පුවත්

ජනාධිපති රනිල් වික්‍රමසිංහ සහ ජාත්‍යන්තර මූල්‍ය අරමුදලේ නියෝජිතයන් අතර සාකච්ඡාවක් ඊයේ (11) ජනාධිපති කාර්යාලයේ දී පැවැත්විණි.

ජාත්‍යන්තර මුල්‍ය අරමුදල සමග පළමු සමාලෝචනය සාර්ථකව අවසන් කිරීම පිළිබඳ මෙහිදී ජනාධිපති රනිල් වික්‍රමසිංහ වෙත සුබ පැතුම් එක් කළ නියෝජිත කණ්ඩායම ජනාධිපතිවරයාගේ නායකත්වයෙන් ශ්‍රී ලංකා රජය සිදු කර ඇති අභියෝගාත්මක ආර්ථික ප්‍රතිසංස්කරණ ඇගයිමට ලක් කළේය.

එසේම ආසියාව තුළ ප්‍රමුඛ ස්ථානයට පත් වෙමින් පාලන විනිශ්චය කිරීමේ වාර්තාව (Governance Diagnostic Report) ප්‍රකාශයට පත් කිරීම සම්බන්ධයෙන් ද මෙහිදී ඔවුහු සිය ප්‍රසාදය පළ කළහ.

විශේෂයෙන් ප්‍රතිපත්ති-නැඹුරු විචල්‍යයන් සහ මූල්‍ය ක්ෂේත්‍රයන්හි ස්ථාවරත්වය කෙරෙහි ජාත්‍යන්තර මූල්‍ය අරමුදලේ වැඩසටහන මගින් දිරි ගැන්වීමක් ලැබී ඇති බවද ජාත්‍යන්තර මූල්‍ය අරමුදලේ ශ්‍රී ලංකාව සඳහා වන ජ්‍යෙෂ්ඨ දූත මණ්ඩල ප්‍රධානී පීටර් බෘවර් (Peter Breuer) සඳහන් කළේය.

2022 දෙවන භාගයේදී මාණ්ඩලික මට්ටමේ ගිවිසුමට එළැඹීමෙන් පසු ක්‍රියාත්මක කරන ලද ප්‍රතිපත්ති අනුව ශ්‍රී ලංකාව විසින් බලාපොරොත්තු සහගත ලෙස ආදායම් ඉහළ නංවාගෙන ඇති බව පසුගියදා පැවති රැස්වීමකදී අනාවරණය වූ බවත්, එමඟින් ජාත්‍යන්තර ප්‍රජාව, නිල ණය හිමියන් සහ පුද්ගලික ණය හිමියන් සමඟ විශ්වාසය ඉහළ නැංවීමට හේතු වන බවත් ජාත්‍යන්තර මූල්‍ය අරමුදලේ නියෝජිත කණ්ඩායම පෙන්වා දුන්හ.

උද්ධමනය සැලකිය යුතු ලෙස අඩුකර ගැනීම මඟින් ශ්‍රී ලංකාව ලබා ඇති සාර්ථකත්වය පිළිබඳව ද අධ්‍යක්ෂ මණ්ඩල රැස්වීමේදී අවධානය යොමු වූ බවත්, මූල්‍ය ප්‍රතිපත්තියේ සහ වියදම් කපා හැරීමේ ශ්‍රී ලංකා රජයේ ප්‍රතිපත්ති එයට හේතු වු බවද සඳහන් කෙරිණ. මෙරට විදේශ සංචිතවල ඉහළ යාම වැනි ධනාත්මක ප්‍රතිඵල ද ජාත්‍යන්තර මූල්‍ය අරමුදල නිරීක්ෂණය කර ඇත.

විශේෂයෙන්ම ප්‍රාග්ධනය සහ යාන්ත්‍රණ ගොඩනැඟීම තුන්වන කාර්තුවේ ආර්ථික වර්ධනයට දායක වී ඇති බවත් එය දැනට පවතින පාලන යාන්ත්‍රණයේ ප්‍රතිසංස්කරණ තුළ ධනාත්මක දර්ශකයන් ලෙස සටහන් වන බව ද ජාත්‍යන්තර මූල්‍ය අරමුදල සඳහන් කර ඇත.

ජාත්‍යන්තර මූල්‍ය අරමුදල එහි ඉදිරි විධිමත් සමාලෝචනය සහ 4 වැනි වගන්තිය යටතේ සිදු කරනු ලබන උපදේශනය සිදු කිරීමට සැලසුම් කරන බැවින්, නව රාජ්‍ය මූල්‍ය කළමනාකරණ නීතිය, රාජ්‍ය-පෞද්ගලික හවුල්කාරීත්වය පිළිබඳ නීතිය සමඟ ඇති විය හැකි ගැටුම්, විදුලි ගාස්තු සහ දේපල බදු අය කිරීම යනාදිය ශ්‍රී ලංකාව අවධානය යොමු කළ යුතු ප්‍රධාන ක්ෂේත්‍ර අතරට ඇතුළත් වේ.

පවතින ප්‍රතිසංස්කරණ, මූල්‍ය ගැටලු විසදා ගැනීම සහ පාලන න්‍යාය පත්‍ර ඉදිරියට ගෙන යාම පිළිබඳ කඩිනම් අවධානය යොමු කිරීමේ වැදගත්කම ද ජාත්‍යන්තර මූල්‍ය අරමුදලේ නියෝජිතයන් මෙහිදී අවධාරණය කළහ.

බැංකු පනත සඳහා සංශෝධන සිදු කිරීම සහ බැංකු ක්ෂේත්‍රය ප්‍රතිප්‍රාග්ධනය කිරීම ඇතුළු රාජ්‍ය මූල්‍ය කරුණු සම්බන්ධයෙන් අවධානය යොමු කිරීමේ හදිසි අවශ්‍යතාව ද අවධාරණය කෙරිණි.

පාලන යාන්ත්‍රණය පිළිබඳව ද අවධානය යොමු කරමින්, දූෂණ විරෝධී කොමිෂන් සභාව ක්‍රියාත්මක කිරීම සහ ඊට අදාළ ක්‍රියාකාරී සැලසුම් ප්‍රකාශයට පත් කිරීම මෙන්ම එහි කොමසාරිස්වරුන් තෝරා ගැනීමේ ක්‍රමවේදය පිළිබඳ අවබෝධයක් ලබා ගැනීම සඳහා ආණ්ඩුක්‍රම ව්‍යවස්ථා සභාව හමුවීම පිළිබඳව ද මෙහිදී සාකච්ඡාවට ලක්විය.

සිදු කරනු ලබන ප්‍රතිසංස්කරණවල සාර්ථකත්වයක් අත්කර ගැනීම සඳහා රාජ්‍ය සේවකයින් සතු නිපුණතා වැඩි දියුණු කිරීමේ වැදගත්කම අවධාරණය කරමින් ධාරිතා සංවර්ධනය සම්බන්ධයෙන් ශ්‍රී ලංකාවේ හවුල්කාරිත්වය ද ජාත්‍යන්තර මූල්‍ය අරමුදලේ ඇගයීමට ලක්විය.

ප්‍රතිසංස්කරණ ක්‍රියාත්මක කිරීම සඳහා තීරණාත්මක වන රාජ්‍ය සේවයේ ධාරිතාව ගොඩනැගීම මෙම වැඩසටහනේ අරමුණයි. මේ වන විට මෙම වැඩසටහන ක්‍රියාත්මක කිරීම සඳහා අනුමැතිය පළ කර ඇති අතර ඊට අදාළ සාකච්ඡා ඉදිරි සතිවලදී සිදු කිරීමට නියමිතය.

ජාත්‍යන්තර මූල්‍ය අරමුදලේ නියෝජිතයන් මෙරට රැඳී සිටින කාලය තුළ, මෙම ප්‍රධාන ක්ෂේත්‍රයන් පිළිබඳව ගැඹුරින් සොයා බැලීමේ අපේක්ෂාවෙන් ශ්‍රී ලංකා බලධාරීන් සමඟ තවදුරටත් සාකච්ඡා සිදු කිරීමට නියමිත අතර, ශ්‍රී ලංකාවේ ආර්ථික ප්‍රතිසංස්කරණ ක්‍රියාවලියේ ප්‍රගතිය සහ අභියෝග පිළිබඳ පුළුල් විශ්ලේෂණයක් සිදු කිරීමට ද අපේක්ෂා කරන බව මෙහිදී සඳහන් කෙරිණි.

මුදල් රාජ්‍ය අමාත්‍ය ෂෙහාන් සේමසිංහ, ආර්ථික කටයුතු පිළිබඳ ජනාධිපති ජ්‍යෙෂ්ඨ උපදේශක ආචාර්ය ආර්.එච්.එස්. සමරතුංග, මුදල් අමාත්‍යාංශයේ ලේකම් මහින්ද සිරිවර්ධන, මහ බැංකු අධිපති ආචාර්ය නන්දලාල් වීරසිංහ යන මහත්වරු ඇතුළු පිරිසක් මෙම අවස්ථාවට එක්ව සිටියහ.

වර්ෂය ආරම්භ වී දින ගණනක් ගත වී ඇති මොහොතේ රජය පරිපූරක ඇස්තමේන්තුවක් ඉදිරිපත් කර ඇති බවට ජාතික ජන බලවේගයේ නායක පාර්ලිමේන්තු මන්ත්‍රී අනුර කුමාර දිසානායක එල්ල කළ චෝදනාව ප්‍රතික්ෂේප කරන බව මුදල් රාජ්‍ය අමාත්‍ය රංජිත් සියඹලාපිටිය පවසයි.

අනුර දිසානායක මන්ත්‍රීවරයාගේ චෝදනාව සම්බන්ධයෙන් පාර්ලිමේන්තුවේදී මෙම ප්‍රතිචාරය දැක්වූ රාජ්‍ය අමාත්‍යවරයා වැඩිදුරටත් කියා සිටියේ වසර 20කට වඩා පාර්ලිමේන්තුව නියෝජනය කරන මන්ත්‍රීවරයකු ලෙස දිසානායක මහතා මීට වඩා වගකීම් සහගත ලෙස කටයුතු කළ යුතු බවය.

සාමාන්‍යයෙන් පරිපූරක ඇස්තමේන්තුවක් පාර්ලිමේන්තුවට ඉදිරිපත් කරන්නේ මාර්තු මාසයට පසුව බව පෙන්වා දුන් රාජ්‍ය අමාත්‍යවරයා රජය ඉදිරිපත් කර ඇත්තේ පරිපූරක ඇස්තමේන්තුවක් නොවන බවද සඳහන් කළේය. .

විසර්ජන පනතේ හය එක වගන්තිය යටතේ විශේෂ කරුණක් සඳහා මුදලක් වෙන් කිරීම සඳහා රජයට හැකියාව ඇති බවත් ඒ පිළිබඳ මාස දෙකක් ඉක්ම යාමට පෙර පාර්ලිමේන්තුව දැනුම්වත් කළ යුතු බවත් රාජ්‍ය අමාත්‍යවරයා වැඩිදුරටත් පෙන්වා දුන්නේ ය.

