පුවත්

දුම්රිය අත්‍යවශ්‍ය සේවයක් බවට පත්කරමින් අදාළ ගැසට් නිවේදනය නිකුත් කර තිබේ.

දුම්රිය වර්ජනය හේතුවෙන් හෙට (13) දිනයේ සිට ජනතාවට මුහුණදීමට සිදුවන අපහසුතා මඟහැරී යන ලෙස මෙම පියවර ගෙන ඇති බව වාර්තා වෙයි.

ලෝක ආහාර වැඩසටහන යටතේ මෙරට ජනතාවට බෙදාදීම සඳහා සුරියකාන්ත තෙල් ටොන් 352ක් ලබාදීමට රුසියාව කටයුතු කර තිබේ.

එම අවස්ථාවට සහභාගී වූ මෙරට රුසියානු තානාපති ලෙවාන් ඩගර්යාන් පැවසුවේ තම රට විවිධ ගැටලුවලට මුහුණදී සිටියද තම මිත්‍ර රටවලට සහාය දීම අත්නොහරින බවයි.

සැලසිනේ රූපවාහිනී ආයතනයේ හිටපු සභාපතිවරයකු මෙන්ම වෙළඳ දැන්වීම් ක්ෂේත්‍රයේ ප්‍රවීණයකු වන, ශාන්ත බණ්ඩාර ජයවර්ධන ගේ මෑණියන් වන ඩබ්.එම්. ඥානවතී මැණිකේ මහත්මිය අභාවප්‍රාප්ත වී ඇත.

දේහය අද (12) සහ හෙට (13) මහරගම රෝහිනී මල්ශාලාවේ තැන්පත් කර ඇත.

දේහය පිළිබඳ අවසන් කටයුතු 13 බදාදා සවස 6ට තලපත්පිටිය ආදාහනාගාරයේ දී සිදුකෙරේ.

මෙරට පෞද්ගලික වෛද්‍ය විද්‍යාල තුනක් ස්ථාපනය කිරීමට අමාත්‍ය මණ්ඩල අනුමැතිය හිමි වූ බව සෞඛ්‍ය අමාත්‍ය කෙහෙළිය රඹුක්වැල්ල පැවසීය.

දැනට මෙරට ක්‍රියාත්මක වෛද්‍ය පීඨ ප්‍රමිතීන්ට අනුකූලව මෙම නව වෛද්‍ය විද්‍යාල ස්ථාපානය කිරීමට අවසර ලබා දී ඇති බව ත් අමාත්‍යවරයා සඳහන් කළේ ය.

සෞඛ්‍ය අමාත්‍ය කෙහෙළිය රඹුක්වැල්ල මේ බව සඳහන් කර සිටියේ ‘ස්ථාවර රටකට සැවොම එක මගකට’ මැයෙන් ඊයේ (සැප්. 11) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

එහිදී වැඩිදුරටත් අදහස් දැක්වූ කෙහෙළිය රඹුක්වැල්ල මෙසේ ද පැවසීය.

“පවතින ප්‍රමිතීන් ආරක්ෂා කරගෙන නව වෛද්‍ය විද්‍යාල කටයුතු කළ යුතු වෙනවා.

මේ සඳහා සම්බන්ධ වන මහාචාර්යවරුන් අපේ රටේ වෛද්‍ය විද්‍යාලවල උපදේශකවරුන් වශයෙන් කටයුතු කළ අය. ආචාර්ය මණ්ඩලය සඳහාත් අවම සුදුසුකම් ඉදිරිපත් කර තිබෙනවා. මෙරට පිළිගත් වෛද්‍ය විද්‍යාලවල කටයුතු කරන ආකාරයෙන් ම හෝ ඊට එහා ගිය මට්ටමකට එම කටයුතු පවත්වා ගෙන යා යුතුයි කියා නීති පනවා තිබෙනවා.

මූලික සුදුසුකම් සහිත වැඩිදුර වෛද්‍ය අධ්‍යාපනය ලබා ගැනීමට නොහැකි දරුවන් මේ රටේ සිටිනවා.

ඒ නිසා 10%ක ප්‍රතිශතයක සිසුන් සංඛ්‍යාවකට ශිෂ්‍යත්ව ලබා දෙන ලෙසට මෙම විශ්වවිද්‍යාලවලින් මම පෞද්ගලිකව ඉල්ලීමක් කර තිබෙනවා. ඒ වෙනුවෙන් ඔවුන් දැනටමත් එකඟතාව පළ කර තිබෙනවා.”

ශ්‍රී ලංකා නිදහස් පක්ෂයේ මහ ලේකම් තනතුරේ වැඩ බැලීමට හිටපු රාජ්‍ය අමාත්‍යවරයකු වන සාරතී දුෂ්මන්ත පත්කර ඇති බව වාර්තා වෙයි.

එම පත්වීම සිදුකර ඇත්තේ ශ්‍රී ලංකා නිදහස් පක්ෂයේ මධ්‍යම කාරක සභාව එම පක්ෂයේ සභාපති හිටපු ජනාධිපති මෛත්‍රීපාල මෛත්‍රිපාල සිරිසේනගේ ප්‍රධානත්වයෙන් අද (11) පක්ෂ මූලස්ථානයේදී රැස්වූ අවස්ථාවේ ය.

හිටපු මහ ලේකම් දයාසිරි ජයසේකර එම ධූරයෙන් ඉවත් කිරීමෙන් අනතුරුව හිටපු ප්‍රධාන අමාත්‍යවරයකු වූ සරත් ඒකනායක ව එම ධූරය සඳහා පත්කර තිබිණ .

නමුත් දයාසිරි ජයසේකර ගනුලැබූ අධිකරණ ක්‍රියාමාර්ගය හමුවේ සරත් ඒකනායක ට ශ්‍රීලනිප මහ ලේකම් ධූරය දැරීම වලක්වාලමින් වාරණ නියෝගයක් නිකුත් කෙරිණ.

