පුවත්

ආර්ථික මර්මස්ථානවලට අයත් රාජ්‍ය ආයතනවල නිලධාරීන්ට වැඩවර්ජනය කිරීමට ඇති අවස්ථාවන් ආණ්ඩුක්‍රම ව්‍යවස්ථාවෙන් තහනම් කළයුතු බව අධිකරණ අමාත්‍ය ජනාධිපති නිතීඥ අලි සබ්රි පවසා ඇති බව වාර්තා වෙයි.

මව්රට වෙබ් අඩවිය වාර්තා කරන අන්දමට ඊයේ (26) ගුවන් විදුලි නාළිකාවක් සමග සාකච්ජාවකට එක්වෙමින් අමාත්‍යවරයා මේ බව සදහන් කොට ඇත.

එසේම ඇතැම් වෘත්තීය සමිති සුළු සිද්ධියකට පවා වැඩවර්ජන කිරීමෙන් ජනතාවට මෙන්ම ආර්ථිකයට වන හානිය අතිමහත් බව අමාත්‍යවරයා පෙන්වාදී ඇත.

මෙවැනි වර්ජන නතර කිරීම සදහා ජනාධිපතිවරයාද මැදිහත් විය යුතු බව අමාත්‍යවරයාගේ අදහස වී තිබේ.

කෙසේ වුවත් වැඩවර්ජනය කිරීම ශිෂ්ට සම්පන්න ලෝකය පිළිගත් වෘත්තීය අයිතිවාසිකමකි.

ජලය නොමැති වුණොත් විදුලිය කප්පාදුවක් කරන්න සිදුවෙන බව වාරිමාර්ග අමාත්‍ය චමල් රාජපක්ෂ පවසයි .

එනිසා සියලු දෙනාම වගකීමෙන් විදුලිය පරිහරණය කළ යුතු බවත් අනවශ්‍ය ලෙස විදුලි පරිභෝජනය සිදු නොකළ යුතු බවත් අමාත්‍යවරයා සඳහන් කර ඇත.

විදුලිය නිපදවීම සඳහා ජලය මුදාහරිනු ලබන්නේ කෘෂිකාර්මාන්තයට ප්‍රමුඛස්ථානය ලබා දෙමින් බවත් ඒ අනුව පවතින නියං තත්ත්වය දිගටම තිබුණොත් ගොවිතැන් කටයුතුවලට හැර වෙනත් දේ සඳහා ජලය නිදහස් කිරීමට නොහැකි බව ද ඔහු සදහන් කර තිබේ.

යල කන්නයේ ගොවිතැන් කටයුතු සඳහා ජලය ආරක්ෂා කර ගැනීම අත්‍යවශ්‍ය කරුණක් බවද ඔහු තවදුරටත් කියා සිටියේය.

මිනිස් පරිභෝජනයට සුදුසු බඩඉරිගු නොමැතිවී⁣මෙන් ත්‍රීපෝෂ නිෂ්පාදනයට බාධා එල්ලවී ඇතැයි ලංකා ත්‍රීපෝෂ සමාගමේ සභාපති දීප්ති කුලරත්න පවසයි.

නිසි ප්‍රමිතීන්ට නොමැතිවීම හේතුවෙන් සැපයුම්කරුවන්ගෙන් ලබාගත් බඩඉරිඟු කන්ටේනර් 05 ක් ද ඉකුත් දින කිහිපයේ ආපසු හරවා යැවූ බවත් ඔහු පවසා ඇත.

කෙසේ වෙතත් බඩඉරිඟු මෙට්‍රික් ටොන් 1,500 ක් කඩිනමින් ලබාගැනීමට අවශ්‍ය කටයුතු මේ වන විටත් සිදුකරමින් ඇති බවද ඔහු සදහන් කර තිබේ.

ත්‍රිපෝෂ නිෂ්පාදනය සඳහා දිනකට බඩඉරිඟු මෙට්‍රික් ටොන් 50 ක් අවශ්‍ය බව ශ්‍රී ලංකා ත්‍රිපෝෂ සමාගම පවසන අතර මෙරට බඩඉරිඟු ප්‍රමාණවත් නොවන බැවින් අමෙරිකාව, බ්‍රසීලය, ඉන්දියාව සහ පාකිස්තානය යන රටවලින් බඩඉරිඟු ආනයනය කරනු ලබයි.

නමුත් මේ වන විට මෙරට ආනයන කටයුතු මුළුමනින්ම පාහේ අඩපණව පවතී. ඒ රට උග්‍ර ඩොලර් හිඟයකට මුහුණදී සිටින නිසාය.

කාබනික පොහොර නැවක් ගෙනවිත් මෙරට සමග අර්බුදයක් ඇතිකර ගත් ක්වින්ඩාවෝ සීවින් බයෝලොජිකල් ගෲප් (Qingdao Seawin Biological Group) නම් චීන සමාගම ලංකාවට එරෙහිව එක්සත් ජාතීන්ගේ ආහාර හා කෘෂිකර්ම සංවිධානයට විධිමත් පැමිණිල්ලක් කර ඇති බව වාර්තා වෙයි.

Qingdao Seawin Biological Group සමාගම, ශ්‍රී ලංකාව විසින් මතභේදයට තුඩු දී ඇති පොහොර සඳහා ගෙවීම සම්බන්ධයෙන් එකඟතාවකට පැමිණීමට මොහොතකට පෙර මෙම පැමිණිල්ල ඉදිරිපත් කර ඇති බවත් වාර්තා වෙයි.

