පුවත්

මේ වන විට ජාත්‍යන්තර පාපන්දු තහනමකට ලක්ව සිටින ශ්‍රී ලංකාවට 2024 වසරේ පැවැත්වෙන ඔලිම්පික් පාපන්දු තරගාවලිය සඳහා සුදුසුකම් ලැබීමේ තරග සඳහා සහභාගි වීමේ අවස්ථාවද අත්හිටුවා තිබේ.

ලෝක පාපන්දු සම්මේලනය විසින් ශ්‍රී ලංකා පාපන්දු සම්මේලනය තහනම් කර ඇති බැවින් මෙම පියවර ගෙන ඇත.

එමෙන්ම වයස අවුරුදු 23න් පහළ ආසියානු පාපන්දු තරගාවලියේ සුදුසුකම් ලැබීමේ තරග සදහාද ශ්‍රී ලංකා කණ්ඩායමට තරග කිරීමට අවස්ථාවක් නොලැබෙන බව ලෝක පාපන්දු සම්මේලනය විසින් ශ්‍රී ලංකාවට දැනුම් දී තිබේ.

රිලවුන් ලක්ෂයක් චීනයට යැවීම සම්බන්ධයෙන් කිසියම් ආකාරයක හෝ තීරණයක් ගැනීමට කෘෂිකර්ම අමාත්‍යංශයට නීත්‍යනුකූල බලයක් නැතැයි ජ්‍යෙෂ්ඨ පාරිසරික නීතිඥ ආචාර්ය ජගත් ගුණවර්ධන ‘මව්බිම’ට පවසා ඇත.

වන සත්ව සහ වෘක්ෂලතා ආරක්ෂක ආඥා පනත ප්‍රකාරව උන් පිළිබඳව තීරණ ගැනීමේ අයිතිය ඇත්තේ, වනජීවී සංරක්ෂණ දෙපාර්තමේන්තුවට පමණක් යැයි ද ඔහු ප්‍රකාශ කරයි.

එම ආයතනය ඇත්තේ, වනජීවී සහ වන සංරක්ෂණ අමාත්‍යංශය යටතේ මිස කෘෂිකර්ම අමාත්‍යංශය යටතේ නොවන බව හෙතෙම අවධාරණය කර ඇත.

වියළි කලාපයේ හමුවන Macaca sinica sinica නම් දර්ශීය උප-විශේෂය සහ තෙත් කලාපයේ මෙන් ම කඳුකරයේ ඇතැම් ප්‍රදේශවල හමුවන Macaca sinica aurifrons නම් උප-විශේෂය මෙරට හමුවන ප්‍රධාන විශේෂ බව ද ඔහු  පවසයි.

ඉන් වැඩි ම ව්‍යාප්තියක් සහ ඉහළ ගහන ඝනත්වයකින් යුතු වන්නේ ද, වගාවන්ට වැඩිම හානියක් කරන්නේ ද දර්ශීය මැකාකා සයිනිකා සයිනිකා (Macaca sinica sinica) නම් උප-විශේෂය බව පෙනී යන්නේ යැයි ද ආචාර්ය ජගත් ගුණවර්ධන ප්‍රකාශ කර ඇත.

ඒ කෙසේ වුවත් මෙරටදී හමුවන රිලවාගේ උප-විශේෂ පිළිබඳව සහ උන්ගේ ව්‍යාප්තිය ඇතුළු තව ත් කරුණු සම්බන්ධයෙන් මේ වනතුරුත් නිසි අධ්‍යයනයක් සිදු කර නොමැති බවට ඔහු චෝදනා කරයි.

ඒ නිසා රිලවුන් විශාල සංඛ්‍යාවක් අපනයනය කරන්නේ නම් ඔවුන් ලබා ගන්නේ කිනම් ප්‍රදේශවලින් ද, එම ප්‍රදේශයෙන් අල්ලා ගන්නා වඳුරන් සංඛ්‍යාව, එම සතුන් එම ප්‍රදේශයෙන් ඉවත් කිරීමෙන් මතුවිය හැකි තත්ත්වයන් පිළිබඳව ද සොයා බැලිය යුතු බව හෙතෙම කීය.

මේ අතර චීන සත්ත්වෝද්‍යාන වෙත නම් මෙරට සිටින රිලවුන් ලක්ෂයක් ලබා දෙන්නේ අඩු තරමේ සතුන් දෙදෙනකු බැගින් හෝ රඳවා තැබිය හැකි සත්ත්වෝද්‍යාන පනස්දාහක්වත් තිබිය යුතු බව පරිසර හා සොබාදම් අධ්‍යයන මධ්‍යස්ථානයේ ජාතික සංවිධායක ආචාර්ය රවින්ද්‍ර කාරියවසම් ‘මව්බිම’ට ප්‍රකාශ කර ඇත.

සත්ත්වෝද්‍යානවල ප්‍රදර්ශනයට යැයි පවසමින් වුවත් ඔවුන් ඉල්ලන්නේ මෙරටට අවේණික රිලවුන් නිසා උන් ලබා දීම මෙරට සතුන්ගේ ජාන පරම්පරා අනතුරේ හෙළීමක් බව ද ඔහු අවධාරණය කළේ ය.

මෙරටට ආවේණික රිලවුන් මිනිසාට බොහෝ සමානකමක් දක්වන නිසා චීනයට රැගෙන යන රිලවුන් සායනික අත්හදා බැලීම් සඳහා වුව ද යොදා ගැනීමේ අවදානමක් පවතින බව ද හෙතෙම පෙන්වා දුන්නේ ය.

එම සතුන් එකෙක් දෙන්නෙක් නොව ලක්ෂයක්ම එකවර ඉල්ලා සිටීම තුළ යම් සැඟවුණු අරමුණක් පවතින්නේ ද යන්න සැක සහිත යැයිද ඔහු සඳහන් කළේ ය.

