පුවත්

ආණ්ඩුවේ රාජ්‍ය අමාත්‍ය ධුර දරන පොහොට්ටු පක්ෂයේ මන්ත්‍රීවරුන් අට දෙනකු එම තනතුරුවලින් ඉවත්වීමේ සූදානමක් පිළිබඳව දේශපාලන ආරංචි මාර්ග පවසයි.

ඊට අනුව පොදුජන පෙරමුණේ ජනාධිපතිවරණ අපේක්ෂක නාමල් රාජපක්ෂ මන්ත්‍රීවරයාට සහාය දක්වන පදනමින් සහ ජනාධිපති රනිල් වික්‍රමසිංහ ට සහාය නොදක්වන පදනමින් මේ ඉල්ලා අස්වීම සැලසුම් කර ඇත.

 ආරංචි මාර්ග සඳහන් කරන ආකාරයට එම රාජ්‍ය ඇමැතිවරුන් වන්නේ ඩී. වී චානක, තේනුක විදානගමගේ, ශෂින්ද්‍ර රාජපක්ෂ, අශෝක ප්‍රියන්ත, මොහාන් ද සිල්වා, ඉන්දික අනුරුද්ධ, ප්‍රසන්න රණවීර සහ සිරිපාල ගම්ලත් ය.

කෙසේ වුවත් මෙම නම් සඳහන් රාජ්‍ය අමාත්‍යවරුන් කිහිපදෙනකුගේ සමීපතමයන් වෙතින් සිදුකළ විමසීමේදී දැනගන්නට ලැබුනේ එවැනි සූදානමක් නොමැති බවය. එසේම මෙම නම් සඳහන් සියලු දෙනා නාමල් රාජපක්ෂ මන්ත්‍රීවරයා ගේ අපේක්ෂකත්වය ට සහාය දීමට හෝ නොදීමට ස්ථිර තීන්දුවක් ගෙන නොමැති බවද දැනගන්නට ලැබිණ.

සමගි ජන බලවේගය පක්ෂයේ සභාපති ධුරයෙන් ඉල්ලා අස්වූ පාර්ලිමේන්තු මන්ත්‍රී ෆීල්ඩ් මාර්ෂල් සරත් ෆොන්සේකා ඉදිරියේ දී ජනාධිපති රනිල් වික්‍රමසිංහ පාර්ශ්වය වෙත සහාය දැක්වීමට වැඩි ඉඩක් ඇති බව දේශපාලන ආරංචි මාර්ග සඳහන් කරයි.

ඒ බව හිටපු අමාත්‍යවරුන් වන හරීන් ප්‍රනාන්දු සහ මනූෂ නානායක්කාර විසින් අද (09) පැවැත්වූ මාධ්‍ය හමුවේ අදහස් දැක්වීම හරහා ද හැඟුණු බවත් එම ආරංචි මාර්ග පවසයි.

කෙසේ වුවත් පාර්ලිමේන්තු මන්ත්‍රී සරත් ෆොන්සේකා ඉදිරි ජනාධිපතිවරණය සඳහා ස්වාධීන අපේක්ෂකයකු ලෙස ඉදිරිපත් වීමට ඇප තැම්පත් කර ඇත.

එසේම ෆොන්සේකා මන්ත්‍රීවරයා සජබ සභාපති ධූරයෙන් නිල වශයෙන් ඉල්ලා අස්වීම ප්‍රකාශයට පත්කරමින් අද පැවැත්වූ මාධ්‍ය හමුවේදී ද පවසා සිටියේ තමන් ඉදිරි ජනාධිපතිවරණය සඳහා ස්වාධීන අපේක්ෂකයකු ලෙස ඉදිරිපත් වන බවයි.

මේ අතර ඇතැම් සමාජ මාධ්‍ය වල දැක්වෙන්නේ සරත් ෆොන්සේකා මන්ත්‍රීවරයා ඉදිරි ජනාධිපතිවරණයේදී ජාතික ජන බලවේගයට සහාය පළකරනු ඇති බවයි.

