පුවත්

කළු ගංතොට සිංහයා වගේ ඉන්න කෙනා මේ දවස්වල එයාගේ කණ්ඩායම වෙනුවෙන් වැඩිය පෙනී සිටින්නෙ නැතිලු.

මොකද එයා ටිකක් එතනින් ඈත්වෙලාලු ඉන්නේ. හේතුව එයා ඉන්න පැත්තේ නායක තැනගේ වැඩ ටිකක් අල්ලන්නේ නැති නිසා.

කොහොම වුණත් මේ සම්බන්ධයෙන් හොයලා බලද්දි තමයිලු ආරංචිය ආවේ. මෙයාටත් ලොකු ලොකු තැන්වලින් ඇමැති පට්ටමක් ගන්න කියලා ආරාධනා ඇවිල්ලලු. ඉතින් මෙයත් පීල්ල මාරු කරන්න කතා කරල තිබෙන බව සමහරු කියනව.

හැබැයි පීල්ල මාරුවෙන්න කතා කළාට වැඩේ ඉක්මනින් වෙන පාටක් නෑලු. මොකද මෙයාට පොහොට්ටුවේ කට්ටිය හීනි බාල්දියක් පෙරළලා. ඉතින් ඒ නිසා එයාගේ වැඩෙත් දැනට කොට උඩලු. හැබැයි තවම එයා අර කැබිනට් පට්ටම් ලැයිස්තුවේ ඉන්නවා කියල‍යි ආරංචිය.

දේශපාලන වාර්තාකරු

ශ්‍රී ලංකා යුද්ධ හමුදාවේ සේවයකර විශ්‍රාම ලබන වෘත්තීය දක්ෂතාවලින් පරිපූර්ණ යුද්ධ හමුදා සාමාජිකයින්ට තම සුදුසුකම් අනුව රැකියා අවස්ථා සොයාගැනීම පහසු කිරීම සඳහා යුද්ධ හමුදාධිපති ලුතිතන් ජෙනරල් විකුම් ලියනගේගේ සංකල්පයක් අනුව නිර්මාණය කළ නව වෙබ් අඩවිය යුද්ධ හමුදාධිපතිතුමන් විසින් පසුගිය දා එළිදැක්වීය.

වෘත්තීය විශේෂඥතාවයෙන් හෙබි යුද්ධ හමුදා සාමාජිකයින් විශ්‍රාම යෑමෙන් පසුව වෙනත් වෘත්තියක නිරතවීමට බලාපොරොත්තුවන්නේ නම් ඔවුන් මෙම වෙබ් අඩවිය පරිශීලනය කර තමන්ට ගැලපෙන වෘත්තියක් සොයාගැනීමේ හැකියාව හිමිවේ.

ප්‍රධාන සංඥා නිලධාරි මේජර් ජෙනරල් ලලිත් හේරත් සහ තොරතරු තාක්‍ෂණ අධ්‍යක්‍ෂ බ්‍රිගේඩියර් සජිත් ලියනගේ ගේ මඟපෙන්වීම යටතේ තොරතරු තාක්‍ෂණ අධ්‍යක්‍ෂ මණ්ඩලය වෙතින් මෙම නව වෙබ් අඩවිය නිර්මාණය කරනු ලැබීය. දිවයින පුරා ස්ථාපිත ප්‍රධාන පෙළේ සමාගම් 13 ක් මේ වනවිට මෙම නව වෙබ් අඩවිය සමඟ ලියාපදිංචි වී ඇත.

(දිලංක ගුණතිලක)

ස්ත්‍රී පුරුෂ සමාජභාවය, සමානාත්මතාවය සහ කාන්තාවන් සවිබලගැන්වීම පිළිබඳ පනතක් ඉදිරියේදී පාර්ලිමේන්තුවට ඉදිරිපත් කිරීමට කටයුතු කරන බවත් එම පනත කෙටුම්පත් කිරීම සඳහා කාන්තා මන්ත්‍රීවරියන්ගේ සංසදයට තමා උපදෙස් දී ඇති බවත් ජනාධිපති රනිල් වික්‍රමසිංහ පැවසීය.

පාර්ලිමේන්තුවේ පමණක් නොව, අනෙකුත් අංශවලද කාන්තා නියෝජනය වැඩි කළ යුතු බවත් රාජ්‍ය අංශය මෙන්ම පෞද්ගලික අංශය ඒ සම්බන්ධව අවධානය යොමු කළ යුතු බවත් ජනාධිපතිවරයා අවධාරණය කළේය.

ජනාධිපති රනිල් වික්‍රමසිංහ මහතා මේ බව සඳහන් කළේ අද (01) පාර්ලිමේන්තුවේ දී විශේෂ ප්‍රකාශයක් සිදු කරමිනි.

මෙරට පළමු මන්ත සභාවේ කාන්තා නියෝජනය 2%ක් වූ බවත් සර්ව ජන ජන්ද බලය හිමිවී වසර 91ක් ගතව තිබුණත් වත්මන් පාර්ලිමේන්තුවේ කාන්තා නියෝජනය 5.3%ක් පමණක් බවත් ජනාධිපතිවරයා පෙන්වා දුන්නේය.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය.

මට භාර අමාත්‍යාංශය ගැන අද මම කතාකරන්න බලාපොරොත්තු වෙනවා. අපේ පාර්ලිමේන්තු කාන්තා සංසදය විසින් ස්ත්‍රී පුරුෂ සමාජභාවය මත පදනම් වූ ප්‍රචණ්ඩත්වයට එරෙහි දින 16ක ක්‍රියාකාරිත්වයක් ආරම්භ කර තිබෙනවා. ඒ ගැන අපි ප්‍රශංසා කළයුතුයි.
1931තමයි මේ රටට සර්වජන ඡන්ද බලය හිමි වුණේ. පළමු රාජ්‍ය මන්ත්‍රණ සභාවේ කාන්තාවන් හිටියේ නැහැ. ඩොනමොර් කොමිසමෙන් කාන්තාවන්ට ඡන්දය ඉල්ලන්න කියලා කිව්වම අපේ හිටපු ජනාධිපතිනි චන්ද්‍රිකා කුමාරතුංග මැතිණයගේ මිත්තනිය එදා ඡන්දය ඉල්ලුවා. ඒ ඡන්දයෙන් එක කාන්තාවක්වත් තේරි පත් වුණේ නැහැ.

මාස 08ක්,09ක් යනකොට අපේ මුත්තා වන ජේ.එච්. මීදෙණිය අධිකාරම්තුමාගේ මරණයෙන් පස්සේ මොළමුරේ මැතිණිය පත් වුණා. එතකොට පළමු වතාවට විරුද්ධ පක්ෂයෙන් ආවෙත් කාන්තාවක්. ඒ ෆ්ලොරන්ස් සේනානායක. එතකොට එදා නියෝජිතයන් 51න් එක කාන්තා නියෝජනයක් තිබුණා. ඒ කියන්නේ ඒ සභාවේ 2%ක නියෝජනයක්.

සර්ව ජන ඡන්දයෙන් අවුරුදු අනූ එකකට පස්සෙ තමයි මම අද කතා කරන්නේ. අද අපේ කාන්තා මන්ත්‍රීවරියන් 12 දෙනෙක් සිටිනවා. ඒ කියන්නේ 5.3%ක නියෝජනයක්. වසර 91ක් තුළ අපි 2%ක ප්‍රමාණය 5%ක් බවට පමණයි පත්කරගෙන තිබෙන්නේ.

ආණ්ඩු පක්ෂයේ සිටියත්, විපක්ෂයේ සිටියත් අපි සියලුදෙනා පිළිගත යුතුයි අපිට කාන්තා නියෝජනය වැඩිකරගන්න නොහැකි වුණා කියලා. එදා අපේ කාන්තා නියෝජනය 2%ක්ව තිබූ අවස්ථාවේ එක්සත් රාජධානියේ පාර්ලිමේන්තුවේත් 2%ක කාන්තා නියෝජනයක් තිබුණා කියලා මම හිතන්නේ නැහැ. අතළොස්සයි හිටියේ. ඒත් අද කැනඩා පාර්ලිමේන්තුව, ලොග් සභාව දෙස බලන්න. එහෙම නම් කාන්තා නියෝජනය ගැන අපි සියලුදෙනා අවධානය යොමු කළ යුතුයි. අපිට වගකීමක් නෑ කියන්න බැහැ. මමත් ඇතුළුව අපි සියලුදෙනා මේ පාර්ලිමේන්තුවේ හිටියා. 2015දී ගෙන ආ ප්‍රතිපත්තියෙන් පළාත් පාලන ආයතනවල කාන්තා නියෝජනය වැඩි කළා. ඒත් පසුව කළ සංශෝධනය නිසා එය නැති වුණා.

අද අපේ ජනගහණයෙන් 52%ක් කාන්තාවන්. අපේ පාර්ලිමේන්තු මන්ත්‍රීවරුන්ගෙන් 5.3%ක් කාන්තාවන්. ඒ නිසයි මම පාර්ලිමේන්තු කාන්තා සංසදයට භාර දුන්නේ මේ වැඩකටයුතු ඉදිරියට කරගෙන යාමට. අදාළ රාජ්‍ය අමාත්‍යවරු දෙදෙනා මේ පිළිබඳ කතා කරයි.
ස්ත්‍රී පුරුෂ සමාජභාවය, සමානත්වය සහ කාන්තාවන් සවිබල ගැන්වීම සඳහා වන පනතක් සකස් කිරීම දැන් කරගෙන යනවා. එක පනතක් වෙනුවට පනත් දෙකක් ඉදිරිපත් කරනවා කියලා ඔවුන් මා සමග සඳහන් කළා. එය හොඳ දෙයක්. එහි සම්පූර්ණ වැඩකටයුතු කරගෙන යන්න කියලා මම ඔවුන්ට කියන්න කැමතියි.

දෙවනුව මේ පනතේම සඳහන් වෙලා තිබෙනවා නීති හා ප්‍රතිපත්ති ප්‍රතිසංස්කරණය පිළිබඳව. කාන්තා අයිතිවාසිකම්, ස්ත්‍රී පුරුෂ සමාජභාවය හා සමානාත්මතාවය යන කාරණාවලට නායකත්වය ලබාදීම සහ ස්ත්‍රී පුරුෂ සමාජත්වයේ සම සාධාරණත්වය සහ සමානත්වය සම්බන්ධයෙන් වන ගැටලු සඳහා මැදිහත්වීමට පාර්ලිමේන්තුවට අවශ්‍ය නිර්දේශ ලබා දීමට නියෝග සහිතව ජාතික කාන්තා කොමිසමක් යන නාමයෙන් ස්වාධින කොමිසමක් පාර්ලිමේන්තු පනතක් මගින් ස්ථාපනය කිරීමට. ආණ්ඩුව එයට පක්ෂයි කියලා මම කියන්න කැමතියි. මම හිතන්නේ නැහැ විපක්ෂයෙනුත් ඒ සඳහා විරුද්ධත්වයක් තිබෙයි කියලා.

තෙවනුව තිබෙන්නේ ඔම්බුඩ්ස්මන් තනතුරක් ඇති කිරීමයි. මේ පිළිබඳ කටයුතු කිරීමට ඔම්බුඩ්ස්මන් කෙනෙක් නෙවෙයි, ඔම්බුඩ්ස්වුමන් කෙනෙක් පත් කරගන්න වෙයි. අපිට මේ පිළිබඳ කතා කරන්න තිබෙන්නේ පාර්ලිමේන්තුවේ විතරක් නොවෙයි. අපේ වැවිලි සමාගම් දෙස බැලුවොත් එහි සේවය කරන බහුතරයක් කාන්තාවන්. එහි අධ්‍යක්ෂ මණ්ඩලයේ එක කාන්තාවක් ඉන්නවද, අපි මේ පිළිබඳ අවධානය යොමු කළ යුතුයි.

විශේෂයෙන්ම අද ඇඟළුම් කම්හල්වල බහුතරයක් ඉන්නේ කාන්තාවන්. ඇත්ත වශයෙන් කාන්තාවන්ට අධ්‍යක්ෂ මණ්ඩලවල එම වගකීම භාරදිය යුතුයි. මේ වැරුද්ද සිදු කර තිබෙන්නේ පුද්ගලික අංශය පමණක් නොවෙයි. රාජ්‍ය අංශයත් මේ ගැන අවධානය යොමු කළ යුතුයි. මේ පිළිබඳ නීතියක් ගෙනාවොත් ඒ කටයුතු කරන්න පුළුවන්. මෙලෙස විශාල අඩුපාඩුකම් තිබෙනවා. අපි මේවා විසඳිය යුතුයි.

අද අධ්‍යාපන ක්ෂේත්‍රයේ වැඩිපුර ඉන්නේ කාන්තාවන්. සෞඛ්‍ය ක්ෂේත්‍රයේ වගේම පරිපාලනයෙත් එහෙමයි. පුද්ගලික අංශයේ එවැනි දියුණුවක් ඇති වී නැහැ. විශ්වවිද්‍යාලයේ වෙන්න පුළුවන් ඉන් පිටත වෙන්න පුළුවන් අද 50% කට වඩා ඉන්නේ කාන්තාවන්.

