පුවත්

සතොස අද (09) සිට ආනයනික සුදු කැකුළු, නාඩු, රතු පරිප්පු, සුදු සීනි, හාල්මැස්සන් යන අත්‍යවශ්‍ය භාණ්ඩ 05ක සහ තවත් භාණ්ඩ කිහිපයක මිල ගණන් පහළ දමා තිබේ.

ඒ අනුව,
සුදු කැකුළු කිලෝවක් – 195 සිට 185 දක්වා
සුදු නාඩු කිලෝවක් – 198 සිට 194 දක්වා

රතු පරිප්පු කිලෝවක් – 460 සිට 429 දක්වා
සුදු සීනි කිලෝවක් – 298 සිට 279 දක්වා
හාල්මැස්සන් කිලෝවක් 1375 සිට 1350 දක්වා මිල ගණන් පහළ දමා තිබේ.

මීට අමතරව සුදුළුෑණු කිලෝවක් – 750 සිට 595 දක්වා සහ වටානා කිලෝවක් – 375 සිට 315 දක්වා මිල ගණන් පහත දැමූ බව සතොස සභාපති පසද යාපා අබේවර්ධන පවසයි.

එක්සත් රාජධානියේ දීර්ඝතම කාලයක් සේවය කළ 96 හැවිරිදි දෙවන එලිසබෙත් රැජින වසර 70 ක් කිරීටය හොබවා බැල්මොරල්හිදී මිය ගියාය.

එළිසබෙත් රැජිණගේ අභාවය වෙනුවෙන් සැප්තැම්බර් 19 මෙරට ශෝක දිනයක් ලෙස ප්‍රකාශයට පත් කර තිබේ.

ජනාධිපති මාධ්‍ය අංශය පැවසුවේ, ජනාධිපතිවරයා විසින් රාජ්‍ය පරිපාලන සහ ස්වදේශ කටයුතු අමාත්‍යාංශයට ඊට අදාළ උපදෙස් ලබා දී ඇති බවයි.

ඒ අනුව ලබන 19 වැනිදා දක්වා ජාතික කොඩිය අඩකුඹු කරන ලෙස ද උපදෙස් දී ලබා දී ඇත.

බ්‍රහස්පතින්දා උදෑසන ඇගේ සෞඛ්‍යය තත්ත්වය ගැන විමසිලිමත් වීමත් සමග ඇගේ පවුලේ අය ස්කොට්ලන්ත වතුයායේ වූ මාලිගයෙහි රැස් වූහ.

ඇයගේ අභාවයත් සමඟ ඇයගේ වැඩිමහල් පුත් චාල්ස්, හිටපු වේල්ස් කුමරු, ශෝකයට පත් රටේ රාජ්‍ය නායකයා ලෙස සහ පොදුරාජ්‍ය මණ්ඩලීය රාජ්‍යයන් 14 ක නව රජු ලෙස කටයුතු කරනු ඇත.

ජනාධිපති රනිල් වික්‍රමසිංහ රට ගොඩනැගීමට ගෙන යන වැඩපිළිවෙළට සහාය දැක්වීම සඳහා වැටුප් සහ වරප්‍රසාද අවශ්‍ය නොවන බව අද (08) දිවරුම් දුන් රාජ්‍ය අමාත්‍යවරු පවසති.

රටේ ආර්ථික ස්ථාවරභාවය ඇති කර ගැනීම මේ මොහොතේ ප්‍රමුඛතම කාර්යභාරය වී ඇති බවත් ඒ සඳහා රාජ්‍ය අමාත්‍යවරුන් ලෙස ආණ්ඩුවේ වගකීම් දරමින් රේඛීය අමාත්‍යාංශ වෙත උපරිම සහායෝගයක් දැක්වීම තම අපේක්ෂාව බවත් ඔවුන් පවසයි.

මෙහිදී අදහස් දැක්වූ,,

ප්‍රවාහන රාජ්‍ය අමාත්‍ය ලසන්ත අලගියවන්න :

රට ගොඩනැගීම වෙනුවෙන් ජනාධිපති රනිල් වික්‍රමසිංහ මහතා කළ යෝජනව අනුව රාජ්‍ය වියදම් අඩු කිරීම වෙනුවෙන් අප සියළු රාජ්‍ය ඇමැතිවරුන් වැටුප් ලබා නොගැනීමට තීරණය කළා. ජනතාව මේ වේලාවේ සිටින තත්ත්වය අප හොඳින් තේරුම් ගෙන තිබෙනවා. ජනතාව මේ පීඩාවෙන් ගොඩගැනීමට අවශ්‍ය කටයුතු අප සිදු කරනවා. කැබිනට් ඇමැතිවරුන් පවා අද වැටුප් ලබා නොගෙනයි කටයුතු කරමින් ඉන්නේ.‍ එක් කැබිනට් ඇමැතිවරයෙක්ට විශාල ක්ෂේත්‍රයක් ආවරණය කරන්න සිදුවෙනවා. අපි මේ තනතුරු පවා ගත්තේ ඔවුන්ට සහායෝගය දක්වමින් ජනතාවට කඩිනම් සහන ලබාදීමටයි.

 ජනමාධ්‍ය රාජ්‍ය අමාත්‍ය ශාන්ත බණ්ඩාර :

මේ වෙලාවෙදි ජනාධිපතිවරයාගෙත්, ඇගමැතිවරයාගෙත් බලාපොරොත්තුව රට ගොඩනැගීමයි. වර්තමානයේ ආර්ථික වශයෙන් වැටී තිබෙන රට ගොඩනැගීම අප සියලුම දෙනාටම වගකීමක් තිබෙනවා. අමාත්‍යාංශය, විෂය පථය කුමක්ද කියන එක පසෙකලා තමන්ට ලැබී තිබෙන වගකීම නිසියාකාරව ඉටු කළ යුතුයි. කවුරුන් හෝ හිතන්න පුළුවන් මේ හරහා විශාල වැය බරක් දරන්න වෙයි කියලා. ඒ නිසා අපිත් යම්කිසි සාධාරණයක් කරන්න ඕන. අපි ජනාධිපතිතුමාට පැහැදිලිව ප්‍රකාශ කළා ඇමැති වැටුප නොගෙන මන්ත්‍රී වැටුප පමණක් ලබාගෙන ඉදිරියට යන්න. මේ වෙලාවේ අපේ පැත්තෙන් කළ හැකි යුතුකමක්ම රට වෙනුවෙන් කළ යුතුව තිබෙනවා. ජනාධිපතිවරයා කටයුතු කළේ ආණ්ඩුක්‍රම ව්‍යවස්ථාවට අනුකූලවයි. ආණ්ඩුක්‍රම ව්‍යවස්ථාව උල්ලංඝණය කරමින් කිසිදු කටයුත්තක් කරලා නොමැති බව විශේෂයෙන්ම සදහන් කළ යුතුයි.