මව්බිම

ක්‍රිකට් ක්‍රීඩාවේ උන්නතිය වෙනුවෙන් ශ්‍රී ලංකා ක්‍රිකට් තාක්ෂණ කමිටුවක් පිහිටුවීමට පියවරගත් බව ක්‍රීඩා අමාත්‍ය රොෂාන් රණසිංහ පවසයි.

කමිටුවේ නිලධාරීන් හට නිල වශයෙන් පත්වීම් භාර දීම ක්‍රීඩා හා යෞවන කටයුතු අමාත්‍යාංශයේ දී පෙරේදා සිදු විය.

සනත් ජයසූරිය එහි සභාහපතීත්වය දරණ අතර අසන්ත ද මෙල් පර්විස් මහරුෆ් , චරිත් සේනානායක හා කපිල විජේගුණවර්ධන යන මහත්වරුන් කමිටුවේ සෙසු සාමාජිකයන් වේ.

ක්‍රීඩාවේ ප්‍රගමනය වෙනුවෙන් නිසි වෙලාවට නිවැරදි, සෘජු තීරණ ගැනීමට නොපැලිකෙන බව ප්‍රකාශ කළ අමාත්‍යවරයා ක්‍රිකට් ක්‍රීඩාවේ දැනට පැනනැගී ඇති ගැටලු නිරාකරණය කර ගැනීම සඳහා 2020 ජනවාරි මස 8 වන දිනට සංශෝධිත ශ්‍රී ලංකා ක්‍රිකට් ව්‍යවස්ථාවේ තුන්වන ඡේදය හා 1973 අංක 25 දරණ ක්‍රීඩා පනතේ 39(03) වන වගන්තිය සමග කියවිය යුතු 41 නි වගන්ති යටතේ අමාත්‍යවරයාට පැවරී ඇති බලතල ප්‍රකාරව ශ්‍රී ලංකා ක්‍රිකට් ආයතන සඳහා තාක්ෂණික උපදෙස් කමිටුවක් පත් කර ඇත.

ක්‍රීඩා ක්ෂේත්‍රයේ අති දැවැන්ත වැඩ කොටසක් කර ඇති මෙම කණ්ඩායම පිළිබඳව ඇති විශ්වාසයත් සමග මොවුන් සියලු දෙනා මෙම තනතුරුවලට පත් කිරීමට කටයුතු කළ බව අමාත්‍යවරයා සඳහන් කළේය.

පසුගිය ආසියානු කුසලානය සහ ඕස්ට්‍රේලියානු සංචාරය සාර්ථක කරගැනීමට හැකියාව ලැබුණු නමුත් ඇතිවූ අඩුපාඩු පිළිබඳව,තාක්ෂණික කටයුතු හා ක්‍රීඩකයින් තේරීම් සම්බන්ධයෙන්ද සොයා බැලීම සඳහා මෙම තාක්ෂණික කමිටුව පත්කිරීමට පියවර ගැනුනු බව අමාත්‍යවරයා වැඩිදුරටත් පැවසීය.

ජාතික ව්‍යාපාර කළමණාකාරීත්ව ආයතනයේ (NIBM) උපදේශන අංශ ප්‍රධානී සහ කථිකාචාර්යවරයෙකු ලෙස සේවය කරන ආචාර්ය හිමේන්ද්‍ර බළල්ල විසින් රචිත “අධ්‍යාපන තාක්ෂණයට ප්‍රවේශයක්“ ග්‍රන්ථය පසුගියදා බත්තරමුල්ල වෝටර්ස් එජ් හෝටලයේදී එළි දක්වන ලදී.

අධ්‍යාපන තාක්ෂණය පිළිබඳව ලියවුණු ‍පොත් පත් ඉතාම අල්පය. අධ්‍යාපන තාක්ෂණය පිළිබදව සිංහල භාෂාවෙන් පළවුණු එකම පොත ලෙස මෙය සැලකෙන අතර කතුවරයාගේ අත්දැකීම් හා පර්යේෂණ සරලව මෙහි ඇතුළත් කර ඇත. මෙය ගුරුවරුන්ට, අධ්‍යාපන ආයතන පරිපාලකයින්ට, අධ්‍යාපන ක්‍රමවේදයන් හදාරන සිසුන්ට එකසේම වැදගත්වන ග්‍රන්ථයකි.

අධ්‍යාපන තාක්ෂණය යනු ඉගැන්වීම සහ ඉගෙනීම වැඩිදියුණු කිරීම සඳහා උපදේශන පරිසරය, ඉගෙනුම් ද්‍රව්‍ය, ඉගෙන ගන්නන් සහ ඉගෙනුම් ක්‍රියාවලිය විශ්ලේෂණය කිරීම, සැලසුම් කිරීම, සංවර්ධනය කිරීම, ක්‍රියාත්මක කිරීම සහ ඇගයීම යන ක්‍රියාවලිය සඳහා තාක්ෂණය භාවිත කිරීම වේ.

අධ්‍යාපන තාක්ෂණය පිළිබඳ මනා දැනුමක් ලබා ගැනීමට නම් ප්‍රථමයෙන් අධ්‍යාපන ක්‍රමවේදයන් ගැන පුළුල් දැනුමක් තිබිය යුතු අතර දෙවෙනුව නවීන තාක්ෂණය පිළිබඳ දැනුමක්ද තිබිය යුතුය. තාක්ෂණය හා අධ්‍යාපනය මිශ්‍ර කිරීම තෙවනුව කළ යුතු අතර අත්දැකීම් මත සාර්ථක භාවය තීරණය වේ.

ජාතික ව්‍යාපාර කළමණාකාරීත්ව ආයතනයේ අධ්‍යක්ෂක ජෙනරාල් ඩී. එම්. ඒ කුලසූරිය, ‍කොළඹ විශ්වවිද්‍යාලයේ ශ්‍රීපාලි මණ්ඩපයේ මහචාර්ය ටියුඩර් වීරසිංහ, ජනාධිපති මාධ්‍ය අංශයේ අධ්‍යක්ෂක ඉංජිනේරු ස්ටැන්ලි හෙට්ටිආරච්චි, මහචාර්ය අනුර මුණසිංහ මෙහිදී දේශන පැවැත්වීය.

