පුවත්

සජීවී විවාදයකට පැමිණෙන ලෙස මව්බිම ජනතා පක්ෂයේ නායක දිලිත් ජයවිර විසින් කරන ලද අභියෝගය ජනතා විමුක්ති පෙරමුණේ සහ ජාතික ජන බලවේගයේ නායක අනුර දිසානායක විසින් ප්‍රතික්ෂේප කර සිටියේ ය.

ඒ විද්‍යුත් නාලිකාවක් සමග පැවති සාකච්ඡාවකදී අදහස් දක්වමින් ය.

එහිදී අනුර දිසානායක මන්ත්‍රීවරයා සඳහන් කර සිටියේ තමන් සහ සමග විවාදයකට පැමිණීමට පෙර දිලිත් ජයවිර මහතා ප්‍රාදේශීය සභාවක හෝ මන්ත්‍රී ධුරයක් දැරිය යුතු බවයි.

එනිසා ඔහු සමග විවාදයක් තමන්ට නැති බවද මන්ත්‍රීවරයා පැවසීය .

යාල ජාතික උද්‍යානයේ ප්‍රධාන පිවිසුම අද (09) සිට දින නියමයක් නැතිව වසා ඇති බව වාර්තා වෙයි .

වාර්තා වන ආකාරයට පවතින අධික වැසි තත්වයත් සමඟ යාල වනෝද්‍යානය අද පෙරවරුවේ සිට ජලයෙන් යටවී ඇති අතර ඒ අනුව පාලනාධිකාරිය විසින් මෙම තීරණය ගෙන ඇත .

යාල වනෝද්‍යාලයේ ප්‍රධන පිවිසුමට පැමිණෙන සියලු මාර්ගය ජලයෙන් යටවී ඇති අතර උද්‍යානය තුළ මාර්ගවලින් අඩක් මේ වන විට ජලයෙන් යටවී ඇති බවත් වාර්තා වෙයි .

එසේම මේ වන විට උද්‍යානය තුළ ඇති සංචාරක නිකේතන 06ක් වසා දමා ඇති බවද සංචාරක නිකේතන දෙකක කොටු වී සිටි සංචාරකයින් පිරිසක් අද පෙරවරුවේදී ආරක්ෂිතව රැගෙන ආ බවද වාර්තා වෙයි .

කෙසේ වුවත් කටගමුව හා ගල්ගේ පිවිසුම් දෙක තවමත් විවෘත කොට තිබෙන බවත් වාර්තා වෙයි .

එමෙන්ම කිරින්ද දෙස සිට යාල උද්‍යානයට පිවිසෙන මාර්ගය මෙන්ම උද්‍යානයට පිවිසෙන යෝදකන්ඩිය හරහා සිතුල්පව්ව මාර්ගයද ජලයෙන් යටවී ඇති බවත් දැනගන්නට ඇත .

රටට අවශ්‍ය අතිරික්ත දියර කිරි නිෂ්පාදනය සඳහා කෘෂිකර්ම දෙපාර්තමේන්තුව විසින් සුළු හා මධ්‍ය පරිමාණ ගොවීන් ශක්තිමත් කිරීමට මේ වන විට පියවර ගනිමින් සිටින බව පශු සම්පත් සංවර්ධන රාජ්‍ය අමාත්‍ය ඩී. බී. හේරත් පැවසීය.

දැනට පවතින දියර කිරි කර්මාන්ත ශාලා 06ට අමතරව තවත් නිෂ්පාදනාගාර දෙකක් විවෘත කිරීමට අවශ්‍ය සාකච්ඡා ප්‍රංශ රජය සමග සිදුකර ඇති බව ද අමාත්‍යවරයා සඳහන් කළේය.

පශු සම්පත් සංවර්ධන රාජ්‍ය අමාත්‍ය ඩී.බී. හේරත් මේ බව සඳහන් කර සිටියේ 'ස්ථාවර රටකට සැවොම එක මඟකට' මැයෙන් අද (09) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

එහිදී වැඩිදුරටත් අදහස් දැක්වූ පශු සම්පත් සංවර්ධන රාජ්‍ය අමාත්‍ය ඩී.බී හේරත් මෙසේද පැවසීය.

රටට අවශ්‍ය දියර කිරි ප්‍රමාණයෙන් අප ස්වයංපෝෂිත නැහැ. ජාතික අවශ්‍යතාවයෙන් 40%ක් පමණයි නිෂ්පාදනය කරන්නේ. ඉතිරි 60% ක ප්‍රමාණය ආනයනය සදහා රුපියල් බිලියන 34කට වැඩි ප්‍රමාණයක් වැය කිරීමට අපට සිදුව තිබෙනවා. වසරකට අපට කිරි ලීටර් මිලියන හත්සිය පනහක් අවශ්‍ය වුවත් අප විසින් නිෂ්පාදනය කරනු ලබන්නේ, ලිටර් මිලියන 350ක් පමණයි.

පවතින තත්ත්වය සැලකිල්ලට ගනිමින් අතිරික්ත දියර කිරි නිෂ්පාදනය සඳහා කෘෂිකර්ම දෙපාර්තමේන්තුව විසින් සුළු හා මධ්‍ය පරිමාණ ගොවීන් ශක්තිමත් කිරීමට මේ වන විට පියවර ගෙන තිබෙනවා.

ඒ වගේම දියර කිරි ප්‍රචලිත කිරීමේ වැඩසටහන යටතේ ප්‍රංශ ආධාර සහිතව කර්මාන්ත ශාලා 06 ක් ආරම්භ කළා. වාරියපොල, වෙන්නප්පුව, අත්තනගල්ල, කොළඹ සහ පොලොන්නරුව කේන්ද්‍ර කර ගනිමින් කර්මාන්ත ශාලා ආරම්භ කර තිබෙනවා.

මීට අමතරව නාවලපිටිය ප්‍රදේශයේ දියර කිරි නිෂ්පාදනාගාරයක් විවෘත කළා. මෙම කර්මාන්ත ශාලාවට අවශ්‍ය කිරි සැකසුම් උපකරණ ආනයනය කිරීම සහ දේශීය කාර්මිකයන් පුහුණු කිරීම සදහා රුපියල් ලක්ෂ 600ක ආධාර ප්‍රංශ රජය මගින් ලබා දීමට කටයුතු කර තිබෙනවා. ඒ සදහා අවශ්‍ය ගොඩනැගිලි සහ අනිකුත් ඉදිකිරීම් සඳහා නාවලපිටිය විවිධ සේවා සමූපකාර සමිතිය රුපියල් මිලියන 60 ක් වැය කළා. මෙම කර්මාන්ත ශාලාව මගින් දිනකට කිරි ලීටර් 5000ක් පරිභෝජනය සදහා නිකුත් කෙරෙනවා.

ඒ වගේම යාපනය සහ කිළිනොච්චිය ප්‍රදේශවල මෙවැනි කර්මාන්ත ශාලා ආරම්භ කිරීම සදහා ප්‍රංශ රජය දැනුවත් කර තිබෙනවා. මෙවර අයවැයෙන් ද මිලියන 250ක් වෙන් කර තිබෙනවා. විශේෂයෙන් එළු කර්මාන්තය දියුණු කිරීම සදහා මිලියන 200 ක් ලබා දී තිබෙනවා.

ඒ වගේම තීරුබදු සහන සහිතව විදෙස් රටවලින් ගෙන එන සත්ත්ව ආහාර සාධාරණ මිලට ගොවියාට ලබාදීමට අවශ්‍ය කටයුතු කරන ලෙස සත්ත්ව නිෂ්පාදන සෞඛ්‍ය දෙපාර්තමේන්තුට උපදෙස් ලබා දී තිබෙනවා.

යුද්ධයෙන් පීඩාවට පත් ජනතාවට සහන සැලසීම සඳහා ශ්‍රී ලංකාවේ සත්‍ය, සමගිය සහ ප්‍රතිසන්ධාන කොමිෂන් සභාව නමින් නව කොමිෂන් සභාවක් පිහිටුවීමට අදාළ පනත් කෙටුම්පත පාර්ලිමේන්තුවේදී අද (9) වැඩි ඡන්ද 41 කින් සම්මත විය.

පනතට පක්ෂව ඡන්ද 48 ක් ලැබුණු අතර ඊට විරුද්ධව ලැබුණේ ඡන්ද 7ක් පමණි.

ඡන්දය විමසන අවස්ථාවේ සභා ගර්භයේ සිටි ආණ්ඩු පක්ෂයේ මන්ත්‍රීවරු පනතට පක්ෂව ඡන්දය ප්‍රකාශ කළහ.

වඩාත් විශේෂ සිදුවීම වූයේ දෙමළ ජාතික සන්ධානය ඇතුළු ද්‍රවිඩ දේශපාලන පක්ෂවල මන්ත්‍රීවරුන් ඡන්දය ප්‍රකාශ කළේ පනතට විරුද්ධවය.

එහිදී දෙමළ ජාතික ජනතා පෙරමුණේ පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම් පනත් කෙටුම්පතට ඡන්දයක් අවශ්‍ය බව මුලසුනට දැන්වු අතර ඡන්ද විමසීම සිදුකෙරුණේ ඒ අනුවය.

ජාතික ජන බලවේගයට මුතු මැණික් කැට දුසිම් ගණන් එකතු වෙන විට විපක්ෂ නායකවරයා ගලි බවුසරයෙන් කුණුගොඩවල් බාගනිමින් සිටින බව ජනතා විමුක්ති පෙරමුණේ හිටපු පළාත් සභා මන්ත්‍රී නලින් හේවගේ පවසයි.

