පුවත්

 දේශීය ජල බෝතල් සඳහා උපරිම සිල්ලර මිල ඉවත් කරමින් පාරිභෝගික කටයුතු පිළිබඳ අධිකාරිය ගැසට් නිවේදනයක් නිකුත් කර තිබේ.

මේ අනුව වෙළෙඳ පොල විශ්ලේෂකයන් පවසන්නේ පානීය ජල බෝතලයේ මිලත් අනෙක් සෙසු භාණ්ඩ සේ හිතුමතේ මිල නියමවීමේ අවධානමක් ඇති බවයි.

මීට පෙර පාලන මිලක් පැවති සියලු භාණ්ඩවල උපරිම මිල ඉවත් කිරීම හමුවේ ඒවායේ මිල අත්තනෝමතික ලෙස ඉහළ ගිය බවත් ඔවුන් සිහිපත් කරයි.

එසේම කිසියම් ආකාරයකට ජල බිල්පත් ගාස්තු වැඩිවීමක් නුදුරේදීම සිදුවේදෝ යන සැකයත් මේ තුළ පවතින බව ඔවුන් වැඩිදුරටත් සඳහන් කර සිටියි.

උඩරට කැරැල්ල කාලේ සුද්දෝ රටේ ගෙඩි හැදෙන ගහක් ගානේ විනාශ කළ බවත්, කාලිංඝ මාඝ යුගයේ මේ රටේ අතීත ශිෂ්ටාචාරය විනාශ කළ බවත් පැවසූ විපක්ෂ නායක සජිත් ප්‍රේමදාස මහතා, වර්ථමාන ආණ්ඩුව රටේ කෘෂිකර්ම ශිෂ්ටාචාරය සහමුලින්ම විනාශ කළ බව අවධාරණය කරයි.

විපක්ෂ නායකතුමා මේ බව පවසා සිටියේ ඊයේ (28) දඹුල්ල නගරාසන්න පැවති සමගි ජන බලවේගයේ ජන හමුවකට එක්වෙමින්ය.

පිපිරීම් නවත්තන බව කියා පැමිණි ආණ්ඩුව යටතේ අතට ගන්න ගෑස් සිලින්ඩරය පවා පිපිරෙන තැනට පත්වී ඇති බවත්,එපමණක් නොව පොහොර කෑන් පවා පිපිරෙන බවත් විපක්ෂ නායක පැවසීය.

ඒ මදිවට,ගෙන්වා ඇති දියර පොහොර උහුලන්නට බැරි තරම් දුගදකින් යුක්ත බව කී විපක්ෂ නායක ඒ දුගඳ අරලියගහ මන්දිරයට දැනෙන්නේ නැති බවත් , ජනාධිපති මන්දිරයට දැනෙන්නේ නැති බවත්, පාර්ලිමේන්තුවට දැනෙන්නේ නැති බවත් පැවසීය.

ජනතාවගේ දුක වේදනාව දැනෙන ස්නායු ආණ්ඩුවට නැතැයි කී විපක්ෂ නායකතුමා, සීනි වංචාව, පොල්තෙල් වංචාව, කෝවිඩ් ගසාකෑම ඇතුලු මහා දූෂණ වංචා අක්‍රමිකතාවලට ආණ්ඩුව වගකිවයුතු බව පැවසීය. අද වන විට ශ්‍රී ලංකාව දූෂණ දර්ශකයේ අතිශය පහල තැනකට රට පත්වී ඇතැයි ද ඔහු පැවැසීය.

පාස්කු වින්දිතයන්ට යුක්තිය ප‍්‍රමාද වීම සහ බොරැල්ල සියළු සාන්තුවරයන්ගේ දෙව් මැදුරේ අත් බෝම්බ සිද්ධිය පිළිබදව ශුද්දොත්තම පාප් වහන්සේගේත් වතිකාන පරිපාලනයේත් අවදානය යොමු වී ඇති බව මව්රට පුවත් වෙබ් අඩවිය වාර්තා කරයි.

අදාළ පුවත වැඩිදුරටත් මෙසේද වාර්තා කර ඇත.