ආණ්ඩුවේ රාජ්‍ය අමාත්‍යවරුන් සහ අමාත්‍යංශ ලේකම්වරුන් අතර බරපතළ රාජකාරිමය ගැටුමක් හටගෙන තිබෙන බව දේශපාලන ආරංචි මාර්ග පවසයි.

මේ බව අනාවරණය වී ඇත්තේ පසුගියදා ජනාධිපතිවරයා සහ අග්‍රාමාත්‍යවරයා සමඟ රාජ්‍ය අමාත්‍යවරුන් පැවැත්වූ සාකච්ඡාවකදී ය.

මෙම සාකච්ඡාව සඳහා රාජ්‍ය අමාත්‍යවරුන් 38න් 35 දෙනෙකු සහභාගීව ඇති බවත් දේශපාලන ආරංචිමාර්ග පවසයි.

එහිදී රාජ්‍ය අමාත්‍යවරුන් බහුතරයක් පවසා ඇත්තේ තමන්ගේ විෂය භාර අමාත්‍යංශ ලේකම්වරුන් සමඟ තවදුරටත් රාජකාරි කළ නොහැකි බවය.

එසේම අමාත්‍යංශ ලේකම්වරුන් රාජ්‍ය අමාත්‍යවරුන්ගේ ඉල්ලීම් කිසිවක් ඉටු නොකිරීම, රාජ්‍ය අමාත්‍යවරුන් ගණන් නොගෙන අමාත්‍යවරුන්ගේ නියෝග පමණක් ක්‍රියාත්මක කිරීම, ඔවුනට අවශ්‍ය මූලික පහසුකම්වත් ලබා නොදීම ඇතුළු චෝදනා ගණනාවක්ම අමාත්‍යංශ ලේකම්වරුන්ට එරෙහිව රාජ්‍ය අමාත්‍යවරු ඉදිරිපත් කර ඇත.

මෙහිදී ඇතැම් රාජ්‍ය අමාත්‍යවරුන් තම විෂය භාර අමාත්‍යවරුන් සම්බන්ධයෙන්ද චෝදනාත්මකව අදහස් දැක්වීමට කටයුතු කර ඇති අතර ඊට මැදිහත්වෙමින් ජනාධිපතිවරයා පවසා ඇත්තේ අමාත්‍යවරුන්ගේ නම් සඳහන් කර අනවශ්‍ය ප්‍රශ්නයක් ඇතිකර නොගන්නා ලෙසය.

තවද තවත් රාජ්‍ය අමාත්‍යවරුන් පිරිසක් තම තමන්ගේ විෂය පථ වෙනම ගැසට් කර රාජ්‍ය අමාත්‍යංශ ලේකම්වරයකු පත්කරන ලෙසද ජනාධිපතිවරයා වෙතින් ඉල්ලා ඇති බවත් දැනගන්නට ඇත.

අනතුරුව ජනාධිපතිවරයා ජනාධිපති ලේකම් සහ අගමැති ලේකම්ගෙන් සමන්විත කමිටුවක් හරහා මෙම ප්‍රශ්නය විසඳීමට පියවර ගන්නා බව රාජ්‍ය අමාත්‍යවරුනට දැන්වූ බවද දේශපාලන ආරංචිමාර්ග පවසයි.

විවිධ භාණ්ඩ ඇතුළත් කන්ටේනර 965ක් පරීක්ෂණ කටයුතු පමාවීම හේතුවෙන් වරාය පර්යන්තයේ සහ රේගු අංගනවල සිර වී ඇතැයි වාර්තා වෙයි.

මේ බව සඳහන් වන්නේ ක්‍රම සහ විධි පිළිබඳ පාර්ලිමේන්තු කාරක සභාව පාර්ලිමේන්තුවට ඉදිරිපත් කළ වාර්තාවකය.

විමර්ශන සහ නඩු අවසන් නොකිරීම මේ තත්ත්වය ඇතිවීමට ප්‍රධානවශයෙන් බලපා ඇති බවද එම වාර්තාවේ සඳහන් අතර රේගු විමර්ශන සහ අභියාචනා කෙටි කාලයක් තුළ අවසන් කළ යුතු බව ඊට අදාළව කාරක සභා නිර්දේශය වී තිබේ.

සංචාරක කර්මාන්තය සහ විදෙස්ගත ශ්‍රමිකයන් වෙතින් 2023 වසරේ ගත වූ මාස 08 ක කාලය තුළ ඇමරිකා එක්සත් ජනපද ඩොලර් මිලියන 5,167.2 ක් හෙවත් ඩොලර් බිලියන 5.16 ක විදේශ විනිමය ප්‍රමාණයක් මෙරටට ලැබී ඇත.

ශ්‍රී ලංකා මහ බැංකුවේ නවතම සංඛ්‍යාලේඛන විසින් මේ බව තහවුරු කරයි.

ඊට අනුව 2023 ජනවාරි සිට අගෝස්තු දක්වා කාලපරිච්ඡේදය තුළ සමස්ත සංචාරක ඉපැයීම් ඩොලර් මිලියන 1,304.5 ක් ලෙසින් වාර්තා වන අතර මෙම වකවානුව තුළ දී විදෙස්ගත ශ්‍රමික ප්‍රේෂණ ප්‍රමාණය ඩොලර් මිලියන 3,862.7 කි.

මහ බැංකුව නිකුත් කළ නවතම සංඛ්‍යාලේඛන අනුව පසුගිය 2023 අගෝස්තු මාසයේ සංචරක ඉපැයීම් ඩොලර් මිලියන 210.5 ක් ලෙසින් සටහන් වන අතර අගෝස්තු මාසයේ ලද විදෙස් ශ්‍රමික ප්‍රේෂණ ඩොලර් මිලියන 499.2 කි.

ශෂී වීරවංශට එරෙහිව කොළඹ ප්‍රධාන මහෙස්ත්‍රාත් අධිකරණය හමුවේ පවතින නඩුවක් වෙනත් මහෙස්ත්‍රාත්වරයකු හමුවට මාරු කරන ලෙස අභියාචනාධිකරණය නියම කර ඇත.

