පුවත්

ශ්‍රී ලංකා ක්‍රිකට් ක්‍රීඩක ධනුෂ්ක ගුණතිලක ට සිඩ්නි අධිකරණයක් මගින් ඇප ලබාදී ඇති බව වාර්තා වෙයි.

අධිකරණයට ගුණතිලකගේ නීතිඥයින් දන්වා ඇත්තේ සැකකරු ට සහාය වීමට ශ්‍රී ලංකා රජය සහ ශ්‍රී ලංකා ක්‍රිකට් ආයතනය ඉදිරිපත් වී ඇති බවය.

ඒ අනුව ඩොලර් 150,000ක පුද්ගලික ඇපයක් මත ධනුෂ්ක ව ඇපමත නිදහස් කිරීමට අධිකරණය නියෝගකර තිබේ.

කෙසේ වුවත් මහෙස්ත්‍රාත් ජැනට් වැක්විස්ට් විසින් පහත සඳහන් ඇප කොන්දේසි ධනුෂ්කට එරෙහිව පනවා තිබේ.

*ඩොලර් 150,000 ඇපයක්
*දිනපතා පොලීසියට වාර්තා කළ යුතුය
*රාත්‍රී 09ත් උදෑසන 06ත් අතර ගමන් බිමන් තහනම්ය
*ටින්ඩර් සහ වෙනත් Dating App භාවිතය තහනම් ය.
*පැමිණිලිකාරිය සමග සම්බන්ධතා පැවැත්වීම තහනම් ය.

31 හැවිරිදි ධනුෂ්ක ව පසුගිය 06 වනදා සිඩ්නි පොලිස් කණ්ඩායමක් විසින් අත්අඩංගුවට ගනුලැබූ අතර ඒ 29-හැවිරිදි තරුණියක් කළ පැමිණිල්ලකට අනුවය.

එහිදී අය සඳහන් කර තිබුණේ ධනුෂ්ක විසින් තමාව "තම කැමැත්ත නොමැතිව" සිව් වතාවක් ලිංගික අපයෝජනයට ලක්කළ බවය.

අධිකරණයේ දී අනාවරණය වුණු ආකාරයට ඒ නොවැම්බර් 02 වනදා, එම තරුණියගේ නිවසේදීය.

සහනාධාර යටතේ ගොවීන්ට ලබාදීමට ආනයනය කරන ලද පොහොර ගොවීන්ට ලබා නොදී පෞද්ගලික සමාගම් වලට වැඩි මිලට ලබා දී ඇතැයි හෙළි වී තිබේ.

අපරාධ පරීක්ෂණ දෙපාර්තමේන්තුව විසින් මේ පිළිබඳව සිදු කළ විමර්ශනයකදී මෙම තොරතුරු අනාවරණය වී ඇතැයි ජාතික පොහොර ලේකම් කාර්යාල ආරංචි මාර්ග සඳහන් කරයි.

රජයේ අවසරය මත යූරියා පොහොර ආනයනය කළ පෞද්ගලික සමාගම් ගොවීන්ට එම පොහොර ලබා නොදී කර්මාන්ත කටයුතු සඳහා පෞද්ගලික සමාගම් වලට ව්‍යාජ ලේඛන සකසා වැඩි මිලට ලබා දී ඇති බවද සඳහන්ය.

ගොවීන්ට අවශ්‍ය පරිදි පොහොර නැති වීම සම්බන්ධයෙන් හිටපු ජනාධිපති ගෝඨාභය රාජපක්‍ෂ 2020 වසරේදී කෘෂිකර්ම අමාත්‍යාංශයේ ලේකම් සුමේධ පෙරේරා සහ රුවන් චන්ද්‍රසිරි මහත්වරුන් වෙත දැනුම් දීමෙන් අනතුරුව එම ලේකම්වරුන් විසින් පොලිස්පතිවරයා වෙත කරන ලද පැමිණිල්ලක් මත සිදුකළ විමර්ශන මත මෙම ජාවාරම හෙළිව තිබේ.

ඩිෆෙන්ඩර් රථයකින් තරුණයකු පැහැරගෙන ගොස් අයුතු ලෙස සිරකර තබා වධහිංසාවට ලක් කළේ යැයි චෝදනා එල්ලවී සිටින හිටපු පාර්ලිමේන්තු මන්ත්‍රිනී හිරුණිකා ප්‍රේමචන්ද්‍ට එරෙහි නඩුවේ විභාගය ජනවාරි 30 වනදා දක්වා කල්තැබීමට කොළඹ මහාධිකරණය අද (16) නියම කර ඇත.

ඒ අදාළ නඩුව අද (16) කොළඹ මහාධිකරණ විනිසුරු අමල් රණරාජා ඉදිරියේ කැඳවනු ලැබූ අවස්ථාවේ වන අතර එහිදී විත්තිකාර හිරුණිකා ප්‍රේමචන්ද්‍ර වෙනුවෙන් පෙනී සිටි නීතිඥ අෂාන් ප්‍රනාන්දු අධිකරණය හමුවේ කරුණු දක්වමින් මෙම නඩුවට අදාළ වීඩියෝ සාක්ෂි දෙකක් ඉදිරිපත් කිරීමට පැමිණිල්ල සූදානම් බවත් එම වීඩියෝ සාක්ෂිවල අන්තර්ගතය අධ්‍යයනය කිරීම සඳහා තමන්ට කාලය අවශ්‍ය බවත් සඳහන් කළේය.