පාස්කු ප‍්‍රහාරය පිළිබදවත්, බොරැල්ල සියළු සාන්තුවරයන්ගේ දේවස්ථානයේ අත් බෝම්බය තැබීමේ සිද්ධිය පිළිබදවත් පැවැත්වෙන විමර්ෂණ පිළිබද තමන්ට විශ්වාසයක් නැති බව මැල්කම් රන්ජිත් කාදිනල් හිමියෝ අවස්ථා කිහිපයකදීම ප‍්‍රකාශ කර තිබුණි.

පරීක්ෂණ සදහා ජාත්‍යන්තර මැදිහත් වීමක් අවශ්‍ය බවටද උන් වහන්සේ පැවසී ය.

ඒ අනුව, පාස්කු ප‍්‍රහාරය සහ ඒ හා සම්බන්ධ අනෙකුත් සියළු සිද්ධීන් පිළිබදව ස්වාධීන වෙනම පරීක්ෂණයක් පැවැත්වීමට අවශ්‍ය සහයෝගය ලබා දීමට වතිකානය කටයුතු කරමින් සිටින බව වාර්තා වේ.

මේ පිළිබදව මෙරට කතෝලික ප‍්‍රජාවේ ගිහි පැවිදි නායකයන් කිහිප දෙනෙකු වතිකානය සමග සාකච්ඡා කරමින් සිටින බව පැවසේ.

පළමු ශ්‍රේණියට දරුවෙක් ඇතුලත්කර ගැනීමට රුපියල් එක්ලක්ෂ පනස් දහසක අල්ලස් මුදලක් ලබා ගන්නා අවස්ථාවේදී අල්ලස් හෝ දූෂණ විමර්ශන කොමිසමේ නිලධාරීන්ගේ ග්‍රහනයට හසුවුනු පානදුර ශ්‍රී සුමංගල පිරිමි විදුහලේ විදුහල්පතිවරයා අද (29) රක්ෂිත බන්ධනාගාරගත කර තිබේ.

ඒ අද එම විදුහල්පතිවරයාව පානදුර මහේස්ත්‍රාත් ලහිරු එන්. සිල්වා වෙත ඉදිරිපත් කිරීමෙන් අනතුරුවය.

විදුහල්පතිවරයා එම අල්ලස් මුදල ලබාගෙන ඇත්තේ ඊයේ (28) සවස් කාලයේදීය.

2022 වසර සදහා පළමු ශ්‍රේණියට පැමිණිලිකරුගේ දරුවා ඇතුලත් කිරීමට රුපියල් ලක්ෂ 02 ක මුදලක් ඉල්ලා මුලින් රුපියල් 50,000 ක් ලබාගෙන ඇති බවත් අත්අඩංගුවට ගන්නේ ඉතිරි මුදල ලබාගන්නා අවස්ථාවේදී බවත් අල්ලස් කොමිසම සඳහන් කරයි.

මෙරටින් තවත් ඔමික්‍රොන් වෛරස් ප්‍රභේදය ආසාදිතයන් 82 දෙනෙකු හඳුනාගෙන තිබේ.

ශ්‍රී ජයවර්ධනපුර විශ්වවිද්‍යාලයේ ප්‍රතිශක්තිකරණ හා අණුක වෛද්‍ය අංශය මගින් නව ඔමික්‍රෝන් ආසාදිතයින් 82ක් සහ ඩෙල්ටා ආසාදිතයින් 6ක් හඳුනා ගෙන ඇතැයි ආචාර්ය චන්දිම ජීවන්දර පවසයි.

ඔවුන්ද අනු ප්‍රභේද 02 ක ආසාදිතයන් බවට හඳුනාගෙන ඇති බව දැක්වෙයි.

පසුගිය සතියේදී සමාජයෙන් ලබාගත් සාම්පලවලින් මෙම ආසාදිතයන් හඳුනාගෙන තිබේ.

කොළඹ මහ නගර සභා බල ප්‍රදේශය,කැස්බෑව, මතුගම යන ප්‍රදේශවලින් එම ආසාදිතයින් හඳුනාගෙන ඇති බව ශ්‍රී ජයවර්ධනපුර විශ්වවිද්‍යාලයේ ආසාත්මිකතා, ප්‍රතිශක්ති විද්‍යා හා සෛල ජෛව විද්‍යායතනය පවසයි.