ශෂී වීරවංශ විසින් ඉදිරිපත් කළ අයදුම් පතක් සලකා බැලීමෙන් අනතුරුව අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න විසින් එම නියෝගය ලබා දී ඇත.

ඒ අනුව, අදාළ නඩුව හෙට (12) දිනයේ කොළඹ ප්‍රධාන මහෙස්ත්‍රාත්වරයා හමුවේ කැඳවීමෙන් අනතුරුව එම අධිකරණයේ තිබෙන අංක දෙක මහෙස්ත්‍රාත් අධිකරණයට මාරු කරන ලෙසද නියෝග කළේය.

පෙත්සම්කාර ශෂී වීරවංශ වෙනුවෙන් පෙනී සිටි ජනාධිපති නීතිඥ නලින් ලද්දුවහෙට්ටි අධිකරණය හමුවේ කරුණු දක්වමින් පැවසුවේ තම සේවාදායිකාවට එරෙහිව ආගමන හා විගමන පනත උල්ලංඝනය කිරීම සම්බන්ධයෙන් කොළඹ ප්‍රධාන මහෙස්ත්‍රාත්වරයා ඉදිරියේ නඩු විභාගයක් පැවැත්වෙන බවත් එම නඩුවෙන් ඇයට සාධාරණයක් නොලැබෙන බවත්ය.

තමා අසනීපව සිටි අවස්ථාවක ද මෙම නඩුව විභාගයට ගැනීමට මහෙස්ත්‍රාත්වරයා සූදානම් වූ බව පෙන්වාදෙන ජනාධිපති නීතිඥවරයා මේ තුළින් තමන්ට යුක්තියක් ඉටු නොවනු ඇතැයි සැකයක් මතු වී තිබෙන හෙයින් එම නඩුව වෙනත් අධිකරණයකට මාරු කරන ලෙස තම සේවාදායිකාව අධිකරනයෙන් ඉල්ලා සිටින බවත් ඔහු පැසුවේය.

එම ඉල්ලීම සම්බන්ධයෙන් අධිකරණය හමුවේ කරුණු දැක්වූ නියෝජ්‍ය සොලිසිටර් ජෙනරාල් දිලීප පිරිස් සඳහන් කළේ, නඩු විභාගයන් කාර්යක්ෂම කිරීම සඳහා මහෙස්ත්‍රාත්වරුන් විසින් විවිධ ක්‍රියාමාර්ග අනුගමනය කරන බවය.

එවැනි සිද්ධීන් සම්බන්ධයෙන් යම් ගැටලු සහගත තත්ත්වයක් මතු වන්නේ නම් ඊට අදාළව සුදුසු නියෝග නිකුත්කරන ලෙසත් නියෝජ්‍ය සොලිසිටර් ජනරාල්වරයා ඉල්ලා සිටියේය.

ඉදිරිපත් වූ කරුණු සලකා බැලීමෙන් අනතුරුව අභියාචනාධිකරණ සභාපති විනිසුරුවරයා විසින් මෙම නියෝගය නිකුත් කර තිබේ.

එල්ලවූ දැවැන්ත පරිගණක වෛරස් ප්‍රහාරයක් හේතුවෙන් කැබිනට් කාර්යාලය ඇතුලුව රාජ්‍ය ආයතන රැසක දත්ත විශාල ප්‍රමාණයක් අහිමිවීමේ අවදානමකට ලක්ව තිබේ.

ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනය හෙවත් අයිසීටීඒ මේ බව නිල වශයෙන් තහවුරු කළේ ය.

ඔවුන් නිලවශයෙන් තහවුරු කළේ, එම අවදානම 2023 මැයි 17 සහ අගෝස්තු 26 අතර එල්ලවූ මහා පරිමාණ වෛරස් ප්‍රහාරයක් හේතුවෙන් සිදුව ඇති බවයි.

ඒ අනුව gov.lk හෙවත් ගවර්න් මන්ට් ඩොට් එල්කේ විද්‍යුත් තැපෑල භාවිත කරන සියලුම රජයේ කාර්යාලවලට මේ දරුණු දත්ත නැතිවීමේ බලපා ඇති බව ICTA විසින් නිල වශයෙන් තහවුරු ක‌ළේ ය.

මේ සම්බන්ධයෙන් අද සන්ඩේ ටයිම්ස් පුවත්පතද පුලුල් වාර්තාවක් ඉදිරිපත් කර තිබේ.

gov.lk විද්‍යුත් තැපෑල හෙවත් ඊමේල් භාවිත කරන රාජ්‍ය ආයතන අතර කැබිනට් කාර්යාලය ඇතුලු රාජ්‍ය අමාත්‍යංශ රැසක් තිබේ.

මේ විද්‍යුත් තැපෑල හරහා ඉතා වැදගත් රාජ්‍ය තොරතුරු හුවමාරු වෙයි.

මෙම ප්‍රහාරය ransomware ප්‍රහාරයක් බවද ශ්‍රී ලංකා තොරතුරුහා සන්නිවේදන තාක්ෂණ නියෝජිතායතනය ප්‍රකාශ කළේ ය.

මොකක්ද මේ ransomware ප්‍රහාරයක් කියන්නේ?

රැන්සම් වෙයර් ප්‍රහාරයකදී සිදුවන්නේ යම් ඊමේල් පණීවුඩයක් මගින් ලැබෙන සබැඳියක් එහෙම නැත්නම් ලින්ක් එකක් ක්ලික් කිරීම හරහා අදාළ ඊමේල් පද්ධතිය හැකර්වරයාගේ ග්‍රහණයට ගැනීමයි.

අනතුරුව මෙම ඊමේල් පද්ධතිය තුළ ඇති දත්තවලට ප්‍රවේශ වීමට හෝ ඒවා භාවිත කිරීමට එහි අයිතිකරුට නොහැකි වෙයි.

මෙම ransomware ප්‍රහාරයෙක් පසුව සිදුවුණේ කුමක්ද?

ransomware ප්‍රහාරයෙන් ආසන්න වශයෙන් විද්‍යුත් තැපැල් ලිපින 5,000කට බලපෑම් එල්ල වූ බව අයිසීටීඒ ආයතනය පිළි ගනී.

