පුවත්

අනුරාධපුර අවුකන බුද්ධ ප්‍රතිමා වහන්සේට වස්ත්‍ර පැළැඳවීම පුරාවිද්‍යා ආඥාපනත අනුව බරපතළ සිද්ධියක් බව පුරාවිද්‍යා දෙපාර්තමේන්තුව සඳහන් කරයි.

ඒ අනුව අද (28)අනුරාධපුර පුරාවිද්‍යා කාර්යාලයට අයත් උපකලාප භාර නිලධාරීවරයෙකු සිද්ධිය සම්බන්ධයෙන් ගල්නෑව පොලීසියට පැමිණිලි කර තිබේ.

එසේම මෙම සිද්ධිය සම්බන්ධයෙන් ඊයේ (27) පුරාවිද්‍යා සහකාර අධ්‍යක්ෂවරයා සහ කලාප භාර පුරාවිද්‍යා නිලධාරීවරයා එහි ගොස් අවුකන පිළිම වහන්සේ හා එම ස්ථානය පරීක්ෂා කර තිබිණ .

පුරාවිද්‍යා දෙපාර්තමේන්තුවේ වැඩබලන අධ්‍යක්ෂ ජනරාල් නිශාන්ති ජයසිංහ පවසන්නේ, ප්‍රශ්නගත සිදුවීමේදී විහාරාධිපති හිමියන් තනි මතයට කටයුතු කර ඇති බවය.

ක්‍රිස්තු වර්ෂ 5 වැනි සියවසේ ධාතුසේන රජු නිර්මාණය කරවූ බවට ඉතිහාසයේ සඳහන් වන අනුරාධපුරය අවුකන බුද්ධ ප්‍රතිමා වහන්සේට වස්ත්‍ර පැළැඳවීමේ ඡායාරූප පසුගිය දිනවල සමාජ මාධ්‍යවල සංසරණය වූයේ සමාජය තුළ දැඩි කතාබහක් නිර්මාණය කරමිනි.

මෙරට ''හිටි බුද්ධ ප්‍රතිමා වහන්සේ ''අතුරින් සුවිශේෂී ස්ථානයක් හිමිවන මෙම අවුකන බුද්ධ ප්‍රතිමාව මත නැගී ඇතැම් පුද්ගලයින් එම වස්ත්‍රය පළඳවන ආකාරයද සමාජ මාධ්‍ය වල පලවූ ඡායාරූපවල දැක්විණි .

රටක් ලෙස වැටුණු තැනින් අප ඉදිරියට පැමිණ තිබුණද, තවම ගමන අවසන් නැති බව අවධාරණය කළ ජනාධිපති රනිල් වික්‍රමසිංහ අපේක්ෂිත අරමුණ ඉටුකර ගැනීමට නම් සියලුදෙනා එක්ව ඉතා ඉවසීමෙන් යුතුව ඉදිරියට යා යුතු බව පැවසීය.

දේශපාලන ප්‍රතිපත්ති මාලා වෙනුවට ආණ්ඩුක්‍රම ව්‍යවස්ථාවේ 06 වන පරිච්ඡේදයේ “රාජ්‍ය ප්‍රතිපත්ති මෙහෙයවීමේ මූලධර්මය හා මූලික යුතුකම්” අනුව ක්‍රියා කිරීමට වත්මන් රජය සෑමවිටම කටයුතු කරන බව ද ජනාධිපතිවරයා සඳහන් කළේය.

ජනාධිපති රනිල් වික්‍රමසිංහ මේ බව සඳහන් කර සිටියේ අද (28) පෙරවරුවේ කොළඹ සුගතදාස ගෘහස්ථ ක්‍රීඩාංගනයේ දී පැවති 2023 සණස ජාතික සම්මේලනය අමතමිනි.

සණස නිර්මාතෘ ආචාර්ය පී . ඒ. කිරිවන්දෙණිය මහතාගේ සංකල්පයක් මත " වැය අඩු කරමු - අය වැඩි කරමු " යන තේමාව යටතේ ක්‍රියාත්මක සණස සමිති 1250ක් සංවර්ධනය කිරීම තුළින් ගම්මාන 5,000ක් සංවර්ධනය කිරීමේ ජාතික වැඩසටහනට අදාල තුන් අවුරුදු ඉදිරි සැලසුම එළි දැක්වීම ද මෙහි දී සිදු කෙරිණි.

ආචාර්ය පී . ඒ. කිරිවන්දෙණිය විසින් එම තුන් අවුරුදු සැලැස්ම ජනාධිපති රනිල් වික්‍රමසිංහ වෙත පිළිගන්වනු ලැබීය.

ජනාධිපතිවරයා වෙනුවෙන් විශේෂ සමරු තිළණයක් ද මෙහිදී පිළිගැන්විණි.

එසේම දිස්ත්‍රික්ක 25 ක් ආවරණය කරමින් සණස නායකයින් 5,000ක් වෙත සැලසුම් ලබාදීම මෙහිදී සිදු කෙරුණු අතර මෙම සැලසුම තුළින් ගම්මාන 5,000ක සංවර්ධන ව්‍යාපෘති 10,000ක් ආරම්භ කිරීමටත් ඒ හරහා දිවයින පුරා සෘජු හෝ වක්‍ර රැකියා අවස්ථා 50,000ක් නිර්මාණය කිරීමත් සැලසුම් කර තිබේ.

මෙම වැඩසටහන යටතේ පවුල් 300,000 වැඩි පිරිසකගේ ආර්ථිකය ශක්තිමත් කිරීමට අපේක්ෂා කෙරේ.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මහතා සඳහන් කළේ මෙරට ආර්ථිකය ගොඩනැගීම සඳහා රජය ගෙන යන වැඩපිළිවෙළේදී සණස වැනි ව්‍යාපාරවල දායකත්වය මනා රුකුලක් වනු ඇති බවයි.

ජන ජීවිතය නගා සිටුවිමන් සමෘද්ධිමත් රටක් ගොඩනැගීමට රජය ගෙන යන වැඩපිළිවෙළට එක්වන ලෙසද ජනාධිපතිවරයා මෙහිදී සියලු රාජ්‍ය සහ පෞද්ගලික අංශවලින් ඉල්ලා සිටියේය.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ 

සණස ව්‍යාපාරය ආරම්භ කිරීම පිළිබඳ අප කිරිවන්දෙණිය මහත්මයාට ස්තූතිවන්ත විය යුතුයි. එතුමා එය ආරම්භ කර ඉදිරියට ගෙන ගියා. අද එය ඉතා සාර්ථක ව්‍යාපාරයක් බවට පත්ව තිබෙනවා. ඒ වගේම මෙම ව්‍යාපාරය තවත් දියුණු කළ යුතුයි.

විශේෂයෙන්ම මෙරට ආර්ථිකය ගොඩනැගීමේ වැඩපිළිවෙළේදී සණස වැනි ව්‍යාපාර එක් කර ගනිමින් අප ඉදිරියට යා යුතුයි.

මෙම දෙසැම්බර් මාසය අවසන් වීමට පෙර ජාත්‍යන්තර මූල්‍ය අරමුදල විසින් අපේ රට නැවත ණය පාලනය කළ හැකි ස්ථාවරත්වයට පැමිණ තිබෙන බව ප්‍රකාශ කරන තුරු අප බලා සිටිනවා. අප එම සහතිකය ලැබු පමණින් සියලු ගැටළු විසඳෙන්නේ නැහැ. අපි බලාපොරොත්තු වෙන්නේ අපේ ණය ගෙවීමට සහන පොළියක් ඉල්ලා සිටීමටයි. ඉන් පසුව එම ණය ගෙවිය යුතුයි. විශේෂයෙන් අපට අලුතින් ණය ගැනීමටත් සිදු වෙනවා.