එළඹෙන ජනාධිපතිවරණයෙන් නියත වශයෙන්ම ජනාධිපති ධුරයට පත්වන අනුර දිසානායක මහතාගේ පළමු නිවේදනය වන්නේ පාර්ලිමේන්තුව වහාම විසුරුවා හැරීම බව ජාතික ජනබලවේගයේ විධායක සභික, ජවිපෙ දේශපාලන මණ්ඩල සභික හිටපු පාර්ලිමේන්තු මන්ත්‍රී කේ.ඩී. ලාල් කාන්ත පවසයි.

මේ වන විට තිබෙන්නේ පුහු පාර්ලිමේන්තුවක් බවත් ඒ සමඟ නව ජනාධිපතිවරයාට වැඩකළ නොහැකි බවත් ඔහු පැවසීය.

ජාතික ජනබලවේගයේ විධායක සභික, ජවිපෙ දේශපාලන මණ්ඩල සභික හිටපු පාර්ලිමේන්තු මන්ත්‍රී කේ.ඩී. ලාල් කාන්ත මේ බව සඳහන් කර සිටියේ මහනුවර කරළියද්ද ප්‍රදේශයේදී පැවති ජාතික ජන බලවේගය ජන හමුවක් අමතමිනි.

එහිදී වැඩිදුරටත් අදහස් දැක්වූ ඔහු මෙසේද සඳහන් කළේය.

‘මේ වසරේ තියන ජනාධිපතිවරණයෙන් මාලිමාව දිනන බවට සියලු සමීක්ෂණ වාර්තා සහතික කරලා ඉවරයි. මාලිමාව ජයග්‍රහණය කරනවා කියලා බයට තමා මේ ආණ්ඩුව පළාත් පාලන මැතිවරණය කල් දැම්මේ.

මෙවර ජනාධිපතිවරණයෙන් අනුර කුමාර දිසානායක දිනනවා කියලා ගොඩාක් පක්ෂවල අයට දෙගිඩියාවක් ඇති වෙලා තියනවා. එක්තරා දුරකට ඡන්දය නොතියා ඉඳියිද කියලා සැකයකුත් අපිට තියෙනවා. හැබැයි ජනතාව බලාගෙන ඉන්නේ තියපල්ලකෝ ඡන්දයක් කියලා. රනිල්ගේ ජොබ් එක තමා විධායක බලය ක්‍රියාවට නැගීම.

මාරුවෙන් මාරුවට 75 වසරක් මේ රට කෑවා. හැදුවේ නැහැ. රජය නිල වශයෙන් පිළිඅරන් ඉවරයි ලෝකය ඉස්සරහා මේක බංකොලොත් රටක් කියලා.

මේ වසරේ ඔක්තෝබර් මාසය ඉවර වෙන්න කලින් එළැඹෙන ජනාධිපතිවරණයේදී , ජනාධිපතිවරයා පත්වෙන්නේ මලිමාවෙන්. එළැඹෙන මාස හතේ ඉන්ටවල් නැහැ. දිනපතා වැඩ කරන්න තියනවා හැමෝටම.

ජාතික ජන බලවේගයේ ජනාධිපතිවරයාගේ පළමු නිවේදනය තමයි පාර්ලිමේන්තුව වහාම විසුරුවනු ලැබේ කියන එක. මේ පුහු පාර්ලිමේන්තුවත් එක්ක ජනාධිපතිවරයාට වැඩ කරන්න පුළුවන්ද? එම නිසා මහා මැතිවරණයකට සූදානම් විය යුතු වෙනවා’

සංචාරක කර්මාන්තයේ සිදුව ඇති පිබිදීමත් සමඟ මෙම වසරේ සංචාරකයන් ලක්ෂ 20ක් පමණ මෙරටට ගෙන්වා ගැනීමට අපේක්ෂා කරන බවත් එමඟින් ඇමරිකානු ඩොලර් බිලියන 6ක් උපයා ගැනීමට අපේක්ෂා කරන බවත් සංචාරක රාජ්‍ය අමාත්‍ය ‍ඩයනා ගමගේ පැවසුවාය.

2022 වසරට සාපේක්ෂව 2023 වසරේ සංචාරකයන්ගේ පැමිණීම 106%කින් වැඩි වී තිබූ බවද රාජ්‍ය අමාත්‍යවරිය පෙන්වා දුන්නාය.

සංචාරක රාජ්‍ය අමාත්‍ය ඩයනා ගමගේ මේ බව සඳහන් කළේ 'ස්ථාවර රටකට සැවොම එක මඟකට' මැයෙන් අද (12) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

එහිදී වැඩිදුරටත් අදහස් දැක්වූ රාජ්‍ය අමාත්‍ය ඩයනා ගමගේ මෙසේද පැවසුවාය.

මේ වන විට මෙරට සංචාරක කර්මාන්තයේ විශාල පිබිදීමක් ඇතිව තිබෙනවා. සංචාරක කේෂ්ත්‍රයේ සිදුව තිබෙන මෙම පිබිදීම අවුරුදු තුනකට පසුව ඇති වූවක් බව කිව යුතුයි.‍ සංචාරක කර්මාන්තය නඟාසිටුවීම වෙනුවෙන් ගනු ලැබූ ක්‍රියාමාර්ගයන්හි සාර්ථකත්වය මේ තුළින් පෙන්නුම් කෙරෙනවා.

2022 වසරේ සංචාරකයන් ලක්ෂ 7කට අධික සංඛ්‍යාවක් මෙරටට පැමිණ තිබෙනවා. 2023 වසරේදී සංචාරකයන් ලක්ෂ 14කට වැඩි පිරිසක් පැමිණ තිබෙනවා. ඇත්තටම 2022 වසරට සාපේක්ෂව 2023 වසරේ සංචාරක ව්‍යාපාරයේ වර්ධනය 106%කින් වැඩි වී තිබෙනවා.

2023 වසරේදී මෙරටට ලක්ෂ 14කට වැඩි පිරිසක් ගෙන්වා ගැනීමට හැකිවීම පිළිබඳව සංචාරක අමාත්‍යාංශය ලෙස අප සතුටට පත් වෙනවා. මේ වසරේ සංචාරක ව්‍යාපාරය තවදුරටත් දියුණු කරමින් වැඩි සංචාරකයන් ප්‍රමාණයක් මෙරටට ගෙන්වා ගැනීමට සැලසුම් සකස් කර තිබෙනවා.

ඒ අනුව 2024 වසරේදී සංචාරකයන් ලක්ෂ 20ක් පැමිණෙනු ඇතැයි විශ්වාස කරනවා. එමඟින් රටට ‍ඇමරිකානු ඩොලර් බිලියන 6ක මුදලක් උපයා ගැනීමට අපේක්ෂා කරනවා.

එසේම සංචාරක කර්මාන්තය තුළ තවදුරටත් විසඳිය යුතු ප්‍රශ්න ප්‍රමාණයක් තිබෙනවා. ඉහළ සංචාරක ආකර්ෂණය ඇති ඇතැම් ස්ථානවල ප්‍රවේශපත්‍ර සඳහා වන මිල ගණන් ඉහළ දමා ඇති බවට වාර්තා වෙනවා. මේ සම්බන්ධව අමාත්‍යාංශය මට්ටමින් සොයා බැලීමට අප කටයුතු කරනවා. මෙම මිල ගණන් වැඩි කිරීම පිළිබඳව අප දැනුවත් නැහැ. ඇතැම් රාජ්‍ය ආයතන විසින් සිදුකර තිබෙන මෙම අත්තනෝමතික ක්‍රියාව නිසා චෝදනා ලබන්නේ සංචාරක අමාත්‍යාංශයයි.

ඒ වගේම හරීන් ප්‍රනාන්දු අමාත්‍යවරයා සංචාරක කර්මාන්තය නඟාසිටුවීමට විශාල වැඩ කොටසක් සිදු කරමින් සිටිනවා. සංචාරකයන්ට බලපා තිබෙන ගැටලු සම්බන්ධව අමාත්‍යවරයා ජනාධිපති රනිල් වික්‍රමසිංහ මහතා සමඟ සාකච්ඡා පවත්වමින් කඩිනම් විසඳුම් ලබාදීමට කටයුතු කරමින් සිටිනවා. එමඟින් සංචාරකයන් වෙනුවෙන් යම් සහනදායක වැඩපිළිවෙළක් සකස් කිරීමට හැකි වෙතැයි අප අපේක්ෂා කරනවා.


සංචාරකයන්ගේ පහසුව වෙනුවෙන් මෙරට සංස්කෘතික ස්ථාන, දියඇලි මෙන්ම ඇල්ල, බණ්ඩාරවෙල ඇතුළු සංචාරක ප්‍රදේශවල විශේෂ ව්‍යාපෘති ආරම්භ කිරීමට ද බලාපොරොත්තු වෙනවා. අද වන විට සංචාරක කේෂ්ත්‍රයේ පිබිදීම අප අත්විඳිමින් සිටිනවා. ඒ වගේම ඉදිරියටත් සංචාරක කර්මාන්තය දියුණු කරමින් රටට විදේශ විනිමය ඉපයීමට කැපවී කටයුතු කරනවා.

තේ පොහොර මිටියක මිල රුපියල් 8500 දක්වා අඩු කිරීමට රජය තීරණය කළ බව කෘෂිකර්ම හා වැවිලි කර්මාන්ත අමාත්‍ය මහින්ද අමරවීර පවසයි.

දැනට තේ සඳහා භාවිතා කරන පොහොර මිටියක මිල රුපියල් 12000 සිට රුපියල් 14000 දක්වා අතර වන බැවින් බොහෝ වගාකරුවන් තේ වගාවට පොහොර නොයොදන බවද අමාත්‍යවරයා සඳහන් කළේය.

අමාත්‍යවරයා මේ බව සඳහන් කර සිටියේ ගාල්ල දිස්ත්‍රික්කයේ තේ වගාකරුවන් පිරිසක් සමග ගාල්ල නගර ශාලාවේදී පැවැති සාකච්ඡාවකින් අනතුරුවය.

තේ පොහොර මිල වැඩි වීම නිසා තේ අක්කරයකින් වරකට නෙලා ගන්නා දළු ප්‍රමාණය කිලෝ ග්‍රෑම් 216 දකවා අඩු වී ඇතැයි ද අමාත්‍යවරයා එහිදී පැවසුවේය.

එබැවින් රජයට අයත් ලංකා පොහොර සමාගම හා කොමර්ෂල් පොහොර සමාගම මගින් තේ පොහොර මිටිය රුපියල් 8500 කට දෙන බවද අමාත්‍යවරයා සඳහන් කළේය.

මෙම සාකච්ඡාව සඳහා කෘෂිකර්ම රාජ්‍ය අමාත්‍ය මොහාන් ද සිල්වා ඇතුලු පිරිසක් සහභාගී වූහ.

