පුවත්

2024 වසර සඳහා වන අයවැය දෙවන වර කියවීමේ විවාදයේ ඡන්ද විමසීම අද (21) පස්වරුවේ පාර්ලිමේන්තුවේදී පැවැත්වූ අතර එහිදී අයවැය වැඩි ජන්ද 45කින් සම්මත විය.

අයවැය ට පක්ෂව ඡන්ද 122ක් හිමිවූ අතර විරුද්ධව ඡන්ද ප්‍රකාශ වූයේ 77ක් පමණි.

ඒ අනුව කථානායකවරයා පාර්ලිමේන්තුවට දැනුම්දී සිටියේ 2024 වසර සඳහා වන අයවැය දෙවන වර කියවීම සම්මතවූ බවය.

ජනාධිපති රනිල් වික්‍රමසිංහ මුදල් අමාත්‍යවරයා ලෙස පසුගිය නොවැම්බර් මස 13 වනදා ලබන වර්ෂය සඳහා වූ අයවැය පාර්ලිමේන්තුවට ඉදිරිපත් කළ අතර අයවැය තෙවන වර කියවීමේ විවාදය හෙට (22) සිට දෙසැම්බර් 13 වනදා දක්වා පැවැත්වේ.

මෙරටට පැමිණ සිටින චීන ජනාධිපතිවරයාගේ විශේෂ නියෝජිත සහ රාජ්‍ය මන්ත්‍රී ශෙන් යික්න් (Shen Yiqin) ඇතුළු දුත පිරිස අද (20) පෙරවරුවේ ජනාධිපති කාර්යාලයේ දි ජනාධිපති රනිල් වික්‍රමසිංහ හමු විය.

ශ්‍රී ලංකාවේ ණය ප්‍රතිව්‍යුහගතකරණ වැඩපිළිවෙළ ඇතුළුව ශ්‍රී ලංකාව සම්බන්ධයෙන් චීනය ලබාදෙන සහාය මෙහිදී අගය කළ ජනාධිපතිවරයා ඒ සම්බන්ධයෙන් චීන ජනාධිපතිවරයාට සහ රජයට සිය ස්තූතිය පිරිනැමීය.

එසේම සංචාරක, ක්‍රීඩා සහ කෘෂිකර්ම ක්ෂේත්‍රවලට අදාළව දෙරට අතර සහයෝගීතාව ඉහළ නංවා ගැනීම ශ්‍රී ලංකාවේ අභිලාෂය බව පැවසූ ජනාධිපති රනිල් වික්‍රමසිංහ මහතා හම්බන්තොට වරාය සහ වරාය නගරය මේ වන විට ආයෝජන සඳහා සූදානම්ව පවතින බවද සඳහන් කළේය.

එක් තීරයක් - එක් මාවතක් (Belt & Road) වැඩසටහනේ පාර්ශ්වකරුවන් වූ ශ්‍රි ලංකාව වැනි රටවල් ආර්ථික වශයෙන් වැඩි දායකත්වයක් ලබාදෙන එම වැඩසටහනේ දෙවන අදියරට පිවිසීමට සූදානමින් සිටින බවද ජනාධිපති රනිල් වික්‍රමසිංහ සඳහන් කළේය.

කලාපීය විස්තීරණ ආර්ථික හවුල්කාරිත්වය (RCEP) වෙත ප්‍රවේශවීමට ශ්‍රී ලංකාව ගෙන ඇති පියවර ද ජනාධිපතිවරයා මෙහිදී පැහැදිළි කළේය.

ඉන්දියන් සාගරය නාවික කටයුතු සම්බන්ධයෙන් නිදහස් කලාපයක් ලෙස මෙන්ම ලෝක භූ දේශපාලන එදිරිවාදිකම්වලින් මිදී පවතින සාම කලාපයක් ලෙස පවත්වාගෙන යාමට ශ්‍රී ලංකාව කැපවී සිටින බවද ජනාධිපති රනිල් වික්‍රමසිංහ මහතා වැඩිදුරටත් සඳහන් කළේය.

චීන - මියන්මාර් ආර්ථික කොරිඩෝව ශ්‍රී ලංකාව දක්වා දීර්ඝ කිරීම පිළිබඳව ද චීනයේ අවධානය යොමුව ඇතැයි විශේෂ නියෝජිතවරිය මෙහිදී පැවසුවාය.

චීන - ශ්‍රී ලංකා නිදහස් වෙළෙඳ ගිවිසුම කඩිනමින් ක්‍රියාත්මක කිරීමට ද මෙහිදී දෙපාර්ශ්වය එකඟතාවකට එළැඹිණි.

චීනය අඛණ්ඩව ශ්‍රී ලංකාවට සහාය ලබාදෙන බව මෙහිදී යළි තහවුරු කළ ශෙන් යික්න් මහත්මිය දෙරට අතර සබඳතා ශක්තිමත් කිරීමට කැපවන බවද අවධාරණය කළාය.

ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක, ජනාධිපති ලේකම් සමන් ඒකනායක, ජනාධිපති ජාත්‍යන්තර කටයුතු පිළිබඳ අධ්‍යක්ෂ දිනුක් කොළඹගේ යන මහත්වරුන් ද මෙම අවස්ථාවට එක්ව සිටියහ.

ශත 25 ක බද්ද මත ආනයනය කළ සියලුම සීනි තොග රජයට පවරාගෙන මාසයක කාලයක් රුපියල් 275 ක පාලන මිලට අළෙවි කිරීමට කැබිනට් මණ්ඩලය තීරණය කළ බව වෙළෙඳ, වාණිජ හා ආහාර සුරක්ෂිතතා අමාත්‍ය නලීන් ප්‍රනාන්දු අද (20) පස්වරුවේ පැවසීය.

එම සීනි ලංකා සතොස, සුපිරි වෙළෙදසැල් සහ තෝරාගත් සමූපකාර හරහා අළෙවි කරන බවත් අමාත්‍යවරයා සඳහන් කළේය .

අමාත්‍ය නලීන් ප්‍රනාන්දු වැඩිදුරටත් සඳහන් කරන ආකාරයට සීනි හිඟය නැති කිරීම සහ ජනතාවට අවශ්‍ය සීනි ප්‍රමාණය වෙළෙඳපොලට යොමු කිරීම මෙම වැඩපිළිවෙලේ අරමුණ වී තිබේ .

ඒ අනුව අදාළ සීනි තොග අද සිට ආනයකරුවන්ගෙන් සහ තොග වෙළෙදුන්ගෙන් ගන්නා බවත් ශත 25 ක බද්ද මත ආනයනය කළ සීනි තොග ප්‍රමාණය පාරිභෝගික කටයුතු පිළිබඳව අධිකාරිය මේ වන විට ගණනය කරමින් සිටින බවත් අමාත්‍යවරයා සඳහන් කරයි.

එම වැඩපිළිවෙළ සමඟ පාලන මිල අවශ්‍ය නොවන බව කී අමාත්‍යවරයා රුපියල් 50 ක බද්දට ඉදිරියේදී ආනයනය කරන සීනි නව මිලට අළෙවි කළ හැකි බව ද සඳහන් කළේය.

කෙසේ වුවත් අද සීනි ආනයනකරුවන් සමග පැවති සාකච්ඡාවකදී සීනි පාලන මිල ඉවත් කිරීමට අමාත්‍යංශය එකඟතාව පළකර ඇති බවත් වාර්තා වෙයි .

පාර්ලිමේන්තු සේවිකාවකට ලිංගික හිංසන කළැයි විපක්ෂය විසින් නඟන චෝදනා තමා මුළුමනින්ම ප්‍රතික්ෂේප කරන බවත්, ඒ පිළිබඳ තමා වැරදිකරු වුවහොත් පාර්ලිමේන්තු මන්ත්‍රී ධුරයෙන් ඉවත්වීමට සූදානම් බවත්, කෝප් කමිටුවේ සභාපති පාර්ලිමේන්තු මන්ත්‍රී රංජිත් බණ්ඩාර පැවසීය.

මන්ත්‍රීවරයා මේ බව සඳහන් කර සිටියේ අද (20) පාර්ලිමේන්තුවේදී ප්‍රකාශයක් සිදුකරමිනි .

මෙම ප්‍රශ්නය වරප්‍රසාද කමිටුවට යොමු කරන ලෙසද එය කමිටුවේ දී විභාග කරන ලෙසද මන්ත්‍රීවරයා ඉල්ලා සිටියේය .

