පුවත්

පළාත් පාලන මැතිවරණය නොපතවන බවට සංඥාවක් ලැබුණු පසු ජනතාවගේ තිබුණු මැතිවරණ උද්යෝගය අඩු වී ගොස් ඇති බව ජනතා විමුක්ති පෙරමුණේ නායක පාර්ලිමේන්තු මන්ත්‍රී අනුර දිසානායක සඳහන් කරයි.

ජවිපෙ නායක මේ බව සඳහන් කර සිටියේ කොලොන්න ප්‍රදේශයේ ජනහමුවක් අමතමිනි.

මාර්තු 09 වැනිදා පළාත් පාලන මැතිවරණය පැවැත්වේයැයි වේගයෙන් මැතිවරණ ව්‍යාපාරයේ නියැලීමට තම පක්ෂය කටයුතු කළ බවද පැවසූ ඔහු අප්‍රේල් 25 වනදා මැතිවරණය පැවැත් වේ යැයි ජනතාව උණුසුමින් ආශ්වාදයෙන් දේශපාලන ක‍්‍රියාකාරකම්වලට සම්බන්ධ වූ බව ද හෙතෙම පැවසීය.

ඒ හේතුවෙන් මාලිමාවේ සංවිධාන යාන්ත‍්‍රණයට දරාගැනීමට නොහැකි ලෙස ජනතාවගෙන් ඉල්ලීම් පැමිණි බවද සඳහන් කල ජවිපෙ නායක අනුර කුමාර දිසානායක නමුත් මැතිවරණය නොපැවැත්වෙන බවට සංඥාවක් ලැබී ඇති නිසා දැන් ජනතාවගේ එම උද්යෝගය පහළ බැස ඇතැයි පැවසීය.

පළාත් පාලන මැතිවරණ කොට්ඨාස සීමා නිර්ණය අවසන් වාර්තාව අප්‍රේල් මුල් සතිය වනවිට පළාත් පාලන අමාත්‍ය සහ අග්‍රාමාත්‍ය දිනේෂ් ගුණවර්ධන වෙත ලබාදෙන බව මැතිවරණ සීමා නීර්ණය කොමිසමේ සභාපති මහින්ද දේශප්‍රිය පවසයි.

එම කොමිසමේ කාලය මාර්තු 31න් අවසන් වුවත් නිම නොවූ වැඩ කටයුතු හේතුවෙන් මෙලෙස අමතර දින කිහිපයක් ගතවන බවද ඔහු සඳහන් කළේය.

විශේෂයෙන් මීට පෙර පළාත් පාලන ආයතනවල තනතුරු දැරූ 8000කට අධික සභික සංඛ්‍යාව නව සීමා නීර්ණය යටතේ 4800 දක්වා පහත හෙලා ඇති බවද ඔහු වැඩිදුරටත් පවසා තිබේ.

ශ්‍රී ලංකාවේ සංචාරයක නිරත ඉන්දියාවේ යහපාලන ආයතනයේ අධ්‍යක්ෂ ජනරාල් භාරත් ලාල් ,ඉන්දීය මහ කොමසාරිස් ගෝපාල් භග්ලේ සමඟ ඊයේ (01) ජනපති නිල නිවසේදී ජනාධිපති රනිල් වික්‍රමසිංහ මුණ ගැසුණි.

ශ්‍රී ලංකාවේ රාජ්‍ය සේවයේ ඵලදායී වෙනසක් ඇති කිරීම සඳහා උපකාර කරන්නේ කෙසේද යන්න සහ ඵලදායී අධීක්ෂණ ක්‍රියාමාර්ග හඳුන්වා දීමෙන් රාජ්‍ය ආයතනවල කාර්ය සාධනය වැඩිදියුණු කරන්නේ කෙසේද යන්න පිළිබඳව සොයා බැලීම භාරත් ලාල් ගේ ශ්‍රී ලංකා සංචාරයේ අරමුණ වී තිබේ.

මහජන සේවාවන් සැපයීම සඳහා තොරතුරු තාක්ෂණය හඳුන්වා දීමෙන් ඉන්දියාව කැපී පෙනෙන ප්‍රගතියක් ලබා ඇති අතර ඒ හරහා රුපියල් බිලියන ගණනක මුදලක් ඉතිරි කර ගැනීමට හැකිව තිබෙන බව ඒ මහතා ජනාධිපති රනිල් වික්‍රමසිංහ හමුවේ පෙන්වා දුන්නේය.

ශ්‍රී ලංකාව තුළ රාජ්‍ය පාලන සහ රාජ්‍ය ප්‍රතිපත්ති පිලිබඳ විශ්වවිද්‍යාලයක් පිහිටුවීමට සහාය වන ලෙස ජනාධිපතිවරයා මෙහිදී භාරත් ලාල් මහතාගෙන් ඉල්ලා සිටියේය.

මහ කන්නයේ නැවුම් අස්වැන්නේ අග්‍රඵලය අනුරාධපුර ජය ශ්‍රී මහ බෝ සමිඳුන්ට පූජා කිරීමේ 56 වන ජාතික අලුත් සහල් මංගල්‍යය අද (02) පෙරවරුවේ පැවැත්වුණි.

ජනාධිපති රනිල් වික්‍රමසිංහගේ ප්‍රධානත්වයෙන් ආරම්භ වූ අලුත් සහල් මංගල්‍යය සඳහා කෘෂිකර්ම අමාත්‍ය මහින්ද අමරවීර  ඇතුළු මැති ඇමතිවරුන් සහභාගීවී තිබුණි.

සියලුම පළාත් නියෝජනය කරමින් ගොවි නායකයින් සහ ආදීවාසි නායක ඌරුවරිගේ වන්නිලැත්තන්ද සිය අස්වැන්නේ අග්‍රඵලය ජය ශ්‍රී මහා බෝධිය අභියසදී පූජා කළේය.

අනතුරුව ජනාධිපතිවරයා ජය ශ්‍රී මහ බෝ සමිඳුන් වැඳපුදාගෙන ආශිර්වාද ලබාගත්තේය.

මෙහිදී අදහස් දක්වමින් කෘෂිකර්ම අමාත්‍ය මහින්ද අමරවීර  පැවසුවේ ගොවි ජනතාව වෙනුවෙන් ඉදිරියේදී QR කේතයක් හඳුන්වා දෙමින් සහන රැසක් ලබාදීමට රජය සැලසුම් කර ඇති බවය.