බෝධි සත්ත්වයෙකු වශයෙන් පෙනී සිටින මහින්ද කොඩිතුවක්කු නමැත්තාගේ විදෙස් ගමන් තහනම් කරමින් කොළඹ කොටුව මහෙස්ත්‍රාත් අධිකරණය අද (12) නියෝගයක් නිකුත් කළේය.

කොළඹ කොටුව මහෙස්ත්‍රා තිළිණ ගමගේ විසින් මෙම නියෝගය නිකුත්කළ අතර ඒ අපරාධ පරීක්ෂණ දෙපාර්තමේන්තුවේ පරිගණක කොට්ඨාසය වෙනුවෙන් පෙනී සිටි නියෝජ්‍ය සොලිසිටර් ජනරාල් පීරිස් ඉදිරිපත් කළ කරුණු සලකා බැලීමෙන් අනතුරුව යි.

නියෝජ්‍ය සොලිසිටර් ජනරාල්වරයා කළ ඉල්ලීමක් පිළිගත් මහෙස්ත්‍රාත්වරයා මෙම පුද්ගලයාගේ බැංකු ගිණුම් පිළිබඳ වාර්තාවක් කැඳවන ලෙසද නියෝග කළේය.

මෙම බෝධිසත්ව වෙස්ගත් පුද්ගලයාට ළමා අපචාර පිළිබඳ චෝදනා ඇති බවද ප්‍රසිද්ධ මාධ්‍ය හමුවලදී අනාවරණය කෙරිණ.

මෙවර අධ්‍යයන පොදු සහතික පත්‍ර උසස් පෙළ විභාගයේ කෘෂි විද්‍යාව දෙවන පත්‍රය අවලංගු කිරීමට විභාග දෙපාර්තමේන්තුව තීරණය කර තිබේ.

මේ සම්බන්ධව අදහස් දක්වමින් විභාග කොමසාරිස් ජනරාල් අමිත් ජයසුන්දර පවසා සිටියේ කෘෂි විද්‍යාව දෙවන ප්‍රශ්න පත්‍රයේ ප්‍රශ්න කිහිපයක් විභාගයට පෙර සමාජ මාධ්‍ය ජාලා ඔස්සේ සංසරණය වී ඇති බවට ලද තොරතුරු සැලකිල්ලට ගනිමින් සිදුකරන ලද විමර්ශනයකින් අනතුරුව මෙම තීරණය ගත් බවය.

සිදුකරන ලද විමර්ශනයේ දී එම ප්‍රශ්න පත්‍රය සමාජ මාධ්‍ය ඔස්සේ සංසරණය වී ඇති බවට පළවූ තොරතුරු තහවුරු වන කරුණු අනාවරණය වී ඇති බවද ඔහු පැවසීය.

මෙවර උසස් පෙළ විභාගයේ කෘෂි විද්‍යාව දෙක ප්‍රශ්න පත්‍රයට අදාළ විභාගය පසුගිය 10 වැනිදා පැවැත්විණ.

ශ්‍රී ලංකා ආර්ථිකය ලබා තිබෙන කැපී පෙනෙන ප්‍රගතිය ජපාන මුදල් අමාත්‍ය සුසුකි ෂුනිචි ( SUZUKI Shunichi) මහතාගේ දැඩි ප්‍රසාදයට ලක් වෙයි.

මෙරට දළ දේශිය නිෂ්පාදිතයේ දර්ශක සහ උද්ධමන දර්ශකවල ධනාත්මක ප්‍රවණතා පෙන්වා දුන් ජපාන මුදල් අමාත්‍යවරයා එම ප්‍රගතිය ශ්‍රී ලංකාවට අත් කර ගැනීමට හැකි වූයේ ජනාධිපති රනිල් වික්‍රමසිංහ ගේ නිවැරදි ආර්ථික වැඩපිළිවෙළ නිසා බවද සඳහන් කළේය.

ජපාන මුදල් අමාත්‍ය සුසුකි ෂුනිචි මහතා (H.E. Mr. SUZUKI Shunichi) මේ බව සඳහන් කර සිටියේ ඊයේ (11) පස්වරුවේ ජනාධිපති කාර්යාලයේ දී ජනාධිපති රනිල් වික්‍රමසිංහ හමු වූ අවස්ථාවේදීය.

ජපානය සහ ශ්‍රී ලංකාව අතර ආර්ථික සබඳතා තවදුරටත් පුළුල් කර ගැනීමේ අරමුණින් ජපාන මුදල් අමාත්‍යවරයා මෙරට දෙදින නිල සංචාරයක නිරතව සිටියි.

ශ්‍රී ලංකා ආර්ථිකය යළි නඟා සිටුවීමේ දී ආර්ථික ස්ථායීකරණය සහ ණය තිරසාරභාවය පිළිබඳ අවධානය යොමු කරමින් සුවිශේෂී ආර්ථික ප්‍රතිසංස්කරණ රැසක් මේ වන විට රජය ආරම්භ කර ඇති බව ජනාධිපති රනිල් වික්‍රමසිංහ මෙහිදී පැවසීය.

ශ්‍රී ලංකාවේ ණය අර්බුදය විසඳා ගැනීමට සහ වත්මන් ආර්ථික ස්ථාවරත්වය උදා කර ගැනීම වෙනුවෙන් ජපාන රජය ලබාදුන් සුවිශේෂී සහාය පිළිබඳවද ජනාධිපතිවරයා මෙහිදී කෘතවේදීව සිහිපත් කළේය.

එසේම ණය ප්‍රශස්තකරණ වැඩසටහනේ සාර්ථකත්වය පිළිබඳවද මෙහිදී සාකච්ඡාවට ලක් වූ අතර ණය ප්‍රශස්තකරණ ක්‍රියාවලියේ දි විනිවිදභාවයෙන් යුතු ප්‍රතිපත්තියක් පවත්වාගෙන යාමේ වැදගත්කම ද සාකච්ඡා කළහ.

ශ්‍රී ලංකාවේ ණය අර්බුදය හේතුවෙන් යෙන් මුදල් ඒකකයෙන් ලබා දී තිබූ ණය අත්හිටුවීම පිළිබඳ සඳහන් කළ ජපාන මුදල් අමාත්‍ය සුසුකි ෂුනිචි මහතා, නිල ණය හිමියන්ගේ කමිටුව (OCC) සමඟ යෝජිත අවබෝධතා ගිවිසුමට එළැඹීමෙන් පසුව සහ ජාත්‍යන්තර මූල්‍ය අරමුදල විසින් අධීක්ෂණය කරනු ලබන ණය තිරසරභාවය ප්‍රකාශ කිරීමෙන් අනතුරුව එම ණය මුදල් නැවත ලබාදීමේ හැකියාව පවතින බව සඳහන් කළේය.

තොරතුරු තාක්ෂණය, සමුද්‍රීය ආරක්ෂාව ඇතුළු ක්ෂේත්‍ර රැසක් ඔස්සේ ජපානය සහ ශ්‍රී ලංකාව අතර සබඳතා තවදුරටත් පුළුල් කර ගැනීම පිළිබඳවද මෙහිදී දීර්ඝ ලෙස සාකච්ඡා වූ අතර ශ්‍රී ලංකාවේ ඉදිරි ගමන වෙනුවෙන් ජපාන රජයෙන් ලබාදිය හැකි පූර්ණ සහාය ලබාදෙන බව ද ජපාන මුදල් අමාත්‍යවරයා පැවසීය.

ජපානය සහ ශ්‍රී ලංකාව අතර සමීප සබඳතා තවදුරටත් වර්ධනය කර ගැනීමට තමා කැපවී සිටින බව මෙහිදී අවධාරණය කළ ජනාධිපති රනිල් වික්‍රමසිංහ විශේෂයෙන් තරගකාරී හරිත ආර්ථිකයක් සහ ඩිජිටල් ආර්ථිකයක් වෙනුවෙන් තවදුරටත් සහයෝගයෙන් කටයුතු කිරීමේ අවශ්‍යතාව පෙන්වා දුන්නේය.

වෙළෙඳ ශේෂය හිතකර මට්ටමක පවත්වාගැනීම සඳහා අපනයන කෙරෙහි අවධානය යොමු කිරීම වැදගත් බව සඳහන් කළ ජනාධිපතිවරයා, ශ්‍රී ලංකාව සඳහා නව ආර්ථික ආකෘතියක් ඇති කර ගැනීම පිළිබඳ අවධානය යොමුව ඇති බව ද පැවසීය.

ණය ප්‍රශස්තකරණ වැඩසටහන මෙම වසරේ පළමු කාර්තුව තුළ අවසන් කිරීම ශ්‍රී ලංකාවේ ඉලක්කය බව ණය ප්‍රශස්තකරණ ක්‍රියාවලියේ ප්‍රගතිය පිළිබඳ සඳහන් කරමින් මෙහිදී ශ්‍රී ලංකා නියෝජිත පිරිස විසින් ජපාන නියෝජිත පිරිස දැනුවත් කරන ලදී.

කටුනායක බණ්ඩාරනායක ජාත්‍යන්තර ගුවන්තොටුපොල ප්‍රතිසංවර්ධනය කිරීම වැනි ව්‍යාපෘති කෙරෙහි ද මෙහිදී විශේෂ අවධානයක් යොමු වූ අතර ජපාන රජයේ ආධාර යටතේ ක්‍රියාත්මක දැනට අතරමග නැවති ඇති සංවර්ධන ව්‍යාපෘති කඩිනමින් යළි ආරම්භ කිරීම පිළිබඳව ද සාකච්ඡා කෙරිණි.

ජපාන දූත පිරිස සහ ශ්‍රී ලංකාව නියෝජනය කරමින් මුදල් රාජ්‍ය අමාත්‍ය ෂෙහාන් සේමසිංහ, ජනාධිපති ලේකම් සමන් ඒකනායක, ආර්ථික කටයුතු පිළිබඳ ජනාධිපති ජ්‍යෙෂ්ඨ උපදේශක ආචාර්ය ආර්.එච්.එස් සමරතුංග, මහබැංකු අධිපති ආචාර්ය නන්දලාල් වීරසිංහ යන මහත්වරුන් මෙම අවස්ථාවට එක්ව සිටියහ.

අපරාධ පරීක්ෂණ දෙපාර්තමේන්තුව (සී.අයි.ඩී.) භාර නියෝජ්‍ය පොලිස්පතිවරයා ලෙස නියෝජ්‍ය පොලිස්පති රොහාන් ප්‍රේමරත්න  පත් කර තිබේ.

එම දෙපාර්තමේන්තුව භාර නියෝජ්‍ය පොලිස්පතිවරයා ලෙස කටයුතු කළ ප්‍රසාද් රණසිංහ  විශ්‍රාම යාමෙන් පසු ජාතික පොලිස් කොමිෂන් සභාව නියෝජ්‍ය පොලිස්පති රොහාන් ප්‍රේමරත්න  එම තනතුරට පත්කළේය.