එහිදී ඔහු වැඩිදුරටත් කතානායකවරයාගෙන් ඉල්ලා සිටියේ අදාළ චෝදනාව නැඟූ හේෂා විතානගේ මන්ත්‍රීවරයා වැරදිකරු වුවහොත් ඔහුට විරුද්ධව ක්‍රියාමාර්ග ගන්නා ලෙසය.

ජනතාව කබලෙන් ලිපට වැටෙන තුරු බලා සිටි විපක්ෂයේ සිහින මෙවර අයවැයෙන් බොඳ වී ඇති බව පාර්ලිමේන්තු මන්ත්‍රී නීතිඥ ප්‍රේම්නාත් සී. දොලවත්ත පැවසීය.

ජනතාවට සහන ලබා දීම පමණක් නොව සහන ලබා දෙන්නේ කෙසේද යන්නත් පෙන්වා දී තිබෙන මෙවර අයවැය නිසැකයෙන්ම වැඩි ඡන්දයෙන් සම්මත වන බවද ඔහු අවධාරණය කළේය.

නීතිඥ ප්‍රේම්නාත් සී. දොලවත්ත මන්ත්‍රීවරයා මේ බව සඳහන් කළේ ‘ස්ථාවර රටකට සැවොම එක මඟකට’ මැයෙන් අද (20) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

එහිදී වැඩිදුරටත් අදහස් දැක්වූ පාර්ලිමේන්තු මන්ත්‍රී නීතිඥ ප්‍රේම්නාත් සී. දොලවත්ත මෙසේද පැවසීය.

රට මුහුණ දුන් ආර්ථික අර්බුදය හමුවේ ජනාධිපති රනිල් වික්‍රමසිංහ  ප්‍රමුඛ රජය ගනු ලැ‍බූ ජනප්‍රිය නොවන මෙන්ම දේශපාලනික නොවන තීන්දු තීරණ හේතුවෙන් මේ වන විට රට ස්ථාවරත්වයට ගෙන ඒමට හැකි වී තිබෙනවා. ඒ වගේම ජාත්‍යන්තර මූල්‍ය අරමුදලේ දෙවැනි ණය වාරිකය නුදුරේදීම ලැබීමට නියමිතයි. ජනතාවට සහන නොලැබෙයි කියා සිතූ විපක්ෂයේ සිහින බොඳ කරන්නට මෙවර අයවැය සමත් වී තිබෙනවා.

මෙවර අයවැයෙන් රාජ්‍ය සේවක වැටුප් මෙන්ම වකුගඩු, ආබාධිත සහ වැඩිහිටි දීමනා වැඩි කිරීමට යෝජනා කර තිබෙනවා. කඳුරට ජනතාවට මෙන්ම ගොවි ජනතාවට සින්නක්කර ඉඩම් ලබා දීම , මුඩු බිම් කෘෂි කාර්මික කටයුතු සඳහා නිදහස් කිරීම වගේම උසස් අධ්‍යාපන අවස්ථා පුළුල් කිරීම සඳහාද දීර්ඝ කාලීන වැඩ පිළිවෙලක් මෙවර අයවැයට ඇතුළත් වෙනවා. විශේෂයෙන් නව ලොවට ගැළපෙන වෘත්තිකයන් බිහි කිරීමේ සැලසුම් ඊට ඇතුළත් බව කිවයුතුයි. සහනවලින් පමණක් රටක් දියුණු කළ නොහැකියි. ඒ සඳහා දීර්ඝ කාලීන වැඩ පිළිවෙළක් ද අවශ්‍යයි. වසර 2034 වන විට ඉංග්‍රීසි භාෂා සාක්ෂරතාව ඉහළ නැංවීමත් මෙම දිගු කාලීන වැඩ පිළිවෙලට ඇතුළත් වෙනවා. ඒ වගේම සෘජු බදු වැඩි කර ගැනීමට අවශ්‍ය සැලසුම් මෙවර අයවැය හරහා යෝජනා කර තිබෙනවා.

විපක්ෂය බලාපොරොත්තු වූයේ ජනතාව කබලෙන් ලිපට වැටීම වුවත් සහන දෙනවා කියන කාරණයට එහා ගොස් මෙවර අයවැය මඟින් ජනතාවට සහන දෙන්නේ කෙසේද යන කාරණය පෙන්වා දී තිබෙනවා. ඒ වගේම මෙවර අයවැය වැඩි ඡන්දයෙන් සම්මත වන බවට කිසිම සැකයක් නැහැ. එබැවින් පෞද්ගලික දේශපාලන මති මතාන්තර කෙසේ වෙතත් රටේ ස්ථාවරත්වය වෙනුවෙන් ආණ්ඩුවත් සමඟ එක්ව රට ජයග්‍රාහී මාවතෙහි ඉදිරියට යාමට එක්වන ලෙස මම සියලු දෙනාගෙන් ඉල්ලා සිටිනවා.

එමෙන්ම තරුණ ප්‍රජාවට පළාත් පාලන ආයතනවල 25%ක නියෝජනය තහවුරු කිරීම සඳහා වූ පනත් කෙටුම්පත පසුගියදා පාර්ලිමේන්තුවේ සම්මත වුණා. පුද්ගලික මන්ත්‍රී යෝජනාවක් ලෙස මම මෙම යෝජනාව ඉදිරිපත් කළේ කාන්තා නියෝජනය ඒ ආකාරයෙන්ම තිබියදීයි. මේ සම්බන්ධයෙන් මට විරුද්ධව විපක්ෂයේ කොටස් දැඩි විවේචන එල්ල කර සිටියා. ඒ චෝදනා අවලාද මැද වුවත් අඛණ්ඩ කැප කිරීම් මැද අපට එය සම්මත කර ගැනීමට හැකි වුණා.

නමුත් තරුණ ප්‍රජාව වෙනුවෙන් පෙනී සිටිනවා යැයි කියන විපක්ෂය උත්සාහ කළේ එම පනත සම්මත වීම කල් දැමීමටයි. ඔවුන් එය අයවැයට පසුව ගෙන එන්නට දැඩි උත්සාහයක් ගත්තා. එසේ වූවා නම් එය ඊළඟ වසර දක්වා කල් යනවා. විපක්ෂය කියන ආකාරයට ඔවුන් ඇත්තටම තරුණ ප්‍රජාව වෙනුවෙන් පෙනී සිටිනවාද කියන ප්‍රශ්නය මෙහිදී මතු වෙනවා. කෙසේ වෙතත් නැති වී ගිය තරුණ නියෝජනය නැවත ගෙන ඒමට හැකි වීමෙන් රටේ සාමාන්‍ය ජනතාව අතර තරුණයින්ට ඉදිරියට පැමිණීමට අවස්ථාව හිමි කර දීමට හැකි වීම ගැන සතුටු වෙනවා.

ලබන වසර මැතිවරණ වසරක් ලෙස ජනාධිපතිතුමා සඳහන් කර තිබෙනවා. මැතිවරණ සඳහා මුදල් නොමැති බව මුදල් අමාත්‍යාංශ ලේකම්වරයා පවසා තිබෙනවා. නමුත් ආර්ථික ස්ථාවරත්වය සමඟ මැතිවරණ පැවැත්විය හැකි වාතාවරණයක් නිර්මාණය වන බව විශ්වාසයි. ඒ අනුව මැතිවරණ කොමිසම විසින් අදාළ මැතිවරණ නියමිත වෙලාවට පවත්වනු ඇතියි.

ඒ වගේම ඩොලරයේ මිල ඉහළ යාමත් සමඟ බඩු මිල වැඩි වුනත් මේ වන විට එහි යම් පාලනයක් සිදුව තිබෙනවා. නමුත් භාණ්ඩ හා සේවා ආශ්‍රිත අනීතික මිල වැඩි කිරීම් පිළිබඳවත් ඩොලරයේ අගය අඩු වීමේ වාසිය ජනතාවට ලැබෙනවාද යන්න පිළිබඳවත් අවධානය යොමු කළ යුතුව තිබෙනවා.

ඊට අමතරව LGBTQ+ ප්‍රජාවේ අයිතිවාසිකම් ආරක්ෂා කිරීමේ අරමුණින් මා විසින් පෞද්ගලික මන්ත්‍රී යෝජනාවක් ලෙස පාර්ලිමේන්තුවට ඉදිරිපත් කළ දණ්ඩ නීති සංග්‍රහය සංශෝධන සඳහා වන පනත් කෙටුම්පත සම්බන්ධයෙන් ඊළඟ පාර්ලිමේන්තු කටයුතු පිළිබඳ කාරක සභාව හමුවේ කරුණු ඉදිරිපත් කිරීමට අවස්ථාව ලැබී තිබෙනවා. ඒ අනුව ඊටද දෙවැනි වර කියවීම සඳහා දිනයක් ලබා ගැනීමට හැකි වනු ඇතැයි විශ්වාස කරනවා.