ඔහු මේ බව සඳහන් කර සිටියේ ජාතික ජන බලවේගයේ ජන හමුවක් අමතමින් ය.

පාලකයන් මැතිවරණයක් කිට්ටු වන විට විදුලි ගාස්තු අඩු කිරීමට සූදානම් වන බවත් ඉන් පසුව ටකරන්, සිල්රෙදි, අරක්කු බෙදණු ඇති බවත් ජනතාවද ඊට රැවටී ඡන්දය ලබාදෙනු ඇති බවත් ඔහු එහිදී පැවසීය.

කෙසේ නමුත් එම පොත අයිති අතීතයට බවත් අනාගතයට එය අයිති වන්නට ඉඩ නොතබන බවත් ජවිපෙ හිටපු පළාත් සභා මන්ත්‍රීවරයා වැඩිදුරටත් කියා සිටියේය.

චීන අග්‍රාමාත්‍ය ලී කියෑං (Li Qiang) විසින් අග්‍රාමාත්‍ය දිනේෂ් ගුණවර්ධන මහතා වෙත චීනය වඩාත් ශුභ ලෙස සලකන ‘මකරාගේ වසර’ සඳහා අලුත් අවුරුදු සුබපැතුම් පිරිනැමීය.

ශ්‍රී ලංකාවේ චීන තානාපති කිව් ෂෙන්හොං (Qi Shenhong) අද (09) කොළඹ අරලියගහ මන්දිරයේ දී අග්‍රාමාත්‍යවරයා හමුවී චීන අග්‍රාමාත්‍යවරයාගේ විශේෂ සුබපැතුම් පත්‍රය භාර දුන්නේය.

ශ්‍රී ලංකාව තුළ පවතින දුෂ්කරතා මඟහරවා ගැනීමට ඇති හැකියාව දැකීමට සතුටු වන බව පැවසූ තානාපතිවරයා අතර කෘෂිකර්මාන්තය නවීකරණය කිරීමට ශ්‍රී ලංකාව දරන ප්‍රයත්නයන්ට චීනයේ අඛණ්ඩ සහයෝගය ලබා දීමටද සහතික විය.

ඉහළ අස්වැන්නක් ලබා දෙන සහල් වගාව සංවර්ධනය කිරීම පිළිබඳ චීන විශේෂඥ දැනුම ශ්‍රී ලංකාව සමඟ බෙදා ගැනීමේ වැඩසටහනක් චීනය විසින් ආරම්භ කරන බවත් එය ඉදිරි යල කන්නයේදී දියත් කරන බවත් චීන තානාපතිවරයා පැවසීය.

අග්‍රාමාත්‍ය ලේකම් අනුර දිසානායක  සහ චීන ජ්‍යෙෂ්ඨ රාජ්‍ය තාන්ත්‍රිකයින් පිරිසක් ද මෙම අවස්ථාවට එක්ව සිටියහ.

සමගි ජන බලවේගයේ බදුල්ල දිස්ත්‍රික් පාර්ලිමේන්තු මන්ත්‍රී චමින්ද විජේසිරි අද (09) තම පාර්ලිමේන්තු මන්ත්‍රී ධුරයෙන් ඉල්ලා අස්වූ අතර ඊට හේතුව පක්ෂ නායක සජිත් ප්‍රේමදාස ගේ ඉල්ලීමක් බව වාර්තා වෙයි .

චමින්ද විජේසිරි මන්ත්‍රීවරයා අද පාර්ලිමේන්තුවේදී විශේෂ ප්‍රකාශයක් කරමින් සිය ඉල්ලා අස්වීම නිවේදනය කළ අතර තම ඉල්ලා අස්වීමේ ලිපිය කථානායකවරයාට භාර දුන් බවද පැවසීය .

එහිදී මන්ත්‍රීවරයා කියා සිටියේ ජනතාව කැමති පාර්ලිමේන්තුවක් පත්කර ගැනීමට මැතිවරණයක් තබන්නයි ඉල්ලා සිටින බවයි .

කෙසේ වුවත් දේශපාලන ආරංචි මාර්ග සඳහන් කරන්නේ සජබ නායක සජිත් ප්‍රේමදාස ගේ බිරිඳ ගේ මස්සිනා වන නයන වාසල තිලක හට පාර්ලිමේන්තුවට පැමිණීමට ඉඩදීම වෙනුවෙන් මෙම ඉල්ලා අස්වීම සිදුවූ බවයි.

මේ සම්බන්ධයෙන් වැඩිදුරටත් වාර්තා වන දේශපාලන ආරංචි මාර්ග සඳහන් කරන ආකාරයට සිදුවීම මෙසේය

එළැඹෙන ජනාධිපතිවරණයේ අපේක්ෂකයකු ලෙස ඉදිරිපත් වීමට නියමිත සජබ නායක සජිත් ප්‍රේමදාස ගේ මැතිවරණ ප්‍රචාරක ව්‍යාපෘතියේ වියදම් පාර්ශ්වය නයන වාසල තිලක බාරගෙන ඇති අතර ඒ වෙනුවෙන් වන කොන්දේසියක් ලෙස තමන්ට ජනාධිපතිවරණයට පෙර පාර්ලිමේන්තු මන්ත්‍රී ධූරයක් අවශ්‍ය බවට නායකත්වය දැනුවත් කර ඇත .

ඒ අනුව චමින්ද විජේසිරි ට පසුව බදුල්ල දිස්ත්‍රික්කයේ සජබ මනාප ලයිස්තුව තුළ ඊළඟ වෙන්ඩ මන්ත්‍රී ලෙස නයන සිටින බැවින් සජබ නායක සජිත් ගේ ඉල්ලීම අනුව චමින්ද විජේසිරි සිය මන්ත්‍රී ධූරයට සමුදී ඇත.

කෙසේ වුවත් මේ වන විට එය මුදල් ගනුදෙනුවක් තුළ සිදුවූවක් බවටද ප්‍රචාරයක් යමින් ඇති නමුත් අප ඒ ගැන විමසීමට හිටපු පාර්ලිමේන්තු මන්ත්‍රී චමින්ද සම්බන්ධ කර ගැනීමට උත්සාහ කළත් සාර්ථක වූයේ නැත.

මේ අතර නයන වාසල තිලක සම්බන්ධයෙන් පළවන මාධ්‍ය වාර්තා අනුව ඔහු LPL ක්‍රිකට් තරගාවලියේ ගාල්ල ටයිටන්ස් කණ්ඩායමේ හිමිකරු වෙයි. එසේම ඕස්ට්‍රේලියාව කේන්ද්‍ර කරගෙන ව්‍යාපාර කටයුතු සිදුකර ඇති අතර එහිදී මැච් ෆික්සින් චෝදනා ඇති බවටද මාධ්‍ය වාර්තා පළවී ඇත.

මේ සම්බන්ධයෙන් චැතම් ස්ට්‍රීට් ජර්නල් youtube නාලිකාවේ පළවූ වීඩියෝව පහත දැක්වෙයි .

රාජ්‍ය සේවකයන් සඳහා 2024 අයවැය මඟින් එළැඹෙන අප්‍රේල් මාසයේ සිට ගෙවීමට යෝජිතව තිබූ රුපියල් 10,000 ක ජීවන වියදම් දීමනාවෙන් රුපියල් 5,000ක් ජනවාරි මාසයේ සිට ලබාදීමට ජනාධිපතිවරයා විසින් කල යෝජනාවට අමාත්‍ය මණ්ඩල අනුමැතිය හිමිවී තිබේ.

මුදල් අමාත්‍යවරයා ලෙස ජනාධිපති රනිල් වික්‍රමසිංහ විසින් අමාත්‍ය මණ්ඩලය වෙත ඉදිරිපත් කළ අමාත්‍ය මණ්ඩල පත්‍රිකාවට මෙසේ අනුමැතිය හිමිව ඇත .

වෛද්‍යවරුන් සඳහා ගෙවනු ලබන DAT දීමනාව ඉහළ දැමීම සඳහා ජනපති සිදුකළ යෝජනාවට කැබිනට් අනුමැතිය හිමිව තිබේ.

ඒ අනුව මෙතෙක් වෛද්‍යවරුන් සඳහා ගෙවනු ලැබූ DAT දීමනාව රුපියල් 35,000 සිට 75,000 දක්වා වැඩිකර තිබේ .

මීට අමතරව විශ්වවිද්‍යාල ආචාර්යවරුන්ගේ අධ්‍යයන දීමනාව ඉහළ දැමීමට ජනපති කළ යෝජනාවට ද කැබිනට් අනුමැතිය හිමිව ඇත.

ඒ අනුව සියයට 25කින් ඉහළ දැමෙන විශ්වවිද්‍යාල ආචාර්යවරුන්ගේ අධ්‍යයන දීමනාව ජනවාරි මාසයේ සිට ඔවුන්ගේ වැටුපට එකතු වීමට නියමිතය.

තරුණයෙක්ට දේශපාලන වශයෙන් ශක්තිමත් වීමට හොඳම අවස්ථාව මෙය යැයි තමන් විශ්වාස කරන බවත් පක්‍ෂය සහ රට ගොඩනැගීමේ අභියෝගය ඕනෑම අවස්ථාව භාරගැනීමට සූදානම් බවත් පාර්ලිමේන්තු මන්ත්‍රී නාමල් රාජපක්ෂ පවසයි.

