පුවත්

'පොහොට්ටු' පක්ෂයේ ජාතික සංවිධායක බැසිල් රාජපක්ෂ අද උදෑසන 08.30ට ඩුබායි සිට එමිරේට්ස් ගුවන් සේවයේ ඊ.කේ- 650 දරන ගුවන් යානයෙන් යලි

දිවයිනට පැමිණියේය.

ඔහු මීට මාසයකට පමණ පෙර සිය පවුලේ සාමාජිකයින් සමග නිවාඩුවක් ගතකිරීම සඳහා ඇමෙරිකා එක්සත් ජනපදය වෙත ගොස් තිබුණි.

අද දිනයේ ඔහු පිළිගැනීම සදහා රෝහිත අබේගුණවර්ධන, ජොන්ස්ටන් ප්‍රනාන්දු, ගාමිණී ලොකුගේ, පවිත්‍රා වන්නිආරච්චි, ශාන්ත බණ්ඩාර, එස්.එම්.චන්ද්‍රසේන, ප්‍රසන්න රණවීර, පියල් නිශාන්ත යන මැති ඇමතිවරුන් ඇතුළු පිරිසක් කටුනායක ගුවන්තොටුපළ විශේෂ අමුත්තන්ගේ මැදිරිය වෙත පැමිණ සිටියහ.

ග්ලයිෆොසේට් සඳහා රජය විසින් පනවා තිබූ තහනම ඉවත් කිරීමට කෘෂිකර්ම අමාත්‍යාංශය තීරණය කර තිබේ.

වී, බඩඉරිඟු, තේ, රබර් ඇතුළු සියලු වගාවන්හි වල් මර්දනය සඳහා යොදා ගන්නා ග්ලයිෆොසේට් යොදා ගත් අතර, ගොවි නියෝජිතයින්, කෘෂිකර්ම විශේෂඥයින්, කෘෂි විද්‍යාඥයින් ඇතුළු විවිධ අංශවලින් කළ විමසීම්වලින් අනතුරුව පනවා ඇති තහනම මෙසේ ඉවත් කර ඇත.

වසර 07කට පසු ග්ලයිෆොසේට් තහනම ඉවත් කිරීමට අදාළ ගැසට් පත්‍රය මුද්‍රණය සඳහා රජයේ මුද්‍රණාලයට භාර දී ඇතැයි කෘෂිකර්ම අමාත්‍යාංශය නිකුත් කළ නිවේදනයක සඳහන් ය.

වල් මර්දනය සඳහා විකල්ප ක්‍රමවේදයක් නොමැතිව 2015දී ග්ලයිෆොසේට් තහනම් කිරීම අස්වනු අඩුවීමට හේතුවී ඇතැයි ද කෘෂිකර්ම අමාත්‍යාංශය පෙන්වා දෙයි.

දුම්රිය වේග සීමා පැනවීමත් සමග දුම්රිය කාල සටහන් සංශෝධනය කිරීමට දුම්රිය දෙපාර්තමේන්තුව තීරණය කර තිබේ.

දුම්රිය පීලිපැනීම් සම්බන්ධයෙන් ලද පැමිණිලි සැලකිල්ලට ගෙන රාජ්‍ය අමාත්‍ය ලසන්ත අලගියවන්න මහතා සමග පැවති සාකච්ඡාවකදී එම තීරණය ගෙන ඇති බව වාර්තා වේ.

ඒ අනුව දුම්රිය මාර්ගයේ අබලන් සහිත ස්ථානවලදී දුම්රිය අඩු වේගයකින් ධාවනය කිරීම සඳහා වේග සීමා පැනවීමට තීරණය වී ඇත.

ජනතාවගේ ආරක්ෂාව සහ දේපළ ආරක්ෂාව සැලකිල්ලට ගෙන එම වේග සීමා පැනවීමට තීරණය කර ඇති බව දුම්රිය දෙපාර්තමේන්තුවේ ප්‍රකාශකයෙකු සඳහන් කළේය.

මාර්ග පද්ධතියේ පවතින දෝෂ හේතුවෙන් පසුගිය දින කිහිපය තුළ අවස්ථා ගණනාවක දී දුම්රිය පීලිපැනීම් සිදුවිය.

පවතින තත්ත්වය සැලකිල්ලට ගනිමින් වේග සීමා පැනවීමට තීරණය කර ඇති අතර ඒ අනුව දුම්රිය කාල සටහන් සංශෝධනය කිරීමට සැලසුම් කර තිබේ.

ඊට අදාළ වාර්තාවක් ලබන 24 වන දින ඉදිරිපත් කිරීමට නියමිත අතර එම වාර්තාවෙන් අනතුරුව නව දුම්රිය කාල සටහන් ප්‍රකාශයට පත්කිරීමට නියමිතය.

මේ අතර දුම්රිය ධාවනය සම්බන්ධයෙන් දැනුවත් වීම සඳහා ඉදිරියේ දී නව දුරකථන යෙදවුමක් හඳුන්වාදීමට ද නියමිතය.

මගී ජනතාවගේ පහසුව සඳහා ජී.පී.එස්.තාක්ෂණය උපයෝගී කර ගනිමින් දුම්රිය ගමන්ගන්නා ස්ථානය පිළිබඳව මෙම නව දුරකථන යෙදවුම මගින් දැනගත හැකිය.

පස් අවුරුදු සැලැස්මක් යටතේ ආර්ථිකය ශක්තිමත් කිරීමට මෙවර අයවැය මගින් පියවර තැබූ බවත් 2023 වසරේ සිට 2027 වසර දක්වා ආර්ථිකයේ පරිවර්තනීය වෙනසක් ඇති කිරීමට මෙමගින් හැකියාව ඇති බවත් ජනාධිපති රනිල් වික්‍රමසිංහ පැවසීය.

ජනාධිපතිවරයා මෙම අදහස් පළ කළේ වවුනියාව නගර ශාලාවේ අද (19) පැවති දිස්ත්‍රික් සංවර්ධන ප්‍රගති සමාලෝචන රැස්වීමට එක්වෙමිනි.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය.

ආහාර සුරක්ෂිතතාව වෙනුවෙන් රජය ගෙන යන වැඩපිළිවෙළ වවුනියාව, මන්නාරම සහ මුලතිව් දිස්ත්‍රික්කවල ක්‍රියාත්මක කෙරෙන බව අපට පැහැදිලියි. සෑම ප්‍රාදේශීය ලේකම් කාර්යාලයකටම නිලධාරීන් සිව් දෙනෙක් ආහාර සුරක්ෂිතතා වැඩසටහන සඳහා පත්කර තිබෙනවා.

ඉන්දියානු ආධාර යටතේ දියර කිරි කර්මාන්තය උතුරු පළාත තුළ සංවර්ධනය කිරීමට කටයුතු කරනවා.

විශේෂයෙන්ම මේ අවස්ථාවට ඔබ කැඳෙව්වේ රටේ පවතින ආහාර හිඟය පිළිබඳවත් දැනුවත් කර ආහාර සුරක්ෂිතතා වැඩසටහන ක්‍රියාත්මක කිරීම පිළිබඳ සාකච්ඡා කිරීමටයි.