මේ ප්‍රහාරයෙන් පසුව මාස දෙකහමාරක පමණ කාලයක ඊමේල් අහිමිවී ඇත්තේ ඕෆ් ලයින් බැකප් හෙවත් අමතර දත්ත ගබඩාවක් නොතිබීම හේතුවෙන් ය.

දැන් ICTA කියන්නේ මොකක්ද?

ශ්‍රී ලංකා තොරතුරුහා සන්නිවේදන තාක්ෂණ නියෝජිතායතනය පවසන්නේ මෙවැනි දත්ත මැකී යාමක් නැවත සිදු නොවීමට අවශ්‍ය පියවර ගෙන ඇති බවයි.

 ඒ අනුව දෛනික හා අනාගත දත්ත නැතිවීම වැළැක්වීම සඳහා දිනපතා ඕෆ් ලයින් දත්ත බැකප් කිරීමේ ක්‍රියාවලියක් දැන් අරඹා ඇතැයි ඔවුන් පවසයි.

ඊට අමතරව , දැනට භාවිත කරන යෙදුම් හෙවත් ඇප් යාවත්කාලීන කිරීම සහ අදාළ යෙදුම වෛරස් ප්‍රහාරවලට එරෙහිව වැඩි දියුණු කර ආරක්ෂිත කිරීම සිදුකරන බවද ICTA පවසයි.

නැතිවූ අතිශය වැදගත් රාජ්‍ය දත්ත නැවත ලබාගන්න පුළුවන් ද?

ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනයේ උපාය මාර්ගික සන්නිවේදනය පිළීබඳ අධ්යක්ෂ සම්පත් ද සිල්වා මහතා පැවසුවේ තම ආයතනය ශ්‍රී ලංකා පරිගණක හදිසි සූදානම් කණ්ඩායම හෙවත් SL CERT සමඟ නැතිවූ දත්ත නැවත ලබා ගැනීමේ උත්සාහයක නිරත වන බවයි.

දේශපාලන පක්ෂ අන්තර්ජාතිකව ප්‍රවර්ධනය සහ අන්තර් අවභෝධය ගොඩ නැගීම සඳහා වන විශේෂ වැඩසටනහක් සඳහා සහභාගි වීමට එක්සත් ජාතික පක්ෂයේ ගම්පහ දිස්ත්‍රික් සංවිධායක වරුණ දීප්ත රාජපක්ෂ සහ ජනතා විමුක්ති පෙරමුණේ ප්‍රචාරක ලේකම් විජිත හේරත් ඊයේ (09) මෙරටින් පිටත්වූ බව වාර්තා වෙයි .

සැප්තැම්බර් 12 ඇරඹෙන මෙම වැඩමුළුව සඳහා යුරෝපය , ආසියාව , අප්‍රිකාව ඇතුළත් රටවල් 18ක් නියෝජනය කරමින් දේශපාලන පක්ෂ 20 ක සාමාජිකයන් සහභාගි වන බවත් වාර්තා වෙයි .

වැඩිදුරටත් දැනගන්නට ඇති ආකාරයට චීන රජය විසින් සංවිධානය කරන මෙම වැඩසටහන සංවිධානය සඳහා අවස්ථාව හිමිව ඇත්තේ ආරාධිත රටවල අදාළ දේශපාලන පක්ෂවල ප්‍රචාරක වගකීම් දරන්නන් වෙතය.

සැප්තැම්බර් 10 වනදා පැවැත්වීමට නියමිතව තිබූ එක්සත් ජාතික පක්ෂයේ 56 වන සම්මේලනය ඔක්තෝබර් 21 වනදා පැවැත්වීමට පක්ෂ කෘත්‍යාධිකාරී මණ්ඩලය තීරණය කර ඇත .

ඒ අනුව ඔක්තෝබර් 21 වනදා පස්වරු 2.00 ට කොළඹ සුගතදාස ගෘහස්ථ ක්‍රීඩාංගනයේදී එජාප සම්මේලනය පැවැත්වීමට නියමිත ය.

එක්සත් ජාතික පක්ෂ නායක ජනාධිපති රනිල් වික්‍රමසිංහ ගේ ප්‍රධානත්වයෙන් කෘත්‍යාධිකාරී මණ්ඩලය පිටකෝට්ටේ සිරිකොත පක්ෂ මූලස්ථානයේ දී පසුගියදා රැස්වූ අවස්ථාවේ මෙම තීන්දුව ගෙන ඇත .

භාවිතයට ගත හැකි පයිනස් දැව ප්‍රමාණවත් තරම් මෙරට තිබියදී පසුගිය වසර තුනේදී රුපියල් කෝටි 480 කට වැඩි වටිනා පයිනස් දැව මෙරටට ආනයනය කිරීම සම්බන්ධයෙන් පරිසර, ස්වභාවික සම්පත් හා තිරසර සංවර්ධනය පිළිබඳ පාර්ලිමේන්තු ආංශික අධීක්ෂණ කාරක සභාවේ දැඩි අප්‍රසාදය පළවිය.

කාරක සභාවේ සභාපති ගම්පහ දිස්ත්‍රික් පාර්ලිමේන්තු මන්ත්‍රී අජිත් මාන්නප්පෙරුම පවසන්නේ දැව සදහා භාවිතා කළ හැකි තත්වයේ පවතින පයිනස් ගස් බිම් හෙක්ටයාර් 1200ක් පමණ වන සංරක්ෂණ දෙපාර්තමේන්තුව යටතේ ඇති කැලෑවලද පයිනස් හෙක්ටයාර් 1764 ක් පමණ ඉඩම් ප්‍රතිසංස්කරණ කොමිෂන් සභාව යටතේ ඇති කැලෑවලද පවතින බවට තොරතුරු අනාවරණය වූ බවයි .

සාමාන්‍යයෙන් පොදුවේ කෝටි 900 කට වැඩි වටිනා දැව දඬු වර්ෂයකදී මෙරටට ආනයනය කෙරෙන බවද ඔහු සඳහන් කළේය.