සිය ඉල්ලීම් සම්බන්ධයෙන් සෑහීමකට පත්විය හැකි නිගමනයකට එළඹෙන තෙක් උසස් පෙළ පිළිතුරු පත්‍ර ඇගයීම සම්බන්ධයෙන් අවසන් තීරණයක් ගෙන නැතැයි විශ්වවිද්‍යාල ආචාර්යවරුන්ගේ සමිති සම්මේලනය පවසයි.

මේ අතර විශ්වවිද්‍යාල ආචාර්ය සංගමය සමග පසුගිය මාස එකහමාරක කාලය තුළ සාකච්ඡා වට කීපයක් පවත්වා එම සංගමය විසින් ඉදිරිපත් කරන ලද ගැටලු කීපයකට විසඳුම් ලබා දී ඇති බව අධ්‍යාපන අමාත්‍යාංශය පවසයි.

එහි දැන්වෙන්නේ විශ්වවිද්‍යාල දේශන යළි ආරම්භ කිරීමට ගත් තීරණය සම්බන්ධයෙන් ද සිය ප්‍රසාදය පළ කරන බවය.

උසස් පෙළ පිළිතුරු පත්‍ර ඇගයීම ආරම්භ කිරීමට මේ වනවිට විභාග දෙපාර්තමේන්තුව සූදානම් බැවින් උසස් පෙළ පිළිතුරු පත්‍ර ඇගයීම කඩිනමින් ආරම්භ කිරීමට ද මැදිහත් වන මෙන් විශ්වවිද්‍යාල ආචාර්ය සංගමයෙන් ඉල්ලා සිටින බව අධ්‍යාපන අමාත්‍යාංශය නිවේදනයක් නිකුත් කරමින් පැවසීය.

විශ්වවිද්‍යාල ආචාර්ය සංගමයට තවදුරටත් යම් ගැටලු සාකච්ඡා කිරීමට අවශ්‍ය නම් ඉදිරි ඕනෑම දිනක ඊට සූදානම් බවද අධ්‍යාපන අමාත්‍යාංශය දැනුම්දෙයි.

ජපානය, ඉන්දියාව සහ ප්‍රංශය ශ්‍රී ලංකාවේ ණය ප්‍රතිව්‍යුහගත කිරීමේ වැඩපිළිවෙල හෙට (13) ප්‍රකාශයට පත් කිරීමට නියමිතව ඇති බව ඉකොනොමික් ටයිම්ස් පුවත්පත පෙන්වා දී ඇත.

ඉන්දියානු මුදල් අමාත්‍යවරිය වන නිර්මලා සීතාරාමන්, ජපාන මුදල් අමාත්‍ය ෂුනිචි සුසුකි, ප්‍රංශ භාණ්ඩාගාරයේ අධ්‍යක්ෂක ජනරාල් බෘනෝ ලෙ මෙයාර් මෙම මාධ්‍ය හමුවට සහභාගී වීමට නියමිතව තිබේ.

ශ්‍රී ලංකාව වෙනුවෙන් ජනාධිපති රනිල් වික්‍රමසිංහ මහතා සහ මුදල් රාජ්‍ය අමාත්‍ය ශෙහාන් සේමසිංහ මාධ්‍ය හමුවට සහභාගී වේ.

ජපාන මුදල් අමාත්‍යංශයේ ප්‍රකාශයක් උපුටා දක්වමින් ජාත්‍යන්තර මූල්‍ය අරමුදල පෙන්වා දී ඇත්තේ ඉන්දියාව, ප්‍රංශය සහ ජපානය හෙට(13) මාධ්‍ය හමුවක් පැවැත්වීමට නියමිත බවත් එහි අරමුණ ශ්‍රී ලංකාවේ ණය ප්‍රතිව්‍යුහගත කිරීමේ සාකච්ඡා ආරම්භ කිරීම පිළිබඳ ප්‍රකාශයට පත් කිරීම බවත්ය.

මෙම මාධ්‍ය හමුවට ජාත්‍යන්තර මූල්‍ය අරමුදලද සහභාගී වන බව පැවැසෙයි.ජාත්‍යන්තර මූල්‍ය අරමුදලේ සහ ලෝක බැංකුවේ සහභාගීත්වයෙන් පැවැත්වෙන වසන්ත රැස්වීම් වලට සමගාමීව මෙම මාධ්‍ය හමුව පැවැත්වීමට නියමිතව ඇත.

(Lankadeepa )

උද්ගතව ඇති අසීරු අවස්ථාවෙන් මිදීමට ශ්‍රී ලංකාවට අඛණ්ඩව සහය පළ කරන බව ජාත්‍යන්තර මූල්‍ය අරමුදලේ කළමනාකාර අධ්‍යක්ෂ ක්‍රිස්ටලීනා ජෝර්ජියේවා  පවසයි.

ඇය මේ බව පවසා ඇත්තේ, ජාත්‍යන්තර මූලය අරමුදල සහ ලෝක බැංකුව එක්ව සංවිධානය කරන ස්ප්‍රිං සමුළුවට සමගාමීව ශ්‍රී ලංකා දූත මණ්ඩලය සමග ඊයේ සාකච්ඡාවකට එක්වෙමිනි.

හමුව පිළිබඳව සිය නිළ ට්විටර් ගිණුමේ සටහනක් තබමින් ජාත්‍යන්තර මූල්‍ය අරමුදලේ කළමනාකාර අධ්‍යක්ෂ ක්‍රිස්ටලීනා ජෝර්ජියේවා  පවසන්නේ, මුදල් රාජ්‍ය අමාත්‍ය ශෙහාන් සේමසිංහ, මහ බැංකු අධිපති නන්දලාල් වීරසිංහ  ඇතුළු ශ්‍රී ලංකාවේ දූත පිරිස සමග සාර්ථක සාකච්ඡාවක් සිදුකළ බවයි.

