පුවත්

විදුලිය අරපිරිමැස්මෙන් භාවිතා කිරීමට රටේ සියලු ජනතාව කටයුතු නොකළහොත් ඉදිරියේදී විදුලි කප්පාදුවකට යාමට සිදුවන බව මහජන උපයෝගිතා කොමිෂන් සභාව සඳහන් කරයි.

විදුලිය අරපිරිමැස්මෙන් භාවිතා කිරීම සඳහා තම කොමිසම විසින් ලබාදුන් නිර්දේශ පළාත් පාලන ආයතන ඇතුළු රජයේ ආයතන වලින් නිසි පරිදි ක්‍රියාත්මක කිරීමක් දක්නට නොලැබෙන බව ද එහි සභාපති ජනක රත්නායක සඳහන් කරයි.

අවස්ථා කිහිපයකදීම මෙම නිර්දේශ ගැන රජයේ ආයතනවල දන්වා ඇතත් ඊට අවධානය නොදැක්වීම කණගාටුවට කරුණක් යයිද ඔහු කියා සිටියේය.

එමෙන්ම ව්‍යාපාරික ප්‍රජාව ද පවතින තත්ත්වය නොසලකා හරිමින් අනවශ්‍ය ලෙස ඩිජිටල් දැන්වීම් පුවරු ප්‍රදර්ශනය කරමින් සිටින බවත් පැවසූ ඔහු විදුලිය පරිභෝජනය කරන සාමාන්‍ය ජනතාවගෙන් පවා මේ මොහොතේ සහායක් නොලැබෙන බවද පැවසීය.

මේ ආකාරයට පවතින ගැටළු නිරාකරණය කර ගැනීම සඳහා පොදුවේ සියලු දෙනා සහාය ලබා නොදෙන්නේ නම් විදුලිය කප්පාදුවක් හැර වෙන විසඳුමක් නැති බවද ඔහු අවධාරණය කරයි.

මේ වන විට රටට අනාගතයක් නෑ වගේ බවත් , අනාගතයක් තිබෙයි නම් තරුණ තරුණියන් පාස්පොට් පොලිම්වල ඉදිද? යනුවෙන් මධ්‍යම පළාත් හිටපු ප්‍රධාන අමාත්‍ය , ශ්‍රී ලංකා නිදහස් පක්ෂයේ උප ලේකම් සරත් ඒකනායක පවසයි.

මීළඟ ආණ්ඩුව පිහිටුවන්නේ ශ්‍රී ලංකා නිදහස් පක්ෂය ප්‍රමුඛ සන්ධානයක් බවත් ඔහු පැවසීය.

පක්ෂයේ ජනහමුවක් අමතමින් ශ්‍රීලනිප උප ලේකම් මේ අදාළ දැක්වූ අතර වැඩිදුරටත් මෙසේද පැවසීය.

ප්‍රථම වතාවට දමිල ජනතාව නියෝජනය කරන්න ප්‍රබල නායකයින් පත් කරලා තියෙනවා ශ්‍රි ලංකා නිදහස් පක්ෂයෙන්.

අපි දන්න දෙයක් තමයි ජන්ද කාලේට එනවා නත්තල් පප්පලා වගේ, ඇවිල්ලා අරක දෙන්නම් මේක දෙන්නම් කියලා කතා කරලා යනවා.

හැබැයි වතුකරයේ ජනතාවට මුකුත් දෙන පාටක් නම් නැ , දෙනවා නම් ඔහොම තවදුරටත් ඉදිද?

නිදහස ලබලා අවු 74 ක් සමරනවා නමුත් රොටි කැල්ලක් කන්න නැතුව ඉන්නවා වතුකරයේ ජනතාව.

හැන්දැවට පහන පත්තු කරන්න ලාම්පුතෙල් නැ , ජිවත් වෙන්න නෙලා ගන්න තේ වලට පොහොර ටික නැනේ.

එම නිසා ජනතාවගේ දුක අදුනන නායකයින් අපිට අවශ්‍යයි, ජන්දයක් ළං වුනාම ඇවිල්ලා මොනවා හරි දෙයක් දිලා යන අය ඕනි තරම් ඉන්නවා.

නමුත් දැන් ජන්දයක් ළග නැ , ඒ නිසා අපි පෙන්වන්නේ අපි මෙහෙමයි වැඩ කරන්නේ කියලා.

ආණ්ඩුවෙන් හැමදේම දෙන්නේ නැනේ , පොහොර ටික නිකම් දෙනවා කිව්වා පොහොර දෙනවද?

ශ්‍රි ලංකා නිදහස් පක්ෂයට ලොකු අයිතියක් තියෙනවා දමිල ජනතාව සමග කටයුතු කරන්න.

ශ්‍රි ලංකා නිදහස් පක්ෂය මුලින්ම හදනකොට සම ලේකම්වරුන් තිදෙනෙක් පත් කලා , සිංහල, දමිල , මුස්ලිම් අයගෙන්.

වතු යටිතල පහසුකම් සංවර්ධනය කියලා එකක් තිබුණේ නැ මේ රටේ ,ශ්‍රි ලංකා නිදහස් පක්ෂය තමයි එහෙම එකක් හැදුවේ.

ශ්‍රි ලංකා නිදහස් පක්ෂය වැටිලා තියෙනවා , නැගිටලා තියෙනවා , අපි මේ නැගිට්ට එකෙන් අපි අවසන් කරන්නේ ශ්‍රි ලංකා නිදහස් පක්ෂය ප්‍රමුඛ සන්ධාන ආණ්ඩුවක් හදමින්.