දළ වශයෙන් වසර 18 කට පමණ ප්‍රමාණවත් පයිනස් දැව මෙරට ඇති බවද එම කාරක සභාවේදී තොරතුරු හෙළිවිය.

මහජන උපයෝගීතා කොමිෂන් සභාවේ හිටපු සභාපතිවරයා බෙන්ස් වර්ගයේ මෝටර් රථයක් රුපියල් තුන්ලක්ෂ හැත්තෑ පන් දහසක මාසික කුලියකට මූල්‍ය රෙගුලාසි උල්ලංඝනය කරමින් ලබා ගෙන ඇතැයි පොදු ව්‍යාපාර පිළිබඳ පාර්ලිමේන්තු කාරක සභාවේදී (කෝප් ) අනාවරණය වී ඇත .

එහිදී රජයේ විගණකාධිපතිවරයා කෝප් කමිටුව හමුවේ පවසා ඇත්තේ මෙම මෝටර් රථය වෙනුවෙන් රුපියල් ලක්ෂ විස්සකට වැඩි මුදලක් පසුගිය 2022 මැයි 31 දක්වා ‍නීති විරෝධීව ගෙවා ඇති බව ය.

මේ අතර ඉන්ධන ලීටරයක් රුපියල් 250 ක මුදලකට ලබා දිය හැකි බවට හිටපු සභාපතිවරයා කළ ප්‍රකාශයද අසත්‍යයක් බව ඔහු සඳහන් කළේය.

ඒ සම්බන්ධයෙන් ප්‍රතිචාර දක්වමින් කෝප් කමිටුව නිලධාරීන් වෙත දන්වා ඇත්තේ ජනතාව නොමග යවමින් හිටපු සභාපතිවරයා කළ එම ප්‍රකාශය අසත්‍ය බවට ජනතාවට ප්‍රසිද්ධ නිවේදනයකින් සති දෙකක් ඇතුළතදී දැනුම්දෙන ලෙසයි.

විදේශිකයන් ප්‍රතිකාර ලබා ගැනීම සඳහා මෙරටට ගෙන්වා ගැනීමට නම් වෛද්‍ය සංචාරක ව්‍යාපාරය (Medical Tourism) සහ උසස් තත්ත්වයේ සෞඛ්‍ය සේවාවක් පවත්වාගෙන යාම අත්‍යාවශ්‍ය බවත්, ඒ සඳහා සෞඛ්‍ය ප්‍රතිපත්තිය පිළිබඳ නැවත අවධානය යොමු කළ යුතුව තිබෙන බවත් ජනාධිපති රනිල් වික්‍රමසිංහ  පැවසීය.

වැඩි වශයෙන් වෛද්‍යවරුන් බිහි කිරීමට නම් තවත් වෛද්‍ය පීඨ මෙන්ම විශ්වවිද්‍යාල ද මෙරට ආරම්භ කළ යුතු බව සඳහන් කළ ජනාධිපතිවරයා ශක්තිමත් අනාගතයක් වෙනුවෙන් මෙරට සෞඛ්‍ය සේවා ශ්‍රම බලකාය පරිවර්තනයකට ලක් කරන බව ද සඳහන් කළේය.

ජනාධිපති රනිල් වික්‍රමසිංහ  මේ බව සඳහන් කර සිටියේ ජෝසප් ෆ්‍රේසර් රෝහලේ 100 වන සංවත්සර සැමරුම් උත්සවයට ඊයේ (08) පස්වරුවේ එක්වෙමිනි.

ශ්‍රී ලංකාවේ තේ කර්මාන්තය ආරම්භයේදී ප්‍රධාන කාර්යභාරයක් ඉටු කළ ස්කොට්ලන්ත වැවිලිකරුවෙකු වන ජෝසප් ෆ්‍රේසර්  සහ ඔහුගේ බිරිඳ විසින් සදාකාලික සිහිවටනයක් ලෙස ජෝසප් ෆ්‍රේසර් රෝහල ස්ථාපිත කිරීම ශ්‍රී ලංකාවේ සංවර්ධනය වෙනුවෙන් ඔවුන්ගේ කැපවීම පෙන්නුම් කළ අවස්ථාවක් බව ද ජනාධිපතිවරයා මෙහිදී සඳහන් කළේය.

මෙම උත්සවයේ ප්‍රධාන ආරාධිත අමුත්තා ලෙස සහභාගී වූ ජනාධිපති රනිල් වික්‍රමසිංහ  රෝහල් පාලනාධිකාරිය විසින් පිළිගනු ලැබීය.

ජෝසප් ෆ්‍රේසර් රෝහලේ 100 වන සංවත්සරය නිමිත්තෙන් නිකුත් කළ සමරු මුද්දරය තැපැල්පති පී. සත්කුමාර  විසින් මෙහිදී ජනාධිපතිවරයා වෙත පිළිගන්වනු ලැබීය.

උත්සව සභාව ඇමතූ ජනාධිපති රනිල් වික්‍රමසිංහ  වැඩිදුරටත් මෙසේද පැවසීය.

ජෝසෆ් ෆ්‍රේසර් රෝහල යනු රෝහලක් පමණක්ම නෙවෙයි, එය අද වන විට වසර සියයක් සම්පූර්ණ කරන ආයතනයක් ද වෙනවා. ෆ්‍රේසර්වරුන් පැවත එන්නේ ස්කොට්ලන්තයේ ප්‍රසිද්ධ පරපුරකින්. එහි සිට තමයි ජෝසෆ් ෆ්‍රේසර්  ශ්‍රී ලංකාවට පැමිණියේ.

බ්‍රිතාන්‍යයන් මෙරටට තේ කර්මාන්තය හඳුන්වා දුන් අවධියේ ජෝසෆ් ෆ්‍රේසර්  වැවිලිකරුවෙකු ලෙස කටයුතු කළා. ඔහු ශ්‍රී ලංකාවේ පිටකන්ද වතුයාය කේන්ද්‍ර කරගනිමින් වැවිලි කර්මාන්තයේ නියැලුනා. අවසානයේ ඔහු මෙරටදීම මිය ගියා.