ආයෝජකයන් පැමිණීමට, ණය ආධාර ලබා ගැනීමට ශක්තිමත් ආණ්ඩුවක් බලාපොරොත්තු වෙනවා. ඊට දේශපාලන ස්ථාවරත්වයක් අවශ්‍යයි. කැබිනට් මණ්ඩලයක්, රාජ්‍ය ඇමැතිවරු ඇතුළු මන්ත්‍රී කණ්ඩායමක් අවශ්‍යයි. ආණ්ඩුවේ ශක්තිමත්භාවය රදා පවතින්නේ ඒ අනුවයි. මේ ගත් තීරණය නිසා අයිඑම්එෆ් වැඩසටහනටත් යම් වාසිදායක තත්ත්වයක් තිබෙනවා. යම් ඉලක්කයක් අනුව සියලුම දෙනා කැපවීමෙන් කටයුතු කරන අතරම ජනාධිපතිවරයාට අපේ ප්‍රශංසාවත් මේ වෙලාවේ හිමි වෙනවා.

 ප්‍රාථමික කර්මාන්ත රාජ්‍ය අමාත්‍ය චාමර සම්පත් දසනායක :

වරප්‍රසාද තිබුණත් නැතත් පසුගිය කාලයේ වැඩ කළා. ඒ වගේම මේ රාජ්‍ය අමාත්‍යාංශය ආභරණයක් කර කරගන්න වුවමනාවක් නැහැ. එදත් වැඩ කළා. අදත් වැඩ කරනවා. එනිසා වරප්‍රසාද ගන්න, වාහන පසුපස, ඉන්ධන පසුපස දුවන්නත් නෙමෙයි මේ අමාත්‍යාංශය භාර ගත්තේ. අපි ජනතාවට සේවයක් කරන්න ග්‍රාමීය අමාත්‍යාංශය භාර ගත්තා. මේක ගමේ ජනතාවත් එක්ක වැඩ කරන්න පුළුවන් අමාත්‍යාංශයක්. නව ධූරය හරහා ජනතාවට උපරිම සේවයක් කරන්න බලාපොරොත්තු වෙනවා.

විදේශ රැකියා ප්‍රවර්ධන රාජ්‍ය අමාත්‍ය ජගත් පුෂ්පකුමාර :

පසුගිය කාලයේ රට දේශපාලන වශයෙන් අර්බුදයකට ලක්ව තිබුණා. ඒ වෙලාවේ මේ රට කවුරුත් භාර ගත්තෙ නැහැ. එහිදී වත්මන් ජනාධිපති රනිල් වික්‍රමසිංහ මහතා එදා අගමැති ධූරය භාර ගත්තා. පසුව නැවත ජනාධිපති ධූරයත් භාර ගත්තා. පාර්ලිමේන්තුව තුළින් අපේ සහාය ශක්තිය එතුමාට ලබා දුන්නා. ජනාධිපතිවරයාගේ සහායට ඉන්න රාජ්‍ය ඇමැතිවරුන් පත් කළා. රනිල් වික්‍රමසිංහ මහතා යටතේ වැඩ කරන්න අපට අවකාශය ලබා දී තිබෙනවා. එතුමාගේ දෑත් ශක්තිමත් කරන්න මේ තනතුරු භාර ගත්තා. පාර්ලිමේන්තුවේ බෙදී ඉදලා තව තවත් රට වට්ටන්න බැහැ. පාර්ලිමේන්තුවට අපිව එවලා තියෙන්නෙ රට කඩා වට්ටවන්න නෙමෙයි. වැඩ කරන්න එවපු අය බේද වෙලා, සන්ධාන ගහලා වැඩක් නැහැ. සන්ධාන අවශ්‍ය මැතිවරණයකදි පමණයි.

පාර්ලිමේන්තුව ශක්තිමත් කරන්න අවශ්‍ය බව අපි දිගින් දිගටම කිව්වා. අමාත්‍යාංශය ලොකු ද පොඩි ද කියලා වැඩක් නැහැ. දෙන දෙයින් වැඩක් කළ යුතුයි. මට ලබාදුන් වගකීම විනිවිදභාවයකින් යුක්තව වැඩ කරනවා.

නාගරික සංවර්ධන හා නිවාස රාජ්‍ය අමාත්‍ය අරුන්දික ප්‍රනාන්දු :

ජනාධිපතිවරයාගේ තීන්දුව පරිදි රාජ්‍ය ඇමැතිවරු කිහිප දෙනෙක් මේ දිවුරුම් දුන්නේ සාකච්ඡා වට කිහිපයකින් පසුවයි. එතුමා ජනාධිපති කළේ අපි විසින්. අපේ ආශිර්වාදය ඇතුවයි එතුමා ජනාධිපති ධූරය භාර ගත්තේ. එහිදී අපි කොන්දේසි විරහිතව සහයෝගය දිය යුතුව තිබෙනවා. රාජ්‍ය ඇමැතිවරු වශයෙන් අපි විශේෂ වරප්‍රසාද ලබා ගන්නේ නැතිව මන්ත්‍රී වැටුප පමණක් ගන්න අප තීන්දු තීරණ අරන් තිබෙනවා. ඒක රටට කරන සහනයක්. අපි කිහිප දෙනෙක් නෙමෙයි අපි සියලුම දෙනාම ඒ තීන්දුව අරන් තිබෙනවා. වැටී තිබෙන තත්ත්වයෙන් රට බේරා ගැනීමට ජනාධිපතිවරයා ගන්නා උත්සාහයට අපි සියයට සියයක් කොන්දේසි විරහිතව සහාය දෙනවා. වරප්‍රසාද අරගෙන කැරලි ගහන්න අපට අවශ්‍ය නැහැ. අනෙක් මන්ත්‍රීවරුත් අපට සහායෝගය දෙයි කියලා විශ්වාස කරනවා.

ස්වදේශ කටයුතු රාජ්‍ය අමාත්‍ය අශෝක ප්‍රියන්ත :

මේ මොහොතේ රටක් විදිහට එකතු විය යුතු කාලය එළැඹ තිබෙනවා. ඒ කාලයේදී ස්වදේශ කටයුතු අමාත්‍යාංශය විදිහට රටේ සියලු දිසාපති, ප්‍රාදේශීය කාර්යාල එකතු කරලා රාජ්‍ය යාන්ත්‍රණය ශක්තිමත් කරලා රට ගොඩනගන්න අවශ්‍යයි. වරප්‍රසාද මත නෙමෙයි මේ තීන්දු තීරණ ගත්තෙ.