ඒ වගේම ළමයින් සම්බන්ධ වැඩකටයුතුත් අපි මේ පාර්ලිමේන්තු කාන්තා සංසඳයට භාර දී තිබෙනවා. විශේෂයෙන් මෙහි ප්‍රශ්න ගණනාවක් තිබෙනවා. අද දෙමාපියන් අහිමි අනාථ දරුවන් කී දෙනෙක් සිටිනවද, ඒත් අපි භාරඅරගෙන තිබෙන්නේ ඉතා සුළු පිරිසක්.
කවුරුත් ඒ දරුවන් රඳවා සිටින ස්ථාන දෙස බලන්නේ නැහැ. ඒවායේ තිබෙන්නේ පැරණි ගොඩනැඟිලි. හරියට ගුරුවරු නැහැ. ඒ නිසා නව ළමා ආරක්ෂන සේවයක් මේ රටේ ඇති කළ යුතුව තිබෙනවා. ඒ පිළිබඳවත් මේ සංසදය වැඩකටයුතු කරගෙන යනවා.

අබාධිත පුද්ගලයන් වෙනුවෙන් අපි සළසන සේවාව ප්‍රමාණවත් නැහැ. ඒ වගේම වැඩිහිටි පුද්ගලයන් වෙනුවෙන් ලබාදිය හැකි ප්‍රතිපාදන අඩු වී තිබෙනවා. අපි ණය ගෙවනවා, අපි වැටුප් ගෙවනවා, නැත්නම් අලාභ ලබන සංස්ථාවලට මුදල් යොදවනවා. මෙම තත්ත්වය වෙනස් කිරීමට කටයුතු කිරීම පිළිබඳ ඇතැම් අය දෝෂාරෝපණය කරනවා.

සමාජ සුබසාධනය වෙනුවෙන් අපි යොදවලා තිබෙන මුදල් ප්‍රමාණවත් නැහැ. එම ප්‍රතිපාදන ඉහළ නැංවමිට පෙර විධිමත් ලෙස ආයතන පද්ධතිය ක්‍රියාත්මක විය යුතුයි. නැත්නම් එම මුදල් අපතේ යනවා. ඇත්තටම තිරය පිටුපස සිදුවන්නේ වෙන දෙයක්. තිරය ඉදිරිපස තමයි අපි සිටින්නේ. ආණ්ඩුව, විපක්ෂය හෝ පෞද්ගලික අංශය වෙන්න පුළුවන්, මේ සියලුදෙනා රඟපාන්නේ මේ තීරය ඉදිරිපස. මේ තිරය කවුරුත් විවර කරලා නැහැ. අපි ඒ තිරය ඉවත් කර බැලිය යුතුයි.

මීට පෙර මේ අමාත්‍යාංශය අපි වැදගත් අමාත්‍යාංශයක් ලෙස සැලකුවේත් නැහැ. මේ පළමු අවස්ථාව. විශේෂයෙන් අපේ තලතා අතුකෝරාළ මැතිණිය අධිකරණ ඇමතිවරිය ලෙස කටයුතු කළා. ඒ වගේම පවිත්‍රා මන්ත්‍රිතුමිය සෞඛ්‍ය ඇමතිණිය විදියට කටයුතු කළා. ඒත් වැදගත් අමාත්‍යංශ ගණනාවක් තවම කාන්තාවන් කරන්නේ නෑ.

ඉන්දියාවේ මුදල් ඇමතිවරියක් ඉන්නේ. එතුමිය ඊට පෙර කටයුතු කළේ ආරක්ෂක ඇමතිවරිය විදියට. ලිස් ට්‍රස්ට් කලින් හිටියේ විදේශ ඇමතිවරිය විදියට. අපිත් ඒ තත්ත්වය ඇතිකළ යුතුයි. මම මේ කාන්තා සංසදයට භාරදනවා නීති රීති කෙටුම්පත් සකස් කරලා එවන්න, ප්‍රතිපත්ති එවන්න. අපි මේ කාලය තුළදී ඒ සම්බන්ධව කටයුතු කරමු.

අපිට යුතුකමක් තිබෙනවා කාන්තා නියෝජනය පාර්ලිමේන්තුව තුළ පමණක් නොවෙයි, අනෙක් ක්ෂේත්‍රවලත් ඉහළ නංවන්න. එය සිදුකරන ආකාරය අපි පසුව කතා කරමු.

හැම කෙනාටම සමෘද්ධිය ලබාදෙන්න අපිට මුදල් නෑ . අපි ගන්න ඇතැම් තීරණ ජනප්‍රිය නොවෙන්න පුළුවන්. පාර්ලිමේන්තුවට ශක්තිය තිබිය යුතුයි මේ වැඩ වැඩකටයුතු ඉදිරියට කරගෙන යන්න. සමෘද්ධියට අදාළ වැඩකටයුතු අපේ ඇමතිතුමා කරගෙන යනවා. සමෘද්ධිය හිමි විය යුතු විශාල කොටසක් සිටිනවා. ඇයි අපිට ඔවුන්ට සමෘද්ධිය ලබා දෙන්න බැරි. නුසුදුසු අය ඉවත් කළොත් සුදුසු අයට මේ ප්‍රතිලාභය ලබාදෙන්න පුළුවන්. සමහරුන් වසර 20-30ක් ඔය ලැයිස්තුවේ ඉන්නවා. ඒ නිසා පළමුවෙන්ම සුදුසු අය කවුද, අලුත් අය කොහොමද ඇතුලත් කරගන්නේ කියලා සොයා බැලිය යුතුයි.

සමහරු දේශපාලන කටයුත්තක් ලෙස ඒ දෙස බැලුවත්, සමෘද්ධිය ලබාගත යුතු අයට, පළමුව සමෘද්ධිය ලබාදිය යුතුයි. සුදුසුකම් නැති අය එතනින් ඉවත් කළ යුතුයි. සියලුදෙනාට මේ ප්‍රතිලාභය ලබාදිමට අපිට හැකියාවක් නැති බවත් ප්‍රකාශ කළ යුතුයි. අපි මේ භාරගෙන තිබෙන්නේ අසීරු කටයුත්තක්. රටේ ආර්ථිකයයි, සමාජයයි හදන්න ගන්න තීරණ ජනප්‍රිය නොවෙන්න පුළුවන්. ඒත් ඒ වැඩකටයුතු කරගෙන යන්න පාර්ලිමේන්තුවට ශක්තිය තිබිය යුතුයි.

අධ්‍යාපනය ගැන කතා කළොත් 1946 අපිට නිදහස් අධ්‍යාපනය ලැබුණා. අපට අවශ්‍ය 80 දශකයේ මේ රටේ තිබ්බ පාසල් පද්ධතිය නොවෙයි. අද අපට අවශ්‍ය 2023 සිට වසර 25ක් ඉදිරියට යන පාසල් අධ්‍යාපන ක්‍රමයක් බව කිව යුතුයි.

මහරගම අපේක්ෂා රෝහලේ හිඟ ඖෂධ මිලදී ගැනීම සඳහා ශ්‍රී ලංකා ක්‍රිකට් ආයතනයෙන් ඩොලර් ලක්ෂ පහක ආධාරයක් ලබාදී ඇති නමුත් තවමත් එම මුදල ඖෂධ මිලදී ගැනීම සඳහා යොදාගැනීමට සෞඛ්‍ය අමාත්‍යංශය කටයුතු කර නොමැති බව විශ්වාසදායක කටයුතු ආරංචිමාර්ග පවසයි.

ශ්‍රී ලංකා ක්‍රිකට් ආයතනය විසින් ඩොලර් ලක්ෂ පහක මුදල (රුපියල් කෝටි 15 ක් පමණ ) පරිත්‍යාග කිරීම සිදුවූයේ ජනාධිපති රනිල් වික්‍රමසිංහ වෙත වන අතර ඒ පසුගිය සැප්තැම්බර් (16) වනදා වන අතර ආරංචිමාර්ග සඳහන් කරන ආකාරයට මේ වන විටත් ශ්‍රී ලංකා මහ බැංකුව විසින් චෙක්පතක් හරහා සෞඛ්‍ය අමාත්‍යංශය වෙත නිකුත්කර ඇත.

චෙක් පතක් නිකුත්කර තිබියදී පවා පසුබිමක එම මුදල් යොදවා පිළිකා රෝහලේ හිඟ ඖෂධ සැපයීමට සෞඛ්‍ය අමාත්‍යංශය කටයුතු නොකිරීම බරපතළ සැකසංකා මතුවන තත්ත්වයක් බව සෞඛ්‍ය ක්ෂේත්‍රයේ වෘත්තීය ප්‍රවීණයන්ගේද අදහස වී තිබේ.

සැකසංකා දනවන තවත් සිදුවීමක් වන්නේ අපේක්ෂා රෝහලේ පිළිකා රෝගීන්ට අත්‍යවශ්‍ය ඖෂධ හිඟ බව ප්‍රසිද්ධියට පත්වීමත් සමඟ පරිත්‍යාගශීලීන් රැසක් ඒ සඳහා ආධාර කිරීමට ඉදිරිපත්වී ලබාදුන් මුදල් ද සෞඛ්‍ය අමාත්‍යංශය භාරයේ රඳවාගෙන ඇති නමුත් ඖෂධ මිලදී ගැනීමට විධිමත් ලෙස යොමුවීම ප්‍රමාද කිරීමය.

එසේම ඊයේ (29) පාර්ලිමේන්තුවේ පැවති සෞඛ්‍ය අමාත්‍යංශ වැය ශීර්ෂයට අදාළ විවාදයේදීද අත්‍යවශ්‍ය ඖෂධ 40 ක පමණ හිඟයක් ඇති බව අනාවරණය විය. එම හිඟ ඖෂධ අතුරින් ඖෂධ 20 කට ආසන්න ප්‍රමාණයක් පිළිකා රෝගීන් සඳහා නිකුත් කරන ඖෂධ බවත් දැනගන්නට ඇත.

මේ සම්බන්ධයෙන් වැඩිදුරටත් ලැබෙන ආරංචිමාර්ග සඳහන් කර සිටින්නේ අදාළ ඖෂධ මිලදී ගැනීම් සඳහා ටෙන්ඩර් කැඳවීම ප්‍රමාද කිරීමක් සෞඛ්‍ය අමාත්‍යංශය පාර්ශ්වයෙන් පෙන්නුම් කරන බවය. හිඟ ඖෂධ සම්බන්ධයෙන් වේලාසන දැනුම්දෙන නමුත් ටෙන්ඩර් පිරිවිතර ඇතුළු විවිධ කොන්දේසි ගෙනැහැර දක්වමින් විධිමත් මිලදී ගැනීම් පමා කිරීමට සෞඛ්‍ය අමාත්‍යංශයේ බලධාරීන් කටයුතු කරන බවටද චෝදනාවක් ඇත.

ඒ හදිසි මිලදී ගැනීම් යටතේ හිඟ ඖෂධ මිලදී ගැනීමේදී ලැබෙන කොමිස් මුදල් යනුවෙන් බවටද බරපතළ චෝදනාවක් ඇත. මෙකී චෝදනාව කාලයක් තිස්සේ සෞඛ්‍ය ක්ෂේත්‍රයේ පවතින්නක් වන නමුත් ක්ෂේත්‍රයේ ප්‍රවීණයන් පවසන්නේ, රටේ ආර්ථිකය බරපතළ දුෂ්කරතාවකට මුහුණදුන් විට එහි වැඩිම අවධානමක් එල්ල කෙරෙන සෞඛ්‍ය ක්ෂේත්‍රය සම්බන්ධයෙන් මේ තරම් දුර්වල සහ මහජන විශ්වාසය කඩවන ආකාරයට අමාත්‍යංශය දක්වන හැසිරීම කොහෙත්ම අනුමත කළ නොහැකි බවය.

විදුලිය ගාස්තු ලබන වසරේ ජනවාරි සහ ජූනි මාසවලදී පියවර දෙකකින් වැඩි කිරීමට කැබිනට් මණ්ඩලයේ අනුමැතිය හිමිවූ බව විදුලි බල මණ්ඩලයේ අතිරේක සාමාන්‍යාධිකාරී රොහාන් සෙනෙවිරත්න ආර්ථිකය ස්ථායීකරණයට අදාළ කෙටි සහ මධ්‍ය කාලීන වැඩසටහන් හඳුනා ගැනීම සඳහා වන ජාතික සභා අනු කමිටුවේදී පැවසීය.

ඒ අනුව විදුලි බිල වැඩි කිරීම සඳහා මහජන උපයෝගීතා කොමිසමේ අනුමැතිය ලබා ගැනීමට අවශ්‍ය කටයුතු කරගෙන යන බවද ඔහු සඳහන් කළේය.

දැනට පවතින පාඩුව පියවා ගැනීමට නම් විදුලි බිල සියයට 70කින් පමණ වැඩි විය යුතු බව පැවසූ විදුලිබල මණ්ඩල නියෝජිතයෝ විදුලිය ගාස්තු පසුගිය කාලයේදී වැඩි කළද එය විදුලිබල මණ්ඩලයේ පාඩුව පියවා ගැනීමට ප්‍රමාණවත් නොවූ බැවින් විදුලි බිල වැඩි කිරීම කැබිනට් මණ්ඩලයෙන් මෙලෙස අනුමැතිය ලබාගත් බවද ප්‍රකාශ කළේය.

“ආර්ථිකය ස්ථායීකරණයට අදාළ කෙටි සහ මධ්‍ය කාලීන වැඩසටහන් හඳුනා ගැනීම සඳහා වන ජාතික සභා අනු කමිටුව එහි සභාපති මන්ත්‍රී පාඨලී චම්පික රණවකගේ ප්‍රධානත්වයෙන් පාර්ලිමේන්තු සංකීර්ණයේදී රැස්විය. මෙම තොරතුරු අනාවරණය වූයේ එම රැස්වීමේදී ය.