කුමන පක්ෂයකට අයත් වුවද කුසගින්න නිර්පාක්ෂික බව පැවසූ ජනාධිපති රනිල් වික්‍රමසිංහ ජනතාවගේ ජීවන බර සැහැල්ලු කරමින් මතු පරපුර වෙනුවෙන් ශක්තිමත් ආර්ථිකයක් ඇති රටක් ගොඩනැඟීමට සහාය වන ලෙස මෙරට සමස්ත කාන්තා පරපුරෙන් ඉල්ලා සිටියේය.

එදා ආහාර සපයාගත නොහැකිව එකවේලක් අතහැරීමට පුරුදුව සිටි සහ දරුවන් පාසලට යවා ගත නොහැකිව ලත වූ මෙරට මව්වරුන් විඳී පීඩාව කිසිවෙකු අමතක නොකළ යුතු බව පැවසූ ජනාධිපතිවරයා අද දේශප්‍රේමය සහ ජනතාවගේ දුක පිළිබඳ වේදිකාවල කථා කරන නායකයන් එදා අභියෝගය හමුවේ පළා ගිය අන්දම මේ රටේ ජනතාවට අමතක නොවනු ඇති බව කියා සිටියේය.

ජනාධිපති රනිල් වික්‍රමසිංහ මේ බව සඳහන් කර සිටියේ “කාන්තා අපේ බලය” මැයෙන් කොළඹ ශ්‍රී ලංකා ප්‍රදර්ශන හා සම්මේලන මධ්‍යස්ථානයේ අද (09) පෙරවරුවේ පැවති කාන්තා සමුළුව අමතමිනි.

පක්ෂ බේදයෙන් තොරව දිවයින පුරා ප්‍රධාන කාන්තා සංවිධානවල සහ ශාඛා සමිති සභාපතිවරියන් සහ නියෝජිතවරියන් විශාල පිරිසක් මෙම හමුවට එක්ව සිටියහ.

ප්‍රකෘතිමත් වෙමින් පවතින මෙරට ආර්ථිකය ස්ථාවර කරමින් දියුණුව කරා ගෙන යාමේ ජනාධිපති රනිල් වික්‍රමසිංහ මහතාගේ වැඩපිළිවෙළට තම පූර්ණ සහාය පළ කරන බවට මෙහිදී කාන්තා සංවිධාන නියෝජිතවරියන් ජනපති හමුවේ සපථ වුහ.

මෙහිදී අදහස් දැක්වූ ජනාධිපති රනිල් වික්‍රමසිංහ වැඩිදුරටත් සඳහන් කළේ දුෂ්කර ආර්ථික තත්ත්වයක වුවද මෙරට කාන්තාවන්ගේ අයිතිවාසිකම් දිනාදීම තමා කිසිසේත් අතපසු නොකළ බවයි.

කාන්තාවන් සවිබල ගැන්වීමේ පනත මේ වන විටත් අනුමත කර තිබෙන අතර කාන්තාවන්ට පිරිමින් හා සමාන අයිතිවාසිකම් හිමිකර දීමේ නීතිමය පසුබිම සැකසීම ඇතුළු කාන්තා අයිතිවාසිකම් දිනා දීම වෙනුවෙන් පියවර රැසක් මේ වන විට ගෙන තිබෙන බවද ජනාධිපතිවරයා සඳහන් කළේය.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය

මෙවර ජනාධිපතිවරණයට නිර්පාක්ෂික අපේක්ෂකයෙක් ලෙස මම ඉදිරිපත් වන්නේ ඇයි කියා ඇතැම් අය මගෙන් ප්‍රශ්න කරනවා. කුසගින්න නිර්පාක්ෂිකයි. කුමන පක්ෂයකට අයත් වුවත් කුසගින්න දැනෙනවා. කුස පිරවීම නිර්පාක්ෂිකයි. ඒ නිසා අප දේශපාලන පක්ෂ පාට පසෙකට දමා රටේ ජනතාවගේ කුස පිරවීමට එක් විය යුතුයි. මේ රටේ ජනතාව විඳි දුක පිළිබඳ මට හොද අවබෝධයක් තිබෙනවා. විදුලිය නොමැතිව, ඉන්ධන හා ආහාර නොමැතිව දරුවන්ව පාසලට යවා ගත නොහැකිව එදා ඔබ සියලුදෙනා විශාල දුෂ්කරතාවයකට මුහුණ දුන්නා. නැවත අප මේ දුක විඳිය යුතුද, ඒ නිසා අප සියලුදෙනා එකට එක්ව මෙම තත්ත්වය වළක්වාගත යුතුයි.

මම ජනාධිපති ධූරයට පත්වුයේ අනෙක් අය එම වගකීම භාර නොගෙන පැන ගිය නිසයි. මම ජනාධිපති ධූරය භාර ගැනිමෙන් පසු “අප සියලුදෙනා එක්ව ජනතාව මෙම දුෂ්කරතාවන්ගේ මුදා ගැනීමට කටයුතු කරමු” කියා සජිත් ප්‍රේමදාස මහතාගෙන් මෙන්ම අනුර දිසානායක මහතාගෙන් ද ඉල්ලීමක් කළා.නමුත් ඔවුන් එය ප්‍රතික්ෂේප කළා. ඔවුන් රටේ ආර්ථිකය ඉදිරියට ගෙන ඒමට අපට සහාය ලබා දුන්නේ නැහැ.

එහිදී කාන්තාවන් තුන්දෙනෙක් මට සහාය ලබා දුන්නා. ඉන්දියාවේ මුදල් අමාත්‍යවරිය වන නිර්මලා සීතාරාම්, ඇමරිකානු භාණ්ඩාගාර ලේකම් ජැනට් යෙලන්, ජාත්‍යන්තර මූල්‍ය අරමුදලේ කළමනාකාර අධ්‍යක්ෂ ක්‍රිස්ටලිනා ජෝර්ජිවා එම කාන්තාවන් තිදෙනායි. දේශප්‍රේමය ගැන කථා කරමින්, ජනතාව විඳින දුක තමන් දන්නවා කියන අය එදා පැනලා ගියා. විදේශ රටවල සිටින කාන්තාවන් තිදෙනෙක් මට රට ඉදිරියට ගෙන යාමට උදව් කළා. මේ තිදෙනාගේ උපකාර නොලැබුණානම් අද අපට මෙම තත්ත්වයට පත්වීමට හැකියාවක් ලැබෙන්නේ නැහැ.

මේ රටේ පොහොර නැති වූ අවස්ථාවේ ඇමරිකාවේ සමන්තා පවර් මහත්මිය අපට සහාය ලබා දුන්නා. ඒ පොහොර ලබාදීම නිසා අපට එම යල කන්නය සාර්ථක කරගෙන ආර්ථිකය ඉදිරියට ගෙන ඒමට හැකි වුණා. ඒ නිසා අප මේ කාන්තාවන්ට ස්තූතිවන්ත විය යුතුයි.

ශ්‍රේෂ්ඨ දේශප්‍රේමි පළපුරුදු නායකයෝ යැයි කියාගන්නා කිසිවෙක් එදා මේ රටේ වගකීම භාරගත්තේ නැහැ. අප රටක් ලෙස ඉදිරියට පැමිණියේ ඉතා අසීරුවෙන්. අප තවත් ඉදිරියට යා යුතුයි. අප සියලුදෙනා විඳි දුක මා අමුතුවෙන් සඳහන් කළ යුතු නැහැ.

මම එක් උදාහරණයක් පෙන්වා දෙන්නම්. 2021 වාණිජ බැංකුවල උකස් කළ රත්‍රන් භාණ්ඩවල වටිනාකම රුපියල් බිලියන 250යි. අද එය රුපියල් බිලියන 500 පසුකර තිබෙනවා. ඒ නිසා අප ඒ පිළිබඳ සහන ලබාදීමට කටයුතු කළා. ඇතැම් නිවාසවල වැඩිහිටියන් එක් ආහාර වේලක් අත හැරීමට පුරුදුව සිටියා. තවත් පිරිසක් දරුවන්ට හොඳ අධ්‍යාපනයක් ලබා දිය නොහැකිව දුක් වින්දා.