ජනාධිපතිතුමාටත් අගමැතිතුමාටත් ශක්තියක් ලැබුණොත් තමයි රටට ජනතාවට සේවයක් කරන්න පුළුවන්. මේ තිබෙන තත්ත්වයෙන් රට ගොඩනගන වැඩපිළිවෙළට ස්වදේශ කටයුතු අමාත්‍යාංශය විදිහට කරන්න පුළුවන් උපරිම දේ කරනවා.

විදුලිබල හා බලශක්ති රාජ්‍ය අමාත්‍ය ඉන්දික අනුරුද්ධ :

අපි මේ වෙලාවේ රට පවතින තත්ත්වය අනුව ආර්ථික අරගලයට මුහුණ දෙන්න සිදු වෙලා තිබෙනවා. ඒ අරගලය ජයග්‍රහණය කරන්න, ජනතාව දිනවන්න ඇප කැප වෙලා කටයුතු කරනවා. මේ තනතුරින් කිසිම වැටුපක් වරප්‍රසාදයක් ගන්නේ නැහැ. නමුත් රට දුවන්න, රාජ්‍යය පවතින්න, රාජ්‍යෙය් ආරක්ෂාව අවශ්‍යයි. ඒ වෙනුවෙන් අප සියලුම දෙනාම ඇප කැප වෙනවා. රටේ ආර්ථික අර්බුදය ජයග්‍රහණය කරන්න සියලුම දෙනාම එකතු වෙනවා. සියලුම දෙනාගෙන් ආයාචනය කරනවා පක්ෂ පාට බේදයෙන් තොරව රට ගොඩනගන්න එකතු වෙන්න කියලා.

මුදල් රාජ්‍ය අමාත්‍ය ශෙහාන් සේමසිංහ :

රාජ්‍ය ඇමැතිවරුන් හැටියට අපි තීන්දු කළා වැටුප් නොගන සේවාව කරන්න. අපි සියලුදෙනා ඒ වෙනුවෙන් කටයුතු කරනවා. රටේ ඇතිව තිබෙන දුෂ්කරතාව කඩිනමින් යථා තත්ත්වය පත් කිරිමට අප කැපවීමෙන් කටයුතු කරනවා.

සමාජ ආරක්ෂණ දායකත්ව බදු පනත් කෙටුම්පත වැඩි ඡන්ද 81 කින් අද (08) පාර්ලිමේන්තුවේ දී සම්මත විය.

පනතට පක්ෂව ඡන්ද 91 ක් ලැබුණු අතර ඊට විරුද්ධව ලැබුණේ ඡන්ද 10 ක් පමණි.

සමගි ජන බලවේගය ,ජාතික ජන බලවේගය, ආණ්ඩුවේ සිට ස්වාධීන වූ ඩලස් අලහප්පෙරුම ප්‍රමුඛ විපක්ෂ කණ්ඩායම සහ විමල් වීරවංශ ප්‍රමුඛ ස්වාධීන පක්ෂ 7 කණ්ඩායමේ මන්ත්‍රීවරුන් පනතට විරුද්ධව ඡන්දය ප්‍රකාශ කර ඇත .

මෙහිදී විශේෂ සිදුවීමක් ලෙස වාර්තා වන්නේ ඡන්දය විමසන අවස්ථාවේදී පක්ෂ විපක්ෂ මන්ත්‍රීවරුන් 123 දෙනකු සභාවේ නොසිටීම ය.

නිෂ්පාදනය බෙදාහැරීම සහ අලෙවිය මත බදු අය කිරීමට අදාළ විධිවිධාන මෙම බදු පනත් කෙටුම්පතට ඇතුළත් වේ.

පනත් කෙටුම්පත පිළිබඳ විවාදය අද උදේ 11.00 සිට සවස 5 දක්වා පැවැත්විණ. විවාදයේදී ආණ්ඩු පක්ෂයේ සහ විපක්ෂයේ මන්ත්‍රීවරු 20 කට වැඩි පිරිසක් අදහස් දැක්වූහ.

පනත් කෙටුම්පතට ඡන්ද විමසීමක් අවශ්‍ය බව ජාතික ජන බලවේගය පක්ෂයේ මන්ත්‍රී අනුර කුමාර දිසානායක කතානායකවරයාගෙන් ඉල්ලීමක් කළේය. ඡන්ද විමසීම පැවැත්වුණේ ඒ අනුවය.

ශ්‍රී ලංකාවේ ඇති වී තිබෙන ආර්ථික අර්බුදය පිළිබඳ සාකච්ඡා කිරීමට සහ දෙරට අතර සංවර්ධන හවුල්කාරීත්වය වර්ධනය කර ගැනීමට ජාත්‍යන්තර සංවර්ධනය සඳහා වූ එක්සත් ජනපද නියෝජිත ආයතනයේ ප්‍රධානී සමන්තා පවර් ශ්‍රී ලංකාවේ සංචාරයක නිරතවීමට නියමිතය.

ලංකාවේ ඇමෙරිකානු තානාපති කාර්යාලය මේ බව තහවුරු කර ඇත .

ඊට අනුව දෙදින නිල සංචාරයක් සඳහා ලබන (10) සමන්තා පවර් ශ්‍රී ලංකාවට පැමිණීමට නියමිතව ඇත.

මීට පෙර සමන්තා පවර් ශ්‍රී ලංකාවේ සංචාරයක නිරතවූ අතර ඒ දිවංගත අමාත්‍ය මංගල සමරවීර ගේ දේශපාලන දිවියට වසර 30ක් සැමරිම නිමිත්තෙන් පැවති උත්සවය වෙනුවෙනි.

අරගලය ප්‍රචණ්ඩකාරී බවට පත් කළේ පෙරටුගාමී සමාජවාදී පක්ෂයේ යයි ජනාධිපති රනිල් වික්‍රමසිංහ විසින් එක්සත් ජාතික පක්ෂයේ 76 වැනි සංවත්සරය අමතමින් සිදුකළ ප්‍රකාශය පිළිකුල් සහගතව ප්‍රතික්ෂේප කරන බව පෙරටුගාමී සමාජවාදී පක්ෂය සඳහන් කරයි.

එම පක්‍ෂ ප‍්‍රධාන ලේකම් කුමාර ගුණරත්න සඳහන් කරන්නේ ජනාධිපතිවරයා ගේ එම ප්‍රකාශය සම්බන්ධයෙන් නීතිමය ක්‍රියාමාර්ග ගැනීමට සූදානම් බවයි.

පක්ෂ මූලස්ථානයේ පැවැති මාධ්‍ය හමුවකදී ඔහු මේ බව සඳහන් කළ අතර ප‍්‍රචණ්ඩත්වය මුවාවෙන් තනතුරු ලබාගත් පුද්ගලයා ම සාමකාමී අරගලයට සම්බන්ධ වූ පිරිසට බොරු චෝදනා කිරීම විහිළු සහගත යැයි ද පැවසීය.