විදුලි බල ක්ෂේත්‍රයේ පවතින ගැටලු විසදීමට සහ අදාළ යෝජනා ලබා ගැනීම සදහා විදුලි බල ක්ෂේත්‍රයට අදාළ රාජ්‍ය සහ පෞද්ගලික ආයතනවල නියෝජිතයෝ මෙම රැස්වීමට කැඳවනු ලැබ සිටියහ.

විදුලි බල මණ්ඩල පාඩුව පියවා ගැනීමේ අරමුණින් විදුලි ගාස්තු වැඩි කළද එය දැරිය නොහැකි මට්ටමක පැමිණ ව්‍යාපාර ආදිය කඩා වැටීමේ අවදානමක් මතුවිය හැකි බව කමිටුවේ සභාපති පාඨලී චම්පික රණවක මහතා මෙහිදී පෙන්වා දුන්නේ ය.

මේවන විට විදුලිබල මණ්ඩලය බැංකු සහ විදුලි බල සැපයුම්කරුවන් ඇතුළු විවිධ පාර්ශවයන්ට ගෙවිය යුතු ණය ලෙස රු කෝටි 65000 ක ට (බිලියන 650 ) ආසන්න ප්‍රමාණයක් පවතින බවද මෙහිදී තොරතුරු අනාවරණය විය.

ඉන් රුපියල් කෝටි 3500 කට ආසන්න ප්‍රමාණයක් (බිලියන 35ක්) පුනර්ජනනීය බලශක්තිය සැපයූ ආයතන සදහා ගෙවීමට ඇති බවත් තාප විදුලිය සැපයුම්කරුවන්ට රුපියල් කෝටි 7500 ක් ( බිලියන 75) ගෙවීමට ඇති බවත් විදුලිබල මණ්ඩල නියෝජිතයෝ පැවසූහ.

ඉදිරියේදී ලබා ගැනීමට අපේක්ෂා කරන රුපියල් කෝටි 5000 ක (බිලියන 50 ) ණය මුදලින් මෙම සැපයුම් කරුවන්ට යම් කොටසක් හෝ ගෙවීමට අපේක්ෂා කරන බවද ඔවුහු ප්‍රකාශ කළහ.

-ලංකාදීප

මඩකළපුව දිස්ත්‍රික්කය තුළ සංචාරක කර්මාන්තය ප්‍රවර්ධනය සඳහා ඉඩම් හඳුනා ගැනීම පිළිබඳ සාකච්ඡාවක් ජනාධිපති රනිල් වික්‍රමසිංහගේ ප්‍රධානත්වයෙන් අද(30) පෙරවරුවේ ජනාධිපති කාර්යාලයේ දී පැවැත්විණි.

ඒ අනුව මඩකළපුව දිස්ත්‍රික්කයේ වෙරුගල්ආරු සිට මඩකළපුව දක්වා ඇති වෙරළාශ්‍රිත රජයේ සහ පෞද්ගලික ඉඩම් හඳුනා ගැනීම පිළිබඳව මෙහිදී සාකච්ඡා විය.

එම ප්‍රදේශය සංචාරක කලාපයක් ලෙස සංවර්ධනය කරමින් 2023 වසරේදී මඩකලපුව හොඳම සංචාරක ගමනාන්තයක් බවට පත්කර ගැනීම මෙහි අරමුණ වී තිබේ.

මඩකළපුව දිස්ත්‍රික් ලේකම් කේ. කරුණාහරන් ඇතුළු ප්‍රාදේශීය ලේකම්වරු කිහිප දෙනෙකු සූම් තාක්ෂණය ඔස්සේ මෙම සාකච්ඡාවට එක් වූහ.

ජනාධිපති ලේකම් සමන් ඒකනායක, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානී සාගල රත්නායක, ජනාධිපති ජ්‍යෙෂ්ඨ ආර්ථික උපදේශක ආචාර්ය ආර්.එච්.එස්. සමරතුංග, සංචාරක හා ඉඩම් අමාත්‍යාංශයේ ලේකම් ඩබ්ලිව්.ඒ. චූලානන්ද පෙරේරා, වනජීවි හා වන සම්පත් සංරක්ෂණ අමාත්‍යාංශයේ ලේකම් ආර්.එම්.සී.එම්. හේරත් සහ රේඛීය ආයතනවල ප්‍රධානීන් ඇතුළු නිලධාරින් මෙම සාකච්ඡාවට සහභාගී වූහ.

ඔක්සිජන් ජනන යන්ත්‍ර මිලදී ගැනීමේ ටෙන්ඩරයකට අනුමැතිය දීමට ඇමැති දියණියකගෙන් සෞඛ්‍ය අමාත්‍යාංශයේ අතිරේක ලේකම්වරයෙකු කප්පම් ඉල්ලා ඇති බව සෞඛ්‍ය වෘත්තීයවේදීන්ගේ සංගමය සඳහන් කරයි.

අදාළ ටෙන්ඩරය අනුමැතිය දීමට නම් තම විශ්‍රාම වයස දීර්ඝ කර දෙන්නැයි අතිරේක ලේකම්වරයා ඇමති දියණියගෙන් ඉල්ලා ඇතැයි එම සංගමයේ සභාපති රවි කුමුදේශ් පවසයි.

වැඩි මිල ලංසුව ඉදිරිපත් කර ඇති ආයතනයට එම ටෙන්ඩරය ලබා දීම අත්‍යවශ්‍ය බවද එම අතිරේක ලේකම්වරයා, අමාත්‍යවරයාගේ දියණියට දැනුම් දී ඇති බවත් ඔහු පවසයි .

සංචාරක අමාත්‍යාංශය හඳුනාගෙන ඇති සියලුම සංචාරක කලාප රාත්‍රී විදුලි කප්පාදුවෙන් නිදහස් කරන බවත් විදුලිබල හා බලශක්ති අමාත්‍ය කංචන විජේසේකර පවසයි.

අමාත්‍යවරයා සඳහන් කරන්නේ නොරොච්චෝලේ ‘ලක්විජය’ ගල්අඟුරු බලාගාරයේ 3 වැනි ජනන යන්ත්‍රය ලබන දෙසැම්බර් 15 වන දින ජාතික විදුලිබල පද්ධතියට නැවත එක් කිරීමට නියමිතව බවත් ඉන් පසුව අදාළ කලාප විදුලි කප්පාදුවෙන් නිදහස් කරන බවය.

රටපුරා රාත්‍රී විදුලි කප්පාදුව පැය 1 දක්වා අඩු කිරීමටත් නත්තල් සහ අලුත් අවුරුදු සමයේ විදුලි කප්පාදුව අත්හිටුවීමටත් බලාපොරොත්තු වන බවත් දකුණු සහ ඇල්ල සංචාරක කලාප රාත්‍රී විදුලි කප්පාදුව දෙසැම්බර් 1 වැනිදා සිට අත්හිටුවන බවත් අමාත්‍යවරයා වැඩිදුරටත් සඳහන් කරයි.

දේශගුණික විපර්යාසවලට ප්‍රතිඵලදායක ලෙස විසඳුම් ලබාදිය හැකි රටවල් දේශගුණික ක්‍රියාකාරකම්වලට ඍජුව මැදිහත් නොවීම අනාගත මානව වර්ගයාගේ පැවැත්මට තර්ජනයක් විය හැකි බව ජනාධිපති රනිල් වික්‍රමසිංහ පැවසීය.

COP27 සමුළුවේ සාර්ථකත්වයට ලොකුම බාධාව දේශපාලනීකරණය සහ කල්මරමින් සිටීම බව ද ජනාධිපතිවරයා පෙන්වා දුන්නේය.

ජනාධිපති රනිල් වික්‍රමසිංහ මේ බව සඳහන් කළේ COP27 ගිවිසුම පිළිබඳ විශේෂ ප්‍රකාශයක් 2022-11-28 දින නිකුත් කරමිනි.

එම සම්පූර්ණ ප්‍රකාශය පහත පරිදි වේ.

මානව වර්ගයාගේ අනාගතයට ඇති විශාලතම තර්ජනය වන දේශගුණික විපර්යාසවල‍ට මුහුණ දීම සඳහා COP යටතේ වසර 27 ක් තිස්සේ ලෝක නායකයින් රැස්ව සිටිති. එහෙත්, COP ක්‍රියාවලිය මගින් එකඟවී ඇති පරිදි දේශගුණික ක්‍රියාකාරකම් පිළිබඳ විශ්වීය සහ සහයෝගී සැලැස්මක් ක්‍රියාවට නැංවීමට අපි මුලපුරා නැත.

COP27 සමුළුවේදී ඇතිකරගත් එකඟතාවන්, අනුපූරක සහ ප්‍රගතිශීලී පිළියමක් කරා ලෝකයේ ජාතීන් යොමු කිරීමට අපොහොසත් වී ඇත. කණගාටුවට කරුණක් නම්, සාර්ථකත්වයට ඇති ලොකුම බාධාව දේශපාලනීකරණය සහ කල්මරමින් සිටීමයි. සමුළුවේ අවසාන ප්‍රතිඵලය කණස්සලුදායකය.

විශාලතම හානිවලට ඓතිහාසික ලෙස වගකිව යුතු හා දේශගුණික විපර්යාසයන්ට ප්‍රතිඵලදායක විසඳුම් ලබා දිය හැකි රටවල නායකයින් මෙම සමුළුවට සහභාගි නොවීම, දේශගුණික විපර්යාස සම්බන්ධයෙන් ක්‍රියාකාරකම්වල ඉදිරි ගමනට විශාල බාධාවකි.

සමකය ආසන්නයේ දකුණු අර්ධ ගෝලයේ ජාතීන්ට (Global South) අර්ධ ජයග්‍රහණයක් වන ‘හානි හා අලාභ අරමුදල‘ ලබා ගැනීම වෙනුවෙන් සටන් කිරීමට සිදුවිය. එය සාත්ෂාත් කර ගනු ලැබූවේ G77 ජාතීන් එකාවන්ව පෙළ ගැසී පසුගිය වසරවල එල්ල කළ පීඩනයේ ප්‍රතිඵලයක් වශයෙනි.

හානි හා අලාභ අරමුදල නිවැරදි දිශානතියේ පියවරක් වුවත්, ඒ සඳහා අවශ්‍ය මූල්‍ය දායකත්වය සැපයීම සඳහා වගකිව යුතු ජාතීන් හඳුනාගැනීමේ දී දැඩි අතපසු වීමක් සිදු වී තිබේ. අරමුදල පිහිටුවීමේ මූලාශ්‍රවල වගකීම් හෝ වන්දි පිළිබඳ ප්‍රතිපාදන ඇතුළත් නොවේ. එනිසා, G77 රටවලට හානි හා අලාභ අරමුදල එහි පූර්ණ විභවතාවයෙන් ක්‍රියාත්මක කිරීම සඳහා මෙම අඩුපාඩු සපුරාලීමේ ව්‍යාපාරය අඛණ්ඩව කරගෙන යාමට අවශ්‍ය වනු ඇත.

එපමණක් නොව, මෙම අරමුදල පසුගාමීය. එය සිදු වූ හානි සඳහා පමණක් වන්දි ලබා දෙනු ඇත. එය දේශගුණික විපර්යාසවලට මූලික වූ හේතු ආමන්ත්‍රණය නොකරයි. එබැවින් දැනට සිදු වෙමින් පවතින පරිසර විනාශය මැඩපැවැත්වීම අත්‍යවශ්‍ය වන අතර ඒ සඳහා ගනු ලබන ක්‍රියාමාර්ග වෙනුවෙන් ඇමරිකානු ඩොලර් බිලියන 100ක මූල්‍ය ආධාර ඉලක්කය සපුරා ගැනීමට ඉලක්කගත උත්සාහයක් දැරීම අත්‍යවශ්‍ය කරුණකි.

ලෝකය මීට පෙර පුරෝකථනය කළ ප්‍රමාණයට වඩා වේගයෙන් දියුණු වෙමින් පවතින අතර, ඒ නිසා දේශගුණික විපර්යාස අවම කිරීමේ ප්‍රයත්නයන් කල්මැරීමට ඉඩ හැරිය නොහැක. ගෝලීය උෂ්ණත්වය සෙල්සියස් අංශක 1.5ට වඩා වැඩි වීමට ඉඩ නොදිය යුතු බවට පසුගිය වසරේදී ලෝකය ඒකමතික තීරණයකට පැමිණියේය. මේ සඳහා ක්‍රියාකාරී සැලැස්මකට ද එකඟ විය. කෙසේ වෙතත්, එහි මුල් ඉලක්කය නොවෙනස්ව තිබෙන අතර, මෙම ඉලක්කය සපුරා ගත යුතු ආකාරය COP 27 හි ගත් තීරණ දෙස බලන විට යම් පසුබෑමකට ලක්ව තිබේ .