මෙම කටුයුතු කරගෙන යාමට අප රට තුළ ශක්තිමත් ආර්ථිකයක් ඇති කළ යුතුයි. එහිදී අපනයන ආර්ථිකය පිළිබඳ විශේෂ අවධානයක් යොමු කළයුතුයි. මෙම වැඩකටයුතු සඳහා සණස ව්‍යාපාරය සම්බන්ධවීම විශාල රැකුලක් ලෙස සලකනවා.

අපි ආණ්ඩුව භාර ගැනීමෙන් පසු දේශපාලන ප්‍රතිපත්ති මාලා වෙනුවට සෑම විටම ක්‍රියා කළේ ආණ්ඩුක්‍රම ව්‍යවස්ථාවේ 06 වන පරිච්ඡේදයේ රාජ්‍ය ප්‍රතිපත්ති මෙහෙයවීමේ මූලධර්මය, මූලික කරගෙනයි.

රාජ්‍ය අංශයේ සහ පුද්ගලික අංශයේ ආර්ථික ක්‍රියාවලිය තුළින් සීග්‍ර ලෙස මුළු රටම සංවර්ධනය කිරීම සණස ව්‍යාපාරයේ වගේම රජයේ ද අරමුණ වෙනවා. මොකද අපට මෙම ණය උගුලෙන් බේරීමට නම් අප සීග්‍ර සංවර්ධනයකට යා යුතුයි.

ඒ වගේම අපි බලාපොරොත්තු වෙන්නේ සෑම කෙනෙකුටම ප්‍රමාණවත් ජීවන මට්ටමක් ලබාදීමටයි. විශේෂයෙන්ම මේ රටේ සිදුවූ ආර්ථික කඩා වැටීමෙන් පසු බොහෝ දෙනෙක්ගේ ජීවන මාර්ග අහිමි වුණා. ඇතැම් ව්‍යාපාර වසා දැමීමට සිදු වුණා. එදා සියළු දෙනා අසීරුවෙන් ජීවත් වුණේ.

දැන් අප යළිත් ආර්ථික දියුණුව ලබමින් සිටිනවා. කෘෂිකාර්මික කටුයුත ආරම්භ කර තිබෙනවා. සංචාරක කර්මාන්තය දියුණු වෙමින් පවතිනවා. සංචාරක ව්‍යාපාරය තුළින් වැඩි රැකියා අවස්ථාවන් ලබා ගත හැකියි. එම නිසා අප සියළුදෙනා එකතු වෙලා මෙම ක්ෂේත්‍ර දියුණු කළ යුතුයි.

ඒ වගේම රටේ සෑම පුරවැසියෙකුටම සහ ඔවුන්ගේ පවුල්වල සාමාජිකයන්ට ප්‍රමාණවත් ජීවන මට්ටමක් ලබාදීමට අප කටයුතු කළ යුතුව තිබෙනවා. අපි සියළු දෙනා එකට එක්ව ඉතා ඉවසීමෙන් එම ගමන යා යුතුයි. අපි වැටුණ තැනින් ඉදිරියට පැමිණ තිබෙනවා. තවම ගමන අවසන් කර නැහැ. ලබන ජනවාරි මාසයේ සිට ඉදිරි වසර කිහිපය පිළිබඳ අවධානය යොමු කරමින් අප ක්‍රියාත්මක විය යුතුයි.

අපේ රට එදා මධ්‍යම පන්තියේ ආදායම් ලබන රටක් ලෙස පැවතුණා. නමුත් අප නැවත අඩු ආදායම්ලාභී රටක් බවට පත්ව තිබෙනවා. දැන් අපේ උත්සාහය නැවත පහළ මධ්‍යම පන්තියේ ආදායම් තිබෙන රටක් බවට පත්වීම. ඊළඟ අදියරේදී ඉහළ මධ්‍යම පන්තියේ ආදායම් තිබෙන රටක් බවට පත්විය යුතුයි. ඉන් අනතුරුව ඉහළ ආදායම් ඇති රටක් බවට පත්වීමට හැකියාව තිබෙනවා. ඒ සඳහා තමයි 2048 වන තෙක් සැලසුම් සකස් කර තිබෙන්නේ.

ඒ වගේම අපේ රටේ අධ්‍යාපන අවස්ථා සීමා සහිතයි. ඒ නිසා බොහෝ දෙනෙක් උසස් අධ්‍යාපන සඳහා විදේශගත වෙනවා. වෘත්තීය අධ්‍යාපනය සදහා විශාල ඉල්ලුමක් තිබුණට ඒ සියල්ල ලබාදීමට අපට අවස්ථාවක් නැහැ. ඒ නිසා අධ්‍යාපන ක්ෂේත්‍රය ප්‍රතිසංවිධානය කිරීමට අප සැලසුම් කර තිබෙනවා.

ඒ වගේම 2030 වන විට ඉංග්‍රීසි භාෂාව පාසල් අධ්‍යාපනයට සහ උසස් අධ්‍යාපනයට එක් කිරීමට වැඩසටහනක් ක්‍රියාත්මක කර තිබෙනවා. ඒවගේම වෘත්තීය අධ්‍යාපනය ප්‍රතිසංස්කරණය කිරීම මෙම වසරේදී ආරම්භ කරනවා.

එසේම කෘෂිකර්ම නවීකරණ වැඩසටහන අපි ආරම්භ කරනවා. ඊට දායකවීමට සණස වැනි ආයතනවලට පුළුල් ඉඩ ප්‍රස්ථාවක් පවතිනවා. එම නිසා මෙම කටයුතු සමග එක්ව වැඩකරමු කියලා මම සියළු දෙනාට ආරාධනා කරනවා.

හිටපු ජනාධිපති මෛත්‍රීපාල සිරිසේන, හිටපු කතානායක චමල් රාජපක්ෂ, නියෝජ්‍ය කතානායක අජිත් රාජපක්ෂ, සබරගමු පළාත් ආණ්ඩුකාර නවීන් දිසානායක යන මහත්වරුන් ඇතුළු ආරාධිත පිරිසක් සහ දිවයිනේ සියලු පළාත් නියෝජනය කරමින් පැමිණි සණස සමිති නායකයන් සහ සාමාජිකයන් මීට එක්ව සිටියහ.

සංවර්ධන නිලධාරීන් ගුරු සේවයට බඳවා ගැනීම සඳහා පවත්වනු ලබන විභාගය සම්බන්ධයෙන් ශ්‍රේෂ්ඨාධිකරණයේ පවතින නඩු කටයුත්ත අවසන් වූ පසු ලැබෙන නියෝගය මත අදාළ නිලධාරීන් ගුරු සේවයට බඳවා ගන්නා බව අධ්‍යාපන අමාත්‍යංශය පවසයි.

නිවේදනයක් නිකුත් කරමින් අධ්‍යාපන අමාත්‍යංශය මේ බව සඳහන් කර ඇත.

එහි දක්වා ඇත්තේ, සංවර්ධන නිලධාරීන් ගුරු සේවයට අන්තර්ග්‍රහණය කළ හැක්කේ ගුරු සේවා ව්‍යවස්ථාවට අනුකූලව බව ය.

ඒ අනුව, සංවර්ධන නිලධාරීන්ගේ වෘත්තීය සමිතිවල එකඟතාව ද ඇතිව විභාග පවත්වන දිනට වයස අවුරුදු 40 දක්වා දීර්ඝ කර, රාජ්‍ය සේවා කොමිෂන් සභාවේ ද අනුමැතිය ඇතිව, බඳවා ගැනීමට අයැදුම් පත් කැඳවා එම විභාගය මෙම වසරේ මාර්තු මස 25 වන දා පැවැත්වීමට කටයුතු යොදා තිබුණු බව එහි සඳහන් ය.

කෙසේ වෙතත්, අදාළ නිවේදනයේ දැක්වෙන්නේ මාර්තු 23 වන දා එම නිලධාරීන්ගෙන් පිරිසක් ශ්‍රේෂ්ඨාධිකරණයේ නඩු ගොනු කර විභාගය පැවැත්වීම අත්හිටුවීමේ නියෝගයක් ගෙන තිබුණු බව ය.