එහිදී වැඩිදුරටත් අදහස් දැක්වූ කෘෂිකර්ම අමාත්‍ය මහින්ද අමරවීර,

"අපි බලාපොරොත්තු වුණාට වැඩිය.. ඉලක්ක කරාට වැඩිය.. දෙගුණයක වගාවකට අපි ප්‍රවේශ වුණා. මාස් කන්නය වෙනකොට අපි යූරියා ටික ලබාදුන්නා. බණ්ඩි පොහොර ටික ලබාදුන්නා. ඒ වගේම අපිට චීන රජයෙන් ලැබුණු ඉන්ධන නොමිලේම ගොවිජනතාවට ලබාදෙන වැඩපිළිවෙල දියත් කළා. ජනාධිපතිවරයාගේ අනුග්‍රහයෙන් ලැබුණු මඩපොහොර බෙදාහැරීම මේ වනවිට අවසන් අදිරයට පැමිණිලා තියෙනවා."

"මහ කන්නයේ වගා කළ සියලුමදෙනා වෙත එම පොහොර නොමිලේම ලබාදෙන්න කියන උපදෙස ජනාධිපතිවරයා ලබාදුන්නා. ඒ අනුව ඒ ලබාදීමේ කටයුත්ත සිද්ධ කරනවා."

"එළඹෙන යල කන්නයේ කිසිම අඩුපාඩුවක් නොවන විදිහට දැනටමත් අප සතුව යම් ප්‍රමණායක් තිබෙනවා. ඒ වගේම තව ඇනවුම් කරලා තිබෙනවා. අද ඩොලරයට සාපේක්ෂව රුපියල ශක්තිමත්වීමේ වාසිය අනුව අපේ මේ සියලුම පොහොර වර්ග ඒ ගොවි ජනතාවට සාධාරණ මිලකට ලබාදීමේ වැඩපිළිවෙල ක්‍රියාත්මක කරන්න අවශ්‍ය උපදෙස් ජනාධිපතිවරයා ලබාදුන්නා. ඒවා මිලදී ගැනීම සඳහා කූපන් නිකුත් කරන්නත් අපිට උපදෙස් ලබාදීලා තිබෙනවා."

"මේ එන යල කන්නයෙන් පස්සේ මහ කන්නයේදී ගොවි ජනතාවට QR එක හඳුන්වලා දෙනවා. ඔවුන්ට ලැබෙන සහන ඒ හරහා ලබාදෙනවා. රජයේ අයතනයක වෙන්න පුළුවන් එසේත් නැතිනම් පුද්ගලික අංශයක වෙන්න පුළුවන්. ගොවීන්ට ගිහිල්ල ඒ QR එක පෙන්නලා ඒ සහනය ලබාගන්න අවස්ථාව උදාකරලා දෙනවා."

පසුගිය කාලය තුළ රට පුරා පැවැති දරුණු ආර්ථික අර්බුදය මඳින් මඳ සමනය වන වර්තමානයේ පසුගිය කාලයට සාපේක්ෂව ඉන්ධන සහ ත්‍රිරෝද රථ කොටස් අමතර කොටස්වල මිල අඩුවීමේ වාසිය මඟී ජනතාවට ලබා දීමට තම සංගමය තීරණය කළ බව සමස්ත ලංකා ත්‍රිරෝද රථ රියැදුරන් ගේ හා හිමි කරුවන්ගේ සංගමයේ සභාපති සුදිල් ජයරුක් පවසයි.

ඒ අනුව පළමු කිලෝ මීටරය රුපියල් 120 ක් සහ දෙවන කිලෝ මීටරයේ සිට රුපියල්100 වශයෙන් මෙතෙක් පැවැති ත්‍රිරෝද රථ ගාස්තුව මේ වන විට රුපියල් 100 සහ රුපියල් 80 දක්වා අඩු කොට ඇතැයි ඔහු කියයි.

මේ අතර ත්‍රිරෝද රථ කර්මාන්තයේ නියැලෙන බව පවසන ඇතැම් පිරිස් විවිධ හේතූන් දක්වමින් ඉන්ධන මිල මත පමණක් පදනම් ව ත්‍රිරෝද රථ ගාස්තු අඩු කළ නොහැකි බවට කරන ප්‍රකාශ වල කිසිදු සත්‍ය පදනමක් නොමැති බව ද සභාපති වරයා කියයි.ඔහු පවසනුයේ ශ්‍රී ලංකාවේ ධාවනය වන වැඩිම ත්‍රිරෝද රථ ප්‍රමාණයක් නිෂ්පාදනය කරන සුප්‍රකට ඉන්දීය සමාගම තම අමතර කොටස් මිල 40%කින් පහත හෙළීමට මේ වන විටත් එකඟත්වය පළ කොට ඇති බවකි.

“පහුගිය කාලේ ඇති වුණු කොවිඩ් වසංගතයෙන්,ඉන්ධන හිඟයෙන්,ආර්ථික අර්බුදයෙන් බරතපලම හානියක් සිද්ද වුණේ ත්‍රිරෝද රථ කර්මාන්තයට.මේ කර්මාන්තය නිසා අද වෙන කොට ආසන්න වශයෙන් ලක්ෂ හතලිස් පහක විතර පිරිසක් යැපෙනවා. ඒ කාලේ අපේ ත්‍රිරෝද රථ රියැදුරන්ට වගේම රියැදුරන් බොහොමයකට තමන්ගේ ජීවනෝපාය වගේම තමන් ගේ ඉන ඉහ ගේ දොර ඉඩකඩම් වගේම තමන් ජීවිකාව කර ගන්නා වාහනය පවා අහිමි වෙන තත්වයක් උදා වෙලා තිබුණා.නමුත්, අද වෙන කොට ඒ තත්වය හිරු පායන්න කලින් මතු වෙන සහන් එළියක් වගේ සුළු සහනදායී මට්ටමකට පරිවර්තනය වෙලා තියනවා.මේ තත්වය තව දුරටත් වර්ධනය කර ගන්න නම් අපි සේරටම කලින් අපේ බිඳ වැටුණු ත්‍රිරෝද රථ කර්මාන්තය ගොඩ නංවා ගන්න ඕනේ ඒ සඳහා ගත යුතු මුල්ම පියවර තමයි මගී ජනතාවට සහන සැලසීම.සංගමයක් වශයෙන් අපි ඒ වෙනුවෙන් උපරිම විදිහට කැප වෙලා ක්‍රියා කරනවා” සභාපති වරයා පවසයි.ඔහු වැඩිදුරටත් පවසනුයේ මේ වන විටත් රට තුළ පවතින අයහපත් ආර්ථික පසුබිම තුළ අප සමාජයේ බොහෝ දෙනකු ත්‍රිරෝද රථ වලින් ගමන් බිමන් යාම දැඩි ලෙස සීමා කොට ඇති තත්වයක් මත ඔවුන් නැවත ත්‍රිරෝද රථ සේවාව වෙත යොමු කර ගැනීමේ උපාය මාර්ගික හැකියාව සෑම ත්‍රිරෝද රථ රියැදුරකු සතුවම තිබිය යුතු බවයි.”මේ වෙන කොට රට තුළ පවතින පුංචි ආර්ථික ප්‍රබෝදයේ වාසිය ජනතාවට ලබා දෙන්න අත්‍යාවශ්‍ය ආහාර ආනයන හා සැපයුම් කරුවන් පවා ඉදිරිපත් වෙලා ඉන්නවා.අල ළුුණු වගේඅත්‍යවශ්‍ය ආහාර සම්බන්ධයෙන් වුණත් ජනතාවට ඒ වගේ සහනයක් සැලසෙන අතරේ ත්‍රිරෝද රථ කර්මාන්තයට සම්බන්ධ අපි මඟීන්ට නොසළකා හැරීම අපේ කර්මාන්තයට කර ගන්න බරාතල පාඩුවක්”ඔහු කියයි.