ඒ අනුව අද දින නඩු විභාගය කල්තබන ලෙසත් ඔහු අධිකරණයෙන් ඉල්ලා සිටියේය.

එම ඉල්ලීමට පැමිණිල්ල වෙනුවෙන් පෙනී සිටි නියෝජ්‍ය සොලිසිටර් ජෙනරාල් ජනක බණ්ඩාර අධිකරණය හමුවේ කරුණු දක්වමින් පවසා සිටියේ මෙම නඩුවේ විභාගය දැනටමත් වසර හයක් පමණ ප්‍රමාදවී ඇති බවය.

කෙසේ වෙතත් විනිසුරු අමල් රණරාජා සඳහන් කළේ මෙම නඩු විභාගය අවසන් වශයෙන් ජනවාරි මස 30 වනදා දක්වා කල්තබන බවය.

එදින නඩුව අනිවාර්යෙන්ම විභාගයට ගන්නා බවත් විනිසුරුවරයා නියෝගකර සිටියේය.

2015 වසරේ දෙසැම්බර් මස 21 වනදා දෙමටගොඩ ප්‍රදේශයේ වෙළෙඳසැළක සේවය කළ අමිල ප්‍රියංක නැමැති තරුණයෙකු පැහැරගෙන ගොස් අයුතු ලෙස සිරකර තබා වධහිංසනයට ලක්කිරීම සම්බන්ධයෙන් හිරුණිකා ප්‍රේමචන්ද්‍රට එරෙහිව නීතිපතිවරයා මෙම නඩුව ගොනුකර තිබේ.

මෙම නඩුවේ විත්තිකරුවන් වශයෙන් නම්කර සිටි හිරුණිකා ප්‍රේමචන්ද්‍ගේ ආධාරකරුවන් අට දෙනෙකු මීට පෙර අධිකරණය හමුවේ වරද පිළිගැනීමෙන් අනතුරුව ඔවුන්ට අධිකරණය විසින් අත්හිටවූ සිරදඬුවම් හා දඩ මුදල් නියමකර තිබුණි.

ඉතාම අනතුරුදායක තත්වයක තිබූ මෙරට ආර්ථිකය මහ බැංකුව හඳුන්වාදුන් මූල්‍ය ප්‍රතිපත්ති හේතුවෙන් මේ වනවිට යම්කිසි ස්ථාවර තත්වයක පවතින බව ශ්‍රී ලංකා මහ බැංකුවේ අධිපති ආචාර්ය නන්දලාල් වීරසිංහ පවසයි.

රට තුළ රුපියල බාල්දුවීමට සහ උද්ධමනය ඉහළයෑමට ප්‍රධාන වශයෙන් හේතු කිහිපයක් බලපෑ බවද ඔහු පවසා තිබේ.

ශ්‍රී ලංකා මහ බැංකුවේ අධිපතිවරයා මෙසේ පැවසුවේ ඊයේ (15) කොළඹ පැවති සම්මන්ත්‍රණයකදීය.

රට නැවත මෙවැනි ආර්ථික අර්බුදයකට ගමන් නොකිරීමට අවශ්‍ය මූලික ව්‍යුහාත්මක ප්‍රතිසංස්කරණ 2023 අයවැය තුළ අන්තර්ගත බවද ඔහු පැවසීය.

එහිදී වැඩිදුරටත් අදහස් දක්වමින් මහ බැංකු අධිපතිවරයා මෙසේද පැවසීය.

ජනවාරි මාසයෙන් පස්සේ අපේ සංචිත තිබ්බෙ අඩුවෙන සහ තවත් ඉදිරියට නොලැබෙන තත්වයක. ඒ අනුව අපට ණය ගෙවන්න තවදුරටත් හැකියාවන් නොමැතිව තියෙද්දි මහ බැංකුවෙන් 203 ට රුපියලේ අගය පවත්වාගෙන ගියා. සංචිත තියෙන ටිකත් ණය ගෙවන්න සහ ඉන්ධන වලට වියදම් කරලා.

" එහෙමත් බැරි වුණාම තමයි මාර්තු මාසයේ රුපියල පා කර හැරියේ. කිසිදු පාලනයකින් තොරව. එතනදි තමයි රුපියල් රු.203 ඉඳලා එකපාරටම 365 ,380 ට ගියේ.

දිගටම මුදල් අච්චු ගැසීම නිසා උද්ධමනය වැඩි වෙනවා. එතකොට අපිට කරන්න තිබුණු ඊළඟ එක තමයි මුදල් ප්‍රතිපත්තිය දැඩි කරන එක. ඒ අනුව තමයි අපි අප්‍රේල් මාසයේ ප්‍රතිපත්ති පොලී අනුපාතය වැඩි වශයෙන් ඉහළ නංවා මුදල් ප්‍රසාරණය අඩු කිරීමේ ක්‍රියාවලියක් ක්‍රියාත්මක කළේ. ඒ සමගම මුදල් අච්චු ගැසීම අඩු කරල ආදායම් වැඩි කර ගැනීමට අවශ්‍ය විවිධ පියවර ගත්තා.