ඒ හේතුවෙන් එම නඩුව තවමත් විභාග වෙමින් පවතින බව අධ්‍යාපන අමාත්‍යංශය සිය නිවේදනයේ දක්වා තිබේ.

මෙම බඳවා ගැනීමට බාධාවක් නොවන ලෙස අදාළ නඩුව කඩිනමින් අවසන් කර ගැනීම අධ්‍යාපන අමාත්‍යංශයේ අවශ්‍යතාව බව ද එහි දැක්වේ.

ඉන් අනතුරුව ගුරුවරුන් විශ්‍රාම යාම හා සේවය හැර යාම මත ඇති වූ පුරප්පාඩු සඳහා ගුරු සේවා ව්‍යවස්ථාව අනුව උපාධිධාරීන් බඳවා ගැනීමට පළාත් බලධාරීන් කටයුතු කරනු ඇති බව ත් විද්‍යා, ගණිත, විදේශ භාෂා උපාධිධාරීන් බඳවා ගැනීමට ගුරු සේවා ව්‍යවස්ථාව අනුව කටයුතු කරනු ඇති බව ත් අදාළ නිවේදනයේ දැක්වේ.

කෙසේ වෙතත්, එම බඳවා ගැනීම් මගින් පුහුණුවන සංවර්ධන නිලධාරීන් බඳවා ගැනීමට බලපෑමක් නොවන බව අධ්‍යාපන අමාත්‍යංශය සිය නිවේදනය මගින් අවධාරණය කර ඇත.

එම අමාත්‍යංශය සඳහන් කරන්නේ, සංවර්ධන නිලධාරීන් දැනටමත් රාජ්‍ය සේවකයින් වන බව ය.

2019 වර්ෂයේදී සංවර්ධන නිලධාරීන් 20,000කට පමණ, විශේෂයෙන් පළාත් පාසල්වල පුහුණු වීමට අවස්ථාව ලබා දී ඇති බව ද එම අමාත්‍යංශය නිකුත් කළ නිවේදනයේ වැඩිදුරටත් දැක්වේ.

ශ්‍රී ලංකාවේ විදේශ විනියමය සංචිත ශක්තිමත් කිරීමට නම් සංචාරකයන් මිලියන 5ක් ‍ මෙරටට ගෙන්වා ගැනීමේ ඉලක්කය සපුරා ගත යුතු බවත්, එහිදී සාම්ප්‍රදායික ක්‍රමවේදයන්ගෙන් බැහැරව නව චින්තනයක් ඔස්සේ සංචාරක ව්‍යාපාරය කටයුතු කළ යුතු බවත් ජනාධිපති රනිල් වික්‍රමසිංහ පැවසීය.

එසේම ඉදිරි වසර කිහිපය තුළ ශ්‍රී ලංකාවට පැමිණෙන සංචාරකයින් ප්‍රමාණය මිලියන 7.5 දක්වා වැඩි කිරීමට සංචාරක ක්ෂේත්‍රයේ සැලසුම් සකස් කළ යුතු බව ද ජනාධිපතිවරයා පෙන්වා දුන්නේය.

ජනාධිපති රනිල් වික්‍රමසිංහ  මෙම අදහස් පළ කළේ, කොළඹ ෂැංග්‍රිලා හෝටලයේ ඊයේ (27) පැවැති ශ්‍රී ලංකා හෝටල් සංගමයේ 58 වන වාර්ෂික මහා සභා රැස්වීම අමතමිනි.

ශ්‍රී ලංකාවේ හෝටල් ක්ෂේත්‍රය වෙනුවෙන් සිදු කළ සේවය වෙනුවෙන් ශ්‍රීලාල් මිත්තපාල සහ හිරාන් කුරේ යන මහත්වරුන් වෙත යාවජීව සම්මාන දෙකක් පිරිනැමීම ජනාධිපතිවරයාගේ අතින් සිදුවිය.

එහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේ ද පැවසීය.

“මා ආණ්ඩුව භාර ගන්නා විට ණය තිරසර බව ඇති කර ගැනීම පමණක් ප්‍රමාණවත් නොවන බව වැටහුණා. එහිදී අප විදේශ විනිමය උපයාගන්නේ කෙසේද සහ අප ධනාත්මක වෙළඳ ශේෂයක් ඇති කර ගන්නේ කෙසේද යන්න පිළිබඳ අවධානය යොමු කළා. එහිදී බොහෝ යෝජනා ඉදිරිපත් වුණා. නමුත් මේ සඳහා අපට පහසුවෙන්ම ළඟා විය හැකි මාර්ගය වන්නේ සංචාරක ව්‍යාපාරයයි. ඒ අනුව අප සංචාරක ව්‍යාපාරය සම්පූර්ණයෙන් ප්‍රවර්ධනය කරනවා. ඒ සඳහා දැන් තිබෙන රාමුවෙන් පිටතට යාමට අපට සිදුවෙනවා. එහිදී අප තරගකාරී විය යුතුයි.

ශ්‍රී ලංකා හෝටල් සංගමය අද එහි 58 වන සංවත්සරය සමරනවා. වියට්නාමය වැනි රටවල හෝටල් සංගම් සැලකීමේදී ආරම්භ කළ කාලය වසර 20ක් 30ක් විය හැකියි. නමුත් මෙහිදී පැන නගින ප්‍රශ්නය වන්නේ ඔවුන්ට අපට වඩා සංචාරකයින් සිටින්නේ කෙසේද යන්නයි. ඒ අනුව දැන් සලකා බැලිය යුතුව තිබෙන්නේ මේ අවස්ථාවේ සංචාරක ව්‍යාපාරය දියුණු කළ යුත්තේ කෙසේද යන්න පිළිබඳවයි. පළමුව අප මෙරටට පැමිණෙන සංචාරකයින් ප්‍රමාණය වර්ධනය කර ගත යුතුයි.

මෙම වසරේ සංචාරකයන් මිලියන 1.5ක් පමණ පැමිණියා. 2021 වසරට සාපේක්ෂව බලන විට මෙම තත්ත්වය යහපත් බව පැවසිය හැකියි. නමුත් ලබන වසරේ එය මිලියන 2.5ක් විය යුතුයි. ඒ වගේම වාර්ෂිකව මෙරටට පැමිණෙන සංචාරකයින් ප්‍රමාණය තවත් වර්ධනය කර ගැනීමට කටයුතු කළ යුතුයි. දෙවනුව, අප එක් සංචාරකයෙකුගෙන් කොපමණ මුදලක් උපයනවාද යන්න වගේම එම ප්‍රමාණය වැඩි කරගන්නේ කෙසේද කියා අපගේ අවධානය යොමු කළ යුතුයි. තවදුරටත් එහිදී අප අවම ගාස්තු අයකරන යුගයෙන් ඉවත්ව ඉහළට යා යුතුයි. ඒ සඳහා අප විධිමත් සැලස්මක් සකස් කළ යුතුයි.

මෙහිදී සංචාරක ව්‍යාපාරය තුළ අප ඉහළම ගුණාත්මකභාවයකින් යුතු බව සහතික කළ යුතු වෙනවා. ඒ වගේම අපගේ සංචාරක ව්‍යාපාරය විශේෂීකරණය විය යුතුයි. එසේ නොමැතිව අපට සංචාරක ව්‍යාපාරයේ වර්ධනයක් අත්කර ගැනීමට නොහැකියි. අපට බෙහෝ හැකියාවන් තියෙනවා. නමුත් අප එම හැකියාවන් වර්ධනය කරගෙන නැහැ.

අපේ ආහාර සංස්කෘතිය දෙස බැලුවහොත් එය එක් ප්‍රදේශයකින් තවත් ප්‍රදේශයකට වෙනස් වෙනවා. ඔබ එය භාවිත කර තිබෙනවාද? එසේනම් අප ආහාර සංස්කෘතියේ ඇති ඒ වෙනස සංචාරක ව්‍යාපාරය වෙත ගෙන එමු. අප විවිධාකාරවලින් සුවිශේෂී විය යුතුයි.