එමෙන්ම අද අප රටේ ත්‍රිරෝද රථ කර්මාන්තය පවත්නා අස්ථාවර තත්වය පිළිබඳව ද ත්‍රිරෝද රථ රියැදුරන් හිමි කරුවන් හා ඔවුන්ගේ පවුල් වල සාමාජිකයන් ද දැන සිටිය යුතු බව ද ඔහු ගේ අදහස ය.”මේ වෙන කොට අපේ රටේ කුලී ත්‍රිරෝද රථ සංඛ්‍යාව ලක්ෂ නවයක් විතර වෙනවා.නමුත් රටේ ජනතාවගේ ප්‍රවාහන අවශ්‍යතා නිරන්තරයෙන් ඉටු කරන ත්‍රිරෝද රථ කර්මාන්තය තවමත් ජාතික ප්‍රවාහන පද්ධතියට ඒකතු වෙලා නෑ.ඒ හින්දම අපේ සේවාවට ජාතික මට්ටමේ නියාමයකුත් නෑ.මේක අපේ පැත්තෙන් වගේම ජනතාවගේ පැත්තෙනුත් විශාල වගකීමක් පැහැර හැරීමක්.ඒ හින්දම අපේ රටේ ත්‍රිරෝද රථ කර්මාන්තය වෙනුවෙන් අන පනත් සම්මත කරගෙන අධිකාරියක් වගේ නියාමන ආයතනයක් පිහිටුවලා වඩාත් ප්‍රමිතිගත මඟී සේවාවක් විදිහට මේ ත්‍රිරෝද රථ කර්මාන්තය නියාමනය හා අධීක්ෂණය කිරීමේ වගකීම බාර ගන්නා ලෙස අපි අවුරුදු ගණනාවක් තිස්සේ රජයට බලපෑම් කරනවා.නමුත් අපේ ඒ ඉල්ලීම බොහොම වැදගත් ඉල්ලීමක් විදිහට පිළිගන්න බලධාරීන් අන්තිම මොහොතේ ඒ ඉල්ලීම පැහැර හරිනවා”සභාපති වරයා කියයි.ඔහු වැඩි දුරටත් අවධාරණය කරන අන්දමට “ත්‍රිරෝද රථයක් මිල දී ගෙන පාරට දැමීම” පහසු ධනෝපායන මාර්ගයක් සේ වරදවා සිතන බාහිර පිරිස් කිසිම පදනමකින් තොරව අරඹා ඇති ත්‍රිරෝද රථ මිදලට ධානය කිරීම නිසා ද වෘත්තීය කුලී රථ සේවයට සහ එහි නියුතු වූවන්ට සිදුව ඇති අහිතකර බලපෑම ඉමහත් ය.”ඒ සමහරු තමන්ගේ පෞද්ගලික ගමන් බිමන්,ව්‍යාපාර සමහර විට ජාවාරම් වලට පවා මිලට ගන්නා ත්‍රිරෝද රථය කුලී රථයක් විදිහටත් යොදා ගන්නවා.සමහරු ගණිකා,සහ මත් ද්‍රව්‍ය ජාවාරම් වලටත් ත්‍රිරෝද රථ යොදා ගන්නවා.නමුත් ඒවා වෘත්තීය පදනමක් තියන කුලී රථ නොවන බව ඒකාන්ත වශයෙන්ම කිව යුතුයි.නමුත් අපේ රටේ සාමාන්‍ය මඟීන් මේවා දන්නේ නෑ. ඒ වගේම වෙන කිසිම රටක මේ දේ කරන්නත් බෑ.සමහර විට ඒ වගේ අවභාවිතාවක් නොකළත් ඒ ත්‍රීවීලර් එක පදවන ඒ මනුස්සයා ත්‍රිරෝද කුලී ත්‍රිරෝද රථ සේවාව ගැන මෙලෝ දෙයක් දන්නේ නෑ.පාරෙදි හමුවන මඟියාගෙන් හිතුමතේ සල්ලි ගසා කනවා.එතකොට ඒ මඟියා කියන්නේ මොකක්ද? ත්‍රීවීලර් කාරයො මිනී කාක්කෝ වගේ සල්ලි ගසා කනවා කියලා නේද?” සභාපති වරයා අසා සිටියි.

එමෙන්ම ත්‍රිරෝද රථ සංගම් නියෝජිත වරුන් ලෙස මාධ්‍ය මඟින් අදහස් දක්වන ඇතැමුන් තමන් කිසිසේත් ත්‍රිරෝද රථ ගාස්තු අඩු නොකරන බවට සිදු කරන බවට කරන බලපෑම් සහගත ප්‍රකාශ කිරීම් මඟින් සිදුවන එකම දෙය අප රටේ සාමාන්‍ය ජනතාව ත්‍රිරෝද රථ සේවාවෙන් ඉවත් වීම බව පවසන සුදිල් ජයරුක් වැඩි දුරටත් පෙන්වා දෙනුයේ රට තුළ පවත්නා ආර්ථික අර්බුදය තවමත් එලෙසම පවතින බව ජනතාවට ඒත්තු ගැන්වීම පිණිස ද ඇතැමුන් එවැනි ප්‍රකාශ සිදු කරන බවය.

සමස්ත ලංකා ත්‍රිරෝද රථ රියැදුරන් ගේ හා හිමි කරුවන්ගේ සංගමය හැටියට අපි නිතරම ජනතාවගෙන් ඉල්ලා සිටින්නේ පාරේ දකින හැම ත්‍රිරෝද රථයකටම අත නොදමා වෘත්තීය කුලී රථයක් වශයෙන් ඒත්තු යන ත්‍රිරෝද රථයක් ලෙස ඒත්තු යන ත්‍රිරෝද රථ වලින් පමණක් තම ගමන් පහසුව සළසා ගන්නා ලෙසයි. ඒ වගේම ඔබ නඟින ත්‍රිරෝද රථය මීටරයක් සවි කළ සේම ඒ මීටරයේ ගමන් ගාස්තුව ලෙස රුපියල් සීය සහ අසූව වශයෙන් සටහන් වී තිබේ ද යන්න විමසා බලන ලෙසත් පළමු කිලෝ මීටරය සඳහා වන ගාස්තුව රුපියල් සියයට වැඩි සියළු ත්‍රිරෝද රථ ප්‍රතික්ෂේප කරන ලෙසත් අපි මඟීන්ගෙන් විශේෂයෙන් ඉල්ලා සිටිනවා” සමස්ත ලංකා රථ රියැදුරන් ගේ හා හිමි කරුවන්ගේ සංගම් සභාපති වරයා විශේෂයෙන් අවධාරණය කරයි.