මන්ත්‍රීවරයා මේ බව සඳහන් කර සිටියේ අද (08) බත්තරමුල්ල, නෙළුම් මාවතේ පිහිටි පොදුජන පෙරමුණ මූලස්ථානයේදී මාධ්‍යයට අදහස් දක්වමින් ය.

වර්තමාන ජනාධිපති රනිල් වික්‍රමසිංහ මහතා යහපාලන ආණ්ඩුය හරහා රට භාරගන්නා විට 2020 වසරේ රට ණය බරින් නිදහස් කරන බව පැවසුවත් නැවත වතාවක් බලයට ඇවිත් ණය ප්‍රතිව්‍යුහගතකරණය කරමින් සිටින බවත් සෑම දේශපාලඥායෙක්ටම සුරංගනා කථා මවා කියන්න පුළුවන් වුවත් එය බිම් මට්ටමේ ක්‍රියාත්මක කරපු පක්‍ෂය පොදුජන පෙරමුණ පමණක් බවත් මන්ත්‍රීවරයා එහිදී පැවසීය .

පොදුජන පෙරමුණෙන් ගැලවෙච්ච අය වෙනත් දේශපාලන පක්‍ෂ ලෙස සන්ධාගතව සිටි අය බවත් ඔවුන් මේ වන විට වෙනත් බලවේග සමඟ එකතුව සිටින බවත් මන්ත්‍රීවරයා සඳහන් කළේය .

ඩලස් අලහප්පෙරුම ඇමතිතුමා තම කඳවුරේ සිටිය යුතු නායකයෙක් යැයි පෞද්ගලිකව විශ්වාස කරන බවත් මහින්ද රාජපක්‍ෂ මහතා 2005 වසරේ බලයට ගේන්න අලහප්පෙරුම මහතා විශාල බලවේගයක් නිර්මාණය කළ කෙනෙක් බවත් මන්ත්‍රීවරයා පැවසීය .

එසේම ජී. එල්. පීරිස් මැතිතුමා සමඟත් සාකච්ඡා කරන්න සූදානම් වුවද ඒ මහතා මේ වන විට සජිත් ප්‍රේමදාස මහතා සමග එකතු සිටින නිසා ඒ පිළිබඳව අනාගතයේ තීරණය කළ යුතු බවත් තමන් අවුරුදු 23 දී දේශපාලනයට එන විට ගොඩක් උපදෙස් දුන්නේ ජී. එල්. පීරිස් මැතිතුමා බවත් පාර්ලිමේන්තු මන්ත්‍රී නාමල් රාජපක්‍ෂ එහිදී වැඩි දුරටත් සඳහන් කළේය.

රටේ තිබෙන දේශපාලන පක්ෂවලට පැවැත්මක් හෝ දැක්මක් නැහැ. එබැවින් ඉදිරියේදී එක රටක්, එක නීතියක්, එක ව්‍යවස්ථාවක් යටතේ රට පවත්වාගෙන යෑමට කටයුතු කරන බව මිහින්තලේ රජමහා විහාරාධිපති වලවාහැංගුන වැවේ ධම්මරතන හිමියෝ කියා සිටියහ.

“රට හදන මග යළි අරඹමු මිහින්තලාවෙන්“ වැඩසටහන ආරම්භ කරමින් උන්වහන්සේ මේ බව කියා සිටියහ. මෙම වැඩසටහන සඳහා සිවිල් සංවිධාන රැසක සාමාජිකයන් මිහින්තලයට පැමිණ සිටියහ.

මෙහිදී වැඩිදුරටත් අදහස් දැක්වූ ධම්මරතන හිමි කියා සිටියේ රටේ සුබසිද්ධිය වෙනුවෙන් පාර්ලිමේන්තු මැතිවරණයට සේම ජනාධිපතිවරණයට ද සූදානම් බවයි.

“එක දේශපාලන පක්ෂයකින්, එක ලකුණකින් ලංකාව පුරා විවිධ වෘත්තිකයන් ඉදිරිපත් කිරීමට කටයුතු කරනවා. අලුතින් දේශපාලන පක්ෂ ලියාපදිංචි කිරීමක් සිදු කරන්නේ නැහැ. දේශපාලන පක්ෂ ගණනාවක් මේ වනවිටත් මා ඇතුළු පිරිසට පූජා කර තිබෙනවා. ජලය,විදුලිය සහ බදු යන සියලු කාරණාවලට අප ළඟ විසඳුම් තිබෙනවා. උද්ධච්ච දරදඬු පාලකයන්ට තවදුරටත් රැඳෙන්නට ඉඩදිය නොහැකියි. එම සියලු දෙනාම “ගෝ හෝම්“ නොව “ගෝ ජේල්“ විය යුතුයි. හොරකම් කළ දේශපාලකයන් සියලු දෙනාම සිරගත කරනවා. ඒවාගේම දේශපාලනඥයන් දේපොළ සොයාගත් ආකාරය රටට අනාවරණය කළයුතු“ යැයි ද උන්වහන්සේ පැවසූහ.

ජාතික සංඝ සම්මේලනයේ සභාපති ලියන්වල සාසනරතන හිමියන් මෙහි දී කියා සිටියේ රට හැදීමේ මග මීට වසර 2332 කට පෙර මිහින්තලාවෙන් ආරම්භ කළා සේ එය නැවත ආරම්භ කරනු ලබන්නේ ද මිහින්තලාවෙන්ම බවය.

“මිහින්තලා ඓතිහාසික පුදබිමේ වැඩ අකර්මන්‍ය කිරීම පිළිබඳ දිගින් දිගටම සිවිල් සංවිධාන, උගත් බුද්ධිමත් වියතුන් සෑම කෙනෙක්ම පාහේ කතා බහට ලක්කරන කාරණාවක්. මිහින්තලේ පුදබිමේ ආරක්ෂාව පිළිබඳව අද ගැටලුකාරී තත්ත්වයක් මතුවෙලා. බුද්ධාගම ආරක්ෂා කිරීමේ වගකීම මෙරට පාලකයන්ට පැවරී තිබෙනවා. ඒත් රටේ පාලකයන් එය අමු අමුවේ උල්ලංඝනය කරමින් සිටින බව පේනවා. මිහින්තලා පුදබිම ආරක්ෂා කිරීමට නොහැකි තත්ත්වයට තක්කඩි බටහිර ගැති දේශපාලන සංස්කෘතිය පත්වෙලා. ජාතිකවාදී සිංහල බෞද්ධයාට පහර ගසමින් රට පාලනය කිරීමට කිසිසේත්ම නොහැකි “ යැයි ද උන්වහන්සේ පැවසූහ.

– Aruna

බංග්ලාදේශයේ පසුගියදා පැවැත්වූ පාර්ලිමේන්තු මැතිවරණයේදී විශිෂ්ඨ ජයග්‍රහණයක් ලබා ගනිමින් නැවතත් එරට අග්‍රාමාත්‍ය ධූරයට තේරී පත් වු ෂෙයික් හසීනා වෙත ශ්‍රී ලංකා රජය සහ ජනතාව වෙනුවෙන් ජනාධිපති රනිල් වික්‍රමසිංහ සිය උණුසුම් සුබ පැතුම් පිරිනැමීය.

ෂෙයික් හසීනා මහත්මිය වෙත විශේෂ සුබපැතුම් පණිවිඩයක් යොමු කරමින් ජනාධිපති රනිල් වික්‍රමසිංහ පෙන්වා දී ඇත්තේ ෂෙයික් හසීනා මහත්මිය මෙතෙක් බංග්ලාදේශ ජනතාවට ලබා දුන් දක්ෂ හා දූරදර්ශී නායකත්වය මෙම විශිෂ්ඨ ජයග්‍රහණයට ඉවහල් වූ බවයි.

ෂෙයික් හසීනා මහත්මියගේ පාලන කාලය තුළ ශ්‍රී ලංකාව සහ බංග්ලාදේශය අතර සමීප සහ මිත්‍රශීලී ද්විපාර්ශ්වික සබඳතා වඩාත් ශක්තිමත්ව ඉදිරියට පැමිණි බව සිය සුබ පැතුම් පණිවිඩයේ සඳහන් කර ඇති ජනාධිපතිවරයා ඉදිරියේ දී එම සබඳතා තවදුරටත් පුළුල් කර ගනිමින් දෙරටේම ජනතාවට අන්‍යෝන්‍ය ප්‍රතිලාභ සැලසෙන අයුරින් ඉදිරියට ගෙන යාමට හැකිවනු ඇති බවට ද විශ්වාසය පළ කර තිබේ.

හැකි විගස ශ්‍රී ලංකාවේ සංචාරයක නිරත වන ලෙසද ෂෙයික් හසීනා මහත්මිය වෙත ඇරයුම් කර ඇති ජනාධිපතිවරයා ශ්‍රී ලංකාව සහ බංග්ලාදේශය අතර දේශපාලන, ආර්ථික සහ සංස්කෘතික සබඳතා වැඩිදියුණු කර ගනිමින් දෙරට අතර අන්‍යෝන්‍ය විශ්වාසය සහ මිත්‍රත්වය වැඩිදියුණු කර ගැනීමට එම සංචාරය ඉවහල් වනු ඇති බවත් සිය සුබපැතුම් පණිවිඩයේ වැඩිදුරටත් සඳහන් කර ඇත.