ඉදිරියේදී රටේ ආහාර හිඟයක් ඇතිවීම පාලනය කිරීමට අප බලාපොරොත්තු වෙනවා. 2023 අවසානය දක්වා මෙම වැඩසටහන ක්‍රියාත්මක කිරීමට සැලසුම් කර තිබෙනවා. ඉන් ඉදිරියට මෙම වැඩසටහන ක්‍රියාත්මක කරනවාද නැද්ද යන්න පසුව අප සලකා බලනවා.

ගෝලීය ආහාර හිඟයක් ඉදිරියේ ඇති වෙන්න පුළුවන්. ඒ තත්ත්වය හමුවේ ශ්‍රී ලංකාව ආරක්ෂා කර ගැනීමට මෙම ආහාර සුරක්ෂිතතා වැඩසටහන වැදගත් වන බව කිව යුතුයි. අප්‍රිකාවේ මේ වන විටත් ආහාර හිඟය දැවැන්ත ලෙස බලපා තිබෙනවා.

අපි සාර්ථක මහ කන්නයක් ලබාගෙන තිබෙනවා. අනෙක් බෝගවලත් එවැනි ඵලදාවක් ලැබුණොත් ආහාර හිගයට පහසුවෙන් මුහුණ දිය හැකියි. මීට අමතරව තව කාරණා දෙකක් තියෙනවා. එකක් මන්දපෝෂණය පාලනය කිරීම, අනෙක ලැබෙන අස්වැන්න ආරක්ෂා කිරීම. අස්වැන්න නෙළන අවස්ථාවේදී නාස්තිය අවම කර ගැනීමට අප පියවර ගතයුතුයි. එමෙන්ම ඒවා ගබඩා කිරීමට සහ පාරිභෝගිකයන්ට සැපයීමේ ක්‍රියාවලිය ශක්තිමත් කරනවා. එහිදී වව්නියාව සහ මන්නාරම දිස්ත්‍රික්කවලට විශාල වගකීමක් තිබෙනවා. තිබෙන අතිරික්ත ආහාර සුරක්ෂිත කිරීමට අප කටයුතු කළ යුතුයි.

ඒ වගේම මෙම දිස්ත්‍රික්කවල අධ්‍යාපන, සෞඛ්‍ය පිළිබඳ ගැටලු කිහිපයක් මෙම සාකච්ඡාවලදි අනාවරණය වුණා. ඒවාට කඩිනමින් විසඳුම් ලබා දෙන්න අප බලාපොරොත්තු වෙනවා. ජාත්‍යන්තර මූල්‍ය අරමුදල සමඟ කටයුතු කිරීමට අප සැලසුම් කර තිබෙනවා. එමඟින් ආර්ථිකයට විශාල වර්ධනයක් ඇති කිරීමට අපට හැකියාව ලැබෙනවා. අපනයන ආර්ථිකයේ පුළුල් වෙනසක් සිදු කර, විශාල ලෙස ඩොලර් උපයන ආර්ථිකයකට අපි යා යුතුයි.

ඒ පිළිබඳ වැඩසටහන 2023 අයවැයෙන් මා ඉදිරිපත් කර තිබෙනවා. එහිදී උතුරටත් විශාල වැඩ කොටසක් තිබෙනවා. යාපනයට විතරක් නොවෙයි. වන්නියටත් එහි වගකීමක් තිබෙන බව සිහිපත් කරන්න කැමතියි.

අපට අලුත් බලශක්ති ආර්ථිකයක් අවශ්‍යයි. එහි ප්‍රධාන කලාපය වෙන්නේ උතුරු පළාතයි. අපට විදේශ විනිමය විශාල වශයෙන් එමගින් ලබා ගත හැකියි . මැදපෙරදිගට හා සිංගප්පූරුවට ආහාර අපනයනය කිරීම මගින් ආදායම් ඉපයීමට අවස්ථාව තිබෙනවා. අලුත් බෝග වගා කිරීම සඳහා අප අවස්ථාව ලබා දෙනවා. කුරුදු වැනි බෝග වගා කිරීමට අවස්ථාව තිබෙනවා .

සත්ව පාලනය සඳහා වැඩි අවධානයක් යොමු කරන්න පුළුවන්. එවැනි වැඩසටහන් ගණනාවක් තිබෙනවා. 2023 සිට 2027 දක්වා පස් අවුරුදු සැලැස්මක් යටතේ වැඩසටහන් ක්‍රියාත්මක කරනවා. මේ කාරණාවේදි වන්නියට විශාල වගකීමක් පැවරී තිබෙන බව කියන්න කැමතියි.

වව්නියාව ගුවන්තොටුපොළ ජාත්‍යන්තර ගුවන් තොටුපොළ බවට පත් කරන්න තිබෙන හැකියාව පිළිබඳව අප මේ වන විට සොයා බලමින් සිටිනවා. මේ සියලු දේ සිදු කිරීමට ඔබ සැමගේ සහාය මම බලාපොරොත්තු වෙනවා.

වවුනියාව දිස්ත්‍රික්කයේ ආහාර සුරක්ෂිතතා වැඩසටහනේ ප්‍රගතිය පිළිබඳව ද ප්‍රාදේශීය ලේකම්වරුන්ගෙන් ජනාධිපතිවරයා මෙහිදී විමසීමක් කළේය.

ධීවර අමාත්‍ය ඩග්ලස් දේවානන්දා, නාගරික සංවර්ධන නිවාස රාජ්‍ය අමාත්‍ය තේනුක විදානගමගේ, ග්‍රාමීය සංවර්ධන රාජ්‍ය අමාත්‍ය කාදර් මස්තාන්, පාර්ලිමේන්තු මන්ත්‍රීවරුන් වන සෙල්වම් අඩෙක්කලනාදන්, රිෂාඩ් බදුර්දීන්, චාල්ස් නිර්මලනාදන්, කුලසිංහ තිලීබන්, උතුරු පළාත් ආණ්ඩුකාර ජීවන් ත්‍යාගරාජ්, ජනාධිපති ලේකම් සමන් ඒකනායක ද, වව්නියාව, මුලතිව් සහ මන්නාරම දිස්ත්‍රික් ලේකම්වරු ඇතුළු රාජ්‍ය නිලධාරීහු මීට එක්ව සිටියහ.

පෞද්ගලික සංචාරයක් සඳහා ඇමෙරිකාවට ගිය ශ්‍රී ලංකා - ඇමරිකානු පුරවැසි බැසිල් රාජපක්ෂ සඳුදා (21) යළි දිවයිනට පැමිණීමට නියමිත බව දේශපාලන ආරංචි මාර්ග පවසයි .

ඔහුගේ පවුලේ සාමාජිකයන් වෙසෙන්නේද ඇමරිකාවේ ය.

මාස එක හමාරක පමණ කාලයක් ඇමෙරිකාවේ රැඳී සිටි අතර, එම කාලය තුළ විසිඑක්වැනි ආණ්ඩුක්‍රම ව්‍යවස්ථා සංශෝධනය පාර්ලිමේන්තුවේ සම්මත කෙරිණ .