පුද්ගලික විවේචන කොතරම් තිබුණද මේ මොහොතේ රට ගොඩ ගැනීමට සුදුසුම පුද්ගලයා රනිල් වික්‍රමසිංහ බව රාජ්‍ය අමාත්‍ය අනුරාධ ජයරත්න පවසයි.

මාධ්‍ය හමුවකදී අදහස් දක්වමින් ඔහු මේ බව පැවසු අතර පාර්ලිමේන්තුවේ සිටින 225 දෙනාගෙන් ජනාධිපති ලෙස පත් කළ යුතු සුදුසුම පුද්ගලයා ඊට පත්කර ඇති බවද සඳහන් කළේය.

මීට මාස කිහිපයකට කලින් රට තුළ පැවැති තත්ත්වය සමනය කිරීමට මේ වන විට හැකිව තිබෙන බවද පැවසූ රාජ්‍ය අමාත්‍යවරයා සියයට සියයක්ම නැති වුවද යම් ප්‍රමාණයක ගැටළුව විසඳා ඇතැයිද සඳහන් කළේය.

ජ්‍යෙෂ්ඨ මාධ්‍යවේදී දිනිත් චින්තක කරුණාරත්න රජයේ ප්‍රවෘත්ති අධ්‍යක්ෂ ජනරාල්වරයා ලෙස රජයේ ප්‍රවෘත්ති දෙපාර්තමේන්තුවේදී අද (08) වැඩභාර ගනු ලැබීය.

ජනාධිපති රනිල් වික්‍රමසිංහගේ නිර්දේශය මත අමාත්‍ය මණ්ඩල අනුමැතියට යටත්ව ජනමාධ්‍ය අමාත්‍ය බන්දුල ගුණවර්ධන විසින් මෙම පත් කිරීම සිදුකර තිබෙි.

කොළඹ ආනන්ද විද්‍යාලයේ ආදි සිසුවකු වන දිනිත් චින්තක කරුණාරත්න ජීව විද්‍යා උපාධිධාරියෙකි.

විජය පුවත්පත් සමාගමේ ලංකාදීප පුවත්පතේ වාර්තාකරුවකු ලෙස වෘත්තීය දිවිය ආරම්භ කළ දිනිත් චින්තක කරුණාරත්න, ජනමාධ්‍ය ක්ෂේත්‍රයේ දශක තුනකට වැඩි කාලයක් පුවත්පත් සම කර්තෘ ධුරය ඇතුළු වගකීම් සහගත තනතුරු රැසක හසල අත්දැකීම් ලබා ඇති මාධ්‍යවේදියෙකි.

එමෙන්ම ඇමරිකා එක්සත් ජනපදයේ කැලිෆෝනියා හි ශාන්ත මොනිකා විද්‍යායතනයේ සන්නිවේදනය පිළිබද පශ්චාත් උපාධි ඩිප්ලෝමා ධාරියෙකු ද වන ඔහු ජනමාධ්‍ය ක්ෂේත්‍රය සම්බන්ධව දේශීය මෙන්ම විදේශීයව ද පුළුල් පරිචයක් ලබා ඇත.

නව ප්‍රවෘත්ති අධ්‍යක්ෂ ජනරාල්වරයා ධූරයෙහි වැඩ බාර ගැනීමේ අවස්ථාවට ජනමාධ්‍ය අමාත්‍යාංශයේ ලේකම් අනූෂ පැල්පිට ඇතුළු ජනමාධ්‍ය අමාත්‍යංශයේ සහ රජයේ ප්‍රවෘත්ති දෙපාර්තමේන්තුවේ නිලධාරීහුද ජනමාධ්‍ය ක්ෂේත්‍රයේ ප්‍රවීණයෝ ද එක්ව සිටියහ.

පොදු ජන පෙරමුණු පක්ෂ මූලස්ථානයේ පැවැති ප්‍රවෘත්ති සාකච්ඡාවකදී අධිකරණයට අපහාස වන අයුරින් ප්‍රකාශයක් කළැයි කියන සිදුවීම සම්බන්ධයෙන් කරුණු ඉදිරිපත් කිරීම සඳහා ලබන 13 වැනිදා අධිකරණයේ පෙනී සිටින ලෙස රාජ්‍ය අමාත්‍ය සනත් නිශාන්තට අභියාචනාධිකරණය අද (08) නොතීසි නිකුත් කර ඇත.

ඒ අනුව මෙම පෙත්සම් දෙක ලබන 13 වැනිදා යළි කැඳවීමට ද අභියාචනාධිකරණය නියෝග කළේය.

නිශ්ශංක බන්දුල කරුණාරත්න සහ ආර්. ගුරුසිංහ යන අභියාචනාධිකරණ විනිසුරු මඩුල්ල හමුවේ මෙම පෙත්සම් සැලකිල්ලට ගැනිණ.

නිතීඥ විජිත කුමාර සහ නීතිඥ ප්‍රියලාල් සිරිසේන විසින් මෙම පෙත්සම් දෙක අභියාචනාධිකරණය හමුවේ ගොනු කරනු ලැබ ඇත .

පෙත්සම්කරුවන් වෙනුවෙන් ජනාධිපති නීතිඥවරුන් වන උපුල් ජයසූරිය, සාලිය පීරිස් අධිකරණය හමුවේ පෙනී සිටියහ.

රාජ්‍ය අමාත්‍ය සනත් නිශාන්ත මහතා වගඋත්තරකරු ලෙස නම් කරමින් ඉදිරිපත් කර ඇති මෙම පෙත්සම්වලින් පෙත්සම්කරුවන් අභියාචනාධිකරණයෙන් ඉල්ලා ඇත්තේ මෙම සිද්ධිය සම්බන්ධයෙන් විමර්ශනයක් ආරම්භ කිරීමට නියෝගයක් ලබා දෙන ලෙසය.

ඉදිරියේදී ශ්‍රී ලංකා පොදුජන පෙරමුණේ විශාල පිරිසක් එක්සත් ජාතික පක්ෂයට එක්වීමට නියමිත බව පාර්ලිමේන්තු මන්ත්‍රී වාසුදේව නානානයක්කාර පවසයි.

සමගි ජනබලවේගයේ පිරිසක්ද එජාපයට එක්වෙනු ඇති බවත් ඉන් පසු සජිත් ප්‍රේමදාස තනි වීම හෝ යථාර්ථයට මුහුණ දීමට සිදුවෙනු ඇතැයිද ඔහු සදහන් කලේය.