ජාතික තරුණ සේවා සභාව විසින් සංවිධානය කළ පස්වන ජාතික තරුණ පාර්ලිමේන්තුවේ 05වන සැසිවාරය නොවැම්බර් 18 සහ 19 දෙදින ජනාධිපති ලේකම් කාර්යාලයේ පැරණි පාර්ලිමේන්තු සභා ගර්භයේ දී පැවැත්විණි.

මෙවර සැසිවාරයේ තේමාව වූයේ “වර්තමාන ශ්‍රී ලංකාව මුහුණ දී ඇති ආර්ථික අභියෝග ජය ගැනීම සඳහා 2024 අයවැය යෝජනා ඵලදායී ලෙස යොදා ගැනීම වෙනුවෙන් තරුණ අදහස් හා යෝජනා ලබා ගැනීම” යන්නයි.

මෙහි පළමු දින ප්‍රධාන ආරාධිත අමුත්තන් ලෙස මුදල් රාජ්‍ය අමාත්‍ය ෂෙහාන් සේමසිංහ, ජාතික තරුණ සේවා සභාවේ සභාපති පසිඳු ගුණරත්න සහභාගී වූහ.

වේත්‍රධාරී විසින් සෙංකෝලය රැගෙන සභා ගර්භයට පිවිසීමෙන් අනතුරුව ශ්‍රී ලංකා තරුණ පාර්ලිමේන්තුවේ 05වන සැසිවාරය ආරම්භ කෙරුණු අතර එහි අග්‍රාමාත්‍ය පැතුම් රණසිංහ සැසිවාරය ආරම්භ කරමින් පිළිගැනීමේ කතාව සිදු කළේය.

තරුණ පාර්ලිමේන්තු පනත, දේශපාලන ඇකඩමිය සහ ප්‍රාදේශීය සංවර්ධන කමිටුවල කාර්යභාරය මෙන්ම තරුණ පාර්ලිමේන්තුව ඩිජිටල්කරණය යන කරුණු පිළිබඳව ද මෙවර සැසිවාරයේ දී අවධානය යොමු කෙරිණි.

එමෙන්ම 2024 අයවැය වෙනුවෙන් තරුණ යෝජනා සහ අදහස් ලබාදීම අගය කරමින් ජනාධිපති රනිල් වික්‍රමසිංහ ගේ අත්සනින් යුත් ලිපියක් ද මෙහිදී තරුණ පාර්ලිමේන්තු සාමාජික සාමාජිකාවන් වෙත පිරිනැමිණි.

මෙහිදී අදහස් දැක්වූ මුදල් රාජ්‍ය අමාත්‍ය ෂෙහාන් සේමසිංහ  සඳහන් කළේ ජනප්‍රිය තීන්දු තීරණ ගෙන රටේ ආර්ථිකය නැවත කඩාවැටුණ යුගයකට ගෙන යෑමට රජයට කිසිදු බලාපොරොත්තුවක් නොමැති බවයි.

2022 වසරට පෙර රටේ තිබූ තත්ත්වය සහ අද පවතින තත්ත්වය අතර විශාල වෙනසක් ඇති බවත්, ජනාධිපති රනිල් වික්‍රමසිංහ ගේ රට ගොඩනඟන එම වැඩපිළිවෙළට තරුණ ප්‍රජාවගේ ද දායකත්වය අවශ්‍ය බවත් රාජ්‍ය අමාත්‍යවරයා සඳහන් කළේය.

වැඩිදුරටත් අදහස් දැක්වූ මුදල් රාජ්‍ය අමාත්‍ය ෂෙහාන් සේමසිංහ මෙසේද පැවසීය.

මේ වන විට ඉදිරිපත් කර තිබෙන අයවැය ලේඛනය පිළිබඳව තරුණ පාර්ලිමේන්තුවේ සාමාජිකයන් යම් අවබෝධයක් ලබා ඇති බව අප විශ්වාස කරනවා. දැනට ස්ථාවරත්වයට පත්ව තිබෙන රටේ ආර්ථිකය, පූර්ණ ස්ථාවරත්වයකට ගෙන ඒම මෙවර අයවැයේ ප්‍රධාන අරමුණ බව කිවයුතුයි.

ඒ වගේම 2024 වසර ආර්ථික වර්ධනයක් ලැබූ වසරක් බවට පත් කිරීමත් මෙවර අයවැයේ තවත් අරමුණක් වෙනවා. මේ සඳහා රටේ සියලු ජනතාව විශාල කැප කිරීමක් සිදුකළා. විශේෂයෙන්ම 2022 වසර දෙස නැව හැරී බැලුවොත් ඒ කටුක, අමිහිරි අත්දැකීම් නැවත මේ රටේ ඇති වෙනවා දැකීමට කිසිවෙක් කැමති නැහැ. ඒ නිසා අර්බුදය ඇති වීම සහ එම අර්බුදය ඇති වීමට බලපෑ හේතු පිළිබඳව නිසි අවබෝධයකින් යුතුව රට ඉදිරියට ගෙන යෑමේ අයවැයක් මෙවර ඉදිරිපත් කර තිබෙනවා.

ඒ සඳහා රනිල් වික්‍රමසිංහ ජනාධිපතිතුමා ඉතාම අධිෂ්ඨානශීලීව නායකත්වය ලබාදී තිබෙනවා. ඒ නායකත්වයට මේ රටේ ජනතාව සහයෝගය ලබා දී තිබෙනවා. එතුමා කොතෙක් අධිෂ්ඨානශීලී වුවත්, ඒ අධිෂ්ඨානශීලීත්වය පිළිබඳව විශ්වාසයක් මහජනතාවට නොතිබුණා නම් මාස 15කට කලින් තිබූ රටත්, අද මේ අත්විඳින රටත් අතර පරතරය පියවා ගන්න හැකියාවක් නැහැ. ඒ නිසා ජනාධිපතිතුමාගේ සිට මුදල් අමාත්‍යාංශය, ශ්‍රී ලංකා මහ බැංකුව, ජනාධිපති කාර්යාලය, විවිධ අමාත්‍යාංශ සහ මේ රටේ ජනතාව එකට අත්වැල් බැඳගෙන ලබා ගත් ආර්ථික ස්ථාවරත්වයක් අද අප සියලුදෙනා මෙලෙස භුක්තිවිඳිනවා. මේ ගමන් මඟ පහසු වුණේ නැහැ. මෙම තත්ත්වයට පරිවර්තනය වීමේදී අප විශාල වේදනාත්මක කාලපරිච්ඡේදයක් පසු කළා.

මේ ආකාරයට ආර්ථිකය කඩාවැටුණු එකම සහ පළමු රට ශ්‍රී ලංකාවත් නෙමෙයි. නමුත් කෙටි කාලයක් තුළ ආර්ථික අර්බුදයෙන් මිදීම සදහා නිවැරදි ගමන්මඟකට පිවිසි රටක් බවට ශ්‍රී ලංකාව පත්ව තිබෙනවා. මේ ආර්ථිකය නැවත යහපත් මට්ටමකට ගෙන ඒම දේශපාලන කෝණයෙන් බැලිය යුතු දෙයක් නොවෙයි. මෙහිදී ජනාධිපතිතුමා ඇතුළු රජය ජනප්‍රිය වූ තීන්දු තීරණ අරගත්තේ නැහැ. රජය ජනප්‍රිය වීමට තීන්දු තීරණ ගත්තා නම්, මේ රටේ තත්ත්වය 2022 වසරට පෙර තිබූ තත්ත්වයට වඩා තවත් බරපතල වෙන්න තිබුණා.

මේ ආකාරයට රට ඉදිරියට ගෙන යෑමේදී තරුණ දායකත්වය ද අපට අවශ්‍යයි. ප්‍රාදේශීය සංවර්ධන කටයුතුවලදි තරුණ ප්‍රජාවගේ දායකත්වය ලබා ගැනීමට අප කටයුතු කරනවා. තරුණ ඔබගේ අදහස් හා යෝජනා අපට ලබා දෙන්න. පිළිගත හැකි තිරසර යෝජනාවලියක් ලබාදීමට තරුණ ඔබ කටයුතු කළහොත් අදාළ සංශෝධන කිරීමට අප සූදාම් බව සඳහන් කරන්න කැමතියි.