සංචාරක ව්‍යාපාරය අපට අලුත් දෙයක් නෙවෙයි. එය අනුරාධපුර යුගය තෙක් ඈතට දිවයන්නක් බව කිව යුතුයි. එක් මෝසම් කාලයක නෞකා මගින් මෙරටට පැමිණි සංචාරකයාට ඊළඟ මෝසම් සමය එළැඹෙන තුරු මෙරට රැඳී සිටිය යුතු වූවා. ඒ කාලයේ අනුරාධපුරයේ “රතු එළි කලාප” පවා තිබූ බව සඳහන් වෙනවා. මම එය අනුමත නොකළත්, අතීතයේ දී ඔවුන් ඔවුන්ගේම ක්‍රමයකට සංචාරක ව්‍යාපාරය ගැන කල්පනා කර තිබෙන බව අප හඳුනාගත යුතුයි.

සංචාරක ව්‍යාපාරයේ හොඳ යතුර ලෙස ආගන්තුක සත්කාරය පෙන්වාදිය හැකියි. සංචාරකයාට ලැබෙන නවාතැන්, ඔහුට ලැබෙන වෙනත් පහසුකම් මෙන්ම ලැබෙන ආහාර ගැන ද අප සඳහන් කළ යුතුයි. ඒවගේම අපේ ආහාර පිසීමේ හැකියාව පුළුල් කරගත යුතුයි. ශ්‍රී ලංකාවේ ආහාර පමණක් නොව විදේශීය ආහාර වර්ග ද එහිදී හඳුන්වාදිය හැකියි. මූලිකවම, ස්පාඤ්ඤයේ පැයෙල්ලා සිට ජපානයේ සහල් දක්වා වන මුළු සහල් පරාසයම අපගේ ආහාර වට්ටෝරුවලට හඳුන්වාදිය හැකියි. ඒ වගේම අපට අපේම සංයෝජනයක් වූව ද සිදු කළ හැකියි.

2003-2004 වකවානුවේ අප ආරම්භ කළ බුටික් හෝටල් වෙත අවධානය යොමු කළහොත් ඒවා මේ වන විට හොඳින් ක්‍රියාත්මක වෙනවා. ඒ වගේම අපට ප්‍රවේශ විය හැකි විවිධ වෙළෙඳපොළ අවස්ථා තිබෙනවා. අප ගොල්ෆ් සංචාරක ව්‍යාපාරය ප්‍රවර්ධනය කරනවා. ඒ වගේම අප මෙරට තිබෙන සංචාරක අවස්ථා පිළිබඳව වැඩි අවධානයක් යොමු කළ යුතුයි.

එසේම කොළඹට පැමිණෙන සංචාරකයන් රඳවාගැනීම කෙරෙහිද අවධානය යොමු කළ යුතුයි. මේ වන විට කොළඹට පැමිණෙන සංචාරකයින්ට සිදුවන්නේ ගංගාරාම විහාරය, කෞතුකාගාරය සහ නිදහස් චතුරස්‍රය වැනි සීමිත ස්ථාන කිහිපයක් නරඹා යාමටයි. අප ඔවුන්ව කොළඹ රඳවාගැනීමට නම් නව සැලසුම් සකස් කළ යුතුයි. එම සැලසුම් විනෝදාස්වාදය, සංගීතය හා ආහාර සමග සකස් විය යුතුයි.

තවද ඉදිරියේදී කොළඹ ජනාධිපති මන්දිරය අවට ප්‍රදේශයේ සිට නිදහස් චතුරශ්‍රය දක්වා වන ප්‍රදේශය නව ආකාරයට පරිවර්තනය වනු ඇතියි. දැනටමත් සංචාරක කර්මාන්තයේ ප්‍රවර්ධනය වෙනුවෙන් මහනුවර බෝගම්බර බන්ධනාගාර පරිශ්‍රය සඳහා අපට යෝජනාවක් ලැබී තියෙනවා. ඒ වගේම කොළඹ, මහනුවර ඇතුළුව රට පුරා මෙතෙක් අවධානයට ලක් නොවූ නමුත් සංචාරක ආකර්ෂණය ලබාගත හැකි බොහෝ ස්ථාන තිබෙනවා. මෙම ස්ථාන දියුණු කරන්නේ කෙසේද කියා අපේ අවධානය යොමු කළ යුතුව තිබෙනවා.

මේ සඳහා අලුත් චින්තනයක් අවශ්‍යයි. පරණ මනසින් අපට ඒ වෙත යාමට නොහැකියි. සෑම විටම අලුතින් සංචාරකයින් මෙරටට ආකර්ෂණය කරවා ගැනීම පිළිබඳ හිතන්න. එවිට අපට මිලියන පහේ ඉලක්කය ජය ගත හැකියි. අවම වශයෙන් ඩොලර් 500ක් හෝ 600ක් වියදම් කරන සංචාරකයන් මිලියන පහක් ඉලක්ක කරන්න. අපට එය කළ හැකියි. ඒ සඳහා අපට සීමාවන් නොතිබිය යුතුයි.

අප රාමුවෙන් පිට සිතිය යුතුයි. ඔබ සැමට එය කළ හැකි බව මට විශ්වාසයි. සංචාරකයින් මිලියන 5ක ඉලක්කය ළඟාකර ගත් පසු, ඉහළ ආදායමක් ලැබෙන සංචාරකයින් මිලියන 7.5 ඉලක්කයට යොමු වෙමු. එවිට ඩොලර් 750ක්, 1000ක් වියදම් කරන සංචාරකයන් කෙරෙහි අවධානය යොමු කළ හැකියි.”

මෙම අවස්ථාවට සංචාරක, ඉඩම්, ක්‍රීඩා හා යෞවන කටයුතු අමාත්‍ය හරීන් ප්‍රනාන්දු, සංචාරක හා ඉඩම් අමාත්‍යාංශ ලේකම් එච්. එම්. පී. බී. හේරත්, ශ්‍රී ලංකා හෝටල් සංගමයේ සභාපති එම්. ශාන්තිකුමාර් මහතා ඇතුළු නිලධාරීන් සහ හෝටල් ක්ෂේත්‍රයේ ප්‍රවීණයින් ඇතුළු පිරිසක් එක්ව සිටිය හ.

ලලිත්, ගාමිණී ,ප්‍රේමදාස රණ්ඩුව සමයේ එම තිදෙනාම ජීවිත වලින් වන්දි ගෙවා අවසන් වන බව ප්‍රථම විධායක ජනාධිපති ජේ.ආර් ජයවර්ධන තමා සමඟ ඒ කාකාලයේ පැවසූ බව එක්සත් ජාතික පක්ෂ පාර්ලිමේන්තු මන්ත්‍රී වජිර අබේවර්ධන පැවසීය.

මන්ත්‍රීවරයා මේ බව සඳහන් කර සිටියේ අද (28) පාර්ලිමේන්තුවේදී අදහස් දක්වමින් ය.

දේශපාලනය කරනවා නම් කුලල් කාගන්නේ නැතිව ඉදිරියට යා යුතුව තිබෙන බවත් ලලිත් ඇතුලත්මුදලි මැරූ විට ඒ කාලේ ප්‍රේමදාස මහතාට ඇඟිල්ල දිගු කළ නමුත් ප්‍රේමදාස මහතා මෙන්ම ගාමිණී දිසානායක මැරුණු විට ඇඟිල්ල දිගු කරන්න කවුරුවත් නොසිටි බවත් මන්ත්‍රීවරයා වැඩිදුරටත් පෙන්වා දුන්නේ ය.

කුලල් කා ගත් සියලු දෙනා නැති වූ බවත් මේ සභාවේ ඉන්න අප කුලල් කා ගත්තොත් වාසිය ලැබෙන්නේ අපට නොව මුහුදෙන් පිට ඉන්න වෙනත් කණ්ඩායම් වලට බවද මන්ත්‍රීවරයා පැවසීය .