බරපතළ මූල්‍ය වංචාවක් සම්බන්ධයෙන් අත්අඩංගුවට ගෙන රිමාන්ඩ් බන්ධනාගාර ගත කර සිටින තිළිණි ප්‍රියමාලි ඇතුළු සිව්දෙනෙකු යළි රිමාන්ඩ් බන්ධනාගාර ගතකිරීමට අධිකරණය අද(16)නියෝග කර ඇත.

ඒ අනුව එම සැකකරුවන් නොවැම්බර් මස 30 වනදා දක්වා රිමාන්ඩ් බන්ධනාගාර ගත කර ඇත.

මෙසේ බන්ධනාගාර ගතකිරීමට අධිකරණය නියෝග කරනු ලැබුවේ තිළිණි ප්‍රියමාලි, ජානකී සිරිවර්ධන, පූජ්‍ය බොරැල්ලේ සිරිසුමන හිමි සහ ඉසුරු බණ්ඩාර යන සැකකරුවන්ය.

චක්‍රලේඛන සකස් කර ඇත්තේ වැඩ කිරීම පහසු කිරීමට මිස වැඩ නොකර කකුලෙන් ඇදීමට නොවන බැවින් චක්‍රලේඛනවලට මුවා වී තමන් ඇන්දීමට කටයුතු නොකරන ලෙස නාගරික සංවර්ධන හා නිවාස ඇමති ප්‍රසන්න රණතුංග නිළධාරීන්ගෙන් ඉල්ලයි.

ඔහු පෙන්වා දෙන්නේ ඇතැම් රාජ්‍ය නිළධාරීන් ජනතාවගේ අවශ්‍යතාවයන් ඉටුකිරීම ප්‍රමාද කිරීමට චක්‍රලේඛන හේතුවක් කරගන්නා බවයි.

“මිනිහෙකුගේ සාධාරණ ඉල්ලීමක් ආපුවාහම නෑ, බෑ කියාගෙන එන්න එපා. ඒක නීත්‍යානුකූල විදිහට ඉටු කරන්න පුළුවන් විදිහ කියන්න. ඔය නෑ, බෑ කියන එක මට දිරවන්නෙම නෑ.” යැයි ද ඇමතිවරයා කීවේය.

නාගරික සංවර්ධන හා නිවාස අමාත්‍යාංශයේ අයවැය හා ඉදිරි කටයුතු පිළිබද අමාත්‍යාංශ නිළධාරින් සමඟ පැවති සාකච්ඡාවක දී ඇමතිවරයා මේ බව සඳහන් කළේය. ඇමති ප්‍රසන්න රණතුංග මහතාගේ ප්‍රධානත්වයෙන් හා රාජ්‍ය අමාත්‍යවරුන් වන තේනුක විදානගමගේ, අරුන්දික ප්‍රනාන්දු යන මහත්වරුන්ගේ සහභාගීත්වයෙන් මෙම සාකච්ඡාව පැවැත්විණ.

මෙහිදී අදහස් දැක්වු ඇමති ප්‍රසන්න රණතුංග මහතා වැඩිදුරටත් මෙසේ කීවේය.

“අපිට හැමදාම ඉතිහාසයට බැණ බැණ ඉන්න බෑ. වර්තමානයට මුහුණ දෙමින් අනාගතය සැලසුම් කළ යුතුයි. නාගරික සංවර්ධන හා නිවාස අමාත්‍යාංශය කියන්නේ රටේ සංවර්ධනයට අදාළ ප්‍රධාන අමාත්‍යාංශයක්. විශේෂයෙන්ම රටේ ජනතාවගේ නිවාස ගැටළුවට සෘජුවම විසඳුම් ලබාදීමට බැඳී සිටින අමාත්‍යාංශයක්. පසුගිය සමයේ පැවති කොවිඩ් වසංගත තත්ත්වයත් මේ වන විට රටේ පවතින ආර්ථික අර්බුදයත් නිසා මේ අමාත්‍යංශය යටතේ සිදු කෙරෙන නිවාස ණය හා ආධාර වැඩසටහන් ඒ වගේම නිවාස ව්‍යාපෘතිවල තාවකාලික පසුබෑමක් සිදුව තිබෙනවා.

ජනාධිපතිවරයා මෙවර ඉදිරිපත් කළේ පවතින ආර්ථික අර්බුදයට විසඳුම් සෙවීම සඳහා වන අයවැයක්. එමගින් මුලික අවධානය යොමුව තිබෙන්නේ මේ රටේ පවතින ආර්ථික අර්බුදයෙන් ගොඩ එන්නේ කොහොමද කියන එක. අපි බලන්න ඕනේ ඒ වැඩපිළිවෙල ඇතුළේ නාගරික සංවර්ධන හා නිවාස අමාත්‍යාංශයට ගත හැකි පියවර පිළිබඳවයි. පවතින ආර්ථික අර්බුදයෙන් රට ගොඩනැගීම ඉලක්ක කරගෙන තමයි අපි ඩොලර් වලට නිවාස විකිණීමේ වැඩසටහන, One Stop Unit සංවර්ධන ව්‍යාපෘති සඳහා අනුමැතිය දීමේ ක්‍රියාවලිය වේගවත් කිරීම සිදු කළේ. තව තවත් අලුත් ව්‍යාපෘති හඳුනාගෙන ඉදිරි කාලය තූළ කඩිනමින් එම ව්‍යාපෘති ක්‍රියාත්මක කළ යුතුයි.