තවද, ෆොසිල ඉන්ධනවලින් ක්‍රමානුකූලව ඉවත්වීමේ හෝ විමෝචනය පිළිබඳ නව ඉලක්ක කෙරෙහි දැඩි කැපවීමකින් ක්‍රියාත්මක වන බව නොපෙනෙයි. මෙම ගිවිසුම් වෙඩි පහරකින් ලත් තුවාලයකට දමන ලද කුඩා වෙළුම් පටියක් බඳුය. දේශගුණික විපර්යාස නූතන ලෝකයට ත්‍රස්තවාදය වැනිම තර්ජනයකි. ලෝක නායකයන් අවංකව මෙයට සම්බන්ධ නොවන්නේ නම්, ගෝලීය දේශගුණය නරක අතට හැරෙන විට සහ වාසස්ථාන අහිමි වන විට පැත්තකට වී සිටීමේ වරදට වරදකරුවන් වනු ඇත.
එක්සත් අරාබි එමීර් රාජ්‍යයේ පැවැත්වීමට නියමිත COP28 සමුළුව තවත් ආරම්භයක්ම නොවිය යුතු අතර, ඒ වෙනුවට අතීත තීරණ ක්‍රියාත්මක කිරීමේ කේන්ද්‍රස්ථානයක් විය යුතුය. එය බලශක්ති ක්ෂේත්‍රය කෙරෙහි දැඩි අවධානයක් යොමු කෙරෙන මෙන්ම දේශගුණික විපර්යාස සඳහා ගෝලීය ප්‍රතිචාරය ශක්තිමත් කෙරෙන වසරක ආරම්භය සනිටුහන් කරන මුද්‍රාවක් විය යුතුය.

මෙම සමුළුව අර්ථවත් වීමට නම්, COP 28 හි තිරසාර ප්‍රගතියක් ලබා ගත යුතුය. එසේ නොමැති නම්, COP විසුරුවා හැරීම වඩාත් සුදුසුය. මේ ආකාරයට පවත්වා ගෙන යා යුතු නැත.

එම්.ඊ නිව් ඩයමන්ඩ් නෞකාව ගිනි බත් වූවාට පසු එම නැවට මෙරටින් පිටවීමට ඉඩදීම කනගාටුදායක තත්වයක් බවත් එසේ කටයුතු කිරීම සම්බන්ධයෙන් එම කාලසීමාවේදී අදාල අමාත්‍යාංශය බාරව සිටි දේශපාලන අධිකාරියටද විදේශ කටයුතු අමාත්‍යංශයේ ලේකම්වරයාට සහ නාවික හමුදාපතිවරයාටද තමා කෙළින්ම චෝදනා කරන බවත් රාජ්‍ය අමාත්‍ය අරැන්දික ප්‍රනාන්දු පවසයි.

නැවට යෑමට ඉඩ දුන්නේ විශාල ප්‍රශ්නයක් පැවතුණු අවස්ථාවක බව පැවසූ රාජ්‍ය අමාත්‍යවරයා මේ සමග නාලක ගොඩහේවාගේ නමද ඉදිරියට ඇවිත් තිබෙන බවද සඳහන් කළේය.

රාජ්‍ය අමාත්‍යවරයා මේ බව සඳහන් කර සිටියේ අද (30) පාර්ලිමේන්තුවේදී විපක්ෂ නායක සජිත් ප්‍රේමදාස විසින් ස්ථාවර නියෝග 27 (2) යටතේ මතු කළ ප්‍රශ්නයකට පිළිතුරු දෙමින්ය.

එක්ස්ප්‍රස් පර්ල් වන්දිය ඩොලර් වලින් මිස රුපියල්වලින් ගැනීමට නීතිපති දෙපාර්තමේන්තුව එකඟවීම කණගාටුදායක බවද ඔහු පැවසීය.

එසේම එක්ස්ප්‍රස් පර්ල් සම්බන්ධයෙන් මුල් අවස්ථාවේදී ඩොලර් කෝටි 700 ක වගේ වන්දියක් ගැන කතා කළ නමුත් මේ වන විට එය ඩොලර් කෝටි තුන්සියයකට පහත බැස ඇති බවත් මෙම සිද්ධියට අදාළව නඩු දැමිය යුතු යැයි තමා මුලසිටම සිටින ස්ථාවරය බවත් සඳහන් කළේය.

සමුද්‍රීය ආරක්ෂක අධිකාරියට වරාය ඇතුළේ කාර්යාලයක් පවා නොමැති බවත් ඇත්තේ කන්ටේනර් පෙට්ටි දෙකක් පමණක් බවත් රාජ්‍ය අමාත්‍යවරයා පැවසීය.

ඊයේ (29) අඟහරුවාදාත් තවත් උණුසුම් දවසක්. එක පැත්තකින් පෑවිල්ල නිසා පරිසරයත් උණුසුම්. අනිත් පැත්තෙන් මේ දවස්වල පාර්ලිමේන්තුවේ තියෙන අයවැය කාරක සභා වාද විවාද නිසා දේශපාලන කරලියත් උණුසුම්.

අඟහරුවාද දවසේ පාර්ලිමේන්තුවේ වාද විවාද පැවැත්වුණේ සෞඛ්‍යය, බුද්ධශාසන, ආගමික හා සංස්කෘතික කටයුතු අමාත්‍යංශ ගැන. ඒත් ඉතින් මාතෘකා නිදිමත නිසාදෝ ආණ්ඩු පක්ෂයේ වැඩි දෙනෙක් පාර්ලිමේන්තුව ඇතුළේ ඉඳලා නෑ. උදේ වරුවේ මොන මොන රස්තියාදුවේ ගියත් හවසට නිසැකවම පාර්ලිමේන්තු එන්නම ඕන කියලා ආණ්ඩු පක්ෂයේ ප්‍රධාන සංවිධායක ප්‍රසන්න රණතුංග හැමෝටම දැනුම් දීලා තිබුණා.

වැය ශීර්ෂයක් ගැන හදිස්සියේ ඡන්දයක් ඉල්ලුවොත් ඡන්දෙ දෙන්න සූදානමින් ළඟපාත ඉන්න කියලයි කියලා තිබුණේ.

සෞඛ්‍යය කොහොම වෙතත් ආගමික කටයුතු බුද්ධ ශාසන හා සංස්කෘතික අමාත්‍යාංශ ගැන ඡන්දයක් එයි කියලා හුඟදෙනෙක් හිතන්න නෑ.

ඒ වුණත් දෙමළ ජාතික සන්ධානයේ පොන්නම්බලම් මන්ත්‍රීවරයා බුද්ධශාසන වැය ශීර්ෂය ගැන බෙදීමක් ඉල්ලුවා. මේ නිසා කලබල වුණ ආණ්ඩු පක්ෂ ප්‍රධාන සංවිධායක කාර්යාලය ආණ්ඩුවේ මන්ත්‍රීවරුන්ට ලවක් දෙවක් නැතුව දුරකථන ඇමතුම් දෙන්න ගත්තා. ඒත් දෙයියනේ මන්ත්‍රීවරුන් මොන තරම් කාර්යබහුල ද කියනවා නම් දුරකථනය උත්සන්නවත් ඔවුන්ට ඉස්පාසුවක් තිබිල නෑ...

මේ හින්දා නහුතෙට තද වෙච්ච මංත්‍රීවරු ඉන්න තැන්වලට ගිහිල්ලා, බැඳගෙන එන්න කඹයක් ගෙනත් දියල්ලා කියලා කාර්යාලයේ කොල්ලන්ට කෙල්ලන්ට කෑගැහුවා කියලයි අපිට ආරංචි උනේ...

විවාදයේ දී වෙනදා වගේම සමගි ජන බලවේගයේ පසුපෙළ මන්ත්‍රීවරු, ආණ්ඩුවට දැඩි ප්‍රහාර එල්ල කළා. ඔන්න ඔය අතරෙ චමින්ද විජේසිරි මන්ත්‍රීවරයා මහා අමුතු කතාවක් කිව්වා...

"මේ ආණ්ඩුව ආණ්ඩු පක්ෂයේ මන්ත්‍රීවරුන්ට වියත් පුරය නිවාස යෝජනා ක්‍රමය යටතේ ගෙවල් දීපු විදිය වැරදියි. ආණ්ඩුව හදපු ගෙවල් මේ මන්ත්‍රීවරුන්ට සින්නක්කර දීලා. හැබැයි ඒකට වියදම් කරලා තියෙන්නෙත් රජයේ මුදල්. මේක මහා විශාල රාජ්‍ය මුදල් අවබාවිතාවක්..." චමින්ද විජේසිරි ඔන්න ඔය විදියට දිගින් දිගටම ආණ්ඩුවට ගහන්න පටන් ගත්තා.

ආණ්ඩු පක්ෂයේ ප්‍රධාන සංවිධායක ප්‍රසන්න රණතුංග සිටියෙ පාර්ලිමේන්තුවේ ඔහුගේ කාර්යාලයේ. මේ කතාව ඇහිච්ච ඔහු විනාඩි දෙකට සභාගැබට ඇවිල්ලා ඊට උත්තර දුන්නා...

"මේ මන්ත්‍රිතුමා කියන්නේ පට්ටපල් බොරු. මන්ත්‍රීවරුන්ට මේ ගෙවල් සින්නක්කර දීලත් නෑ ඒවට ආණ්ඩුවේ මුදල් වියදම් කරලත් නෑ. නිකං බොරුවට පාර්ලිමේන්තුවේ කතා කරලා බොරුව ජනගත කරන්න එපා මන්ත්‍රිතුමා. කරුණු හරියට දැනගෙන කතා කරන්න..." ප්‍රසන්න අවවාදාත්මක ස්වරයෙන් චමින්දට කියද්දි ඔහුත් මෙන්න මෙහෙම උත්තර දුන්නා...

"නෑ නෑ... මම කිව්වේ මන්ත්‍රීවරුන් රක්ෂණයෙන් සල්ලි අරගෙන මේවට ගෙව්වා කියලායි. රක්ෂණය හරහායි ගෙවීම් කරල තියෙන්නෙ.." චමින්ද උත්තර දුන්නා.

මේ ගෙවල් මොනවද කියලා අපිටත් පැහැදිලි නෑ... පහුගිය දවස්වල අරගලය හේතුවෙන් මන්ත්‍රීවරුන් රැසකටම නිවාස අහිමි උනා නේ... අන්න ඒ වෙනුවට කොළඹ මෙයාලට ඉන්න ලබා දෙන නිවාස තමයි මේ...

කොහොම වුණත් ලස්සනම කතාව එළියට ආවේ ඊට පස්සේ ප්‍රසන්න කරපු හෙළිදරව්වත් එක්ක...

" ඔබතුමාට මේ ගෙවල් ගැන මෙච්චර උනන්දුවක් ආවෙ කොහොමද කියලා මම හොයල බැලුවා... පහුගිය දවස්වල මේ මන්ත්‍රීතුමා ගිහින් තියෙනවා UDA එකට... ගිහින් අහල තියෙනවා අපටත් ගෙයක් ගන්න බැරිද කියලා. එතන හිටපු නිලධාරියෙක් කිව්වලු ප්‍රසන්න ඇමතිතුමා ඕකේ කරනවා නම් අපට ප්‍රශ්නයක් නෑ කියලා... එදා ගිහින් එතනින් ගෙයක් ගන්න ට්‍රයි කරපු මන්ත්‍රිතුමා තමයි අද ඇවිල්ල මෙතන මේ විදිහට කතා කරන්නේ..."

කොහොම වුණත් මේ වගේ වැඩ කාටත් පැහැදිලි විනිවිද පෙනෙන ගණුදෙනුවලින් සිදුවෙනව නම් තමයි හොඳ...

මේ විවාදය හොඳටම උණුසුම් වුණේ හවස්වරුවේ. විපක්ෂයෙන් ආණ්ඩු පක්ෂයට එල්ලවුණු චෝදනා වැඩිවෙනකොට ආණ්ඩුවෙත් මන්ත්‍රීවරු සංවිධානය වෙලා උත්තර දෙන්න පටන් ගත්තා. කවුරුත් එකතුවෙලා වට කරලා ගහන්න පටන් ගත්තෙ සජිත්ට. විවාදයට සංස්කෘතික අමාත්‍යංශයේ වැය ශීර්ෂයත් අදාල නිසා බැටින් විකට් එකක ප්ලේ කරන කලූලා සනත්ල වගේ ආන්ඩුවේ මන්ත්‍රීවරු එක දිගට පහර දුන්නා....

සජිත් ඇමති වෙලා හිටපු කාලේ ඉංජිනේරු සංස්ථාවේ සේවකයෝ යොදවලා සජිත්ගෙ තාත්තට අයත්ව තිබුණ අඹන්පොළ අඹ වත්තෙ වැඩ කරපු හැටි සමහරු කිව්වා...

ඒ විතරක්ද... නෑ... ඉංජිනේරු සංස්ථාවේ සේවකයෝ සජිත් ගේ බිරිඳ ජලනි ට අයත් beauty සැලූන් එකක වැඩට යොදවපු හැටි ගැනත් කියවුනා. ඒ beauty salon එක තිබිල තියෙන්නා තියෙන්නෙ ෂැන්ග්‍රිලා හෝටලයේ.

කොහොමින් කොහොම හරි මේ දෙපැත්තෙ වැඩවලට සේවකයෝ යවලා ඒගොල්ලො නඩත්තු කරන්න ඉංජිනේරු සංස්ථාව යොදවපු මුදල රුපියල් මිලියන 42ට අධිකයි කියලා තමයි කියවුනේ...

දේශපාලන වාර්තාකරු

එක්සත් ජාතික පක්ෂය 2023 වසර සඳහා ආසන සංවිධායකවරුන් පත්කිරීමේ සම්මුඛ පරීක්ෂණ හෙට (01) සිරිකොත පක්ෂ මූලස්ථානයේදී ආරම්භ කිරීමට නියමිත අතර මේ වන විට ඊට අයදුම්පත් දහස් ගණනක් ලැබී ඇති බව වාර්තා වෙයි.