ආර්ථික අර්බුදයෙන් අත්මිදීම සඳහා සිය වගකීම් ඉටු කිරීමට සියලු දෙනා එක්ව කටයුතු කිරීම ඉතා වැදගත් බව ජෝර්ජියේවා මහත්මිය සිය ට්විටර් සටහනෙන් පෙන්වා දෙයි.

මුදල් රාජ්‍ය අමාත්‍ය ෂෙහාන් සේමසිංහ සිය නිල ගිණුමේ ට්විටර් පණිවුඩයක් නිකුත් කරමින් ඔහු ප්‍රකාශ කළේ මෙම රැස්වීමේ ප්‍රධාන අවධානය යොමු වී ඇත්තේ අභියෝග මධ්‍යයේ තිරසාර සහ සාමුහික වර්ධනයක් සුරක්ෂිත කිරීම බවයි.

“ජාත්‍යන්තර ප්‍රජාවට සහ බහුපාර්ශ්වික ආයතනවලට තිරසාර සහ සාමුහික වර්ධනයක් ලබා ගැනීම සඳහා නැගී එන වෙළෙඳපොළ සහ සංවර්ධනය වෙමින් පවතින ආර්ථිකයන්හි ප්‍රතිපත්තිමය ප්‍රයත්නයන්ට ඵලදායී ලෙස සහාය විය හැකි ප්‍රධාන ක්ෂේත්‍ර සාකච්ඡා කිරීමට මෙම රැස්වීම වේදිකාවක් සැපයීය. මෙහි ප්‍රධාන කොටසක් වන්නේ ද්‍රවශීලතා සහය මෙන්ම නිල සහ පෞද්ගලික මූලාශ්‍රවලින් ආසන්න හා මධ්‍ය කාලීන මූල්‍යකරණයට ප්‍රවේශ වීමයි.” ඔහු වැඩිදුරටත් පැවසීය.

තවද, ජාත්‍යන්තර මූල්‍ය අරමුදලේ කළමනාකාර අධ්‍යක්ෂිකා ක්‍රිස්ටලිනා ජෝර්ජිවා මහත්මිය සහ මුදල් රාජ්‍ය අමාත්‍ය ෂෙහාන් සේමසිංහ අතර සාකච්ඡාවක් පැවැත්විණි. මෙහිදී , ආර්ථික අර්බුදයේදී මුහුණ දෙන දුෂ්කරතා මඟහරවා ගැනීම සඳහා ශ්‍රී ලංකාවට සහාය වීමට නායකත්වය ලබා දීම සම්බන්ධයෙන් රාජ්‍ය අමාත්‍යවරයා කෘතඥතාව පළ කර ඇති අතර, IMF වැඩසටහන මෙරට තුළ ම සුරක්ෂිත කරමින් අඛණ්ඩව ක්‍රියාත්මක කිරීමට ශ්‍රී ලංකාවේ කැපවීම රාජ්‍ය අමාත්‍යවරයා විසින් පෙන්වා දී තිබේ. මෙම සාකච්ඡාවට ශ්‍රී ලංකා මහ බැංකුවේ අධිපති ආචාර්ය නන්දලාල් වීරසිංහ සහ මහින්ද සිරිවර්ධන යන අය සහභාගි වූහ.

ලෝක බැංකුවේ කළමනාකාර අධ්‍යක්ෂ Anne Bjerde මහත්මිය සමඟ සාකච්ඡාවක නිරත වූ රාජ්‍ය අමාත්‍යවරයා, ශ්‍රී ලංකාවේ ප්‍රතිසංස්කරණ න්‍යාය පත්‍රය, ආර්ථික ප්‍රකෘතියට සහාය වන්නේ කෙසේද යන්න පැහැදිලි කර ඇත. මෙම සාකච්ඡාවේදී කළමනාකාර අධ්‍යක්ෂවරිය විසින්, ශ්‍රී ලංකාවේ සමාජ ආරක්ෂණ කටයුතු සහ ආර්ථික ස්ථාවරත්වය ශක්තිමත් කිරීම සඳහා තවදුරටත් ලෝක බැංකුවේ සහාය සහතික කර ඇත.

විශ්විද්‍යාල ආචාර්යවරුන් අධ්‍යයන කටයුතුවලින් බැහැරව ආරම්භ කළ වෘත්තීය ක්‍රියාමාර්ගය අත්හිටුවීමට තීරණය කර ඇත.

ඒ අනුව ලබන 17 වැනිදා සිට යළි අධ්‍යයන කටයුතු සදහා එක්වන බව විශ්වවිද්‍යාල ආචාර්යවරුන්ගේ සමිති සම්මේලනය පවසයි.

විශ්වවිද්‍යාල ආචාර්යවරුන්ගේ සමිති සම්මෙලනය තම වෘත්තිය ක්‍රියාමාර්ග සම්බන්ධයෙන් විශේෂ සාකච්ඡාවක නිරත විය.

ඊයේ මධ්‍යම රාත්‍රිය වන තෙක් එම සාකච්ඡා පැවැති බව වාර්තා වේ.

කෙසේ වුවද එම සමිති සම්මේලනය අද නිවේදනය කළේ අධ්‍යයන කටයුතුවලින් බැහැරව සිටීමට ගත් වෘත්තීය ක්‍රියාමාර්ග අවසන් කිරීමට තීරණය කළ බවයි.

කෙසේ වුවද උසස්පෙල උත්තරපත්‍ර පරික්ෂා කිරීම සම්බන්ධයෙන් මෙතෙක් නිෂ්චිත තීරණයකට එළඹ නොමැති බවද වාර්තා වේ.

පොදුජන පෙරමුණේ නායකත්වයේ වෙනසක් පිළිබඳ පාර්ලිමේන්තු මන්ත්‍රී රංජිත් බණ්ඩාර සිදුකර ඇති ප්‍රකාශය සම්බන්ධව දේශපාලන ක්ෂේත්‍රයේ විශේෂ අවධානයක් යොමුව ඇත.