හේමන්ත රන්බණ්ඩාර (විනිවිද)

රට බංකොලොත් භාවයෙන් මුදා ගැනීම සඳහා එක්සත් ජනරජ පෙරමුණ නමින් නව දේශපාලන පක්ෂයක් එළඹෙන මැයි මාසයේ තෙවන සතියේ එළිදක්වන බව 43 වැනි සේනාංකයේ නායක පාර්ලිමේන්තු මන්ත්‍රී පාඨලී චම්පික රණවක ඊයේ(01) පැවසීය .

බදුල්ල වැලිගම හෝටලයේදි පැවැති 43 වැනි සේනාංකයේ වැඩ මුළුවකින් පසුව මාධ්‍යවේදීන් අමතා ඔහු නව පක්ෂය පිළිබදව අනාවරණය කළේය .

බකොලොත් භාවයෙන් රටමුදාගැනීමට කුසලතාව මත පදනම් වූ දේශපාලනයක් අවශ්‍ය වි ඇති බවත් පවුල් උරුමයෙන් රට පාලනය කරන දේශපාලනයට තිති තැබැයි යුතු බවත් එහිදි ඔහු පැවසීය .

ත්‍රිවිධ හමුදාව හා පොලීසිය අමතා ජනාධිපති රනිල් වික්‍රමසිංහ අද (01) විශේෂ ප්‍රකාශයක් සිදු කළේය.

ඒ, අනුරාධපුර ගුවන් හමුදා කඳවුරේදීය.

"අපේ රට මුහුණ දෙන විශාල ආර්ථික අර්බුදයෙන් ගොඩඑන්න අවශ්‍ය පළමු පියවර ආරම්භ කළා."

"හෙට විශ්වවිද්‍යාලයේ ආර්ථික කථිකාචාර්යවරුන් හමුවෙන්න මම බලාපොරොත්තු වෙනවා."

"මම ජනාධිපති වුණේ රටේ විශාල අවුලක් තිබුණු වෙලාවක. පාර්ලිමේන්තුව අල්ලගන්න තත්ත්වයට ඇවිත් තිබුණේ."

"එදා හමුදාව, පොලීසිය ඇතුළු සියලු ආරක්ෂක අංශ ගත් පියවරවල්වලට මම අද ස්තූති කරනවා. ඒ පියවර ගත්තේ නැත්නම් අද අපිට මෙහෙම ඉන්න බැහැ."

"අමාරු තීරණ ගන්න සිදුවුණා. බදු වැඩි වුණා, භාණ්ඩ මිල වැඩි වුණා, බදු ගෙවන්න සිදුවුණා. ආදායම් සීමා වුණා. ප්‍රශ්න නැති කවුරුවත් මෙතන නැහැ. ඒ තීරණ ගත්ත නිසයි IMF ආධාර අපිට ලැබුණේ. ඒ නිසා මේ මාසයෙත් ලබන මාසයෙත් පඩි ගෙවන්න අපිට මුදල් තිබෙනවා."

"මේ පළවෙනි වටයේ විතරයි. දැන් අපිට විදේශ බැංකු එක්ක ගනුදෙනු කරන්න පුළුවන්. දැන් අපිට ණය ගැන සාකච්ඡා කරන්න තිබෙනවා... කණ්ඩායම් 03ක් එක්ක. පැරිස් සමාජය, ඊට අයත් නොවන චීනය වැනි රටවල් සමග, ලෝක බැංකුව, ආසියානු සංවර්ධන බැංකුව."

"වැඩියෙන්ම අපි ණය වෙලා තියෙන්නේ ජාත්‍යන්තර වෙළෙඳපොලෙන් ගත්තු ඩොලර් බැදුම්කරවලට.. සියයට 50කට වැඩියි."

"මම බලාපොරොත්තු වෙන්නේ ඒකත් ඉක්මණින් අවසන් කරන්න. කොච්චර අමාරු වුණත් කෙටි කාලයකින් අපි මේකෙන් ගොඩ එමු."

"අපේ ප්‍රධාන ප්‍රශ්න දෙක.. විදයම්වලට වඩා ආදායම් අඩුයි. රුපියල්වලින් ණය ගත්තා ඒකට. ආනයනවලට වඩා අපනයන ආදායම අඩුයි. ඒකට ඩොලර්වලින් ණය ගත්තා. මේක වෙනස් කරන්න අපි කටයුතු කළ යුතුයි."

"ආණ්ඩුව තුළ විශාල ප්‍රතිව්‍යුහගතකරණයක් කරන්න තිබෙනවා. අලුත් බඳවාගැනීම් නවත්වලා තිබෙනවා. පිරිස අඩු කරනවා. ඒක ත්‍රිවිධ හමුදාවටත් පොලීසියටත් බලපානවා. 2028 වනවිට ත්‍රිවිධ හමුදාවේ සංඛ්‍යාව බොහෝදුරට අඩුවෙයි."

"පොලීසියේ සංඛ්‍යාව ටිකක් වැඩිකරන්න සිදුවෙලා තිබෙනවා. නීතිය හා සාමය ආරක්ෂා කරගන්න අවශය නිසා. රාජ්‍ය සේවයේ ඒක වෙන්නේ නැහැ."

"අපි අලුත් ආරක්ෂක උපක්‍රම සකස් කරගන්න තිබෙනවා. මුහුද, ගුවන මොකක් වෙයිද අපි දන්නේ නැහැ. ගොඩබිමේ හමුදාව කොහෙට යවන්න වෙයිද දන්නේ නැහැ."

"අපිට සූදානම් වෙන්න තියෙන්නේ ඊළඟට එන ප්‍රශ්නයට. ඒ සඳහා විශේෂ පියවර කිහිපයක් අපි ගන්නවා."

"මත්ද්‍රව්‍ය පාලනය කිරීම සඳහා තද නීති ගේන්න මම උපදෙස් දුන්නා."

"අපිට හැමදාම හිඟමනේ යන්න බැහැ. අපි දියුණු ආර්ථිකයකට යන්න ඕනේ. ඒකට අපි අලුතින් හිතන්න ඕනේ."

"අපිට විශාල වෙළෙඳපොලවල් දෙකක් තිබෙනවා. ඒකෙන් අපි විශාල ප්‍රයෝජනයක් ගන්න ඕනේ. ඩිජිටල්කරණයට අපි වේගයෙන් යන්න ඕනේ."

"මේවා හීන නෙමෙයි.. මේවා කළේ නැත්නම් අපි වැටෙනවා. කෘෂි, ධීවර, සංචාරක ව්‍යාපාරය අපි නවීකරණය කරන්න ඕනේ."

