු දූෂණ වංචා සහ අක්‍රමිකතා සිද්ධීන් සියයට හැත්තෑවක් සම්බන්ධයෙන් දැනටමත් නිසි ක්‍රියාමාර්ග ගෙන ඇති බවත් කෝටි ගණනක වංචා සම්බන්ධයෙන් තොරතුරු අනාවරණය කරගෙන ඇති බවත් සභාපතිවරයා වැඩිදුරටත් පැවසීය.

හෙට (27) දින සිට එළැඹෙන 30 වැනි දා දක්වා දිනපතා පැය දෙකයි විනාඩි 20ක කාලයක් විදුලි කප්පාදුවක් සිදුවේ.

ඒ සඳහා මහජන උපයෝගිතා කොමිසම අනුමැතිය දී ඇති බවත් වාර්තා වෙයි .

ඒ අනුව දිවා කාලයේදී පැයක් සහ රාත්‍රී කාලයේ පැයකුත් විනාඩි 20ක කාලයක් විදුලිය කපා හැරීම සිදු වෙයි.

විදේශිකයන් එක්දහස් නවසිය පනස් පස් දෙනෙක් (1955) අපරාධ සහ විවිධ දූෂණ වංචා චෝදනා පදනම් කරගෙන පසුගිය වසර හතරේදී (2018-2021) මෙරටින් නෙරපනු( පිටුවහල්) ලැබ ඇතැයි ආගමන විගමන දෙපාර්තමේන්තුව පවසයි.

විදේශිකයන් වැඩිම පිරිසක් නෙරපනු ලැබ ඇත්තේ 2019 වර්ෂයේදී වන අතර එම සංඛ්‍යාව 898 කි.

මෙයට අමතරව විදේශිකයන් 678 දෙනෙකු 2018 වර්ෂයේදීත් විදේශිකයන් 249 දෙනකු 2020 වර්ෂයේදීත් විදේශිකයන් 130 දෙනකු 2021 වර්ෂයේදීත් නෙරපනු ලැබ ඇතැයි ආගමන විගමන දෙපාර්තමේන්තුවේ 2021 කාර්ය සාධන වාර්තාවේ සඳහන් වේ.

විදේශිකයන් එකසිය තිස් දෙනෙකු පසුගිය වසරේදී නෙරපනු ලැබ ඇත්තේ ඔවුන් සම්බන්ධයෙන් කරන ලද විමර්ශන 505ක ප්‍රතිඵල අනුව බව එම වාර්තාවේ දැක්වේ.

මෙසේ නෙරපනු ලැබූ වැඩි පිරිසක් ඉන්දියානුවෝ වෙති. එම සංඛ්‍යාව 92කි.

එමෙන්ම නේපාල ජාතිකයෝ නව දෙනෙක්ද නයිජීරියානු ජාතිකයෝ හත් දෙනෙක්ද පාකිස්තාන ජාතිකයෝ හය දෙනෙක් ද රුසියානු ජාතිකයෝ පස් දෙනෙක් සහ මාලදිවයින ජාතිකයෝ දෙදෙනෙක්ද නෙරපනු ලැබූ පිරිසට ඇතුළත් වෙති.