පසුගිය සමයේ ෂෙයික් හසීනා මහත්මියගේ පෞද්ගලික මැදිහත්වීම මත බංග්ලාදේශය ශ්‍රී ලංකාවට ලබා දුන් සුවිශේෂී සහාය පිළිබඳව ද සිහිපත් කර ඇති ජනාධිපතිවරයා ෂෙයික් හසීනා මහත්මිය ශ්‍රී ලංකාව සහ ජනතාව කෙරෙහි දක්වන ලැදියාව සහ හිතෛෂීභාවයද කෘතවේදීව අගය කර තිබේ.

බංග්ලාදේශ ජනතාවගේ අඛණ්ඩ ප්‍රගතිය සහ සමෘද්ධිය වෙනුවෙන් කටයුතු කිරීමට අග්‍රාමාත්‍ය ෂෙයික් හසීනා මහත්මිය වෙත නිදුක් නිරෝගි සුව ප්‍රාර්ථනා කරන ජනාධිපති රනිල් වික්‍රමසිංහ ඇයගේ ඉදිරි කටයුතු වෙනුවෙන් ද සිය හෘදයාංගම ශුභාශිංසන පළ කර ඇත.

විපක්ෂ නායක සජිත් ප්‍රේමදාස විසින් ශ්‍රේෂ්ඨාධිකරණය හමුවේ අද (08) මූලික අයිතිවාසිකම් පෙත්සමක් ගොනුකර ඇත.

ඒ දැනට අයකරන විදුලි ගාස්තු අඩු නොකිරීම හේතුවෙන් තම මූලික අයිතිවාසිකම් කඩ වී ඇති බව සඳහන් කරමිනි.

ලංකා විදුලි බල මණ්ඩලය, ශ්‍රී ලංකා මහජන උපයෝගිතා කොමිසම, විදුලිබල අමාත්‍යවරයා හා එම අමාත්‍යංශයේ ලේකම්වරයා ඇතුළු පිරිස මෙහි වග උත්තරකරුවන් ලෙස නම් කර ඇත.

කෙසේ වෙතත් මේ සම්බන්ධයෙන් එම පක්ෂ අභ්‍යන්තරයේ කතා බහක් මතුව ඇත්තේ , පක්ෂය නියෝජනය කරන මන්ත්‍රීවරයකු හෝ බහුජන සංවිධාන නියෝජිතයකු යොමුකර සිදුකළ යුතු කටයුත්තක් සඳහා විපක්ෂ නායක ඉදිරිපත්ව සිදුකිරීම ය. ඒ සම්බන්ධයෙන් ඇතමුන්ගේ මතය වී ඇත්තේ තම නායකයා දිගින් දිගටම one man show හැසිරීමක නිරතව සිටින බවයි.

පාර්ලිමේන්තු අවස්ථාවේ පවා විපක්ෂ නායක ලෙස සජිත් අනෙක් විපක්ෂ මන්ත්‍රීවරුන් ට අදහස් දැක්වීමට ඇති කාලය වෙන්කර ගනිමින් කටයුතු කිරීම ද ඔවුන්ගේ විවේචනයට ලක්ව තිබේ.

ජනතාවට යහපත්, අහයපත් ඕනෑම පනතක් පාර්ලිමේන්තුව තුළ සම්මත වන්නේ ප්‍රධාන පක්ෂ කිහිපය එකට එක් වී සිටින නිසා බවත් එහෙත් එය ජනතාවට නොපෙන්වන බවත් මව්බිම ජනතා පක්ෂයේ නායක දිලිත් ජයවීර පැවසීය.

 ඔහු මේ බව ප්‍රකාශ කළේ මහනුවර සහස් උයනේදි ඊයේ (07) පැවති මහනුවර දිස්තික්‍රක් සමුලුව අමතමින්ය.

 "එදා ආපු රතු පෙළපාලි අද එකක්වත් ගොල්ෆේස් එන්නේ නැහැ . ඒ විරෝධතා ඇහෙන්නෙත් නැහැ. අපි සාම්ප්‍රදායිකව දැක්ක වම දකුණ දේශපාලනයට අද කිසිම ප්‍රවේශයක් ගන්නට ප්‍රවාහයක් නැහැ." යැයිද හෙතෙම කිවේය.

 තුන්වැනි ලෝකෙන් "යම" ලෝකයට ගෙන යන මෙම රැඩිකල් පක්ෂ හොරු අල්ලලා ඒවා මිනිස්සුන්ට දෙන බවට සිදු කරන ප්‍රකාශ පුහු කතා බව පැවසු ඒ මහතා රට ඉදිරියට යාමට නම් සියලු දෙනා එකතු වු සභ්‍යත්ව මාවතකට යා යුතු බවද පැවසීය.

 එහිදී හෙතෙම වැඩිදුරටත් මෙසේද කීය.

 "එළියේ තිබෙන දේශපාලන රික්තය නිසා අපිට සොභාවධර්මයා විසින් ලබාදුන් ආශිර්වාදයක් ළෙස සලකා ශ්‍රි ලංකාවේ දේශපාලනය නව මගකට යොමු කිරීම තමයි අපේ අරමුණ. අප රෙට් ඉතිහාසය පුරාම දේශපාලනය බල කඳවුරු දෙකකට බෙදිල තිබුණා. ඒ කඳවුරු දෙකට තිබුණු ඡන්ද අද වෙනස් වෙලා. සමීක්ෂණ වාර්තාවලින් පැහැදිළිව ප්‍රකාශ කරන්නේ සියයට 60 කට වැඩි පිරිසක් ඒ සාම්ප්‍රදායික කඳවුරුවලින් මිදිලා නව විසඳුමකට එමින් සිටින බව. ඒ නව විසඳුම කුමක්ද. ඒ සදහා කිනම් සාධනීය අවකාශයක් ප්‍රවේශයක් තිබේද කියල තමයි සාකච්ඡා කළ යුත්තේ. අවලාද මඩ ගැහිලි මැද අපි ඉදිරියට යන්නේ නැහ. ඉදිරියට ගිහිල්ල තියෙන්නේ සුලු පිරිසක් පමණයි. ශ්‍රි ලංකාවේ තවත් රැකියාවක් හැටියට දේශපාලනයේ නිරතව ඉන්න, මේක වෘත්තියක් විදියට කරගෙන ඉන්න බොහෝ දෙනා මේ දේශපාලනය ඇදගෙන ඇවිත් තියෙනවා මෙතනට. ඒ නිසා තමයි අද රටට මේ තත්වය උද්ගතවෙලා තියෙන්නේ. අපි සංකල්ප හතරක් ගැන කතා කරනවා. සභ්‍යත්වය, ව්‍යවසායකත්ව රාජ්‍ය, අභිප්‍රෙරණය හා උපාය මාර්ගික සැලස්ම. ඒ තමයි ඒ හතර. අපි කතා කරන්නේ මේ හතර ගැන විතරයි. අපි මේ හතරෙන් එළියට දක්කාගෙන යන්න හදන සියලු සාම්ප්‍රදායික දේශපාලනයන්ට දේශපාලන බලවේගවලට මම නැවත නැවත ආරාධනා කරනවා අපි ඔය මඩ වලට ඇදගෙන යන්න එපා කියල. මම සුදාමින් සිටිනවා අනුර කුමාර සහෝදරයා එක්ක සජීව සාකච්ඡාවකට යන්න. මම නැවත නැවත ඔහුට ආරාධනා කරනවා.

 අපිට අවශ්‍ය සාධක අපිම සපුරා ගත යුතුයි. මේ රටේ අද මිනිස්සු දුක්විදින විදිය අපි ඔක්කොම දන්නවා. අන්ත දුගි දුප්පත් තත්වයට රටේ මිනිස්සු සියයට 80ක්ම පත්වෙලා. වැඩිපිරිසකට කරකියා ගන්න දෙයක් නැහ. ලංකාවේ මධ්‍ය පරිමාණ මහාපාරිමාණ සුලු පරිමාණ ව්‍යාපාර සීග්‍රයෙන් වැහිල යනවා. පත්තර බලන විට තේරෙනවා ඇති මේ ව්‍යාපාර කොයිතරම් වෙන්දෙසි දානවද කියල. මේ කෙන් අපි මිදිය යුතුයි. අවලාද නගන මේ බාල දේශපාලනයෙන් අපි මිදිය යුතුයි. අපි ඉස්සරහාට යන්න ඕනෑ. අපේ රටේ තරුණයින්ට අගයක් තියෙන්න ඕනෑ. ජාති ආගම්වලට ගරුකරන ශිෂ්ටාචාරය පළමුවෙන්ම රැක ගත යුතුයි. ඒ තුලින් විතරයි මේ රටේ මානව ප්‍රාග්ධනය මේ සියලු දෙනා අතර එකතු වෙන්න පුලුවන් ක්‍රමය. පවතින දේශපාලන ප්‍රවාහය තුළ ප්‍රධාන පක්ෂ වන එජාපය, සජබ, ජාතික ජනබල වේගය, පොහොට්ටුව එක තැනකට එකතු වෙලා. ඒකයි පාර්ලිමේන්තුවේ හැම පනතක්ම සම්මත වෙන්නේ. මිල වැඩි කිරීම්, බදු වැඩිකිරීම් ඕනෑම වෙලාවක කරන්න පුලුවන්. ඔක්කොම එකට ඉන්නේ.