රොහාන් ප්‍රේමරත්න බස්නාහිර පළාත උතුර දිසාව බාර නියෝජ්‍ය පොලිස්පතිවරයා ලෙස කටයුතු කරමින් සිටි අතර ඔහු සංවිධානාත්මක අපරාධ මැඩලීම සහ මත්ද්‍රව්‍ය ජාවාරම්කරුවන් අත්අඩංගුවට ගැනීම ඇතුළු අපරාධ මර්ධන සදහා නමක් දිනා සිටින නිලධාරියෙකි.

අපරාධ පරීක්ෂණ දෙපාර්තමේන්තුව, වංචා විමර්ශන කාර්යංශය, පොලිස් විනය සහ කල්ක්‍රියා කොට්ඨාසය ඇතුළු පොලිස් ඒකක ගණනාවක අධ්‍යක්ෂ ධූරයන් මෙන්ම කොට්ඨාස බාර ජ්‍යෙෂ්ඨ පොලිස් අධිකාරී තනතුරු දරා ඇති රොහාන් ප්‍රේමරත්න  අති දක්ෂ අපරාධ විමර්ශන නිලධාරියෙකි.

සමගි ජන බලවේගයේ බදුල්ල දිස්ත්‍රික් මන්ත්‍රී ලෙස නයන වාසලතිලක කථානායක මහින්ද යාපා අබේවර්ධන ඉදිරියේ පාර්ලිමේන්තුවේදී දිවුරුම් දුන්නේය.

බදුල්ල දිස්ත්‍රික් මන්ත්‍රී චමින්ද විජේසිරි මහතා ඉල්ලා අස්වීමෙන් බදුල්ල දිස්ත්‍රික්කයේ මන්ත්‍රී ධුරයක් පුරප්පාඩු විය.

බදුල්ල දිස්ත්‍රික් පාර්ලිමේන්තු මන්ත්‍රී චමින්ද විජේසිරි ගේ ඉල්ලා අස්වීමෙන් පුරප්පාඩු වූ මන්ත්‍රීධුරය සඳහා නයන වාසලතිලක පත්කිරීමට අදාළ ගැසට් නිවේදනය මැතිවරණ කොමිසම විසින් අද (11) ප්‍රකාශයට පත්කර තිබේ.

සමගි ජන බලවේගයේ පාර්ලිමේන්තු මන්ත්‍රී චමින්ද විජේසිරි ජනවාරි 09 දා සිය පාර්ලිමේන්තු මන්ත්‍රී ධූරයෙන් ඉවත් විය.

චමින්ද විජේසිරි මන්ත්‍රිවරයාගේ ඉල්ලා අස්වීම පාර්ලිමේන්තුවේ මහ ලේකම් විසින් එදිනම (09) පස්වරුවේ දී මැතිවරණ කොමිෂන් සභාව වෙත දැනුම් දී තිබිණ.

2020 පාර්ලිමේන්තු මැතිවරණයේදී බදුල්ල දිස්ත්‍රික්කයෙන් සමගි ජන බලවේගයේ මන්ත්‍රීවරුන් තිදෙනෙකු පත්විය.

1) වඩිවේලු සුරේෂ් - මනාප 49,762
2) ඒ. අරවින්දකුමාර් - මනාප 45,491
3) චමින්ද විජේසිරි - මනාප 36,291

ඔවුන් තිදෙනාට පසු වැඩිම මනාප හිමිව තිබුනේ නයන වාසලතිලක ටයි. ඔහු ලබාගෙන තිබු මනාප සංඛ්‍යාව 31,307කි.

අද දිනයේ ප්‍රකාශයට පත්ව ඇති ගැසට් නිවේදනය පහතින් පළවේ.

පසුගිය දවසක සමඟි ජන බලවේගයේ ප්‍රබල මන්ත්‍රීවරුන් දෙන්නෙක් , ජනාධිපති රනිල් වික්‍රමසිංහව රහසිගතව හමුවෙලා කියලා , ලොකු රාවයක් යනවා. ඊයේ පාර්ලිමේන්තු කැන්ටිමේත් ඔය ගැන ලු කතාව.

මෙම මන්ත්‍රීවරුන් දෙන්නම , ජනපතිට අතිශයින්ම හිතවත් දෙදෙනෙක් ලු.. ආරංචිවල හැටියට කොල්ලුපිටියේ පිහිටි ලක්ෂරි එපාර්ට්මන්ට් එකක ලු ඔය හමුව තිබුනා කියන්නේ. ඒ ආරංචිවල හැටියට කතාව මෙහෙමයි..

“ආ... කොහොමද ඉතිං” - කියමින් ජනාධිපතිවරයා මන්ත්‍රීවරු දෙන්නව පිළිඅරගෙන තියන්නේ ෆුල් වෙල්කම් එකක් දීලලු..

“ඔයාලගේ නායකතුමා මොකද කරන්නේ?” - කියලා අහගෙනලු, ජනාධිපතිවරයා කතාව පටන් ගත්තේ.

“තාම පැහැදිලි තැනක නෑ සර්... මයික් එකක් දැක්කොත් පැය ගණන් කතා කරනවා, එතනින් එහාට කිසිම ඇක්ෂන් එකක් නැහැ. එතුමත් එක්ක ගමනක් යන්න අමාරුයි. දැන් එතුමාව කොන්ට්‍රෝල් කරන්නේ බිස්නස්කාරයෝ දෙතුන් දෙනෙක්.. පක්ෂය පාලනය කරන්නේ විපක්ෂ නායකතුමාගේ යාලුවෝ දෙතුන් දෙනෙක් .. ඒ ගැන මන්ත්‍රීවරුන් හැමෝටම වගේ ප්‍රශ්න තියෙනවා.” - මන්ත්‍රීවරුන් දෙන්නා කියලා.

“සර්, අපි හැමෝටම ලොකු ප්‍රශ්නයක් තියනවා. ඒ ප්‍රසිඩන්ට් ඉලෙක්ෂන් එකේදි සර් මොකද කරන්නේ කියලා . අපේ ලොක්කා හිතාගෙන ඉන්නේ සර් එන එකක් නෑ කියලා. ..” - මන්ත්‍රීවරුන් දෙන්නම කියලා .

“කලබල වෙන්න එපා. එතුමට කියන්න මම එනවා කියලා .” -ජනාධිපතිවරයා හිනාවෙවී කියලා.

“මෙහෙමයි සර්.. අපිත් එක්ක 15කට වැඩි මන්ත්‍රීවරු පිරිසක් ඉන්නවා. එතන පොහෙටේටුවේ ස්වාධීන වෙච්ච කිහිපදෙනෙකුත් ඉන්නවා. ශ්‍රී ලංකා එකේ කිහිපදෙනෙකුත් ඉන්නවා. හැබැයි අපිට යූ.එන්.පී එකට එන්නත් බෑ. ඒක නිසා සර් සන්ධානයක් හදන්න. අපි ඒකට එකතු වෙන්නම්. එතකොට අපිට වැඩ කරන්න ලේසියි.” - ඒ මන්ත්‍රීවරු දෙන්නා කිව්ව ලු..

''ඔව් ඔය පක්ෂ නායකයෝ කීපදෙනෙක්ම වජිරටයි - රවිටයි කියලා තියනවා , එයාලගේ පක්ෂ වලින් එක්කෙනා දෙන්නා කඩලා ගන්න එපා , වෙලාව ආපු හැටියේ, එයාල පක්ෂයක් විදියට ජනධිපතිවරනේදී සහය දෙන්නම් කියලා .'' - ජනාධිපති කියලා.

“ඔව් සර් ... ඉලෙක්ෂන් එක කෝල් කරන්න. අපි එතකොට එළියට ඇවිල්ලා ගේම ගහන්නම්.. සර් අපිට තව ඩේට් එකක් දෙන්න. අපි අනිත් අය එක්ක සර් හමුවෙන්න එන්නම්” ..

එහෙම කියපු ඒ මන්ත්‍රීවරුන් දෙන්නා තවත් බොහෝ දේශපාලන කරුණු කාරණා සාකච්ඡා කර කර ඉඳලා. , මෙයාලා විසිර ගිහින් තියෙන්නේ ජනාධිපතිත් එක්ක කෝපි කෝප්පයකුත් බිව්වට පස්සේ ලු.. ඒ නැවත හැකි ඉක්මනින් හමුවී සාකච්ඡා කරන බවට ගිවිස ගනිමින්..

ඔය කතාවල ඇත්ත බොරු මොනවා වුනත් , සජබේ මන්ත්‍රීවරු හතර පස් දෙනෙක් මලික් සමරවික්‍රම
හරහා මේ වෙනකොටත් රනිල් එක්ක රහස් කතා පටන් අරන්.. ඒත් චන්දයක් call කරනතුරු දැනට ඉන්න විදියටම ඇතුලට වෙලා ඉන්න කියලලු රනිල් කිව්වයි කියන්නේ.

ඔන්න ඒ අස්සේ , පසුගිය 8 වැනිදා අමාත්‍යවරුන් කිහිප දෙනෙකු හා පොහොට්ටුවේ මන්ත්‍රීවරුන් පිරිසක් ජනාධිපතිවරයා හමුවූයේ විශේෂ සාකච්ඡාවකට..

“සර්.. ප්‍රසිඩන්ට් ඉලෙක්ෂන් එකට එනවා කියලා එනවුන්ස් කරන්න” - ඒ කට්ටිය ඉල්ලීමක් කරලා.

“මම එනවා. ඒකෙ සැකයක් තියාගන්න එපා. හැබැයි ඊට කලින් මම රටේ ආර්ථිකය හදන්න ඕන. අපි ඒ මැච් එකේ අන්තිම ඕවරේ ඉන්නෙ. හදිස්සියේ ඡන්දයකට ගිහිල්ලා ආපහු අනාගන්න බැහැ.” ජනාධිපතිවරයා කට්ටියට කියලා.

ඒ සාකච්ඡාවලින් පස්සේ, ජනාධිපතිවරය පසුගිය 9 වැනිදා එ.ජා.ප කළමනාකරණ කමිටුව කැඳවලා තිබුනා. එතනදීත් ඇදිලා තියෙන්නේ ජනාධිපතිවරණය ගැන..

'' සර් , ජනාධිපතිවරණයට එනවා කියලා එනවුන්ස් කරන්නේ කවද්ද.. සර් චන්දෙට එන්නේ නෑ කියලා සජිත්ලා , චම්පිකලා , නාමල්ලා ලොකු කැම්පේන් එකක් ගෙනියනවා '' - ක්‍රිෂාන්ත තියඩෝර් කියලා . ඒ කතාව ලංකා බැංකු සභාපති රොනල්ඩ් පෙරේරාත් අනුමත කරලා.

'' දෙගිඩියාවක් තියාගන්න එපා. මම අනිවාර්යයෙන් ජනාධිපතිවරණයට ඉදිරිපත් වෙනවා .. නමුත් රටේ ආර්ථිකය හදන්න ගෙන යන වැඩපිළිවෙල අවසන් කරන්න තවත් මාස කීපයක් දෙන්න '' ඔහු කළමනාකරණ කමිටුවෙන් ඉල්ලීමක් කරලා.