"අපි බිස්නස්වල ඉන්නේ නැහැ. නමුත් ඒ යාන්ත්‍රණය අපි හදන්න ඕනේ. හමුදාව කරන්න ඕනදේ හමුදාවෙන් දැනුම්දෙයි. මේ සීඝ්‍ර වැඩසටහන ක්‍රියාත්මක කරන්න ඕනේ."

"මේ හැම කෙනාටම ඒ දැනුම ලබාදෙන්න ඕනේ. ඕනේ නම් නිවාඩු දෙමු. ගමටම ඒක ව්‍යාප්ත කරන්න ඕනේ. තමන් කැමති නම් ඒ දැනුම ලබාගන්න. දැනුම තිබෙන නිලධාරීන් ට අනාගතයේ අවස්ථාව ලැබෙනවා. මේකේ වාසිය ලබන්නේ අලුත් තරුණ පරපුරට."

"මම ඉන්නේ හරි දේ කරන්න.. ජනප්‍රිය දේ කරන්න නෙමෙයි. අපි ජනප්‍රිය දේ කරන්න ගිහින්, අපේ සංකල්ප ඉදිරිපත් කරන්න ගිහින් අපි මේ රට විනාශ කළා."

"ඒකයි මම මේ යෝජනාව ඉස්සරවෙලා පාර්ලිමේන්තුවට දාන්නේ. අපේ පාර්ලිමේන්තුවේ මන්ත්‍රීවරුන්ට හරිදේ කරන්න ශක්තියක් තියෙනවද? නැද්ද? කියලා අහන්න. හරි දේ කියන්නේ රට වෙනුවෙන් සහයෝගය දෙන එක. මම බලාපොරෙත්තු වෙනවා.. ඒ අය උදාහරණයක් දෙයි කියලා."

"මම ජනාධිපති හැටියට ඉන්නතුරු නීතිය හා සාමය කඩන්න මම ආපහු ඉඩදෙන්නේ නැහැ. තමන්ගේ අදහස් නිදහසේ ප්‍රකාශ කරන්න පුළුවන් සාමකාමිව. රැස්වීමකට පර්මිට් එකක් අරගෙන රැස්වීම පවත්වලා ඕන තරම් මට බන්නින. ඒක ප්‍රශ්නයක් නැහැ. ඒත් මෙතෙන්ට ඇවිල්ල පාරේ ගිහින් කෝලහාල කරන්න බැහැ."

"අපි අලුත් ගමනක් යනවා කියලා කැපවෙලා වැඩකරනවා නම්.. මගේ කිසිම සැකයක් නැහැ, මේ අවුරුදු 25ට ඉස්සරවෙලා මේ රටේ විශාල දියුණුවක් ඇතිවෙනවා. අපිට ඒ මාර්ගයේ යන්න තියෙනවා. යන්න වෙන මාර්ග නැහැ."

නව ත්‍රස්ත පනතට එරෙහිව දේශපාලන පක්ෂ රැසක් ශ්‍රේෂ්ඨාධිකරණයට යාමට තීරණය කර ඇත.

දැනට තිබෙන ත්‍රස්තවාදය වැළැක්වීමේ පනතට මුවා වී ඒ වෙනුවට ආණ්ඩුව ගෙන එන නව පනතට එරෙහිව උපරිමාධිකරණයට යන බව ‘නිදහස ජනතා සභාවේ’ නායක ශ්‍රී ලංකා පොදුජන පෙරමුණ මාතර දිස්ත්‍රික් පාර්ලිමේන්තු මන්ත්‍රී ඩලස් අලහප්පෙරුම ‘ඉරිදා මව්බිම’ට පවසා ඇත.

“ඊට එරෙහිව අපි පාර්ලිමේන්තුව ඇතුළෙත් අධිකරණය ඇතුළෙත් සිවිල් සමාජය ඇතුළෙත් කටයුතු කරනවා,” යැයි ද ඔහු පවසා ඇත.

“මේ පනත භාෂණයේ නිදහස තියෙන හැම පුද්ගලයාට ම බලපානවා. පුරවැසියාට ඉන් වන බලපෑම වළක්වන්න බැහැ. රටේ ප්‍රජාතන්ත්‍රවාදය වළ දැමීමේ ක්‍රියාවලියට එරෙහිව අපි රටේ උපරිමාධිකරණයට යාම දක්වා කටයුතු කරනවා. එය රටේ සෑම ජන කොටසකට ම බලපාන කාරණයක්. මෙවැනි දැඩි මර්දනයක් ක්‍රියාත්මක කරන්න අලුත් පනතක් ගෙනැවිත් ක්‍රියා කිරීමට එරෙහිව අපි පාර්ලිමේන්තුව ඇතුළෙත් අධිකරණය ඇතුළෙත් සිවිල් සමාජය ඇතුළෙත් කටයුතු කරනවා. තාම මේක ගැසට් කළා විතරයි. මේකට එරෙහිව අධිකරණයට ගියාම යමක් වේවි කියලා හිතනවා. පාර්ලිමේන්තුවේ සභාගත කරලා සති දෙකක් ඇතුළත අධිකරණයට යන්න පුළුවන්. අනිවාර්යයෙන් ම මේකට අභියෝග කළ යුතු,” යැයි ද මන්ත්‍රීවරයා වැඩිදුරටත් පවසා ඇත.

ජාත්‍යන්තර මූල්‍ය අරමුදලේ ණය පහසුකම ඇතුළු ඒ ආශ්‍රිත ක්‍රියාවලිය සම්බන්ධව සොයාබලා වාර්තා කිරීම සඳහා පසු විපරම් කමිටුවක් පත්කිරීමට ජනාධිපති රනිල් වික්‍රමසිංහ කටයුතු කර ඇත .

ඒ සඳහා පත්කළ කමිටුවේ සාමාජිකයන් ලෙස ජාතික ආරක්ෂාව පිළිබඳ ජනාධිපති උපදේශක සහ ජනාධිපති කාර්ය මණ්ඩල ප්‍රධානී සාගල රත්නායක, මහා භාණ්ඩාගාර ලේකම් මහින්ද සිරිවර්ධන, මහබැංකු අධිපති නන්දලාල් වීරසිංහ ඇතුළු විද්වතුන් පිරිසක් පත්කර තිබේ.

ජනාධිපතිවරයා විසින් මෙම කමිටුව කටයුතු කරන ආකාරය ගැන යෝජනාවක් ද කැබිනට් මණ්ඩලය වෙත යොමු කර ඉදිරියේදී ඊට කැබිනට් අනුමැතිය ලබා ගැනීමට නියමිත බවත් වාර්තා වෙයි .