බැසිල් රාජපක්ෂ දිවයිනට පැමිණීමෙන් පසුව,පොදුජන පෙරමුණේ දේශපාලන කටයුතු සඳහා සක්‍රීයව දායක වීමට නියමිතව ඇති බවද එම පක්ෂයේ ආරංචි මාර්ග සඳහන් කරයි.

ඉඩම් ගැටලු නිරාකරණය කිරීමට පළාත් මට්ටමින් කමිටු 08ක් පත් කිරීමට කටයුතු කරන බව ජනාධිපති රනිල් වික්‍රමසිංහ පැවසීය.

ඒ අනුව උතුරේ සහ දකුණේ සියලු ඉඩම් ගැටලු නිරාකරණය කිරීමට හැකිවනු ඇතැයි ද ජනාධිපතිවරයා පෙන්වා දුන්නේය.

ජනාධිපති රනිල් වික්‍රමසිංහ මේ බව සඳහන් කළේ අද (19) වව්නියාව දිස්ත්‍රික් ලේකම් කාර්යාලයේ පැවති දිස්ත්‍රික් සංවර්ධන කමිටු රැස්වීමට සහභාගී වෙමිනි.

උතුරු පළාතේ වව්නියාව, මන්නාරම සහ මුලතිව් දිස්ත්‍රික්ක තුන ආවරණය වන පරිදි මෙම සංවර්ධන කමිටු රැස්වීම කැඳවා තිබූ අතර එම දිස්ත්‍රික්කයන්හි මහජන නියෝජිතයන් සහ රාජ්‍ය නිලධාරීහු මීට එක්ව සිටියහ.

පළාතේ ඉඩම්, නිවාස, සෞඛ්‍ය, වාරිමාර්ග සහ කෘෂිකර්ම යන ක්ෂේත්‍රයන්හි මතුව ඇති ගැටලු හා ඒවාට ලබාදිය හැකි විසදුම් පිළිබඳ මෙහිදී දීර්ඝ ලෙස සාකච්ඡා කෙරිණි.

උතුරු පළාතේ විවිධ ක්ෂේත්‍රයන්හි මතුව ඇති ගැටලුවලට කඩිනම් විසඳුම් ලබාදෙමින් එම ජනතාවගේ ජීවන තත්ත්වය උසස් කිරීමට පියවර ගන්නා බව පැවසූ ජනාධිපති රනිල් වික්‍රමසිංහ ඒ සඳහා උතුරු පළාතේ සියලු මන්ත්‍රීවරුන්ගේ සහාය ද අපේක්ෂා කරන බව සඳහන් කළේය.

මෙතෙක් විසඳුම් ලැබී නොමැති ගැටලු රැසක් උතුරේ පවතින බවත් සියලු පාර්ශ්වයන් සමඟ සාකච්ඡා කරමින් ඒවාට අවශ්‍ය විසඳුම් ලබාදීමට කටයුතු කරන බවත් ජනාධිපතිවරයා වැඩිදුරටත් සඳහන් කළේය.

1994 සෙට්ටිකුලම් ප්‍රදේශයේ පදිංචි කළ දෙමළ ජනතාවට තවමත් ඉඩම් ලබා නොදීම පිළිබඳ පාර්ලිමේන්තු මන්ත්‍රී චාල්ස් නිර්මලනාදන් මෙහිදී ජනාධිපතිවරයාගේ අවධානයට යොමු කළේය.

සෙට්ටිකුලම ප්‍රදේශයේ ඉඩම් ගැටලුව මාස 03ක් ඇතුළ විසඳීමට මැදිහත්වී කටයුතු කරන ලෙස ජනාධිපතිවරයා වව්නියාව දිස්ත්‍රික් ලේකම්වරයාට උපදෙස් දුන් අතර ඒ පිළිබඳව අධිකරණ අමාත්‍යංශයෙන් සහ ඉඩම් අමාත්‍යාංශයෙන් කරණු විමසීමක් සිදු කිරීමට කටුයුතු කරන බව ද පැවසීය.

මුලතිව් දිස්ත්‍රික්කයේ ඇතැම් ගොවි බිම් පුරාවිද්‍යා දෙපාර්තමේන්තුවට පවරාගෙන තිබීම හේතුවෙන් මතුව ඇති ගැටලු කෙරෙහි ද අවධානය යොමු කෙරිණි.

උතුරු පළාතේ ජනතාවගේ නිවාස ගැටලුව කෙරෙහි මෙහිදී විශේෂ අවධානය යොමු වූ අතර උතුරු පළාතේ දිස්ත්‍රික්ක තුනෙහි ජනතාවට අවශ්‍ය නිවාස ලබාදීම සඳහා ක්‍රියාත්මක කළ ව්‍යාපෘති විවිධ අදියරවල පවතින බවත්, ඒ සඳහා තවත් රුපියල් මිලියන තුන්දහසක් පමණ අවශ්‍යව ඇති බවත් නිලධාරීහු පෙන්වා දුන්හ.

ඒ සම්බන්ධයෙන් අදහස් දැක්වු ජනාධිපති රනිල් වික්‍රමසිංහ සඳහන් කළේ නිවාස ව්‍යාපෘති රැසක් මේ වන විට දිවයින පුරා ක්‍රියාත්මක වන බවත් උතුරේ ජනතාවගේ නිවාස ගැටලුවට ද කඩිනම් විසඳුම් ලබාදීමට තමා අපේක්ෂා කරන බවයි.

වව්නියාව වැව සහ තිරික්කුලම් වැව ආශ්‍රිතව ජීවත්වන ජනතාවගේ අවශතා පිළිබදව පාර්ලිමේන්තු මන්ත්‍රී සෙල්වම් අඩෛක්කලනාදන් මෙහිදී ජනාධිපතිවරයාගේ අවධානය යොමු කළේය.

දිස්ත්‍රික්කයේ වැව් ප්‍රතිසංස්කරණය, පොහොර ගැටලුව විසඳීම සහ බෙදාහැරීමේ කටයුතු විධිමත් කිරීම පිළිබඳව ද මෙහිදී සාකච්ඡා කෙරිණි.

උතුරු පළාතේ සෞඛ්‍ය ගැටලු සහ වෛද්‍යවරුන්ගේ හිඟය පිළිබඳව ද අවධානය යොමු වු අතර ඒ පිළිබඳ විශේෂ අවධානය යොමු කරමින් අවශ්‍ය විසඳුම් ලබාදීමට පියවර ගන්නා ලෙස ජනාධිපතිවරයා නිලධාරීන්ට උපදෙස් දුන්නේය.

මන්නාරම දිස්ත්‍රික්කයේ ධීවරයන්ට භූමිතෙල් ලබා දීමේදී සිදුවන විවිධ අක්‍රමිකතා පිළිබඳ පාර්ලිමේන්තු මන්ත්‍රී රිෂාඩ් බදුර්දීන් කරුණු පැහැදිළි කළ අතර ඒ පිළිබඳ කඩිනම් පරීක්ෂණයක් සිදු කරන ලෙස ජනාධිපතිවරයා නිලධාරීන්ට දැනුම් දුන්නේය.