අපි සන්ධානගත වෙන්නේ රටට ආදරය කරන අය එක්ක පමණි, රට විකුණන අය එක්ක නෙවෙයි.

මේ වන විට රටට අනාගතයක් නැ වගේ , අනාගතයක් තිබෙයි නම් තරුණ තරුණියන් පාස්පොට් පොලිම්වල ඉදිද?

මම කියනවා අපි පිහිටුවනවා ප්‍රතිපත්තිගරුක ආණ්ඩුවක් හොරු නැති ආණ්ඩුවක්.

හොරකම , වංචාව , දුෂණය තියෙන කම් මේ රට ගොඩගන්න බැ. රටේ අදායමින් කොටසක් ගජ මිතුරන්ගේ සාක්කුවට නම් යන්නේ මේ රට හදන්නේ කොහොමද?

හැම ජනාධිපතිවරයාම බලයට ආවේ ජනාධිපති ක්‍රමය අහෝසි කරනවා කියලා, එත් ඒක කරේ නැ , ටිකක් හරි ජනාධිපති බලතල අඩු කරේ මෛත්‍රිපාල සිරිසේන ජනාධිපතිවරයා විතරයි.

විදේශ කටයුතු අමාත්‍ය මහාචාර්ය ජී. එල්. පීරිස් දෙදින නිල සංචාරයක් සඳහා ඉන්දියාව බලා පිටත්ව යෑමට නියමිත බව වාර්තා වෙයි.

දැනගන්නට ඇති ආකාරයට අමාත්‍යවරයා මෙසේ පිටව යන්නේ ඉන්දියාවේදී ලබන 6 වැනිදා පැවැත්වෙන හමුවකට සහභාගිවීම සඳහාය.

විදේශ අමාත්‍යවරයා ඉන්දියාවේ අගමැතිවරයා විදේශ කටයුතු ඇමතිවරයා ඇතුළු පිරිසක් හමුවී සාකච්ඡා පැවැත්වීමටද නියමිත බවත් විදේශ කටයුතු අමාත්‍යාංශය පවසයි.

අගරදගුරු අතිඋතුම් මැල්කම් කාදිනල් රංජිත් හිමියන් අද (04) පෙරවරුවේ කොළඹ අපරාධ කොට්ඨාසය වෙත පැමිණියේය.

ඒ බොරැල්ල දේවස්ථානයේ බෝම්බ සිද්ධිය සම්බන්ධයෙන් අත්අඩංගුවේ පසුවන ෆ්‍රැන්සිස් මුනීන්ද්‍රන් නමැත්තාගේ සුවදුක් විමසීම සඳහාය.

බොරැල්ල සියලු සාන්තුවරුන්ගේ දේවස්ථානයේ කාලබෝම්බයක් ආකාරයට සකසන ලද අත්බෝම්බයක් තැබීමේ සිද්ධියට අදාළව අත්අඩංගුවට ගත් දේවස්ථානයේ සේවකයෙකු ලෙස කටයුතු කළ ෆ්‍රැන්සිස් මුනීන්ද්‍රන් නමැත්තා මේ වනවිට කොළඹ අපරාධ කොට්ඨාසය භාරයේ රැඳවා සිටී.

කාදිනල් හිමියන් එහි පැමිණෙන අවස්ථාවේ පොලිස් නිලධාරීන් 50කට ආසන්න පිරිසක් ඒ අවට සිටින ආකාරයක් ද දක්නට ලැබුණි.

මෙම අවස්ථාවට එක්වෙමින් කොළඹ අගරදගුරු පදවි, ජන සන්නිවේදන අධ්‍යක්ෂ ජූඩ් ක්‍රිශාන්ත ප්‍රනාන්දු පියතුමා පැවසුවේ,

"මුනි කියන මේ මහත්මයා තමයි එදා දේවස්ථානයේ බෝම්බය සොයා ගත්තේ. වෙන්න ගිය විනාශය නවත්වන්න කටයුතු කළේ ඔහු. ඉතින් ඒ පුද්ගලයා පිළිබඳව කාදිනල් හිමියන්ට ලොකු කෘතඥතාවයක් තිබෙනවා. අපි බලාපොරොත්තුවෙනවා ඔහුවත් නිදහස් කරයි කියලා."

"අපිට විශාල සැකයක් පවතිනවා.. මේ අත්බෝම්බය යම් පුද්ගලයෙකු පෞද්ගලික හේතුවක් මත තැබූ බෝම්බයක් නෙමෙයි කුමන්ත්‍රණකාරී සිද්ධියක් කියලා."

"පාස්කු ප්‍රහාරයට දින 1,000ක් සපිරෙන මොහොතේ ජනවාරි 14 වනදා තිබුණු යාච්ඤා මෙහෙයට යම් බාධාවක් කරමින් ජනතාව බියගැන්වීමට හෝ පාස්කු ප්‍රහාරය යට ගහන්නට උත්සාහ කරන අය කළාද කියලා අපිට ලොකු සැකයක් තියෙනවා."