සෙසු සාම්පල් සාම්පල් 06 ඩෙල්ටා ප්‍රභේදය ආසාදිත බව හඳුනාගෙන ඇත.

ඩෙල්ටා ප්‍රභේදය ආසාදිතයන් වාර්තා වී ඇත්තේ හොරණ, මතුගම සහ පානදුර යන ප්‍රදේශවලිනි.

ඒ අනුව මේ වන විට රට පුරා කොවිඩ් 19 ඔමික්‍රොන් ප්‍රභේදය වේගයෙන් ව්‍යාප්ත වෙමින් තිබෙන හෙයින් තවදුරටත් එම එන්නත්කරණය ලබා ගැනීමේ අවශ්‍යතාව පවතින බවයි සෞඛ්‍ය අංශ පෙන්වා දෙයි.

දේශපාලන පළිගැනීම් පිළිබඳව සොයාබැලූ ජනාධිපති කොමිසමේ නිර්දේශ බල රහිත කරන ලෙස ඉල්ලා හිටපු අග්‍රාමාත්‍ය , එක්සත් ජාතික පක්ෂයේ නායක රනිල් වික්‍රමසිංහ විසින් ගොනුකර තිබෙන රීට් පෙත්සම සලකා බැලීම සඳහා මාර්තු 30 කැඳවීමට අභියාචනාධිකරණය අද (28) තීන්දු කර ඇත.

පෙත්සම අද කැඳවනු ලැබුවේ නිශ්ශංක බන්දුල කරුණාරත්න, එම්.ටී.එම්. ලෆාර් තාහිර්, ඩී.එම්. සමරකෝන් යන අභියාචනාධිකරණය විනිසුරු මඬුල්ල හමුවේ ය.

පෙත්සමේ වගඋත්තරකරුවන් ලෙස දේශපාලන පළිගැනීම් පිළිබඳ සොයා බැලීමට පත් කළ කොමිසමේ සභාපති විශ්‍රාමික ශ්‍රේෂ්ඨාධිකරණ විනිසුරු උපාලි අබේරත්න , ඇතුළු එම සාමාජිකයින්, කොමිසමේ ලේකම්වරයා හා ජනාධිපති ලේකම්වරයා නම් කර තිබේ.

කොමිසමට කැඳවූ අවස්ථාවේදී තමන්ට චෝදනා පත්‍රයක් හෝ පැමිණිල්ලක් ඉදිරිපත් නොවූ බව සඳහන් කර ඇති පෙත්සම්කරු දේශපාලන පළිගැනීම් පිළිබඳව සොයා බැලූ කොමිසමේ වාර්තාවෙහි තමන්ට එරෙහිව සොයාගැනීම් සහ නිර්දේශ සදහන් කර ඇති බවට පෙන්වා දෙයි.

එම කොමිසම විමර්ශනය කළ ආකාරය සම්පූර්ණයෙන්ම නීතියට පටහැනි යැයි ද තමන්ට පැවරී ඇති බලතල ඉක්මවා ඔවුන් ක්‍රියාකර ඇතැයි ද පෙත්සමෙහි වැඩිදුරටත් සඳහන් කරන පෙත්සම්කරු, එම කොමිසමේ නිර්දේශ සහ සොයාගැනීම් බල රහිත කරන රීට් ආඥාවක් නිකුත් කරන ලෙස ද ඉල්ලා තිබේ.

එක කන්නයෙන් රටේ කෘෂිකර්මාන්තය කාබනික කිරීමට යාමේ ආදීනව මේ වන විට දසතින් මතුවෙමින් ඇත.

ඊට අදාළ තවත් පුවතක් වන්නේ අර්තාපල් අතර සගවා පාකිස්තානයේ සිට නීති විරෝධීව මෙරටට රතු අල ගෙන්වීමට ගෙන තිබීමය.