“2022 ජනවාරි 5 වන දින සීවින් සහ ගැනුම්කරුවන් අතර L/C වාරණ නියෝග නඩු විසඳීමේ නියමයන් වෙත ළඟා වීමට පෙර, එක්සත් ජාතීන්ගේ ආහාර හා කෘෂිකර්ම සංවිධාන මූලස්ථානය වෙත පැමිණිල්ලක් ගොනු කර ඇති අතර විමර්ශනයට මැදිහත් වීමට ජාත්‍යන්තර ආයතන සඳහා ඉල්ලුම් කර ඇත. ඉහත ජාත්‍යන්තර ආයතන ද සීවින් වෙත විද්‍යුත් තැපෑලෙන් පිළිතුරු දුන් අතර, අවශ්‍ය නම් ඔවුන්ට විමර්ශනයට මැදිහත් විය හැකි බව එමගින් දන්වා ඇත. ”යනුවෙන් සීවින් සමාගම සදහන් කොට ඇත.

ජාත්‍යන්තර ශාක ආරක්ෂණ සම්මුතියට (IPPC) අනුව පළිබෝධ පැතිරීම පාලනය කිරීමට එක් එක් සාමාජික රාජ්‍යයට ඇති අයිතියට ඔවුන් ගරු කරන බව එක්සත් ජාතීන්ගේ ආහාර හා කෘෂිකර්ම සංවිධානය වෙත සිය පැමිණිල්ල ඉදිරිපත් කරමින් එම සමාගම පෙන්වා දී තිබේ.

කෙසේ වෙතත්, සමාගම සඳහන් කළේ, එක් එක් සාමාජික රාජ්‍යයේ ශාක සනීපාරක්ෂාව තාක්‍ෂණිකව සාධාරණ සහ විනිවිද පෙනෙන විය යුතු අතර ජාත්‍යන්තර වෙළඳාම සඳහා සැගවුණු සීමාවන් නොපැවතිය යුතු බවයි.

(මූලාශ්‍රය - මව්රට )

අග්‍රාමාත්‍ය මහින්ද රාජපක්ෂගේ නමින් රාජ්‍ය බැංකුවක තිබූ ගිණුමකින් රුපියල් කෝටි තුනහමාරක මුදලක් ඔහුගේ පෞද්ගලික කාර්ය මණ්ඩල සාමාජිතයෙකු විසින් වංචාකර ඇති බව තමන් නොදන්නා බව අමාත්‍ය නාමල් රාජපක්ෂ පවසයි.

කෙසේ වුවත් මෙරට ජාතික පුවත්පත් පවා අද (26) මේ බව වාර්තාකර තිබු නමුත් නාමල් රාජපක්ෂ අමාත්‍යවරයා පැහැදිලිව මාධ්‍ය වෙත පැවසුවේ, මෙම වංචාව සම්බන්ධයෙන් තමන් නොදන්නා බවය.

අග්‍රාමාත්‍ය මහින්ද රාජපක්ෂගේ නමින් රාජ්‍ය බැංකුවක තිබූ ගිණුමකින් රුපියල් කෝටි තුනහමාරක මුදලක් ඔහුගේ ළගම සිටි නිලධාරියෙකු වසර 6ක කාලයක සිට වරින්වර වංචනික ලෙස ලබාගෙන ඇති බව ජාතික පුවත්පත් අද වාර්තා කර තිබුණි.

අග්‍රාමාත්‍ය කාර්යාලයේ තොරතුරු වාර්තා කර ඇත්තේ එම නිලධාරියා අග්‍රාමාත්‍යවරයාගේ ATM කාඩ්පත උපයෝගී කරගෙන මෙම මුදල ලබාගෙන ඇති බවය.

අදාළ ගිණුමේ තිබූ මුදල් මහින්ද රාජපක්ෂ ජනාධිපතිවරයා ලෙස කටයුතු කළ අවධියේ සිට වැටුප් ලෙස ලැබූ මුදල් බවත්, එම ගිණුමේ මුදල් සම්බන්ධයෙන් ඇතිවූ සැකයක් හේතුවෙන් එය පරීක්ෂා කිරීමේදී මෙම වංචාව හෙළිවී ඇති බවත් මාධ්‍ය වාර්තා වල පළවිය.

මෙම මූල්‍ය වංචාව හෙළිවීමෙන් පසු එම නිලධාරියාව අග්‍රාමාත්‍ය පෞද්ගලික කාර්ය මණ්ඩලයේ සියලු තනතුරුවලින් ඉවත් කර ඇති නමුත්, මේ සම්බන්ධයෙන් නීතිමය පියවරක් ගැනීමට අග්‍රාමාත්‍යවරයා අපේක්ෂා නොකරන බව වාර්තා පළව තිබිණ.

මේ සම්බන්ධයෙන් අදහස් පළ කළ අමාත්‍ය නාමල් රාජපක්ෂ ,

"තාත්තාගෙන් තමයි අහන්න ඕනේ..එහෙම දෙයක් සිදුවෙලා තියෙනවා ද කියලා. මං දන්න හැටියට එහෙම දෙයක් නෑ. "

වත්මන් ආණ්ඩුව පසුගිය මාස 25 ට කෝටි 149,905 ක මුදල් නෝට්ටු මුද්‍රණය කර ඇතැයි ද එය මහ බැංකු ඉතිහාසයේ අච්චු ගැසූ මුළු මුදල මෙන් 20 ගුණයක් යැයිද හිටපු ආණ්ඩුකාර රජිත් කිර්ති තෙන්නකෝන් පවසයි.