”මා ඉල්ලා සිටිනවා සියලු මැති ඇමතිවරු, අනෙකුත් දේශපාලනඥයින්ගෙන් රටට ආදර්ශයක් වන ලෙස හැම විටම කටයුතු කරන ලෙස, ඔබ ජනතාවට ඒ ආදර්ශය සපයන්නේ නම්, රටේ බහුතරයක් ජනතාව ඔබව අනුගමනය කරාවි”  යනුවෙන්  ජනාධිපතිවරයා ඉල්ලීමක් එක් කරමින්  අභියෝග ජයගත් ඉසුරුමත් හෙට දිනක් යන්න තේමා කර ගනිමින් නිදහස් චතුරස්‍රයේදී පැවති 74 වන අභිමානවත් නිදහස් දින සැමරුම් උළෙලේදී ජාතිය ඇමතීය.=

අනාගත ඉලක්ක සාර්ථකව ඉටු කරගැනීමට සියලු දෙනාට වෙනස් වීමට මෙන්ම කැපවීම් සිදු කිරීමට සිදු වන බව සඳහන් කළ ජනාධිපතිවරයා වැඩිදුරටත් කියා සිටියේ, ජනාධිපතිවරයා ලෙස ඒ සඳහා අවශ්‍ය ආදර්ශය ලබා දීමට තමන් ද සූදානම් බවයි.

දේශීයත්වය අගයන, රටේ සෛවරීත්වය සුරකින, ජාතික නායකත්වයට එරෙහි බලවේග ඉතා සූක්ෂම ලෙස අසත්‍ය ප්‍රචාර හරහා ජනතාව නොමග යවන්නට කටයුතු කරන බව සඳහන් කළ ජනාධිපතිවරයා කියා සිටියේ, විචාර බුද්ධියෙන් කටයුතු කර, දත්ත මත පදනම්ව කරුණු විමසා බලා සත්‍ය හඳුනාගෙන තීන්දු තීරණ ගන්නේ නම්, කිසිවෙකුට ජනතාව නොමග යැවිමේ හැකියාවක් නොමැති බවයි.

තව ද දිනූ නිදහස සෑම විටම සුරකින බවටත් ඒකීයබව භෞමික අඛණ්ඩතාව හා ස්වෛරීත්වය ආරක්ෂා කරන බවටත් රාජ්‍ය නායකයා ලෙස දී ඇති ප්‍රතිඥාව සැම විටම සුරකින බවට ද ජනාධිපතිවරයා යළි සහතික විය.

කිසිදු ආකාරයක මානව හිමිකම් කඩ කිරීමකට රජය අනුබල දී නොමැති බව සිහිපත් කළ ජනාධිපතිවරයා කියා සිටියේ, කිසිදු හේතුවක් මත යළි අන්තවාදයට හිස ඔසවන්නට ඉඩ නොතබන බවයි.

”රජය ජනතාවට පොරොන්දු වූ ආකාරයට ම අප අද ජාතික ආරක්ෂාව තහවුරු කර තිබෙනවා. ජනතාව වත්මන් රජයට වරම් ලබා දී තිබෙන්නේ, සෞභාග්‍යයේ දැක්ම ප්‍රතිපත්ති ප්‍රකාශනය ක්‍රියාවට නංවන්නටයි. අප ඉදිරිපත් කළ ප්‍රතිපත්ති රාමුව තුළ හරිත කෘෂිකර්මාන්තය, පුනර්ජනනීය බලශක්ති නව ලොවට ගැළපෙන අධ්‍යාපන ප්‍රතිසසංස්කරණ දේශීය ව්‍යවසායකත්වය දිරි ගැන්වීම, අපනයන විවිධාංගීකරණය හා අගය වැඩි කිරීම, ආර්ථික නව පිම්මක් සඳහා තාක්ෂණය භාවිතය ප්‍රචලිත කිරීම වැනි අප විසින් හඳුනාගත් ප්‍රමුඛතාවල කිසිදු වෙනසක් නැහැ”

ඵලදායි පුරවැසියෙක්, සතුටින් ජීවත්වන පවුලක්, විනය ගරුක ගුණ ගරුක සමාජයක්, සෞභාග්‍යමත් දේශයක් යන මූලික අරමුණු ඉටු කර ගැනීම සඳහා කැපවී සිටින බව ද ජනාධිපතිවරයා නිදහස් දින උත්සවය අමතමින් වැඩිදුරටත් කියා සිටියේ ය.

ඉන්දීය ධීවර තර්ජනය විසඳා දෙන ලෙස ඉල්ලමින් උතුරේ ධීවර ප්‍රජාව දියත්කර ඇති විරෝධය සම්බන්ධයෙන් පැවැති සාකච්ජාවකදී ධීවර අමාත්‍ය ඩග්ලස් දේවානන්දාට දැඩි විරෝධයක් එල්ලවූ බව වාර්තා වෙයි.

අද (03) පෙරවරුවේ පැවැති සාකච්ඡාවකදී මෙන්ම පස්වරුවේ පැවැති සාකච්ඡාවේදී මෙම විරෝධය එල්ලවී තිබේ.

එසේම පස්වරුවේ පැවති සාකච්ඡාව අවස්ථාවේ ධීවර විරෝධය මතුවූ විට ඩග්ලස් දේවානන්දා අමාත්‍යවරයා ‘ඒයි කට වහපන්… මමයි කතා කරන්නේ…’ යනුවෙන් කියමින් ධීවර ජනතාවට බැන තර්ජනය කර ඔවුන්ව පාලනය කිරීමට උත්සාහ කර ඇත.

ඒ නොතකා ධීවරයන විරෝධය පළ කිරීම හේතුවෙන් ආරක්ෂකයන් විසින් අමාත්‍යවරයාව එම ස්ථානයෙන් පිටතට ගෙන ගොස් ඇත.

ඊළඟ මැතිවරණය පළාත් පාලන ආයතන වෙනුවෙන් බව වාර්තා වෙයි.

ඒ මුදල් ඇමති බැසිල් රාජපක්ෂ සිදුකළ අනාවරණයක් නිසාය.