අයවැයේ හොඳ කරුණු සහ තවදුරටත් ප්‍රවර්ධනය විය යුතු කරුණු කාරණා පිළිබඳව අධ්‍යයනය කරන්න. එකිනෙකා දකින අන්දමින් තීන්දු ගන්නවා වෙනුවට, දත්ත සහ ඉලක්කම් මත පදනම්ව, නිසි ඇගයීමකට ලක්වන තීන්දු තීරණ ගැනීමේ ප්‍රතිපත්තියක් මේ වන විට ජනාධිපතිතුමා සහ රජය ක්‍රියාත්මක කරමින් සිටිනවා. ඒ අනුව ලෝකයේ හොඳ භාවිතාවන් සමඟ රට ඉදිරියට ගෙන යෑමේ වැඩපිළිවෙළට තරුණ ප්‍රජාවගේ ද සහාය අවශ්‍යයි.

තරුණ කටයුතු හා තිරසර සංවර්ධනය පිළිබඳ ජනාධිපති අධ්‍යක්ෂවරුන් වන රන්දුල අබේධීර, සතිර සරත්චන්ද්‍ර ඇතුළු පිරිසක් ද මෙම අවස්ථාවට එක්ව සිටියහ.

ලොව පුරා මිලියන ගණනක රසික ප්‍රජාවගේ ජනාදරයට පත් ව්ලොග් නිර්මාණකරුවෙකු වන නාස් ඩේලි (Nas Daily) ශ්‍රී ලංකාවට පැමිණ සිටී.

සංචාරක ප්‍රවර්ධන අධිකාරියේ ආරාධනයකට අනුව ඔහු ශ්‍රී ලංකාව වෙත පැමිණ ඇත.

ලෝක ප්‍රසිද්ධ ‘ව්ලොග්’ නිර්මාණකරුවෙකු වන නාස් ඩේලි මෙරට සංචාරක ප්‍රවර්ධන කාර්යාංශය සමග ගිවිසුමකට එළැඹ තිබේ.

සංචාරක අමාත්‍ය හරීන් ප්‍රනාන්දු සිය නිල ෆේස්බුක් ගිණුමේ සටහනක් තබමින් සඳහන් කර ඇත්තේ මෙම ගිවිසුම ශ්‍රී ලංකාවේ සංචාරක කර්මාන්තය ප්‍රවර්ධනය උදෙසා මහත් පිටුවහලක් වනු ඇති බවය.

ඊශ්‍රායල - අරාබි ජාතික ව්ලොග් නිර්මාණකරුවා විසින් මින් පෙර නිර්මාණය කරන ලද This is Made of Poop, My Biggest Money Mistake, The Key Board Warrior යනුවෙන් නම් කරන ලද ශ්‍රී ලංකාව පිළිබඳ වීඩියෝ පට තුනක් අන්තර්ගත කර තිබුණි.

2020 වසරේදී නාස් ඩේලී, කොවිඩ් වසංගත සමය තුළ වඩාත්ම නිර්ලෝභීව කටයුතු කළ රට වශයෙන් (The Most Generous Country During Covid) ශ්‍රී ලංකාව නම් කරමින් නිකුත් කළ වීඩියෝ පටයක් නිර්මාණය කර තිබුණි.

කාරක සභා පැවැත්වෙන අවස්ථාවේදී වෙනත් කිසිදු බාහිර පුද්ගලයෙකු එම රැස්වීම් කාමර තුළට ඇතුළු විය නොහැකි බව කතානායකවරයා විසින් අද (20) දින විශේෂ ප්‍රකාශයක් සිදුකළේය.

ඔහු මේ බව සඳහන් කළේ, අද (නොවැ. 20) පාර්ලිමේන්තුවේදී ය.

කාරක සභා සභාපතිවරුන් තමන්ගේ විෂය සීමාව ඉක්මවා කාරක සභාවේ වැඩ කටයුතු සිදු කිරීම සම්බන්ධයෙන් තමා වෙත විවිධ අවස්ථාවලදී කරුණු වාර්තා වී ඇති බව ත් පාර්ලිමේන්තුවේ දීර්ඝ කාලයක් පුරා පැවති සාම්ප්‍රදායන් ආරක්ෂා වන අයුරින් කටයුතු කිරීමට සියලු ම කාරක සභා සභාපතිවරුන් ස්ථාවර නියෝග අනුව බැඳී සිටින බව කතානායකවරයා සඳහන් කළේ ය.

”පාර්ලිමේන්තුවේදී දැනට ක්‍රියාත්මකව පවතින විවිධ කාරක සභා රැස්වීම් සඳහා සාමාජික මන්ත්‍රීවරයන් හෝ සභාපතිවරයාගේ විධිමත් අවසරය මත පැමිණෙන සාමාජික මන්ත්‍රීන් නොවන පාර්ලිමේන්තු මන්ත්‍රීවරුන් සහ අදාළ කාරක සභාවේ වැඩකටයුතු සඳහා කැඳවීමක් කරන ලද වෙනත් බාහිර ආයතන නිලධාරීන්ට ද එකී කාරක සභාවේ කටයුතු ඉටු කරනු ලබන පාර්ලිමේන්තු කාර්ය මණ්ඩලයේ නිලධාරී මහත්ම මහත්මියන්ට පමණක් එම කාරක සභා සහභාගී විය හැකි බව ත් වෙනත් කිසිදු හෝ බාහිර පුද්ගලයෙකුට එම කාරක සභා රැස්වීමේ පැවැත්වීමේ අවස්ථාවේදී කාරක සභා කාමර තුළට පැමිණීමට හෝ කිසිදු අවසරයක් නොමැති බව ත් මෙයින් අවධාරණය කරමි. මීට අමතරව කාරක සභා සභාපතිවරයා තමන්ගේ විෂය සීමා ඉක්මවා කාරක සභාවේ වැඩ කටයුතු කිරීමේ ප්‍රවණතාවක් පිළිබඳ මා වෙත විවිධ අවස්ථාවලදී කරුණු මා වෙත ඉදිරිපත් වී ඇති බැවින් ඒවා සම්බන්ධයෙන් ද පාර්ලිමේන්තුවේ චිරාත් කාලයක් පුරාවට පැවති සම්ප්‍රදායන් සහ පරිචයන් ආරක්ෂා වන අයුරින් කටයුතු කිරීමට සියලු ම කාරක සභා සභාපතිවරුන් පාර්ලිමේන්තු ස්ථාවර විධි විධාන ප්‍රකාරව බැඳී සිටින බව අවධාරණය කරමි”

එසේ ම ඔහු තවදුරට ත් සඳහන් කළේ, කාරක සභා සභාපතිවරයන් වශයෙන් වැඩ කටයුතු කිරීමේදී සම්බන්ධීකරණය සහ උපදේශන කාර්යයන් සඳහා කිසියම් බාහිර පුද්ගලයෙකුගේ සේවය සඳහා ස්වෙච්ජාවෙන් හෝ ලබා ගැනීමට කතානායකවරයාගේ ලිඛිත අවසරයක් ගත යුතු බව ය.

”පාර්ලිමේන්තුවේ කාර්යයය මණ්ඩලයේ නිලධාරීන්ට අමතරව කාරක සභා සභාපතිවරයන් විසින් කාරක සභාවේ වැඩ කටයුතු කිරීම සම්බන්ධීකරණය සහ උපදේශන කාර්යයන් සඳහා කිසියම් බාහිර පුද්ගලයෙකුගේ සේවය ස්වෙච්ජාවෙන් හෝ වෙනත් ආකාරයකින් ලබා ගැනීමට අපේක්ෂා කරන්නේ නම් ඒ සඳහා මාගේ පූර්ව ලිඛිත අවසරයක් ගත යුතු බව අවධාරණය කරමි”

කාරක සභා වැඩකටයුතු කරගෙන යාමේදී විවිධ අමාත්‍යාංශවල, දෙපාර්තමේන්තුවල ව්‍යවස්ථාපිත හෝ ව්‍යවස්ථාපිත නොවන ආයතනවල රජයේ නිලධාරීන් කැඳවීමේදී ඔවුන් අපහසුතාවට පත් නොවන ආකාරයෙන් කාරක සභාවේ වැඩකටයුතු කිරීම සිදු කළ යුතු බව ත් ඔහු වැඩිදුරට ත් සඳහන් කළේ ය.