මෙසේ නීති විරෝධී ලෙස ගෙනා රතු අල කිලෝ ග්‍රෑම් 16,000ක් බහලුම් දෙකක් පරීක්ෂා කිරීමේදී රේගු නිලධාරීන් විසින් සොයා ගෙන ඇත. රේගුවේ මධ්‍යම භාණ්ඩ පරීක්ෂණ අංශයට අනුයුක්ත ග්‍රේ ලයින් 2 බහාලුම් පරීක්ෂණ අංගනයේ රේගු නිලධාරීන් විසින් මෙම බහලුම් දෙක අද (28) පරීක්ෂාවට ලක් කර ඇත.

වත්තල ප්‍රදේශයේ පිහිටි සමාගමක් විසින් ඉන්දියාවේ පිහිටා ඇති සමාගමකින් ඇණවුම් කර මෙම බහාලුම් දෙක මෙරටට ආනයනය කර තිබුණ අතර එහි අර්තාපල් කිලෝග්‍රෑම් 53,000 අඩංගු බව රේගුවට ප්‍රකාශ කර තිබිණ.

නමුත් එම බහාලුම් පරීක්ෂා කිරීමේ දී එහි තුල ඉතා සූක්ෂ්ම ලෙස සඟවා තිබූ මෙරටට ආනයනය සීමා කර ඇති රුපියල් මිලියන තුනකට වඩා අධික වටිනාකමකින් යුත් රතු අල කිලෝග්‍රෑම් 16,000 ක් සොයා ගෙන ඇත.

මෙම රතු අල තොගය අර්තාපල් අඩංගු බෑග් වලට සමාන බෑග් වල අසුරා එම බහාලුම්වල ගැඹුරු අන්තයේ ඉතා සූක්ෂ්ම ලෙස සඟවා තිබූ බවයි රේගු නිලධාරීන් සඳහන් කළේ.

මේ වන විට මෙම භාණ්ඩ නිෂ්කාශනය සඳහා පැමිණි වාප්පු ලිපිකරු රේගුව විසින් රඳවා ගෙන ප්‍රශ්න කරමින් සිටින බව රේගු මාධ්‍ය ප්‍රකාශක සුදත්ත සිල්වා සඳහන් කරයි.

තවත් කොවිඩ් මරණ 17ක් සෞඛ්‍ය සේවා අධ්‍යක්ෂ ජනරාල්වරයා විසින් තහවුරු කර තිබේ.

සෞඛ්‍ය අංශ පෙන්වා දෙන්නේ එම මරණ ඊයේ (27) තහවුරු කර ඇති බවය.

අවුරුදු 30ට අඩු එක් පිරිමි මරණයක් ද වාර්තා වී තිබේ.

ඒ අනුව, මෙරටින් මේ දක්වා වාර්තා වී ඇති මුළු කොවිඩ් මරණ ගණන 15,386කි

කතානායක මහින්ද යාපා අබේවර්ධනට කොවිඩ් ආසාදනය වී ඇතැයි පාර්ලිමේන්තු ආරංචි මාර්ග සඳහන් කරයි.

කතානායකවරයා පීසීආර් පරීක්ෂණයට ලක් වූ අවස්ථාවේ දී positive බව දක්වමින් කොවිඩ් ආසාදනය වී ඇති බවට තහවුරු වූ බවද එම ආරංචි මාර්ග සඳහන් කරයි.

කතානායක මහින්ද යාපා අබේවර්ධන මේ වන විට කථානායක නිල නිවසේ නිරෝධායනය වෙමින් සිටින බව ද එම ආරංචි මාර්ග පවසයි.

අල්ලස් පනතේ දූෂණය නම් වරදක් සිදු කළ බවට චෝදනා ලැබ සිටි හිටපු සමූපකාර අභ්‍යන්තර වෙළඳ අමාත්‍ය සහ වර්තමාන මහා මාර්ග අමාත්‍ය ජොන්ස්ටන් ප්‍රනාන්දු ඇතුළු තිදෙනෙකු අල්ලස් නඩු තුනකින් නිදහස් කිරීමට කොළඹ ප්‍රධාන මහේස්ත්‍රාත් බුද්ධික සී. රාගල නියෝග කළේය.