පසුගිය කාලයේ නිවාස ණය, ආධාර වැඩසටහන් වගේම ඇතැම් නිවාස ව්‍යාපෘති හා ඇතැම් සංවර්ධන ව්‍යාපෘති ආරම්භ කරලා තියෙන්නේ නිසි සැලසුමකින් තොරවයි. ඇතැම් ව්‍යාපෘති ආරම්භ කරලා තියෙන්නේ නිළධාරීන්ට ඕන විදිහට. තිබෙන ව්‍යාපෘති අවසන් කිරීම වෙනුවට තවත් අලුතින් ව්‍යාපෘති ආරම්භ කිරීම සිදුවෙලා තියෙනවා. මෙතෙක් ක්‍රියාත්මක ණය, ආධාර, වැඩසටහන් හා ව්‍යාපෘති අවසන් කරනතුරු නව ව්‍යාපෘති හා ණය හා ආධාර වැඩසටහන් ආරම්භ නොකළ යුතුයි.

ඇතැම් නිළධාරින්ගේ වැරදි නිසා දේශපාලනඥයින් වන අපියි බැණුම් අහන්නේ. “ටයි ගැට” ප්‍රශ්න නිසා නිළධාරීන් අතර විවිධ ගැටළු තියෙනවා. ඒකත් මේ රාජ්‍ය ආයතනවල වැඩ නොවීමට හේතුවක්. තනතුරු ප්‍රශ්න, සීනියෝරිටි ප්‍රශ්න එහෙම නැත්නම් වෙන පුද්ගලික ප්‍රශ්න නිසා නිළධාරීන් අතර විවිධ ප්‍රශ්න තියෙනවා. ඒකට තමයි කියන්නේ “ටයි ගැට” ප්‍රශ්න කියලා. මේ ප්‍රශ්න නිසා ආයතනවල වැඩ නොවුණාම බනින්නේ බලය තියන ආණ්ඩුවට. නැත්නම් ඇමතිට ඒ නිසා “ටයි ගැට” ප්‍රශ්න නිසා ජනතා සේවය බාල්දු කරන්න එපා. අමාත්‍යාංශයේ වැඩ ප්‍රමාද කරන්න එපා. ”

සිංගප්පූරු ශ්‍රී ලංකා නිදහස් වෙළෙඳ ගිවිසුම ඉතා කෙටි කලක් තුළ ක්‍රියාත්මක කිරීමට කටයුතු කරන ලෙස ජනාධිපති රනිල් වික්‍රමසිංහ අදාළ නිලධාරීන්ට උපදෙස් දුන්නේය.

සිංගප්පූරු ශ්‍රී ලංකා නිදහස් වෙළෙඳ ගිවිසුම ක්‍රියාත්මක කිරීම පිළිබඳ අද (16) පෙරවරුවේ ජනාධිපති කාර්යාලයේ පැවති සාකච්ඡාවේ දී ජනාධිපතිවරයා මෙම උපදෙස් දෙනු ලැබීය.

මේ සම්බන්ධයෙන් පවතින ගැටලු පිළිබඳ මෙහිදී දීර්ඝ ලෙස සාකච්ඡා කෙරුණු අතර පවතින සියලු ගැටලු සඳහා කඩිනම් විසඳුම් ලබාදීමේ අවශ්‍යතාව ජනාධිපතිවරයා අවධාරණය කළේය.

ජනාධිපති ලේකම් සමන් ඒකනායක, ජනාධිපති ජ්‍යෙෂ්ඨ ආර්ථික උපදේශක ආචාර්ය ආර්.එච්.එස්. සමරතුංග, නීතිපති සංජය රාජරත්නම්, වෙළෙඳ, වාණිජ හා ආහාර සුරක්ෂිතතා අමාත්‍යාංශයේ ලේකම් එස්.ටී. කොඩිකාර, සහ රේඛීය ආයත ප්‍රධානීහු මෙම සාකච්ඡාවට එක්ව සිටියහ.

ලංකා විදුලිබල මණ්ඩලයේ පසුගිය මාස තුනේදී රුපියල් කෝටි 4431ක මූල්‍ය පාඩුවක් සිදුව ඇති බව වාර්තා වෙයි.

මේ වසරේ ජූලි මාසයේ සිට සැප්තැම්බර් මාසය දක්වා කාර්තුව වෙනුවෙන් ලංකාවිදුලි බල මණ්ඩලයට එම පාඩුව සිදුව ඇතැයි එම මණ්ඩලයට නිකුත් කළ මූල්‍ය වාර්තාවේ සඳහන් වේ.

ලංකා විදුලි බලමණ්ඩලය ඉකුත් 2021 වසරේ එම කාර්තිවේදි රුපියල් කෝටි 2145ක පාඩුවක් ලබා තිබිණි.