මාධ්‍ය හමුවකදී අදහස් දක්වමින් මුදල් අමාත්‍ය බැසිල් රාජපක්ෂ පවසා ඇත්තේ ඉක්මණින් පැවැත්විය හැකිවන්නේ පළාත් පාලන මැතිවරණය බවය

ශ්‍රී ලංකා පොදුජන පෙරමුණ පක්‍ෂයේ අපේක්‍ෂාව හැකි ඉක්මණින් ඡන්දයකට යෑම බව මුදල් අමාත්‍ය බැසිල් රාජපක්‍ෂ එහිදී පවසා ඇත.

ඕනෑම අවස්ථාවක මැතිවරණයක් පැවැත්වීමට පෞද්ගලිකව තමාත් පොහොට්ටු පක්‍ෂයත් සූදානම් බව ද ඔහු සඳහන් කර තිබේ.

ආණ්ඩුක්‍රම ව්‍යවස්ථාවට අනුව ජනාධිපතිවරණය සහ පාර්ලිමේන්තු මැතිවරණය හැකි ඉක්මණින් පැවැත්විය නොහැකි බව ද ඔහු කීය.

පළාත් සභා මැතිවරණය පැවැත්වීමට ගැටලු ගණනාවක් මතුව තිබෙන හෙයින් ඉක්මණින් පැවැත්විය හැකිවන්නේ පළාත් පාලන මැතිවරණය බව බැසිල් රාජපක්‍ෂ පවසා ඇත.

මේ මස 9 වැනි දින ශ්‍රී ලංකා පොදුජන පෙරමුණ ආරාධපුර නගරයේදී පළමු මැතිවරණය ප්‍රචාරක රැස්වීම පවත්වන බව ද ඔහු කීය.

පළාත් පහක මැතිවැණ ප්‍රචාරක රැස්වීම් පැවැත්වීමට දැනටමත් සැළසුම් කර ඇතැයි ද ඔහු පවසා ඇත.

අයවැයෙන් වැඩ ලක්ෂයක් වැඩසටහන අද බැසිල් රාජපක්ෂ මුදල් අමාත්‍යවරයා ආරම්භ කරනු ලැබීය.

තවත් කොවිඩ් මරණ 23ක් සෞඛ්‍ය සේවා අධ්‍යක්ෂ ජනරාල්වරයා විසින් තහවුරු කර තිබේ.

සෞඛ්‍ය අංශ පෙන්වා දෙන්නේ එම මරණ ඊයේ (02) තහවුරු කර ඇති බවය.

ඒ අනුව, මෙරටින් මේ දක්වා වාර්තා වී ඇති මුළු කොවිඩ් මරණ ගණන 15,515කි.

රාජගිරියේදී තරුණයකු අනතුරට ලක් කළ බවට හිටපු අමාත්‍ය පාඨලී චම්පික රණවකට එරෙහි අධිචෝදනා කියවා දීම සඳහා නඩුව ලබන ජූනි 17 වැනිදා කැඳවීමට කොළඹ මහාධීකරණ විනිසුරු නාමල් බලල්ලේ නියම කළේය.

මෙම නඩුව පවත්වාගෙන යාමට නොහැකි බවට විත්තියේ නීතිඥවරුන් ඉදිරියේ කළ මූලික විරෝධතාව ප්‍රතික්ෂේප කළ විනිසුරුවරයා චෝදනා පත්‍ර කියවා දීමෙන් අනතුරුව නඩුව විභාග කිරීමට දින නියම කරන බවද දැනුම් දුන්නේය.

2016 වසරේදී රාජගිරියේදී සදීප් සන්දීප නැමැති තරුණයා අනතුර ලක් කර පළා ගිය බවට නීතිපතිවරයා විසින් පාර්ලිමේන්තු මන්ත්‍රී පාඨලී චම්පික රණවකට එරෙහිව නඩු පවරා තිබේ.

සියලු ග්‍රාම සේවා වසම් ආවරණය වන පරිදි ක්‍රියාත්මක වන ‘අයවැයෙන් වැඩ ලක්ෂයක්’ ව්‍යාපෘතිය අද (03) පෙරවරු 8.52ට යෙදුණු සුබ මොහොතින් මුදල් අමාත්‍ය බැසිල් රාජපක්ෂ විසින් ආරම්භ කළේය.

රට සමෘද්ධිමත් දේශයක් කරා රැගෙන යාම මෙම ව්‍යාපෘතියේ අරමුණ බව ඊට අදාළ මාධ්‍ය හමුවකදී සඳහන් විය.

එහිදී මුදල් අමාත්‍යවරයා පෙන්වා දුන්නේ රට අසීරු අවස්ථාවක පැවතියද පස්වැදෑරුම් සංවර්ධන ක්‍රියාවලියක් මේ හරහා දියත් කිරීමට නියමිත බවය.

මේ සම්බන්ධයෙන් අදහස් දක්වමින් දේශපාලන විචාරකයන් පවසන්නේ රාජපක්ෂ කඳවුර තුළ ඊළඟ ජනාධිපති අපේක්ෂක ලෙස බැසිල් රාජපක්ෂ ඉදිරිපත් වීමට වැඩි ඉඩක් පවතින බවයි.

පසුගිය සමයේ ජනාධිපති ගෝඨාභය රාජපක්ෂ විසින් තමන් නැවත මැතිවරණයක් සඳහා සහභාගි නොවන බව පැවසීමත් සමග බැසිල් රාජපක්ෂ වැඩි වැඩියෙන් පෙරට පැමිණ රාජපක්ෂ කඳවුරේ ගැලවුම්කරු තමන් බව හැගෙන ආකාරයට දේශපාලන කටයුතු දියත්කර ඇති බවත් ඔවුන් පවසයි.