”තව ද කාරක සභා වැඩකටයුතු කරගෙන යාමේදී විවිධ අමාත්‍යාංශවල, දෙපාර්තමේන්තුවල ව්‍යවස්ථාපිත හෝ ව්‍යවස්ථාපිත නොවන ආයතනවල රජයේ නිලධාරීන් කැඳවීමේදී ඔවුන් අපහසුතාවයට පත් නොවන ආකාරයෙන් කාරක සභාවේ වැඩකටයුතු කිරීමටත් පාර්ලිමේන්තුවේ ගෞරවයට අභිමානයට හානි නොවන ආකාරයෙන් සමබරව කාරක සභාව විසින් අනුමත කරන ලද කාරණා සම්බන්ධයෙන් පමණක් මාධ්‍ය නිවේදන නිකුත් කිරීමට ත්, ලිපි ගනුදෙනු කිරීමේදී අදාළ කාරක සභා නාමය සහිත නිල ලිපි ශිර්ෂ අදාළ කාරක සභා විසින් අනුමත කාරණා සන්නිවේදනය කිරීම සඳහා පමණක් භාවිතා කිරීමට ත් එම කාරක සභා නිල ලිපි ශිර්ෂ කිසිම අවස්ථාවක පෞද්ගලික හෝ දේශපාලනික කාරණා වෙනුවෙන් භාවිතා කිරීම නොකළ යුතු බවට ත් එලෙසම කාරක සභා වැඩකටයුතු සම්බන්ධයෙන් වාර්තා පාර්ලිමේන්තුවේදී ඉදිරිපත් කිරීමේදී ද මෙතෙක් අනුගමන කරන ලැබූ ක්‍රමවේදයන්ට අනුව කටයුතු කිරීමටත් සියලු ම කාරක සභා සභාපතිවරයන් විසින් වග බලා ගත යුතු බවට මෙයින් අවධාරණය කරමි”

මේ අතර, කෝප් කමිටු සභාපති මහාචාර්ය රංජිත් බණ්ඩාරගේ පුත් කනිෂ්ක බණ්ඩාර කෝප් කමිටු රැස්වීමට පැමිණීම සම්බන්ධයෙන් විපක්ෂ නායක ඇතුළු මන්ත්‍රීවරුන් රැසක් පසුගිය දා දැඩි විරෝධය පළ කළහ.

ශ්‍රේෂ්ඨාධිකරණ විනිසුරුවරුන් අභියාචනාධිකරණයේ සභාපති ඇතුළු විනිසුරුවරුන් පත් කිරීමේ දී එම විනිසුරුවරුන්ගේ ක්‍රියා කලාපය පරීක්ෂා කළ යුතු බවට ආණ්ඩුක්‍රම ව්‍යවස්ථා සභාව අගවිනිසුරු ජයන්ත ජයසූරිය ට ලිපියකින් දැනුම් දී තිබේ.

ජනාධිපතිවරයා විසින් ආණ්ඩුක්‍රම ව්‍යවස්ථා සභාවට කරන යෝජනා අනුව සිදු වන පත් කිරීම්වලට අදාලව මෙම ලිපිය යොමු කර ඇත.

ආණ්ඩුක්‍රම ව්‍යවස්ථා සභාව අගවිනිසුරුවරයාට යොමු කරන ලද ලිපියෙන් තවදුරටත් දක්වන්නේ නව පත් කිරීම් ලබන විනිසුරුවරුන් පසුගිය වසර කිහිපය ඇතුලත ලබා දුන් විනිශ්චයන් සංඛ්‍යාව සහ අදාල විනිසුරුවරයාගේ කාර්ය සාධනය සම්බන්ධයෙන් සලකා බැලිය යුතු බවයි.

එමෙන්ම ශ්‍රේෂ්ඨාධිකරණය විසින් අවලංගු කරන ලද අදාල විනිසුරුවරුන්ගේ විනිශ්චයන් සංඛ්‍යාව සහ ඒ සම්බන්ධයෙන් ශ්‍රේෂ්ඨාධිකරණය විසින් කරන ලද නිරීක්ෂණ පිළිබඳවත් අදාල විනිසුරුවරයාගේ හැසිරීම සහ ඔහු නීතිමය අධිකරණ විද්‍යාවේ දියුණුව සඳහා කිසියම් කැපී පෙනෙන දායකත්වයක් ලබා දීම යනාදී කරුණු සම්බන්ධයෙන් විමසා බැලිය යුතු බව ආණ්ඩුක්‍රම ව්‍යවස්ථා සභාව අගවිනිසුරුවරයාට යැවූ ලිපියේ දක්වා තිබේ.

• lankadeepa

පොලිස්පති සී.ඩී වික්‍රමරත්න ගේ තෙවැනි සේවා දිගුවද ව්‍යවස්ථා සභාව විසින් ප්‍රතික්ෂේප කර ඇති බව වාර්තා වෙයි .

ජනාධිපති රනිල් වික්‍රමසිංහ විසින් පොලිස්පති සී. ඩී වික්‍රමරත්න ට තුන්වැනි සේවා දිගුව ලබා දුන්නේ පසුගිය 3 වැනිදාය.

ඔහුට මෙලෙස තුන්වැනි සේවා දිගුව දුන්නේ සති තුනක කාලයක් සඳහා වන අතර ඒ අනුව පොලිස්පතිගේ සේවා කාලය ලබන 24 වැනිදා අවසන්වීමට නියමිතයි .

පොලිස්පති සී.ඩී වික්‍රමරත්න ගේ සේවා දිගු අනුමත කිරීම ආණ්ඩුක්‍රම ව්‍යවස්ථා සභාවේ සාමාජිකයන් දිගටම ප්‍රතික්ෂේප කිරීම හේතුවෙන් ගැටලු රැසක් මතුව ඇති බවත් වාර්තා වෙයි .

මේ අතර තුන්වෙනි සේවා දිගුව අවසන් වීමෙන් පසු පොලිස්පති සිරි වික්‍රමරත්න ට තවත් සේවා දිගුවක් ලබා දෙන්නේද එසේ නැත්නම් නව පොලිස්පතිවරයකු පත් කරන්නේද යන්න සම්බන්ධයෙන් රජය මෙතෙක් කිසිදු තීරණයක් ගෙන නොමැති බවත් වාර්තා වෙයි .

පොලිස්පති ධුරය සඳහා ජ්‍යෙෂ්ඨ නියෝජ්‍ය පොලිස්පතිවරුන් සිවු දෙනකුගේ නම් රජයට දැනටමත් යෝජනා වී ඇත.

ඉතිහාසයේ දරුණුතම ආර්ථික අර්බුදය මධ්‍යයේ වූවද රටේ ජනතාවගේ ජීවන තත්ත්වය, සහ අවදානමට ලක්විය හැකි ජනතාවගේ ජීවන තත්ත්වය වැඩිදියුණු කිරීම කෙරෙහි විශේෂ අවධානයක් යොමු කරමින් ඉදිරි වසර සඳහා වන අයවැය රජය පාර්ලිමේන්තුවට ඉදිරිපත් කර ඇති බව ජනාධිපති රනිල් වික්‍රමසිංහ පැවසීය.

ජනාධිපති රනිල් වික්‍රමසිංහ මේ බව සඳහන් කර සිටියේ "ගෝලීය දකුණේ හඬ" සමුළුවේ රාජ්‍ය නායක සැසිය පසුගිය 17 වනදා මාර්ගගත ක්‍රමවේදය ඔස්සේ අමතමිනි.

දෙවැනි වරට පැවැත්වූ මෙම සමුළුව, ඉන්දීය අග්‍රාමාත්‍ය නරේන්ද්‍ර මෝදි මහතාගේ ප්‍රධානත්වයෙන් ඉන්දියාවේදි ආරම්භ වූ අතර සංවර්ධනය වෙමින් පවතින රටවල රාජ්‍ය නායකයින් රැසක් ඊට එක්ව සිටියහ.

සමුළුවට සහභාගී වීම සඳහා ඉන්දීය අග්‍රාමාත්‍ය නරේන්ද්‍ර මෝදි විසින් කළ ආරාධනයට සිය ස්තූතිය පළ කළ ජනාධිපති රනිල් වික්‍රමසිංහ මෙම සමුළුව සංවිධානය කරමින් ඉන්දියාව සිදු කරන කාර්යභාරය ද අගය කළේය.