ධීවර අමාත්‍ය ඩග්ලස් දේවානන්ද ,නාගරික සංවර්ධන නිවාස රාජ්‍ය අමාත්‍ය තේනුක විදානගමගේ, ග්‍රාමීය සංවර්ධන රාජ්‍ය අමාත්‍ය කාදර් මස්තාන්, පාර්ලිමේන්තු මන්ත්‍රීවරුන් වන සෙල්වම් අඩෙක්කලනාදන්, රිෂාඩ් බදුර්දීන්, චාල්ස් නිර්මලනාදන්,උතුරු පළාත් ආණ්ඩුකාර ජීවන් ත්‍යාගරාජ්, ජනාධිපති ලේකම් සමන් ඒකනායක ද වව්නියාව, මන්නාරම සහ මුලතිව් දිස්ත්‍රික් ලේකම්වරු ඇතුළු රාජ්‍ය නිලධාරීහු මෙම අවස්ථාවට එක්ව සිටියහ.

ශ්‍රී ලංකාවේ සංචාරක ආකර්ෂණය ලොවටම ප්‍රදර්ශනය කරමින් සංචාරකයන් 700 දෙනකු රැගත් ‘Viking Mars’ නෞකාව කොළඹ වරායට සේන්දු විය.

වසර දෙකහමාරකට පසු මගී නෞකාවක් කොළඹ වරායට පැමිණි පළමු අවස්ථාව මෙය වන අතර, වසර දෙකහමාරක් පුරා පැවති කොරෝනා සහ ආර්ථික අර්බුදයෙන් පසු සංචාරකයන් 700ක් සහ කාර්ය මණ්ඩලය 450ක් රැගත් වයිකිං මාස් නමැති නෝර්විජියානු නෞකාව ඊයේ (18) පස්වරු 1.00ට කොළඹ වරායට පැමිණි බව වරාය, නාවික හා ගුවන් සේවා අමාත්‍යාංශය අවධාරණය කරයි.

මේ නෞකාව පිළිගැනීම සඳහා වරාය, නාවික හා ගුවන් සේවා ඇමැති නිමල් සිරිපාල ද සිල්වා සහ සංචාරක ඇමැති හරීන් ප්‍රනාන්දු මහත්වරුන් ඇතුළු පිරිසක් වරායේ මගී ජැටිය වෙත පැමිණ සිටි අතර, ඉන්දියාවේ ගෝවේ සිට පැමිණි මේ නෞකාව පැය 24ක් කොළඹ වරායේ නැංගුරම්ලා තිබෙන බවද ඔවුන්ට අවශ්‍ය රේගු, ආගමන විගමන හා තීරුබදු සාප්පු සංකීර්ණ පහසුකම් ලබාදීමේ විශේෂ වැඩපිළිවෙළක් සකසා ඇති බවද එම අමාත්‍යාංශය පවසයි.

2022 වර්ෂයේදී නිෂ්පාදිත මේ නෞකාවේ ගැඹුර මීටර් 6.7ක්, දිග මීටර් 229ක් සහ පළල මීටර් 32ක් වන අතර, නෝර්විජීයානු ධජය යටතේ යාත්‍රා කරන මේ නෞකාව මෙරට ප්‍රමුඛතම සංචාරක ගමනාන්ත කළමනාකරණ ආයතනයක් වන එයිට්කන් ස්පෙන්ස් ට්‍රැවල්ස්හි කළමනාකරණයෙන් මෙරටට පැමිණ ඇත. මේ නෞකාවෙන් පැමිණි සංචාරකයන් කොළඹ, මහනුවර, පින්නවල, ගාල්ල යන නගරවල සංචාරය කිරීමට නියමිත අතර, මුතුරාජවෙල සහ මාදු ගඟෙහි බෝට්ටු සවාරිවලටද එක් වනු ඇත.

වර්තමානයේ දරුවන් අතර පවතින මන්දපෝෂණය පිළිබඳ ගැටලුවට පිළියම් යෙදීමේ අවශ්‍යතාව හිටපු ජනාධිපතිනි චන්ද්‍රිකා බණ්ඩාරනායක කුමාරතුංග (CBK) අවධාරණය කර සිටියි.

රටවල් 200ක් අතරින් දරුණුම මන්දපෝෂණය පවතින රටවල් දහය අතරට ශ්‍රී ලංකාව මේ වන විට ඇතුළත්ව ඇති බවත් අවුරුදු පහට අඩු දරුවන්ගෙන් 20%කට අධික ප්‍රමාණයක් දැඩි මන්දපෝෂණ තත්ත්වයෙන් පෙළෙන බවත් ඇය කියා සිටියි.

ඇය මේබව කියා සිටියේ, නොවැම්බර් 16 වන බණ්ඩාරනායක ජාත්‍යන්තර සම්මන්ත්‍රණ ශාලාවේ පැවති ආහාර සුරක්ෂිතතාව සහ පෝෂණය සඳහා වූ ජාතික ඒකාබද්ධ යාන්ත්‍රණයේ දෙවන රැස්වීමේදීය.

ජනාධිපති රනිල් වික්‍රමසිංහ විසින් ආහාර සුරක්ෂිතතාව සහ පෝෂණය පිළිබඳ ජාතික ඒකාබද්ධ යාන්ත්‍රණයේ ජ්‍යෙෂ්ඨ උපදේශිකාව ලෙස හිටපු ජනාධිපතිනි චන්ද්‍රිකා බණ්ඩාරනායක කුමාරතුංග පත් කර තිබේ.

රජයේ පාර්ශ්වකරුවකු ලෙස නොව, ජාතික වැදගත්කමක් ඇති සේවාවක් ලෙස සලකා සිවිල් සමාජ නායකයින් සමග නිස්සරණාධ්‍යාශයෙන් මේ වැඩසටහන සාර්ථක කර ගැනීම සඳහා කැප වන බව හිටපු ජනාධිපතිනි චන්ද්‍රිකා බණ්ඩාරනායක කුමාරතුංග අවධාරණය කළා ය.

ජනාධිපති ලේකම් කාර්යාලයේ ආහාර සුරක්ෂිතතා අංශයේ ජනාධිපති අතිරේක ලේකම් චාන්දනී විජේවර්ධන, අධ්‍යාපන අමාත්‍යංශයේ ලේකම් එම්.එන් රණසිංහ, හිටපු අධ්‍යාපන ලේකම් වෛද්‍ය ටාරා ද මෙල් ද දැනට පාසල් දරුවන්ට දිවා ආහාරය ලබා දීමේ නියුතු අවායා සංවිධානයේ විජිත නානායක්කාර සහ මේ වන විට පාසල් සිසුන්ට ආහාර ලබා දෙන සිවිල් සංවිධාන නියෝජිතයන් පිරිසක් ද මෙම රැස්වීමට සහභාගී වී සිටියේය.

ආහාර සුරක්ෂිතතාව සහ පෝෂණය සඳහා වූ ජාතික ඒකාබද්ධ යාන්ත්‍රණය විසින් මෙම රැස්වීමේදී පහත ක්‍රියාමාර්ග කඩිනමින් ක්‍රියාත්මක කිරීමට තීන්දු කර තිබේ.