කෙසේ වුවත් ජනාධිපති ගෝඨාභය රාජපක්ෂ තම තීරණය වෙනස් කිරීමක් සහ මහින්ද රාජපක්ෂ විසින් 2024 ජනාධිපතිවරණය සඳහා නාමල් රාජපක්ෂ අපේක්ෂකයෙක් ලෙස ඉදිරිපත් නොකිරීමක් සිදුවන තැනට බැසිල්ගේ දේශපාලන කටයුතු ඉදිරියට පැමිණ ඇති බවත් ඔවුන් නිරීක්ෂණය කර දක්වයි.

මෙරට සිවිල් යුද්ධය අවස්ථාවේ ලංකා රජය උතුරු කොරියාවෙන් ආයුධ මිලදී ගත්බවට මුදල් අමාත්‍ය බැසිල් රාජපක්ෂ පසුගියදා දිවයින පුවත්පත වෙත සිදුකළ ප්‍රකාශය සම්බන්ධයෙන් දේශීය මෙන්ම ජාත්‍යන්තරව ද දැඩි අවධානයක් යොමුව ඇත.

මේ සම්බන්ධයෙන් විදෙස් මාධ්‍ය පවා ප්‍රචාරයක් ලබාදුන් අතර එය ලංකාවේ කීර්ති නාමයට මැකිය නොහැකි කැලලක් බව දේශපාලන විචාරකයන් පවසයි.

යුද්ධය දිනවූ හමුදාපති බැසිල්ගේ ප්‍රකාශය ප්‍රතිකේෂ්ප කරයි !

කෙසේ වුවත් යුද සමයේදී කළු සල්ලි යොදවා උතුරු කොරියාවෙන් ආයුධ මිලදී ගත් බවට මුදල් අමාත්‍යවරයා කර ඇති ප්‍රකාශය හිටපු හමුදාපති ෆීල්ඩ් මාර්ෂල් සරත් ෆොන්සේකා ප්‍රතිකේෂ්ප කරයි.

ඔහු පවසන්නේ ප‍්‍රධාන වශයෙන්ම එකල ලංකාවට අවශ්‍ය ආයුධ මිලදී ගත්තේ චීනයෙන් බවයි.

එමෙන්ම චෙකෝස්ලෝවැකියාවෙන් සහ පාකිස්තානයෙන්ද ලංකාවට අවශ්‍ය ආයුධ මිලදී ගත් බවද හෙතෙම සදහන් කරයි.

එජාප උද්ඝෝෂණ, විරෝධතා සහ දේශපාලන ක්‍රියාකාරකම් සංවිධානය කිරීමේදී දිනෙන් දින උග්‍ර වන ඔමික්‍රෝන් වෛරසය පිළිබඳවත් වැඩි අවධානයක් යොමු කර ක්‍රියා කරන ලෙස , හිටපු අග්‍රාමාත්‍ය , එක්සත් ජාතික පක්ෂ නායක රනිල් වික්‍රමසිංහ පක්ෂයේ ජ්‍යෙෂ්ඨයන්ට උපදෙස් ලබාදී ඇත.

ඔහු මේ උපදෙස් දුන්නේ සූම් තාක්ෂණය ඔස්සේ පක්ෂයේ ජ්‍යෙෂ්ඨයන් සමඟ අද (3) පැවති සාකච්ඡාවකදීය.

දිවයිනේ සෑම ප්‍රදේශයකම ඔමික්‍රෝන් රෝගීන් වැඩි වශයෙන් හමුවන තත්ත්වයක් යටතේ පක්ෂයේ දේශපාලන නායකයන්ගේ මෙන්ම පාක්ෂිකයන්ගේ ආරක්ෂාව තහවුරු කිරීමේ වැදගත්කම ගැන මෙහිදී රනිල් වික්‍රමසිංහ මහතා පක්ෂ ජ්‍යෙෂ්ඨයන් දැනුවත් කරනු ලැබීය.

එක්සත් ජාතික පක්ෂයේ කෘත්‍යාධිකාරී මණ්ඩලය අනුමත කළ දේශපාලන දර්ශනය අනුව ඉදිරි දේශපාලන ක්‍රියාකාරකම් සංවිධානය කිරීමෙිදී කටයුතු කළ යුත්තේ ඔමික්‍රෝන් සම්බන්ධයෙන් වැඩි අවධානයක් යොමුකරමින් බවද එජාප නායක රනිල් වික්‍රමසිංහ දුන් උපදෙස් වල වැඩිදුරටත් සඳහන් වේ .

ජාත්‍යන්තර මූල්‍ය අරමුදලින් උපදෙස් පතන බවට මුදල් අමාත්‍ය බැසිල් රාජපක්ෂ කළ ප්‍රකාශය පිළිබඳව මහ බැංකුවේ අධිපති අජිත් නිවාඩ් කබ්රාල් පැහැදිලි කිරීමක් සිදුකර ඇත.

එහිදී මහ බැංකු අධිපති පෙන්වා දෙන්නේ ශ‍්‍රී ලංකාවේ ආර්ථික තත්ත්වය පිළිබඳ විශේෂඥ උපදෙස් ලබා දෙන්නැයි ශ්‍රී ලංකාව ජාත්‍යන්තර මූල්‍ය අරමුදලට සඳහන් කළ බව මුදල් අමාත්‍යවරයා පවසා ඇති බවයි.