පළමු වරට පැවැත්වූ ගෝලීය දකුණේ හඬ සමුළුවේ වැදගත්කම පිළිබිඹු කරමින් ජනාධිපති රනිල් වික්‍රමසිංහ මහතා ඉන්දියාවේ නායකත්වය සහ සංවර්ධනය වෙමින් පවතින ලෝකයේ ප්‍රමුඛතා කෙරෙහි ජාත්‍යන්තර අවධානය යොමු කිරීම සඳහා එමඟින් ඇති වූ ධනාත්මක බලපෑම අගය කළේය.
ඉන්දියාවේ සභාපතිත්වය යටතේ පැවති G20 සමුළුවේ සාර්ථකත්වය සිහිපත් කළ ජනාධිපතිවරයා, සංවර්ධනය වෙමින් පවතින රටවලට අදාළ ප්‍රධාන ප්‍රමුඛතා සහ විවිධ ගැටළු හඳුනාගැනීමට එමගින් හැකි වූ බව ද සඳහන් කළේය.

පසුගිය වසරේ පැවති පළමු සමුළුවේදී, ආර්ථික ගැටළු, එනම් ණය පියවීමේ දුෂ්කරතා සහ ජාත්‍යන්තර මූල්‍ය වෙළඳපොළ සඳහා පවතින සීමිත ප්‍රවේශය වැනි ගෝලීය දකුණ විසින් මුහුණ දෙන පොදු අභියෝග පිළිබඳව තමා දැක්වූ අදහස් ද ජනාධිපති රනිල් වික්‍රමසිංහ මෙහිදී සිහිපත් කළේය.

මෙම අභියෝගවලට මුහුණ දීම සඳහා සංවර්ධනය වෙමින් පවතින ආර්ථිකයන් සහ G20 රටවල් අතර පාලමක් ලෙස ඉන්දියාව ක්‍රියාකිරීම සහ බහුපාර්ශ්වික ආයතනවලින් හා සංවර්ධිත ආර්ථිකයන් සහිත රටවලින් මේ සඳහා බාහිර ආධාර අවශ්‍ය බවත් ජනාධිපතිවරයා එහිදී අවධාරණය කර තිබිණි.

ශ්‍රී ලංකාවේ වත්මන් ආර්ථික ප්‍රගතිය පිළිබඳව මෙහිදී අදහස් දැක්වූ ජනාධිපති රනිල් වික්‍රමසිංහ , ජාත්‍යන්තර මූල්‍ය අරමුදලේ පළමු ණය වාරිකය ලැබීම සහ ශ්‍රී ලංකාවේ ද්විපාර්ශ්වික ණය පිළිබඳ නිල ණය හිමියන්ගේ කමිටුව විසින් අත් කර ගෙන ඇති ප්‍රගතිය පිළිබඳව ද සඳහන් කළේය.

මෙහිදී ණයගැතිභාවය පිළිබඳ ගැටලුවේ සංකීර්ණත්වය වැඩිදුරටත් අවධාරණය කළ ජනාධිපතිවරයා, මේ සඳහා තිරසාර විසඳුම් සෙවීම වෙනුවෙන් ණයහිමියන් සහ ජාත්‍යන්තර මූල්‍ය ආයතන අතර සහයෝගීතාවක් ඇති කර ගත යුතු බව ද සඳහන් කළේය.
අනාගතය දෙස බලමින් දිගුකාලීන වර්ධනයක් සඳහා විදේශ ආයෝජන ආකර්ෂණය කර ගැනීමේ සහ සම්බන්ධතා වර්ධනය කර ගැනීම වැදගත් බව ද ජනාධිපති රනිල් වික්‍රමසිංහ පෙන්වා දුන්නේය.

තමා පසුගියදා ඉන්දියාවේ සිදු කළ නිල සංචාරය අතරතුර අග්‍රාමාත්‍ය නරේන්ද්‍ර මෝදි සමඟ එක්ව එළිදක්වන ලද හවුල්කාරීත්ව දැක්ම තුළ අන්‍යෝන්‍ය වශයෙන් ප්‍රතිලාභ සැලසෙන අයුරින් සියලු ක්ෂේත්‍රයන් ඔස්සේ දෙරට අතර සබඳතා ප්‍රවර්ධනය කිරීම කෙරෙහි අවධානය යොමු කර තිබෙන බවද ජනාධිපතිවරයා සඳහන් කළේය.

ඩිජිටල්කරණයේ දී අද ඉන්දියාව ඉහළ සාර්ථකත්වයක් ලබා ඇති බවත්, එම ක්ෂේත්‍රයට අදාළව දෙරට අතර සහයෝගීතාව ඉහළ නංවා ගැනීමට විශේෂ අවධානයක් යොමු කළ යුතු බවටත් ජනාධිපතිවරයා මෙහිදී යෝජනා කළේය.

ආර්ථික වර්ධනයේ දී මෙන්ම ඵලදායී රාජ්‍ය සේවාවක් වෙනුවෙන් ශ්‍රී ලංකාව තුළ ඩිජිටල්කරණයේ දියුණුව අපේක්ෂා කරන බවද ජනාධිපතිවරයා සඳහන් කළේය.

සෞඛ්‍ය අමාත්‍යාංශයේ ලේකම් ජනක ශ්‍රී චන්ද්‍රගුප්ත ඇතුළු අමාත්‍යාංශ ප්‍රධානීන් 9 දෙනෙකුට විදේශගත වීම තහනම් කරමින් මාලිගාකන්ද මහේස්ත්‍රාත් අධිකරණය නියෝගයක් නිකුත් කර තිබේ.

ඒ, ව්‍යාජ ලේඛන සකස් කර මිලියන 130ක වටිනාකමකින් යුත් ප්‍රමිතියෙන් තොර මානව ප්‍රතිදේහ (ඉමියුනොග්ලොබියුලීන්) එන්නත් ගනුදෙනුවට සම්බන්ධ බවට සැක කරමිනි.

එලෙස මානව ප්‍රතිදේහ එන්නත් ආනයනය කර දිවයිනේ රාජ්‍ය රෝහල් වෙත බෙදා හැරීමේ වංචාවට මේ පුද්ගලයන් සම්බන්ධ බවත්, ඔවුන් අධිකරණය මගහැර විදේශගත වීමට හැකි බවත් සඳහන් කරමින් අපරාධ පරීක්‍ෂණ දෙපාර්තමේන්තුව අධිකරණය ඉදිරියේ කරුණු පැහැදිලි කර ඇත.

එකී ඉල්ලීම සලකා බලා සෞඛ්‍ය අමාත්‍යාංශයේ ලේකම්, අතිරේක ලේකම්, තාක්‍ෂණික ඇගයීම් කමිටුවේ ප්‍රධානී, වෛද්‍ය සැපයීම් ඒකකයේ අධ්‍යක්‍ෂ, වෛද්‍ය සැපයීම් ඒකකයේ සහකාර අධ්‍යක්‍ෂ ඇතුළු පහත සඳහන් උසස් නිලධාරීන් 9 දෙනෙකුට මෙම තහනම් නියෝගය පනවා තිබේ.

1 - සීමාහේවගේ ජනක ශ්‍රී චන්ද්‍රගුප්ත
2 - අත්තනායක මුදියන්සේලාගේ සමන් කුසුම්සිරි රත්නායක
3 - හේරත් මුදියන්සේලාගේ ධර්මසිරි රත්නකුමාර හේරත්
4 - බුත්පිටිය ලේකම්ලාගේ දොන් ජයනාත්
5 - යූ. එස්. කේ. දෙනාවත්ත
6 - ඩී.එච්.ආර්. එන්. ප්‍රේමතුංග
7 - ටී. ඩී. සොලමන්
8 - මරක්කල මානගේ නිරාන් ධනංජය
9 - එම්. සුජිත් වසන්ත කුමාර

මෙම පුද්ගලයන් විදේශගත වීමට ක්‍රියා කළහොත් හෝ විදේශගතව සිට මෙරටට පැමිණියහොත් එම ගමන නවතා අපරාධ පරීක්‍ෂණ දෙපාර්තමේන්තුවේ විශේෂ විමර්ශන අංශය ඒ පිළිබඳ දැනුවත් කරන ලෙස මාලිගාකන්ද අධිකරණය ආගමන විගමන දෙපාර්තමේන්තුවට නියෝග කර ඇත.