 # කිරි, බිත්තර සහ එළවළු නිෂ්පාදනය ඉහළ නැංවීම සඳහා ක්‍රියාකාරී සැලසුම් කඩිනම් කිරීම.

# විදේශ ආධාර මත අධ්‍යාපන අමාත්‍යාංශය මගින් ක්‍රියාත්මක කරන දරුවන්ට දිවා ආහාරය ලබාදීමේ වැඩසටහන විධිමත් කිරීම.

# ආහාර සැපයීමේදී සිවිල් සංවිධානවල දායකත්වය පුළුල් ලෙස ලබා ගත හැකි ආකාරය.

රට මුහුණ දී සිටින ආර්ථික අර්බුදය හමුවේ දරුවන්ට ප්‍රධාන කෑම වේල හෝ සපයා දිය නොහැකි තත්වයකට දෙමාපියන් පත්ව සිටින බව අනාවරණය කරන එක්සත් ජාතීන්ගේ නවතම වාර්තාවක් මගින් උග්‍ර මන්දපෝෂණය අතින් දැනටමත් දකුණු ආසියා කලාපයේ ඉහළම ස්ථානයක ශ්‍රී ලංකාව රැදී සිටින බව පෙන්වා දී තිබිණ.

එක්සත් ජාතීන්ගේ ජාත්‍යන්තර ළමා අරමුදලේ (UNICEF) දකුණු ආසියානු කලාපීය අධ්‍යක්ෂ ජෝර්ජ් ලැරියා-ඇඩ්ජේ පසුගියදා මෙරට සංචාරයක නිරතවීමෙන් පසු නිකුත් කළ වාර්තාවක් මගින් අනතුරු අඟවා ඇත්තේ ආර්ථික කම්පනය ශ්‍රී ලංකාව දිගින් දිගටම අවුල් කරද්දී, එහි වැඩිම මිල ගෙවන්නේ දුප්පත්ම හා වඩාත්ම අවදානමට ලක්විය හැකි ගැහැනු ළමයින් සහ පිරිමි ළමයින් බවයි.

ශ්‍රී ලංකා පොදුජන පෙරමුණට සමාජ මාධ්‍ය ඔස්සේ මඩ ප්‍රචාර එල්ල කරන්නන්ට එරෙහිව නීතිමය ක්‍රියාමාර්ග ගැනීමට එම පෙරමුණේ නායක හිටපු ජනාධිපති මහින්ද රාජපක්ෂ උපදෙස් දී ඇතැයි වාර්තා වේ..

පොදුජන පෙරමුණු පක්ෂයට එරෙහිව සමාජ මාධ්‍ය ඔස්සේ එසේ මඩ ප්‍රචාර එල්ල කරන කිහිප දෙනෙකු මේ වනවිට හඳුනාගෙන ඇති අතර ඔවුන් පිළිබඳව නීති මගින් කටයුතු කිරීම සඳහා පක්ෂයේ නීතිඥ කණ්ඩායමට එම විස්තර ලබාදීමට කටයුතු කරන බවද මේ පිළිබඳ කළ විමසීමකදී පොදුජන පෙරමුණු මහ ලේකම් නීතිඥ සාගර කාරියවසම් පැවසීය.

මෙම මඩ ප්‍රචාර දියත් කිරීමට සමාජ මාධ්‍ය ඔස්සේ කණ්ඩායම් කිහිපයක් මේ වනවිට කටයුතු කරමින් සිටින බව ද සමාජ මාධ්‍ය ඔස්සේ විවිධ නම්වලින් පෙනී සිටිමින් පොදුජන පෙරමුණට හා එම පක්ෂ නායකයන්ට මඩ ප්‍රහාර දියත් කිරීමට මෙම පිරිස කටයුතු කරමින් සිටින බව ද සාගර කාරියවසම්  පැවසීය.

විශේෂයෙන් ම, එළඹෙන මැතිවරණ ඉලක්ක කරගනිමින් පොදුජන පෙරමුණු පක්ෂය පිළිබඳව ජනතා අප්‍රසාදය ඉස්මතු කරලීම සඳහා මෙම පිරිස බළකායක් ලෙස එක්වී පක්ෂයට පහර දෙන බව ද ඒ මහතා පැවසීය.

මෙම මඩ ප්‍රහාර එල්ල කරන පිරිස පසුගිය දා පැවති අරගලයේදී ද තම පක්ෂයටත්, නායකයන්ටත් විශාල වශයෙන් අගතියක් වන ලෙස අවලාද හා අපහාස සිදු කළ බව ත් තම පක්ෂය ඔවුන්ව හඳුනාගෙන ඇති අතර කඩිනමින් මෙම පිරිසට නීති මගින් කටයුතු කිරීමට පක්ෂ නායක මහින්ද රාජපක්ෂ උපදෙස් දුන් බවද පක්ෂ ලේකම්වරයා කීය.

මේ පිළිබඳව මේ වනවිට පක්ෂයට සම්බන්ධ නීතිඥවරුන් කරුණු අධ්‍යයනය කරමින් සිටින අතර එළඹෙන සතියේදී ඒ පිළිබඳ අවසන් තීරණයකට පැමිණ ඇති බව ත් සාගර කාරියවසම්  වැඩිදුරට ත් කීවේ ය.

සති අන්තයේ විදුලි කප්පාදුව පැය 1 කට සීමා කර තිබේ.

ඒ අනුව විදුලි කප්පාදුව හෙට (19) සහ අනිද්දා (20) සවස 5.30 සිට 8.30 දක්වා පැය 1 ක් කප්පාදු කෙරෙනු ඇත.

තව ද නොවැම්බර් 21 වැනි දා පැය 2 ක විදුලි කප්පාදුවකට මහජන උපයෝගිතා කොමිසමේ (PUCSL) අනුමැතිය හිමිව තිබේ.

ඒ අනුව 21 වැනි දා A-W කාණ්ඩවලට දිවා කාලයේ පැය 1 ක් සහ රාත්‍රී කාලයේ පැය 1 ක් විදුලි කප්පාදුව සිදු කරනු ඇත.

හිටපු පාර්ලිමේන්තු මන්ත්‍රී දුමින්ද සිල්වා නිදහස් කිරීම සම්බන්ධයෙන් ගොනුකර ඇති මූලික ආයිතිවාසිකම් පෙත්සමේ වගඋත්තරකරුවෙකු ලෙස හිටපු ජනාධිපති ගෝඨාභය රාජපක්ෂ නම්කරන ලෙස ශ්‍රේෂ්ඨාධිකරණයට ඉල්ලීමක් ලැබී තිබේ.

එම පෙත්සම ඉදිරිපත් කළ පාර්ශ්වය විසින් අදාළ ඉල්ලීම අද (17 ) දින ශ්‍රේෂ්ඨාධිකරණයෙන් සිදුකර තිබුණි.

භාරත ලක්ෂ්මන් ප්‍රේමචන්ද්‍ර ගේ බිරිඳ වන සුමනා ප්‍රේමචන්ද්‍ර, දියණිය වූ හිරුණිකා ප්‍රේමචන්ද්‍ර සහ මානව හිමිකම් කොමිසමේ හිටපු කොමසාරිස්වරයෙකු වන ජනාධිපති නීතිඥ ගසාලි හුසේන් යන අය විසින් ගොනු කළ මූලික අයිතිවාසිකම් පෙත්සම් තුනක් විභාගය සඳහා අද ගාමිණි අමරසේකර සහ ජනක් ද සිල්වා යන විනිසුරු මඩුල්ල ඉදිරියේ එලෙස කැඳවනු ලැබීය.