මුදල් අමාත්‍යංශය විසින් ආරම්භ කර ඇති සාරව මූල්‍ය ඒකක සඳහා තාක්ෂණික වැඩසටහනක් ගොඩනැගීම පිළිබඳව මෙහිදී අවධානය යොමුව ඇති බවත් වෙන කිසිවක් මෙහි නොමැති බවත් මහ බැංකු අධිපතිවරයා කියා සිටියි.

තම ට්විටර් ගිණුමේ සටහනක් තබමින් ඔහු මෙම අදහස් පළ කර ඇත.

කෙසේ වුවත් දේශපාලන විචාරකයන් පවසන්නේ මුදල් අමාත්‍යවරයා සහ මහ බැංකු අධිපති ජාත්‍යන්තර මූල්‍ය අරමුදල සමග වැඩකිරීම සම්බන්ධයෙන් පරස්පර අදහසක සිටින බව මේ හරහා පෙන්නුම් කරන බවයි.

පසුගිය කාලයක් තිස්සේ මහ බැංකු අධිපති අජිත් නිවාඩ් කබ්‍රාල් පවතින මූල්‍ය අර්බුදය සමනය කරගන්න ජාත්‍යන්තර මූල්‍ය අරමුදලේ සහය ගැනීම ප්‍රතිකේෂ්ප කළ ස්ථාවරයේ සිටි බවත් නමුත් ආණ්ඩුවේ බැසිල් පාර්ශ්වය නියෝජනය කරන පිරිස දිගින් දිගටම IMF යාම අත්‍යවශ්‍ය බව අවධාරණය කළ බවත් ඔවුන් පෙන්වා දෙයි.

තවද රටේ ආර්ථික ක්‍රියාවලිය සම්බන්ධව ප්‍රතිපත්තිමය තීන්දු තීරණ ගනු ලබන මුදල් අමාත්‍යවරයා සිදුකරන ප්‍රකාශ මහ බැංකු අධිපති විසින් යළි අර්ථකථනය කිරීම මුදල් අමාත්‍යවරයාව අභියෝගයට ලක්වීමක් ලෙසත් අවධාරණය කරන දේශපාලන විචාරකයන් වැඩිදුරටත් පවසන්නේ ඒ හරහා පිළිඹිබු වන්නේ මෙරටට ආර්ථික කටයුතු සම්බන්ධයෙන් නිසි ප්‍රතිපත්තියක් නොමැති වීම බවත් පෙන්වා දෙයි.

මේ තත්ත්වය දිගටම පැවතීම තුළ ඊළඟ අර්බුදය මුදල් ඇමති සහ මහ බැංකු අධිපති අතර හටගනු ඇති බවත් , ඔවුන් පවසයි.

මෙවර නිදහස් දින රාජ්‍ය උත්සවයට සහභාගී නොවීමට මැල්කම් කාදිනල් රංජිත් කොළඹ අගරදගුරුතුමන් තීරණය කර ඇත.

එසේම සෑම වසරකම බොරැල්ල, සියලු සාන්තුවරයන්ගේ දේවස්ථානයේදි තමන් විසින් පවත්වන නිදහස් දින දේව මෙහෙය නොපැවැත්වීමටත් තීන්දුවක් ගෙන ඇත.

කතෝලික සභාවේ මාධ්‍ය ප්‍රකාශක සිරිල් ගාමිණී ප්‍රනාන්දු පියතුමා අද (3) මාධ්‍ය හමුවකදී මේ බව අනාවරණය කළ අතර, ඒ පාස්කු ඉරුදින ත්‍රස්ත ප්‍රහාරය සම්බන්ධයෙන් මෙතෙක් සාධාරණයක් ඉටුනොවීම සහ බොරැල්ල සියලු සාන්තුවරයන්ගේ දේවස්ථානයෙන් අත්බෝම්බයක් හමුවීමේ සිද්ධියට අදාළව එහි සේවය කරන මුනීන්ද්‍රන් නැමති සන් ක්‍රිස්ටියන්වරයාගේ නිදහස අහිමි කර අසාධාරණ ලෙස අත්අඩංගුවේ තබාගෙන සිටීම යන කරුණු හේතුවෙන් බවත් පැවසීය.

එසේ වුවත් රටපුරා දේවස්ථානවල දී නිදහස් දින දේව මෙහෙයන් පැවැත්වෙන බවත්, කාදිනල්තුමන්ගේ නියෝජිතයෙක් නිදහස් දින රාජ්‍ය සැමරුමට සහභාගී වන බවත් පියතුන් සඳහන් කළේය.

ප්‍රශ්න ගත බෝම්බ තැබීමේ සිද්ධිය සම්බන්ධයෙන් සිදුකෙරන පරීක්‍ෂණ ගැන සෑගීමකට පත්නොවන බව හා එම පරීක්‍ෂණ කඩිනම් කළ යුතු බව කොළඹ මහේස්ත්‍රාත් අධිකරණයේදී මහේස්ත්‍රාත්වරිය ද පොලීසියට පැවසූ බව කී සිරිල් ගාමිණී පියතුමන්, අහිංසකයන්ට වද හිංසා කරන පසුබිමක් තුළ එම දේවස්ථානයේ දේවමෙහෙය මෙවර පැවැත්වීම කළ නොහැකි බවට කාදිනල්තුමන් තීරණය කළ බව ද සඳහන් කළහ.

ජාත්‍යන්තර මූල්‍ය අරමුදල සම්බන්ධයෙන් අමාත්‍ය මණ්ඩල පැහැදිලි කිරීමක් කරන ලෙස එක්සත් ජාතික පක්ෂය ඉල්ලීමක් කර මාධ්‍ය නිවේදනයක් නිකුත්කර ඇත.