වෛද්‍ය ආඥා පනත සංශෝධනය කිරීමට අමාත්‍ය මණ්ඩල අනුමැතිය හිමිව ඇත .

විශේෂඥ වෛද්‍යවරුන් ලියාපදිංචි කිරීමට අදාළව පවතින විධිවිධාන සංශෝධනය කිරීම සඳහා 1927 අංක 26 දරණ වෛද්‍ය ආඥා පනත සංශෝධනය කිරීම සඳහා හිටපු සෞඛ්‍ය අමාත්‍යවරයා ඉදිරිපත් කරන ලද යෝජනාව 2023 -8-7 දින පැවති අමාත්‍ය මණ්ඩල රැස්වීමේදී සාකච්ඡාවට ගෙන නිර්දේශ නිර්දේශ ඉදිරිපත් කිරීම සඳහා කමිටුවක් පත් කෙරිණි.

එම කමිටුව විසින් ඉදිරිපත් කරනු ලැබ ඇති වාර්තාවේ සඳහන් නිර්දේශ මත පදනම වෛද්‍ය ආඥා පනත සංශෝධනය කිරීම සඳහා පනත් කෙටුම්පතක් සකස් කරන ලෙස නීති කෙටුම්පත් සම්පාදකට උපදෙස් දීම සඳහා අමාත්‍ය මණ්ඩලය තීරණය කර තිබේ.

අඛණ්ඩව පාඩුපිට පාඩු ලබන ශ්‍රී ලංකා රූපවාහිනි සංස්ථාව හා ශ්‍රී ලංකා ගුවන් විදුලි සංස්ථාව පොදු සමාගමක් බවට පත් කරන බව ජනමාධ්‍ය අමාත්‍ය බන්දුල ගුණවර්ධන පවසයි .

අමාත්‍යවරයා මේ බව පවසා ඇත්තේ පසුගියදා පැවති ජනමාධ්‍ය අමාත්‍යංශයේ උපදේශක කාරක සභාවේදී අදහස් දක්වමින් ය.

ශ්‍රී ලංකා රූපවාහිනි සංස්ථාව මේ වසරේ රුපියල් කෝටි 28 ක පමණ පාඩුවක්ද ශ්‍රී ලංකා ගුවන් විදුලි සංස්ථාව මේ වසරේ රුපියල් කෝටි 46 ක පමණ පාඩුවක්ද ලබා තිබෙන බව ද අමාත්‍යවරයා එහිදී පැවසීය .

මහ භාණ්ඩාගාරයට මෙම නාලිකා සඳහා මුදල් ප්‍රතිපාදන තවදුරටත් ලබාදීමට අපහසු බව පෙන්වා දුන් බන්දුල ගුණවර්ධන අමාත්‍යවරයා එම ආයතන සම්බන්ධයෙන් ඉදිරි ක්‍රියාමාර්ග ගැනීමට කමිටුවක් පත්කිරීමට අමාත්‍ය මණ්ඩලය තීරණය කර ඇති බව ද සඳහන් කළේය .

2024 අයවැය යෝජනා සම්බන්ධයෙන් වෘත්තිය සමිති සහ සිවිල් සංවිධාන නියෝජිතයන් දැනුවත් කිරීමේ සාකච්ඡාවක් මුදල් රාජ්‍ය අමාත්‍ය රංජිත් සියඹලාපිටිය සහ ආර්ථික කටයුතු පිළිබඳ ජනාධිපති ජ්‍යෙෂ්ඨ උපදේශක ආචාර්ය ආර්.එච්.එස්. සමරතුංග ගේ ප්‍රධානත්වයෙන් ඊයේ (27) පස්වරුවේ ජනාධිපති කාර්යාලයේ දී පැවැත්විණි.

වෘත්තීය සමිති නායකයන්, ජාතික තරුණ සේවා සභාවේ නියෝජිතයන්, තරුණ සංවිධාන සහ සිවිල් සංවිධාන ක්‍රියාකාරීන් රැසක් ඊට එක්ව සිටියහ.

වර්ෂ 2048 වන විට ශ්‍රී ලංකාව ඉහළ ආදායම් ලබන රටක් බවට පත් කිරීම අරමුණු කර ගනිමින් දිගුකාලීන ප්‍රතිසංස්කරණ රැසක් මෙවර අයවැයට ඇතුළත් කර තිබෙන බව ආර්ථික කටයුතු පිළිබඳ ජනාධිපති ජ්‍යෙෂ්ඨ උපදේශක ආචාර්ය ආර්.එච්.එස්. සමරතුංග මෙහිදී පැවසීය.

රට තුළ ආර්ථික ස්ථාවරත්වය ඇති කිරීම සහ ලෝක ආර්ථිකය සමඟ තරග කළ හැකි අන්දමින් මෙරට ආර්ථිකය ප්‍රතිස්ථාපනය කිරීම ප්‍රමුඛ අරමුණක් බවත් එය සාක්ෂාත් කර ගැනීම සඳහා ජාත්‍යන්තර මූල්‍ය අරමුදල සමඟ සකච්ඡා කර වසර හතරක වැඩසටහනක් ක්‍රියාවට නංවා ඇති බවත් ඔහු සඳහන් කළේය .

රාජ්‍ය සේවකයන්ට රුපියල් දස දහසක දීමනාවක් ලබාදීම, ගොවි ජනතාවට සින්නක්කර ඉඩම් අයිතිය ලබා දීම,රාජ්‍ය යටිතල පහසුකම් සංවර්ධනය, දේශීය ව්‍යවසායකයන් නගා සිටුවීම යන යෝජනා හරහා මෙරට ආර්ථිකය ප්‍රකෘතිමත් වන ආකාරය පිළිබඳව ද මෙහිදී දීර්ඝ වශයෙන් පැහැදිළි කෙරිණි.

මුදල් රාජ්‍ය අමාත්‍ය රංජිත් සියඹලාපිටිය ද 2024 අය වැය යෝජනා සහ ඉන් රටට ලැබෙන කෙටිකාලීන සහ දිගුකාලීන ප්‍රතිලාභ පිළිබඳ කරුණු පැහැදිළි කළේය.

ජනාධිපති වෘත්තීය සමිති අධ්‍යක්ෂ ජනරාල් සමන් රත්නප්‍රිය, රාජ්‍ය මූල්‍ය ප්‍රතිපත්ති දෙපාර්තමේන්තුවේ අධ්‍යක්ෂ ජනරාල් කපිල සේනානායක ඇතුළු නිලධාරීන් පිරිසක් මීට එක්ව සිටියහ.

ක්‍රීඩා හා යෞවන කටයුතු සහ වාරිමාර්ග අමාත්‍යවරයා ලෙස කටයුතු කළ රොෂාන් රණසිංහ ගේ ඉවත් කිරීමත් සමඟ පුරප්පාඩු වූ විෂය පථ සඳහා අමාත්‍යවරුන් පත්කර ඇත.

ඒ අනුව වාරිමාර්ග අමාත්‍ය ලෙස පවිත්‍රා වන්නිආරච්චි ද , ක්‍රීඩා හා යෞවන කටයුතු අමාත්‍ය ලෙස හරීන් ප්‍රනාන්දු ද අද (27) මීට සුළු මොහොතකට පෙර ජනාධිපති රනිල් වික්‍රමසිංහ ඉදිරියේ දිවුරුම් දෙනු ලැබූහ.

ක්‍රීඩා හා යෞවන කටයුතු සහ වාරිමාර්ග අමාත්‍යවරයා ලෙස කටයුතු කළ රොෂාන් රණසිංහ දිගින් දිගටම කැබිනට් සාමූහිකත්වය බිඳදමමින් රජය අපහසුතාවට පත්වෙන ආකාරයට හැසිරීම හේතුවෙන් අද සිට වහාම ක්‍රියාත්මක වන පරිදි එම ධූරයෙන් ඉවත් කිරීමට ජනාධිපති රනිල් වික්‍රමසිංහ විසින් කටයුතු කළේය .

