පුවත්

පාස්කු ඉරිදා ප්‍රහාරය සම්බන්ධයෙන් වූ පසුගිය සඳුදා (07) රාත්‍රී ස්වර්ණවාහිනියේ සජීවී ලෙස විකාශය වූ 'රතු ඉර' විශේෂ විවාදය පෙර සුදානමක් සහිතව සිදුකල කුමන්ත්‍රණකාරී ක්‍රියාවක් වියහැකි බවට සමගි ජන බලවේගයේ මන්ත්‍රීවරුන් අතර බරපතල සැකයක් මතුව ඇතැයි එම පක්ෂයේ අභ්‍යන්තර ආරංචිමාර්ග පවසයි.

පාස්කු ඉරිදා ප්‍රහාරය සම්බන්ධයෙන් කතෝලික පල්ලිය විසින් දිගින් දිගටම මතුකරමින් ආ විරෝධය මෙම විවාදයෙන් හැල්ලුවට ලක්වූ බවටද චෝදනා එල්ලවෙමින් තිබෙන බවද එම ආරංචිමාර්ග කියා සිටියි.

පාර්ලිමේන්තු වරප්‍රසාද යටතේ සිදුකළ ඇතැම් ප්‍රකාශ මෙම විවාදය තුලදී සිදු කළහොත් නඩු වැටීමේ අවධානමක් පවතින බවත්, පාර්ලිමේන්තුවේදී අනාවරණය කල කාරණා මෙම විවාදයේදී ප්‍රකාශ නොකළහොත්, ආණ්ඩුවට එරෙහි විරෝධය හෑල්ලු වීමට ඉඩ ඇතිබවත් පවසමින් මෙම විවාදයට නොයන්නැයි එම පක්ෂයේ මාධ්‍ය අංශයේ ප්‍රධානින් මෙන්ම කතෝලික මන්ත්‍රීවරුන් කිහිප දෙනෙකුම පවසා ඇතත් හරින් ප්‍රනාන්දු හා මනුෂ නානායක්කාර මන්ත්‍රීවරුන් එම ඉල්ලීම් වලට සවන්දීම පවා ප්‍රතික්ෂේප කර තිබේ.

ජනාධිපති මාධ්‍ය ඒකකයේ ප්‍රධානියකු විසින් මෙහෙයවන ස්වර්ණවාහිනී අපක්ෂපාතිත්වය සම්බන්ධයෙන් ද මෙහිදී සජබ මාධ්‍ය ඒකකයේ ඇතැමුන් ප්‍රශ්න මතුකර ඇතත් හරින් ප්‍රනාන්දු මන්ත්‍රීවරයා ඒ සම්බන්ධයෙන් සැලකිල්ලට නොගත්බව එම පක්ෂයේ අභ්‍යන්තර ආරංචිමාර්ග පවසයි.

කෙසේවුවද පසුගිය සඳුදා (07) 'රතු ඉර' විශේෂ දේශපාලන වැඩසටහන තුලින් තමන් මෙතෙක් ගෙනගිය විරෝධය හෑල්ලු කිරීමකට ලක්වුබවට කතෝලික ප්‍රජාවෙන්ද විපක්ෂ නායකයා වෙත දැඩි චෝදනාවක් එල්ල වී ඇතැයි පැවසේ.

කාදිනල්තුමන්, විපක්ෂනායක හමුවීම ප්‍රතික්ෂේප කරයි !

මෙම තත්වය යටතේ අගරදගුරු මැල්කම් කාදිනල් රංජිත් පියතුමා වෙත කරුණු පැහැදිලි කිරීම සඳහා උන්වහන්සේ හා විපක්ෂ නායකවරයා අතර හමුවක් සංවිධානය කිරීම සජබ මන්ත්‍රීවරයෙක් දැරූ උත්සාහයද අසාර්ථක වී ඇත.

පසුගිය අඟහරුවාදා දිනයේ කාදිනල් හිමිපාණන් හා විපක්ෂ නායකවරයා අතර හමුවක් සුදානම් කර තිබුනද කාදිනල් තුමන්ගේ පාර්ශවයෙන් එම හමුව අවලංගුකර තිබේ.

ඒ දේශපාලනඥයින් ගේ බල ව්‍යපෘති සම්බන්ධයෙන් සැක මතු කරමිනි. පසුගිය සඳුදා 'රතු ඉර' වැඩසටහන සම්බන්ධයෙන් මතුව ඇති සැකය ඊට ආසන්නම සිද්ධිය ලෙස සැලකේ.

සජිත් නිදහස් දින උළෙලට නොගිය හේතුව ?

විපක්ෂ නායකවරයා මෙවර නිදහස් දින උළෙලට සහභාගිවීමට සුදානම්ව සිටියද එය වැලක්වුයේ ද හරින් ප්‍රනාන්දු හා මනුෂ නානායක්කාර මන්ත්‍රීවරුන් බවට එම පක්ෂයේ ඇතැම් මන්ත්‍රීවරු චෝදනා කරති.

ඒ සම්බන්ධයෙන් අප වෙත අදහස් දැක්වූ සජබ මාධ්‍ය අංශයේ සාමාජිකයකු පැවසුයේ, පෙබරවාරි 01 දා රාත්‍රී හරින් ප්‍රනාන්දු හා මනුෂ නානායක්කාර මන්ත්‍රීවරුන් දෙදෙනා බිෂොප් හවුස් වෙත ගොස්, පාස්කු සිද්ධියට විරෝධය පළකරමින් මෙවර නිදහස් උත්සවය වර්ජනය කිරීමට තම පක්ෂය තීරණය කර ඇතයි දැනුම්දී ඇති බවත්, ඒ මොහොත වනවිට පක්ෂය එවැනි තීන්දුවක් ගෙන නොතිබූ බවත් කියා සිටියේය.

'' විපක්ෂනායකතුමා නිදහස් උත්සවයට යන්න හිටියේ. ඒත් මෙයාල දෙන්න ඩෙනින්ටන් සුබසිංහ පියතුමාත් එක්ක බිෂොප් හවුස් එකට ගිහින්, විපක්ෂනායකතුමා නිදහස් උත්සවේ වර්ජනය කරනවා කියලා බොරුවක් කියල.. ඒත් නායකතුමා එකට එකඟ වුනේ නැ . පස්සේ පෙබරවාරි 03 වෙනිදා රැ චමිත් විජේසුන්දරගේ උපන්දින පාටියේදී මේ දෙන්න නායකතුමාට කියලා කාදිනල්තුමා නිදහස් උත්සවේ වර්ජනය කරනවා කියල. . ඒ නිසා මෙදා පාර නිදහස් උත්සවේට නොගිහින් විරෝධය පළකරමු කියල. අන්තිමට නායකතුමා ඇහුවේ මේ දෙන්න කියපු දේ.. ඇත්තටම හරින්ලා දැන් නායකතුමා කියනදෙයක් අහන්නේ නෑ . එයාලට ඕන විදියට වැඩකරන්නේ. '' යයි ද සජබ මාධ්‍ය අංශ ක්‍රියාකාරිකයා සඳහන් කළේය.

චමිත් විජේසුන්දර ගේ උපන්දා සාදය අවස්ථාව !

'' හරින්ලා දැන් වැඩකරන්නේ චම්පිකලත් එක්ක. මේ කට්ටිය දැන් රනිල් එක්ක රහස් කතා කරනවා කියලත් ආරංචියි.. අපි ඕව නායකතුමාට කිව්ව ම හරි හරි මම බලාගන්නම් කියනවා.. '' යයි ද එම මන්ත්‍රීවරයා වැඩිදුරටත් කියා සිටියේය.

අභියෝග හමුවේ ද තම මතයෙන් බැහැරට නොගිය මංගල සමරවීර ජීවිත ගමන අවසන් කරන තුරුම තමන්ටම ආවේණික වූ දේශපාලන ප්‍රතිපත්තියක්ව ගේම දර්ශනයක් වෙනුවෙන් පෙනී සිටි දේශපාලන චරිතයක් බව අග්‍රාමාත්‍ය මහින්ද රාජපක්ෂ පවසනවා. හිටපු අමාත්‍ය මංගල සමරවීර මැතිතුමා පිළිබඳ ශෝක යෝජනාව ඉදිරිපත් කරමින් අද (11) පාර්ලිමේන්තුවේ දී අග්‍රාමාත්‍යවරයා මේ බව කියා සිටියේ ය.

අග්‍රාමාත්‍යවරයාගේ සම්පූර්ණ කතාව පහතින්,

"ගරු කථානායකතුමනි,

ශ්‍රී ලාංකීය දේශපාලනයේ නොමැකෙන මතකයන් ඉතිරි කළ දේශපාලනඥයෙකු ලෙස හිටපු අමාත්‍ය මංගල සමරවීර මහතා පිළිබඳව සඳහන් කරන්න පුළුවන්. කොළඹ රාජකීය විද්‍යාලයෙන් මූලික අධ්‍යාපනය හදාරා, ලන්ඩන් නුවර ශාන්ත මාටිනස් උසස් අධ්‍යාපන ආයතනයෙන් පළමු උපාධිය ලබාගෙන 1983 දී ලංකාවට පැමිණෙන මංගල සමරවීර මහතා දේශපාලනයට අත්පොත් තැබුවා.

1988 දී ශ්‍රී ලංකා නිදහස් පක්ෂයේ මාතර ආසන සංවිධායක ධූරය ට පත් වූ මංගල සමරවීර මහතා 1989 දී පළමු වරට පාර්ලිමේන්තුවට තේරී පත් වුණා.
එදා ඉඳන් වසර 31 ක් සක්‍රීය දේශපාලනයේ නිරත වුණා.