එක්සත් ජාතික පක්ෂයේ ප්‍රධානත්වයෙන් දක්ෂිණාංශික කණ්ඩායමක් හා ජනතා විමුක්ති පෙරමුණ, උත්තර ලංකා සභාගය, ඩලස් අලහප්පෙරුම ඇතුළු ස්වාධීන පිරිස සහිත "නිදහස" කණ්ඩායම ලෙස ඉදිරියේදී කණ්ඩායම් දෙකක් බිහිවෙනු ඇතැයිද ඔහු තව දුරටත් පවසා ඇත.

රාජ්‍ය අමාත්‍යවරුන් ලෙස 37 දෙනෙකු අද (08) ජනාධිපති රනිල් වික්‍රමසිංහ ඉදිරියේ දිවුරුම් දෙනු ලැබීය.

ජනාධිපති ලේකම් කාර්යාලයේ දී මෙම දිවුරුම්දීම පැවති අතර එහිදී දිවුරුම්දුන් රාජ්‍ය අමාත්‍යවරුන් මෙසේය.

ජගත් පුෂ්ප කුමාර – විදේශ රැකියා ප්‍රවර්ධන
රංජිත් සියඹලාපිටිය – මුදල්
ලසන්ත අලගියවන්න – ප්‍රවාහන
දිලුම් අමුණුගම – ආයෝජන හා ප්‍රවර්ධන
කනක හේරත් – තාක්ෂණ
ජානක වක්කුඹුර – පළාත් සභා හා පළාත් පාලන
ෂෙහාන් සේමසිංහ – මුදල්
මොහාන් ප්‍රියදර්ශන ද සිල්වා – කෘෂිකර්ම රාජ්‍ය අමාත්‍ය
තේනුක විදානගමගේ – ආර්ථික සංවර්ධන හා නිවාස
ප්‍රමිත බණ්ඩාර තෙන්නකෝන් – ආරක්‍ෂක
රෝහණ දිසානායක – ක්‍රීඩා හා යෞවන කටයුතු
අරුන්දික ප්‍රනාන්දු – නාගරික සංවර්ධන
විජිත බේරුවල – පිරිවෙන් අධ්‍යාපන
ලොහාන් රත්වත්තේ – වැවිලි කර්මාන්ත
තාරක බාලසූරිය – විදේශ කටයුතු
ඉන්දික අනුරුද්ද – විදුලි බල හා බලශක්ති
සනත් නිශාන්ත – ජල සම්පාදන
සිරිපාල ගම්ලත් – මහා මාර්ග
ශාන්ත බණ්ඩාර – ජනමාධ්‍ය
අනුරාධ ජයරත්න – අධිකරණ හා බන්ධනාගාර කටයුතු
එස්. විලයාන්ද‍්‍රන් – වෙලද
සිසිර ජයකොඩි – දේශීය වෛද්‍ය
පියල් නිශාන්ත – ධීවර
ප‍්‍රසන්න රණවීර – කුඩා හා මධ්‍යම පරිමාණ ව්‍යවසාය සංවර්ධන
ඩී.වී. චානක – වනජීවි හා වනසම්පත්
ඩී.බී. හේරත් – පශු සම්පත් සංවර්ධන
ශෂීන්ද‍්‍ර රාජපක්‍ෂ – වාරිමාර්ග
සීතා අරඹේපොල – සෞඛ්‍ය
කදර් මස්තාන් – ග‍්‍රාමීය ආර්ථික
අශෝක ප‍්‍රියන්ත – ස්වදේශ කටයුතු
අරවින්ද කුමාර් – අධ්‍යාපන
ගීතා කුමාරසිංහ – කාන්තා හා ළමා කටයුතු
සිවනේෂතුරෙයි චන්ද‍්‍රකාන්තන් – ග‍්‍රාමීය මාර්ග සංවර්ධන
සුරේන් රාඝවන් – උසස් අධ්‍යාපන
ඩයනා ගමගේ – සංචාරක
චාමර සම්පත් – ප‍්‍රාථමික කර්මාන්ත
අනූප පැස්කුවෙල් – සමාජ බලගැන්වීම

මෙම අවස්ථාව සඳහා අග්‍රාමාත්‍ය දිනේෂ් ගුණවර්ධන , ජනාධිපති ලේකම් සමන් ඒකනායක ඇතුළු පිරිසක් සහභාගීව ඇත.

වරප්‍රසාද මොකුත් නෑ !

මේ අතර දේශපාලන ආරංචිමාර්ග පවසන්නේ, අදාළ පිරිස රාජ්‍ය අමාත්‍යවරුන් ලෙස දිවුරුම් දුන්නත් ඔවුන් කිසිඳු විශේෂ වරප්‍රසාද හෝ විශේෂ දීමනා ඇතුළු කිසිවක් නොගෙන ආණ්ඩුවට සහය දැක්වීමට එකඟතාව පළකර ඇති බවය.

එසේම වෙනම විෂය පථ ගැසට් කිරීමක් හෝ වෙනම වැය ශීර්ෂ වෙන් කිරීමක් මේ අමාත්‍යංශ වෙත සිදුනොවන බවත් ඒ වෙනුවට රේඛීය අමාත්‍යංශයට සහය දෙමින් වගකීම් දැරීමට අවස්ථාව හිමිවන බවත් එම ආරංචිමාර්ග පවසයි.

රාජ්‍ය අමාත්‍යවරු ලෙස ශ්‍රී ලංකා නිදහස් පක්ෂයේ මන්ත්‍රීවරුන් පිරිසක් දිව්රුම් දීමත් සමඟ පාර්ලිමේන්තුවේ විපක්ෂය නියෝජනය කරන ශ්‍රී ලංකා නිදහස් පක්ෂ මන්ත්‍රීවරුන් පිරිස තවදුරටත් අඩු වී ඇත.

මේ වන විට නිමල් සිරිපාල ද සිල්වා සහ මහින්ද අමරවීර මහත්වරුන් කැබිනට් අමාත්‍ය ධුර දරන අතර රංජිත් සියඹලාපිටිය, ජගත් පුෂ්ප කුමාර, ලසන්ත අලගියවන්න, චාමර සම්පත් දසනායක, සුරේෂ් රාගවන්, ශාන්ත බණ්ඩාර යන මන්ත‍්‍රීවරුන් අද (08) රාජ්‍ය අමාත්‍ය ධුරවල දිවුරුම් දී ඇත.

ඒ සමගම ශ්‍රී ලංකා නිදහස් පක්ෂයේ පාර්ලිමේන්තු මන්ත්‍රීවරුන්ගෙන් බහුතරය ආණ්ඩුව නියෝජනය කරමින් ඇති අතර පක්ෂ සභාපති මෛත්‍රීපාල සිරිසේන ඇතුළු දෙතුන් දෙනෙකු පමණක් විපක්ෂය නියෝජනය කරයි.