නිවේදනයක් නිකුත් කරමින් ඔහු මේ බව කියා සිටින අතර එහි වැඩිදුරටත් මෙසේද සඳහන් කර ඇත.

වත්මන් රජය බලයට පත් වීමෙන් පසුව මේ දක්වා රු. කෝටි 149,905 ක මුදලක් අච්චු ගැසීම නිසා එදිනෙදා ජීවිතයට බලපාන සියළුම භාණ්ඩ මිල ඇදහිය නොහැකි අන්දමින් ඉහළ යමින් ඇතැයි හිටපු ආණ්ඩුකාර රජිත් කීර්ති තෙන්නකෝන් පවසයි.

ආණ්ඩුව මේ වසරේ ගතවූ දින 25 ට පමණක් රු. කෝටි 15,704 ක් අච්චු ගසා ඇත. 2021 ජනවාරි සිට දෙසැම්බර් දක්වා (2021 වසරේ දී) පමණක් ආණ්ඩුව රු. කෝටි 67,833 ක් (බිලියන 678.33) මුද්‍රණය කළේය. එයට දෙසැම්බර් 31 දින අච්චු ගැසූ ලක්ෂ 66,500 ද ඇතුලත් ය.

අජිත් නිවාඩ් කබ්රාල් මහ බැංකුවේ ලෙස පත්වීමෙන් පසුව පමණක් රු. කෝටි 28,942 ක් මුද්‍රණය කර ඇත. කබ්රාල් අධිපති ධූරයට පත් වන විට මහබැංකුවේ රජයේ සුරැකුම්පත් වන මුහුණත අගය රු. බිලියන 1284.37 ක් විය. අද වන විට එය රු. බිලියන 1574.79 කි.

වත්මන් ආණ්ඩුව බලයට පත් වූ දා සිට (2020 ජනවාරි* අද දක්වා රු. කෝටි 149,905 ක් (රු.බිලියන 1,499.05) අච්චු ගසා ඇත. ශ‍්‍රී ලංකා මහ බැංකුවේ සුරැුකුම්පත්වල (2022 ජනවාරි 25 දිනට) මුහුණත අගය රු. බිලියන 1,573.79 දක්වා ඉහළ ගොස් ඇත.

භාණ්ඩාගාර ලේකම්වරයා ගේ අවශ්‍යතාව මත, මහ බැංකු අධිපතිවරයා මුදල් අච්චු ගැසීම සිදු කරයි. ශ‍්‍රී ලංකා මහ බැංකුව ස්ථාපනය කිරීමෙන් පසුව වත්මන් ආණ්ඩුව බලයට පත් වන තෙක් අච්චු ගසා තිබූණේ රු. කෝටි 7474 ක් පමණී. සරළව පවසන්නේ නම්, මහ බැංකුව ඇරඹි දා සිට 2020 දක්වා අච්චු ගසා ඇති මුළු මුදලට මෙන් 20 ගුණයක මුදල් ප‍්‍රමාණයක් පසුගිය මාස 25 තුල අච්චු ගසා ඇත.

‘‘සල්ලි අච්චු ගැසීම පාලනයකින් තොරව සිදු වන බව සක් සුදක් සේ පැහැදිලියි. 1950 සිට මේ දක්වා මහ බැංකු අධිපතිවරු 14 දෙනෙකු යටතේ අච්චු ගැසූ මුදල මෙන් 20 ගුණයක් මහාචාර්ය ඩබ්ලිව්. ඩී. ලක්ෂමන් හා අජිත් නිවාඞ් කබ්රාල් යටතේ අච්චු ගසා තිබේනවා. සර් ජෝන් කොතලාවල, බණ්ඩාරනායක, ඩඞ්ලි සේනානායක, සිරිමා බණ්ඩාරනායක, ජේ.ආර්.ජයවර්ධන, ආර්.පේ‍්‍රමදාස, ඩී.බී.විජේතුංග, චන්ද්‍රිකා කුමාරතුංග, මහින්ද රාජපක්ෂ, මෛත‍්‍රීපාල සිරිසේන පාලනයන් යටතේ අච්චු ගැසූ මුලූ‍ මුදල මෙන් 20 ගුණයක් වත්මන් ආණ්ඩුව යටතේ අච්චු ගසා තිබෙනවා.” යැයි හිටපු ආණ්ඩුකාර තෙන්නකෝන් පවසයි.

‘‘මුදල් අච්චු ගැසීම නිසා ලංකාව ලෝකයේ උද්ධමනය වැඩිම රාජ්‍යයන් අතරට එකතු වී තිබෙනවා. මහ බැංකුවේ ජ්‍යෙෂ්ඨ ආර්ථික විද්‍යාඥයින්ගේ උපදෙස්වලට පිටින් භාණ්ඩාකාර ලේකම් හා මහ බැංකු අධිපති ඒකාධිපතියෙකු සේ හිතුවක්කාරී ලෙස මුදල් අච්චු ගැසීම සිදු කරනවා” යැයි ද තෙන්නකෝන් පවසයි.