ජීවිත ගමන අවසන් කරන තුරුම තමන්ටම ආවේණික වූ දේශපාලන ප්‍රතිපත්තියක් වගේම දර්ශනයක් වෙනුවෙන් පෙනී සිටි දේශපාලන චරිතයක් ලෙස ඔහු හඳුන්වන්න පුළුවන්.

ගරු කථානායකතුමනි,

1989 දී ශ්‍රී ලංකා පාර්ලිමේන්තුවේදී කළ ඔහුගේ පළමු කථාවේ ඉඳන් 2020 පෙබරවාරි මාසයේදී කළ අවසන් කථාව දක්වා කළ කථාවලින් එම දේශපාලන දර්ශනය මනාව පැහැදිලි වෙනවා. 1988/ 89 භීෂණ සමයේදී පැවති අවනීතිය සහ අසාධාරණයන්ට එරෙහිව මංගල සමරවීර මහතා මව් පෙරමුණ නිර්මාණය කළා. මා එහි සම කැඳවුම්කරු ලෙසත් කටයුතු කළා.

1977 සිට 1994 දක්වා පැවති 17 වසරක මහජන පීඩාකාරී පාලනයට එරෙහිව, විශේෂයෙන් 88/ 89 භීෂණයට එරෙහිව යුක්තිය සාධාරණත්වය සහ සමාජ ප්‍රජාතන්ත්‍රවාදය වෙනුවෙන් මා මෙහෙයවූ අරගලවලට සහ පාද යාත්‍රාව සාර්ථක කර ගැනීමට මංගල සමරවීර මහතා එදා කළ මෙහෙවර මා මෙහිදී විශේෂයෙන් සිහිපත් කළ යුතුයි.

ගරු කථානායකතුමනි,

1994 වර්ෂයේදී පළමු කැබිනට් අමාත්‍ය ධූරයට පත් වු දා සිටම විවිධ රජයන් වල වගකිව යුතු අමාත්‍ය ධූර රැසක් හොබවනු ලැබුවා. තැපැල් හා විදුලි සංදේශ, නාගරික සංවර්ධන, වරාය හා ගුවන් සේවා, ජන මාධ්‍ය, විදේශ කටයුතු සහ මුදල් අමාත්‍ය ධූර දරමින් තමන්ට පැවරුණ විෂය පථයන් නව මාවතකින් ඉදිරියට ගෙන යාමට මංගල සමරවීර මහතා සෑම අවස්ථාවකම උත්සාහ කළා.

සංහිඳියාව පිළිබඳව විශ්වාසය තැබූ ඔහු දේශපාලනයේදී නිර්මාණශීලී මිනිසෙකි. අභියෝග හමුවේද තම මතයෙන් බැහැරට නොගිය මංගල සමරවීර මහතා එම මතවාද වෙනුවෙන් නිරතුරු ව පෙනී සිටියා.පසුකාලීනව මතවාදී වශයෙන් වෙනස් දේශපාලන කඳවුරු නියෝජනය කළද මිය යන තුරුම මංගල මාගේ පෞද්ගලික මිතුරෙක් වුණා.

ගරු කථානායකතුමනි,

මා ජනාධිපති අපේක්ෂක ලෙස ඉදිරිපත් වූ 2005 ජනාධිපතිවරණයේ දී, මා වෙත විවිධ අභියෝග රැසක් පැමිණුනා. ඒ අභියෝග හමුවේ මාගේ ජයග්‍රහණය වෙනුවෙන් මංගල සමරවීර මහතා කළ කැප කිරීම මා මෙහිදී විශේෂයෙන් සඳහන් කළ යුතුයි.

ඔහු දේශපාලන ජීවිතය පුද්ගලික ජීවිතයට ගාව ගත්තෙ නෑ. පාර්ලිමේන්තුවේ දරණ දේශපාලන මතවාදය නිසා පෞද්ගලික හිතවත්කම් නැති කර ගන්න තරම් පටු මිනිහෙක් වුනෙත් නෑ.

මංගල දැඩි විවේචකයෙක්. ඉතාම තියුණු විධියට තමන්ගෙ ප්‍රතිවාදියාව අපහසුතාවයට පත් කරන්න සමත් ප්‍රචාරකයෙක් හැටියට කා අතරත් ප්‍රකටයි.

මංගල ලිබරල් මතවාදය දැරුවත් මාතර දිස්ත්‍රික්කය නියෝජනය කළේ ඒ පළාතේ තිබුණ සංස්කෘතික පසුබිම පදනම් කර ගෙන බව අපි දන්නවා.

ඇමති ධූර දැරූ සෑම අවස්ථාවකම තමන්ගෙ පාක්ෂිකයා වෙනුවෙන් විශේෂ කැප කිරීම් කරන්න ඔහු අමතක කළේ නෑ. ඒ නිසාම එතුමාගේ ආසනයේ සහ දිස්ත්‍රික්කයේ කීර්තිය හා ජනප්‍රියත්වය නොඅඩුව ඔහුට හිමි වුනා.

මංගල දේශපාලනයෙන් ඉවත්වෙන කොට එතුමාගේ මරණයෙදි වගේම මම ගොඩක් කණගාටු වුණා. ඒකට හේතුව වුනේ

මංගල කියන්නේ දේශපාලනයේ සිටිය යුතුම දේශපාලනඥයෙක්. තරඟ කළ යුතු, සටන් වැදිය හැකි ප්‍රතිවාදියෙක්.

දේශපාලනයෙන් සමුගන්නවා කිවුවහම මම කතා කරලා මංගලට කිවුවා “මංගල තව දුරටත් ඔබ දේශපාලනයේ ඉන්න ඕනෙ” කියලා. ඒකට හේතුව මංගල වගේ ප්‍රතිවාදියෙක් මේ දේශපාලන ලෝකයට අවශ්‍ය කරනවා. ඔහු කොයිම වෙලාවකවත් දේශපාලනය පුද්ගලික ජීවිතයට ගාවගෙන පලිගැනීම් කරන්න වෛර කරන්න සූදානම් නොවෙච්ච මිනිහෙක්.

ගරු කථානායකතුමනි,

පාර්ලිමේන්තුවේ හෝ මහජන සභාවල අපි අතරෙ තියෙන ප්‍රතිපත්තිමය වෙනස්කම් පැහැදිලිව විවේචනය කර ගන්න ඕනෙ. ඒවා තියුණු වෙන්නත් පුළුවන්. ඒත් මනුෂ්‍යත්වය පිළිබඳ කාරණාවලදී දේශපාලනයයි මනුෂ්‍යත්වයයි කියන්නේ දෙකක් නොවන බව මතක තියාගන්න.

ශ්‍රී ලාංකීය දේශපාලනයේ අපූර්ව චරිතයක් වූ මංගල සමරවීර මහතාගේ අභාවයෙන් සංවේගයට පත් එතුමාගේ වැඩිමහල් සොහොයුරිය වන ජයන්ති ගුණවර්ධන මහත්මිය ඇතුළු පවුලේ සියළු දෙනාට මාගේ සහ රජයේ ශෝකය පල කිරීමට මෙය අවස්ථාවක් කර ගන්නවා.

 ස්තුතියි.

විශ්‍රාම වැටුපක් නොමැති අසරණ සේවකයන්ගේ එකම බලාපොරොත්තුව වන “අර්ථසාධක අරමුදල” අධිභාර පනතින් ඉවත් කරන ලෙස රජයෙන් දැඩිව ඉල්ලා සිටින බව සාධාරණ සමාජයක් සඳහා වන ජාතික ව්‍යාපාරයේ සභාපති හිටපු කථානායක කරු ජයසූරිය පැවසීය.

කොළඹ පැවති මාධ්‍ය හමුවකදී අදහස් දක්වමින් ඔහු මේ බව සඳහන් කළේය.

අර්ථසාධක අරමුදල පැහැර ගැනීමට තැත් කිරීම ඉතා අමානුෂික ක්‍රියාවක් බවත් එම අරමුදලට අත නොතබන්නැයි රජයට අවධාරණය කරන බවත් ඔහු එහිදී පැවසීය.

එහිදී ඔහු වැඩිදුරටත් මෙසේද පැවසීය.

“රජයේ සේවයේ නොමැති අතිවිශාල ජන කොට්ඨාසයක් අර්ථසාධක අරමුදලෙහි සාමාජිකයින් වී තිපෙනවා. විශ්‍රාම යන විට ඔවුන්ගේ එකම බලාපොරොත්තුව වන්නේ එම මුදලින් නිවාසයක් සාදා ගැනීම, දරුවන්ගේ අධ්‍යාපනයට වියදම් කිරීම, දරුවන්ගේ විවාහ කටයුතු සඳහා උපයෝගී කර ගැනීම වැනි පවුලේ කටයුතුයි.

අසරණ සේවකයන්ගේ එකම සම්පත වන අර්ථසාධක අරමුදල පැහැර ගැනීමට තැත් කිරීම ඉතා අමානුෂික ක්‍රියාවක් ලෙස සාධාරණ සමාජයක් සඳහා වන ජාතික ව්‍යාපාරයේ අපගේ අදහසයි. ඇතැම් බලවත් පුද්ගලයින් කොටස් වෙළෙඳපොළ හරහා මෙම අරමුදල පාවිච්චි කළ බොහෝ අවස්ථා අපි දැක්කා.

මෙම අසරණ ජනතාවගේ මුදලින් කෝටිපතියන් බිහි වූ අවස්ථා බොහෝ යි. එම පනතින් “අර්ථසාධක අරමුදල” ඉවත් කරන ලෙස අපි රජයෙන් දැඩිව ඉල්ලා සිටිමු.