මෙරටට පැමිණ සිටින සෞදි අරාබි රාජ්‍යයේ ආර්ථික සහ සැලසුම් අමාත්‍ය ෆයිසාල් එෆ්. අලිබ්‍රහීම් (Faisal F.Alibrahim) අද (27) පස්වරුවේ ජනාධිපති කාර්යාලයේ දී ජනාධිපති රනිල් වික්‍රමසිංහ හමුවී සාකච්ඡා පැවැත්වීය.

ශ්‍රී ලංකාව සහ සෞදි අරාබිය අතර පවතින ආර්ථික සබඳතා තවදුරටත් ශක්තිමත් කර ගැනීම පිළිබඳ මෙහිදී දීර්ඝ ලෙස සාකච්ඡා කෙරුණු අතර විශේෂයෙන් ඇඟළුම් සහ සංචාරක ක්ෂේත්‍රයට අදාළව දෙරට අතර පවතින සබදතා වැඩිදියුණු කර ගැනීමට අපේක්ෂා කරන බව සෞදි අරාබි රාජ්‍යයේ ආර්ථික සහ සැලසුම් අමාත්‍යවරයා පැවසීය.

එසේම කලාපය තුළ ආර්ථික සබඳතා ශක්තිමත් කර ගැනීමට සෞදි අරාබි රජයේ අවධානය යොමුව ඇති බව ද පැවසූ ෆයිසාල් එෆ්. අලිබ්‍රහීම් මහතා එහිදී ශ්‍රී ලංකාවට සුවිශේෂී ස්ථානයක් හිමි වන බව නිරීක්ෂණය වී ඇති බව සඳහන් කළේය.

බටහිර ආසියාව ඇතුළු ආසියානු කලාපය තුළ සහයෝගීතාව ශක්තිමත් කර ගැනීමට ශ්‍රී ලංකාව කැපවී සිටින බව මෙහිදී සඳහන් කළ ජනාධිපති රනිල් වික්‍රමසිංහ කලාපීය කටයුතු පිළිබඳවද අමාත්‍යවරයා සමඟ සාකච්ඡා කළේය.

තවද සංචාරක සහ කෘෂිකාර්මික ක්ෂේත්‍ර නවීකරණය කිරීමට ශ්‍රී ලංකාව ගෙන යන වැඩපිළිවෙළ පැහැදිළි කළ ජනාධිපතිවරයා එම ක්ෂේත්‍රවල පවතින ආයෝජන අවස්ථා පිළිබඳවද අමත්‍යවරයා දැනුවත් කළේය.

ජනාධිපති ලේකම් සමන් ඒකනායක, ජාත්‍යන්තර සබඳතා පිළිබඳ ජනාධිපති අධ්‍යක්ෂ දිනුක් කොළඹගේ ද මෙම අවස්ථාවට එක්ව සිටියහ.

ජලයේ ගුණාත්මකභාවය රැකගැනීම සහ පිරිවැය අඩු කිරීම සඳහා රාජ්‍ය-පෞද්ගලික හවුල්කාරිත්වයක් ඇති කිරීමට රජය සැලසුම් කර ඇති නමුත් ජලය විකිණීමට හෝ පෞද්ගලීකරණය කිරීමට කිසිඳු අදහසක් නොමැති බව ජල සම්පාදන සහ වතු යටිතල පහසුකම් සංවර්ධන අමාත්‍ය ජීවන් තොණ්ඩමන් පැවසීය.

ජල සම්පාදන හා ජලාපවාහන මණ්ඩලයේ තිරසරභාවය පවත්වාගෙන යාම සඳහා ජල ගාස්තු සඳහා සූත්‍රයක් අවශ්‍ය බවත් එම සූත්‍රය සැකසීම පිළිබඳ සාකච්ඡා දැනට සිදුවෙමින් පවතින බවත් අමාත්‍යවරයා සඳහන් කළේය.

ජල සම්පාදන සහ වතු යටිතල පහසුකම් සංවර්ධන අමාත්‍ය ජීවන් තොණ්ඩමන් මේ බව සඳහන් කළේ 'ස්ථාවර රටකට සැවොම එක මඟකට' මැයෙන් අද (27) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

යෝජිත ජල ගාස්තු සූත්‍රයේ අවසන් කෙටුම්පත දෙසැම්බර් මාසයේදී සකස් කර අවසන් කිරීමට අපේක්ෂා කරන බවත් එමඟින් පුණ්‍ය ආයතන, රෝහල් සහ පාසල් සඳහා සාධාරණ මිල ගණන් යටතේ ජල සැපයුම සහතික කරන බවත් අමාත්‍යවරයා සඳහන් කළේය.

වාණිජ ආයතන සඳහා ජල ගාස්තු සූත්‍රය බලපාන ආකාරය පිළිබඳ ආයෝජන ප්‍රවර්ධන රාජ්‍ය අමාත්‍ය දිලුම් අමුණුගම සහ මුදල් රාජ්‍ය අමාත්‍ය ෂෙහාන් සේමසිංහ යන අමාත්‍යවරුන් හමුවී සාකච්ඡා කිරීමට සැලසුම් කර තිබෙන බව ද ජීවන් තොණ්ඩමන් මහතා පැවසුවේය.

ආර්ථික අර්බුදයේ බලපෑම හේතුවෙන් විදේශීය මෙන්ම දේශීය අරමුදල් සපයා ගැනීම දුෂ්කර වී ඇති නමුත් අතරමැද නැවතී තිබෙන ව්‍යාපෘති අවසන් කිරීම කෙරෙහි අවධානය යොමු කර තිබෙන බව ද සඳහන් කළ ජීවන් තොණ්ඩමන් අමාත්‍යවරයා සැලසුම් කර තිබෙන නව ව්‍යාපෘති ජනවාරි මාසයේදී ආරම්භ කරන බව ද පැවසීය.

පිරිසිදු ජලය සඳහා ප්‍රමාණවත් ප්‍රවේශයක් නොමැති ප්‍රදේශවල කාර්යක්ෂම ජල සංරක්ෂණයක් ඇති කිරීම සඳහා රජය කැපවී සිටින බව අවධාරණය කළ අමාත්‍යවරයා යාපනයේ ලවණ ඉවත් කිරීමේ කම්හලක් සැලසුම් කර තිබෙන බව ද සඳහන් කළේය.

ජල සම්පාදන මණ්ඩලය දේශපාලනීකරණය වී තිබෙන බවට එල්ල වන චෝදනා ප්‍රතික්ෂේප කළ ජීවන් තොණ්ඩමන් මහතා ආයතනයේ ප්‍රධාන තනතුරු සඳහා පත්කිරීම් සිදු කිරීමේ ක්‍රියාවලිය විධිමත්ව සිදුවන ආකාරය ද පැහැදිලි කළේය.

රොෂාන් රණසිංහ අමාත්‍යවරයා එම ධූරයෙන් ඉවත් කිරීමට පෙර අද (27) පාර්ලිමේන්තුවේදී පැවැත්වූ අමාත්‍ය මණ්ඩල හමුවට කැදවා ප්‍රශ්න කිහිපයක් යොමුකිරීමට ජනාධිපති රනිල් වික්‍රමසිංහ කටයුතු කර ඇති බව දේශපාලන ආරංචි මාර්ග පවසයි .

එහිදී අදාළ ප්‍රශ්න දෙක සඳහා ම පිළිතුරු ලබාදීමට නොහැකිව හිටපු අමාත්‍යවරයා නිරුත්තරව ඇති බවත් එම ආරංචි මාර්ග සඳහන් කරයි.