මන්නාරම රදගුරු ෆිඩෙල්ස් ලයනල් එම්මානුවෙල් ප්‍රනාන්දු හිමිපාණන් ඇතුළු පූජකතුමන්ලා පිරිසක් අද (16) පෙරවරුවේ ජනාධිපති කාර්යාලයේ දි ජනාධිපති රනිල් වික්‍රමසිංහ හමු වූහ.

මන්නාරම ප්‍රදේශයේ ඉඩම් ගැටලු ඇතුළු කරුණු කිහිපයක් පිළිබඳ මෙහිදී ජනාධිපතිවරයා දැණුවත් කෙරුණු අතර ඒ පිළිබඳ අවධානය යොමු කළ ජනාධිපති රනිල් වික්‍රමසිංහ එම ගැටලු විසඳීමට කඩිනම් පියවර ගන්නා බව සඳහන් කළේය.

මඩු වන්දනාවේ පැමිණෙන බැතිතුන්ට අවශ්‍ය පහසුකම් සැලසීම පිළිබඳව ද මෙහිදී විශේෂ සාකච්ඡාවට ලක් විය.

ජොයිස් පෙපි සොසායි (Joyce Peppi Sosai Santia) පියතුමා, ඇන්තනී සොසායි පියතුමා (Antony Sosai) ඇතුළු පියතුමන්ලා සහ පාර්ලිමේන්තු මන්ත්‍රී කාවින්ද ජයවර්ධන ඇතුළු පිරිසක් මෙම අවස්ථාවට එක්ව සිටියහ.

ලංකා කම්කරු කොන්ග්‍රසයේ නායක හිටපු පළාත් සභා අමාත්‍ය සෙන්දිල් තොණ්ඩමන් සහ තමිල්නාඩු ප්‍රාන්ත ප්‍රධාන අමාත්‍ය එම්. කේ. ස්ටාලින් විශේෂ හමුවක් ඊයේ (15) සිදුව තිබේ.

මෙහිදී කම්කරු කොන්ග්‍රස් නායකයා , තමිල්නාඩු ප්‍රාන්ත ප්‍රධාන අමාත්‍යවරයාට දන්වා ඇත්තේ පසුගිය සමයේ ලංකාව මුහුණදුන් දුෂ්කරම මොහොතේ තමිල්නාඩු ප්‍රාන්ත රජය මානුෂීය ආධාර ලබාදෙමින් දැක්වූ සහයට ශ්‍රී ලංකා ජනාධිපති රනිල් වික්‍රමසිංහ සිය හදපිරි ස්තූතිය පිරිනැමූ බවය.

එසේම සිරිමා - ශාස්ත්‍රී ගිවිසුම සමයේ මෙරටින් ඉන්දියාවට ගිය දමිළ ජනතාව මුහුණදී ඇති බරපතළ ප්‍රශ්නයක් වූ එම ජනතාවගේ නිවාස ප්‍රශ්නය පිළිබඳවද මැදිහත්වීමක් සිදුකිරීමට ලංකා කම්කරු කොන්ග්‍රසයේ නායක හිටපු පළාත් සභා අමාත්‍ය සෙන්දිල් තොණ්ඩමන් කටයුතු කර ඇති අතර ඒ අනුව ප්‍රාන්ත රජයේ සහයෙන් එම ජනතාවට නිවාස 650ක් ලබාදීමට කටයුතු යෙදී තිබේ.

ඉකුත් මැයි මස 9 වැනිදා කළහකාරීන් විසින් ඝාතනය කළ ශ්‍රී ලංකා පොදුජන පෙරමුණේ පොළොන්නරුව දිස්ත්‍රික් හිටපු පාර්ලිමේන්තු මන්ත්‍රී අමරකීර්ති අතුකෝරාළ වෙනුවෙන් පාර්ලිමේන්තු මන්ත්‍රීවරුන් විසින් පරිත්‍යාග කළ රුපියල් අනූලක්ෂ විසිපන්දහසක මුදල ඔහුගේ බිරිඳ වෙත ප්‍රදානය කිරීම ජනාධිපති රනිල් වික්‍රමසිංහ අතින් ඊයේ (14) සිදු විය.

පාර්ලිමේන්තු සංකීර්ණයේදී පැවැති ආණ්ඩු පක්ෂයේ මන්ත්‍රී කණ්ඩායම් රැස්වීමේදී නියෝජ්‍ය කථනායක අජිත් රාජපක්ෂ විසින් අදාළ චෙක් පත ජනාධිපතිවරයාට භාරදෙනු ලැබූ අතර අනතුරුව ජනාධිපතිවරයා විසින් චෙක්පත අමරකීර්ති අතුකෝරාළ ගේ බිරිඳ සහ පුතණුවන් වෙත ප්‍රදානය කළේය.

මේ සඳහා පාර්ලිමේන්තු මන්ත්‍රීවරුන් 183දෙනෙකු මුදල් පරිත්‍යාග කර තිබේ.

මාදිවෙල මන්ත්‍රී නිවාස සංකීර්ණයේ සිටින ආණ්ඩු පක්ෂ පර්ලිමේන්තු මන්ත්‍රීවරු 20 දෙනෙකුගෙන් සමන්විත “මාදිවෙල සංවිධානය" විසින් අමරකීර්ති අතුකෝරාළ වෙනුවෙන් මෙම අරමුදල් එකතු කිරීම ආරම්භ කළ බවත්, ඊට පසුව ආණ්ඩු පක්ෂයේ මෙන්ම විපක්ෂ මන්ත්‍රීවරුන්ගේ සහයෝගය ඊට හිමිවීම සුවිශේෂී කරුණක් බවත් නියෝජ්‍ය කථානායක අජිත් රාජපක්ෂ මෙහිදී පැවසීය.