ඒ, 1948 අංක 20 දරන ආගාමික විගාමික පනතේ 1993 අංක 16 දරන පනතින් සංශෝධිත ආගාමික විගාමික පනතේ 51 (ඇ) (1) වගන්තිය සමග කියවිය යුතු 1979 අංක 15 දරන අපරාධ නඩු විධාන සංග්‍රහ පනතේ 124 වගන්තිය අනුව බව ද අධිකරණ නියෝගයේ දක්වා තිබේ.

මාලිගාකන්ද මහේස්ත්‍රාත් අධිකරණය මෙම නියෝගය ලබා දෙන අවස්ථාව වන විටත් තාක්‍ෂණික ඇගයීම් කමිටුවේ ප්‍රධානී විදෙස්ගත වී ඇති බව ද සෞඛ්‍ය අමාත්‍යාංශයේ උසස් නිලධාරියෙක් පැවසීය.

සෞඛ්‍ය අමාත්‍යාංශයේ විමර්ශන ඒකකයේ අනුමැතියකින් තොරව, සහකාර ලේකම්වරයාගේ අනුමැතිය යටතේ විෂය භාර ඇමැතිවරයාගේ අවසරය මත ඔහු විදෙස්ගත වී ඇති බව ද හෙතෙම කීය.

ව්‍යාජ ලිපි ලේඛන භාවිත කරමින් ප්‍රසම්පාදන කටයුතුවලට සම්බන්ධ වී මිල දී ගත් මානව ප්‍රතිදේහ එන්නත් සම්බන්ධයෙන් අපරාධ පරීක්‍ෂණ දෙපාර්තමේන්තුවට ලැබුණු පැමිණිලි අනුව මෙම විමර්ශන ආරම්භ කර ඇති අතර ඒ සම්බන්ධයෙන් මාලිගාකන්ද අධිකරණයේ නඩු ගොනු කර ඇත.

හියුමන් ඉමියුනොග්ලොබියුලීන් එන්නත් කුප්පි 22,500ක තොගයක් මෙරටට ගෙන්වන ලදැයි කියන සමාගමේ හිමිකරු සුගත් ජනක ප්‍රනාන්දු හෙවත් 'අරුණ දීප්ති', ඖෂධ නියාමන අධිකාරියේ ප්‍රධාන විධායක අධ්‍යක්ෂ වෛද්‍ය විජිත් ගුණසේකර, සෞඛ්‍ය අමාත්‍යංශයේ සැපයුම් අධ්‍යක්ෂ වෛද්‍ය කපිල වික්‍රමනායක යන තිදෙනාට මාළිගාකන්ද මහේස්ත්‍රාත් අධිකරණය විසින් මිට ඉහත දී විදෙස් ගමන් තහනමක් පනවා තිබිණ.

මෙම හියුමන් ඉමියුනොග්ලොබියුලීන් වංචාව සම්බන්ධයෙන් අපරාධ පරීක්ෂණ දෙපාර්තමේන්තුව සහ රාජ්‍ය බුද්ධි අංශය විසින් වෙන වෙනම විමර්ශන සිදුකරමින් පවතී.

මෙම සිද්ධියට සම්බන්ධ බවට සැක කරන සැකකරුවන් අධිකරණයට ඉදිරිපත් කිරීමට අධිකරණය නියෝග කර තිබුණ ද මෙතෙක් ඔවුන් ඉදිරිපත් කර නොතිබිණි.

සෞඛ්‍ය අමාත්‍යාංශ ලේකම් ජනක ශ්‍රී චන්ද්‍රගුප්ත නොවැම්බර් 18 වන දා සිට සේවයෙන් විශ්‍රාම යෑමට නියමිතව තිබිණ.

දිවයිනේ බොහෝ පළාත්වලට අද පස්වරු 1.00 පසු වැසි හෝ ගිගුරුම් සහිත වැසි ඇති වන බව කාලගුණ විද්‍යා දෙපාර්තමේන්තුව කියයි.

මධ්‍යම,සබරගමුව සහ ඌව පළාත්වලත් කුරුණෑගල සහ මන්නාරමටත් මිලි මීටර් 100 වැඩි තද වැසි ඇති වේ.

උතුර බස්නාහිර සහ දකුණු පළාත්වලත් පුත්තලම දිස්ත්‍රික්කයේ ඇතැම් ස්ථානවලට උදෑසන කාලයේ තද වැසි ඇති වේ.

ප්‍රශ්නගත ඉමියුනොග්ලොබියුලින් ඖෂධ ගනුදෙනුව සම්බන්ධයෙන් සිදු කරන පරීක්ෂණ සඳහා කිසිදු දේශපාලන බලපෑමක් සිදු කර නොමැති බව සෞඛ්‍ය අමාත්‍ය වෛද්‍ය රමේෂ් පතිරණ සඳහන් කරයි.

අදාළ විමර්ශන කටයුතු වෙනුවෙන් කිසියම් කාල සීමාවක් අවශ්‍ය බව අපරාධ පරීක්ෂණ දෙපාර්තමේන්තුව දන්වා ඇති බවද සෞඛ්‍ය අමාත්‍යවරයා සඳහන් කර සිටියි.

සෞඛ්‍ය අමාත්‍ය රමේෂ් පතිරණ මේ බව සඳහන් කර සිටියේ ඉමියුනොග්ලොබියුලින් ඖෂධය මෙරටට ගෙන්වීම සම්බන්ධයෙන් සිදු කළ ප්‍රසම්පාදන ක්‍රියාවලිය පිළිබඳ සිදු කෙරෙන පරීක්ෂණ පිළිබඳව පාර්ලිමේන්තු මන්ත්‍රීවරයකු යොමු කළ ප්‍රශ්නයකට පිළිතුරු දෙමින් ය.

එම ප්‍රශ්නය යොමුකරමින් මන්ත්‍රීවරයා පෙන්වා දුන්නේ අදාළ සිද්ධිය සම්බන්ධයෙන් විදෙස් ගමන් තහනමක් පනවා ඇති පුද්ගලයෙකු මෙරටින් පළා ගොස් ඇති බවය.

මේ අතර, අදාළ ගනුදෙනුව සම්බන්ධයෙන් චෝදනා එල්ල වී සිටින සෞඛ්‍ය අමාත්‍යංශයේ හිටපු ලේකම් ජනක ශ්‍රී චන්ද්‍රගුප්ත ඇතුළු පුද්ගලයන් 09 දෙනෙකුට විදෙස් ගමන් තහනමක් පැනවීමට මාලිගාකන්ද අධිකරණය නියෝග කර තිබේ.

එසේම මෙම සිදුවීමට අදාළ තවත් තිදෙනෙකුට මීට ඉහත දී විදෙස් ගමන් තහනමක් පනවා තිබිණි.

ජනතාව ගෙවනු ලබන VAT බද්ද රජයට නිසියාකාරව ලැබෙන්නේ ද යන්න තහවුරු කරගැනීම සඳහා ක්‍රමවේදයක් සකස් කරන ලෙස කෝපා කමිටුව විසින් දේශීය ආදායම් දෙපාර්තමේන්තුවට උපදෙස් ලබාදී ඇත.

දේශීය ආදායම් දෙපාර්තමේන්තුව සම්බන්ධයෙන් 2019, 2020, හා 2021 වර්ෂ සඳහා වූ විගණකාධිපති වාර්තා හා වර්තමාන කාර්ය සාධනය පරීක්ෂාව සඳහා කෝපා කමිටුව රාජ්‍ය අමාත්‍ය ලසන්ත අලගියවන්න ගේ සභාපතිත්වයෙන් පසුගියදා පාර්ලිමේන්තුවේදී රැස්වූ අවස්ථාවේදී මේ බව සඳහන් කර ඇත.

ඊට ප්‍රතිචාර දක්වමින් දේශීය ආදායම් දෙපාර්තමේන්තු නිලධාරීන් පවසා ඇත්තේ වර්තමානය වනවිට VAT බද්ද සඳහා ආයතන 13,000ක් පමණ ලියාපදිංචි වී ඇති අතර එම ආයතන මඟින් අදාළ බද්ද රජයට ගෙවීම පිළිබඳව විමර්ශන කරන බවය.

කෙසේ වුවත් කෝපා කමිටුව අවධාරණය කර ඇත්තේ ජනතාවගෙන් VAT අය කරන ආයතන එම බදු නිවැරදිවම රජයට ලැබෙන ක්‍රමවේදයක් සකස් කළ යුතු බවය.