 ගමේ ඉන්න සෑම දුප්පත් මනුස්සයෙක්ම පවුලක්ම ගන්න සමෟද්ධිය කියන අටමගලය නැති කරල ඒ මිනිස්සු බලාත්මක කරමු. ඒ අය කීයක් හරි උපයා ගන්න වැඩපිළිවෙලකට යොමු කරමු. ඒකට තමයි ව්‍යවසායකත්ව රාජ්‍ය කියන්නේ. ඒ තුලින් ඇතිවෙන ප්‍රතිපලයක් ලෙස අන්තිම දුගි පැලටත් ඔවුන්ගේ විශ්වාසය මත කටයුතු කළ හැකියි. ඔවුන්ට සතුටින් ජිවත් වීමේ පරිසරයක් නිර්මාණය කළ යුතුයි. එයින් අදහස් වෙන්නේ නැහ ලංකාවේ ව්‍යවසායකයා අපි අමතක කළා කියලා. අද රටේ ව්‍යවසායකයා අතින් රටට ලොකු සේවයක් වෙනවා. ඔවුන් තමයි රැකියා ටිකවත් ලබල දෙන්නේ. රජය ගෙන යන මේ බදු ප්‍රතිපත්තියට වැඩිදුරක් යන්න වෙන්නේ නැහ.

අද ලෝකේ සෑම රටක් දියුණු වෙලා තියෙන්නේ ව්‍යවසායකත්ව රාජ්‍යක් තුලින්. වසර 70ක් දුක්වින්ද ඉන්දියාව අද දියුනු වෙලා තියෙන්නේ මේ ව්‍යවසායකත්ව රාජ්‍ය මෝදි විසින් ඇතිකළ නිසා. ජනතාවගේ ඔලුවට හැමෝම සෘණාත්මක දේවල් පමණක් දැම්මොත් කවදාමත්ම මේ ජාතිය ගොඩ එන්නේ නැහ. ඒ නිසා තමයි අපි මේ සෘණාත්මක ප්‍රවේශය ප්‍රතික්ෂේප කරන්නේ. අපි කතාකරන්නෙ කරන්න පුලුවන් දේ ගැන පමණයි. අපේ ජනතාව දැනුම බුද්ධියෙන් පිරි පිරිසක්. අපි කියන මේ හැමදේකටම උපාය මාර්ගික සැලැස්මක් තියෙනවා. අපි කතා කරන්නේ ප්‍රතිපත්ති ප්‍රකාශණයේදිත් උපාය මාර්ගික සැලස්ම ගැන පමණයි. ඒකට දින වකවානු තිබෙනවා. ඒ අනුව වැඩකරල ඔබ හැම අභිප්‍රේරණය කරලා ජාතිකත්වය මත පදනම් වු රජයක් තුළ මේ වැටුණු වලෙන් ගොඩ ඒමට පුලුවන් කමක් තිබෙනවා. සාප්‍රදායික දේශපාලන බලවේග එක්ක හැප්පෙන එක ඉතාම දුෂ්කර කාර්යයක්. නමුත් අපි ඊට වඩා එහාට ගිය උපාය මාර්ගික වැඩපිලිවෙළක් තුළ ජයග්‍රහණය කාර ගොස් ඉල්ලක ගත වැඩපිලිවෙළකට අනුව කටයුතු කරනවා. සාම්ප්‍රදායික දේශපාලන ගති ලක්ෂ අපි දන්වා ඒවා අතික්‍රමණය කරමු."

‘ධම්මික පෙරේරාට පොහොට්ටුව දීලා තියෙන්නේ ලණුවක්. නිකන් ලණුවක් නෙමේ දිරච්ච ලණුවක්. ව්‍යාපාර පිළිබඳව අද්දැකීමක් තිබුනට දේශපාලනය ගැන අද්දැකීමක් නැහැ’ පාර්ලිමේන්තු මන්ත්‍රී නිමල් ලාන්සා පවසයි.

මන්ත්‍රීවරයා මේ බව පවසා ඇත්තේ අද (07) ප්‍රමුඛ පෙළේ ව්‍යාපාරික පිරිසක් සමඟ කොළඹ දී පැවති හමුවකින් අනතුරුව මාධ්‍ය වෙත අදහස් දක්වමින්ය.

එහිදී නිමල් ලන්සා මන්ත්‍රීවරයා මෙසේද පවසා සිටියේය.

“ඉතාමත් පැහැදිලිව කියන්න ඕනේ ඉස්සෙල්ලා එන්නේ ජනාධිපතිවරණයක්. ජනාධිපතිවරණයට රනිල් වික්‍රමසිංහ මහතා තරග කරයි කියලා අපිට ලොකු විශ්වාසයක් තියෙනවා. රටේ විශාල පිලිගැනීමක් තියෙනවා එතුමා වැටුනු රට යම් ක්‍රමයකට ගොඩගත්තා කියන එක පිළිබඳව. මේ ක්‍රමය දිගටම පැවතුනොත් රටේ ආර්ථිකය ගොඩගන්න පුලුවන් කියන එක ජනතාව විශ්වාස කරනවා. කයිවාරුකායින්, බොරු කාරයින් ඇවිල්ලා එක එක ඒවා කියලා රට ආයෙත් ආපස්සට යන්න පුලුවන්. ඒ නිසා ජනාධිපතිතුමාට ඉල්ලන්න කියලා රටේ මතයක් ගොඩනැගිලා තියෙනවා.

ධම්මික පෙරේරා කියන්නේ හොඳ ව්‍යාපාරිකයෙක්. ව්‍යාපාරික ඥාානය තිබුනට එතුමට දේශපාලන ඥානය නැහැ. පොහොට්ටුව කිව්වා කියනවා, එතුමා ජනාධිපති අපේක්ෂකයා කරන්න කොනිදේසි 10 ක් දාලා තියෙනවා, ඒ කොන්දේසි 10 සපුරලා පොහොට්ටුවේ ජනාධිපති අපේක්ෂකයා විදියට ඉදිරිපත් වෙනවා කියලා. පොහොටේටුවේ කවුරුත් කියලා නැහැ එතුමා ජනාධිපති අපේක්ෂකයා කරනවා කියලා. ධම්මික පෙරේරා මහතාට කවුරුහරි ලොකු බලාපොරොත්තුවක් දීලා තියෙනවා. ඒ බලාපොරොත්තුව පොහාට්ටුව කඩ නොකරයි කියලා මම විශ්වාස කරනවා. බලාපොරොත්තුව දුන්න කෙනා දැන් කියන්න ඕනේ අපි ධම්මික පෙරේරා මහතා ජනාධිපති අපේක්ෂකයා කරනවා කියලා. තාම එහෙම දෙයක් පේන්න නැහැ. ධම්මික පෙරේරා මහත්තයා නිකන් කියන්නේ නැහැනේ ජනාධිපතිවරණයට ඉදිරිපත් වෙනවා කියලා. ධම්මික පෙරේරා මහතාට මේ පණිවුඩය දුන්න වගකිවයුතු කෙනාට කියනවා ඇවිල්ලා රටට කියන්න පොහොට්ටුවේ අපේක්ෂකයා ධම්ම්ක පෙරේරා කියලා. ධම්මික පෙරේරා මහතාට පොහොට්ටුව දීලා තියෙන්නේ ලණුවක්. නිකන් ලණුවක් නෙමේ දිරච්ච ලණුවක්. ව්‍යාපාර පිළිබඳව අද්දැකීමක් තිබුනට දේශපාලනය ගැන අද්දැකීමක් නැහැ. ව්‍යාපාර කියවීමට හැකියාව තිබුනට දේශපාලනය කියවීමට හැකියාවක් ධම්මික පෙරේරා මහතාට නැහැ. මම දන්න පොහොට්ටුව දැන්ම හදිස්සි වෙන්නේ නැහැ තමන්ගේ ජනාධිපති අපේක්ෂාකයා ධම්මික පෙරේරා කියලා කියන්න.

අපි රනිල් වික්‍රමසිංහ මහතාගේ ආර්ථික වැඩපිළිවෙලට සහය දක්වනවා. අපේ වැඩපිළිවෙලේ අපි වෙන කිසිම අපේක්ෂකයෙක් ගැන බලාපොරොත්තුවක් නැහැ. මේ ආර්ථික වැඩිපිළිවෙල ගෙනියන ජනාධිපතිතුමා මැතිවරණයට ඉදිරිපත් වෙනවා කියන එකයි අපේ බලාපොරොත්තුව.