කැලණි තිස්ස බලාගාරය හෙවත් නැප්තා බලාගාරය සඳහා අවශ්‍ය ඉන්ධන ප්‍රමාණවත් වන්නේ අදට (11) පමණක් බව විදුලි බල මණ්ඩලය පවසයි.

එහි මාධ්‍ය ප්‍රකාශක ඇන්ඩෘ නවමුනි සඳහන් කරනුයේ , අද රාත්‍රියෙන් පවතින ඉන්ධන අවසන් වීමට නියමිත බවයි.

බලාගාරයේ විදුලි ජනනය සඳහා අවශ්‍ය ඉන්ධන මෙට්‍රික් ටොන් දහසක් ඊයේ, ඛනිජ තෙල් සංස්ථාවෙන් ලබාදුන් බව ඔහු සඳහන් කර ඇත.

එහෙත්, එය ප්‍රමාණවත් වන්නේ අද දිනය සඳහා පමණයි.

කැලණිතිස්ස සංයුක්ත චක්‍රීය බලාගාරයෙන් ජාතික පද්ධතියට එක් කෙරෙන විදුලි ධාරිතාව, මෙගාවොට් 165 කි.

අද දිනය තුළ ඒ සඳහා අවශ්‍ය ඉන්ධන නොලැබුණ හොත් බලාගාරය අක්‍රීය වන බව ඇන්ඩෘ නවමුනි සඳහන් කළේ ය.

පසුගිය 2 වැනිදා සිට කැලණිතිස්ස ඩීසල් බලාගාරය ද අක්‍රීය කෙරුණේ ඉන්ධන නොලැබීම හේතුවෙනි.

සංයුක්ත චක්‍රීය බලාගාරය සඳහා අවශ්‍ය ඉන්ධන නොලැබුණහොත් හෙට සිට යළි විදුලිය සැපයුමට බාධා එල්ල විය හැකි බව ඔහු ප්‍රකාශ කළේ ය.

ඒ හේතුවෙන් විදුලිය අරපිරිමැස්මෙන් භාවිත කරන්නැයි ලංකා විදුලි බල මණ්ඩලය ජනතාවට දැනුම් දෙයි.

මිල දීගත් ඉන්ධන සඳහා ලංකා විදුලි බල මණ්ඩලය, මේ වන විට ඛනිජ තෙල් සංස්ථාවට ගෙවා ඇති මුදල රුපියල් බිලියන 20 කි.

සේවක අර්ථ සාධක අරමුදල සහ සේවා නියුක්තිකයන්ගේ භාරකාර අරමුදල මත 25%ක අධිභාරයක් පැනවීමට විරුද්ධව කම්කරු අමාත්‍ය නිමල් සිරිපාල ද සිල්වා ගේ බරපතළ විවේචනය සමග ආණ්ඩුවේ වැඩ සම්බන්ධයෙන් විරුද්ධව අදහස් දක්වන මැති ඇමතිවරුන් ප්‍රමාණය ඉහළ ගොස් ඇත.

දේශපාලන නිරීක්ෂකයන් මේ බව පෙන්වා දෙයි.

ඒ අනුව මෙයට පෙර උදය ගම්මන්පිල, විශේෂයෙන්ම රට තුළ පවතින ආර්ථික අර්බුදය කොරෝනා වසංගතය නිසා සිදුවූවක් නොවන බව ප‍්‍රකාශ කර තිබිණි. ඉන්පසුව සනත් නිශාන්ත රාජ්‍ය අමාත්‍යවරයා පාස්කු ප‍්‍රහාරය සම්බන්ධයෙන් ආණ්ඩුව අනුගමනය කරන ක්‍රියාමාර්ගය පිළිබඳව හෘදය සාක්ෂියත් සහිත පුද්ගලයෙකු හැටියට එකඟ නොවිය හැකි බව ප‍්‍රකාශ කර තිබිණි.

මේ අතර ජනමාධ්‍ය ඇමති ඩලස් අලහප්පෙරුම මෙයට දින කිහිපයකට පෙර ප‍්‍රසිද්ධ ජන හමුවකදි කොරෝනා වසංගතය සම්බන්ධයෙන් ආණ්ඩුව අනුගමනය කළ ක්‍රියාමාර්ග විවේචනය කර තිබිණි. ඔහු ප‍්‍රකාශ කර තිබුණේ ”අපි මුලින් පැණි බිව්වා. පැණි පෝලිම් පස්සේ ගියා. මුට්ටි පා කරා. මිථ්‍යාව පස්සේ ගියා. ඒකෙන් අපට වැරදුණා.” යනුවෙන්ය.

ඊට අමතරව ඊයේ (10) සේවක අර්ථසාධක අරමුදල සහ සේවා නියුක්තිකයන්ගේ අරමුදලේ ලාභ මත 25%ක අධිභාරයක් පැනවීමට බැසිල් රාජපක්ෂ මුදල් ඇමති ගෙන ඇති ක්‍රියාමාර්ගය පිළිබඳව කැබිනට් මණ්ඩලයේදී තම අදහස් පළ කරන බව නිමල් සිරිපාල ද සිල්වා ඇමතිවරයා ප‍්‍රකාශ කළේය. ඔහු මෙම ප‍්‍රකාශය කළේ අන්තර් සමාගම් සේවක සංගමය විසින් කම්කරු අමාත්‍යාංශය ඉදිරිපිට පැවති විරෝධතා උද්ඝෝෂණය පිළිබඳව කරුණු විමසීමෙන් පසුවය.

පාර්ලිමේන්තුවට ඉදිරිපත් කර තියෙන ඉඩම් සංවර්ධන සංශෝධන පනත් කෙටුම්පත බුරියානි එකක් අස්සෙ දාලා සයිනයිඩ්කරල දෙනවා වගේ වැඩක් බව පෙරටුගාමී සමාජවාදී පක්ෂයේ අධ්‍යාපන ලේකම් පුබුදු ජයගොඩ පවසයි.

මාධ්‍ය හමුවකදී අදහස් දක්වමින් ඔහු මේ බව පැවසූ අතර වැඩිදුරටත් මෙසේද පැවසීය.

“පාර්ලිමේන්තුවට ඉදිරිපත් කරල තියෙන ඉඩම් සංවර්ධන සංශෝධන පනත් කෙටුම්පත හරහා ඉතාම බරපතළ දෙයක් ආණ්ඩුව කරන්න හදනවා. බුරියානි එකක් අස්සෙ දාලා සයිනයිඩ් කරල දෙනවා වගේ වැඩක් මේ කරල තියෙන්නෙ.

ඉඩම් වලට අදාල යම් හොඳ කරුණු ගණනාවක් දාලා ඇතුලට ඔබල තියෙනවා ලංකාවේ ගොවියගෙ ඉඩම් අහිමි කිරීම සඳහා වන ප්‍රධාන සැලැස්ම. මේ පනත් කෙටුම්පතේ 4 වෙනි වගන්තියට අනුව ඉඩම් සංවර්ධන ආඥා පනතේ දහ නමය හය උප වගන්තියෙ එක දෙක කියන කොටස් ටික වෙනස් කරනවා.

ලංකාවේ ගොවියන්ගෙන් තමන්ටම කියලා ඉඩමක් තියෙන ගොවීන් ප්‍රමාණය ඉතාම අවමයි ලංකාවේ. ගොඩක් ගොවීන් රජයේ ඉඩම්වල වගා කරන්නේ. ඔවුන්ගෙන් 80% ක විතර ප්‍රමාණයක් ඉන්නවා කිසිම වලංගු ලියැවිල්ලක් නැතිව පරම්පරා ගනනක් තිස්සේ රජයේ ඉඩම් වල වවන අය. තවත් පිරිසක් ඉන්නවා ඒ අය රජයේ ඉඩම්වල වවනවා ඒ අයට ස්වර්ණභූමි ජයභූමි වගේ ඔප්පු ලබා දීලා තියෙනවා. එහෙම නැතිනම් වගා බලපත්‍ර ලබා දීලා තියෙනවා. ස්වර්ණ භූමි ජය භූමි ඔප්පු වල හා වගා බලපත්‍ර වල තියෙන ප්‍රධාන කාරණය තමයි ඒ ඉඩම් වල වගා කළ හැකි නමුත් ඒවා විකුණන්න බෑ. ඒක තමයි ඉඩම් ආඥා පනතේ 19 වගන්තිය නිශ්චිතව කියලා තියෙන්නෙ.