ඝාතනයට ලක්වූ අමරකීර්ති අතුකෝරළ මන්ත්‍රීවරයා ට, පාර්ලිමේන්තු මන්ත්‍රීවරයකුට ලබාදෙන විශ්‍රාම වැටුප ලබාදීමට කටයුතු කරන ලෙස ද ජනාධිපතිවරයාගෙන් ඉල්ලා සිටී නියෝජ්‍ය කථානායකවරයා මෙයට පෙර පාර්ලිමේන්තුවේදී ඝාතනයට ලක්වූ හිටපු මාතර දිසා අමාත්‍යවරයකු වූ කීර්ති අබේවික්‍රම වෙනුවෙන්ද මන්ත්‍රී විශ්‍රාම වැටුප් ලබාදෙන බවත් ඒ අනුව අතුකෝරාළ මන්ත්‍රීවරයාගේ පවුලට ද එම දීමනාව ලබා දිය හැකි බවත් සඳහන් කළේය.

අග්‍රාමාත්‍ය දිනේෂ් ගුණවර්ධන, හිටපු අග්‍රාමාත්‍ය මහින්ද රාජපක්ෂ , ආණ්ඩුව නියෝජනය කරන මැති ඇමතිවරුන් මෙම අවස්ථාවට එක්ව සිටියහ.

පොහොට්ටුවෙන් බිඳිල ගිය එක්තරා කස්ටියක් දැන් ඉන්නෙ විපක්ෂය පැත්තෙ...

විපක්ෂයට යන්න කලින් උන්නැහේල රටේ ලොකු පුටුවටත් සටනක් දීලයි ගියේ... කොහොම නමුත් ඒ ගොල්ලො ආණ්ඩුවෙ අය-වැයට සපෝට් කරන්න යනවය කියල ආරංචියක් යනව...

නමුත් ඒ සපෝට් එක දෙන බවවත් නොදෙන බවවත් එයාල ප්‍රසිද්ධියේ කියන්නෙ නැහැල්ලු... අන්තිම මොහොතෙ ලොකු ප්‍රකාශයක් කරල හේතු දන්වල අයවැයට උදව් කරන්න යන වගයි තතු දත් උදවිය කියන්නෙ...

මේ සහය දීමට බලපාපු ඇත්තම හේතුව නිල වශයෙන් කවුරුවත් දන්නෙ නැතත් ඒ ඇත්ත හේතුවට වාහන හුටපටයක් බව සමහරු කියනව...

ඔය කණ්ඩායමේ අය කිහිප දෙනෙක් ආණ්ඩුවෙ මහ කන්තෝරුවෙන් වාහන වගයක් අරන් ඒව නැවත භාර නොදීම නිසා ඒකට විරුද්ධව ආණ්ඩුව පොලිස් පැමිණිලි කාරිය දාලත් තිබුණ... නමුත් හිටපු ගමන් ආණ්ඩුව විසින්ම ඒ පොලිස් පැමිණිලි ඉල්ලා අස්කර ගත්තලු...

එහෙම පැමිණිලි අස් කරගෙන විපක්ෂයෙන් වාහන අරන් භාර නොදුන් උදවිය බේරාදීමට කෘතගුණ දැක්වීමට අයවැයට ඡන්දෙ පාවිච්චි කරන්න උන්නැහේල සැරසෙන බව තමයි තිරය පිටුපස තොරතුරු දන්න උදවියගෙ අදහස.

මේ ගැන ආණ්ඩුවෙ ඉහළම මට්ටමේ කෙනෙක් ඔය විපක්ෂ කණ්ඩායමේ කටකාර ලොක්කෙක් එක්ක රහසිගත එකඟතාවකට පත්වෙලා ඉන්න බවත් ආරංචියි...

ඕකට තමයි එයාල කියන්නෙ ප්‍රතිපත්තිගරුක දේශපාලනේ කියලා .

-deshaya

එක්සත් ජාතික පක්ෂයේ මහලේකම් ධුරයට හිටපු මුදල් අමාත්‍යවරයකු වන රවි කරුණානායක පත්කෙරෙනු ඇති බව ඉහළ පෙළේ දේශපාලන ආරංචි මාර්ග පවසයි .

එම ආරංචි මාර්ග සඳහන් කරන ආකාරයට දැනට පක්ෂ මහලේකම් ධුරය දරන පාලිත රංගේබණ්ඩාර පළාත් ආණ්ඩුකාර ධුරයකට පත්කිරීමට නියමිතය.

ඉදිරි මැතිවරණ වසර ඉලක්ක කරගෙන එජාපය නව ජවයකින් ප්‍රතිසංවිධානය කිරීම සඳහා හිටපු මුදල් අමාත්‍ය රවි කරුණානායකට වගකීම් පැවරෙන බවත් වාර්තා වෙයි.