මහේස්ත්‍රාත් අද (28) එම නියෝගය නිකුත්කළ අතර, ඒ, අපරාධ නඩු විධාන සංග්‍රහ පනතේ 126 වගන්තිය ප්‍රකාරව නැවත නඩු පැවරීමේ කොන්දේසිය මත මෙම නඩු වලින් අදාල චූදිතයන් නිදහස් කරන ලෙසට අල්ලස් හෝ දූෂණ විමර්ශන කොමිෂන් සභාව අධිකරණයෙන් කළ ඉල්ලීමක් සැලකිල්ලට ගනිමිනි.

කළුතර දිස්ත්‍රික් පාර්ලිමේන්තු මන්ත්‍රී කුමාර වේල්ගමටද කොවිඩ් ආසාදනයවී ඇතැයි වාර්තාවේ.

අද (28) දින සිදුකළ පීසීආර් පරීක්ෂණයකදී මේ බව තහවුරුවී ඇත.

මේ අනුව කොවිඩ් ආසාදිත මන්ත්‍රීවරුන් සංඛ්‍යාව 45 ක් දක්වා වූ ඉහළ ගොස් ඇත.

හුදු ආණ්ඩු මාරුවකින් හෝ මුහුණු මාරුවකින් පමණක් රට මුහුණදී ඇති ප්‍රශ්න විසඳිය නොහැකි බව ජාතික ජන බලවේගයේ පාර්ලිමේන්තු මන්ත්‍රී අනුර කුමාර දිසානායක පවසයි.

ඔහු මේ බව සඳහන් කර සිටියේ කෑගල්ලේ පැවැති වැඩසටහනකදී අදහස් දක්වමින් ය.

එහිදී ඔහු මෙසේද පැවසීය.

"තවදුරටත් හුදු ආණ්ඩු මාරුවකින් හෝ මුහුණු මාරුවකින් විතරක් මේ ප්‍රශ්නය විසඳන්න බෑ. මේ ප්‍රශ්නය විසඳන්න නම් අපේ රටේ දේශපාලනය වෙනස් කරන්න ඕනේ. සමාජයේ සාමුහිකත්වය, රටේ නිෂ්පාදනයට ජනතාව හවුල්වීම සහ නිෂ්පාදනයේ සාධාරණ පංගුව ජනතාවට ගලායෑමේ නව ආර්ථිකයකට අපේ රට පරිවර්තනය කරන්න ඕනේ. එහෙම නැතුව මේ රට හදන්න බෑ."

"ඇමතිවරුන්ගේ ලයිට්බිල 119,000යි, 120,000යි. මාසේ ලයිට් බිල. ආණ්ඩුවෙන් ගෙවන්නේ. පොඩ්ඩක් කල්පනා කරලා බලන්න."

"අපේ රටේ දේශපාලකයා මහජනයාට උඩින් වරප්‍රසාද ගන්නවා. ජනතාවගේ ධනය නාස්ති කරන ආණ්ඩු ක්‍රමයක් තියෙන්නේ."

"මේ රට හදන්න නම් පුරවැසියට දැනෙන්න ඕන දේශපාලකයා මේ වැඩේට ලෑස්තියි කියලා. එහෙම දැනෙන්න නම් දේශපාලකයා තමන්ගේ වරදාන වරප්‍රසාද අයින් කරන දේශපාලනයක් ඕනේ. ඒක අපි කරනවා."

"මන්ත්‍රිවරුන්ගේ විශ්‍රාම වැටුප, මන්ත්‍රි වාහන බලපත්‍ර, ඇමතිවරුට දෙන නිවාස, ජනාධිපතිවරුන්ගේ හතරවටේ තියෙන නිවාස, හිටපු ජනාධිපතිවරු බලාගන්න එක ඔක්කොම නතර කරන තීන්දුවක් ගන්නවා."

ආන්දෝලනාත්ම සුදුළුණු වංචාවට අදාල සුදු ලුණු තොග තම සමාගම්වල බව මෙරටට සුදුළුණු ගෙන්වන සමාගම්වල අයිතිකරුවන් කියා සිටිති.