දැන් මේ ඉඩම් සංවර්ධන ආඥා පනතේ 4 වෙනි වගන්තියෙ කියනවා හත හය උප වගන්තියෙ ආ ඡේදය විධිවිධාන වල කුමක් සඳහන්ව තිබුණ ද ඒ ඉඩම් කොටස බලපත්‍රලාභී වාණිජ බැංකු, රාජ්‍ය උගස් සහ ආයෝජන බැංකුව, ලංකා සංවර්ධන මූල්‍ය සංස්ථාව, ශ්‍රී ලංකා ජාතික සංවර්ධන බැංකුව , ජාතික නිවාස සංවර්ධන අධිකාරිය, ශ්‍රී ලංකා නිවාස සංවර්ධන මූල්‍ය සංස්ථා බැංකුව, ලියා පදිංචි කරනු ලැබූ යම් සංගමයක් හෝ වෙනත් නියමිත ආයතනයක් වෙත උකස් කිරීමේදී ප්‍රාදේශීය ලේකම්වරයාගේ අනුමැති අවශ්‍ය නොවන්නේය කියල. දැන් ඉඩම් අන්සතු කළ නොහැකිය කියන වගන්තිය වෙනස් කරල අවශ්‍ය නම් උගස් කරන්න පුළුවන් කියලා වගන්තිය දාලා. ඕනෑම බලපත්‍රලාභී වාණිජ බැංකුවකට. එහෙමත් නැතිනම් මේ නම් කරල තියෙන රාජ්‍ය බැංකු ටික. එහෙමත් නැතිනම් ලියා පදිංචි කරනු ලැබූ යම් සංගමයක් හෝ ආයතනයක්. ඒ කියන්නේ මහ බැංකුවේ මූල්‍ය ආයතනයක් ලෙස ලියාපදිංචි කරනු ලැබූ ඕන කෙනෙකුට තමන්ගේ ඉඩම උගස් කරන්න පුළුවන්. අපි අහනව උගස් කිරීම සඳහා ප්‍රතිපාදන දෙන්නේ මොකක් යටතේ ද? උගස බේරගන්න බැරුව අදාල මූල්‍ය ආයතනයට ඉඩම සින්න වුණොත් මොකද වෙන්නේ. ලංකාවේ කෘෂිකාර්මික ඉඩම් වෙළඳ භාණ්ඩ බවට පත් කරලා ඒවා වෙළෙඳ පොළට මුදාහැරලා ඒවා විකුණන්න සලස්වලා ගොවියාට ඉඩම අහිමි කරල දැවැන්ත ඒකාධිකාරී සමාගම් ඒ ඉඩම් සතු කරගන්න සැලසුම් ප්‍රමාණයක් පහුගිය කාලය පුරා ආවා. ආසන්න උදාහරණ ගත්තොත් , එම් සී සී ගිවිසුම ආවා. එම් සී සී ගිවිසුමෙන් උත්සාහ කළේ ගොවීන්ට විකිණිය හැකි ඔප්පු ලබා දීලා ඒක හරි ලොකුවට කිව්වේ ගොවියා වගාකරන ඉඩමට ගොවියට අයිතිය ලබා දෙනවා කියලා.

යහපාලන ආණ්ඩුව ඉඩම් බැංකු පනත කියලා පනතක් ගෙනාවා. 2017 ඒ අය උත්සාහ කරා රජයේ ඉඩම් සියල්ල වෙළඳ භාණ්ඩ කරන්න.

එම්සීසී එකත් ලංකාවේ ජනතාව පරාජය කරා. ඉඩම් බැංකු පනතත් ලංකාවේ ජනතාව පරාජය කළා. 2017 යහපාලන ආණ්ඩුව ගෙනාවා ඉඩම් විශේෂ විධිවිධාන පනත කියලා එකක්. ඒ පනත හරහා උත්සාහ කළේ ගොවියන්ගේ ඉඩම්වලට ඔප්පු දීලා ඒ ඔප්පු හරහා ගොවියන්ගේ ඉඩම් විකිණිය හැකි ඒවා බවට පත්කරන්න.

ඒකත් අකුල ගන්න සිද්ධ වුණා. ශ්‍රේෂ්ඨාධිකරණය පවා තීන්දුවක් දුන්නා ඒ පනත නීතිවිරෝධී, ගොවියන්ගේ ඉඩම් වෙළඳපොළට මුදා හරින්න බෑ, ඉඩම් විෂය අදාළ පළාත් සභා වලට නිසා එවැනි නීතියක් සම්මත කරනවා නම් සියලු පළාත් සභා ඒකට අනුමැතිය දිය යුතුයි කියලා අධිකරණයේ තීන්දුවක් තිබුණා. ගම්මන්පිල ම්හත්තය කිය කිය හිටියේ එම්සීසී උපක්‍රමිකව පැරැද්දුවා. අපි එහෙම තමයි වැඩ කරන්නේ කිය කිය හිටියෙ. දැන් අන්තිමට වෙලා තියෙන්නෙ එම්සීසී එකේ තියෙන ප්‍රධානම පියවරක් පනත් කෙටුම්පතට ඇතුළු කරල තියනවා. හොර නාඩගම එක්ක වෙච්ච තත්ත්වය නිසා සුළු ගොවිය ආර්ථික වශයෙන් වැටිලා ඉන්නේ. සුළු ගොවියා ඉඩම උගස් කරාට පස්සේ ඉඩම බේරගන්න බැරිවෙනවා. බේරගන්න බැරි උනාට පස්සේ මූල්‍ය ආයතනය තමන්ට සින්න වෙච්ච ඉඩම විකුණනවා.

ඉඩම විකුනනකොට දැවැන්ත කෘෂි සමාගම් ඒකාධිකාර සමාගම මේක මිලට ගන්නවා.
මැඩගස්කරයේ ගොවීන් චිරාත් කාලයක් තිස්සේ වගා කළා රජයේ ඉඩම් වල.ලංකාවේ මහවැලි අධිකාරියෙන් ඉඩම් දුන්න වගේ රජයේ ඉඩම්දී ලා තිබුණා ගොවීන්ට. මැඩගස්කරයේ ප්‍රධාන ආදායමක් තමයි එලවලු අපනයනය, එළවළු වගා කරා ගොවීන්.

නීති වෙනස් කරල ගොවියට ඉඩම විකිණීමේ අයිතිය දුන්නා. එක කන්නයක ප්‍රශ්නයක් වෙලා වවන්න ඕන වෙද්දී වවන්න සල්ලි නැතුව ගොවියෝ ඉඩම් උගස් කළා. උගස් කළේ දකුණු කොරියානු ඩේව් සමාගමට සහ ඉන්දියාවේ වරුන් ඉන්දියා කියන සමාගමට හෙක්ටයාර ලක්ෂ ගණන් මිලියන ගණන් උගස් කළා මේ සමාගම් වලට. කන්න දෙකයි පාඩු වුණේ ඒ ඉඩම් ටික ඔක්කොම සින්න උනා මේ සමාගම් වලට. අද මැඩගස්කර ගොවියා තමන් වගා කරපු ඉඩම් වල සමාගමක කුලී කරුවෙක් ලෙස වගා කරමින් ඉන්නවා.

මෙන්න මේ තත්වයද දැන් මේ වෙන්න යන්නේ කියල අපි අහනව. අපි අහනවා ආණ්ඩුව ඇතුළේ පක්ෂ 11 කියලා කට්ටිය කෑ ගගහ හිටිය නේ, ඒගොල්ලො කෝ?. කැබිනට් මණ්ඩලයේ මේවා අනුමත වෙද්දි ඒගොල්ලො කොහෙද හිටියේ?.”

අප රටට කිරි පිටි ආනයනය කරන සමාගම් දූෂිත ක්‍රියාවල නිරතවන බව හිටපු පාරිභෝගික කටයුතු අමාත්‍යය බුද්ධික පතිරණ පවසයි.

ශ්‍රී ලංකාවට ආනයනය කරන පාම් තෙල් මිශ්‍ර බාල කිරි පිටි දිය කර ව්‍යාජ ලෙස සකස් කළ යෝගට් සහ දියර කිරි වෙළෙඳ පොළට ඉදිරිපත් කරන බවට ඔහු චෝදනා කරයි.

බුද්ධික පතිරණ මන්ත්‍රීවරයා වැඩිදුරටත් චෝදනා කරන්නේ මෙම ක්‍රියාව මගින් පාරිභොගිකයන් විශේෂයෙන්ම කුඩා දරුවන් රැවටීමට ලක් කරන බවයි.

ඒ අනුව ඔහු අවධාරණය කරන්නේ මෙම තත්ත්වය වහාම වෙනස් කළ යුතු බවයි.

ජපානයෙන් ලංකාවට ලැබෙන ආධාර 2019 ට සාපේක්ෂව, 2020 වසරේදී 94%කින් අඩු වී ඇති බව දැනගන්නට ඇත.

ඊට අනුව 2019 වසරේදී යෙන් බිලියන 42.7 ක මුදලක් ලංකාවට ලැබී ඇති අතර, 2020 දී ලැබී ඇත්තේ යෙන් බිලියන 1.4 කි.

ජයිකා ආයතනයේ දත්ත මත පදනම් වී මාධ්‍ය මෙම කරුණු හෙළි කර තිබේ.

මෙරටට ලැබෙන ජපන් ආධාර මෙසේ දැවැන්ත ලෙස පහත වැටීමට හේතු වී ඇත්තේ, ජනාධිපති ගෝඨාභය රාජපක්ෂ බලයට පත් වීමෙන් පසුව,ජපන් ආධාර මත ඉදිකිරීමට නියමිතව තිබුණු සැහැල්ලූ දුම්රිය ව්‍යාපෘතිය අහෝසි කර දැමීම බවද දැනගන්නට ඇත.

ණය ප්‍රතිව්‍යුහගත කිරීමට අපේක්ෂාවක් නොමැති බවත් ණය ගෙවීම දුෂ්කර වී ඇති බවට පළවෙන මාධ්‍ය වාර්තා ප්‍රතිකේෂ්ප කරමින් ශ්‍රී ලංකා මහ බැංකුව නිවේදනයක් නිකුත්කර ඇත.

එය පහත දැක්වෙයි.