තවද ,RAMIS පද්ධතිය තවමත් භාරගත නොහැකි බව දේශීය ආදායම් දෙපාර්තමේන්තුව එහිදී කෝපා කමිටුවට දැනුම් දී ඇති අතර එහිදී RAMIS පරිගණක පද්ධතියට සම්බන්ධ වීමට වහාම තමන්ගේ පරිගණක පද්ධතියේ අදාළ යාවත්කාලීන කිරීම් සිදුකරන ලෙස කෝපා කමිටුව සමාගම් රෙජිස්ට්‍රාර් දෙපාර්තමේන්තුවට උපදෙස් ලබා දී ඇත.

එසේම 2023 වසරේ මේ වනතෙක් නව බදු ගෙවන්නන් 198,000කට අධික ප්‍රමාණයක් ලියාපදිංචි කර ඇති බව ද දේශීය ආදායම් දෙපාර්තමේන්තුව මෙහිදී පවසා ඇත .

පොදු ව්‍යාපාර පිළිබඳ පාර්ලිමේන්තු කාරක සභාවේ (කෝප් කමිටුව) සභාපති මහාචාර්ය රංජිත් බණ්ඩාර ට එරෙහිව විශ්වාසභංග යෝජනාවක් කතානායකවරයාට බාර දීමට සමගි ජන බලවේගය පක්ෂය තීරණය කර ඇති බව වාර්තා වෙයි .

අදාළ විශ්වාස භංග යෝජනාව එළැඹෙන සඳුදා (20) කතානායකවරයා වෙත භාරදීමට නියමිත බවත් දැනගන්නට ඇත .

ඊට නිමිත්ත වී තිබෙන්නේ ශ්‍රී ලංකා ක්‍රිකට් ආයතනය සහ මහාචාර්ය රංජිත් බණ්ඩාර අතර ඇතැයි පැවසෙන ළබැදියාවන් අතර ගැටුම බවත් එබැවින් ඔහු එම කමිටුවේ මුල් පුටුවේ තබා ගෙන ක්‍රිකට් ආයතනය සම්බන්ධයෙන් කතාබස් කිරීම ඵලදායි කරුණක් නොවන බව විපක්ෂයේ මන්ත්‍රීවරුන්ගේ ස්ථාවරය වී ඇති බවත් වාර්තා වෙයි .

එබැවින් පාර්ලිමේන්තු මන්ත්‍රී රංජිත් බණ්ඩාර ගේ මූලිකත්වය යටතේ ශ්‍රී ලංකා ක්‍රිකට් ආයතනයේ දූෂණ වංචා සහ අක්‍රමිකතා විමර්ශනය කිරීමට එකඟ නොවීමට ද ඔවුන් තීරණය කර ඇත .

මේ අතර කෝප් කමිටුවේ රැස්වීම් දින නියමයක් නොමැතිව නතර කිරීමට කතානායක මහින්ද යාපා අබේවර්ධන ඊයේ (17) තීන්දු කළේය .

හිටපු ජනාධිපති මහින්ද රාජපක්ෂ ගේ ජන්ම දිනයට සමගාමීව අභයාරාමයේදී අද (18) උදෑසන කිරිඅම්මාවරුන්ගේ දානමය පිංකමක් පැවැත්වු අතර ඒ සඳහා අපේක්ෂා කළ තරම් පිරිසක් සහභාගීව නොමැති බව වාර්තා වෙයි .

මෙම කිරිඅම්මාවරුන්ගේ දානමය පිංකම අභයාරාමාධිපති පූජ්‍ය මුරුත්තෙට්ටුවේ ආනන්ද හිමියන්ගේ අනුශාසකත්වයෙන් පවත්වා ඇති අතර ඒ අවස්ථාව සඳහා හිටපු ජනාධිපති මහින්ද රාජපක්ෂ සහ ශිරන්ති රාජපක්ෂ ඇතුළු පිරිසක් සහභාගි වී ඇතත් මැති ඇමතිවරුන් ගේ සහභාගිත්වයේ අඩුවක් කැපීපෙනී තිබේ.

මුරුත්තෙට්ටුවේ ආනන්ද හිමි ඒ සම්බන්ධයෙන් මෙසේ සඳහන් කර ඇත .

"මම මේ පිංකම කරන්නේ රට බේරාගත් නායකයා වෙනුවෙන් යුතුකමක් වශයෙන්. නමුත් ඔබතුමාට පේනවා ඇති අද මෙතන තත්ත්වය එදා මෙතන අපිට ඉන්නවත් ඉඩ නෑ. ඒ තරම් ඇමති මැතිවරු. අද බලන්න තත්ත්වය කොච්චර වෙනස් වෙලාද කියලා. බලය තියෙනදාට ඕන තරම් අය ඉන්නවා. බලය නැතිදාට කිසිකෙනෙක් නැහැ. ඔබතුමාට මේවා හොඳ පාඩම්"

සෞඛ්‍ය සේවා හිටපු අධ්‍යක්ෂ ජනරාල් විශේෂඥ වෛද්‍ය පාලිත මහීපාල සෞඛ්‍ය අමාත්‍යාංශයේ ලේකම් ලෙස පත්කිරීමට නියමිත බව වාර්තා වෙයි.

වැඩිදුරටත් වාර්තා වන ආකාරයට සෞඛ්‍ය අමාත්‍යාංශයේ ලේකම්වරයා ලෙස දැනට කටයුතු කරන්නේ ජනක ශ්‍රී චන්ද්‍රගුප්ත වන අතර ඔහුගේ සේවා කාලය අද (18) අවසන් වෙයි. ඒ අනුව විශේෂඥ වෛද්‍ය පාලිත මහීපාල සෞඛ්‍ය අමාත්‍යාංශයේ ලේකම් ලෙස අනිද්දා (20) පත්කිරීමට නියමිතය.

කෙසේ වුවත් අද විශ්‍රාම යන සෞඛ්‍ය අමාත්‍යාංශයේ ලේකම්වරයා තවත් වසරක සේවා දිගුවක් ඉල්ලා ඇති නමුත් ඒ සඳහා අනුමැතිය නොලැබී ඇති බවත් දැනගන්නට ඇත. ඒ ව්‍යාජ ලේඛන භාවිතා කරමින් ප්‍රමිතියෙන් තොර මානව ප්‍රතිදේහ හෙවත් හියුමන් ඉමියුනෝග්ලොබින් එන්නත් රජයේ රෝහල්වලට බෙදා හැරීමේ කුප්‍රකට සිද්ධියට ඔහුගේ නම ද ගෑවි වී ඇති නිසාය.

මේ අතර හිටපු සෞඛ්‍ය අමාත්‍ය කෙහෙළිය රඹුක්වැල්ල විසින් අමාත්‍යංශයේ සිටින ජ්‍යෙෂ්ඨ නිලධාරියකු ගේ නමක් සෞඛ්‍ය අමාත්‍යාංශයේ ලේකම් ධූරය සඳහා නම් කර ජනාධිපතිවරයා වෙත නිර්දේශ කර තිබුනද ආන්දෝලනාත්මක ඉමියුනෝග්ලොබියුලින් එන්නත් ගණුදෙනුව සම්බන්ධ විමර්ශන වලදී මේවනවිට ඔහුවද ප්‍රධාන සැකකරුවකු ලෙස හඳුනාගෙන ඇති බැවින් ඒ සඳහා ද අවසර දී නොමැති බවත් වාර්තා වෙයි.

එසේම මේ වන විට පරිසර අමාත්‍යංශයේ ලේකම් ලෙස කටයුතු කරන විශේෂඥ වෛද්‍ය අනිල් ජාසිංහ ගේ නමද අද පුරප්පාඩු වන සෞඛ්‍ය අමාත්‍යාංශයේ ලේකම් ධූරය සඳහා යෝජනා වී ඇතත් පරිසර අමාත්‍යංශයේ වැදගත් ව්‍යාපෘති කිහිපයක් ඔහුගේ අධීක්ෂණය යටතේ ඇරඹි ඇති බැවින් ඔහුව නිදහස් කිරීමට විෂය භාර අමාත්‍යවරයා ප්‍රතිකේෂ්ප කර ඇති බවත් වාර්තා වෙයි .

ඒ අනුව විශේෂඥ වෛද්‍ය පාලිත මහීපාල සෞඛ්‍ය අමාත්‍යාංශයේ ලේකම් ධූරයට පත්කිරීමට නියමිත බවත් ඔහු මීට පෙර ජාත්‍යන්තර සෞඛ්‍ය සංවිධාන රැසකද නිලතල හොබවා ඇති නිලධාරියෙකු බවත් වාර්තා වෙයි .