ඔන්න ඊට පස්සේ, ජනාධිපති රනිල් වික්‍රමසිංහ , ඉදිරි ජනාධිපතිවරණෙ ජාතික අපේක්ෂකයා ලෙස ඉදිරිපත් කරන්න කළමනාකරණ කමිටුව ඒකමතිකව තීරණය කරලා.

'' මම ඉදිරිපත් වෙන්නේ UNP අපේක්ෂකයා විදියට නෙමෙයි, නිර්පාක්ෂික අපේක්ෂකයා විදියට. එතකොට අපේ ආර්ථික වැඩපිළිවෙල අනුමත කරන ඕන කෙනෙකුට මට සහය දෙන්න පුළුවන් නේ ..සමහරුන්ට කෙලින්ම මට උදව් කරන්න පුළුවන්.. නැත්තන් 2015 දී JVP එක කළා වගේ අපේක්ෂකයෙක් ඉදිරිපත් නොකර උදව් කරන්නත් පුළුවන්.. ''

'' කොහොමටත් මෙදා සැරේ ජනාධිපතිවරනෙට අපේක්ෂකයෝ ගොඩක් ඉදිරිපත් වුනාට මොකද , අන්තිමේදී ගොඩවල් දෙකකට බෙදෙනවා. අපේ ආර්ථික වැඩපිළිවෙල අනුමත කරන කණ්ඩායම හා අපේ වැඩපිළිවෙලට විරුද්ධ කණ්ඩායම විදියට. මෙතන මැදක් කියලා එකක් නෑ .'' . - ජනාධිපති වික්‍රමසිංහ එහෙම කියද්දී කට්ටියම ඔලුව වනමින් ඒ කතාව නිහඬවම අනුමත කළා ලු..

• දේශපාලන වාර්තාකරු

විපක්ෂනායක සජිත් ප්‍රේමදාස ලකුණු දා ගැනීමේ අරමුණින් පාර්ලිමේන්තුවේ කතා පවත්වන බව ආණ්ඩුපක්ෂ ප්‍රධාන සංවිධායක, නාගරික සංවර්ධන හා නිවාස අමාත්‍ය ප්‍රසන්න රණතුංග පවසයි.

අමාත්‍යවරයා වෝදනා කරන්නේ විපක්ෂනායකවරයාට පමණක් කතා කරන්නට දීමෙන් ඔහු පවසන දේවල් පමණක් ජනගත වෙන බවයි. එය ඉතා වැරදි ක්‍රියාවක් බවද හෙතෙම පෙන්වා දෙයි.

කතානායක මහින්ද යාපා අබේවර්ධන මහතාගේ ප්‍රධානත්වයෙන් පාර්ලිමේන්තුව අද (11) රැස්විය.

එහිදී විපක්ෂනායක සජිත් ප්‍රේමදාස කළ කතාවකට පිලිතුරු දෙමින් ආණ්ඩු පක්ෂ ප්‍රධාන සංවිධායක අමාත්‍ය, ප්‍රසන්න රණතුංග මේ බව සඳහන් කළේය.

එහිදී මෙවන් සංවාදයක් ඇති විය.

විපක්ෂනායක සජිත් ප්‍රේමදාස – ගරු කතානායකතුමනි, මේ රටේ කුඩා දරුවාගේ සිට සියලුම දෙනාගේ ජන ජීවිතය කඩාවැටෙනකොට කොහොමද හිටපු ජනාධිපතිවරයා වරායේ නැව් දෙකක් අරගෙන මුහුද මැදට ගිහිල්ල පාටි දමන්නේ.ඒකට උත්තරයක් දෙන්න.මම මේව කතාකරනකොට මගේ කට වහන්න හදනවා. ඒක කරන්න බැහැ.

ආණ්ඩුපක්ෂ ප්‍රධාන සංවිධායක, අමාත්‍ය ප්‍රසන්න රණතුංග (ශ්‍රී.පො.පෙ) –

ගරු කතානායකතුමනි, විපක්ෂනායකතුමා අවසර ගත්තේ අතුරු ප්‍රශ්නයක් අහන්නයි. විපක්ෂනායකතුමා කතාකරන එකේ කිසිම ගැටළුවක් නැහැ. නමුත් එතුමා වටපිටාව සම්බන්ධකරගනිමින් කතා කරනකොට වෙලාව පිළිබඳ ගැටළුවක් මතුවෙනවා. මෙතුමා විපක්ෂනායක හැටියට මීට වඩා වගකීමකින් කටයුතු කරන්න ඕන. කතා පවත්වනවට වඩා හොඳයි අදාළ කාරණාව ගැන විෂයභාර ඇමතිතුමාගෙන් ප්‍රශ්නයක් අහන එක. මහජන මුදල් නාස්තිවෙලා තියේනම් ඒකට විධිමත්ව කටයුතු කරන්න. මෙතුමා ලකුණු දා ගන්න කතා පවත්වනවා.නිකම් තුනේ පන්තියේ වැඩ කරන්න එපා විපක්ෂනායකතුමා.

විපක්ෂනායක සජිත් ප්‍රේමදාස –

ගරු කතානායකතුමනි, මම කතාකරන්නේ මම ගැනවත්, පවුලේ සාමාජිකයන් ගැනවත්, මට සම්බන්ධ ව්‍යාපාර ගැනවත් නෙවෙයි. ඒ නිසා මට කරුණාකරල අවස්ථාව දෙන්න. මගේ කටවහන්න එපා.

කතානායක මහින්ද යාපා අබේවර්ධන – මට ඔබතුමාගේ කට වහන්න අවශ්‍ය නැහැ. කාලය වැදගත්.

(සභාවේ කෑ කෝ ගැසීම්)

ආණ්ඩුපක්ෂ ප්‍රධාන සංවිධායක, අමාත්‍ය ප්‍රසන්න රණතුංග (ශ්‍රී.පො.පෙ) – ගරු කතානායකතුමනි, මටත් කතා කරන්න අවසර දෙන්න.

කතානායක මහින්ද යාපා අබේවර්ධන – නෑ.. ඔබතුමත් වාඩි වෙන්න.

ආණ්ඩුපක්ෂ ප්‍රධාන සංවිධායක, අමාත්‍ය ප්‍රසන්න රණතුංග (ශ්‍රී.පො.පෙ) – විපක්ෂනායකතුමාට අවසර දෙනකොට එතුමා කතාකරන දේවල් විතරයි ජනගත වෙන්නේ. ඒක වැරදියි. අපිටත් ගැටළු තියෙනවා. විපක්ෂනායකතුමා හිටපු ජනාධිපතිතුමා ගැනයි හිටපු අනිත් අය ගැනයි කතාකරනවා. හොර සල්ලි එක්ක අහුවුණාම ඔබතුමාගේ සහෝදරිය බේර ගත්තේ හිටපු ජනාධිපතිතුමයි. ඒකත් රටේ ආර්ථිකයට බලපෑවා. ඒ වගේම ඔබතුමාගේ තාත්ත තමයි කොටින්ට ආයුධ දුන්නේ. අපිටත් ඒව ගැන කතා කරන්න පුළුවන්.

ප්‍රදීප් අනුර කුමාර

පලස්තීනය සඳහා වන ද්විත්ව රාජ්‍ය සංකල්පය සාක්ෂාත් කර ගැනීම වෙනුවෙන් ශ්‍රී ලංකාව කැපවී සිටින බව ජනාධිපති රනිල් වික්‍රමසිංහ පැවසීය.

ජනාධිපතිවරයා මේ බව සඳහන් කළේ මැද පෙරදිග රටවල් 10 ක තානාපතිවරුන් සමග අද (11) ජනාධිපති කාර්යාලයේ පැවති සාකච්ඡාවේදී ය.

ස්ථීර සහ ක්‍රියාකාරී පලස්තීන රජයක් පිහිටුවීම වෙනුවෙන් පෙනී සිටින අතරම බටහිර ඉවුරේ (West Bank) සිටින පදිංචිකරුවන් ඉවත් කිරීමට බලධාරීන් තීරණාත්මක පියවර ගැනීමේ අවශ්‍යතාවය ද ජනාධිපති රනිල් වික්‍රමසිංහ මෙහිදී අවධාරණය කළේය.

එක් රාජ්‍යයක් පිහිටුවීම මගින් ද්විත්ව රාජ්‍ය විසඳුමක් ලබා දිය නොහැකි බව ජනාධිපතිවරයා ප්‍රකාශ කළේය.

හමාස් සංවිධානයේ ත්‍රස්තවාදී ප්‍රහාර මෙන්ම ගාසා තීරයට දිගින් දිගටම බෝම්බ හෙලීම සාධාරණීකරණය නොකළ යුතු බව තරයේ ප්‍රකාශ කළ ජනාධිපති රනිල් වික්‍රමසිංහ මේ සඳහා සාමකාමී යෝජනාවක් අනුගමනය කිරීම අත්‍යවශ්‍ය බව පැවසීය.

මීට අමතරව, ගාසා තීරය වෙත ශ්‍රී ලංකාවද මානුෂීය ආධාර සැපයීමට කටයුතු කරන බව සඳහන් කළ ජනාධිපති රනිල් වික්‍රමසිංහ ගාසා තීරය වෙත මානුෂීය අධාර සැපයීම් අඛණ්ඩව සිදු කරන ලෙස ද ඉල්ලා සිටියේය.

පලස්තීන ජනතාව මුහුණ දී සිටින දුක්ඛිත තත්ත්වය සම්බන්ධයෙන් ශ්‍රී ලංකාවේ නොසැලෙන කැපවීම පෙන්නුම් කරමින් සටන් විරාමයක් ඇතිකරගන්නා ලෙස ද ජනාධිපතිවරයා ඉල්ලා සිටියේය.

පලස්තීනය සහ ගාසා තීරය වෙනුවෙන් ජනාධිපති රනිල් වික්‍රමසිංහ දක්වන ස්ථාවර සහයෝගය වෙනුවෙන් මැදපෙරදිග රටවල් නියෝජනය කරමින් සහභාගී වූ තානාපතිවරු එහිදී සිය ස්තූතිය පළ කළහ.

ගාසා තීරයේ සිදුවන සටන් නැවැත්විය යුතු බවට එක්සත් ජාතීන්ගේ සංවිධානයේ යෝජනා සඳහා ශ්‍රී ලංකාව දක්වන සහයෝගය පිළිබඳ සිහිපත් කළ තානාපතිවරු, ඒ සම්බන්ධයෙන් වන ශ්‍රී ලංකාවේ නොසැලෙන ස්ථාවරය ද අගය කළහ.

එහිදී වැඩිදුරටත් අදහස් දක්වමින් ශ්‍රී ලංකාව රතු මුහුදේ ආරක්ෂක මෙහෙයුම්වලට සහභාගී වීම පිළිබඳ සඳහන් කළ ජනාධිපතිවරයා, ශ්‍රී ලංකාවේ ආර්ථිකයට ඇතිවන අහිතකර බලපෑම් අවම කිරීම සහ නාවික ගමනාගමනය සඳහා පැවතිය යුතු නිදහස ආරක්ෂා කිරීම වෙනුවෙන් ශ්‍රී ලංකාව මෙම මෙහෙයුම සඳහා සම්බන්ධ වී ඇති බව ද සඳහන් කළේය.