ට්‍රාන්ස්පේරන්සි ඉන්ටනැෂනල් ආයතනය විසින් නිකුත් කරන නවතම දූෂණ සංජානන දර්ශකය අනුව ශ්‍රී ලංකාව තවත් ස්ථාන 08ක් පසුපසට එනම් දූෂිත රටල් අතරට එක්ව ඇත.

අදාළ වාර්තාව ඊයේ (25) නිකුත් කර ඇති අතර එකී දර්ශකය අනුව ශ්‍රී ලංකාව 2021 වසරේදී දූෂිත රටවල් අතර 102 වැනි ස්ථානයට පත්ව ඇත. නමුත් 2020 වසරේදී ශ්‍රී ලංකාව පසුවූයේ 94 වැනි ස්ථානයේය.

මෙවර එම දර්ශකය ගණනය කිරීම සඳහා රටවල් 180ක දත්ත යොදාගෙන තිබුණි.

මෙම දර්ශකයට අනුව ශ්‍රී ලංකාව ලබාගෙන ඇති ලකුණු සංඛ්‍යවා 37කි. මෙහි අගය 0ක් නම් බෙහෙවින් දූෂිත රටක් ලෙස නම් කෙරෙන අතර එහි අගය 100ට ආසන්න වනවිට ඉතා පිරිසිදු රටවල් ලෙස නම් වෙයි.

එහි අගය 88ක් ලබාගනිමින් ඩෙන්මාර්කය, පින්ලන්තය සහ නවසීලන්තය දර්ශකයෙහි ඉහළින් සිටින රටවල් වන බවට පත්ව ඇති අතර සෝමාලියාව සහ සිරියාව අගය 13ක් සහ දකුණු සුඩානය අගය 11ක් ලබාගනිමින් බෙහෙවින් දූෂිත රටවල් අතර පසුවෙයි.

"අපේ රටේ හොරකම්, දූෂණ, වංචා කොච්චර සිද්ධ වෙනවාද කියලා අගමැතිගේ ගිණුමෙන් සල්ලි හොරකම් කිරීමෙන් පැහැදිලි වෙනවා. ජනාධිපති ධුරය දරන කාලයේ භාවිතා කළ ගිණුමේ සල්ලි ළඟම හිටපු කෙනෙක් හොරකම් කරලා. කෝටි ගණනක් ඒ ගිණුම්වල තිබිලා. මෙච්චර කල් ඒවා හොයලා බලලත් නැහැ. එච්චර මුදලක් ගැන කිසිම සැලකිල්ලක් දක්වලා නැහැ. ඒ සල්ලිවල ලොකු වටිනාකමක් ඒ ගිණුම් අයිතිකාරයන්ට තිබිලත් නැහැ කියලත් ඒකෙන්ම පේනවා." යැයි ජනතා විමුක්ති පෙරමුණේ පාර්ලිමේන්තු මන්ත්‍රී විජිත හේරත් පවසයි.

මන්ත්‍රීවරයා මේ බව සඳහන් කර සිටියේ අද (26) ජවිපෙ මූලස්ථානයේ පැවති මාධ්‍ය හමුවකදී අදහස් දක්වමින් ය.

එහිදී ඔහු මෙසේද පැවසීය.

"හොරුන්ගෙත් හොරු කම්බා හොරු කතාවක් තිබෙනවා නේ. අගමැතිගේ ගිණුමෙන් සල්ලි හොරකම් කිරීමෙන් ඔප්පු වෙලා තිබෙන්නේ ඒ බව. ප්‍රශ්නය තිබෙන්නේ එවැනි ගිණුමක් ගැන හොයලා බැලීමට තරම් වත් ගණන් නොගැනීමට තරම් ඔවුන් සතුව සල්ලි තිබීමයි.”

"මුදල් ඇමතිවරයා සල්ලි අච්චු ගහලා 5000/ක් බෙදන එකෙන් අර්බුදය වැඩිවීමක් විතරයි වෙන්නේ. මේවා මුදල් ඇමතිගේ මෝඩ තීන්දු. මේවගෙන් වෙන්නේ අර්බුදය වැඩිවෙන එකයි. මෙයින් ඔප්පු වෙන්නේ මුදල් ඇමතිවරයාගේ මොළ හතේ තත්වයයි. ලංකාවේ මුදල් ඇමතිවරයා විතරයි ලෝකයේම මුදල් විශුද්ධිකරණය පිළිබඳ චෝදනා තිබෙන මුදල් ඇමතිවරයා. ඇත්තටම ගිනස් වාර්තාවක්. එවැනි කෙනෙක් රටේ මුදල් ඇමති වුණාම රට වැටෙන එක අහන්න දෙයක් නැහැ.

හොරකම්, දූෂණය, වංචා නතර කරන ක්‍රියාමාර්ග තිබිය යුතුයි. ඒවගේම නිෂ්පාදනය මත රටේ ආර්ථිකය ඉදිරියට ගෙන යන වැඩ පිළිවෙළක් ක්‍රියාත්මක කළ යුතුයි. රට හැදීමේ ප්‍රධානම ක්‍රියාමාර්ග දෙක මේවායි. වත්මන් ආණ්ඩුවලට එවැනි උවමනාවක් නැහැ."