සමගි ජන බලවේගය පහුගිය කාලය පුරාම කිව්වේ පොහොට්ටුව, රාජපක්ෂවරු සහ එතුමා එක්ක හිටපු අය හොරු කියලා. ආර්ථිකය වැටෙන්න ප්‍රධානම හේතුව රාජපක්ෂවරු ගත්ත තීරණ කියලා කිව්වා. එහෙනම් සජබෙන් අහන්න කැමතියි නාලක ගොඩහේවා, ජී. එල්. පීරිස් වගේ අය ගන්නේ රෙදි ඇඳගෙනද කියලා. නාලක ගොඩහේවා තමා ගෝඨාභය රාජපක්ෂගේ දකුණු අත. ආර්ථිකය වැටෙන්න බදු අඩු කරන්න උපදෙස් දුන්නේ ප්‍රධාන වශයෙන් නාලක ගොඩහේවා මහතා. වියත්මග, එළිය සංවිධාන හඳාගෙන පාර්ලිමේන්තුවේ නැති කෙනෙක්, දේශපාලනය කරපු නැති කෙනෙක් ගේන්න ඕනේ කියලා මතයක් ගොඩනැගුවේ මේ අය. අපි ඒ වේලාවෙත් කීවා ගෝඨාභය මහතාට දේශපාලනය කරන්න බැහැ කියලා. ඒක ජනතාව පිළිගත්තෙත් නැහැ, එතුමලා පිළිගත්තෙත් නැහැ. හැබැයි ගෝඨාභය ගෙනල්ලා අපේ අවුරුදු 30 ක දේශපාලනය නැති කරලා, නාලක ගොඩහේවා සජබයට කරනමක් ගැහැව්වා. සජිත් මහත්තයත් ආදරයෙන් වැලඳගෙන ඉන්නවා. ජී එල් කියන්නේ පොහොට්ටු පක්ෂයේ සභාපති. මේ අය එලියට ගියේ වේලාසනින් නෙමේ. අරගලයට ඉස්සෙල්ලා එලියට ගියේ මම. මේ අය අරගලයෙන් එළියට දාපු අය. නාලක ගොඩහේවා, ජී එල් ගෝඨාභය මහතාගේ අන්තිම කබිනෙට්ටුවෙත් හිටියා. මේ අය තමා ආණ්ඩුව කළේ. බදු අඩු කරලා රට නන්නත්තාර කළේ. සජබ අය නාලකට, ජී.එල් ට බැන්නා, පොහොට්ටුවට බැන්නා. රෙදි ඇඳගෙනද මේ අය වැළදගත්තේ කියලා අහනවා.

ජාත්‍යන්තර ස්වෛරී බැදුම්කර නොගෙවා ඉන්න පුලුවන් කියලා ජනතා විමුක්ති පෙරමුණේ ආර්ථික විශේෂඥයා කියනවනම් ඒ එයාගේ දැනුමේ තරම තමයි මේ. රටේ දැනුමක් තියෙන අය පිළිගන්න ඕනේ ජනතා විමුක්ති පෙරමුණට බැහැ කියන එක. ජවිපෙ කියන්නේ අනුන්ගෙන් අරගන්න, අනුන්ගෙන් යැපිලා ජීවත්වන පිරිසක්. අනුර කුමාරට, සුනිල් හදුන්නෙත්තිට, විජිත හේරත්ට රස්සාවක්, ව්‍යාපාරයක් තියෙනවද ? නැහැ. පෞද්ගලික ආයතන වල වෘත්තීය සමිති පිහිටුවලා කප්පම් ගන්නවා, රාජ්‍ය ආයතනවල වැඩක් කරන්න දෙන්නේ නැහැ. මේ අය කියනවා අවුරුදු 70 ක් රට කෑවලු. 20 කෑවේ ඒ අය. අවුරුදු 30 ක් කෑවේ ප්‍රභාකරන්. ඉතිරි අවුරුදු 20 අධයාපන ප්‍රතිසංස්කරණ, විදුලිබල ප්‍රතිසංස්කරණ කරන්න දුන්නේ නැහැ. විදුලිබල මණ්ඩලයේ පාඩුව අවම කරගත්තොත් ලක්ෂ 20 කට රුපියල් 10,000 ගානේ දෙන්න පුලුවන්. ඒකට ඉඩ දෙන්නේ නැත්තේ කවුද ජවිපෙ වෘත්තීය සමිති. ‘හා මංචං ස්වෛරී බැදුම්කර ගෙවන්නේ නැතිව ඉන්න පුලුවන් කියලා’ සුනිල් හදුන්නෙත්ති කියන කාරණාව හෝඩියේ පන්තියේ ළමයෙක්වත් නොකියන කාරණාවක්. මේ අය බැංකුවකින් ණයක්, ව්‍යාපාරයක්, කඩයක්වත් නොකරපු අය තමා රටේ ආර්ථිකය හදන්න බණ දේශනා කරන්නේ.

අද වෙනකොට විදේශ සංචිත බිලියන 4.5 ට වැඩිවෙලා. ගිය අවුරුද්දට සාපේක්ෂව ප්‍රේෂණ එවන එක සියයට 53 කින් වැඩිවෙලා. සංචාරකයන්ට එන්න එපා කියලා ඒ අය කිව්වා. යුක්රේනයෙන් ගණිකාවෝ එනවා කියලා විවිධ චෝදනා කළා. අද සංචාරකයෝ විශාල වශයෙන් එනවා. ආර්ථිකය යම් හොද මට්ටමකට ඇවිල්ලා තියෙනවා. මේක බලාගෙන ඉන්න ජවිපෙ කයිවාරුකාරයින්ට බැහැ. සුනිල් හදුන්නෙත්ති සමූපකාර සමිතියකවත් ණයක් අරන් නැති නිසා ණය ගෙවීම පිළිබඳව වගකීමක් නැති ප්‍රකාශයක් කරලා තියෙන්නේ.

වැට් හා බදු වැඩිකිරීම තුළ ජනතාවට විශාල අපහසුතාවයක් තියෙනවා. ඒක ජනතාවට දාරාගන්න බැහැ. ගෝඨාභය රාජපක්ෂ බදු අඩු කිරීමෙන් ඉන්ධන, විදුලිය අර්බුද ආවා. මිනිස්සු පැය ගණන් පෝලිමේ හිටියා. බේත් ටික ගෙන්නගන්න බැරිවුනා. බදු අඩු කිරිම තුළ රටේ ආර්ථිකය වැටීමෙන් රුපියල් නැතිව ගියා. විදේශ විනිමය නැතිවුනා. ඒ නිසා අරගලයක් ඇවිල්ලා ගෝඨාභය රාජපක්ෂ හා ආණ්ඩුව එලෙව්වා. දැන් කියන්නේ රනිල් වික්‍රමසිංහටත් බදු අඩු කරලාා, රටේ ආර්ථිකය වට්ටලා ආපහු තිබුන තත්ත්වයට පත් කරන්න කියලද ?. බදු වැඩි කරනකොට මිනිස්සු බනිනවා, මිනිස්සු ජන්දෙ දෙන්නේ නැහැ කියලා දන්නවා. දන්නවා වුනාට ජාත්‍යන්තර මූල්‍ය අරමුදලේ දෙවන වාරිකය ගන්න, බංකොලොත් භාවයෙන් මිදෙන්න, ආසියානු සංවර්ධන බැංකුව, ලෝක බැංකුව, ජපාන ආධාර ගන්නනම් ආර්ථිකය පිළිබඳ ගන්න ඕන තීන්දු තීරණ ඉතා පැහැදිලිව ගන්න ඕනේ. ඒකට ජනතාව බනියි, ජන්දය නොදී ඉදියි කියලා තීරණ ගන්නේ නැතිව ඉන්න බැහැ. එහෙම වුනොත් ගෝඨාභය රාජපක්ෂගේ අනිත් එක සිදු වෙන්නේ. මේ තීන්දු ගන්නකොට ජනතාව බනියි කියන එක, ජන්දය නොදී ඉදියි කියලත් දන්නවා. හැබැයි බුද්ධිමත් ජනතාව මේක තේරුම් ගනියි කියලත් අපි දන්නවා. පහුගිය අවුරුදු එක හමාර තුළ සිදූවූ දේ අමතක කරන්න බැහැ. බදු අඩු කරලා රටට වුනු විපත්තිය දැක්කා. ජනතාව පීඩනයට පත්වුනා. මේ ආර්ථික ප්‍රතිසංස්කරණ රනිල් වික්‍රමසිංහ මහතා හැර වෙන කෙනෙක් කරන්නේ නැහැ. මොකද ජනවාරි පළවෙනිදා බදු වැඩි කරන්නේ නැහැනේ කිසිම නායකයෙක්. එතුමට ජන්දය ලැබුනා හෝ නොලැබුනා රටේ ඉදිරි දරුවන්ට මේ රටේ ආර්ථිකය හදන්න එතුමට ඕනේකම තියෙනවා. දේශපාලන පොරොන්දු, සුරංගනා කතා කියලා රටේ ආර්ථිකය හදන්න බැහැ.

ජනතාවට ඇත්ත කියලා, මේ දේවල් පැහැදිලි කරන්න ඕනේ. හැබැයි එහෙම නැතිව එන ඕන කෙනෙක් මාස තුනයි. ඔය අයට වැට් එක් අඩු කරන්නත් බැහැ. බදු අඩුකරන්නත් බැහැ. පෞද්ගලීකරණය කරන්නත් බැහැ. එතකොට ආණ්ඩුවක් ඒ අයට ගෙනියන්න බැහැ. පෞද්ගලීකරණය කළොත් තමා පාඩු ලබන ආයතන වලින් අරගෙන ජනතාවට දෙන්න පුලුවන්. පාඩු ලබන ඒවා අඩුකරගත්තොත් තමා ණය ගෙවන්න පුලුවන් වෙන්නේ. රටේ ජනතාවගෙන් සියයට තිහක් තිස්පහක් තේරුම් අරන් තියෙනවා මේ ආර්ථික ප්‍රතිසංස්කරණ හැර වෙන ක්‍රමයක් නැහැ කියලා. තව ටික කාලයක් මේක ඉවසගෙන හිටියොත් තව මාස දෙක තුනකින් ජනතාවට සහන සලසන්න පුලුවන් වෙයි.

මම රාජපක්ෂවරුන්ට බලය තියෙනකොට එලියට ආව කෙනෙක්. අරගලයට ඉස්සෙල්ලා එලියට බැස්සා. සජබයට යන අය එලියට ආවේ අරගලයෙන් එලෙව්වට පස්සේ. ඒ නිසා අපිට නැවත රාජපක්ෂවරු බලයට ගේන්න උවමනාවක් නැහැ වගේම පොහොට්ටුව සමග වැඩ කරන්නේත් නැහැ. අපිත් එක්ක සන්ධානයේ ඉන්න මන්ත්‍රීවරුන් ඉන්නේ පොහොට්ටුවත් එක්ක ආයේ දීගකෙට යන්නේ නැහැ කියලා.”