එහිදී පෙත්සම්කාර පාර්ශ්වය වෙනුවෙන් පෙනී සිටි එම්.ඒ. සුමන්දිරන්, ජෙෆ්රි අලගරත්නම් යන ජනාධිපති නීතිඥවරුන් සහ නීතිඥ එරාජ් ද සිල්වා අධිකරණයට දන්වා සිටියේ මෙම පෙත්සම්වල වගඋත්තරකරුවකු ලෙස හිටපු ජනාධිපති ගෝඨාභය රාජපක්ෂ නම් කිරීමට තමන් අපේක්ෂා කරන බවය.

ඊට අදාළ ලේඛන දැනටමත් අධිකරණය හමුවේ තමන් විසින් ගොනු කර තිබෙන බවත් එම නීතිඥවරුන් දන්වා සිටියේය.

ඒ අනුව හිටපු ජනාධිපතිවරයා වගඋත්තරකරුවකු ලෙස නම් කිරීමට කර ඇති ඉල්ලීම, කරුණු තහවුරු කිරීම සඳහා ලබන 24 වනදා කැඳවන ලෙස ශ්‍රේෂ්ඨාධිකරණය නියම කර තිබේ.

පෙත්සම්කරුවන් කියා සිටින්නේ භාරත ලක්ෂ්මන් ප්‍රේමචන්ද්‍ර ඝාතනය සම්බන්ධයෙන් වරදකරු කෙරුණු හිටපු පාර්ලිමේන්තු මන්ත්‍රී දුමින්ද සිල්වා මහතාට කොළඹ ත්‍රිපුද්ගල මහාධිකරණ විනිසුරු මඩුල්ලේ බහුතර විනිසුරුවරුන් විසින් මරණීය දණ්ඩනය නියම කළ බවත් එය ශ්‍රේෂ්ඨාධිකරණයේ පංච පුද්ගල විනිසුරු මඩුල්ලක් විසින් අනුමත කර ඇති බවය.

එසේ තිබිය දී පිළිගත් නීතිමය පටිපාටිය අනුගමනය කිරීමකින් තොරව ඔහුට පොදු සමාව ප්‍රදානය කර නිදහස් කිරීමට හිටපු ජනාධිපති ගෝඨාභය රාජපක්ෂ කටයුතු කළ බව පෙත්සමෙන් චෝදනා කර තිබේ.

මේ තුළින් සිය මූලික අයිතිවාසිකම් උල්ලංඝනය වී ඇති බවට තීන්දුවක් ලබාදෙන ලෙසත් දුමින්ද සිල්වා නිදහස් කරමින් ප්‍රදානය කර ඇති පොදු සමාව බලරහිත කිරිමේ නියෝගයක් නිකුත් කරන ලෙසත් පෙත්සම්කරුවන් ශ්‍රේෂ්ඨාධිකරණයෙන් ඉල්ලා සිටී.

මූලාශ්‍රය - මව්රට

මෙරට සමාජ මාධ්‍ය කිහිපයක 2022 නොවෙම්බර් 16 දින සඳහන් වූ ප්‍රධාන ශීර්ෂය වූයේ 'ඇමති ටිරාන්ගේ නියෝගයට පොලිස් ලොක්කෙක් මූණටම බෑ කියයි!'

සහ අනු සිරසෙහි සඳහන් වූයේ 'කොළඹ සියලුම විරෝධතා මර්දනය කරන්න්නැයි ඇමති ටිරාන්ගේ පොලිසියට නියෝග' කළ වගයි." යනුවෙනි.

මෙකී වෙබ් අඩවි යනු ශ්‍රී ලංකා පොලිසිය කීර්තිනාමය හැමවිටම කෙලෙසීමට ව්‍යාජ කරුණු ඉදිරිපත් කරමින් එහි පාඨකයාව නොමග යවමින් හිට් වෙන්න ලියන තුට්ටු දෙකේ පඩංගු ය.

මෙහි සඳහන් වන උක්ත ලිපියද ව්‍යාජ කරුණු දක්වමින් ශ්‍රී ලංකා පොලිසිය කීර්ති නාමය කෙලෙසීමට දරන තවත් නිශ්ඵල උත්සහයක ප්‍රතිපලයකි.

මෙහිදී අනු සිරසෙහි සඳහන් වන සියලු විරෝධතා මර්දනය කරන්නැයි නියෝග කලා යැයි කීමම නීති විරෝධී ප්‍රකාශයකි. මෙහිදී ටිරාන් අලස් අමාත්‍යවරයා පසුගිය දා පාර්ලිමේන්තුවේදී ප්‍රකාශ කර සිටියේ විරෝධතා කිරීමේදී අනුගමනය කල යුතු නීතියානුකූල අවසර ගැනීම් ක්‍රම පටිපාටිය අනුගමනය කරමින් පවත්වන කිසිදු විරෝධතාවයකට පොලිසියෙන් බාධා නොකරන බවයි. ඒ බව එක්සත් ජාතීන්ගේ කාර්යාලය ඉදිරිපිට පැවති විරෝධතාවය කිසිදු පොලිසියේ බාධාවකින් තොරව පැවැත්වීම දැක්විය හැක. සියලු විරෝධතාවයන් මර්දනය කිරීමේ නියෝගය රටේ විධායක ජනාධිපති වරයාටවත් කල නොහැක්කකි. කිමද එය අදහස් ප්‍රකාශ කිරීමේ අයිතිය නොහොත් භාශාණයේ නිදහස අමු අමුවේ උල්ලංඝනය කිරීමක් නිසාවෙනි.

නමුදු රාජ්‍ය අස්ථාවර කිරීමේ නීති විරෝධී විරෝධතාවයන් විසුරුවා හැරීමේ බලය ශ්‍රී ලංකා පොලිසියට පොලිස් ආයතන පනතට ප්‍රකාරව හිමිව තිබෙන්නෙ කුමන්ත්‍රණකාරී ලෙස රාජ්‍ය බිඳවැට්ටවීම වැලැක්වීමටයි.

පසුගිය 15 වෙනිදා මහජන ආරක්ෂක අමාත්‍යාංශ සාකච්ඡාවේ සිදුවූ යේ කුමක්ද?

පොලිස්පතිවරයා ජේෂ්ඨ පොලිස් අධිකාරි මාරපනගෙන් පුද්ගලයකු අත්අඩංගුවට ගැනීමට ප්‍රමාද වීම සම්බන්ධව කරුණු විමසුවේය.එහිදී මාරපන නිදහසට කාරණා එකින් එක පැහැදිලි කෙරිණි.මෙහිදී පොලිස්පතිවරයා නැවත නැවත එම ප්‍රශ්නය මොහුගෙන් විමසීමේදී ඔහුගේ අවසාන පිළිතුර වූයේ මම නීතිය අනුව වැඩ කරා යන්නයි. කතාව උණුසුම් වන විට ඊට මැදිහත් වූ ඇමැතිවරයා කියා සිටියේ ඒ අදාල පුද්ගලයා පොලිස් නිලධාරීන් තල්ලු කරමින් හැසිරූ ආකාරය පොලිසියේ කීර්තිනාමය කෙලෙසීමක් බවත් පොලිස්පතිවරයාගේ නියෝගය අනුව එම පුද්ගලයාව කලින්ම අත්අඩංගුවට ගත්තේ නම් එය වලක්වා ගත හැකිව තිබුන බවත්ය.