අදාල ගනුදෙනුව හේතුවෙන් තම සමාගම්වලට කෝටි හතරකට අධික මුදලක් පාඩු වූ බවද ඔවුන් පවසති.

මෙම සුදුළුණු සතොස ගබඩාවලට නොගොස් කෙළින්ම ඉන්දියානු ව්‍යාපාරිකයන්ගේ ගබඩාවලට ගිය බවද ඔවුන් චෝදනා කරති.

අමාත්‍යවරයා සිට සභාපති දක්වාම මෙම වංචාවට සම්බන්ධ බවද ඔවුන් පෙන්වා දෙති.

මේ රට තුළ නැවතත් තමන් ව්‍යාපාර නොකරන බවද ඔවුන් අන්තර්ජාල නාලිකාවක සාකච්ඡාවක දී කියා සිටියහ.

මෙරට තුළ වසරකට ප්ලාස්ටික් හැඳි මිලියන 600 කට අධික ප්‍රමාණයක් පරිසරයට බැහැර කරන බව වාර්තා වෙයි.

පරිසර අමාත්‍ය මහින්ද අමරවීර පවසන ආකාරයට මේ වන විට පරිසර අමාත්‍යාංශය ප්ලාස්ටික් හා පොලිතීන්වලින් නිෂ්පාදිත එක්වරක් පමණක් භාවිතකර බැහැරකරන භාණ්ඩ රැසක් භාවිතයෙන් ඉවත් කිරීමට කටයුතු යොදා ඇත.

ෂැෂේ පැකට්, දිරාපත් නොවන ලන්ච්ෂීට්, ඉදිආප්ප වට්ටි, ප්ලාස්ටික් හැදි, ආහාර කළතන ප්ලාස්ටික් කූරු සහ කොට්න් බඩ්, ප්ලාස්ටික් හා පොලිතින්වලින් නිෂ්පාදිත මල්මාලා , සුළං පුරවන සෙල්ලම් භාණ්ඩ, බීම බටද මීට ඇතුළත් ය.

තමන් යළිත් දේශපාලනයේ නොයෙදෙන බව පාර්ලිමේන්තු මන්ත්‍රී අතුරලියේ රතන හිමි පවසා ඇත.

ඒ අනුව තමන් මැතිවරණයට ඉදිරිපත් නොවී බණ භාවනාවල යෙදෙමින් කටයුතු කරන පවසා තිබේ.

පසුගිය මහ මැතිවරණයේ අපේ ජනබල පක්ෂයෙන් තරග කරන ලද උන් වහන්සේ පරාජයට පත්වී ජාතික ලැයිස්තුවෙන් පාර්ලිමේන්තු පැමිණි අතර ඒ රටම හිනැස්සූ බල කුලල්කා ගැනීමකින් පසුවය.

එහිදී අපේ ජනබල පක්ෂයේ මහ ලේකම් හිමිනමව පැහැරගැනීමක් පවා සිදුවූ බව ප්‍රසිද්ධ කරුණකි.

සන්නස්ගල තැබූ ෆේස්බුක් සටහන !

මේ සම්බන්ධයෙන් ප්‍රවීණ සිංහල ආචාර්‍යවරයෙකු සහ විචාරකයකු වන උපුල් ශාන්ත සන්නස්ගල සිය ෆේස්බුක් ගිනුමේ මෙසේ ප්‍රතිචාර දක්වා තිබුණි.

රට මුහුණ දී තිබෙන බරපතළ අර්බුදවලින් ගොඩ ගැනීම සඳහා වන යෝජනාවලියක් ආණ්ඩුවට ඉදිරිපත් කිරීමට ආණ්ඩුවේ හවුල්කාර පක්ෂ දහයක නායකයන් නොහොත් ආණ්ඩුවේ බැසිල් විරෝධී පාර්ශ්වය තීරණය කර ඇත.

ආණ්ඩුවේ හවුල්කාර පක්ෂවල නායකයන් ශ්‍රී ලංකාවේ කොමියුනිස්ට් පක්ෂයේ ප්‍රධාන කාර්යාලයේ දී පසුගිය (25) රාත්‍රියේ රැස්වී කල සාකච්ඡාවක දී මෙම තීරණය ගෙන ඇත.