– Media unit

ආර්ථික ස්ථාවරත්වයක් ඇති කර ගනිමින් රට සංවර්ධනය කරා ගෙන යාමේ වැඩපිළිවෙළේදී විශ්වවිද්‍යාල සිසුන්ට තීරණාත්මක කාර්යභාරයක් ඉටු කළ හැකි බව ජනාධිපති රනිල් වික්‍රමසිංහ පෙන්වා දුන්නේය.

කෘෂිකර්මාන්ත, සංචාරක, ව්‍යාපාරික, තාක්ෂණය ඇතුළු විවිධ ක්ෂේත්‍රවල සංවර්ධනය සඳහා විශ්වවිද්‍යාල සිසුන්ගේ දායකත්වය ලබා ගැනීමට අපේක්ෂා කරන බව පැවසු ජනාධිපතිවරයා මෙම පරිවර්තනීය ප්‍රයත්නයන් සඳහා ක්‍රියාකාරීව එක් වන ලෙස ද විශ්වවිද්‍යාල සිසුන්ට ඇරයුම් කළේය.

ජනාධිපති රනිල් වික්‍රමසිංහ මේ බව සඳහන් කර සිටියේ යාපනය විශ්වවිද්‍යාල සිසුන් සමඟ පසුගියදා යාපනය ජෙට්වින්ග් හෝටලයේ පැවති හමුව අමතමිනි.

රටේ සංවර්ධනය සඳහා විශ්වවිද්‍යාල ප්‍රජාව වෙත පැවරී ඇති ප්‍රමුඛ කාර්යභාරය පිළිබඳව පැහැදිළි කිරීමේ අරමුණින් මෙම හමුව පැවැත්විණි.

මෙරට ජාතික ආර්ථිකයට පුළුල් දායකත්වයක් ලබා දිය හැකි අන්දමින් උතුරු පළාත දැවැන්ත සංවර්ධනයකට ලක් කිරීම සඳහා රජය ගෙන යන වැඩපිළිවෙළ පිළිබඳව මෙහිදී සිසුන් දැනුවත් කළ ජනාධිපතිවරයා එම වැඩපිළිවෙළ සාර්ථක කර ගැනීමට එක්වෙන ලෙස ද ඔවුන්ගෙන් ඉල්ලා සිටියේය.

රටක් සංවර්ධනය කරා ගෙන යාමේ ගාමක බලවේගය එරට මානව සම්පත බව පෙන්වා දුන් ජනාධිපති රනිල් වික්‍රමසිංහ මහතා නවීන තාක්‍ෂණය කෙරෙහි අවධානය යොමු කරමින් රාජ්‍ය හා පෞද්ගලික විශ්වවිද්‍යාල බිහි කිරීම ඇතුළු උසස් අධ්‍යාපන ක්ෂේත්‍රය පුළුල් කිරිමේ රජයේ සැලසුම් පිළිබඳවද සිසුන් දැනුවත් කළේය.

එසේම ඩිජිටල් තාක්‍ෂණය, කෘත්‍රිම බුද්ධිය (AI) වැනි ක්ෂේත්‍රවල කඩිනම් ප්‍රගතියක් අත්කර ගැනීමේ අවශ්‍යතාවය පිළිබඳව ද ජනාධිපතිවරයා පෙන්වා දුන්නේය.

රටක් ලෙස කලාපීය සහයෝගීතාවයේ ඇති වැදගත්කම ද මෙහිදී අවධාරණය කළ ජනාධිපති රනිල් වික්‍රමසිංහ මහතා කොළඹ සහ ත්‍රිකුණාමලය ශක්තිමත් වරායන් බවට පත් කිරීමේ සැලසුම් පිළිබඳවද සාකච්ඡා කළේය. දකුණු ඉන්දියාව සහ ශ්‍රී ලංකාව සම්බන්ධ කරමින් මන්නාරම සිට ඉන්දියාව දක්වා ගොඩබිම් සම්බන්ධතාවක් ඇති කිරීම පිළිබඳව ද තමා ඉන්දීය අගමැති නරේන්ද්‍ර මෝදි සාකච්ඡා කළ බව ද ජනාධිපතිවරයා සඳහන් කළේය.

2025 වන විට 5% ක ආර්ථික වර්ධනයක් ඇති කර ගැනීම සහ 2030 වන විට එය 7%ක් දක්වා ක්‍රමයෙන් වැඩි කර ගැනීමේ ඉලක්ක පිළිබඳවද කරුණු පැහැදිළි කළ ජනාධිපතිවරයා ශ්‍රී ලංකාව කඩිනමින් ඉහළ ආර්ථික වර්ධන වේගයක් අත්කර ගැනීමේ අවශ්‍යතාවයද අවධාරණය කළේය.

සමෘද්ධිමත් හා සංවර්ධිත ශ්‍රි ලංකාවක් ගොඩනැගීම වෙනුවෙන් සියලුදෙනා එක්වීමේ අවශ්‍යතාව වැඩිදුරටත් අවධාරණය කළ ජනාධිපති රනිල් වික්‍රමසිංහ මහතා එම වගකීම ඉටු කිරීමට විශ්වවිද්‍යාල සිසුන්ද කැපවනු ඇති බවට විශ්වාසය පළ කළේය.

මෙහිදී සිසුන් නැගු ප්‍රශ්නවලට ද ජනාධිපති රනිල් වික්‍රමසිංහ මහතා පිළිතුරු ලබා දුන් අතර එම ප්‍රශ්න කිහිපයක් සහ ඊට ජනාධිපතිවරයා ලබා දුන් පිළිතුරු පහත දැක්වේ.

ප්‍රශ්නය:

රටක ආදායමේ ප්‍රධාන සාධකය වන්නේ බදු ආදායමයි. ව්‍යවසායකත්ව අදහස් සහ ව්‍යසායකත්වය පිළිබඳ අප විශ්වවිද්‍යාලයේ අධ්‍යයන කටයුතුවලදී හදාරනවා. නමුත් ජනාධිපතිතුමනි, එය ප්‍රායෝගිකව ක්‍රියාත්මක වෙන්නේ නැහැ. ඒ නිසා, ව්‍යවසායකත්ව ක්‍රියාකාරකම් සඳහා සිසුන්ගේ අදහස් ඇතුළත් කිරීම වෙනුවෙන් ක්‍රියාකාරකම් වැඩිදියුණු කරන ලෙස අප ඔබතුමාගෙන් ඉල්ලා සිටිනවා.

පිළිතුර:

ඔබට ඔබේ පීඨයේ එවැනි කවයක් ස්ථාපිත කරගෙන අපගේ ආර්ථික කටයුතු පිළිබඳ කණ්ඩායම සමඟ ඍජුවම සම්බන්ධ වීමට හැකියාව තිබෙනවා.

ප්‍රශ්නය

ජනාධිපතිතුමනි, මෙම වැඩසටහන සියලුම විශ්වවිද්‍යාලවල ක්‍රියාත්මක කිරීමට දිරිමත් කරනවා නම් එය වඩාත් සුදුසු බව කිවයුතුයි.

පිළිතුර:

විශ්වවිද්‍යාල ශිෂ්‍ය කණ්ඩායම්වලට දිනක් හෝ දෙකක් මහා භාණ්ඩාගාරයට පැමිණ එහි කටයුතු සිදුවන ආකාරය අධ්‍යයනය කිරීමට අවස්ථාව සලසා දිය හැකියි.

ප්‍රශ්නය

විශ්වවිද්‍යාල සිසුන් ඉංග්‍රීසි මාධ්‍යයෙන් තමන්ගේ අධ්‍යයන කටයුතු කරගෙන යාමේදී විශාල ගැටලුකාරී තත්ත්වයකට මුහුණදී සිටිනවා. එක් අවස්ථාවක අපගේ විශ්වවිද්‍යාලයේ ඉංග්‍රීසි භාෂාවෙන් අධ්‍යයන කටයුතුවල නිරතවීමට සිදුවීම නිසා සියදිවි නසාගැනීමේ සිදුවීමකුත් වාර්තා වුණා. එබැවින් මූලික මට්ටමේ සිටම සිසුන්ගේ ඉංග්‍රීසි දැනුම දියුණු කිරීමට අවශ්‍ය කටයුතු සම්පාදනය කිරීමේ හැකියාවක් තිබෙනවාද?

පිළිතුර:

මම හිතන්නේ කොළඹ විශ්වවිද්‍යාලයේ මෙවැනි ප්‍රශ්නයක් නැහැ. මොරටුව විශ්වවිද්‍යාලයේද එවැනි ප්‍රශ්නයක් මතුව නැහැ. නමුත් ඔබ සියලුදෙනා ඉංග්‍රීසි භාෂාව හැදෑරිය යුතුයි. ඉංග්‍රීසි භාෂාව ජාත්‍යන්තර භාෂාවක්. ඔබ කෘත්‍රිම බුද්ධිය වැනි නවීන තාක්ෂණය සමග වැඩකරනවා නම් ඔබට ඉංග්‍රීසි දැනුම අත්‍යවශ්‍යයි. ඇමරිකාව, එක්සත් රාජධානිය, කැනඩාව, ඉන්දියාව ඇතුළු ලෝකයේ බොහෝ රටවල් ඉංග්‍රීසි භාෂාවෙන් වැඩ කටයුතු සිදු කරනවා. ඉදිරියේදී බොහෝ දුරට චීනයත් මේ මාවත අනුගමනය කරනු ඇතියි.