අයදුම්පත් යොමුකළ පිරිස අතර බහුතරයක් වෘත්තිකයන් වීම කැපී පෙනෙන කරුණක් බවත් එජාප ආරංචිමාර්ග පවසයි.

එක්සත් ජාතික පක්ෂයේ නියෝජ්‍ය නායක රුවන් විජේවර්ධන සහ මහලේකම් පාලිත රංගේ බණ්ඩාරගේ ප්‍රධානත්වයෙන් යුත් කමිටුවක් විසින් සුදුස්සන් තෝරා ගැනීමට නියමිත බවත් වාර්තා වෙයි.

මේ සම්බන්ධයෙන් අදහස් දක්වමින් එක්සත් ජාතික පක්ෂයේ මහ ලේකම් පාලිත රංගේබණ්ඩාර පවසන්නේ විනයගරුක පක්ෂයක් ලෙස එක්සත් ජාතික පක්ෂයේ ආසන සංවිධායකයන් , දිස්ත්‍රික් කළමනාකරුවන් සහ ආසන කළමනාකරුවන් පත්කර ගැනීමේදී උගත් බුද්ධිමත් තරුණ පිරිස වෙත වැඩි අවධානයක් ලබාදෙන ලෙස පක්ෂ නායක ජනාධිපති රනිල් වික්‍රමසිංහ උපදෙස් ලබාදී ඇති බවය.

වැඩිදුරටත් අදහස් දැක්වූ පක්ෂ මහ ලේකම්වරයා මෙසේද පැවසීය.

" එක්සත් ජාතික පක්ෂයේ ආසන සංවිධායක , දිස්ත්‍රික් කළමනාකරු, ආසන කළමනාකරු යන ධූර සඳහා අයදුම්පත්‍ර දහසකට වඩා ලැබී තිබෙනවා. ,ඒ සියලු අයදුම්පත්‍ර සලකා බැලීම සම්මුඛ පරීක්ෂණ මණ්ඩල 8 කින් සමන්විත සම්මුඛ පරීක්ෂණ ක්‍රියාවලියක් ආරම්භ කරනවා. ඒ අනුව එක්සත් ජාතික පක්ෂය වෙනුවෙන් ආසන සංවිධායක වරුන්, දිස්ත්‍රික් කළමනාකරුවන්, ආසන කළමනාකරුවන් බඳවා ගැනීම යුහුසුළු කිරීමට කටයුතු කරනවා.

ඊට අමතරව තවත් අයදුම්පත්‍ර ඉදිරිපත් කිරීමට බලාපොරොත්තු වන අය ඉන්නවා නම් දෙසම්බර්මාසය තුළ එම අයදුම්පත්‍ර යොමුකිරීමට අවස්ථාව තිබෙනවා."

"සැබවින්ම රට අරාජික කරන අත්තනෝමතික ප්‍රචණ්ඩත්වයට; 88-89 ප්‍රචණ්ඩත්වයට ආර්. ප්‍රේමදාස ජනාධිපති බිය වුණේ නැත. ජවිපෙ සිදු කළ අවි ගත් කැරැල්ලට මුහුණ දීමට තරම් ධෛර්යයක් එදා ආර්. ප්‍රේමදාස ජනාධිපතිට තිබිණ. එහෙත් ඔහුගේ ජීව විද්‍යාත්මක උරුමය පමණක් ඇති සජිත්, අද එහි ප්‍රතිවිරෝධය බවට පත්ව ඇත."

"කිසිදු ජනතා කැමැත්තකින් තොරව පස්සා දොරෙන් බලයට පත්ව ආර්ථික ඝාතකයන් රැළකගේ රැකවරණය ලබමින් සිදු කරන බියගුළු ප්‍රකාශවලට මේ රටේ පුරවැසියන් බිය වෙතැයි ජනාධිපතිවරයා කල්පනා කරනවා නම්, ඔහුට සිහිපත් කළ යුත්තේ මීට මාස කිහිපයකට පෙර සිදුවූ දේශපාලන පෙරළිය නැවත විමසා බලන ලෙසටය."

ඉහත උපුටා ගැනීම පසුගිය නොවැම්බර් 23 වැනිදා විපක්ෂ නායක සජිත් නිකුත් කළ නිවේදනයෙන්ය. ඒ පාර්ශ්වය මේ නිවේදනය නිකුත් කර සිටියේ, නොවැම්බර් 23 වැනිදා පෙරවරුවේ ජනාධිපති රනිල් පාර්ලිමේන්තුවේදී සිදු කළ විශේෂ ප්‍රකාශයට ප්‍රතිචාර දක්වමින්ය.

විපක්ෂ නායක සජිත් කියන ලෙසට මීට මාස කිහිපයකට පෙර සිදුවූ දේශපාලන පෙරළිය සිහිපත් කළොත් පෙනෙන්න ඇත්තේ කුමක් ද? විපක්ෂ නායක සජිත් අසන්නේ මැයි 09 වැනිදා සිට ද? නැත් නම් ජූලි 09 සිට ද? මැයි 09 සිට සිහිපත් කළොත් අප ඉදිරියේ සිටියේ, අගමැති මහින්ද ප්‍රමුඛ ආණ්ඩුව ඉල්ලා අස්වී දින කිහිපයක් අග්‍රාමාත්‍යවරයකු ප්‍රමුඛ ආණ්ඩුවක් නොමැතිව අරාජික වූ රට බාර ගන්න තරම් කොන්දක් නොතිබූ, විපක්ෂ නායකවරයෙක්ය. අවම වශයෙන් ජනාධිපති තෝරා ගැනීම වෙනුවෙන් පවැති පාර්ලිමේන්තු ජන්ද විමසීමේදී විපක්ෂයේ අපේක්ෂකයා වීමේ අවස්ථාවවත් සජිත්ට ලැබුණේ නැත. ඒ අවස්ථාව ලබා ගත්තේ ඩලස් අලහප්පෙරුමය.

ඒ කියන්නේ ජනාධිපති ධුරය පුරප්පාඩු වූ විට ඊළඟ සුදුස්සා ලෙස ජන්දයට ඉදිරිපත් කිරීමට විපක්ෂයේ පාර්ශ්වයේ බහුතරය දිනා ගන්න සජිත් අසමත් වූ බවය. එසේ විපක්ෂයේ බහුතර විශ්වාසය තීරණාත්මක මොහොතේ ලබා ගැනීමට අසමත් වූ සජිත්, තවදුරටත් විපක්ෂ නායක ලෙස කටයුතු කරමින් සිටියි. ඒ අනුව සජිත් කියන ඒ "පසුගිය මතකය", වත්මන් දේශපාලනයට ආදේශ කළොත්, මේ ආණ්ඩුව විකෘතියක් කියන්න හෝ ජනාධිපති රනිල් බලය ගත්තේ පස්සා දොරෙන් කියා සජිත් කරන චෝදනාවට කිසිම පදනමක් නැත. විකෘතිය ඇත්තේ විපක්ෂ නායක ධුරයේය. දැන හෝ නොදැන සිදු කරන ළදරු දේශපාලන තර්ක අවසානයේ සජිත්ටම පාරාවළල්ලක් වන්නේ එහෙමය.

ප්‍රතිපත්තිමය තීන්දු තීරණ !

කෙසේ නමුත් දිගින් දිගටම විපක්ෂ නායකවරයා විකෘතියක් ගැන කතා කරන බැවින්, සැබෑ විකෘතිය ඇත්තේ කොතැනද? යන්න පෙන්නුම් කර දීමට බල කෙරී ඇත.

"මේ රටේ පුද්ගලීකරණය සහ ජනතාකරණය ආරම්භ වූයේ ප්‍රේමදාස ජනාධිපතිවරයා යටතේය. එවකට කර්මාන්ත ඇමැතිවරයා ලෙස මම එය ආරම්භ කළා.".... "අපි පළමුවෙන්ම පෞද්ගලීකරණය කළේ යුනයිටඩ් මෝටර්ස් ආයතය. එය ලාභ ලබපු ආයතනයක්. ඒ වගේම පෞද්ගලිකරණය කළ සිලෝන් ඔක්සිජන්, ලෙදර් කෝපරේෂන්, ටයර් කෝපරේෂන්, ලංකා මිල්ක් පුඩ්, ලංකා ඩිස්ටිලරිස් මේ සියලු ආයතන ලාභ ලබන ආයතන. ඊළගට වැවිලි සමාගම් පෞද්ගලීකරණය කළා. මේ ඇතැම් ආයතන ලාභ ලැබූ ඒවා. සමහර ආයතන අලාභ ලැබූ ආයතන.

1977 ජේ.ආර්. ජයවර්ධන මහතා ආර්ථිකය විවෘත කළා. ප්‍රේමදාස ජනාධිපතිතුමා 1989 ඊළග පියවර ගත්තා. සමහර ආයතන රජයේ පාලනයෙන් ඉවත් කරලා පෞද්ගලික අංශයට භාර දෙන්න. මෙහිදී උදාහරණ කර ගත්තේ චීනයේ ඩෙන්ග් ෂියෝපින්ග් මහතා ආරම්භ කළ වැඩසටහන. අපි එය ඉදිරියට ගෙන ගියා. නැවත උත්සාහ කරන්නේ එම වැඩසටහන ක්‍රියාත්මක කරන්න."

ඉහත උපුටා ගැනීම නොවැම්බර් 23 වැනිදා ජනාධිපති රනිල් පාර්ලිමේන්තුවේ සිදු කළ ප්‍රකාශයෙන්ය.

එදා ආර්. ප්‍රේමදාස පාලනය යටතේ දියත් කළ රාජ්‍ය ව්‍යවසාය පෞද්ගලික අංශයට පැවරීමේ ප්‍රතිපත්තිය ඔහුගේම පුතාණෝ වන විපක්ෂ නායක සජිත් ප්‍රේමදාස විසින් අද ප්‍රතික්ෂේප කර ඇත. 77 දී ජේ.ආර්. පාලනය ආර්ථිකය විවෘත කළ අතර, ආර්. ප්‍රේමදාස පාලනය දියත් කර සිටියේ එහි ඊළඟ පිම්මය. රාජ්‍ය ව්‍යවසාය පෞද්ගලික අංශයට පැවරීම එහි වැදගත් මෙන්ම අත්‍යවශ්‍ය පියවරක් විය. ඒ තුළ රාජ්‍යයේ සීමා මත යැපුණු ප්‍රාග්ධනයට නිදහසේ වර්ධනය වීමට අවස්ථාව සැලසිණ. රාජ්‍ය ඒකාධිකාරී ධනවාදයේ විලංගුවෙන් ගැළවුණු රට, මූල්‍යමය වශයෙන් ශක්තිමත් කිරීමට එය අත්‍යවශ්‍ය කාරණයක් විය. රජයේ කාර්ය භාරය වූයේ ඒ වෙනුවෙන් වන පහසුකම් සැලසීම සහ ප්‍රතිපත්තිමය තීන්දු තීරණ ගැනීමය.

නිවැරදි මාවත !

ඒ වන විටත් සමාජවාදී ලෙස හැඳින්වුණු චීනය පවා සිටියේ මේ උපායමාර්ගික ක්‍රමවේදය පිළිගනිමින්ය. මාවෝ සේතුං ගේ උගත් පාඩම් ඇසුරෙන් ඩෙං ෂියාඕපිං චීන ආර්ථිකය ප්‍රතිසංස්කරණය කළේ, පළමුව ගොවියන්ට තම ඉඩම්වල වගා කිරීමට අවසර දීම ඔස්සේය. 1979දී එක්සත් ජනපදය සමඟ චීනය රාජ්‍යතාන්ත්‍රික සබඳතා යළි ඇති කර ගැනීමත් සමඟ, විදෙස් ආයෝජන සඳහා දොරටු විවර විය. ඉතා ලාභ මිලට ලැබෙන කම්කරු ශ්‍රමයට ලොල් වූ ආයෝජකයන්ගෙන් මුදල් ගලා එන්න විය. ඉතිහාසයේ දුටු ඉහළම ආර්ථික ආශ්චර්යය 1970 අවසානයේ චීනය ඔස්සේ ප්‍රදර්ශනය විය. 1990 දශකය පුරා ශීඝ්‍ර ආර්ථික වර්ධනයක් වාර්තා කළ චීනය, 2001දී ලෝක වෙළෙඳ සංවිධානයට බැඳුණේය. ඉන් චීන ආර්ථිකය තවත් ශක්තිමත් විය. වෙනත් රටවලට පනවා තිබූ වෙළෙඳ සීමා සහ තීරු බදු ලිහිල් කළේය‍. ඉතා කෙටි කලක් තුළ චීන භාණ්ඩවලින් ලෝකය වෙලා ගැනිණ. චීනය අනුගමනය කළ ලිබරල් ආර්ථික ප්‍රතිපත්ති හේතුවෙන් අද වන විට ලොව ශක්තිමත්ම ආර්ථිකයක් ඇති රට පමණක් නොව, වැඩිම බිලියනපතියන් සිටින රට බවටත් චීනය පත්ව ඇත.