පසුගියදා පැවති මාධ්‍ය හමුවකදී අදහස් දක්වමින් රංජිත් බණ්ඩාර මන්ත්‍රීවරයා පවසා ඇත්තේ එළැඹෙන සිංහල දෙමළ අලුත් අවුරුද්ද නිමාවන විට ශක්තිමත් නායකයෙක් ශ්‍රී ලංකාව පොදුජන පෙරමුණ සඳහා පත් කිරීමට කටයුතු කරන බවය.

එසේම හිසතෙල්ගා නැකතට වැඩ අල්ලමින් නව නායකයා ප්‍රකාශයට පත් කිරීමට කටයුතු කරන බවත් ඔහු එහිදී සඳහන් කළේය.

කෙසේ වුවත් මේ වන විට පොදුජන පෙරමුණේ නායකත්වය දරන්නේ හිටපු ජනාධිපති මහින්ද රාජපක්ෂ වන අතර මෙතෙක් මන්ත්‍රීවරයාගේ ප්‍රකාශය සම්බන්ධව රාජපක්ෂ පවුලේ ප්‍රතිචාරයක්ද ලැබී නැත.

දේශපාලන විචාරකයන් පවසන්නේ සජබ මන්ත්‍රී කණ්ඩායමේ පිරිසක් ආණ්ඩුවට එක්වීමත් සමඟ මන්ත්‍රී කණ්ඩායමක් සමඟ විපක්ෂයට එක්වී එහි නායකත්වය ගැනීමේ අපේක්ෂාවක් නාමල් රාජපක්ෂ මන්ත්‍රීවරයාට තිබු බවත් ඒ උත්සාහය අඩපණ කර නැවත පාර්ලිමේන්තු පැමිණ විපක්ෂ නායකත්වය ගැනීමේ උත්සාහයක් බැසිල් රාජපක්ෂවාදීන්ගේ හැසිරීම තුළ පෙන්නුම් කරන බවය.

රජය විසින් යෝජනා කර ඇති ප්‍රති ත්‍රස්ත පනත් කෙටුම්පත හේතුවෙන් ජී.එස්.පී. ප්ලස් තීරු බදු සහනය ශ්‍රී ලංකාවට අහිමි වීමේ අවදානමක් ඇති බව යුරෝපා සංගමයේ කොළඹ තානාපතිවරයා වන ඩෙනිස් ෂායික් පෙන්වා දෙයි.

මෙම බදු සහනය දීර්ඝ කිරීමට අපොහොසත් වුවහොත් ඉන් ශ්‍රී ලංකාවට ඇමරිකානු ඩොලර් මිලියන පන්සියයකට අධික වෙළඳ සහනයක් අහිමි වනු ඇති බවද තානාපතිවරයා යොමු කර ඇති නිවේදනයේ සඳහන්ය.

මානව හිමිකම් ආරක්ෂා කිරීමට ශ්‍රී ලංකා රජය ප්‍රමුඛතාවයක් ලබා නොදුනහොත් එම සහනය අහිමි වී ඉඩ ඇති බවත් මෙරට ජර්මානු තානාපති කාර්යාලයද පසුගිය පෙබරවාරියේ අනතුරු ඇඟවීමක් කර තිබූ බවද නිවේදනයේ දැක්වෙයි.

ශ‍්‍රී ලංකාවට තීරු බදු සහනය දීර්ඝ කිරීම සම්බන්ධයෙන් වන ක්‍රියාවලිය දැනට අවසන් ඉදිරියේ පවතින බවත් එම නිවේදනය පෙන්වා දෙයි.

අලි සබ්‍රිත් සංශෝධන ඉල්ලයි !

මේ අතර විදේශ කටයුතු අමාත්‍ය ජනාධිපති නීතිඥ අලි සබ්‍රි පවසන්නේ යෝජිත ප්‍රතිත්‍රස්ත පනතේ ඇතැමි කරුණුවලට එකඟවිය නොහැකි බවය.

එම පනත් කෙටුම්පත සංශෝධනය කළ යුතු බවට ආණ්ඩුවේ සියලු දෙනා පොදු මතයක සිටන බව ද අමාත්‍යවරයා සඳහන් කර ඇත.

යෝජිත ප්‍රතිත්‍රස්ත පනත සම්බන්ධයෙන් මාධ්‍ය කළ විමසීමේදී අමාත්‍යවරයා වැඩිදුරටත් මෙසේද පවසා ඇත.

මෙම පනත් කෙටුම්පතේ මට එකඟ වන්න බැරි සමහර දේවල් තිබෙනවා. එකක් තමයි නියෝජ්‍ය පොලිස්පතිවරයකුට රැඳවුම් නියෝගයක් නිකුත් කිරීම සඳහා ඇති බලය. එය ඇමැතිවරයා යටතේ නැත්නම් අවම වශයෙන් ආරක්ෂක ලේකම් ළඟන් නවතින්න අවශ්‍යයි. මේ සඳහා පුළුල් අර්ථකතනයක් දීම ඉතාම භයානකයි. මේක හැමෝටම පොදුවේ කතා කරන්න පුළුවන් පිළිගතහැකි සාමාන්‍ය නීතියක් ලෙස යොදා ගැනීම නොවෙයි කළ යුතු්තේ. ත්‍රස්තවාදි අවස්ථාවක පමණක් නීතියක් ලෙස ගැනිමයි.ඒ මතයේ ඇපි හැමෝම සිටිනවා යැයි ද ඇමැතිවරයා පැවැසීය.

නව අමාත්‍යාංශ ලේකම්වරු දෙදෙනෙකු සහ නව තානාපතිවරයකු පත්කිරීම සඳහා උසස් නිලතල පිළිබඳ පාර්ලිමේන්තු කාරක සභාවේ අනුමැතිය හිමිව ඇති බව පාර්ලිමේන්තු වාර්තා පවසයි.