තවත් කොවිඩ් මරණ 16ක් සෞඛ්‍ය සේවා අධ්‍යක්ෂ ජනරාල්වරයා විසින් තහවුරු කර තිබේ.

සෞඛ්‍ය අංශ පෙන්වා දෙන්නේ එම මරණ ඊයේ (25) තහවුරු කර ඇති බවය.

ඒ අනුව, මෙරටින් මේ දක්වා වාර්තා වී ඇති මුළු කොවිඩ් මරණ ගණන 15,346කි.

කෘෂිකර්ම හා ගොවිජන රක්ෂණ මණ්ඩලයේ සභාපති නීතිඥ ප්‍රේමචන්ද්‍ර ඈපා සිය තනතුරෙන් ඉල්ලා අස්වී ඇති බව වාර්තා වෙයි.

දැනගන්නට ඇති ආකාරයට ඔහු සිය ඉල්ලා අස්වීමේ ලිපිය කෘෂිකර්ම අමාත්‍ය මහින්දානන්ද අලුත්ගමගේ වෙත ‍යොමුකර ඇත.

තමන්ට තවදුරටත් එම ආයතනය තුළ හිතට එකඟව වැඩ කටයුතු කර ගැනීමට නොහැකි බැවින්‌ තමන්‌ මෙලෙස එම සභාපති ධුරයෙන්‌ ඉල්ලා අස්‌ වූ බව ඔහු පවසා ඇති බව මාධ්‍ය වාර්තා පවසයි.

මේ වන විට රාජ්‍ය ආයතන රැසක ප්‍රධානීන් ඉල්ලා අස්වීමේ ප්‍රවණතාවක් පෙන්නුම් කරන අතර ඇතමුන් ඉවත් කිරීමට ආණ්ඩුවේ ප්‍රධානීන් කටයුතු කරමින් සිටියි.

ආණ්ඩුව ආරම්භයේ රාජ්‍ය ආයතන සඳහා ප්‍රධානීන් පත්කිරීම විද්වත් කමිටුවක නිර්දේශ මත සිදුකරන බව ජනාධිපති ගෝඨාභය රාජපක්ෂ පවසා කමිටුවක් ද පත්කළ නමුත් දැන් අවුරුදු 2ක් ඉක්මයන තැන එවැනි කමිටුවක් සොයාගැනීමට හෝ නොමැති බව දේශපාලන විචාරකයන් පවසයි.

රජයේ සමාගමක් වන ලිට්‍රෝ සමාගම පසුගිය කාලයේ රජයේ විගණනයෙන් ඉවත්වීමට විශාල උත්සාහයක් දැරූ බව පාර්ලිමේන්තුවේ ‘කෝප්’ කමිටුවේ හිටපු සභාපති, පාර්ලිමේන්තු මන්ත්‍රී මහාචාර්ය චරිත හේරත් පැවසීය.

එම සමාගම රජයේ විගණනයට එරෙහිව උසාවි ගොස් නීතිඥා ගාස්තු සඳහා පමණක් එම සමාගමේ මුදලින් රුපියල් කෝටි 2 ක් වැයකර ඇති බවත් එය ඉතාම බරපතල තත්වයක් බවත් මහාචාර්ය චරිත හේරත් සඳහන් කළේය.

රජයට කොටස් සියයට 50 ක් නොව සියයට 98 ක් පමණ හිමි ව්‍යාපාර රජයේ විගණනයෙන් ඉවත්වීමට උත්සාහක කළ අවස්ථාව විශාල සංඛ්‍යාවක් ඇති බවත් ලිට්‍රෝ සමාගම 2021 වසරේ විගණකාධිපතිවරයාගේ විගණනයට එරෙහිව උසාවියෙන් වාරණ නියෝගයක් ලබාගත් බවත් මහාචාර්ය චරිත හේරත් කීය.

- lankadeepa

පාපැදි භාවිතය ප්‍රවර්ධනය කිරීම සඳහා කැබිනට් මණ්ඩල පත‍්‍රිකාවක් සකස්කර ඇතැයි පරිසර අමාත්‍ය මහින්ද අමරවීර පවසයි .

එසේම පාපැදිවලින් රාජකාරියට පැමිණෙන සේවකයන් සඳහා ප්‍රවර්ධන ප්‍රතිලාභ ලබාදීමේ නියාමන වැඩසටහනක් ද හඳුන්වා දීමට බලාපොරොත්තු වන බවත් ඔහු පවසයි.

වායු දුෂණය අඩු කිරීම කාලය අපතේ යාම වළක්වා ගැනීම මෙන්ම බෝ නොවන රෝග පාලනය කිරීම ඇතුළු තවත් කාරණා ගණනාවක් හේතුවෙන් පාපැදි භාවිතය ප්‍රවර්ධනය කිරීමට පියවර ගන්නා බවද හෙතෙම පැවසීය.

වාහන තදබද ඇති විට එක් වාහනයකින් රජයට කිලෝමීටරයක් සඳහා රුපියල් 103.56ක් අහිමි වන බව සමීක්‍ෂණයකින් හෙලිව ඇති බවත් ඔහු සදහන් කලේය.

පාපැදිය භාවිතා කිරීම මගින් සෑම කිලෝමීටර් එකටම රුපියල් 236 ඉතිරි කල හැකි බවත් එමගින් රජයට රුපියල් 339ක ලාභයක් ලැබන බවත් ඔහු පෙන්වා දෙයි.