මෙම සාකච්ඡාවන්හිදී, බටහිර රටවල් සමඟ පවතින සබඳතාවලට අමතරව ආසියාව, බටහිර ආසියාව, අප්‍රිකාව සහ මැදපෙරදිග යන කලාප සමඟ ද පවතින සබඳතා ශක්තිමත් කර ගැනීම පිළිබඳව අවධාරණය කළ ජනාධිපතිවරයා, ශ්‍රී ලංකාව අනුගමනය කරන පුළුල් විදේශ ප්‍රතිපත්තිය සම්බන්ධව තානාපතිවරුන් වෙත කරුණු පැහැදිළි කළේය.

මෙම සාකච්ඡාව සඳහා ශ්‍රී ලංකාවේ පලස්තීන තානාපතිවරයා ප්‍රමුඛ, ඊජිප්තුව, කටාර්, එක්සත් අරාබි එමීර් රාජ්‍යය, ලිබියාව, ඉරානය, කුවේට්, සෞදි අරාබිය, ඕමානය සහ ඉරාකය යන රටවල තානාපතිවරුන් එක්ව සිටියහ.

ශ්‍රී ලංකාව වෙනුවෙන් ජනාධිපතිවරයා සමග විදේශ කටයුතු අමාත්‍ය ජනාධිපති නීතිඥ අලි සබ්‍රි, ජනාධිපති ලේකම් සමන් ඒකනායක, විදේශ කටයුතු අමාත්‍යායේ ලේකම් අරුණි විජේවර්ධන, ජනාධිපති විදේශ සබඳතා අධ්‍යක්ෂ දිනුක් කොළඹගේ සහ ජනාධිපති මාධ්‍ය අධ්‍යක්ෂ ජනරාල් ධනුෂ්ක රාමනායක යන මහත්ම මහත්මීහු සහභාගී වූහ.

ඉදිරියේදී ජාතික හැඳුනුම්පත නිකුත් කරන විටම බදු ගෙවන්නා හඳුනාගන්නා TIN අංකය නිකුත් කිරීමට රජය සූදානම් වෙයි.

මේ සම්බන්ධයෙන් අදහස් දක්වමින් මුදල් රාජ්‍ය ඇමැති රංජිත් සියඹලාපිටිය පවසන්නේ ජාතික හැඳුනුම්පත ලබාගන්නා විටම සියළුම පුරවැසියන්ට බදු අංකයක්ද හිමිවනු ඇති බවය.

දේශීය ආදායම් දෙපාර්තමේන්තුවේ දත්ත පරිගණකගත කර බදු සම්බන්ධ ක්‍රියාවලිය වඩා ශක්තිමත් කරන බවද රාජ්‍ය අමාත්‍යවරයා පවසයි .

හිටපු ජනාධිපති මහින්ද රාජපක්ෂ ඇතුළු පොදුජන පෙරමුණේ මැති ඇමතිවරුන් පිරිසක් නෞකාවක අති උත්කර්ෂවත් සාදයක් සංවිධානය කළ බවට පළවන වාර්තා ප්‍රතික්ෂේප කරන ශ්‍රී ලංකා වරාය අධිකාරිය පවසයි .

නිවේදනයක් නිකුත්කරමින් වරාය අධිකාරිය මේ බව සඳහන් කරන අතර එහි සඳහන් වන්නේ එය කොළඹ වරායේ සංවර්ධන කටයුතු පිළිබඳ නිරීක්ෂණ චාරිකාවක් පමණක් බවයි .

වරාය සංවර්ධන කටයුතු පිළිබඳ නිවැරදි තොරතුරු ලබා දීමේ අරමුණින් වරාය අධිකාරිය අභ්‍යන්තර හා පිටත වරායේ විවිධ රාජ්‍ය නායකයන්, ප්‍රභූවරුන්, වෘත්තිකයන් සහ මාධ්‍යවේදීන් සඳහා මෙවැනි නිරීක්ෂණ චාරිකා සංවිධානය කරන බවද වරාය අධිකාරිය නිකුත්කළ නිවේදනයේ සඳහන් වෙයි.

එම නිවේදනයේ වැඩිදුරටත් සඳහන් වන්නේ නැගෙනහිර ජැටිය, JCT පර්යන්තය සහ බටහිර පර්යන්තය සංවර්ධනය කිරීම නැරඹීම සඳහා, ඇමතිවරුන් වන නිමල් සිරිපාල ද සිල්වා සහ ප්‍රියංකර ජයරත්න යන අයගේ ඉල්ලීම පරිදි, වරාය අධිකාරිය මැති ඇමතිවරුන් පිරිසක් සඳහා මෙම නිරීක්ෂණ චාරිකාව සංවිධානය කළ බවයි.

එසේම මාධ්‍ය වාර්තා වල සඳහන් වූ ආකාරයට ආහාර හෝ වෙනත් කිසිවක් සඳහා තමන් කිසිදු වියදමක් දරා නොමැති බවත් නිවේදනයේ දැක්වෙයි .

වරාය අධිකාරිය මේ සම්බන්ධයෙන් නිකුත්කළ නිවේදනය පහත දැක්වෙයි .


කෙසේ වුවත් වරාය වෘත්තීය සමිති චෝදනා කර සිටින්නේ වරාය පරිශ්‍රයේ අධිආරක්ෂිත කලාපයක අනීතික ලෙස මෙම සාදය පවත්වා ඇති අතර, මේ පිළිබඳ කඩිනම් විමර්ශනයක් පැවැත්විය යුතු බවයි.

වරාය හා ගුවන් සේවා රාජ්‍ය අමාත්‍ය ප්‍රේමලාල් ජයසේකර ඇතුළු පාර්ලිමේන්තු මන්ත්‍රීවරු 50ක පමණ පිරිසක් සමඟ ශ්‍රී ලංකා වරාය අධිකාරිය තුළ පෙරේදා (09) සිදුකළ මෙම නාවික සංචාරය සම්බන්ධයෙන් සමස්ත ලංකා වරාය පොදු සේවක සමිතිය ඊයේ (10) ප්‍රවෘත්ති සාකච්ඡාවක් පවත්වා මෙසේ චෝදනා කරනු ලැබිණ .

එහිදී රාජ්‍ය අමාත්‍යවරයාගේ ක්‍රියාකලාපය දැඩි ලෙස විවේචනය කළ අතර, එම සංචාරයේ හා සාදයේ වීඩියෝ දර්ශන පෙළක් ද ඔවුන් මාධ්‍යයට නිකුත් කෙරිණ .

කෙසේ වුවත් මෙම ආන්දෝලනාත්මක සාදය සඳහා ආරාධනා පත්‍රයක් ද නිකුත් කර තිබූ බවට ආරංචි මාර්ග සඳහන් කරන අතර , නව වර්ෂය ආරම්භයේ කොළඹ වරාය පරිශ්‍රයේ කෙටි නාවික සංචාරයක් අමාත්‍යවරුන්, රාජ්‍ය අමාත්‍යවරුන් සහ පාර්ලිමේන්තු මන්ත්‍රිවරුන් වෙනුවෙන් රාජ්‍ය අමාත්‍යවරයා සංවිධාන කර ඇති බව එහි සඳහන් ව ඇති බවත් දැනගන්නට ඇත .

එසේම මෙම සංචාරය සිදු කර ඇත්තේ, හංසකාවා සහ දියකොවුලා නමැති වරායේ වැලි ඉවත් කරන යාත්‍රා ද්විත්වය යොදාගනිමින් බවත් වාර්තා වෙයි .

දිවයිනේ සියලු පෙර පාසල් දරුවන් සඳහා උදෑසනට පූර්ණ ආහාර වේලක් ලබා දීමේ වැඩසටහන මෙම වසරේදී ආරම්භ කරන බව කාන්තා හා ළමා කටයුතු රාජ්‍ය අමාත්‍ය ගීතා කුමාරසිංහ පැවසීය.

යෝජිත ස්ත්‍රී පුරුෂ සමාජ භාවීය සමානාත්මතා පනත් කෙටුම්පත (Gender Equality Bill) මඟින් ස්ත්‍රී පුරුෂ සමාජ භාවීය සමානාත්මතා අයිතීන් තහවුරු කිරීමට කටයුතු කරන බව ද රාජ්‍ය අමාත්‍යවරිය සඳහන් කළාය.

කාන්තා හා ළමා කටයුතු රාජ්‍ය අමාත්‍ය ගීතා කුමාරසිංහ මේ බව සඳහන් කර සිටියේ 'ස්ථාවර රටකට සැවොම එක මඟකට' මැයෙන් අද (11) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

එහි දී වැඩිදුරටත් අදහස් දැක් වූ කාන්තා හා ළමා කටයුතු රාජ්‍ය අමාත්‍ය ගීතා කුමාරසිංහ මෙසේ ද පැවසුවාය.

120,000 ක් වන පෙර පාසල් දරුවන්ට පූර්ණ ආහාර වේලක් උදෑසනට ලබාදීම අපට තිබුණු විශාල අභියෝගයක් වූණා. දැනට එම දරුවන් සඳහා වෙන්ව ඇති රුපියල් 60ක මුදල රුපියල් 100ක් දක්වා වැඩිකර දෙන ලෙස ජනාධිපති රනිල් වික්‍රමසිංහ මහතාගෙන් ඉල්ලීමක් කර තිබෙනවා. ලංකාවේ ළමුන්ගෙන් විශාල ප්‍රතිශතයක් මන්දපෝෂණයෙන් පෙලෙන බැවින් ප්‍රෝටීන් සහිත පෝෂණීය ආහාර වේලක් ලබාදීමට අප සැලසුම් කරනවා.

ඒ අනුව දිවයිනේ සියලු පෙර පාසල් දරුවන් සඳහා උදෑසනට පූර්ණ ආහාර වේලක් ලබා දීමට මෙම වසරේදී කටයුතු කරනවා. එම වැඩසටහන දිවයිනේ සියළුම ප්‍රාදේශීය ලේකම් කොට්ඨාශ ආවරණය වන පරිදි ක්‍රියාත්මක කටයුතු කරනවා. වතු නොවන පෙර පාසල් දරුවන් 120,000 ක් පමණ සිටිනවා. එමෙන්ම වතු පෙර පාසල් දරුවන් 35,000 ක් සිටිනවා. ඒ අනුව මුළු ප්‍රතිලාභින් සංඛ්‍යාව 155,000ක් වනවා.

ඒ වගේම ගර්භණී මව්වරුන් සඳහා වන පෝෂණීය ආහාර මල්ලක් ලබාදීමට කටයුතු කරනවා. ගර්භනී මව්වරුන් 220,214 ක් සඳහා මසකට රුපියල් 4,500 බැඟින් මාස 10 ක් සඳහා පෝෂණ ආහාර මල්ලක් ලබා දීමට අප මේ වන විට කටයුතු යොදා තිබෙනවා.
ඒ වගේම පෙර පාසල් ගුරුවරුන් පුහුණු කිරීමේ වැඩ පිළිවෙලක් ක්‍රියාත්මක කිරීමට ද බලාපොරොත්තු වෙනවා.