ඉදිරි ණය වගකීම් පියවීම සඳහා ශ්‍රී ලංකාවේ කැපවීම නැවත අවධාරණය කිරීම

ශ්‍රී ලංකාව ස්වෛරීත්ව ණය ගෙවීම් පැහැර හැරීමක් අභියස සිටින බවට මෑතකදී පළවූ ඇතැම් මාධ්‍ය වාර්තා පිළිබඳව ශ්‍රී ලංකා මහ බැංකුවේ අවධානය යොමු වී තිබේ. එවැනි ප්‍රකාශ පදනම් රහිත බව ශ්‍රී ලංකා මහ බැංකුව අවධාරණය කරන අතර, ජාත්‍යන්තර ප්‍රමිතීන්ට අනුව ශ්‍රී ලංකා මහ බැංකුව විසින් ප්‍රකාශයට පත් කරන ලද විශ්වසනීය නිල දත්ත තිබියදීත් මෙම වාර්තාවල පැහැදිලිවම සාවද්‍ය වන කරුණු අඩංගු වීම කනගාටුවට කරුණකි. එබැවින්, සියලු ඉදිරි ණය වගකීම් පියවීමට සහ එමඟින් ශ්‍රී ලංකාවේ නොකැළැල් ණය සේවාකරණ ගෙවීම් වාර්තාව අඛණ්ඩව පවත්වාගෙන යෑමට රජය සහ ශ්‍රී ලංකා මහ බැංකුව කැපවී සිටින බවට දේශීය සහ විදේශීය ආයෝජක ප්‍රජාව සහ මහජනතාව වෙත ශ්‍රී ලංකා මහ බැංකුව සහතික වේ.

2022 වසරේ ජනවාරි මාසයේදී කල් පිරුණු එ.ජ. ඩොලර් මිලියන 500ක ජාත්‍යන්තර ස්වෛරීත්ව බැඳුම්කරය සාර්ථක ලෙස පියවීමට ශ්‍රී ලංකාව සමත් වූයේ එවැනි පියවීමක් කළ නොහැකි වනු ඇති බවට සමහර පාර්ශ්වයන් අතර ඍණාත්මක අනුමාන කිරීම් තිබියදීය. 2020 වසරේ ජනවාරි මස පටන් එ.ජ. ඩොලර් බිලියන 2.5ක මුළු වටිනාකමක් සහිත ජාත්‍යන්තර ස්වෛරීත්ව බැඳුම්කර ආපසු ගෙවීම් සමඟ දැනට නොපියවා ඉතිරිව ඇති ජාත්‍යන්තර ස්වෛරීත්ව බැඳුම්කර ප්‍රමාණය එ.ජ. ඩොලර් බිලියන 12.55ක් දක්වා අඩු වී ඇති අතර, එය 2022 වසරේ ජුලි මාසයේදී එ.ජ. ඩොලර් බිලියන 11.55ක් දක්වා තවදුරටත් අඩු වනු ඇත‍. එය ජාත්‍යන්තර ස්වෛරීත්ව බැඳුම්කර ණය ප්‍රමාණය දළ දේශීය නිෂ්පාදිතයෙහි ප්‍රතිශතයක් ලෙස සියයට 10ක් දක්වා පමණ ක්‍රමානුකුලව අඩු කර ගැනීමේ රජයේ අරමුණ සමඟ පුළුල්ව අනුකූල වේ. මෙම අරමුණු වෙනුවෙන්, 2022 වසරේ ජුලි මාසයේදී කල් පිරෙන එ.ජ. ඩොලර් බිලියන 1ක ජාත්‍යන්තර ස්වෛරීත්ව බැඳුම්කරයද ඇතුළු, ඉදිරි ණය වගකීම් පියවීම සඳහා ද්විපාර්ශ්වික සහ බහුපාර්ශ්වික අරමුදල් සැලසුම් ගණනාවක් හරහා විකල්ප විදේශ විනිමය ලැබීම් සුරක්ෂිත කර ගැනීමට රජය සහ මහ බැංකුව දැනටමත් අවශ්‍ය පියවර ගෙන ඇත.

මෙම පසුබිම තුළ, අපේක්ෂිත විදේශ විනිමය ලැබීම් අත්කරගැනීම් සහ එමඟින් ජාත්‍යන්තර සංචිත ගොඩනැගීම තුළින් ස්වෛරීත්ව ණය කිසිදු බාධාවකින් හෝ පැහැර හැරීමකින් තොරව පියවීමට හැකි බවට රජයට සහතික විය හැකි නිසා, ණය ප්‍රතිව්‍යුහගත කිරීම පිළිබඳව ආයෝජකයින් සමඟ සාකච්ඡා ආරම්භ කිරීමේ අවශ්‍යතාවයක් (මෙම මාධ්‍ය වාර්තාවල දක්වා ඇති ආකාරයට) මේ මොහොතේදී මතු නොවේ.

ඒ අනුව, අනාගත ණය වගකීම් පියවීමට ශ්‍රී ලංකාවට ඇති හැකියාව සම්බන්ධයෙන් දුර්මත පතුරුවා හරින ඇතැම් පාර්ශ්වකරුවන්ගේ සාවද්‍ය කරුණු, නොමඟ යවන සුලු මත සහ වැරදි අර්ථකථනවලින් නොමඟ නොයන ලෙස මහජනතාව සහ ආයෝජක ප්‍රජාව වෙත මහ බැංකුව විසින් දැනුම් දෙනු ලැබේ.

රාජ්‍ය ආයතනයක ප්‍රධානියකුගේ කෝටි තුනහමාරක අයථා ගනුදෙනුවක් සිදුවූ බව කියන සිද්ධියක් සම්බන්ධයෙන් තොරතුරු හෙළිකරන හඬ පටයක් එම ආයතනයේ නිලධාරීන් අතට පත්ව ඇතැයි ආරංචිමාර්ග සඳහන් කරයි.

එම ආයතනයේ ප්‍රධාන කාර්යාලය පවත්වාගෙන යන ගොඩනැගිල්ලේ විදුලි සෝපානය ඉවත් කර නව විදුලි සෝපානයක් ස්ථාපිත කිරීම, ආයතනය සතු වාහන දහයක් විකිණීම ඇතුළු කාර්යයන් කීපයකට ටෙන්ඩර් කැඳවා ඇති බවටද එම ටෙන්ඩර් පත්‍රිකාවල මිල ගණන් වෙනස් කර තමන්ට හිතවත් ව්‍යාපාරිකයකුට ටෙන්ඩරය ලබාදීම වෙනුවෙන් එම ආයතන ප්‍රධානියාගේ ළඟගම ගෝලයකුට මෙම රුපියල් කෝටි තුනහමාරක මුදල ලබාදී ඇති බවටද එම හඬ පටයේ සංවාදවලින් හෙළිවන බව එම ආරංචිමාර්ග සඳහන් කරයි.

මෙම ප්‍රශ්නගත ආයතන ප්‍රධානියාගේ ගිණුමකටද එම ව්‍යාපාරිකයා සෘජුවම ලක්ෂ පහළොව හා හතර හමාර බැගින් අවස්ථා දෙකකදී දහනව ලක්ෂ පනස් දහසක මුදලක් ලබාදී ඇති බවද එම හඬපටයෙන් හෙළි වී ඇතැයි වාර්තා වේ.

රුපියල් කෝටි තුනහමාර ලබාගත් බව කියන සේවකයා මාසයක පමණ කාලයක සිට සේවයට වාර්තා නොකිරීමෙන් හා තමන්ගේ ගනුදෙනුව සිදුනොවීමෙන් ඇති වූ සැකය මත අදාළ ව්‍යාපාරිකයා මෙම හඬපටය නිකුත් කර ඇති බවද දැන ගන්නට තිබේ.

මෙම සේවකයා එම ආයතනයේ ප්‍රවාහන අංශයේ හා ප්‍රවර්ධන අංශයේ කළමනාකරුවකු ලෙස පත්වීම් ලබාදී තිබෙන්නේ ප්‍රශ්න ගත ආයතන ප්‍රධානියා විසින්ම බවද, එසේ සිදුකර තිබෙන්නේ එම සේවකයා මීට පෙරද මුල්‍ය අක්‍රමිකතාවක් සම්බන්ධයෙන් වසර ගණනාවක සිට වැඩතහනමට ලක්ව සිටියදී එය සමථයකට පත්කර බවද ආරංචිමාර්ගවලින් වාර්තා වේ.

මේ හඬපටය නිකුත් වීමත් සමග එම ආයතන ප්‍රධානියා ඔහුගේ කාර්යාලයට විශේෂ ආරක්ෂාවක්ද යොදවාගෙන ඇතැයිද දැන ගන්නට තිබේ. එහෙත් ආයතනයේ සිටින ආරක්ෂකයන් එයට ප්‍රමාණවත් නොවන නිසා තාවකාලිකව තුන්දෙනකු පමණක් ආරක්ෂාවට ලබාදිය හැකි බවට ආරක්ෂක අංශ ප්‍රධානියා එම නිලධාරියාට දැනුම් දී ඇතැයිද වාර්තා වේ.

ආයතනයේ සිටින ආරක්ෂකයන් ප්‍රමාණවත් නොවන්නේ නම් වෙනත් පෞද්ගලික ආරක්ෂක සේවාවකින් පිරිසක් ගෙන්වා ගන්නා ලෙස ඔහු ආරක්ෂක අංශ ප්‍රධානියාට උපදෙස් දී ඇති බවද දැනගන්නට තිබේ.

මේ සම්බන්ධයෙන් අභ්‍යන්තර පරීක්ෂණයක් ආරම්භ කර ඇති බවද අප කළ විමසීමකදී එම ආයතනයේ ඉහළ නිලධාරියෙක් සඳහන් කළේය.