ජේ.ආර්. 77 දී ආර්ථිකය විවෘත කරන විට, බටහිර දියුණු රටවල පමණක් නොව, සමාජවාදී චීනයේ මේ වෙනසත් නොදැන සිටියා විය නොහැකිය. ජේ.ආර්. ප්‍රතිපත්තිය ඉදිරියට ගෙන ගිය ආර්.ප්‍රේමදාස පාලනය පවා චීනයේ මේ වෙනස නොදැන සිටියා විය නොහැකිය. ඒත්, 94න් පසුව මේ ප්‍රතිපත්තිය නිවැරැදිව ඉදිරියට ගියේ නැත. ඒ නිසා ඇති වූ විකෘතිය අවසන් වූයේ දශක කිහිපයකට පසුව රටම මහා සමාජ ආර්ථික ව්‍යසනයක් වෙත ඇද දමමින්ය.

ජේ.ආර්, ප්‍රේමදාස යුගයේ අද නියමුවා ජනාධිපති රනිල්ය. දේශපාලන ජීවිතයේ වැඩිම කාලයක් විය යුතු දේ සම්බන්ධයෙන් ඇත්ත කියන්න ගොස් වැඩිම හානියක් කරගත් දේශපාලනඥයා ද රනිල්ය. 2023 අයවැය යෝජනා මඟින් ජනාධිපති රනිල් පදනම සකස් කර ඇත්තේ, ආර්ථිකයට අදාළව ජේ.ආර්. - ප්‍රේමදාස යුගයෙන් පසුව පැමිණි පාලන ඔස්සේ සිදුවූ ඓතිහාසික වැරැදි යළි නිවැරැදි මාවතට ගන්නය. නැත්නම් ශ්‍රී ලංකාවේ ආර්ථිකයේ සිදුවූ විකෘතිය යථා තත්ත්වයට පත් කරන්නය. එහෙත් ඒකට විපක්ෂ නායක සජිත් විරුද්ධය.

අත්තනෝමතික ප්‍රචණ්ඩත්වය !

සජිත්ගේ මේ හැසිරීමට අදාළව කදිම දේශපාලන විග්‍රහයක් පසුගිය 23 වැනිදා ජනාධිපති රනිල් පාර්ලිමේන්තුවේදී ගෙනහැර පෑවේය.

ඒ, "ඊයේ (22) මහින්ද රාජපක්ෂ අපේ හිටපු ජනාධිපතිතුමා ප්‍රකාශ කළා අලාභ ලබන ආයතන විතරයි පෞද්ගලීකරණය කළ යුත්තේ කියලා. එතුමාගේ සහයෝගයට විපක්ෂ නායකතුමත් කිවුවා අලාභ ලබන ආයතන විතරයි විකුණන්නේ කියලා. ඔන්න ඔබතුමාට හොඳ අනුගාමිකයෙක් ඉන්නවා." කියමින්ය.

ජනාධිපති රනිල්, සජිත්ව මහින්දගේ අනුගාමිකයකු කළාට, දර්ශනය අනුව නම් ඔහු වඩාත් ගැළපෙන්නේ මහින්දගේ දේශපාලන පුත්‍රයාටය. ඒ බව යළි යළිත් තහවුරු කිරීමට අලුත් සාක්ෂ්‍ය අනවශ්‍ය අතර, එයත් කරදරයක් නැතිවම සපයන්නේ සජිත්මය. ඊට ආසන්න නිදර්ශනය ජනාධිපති රනිල් නොවැම්බර් 23 වැනිදා පාර්ලිමේන්තුවේදී සිදු කළ ප්‍රකාශයට ප්‍රතිචාර දක්වමින් සජිත් නිකුත් කළ නිවේදනයේ පවා ඇතුළත් වූයේ මෙසේය.

"ආර්ථික ඝාතකයන්ට උත්තමාචාර පිරිනමා ඔවුන්ව රතු පලස් උඩින් පිළිගන්නා ජනාධිපතිවරයා, අප්‍රමාණ දුක් පීඩා උහුලමින් සිටින ජනතාවට ලබා දෙන්න යන්නේ මර්දනය බව ඔහුගේ වියරු ප්‍රකාශයෙන් සහ හැසිරීමෙන් ගම්‍ය වන අතර, එවැනි තර්ජන හෝ ගර්ජන අප මායිම් නොකරන බවද අවධාරණය කරමු."

මේ ප්‍රකාශය හමුවේ සජිත් පිළිතුරු දිය යුතුව ඇති පළමු ප්‍රශ්නය නම්, 2023 අයවැයේ ඇති ආර්ථික ඝාතන ප්‍රතිපත්තිය කුමක් ද? යන්නය. දෙවැන්න නම් ජනාධිපති රනිල් අත්තනෝමතික ප්‍රචණ්ඩත්වයට සහ රට අරාජික කරන්නන්ට එරෙහිව කටයුතු කළ ආකාරය ෆැසිස්ට් නම්, ඊටත් වඩා ඉදිරියට ගොස් ජවිපෙ කැරැල්ල පරාජය කළ තම පියාණෝ ද ෆැසිස්ට්වාදියකු ලෙස සජිත් සලකනවා ද? යන්නය.

සැබවින්ම රට අරාජික කරන අත්තනෝමතික ප්‍රචණ්ඩත්වයට; 88-89 ප්‍රචණ්ඩත්වයට ආර්. ප්‍රේමදාස ජනාධිපති බිය වුණේ නැත. ජවිපෙ සිදු කළ අවි ගත් කැරැල්ලට මුහුණ දීමට තරම් ධෛර්යයක් එදා ආර්. ප්‍රේමදාස ජනාධිපතිට තිබිණ. එහෙත් ඔහුගේ ජීව විද්‍යාත්මක උරුමය පමණක් ඇති සජිත්, අද එහි ප්‍රතිවිරෝධය බවට පත්ව ඇත. ඒ ජනාධිපති රනිල්ට එරෙහිව රට අරාජික කරන අත්තනෝමතික කල්ලි කණ්ඩායම්වලට සහය දක්වමින්ය.

ප්‍රජාතන්ත්‍රවාදයෙන් ප්‍රශ්න විසඳීම !

මේ සියල්ල කැටි කර ගත් කල, සජිත් කියන්නේ එක් පසෙකින් පියාණන් පවා භාවිතය තුළ තහවුරු කළ නිවැරැදි ආර්ථික දර්ශනය තේරුම් නොගත් සහ ඊටම පිටුපෑ පුතාණෝය. අනෙක් පසින් රට අරාජික කරන අත්තනෝමතික ප්‍රචණ්ඩත්වයට එරෙහිව රාජ්‍යය ආරක්ෂා කිරීමට පියාණන්ට තිබූ ධෛර්යයටත් නින්දා කරන පුතාණෝය.

ඒ අනුව විකෘතිය ඇත්තේ ආණ්ඩුවේ ද? නැත්නම් විපක්ෂ නායක සජිත්ගේ ද? කියා තේරුම් ගන්න අලුත් දර්ශනයක් අවශ්‍ය නැත. විකෘතිය ඇත්තේ සජිත්ගේය. ප්‍රශ්නය ඇත්තේ සජිත් එය නොදැන සිටීමය. එනිසා තව දුරටත් ඔය විකෘතිය සමඟ ගොස් විකාරයක් වනවා ද? අර්බුදයෙන් රට ගොඩනගන්න එකතු වෙනවා ද? යන්න ගැන විපක්ෂයේ පාර්ශ්ව තීන්දුවක් ගත යුතුව ඇත.

ඒ හැර ජනාධිපති රනිල් ෆැසිස්ට් කියමින් වචනවලින් තොරණ ගහන්න ගියාට තේරුමක් නැත. රනිල් ෆැසිස්ට් නම්, රනිල් චීනයේ ඩෙන්ෂියාඕගේ ආර්ථික ප්‍රතිපත්ති අගයන නිසා ඔහු වාමාංශික වෙලා ද? ක්‍රියාත්මක කළ බව මේ කතා අස්සේ කිවුවේය. එතකොට රනිල් වාමාංශික වෙලා ද? වියට්නාමයේ ඩින් ඩියැම් ගැන කියන විරෝධාකල්ප අදහස් නිසා ජනාධිපති රනිල් කතෝලික හෝ අමෙරිකන් විරෝධියෙක් වෙලා ද? පැවිදි බට්ටන් ගැනත් කිවුවේය. ඒ කියන්නේ රනිල් බෞද්ධ විරෝධියෙක් වෙලා ද? නැත.

රනිල් කියන්නේ රනිල් ය. රනිල් වම - දකුණ කියා දේශපාලනය තුළ පැරඩ් තියන්න යන්නේ නැත. රනිල්, ආගම දේශපාලනයට පටලවා ගත්තේද නැත. ඒ, ජේ. ආර්. ගේ ආදර්ශයය. රනිල් හැම ආගමකටම ගරු කරයි. ඒත් සුදු ලෝගු දාගෙන, කහ සිවුරු පොරවාගෙන එන කුමන්ත්‍රණවලට ඉඩක් ඔහුගෙන් ලැබෙන්නෙ නැත. සිංහල, දෙමළ, මුස්ලිම් සිංහල ජන කොටස්වලට සාමයෙන්, සාමදානයෙන්, සංහිඳියාවෙන් ජීවත් වෙන්න බලය බෙදා හැරීම වෙනුවෙන් ඔහු පෙනී සිටියි. ඔහු ඒ බව පසුගියදා ප්‍රසිද්ධියේම පාර්ලිමේන්තුවේදී කිවුවේය. පොදු එකඟතාවක් ඇති කර ගැනීම වෙනුවෙන් පාර්ලිමේන්තුවේ සියලු පක්ෂ වෙත ආරාධනාද කළේය.

රනිල් ප්‍රශ්න විසඳන්නේ හිට්ලර්ගේ ක්‍රමයට නොවේ. ඔහුගෙන් ඉඩ ලැබෙන්නේ ප්‍රජාතන්ත්‍රවාදයට පමණය. මේක තේරුම් ගන්න බැරි උදවිය නම් ඇත්තටම විකෘතිය.

 කුලසිරි ලියනගේ

එක්සත් ජනතා නිදහස් සන්ධානයේ සභාපතිවරයා ලෙස හිටපු ජනාධිපති මෛත්‍රිපාල සීරිසේන විසින් හෙට (30) පස්වරුවේ කැඳවා ඇති විධායක සභා රැස්වීම පැවැත්වුවහොත් ඊට එරෙහිව නීතිමය පියවර ගන්නා බව අමාත්‍ය මහින්ද අමරවීර එක්සත් ජනතා නිදහස් සන්ධානයේ නායක මෛත්‍රීපාල සිරිසේනට ලිපියකින් දන්වා තිබේ.

තවමත් එක්සත් ජනතා නිදහස් සන්ධානයේ මහලේකම් ලෙස කටයුතු කරන්නේ තමා හෙයින් එක්සත් ජනතා නිදහස් සංධානයේ ව්‍යවස්ථාව අනුව රැස්වීමක් කැඳවීමට බලය ඇත්තේ තමාට බවත් මෛත්‍රීපාල සිරිසේනට රැස්වීමක් කැඳවීමට කිසිදු බලයක් නැති බවත් අමාත්‍ය මහින්ද අමරවීර එම ලිපියේ සඳහන් කර ඇත .

හිටපු ජනාධිපති මෛත්‍රිපාල සිරිසේන කැඳවා ඇති රැස්වීම ව්‍යවස්ථා විරෝධී නීති විරෝධී රැස්වීමක් බවත් මෙම තත්ත්වය නිවැරදි කිරීමට වහාම පියවර ගෙන රැස්වීම අවලංගු කරන ලෙසත් අමාත්‍ය මහින්ද අමරවීර අදාළ ලිපිය හරහා ඉල්ලා තිබේ.

රැස්වීම අවලංගු නොකළහොත් ව්‍යවස්ථා විරෝධී නීති විරෝධී රැස්වීමක් කැඳවීම පිළිබඳ නීති ක්‍රියාමාර්ග ගන්නා බවද අමාත්‍යවරයා එම ලිපියෙන් අවධාරණය කරයි.

යුද හමුදා මාණ්ඩලික ප්‍රධානි ලෙස මේජර් ජෙනරල් චන්න විරසුරිය  පත්කර තිබේ.

ඔහු ශ්‍රී ලංකා පාබල රෙජිමේන්තුවේ දක්ෂ නිධාරියෙකු වන අතර

ඔහුගේ සේවා කාලය වසර 36 කි.

1968 ක්වූ ජූලි මස 15 වන දින කොළඹ 7 මැකාති රෝහලේදී බෙන්සන් පැට්ට්‍රික් වීරසුරිය හා වීරකොන්ඩ ආරච්චි වයලා යන ආදරනීය දෙමව්පියන්ගේ දරුවා ලෙස උපත ලැබූ එතුමා සිප් සතර හැදෑරීම සදහා එවකට ප්‍රසිද්ධ පාසැලක් වන කොලඹ මහානාම විදුහල වෙත ඇතුලත් වුනි. මහානාමයේ මැවුම්කරු ලෙස අප සියලු දෙනාගේ ගරුත්වයට නිතැතින් පාත්‍ර වූ කේ එන් පී ද සිල්වා විදුහල්පති තුමන්ගේ සෙවනේ නිතැතින්ම හැදූවැඩුනු එතුමන් පාසලේ අතිදක්ශ කැපී පෙනෙන සිසුවෙකු ලෙස සිප් සතර හැදෑරීය. පලමු පෙල ක්‍රිකට් කන්ඩායමේ නිත්‍ය සාමාජිකයෙකු ලෙස කීර්තිමත් මහානාම ක්‍රීඩකයන් වන විපුල සිට්ටමිගේ, සුදේශ් වීරසිංහ, සුරේශ් එදිරිවීර හා ශශී ප්‍රභා පීරිස් සමග ඒ කාලයේදී සියලු ක්‍රිකට් සංග්‍රාමයන් හමුවේ මහානාම මාතාවට ජය ගෙන එන්නට එතුමා සමත් වූ බව පවසන්නේ අභිමානයෙනි. සිය පාසැල් දිවියේ අවසානයත් සමගම දේශය වෙනුවෙන් සිය පරම යුතුකම ඉටුකිරීමේ අදිටනින් 1986 ක්වූ ඔක්තෝම්බර් මස 27 වන දින යුද්ධ හමුදාව බැදී ඇත.