ශ්‍රී ලංකාවේ සෑම දිස්ත්‍රික්කයක්ම ආවරණය වන පරිදි මුල් ළමාවිය සංවර්ධනය පිළිබඳ ජාතික ලේකම් කාර්යාලය යටතේ ලියාපදිංචි පෙර පාසල් ගුරුවරියන් 18,333ක් සිටිනවා. ඔවුන් සඳහා වැටුපක් ලබාදිය යුතුයි. පෙර පාසල් ක්ෂේත්‍රයේ ගුණාත්මක භාවය ඉහළ නැංවීම සහ පෙර පාසල් ගුරුවරියන්ගේ සේවය ඇගයීම වෙනුවෙන් මාසිකව රු 2500ක දීමනාවක් දැනට ලබා දෙනවා. එම මුදල ජීවත්වීමට ප්‍රමාණවත් නොවන බැවින් එම මුදල් තවදුරටත් වැඩිකළ යුතුව තිබෙනවා.

ඒ වගේම අප අමාත්‍යාංශය විසින් ළමා හා කාන්තා අයිතිවාසිකම් වෙනුවෙන් නව පනත් 03ක් පාර්ලිමේන්තුවට ඉදිරිපත් කර සම්මත කිරීමට සැළසුම් කර තිබෙනවා.

ඒ අනූව, ස්ත්‍රී පුරුෂ සමාජ භාවීය සමානාත්මතා පනත් කෙටුම්පත (Gender Equality Bill) හරහා ස්ත්‍රී පුරුෂ සමාජ භාවීය සමානාත්මතා අයිතීන් තහවුරු කිරීමට කටයුතු කරනවා. LGBTIQ ඇතුලුව ස්ත්‍රී පුරුෂ සමාජභාවීය සමානාත්මතා සභාව ස්ථාපිත කිරීම සිදු කළ යුතුයි. එම සභාව යටතේ ස්ත්‍රී පුරුෂ සමාජ භාවීය සමානාත්මතා කේන්ද්‍රීය නිලධාරීන් (Gender Focal Point) රාජ්‍ය ආයතන සඳහා බඳවා ගැනීම හා පත් කිරීමට අප කටයුතු කරමින් සිටිනවා.

ඒ වගේම කාන්තාවන් රැකියා සඳහා විදේශගත වීමේදී තම දරුවන්ගේ අවම වයස් සීමාව අවුරුදු 02 වෙනුවට යලිත් පෙර පැවති අවුරුදු 05 සීමාව දක්වා සංශෝධනය කිරීමට බලාපොරොත්තු වෙනවා. එමෙන්ම අවුරුදු 05ට අඩු දරුවන් සිටින මව්වරුන් කොපමණ ප්‍රමාණයක් මේ වන විට විදේශගත වී ඇත්දැයි සොයා බැලීමට ප්‍රාදේශීය ලේකම් කොට්ඨාස මට්ටමින් දත්ත රැස් කිරීමට ද පියවර ගෙන තිබෙනවා.

සියළුම පළාත් ආණ්ඩුකාරවරුන් දැනුවත් කර ඒ හා සමානවම ප්‍රවාහන අමාත්‍යවරයා, ජාතික ගමනාගමන කොමිසම් සභාව සහ පලාත් මාර්ගස්ථ මගී ප්‍රවාහන අධිකාරිය දැනුවත් කර සියළුම මගී ප්‍රවාහන සේවා බස් රථවල සීසීටීවී (CCTV) කැමරා සවිකිරීමට පියවර ගැනීමට අප අදහස් කරනවා.

එමෙන්ම පොදු මගී ප්‍රවාහන සේවාවන් තුළදී කාන්තාවන්ට සිදුවන හිංසන නැවත්වීම සඳහා කැමරා සවිකිරීම තුළින් යම් ප්‍රමාණයකට අඩු වෙතැයි අප අපේක්ෂා කරනවා. ඒ අනූව මගී ප්‍රවාහන සේවා බස් රථ සඳහා ලබා දෙන වාර්ෂික බලපත්‍රයේ බලපත්‍ර කොන්දේසියක් ලෙස කැමරා සවි කිරීම ඇතුළත් කිරීමේ යෝජනාවක් වගකිව යුතු පාර්ශ්ව වෙත යොමු කිරීමට අප අවධානය යොමු කර තිබෙනවා.

චමින්ද විජේසිරි ගේ ඉල්ලා අස්වීමෙන් පුරප්පාඩු වූ බදුල්ල දිස්ත්‍රික්කයේ සජබ පාර්ලිමේන්තු මන්ත්‍රීධුරය සඳහා නයන වාසලතිලක පත්කිරීමට අදාළ ගැසට් නිවේදනය මැතිවරණ කොමිසම විසින් ප්‍රකාශයට පත්කර තිබේ.

ඒ බදුල්ල දිස්ත්‍රික්කයේ සජබ මනාප ලයිස්තුවේ ඊළඟ ට සිටින්නේ නයන වාසල තිලක වන නිසාය .

නයන වාසල තිලක සජබ නායක සජිත් ප්‍රේමදාස ගේ බිරිඳ ගේ මස්සිනා කෙනෙකු මෙන්ම මැච් ෆික්සින් සහ මුදල් විශුද්ධිකරණ චෝදනා ඇත්තෙකු ලෙස සමාජ මාධ්‍ය ඇතුළු වෙබ් අඩවි වාර්තා කර තිබිණ.

එසේම ඊයේ (10) පාර්ලිමේන්තුවේදී ප්‍රකාශයක් කරමින් පාර්ලිමේන්තු මන්ත්‍රී මහින්දානන්ද අලුත්ගමගේ චෝදනා කර සිටියේ ඔහු ද්විත්ව පුරවැසියෙකු ද වන බවයි .

එසේම චමින්ද විජේසිරි රුපියල් ලක්ෂ 900කට මන්ත්‍රී ධූරය විකුණා ඇති බවට පළවූ මාධ්‍ය වාර්තා සම්බන්ධයෙන් පරීක්ෂණයක් අවශ්‍ය බවද මහින්දානන්ද මන්ත්‍රීවරයා එහිදී පැවසීය .

මේ අතර තවත් මාධ්‍ය වාර්තා වල සඳහන් වූයේ චමින්ද විජේසිරි ට මන්ත්‍රී ධූරයෙන් ඉල්ලා අස්වීම සඳහා සජබ නායක සජිත් ප්‍රේමදාස බලපෑම් කර ඇති බවයි.

නයන වාසල තිලක මන්ත්‍රී ධූරයට නම් කරමින් මැතිවරණ කොමිසම නිකුත්කළ ගැසට් නිවේදනය පහත දැක්වෙයි .

ඉදිරි දෙවසර තුළ මෙරට මැණික් කර්මාන්තයේ විශාල දියුණුවක් ඇති කිරීම තම අරමුණ බවත් ඒ සඳහා නව වැඩපිළිවෙළක් හඳුන්වා දීමට කටයුතු කරන බවත් ජනාධිපති රනිල් වික්‍රමසිංහ පැවසීය.

එම වැඩපිළිවෙළ ජාතික ආර්ථිකයට මෙන්ම ක්ෂේත්‍රයේ නියැළි සිටින සියලුදෙනාට සෙත සැලසෙන වැඩපිළිවෙළක් බව පෙන්වා දුන් ජනාධිපතිවරයා ඒ යටතේ මැණික් හා ස්වර්ණාභරණ ක්ෂේත්‍රය පුළුල් නවීකරණයකට ලක් කෙරෙන බවද පැවසිය.

මැණික් හා ස්වර්ණාභරණ ක්ෂේත්‍රය දියුණු කිරීමට නම් බදු සහන ලබාදීම පමණක් ප්‍රමාණවත් නොවන අතර මෙරටට විදේශ විනිමය උපයා දෙන ප්‍රධාන ක්ෂේත්‍රයක් ලෙස එය දියුණු කළයුතු බවද ජනාධිපතිවරයා පෙන්වා දුන්නේය .

ජනාධිපති රනිල් වික්‍රමසිංහ මේ බව සඳහන් කර සිටියේ චීනකොටුව මැණික් හා ස්වර්ණාභරණ වෙළඳ සංගමය විසින් සංවිධානය කළ “Gem Sri Lanka 2024” මැණික් හා ස්වර්ණාභරණ ප්‍රදර්ශනයේ සමාරම්භක අවස්ථාවට අද (11) පෙරවරුවේ එක් වෙමිනි.

බෙන්තොට සිනමන් බේ හෝටලයේ පැවත්වෙන මෙම ප්‍රදර්ශනය ජනවාරි 13 වැනිදායින් අවසන් කෙරේ.

ප්‍රදර්ශනය විවෘත කළ ජනාධිපති රනිල් වික්‍රමසිංහ මහතා එහි වෙළෙඳ කුටි නිරීක්ෂණය කිරීමටද එක් වූ අතර මැණික් කර්මාන්තකරුවන්ගේ ගැටළු විමසමින් ඔවුන් සමග සුහද කතා බහක ද නිරත විය.

චීන කොටුව මැණික් හා ස්වර්ණාභරණ සංගමය විසින් මෙහිදී ජනාධිපතිවරයා වෙත සිහිවටන තිළිණයක් ද පිළිගැන්වීය.

මෙහිදී වැඩිදුරටත් අදහස්දැක්වූ ජනාධිපති රනිල් වික්‍රමසිංහ මෙසේද පැවසීය.

ලෝකය පුරා විවිධ රටවලින් නියෝජිත කණ්ඩායම් අද මෙහි පැමිණ සිටීම සතුටට කරුණක්. ශ්‍රි ලංකාවේ මැණික් සඳහා කේන්ද්‍රස්ථානය වන්නේ මේ බේරුවල ප්‍රදේශයයි. ඒ වගේම බේරුවල ඊට ප්‍රසිද්ධයි. මැණික් කර්මාන්තයේ දියුණුව පිළිබඳ අපගේ විශේෂ අවධානය යොමු කර තිබෙනවා.

පසුගිය අයවැය කථාවේදීද මම මැණික් කර්මාන්තය සඳහා ප්‍රතිපත්ති රාමුවක් සකස් කිරීම පිළිබඳ සඳහන් කළා. ඉදිරි මාස දෙක තුළ අප එම ප්‍රතිපත්ති රාමුව සකස් කිරීමේ වැඩකටයුතු සිදු කරනවා. ඒ අනුව මෙරට මැණික් කර්මාන්තයක් ඉතා විශාල දියුණුවක් කරා ගමන් කරනු ඇතියි.