කෙසේ වුවත් පසුගියදා ශ්‍රී ලංකා නිදහස් පක්ෂ සමුළුව අවස්ථාවේ එහි ව්‍යවස්ථාව සංශෝධනය කරගන්නට පක්ෂ සභාපති , හිටපු ජනාධිපති මෛත්‍රීපාල සිරිසේන කටයුතු කර තිබිණ. ඒ පක්ෂ විනය උල්ලංඝණය කරන පාර්ශවවලට එරෙහිව විනය ක්‍රියාමාර්ග ගැනීම ඇතුළු කරුණු කිහිපයක් පෙන්වා දෙමින්ය.

ප්‍රවීණ රංගන ශිල්පිනී දමිතා අබේරත්න පොලීසිය විසින් අත්අඩංගුවට ගෙන තිබේ.

දියත උයන අසලදී අද පැවති විරෝධතාවයකින් අනතුරුව විශේෂ පොලිස් කණ්ඩායමක් විසින් ඇය අත්අඩංගුවට ගෙන ඇති බව පොලීසිය පවසයි.

පොලිසිය සඳහන් කළේ පොල්දූව හංදිය ප්‍රදේශයේදී ඇය අත්අඩංගුවට ගෙන ඇති බවයි.

මේවනවිට ඇයව මෝදර පොලිසියේ රඳවා ගෙන සිටිනබව වාර්තාවේ.

පසුගිය ජුලි මාසයේදී ජනාධිපති කාර්යාලයට අයුතු ලෙස ඇතුලු වීම සහ එහි දේපළවලට අලාභ හානි කිරීමත්, එසේම, පොලිස් නිලධාරීන්ට තර්ජනාත්මකව බලපෑම් කිරීම හා ආරක්ෂක නිලධාරීන්ගේ රාජකාරියට බාධා කිරීමත් සම්බන්ධයෙන් ද ඇය වෙත චෝදනා එල්ලකර ඇත.

මඩකලපු දිස්ත්‍රික් දෙමළ මාධ්‍යවේදීන්ගේ සංගමයේ සභාපති TID යට

 මේ අතර මඩකලපු දිස්ත්‍රික් දෙමළ මාධ්‍යවේදීන්ගේ සංගමයේ සභාපති බාලසිංහම් ක්‍රිෂ්ණකුමාර්ව සැප්තැම්බර් 14 දින කොළඹ ත්‍රස්ත මර්දන හා විමර්ශන කොට්ඨාශ මූලස්ථානය වෙත කැඳවනු ලැබ තිබේ.

ඔහු මාධ්‍ය අයිතිවාසිකම් පිළිබඳ ප්‍රමුඛ ක්‍රියාධරයෙකි.

අගෝස්තු 20 දින අපරාධ පරීක්ෂණ දෙපාර්තමේන්තු නිලධාරීන් විසින් ගාල්ලේදි අත්අඩංගුවට ගත් තරුණ ක්‍රියාකාරිකයෙකු වන සහජ මධුශංක දින 19ක් වැලිකඩ බන්ධනාගාරයේ රඳවා සිටීමෙන් පසු අද කොටුව මහේස්ත්‍රාත් අධිකරණයට ඉදිරිපත් කරන ලදී.

මීළඟ නඩු වාරය සැප්තැම්බර් 21 වැනිදාට නියම කෙරුණි.

ශ්‍රී ලංකාව ඇතුළු රටවල් බොහොමයක ණය තත්ත්වය තිරසර නොවන බවත් එම රටවල් වලට ණය බර දරා ගත නොහැකි තත්ත්වයක් මතුවෙමින් තිබෙන බව ජාත්‍යන්තර මූල්‍ය අරමුදලේ කළමණාකාර අධ්‍යක්ෂිකා ක්‍රිස්ටලිනා ජොර්ජීවා පවසයි .

ඇය මේ බව සඳහන් කර සිටියේ නෙදර්ලන්තයේ පැවැත්වෙන අප්‍රිකානු සමුළුව අමතමින්ය.

දිළිඳු රටවල් වලින් සියයට 60 ක් ණය ගෙවා ගත නොහැකි තත්ත්වයකට පත්ව ඇති බැවින් ආර්ථික ක්‍රියාදාමය පිළිබඳව සාමාන්‍ය ආකාරයට සිතිය නොහැකි බවත් එම සමුළුවේදී IMF කළමනාකාර අධ්‍යක්ෂවරිය වන ජොර්ජීවා පැවසුවාය.

කොවිඩ් වසංගතයෙන් පීඩිත වූ මිනිසුන්ට උද්ධමනයද පහර දෙන බවත් ඇය ප්‍රකාශ කළාය.

මෙම ගැටලුවට මුහුණදීම සඳහා බලවත් බැංකු පද්ධතියක සහ ස්ථාවර ආර්ථිකයක අවශ්‍යතාව ද ජාත්‍යන්තර මූල්‍ය අරමුදලේ කළමණාකාර අධ්‍යක්ෂිකා ක්‍රිස්ටලිනා ජොර්ජීවා අවධාරණය කරයි .

ශ්‍රී ලංකාවේ ණය ප්‍රතිව්‍යුහගතකරණය කිරිම සඳහා සහාය ලබාදෙන බව අමෙරිකා එක්සත් ජනපද භාණ්ඩාගාර ලේකම් ජැනට් යෙලන් (Janet Yellen) ජනාධිපති රනිල් වික්‍රමසිංහට දැනුම් දී ඇත.

ශ්‍රී ලංකාව මුහුණ දී ඇති ආර්ථික අර්බුදය විසදීම සඳහා මූල්‍ය නීතිරීතිවලට අනුව ලෝක බැංකුව, ආසියානු සංවර්ධන බැංකුව සහ අමෙරිකානු මූල්‍ය ආයතනවල සහාය ලබාදීමට කටයුතු කරන බව ද භාණ්ඩාගාර ලේකම්වරිය දැනුම් දී තිබේ.

ශ්‍රී ලංකාවේ නිල ද්විපාර්ශ්වික ණය හිමියන් සඳහා සම්බන්ධීකරණ වේදිකාවක් සඳහා වන ජනාධිපති රනිල් වික්‍රමසිංහගේ යෝජනාව පිළිගන්නා එක්සත් ජනපද භාණ්ඩාගාරය මේ සම්බන්ධයෙන් කටයුතු කරන ලෙස ඉල්ලා සිටී.

එක්සත් ජනපදය සිය මූලධර්මවලට අනුකූලව මූල්‍ය සහතික කිරීම කඩිනම් කිරීම යන පොදු ඉලක්කය ශ්‍රී ලංකාව සමඟ බෙදා ගනිමින්, පැරිස් සමාජයේ අනෙකුත් සාමාජිකයන් හා සම්බන්ධවීමට සූදනම්ය.