එල්.ටි.ටි.ඊ. ත්‍රස්ත්‍රවාදින්ගෙන් රට බේරා ගැනීම සඳහා ක්‍රියාන්විත රාජකාරී ඉටුකළ වීරසූරිය  දෙස්, විදෙස් විශ්ව විද්‍යාල කිහිපකින්ම අධ්‍යාපනය ලැබූ අයෙකි.

ශ්‍රී ලංකා යුද්ධ හමුදාවට හමුදාධිපතිවරුන් සිවි දෙනෙකු දායාද කර ඇති ශ්‍රී ලංකා සන්නාහ සන්නද්ධ බළකායේ 67 වැනි සංවත්සරය 2022 දෙසැම්බර් මස 15 වන දිනට යෙදී ඇත.

ඊට සමගාමීව පැවැත්වූ රණවිරු සැමරුම ශ්‍රී ලංකා යුද්ධ හමුදා සන්නාහ සන්නද්ධ බලකා රෙජිමේන්තු අධිපති සහ හමුදා ලේකම් මේජර් ජෙනරල් ස්වර්ණ බෝතොටගේ ප්‍රධානත්වයෙන් කලත්තෑව රණවිරු ස්මාරකය අභියසදී පැවැත්විණ.

දෛවයේ කැඳවුම කොතැනද ? යන්න තේමා කරගත් ශ්‍රී ලංකා යුද්ධ හමුදා සන්නාහ සන්නද්ධ බලකාය මෙරට පැවති තිස්අවුරුදු යුද්ධයේදී ලුතිතන් ජෙනරාල් ඩෙන්සිල් කොබ්බෑකඩුව ඇතුළු නිලධාරීන් 28 දෙනෙකු සහ සෙසු නිලයින් 415 දෙනෙකු මාතෘභූමිය වෙනුවෙන් සිය ජීවිතය පූජා කර ඇත.

මාතෘභූමියේ නිවහල්භාවය ඇති කිරීම වෙනුවෙන් ශ්‍රී ලංනා යුද්ධ හමුදාව විසින් දියත් කළ වඩමාරච්චි, බලවේගය, යාල්දේවි, රිවිරැස, සත්ජය 1/2/3, ජයසිකුරු ක්‍රියාන්විතවලදීත් අවසන් මානුෂීය මෙහෙයුමේදීත් සුවිශේෂී දායකත්වයක් ලබා දී ඇති ශ්‍රී ලංකා යුද්ධ හමුදා සන්නාහ සන්නද්ධ බලකායේ සාමාජිකයින් වීර වික්‍රම පදක්කම් 17කිත්, රණ වික්‍රම පදක්කම් 67කින් සහ රණ ශූර පදක්කම් 505 කින් පිදුම් ලබා ඇත.

රණවිරු සැමරුම් උත්සවයේ දී, ජ්‍යෙෂ්ඨ නිලධාරීන් කිහිප දෙනෙකු සහ මියගිය රණවිරුවන්ගේ පවුල්වල සාමාජිකයින් විසින් රණවිරු ස්මාරකය වෙත ගොස් සිය ආචාරය රටවෙනුවෙන් දිවිපිදූ රණවිරුන් වෙත පුද කළහ. එදින උත්සවය අවසානයේ මේජර් ජෙනරල් ස්වර්ණ බෝතොට එම අවස්ථාවට සහභාගී වූ රණවිරු පවුප්වල සාමාජිකයින් සමඟ අදහස් හුවමාරු කර ගන්නා ලදී.

පරාභව සූත්‍රයේ සඳහන් වන්නේ ධර්මය ගැන මිස සංඝරත්නය ගැන නොවන බවත් විපක්ෂනායකවරයා ධර්මය සහ සංඝරත්නය මිශ්‍ර කරගෙන ඇති බවත් ජනාධිපති රනිල් වික්‍රමසිංහ පෙන්වා දෙයි.

ජනාධිපතිවරයා මේ බව සඳහන් කළේ අද (29) පාර්ලිමේන්තුවේ දී අදහස් දක්වමිනි.

සංඝයා වහන්සේ ධර්මය අනුව ක්‍රියා නොකරනවිට ප්‍රශ්න ගණනාවක් ඇතිවන බවත්, එය බුදුන් වහන්සේගේ සමයේ සිට සිදුවන දෙයක් බවත් පෙන්වා දුන් ජනාධිපතිවරයා සංඝ විනය ආරක්ෂා කිරීමට මහා සංඝරත්නයට බලය ලබාදෙන කතිකාවතක් ලියාපදිංචි කිරීමේ පනත් කෙටුම්පතකට පළමුවතාවට අනුමැතිය ලබා දුන්නේ ඒ වෙනුවෙන් බව ද පැවසීය.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය .

අද ආගමික කටයුතු හා බුද්ධ ශාසන අමාත්‍යාංශයට අදාළ විෂයය පිළිබඳ සාකච්ඡා කරන අවස්ථාවේ පළමුවෙන්ම මම ස්තූතිවන්ත වෙනවා විපක්ෂ නායකතුමා පරාභව සූත්‍රය ගැන මට කළ දැනුම්දීම පිළිබඳව.

ඇත්ත වශයෙන්ම මම දන්න විදියට පරාභව සූත්‍රයේ මහා සංඝරත්නය ගැන කතා කරන්නේ නැහැ. බුදුන් වහන්සේ දේශනා කර තිබෙන්නේ ,

සුවිජානෝ භවං හෝති
සුවිජානෝ පරාභවෝ
ධම්ම කාමෝ භවං හෝති
ධම්ම දෙස්සී පරාභවෝ

(දියුණුවන පුද්ගලයා එම කරුණු අනුව දැනගත හැකිය. පිරිහෙන පුද්ගලයාද එසේම දැනගත හැකිය. දස කුසලයේ යෙදෙන තැනැත්තා දියුණුවන අතර ඊට ද්වේශ කරන කෙනා පිරිහෙයි) යනුවෙනි.

බුදු දහමේ සඳහන් වෙනවා බුද්ධ, ධම්ම, සංඝ පිළිබඳව.

පරාභ‍ව සූත්‍රයේ සඳහන් වෙන්නේ ධර්මය ගැන මිස සංඝරත්නය ගැන නොවෙයි. මම හිතන්නේ අපේ විපක්ෂ නායකතුමා ධර්මයයි, සංඝරත්නයයි දෙක මිශ්‍ර කරලා තිබෙන්නේ. අපි එය වෙන්කරගත යුතුයි. මොකද ගිහි පැවදි සියලුදෙනා ධර්මය පිළිපැදිය යුතුය. ඇතැම්විට ගිහි අයට ධර්මය පිළිපදින්නේ නැතිව ඉන්න පුළුවන්. එහෙත් අපි ජිවත්විය යුත්තේ ධර්මයට අනුවයි.

මම තව කරුණක් එතුමාට මතක් කරන්න කැමතියි.

අසන්තස්ස පියා හොන්ති
සන්තේ න කු‍රුතේ පියං
අසතං ධම්මං රෝචේති
තං පරාභවතෝ මුඛං

(මොහුට අන්‍ය ශ්‍රාස්තෘන් ප්‍රිය වෙත්ද, බුද්ධාදි සත්පුරුෂයන් ප්‍රිය නොවෙත්ද, දෙසැටක මිත්‍යාදෘෂ්ටීන් ඇති අසත්පුරුෂ ධර්මය ප්‍රිය කරන්නේ ද මේ කරුණු 03 පිරිහීමේ දෙවන දොරටුවයි.)

මම එම අවවාදය අපේ විපක්ෂ නායකතුමාට දෙන්න කැමතියි. ඇත්ත වශයෙන්ම අපේ ශාසනයේ ප්‍රශ්න ගණනාවක් තිබෙනවා. අපි පළමුව බලාපොරොත්තු වෙන්නේ ගිහි පැවිදි සියලුදෙනා ධර්මය අනුව ක්‍රියා කරනු ඇති බවයි.

අපේ සංඝයා වහන්සේ ධර්මය අනුව ක්‍රියා නොකරනවිට ප්‍රශ්න ගණනාවක් ඇති වෙනවා. ඒක බුදුන්වහන්සේගේ සමයේ සිටම සිදුවන දෙයක්. දේවදත්ත සිවුරු දරාගෙන තමයි බුදුන්වහන්සේට එරෙහිව ක්‍රියා කළේ.

අපේ ශාසනික කටයුතුවලදී අවධානය යොමුකළයුතු ප්‍රශ්න ගණනාවක් අද තිබෙනවා. ඒකයි අපි පළමුවතාවට සංඝ විනය ආරක්ෂා කිරීමට මහා සංඝරත්නයට බලතල ලබාදීමේ කතිකාවතක් ලියාපදිංචි කිරීමේ පනත් කෙටුම්පතකට අනුමැතිය ලබාදී තිබෙන්නේ. මේ සඳහා නීති සම්පාදක දෙපාර්තමේන්තුවෙන් අනුමැතිය ලැබීමෙන් පසු අපි එය මේ සභාවට ඉදිරිපත් කරනවා. මොකද යම් කිසි පාලනයක් තිබිය යුතුයි. අතීතයේ මේ රට පාලනය කළේ රජවරු. ඒ රජවරු මගින් තමයි ශාසනයේ යම් යම් ප්‍රතිසංස්කරණ සිදු වුණේ.

පරාක්‍රමබාහු රජතුමාගේ කාලයේ ඇතැම් සංඝයාවහන්සේලාට මරණ දඬුවම නියම කළා. අපිට ඒවා කරන්න බැහැ. ඒ සඳහා ව්‍යවස්ථාවෙන් අපට බලයකුත් නැහැ. ආණ්ඩුක්‍රම ව්‍යවස්ථාවේ 09 වන වගන්තිය යටතේ භික්ෂූන් වහන්සේ‍ලාගේ විනය පිළිබඳ සඳහන් වෙනවා. සියම් නිකාය, අමරපුර නිකාය සහ රාමඤ්ඤ නිකාය නමින් අපිට කතිකාවත් 03ක් තිබෙනවා. ශාසනික කටයුතුවලදී අවධානය යොමු කළ යුතු ප්‍රශ්න ගණනාවක් අද අපට තිබෙන නිසා මෙම කෙටුම්පත අවශ්‍ය වෙනවා.

මම දැක්කා විශ්වවිද්‍යාල අධ්‍යාපනය ලබන එක් භික්ෂූන් වහන්සේ නමක් අපේ මල්වතු, අස්ගිරි මහානායකහිමිවරුන්ට බනිනවා, දොෂාරෝපණය කරනවා. කවුද මේ අය, භික්ෂූන් වහන්සේලාද, වෛතුල්‍යවාදීන්ද කියලා අපිට අහන්න වෙනවා.

සිවුරු දැරුවා කියලා ධර්මයට විරුද්ධව ක්‍රියා කරන්න එයින් විශේෂ ආරක්ෂාවක් ගන්න බැහැ. ඒ නිසා මේ පනත අවශ්‍යයි. ඇතැම්විට මේ හැසිරීම තුළින් පැවිදි සමාජය තුළ තිබෙන ප්‍රශ්න ගිහි සමාජය තුළින් මතු කෙරෙනවා. මෙහිදී අපි දීර්ඝ වශයෙන් සාකච්ඡා කළයුතුයි.

අද භික්ෂුන් වහන්සේලා ලෙස විශාල පිරිසක් විශ්වවිද්‍යාලවලට ඇතුලත්වුණත් අවසන් වෙනකොට ඉන්නේ ගිහියන් විදියට. අපි පළමුවෙන්ම තීරණය කළයුතුයි භික්ෂුන් වහන්සේ‍ලා විදියට විශ්වවිද්‍යාලයට ඇතුළත් වුණොත්, භික්ෂුන් වහන්සේ ලෙසම උපාධිය ලබාගෙන ඉන් පිටවිය යුතු බව. ඒ ගැන මහානායක ස්වාමීන්වහන්සේලා සමග සාකච්ඡා කළ යුතුයි.

ඒවගේම විශ්වවිද්‍යාල තුළ හැසිරීම මේ කතිකාවන්ට සම්බන්ධ කළයුතුයි. මේ යන ක්‍රමවේදය තවදුරටත් ඉදිරියට පැවතුනොත් අපේ ශාසනය නැති වෙනවා. ඒකයි මම විශේෂයෙන්ම අද මේ ගැන කතා කළේ.

ඉන්දියාව හා සසඳන විට ශ්‍රී ලංකාවේ හින්දු ආගමේ සුවිශේෂී ස්වභාවය අප ආරක්ෂා කරන්නේ කෙසේද යන්න පිළිබඳව ද රජය සොයා බැලිය යුතුයි. හින්දු භක්තිකයන් පමණක් නොවෙයි බෞද්ධ විහාරස්ථානවලත් විවිධ හින්දු දෙවිවරුන් කී දෙනෙක් අදහනවාද?