මේ සම්බන්ධයෙන් පාක්ෂිකයින් අතරත් උද්ද්‍යෝගයක් ඇති බව සඳහන් කරන එම ආරංචි මාර්ග වැඩිදුරටත් පවසන්නේ මේ වන විට එක්සත් ජාතික පක්ෂය සමග එක්වීමට අපේක්ෂාවෙන් සිටින වෙනත් පක්ෂ වල ජ්‍යෙෂ්ඨයන් ඇතුළු ක්‍රියාකාරීන් රවී කරුණානායක හිටපු අමාත්‍යවරයා සමග කටයුතු කිරීම පහසුවක් සහ විශ්වාසය තැබිය හැකි අයෙකු බවට පක්ෂ නායකත්වයට දන්වා ඇති බවය.

එසේම හිටපු අමාත්‍ය රංගේබණ්ඩාර ට ආණ්ඩුකාර ධුරයට අමතරව පක්ෂයේ පූර්ණකාලීන නොවන තනතුරක්ද ලබා දෙනු ඇති බවත් එම ආරංචි මාර්ග සඳහන් කරයි.

ලංකා විදුලි බලමණ්ඩලය විසින් විදුලි ගාස්තු ඉහළ දැමුවද එය ආයතනයේ පිරිවැය පියවා ගැනීමට ප්‍රමාණවත් නැති බව ජාත්‍යන්තර ‘ෆිච් රේටින්ග්ස්’ ආයතනය නිකුත්කළ වාර්තාවක් පවසයි .

විදුලි ගාස්තු වැඩි කිරීම විදුලි ජනන පිරිවැය අනුව විදුලි බල මණ්ඩලයේ වියදම් පියවා ගැනීමට ප්‍රමාණවත් නැති නමුත් එමගින් පාඩුව අවම කර ගැනීමට උපකාරී වනු ඇතැයිද ෆිච් රේටිං වාර්තාව පවසයි .

කෙසේ නමුත් විදුලි ජනන පිරිවැය පහත ගියොත් හෝ අඩු වියදම් සහිත පුනර්ජනනීය බලශක්ති වෙත හුවමාරු කිරීමට හැකියාවක් ලැබෙන්නේ නම් ඒ හරහා මණ්ඩලය බිඳ නොවැටී ආරක්ෂා වීමට උපකාරී වනු ඇතැයිද එම වාර්තාව වැඩිදුරටත් සඳහන් කරයි.

ආණ්ඩුවෙන් එලියට ඇවිත් , විපක්ෂයේ ඉන්න අනුර යාපල ,ඊයේ සජිත් එක්ක සන්ධනගත වුනා විතරයි , ඔන්න ආණ්ඩුවේ ඉන්න, ශ්‍රීලංකා මැති ඇමතිවරු සෙට් එකම, ඊයේ හවස තමන්ගේ හිටපු නායිකාව හම්බවෙන්න ගිහින්..

'අතේ' අනාගතය ගැන කතා කරන්න.

ශ්‍රී ලංකා එකේ ජ්‍යෙෂ්ඨ අමාත්‍යවරුන් , රාජ්‍ය අමාත්‍යවරුන් , ප්‍රධාන මන්ත්‍රීවරුන්, ඒ විදියට හිටපු ජනාධිපතිනි චන්ද්‍රිකා බණ්ඩාරනායක කුමාරතුංග හම්බවෙන්න ගිහින්, සැහෙන්න වෙලාවක් කතාබහ කරලා ..

හිටපු ජනාධිපතිනියගේ , කොළඹ නිදහස් මාවතේ නිල නිවසේ දී තමයි, ඔය කතාබහ තිබිලා තියෙන්නේ .

ඒ සාකච්ජාවේ දී වෙච්ච කතාබහ ගැන , තාම හරිහමන් විස්තරයක්, එලියට ඇවිත් නෑ .

ඒත්, ආරංචි හැටියට, මෛත්‍රීපාල පන්නල ශ්‍රී ලංකා එකේ බලය අතට ගන්නලු , යනවයි කියන්නේ..

තවත් සමහරු කියන්නේ , කුමාර වෙල්ගමගේ පක්ෂයට එකතුවෙන්න ලු, චන්ද්‍රිකා හම්බවෙන්න ගිහින් තියෙන්නේ ..

ඔය කතාවල ඇත්ත නැත්ත මොනවා වුනත්, චන්ද්‍රිකා ආයෙත් , ගේමට බැහැල තියන පාටක් පේන්න තියනවා.

''රට මුහුණ පා සිටින බරපතල ආර්ථික බංකොලොත්භාවයට ප්‍රධාන ම හේතුව වංචාව හා දූෂණය'' කියල චන්ද්‍රිකා , මේ ඊයේ පෙරේදා , ශෝෂල් මිඩියා එකට, වීඩියෝ එකකුත් , රිලීස් කරලා තිබුනා. චන්ද්‍රිකා ඒකෙ කියල තිබුන, සමහර දේවල් හරිම බරපතලයි..