වැඩිදුරටත් ආරංචි මාර්ග සඳහන් කරන ආකාරයට පළමු ප්‍රශ්නය ලෙස ජනාධිපතිවරයා විමසා ඇත්තේ ක්‍රිකට් අර්බුදය විසදා ගැනීම වෙනුවෙන් ජාත්‍යන්තර ක්‍රිකට් කවුන්සිලය හා සාකච්ඡා කිරීමට කැබිනට් මණ්ඩලය විසින් අනු කමිටුවක් පත් කර තිබිදී, ඒ නොතකා ක්‍රිඩා ඇමතිවරයා ලෙස විපක්ෂ නායක සජිත් ප්‍රේමදාස ගේ කාර්යාලය වෙත ගොස් විපක්ෂ නායක හා විපක්ෂයේ ප්‍රධාන සංවිධායක වන ලක්ෂ්මන් කිරිඇල්ල මන්ත්‍රීවරයා සමඟ ක්‍රිකට් අර්බුදය විසදීම සඳහා ඉන්දියන් මහ කොමසාරිස් කාර්යාලය හරහා ඉන්දීය ක්‍රිකට් පාලක මණ්ඩලයට කතා කළේ ඇයිද යන්නය.

දෙවැනි ප්‍රශ්නය වන්නේ මහවැලි ඉඩම් බෙදා දීම වෙනුවෙන් ඇමතිවරයා ලෙස ඔහු ඉදිරිපත් කළ කැබිනට් පත්‍රිකාවෙන් යෝජනා කර තිබූ පිරිසෙන් බහුතරයක් ඔහුගේ දේශපාලන හිතවතුන් සහ ඥාතී මිත්‍රාදීන් වූවේ ඇයි ද යන්නයි. එහිදී ජනාධිපතිවරයා වැඩිදුරටත් අවධාරණය කර තිබෙන්නේ ඉඩම් හිමි අහිංසක ජනතාව සිටියදී මෙලෙස කටයුතු කිරීම ගැටළුවක් බවයි.

නමුත් මේ ප්‍රශ්න දෙක සඳහා පිළිතුරු ලබාදීමට හිටපු අමාත්‍යවරයා සමත්ව නොමැති බවත් ඒ අනුව අමාත්‍ය මණ්ඩල හමුවට කැඳවා ධූරයෙන් ඉවත් කළ අමාත්‍යවරයා ලෙස රොෂාන් රණසිංහ ඉතිහාසයට එක්ව ඇති බවත් දේශපාලන ආරංචි මාර්ග වැඩිදුරටත් පවසයි .

හම්බන්තොට නව ඛනිජ තෙල් පිරිපහදුව සහ ඒ ආශ්‍රිත නිෂ්පාදන සැකසුම් මධ්‍යස්ථානයක් පිහිටුවීම වෙනුවෙන් වන කොන්ත්‍රාත්තුව චීන SINOPEC සමාගමට පිරිනැමීම සඳහා කැබිනට් අනුමැතිය ලබාදී තිබේ.

මේ බව සඳහන් කරමින් ඛනිජ තෙල් සහ බලශක්ති අමාත්‍ය කංචන විජේසේකර සිය ට්වීටර් ගිනුමේ සටහනක් තබා ඇත.

එහිදී අමාත්‍යවරයා වැඩිදුරටත් සඳහන් කර තිබෙන්නේ අදාළ ගිවිසුමට එළඹීමට කැබිනට් අනුමැතිය හිමිව තිබෙන බවය.

අනුරාධපුරය අවුකන බුද්ධ ප්‍රතිමා වහන්සේට වස්ත්‍රයක් පැලඳවීමේ සිද්ධිය සම්බන්ධයෙන් මේ වන විට විමර්ශනයක් අරඹා ඇතැයි බුද්ධශාසන,

ආගමික හා සංස්කෘතික කටයුතු අමාත්‍ය විදුර වික්‍රමනායක පවසයි.

 පුරාවිද්‍යා දෙපාර්තමේන්තුව පවසන්නේ පුරාවිද්‍යාත්මක වටිනාකමක් සහිත ප්‍රතිමාවක පවතින ස්වභාවය වෙනස් කිරීම දඬුවම් ලැබිය හැකි වරදක් බවය.

ඒ අනුව අනුරාධපුර පුරාවිද්‍යා සහකාර අධ්‍යක්ෂවරයා සහ කලාප නිලධාරීවරයා සිද්ධිය පිළිබඳ තොරතුරු රැස්කිරීමට පුදබිම වෙත පිටත්කර යවා ඇති බව පුරාවිද්‍යා දෙපාර්තමේන්තුව පවසයි.

 පුරාවිද්‍යා දෙපාර්තමේන්තුව සඳහන් කරන්නේ, පුරාවිද්‍යා ආඥා පනතට අනුව පුරාවිද්‍යා ස්මාරකයක හෝ ප්‍රතිමාවක පවතින ස්වභාවය වෙනස් කිරීම දඬුවම් ලැබිය හැකි වරදක් බවය. එමෙන්ම ඊට එරෙහිව අධිකරණ ක්‍රියාමාර්ග ගැනීමේ හැකියාවක් පවතින බවද එම දෙපාර්තමේන්තුව සඳහන් කරයි.

අනුරාධපුර යුගයේ ඉදිකෙරුණු අවුකන බුද්ධප්‍රතිමාවට මෙරට ''හිටි බද්ධ ප්‍රතිමා වහන්සේ ''අතුරින් හිමිවන්නේ සුවිශේෂී ස්ථානයකි.

ක්‍රිස්තු වර්ෂ 5 වැනි සියවසේ ධාතුසේන රජතුමන් මෙම ප්‍රතිමා වහන්සේ නිර්මාණය කරවූ බව ඉතිහාසයේ සඳහන්ය.

ප්‍රතිමාවේ සිවුරේ රැලි ඉතා පැහැදිලිව දිස් වන අයුරින් ඉතා සියුම්ව විශිෂ්ට ලෙස කැටයම් කර තිබීමත් එහි සමබරතාවත් හේතුවෙන් එය සැලකෙන්නේමෙරට අතීත කලාශිල්පයේ අද්විතීයබව පෙන්නුම් කෙරෙන නිර්මාණයක් ලෙසය.

පුරාවිද්‍යාත්මක වටිනාමකමක් සහිත දෙස් විදෙස් සැදැහැවතුන්තේ වන්දනාවට පාත්‍රවන අවුකන බුද්ධ ප්‍රතිමා වහන්සේට වස්ත්‍රයක් පැළඳවීමට පිරිසක් කටයුතු කරන අයුරු දැක්වෙන ඡායාරූප කිහිපයක් අද සමාජ මාධ්‍ය ඔස්සේ සංසරණය වුණි.

ඇතැම් පුද්ගලයින් ප්‍රතිමා වහන්සේ මතට නැඟී එම වස්ත්‍රය පළඳවන ආකාරය ද එහි දක්නට ලැබුණි.

(adaderana.lk)

ආණ්ඩුවේ ඉන්න බැරි ඕනෑම අයෙකුට ඉන් ඉවත්වීමට අවස්ථාව තිබෙන බව රාජ්‍ය අමාත්‍ය චාමර සම්පත් දසනායක පවසයි.

රාජ්‍ය අමාත්‍යවරයා මේ බව අද (27) සඳහන් කර සිටියේ පාර්ලිමේන්තුවේදී අදහස් දක්වමිනි.

ආණ්ඩුවෙන් ඉවත් වන පිරිසට යාම සඳහා ඕනෑතරම් ආසන විපක්ෂයේ තිබෙන බවත් ආණ්ඩුවේ කැබිනට් ඇමතිකම් ලබාගැනීම සඳහා පෝලිමක් සිටින බවත් රාජ්‍ය අමාත්‍යවරයා එහිදී වැඩිදුරටත් සඳහන් කර සිටියේ ය.

එහිදී වැඩිදුරටත් දැක්වූ රාජ්‍ය අමාත්‍යවරයා මෙසේද පැවසීය .