ඒ අනුව නාගරික සංවර්ධන හා නිවාස අමාත්‍යාංශයේ නව ලේකම්වරයා ලෙස ඩබ්ලිව්. එස්. සත්‍යානන්දගේ පත්වීම සහ ආයෝජන ප්‍රවර්ධන අමාත්‍යාංශයේ නව ලේකම්වරයා ලෙස එම්. එම්. නයීමුඩීන්ගේ පත්වීමද උසස් නිලතල පිළිබඳ කාරක සභාව අනුමත කර ඇත.

එසේම පිලිපීනයේ ශ්‍රී ලංකා තනාපති ලෙස ආචාර්ය චානක හර්ෂ තල්පහේවා පත්කර යැවීමටද උසස් නිලතල පිළිබඳ කාරක සභාව අනුමැතිය ලබාදී ඇත.

පාර්ලිමේන්තුවේ උසස් නිලතල පිළිබඳ කාරක සභාව කථානායක මහින්ද යාපා අබේවර්ධන ගේ ප්‍රධානත්වයෙන් පසුගියදා පාර්ලිමේන්තුවේදී රැස්වූ අතර පාර්ලිමේන්තු මන්ත්‍රීවරුන් වන ජෝන් සෙනවිරත්න, අනුර ප්‍රියදර්ශන යාපා, තලතා අතුකෝරළ සහ සුදර්ශනී ප්‍රනාන්දුපුල්ලේ යන අය ඊට සහභාගීව ඇත.

බැසිල් රාජපක්ෂ ශ්‍රී ලංකාවට නායකත්වය දෙන්න ඉතාමත් සුදුසු පුද්ගලයෙක් මෙන්ම ඔහු නායකත්ව හැකියාව ප්‍රදර්ශනය කළ නායකයෙක් බව ශ්‍රී ලංකා පොදුජන පෙරමුණේ මහ ලේකම්, පාර්ලිමේන්තු මන්ත්‍රී නීතිඥා සාගර කාරියවසම් පවසයි.

බැසිල් රාජපක්ෂ මහතා යුද්ධය අවස්ථාවේදී ජාත්‍යන්තරය සමඟ ගනදෙණු කරමින් ඉතාම හොදින් යුද්ධයට අවශ්‍ය ජාත්‍යන්තර සහය ගැනීමට සමත් වූ බවත් මහ ලේකම්වරයා සිහිපත් කරයි.

ශ්‍රී ලංකා පොදුජන පෙරමුණ පක්ෂ මූලස්ථානයේදී අද (11) පැවැති, විශේෂ ප්‍රවෘත්ති සාකච්ඡාවට සහභාගී වෙමින් මහ ලේකම්වරයා මේ බව සඳහන් කල අතර යුද්ධයෙන් පසු මේ රටේ දිළිදු ජනතාව නඟා සිටුවීම සඳහා අවශ්‍ය සියලු කටයුතු කර ලෝකයේ වේගයෙන් දියුණුවන රටවලින් එකක් බවට පත්කිරීමේදී ආර්ථික සංවර්ධන අමාත්‍යවරයා ලෙස බැසිල් රාජපක්‍ෂ කටයුතු කළ බවත් මන්ත්‍රීවරයා පැවසීය.

එසේම උතුරට සහ නැගනෙහිරට වැඩිම සංවර්ධනයක් කළ නායකයා ද බැසිල් රාජපක්ෂ බවත් ඔහුට විරුද්ධව පසුගිය කාලයේ බොරු චෝදනා කර නඩු පැවරුව ද ඔහු ඒවාට නිර්භයව මුහුණදිලා ඒ සියලු නඩුවලින් නිදොස්කොට නිදහස් වූ බවත් කාරියවසම් මන්ත්‍රීවරයා වැඩිදුරටත් සඳහන් කර සිටියේය.

පාර්ලිමේන්තුවට ඉදිරිපත් කිරීමට යෝජිත මහබැංකු පනත් කෙටුම්පත සම්බන්ධයෙන් පාර්ලිමේන්තු මන්ත්‍රී උදය ගම්මන්පිල මාධ්‍ය හමුවක දී කළ ප්‍රකාශය මුළුමනින්ම සාවද්‍ය මෙන්ම රට අධිකරණය නොමඟ යවන සුළු එකක් බව කතානායක මහින්ද යාපා අබේවර්ධන පැවසීය.

කතානායකවරයා පාර්ලිමේන්තුවට ප්‍රකාශ කළේ යැයි සඳහන් කරමින් යම් කරුණක් ගැන අදහස් පළකරන්නේ නම් වගකිවයුතු පාර්ලිමේන්තු මන්ත්‍රීවරයකු ලෙස උදය ගම්මන්පිල ඊට ප්‍රථමයෙන් එහි මූලාශ්‍රවන හැන්සාඩ් වාර්තාවූ අදාළ පටිගත කළ ශ්‍රව්‍ය දෘශ්‍ය මාධ්‍ය නිවැරදි ලෙස පරිශීලනය කිරීම යෝග්‍ය බව කතානායකවරයා දැනුම් දෙයි.

අන් කිසිවකුගේ ප්‍රකාශයක් සාවද්‍ය ලෙස නිරූපණය කරමින් පටු දේශපාලන අරමුණු ඉටුකර ගැනීම සඳහා මහජනතාව නොමඟ යැවීමට ගම්මන්පිල ගන්නා පහත් උත්සාහය බැහැර කරන බවද කතානායකවරයා වැඩිදුරටත් දැනුම් දෙයි.