ඉන්ධන හිඟයට පිළියමක් ?

ඉහත පුවත ලංකා සීනිව්ස් ඇතුළු ආණ්ඩුව හිතවාදී වෙබ් අඩවිය වාර්තා කර තිබිණ.

කෙසේ වුවත් මේ වන විට ආර්ථික ක්ශේත්‍රය මුලුමනින්ම අර්බුදයට පත්කර ගෙන ඇති ආණ්ඩුව දරුණු ඉන්ධන හිඟයකටද මුහුණදී සිටියි.

ඉන්ධන හිඟවී ඇත්තේ ඒවා ආනයනය කිරීමට ඩොලර් නොමැති නිසාය. මේ තත්ත්වය විසඳාගැනීම සඳහා ජාත්‍යන්තර මූල්‍ය අරමුදලේ සහය ගන්නා ලෙස විපක්ෂයේ මෙන්ම ආර්ථික විශේෂඥයන් දිගින් දිගටම පෙන්වා දුන්නත් කුමන හෝ හේතුවක් නිසා ආණ්ඩුවේ ආර්ථිකය හසුරවන ප්‍රධානීන් ඊට යොමුවන්නේ නැත.

ඒ අනුව මහින්ද අමරවීර කියන මේ පාපැදි කැබිනට් පත්‍රිකාව අන් කිසිවක් නොව ඉදිරි ඉන්ධන හිඟය සම්බන්ධයෙන් වන පූර්ව දැනුම්දිමක් බව විචාරක මතය වී තිබේ.

ලංකා විදුලි බල මණ්ඩලයේ සභාපති එම්. එම්. සී. ෆර්ඩිනැන්ඩු සිය ධුරයෙන් ඉල්ලා අස්වී තිබේ.

පෞද්ගලික හේතුවක් මත ඔහු මෙම තීරණය ගෙන ඇති බවත්, ජනාධිපතිවරයා වෙත සිය ඉල්ලා අස්වීමේ ලිපිය භාර දුන් බවත් විදුලි බල මණ්ඩලයේ මාධ්‍ය ප්‍රකාශක අතිරේක සාමාන්‍යාධිකාරී ඇන්ඩෲ නවමනි සඳහන් කළේය.

අඩක් භාවිත කළ හා සැක සහිත ගෘහස්ත ගෑස් සිලින්ඩර අදාළ සමාගම්වලට ආපසු භාර දීමේ හැකියාව ඇති බව පාරිභෝගික කටයුතු අධිකාරිය දැනුම් දෙයි .
ඒ සම්බන්ධයෙන් පාරිභෝගිකයන් දැනුවත් කිරීමේ නිවේදන හෙට(27) දින විද්‍යුත් මාධ්‍ය ඔස්සේ ප්‍රසිද්ධ කරන බවත් පාරිභෝගික කටයුතු අධිකාරිය අද (26) අභියාචනාධිකරණයට දැනුම් දුන්නේ ය.

මේ සම්බන්ධව මුද්‍රිත නිවේදන භාෂා තුනෙන්ම අද(26) දින ජාතික පුවත්පත්වල පළ කර ඇති බව ද පාරිභෝගික කටයුතු අධිකාරිය වෙනුවෙන් පෙනී සිටි රජයේ ජ්‍යෙෂ්ඨ නීතිඥ මනෝහාර ජයසිංහ මහතා අධිකරණයට දන්වා සිටියේ ය.

අඩක් භාවිත කළ සහ සැක සහිත ගෘහස්ථ L.P ගෑස් සිලින්ඩර නැවත භාර ගන්නා ලෙස අධිකරණය මීට පෙර දුන් නියෝගය අනුව පාරිභෝගික කටයුතු අධිකාරිය සහ ගෑස් සමාගම් කටයුතු කර නැති බවට විනිවිද පෙරමුණේ මහ ලේකම් නාගානන්ද කොඩිතුවක්කු මහතා පැමිණිලි කළ අවස්ථාවේදී රජයේ ජ්‍යේෂ්ඨ නීතිඥවරයා මේ බව සඳහන් කළේ ය.

අනතුරුදායක ගෘහස්ත ගෑස් සිලින්ඩර වෙළෙඳපොළට නිකුත් කිරීම සම්බන්ධයෙන් ලිට්‍රෝ සහ ලාෆ් ගෑස් සමාගම්වලට එරෙහිව ගොනු කළ රීට් පෙත්සම කැඳවූ අවස්ථාවේදී පෙත්සම්කාර කොඩිතුවක්කු මහතා මෙම පැමිණිල්ල සිදු කළේ ය.

රුවන් ප්‍රනාන්දු සහ සම්පත් විජයරත්න යන අභියාචනාධිකරණ විනිසුරු මඩුල්ල ඉදිරියේ මෙම මෝසම අද කැඳවීය.

එහිදී ලාෆ් සමාගම වෙනුවෙන් පෙනී සිටි ජනාධිපති නීතීඥ හර්ෂ අමරසේකර මහතාට මේ වන විට කොවිඩ් රෝගය වැළඳී ඇති බැවින් පෙත්සම වෙනත් දිනයක කැඳවන ලෙස ඔහුගේ කනිෂ්ඨ නීතීඥවරයා ඉල්ලා සිටියේ ය.