මාසයක් තිස්සේ මේ රටේ ක්‍රිකට් කියමින් ආණ්ඩුව අපහසුතාවයට පත්කරන ක්‍රියාවලියක් සිදු වුණා. මේ ආණ්ඩුව හැදුණේ කවුරුත් එකතුවෙලා .ආණ්ඩුව පණ ගහලා යන්න තියෙන වෙලාවේ ආණ්ඩුව කඩලා දාන්න වැඩපිළිවෙළක් තියෙනවා.

තමන්ට ඇමතිකම දුන්න නම් ඒකෙ කොන්ද පණ ඇතිව වැඩ කරන්න ඇමතිට පුළුවන්කම තියෙන්න ඕන.

ජනාධිපති ගැන සැකයක් තිබෙනවා නම් කැබිනට් එකේ ඉන්න බෑ.ඒක ගෙදර ගෑනිටයි මිනිහටයිද අදාළ යි. විශ්වාසයක් නැතිනම් ඉවත් වෙන්න ඕන.

ක්‍රීඩා හා යෞවන කටයුතු සහ වාරිමාර්ග අමාත්‍ය රොෂාන් රණසිංහ වහාම ක්‍රියාත්මක වන පරිදි එම ධුරවලින් ඉවත් කර ඇති බව වාර්තා වන අතර ඒ අද (27) පාර්ලිමේන්තු ශාලා අංක තුනෙහි පැවති අමාත්‍ය මණ්ඩල රැස්වීමේදී ය.

දේශපාලන ආරංචි මාර්ග සඳහන් කරන ආකාරයට රොෂාන් රණසිංහ අමාත්‍ය ධූරයෙන් ඉවත් කිරීමට අදාළ මෙම තීන්දුව අමාත්‍ය මණ්ඩලය සමග සාකච්ඡා කිරීමෙන් අනතුරුව ගෙන ඇති නමුත් ඒ අවස්ථාව සඳහා ඔහුව සහභාගී කරගෙන නොමැත.

අනතුරුව අදාළ ලිපිය හිටපු අමාත්‍යවරයා වෙත ලබාදීමට ජනාධිපතිවරයා කටයුතු කර ඇත .

මේ සමඟ පුරප්පාඩු වන ක්‍රීඩා හා යෞවන කටයුතු සහ වාරිමාර්ග යන අමාත්‍ය විෂය පථ වෙනුවෙන් වන නව අමාත්‍යවරුන් පත්කිරීම ඉදිරි පැය කිහිපය තුළ සිදුකිරීමට නියමිත බවත් වාර්තා වෙයි .

දිගින් දිගටම අමාත්‍ය මණ්ඩල සාමුහිකත්වය බිඳහෙළමින්, රජය ද අපහසුතාවට පත්කරන හිටපු අමාත්‍යවරයාගේ හැසිරීම සම්බන්ධව තීන්දුවක් ගන්නා ලෙස අමාත්‍ය මණ්ඩල සාමාජිකයන් වෙතින්ද ජනාධිපතිවරයා වෙත පැමිණිලි ලැබී තිබිණ.

ඒ අනුව කැබිනට් සාමුහිඛත්වය රැකගනිමින් මහජන සුබසිද්ධිය පිණිස වහාම ක්‍රියාත්මක වන පරිදි ශ්‍රී ලංකා ආණ්ඩුක්‍රම ව්‍යවස්ථාව අනුව ජනාධිපතිවරයා වෙත පැවරී ඇති බලතල ප්‍රකාරව මෙම තීන්දුව ගෙන ඇත.

දිවංගත හිටපු අමාත්‍ය ලලිත් ඇතුලත්මුදලි මැතිතුමාගේ 87 වැනි ජන්ම දින සැමරුම් වැඩසටහනක් අද (26) උදෑසන කොළඹ 07 කේම්බ්‍රිජ් පෙදෙසේ පිහිටි ඒ මහතාගේ පිළිරුව අසලදී පැවැත්විණ.

ඒ හිටපු මුදල් අමාත්‍ය රවී කරුණානායක ගේ ප්‍රධානත්වයෙනි . එහිදී රවී කරුණානායක මහතා විසින් ලලිත් ඇතුලත්මුදලි පිළිරුවට පුෂ්පෝපහාර දක්වනු ලැබිණ .

අනතුරුව මාධ්‍ය වෙත අදහස් දැක්වූ හිටපු අමාත්‍ය රවී කරුණානායක සඳහන් කර සිටියේ , අද දේශපාලනයට අවශ්‍ය ලලිත් ඇතුලත්මුදලි මහතා වැන්නන් බවත් අද ඒ හිස්තැන පේන්න තිබෙන බවත් ය.

එහිදී වැඩිදුරටත් අදහස් දක්වමින් හිටපු අමාත්‍ය රවී කරුණානායක මෙසේද සඳහන් කළේය.

අද ලලිත් ඇතුලත්මුදලි මැතිතුමා වැන්නන් ගේ අඩුව දැනෙමින් පවතිනවා. එම නිසා එම වැඩපිළිවෙළ අප අඛණ්ඩව ඉදිරියට ගෙන යනවා.

පෝලිම් යුගයක් තිබුනා.රට බංකොලොත් වූ විට නැවත යථාතත්වයට පත් කිරීම ලේසි වැඩක් නොවෙයි.

මේ අවස්ථාවේ කල යුත්තේ දේශපාලන පොරපිටියක් ඇති කිරීම නොවෙයි.

මේ අය වැයෙන් මීට වැඩිය දෙයක් කරන්න තිබුනා නම් හොඳයි. නමුත් මේ අය වැය හොඳයි.

නිදහස ලැබුණු දා සිට කරගෙන එන්න නොහැකි වූ අවශ්‍ය කටයුතු දැන් ඉදිරියට කරගෙන යනවා. එදා කරන්න බැරි වෙච්ච දේවල් අද කලයුතුයි.

IMF වාරිකය ලැබෙන ස්වරූපයක් තිබෙනවා .ඒ අනුව දෙසැම්බර් 8 වැනිදා රටේ බංකොලොත්භාවය නැති කිරීමේ වැඩපිළිවෙළ ආරම්භ වනු ඇතියි.

දේශපාලනය වෙන්දේසි නොකර හැම දේම නිකන් නොදී සිටිය යුතුයි. බංකොලොත්භාවය ඇතිවුනේ පොරොන්දු දේශපාලනය නිසයි.
දේශපාලකයන් ලෙස ඕනෑම වෙලාවක අප මැතිවරණයක් සඳහා සූදානම්.

බොහෝ දේ අහිමි උනා නේ.අද එක්සත් ජාතික පක්ෂයේ පරිණත භාවය පේන්න තිබෙනවා."

මෙවර මහ කන්නයේ දී බණ්ඩි පොහොර හෙවත් MOP රුපියල් 9,000 දක්වා අඩු කිරීමට අමාත්‍ය මණ්ඩල අනුමැතිය ලැබුණු බව කෘෂිකර්ම හා වැවිලි කර්මාන්ත අමාත්‍ය මහින්ද අමරවීර පැවසීය .

අමාත්‍යවරයා මේ බව සඳහන් කර සිටියේ අද (26) පෙරවරුවේ ඇඹිලිපිටිය ප්‍රදේශයේ දී පැවැති වගා හානි වන්දි පිරිනැමිමේ අවස්ථාවට සහභාගි වෙමිනි .

යල කන්නයේ දී වළව කලාපයේ වගා හානි සිදු වූ ගොවීන්ට වගා හානි සඳහා අද දින රුපියල් ලක්ෂ 1,000ක මුදලක් රජය විසින් පිරිනමනු ලැබූ අතර ඒ අනුව බණ්ඩි පොහොර මිටියක මිල රුපියල් 9,000 දක්වා අඩු කිරීමට නියමිත අතර, රජයට අයත් පොහොර සමාගම් දෙක මඟින් එම මිලට බණ්ඩි පොහොර ලබා දීම සිදු කරනු ඇති බවද අමාත්‍ය මහින්ද අමරවීර වැඩිදුරටත් පැවසීය.