-lankadeepa

ශ්‍රී ලංකා පොදුජන පෙරමුණ විසින් අනුරාධපුර සල්ගාදු ක්‍රීඩාංගණයේ දී ඊයේ (9) පැවැති ජනරැලියේදී අග්‍රාමාත්‍ය මහින්ද රාජපක්ෂ අභියෝගය බාර ගනිමින් තම පක්ෂයද ලබන මාසයේදී එම ක්‍රීඩාංගණයේදීම ජනරැලියක් පවත්වන බව සමඟි ජනබල වේගය පක්ෂය පවසයි.

එම පක්ෂයේ මාධ්‍ය ප්‍රකාශක කොළඹ දිස්ත්‍රික් පාර්ලිමේන්තු මන්ත්‍රී එස්.එම් මරික්කාර් මේ බව සදහන් කර සිටියි.

ඔහු පවසන්නේ රජය විසින් කල්දමා ඇති පළාත් පාලන මැතිවරණය පවත්වන ලෙස තම පක්ෂය රජයට අභියෝග කරන බවය.

එවිට සැබෑ ජනරැල්ල ඇත්තේ කාටද යන්න සෑබෑවටම දැකගත හැකිවනු ඇතැයිද මන්ත්‍රීවරයා පවසයි.

සමඟි ජනබලවේගයට කුඹුර, මහපාර, වැල්ල මෙන්ම ඕනෑම ජන්දයක්ද ඔට්ටු යැයිද මරික්කාර් මන්ත්‍රීවරයා වැඩිදුරටත් කියා සිටියි.

ත්‍රස්තවාදය වැළැක්වීමේ පනත යටතේ අත්අඩංගුවට ගත් ඊ නිවුස් මාධ්‍ය වේදී කීර්ති රත්නායක ඊයේ (09) ඇප පිට මුදාහැරීමට කොටුව මහේස්ත්‍රාත් ප්‍රියන්ත ලියනගේ විසින් නියම කර ඇති බව වාර්තා වෙයි.

කොළඹ අපරාධ කොට්ඨාසය මගින් ත්‍රස්තවාදය වැලැක්වීමේ පනත යටතේ ඔහුව අත්අඩංගුවට ගෙන තිබිණ.

නමුත් රැපියල් 50000ක පුද්ගලික ඇපයක් මත ඔහුව මුදාහැරීමට අධිකරණය නියෝග කල බව සඳහන් වෙයි.

මේ වනවිට කීර්ති රත්නායක තමාට එරෙහිව සිදුකල අත්තනෝමතික අත්අඩංගුවට ගැනීම පිළිබඳව කෝටි 10ක් වන්දි ඉල්ලා ආරක්ෂක ලේකම් කමල් ගුණරත්න .ජේෂ්ඨ නියෝජ්‍ය පොලිස්පති දේශබන්දු
තෙන්නකෝන් , පොලිසිය බාර ඇමැති සරත් වීරසේකර ඇතුළු 20 දෙනෙකුට විරැද්ධව නමින්ම නඩු පවරා ඇති බවත් වාර්තා වෙයි.

තවද තව නොබෝ දිනකින් මාධ්‍ය හමුවක් පවත්වා තමාට එරෙහිව සිදුකල අත්තනෝමතික අත්අඩංගුවට ගැනීම සහ වෙනත් ආන්දෝලනාත්මක කරැණු රාශියක් හෙළිදරව් කිරීමට සැලසුම් කොට ඇති බවත් ඔහුට සමීප ආරංචි මාර්ග පවසයි.

ජනතාව නොමග යවමින් රට අගාධයට ඇද දැමීමට පසුගිය ආණ්ඩු කළ කණ්ඩායම් නැවතත් එක්ව සිටින බව ජනාධිපති ගෝඨාභය රාජපක්ෂ පවසයි.

කුමන අභියෝග හමුවේ වුව ද “සෞභාග්‍යයේ දැක්ම” ප්‍රතිපත්ති ප්‍රකාශනයෙන් වූ පොරොන්දු ප්‍රකාරව ගොවි ජනතාවගේ ආදායම සියයට සියයකින් ඉහළ නැංවීමටත් රටත් ජනතාවත් ආරක්ෂා කිරීමටත් තමා කැපවන බව ද ජනාධිපතිතුමා සඳහන් කළේය.

ශ්‍රී ලංකා පොදුජන පෙරමුණ සංවිධාන කරන ජනරැළි මාලාවේ “පළමු පොදුජන රැලිය” අමතමින් ජනාධිපති ගෝඨාභය රාජපක්ෂ මේ බව පැවසීය.

ජනාධිපති ගෝඨාභය රාජපක්ෂ සහ අග්‍රාමාත්‍ය මහින්ද රාජපක්ෂගේ ප්‍රධානත්වයෙන් ඊයේ (09) පස්වරුවේ අනුරාධපුර සල්ගාදු ක්‍රීඩාංගණයේ දී පොදුජන රැලිය පැවැත්විණ.

“සෞභාග්‍යයේ දැක්ම” ප්‍රතිපත්ති ප්‍රකාශයට අනුව අභියෝග හමුවේ රජය අත්පත් කරගත් ඉලක්ක පිළිබඳ ජනතාව දැනුවත් කිරීමේ අරමුණින් ශ්‍රී ලංකා පොදුජන පෙරමුණ මහජන රැලි මාලාව සංවිධාන කරයි.

රැස්වීම් භූමියට පැමිණි ජනාධිපතිතුමා සහ අගමැතිතුමා, ශ්‍රී ලංකා පොදුජන පෙරමුණේ ජාතික සංවිධායක බැසිල් රාජපක්ෂ, අනුරාධපුර දිස්ත්‍රික් නායක එස්.එම්. චන්ද්‍රසේන ඇතුළු කැබිනට් හා රාජ්‍ය අමාත්‍යවරුන් විසින් පිළිගනු ලැබිණ.

මහින්ද රාජපක්ෂ රජය පෙරලා දැමීමට එදා කටයුතු කළාක් මෙන් දේශීය හා විදේශීය බලවේග එක්ව නැවත රජයේ ගමන වැළැක්වීමට උත්සාහ කරන බව ජනාධිපතිතුමා පෙන්වා දුන්නේය. ආණ්ඩුවේ ප්‍රතිපත්තිය ඉදිරි පරම්පරාවේ සුබසිද්ධිය ඉලක්කගතව ක්‍රියාවට නැංවෙයි. එබැවින් කුමන බාධක පැමිණිය ද අඛණ්ඩව පෙරට යන බව ජනාධිපතිතුමා අවධාරණය කළේය.

ආණ්ඩුවට විරුද්ධව පාරට බැස වර්ජන කරන අය ආණ්ඩුව දෙස නොව ජනතාව දෙස බැලිය යුතුය. රාජ්‍ය සේවකයන් රටත් ජනතාවත් වෙනුවෙන් සේවයට කැපවිය යුතු වේ. පිබිදෙමින් පවතින ආර්ථිකය ආරක්ෂා කරගැනීමට රට නොවසා රජයේ ප්‍රතිපත්ති ක්‍රියාවට නැංවීමට ඉඩ තැබීමේ අවශ්‍යතාව ද ජනාධිපතිතුමා සිහිපත් කළේය.

අග්‍රාමාත්‍ය මහින්ද රාජපක්ෂ , අමාත්‍යවරුන් වන එස්.එම්. චන්ද්‍රසේන, ජී.එල්. පීරිස්, රෝහිත අබේගුණවර්ධන, ජොන්ස්ටන් ප්‍රනාන්දු, පවිත්‍රා වන්නිආරච්චි, රාජ්‍ය අමාත්‍යවරුන් වන ෂෙහාන් සේමසිංහ, චන්න ජයසුමන, කංචන විජේසේකර, පාර්ලිමේන්තු මන්ත්‍රී එච්. නන්දසේන, කේ.පී.එස්. කුමාරසිරි යන අය උත්සව සභාව ඇමතූහ.

මහා සංඝරත්නය, කැබිනට් අමාත්‍යවරු, උතුරු මැද පළාත් ආණ්ඩුකාරතුමා, රාජ්‍ය අමාත්‍යවරු, පාර්ලිමේන්තු මන්ත්‍රීවරු, හිටපු පළාත් සභා මැති ඇමතිවරු, නගර සභා, ප්‍රාදේශීය සභා සභාපතිවරු, මන්ත්‍රීවරු සහ මහජන නියෝජිතයෝ ඇතුළු විශාල පිරිසක් මේ අවස්ථාවට එක්ව සිටියහ.

– ජනාධිපති මාධ්‍ය අංශය

ආණ්ඩුවේ පසුපෙළ මන්ත්‍රීවරයකු වන තිස්ස කුට්ටිආරච්චි නීත්‍යානුකූල නොවන ලෙස ජනතා මුදල් තැන්පත් කරගනිමින් බැංකුවක් පවත්වා‌ගෙන යන බව සමගි ජන බලවේගයේ පාර්ලිමේන්තු මන්ත්‍රී චමින්ද විජේසිරි චෝදනා කරයි.

පාර්ලිමේන්තුවේදී මේ පිළිබද අදහස් දක්වමින් විජේසිරි මන්ත්‍රීවරයා කියා සිටියේ මෙය මුදල් මණ්ඩලයේ අනුමැතිය නොමැතිව පවත්වාගෙන යන එකක් බවයි.

ඊට පිළිතුරු ලබා දෙමින් රාජ්‍ය අමාත්‍ය ලසන්ත අලගියවන්න සදහන් කර සිටියේ ඒ පිළිබදව සොයා බැලීමට පියවර ගන්නා බවය.

තිස්ස කුට්ටි ගේ ප්‍රතිචාරය !