තවද එක්සත් ජනපද භාණ්ඩාගාරය ශ්‍රී ලංකාවේ ජනතාවට උපකාර කිරීම සඳහා ඔවුන්ගේ අනෙකුත් රාජ්‍ය ආයතන මෙන්ම ලෝක බැංකුව සහ ආසියානු සංවර්ධන බැංකුව සමඟ අඛණ්ඩව සම්බන්ධ වීමට ප්‍රතිඥා දී ඇත.

පාසල් දරුවන්ගේ පෝෂණය ඉහළ නැංවීම, ගර්භනී කාන්තාවන් සහ නව මව්වරුන් සඳහා ආහාර වවුචර ලබාදීම, ආහාර නිෂ්පාදනය ඉහළ නැංවීම සඳහා කුඩා හා මධ්‍ය පරිමාණ ගොවීන් සඳහා පොහොර සහ මුදල් ලබාදෙමින් එක්සත් ජනපදය ශ්‍රී ලංකාවේ ජනතාවට අන්‍යෝන්‍ය වශයෙන් සහයෝගය ලබා දී ඇති බවද භාණ්ඩාගාර ලේකම්වරිය තවදුරටත් දන්වා තිබේ.

විස්තීරණ අරමුදල් පහසුකමක් (EFF) හරහා ජාත්‍යන්තර මූල්‍ය අරමුදලේ සහය ලබා ගැනීමට ශ්‍රී ලංකා රජය ගත් තීරණයට එක්සත් ජනපද භාණ්ඩාගාර දෙපාර්තමේන්තුව සිය ප්‍රසාදය පළ කර සිටී.

ගෝල් ෆේස් අරගලකරුවන්ගේ ප්‍රධාන ඉල්ලීමක් වූ ග්‍රාමීය සාමාන්‍ය ජනතාවගේ අදහස් සාකච්ඡා කොට ඒ්වා සම්බන්ධයෙන් දේශපාලන මැදිහත්වීම සදහා වන ව්‍යුහයක් ලෙස "මහජන කවුන්සලය" ගොඩ නැගීමට යන්නට ආණ්ඩුව ප්‍රතිචාර දක්වා ඇත.

ජනාධිපති රනිල් වික්‍රමසිංහගේ මැදිහත්වීමෙන් මේ සම්බන්ධයෙන් වන සාකච්ඡාවක් පසුගියදා සිදුව ඇති අතර එහිදී දිවයිනේ ග්‍රාම සේවා වසම් දෙකක් මූලික කොටගෙන අදාළ ජනසභාවේ සාමාජිකත්වයන් ගොඩ නැගෙන "ජනසභා ලේකම් කාර්යාලයක්" ස්ථාපිත කිරීමට යෝජනා වී ඇත .

මේ සදහා තරුණ ප්‍රජාව, පූජ්‍ය පක්ෂය හා ගමෙහි ප්‍රධාන වගකිව යුතු පාර්ශවයන් එක් කොට ගෙන ගොඩ නැගෙන අතර එය දිස්ත්‍රික්කය තුළ සාකච්ඡා වන සංවිධානයක් මගින් සෘජුව බලාධිකාරයන් වෙත සම්ප්‍රේෂණය වීම දක්වා වන ගලායාමක් සිදුවිය යුතු බවට අදහස් දක්වා ඇත.

ජනසභා ලේකම් කාර්යාලයෙහි ප්‍රධාන මූලස්ථානය හිටපු කතානායක කරූ ජයසූරියගේ මූලිකත්වයෙන් හා ප්‍රවීන ජනමාධ්‍ය වේදී වික්ටර් අයිවන්ගේ මූලිකත්වයෙන් සිදුවේ.

මේ පිළිබදව කළ මූලික සාකච්ඡාව සදහා ජනාධිපතිවරයා සමග කරූ ජයසූරිය, වික්ටර් අයිවන්, රංජිත් කීර්ති තෙන්නකෝන්, වරුණ දීප්ත රාජපක්ෂ, නීතිඥ අකලංක හෙට්ටිආරච්චි, සුජාතා ගමගේ හා සංජීව විමලගුණරත්න සහභාගී වූහ.

විසි දෙවැනි ආණ්ඩුක්‍රම ව්‍යවස්ථා සංශෝධන පනත් කෙටුම්පතේ ඇතැම් වගන්ති ආණ්ඩුක්‍රම ව්‍යවස්ථාවට පටහැනි හෙයින් ඒවා සංශෝධනය කළ යුතු බවත් එසේ නැතිනම් එම වගන්ති පාර්ලිමේන්තුවේ විශේෂ බහුතරයකින් සහ ජනමත විචාරණයකින් සම්මත කළ යුතු බවත් ශ්‍රේෂ්ඨාධිකරණය දන්වා ඇතැයි කතානායක මහින්ද යාපා අබේවර්ධන පාර්ලිමේන්තුවට දැනුම්දී ඇත.

කතානායකවරයා මෙම දැනුම්දීම කළේ අද (06) සභාවේ කටයුතු ආරම්භයේදී විශේෂ නිවේදන ඉදිරිපත් කරමිනි.

මෙම පනත් කෙටුම්පත ආණ්ඩුක්‍රම ව්‍යවස්ථාවේ 82(1) ව්‍යවස්ථාවේ විධිවිධානවලට අනුකූල වන හෙයින් ආණ්ඩුක්‍රම ව්‍යවස්ථාවේ 82(5) ව්‍යවස්ථාවේ දක්වා ඇති විශේෂ බහුතරයෙන් එය සම්මත කළ යුතු බවද ශ්‍රේෂ්ඨාධිකරණය ප්‍රකාශ කර ඇතැයි කතානායකවරයා දැනුම් දුන්නේය.

පනත් කෙටුම්පතේ 2 වැනි වගන්තියේ ආණ්ඩුක්‍රම ව්‍යවස්ථාවේ 4(ආ) ව්‍යවස්ථාව සමග කියවනු ලැබිය යුතු 3 වැනි ව්‍යවස්ථාව සමග අනනුකූල වන විධිවිධාන අඩංගු වන හෙයින් අදාළ පනත් කෙටුම්පතෙහි එකී වගන්ති පනවනු ලැබිය හැකි වනුයේ, ආණ්ඩුක්‍රම ව්‍යවස්ථාවේ 82(5) ව්‍යවස්ථාවෙහි නියම කෙරෙන පරිදි විශේෂ බහුතරයකින් පාර්ලිමේන්තුවේදී සම්මත කරන ලදුව, 83 වැනි ව්‍යවස්ථාව ප්‍රකාරව ජනතාව ජනමත විචාරණයකදී අනුමත කිරීමෙන් පමණක් බවද කතානායකවරයා පැවසූවේය.