 ජෝසෆ් ෆ්‍රේසර් මහතා සහ අනෙකුත් වැවිලිකරුවන් අතර තිබෙන වෙනස වන්නේ ඔහු සහ ඔහුගේ බිරිඳ ශ්‍රී ලංකාවේ යම් සළකුණක් තබා යාමට කටයුතු කිරීමයි. ශ්‍රී ලංකාව ඔහු සේවය කළ රට වගේම ශ්‍රි ලංකාව ගොඩනැඟීමට ද ඔහු දායක වී තිබෙනවා.

මෙරට වැවිලි කර්මාන්තයේ නිරතව ලාභ උපයාගත් අනෙකුත් සිය ගණනක් වැවිලිකරුවන් අතර ජෝසෆ් ෆ්‍රේසර් මහතා සහ ඔහුගේ පවුලේ අය මේ රටට යමක් ඉතිරි කර යන්නට කටයුතු කළා. ඒ තමයි මෙම ජෝසෆ් ෆ්‍රේසර් රෝහල. මෙම රෝහල ආරම්භ කරන අවධියේ මෙම ප්‍රදේශය දියුණු තත්ත්වයක තිබුණේ නැහැ.

මගේ සීයා මගේ නැන්දට සිරිපා පාරේ ඉඩමක් අරන් දී තිබුණා. ඒ නිසා මගේ අම්මා නිතරම එම ප්‍රදේශයට යනවා. එදා මෙම පළාත තනිකරම හිස් භූමියක් ලෙසයි පැවතියේ. වැඩිම වුණොත් මෙම මාර්ගයේ ඉදිරියට යන විට නිවාස දෙක තුනක් පමණයි දකින්න ලැබුණේ. එසේ වූවත් එදා මෙම රෝහල සෑම කෙනෙකුගේම අවධානයට ලක් වුණා. මෙම රෝහල මෙරට කාන්තා පරපුරට ලබා දී අති තිළිණයක් ලෙස සැලකිය හැකියි. එසේම මෙම රෝහල පිළිබඳ අප සියලුදෙනා ආඩම්බර විය යුතුයි.

මේ ආයතනය හොඳින් නඩත්තු කෙරෙනවා. සුමල් පෙරේරා මහතා නයින්වෙල්ස් රෝහලෙන් මෙම කටයුතු ආරම්භ කර දැන් මේ දක්වා සාර්ථක ගමනක් පැමිණ තිබෙනවා. අපට ඇති දේ සහ අපට කළ හැකි දේ පිළිබඳ එය හොඳම උදාහරණයක් බව කිවයුතුයි.

ශ්‍රී ලංකාවේ ඇති මෙවැනි රෝහල්වලට ඉදිරියේ දී මෙරට ජනතාව වෙනුවෙන් පමණක් නොව විදේශිකයන් වෙනුවෙන් ද අවශ්‍ය සේවා සැපයීමට හැකිවනු ඇතැයි මම විශ්වාස කරනවා. මෙම රෝහල දෙස බැලීමේ දී මෙය රෝහලක් ද හෝටලයක් ද කියා සිතා ගැනීම අපහසුයි. රෝහලක සේවාවන් සිදු විය යුත්තේ මේ ආකාරයටයි. එම සේවාවන් උසස් ප්‍රමිතියකින් පවත්වාගෙන යා යුතුයි. විදේශිකයන් ප්‍රතිකාර ලබා ගැනීම සඳහා මෙරටට ගෙන්වා ගැනීමට උත්සාහ කරන්නේ නම් වෛද්‍ය සංචාරක ව්‍යාපාරය සහ සෞඛ්‍ය සේවා ඉතා ඉහළ ප්‍රමිතියකින් පවත්වා ගැනීම අත්‍යාවශ්‍යයි. එම ප්‍රමිති මට්ටම සඳහා මෙම රෝහල හොඳ උදාහරණයක් බව කිවහැකියි.

අපේ රටේ සමස්ත සෞඛ්‍ය ප්‍රතිපත්ති පිළිබඳ නැවත සිතා බැලිය යුතුව තිබෙනවා. මෙරට රෝහල් පද්ධතිය පෞද්ගලික රෝහල් හා රජයේ රෝහල් ලෙස වෙන් කර තිබෙනවා. ඒ වගේම වෛද්‍යවරු විශාල පිරිසක් දැන් රට හැර යමින් සිටිනවා. මෙවන් පසුබිමක් තුළ අපට වැඩි වැඩියෙන් වෛද්‍යවරුන් බිහි කිරීමට සිදුව තිබෙනවා. ඒඅනුව ඉදිරියේදී පළමු රාජ්‍ය නොවන වෛද්‍ය පීඨය ආරම්භ කිරීමට අප සැලසුම් කර තිබෙනවා.

දකුණු ආසියානු තාක්ෂණ හා වෛද්‍ය ආයතනය (SAITM) අප මේ වන විට මොරටුව විශ්වවිද්‍යාලයට ලබා දී තිබෙනවා. ඒ වගේම තවත් වෛද්‍ය පීඨ සහ විශ්වවිද්‍යාල මෙරට ආරම්භ කිරීමට අවස්ථාව ලැබෙනු ඇතැයි මම බලාපොරොත්තු වෙනවා. වැඩිපුර වෛද්‍යවරුන් බිහි කිරීමට අනුගමනය කළ ක්‍රමය එයයි. මේ සඳහා වෙනත් විකල්පයක් නැහැ.

ශ්‍රී ලාංකික වෛද්‍යවරුන් නොමැතිව අද වන විට එක්සත් රාජධානියට තම රෝහල් පද්ධතිය පවත්වාගෙන යාමට අසීරු තත්ත්වයක් මතුව තිබෙනවා. ඒ අනුව පකිස්තානය, බංග්ලාදේශය සහ ඉන්දියාව සමඟ එක්ව, අප එක්සත් රාජධානියේ රෝහල් පද්ධතිය පාලනය කරමින් සිටින බව පැවසුවොත් නිවැරදියි. ඒ අනුව ශ්‍රී ලංකාව ආධාර ලබන රටක් පමණක් නෙවෙයි, ආධාර ලබා දෙන රටක් බවට ද පත් වෙනවා.