මහ බැංකු පනත් කෙටුම්පත සම්බන්ධයෙන් ශ්‍රේෂ්ඨාධිකරණය ලබාදුන් තීරණය කතානායකවරයා විසින් පාර්ලිමේන්තුවට දැනුම්දුන් ආකාරය ගැටළු සහගත බව පිවිතුරු හෙළ උරුමයේ නායක පාර්ලිමේන්තු මන්ත්‍රී නීතිඥ උදය ගම්මන්පිල ඊයේ (10) පැවති මාධ්‍ය හමුවකදී පැවසිය. ඔහු කියා සිටියේ අදාළ කරුණ සම්බන්ධයෙන් කතානායකවරයාට උපදෙස් ලබාදුන් නිලධාරින් සිතාමතා හෝ නොසැලකිලිමත්ව කතානායකවරයා නොමඟ යවා ඇති බවයි.

lankadeepa

ශ්‍රී ලංකා නිදහස් පක්ෂයෙන් වෙන්ව සිටින පාර්ලිමේන්තු මන්ත්‍රීවරුන් එකොළොස් දෙනා මෙවර ශ්‍රීලනිප මැයි දින රැලියට සහභාගී නොවීමට තීරණය කර ඇති බව දේශපාලන ආරංචිමාර්ග පවසයි.

පසුගිය මහ මැතිවරණයේ දී ශ්‍රී ලංකා නිදහස් පක්ෂය නියෝජනය කරමින් මන්ත්‍රීවරු 14 දෙනෙක් තේරී පත්වූ අතර ඉන් 11 දෙනෙකු මේ වන විටත් රජයට සහයෝගය පළ කරමින් අමාත්‍ය ධුර සහ රාජ්‍ය අමාත්‍යධුර බාරගෙන ඇත.

එම කණ්ඩායම පවසන්නේ මෙවර ශ්‍රී ලංකා නිදහස් පක්ෂය සංවිධාන කරන මැයි දින රැළියට හෝ පෙළපාළියට සහභාගී නොවී සිටීමට තීරණය කල බවය.

මේ අතර පසුගියදා ශ්‍රී ලංකා නිදහස් පක්ෂයේ මහ ලේකම් පාර්ලිමේන්තු මන්ත්‍රී දයාසිරි ජයසේකර පවසා තිබුණේ ආණ්ඩුවේ තනතුරු අත්හැර ශ්‍රීලනිපයෙන් ඉවත්කළ පිරිසට යලිත් පක්ෂයට පැමිණිය හැකි බවය.

පළාත් පාලන ආයතනවලට තෝරාගන්නා සභිකයින් සංඛ්‍යාව මෙතෙක් 8000ක් වුවත් එම ප්‍රමාණය 4714ක් දක්වා අඩු කිරීමට නව සීමා නිර්ණ කොමිෂන් සභා කමිටුව අද (11) අග්‍රාමාත්‍යවරයා වෙත ලබාදුන් අවසන් වාර්තාවේ යෝජනා කර ඇති බව වාර්තා වෙයි.

මේ අතර පළාත් පාලන ආයතන සඳහා කොට්ඨාශ මට්ටමින් මෙතෙක් නියෝජිතයන් 5092ක් තොරාගැනුණු නමුත් නව වාර්තාව අනුව එම ප්‍රමාණය 2882ක් දක්වා අඩු කිරීමටද යෝජනා කර ඇත.

එසේම මෙම වාර්තාව ලබන 18 වැනිදා සිට 25 වැනිදා දක්වා දිස්ත්‍රික් ලේකම් කාර්යාලවල සහ අප්‍රේල් 19 වනදා පළාත් පාලන ආයතන වලද ප්‍රදර්ශනය කිරීමට නියමිත බවත් දැනගන්නට ඇත.

පළාත් පාලන ආයතන සඳහා වූ කොට්ඨාශ සීමා නිර්ණය කිරීමේ ජාතික කමිටුව අග්‍රාමාත්‍ය දිනේෂ් ගුණවර්ධන මහතා විසින් විෂය බාර අමාත්‍යවරයා ලෙස පත්කරනු ලැබුවේ පසුගිය නොවැම්බර් මාසයේදී වන අතර මහින්ද දේශප්‍රියගේ සභාපතිත්වයෙන් යුතු එම කමිටුවට සාමාජිකයෝ හතර දෙනෙක් ඇතුළත් වූහ.

ජාතික කමිටුවේ නිල කාලය මෙම මස 30 වැනිදා දක්වා දීර්ඝ කර ඇති බැවින් සීමා නිර්ණය කටයුතු සඳහා ගනු ලැබූ ක්‍රියාමාර්ග, දේශපාලන පක්ෂවල සිවිල් සංවිධානවල යෝජනා හා අදහස් මහජන නියෝජන පිළිබඳ තොරතුරු, කමිටුවේ නිරීක්ෂණ හා නිර්දේශ ඇතුළත් වාර්තාව ඒ ඒ පළාත් පාලන ආයතනවල සිතියම් දැක්වෙන වාර්තා ද අග්‍රාමාත්‍යවරයාට මැයි මස 2 වැනිදා බාරදීමට නියමිත බවත් වාර්තා වෙයි.

පළාත් පාලන ආයතන කොට්ඨාස සීමා නිර්ණයේදී අදාළ ලේඛනවල දැක්වෙන ඒ ඒ කොට්ඨාස බෙදා වෙන් කිරීම පිළිබඳව උනන්දුවක් දක්වන දේශපාලන පක්ෂ සහ සිවිල් සංවිධානවලට සහ පුරවැසියන්ට ස්වකීය යෝජනා හා අදහස් අප්‍රේල් මස 25 වැනි දින දක්වා කොළඹ 5 කිරුළ පාර මිනින්දෝරු ජනරාල් කාර්යාල ගොඩනැගිල්ලේ පිහිටි සීමා නිර්ණය කිරීමේ ජාතික කමිටුවට එවීමට හැකියාව ඇති බවත් වාර්තා වෙයි.

ශ්‍රී ලංකාව තුළ ඇමෙරිකානු හමුදා කඳුවුරක් පිහිටුවීමට තම රටට කිසිදු අදහසක් නැති බව කොළඹ සිටින ඇමරිකානු තානාපති ජූලි චං පවසයි.

ඇමරිකාවේ ඉහළ පෙළේ ආරක්ෂක නිලධාරියෙකුගේ මෙරට සංචාරයක පිළිබඳව කළ විමසුමකට ප්‍රතිචාර දක්වමින් තානාපතිවරිය ඩේලි මිරර් පුවත්පත සමඟ මේ බව සදහන් කර ඇත.