මෙම පෙත්සම පෙබරවාරි මස 08 වැනිදා යළි කැඳවීමට නියමිත ය.

දිවයින පුරා පාසල් රැසකින් කොවිඩ් ආසාදිත ළමුන් සහ ගුරුවරුන් පිළිබඳ වාර්තා වෙමින් ඇතැයි අධ්‍යාපන අමාත්‍යාංශය පවසයි.

එම අමාත්‍යාංශය සඳහන් කළේ, ඒ සම්බන්ධයෙන් නිරන්තර අවදානයෙන් කටයුතු කරන බවයි.

කොවිඩ් ආසාදිතයින් හඳුනා ගැනීමත්, පවතින තත්ත්වයට අනුව ක්‍රියාකිරීම සඳහා අවශ්‍ය සෞඛ්‍ය උපදෙස් සෞඛ්‍ය අමාත්‍යාංශය මගින් ලබා ගැනීමට අපේක්ෂා කරන බවත් අධ්‍යාපන අමාත්‍යාංශය පවසයි.

නියෝජ්‍ය සෞඛ්‍ය සේවා අධ්‍යක්ෂ, වෛද්‍ය ජී.විජේසුරිය = පැවසුවේ මේ වනවිට රෝහල්ගත වන ආසාදිත ළමුන්ගේ සංඛ්‍යාවද ඉහළ යමින් ඇති බවයි.

නැවතත් කොවිඩ් රැල්ලක් ඇතිවෙයිද?

නියෝජ්‍ය සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය හේමන්ත හේරත්

මේ ඔමික්‍රෝන් රැල්ල ලෝකය පුරා බොහෝ රටවල් මේ වනවිට අත් දැකලා ඉවරයි. ලංකාවේ බරපතල ලෙස මේක තවම අපි දුටුවේ නැතිකම පමණයි තියෙන්නේ. අපි නැවතත් මතක් කරන්න ඕනා මීට කලින් ආපු වෛරස් ප්‍රභේදවලත් රැල්ල ලංකාවේ මතු වුණේ අනිත් රටවල ඇතිවෙලා යම් කාලයකට පස්සේ . ඒ නිසා අපිට තාම කියන්න කල් වැඩියි අපේ රටේ රැල්ලක් එන්නේ නෑ කියන වචනේ. අද වෙන කොට බොහෝ වෙලාවට අපිට විශ්වාස කරන්න පුළුවන් මේ මොහොතේ අපේ රෝගීන්ගෙන් බහුතරය අඩුම ගානේ 50 % ඉක්මවලා හෝ මේ කොවිඩ් ඔමික්‍රොන් ප්‍රභේදය වන්නට ඉඩ තියනවා. නමුත් වැදගත් වන්නේ ඒ ආසන්නම ප්‍රතිශතයක් ඩෙල්ටා රෝගීන් ඉන්න බවත් මතක තබා ගත යුතුයි..

ඔමික්‍රෝන් ආසාදිතයින් හඳුනා ගැනීම මන්දගාමී ඇයි?

නියෝජ්‍ය සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය හේමන්ත හේරත්

දවසකට 8000 ඉක්මවලා PCR පරීක්ෂණ කරනවා. එතකොට මේ 8000 ම අපිට ජාන විශ්ලේෂණය සඳහා යොමු කරන්න බෑ. ඒ වගේම තමා පොසිටිව් වන රෝගීන් සංඛ්‍යාව දැන් අටසිය ගාණක් වනවා. මේ 800 පමණක්වත් ජාන විශ්ලේෂණයට යොමු කරන්න බෑ. අපි කරන්නේ ඒ රෝගීන්ගෙන් නියැදියක් පමණක් අරගන ජාන විශ්ලේෂණයට විටින් විට ලක් කිරීමෙන් අපි බලනවා ඉන්න රෝගීන්ගෙන් කොයි තරම් ප්‍රතිශතයක් ඔමික්‍රොන් රෝගීන්ද කොයි තරම් ප්‍රතිශතයක් ඩෙල්ටා රෝගීන් ද කියලා.

කොවිඩ් ආසාදිතයින් හා ප්‍රතිකාර මධ්‍යස්ථානවල තත්ත්වය කුමක්ද?

මේ වනවිට ප්‍රතිකාර මධ්‍යස්ථානවල ඇදන් 5758 ක් හා දැඩි සත්කාර ඒකකවල ඇදන් 62 ක් භාවිතයට ගැනෙන බව නියෝජ්‍ය සෞඛ්‍ය අධ්‍යක්ෂ ජනරාල් විශේෂඥ වෛද්‍ය හේමන්ත හේරත් = පවසයි.

news1st

මල්වාන ප්‍රදේශයේ පිහිටි අක්කර 16ක ඉඩමක ඇති විශාල ප්‍රමාණයේ නිවස ඉදි කිරීම සඳහා මුදල් ලබා දුන්නේ බැසිල් රාජපක්ෂ විසින් බවත් එම නිවස ඉදි කිරීම සඳහා මුදල් ලබා දුන්නේ තමන් විසින් යැයි මීට පෙර දේශීය ආදායම් දෙපාර්තමේන්තුවට ප්‍රකාශ කරනු ලැබූවේ තමන්ට එල්ල වූ බලපෑම් මත බවත් වරලත් ගෘහ නිර්මාණ ශිල්පී මුදිත ජයකොඩි අද (25) අධිකරණයේදී සඳහන් කර තිබේ.