 ඒ වගේම පෞද්ගලික අංශයට සහ රාජ්‍ය අංශයට එකට වැඩ කළ හැකි නව ක්‍රමවේදයක් අප දැන් සකස් කර තිබෙනවා.

එසේම සෑම පුරවැසියෙකුටම යම් වෛද්‍ය රක්ෂණයක් ලබාදීමට අප අපේක්ෂා කරනවා. එවිට ප්‍රතිකාර ලබා ගැනීම සඳහා රජයේ රෝහලකට යනවාද, නැතිනම් පෞද්ගලික රෝහලකට යනවාද කියා ජනතාවටම තීරණය කළ හැකියි. අප අවධානය යොමු කළ යුත්තේ මෙම කරුණු පිළිබඳවයි.

ඇත්ත වශයෙන්ම මෙම දිනවල මමත් වෛද්‍යවරයෙක් වගේ කියා මට දැනෙනවා. මරණයට ආසන්නව සිටින රෝගියෙකු ඉන් මුදවා ගැනීමට මට සිදුව තිබෙනවා. ඒ වගේම මම තවමත් එම රෝගියාට සාත්තු කරමින් ඔහුව බේරා ගැනීමට උත්සාහ කරමින් සිටිනවා. මට අවස්ථාවක් ලැබුණොත් මම ඔහුව ජෝසප් ෆ්‍රේසර් නයින්වෙල්ස් රෝහල වෙත එවනවා. නමුත් අවාසනාවකට, මට ඔහුව භාණ්ඩාගාරයේ තබාගෙන ප්‍රතිකාර කිරීමට සිදුව තිබෙනවා.

අප සම්පූර්ණයෙන්ම විවෘත ආර්ථිකයක් තුළ නව ක්‍රමවේදයක් ඔස්සේ දිගු ගමනක් යා යුතුව තිබෙනවා. ඒ තුළ පුද්ගලික ව්‍යවසායන්ට ද දියුණු වී ඉදිරියට යා හැකියි. එසේ නොමැතිව රටක් දියුණු කිරීමට හැකියාවක් නැහැ. එසේම රටකට දියුණු වෙන්නත් බැහැ.

ඒ අනුව ශ්‍රී ලංකාවේ තේ වැවීමෙන් ඔබ්බට ගිය පුද්ගලයෙක් ලෙස ජෝසෆ් ෆ්‍රේසර් මහතා හඳුන්වාදිය හැකියි. ඒ මොහොතේ ශ්‍රී ලංකාවේ කෝපි සඳහා පැවති ඉල්ලුම අඩු වී තේ කර්මාන්තය ඉදිරියට පැමිණෙමින් තිබුණා. ඒ තත්ත්වය තුළ ඔහු සාර්ථක වී රටට ද යමක් ඉතිරි කර දුන්නා. දැන්, සුමල් පෙරේරා වැනි අය සමඟ එක්ව අපි සියලු දෙනා මෙම ක්‍ෂේත්‍රයේ ඉදිරියට ගෙන යාමට අධිෂ්ඨාන කර ගනිමු.

ඇක්සස් සමුහ ව්‍යාපාරයේ සභාපති සුමල් පෙරේරා, ජෝශප් ෆ්‍රේසර් නයින්වෙල්ස් භාරකාර මණ්ඩලයේ සභාපති වෛද්‍ය මනිල් ප්‍රනාන්දු, නයින්වෙල්ස් රෝහලේ කළමනාකාර අධ්‍යක්ෂ තියෝ ප්‍රනාන්දු, ජෝශප් ෆ්‍රේසර් නයින්වෙල්ස් භාරකරු තෝමස් ඩේට්වයිලර්, ප්‍රසව හා නාරිවේද විශේෂඥ වෛද්‍ය මහාචාර්ය හේමන්ත සේනානායක යන අය ඇතුළු සෞඛ්‍ය සේවා වෘත්තිකයන් සහ සම්භාවනීය ආරාධිත පිරිසක් මෙම අවස්ථාවට සහභාගී වූහ.

දශක කිහිපයක ජනමාධ්‍ය අත්දැකීම් සහිත අශෝක ජයතුංග, ඇමෙරිකාවේ වොෂින්ටන් DC හි ශ්‍රී ලංකා තානාපති කාර්යාල මාධ්‍ය ප්‍රධානියා ලෙස පත්ව සිටී.

 එරට තානාපති මහින්ද සමරසිංහ ගේ නිර්දේශය මත ජනාධිපති වික්‍රමසිංහ විසින් අදාළ පත්වීම සිදුකොට තිබේ.

ගාල්ල මහින්ද විද්‍යාලයීය ආදි ශිෂ්‍යයෙකු වන ඔහු, ලංකාදීප පුවත්පතේ ආරම්භක සාමාජිකයෙකු මෙන්ම එහි ඉහළ තනතුරු දැරූවෙකි.

සදුදා හමුව, රජවීදිය, ඉරිදා ලංකාදීප තිරෙන් පිටුපස ප්‍රධාන දේශපාලන කොළම හා ජනපති අගමැති විපක්ෂ නායක ඇතුළු ප්‍රබලම දේශපාලනඥයන් සමඟ සම්මුඛ සාකච්ඡා ඇතුළු විශේෂාංග රැසක් දශක ගණනාවක් පුරා ඔහු විසින් මෙහෙයවිය.

90 දශකයේ මෙරට පැවැති එකම සජීවී දේශපාලන සංවාදය වූ ජාතික රූපවාහිනියේ "ජනමණ්ඩලී" මෙන්ම පසුව ITN හි "වන් ටු වන්" සජීවී දේශපාලන සංවාද රැසක් ද මෙහෙයවීය වුයේ ඔහු විසිනි.