අතීතය මතක් කර දෙමින් ඇමැතිවරයා පැවසුවේ මහ මග පොලිසියේ නිලධාරීන්ට පහරදීමේ සිට නැවත පොලිසියේ ගෞරවය නැවත ලබාගැනීමේ අරමුණ සඳහා සියලු පොලිස් නිලධාරීන් කැප වෙන මෙවන් සමයක පොලිස්පතිවරයාගේ නියෝගය පැහැර හැරීම වරදක් බවත් පොලිස්පතිවරයාගේ නියෝග පිලිනොපැදීම නීතියානුකූල නොවන ක්‍රියාවක් බවත් ය.

මෙම සිදුවීම මෙකී වෙබ් වාර්තා කිරීම කර තිබුනේ නීති විරෝධී විරෝධතාකරුවන් හා පොලිසිය අතර අර්බුදකාරී තත්ත්වය තීව්‍ර වන ආකාරයටයි. රටම අර්බුදයක මුහුණ දෙමින් සිටින විට නැවත වටයකින් රට අස්ථාවර කිරීමේ කුමන්ත්‍රණයක් ආරම්භ වී ඇත්දැයි සැක සහිතයි.

එහිදී මාරපන වගේ පොලිස් නිලධාරීන් කුමන්ත්‍රණකරුවන්ගේ ඉත්තන් වී රාජ්‍ය විරෝධී කැරැල්ලකට පාර කපමින් ඇති බවත් අදාළ වෙබ් අඩවි මේ කුමන්ත්‍රණයේ මාධ්‍ය අනුග්‍රහකයන් ද යන්න සැක සහිත බවත් නොලියා සිටීමට නොහැකිය. එනිසා මේ සම්බන්ධව මහජන ආරක්ෂක ඇමැති වරයා හා ජනාධිපතිවරයා අවධානය යොමුකළ යුතුය. ම්ව්‍ය ජනතාවට ඇත්ත වාර්තා කරන වගකීම් සහගත වෘත්තීය මාධ්‍යවේදීන්ට කරන බාධාවක් හෝ මර්දනයට අතවැනීමක් නොවේ. මෙසේ කියන්නේ මාධ්‍ය නිදහස වල්බූරු කරන අවස්ථාවාදීන් අතින් අපහරණය වීම වලක්වා ගැනීම සඳහා යි.

විශේෂ වාර්තාකරුවෙකු විසිනි

අරගලය පැවති ජූලි මස 09 වනදා කොටුව ජනාධිපති මන්දිරයට අයුතු ඇතුළු වීමක් කළැයි කියන සිද්ධියේ 59 වන සැකකරු ලෙස නම් කර සිටි නීතිඥ නුවන් බෝපගේ රුපියල් ලක්ෂ පහක ශරීර ඇපයක් මත මුදාහැරීමට කොළඹ කොටුව මහේස්ත්‍රාත් තිළිණ ගමගේ අද (17) නියෝග කළේය.

නීතිඥවරුන් මාර්ගයෙන් අධිකරණයට භාර වූ නීතිඥවරයාට ඇප නියම කළ මහේස්ත්‍රාත්වරයා 19 වැනිදා පෙරවරු 10.00 ට කොළඹ මධ්‍යම අපරාධ කොට්ඨාසයට ගොස් ප්‍රකාශයක් ලබා දෙන ලෙසටද නියෝග කළේය.

නඩුව කැඳවූ අවස්ථාවේදී සැකකාර නීතිඥ නුවන් බෝපගේට විදේශ ගමන් තහනමක් නිකුත් කරන ලෙසට පොලීසිය කළ ඉල්ලීමට ඔහු වෙනුවෙන් අධිකරණයට කරුණු දැක්වූ ජනාධිපති නීතිඥ සාලිය පීරිස් විරෝධතාවය ප්‍රකාශ කළේය.

ඔහු සැකකරුවෙක් ලෙස නම් කළ පසු අධිකරණයට භාර වූ අයෙකු බවත්, පොලීසිය එම සැකකරුව අත්අඩංගුවට නොගත් බවත් සඳහන් කළ මහේස්ත්‍රාත්වරයා, ඔහු නීතිඥවරයෙක් වන බැවින් අධිකරණය මග හරින බවට කරුණු තිබෙනවාදැයි පැමිණිල්ලෙන් ප්‍රශ්න කර සිටියේය.

එමෙන්ම පුද්ගලයන් අපහසුතාවයට පත් කරන නියෝග නොඉල්ලන ලෙසත්, සැකකරු අධිකරණය මග හරියිකියා හැගෙයි නම් අවශ්‍ය නියෝග තමන් ලබා දෙන බවත් ප්‍රකාශ කළ මහෙස්ත්‍රාත්වරයා පැමිණිල්ලේ ඉල්ලීම ප්‍රතික්ෂේප කළේය.

මෙහිදී නීතිඥ නුවන් බෝපගේ වෙනුවෙන් ජනාධිපති නීතිඥ සාලිය පීරිස් සමග නීතිඥවරුන් 50 ක පමණ පිරිසක් ඉදිරිපත්ව සිටි බවත් වාර්තා වෙයි .

ශ්‍රී ලංකාවේ ඉදිරි සංවර්ධන සැලසුම් සහ ප්‍රතිපත්ති පිළිබඳ ලෝක බැංකු නියෝජිතයන් සමග සාකච්ඡාවක් ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායකගේ සහ මුදල් රාජ්‍ය අමාත්‍ය ෂෙහාන් සේමසිංහ, ආයෝජන ප්‍රවර්ධන රාජ්‍ය අමාත්‍ය දිලුම් අමුණුගම ගේ ප්‍රධානත්වයෙන් අද (17) මුදල් අමාත්‍යාංශයේ දී පැවැත්විණි.

ශ්‍රී ලංකාව සඳහා වන ලෝක බැංකු අධ්‍යක්ෂ ෆාරීස් හඩඩ් ස්වෝස් (Faris Hadad-Zervos) ඇතුළු නියෝජිත පිරිස සමඟ පැවති මෙම සාකච්ඡාවේ දී මෙරට ඉදිරි සංවර්ධන සැලසුම් සහ ප්‍රතිපත්ති පිළිබඳ දීර්ඝ ලෙස විමසා බැලිනි.