අදාළ යෝජනාවලිය ජනාධිපතිවරයාට සහ අගමැතිවරයාට අද හෙටම භාරදීමෙන් අනතුරුව ජනතාවගේ දැන ගැනීම සඳහා ප්‍රසිද්ධ කිරීමට ද පක්ෂ නායකයින් තීරණය කර ඇති බවත් වාර්තා වෙයි.

රට මුහුණ දී ඇති බරපතළ අර්බුදය ජනතාවගෙන් වසන් නොකර සත්‍ය තත්ත්වය ගැන ජනතාව දැනුවත් කළ යුතු බව ද එහිදී පක්ෂ නායකයින් අවධානය යොමුකර ඇති බවත් වාර්තා වෙයි.

පාර්ලිමේන්තු මන්ත්‍රී අතුරලියේ රතන හිමි ,ඇමැතිවරුන් වන විමල් වීරවංශ, උදය ගම්මන්පිල ,වාසුදේව නානයක්කාර ,පාර්ලිමේන්තු මන්ත්‍රීවරුන් වන වීරසුමන වීරසිංහ ,ටිරාන් අලස්, ගෙවිඳු කුමාරතුංග , ශ්‍රී ලංකාවේ කොමියුනිස්ට් පක්ෂයේ ප්‍රධාන ලේකම් විශේෂඥ වෛද්‍ය ජී වීරසිංහ ,හිටපු ප්‍රධාන ලේකම් ඩිව් ගුණසේකර යන මහත්වරුන් ඇතුළු පිරිසක් මේ අවස්ථාව සඳහා සහභාගි ව තිබේ.

විමල් - ජනාධිපති දවල් හම්බෙලා !

මේ අතර ආන්දෝලනාත්මක යුගදනවි ගිවිසුම මුල්කරගෙන කැබිනට් මණ්ඩලයට එරෙහිව ශ්‍රේෂ්ඨාධිකරණයට යාමෙන් පසු අමාත්‍ය විමල් වීරවංශ හා ජනාධිපති ගෝඨාභය රාජපක්ෂ ප්‍රසිද්ධියේ පළමුවරට පසුගිය 25 එක වේදිකාවක මුණගැසීම ගැනත් දේශපාලන ක්ශේත්‍රයේ අවධානය යොමුව ඇත.

ඒ දේශීය හස්ත කර්මාන්ත ශිල්පීන්ගේ විශිෂ්ට නිර්මාණ ජාතික මට්ටමේ ඇගයෙන “ශිල්ප අභිමානී – 2021” ජනාධිපති හස්ත කර්මාන්ත සම්මාන උළෙල සදහාය.

ඊට පැමිණි ජනාධිපති සහ අමාත්‍ය විමල් අතර සිදුවූ කතා බහ ගැන වැඩි විස්තර තවමත් ප්‍රසිද්ධියට පත්ව නැත.

කෙසේ වුවත් මේ අයුරින් වීරවංශ අමාත්‍යවරයා ඇතුලු කණ්ඩායම අධිකරණය ඉදිරියට යාම සම්බන්ධයෙන් ‌ඉකුත් දා පැවැති කර්තෘවරුන්ගේ රැස්වීමකදී පවා, ජනාධිපතිවරයා ප්‍රසිද්ධියේම කියා තිබුණේ වීරවංශ අමාත්‍යවරයා කළෙ වැරදි වැඩක් බවත්, හෙතෙම සාමූහික වගකිම කඩකොට ඇති බවත්ය.

මේ සම්බන්ධයෙන් වැඩිදුරටත් අදහස් දක්වමින් දේශපාලන විචාරකයන් පවසන්නේ ආණ්ඩුවේ බැසිල් විරෝධී පාර්ශ්වය මේ අලුතින්ම නටන්න යන පදය ආණ්ඩුවේ අභ්‍යන්තර අර්බුදය පුපුරා යාම කල්දමා ගැනීමේ උත්සාහයක් වියහැක බවයි.