ශ්‍රී ලංකාව සතුව මැණික් පිළිබඳ විශාල විභවයක් තිබෙනවා. ඉයන් ෆ්ලෙමින් මීට කලකට පෙර සඳහන් කර තිබුණා “දියමන්ති සදාකාලිකයි” කියලා. දියමන්ති විතරක් නොවෙයි, ශ්‍රී ලංකාවේ මැණික් ද සදාකාලිකයි. ශ්‍රී ලංකාවේ නිල් මැණික්වලට දිගු කාලීන ඉතිහාසයක් තිබෙනවා.

මීට පෙර කථිකයා සඳහන් කළ ආකාරයට, චීන වෙළෙඳපොළ තවමත් පවතින්නේ එහි ආරම්භයේයි. ඔවුන්ට තවමත් තිබෙන්නේ ෂෙන්ෂෙන් ආභරණ සංගමය පමණයි. මම 1979දී ෂෙන්ෂෙන්වලට යන අවස්ථාවෙදී එහි පැවතුණේ කුඹුරු යායක් පමණයි. නමුත් අද එහි විශාල විවිධත්වයකින් යුත් ආර්ථිකයක් තිබෙනවා.

මීට සමගාමීව අපට ඉගෙන ගැනීමට බොහෝ දේ තිබෙනවා. මැණික් ප්‍රති අපනයනය සහ මැණික් සඳහා අගය එකතු කිරීම වැනි කරුණු සම්බන්ධයෙන් රජය අවධානය යොමු කර තිබෙනවා. ඒ වගේම මැණික් මඟින් අපට ලැබෙන විදේශ විනිමය ඉහළ නංවා ගැනීම පිළිබඳ සැලසුම් සහගතව කටයුතු කරනවා. අපි මැණික් කර්මාන්තය නවීකරණය කළ යුතුයි.

එසේම මෙම කර්මාන්තය හා බැඳුණු විවිධ ගැටළු තිබෙනවා.

අප පුරුදුව සිටින්නේ බදු සහන ඉල්ලීමටයි. නමුත් එම සහන සියල්ල ලබාදී අප මෙම ක්ෂේත්‍රයෙන් බිලියනයක්වත් උපයා ගෙන නැහැ. ඒ කියන්නේ සහන ලබාදීම අසාර්ථක වී තිබෙනවා. ඒසේ නම් කළයුතුව තිබෙන්නේ සහන ලබාදෙන අතරම මෙම කර්මාන්තය දියුණු කිරීමයි. මේ කර්මාන්තයේ සිටින සියලුදෙනා ආර්ථික වශයෙන් ශක්තිමත් කළයුතුයි. ඒ වගේම මැණික් ඔප දැමීමේ නිරතව සිටින පිරිස්වල ද දැනුම වර්ධනය කළයුතුයි.

තමන්ගේ සාක්කුවට විතරක් මුදලා දමා ගැනීම වෙනුවෙන් බදු වලින් නිදහස් කරන්න කියන යෝජනාවට මම නම් එකඟ නැහැ. මගේ අරමුණ ඊළග වසර දෙක තුළ මෙම කර්මාන්තය විශාල දියුණුවකට ගෙන ඒමයි. විශේෂයෙන් බේරුවල, රත්නපුර ඒ වගේම ලග්ගල යන ප්‍රදේශවල සියලුදෙනාට එහි වාසිය ලැබිය යුතුයි. රටට වගේම ක්ෂේත්‍රයේ සියලුදෙනාට සෙතක් විය යුතුයි.

මීට වසර දෙකකට පෙර රටේ ආර්ථිකය දැවැන්ත කඩාවැටීමකට ලක් වුණා. අපට ඉන්ධන තිබුණේ නැහැ. පොහොර තිබුණේ නැහැ. ආහාර ලබා ගැනීම අසිරු වුණා. පැය 10ක් 12ක් විදුලිය කප්පාදු කෙරුණා. අප දැන් ඒ සියල්ල නැවත ජනතාවට ලබාදී තිබෙනවා. දැන් විදේශ විනිමය තිබෙන නිසා අපට එසේ කිරීමට හැකිවී තිබෙනවා.

මෙම විදේශ විනිමය අප අපනයනයෙන් ලබාගත් ඒවා නොවෙයි. ඒවා අපට ලැබුණේ ලෝක බැංකුව වැනි ආයතන හා සංවිධානවලින්. 2022 ඇමරිකා ආණ්ඩුවෙන් තමයි අපට අවශ්‍ය පොහොර ටික සපයා දුන්නේ. නමුත් අපට හැමදාම මේ ආකාරයට යැපෙන්න බැහැ. හැමදාම රටවල්වලින් ආධාර ඉල්ලන්න බැහැ. අපට අවශ්‍ය විදේශ විනිමය අප උපයාගත යුතුයි. ඒ සඳහා මෙරට ආර්ථිකය සූදානම් කළ යුතුයි.

පොරොන්දු ලබාදීමෙන් මේවා කරන්න බැහැ. විදේශ විනිමය උපයා ගැනීමට අවශ්‍ය අලුත් ආර්ථිකයක් රට තුළ ඇතිකළ යුතුයි. එය අපනයන ආර්ථිකයක් විය යුතුයි. මේ කුඩා ප්‍රදේශයෙන් අපට ඉහළ ආදායමක් උපයා ගැනීමට හැකියාව තිබෙනවා එක අතකින් මැණික් කර්මාන්තයෙන් ආදායම් ලැබෙනවා.

ඒ වගේම සංචාරක කර්මාන්තයෙන් ද ආදායම් උපයා ගැනීමේ හැකියාව තිබෙනවා. එක් පැත්තකින් බේරුවල, අලුත්ගම සිට ගාල්ල දක්වා ධීවර කර්මාන්තය තිබෙනවා. මෙය ලෝකය සමඟ ගනුදෙණු කරන නගරයක්. ඒ වගේම ලෝකය සමග තරග කරන නගරයක්. අපේ රටේ අනෙක් ප්‍රදේශද මේ අන්දමින් සැලසුම් කළයුතුයි.

අප රටක් ලෙස ඉදිරියට යනවා නම් අපේ උත්සාහයෙන් විදේශ විනිමය උපයාගත යුතුයි. ඕනෑම කෙනෙක්ට ඕන දෙයක් කියන්න පුළුවන්. නමුත් ප්‍රතිඵල තිබෙන්න ඕන.

මට අවශ්‍ය මේ වසරේ 2%ක ආර්ථික වර්ධනයක් ඇති කිරීමට. එය කුඩා ප්‍රමාණයක් වුවත් පසුගිය වසරේ මෙරට ආර්ථිකය සෘණ 7%ක් දක්වා කඩා වැටී තිබු බව සිහිපත් කළයුතුයි. නමුත් දැන් අප ක්‍රමයෙන් ඉදිරියට එමින් සිටිනවා. 2025 වසරේදී එම ආර්ථික වර්ධනය ධන 5%ක් දක්වා ඉහළ නංවා ගැනීමට අප අපේක්ෂා කරනවා. ඉන් පසුව 7% - 8%ක ආර්ථික වර්ධනයක් ඉලක්ක කර ගනිමින් අප ඉදිරියට යා යුතුයි. මේ අන්දමින් කටයුතු කළහොත් වසර 05ක් තුළ රට ගොඩගැනීමට හැකියාව තිබෙනවා.

අද රටේ සියලු පුරවැසියන් ජීවන වියදම පිළිබඳ ගැටළුවකට මුහුණ දී සිටිනවා. අපි සියලුදෙනා එකතුව රටේ සැබෑ තත්ත්වය පිළිබඳව අවබෝධයක් ඇතිව ඉදිරියට ගියහොත් වසර 02ක් යන විට මෙම තත්ත්වයෙන් නිදහස් වීමට හැකි වන බව මම විශ්වාස කරනවා.

එසේ ගොඩනගන මේ රටේ අනාගතයේ වාසිය හිමි වන්නේ මට නොවෙයි. එම වාසිය ලැබෙන්නේ මෙරට තරුණ ප්‍රජාවටයි. එම තරුණ ප්‍රජාවගේ අනාගතය වෙනුවෙන් හොද ආර්ථිකයක් අපි ඇති කරනවා කියා මම ප්‍රකාශ කරන්න කැමතියි.

මෙහිදී අදහස් දැක්වූ රාජ්‍ය අමාත්‍ය චාමර සම්පත් දසනායක :

මැණික් හා ස්වර්ණාභරන කර්මාන්තයේ නියුතු බොහෝ පිරිසක් අද බදු පිළිබඳ ගැටළුවලට මුහුණ දී සිටිනවා. එම ගැටළු විසඳීම සම්බන්ධව ජනාධිපතිතුමාගේ අවධානය යොමුව තිබෙනවා.

මුදල් අමාත්‍යවරයා ලෙස බදු පිළිබඳ කතා කිරීමට හැකියාව තිබෙන්නේ ජනාධිපතිවරයාට. අප බලාපොරොත්තු වෙනවා එතුමා මේ ක්ෂේත්‍රයේ ප්‍රශ්න විසදා මැණික් කර්මාන්තය විදේශ විනිමය උපයන ප්‍රධාන ක්ෂේත්‍රයක් බවට නගා සිටුවනු ඇතියි කියා.
ඇතැමුන් ජනාධිපති වීමේ අපේක්ෂාවෙන් “සූට්” මහගෙන ඉන්නවා. නමුත් මෙම ප්‍රශ්නවලට විසදුම් ලබා දීමට ඔවුන්ට හැකියාවක් නැහැ. එම විසදුම් ලබාදිය හැක්කේ ජනාධිපතිතුමාට පමණයි.

එදා මේ රට තිබු තත්ත්වය ඔබ කවුරුත් දන්නවා. එදා ඩීසල් තැබුණේ නැහැ. ජනතාව පෙට්‍රල් ෂෙඩ්වල ඇණ කොටා ගත්තා. එම තත්ත්වය අවසන් කළේ ජනාධිපතිතුමා.අපි මේ රට නැවත භාර දෙන්නේ එය හොද තැනකට ගෙන ඒමෙන් පසුවයි .

මෙම අවස්ථාවට රාජ්‍ය අමාත්‍ය පියල් නිශාන්ත ද සිල්වා, හිටපු කතානායක කරු ජයසූරිය, හිටපු අමාත්‍ය ඒ.එච්.එම් ෆවුසි, පාර්ලිමේන්තු මන්ත්‍රීවරුන් වන වජිර අබේවර්ධන, රාජිත සේනාරත්න, චීන කොටුව මැණික් හා ස්වර්ණාභරණ වෙළෙඳ සංගමයේ සභාපති, පාර්ලිමේන්තු මන්ත්‍රී මර්ජාන් ෆලීල්, “Gem Sri Lanka 2024” මැණික් හා ස්වර්ණාභරණ ප්‍රදර්ශනයේ සභාපති හිල්මි කාසීම්, උපසභාපති රිස්වාන් නයීම් යන මහත්වරුන් ද, විදේශීය තානාපතිවරු, චීන රජයේ නියේජිතයන් ඇතුළු දෙස් විදෙස් ආරාධිත පිරිසක් මෙම අවස්ථාවට එක්ව සිටියහ.