කෙසේ වුවත් මාධ්‍ය වෙත අදහස් දක්වමින් පාර්ලිමේන්තු මන්ත්‍රී තිස්ස කුට්ටිආරච්චි පවසා සිටියේ , තමන් විසින් ව්‍යාජ බැංකු පද්ධතියක් පවත්වාගෙන යන බවට එල්ල වන චෝදනා ප්‍රතික්ෂේප කරන බවය.

 මෙරට බැංකු නීතිය පිළිබඳව හෝ සමුපකාර නීතිය පිළිබඳ කිසිදු දැනුමක් නොමැතිව චමින්ද විජේසිරි මන්ත්‍රීවරයා තමන්ට චෝදනා එල්ල කළ බවත් මේ පිළිබඳව ඉදිරියේදී පාර්ලිමේන්තුව ප්‍රකාශයක් කරන බවද හෙතෙම පවසා ඇත.

තමන් විසින් රැකියා විරහිත උසස් පෙළ සමතුන් සඳහා ප්‍රාග්ධන සමුපකාර සමිතියක් දිස්ත්‍රික් නවයක් ආවරණය වන පරිදි ආරම්භ කරන තිබෙන බව එහිදී පිළිගෙන ඇති තිස්ස කුට්ටිආරච්චි මන්ත්‍රීවරයා මෙම සමුපකාර සමිතිය මහ බැංකුවේ ලියාපදිංචි කර ඇති බවත් තමන් දේශපාලන පැමිණි පසු අදාළ සමිතියෙ කිසිදු තනතුරක කටයුතු නොකළ බවත් පවසයි.

මහින්ද සුළඟ පළමු වේදිකාවේ කථිකයෙකු වූ ආචාර්ය දයාන් ජයතිලක කේන්ද්‍රීයව සමගි ජනබලවේගය පක්ෂයේ අභ්‍යන්තරයේ දැවැන්ත ගැටුමක් නිර්මාණය වී ඇති බව දේශපාලන ආරංචි මාර්ග සඳහන් කරයි.

එම ආරංචි මාර්ග සඳහන් කරන ආකාරයට වසරේ සජබ පළමු කලමනාකරණ රැස්වීමේ දී ප්‍රධානම මාතෘකාව වූවේ දයාන් ජයතිලක බව හර්ෂ ද සිල්වා මීමැස්සෝ සමඟ සාකච්ඡාවේ දී පැවසුවේ මේ නිසාය.

වැඩිදුරටත් වාර්තා වන තොරතුරු අනුව සජබ තුල සිදුවන සියළු සාකච්ඡා පැය කිහිපයකින් වෙබ් අඩවි සහ වට්ස්අප් ගෘෘප්වලට යන තත්ත්වයක් මතුවෙලා.

එකී දේශපාලන ආරංචි මාර්ග සඳහන් කරන ආකාරයට , පක්ෂයේ බොහෝ මන්ත්‍රීවරුන් මේ තුළ සැකසංකා මතුකරන්නේ ආචාර්ය දයාන් ජයතිලක සම්බන්ධයෙන් ය.

දයාන් පක්ෂ අභ්‍යන්තර සාකච්ඡා පුවත්පත්වල ලිවීමට පටන් ගත් පසුව සජබ පාර්ලිමේන්තු මන්ත්‍රීවරුන් බහුතරයක් දැන් පක්ෂ රැස්වීම්වලට සහභාගි වන්නේ හෝ නිදහසේ අදහස් දක්වන්නේ හෝ නැති බවත් පැවසෙනවා.

ඒ තුළ ජනපති ප්‍රේමදාස සමයේ එජපය තුල ලලිත් ගාමිණී කේන්ද්‍රගතව බෙදීම හා සමාන කැරැල්ලක් සජබ හරහා හමා යමින් ඇත. එහි න්‍යයාචාර්යවරයා සජිත් ප්‍රේමදාස ගේ උපදේශක දයාන් ජයතිලක බව සජබ මන්ත්‍රීවරුන්ගේ වැඩිදුර අදහසයි.

දයාන් ජයතිලකගේ දේශපාලන ආගමනය !

ඊපීආර්එල්එෆ් සංවිධානයෙන් ක්‍රියාකාරී දේශපාලනය ඇරඹි දයාන්, ඊපීආර්එල්එෆ් සංවිධානය ප්‍රමුඛව හැදූ උතුරු නැගෙනහිර පළමු පළාත් සභාවේ අමාත්‍යවරයෙකු බවට පත් විය.

දයාන්ගේ පළමු නායක පද්මනාභ ඝතානය වූ අතර, මහ ඇමති වර්ධරාජා පෙරුමාල් ට ඉන්දියාවේ සරණාගත තත්වය ලබා ගැනීමට සිදු විය.

වර්ධරාජා ඊලම ප්‍රකාශ කරන්නේ දයාන්ගේ උපදේශයක් අනුවයි. දයාන් කලක් විජය කුමාරතුංග ගේද උපදේශකවරයා වෙලා හිටියා. පැරණි වාමාංශික දේශපාලන පක්ෂ සමඟ එකට හිටගන්නට විජයට අවශ්‍ය කතා කියා දුන්නේ දයාන්. එක්සත් සමාජවාදී පෙරමුණ බිහිකරන්නට පෙර විජය කුමාරතුංග ද ඝාතනයට ලක් වෙනවා.

ඊලඟට දයාන් ලංකර ගත්තේ රණසිංහ ප්‍රේමදාස ජනාධිපති. ප්‍රේමදාස ආණ්ඩුවේ කැබිනට් ඇමතිවරුන්ට වැඩි බලයක් පාස්කරලිංගම්, පොලිස් අධිකාරි ලෝරන්ස්, කැසිනෝ ජෝ සිම් හා දයාන් ජයතිකට තිබුණ බව ඉතිහාසයේ සඳහන් තවත් ප්‍රසිද්ධ රහසක්.

රණසිංහ ප්‍රේමදාස ගේ අභාවයෙන් පස්සේ දයාන් ගියේ මහජන පක්ෂ නායක ඔසී අබේගුණසේකර ලඟට. ඔහු තොටලඟ බෝම්බයෙන් ඝාතනය වෙනවා.

පස්සේ, එජාප හිටපු මහ ලේකම්වරයකු වූ සිරිසේන කුරේ ගේ ප්‍රේමදාස කේන්ද්‍රයේ කාමරයකට ගිය දයාන් රනිල් වික්‍රමසිංහ විනාශ කිරීමේ කුමන්ත්‍රණයට එක් වෙනවා.

ටික කලක් නිහඩව සිටි දයාන්, ඊලඟට මහින්ද රාජපක්ෂ ට කිට්ටු වෙනවා. 2014 නොවැම්බර් උදේ වරුවේ මෛත්‍රීපාල සිරිසේන සමඟ සිටි දයාන්, සවස නැවත මහින්ද ලඟට ගිය අතර , යහපාලනය හිමිවීමෙන් පසුව නුගේගොඩ පැවති පළමු මහින්ද සුළඟ රැළියේ ප්‍රමුඛ කතිකයා වූවේ ද දයාන් .

නැවතත්, දයාන් උඩට ගේන්නේ එවකට මෛත්‍රීපාල සිරිසේන ජනාධිපති ගේ උපදේශක වුනු ශිරාල් ලක්තිලක. ඒ =ජනාධිපති උපදේශක ශිරාල් ලක්තිලක දේශනයක් පැවැත්වීම සඳහා. පසුව දයාන් මෛත්‍රීපාල සිරිසේන ජනාධිපතිවරයා වෙත සමීපව ශිරාල් සමග සීතල යුද්ධයක් අරඹනවා. මේ තත්ත්වය සමනය කරමින් මෛත්‍රීපාල සිරිසේන ජනාධිපති ඇඟ බේරගන්නේ දයාන්ව රුසියාවේ ශ්‍රී ලංකා තානාපති කිරීමෙන්.

දයාන් ලංකර ගත් පත්මනාභ, වර්ධරාජා, විජය, ප්‍රේමදාස, ඔසී, සිරිසේන කුරේ දේශපාලනික ලෙස විනාශ වූ බව රහසක් නෙවෙයි.

ඒ ඉතිහාසය දන්න නිසා, දේශපාලන ඉවක් තිබූ මහින්ද රාජපක්ෂ හා මෛත්‍රීපාල සිරිසේන වැන්නන් දයාන්ව අතේ දුරින් තියා, කරදරයේ නොවැටී බේරුණා.

නායකයින්ගේ දුර්වල දුබලතාවයන් ස්පර්ශ කරන දයාන් ඒ හරහා තම සිතැඟි අනුව නායකයන් මෙහෙයවන බවත් ප්‍රසිද්ධ රහසක්.

ඉතිං සජබ පිපිරීම නියත තත්ත්වය නිර්මාණය වීමත් මේ ඉතිහාසය අනුව අමුතුවෙන් කියන්න දෙයක් නෑ.

දයාන් ජයතිලක දැන් සජිත් ප්‍රේමදාස විපක්ෂ නායක ගේ උපදේශක. පත්මනාභ-විජය-ප්‍රේමදාස-ඔසී-කුරේ ගේ දේශපාලනික අරාජිකත්වයෙන් මාවතට සජිත් රැගෙන යන්නට දයාන් ට කෙටි කලක දී ම හැකිවී තියෙනවා.

චම්පික, සරත් ෆොන්සේකා, හරීන්, හර්ෂ, තලතා, එරාන්, මනූෂ වැනි සජබ ක්‍රියාකාරීන්ට පමණක් නොව කබීර් හෂිම්, රාජිත වැනි දැවැන්තයින් දැන් රැස්වීමකට එන්නේ කලාතුරකින්.