ජනවාරි 31 දින දක්වා විදුලි කප්පාදු කිරීමක් සිදු නොකරන බව මහජන උපයෝගිතා කොමිසම සඳහන් කරයි.

කොමිසමේ සභාපති ජනක රත්නායක පැවසුවේ ජනවාරි 31 වැනිදායින් පසු විදුලි කප්පාදුවක් සිදු කිරීම හෝ නොකිරීම ගැන තීරණයක් ගන්නා බවය.

කෙසේ වෙතත් පවතින තත්ත්වය අනුව අරපිරිමැස්මෙන් යුතුව විදුලිය පරිභෝජනය කරන්නැයිද ඔහු ජනතාවගෙන් ඉල්ලා ඇත.

නිවැරදි දත්ත ජනමාධ්‍ය ඔස්සේ ප්‍රචාරය නොවුණද මෙරටින් දෛනිකව කොවිඩ් ආසාදිතයින් 2000කට ආසන්න සංඛ්‍යාවක් වාර්තා වෙන බව මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ පෙන්වා දෙයි.

බොහෝ රෝහල්වල කොවිඩ් රෝගීන් සඳහා ලබා දී තිබු වාට්ටු මේ වන විට වෙනත් රෝගීන් සඳහා ලබා දී ඇති බැවින් රෝහල් ධාරිතාව ද ඉක්මවා යමින් පවතින බව ද හෙතෙම සදහන් කරයි.

වර්ථමානයේ ඇතිවී තිබෙන තත්ත්වය සම්බන්ධයෙන් වැඩිදුරටත් අදහස් දක්වමින් මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ මෙසේද පවසයි.

“දැනට ලංකාවේ කොවිඩ් රෝගීන්ගේ වාර්තා වීම ඉතා විශාල වශයෙන් ඉහළ ගොස් තියෙනවා. දෛනිකව 2000කට ආසන්න කොවිඩ් රෝගීන් සංඛ්‍යාවක් වාර්තා වෙන බවක් පේනවා නිවැරදි දත්ත ජනමාධ්‍ය හරහා ප්‍රකාශ නොවුණට. මේ වාර්තා වන සංඛ්‍යාවේ වැඩිවීම නිසා ම මේ වෙද්දි රෝහල් පිරී ඉතිරිලා ගිහින් තියෙනවා. ඒ වගේම ප්‍රතිකාරක මධ්‍යස්ථාන බොහෝමයක ඉඩ මේ වෙද්දි අවසන් වෙමින් යනවා. තිබුණු බොහෝ ප්‍රතිකාර මධ්‍යස්ථාන සංඛ්‍යාවක් මේ වෙද්දි ආපහු භාරදීලා. මේ වෙද්දි ප්‍රතිකාර මධ්‍යස්ථානවල ඉඩ සම්පූර්ණයෙන්ම පිරිලා ඉතිරිලා ගිහින් තියෙනවා. මේ රෝගීන්ගේ වාර්තා වීම ඉදිරියේ දී සෞඛ්‍ය පද්ධතියට දරා ගන්න බැරි තරම් වෙනබවට පෙර මඟ ලකුණු පහල වෙලා තියෙනවා. විශේෂයෙන්ම බලධාරීන් මෙන්ම ජනතාව මේ තත්ත්වය තේරුම් ගත යුතුයි අපි ඉන්න බැරෑරුම් තත්ත්වය ගැන. එසේ නොමැති වුනොත් ඉදිරියේදී දැනට අඩුවී තිබෙන කොවිඩ් ආසාදිත මරණ ගණන ඉහළ යන්න පුලුවන් සෞඛ්‍ය පද්ධතියේ දරා ගැනීමේ ශක්තිය ඉක්මවා ගියොත්. අපි ජනතාවගෙන් ඉල්ලා සිටිනවා ලඟම තියෙන එන්නත් මධ්‍යස්ථානයෙන් එන්නත ලබා ගන්න කියලා. ඒ වගේම සෞඛ්‍ය උපදෙස් දැඩිව අනුගමනය කරන්න කියලත් අපි ජනතාවගෙන් ඉල්ලා සිටිනවා.”