ඔහු මේ බව කියා සිටියේ, එම නිවස ඉදිකර රජයේ මුදල් අවභාවිතා කිරීම සම්බන්ධයෙන් වත්මන් මුදල් අමාත්‍ය බැසිල් රාජපක්ෂට චෝදනා ගොනු කරමින් පවරා ඇති නඩුවට මහාධිකරණය හමුවේ සාක්ෂි දෙමිනි.

නිවසට අදාළව ආදායම් බදු ගෙව්වේ තම සමාගමෙන් බව පවසා ඇති ඔහු එම නිවස ඉදිකිරීමට අනුමැතිය ගැනීමට අයදුම්කරු ලෙස ඉදිරිපත් වී එය ඉදිරිපත් කළේ රාජපක්ෂ පදනම කාර්යාලය විසින් බවද සඳහන් කර ඇත.

නඩුව මාර්තු මස 11 වන දින තෙක් කල් දමන ලද අතර එදිනට අධිකරණයේ පෙනී සිටින ලෙස බැසිල් රාජපක්‍ෂ, තිරුකුමාර් නඩේෂන් යන මහත්වරුනට නියෝග කර තිබේ.

ඉදිරි දින 02ක කාලයේ විදුලි කප්පාදුවකට යොමු නොවනු ඇති බව සිතීමට හැකිව තිබේ.

ඒ ජනවාරි 27 දක්වා විදුලිය විසන්ධි කිරීමේ අවශ්‍යතාවයක් නොමැති බව මහජන උපයෝගීතා කොමිෂන් සභාව පවසා ඇති නිසාය.

ප්‍රමාණවත් ඉන්ධන තොග පවතින බැවින් විදුලි කප්පාදුවක් අවශ්‍ය නොවන බවත් එම කොමිසම පෙන්වාදී ඇත.

කෙසේ වුවත් ඊට පසුව තත්ත්වය සළකා බලා තීරණයක් ගනු ඇති බවද මහජන උපයෝගිතා කොමිසම කීය.

ශ්‍රී ලංකාව තුළ දැනට වාර්තා වන කොවිඩ් රෝගීන් අතරින් ඔමික්‍රොන් ප්‍රභේදය 95%ක ප්‍රමාණයකට පැතිර ගොස් ඇතැයි සෞඛ්‍ය අංශ පවසයි.

විද්‍යුත් නාලිකාවක් සමග සාකච්ඡාවකට එක්වෙමින් සෞඛ්‍ය ප්‍රවර්ධන කාර්යාංශයේ අධ්‍යක්ෂ, වෛද්‍ය රංජිත් බටුවන්තුඩාව මේ බව සඳහන් කර ඇත.

එහිදී ඔහු පවසා සිටියේ, ලංකාව තුළ ඔමික්‍රෝන් ප්‍රභේදය පැතිර යෑමට මාස දෙකකට වැඩි කාලයක් ගතව ඇති බවය.

"ශ්‍රී ලංකාවේ ප්‍රථම රෝගියා වාර්තා වෙලා, දැනට මාස දෙකකට ආසන්න කාලයක් ගතවෙලා තියෙනවා. දැන් තමයි දත්තයන්වලින් අපිට පේන්නේ ලංකාවේත් ඔමික්‍රෝන් ප්‍රභේදය 95%කට එහායින් පැතිරිලා කියලා. මේකෙන් කියවෙන්නේ යම් අවස්ථාවක gene sequence ටෙස්ට් කරන සාම්පල සංඛාවෙන් සියයට 95කට එහා ඔමික්‍රෝන් ප්‍රභේදය ලංකාවෙන් දැන් වාර්තා වෙනවා."

ප්‍රශ්නය - ශ්‍රී ජයවර්ධනපුර විතරයි මේක වාර්තාවක් ලෙස එළිදැක්වුයේ. එතැනින් එහාට අපිට කියන්න පුළුවන් ද ඔවුන්ගේ වාර්තා පමණක් පදනම් කරගෙන ලංකාවේම ප්‍රබලම ප්‍රභේදය වෙලා තියෙන්නේ ඔමික්‍රෝන් කියලා.

"ශ්‍රී ජයවර්ධනපුර විශ්වවිද්‍යාලය තමා දිගටම ඒ කටයුතු කළේ. මෑතක ඉඳලා සෞඛ්‍ය අමාත්‍යාංශයේ වෛද්‍ය පර්යේෂණ ආයතනයෙනුත් ඒ වාර්තාව ලැබෙනවා. gene sequence ඔවුන් දැන් අවස්ථා 4කදී වාර්තා ඉදිරිපත් කරලා තියෙනවා. ඔවුන්ගේ ඊයේ MRI රිපෝට් එකක් අවුට් වුණා. ඒකෙනුත් කියවෙන්නේ, 96%කට වැඩිය ඔමික්‍රෝන් ප්‍රභේදය තමා. මම හිතන්නේ ජයවර්ධනපුර හා MRI ලැබ් එකෙන් එකම විදියේ දත්ත තමා තියෙන්නේ. ලංකාවේ රෝගීන්ගෙන් පැතිරෙන වෛරසයෙන් 95%කට එහා ප්‍රමාණය දැනට වාර්තා වෙන්නේ ඔමික්‍රෝන් කියලා."