''2005 වසරෙන් පසු, මහින්ද ‍රාජපක්ෂ ආණ්ඩු විසින්, අනුගමනය කළ අදූරදර්ශී ආර්ථික ප්‍රතිපත්තිය, දූෂණය සහ ගුණාත්මක බවෙන් සහ, ඵලදායිතාවයෙන් අඩු ව්‍යාපෘති ආදිය නිසා, රට ආර්ථික වශයෙන් බංකොලොත් වූනා'' කියලයි , චන්ද්‍රිකා කියන්නේ.

රට ගොඩ නැගීමට නම් , නිශ්චිත ආර්ථික සැලසුම් මෙන්ම , යහපාලන ක්‍රමවේදයන් ද අවශ්‍යයි කියලා , හිටපු ජනාධිපතිනිය අවධාරණය කරනවා.

දේශපාලන වාර්තාකරු

කංසාවලට වගේම කිතුල් රා වලටත් සහය දෙන්නැයි ඉල්ලා සිටින බව රාජ්‍ය අමාත්‍ය චාමර සම්පත් දසනායක අද (15) පාර්ලිමේන්තුවේදී පැවසීය.

බදුල්ල පස්සර ප්‍රදේශවල වස විස නැති රා තිබෙන නමුත් තවමත් කිතුල් රා ගොවියාට සාධාරණයක් ඉටු වූයේ නැති බවත් රාජ්‍ය අමාත්‍යවරයා පවසයි .

කඳුකර ප්‍රදේශවල ජනතාව වසර ගණනාවක සිට රා පාවිච්චි කළ අය බවද රා නිෂ්පාදනය සම්බන්ධ නීති අඩු කරන්නැයි ඉල්ලා සිටින බවත් පොලිසිය රා හොඳට හදන කෙනා වගේම නරකට හදන අයත් කුදලාගෙන යන බවත් සඳහන් කළේය.

තමා සිරිකොත මිදුලට වත් ගිහිපු නැති සිරිකොත තියෙන තැනවත් දන්නේ නැති නමුත් ජනපතිට සහය දෙන බවද රාජ්‍ය අමාත්‍යවරයා වැඩිදුරටත් පැවසීය.

අත්අඩංගුවට ගෙන සිටි සමගි වනිතා බලවේගයේ ජාතික සංවිධායිකා හිරුණිකා ප්‍රේමචන්ද  ඇතුළු 15 දෙනා රුපියල් ලක්ෂ 5 බැගින් වූ ශරීර ඇප මත මුදා හැරීමට කොළඹ ප්‍රධාන මහේස්ත්‍රාත් චන්දන අමරසිංහ අද නියෝග කළේ ය.

ඇය ඇතුළු පිරිස ඊයේ අත්අඩංගුවට ගැණුනේ ජනාධිපතිවරයාගේ නිවසට යන මාර්ගයේ වීදි නාට්‍යයක් රඟ දැක්වීමට ගිය අවස්ථාවේයි.

කුරුඳුවත්ත පොලිසිය විසින් අත්අඩංගුවට ගනු ලැබූ හිටපු පාර්ලිමේන්තු මන්ත්‍රීණී හිරුණිකා ප්‍රේමචන්ද්‍ර  අද පෙරවරුවේ අලුත්කඩේ මහේස්ත්‍රාත් අධිකරණයට ඉදිරිපත් කෙරිණ.

ජනාධිපති රනිල් වික්‍රමසිංහ මුදල් ඇමති විදියට හාපුරා කියලා , පලවෙනි අයවැය ලේඛනේ පාර්ලිමේන්තුවට ඉදිරිපත් කලේ ඊයේ (14) .

මේ කියන්න යන්නේ ඒ ගැන නෙමෙයි , ඔය 2023 අයවැය ලේඛනේ සම්මත කරගන්න, ඊයේ උදේ තිබුන, කැබිනට් රැස්වීමේදී වෙච්චි දෙයක් ගැන..

මොනතරම් හොඳ වැඩක් කරන්න ගියත්, සමහර නිලධාරීන්ගෙන් හරි හමං සපෝට් එක්ක නෑ කියල, සමහර ඇමතිලා ඔය කැබිනට් රැස්වීමේදී, කන්කෙඳිරි ගාන්න ගත්ත ලු. . ඇමතිලා කට්ටියම ඒ කතාව අනුමත කරලා.

ජනාධිපති රනිල්ට එතනදී මල පැන්න ලු.. '' වැඩකරන්න බැරි සේරටම යන්න කියන්න..නැත්තන් යවන්න ඕන '' ජනාධිපති රනිල් ටිකක් සැරෙන් කිව්වලු.

'' ඔය වැඩකරන්නේ නෑ කියන ලේකම්ලාගේ නම් ටික, සමන්ට දෙන්න.. මම කොහොමත් ජනවාරියේ අමාත්‍යංශ ලේකම්ලා මාරු කරන්නයි හිතාගෙන ඉන්නේ.. දක්ෂ නිලධාරීන් ඉන්නවා නං සමන්ට කියන්න.'' ජනාධිපතිතුමා කිව්වයි කියන්නේ එහෙම.

ඒ කියන්නේ රනිල්, ලබන අවුරුද්ද පටන් ගන්න යන්නේ ගේමක් දීගෙනද ? ඒක හරියටම කියන්න වෙන්නේ, අයවැයෙන් පස්සේ, රනිල් රට ගිහින් ආවට පස්සේ තමයි..

දේශපාලන වාර්තාකරු