එසේම අදාළ කමිටුව විසින් IMF ක්‍රියාවලිය සම්බන්ධයෙන් නිතර පසු විපරමක් කළ යුතු අතර බදු ප්‍රතිපත්ති, බදු ප්‍රතිශතයන් වෙනස්වීම්, වක්‍ර බදු අඩු කරමින් සෘජු බදු ඉහළ නැංවීම ආදිය ගැන නිරන්තයෙන් සොයා බලා ඊට අවශ්‍ය කටයුතු සම්පාදනය කළ යුතු බවටද ජනාධිපතිවරයා උපදෙස් නිකුත්කර ඇති බවත් වාර්තා වෙයි .

ඊට අමතරව අයි.එම්.එෆ් කොන්දේසි ක්‍රියාත්මක කිරීම ගැනද මෙම කමිටුව විසින් සොයා බැලිය යුතු බවද සඳහන් ය.

දුෂණ මර්දන පනත වැනි අණ පනත් ගැන ද සොයා බලමින් මාසකට වරක් මෙම කමිටුව විසින් ඇමති මණ්ඩලය දැනුම්වත් කළ යුතු බවද ජනපති රනිල් වික්‍රමසිංහ මහතා කමිටුව වෙත දුන් උපදෙස්වල සඳහන් බවද දැනගන්නට ඇත .

රාජ්‍ය ආයතන ප්‍රතිසංස්කරණය කිරීමට ජනවරමක් නැති ආණ්ඩුවකට ජාත්‍යන්තර මූල්‍ය අරමුදල උදව් කිරීම වැරදි බව විපක්ෂයේ ප්‍රධාන සංවිධායක පාර්ලිමේන්තු මන්ත්‍රී නීතිඥ ලක්ෂ්මන් කිරිඇල්ල පවසයි .

එවැනි ආණ්ඩුවකට උදව් කිරීමෙන් ජාත්‍යන්තර මූල්‍ය අරමුදල මූලික වශයෙන් වැරැද්දක් කළ බවද මන්ත්‍රීවරයා සඳහන් කරයි.

තමන් උදව් කරන්නේ රාජ්‍ය ආයතන ප්‍රතිසංස්කරණය කිරීමේ හැකියාව සහිත ජනවරමක් සහිත ආණ්ඩුවකට බව ජාත්‍යන්තර මූල්‍ය අරමුදල පසුගිය සැප්තැම්බර් මාසයේදී ප්‍රකාශ කළ බව පැවසූ මන්ත්‍රීවරයා ඒ අනුව ආණ්ඩුව මැතිවරණයක් පවත්වා නව ජනවරමක් ලබා ගැනීමට කටයුතු කරාවි යැයි රටම බලාපොරොත්තු වූ බවද ඔහු සඳහන් කර ඇත .

එසේම වර්තමාන ආණ්ඩුව ජනවරමක් නොමැතිව රාජ්‍ය ආයතන විකිණීමෙන් සේවකයන් අතර නොසන්සුන්තා ඇතිවී රට ලේ විලක් බවට පත්විය හැකි බවද මන්ත්‍රීවරයා පවසයි .

මන්ත්‍රීවරයා මේ අදහස් දක්වා ඇත්තේ ඉරිදා ලංකාදීප පුවත්පත වෙතය.

දැන් විපක්ෂය මරු කියවනවා !

කෙසේ වුවත් මේ සම්බන්ධයෙන් අදහස් දක්වමින් දේශපාලන විචාරකයන් පවසන්නේ විපක්ෂයේ පාර්ශ්ව වෙතින් ජාත්‍යන්තර මූල්‍ය අරමුදල වෙත පළවෙමින් ඇති වෛරී ප්‍රකාශ IMF හී මූල්‍ය සහය ලැබීමත් සමග ලංකා දේශපාලන ක්ෂේත්‍රයේ වෙනසක් ඇරඹි ඇති බවට සංඥාවක් බවයි.

මේ වන විට ආණ්ඩුවේ වැඩපිළිවෙළ විපක්ෂයේ සිටින ආර්ථික ඔස්තාද් ලා ගේද පැසසුමට ලක්ව ඇති බවත් ඒ හරහා සටන් පාඨ අහිමිව මරු කියවන අසරණ තත්ත්වයකට විපක්ෂයේ කොටස් පත්ව ඇති බවත් ඔවුන් පෙන්වා දෙයි.

මේ සම්බන්ධයෙන් වැඩිදුරටත් අදහස් දක්වමින් දේශපාලන විචාරකයන් පවසන්නේ රාජ්‍ය ව්‍යවසාය පෞද්ගලීකරණය කිරීමට හෝ ප්‍රතිව්‍යුහගත කිරීමට ජනවරමක් අවශ්‍ය නොවන බවයි. මේ වන විට අවස්ථාවාදී වෘත්තීය සමිති කිහිපයක් හැරුණු විට ආණ්ඩුව ගෙනයන වැඩපිළිවෙළ සම්බන්ධයෙන් ජනතා විරෝධයක් මතුව නොමැති බවත් ඔවුන් පෙන්වා දෙයි.

එසේම IMF මූල්‍ය සහය නොලැබෙන්න ලංකාව මාස කිහිපයක් තුළ අමු සොහොනකින් අවසන් වීමට නියමිත ඉරණමකට මුහුණදී සිටි බවත් ජනාධිපති රනිල් වික්‍රමසිංහ ගේ රැඩිකල් තීන්දු තීරණ හේතුවෙන් එම තත්ත්වය සමනය වූ බවත් දේශපාලන විචාරකයන් අවධාරණය කර දක්වයි.

පාසල් සිසුන්ගේ පෙළපොත් සඳහා ලිංගික හා ප්‍රජනන සෞඛ්‍ය පිළිබඳ තොරතුරු ඇතුළත් කිරීමට අධ්‍යාපන අමාත්‍යාංශයේ සම්බන්ධීකරණයෙන් විශේෂ කමිටුවක් පත් කරන ලෙස උපදෙස් ලබා දී ඇත.

මෙම උපදෙස් ලබාදී ඇත්තේ පාර්ලිමේන්තු මන්ත්‍රිනී රෝහිණී කවිරත්න ගේ ප්‍රධානත්වයෙන් යුත් ළමයින් සඳහා වන පාර්ලිමේන්තු කමිටුව විසිනි.

අදාල කමිටුවට ජාතික ළමා රක්ෂණ අධිකාරිය, පරිවාස හා ළමා රක්ෂණ දෙපාර්තමේන්තුව, සෞඛ්‍ය අමාත්‍යාංශය, අධ්‍යාපන අමාත්‍යාංශයට අයත් අදාළ ආයතන වල නියෝජිතයන් නම් කරන ලෙසද ඇය එහිදී උපදෙස් දී තිබේ.

මෙම කමිටුව මාස තුනක් ඇතුළත සිය කාර්යය අවසන් කළ යුතු බවද සභාපතිනිය සඳහන් කළාය.