ඉදිරිපත් කර ඇති ප්‍රති ත්‍රස්ත පනත ජාත්‍යන්තර ප්‍රමිතීන්ට අනුකූල විය යුතු බවත් පනත ගෙන ඒමට පෙර අදාළ සියලු පාර්ශ්වයන්ගෙන් අදහස් ලබාගනු ඇතැයි තමන් බලාපොරොත්තු වන බවත් කියා සිටින ඇමරිකානු තානාපතිනිය නව දූෂණ විරෝධී පනත් කෙටුම්පත සරාජ්‍ය මූල්‍ය විනිවිදභාවය සහතික කිරීමට එය ඉවහල් වනු ඇති බවත් සඳහන් කර ඇත.

ශ්‍රී ලංකා පොදුජන පෙරමුණේ ජාතික සංවිධායක හිටපු ඇමති බැසිල් රාජපක්ෂ මීළඟ ජනාධිපති අපේක්ෂකයා ලෙස තෝරා ගැනීමේ වරදක් නැතැයි එම පක්ෂයේ පාර්ලිමේන්තු මන්ත්‍රී රංජිත් බණ්ඩාර සඳහන් කරයි.

ජනාධිපතිවරණයකට ඉදිරිපත් වන්නේ කවුද යන්න අලුත් අවුරුද්දෙන් පසුව ප්‍රකාශ කරන බවද ඔහු පවසයි.

රංජිත් බණ්ඩාර මන්ත්‍රීවරයා මේ බව සඳහන් කර සිටියේ පොදුජන පෙරමුණේ මාධ්‍ය හමුවකදී අදහස් දක්වමින්ය.

රටේ පවතින ප්‍රශ්න විසඳීමට ස්ථිරසාර වැඩපිළිවෙළක් ඉදිරිපත් කර හැකි එකම පක්ෂය ශ්‍රී ලංකා පොදුජන පෙරමුණ පමණක් බවත් එහිදී මන්ත්‍රීවරයා පැවසීය.

පොහොට්ටුවේ බෙදීමක් !

කෙසේ වුවත් මේ වන විට ඊළඟ ජනාධිපති අපේක්ෂකයා සම්බන්ධව පොදුජන පෙරමුණ අභ්‍යන්තරයේ බෙදීමක් ඇති බව මන්ත්‍රීවරයාගේ මේ ප්‍රකාශය හරහා පෙන්නුම් කරයි.

මන්ද මේ වන විටත් බන්දුල ගුණවර්ධන සහ කංචන විජේසේකර යන අමාත්‍යවරුන් දැනටමත් පවසා ඇත්තේ ඊළඟ ජනාධිපතිවරණය සඳහා අපේක්ෂකයකු ලෙස ජනාධිපති රනිල් වික්‍රමසිංහ ඉදිරිපත් වුවහොත් ඔහුට සහය දෙන බවය. එසේම ඒ සඳහා සුදුසුම පුද්ගලයා ලෙස ද ඔවුන් ජනාධිපති රනිල් වික්‍රමසිංහව හඳුන්වනු ලැබිණ.

මේ අතර දිලුම් අමුණුගම අමාත්‍යවරයා ද පවසන්නේ ''පොහොට්ටුව කුමක් කීවත් ජනාධිපතිවරණයේදී තම සහය රනිල් වික්‍රමසිංහ ජනාධිපතිවරයාට ලබාදෙන බවය.

වත්මන් ජනාධිපති වික්‍රමසිංහ ඉදිරි ජනාධිපතිවරණයට තරග කරන්නේ නම් තම සහයෝගය කොන්දේසි විරහිතව ඔහුට ලබාදෙනවා බවත් අමාත්‍යවරයා පවසයි.

එසේම ශ්‍රී ලංකා පොදුජන පෙරමුණ කුමන තීන්දුවක් ගනී දැයි අනුමාන කල නොහැකි වූවත් තමන් ස්ථිර වශයෙන්ම ජනාධිපති වික්‍රමසිංහට සහය පළ කරන බවද ඔහු අවධාරණය කර ඇත.

අර්බුදයක පැවති රට ජනාධිපති වික්‍රමසිංහ විසින් වසරකට අඩු කාලයක් තිස්සේ ස්ථාවර කිරීමට කටයුතු කළ බවත්, රට අර්බුදයකට ඇද වැටුනේ පොහොට්ටු පක්ෂයේ ජනාධිපති වරයෙක් යටතේ රට පාලනය වූ සමයේ බවත් අමතක නොකළ යුතු බවත් අමාත්‍යවරයා මෙහිදී සිහිපත් කර සිටියි.

පළාත් පාලන ආයතනවල ඡන්ද ප්‍රමාණය හා සිතියම් පිළිබද තොරතුරු ඇතුළත් කරමින් සීමානිර්ණය වාර්තාව සකස් කර තිබෙයි.

සීමානිර්ණය පිළිබද කමිටු සභාපති මහින්ද දේශප්‍රිය  විසින් අදාළ වාර්තාව අග්‍රාමාත්‍ය දිනේෂ් ගුණවර්ධන  වෙත භාර දී ඇත.

අටදහසකට අධික වන පළාත් පාලන ආයතන සභික සංඛ්‍යාව නව සීමා නිර්ණය හරහා හාරදහසේ සීමාවට රැගෙන ඒමට කටයුතු කර ඇති බව වාර්තා වෙයි

පසුගිය නොවැම්බර් මස පළමු වැනිදා සීමා නිර්ණ කමිටුව පත්කිරීමට විෂය භාර අමාත්‍යවරයා ලෙස අග්‍රාමාත්‍ය දිනේෂ් ගුණවර්ධන  පියවර ගත්තේය.

ඒ අනුව එහි සභාපතිවරයා ලෙස මැතිවරණ කොමිසමේ හිටපු සභාපති මහින්ද දේශප්‍රිය  පත් කෙරුණි.