නිදසුනක් වශයෙන්, ශිව වන්දනාව යාපනයේ බහුලව දක්නට ලැබෙනවා.

විෂ්ණු වන්දනාව හෙවත් විෂ්ණු දෙවියන් මූලික වශයෙන් දකුණු පළාතේ අදහනු ලබනවා. විෂ්ණු, කතරගම, පත්තිනි, විභීෂණ දෙවියන්ට අපි නමස්කාර කරනවා.

ඉන්දියාවේ හින්දු නමස්කාරයට වඩා ශ්‍රී ලංකාවේ හින්දු ආගමේ සුවිශේෂීභාවය පිළිබඳ වාර්තාවක් සම්පාදනය කරන ලෙස මම අමාත්‍යතුමාගෙන් ඉල්ලා සිටිනවා, සමහර විට අනෙක් පාර්ශ්වයන්ට ද මෙයට උදව් කළ හැකිය. එහිදී නැවතත් ඔබට උතුරු ඉන්දියාව සහ දකුණු ඉන්දියාව අතර වෙනසක් දක්නට ලැබෙනවා. එය අප විසින් කළයුතු දෙයක්.

ඒ වගේම අපි තීරණය කරලා තිබෙනවා ශ්‍රී ලංකාවේ ඉතිහාසය පිළිබඳ අධ්‍යයන ආයතනයක් ඇති කරන්න. අද ඉතිහාසය අමතක වෙලා තිබෙන්නෙ. විශේෂයෙන්ම මේ ආයතනය ඇති කරන්න යන්නේ අපේ රටේ ඉතිහාසය පිළිබඳ දැනුම ලබා දෙන්න. ඒ වගේම පර්යේෂණ ඇති කරන්න. මහා වංශයට වඩා අද ඉතිහාසය වෙනස් වෙලා තිබෙනවා.

මහාවංසයේ තිබෙන්නේ එක කණ්ඩායමක අදහස්. නමුත් තවත් අදහස් තිබෙනවා. අපි මේ ගැන සොයා බලා ලංකාවේ ඉතිහාසය පිළිබඳව මේ ආයතනය ඇති කරලා ඉදිරියට යන්න බලාපොරොත්තු වෙනවා.

ඒ වගේම මම සෞඛ්‍ය ඇමතිතුමාට ප්‍රශංසා කරන්න ඕනේ ඌව වෙල්ලස්ස, සබරගමුව, සහ පොලොන්නරුවේ අපට අවශ්‍ය වෛද්‍ය පීඨ 03ක් ආරම්භ කරන්න කටයුතු කිරීම පිළිබඳව.

එමගිනුත් පශ්චාත් පරීක්ෂණ වෛද්‍ය විද්‍යාව පිළිබඳ උපාධි පිරිනමන්න අපි සූදානම්. එවැනි උපාධි පිරිනමන එක් ආයතනයක් කොළඹ තිබෙනවා.

 මේ වන විට අපි සෞඛ්‍ය ක්ෂේත්‍රයේ විශාල පරිවර්තනයක් සිදු කරමින් සිටිනවා. වෛද්‍ය පර්යේෂණ ආයතනය දියුණු කරන්න අපි මුදල් ලබා දෙනවා. කොළඹ අපේ තිබෙන වෛද්‍ය පර්යේෂණ ආයතනය ඉන්දියාවේ පූනේ ප්‍රදේශය ඇති වෛද්‍ය පර්යේෂණ ආයතනය මට්ටමට ගෙන ආ යුතුයි. ඉදිරි වසර දෙක තුනවන විට අපට එම මට්ටමට ළගා විය හැකියි.

වෛද්‍ය විද්‍යාවට අවශ්‍ය දියුණුව අපි ලබා දී තිබෙනවා. මේ වන විට එක වෛද්‍ය පීඨ ශිෂ්‍යයෙක් වෙනුවෙන් ලක්ෂ හැටක් රජය වියදම් කරනවා. මේ ඔක්කොම වියදම් කරන්නෙ ඔවුන් අපේ රටේ රඳව ගන්න. නමුත් උපාධිය ලබා ගත්තට පස්සේ බොහෝ දෙනා පිටරට යනවා. මේක විශාල ප්‍රශ්නයක්.

මෙහිදී අපි ගතයුතු පියවර කුමක්ද කියලා සාකච්ඡා කළයුතුයි. මොන ආණ්ඩුව ආවත් මේ ප්‍රශ්නය තිබෙනවා. එහෙම බැලුවම අපේ වෛද්‍යවරු පුහුණු කරලා අපේ රටින් අනිත් රටවල්වලට ලබාදෙන ආධාර, විදේශ රටවලින් අපේ රටට සෞඛ්‍ය සඳහා දෙන ආධාර වලට වඩා වැඩි බවයි පේන්න තිබෙන්නේ. පිටරට යන අපේ වෛද්‍යවරු සුදුසුකම් සහ අත්දැකීම සහිත අය. මේ පිළිබඳ අපි අවධානය යොමු කළ යුතුයි. වෛද්‍ය විද්‍යාව සහ ඉංජිනේරු විද්‍යාව හදාරන සිසුන්ට අපි මොකක්ද කරන්නේ කියලා සාකච්ඡා කළ යුතුයි. මේ සඳහා පිළිතුරක් අපි සෙවිය යුතුයි.

මොල හතක් තියෙනවයි කියන බැසිල් රාජපක්ෂ, ලංකාවට ආපු දවසේ ඉඳලා , එක මිනිත්තුවක් නිකං නෑ කියලයි, පොහොට්ටුවේ එක ප්‍රකාශකයෙක් කිව්වේ. ප්‍රකාශකයා වෙන කවුරුවත් නෙවෙයි. සංජීව එදිරිමාන්න. සංජීව කියන්නේ බැසිල්ගෙ ළඟටම වෙලා ඉඳලා, බැසිල්ව අයිති තමන්ට කියලා හිතාගෙන, වැඩ කරන මන්ත්‍රීවරයෙක් කියලයි, අපි දන්නෙ. හැබැයි ඒකටත් ඕන් දැන් තරගයක්.

තරගයක් කිව්වම, ඒ කාත් එක්කද කියලා ඕගොල්ලෝ බලාවි. ඇත්තම කියනවා නම්, කාලෙක ඉඳලා බැසිල්ගෙ ළඟම ගෝලයා වෙන්න, පක්ෂයෙ මහලේකම්, සාගර කාරියවසමුයි සංජීවයි අතර , පුංචි නිහඬ සටනක් පටන් ගෙන තිබුණා. සංජීව කාලෙකදි ඉස්සරහට ආවා. ඒත් මේ දවස් වල නං සංජීව පරද්දල ඉදිරියට එන්න, සාගර සමත් වෙලා...

ඒ දෙන්නගෙ සටනත් හරියට, football world cup එකේ, සහභාගි වෙන, අන්තිම තරගාවලිය නිසා , වාර්තාවක් තියන්න, රොනාල්ඩෝ යි මෙසීයි අතර තියන තරගය වගේම තමයි....

පහුගිය දවස්වල, පත්තර වලට මීඩියා වලට කතා කරමින්, බැසිල්ගේ තොරතුරු කියන්න, බැසිල් පිලිබද නිවුස් දෙන්න, මැසේජ් ගැන සුභවාදී ප්‍රකාශ නිකුත් කරන්න, එදිරිමාන්න මොනතරම් මහන්සි වුණත්, ඊට වඩා ලොකු දෙයක්, සාගර එක වොයිස් කට් එකෙන් කරලා දැම්මා...

ඔන්න ඔය අස්සෙ තමයි, බැසිල් ගිය ඉරිදා ආපු වෙලාවේ, ගුවන්තොටුපලේ විශේෂ ප්‍රභූන් වෙනුවෙන් තියන, පර්යන්ත හා වරප්‍රසාද පාවිච්චි කරමින්, රජයේ මුදල් අවභාවිතා කරලා කියන, චෝදනාව එළියට ආවේ.

සමාජ මාධ්‍ය වලින් , මේ චෝදනාව, තදටම බැසිල්ට එරෙහිව එල්ල කළා. ඒ වෙලාවේ, පක්ෂය වෙනුවෙන් කතා කරමින් , එහෙම දෙයක් වුණේ නෑ කියලා , කරුණු පැහැදිලි කරන්න ඉදිරිපත් වුණේ සාගර...

"කිසිම මුදල් අවභාවිතාවක් වෙලා නෑ... රජයේ මුදල් සතයක්වත්, බැසිල් මහත්තයාගේ ආගමනය වෙනුවෙන්, වියදම් වෙන්න විදියක් නෑ... මොකද ඒ සියලුම මුදල්, පක්ෂය විසින් ගෙවා දැමුවා..."

ඔන්න ඔය අස්සේ මාධ්‍ය අතර ඉන්න, කවුදෝ දග පන්දු කාරයෙක්, සාගරගෙ කකුල් දෙක මුලටම , දුස්රාවක් දැම්මෙ මෙන්න මෙහෙම.

"රෝ සංවිධානයේ නියෝජිතයෝ වගයක් ඇවිල්ලා, බැසිල් මහත්තයා හම්බෙලා, සාකච්ඡාවක් කරා කියලත් ආරංචියි..."

සාගර පසු පාදයට ගිහින්, බැට් එකයි පාදයයි දෙකම ඉස්සරහට දාලා, විකට් එක බේරගත්තේ මෙන්න මෙහෙම....

"ඇයි... එතුමට ඒ වගේ කවුරු හරි හම්බවෙන්න, තහනමක් කරලා තියෙනවද..?"

"ඒ කියන්නේ එහෙනම් හම්බ වෙලා තියෙනවා...?"

"ඒක මන් දන්නෑ.... ඒක අහන්න ඕන එතුමාගෙන්. හැබැයි එතුමට ඒ කවුරුවත් හම්බවෙන්න තහනමක් නෑ..."

රෝ එකයි බැසිලුයි කළයි කියන සාකච්ඡාව, කොහොම වෙතත්, මේ දවස් වල රෝ එක ගැන නම්, අපේ දේශපාලන කරලියේ කතා-බස් බහුලයි. ලබන අවුරුද්දේ, ලංකාවේ දේශපාලනය තුළ, පෙරළියක් කරන්න, දැන් ඉඳලම, රෝ එක වැඩ කරන්න පටන් අරන් කියලා, පුංචි කතාබහක්, පහුගිය දා පාර්ලිමේන්තු ආලින්දයකත් ඇතිවුණා.

හැබැයි එතන, ආණ්ඩුවේ මන්ත්‍රීවරු කවුරුවත් හිටියේ නෑ. හිටපු ඔක්කොම විපක්ෂයේ හා, ආණ්ඩුවෙන් ඉවත් වෙච්ච කණ්ඩායම් වල අය...

මේ කට්ටිය කතා උනේ, ලබන අවුරුද්දේ මැද විතර වෙනකොට ආණ්ඩුවට, නිසැකයෙන්ම මහ ඡන්දයක් පවත්වන්න සිද්ධ වෙනවා , කියලා තැන ඉදන්...

"ඡන්දයක් තියන්නේ නෑ කියලා, රනිල් කියලා ඉවරයි... ඔයගොල්ලො බොරුවට දගලනවා." ප්‍රශ්න ටිකක් මධ්‍යස්ථව දකින, එක් මන්ත්‍රීවරයෙක් එහෙම කිව්වා...

"ඔයා කතා කරන්නේ, දැන් තියෙන තත්ත්වය ගැන. හැබැයි ලබන අවුරුද්දේ ඡන්දයක් තියන්න කියලා, ඉල්ලලා, සජබේ මූලිකත්වයෙන්, ජවිපෙයි , පෙරටුගාමීන් සහ විපක්ෂයේ පක්ෂයි, පාරට බැහැලා උද්ඝෝෂණය කරන කොට, රනිල් කොහොමද ඡන්ද නොතියා ඉන්නේ.

මාර්තු වල නිසි කාලේ ආවම, අනිවාර්යයෙන් ම, එයාට ආණ්ඩුව විසුරුවාලා , ඡන්දයක් තියන්න වෙනවා. ඒකට ජාත්‍යන්තරයෙ සපෝට් එකක් තියෙනවා. විශේෂයෙන් රෝ එකේ..." මන්ත්‍රීවරයා එහෙම කිව්වේ, කාරණා කාරණා දැනමුත්තෙක් විදිහට.

"රෝ එක්ක ඉන්නේ ,රනිල් එක්කනේ..." තවත් මන්ත්‍රීවරයෙක් කිව්වා.

"ඒ ඉස්සර... 2015දී system change කරන්න රනිල්ට ඒගොල්ලො උදව් කලා තමයි. එකේ හිලව්වට රනිල් මොනාද ඉන්දියාවට කළේ...හම්බන්තොට චීනට දුන්නා. පෝට් සිටිය නතර කරනවා, කියලා කිව්වට, කළේ නෑ... අන්තිමේ ඉඩමත් වැඩි කරල දුන්නා. ඉන්දියාවට කළගුණ සළකන්නට රනිල්ට බැරි වුණා..." ජාත්‍යන්තර සබඳතා බහුශෘතයෙකු වගේ ඒ මන්ත්‍රීත්, මෙන්න මෙහෙම විස්තර, කියාගෙන කියාගෙන ගියා.

දේශපාලන වාර්තාකරු