මෙහිදී වයස අවුරුදු ද 16 සපිරූ පාසැල් සිසුන්ට ලිංගික හා ප්‍රජනන සෞඛ්‍ය පිළිබඳව දැනුවත් කිරීමට දැනටමත් පෙළපොත් සකස් කර ඇතැයි අධ්‍යාපන අමාත්‍යාංශයේ නිලධාරීන් කාරක සභාවට දැනුම් දී ඇත.

නමුත් දරුවන්ගේ මනසට ගැලපෙන ලෙස කුඩා කල සිටම මේ සම්බන්ධයෙන් දැනුවත් කිරීමේ අවශ්‍යතාවයක් පවතින බවත් ඒ සඳහා පෙළපොත් සකස් කිරීමට කටයුතු කඩිනමින් ආරම්භ කළ යුතු බව ද කමිටුව පෙන්වා දී ඇත.

සම්මානනීය ජේෂ්ඨ චිත්‍රපට සහ ටෙලිනාට්‍ය රංගන ශිල්පී අමරසිරි කලංසූරිය අද(01) උදෑසන අභාවප්ප්‍රාප්ත වී තිබේ.

1940 සැප්තැම්බර් 20 නුවරදී උපත ලබා ඇති ඒ මහතා මියයන විට වයස අවුරුදු 83 වන වියේ පසු විය.

සිංහල සිනමාවේ වෙනස්ම ආකාරයේ පෙම්වතෙක් ලෙස පැවති සම්ප්‍රදාය කණපිට පෙරළු නළුවෙක් ලෙස ප්‍රකට ඔහු 1969 වසරේ "රැයක් දවාලත්" චිත්‍රපටයෙන් සිනමාවට පිවිසියේය.

ඔහු "හන්තානෙ කතාව", "අක්කර පහ", "නිම් වළල්ල" යන චිත්‍රපටවල රඟපෑ අතර "අහස් ගව්ව" චිත්‍රපටයේ රංගනයෙන් ඉතා ජනප්‍රියත්වයට පත් විය.

"බඹරු ඇවිත්" හි සනත්, "පොඩි මල්ලි" හි බර්ටි, "අනූපමා" හි රජී අයියා, "අපේක්ෂා" හි නිමල්, "පරිත්‍යාගය" හි ධානප්‍රේම, "සිංහබාහු" හි සිංහබාහු, "යස ඉසුරු" හි සුරංග, "පෙම් රජ දහන" හි සාජන්ට් ජයතිලක සහ "වජිරා" හි නිමල් වැනි චිත්‍රපටවලින් ඉහළම ජනප්‍රියත්වයට පත් ඔහු සිංහල සිනමාවේ කිසිදින අමතක නොවන චරිතයකි.

දීපශිකා, සරසවිය, ජනාධිපති, ස්වර්ණ සංඛ සහ සිග්නීස් සම්මානලාභියෙකු වන ඔහුට 2004 වසරේ සිග්නීස් සම්මාන උළෙලේ යාවජීව ගෞරව සම්මානය පිරිනැමුණු අතර මේ වසරේ දෙරණ සම්මාන උළෙලේදී ද ඔහු ජීවිතයේ එක් වරක් පමණක් පිදෙන යාවජීව සම්මානයෙන් පිදුම් ලැබුවේය.

කොළඹ සරසවිය, රුහුණු සරසවිය සහ පේරාදෙණිය සරසවිය ආදියෙන්ද විශේෂ ඇගයීම් කලං අයියා වෙනුවෙන් පුද කර ඇති අතර 2018 වසරේ ජනවාරි 14 වන දින ඔහු බොදු සිසු විරාජමානී ගෞරව සම්මානයෙන් පිදුම් ලද්දේය.

ලොව රටවල් 96 ක ක්‍රියාත්මක ස්ටීම් අධ්‍යාපන ක්‍රමවේදය මෙරටට හඳුන්වා දීම අද (31) සිදු කෙරිණි.

ස්ටීම් අධ්‍යාපන ක්‍රමවේදය හඳුන්වාදීමේ බස්නාහිර පළාත කේන්ද්‍ර කරගත් ප්‍රධාන වැඩසටහන අද (31) පැවැත්වුණේ කොළඹ රාජකීය විද්‍යාලයේදී ය.

ඒ අධ්‍යාපන අමාත්‍ය, ආචාර්ය සුසිල් ප්‍රේමජයන්ත, ජාතික විද්‍යා පදනමේ සභාපති, මහාචාර්ය රංජිත් සේනාරත්න යන අය හා තානාපතිවරුන් ඇතුළු පිරිසකගේ සහභාගීත්වයෙනි.

සෙසු පළාත් සඳහා ද මාර්ගගත ක්‍රමය ඔස්සේ මෙම වැඩසටහන ආරම්භ කෙරුණු අතර අමෙරිකාව 1999 දී හඳුන්වා දුන් ස්ටීම් අධ්‍යාපන ක්‍රමවේදය හරහා විෂය සිද්ධාන්ත හා මූලධර්ම සරල ක්‍රියාකාරකම් මගින් දරුවන්ට ප්‍රායෝගික ව වටහා ගැනීමට අවස්ථාව සැළසෙයි.

මේ සඳහා විද්‍යාව, තාක්ෂණය, ඉංජිනේරු විද්‍යාව, කලා හා ගණිතය විෂයන් ඇතුළත් වේ.