කෙසේ වෙතත්, 2 වැනි වගන්තියේ යෝජිත 41 (අ)(6) සහ 41(ආ)(4) වගන්ති ඉහත විග්‍රහ කරන ලද ප්‍රතිපාදනය ඉවත් කිරීම සඳහා යෝග්‍ය ලෙස සංශෝධනය වන්නේ නම් ජනමත විචාරණයක අවශ්‍යතාවය නිශේධ වන බවත් පනත් කෙටුම්පතේ 3 වැනි වගන්තියේ ආණ්ඩුක්‍රම ව්‍යවස්ථාවේ 4(ආ) ව්‍යවස්ථාව සමග කියවනු ලැබිය යුතු 3 වැනි ව්‍යවස්ථාව සමග අනනුකූල වන විධිවිධාන අඩංගු වන හෙයින් අදාළ පනත් කෙටුම්පතෙහි එකී වගන්ති පනවනු ලැබිය හැකි වනුයේ, ආණ්ඩුක්‍රම ව්‍යවස්ථාවේ 82(5) ව්‍යවස්ථාවෙහි නියම කෙරෙන පරිදි විශේෂ බහුතරයකින් පාර්ලිමේන්තුවේදී සම්මත කරන ලදුව, 83 වැනි ව්‍යවස්ථාව ප්‍රකාරව ජනතාව විසින් ජනමත විචාරණයකදී අනුමත කරනු ලැබීමෙන් පමණක් බවත් ශ්‍රේෂ්ඨාධිකරණය දන්වා ඇතැයි කතානායකවරයා දැනුම් දුන්නේය.

කෙසේ වෙතත් පනත් කෙටුම්පතේ 3 වැනි වගන්තියේ 44(2, 44(3), 45(1), 46(1), 47(3)(අ), 48(3) සහ 50 වැනි ව්‍යවස්ථාවන්හි සදහන් අග්‍රාමාත්‍යවරයාගේ උපදෙස් මත ජනාධිපතිවරයා ක්‍රියා කරන බවට වන සඳහන ඉවත් කර ඒ වෙනුවට අග්‍රාමාත්‍යවරයා සමඟ සාකච්ඡා කර ජනාධිපතිවරයා ක්‍රියා කරන බවට සංශෝධනය කර ඇත්නම් සහ
(ආ) 3 වැනි වගන්තියේ යෝජිත 47(2) ව්‍යවස්ථාවේ 47(2)(අ) ව්‍යවස්ථාවේ විධිවිධාන ප්‍රතිස්ථාපනය කරන්නේ නම් ජනමත විචාරණයක අවශ්‍යතාවය නතර වනු ඇතැයිද ශ්‍රේෂ්ඨාධිකරණය දැනුම්දී ඇති බව කතානායකවරයා පැවසුවේය.

විසි දෙවැනි ආණ්ඩු ක්‍රම ව්‍යවස්ථා සංශෝධන පනත් කෙටුම්පත අධිකරණ අමාත්‍ය ආචාර්ය විජයදාස රාජපක්ෂ මහතා විසින් පාර්ලිමේන්තුවට අගෝස්තු මස 10 වෙනිදා ඉදිරිපත් කරනු ලැබීය.

පනත් කෙටුම්පතට අදාළ ගැසට් නිවේදනය නිකුත් කෙරුණේ අගෝස්තු මස 2 වැනිදාය.

අතීතයේ සිදු වූ මානව හිමිකම් උල්ලංඝනය කිරීම් නැවත සිදු වීම වැළැක්වීම සඳහා ශ්‍රී ලංකාවේ වගවීම සහ රාජ්‍ය ආයතන තුළ ගැඹුරු ප්‍රතිසංස්කරණ ක්‍රියාත්මක විය යුතු බව එක්සත් ජාතීන්ගේ මානව හිමිකම් පිළිබඳ මහ කොමසාරිස් කාර්යාලය පවසයි .

එක්සත් ජාතීන්ගේ මානව හිමිකම් පිළිබඳ මහ කොමසාරිස් කාර්යාලය මේ බව සඳහන් කර ඇත්තේ ලංකාව සම්බන්ධයෙන් නිකුත් කළ වාර්තාවේ ය.

ශ්‍රී ලංකාවේ නව රජය මානව හිමිකම් සහ ප්‍රතිසන්ධානය ඉදිරියට ගෙනයාම සඳහා ජාතික සංවාදයකට අවතීරණ විය යුතු බවත් එම වාර්තාවේ දැක්වේ.

ශ්‍රී ලංකාව දේශපාලනික වශයෙන් සන්ධිස්ථානයක සිටින බව එම වාර්තාවෙන් පිළිගෙන ඇති අතර ශ්‍රී ලංකාවේ ඇති වී තිබෙන ආර්ථික අර්බුදය හේතුවෙන් සියලු ජන කොටස්වල සහ සෑම තරාතිරමකම මිනිසුන්ගේ මානව හිමිකම්වලට දැඩි ලෙස බලපෑමක් එල්ල කර ඇති බව එම වාර්තාවේ සඳහන් වේ.

කුරිරු ආරක්ෂක නීති මත යැපීම සහ සාමකාමී විරෝධතා මර්දනය කිරීම වහාම අවසන් කරන ලෙසද එක්සත් ජාතීන්ගේ මානව හිමිකම් පිළිබඳ මහ කොමසාරිස් කාර්යාලය එම වාර්තාව මගින් රජයෙන් ඉල්ලා සිට ඇත.

මිලිටරිකරණය දෙසට ගමන් කිරීම ආපසු හරවමින්, ආරක්ෂක අංශයේ ප්‍රතිසංස්කරණ ක්‍රියාකරමින් සහ දණ්ඩමුක්තිය අවසන් කිරීමට කටයුතු කරමින් නව කැපවීමක් පෙන්නුම් කරන ලෙස එම වාර්තාව මගින් මානව හිමිකම් පිළිබඳ මහ කොමසාරිස් කාර්යාලය ශ්‍රී ලංකා රජයෙන් ඉල්ලීමක් කර තිබේ.

ත්‍රස්තවාදය වැළැක්වීමේ පනත යටතේ ශිෂ්‍ය ක්‍රියාකාරීන් අත් අඩංගුවට ගනිමින් මහජන විරෝධතා මර්දනය කිරීමට රජය දැඩි පිළිවෙතක් අනුගමනය කර තිබෙන බව එම වාර්තාවේ සඳහන් වේ.

දැඩි ලෙස මිලිටරිකරණය වූ පරිසරයක් තුළ උතුරු සහ නැගෙනහිර පළාත්වල ජනතාව ශ්‍රී ලංකා රජය ගැන සමීපව නිරීක්ෂණය කරමින් සිටින බව එම වාර්තාවේ දැක්වේ.