එහිදී එක්සත් ජාතික පක්ෂ කෘත්‍යාධිකාරී මණ්ඩල සභික දිනුක් කොළඹගේ අදහස් දක්වමින් පවසා ඇත්තේ , පසුගිය සතියේ රජය ජාත්‍යන්තර මූල්‍ය අරමුදලේ සහය ඉල්ලා ප්‍රකාශ තුනක් නිකුත් කළ බවයි.

" රටේ ණය ප්‍රතිව්‍යුහගත කිරීමේ ජාත්‍යන්තර මූල්‍ය අරමුදලේ වැඩපිළිවෙලකට රජය එකඟ බව" පසුගිය පෙබරවාරි 2 වෙනිදා කැබිනට් ප්‍රකාශක ආචාර්ය රමේෂ් පතිරණ ප්‍රකාශ කර තිබුණි. පෙබරවාරි 2 වෙනිදා මුදල් අමාත්‍ය බැසිල් රාජපක්ෂ මාධ්‍ය වෙත ප්‍රකාශ කර තිබුණේ වත්මන් ආර්ථික තත්ත්වය පිළිබඳව විශේෂඥ උපදෙස් ජාත්‍යන්තර මූල්‍ය අරමුදලෙන් මේ වනවිට ඉල්ලා ඇති බවය. පෙබරවාරි 3 වෙනිදා මහ බැංකු අධිපති අජිත් නිවාඩ් කබ්රාල් ටුවිටර් පණිවිඩයක් නිකුත් කරමින් කියා සිටියේ මෙය සමාන්‍ය තාක්ෂණික ආධාර වැඩසටහනක් බවයි.

කෙසේ වුවත් වැඩිදුරටත් අදහස් දැක්වූ කොළඹගේ පවසන්නේ , පසුගිය වසරේ නොවැම්බර්-දෙසැම්බර් මාසවලදී ජාත්‍යන්තර මූල්‍ය අරමුදලේ උපදේශන කටයුතු මෙරට පැවැති බැවින් මෙය තාක්ෂණික වැඩසටහනක්ද යන්න පිළිබඳව සැකයක් මතුවී තිබෙන බවයි.

රජය මේ සම්බන්ධයෙන් ගන්නා ක්‍රියාමාර්ග මොනවාද යන්න මුදල් ඇමතිවරයා නොදන්න බව මහබැංකු අධිපතිවරයා ප්‍රකාශ කරනවාද? යන ප්‍රශ්නයත් ඔහු මතුකරයි.

ශ්‍රී ලංකාව දැවැන්ත මූල්‍ය අර්බූධයකට මුහුණ දී සිටින අවස්ථාවක රටේ පවතින ප්‍රශ්න මගහරවා ගැනීම සඳහා රජය තම සැලැස්ම මහජනතාවට ඉදිරිපත් කළ යුතු බවද, වර්තමානයේදී රටේ ආර්ථිකය අධීක්ෂණය කරන්නේ කවුරුන්ද යන්න පිළිබඳව දැඩි කනස්සල්ලක් පවතින බවද කොළඹගේ තවදුරටත් පැවසීය.

එසේම වැඩිදුරටත් ඔහු මෙසේද සඳහන් කරයි. ජාත්‍යන්තර මූල්‍ය අරමුදල සහ නිවැරදි තත්ත්වය කුමක්ද යන්න සම්බන්ධයෙන් අමාත්‍ය මණ්ඩලය ප්‍රකාශයක් කිරීම අත්‍යාවශ්‍යයි. රජයේ පවතිත මේ අඛණ්ඩ ව්‍යාකූලත්වය සහ අවිනිශ්චිතභාවය මහජනතාව මුහුණදෙන දුෂ්කරතා තවත් වැඩිකරන බව අපේ හැඟීමයි.

රට මුහුණ දී සිටින මූල්‍ය ප්‍රශ්න විසඳීම සඳහා ජාත්‍යන්තර මූල්‍ය අරමුදලේ සහය ලබාගන්නා ලෙස එක්සත් ජාතික පක්ෂය දිගින් දිගටම රජයෙන් ඉල්ලා සිටියා. අමාත්‍ය මණ්ඩලය ජාත්‍යන්තර මූල්‍ය අරමුදලේ සහය ලබාගැනීම ප්‍රතික්ෂේප කරන්නේ නම් ඔවුන්ගේ ඉදිරි සැලසුම් මහජනතාවට ඉදිරිපත් කිරීමේ වගකීම ඔවුන් ක්‍රියාත්මක කළ යුතුව තිබෙනවා.

රාජ්‍ය අමාත්‍ය අරුන්දික ප්‍රනාන්දු ඉල්ලා අස්වීමට තීරණය කර තිබේ.

රාගම වෛද්‍ය පීඨ සිසුන් පිරිසකට එල්ල වූ ප්‍රහාරය සම්බන්ධයෙන් පූර්ණ පරීක්ෂණයක් පැවැත්වෙන තුරු සිය ධුරයෙන් ඉවත් කිරීමට තීරණය කළ බව හෙතෙම පවසා ඇත.

මේ අතර සිද්ධිය සම්බන්ධයෙන් අත්අඩංගුවට ගෙන ඇති අරුන්දික ප්‍රනාන්දු අමාත්‍යවරයා ගේ පුතා ඇතුළු සැකකරුවන් අධිකරණයට ඉදිරිපත් කිරීමෙන් අනතුරුව එළැඹෙන 07 වෙනිදා දක්වා රක්ෂිත බන්ධනාගාරගත කර තිබේ.