ඉදිරි වසර දෙක තුළ කෘත්‍රිම බුද්ධිය (AI) පිළිබඳ පාඨමාලාවක් හඳුන්වා දීමට අප සැලසුම් කර තිබෙන නිසා විශ්වවිද්‍යාල සිසුන්ගේ ඉංග්‍රීසි භාෂා දැනුම වර්ධනය කිරීම අනිවාර්ය වී තිබෙනවා.ඒ අනුව විශ්වවිද්‍යාල ප්‍රතිපාදන කොමිෂන් සභාව හරහා මෙන්ම අවශ්‍යනම් බ්‍රිතාන්‍ය කවුන්සිලය වැනි ආයතන මගින් ඒ සඳහා පහසුකම් සළසා දීමට අප අපේක්ෂා කරනවා.

ප්‍රශ්නය:

ජනාධිපතිතුමනි, රාජ්‍ය විශ්වවිද්‍යාලයක ශිෂ්‍යයෙක් උපාධිය සම්පූර්ණ කිරීම සඳහා අධ්‍යයන සුදුසුකම් ලබා ගැනීමට වැය කරන කාලය, පුද්ගලික විශ්වවිද්‍යාලයක උපාධියක් සම්පූරණ කිරීමට වැය කරන කාලයට වඩා ඉතා වැඩියි. එබැවින් අප රැකියා වෙළඳපොළට යන විට, අපට වඩා අත්දැකීම් ඔවුන්ට තිබෙනවා. මේ සඳහා ඔබතුමාගේ යෝජනාව කුමක්ද?

පිළිතුර:

මම අධ්‍යාපනය ලැබුවේ රාජ්‍ය විශ්වවිද්‍යාලයක. මම අවුරුදු 18දි විශ්වවිද්‍යාල අධ්‍යාපනය ආරම්භ කළා, වයස වුරුදු 21දි උපාධිධාරියෙක් ලෙස විශ්වවිද්‍යාලයෙන් පිට වුණා. වයස අවුරුදු 23 දි නීතිඥයෙක් වුණා.

මෙය විශ්වවිද්‍යාල තුළ පවතින අභ්‍යන්තර ප්‍රශ්නයක්. අද ඇතැම් පිරිස් විශ්වවිද්‍යාල අධ්‍යාපන කටයුතු අවුල් කරනවා. නමුත් අප විශ්වවිද්‍යාලයේ අධ්‍යයන කටයුතු සිදු කරනකොට, උපකුලපතිතුමා සමඟ එකඟතාවක් ඇති කරගෙන තිබුණා පළමු වාරයේ අවසාන සති දෙක පමණක් වර්ජන සඳහා වෙන් කරනවා කියලා. ඉතින් එතුමාත් ඊට එකඟ වුණා. අපි එය කළා. ඒ නිසා මම හිතන්නේ අප එක් ක්‍රමයකට අනුව වැඩ කිරීම ඉතා වැදගත් වෙනවා.

ඒ වගේම විශ්වවිද්‍යාලවලට ශිෂ්‍යයන් ඇතුළත් වූ පසු නියමිත අවුරුදු තුන හෝ හතරකින් අධ්‍යාපන කටයුතු අවසන් කර විශ්වවිද්‍යාලයෙන් පිටවිය යුතු බවට ඉදිරියේ දී නීතියක් ගෙන ඒමට ද අප අපේක්ෂා කරනවා. වෛද්‍ය විද්‍යාලවලට එසේ අවශ්‍ය වන්නේ නැහැ.

ප්‍රශ්නය

ජනාධිපතිතුමනි, මට යෝජනාවක් කරන්න පුලුවන්ද? බොහෝ විට රජයේ පාසල් ආරම්භ වන්නේ සහ අවසන් වෙන්නේ එකම දවසක. ඇයි රාජ්‍ය විශ්වවිද්‍යාලවලටත් ඒ දේම කරන්න බැරි?

පිළිතුර:

විශ්වවිද්‍යාලවල අධ්‍යයන වර්ෂය ඔක්තෝබර් මාසයේ ආරම්භ කරනවා. ඒ වගේම එය ඊළඟ වර්ෂයේ සැප්තැම්බර් 30 වෙනිදායින් අවසන් වෙනවා. අප විශ්වවිද්‍යාල අධ්‍යාපනය ලබන සමයේදීත් අධ්‍යයන වර්ෂය ආරම්භ වුණේ ඔක්තෝබර් මාසයේ. බොහෝ රටවල් වලත් ඔක්තෝබර් සිට සැප්තැම්බර් දක්වා තමයි විශ්වවිද්‍යාල අධ්‍යයන වර්ෂය ක්‍රියාත්මක් වන්නේ.

පාර්ලිමේන්තු මන්ත්‍රී වජිර අබේවර්ධන, උතුර පළාත් ආණ්ඩුකාර පී. එස්. එම්. චාල්ස්, ජනාධිපති ලේකම් සමන් ඒකනායක, ජනාධිපති විශේෂ ව්‍යාපෘති අධ්‍යක්ෂ තික්ෂණ අබේවර්ධන, ජනාධිපති වෘත්තීය සමිති සබඳතා අධ්‍යක්ෂ ජනරාල් සමන් රත්නප්‍රිය, විශ්වවිද්‍යාල ප්‍රතිපාදන කොමිෂන් සභාවේ සභාපති මහාචාර්ය සම්පත් අමරතුංග, යාපනය විශ්වවිද්‍යාලයේ උපකුලපති මහාචාර්ය එස්. ශ්‍රී සත්කුනරාජා, යාපනය විශ්වවිද්‍යාලයේ හිටපු උපකුලපතිනි වසන්ති අරසරත්නම් යන මහත්ම මහත්මීන් ඇතුළු පිරිසක් මෙම අවස්ථාවට එක්ව සිටියහ.

අඟුණකොළපැලැස්ස ජඳුර ප්‍රදේශයට නව තාක්ෂණයෙන් යුත් සහල් මෝලක් ලබා දීමට චීනයේ හයිනෑන් ප්‍රාන්ත රජය එකඟතාවය පළ කළ බව කෘෂිකර්ම අමාත්‍යාංශය පවසයි.

සහල් නිෂ්පාදනය සඳහා දැවැන්ත ඒකාධිකාරයක් පවතින අතර සහල් මිල තීරණය කරන්නේ එම ඒකාධිකාරයේ සිටින සහල් මෝල් අයිතිකරුවන් කිහිප දෙනෙක් විසින් බවත් එම අධිකාරය බිදීමට නම් රජය සතුව ඉහළ තාක්ෂණයෙන් යුත් සහල් මෝල් කිහිපයක් ක්‍රියාත්මක කළ යුතු බවත් කෘෂිකර්ම අමාත්‍ය මහින්ද අමරවීර පවසයි .

රජයට එම කාර්ය තනිවම කළ නොහැකි නිසා ජඳුර හා ගුරුවල තරුණ පිරිස යොදා ගනිමින් චීන සහල් සැකසීම් මධ්‍යස්ථානය සඳහා සමුපකාර වැඩ පිළිවෙළක් සකස් කරන බවහ අමාත්‍යවරයා පවසයි .

චීන සහල් මෝල මගින් සමස්ත දකුණු පළාතේම නිෂ්පාදනය කරන වී සහල් බවට පත් කර රටපුරා බෙදා හැරීමට හැකි වන බව අමාත්‍යවරයා වැඩිදුරටත් සඳහන් කර සිටියි.

ඉදිරියේදී රට බීමහලක් ආරම්භ කරන ඕනෑම පුද්ගලයකුට රුපියල් කෝටියක මූලික ගාස්තුවක් අනිවාර්යයෙන්ම තැන්පත් කිරීමට සිදුවන බව මුදල් රාජ්‍ය අමාත්‍ය රංජිත් සියඹලාපිටිය පවසයි .

කෙසේ වුවත් මීට පෙර මත්පැන් හලක් විවෘත කිරීමේදී එවැනි මූලික ගාස්තුවක් අය කෙරුණේ නැත.

කෙසේ වුවත් රාජ්‍ය අමාත්‍යවරයා පවසන්නේ සුරා බදු බලපත්‍ර ඉතාමත් නිත්‍යානුකූල ආකාරයට ලබාදීමට කටයුතු සිදු කෙරෙමින් පවතින බවත් රා බී 4 යන බලපත්‍රයට වැඩි ඉල්ලුමක් පවතින හෙයින් එම බලපත්‍රය නිකුත් කිරීමේදී මූලික ගාස්තුවක් වශයෙන් රුපියල් කෝටියක මුදලක් ගැනීමට බලාපොරොත්තු වන බවත් ය.

සංචාරක කර්මාන්තය සමග බලපත්‍ර ලබාදීමේ වැඩපිළිවෙළ පුළුල් කිරීමට බලාපොරොත්තු වන බව පැවසූ රාජ්‍ය අමාත්‍යවරයා මේ රටේ සාමාන්‍ය ජනතාව මත පැටවී ඇති බදු බර ක්‍රම ක්‍රමයෙන් ගිහිල් කිරීමට පියවර ගන්නා බවද ප්‍රකාශ කළේය.