රාජ්‍ය මූල්‍ය අධීක්ෂණය හා ණය කළමනාකරණය වැඩිදියුණු කිරීම, බදු පරිපාලන ප්‍රතිපත්තිය වැඩි දියුණු කිරීම, ස්වෛරී මූල්‍ය අංශයේ සම්බන්ධය සහ පද්ධතිමය අවදානම් අඩු කිරීම, බලශක්ති අංශයේ කාර්ය සාධනය වැඩිදියුණු කිරීම හා කාබන් විමෝචනය අඩු කිරීම, ප්‍රතිපත්ති අවිනිශ්චිතතාව අවම කිරීම සහ ආර්ථිකයේ තරගකාරීත්වය වැඩි කිරීම, රාජ්‍ය ව්‍යවසාය ප්‍රතිව්‍යුහගත කිරීම, පුද්ගලික ප්‍රාග්ධනය ක්‍රියාත්මක කිරීම සහ එමඟින් බ්‍රෝඩ්බෑන්ඩ් වෙළෙඳපොළේ තරගකාරිත්වයක් ඇති කිරීම, සමාජ ආරක්ෂණ ආයතන ශක්තිමත් කිරීම හා බෙදාහැරීමේ පද්ධති ඉලක්කගත කිරීම යනාදී ක්ෂේත්‍ර අටක් පිළිබඳව ද මෙහිදී සාකච්ඡා කෙරුණු අතර ඊට අදාළ යෝජනා ද ඉදිරිපත් කෙරිණි.

ජනාධිපති ලේකම් සමන් ඒකනායක , ජනාධිපති ජ්‍යෙෂ්ඨ ආර්ථික උපදේශක ආචාර්ය ආර්.එච්.එස්. සමරතුංග , මුදල් අමාත්‍යංශයේ ලේකම් මහින්ද සිරිවර්ධන, මහ බැංකු අධිපති ආචාර්ය නන්දලාල් වීරසිංහ සහ රේඛීය ආයතනවල රාජ්‍ය නිලධාරීහු ද මීට එක්ව සිටියහ.

ඉන් අනතුරුව ජනාධිපති රනිල් වික්‍රමසිංහ හමුවූ ශ්‍රී ලංකාව සඳහා වන ලෝක බැංකු අධ්‍යක්ෂ ෆාරීස් හඩඩ් ස්වෝස් (Faris Hadad-Zervos) ඇතුළු නියෝජිත පිරිස මෙම කරුණු පිළිබඳ ජනාධිපතිවරයා දැනුවත් කළහ.

දකුණු අප්‍රිකානු ජනාධිපති සිරිල් රමපෝසා සහ ජනාධිපති රනිල් වික්‍රමසිංහ අතර හමුවක් ඊයේ (16) පස්වරුවේ කටුනායක ගුවන් හමුදා කඳවුරේදී පැවැත්විණි.

ඉන්දුනිසියාවේ පැවතී ජී20 සමුළුවට සහභාගී වී නැවත සිය රට බලා යන අතරතුරදී කෙටි සංචාරයක් සඳහා දකුණු අප්‍රිකානු ජනාධිපතිවරයා මෙරටට පැමිණ තිබේ.

මෙහිදී නායක දෙපළ ද්විපාර්ශ්වික සාකච්ඡාවල නිරතවූ අතර ආර්ථික සහයෝගීතාව සහ ආයෝජන ඉලක්ක කර ගනිමින් දෙරට අතර ද්වීපාර්ශ්වික සබඳතා තවදුරටත් ශක්තිමත් කර ගැනීම පිළිබඳ අවධානය යොමුවිය.

ශ්‍රී ලංකාවේ සංචාරක ව්‍යාපාරය පුළුල් කිරීමට දකුණු අප්‍රිකාවේ සහාය ලබා ගැනීම පිළිබඳව ද සාකච්ඡා විය.

ප්‍රජාවන් අතර කල්පවත්නා සංහිඳියාවක් ඇති කර ගැනීම වෙනුවෙන් විශ්වසනීය සත්‍ය සෙවීමේ යාන්ත්‍රණයක් පිහිටුවිම සඳහා දකුණු අප්‍රිකානු සහාය, මඟපෙන්වීම සහ උපදේශනය ලබා ගැනීම කෙරෙහි ද සැලකිල්ල යොමුකෙරින.

හමුව සනිටුහන් කරමින් නායක දෙපළ අතර සමරු තිළිණ හුවමාරු කර ගැනීම ද සිදු කෙරිණි.

විදේශ කටයුතු අමාත්‍ය අලි සබ්‍රී, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක, ජනාධිපති ලේකම් සමන් ඒකනායක ඇතුළු දෙරටේ නියෝජිතයෝ පිරිසක් මෙම අවස්ථාවට එක්ව සිටියහ.

රටට වැරදුණු හේතුවට අයවැයෙන් වැරදිකරුවන් බවට පත්කර තිබෙන්නේ සහනාධාර මත යැපෙන අසරණ ජනතාව බව ජාතික ජනබලවේගයේ මන්ත්‍රීනී ආචාර්ය හරිනි අමරසූරිය පාර්ලිමේන්තුවේදී පැවසුවාය.

ඒ අයවැය තෙවැනි දින (17) විවාදයට සහභාගී වෙමින් ය.

ලැබෙන ආදායමින් ජීවිතය හරියට කළමනාකරණය කරගන්නට බැරි පුරවැසියන්ට මත වරප්‍රසාදිත ජීවිත ගත කරන අය විසින් වරද පටවා තිබෙන බව පැවසු මන්ත්‍රීවරිය ප්‍රශ්නය මේ විදිහට දකින්න නම් කොච්චර නපුරු විය යුතුදැයි ද ප්‍රශ්න කර සිටියාය.

අයවැයෙන් ප්‍රශ්නය හෝ දේශපාලන තත්වය තේරුම් ගෙන නැහැ. ජනතාව ආණ්ඩුවෙන් ඉල්ලන්නේ මොකක්ද කියා කිසිම සංවේදී බවක් පෙන්නුම් කරන්නේ නැහැ. ජනතාව පාලකයන්ගේ දුරස් වී ඇත්තේ ඇයි දැයි කිසිම හැඟීමක් නැතිව මෙය ඉදිරිපත් කර තිබෙනවා.

දේශීය ණය ප්‍රතිව්‍යුහගත කිරීම සම්බන්ධයෙන් ආණ්ඩුව කිසිදු තීරණයක් ගෙන නොමැති බව මුදල් රාජ්‍ය අමාත්‍ය ශෙහාන් සේමසිංහ පවසයි.

ට්විටර් පණිවුඩයක් නිකුත් කරමින් රාජ්‍ය අමාත්‍යවරයා මේ බව සඳහන් කර ඇති අතර විදේශීය ද්විපාර්ශවික සහ වාණිජ ණයහිමියන් සමග ණය ප්‍රතිව්‍යහුගත කිරීමට අදාළව පමණක් ආණ්ඩුවේ අවධානය යොමු වී ඇති බවත් සඳහන් කර ඇත.

රාජ්‍ය බැංකු සහ දේශීය මූල්‍ය ක්ෂේත්‍රයට අහිතකර බලපෑමක් එල්ල විය හැකි බැවින් දේශිය ණය ක්ෂේත්‍රය ප්‍රතිව්‍යහගත කිරීමට රජය අවධානය යොමු කර නොමැති බවත් රාජ්‍ය අමාත්‍යවරයා පෙන්වාදෙයි.