රාජ්‍ය අමාත්‍ය අරුන්දික ප්‍රනාන්දුගේ පුත්‍රයා වන 23 හැවිරිදි අවින්ද රන්දිල ජෙහාන් ප‍්‍රනාන්දු පොලිස් අත්අඩංගුවට ගනිමින් පොලිසිය පවසා සිටියේ රාගම වෛද්‍ය පීඨ නේවාසිකාගාරයට සිදු කරන ලද පහර දීම සම්බන්ධයෙන් මෙම අත්අඩංගුවට ගැනීම කරන ලද බවයි.

අමාත්‍ය වරයාගේ පුත්‍රයා අත්අඩංගුවට ගෙන ඇත්තේ පොලීසියට භාර වීමෙන් පසුවය.

මේ අතර මාධ්‍ය වෙත අදහස් දක්වමින් රාජ්‍ය අමාත්‍ය අරුන්දික ප්‍රනාන්දු පවසන්නේ ,තම අමාත්‍යංශය යටතේ ඇති ආයතනයක වාහනයක් රාගම වෛද්‍ය පීඨයට ගොස් ඇත්තේ ජ්‍යෙෂ්ට සිසුන්ගේ පහරදීමෙන් කනිෂ්ඨ ශිෂ්‍යයන් බේරාගන්න බවයි.

මෙම තොරතුරු තමන්ට වාර්තා වූ ඒවා බව ද පැවසූ ඔහු මේ ගැන සාධාරණ පරීක්ෂණයක් සිදුකළ හොත් නිවැරදි තොරතුරු සොයාගත හැකි බවද පවසයි.

තමන් මෙම සිදුවීම දැනගත්තේ එදින පෙරවරුවේ බවත් අමාත්‍යාංශයට අයත් වාහන ගොස් සරසවි සිසුන්ට පහර දී ඇත්තේ නම් තමන් ඒ පිළිබඳව සමාව ඉල්ලන බව ද හෙතෙම කියා සිටියේය.

මෙම සිදුවීම සම්බන්ධයෙන් තමන්ගේ කිසිදු සම්බන්ධයක් නැති බවත් පොලිසියක තමන්ගේ නමක් හෝ සටහන්ව නැති බවත් හෙතෙම තවදුරටත් සඳහන් කළේය.

සිදුවීම සම්බන්ධයෙන් සාධාරණය පරීක්ෂණයක් සිදුකළ යුතු බවත් පවසන ඔහු එම පරීක්ෂණ සඳහා තමන්ගේ උපරිම සහාය දෙන බව ද කියා සිටියේය.

කෙසේ වුවත් පසුගියදා අමාත්‍යවරයා ප්‍රකාශ කර සිටියේ තමන් මේ පහරදීමට සම්බන්ධ බව ඔප්පු වුවහොත් ඉල්ලා අස්වීමට සූදානම් බවය.

ජනවාරී 01වනදා සිට මේ දක්වා කාලය තුළ කොළඹ නගරයේ කොරෝනා ආසාදිතයින්ගෙන් බූස්ටර් එන්නත ලබා ගත් කිසිදු පුද්ගලයෙකු ජිවිතක්ෂයට පත්වී නොමැති බව කොළඹ මහ නගර සභාව පවසයි.

එහි ප්‍රධාන සෞඛ්‍ය වෛද්‍ය නිලධාරී රුවන් විජයමුණි සෞඛ්‍ය ප්‍රවර්ධන කාර්යාංශයේ අද (02) පැවති මාධ්‍ය හමුවකදී මේ බව සඳහන් කර ඇත.

මෙතෙක් තමන්ට අදාල මාත්‍රාව ලබා නොගත් පුද්ගලයින්ට කඩිනමින් එම මාත්‍රාව ලබා ගන්නා ලෙසටද මෙහිදී ඉල්ලීමක් සිදුකෙරුණි.

කෙසේ වුවත් මේ වන විට බූස්ටර් එන්නත සම්බන්ධයෙන් විවිධ මිත්‍යා අදහස් සමාජය තුළ ඉස්මතුව තිබේ. නමුත් වසංගත තත්ත්වයක් හමුවේ මුල්තැන දියයුතුව ඇත්තේ මිත්‍යාවට නොව විද්‍යාවටය.

ත්‍රස්තවාදය වැලැක්වීමේ පනත යටතේ අත්අඩංගුවට ගෙන රඳවාගෙන සිටි සිරකරුවන් පිරිසක් නිදහස් කිරීමට කටයුතු කර ඇත.

මෙසේ නිදහස් කරන සිරකරුවන් ගණන 09ක් වන අතර ඒ කොළඹ ප්‍රධාන මහේස්ත්‍රාත් අධිකරණය ලබාදුන් නියෝගයක් අනුවය.

බන්ධන්ගාර මාධ්‍ය ප්‍රකාශක ,බන්ධනාගාර කොමසාරිස් චන්දන එකනායක පැවසුවේ, රුපියල් ලක්ෂ 50 ක ශරිර ඇප දෙක බැගින් එක් අයකුට ඊයේ (01) අධිකරණයෙන් ඇප නියම කර ඇති බවයි.

මෙලෙස ඇප නියම කර ඇත්තේ කොළඹ මැගසින් බන්ධනාගාරයේ රඳවා සිටි රැඳවියන් පිරිසකි.

බන්ධනාගාර මාධ්‍ය ප්‍රකාශකවරයා පැවසුවේ, අදාළ රැඳවියන් මෙතෙක් ඇප කොන්දේසි ඉටු නොකිරිම හේතුවෙන් තවදුරටත් ඔවුන් බන්ධනාගාරගත කර සිටින බවයි.