ඇමෙරිකාවට අමතරව මෙක්සිකෝව හා ට්‍රිනිඩෑඩ් ඇන්ඩ් ටොබැගෝ දෙරට ද ඔහුගේ රාජකාරි පත්‍රයට ඇතුලත්වේ. තවද නිව්යෝර්ක් හි එක්සත් ජාතීන්ගේ සංවිධාන ශ්‍රී ලංකා තානාපති කාර්යාල මාධ්‍ය කටයුතු සඳහා දායකත්වය ලබාදීම ද ජනපති විසින් ඔහුට පවරා තිබේ.

මෑතකදී ඔහු ලියූ "ජනපති e කොළම" කාගේත් අවධානයට ලක්වූ හා ආන්දෝලනයකට තුඩුදුන් සමාජ මාධ්‍ය ලිපි පෙළකි.

තමන්ට ජනාධිපතිකම ලබාදුනහොත් ආණ්ඩුවට යාමට සූදානම් බව ශ්‍රී ලංකා නිදහස් පක්ෂයේ සභාපති හිටපු ජනාධිපති මෛත්‍රීපාල සිරිසේන සඳහන් කරයි.

එසේ නොමැතිව ආණ්ඩුවේ අගමැති හෝ අමාත්‍යධුර ලබා ගැනීමේ කිසිදු උවමනාවක් තමනට නැති බවද ඔහු පවසයි .

හිටපු ජනාධිපති පාර්ලිමේන්තු මන්ත්‍රී මෛත්‍රීපාල සිරිසේන මේ බව සඳහන් කර සිටියේ ශ්‍රී ලංකා නිදහස් පක්ෂ මූලස්ථානයේ පැවැති සාකච්ඡාවකින් අනතුරුව මාධ්‍ය වෙත අදහස් දක්වමින් ය.

දේශපාලන පක්ෂවල බෙදී යාම් සාමාන්‍ය බවත් ඒවා අද ඇති සියලු පක්ෂවලට පොදු බවත් එහිදී ඔහු කියා සිටියේ ය.

කෙසේ වුවත් දේශපාලන විචාරකයන් පවසන්නේ පාස්කු ප්‍රහාරය පිළිබඳව නැවත කතා බහක් මතුව ඇති පසුබිමේ ප්‍රහාරය සම්බන්ධයෙන් අපරීක්ෂාකාරී ලෙස කටයුතු කිරීම ගැන චෝදනා ලබා ඇති හිටපු ජනාධිපති මෛත්‍රීපාල සිරිසේන ආණ්ඩුවට එක්වීම වෙනුවෙන් කොළ එළි දල්වමින් සිටින බවයි.

ශ්‍රීලනිප සහය ආණ්ඩුවට ලබාදීමට බාධාවක් ලෙස කුප්‍රකට වූ ශ්‍රීලනිප මහ ලේකම් ලෙස කටයුතු කළ පාර්ලිමේන්තු මන්ත්‍රී දයාසිරි ජයසේකර එම ධූරයෙන් ඉවත්කර ආණ්ඩුවට එක්ව සිටි ශ්‍රීලනිප මන්ත්‍රී කණ්ඩායම නැවත පක්ෂයට ගෙන ඔහු ආරක්ෂා කාරී පියවර අනුගමනය කරමින් සිටින බවත් ඔවුන් පෙන්වා දෙයි.

ඒ අනුව පවතින දේශපාලන සන්ධර්භය යටතේ ශ්‍රීලනිප සභාපති ලෙස හිටපු ජනාධිපති මෛත්‍රීපාල සිරිසේන ආණ්ඩුව වෙත එක්නොවූවත් අනියමින් ඒ සමග එක්ව ඇති තත්ත්වයක් පෙන්නුම් කරන බවත් දේශපාලන විචාරකයන් පෙන්වා දෙයි.

රාජ්‍ය ගිණුම් කාරක සභාව( කෝපා) විසින් ක්‍රීඩා හා යෞවන කටයුතු අමාත්‍යාංශයේ සහ ක්‍රීඩා සංවර්ධන දෙපාර්තමේන්තුවේ නිලධාරීන්ගෙන් ඇසූ ප්‍රශ්න කිසිවකටත් පිළිතුරු දීමට නොහැකිව නිහඬව සිට ඇතැයි වාර්තා වේ.

එහිදී කිසිදු සූදානමකින් තොරව පාර්ලිමේන්තු කමිටුව හමුවේ පෙනී සිටීම සම්බන්ධයෙන් කෝපා කමිටුව එම නිලධාරින්ට දැඩි අප්‍රසාදය පළ කළ බවත් වාර්තා වෙයි.

වැඩිදුරටත් වාර්තා වන ආකාරයට රාජ්‍ය ගිණුම් පිළිබඳ කාරක සභාව එහි සභාපති රාජ්‍ය අමාත්‍ය ලසන්ත අලගියවන්න ගේ ප්‍රධානත්වයෙන් පාර්ලිමේන්තුවේදී රැස්ව තිබේ.

එහිදී ඔලිම්පික් තරගාවලියේ තරග සංඛ්‍යාව පිළිබඳ කෝපා කමිටුව මුලින්ම විමසා තිබෙන අතර නිලධාරීන්ට ඒ ප්‍රශ්නයට පවා පිළිතුරු දීමට නොහැකිව ඇත.

එමෙන්ම ඔලිම්පික්, පොදු රාජ්‍ය මණ්ඩලීය ක්‍රීඩා, ආසියානු ක්‍රීඩා සහ දකුණු ආසියානු ක්‍රීඩා යන තරගාවලිවල තරග ඉසව් සහ ශ්‍රී ලංකාව එම තරගාවලිවල සිටින ස්ථානය සහ ක්‍රීඩා කරන තරග ඉසව් පිළිබඳව විමසූ අවස්ථාවේදී නිලධාරීන්ට ඒ ප්‍රශ්න සඳහාද පැහැදිලි පිළිතුරක් ලබාදීමට නොහැකිවුණු බව කෝපා කමිටුව පවසයි.