කටක් අරින්නේ කේක් කන්න පමණයි. මේ දුරස්වීම හෙට දවසේ දේශපාලන පිපිරීමක් සජබ තුළ දැනට තහවුරු කර තිබෙනවා.

ප්‍රශ්නය වන්නේ , දැනට සමගි ජනබලවේගය පක්ෂයේ ජ්‍යෙෂ්ඨයන් අති බහුතරයක් දන්න මේ කරුණ සජිත් ප්‍රේමදාස විපක්ෂ නායක නොදැන සිටීමයි. ඒ නිසා එය ඔහුගේ දේශපාලන අවාසනාවක් වීම කොහෙත්ම විය නොහැක්කක් නොවන බව සජබ ජ්‍යෙෂ්ඨයන් රැසකගේ අදහස බවත් දේශපාලන ආරංචි මාර්ග පවසනවා.

විශේෂ වාර්තාකරුවෙකු විසිනි

පාස්කු ප්‍රහාරය සම්බන්ධයෙන් පසුගිය පෙබරවාරි 07 ස්වර්ණවාහිනී නාලිකාවේ විකාශය වූ රතු ඉර දේශපාලන විවාදය , පාස්කු වින්දිතයන්ට යුක්තිය ඉල්ලා ගෙනයන අරගලය මොටකළ රංගනයක්ද යන්න කෙරෙහි , සිවිල් සමාජ සංවිධාන ඇතුළු ක්‍රියාකාරීන්ගෙ අවධානය යොමුවෙලා.

විශේෂයෙන් වතිකානුවේ ශුද්ධ වූ අති උතුම් පාප් වහන්සේ පවා මේ පාස්කු වින්දිතයන්ට යුක්තිය ඉටුකරන අරගලය සම්බන්ධයෙන් උනන්දුවෙන් සිටින පසුබිමක, සහ එළැඹෙන අප්‍රේල් 21 ජාත්‍යන්තර අවධානය ගනිමින් මේ පාස්කු වින්දිතයන්ට යුක්තිය ඉටුකර ගැනීමට කටයුතු සූදානම් වෙමින් ඇති පසුබිමේ , පසුගිය 07 වෙනිදා විවාදය ඒ සියල්ල දියත්කර හැරීමේ ප්‍රයත්නයක් ද යන සැකය මේ පිරිස් මතුකරනවා.

වැඩිදුරටත් වාර්තා වන තොරතුරු අනුව ආණ්ඩුවේ පාර්ශ්වයෙන් මේ විවාදය සඳහා එක්වෙන්නේ අමාත්‍ය මහින්දානන්ද අලුත්ගමගේ සහ රාජ්‍ය අමාත්‍ය කාංචන විජේසේකර. විපක්ෂය පාර්ශ්වයෙන් මේ විවාදය සඳහා එක්වෙන්නේ, සජබ පාර්ලිමේන්තු මන්ත්‍රී හරීන් ප්‍රනාන්දු සහ මනූෂ නානායක්කාර යි.

මේ දෙන්නා මීට සූදානම් වෙලා තියෙන්නේ , කොළඹ ජයික් හිල්ටන් හෝටලයේ වෙනම කාමරයක් පවා වෙන්කර ගනිමින්.

ඉතිං මේ විවාදයට සූදානම් වෙන දෙදෙනාට අවශ්‍ය වැඩිදුර ලිපි ලේඛන ඇතුළු තර්ක , සාක්ෂි විශ්ලේෂණ ආදී තොරතුරු දෙන්න විවිධ පුද්ගලයන් ජයික් හිල්ටන් වෙත 7 වෙනිදා ඇවිත් තියෙනවා. විශේෂයෙන් සජබ මහ ලේකම් පාර්ලිමේන්තු මන්ත්‍රී රංජිත් මද්දුමබංඩාර ඇතුළු පිරිසක් ඒ වෙත ගිහින් තියෙනවා.

හැබැයි ප්‍රශ්නය තියෙන්නේ පෙබරවාරි 07 වෙනිදා පස්වරු 12.30 ට විතර අමාත්‍ය මහින්දානන්ද අලුත්ගමගේ ත් මේ ස්ථානයට ගිහින් තිබීම.

මහින්දානන්ද අලුත්ගමගේ ඇමති ගේ මේ හදිසි ජයික් හිල්ටන් පැමිණීමත්, ස්වර්ණවාහිනී රතුඉර සංවාදය පැවැත්වුණ ස්වරූපයත් විමර්ශනය කරමින් තමයි, පාස්කු වින්දිතයන්ට යුක්තිය ඉටුකිරීම වෙනුවෙන් මැදිහත්වී සිටින පාර්ශ්ව, මේ 7 වෙනිදා විවාදය ඩ්‍රාමා එකක්ද කියලා ප්‍රශ්නය යොමුකරන්නේ .

ඔවුන් වැඩිදුරටත් කියන්නේ , මේක ප්‍රසිද්ධියේ විවාද කරන්න පුළුවන් කරුණක් නෙවෙයි. ආගමික සංස්ථාව, රාජ්‍ය රහස්, ජාතික ආරක්ෂාව , හමුදාව සහ පොලිසිය , බුද්ධි අංශ, දේශපාලනයේ ඉහළම තන්ත්‍රය , ඇතුළු සංකීර්ණ සාධක රැසක් හරහා යන්න වෙන යුක්තිය සොයන ගමනක්.

එවැනි තත්ත්වයක් යටතේ විපක්ෂය පාර්ලිමේන්තු වරප්‍රසාද පවා නොමැති ප්‍රසිද්ධ නාලිකාවක විවාදයක් සඳහා යනවා කියන්නේ , දැලිපිහියෙන් කිරි කෑමට වඩා අවධානම් වැඩක්.

ඉතිං විපක්ෂය නියෝජනය කරන මන්ත්‍රීවරුන් දෙදෙනෙකුට නිදහසේ තමන් දන්න දේවල් අනාවරණය කරන්න ඉඩක් එතන නැති බව දැන දැන මේ වගේ විවාදයක් සඳහා ගියේ මොකද කියලත් මේ පිරිස් ප්‍රශ්න කරනවා.

ඒ වගේම ඔවුන් කියන්නේ පාස්කු වින්දිතයන්ට යුක්තිය ඉටුකරන්න ගෙනියන සටන මේ වගේ ජනප්‍රිය විගඩම් නිසා අවුල් වෙනවා කියලා. මේ වෙනකොට මේ පාස්කු ප්‍රහාරයේ වින්දිතයන්ට යුක්තිය ලබාගන්න සටන ජාත්‍යන්තර අවධානයක් දිනාගෙන තියෙන්නේ. ඒ පසුබිමේ විපක්ෂය නියෝජනය කරන , යම් දැනුම් තේරුමක් ඇති හරීන්ලා, මනූෂලාත් මේ දන්න කරුණු ටිකවත් ප්‍රසිද්ධියේ කියන්න බැරි , නාඩගම් මඩුවක, නාඩගම්කාරයන් වෙන්න යාමත් ප්‍රශ්නයක් බව ඔවුන් ප්‍රශ්න කරනවා.

විශේෂ වාර්තාකරුවෙකු විසිනි

දකුණු කොරියාවේ පැවැත්වෙන ලෝක සාම සමුළුව ඇමතීමට ශ්‍රී ලංකා නිදහස් පක්ෂයේ සභාපති ,හිටපු ජනාධිපති මෛත්‍රීපාල සිරිසේන අද(08) රාත්‍රියේදී දිවයිනෙන් පිටත්ව යන බව වාර්තා වෙයි.

මෙම සමුළුව දකුණු කොරියාවේ දී අනිද්දා (11) ආරම්භ වන අතර, එහි ප්‍රධාන දේශනය පවත්වනු ලබන්නේ ද හිටපු ජනාධිපති මෛත්‍රිපාල සිරිසේන විසින් බවත් වාර්තා වෙයි.

රටවල් 160ක පමණ නියෝජිතයන් සමුළුවට සහභාගි වන අතර , හිටපු ජනාධිපති මෙම සමුළුවට සහභාගි වන්නේ එක්සත් ජාතීන්ගේ හිටපු මහ ලේකම් බෑන් කී මූන් ගේ ආරාධනයකට අනුවය .

තවත් කොරෝනා මරණ 36 ක් වාර්තා වීමත් සමග මෙරට සමස්ත මරණ සංඛ්‍යාව 15,692 ක් දක්වා ඉහළ ගියේ ය.

රජයේ ප්‍රවෘත්ති දෙපාර්තමේන්තුව නිකුත් කළ නිවේදනයට අනුව, මියගිය පිරිස වාර්තා වී ඇත්තේ, පිරිමි ආසාදිතයින් 27 දෙනෙක් සහ කාන්තාවන් 09 දෙනෙකු ලෙසයි.

මියගිය පිරිස අතර වයස අවුරුදු 30ට අඩු ආසාදිතයින් තිදෙනෙකු ද වේ.

අවුරුදු 30 – 59 ත් අතර වයසේ පසුවන ආසාදිතයින් 08 දෙනෙකු සිටින අතර ඉතිරි ආසාදිතයින් 25 දෙනා වයස අවුරුදු 60 සහ එම වයස් සීමාව ඉක්ම වූ වැඩිහිටියන් ය.

අද (09) වාර්තා කරන ලද මෙම මරණ 36 සෞඛ්‍ය සේවා අධ්‍යක්ෂ ජනරාල්වරයා විසින් තහවුරු කරනු ලැබ ඇත්තේ, ඊයේ දිනයි.