 අධ්‍යාපන අමාත්‍ය, ආචාර්ය සුසිල් ප්‍රේමජයන්ත -

'' ඊළඟට අපි යන්නේ ලෝකයේ පරිවර්තනීය යුගයකට. අද සමහර රටවල් සැලසුම් කරනවා තාක්ෂණය යොදා ගන්නකොට රැකියා අහිමි වෙද්දි කොහොමද ඒ අයව කොහොමද ඒවට අනුගත කරගන්නේ කියන කාරණය. ඒවා තමය පර්යේෂණ. අපේ කොහොමද?අපේ විශ්වවිද්‍යාලවල ඉගෙන ගන්න ඕනි දරුවෝ විශ්ව දැනුම ලබා ගන්න ඕනි අය ඒක පැත්තකින් තියලා පොලිසියෙන් කඳුළු ගෑස් කනවා පාර දිගේ. මේක වෙනස් වෙන්න ඕනි. සමහර කතා කරනවා අවුරුදු 75 ක් වෙනසක් වෙලා නෑ. ඔව්.. හැබැයි දැනුම අතින් අපි ඉහළයි. දැනුම යොදා ගැනීම පිළිබඳ ප්‍රශ්නයයි අපිට තියෙන්නේ. ඔබ හිතෙනවාද වෙනත් රටවල්වල ඔය ඔක්කොම විභාග මත මනින්නේ කියලා. දැන් මේක විශාල වදයක් වෙලා දරුවන්ට නේද.. ගුරුවරුන්ටත් එහෙමයි. කියන්නේ කොළ පුරවනවා ඉවරයක් නෑ කියලා. න්‍යාය, මූලධර්ම, සිද්ධාන්ත ඉතාම සරලව ක්‍රියාකාරකමත් එක්ක ලබා දෙනවා දරුවන්ට. කුමන මට්ටමකින් පාසලෙන් ඉවත් වුවත් ඔවුන්ට තනියෙන්ම සමාජිය අභියෝගවලට මුහුණ දෙන්න පුලුවන් ආකාරයට මේ අය හැඩැගැහෙනවා. ඒක තමයි ප්‍රධානම අරමුණ වෙන්නේ මේ අධ්‍යාපන පරිවර්තනයේ. ඇමරිකා එක්සත් ජනපදයේ ජාතික ආදායමෙන් සීයට 62 ක් නිර්මාණය කරන්නේ ස්ටීම් අධ්‍යාපනයෙන් ආපු උදවිය. අපි තාම තේ පොල් රබර් ඔය ටික අපනයනය කරලා විදේශ විනිමය හොයන්න යනවා. ඊළඟට ලක්ෂ 12 ක් ඉන්නේ කවුද මැදපෙරදිග. නුපුහුණු ශ්‍රමිකයෝ. ඒ අයගේ විදේශ විනිමය මත අපි යැපෙන්න හදනවා. ඊට පස්සේ අපිට ණය ගන්න වෙලා තියෙනවා. නෑ අපේ සම්පත්වලට අගය එකතු කරන්න වෙනවා. ඒ සඳහා නිර්මාණකරුවෝ ඉන්නවා. ඒගොල්ලන්ට අවස්ථාව දෙන්න ඕනි. ඒක කුඩා කල සිටම පුහුණු කිරිම තමයි ස්ටීම් අධ්‍යාපනයෙන් වෙන්නේ. ඒ අනූව කිසිම දරුවෙක් විෂය ධාරාව අනූව මෙකෙන් ඉවත් වෙන්නේ නෑ.."

කෘත්‍රීම බුද්ධිය, රොබෝ තාක්ෂණය, ජෛව හා නැනෝ තාක්ෂණය, ජාන තාක්ෂණය වැනි ලොව නැගී එන විෂයන් අපේ විශ්වවිද්‍යාල පද්ධතියට මෙන් ම පාසල් අධ්‍යාපනයටත් ඇතුළත් විය යුතු අතර කෘත්‍රීම බුද්ධිය නිසා ඉදිරියේ දී රැකියා අහිමි වන මිලියන 300ක ජනතාව වෘත්තීය ක්‍රියාදාමයට අනුගත කරගැනීමේ මං සොයන ලෝකය සමග අප ද එක් විය යුතු බවත් නව අධ්‍යාපන පරිවර්තන හරහා මෙරට දරුවන්ට එයට මග සැලසෙනු ඇති බවත් හෙතෙම සඳහන් කළේ ය.

දැනුම අතින් ඉහළ ස්ථානයක සිටින මෙරට ශිෂ්‍ය ප්‍රජාවට සිය කුසලතා ඔප් නංවා ගැනීම මගින් ඊට අනුගත වීම එතරම් දුෂ්කර නොවනු ඇතැයි ද අමාත්‍යවරයා පැවසී ය.

ඉදිරියේ දී දීපව්‍යාප්ත ව ක්‍රියාවට නැංවෙන මෙම නව අධ්‍යාපන ක්‍රමවේද ඔස්සේ දෙස් විදෙස් සේවයේ නියුතු ශ්‍රී ලාංකික විද්‍යාඥයන් ඇතුළු විශ්වවිද්‍යාල ආචාර්ය මහාචාර්යවරුන් හා වෙනත් විද්වතුන් සමග බුද්ධිමය සංවාද හා සාකච්ඡාවල යෙදෙමින් ප්‍රායෝගික ව විෂය සිද්ධාන්තමය දැනුම උකහා ගැනීමේ අවස්ථාව මෙරට පාසල් සිසුන්ට උදා වනු ඇතැයි ද පැවසූ අමාත්‍යවරයා මේ අවස්ථාවට සහභාගී වූ අධ්‍යාපන‍ඥයන්, විද්වතුන් හා නිලධාරීන් මෙන් ම ප්‍රතිලාභී ශිෂ්‍ය ප්‍රජාව ද ඇගයීමට ලක් කළේ ය.

රෝයල් පාර්ක් මිනීමැරුම් සිද්ධිය සම්බන්ධයෙන් මරණීය දණ්ඩනය නියමවී සිටි ජූඩ් ශ්‍රමන්ත ජයමහට සමාව ප්‍රදානය කර නිදහස් කිරීමට එවකට ජනාධිපති මෛත්‍රීපාල සිරිසේන ගත් තීරණය අන්තර්ගත ලේඛනය අධිකරණයට ඉදිරිපත් කරන ලෙස ශ්‍රේෂ්ඨාධිකරණය නීතිපතිවරයාට දැනුම් දී තිබේ.

අදාළ විත්තිකරුට ප්‍රදානය කරන ලද ජනාධිපති සමාව බලරහිත කරන ලෙස ඉල්ලා කාන්තා මාධ්‍ය සංවිධාන එකමුතුව විසින් ගොනු කරන ලද මූලික අයිතිවාසිකම් පෙත්සමක් ඊයේ (මාර්තු 30) විභාගයට ගත් අවස්ථාවේදී ශ්‍රේෂ්ඨාධිකරණ විනිසුරු මඩුල්ල විසින් මෙම නියෝගය නිකුත් කරනු ලැබ ඇත.

එස්. තුරෙයිරාජා, යසන්ත කෝදාගොඩ සහ ජනක් ද සිල්වා යන ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ පෙත්සම් විභාගය පවත්වා තිබේ.

ඉන්ධන මිල පහළ දැමීමට සමගාමීව අධිවේගී බස් ගාස්තු ද සංශෝධනය කර තිබේ.

ඒ අනුව, අදාළ ගාස්තු අද (මාර්තු 31) සිට ක්‍රියාත්මක වීමට නියමිත ය.

එම ගාස්තු ලේඛනය පහතින් දැක්වේ.

කේ.ඩී.එන් රංජිත් අශෝක රාජ්‍ය පරිපාලන ස්වදේශ කටයුතු පළාත් සභා හා පළාත්

ජාතික සම්පත් විකිණීමට එරෙහිව අප්‍රේල් 02 වනදා  එස් ද එස් ජයසිංහ ශාලාවේ දී පැවැත්වෙන

ශ්‍රී ලංකා නීතීඥ සංගමයේ (BASL) හිටපු සභාපති මෙන්ම ජනාධිපති නීතීඥවරයෙකුද වන සාලිය පීරිස් ගේ වෘත්තීය රාජකාරි සහ ඔහුගේ ආරක්ෂාව තහවුරු කිරීමට අවශ්‍ය කටයුතු කරන ලෙස නීතීඥ සංගමය බලධාරීන්ගෙන් ඉල්ලමින් නිවේදයක් නිකුත් කොට ඇත.