මම ජාත්‍යන්තර මූල්‍ය අරමුදලේ සහයෝගය ඉල්ලා සිටි අවස්ථාවේ එහි කළමනාකරණ අධ්‍යක්ෂවරිය වන ක්‍රිස්ටලිනා ජෝර්ජිවා මහත්මිය ලබා දුන් උපකාරය නිසා අද අපට මෙම සහන ලැබී තිබෙනවා. ජැනට් යෙලන් මහත්මිය සහ නිර්මලා සීතාරමන් මහත්මිය අපට ට සහය ලබා දුන් නිසා අද අපට ශක්තිමත්ව ඉදිරියට පැමිණීමට හැකියාව ලැබී තිබෙනවා.

ජාත්‍යන්තර මූල්‍ය අරමුදල සමඟ මෙන්ම අපට ණය ලබාදෙන රටවල් ගණනාවක් සමඟ අප ගිවිසුම් අත්සන් තබා තිබෙනවා. එහිදී අප ඇතිකරගත් කොන්දේසි මම ආර්ථික පරිවර්තන නීතියට ඇතුළත් කර තිබෙනවා. මේ මාර්ගයේ ඉදිරියට යනවා නම් අපට රටක් ලෙස ගොඩඒමට හැකියාව තිබෙනවා.

නමුත් ඇතැම් අය කියනවා ජාත්‍යන්තර මූල්‍ය අරමුදල සමඟ ගිවිසුම සංශෝධනය කරනවා කියලා. රටේ ප්‍රශ්න විසඳිය නොහැකි බව ප්‍රසිද්ධියේ ප්‍රකාශ කරමින් පැන ගිය අය අද කාන්තාවන්ගේ සහයෙන් අපට ලැබුණු මෙම සහනය ඉවත් කරන බව ප්‍රකාශ කරනවා.

අපි සියලුදෙනා මේ ගමන ආවේ ඉතා අසීරුවෙන්. ඒ නිසා මෙම සහනය නැති කර ගන්නවද, ආරක්ෂා කර ගන්නවාද කියා අප තීරණය කළ යුතුයි. එහිදී මුහුණු දෙස හෝ නම් දෙස නොව තමන්ගේ සහ දරුවන්ගේ අනාගතය පිළිබඳ සිතිය යුතුයි. එම තීරණය ඔබගත යුතුයි.

මෙම අසීරු ගමනේදි වුවද මම මේ රටේ කාන්තාවන් අමතක කළේ නැහැ. අස්වැසුම, උරුමය, අඩු ආදායම්ලාභී ජනතාව ජීවත් වන මහල් නිවාසවල අයිතිය ලබාදීම, කඳුකරයේ ගම්මාන ඇති කිරීමේ වැසටහන, පාසල් සිසුන්ට ආහාර වේලක් ලබාදීමේ වැඩසටහන වැනි වැඩසටහන් ක්‍රියාත්මක කරමින් සහන ලබා දුන්නා. ඒ වගේම කාන්තාවන් බල ගැන්වීමට ද අප කටයුතු කර තිබෙනවා.

ඒ වෙනුවෙන් අපි කාන්තාවන් බල ගැන්විමේ පනත සම්මත කර ගෙන තිබෙනවා. වසර 20-30ක් මේ රටේ සුළු ජාතින්ගේ අයිතීන් පිළිබඳ සටන් ක්‍රියාත්මක වුණා. අප දැන් සාකච්ඡා කරමින් ඒවා විසඳීමට කටයුතු කරමින් සිටිනවා. සිංහල, දෙමළ, මුස්ලිම් සියලු ජාතීන්ට සමාන අයිතිවාසිකම් හිමිවිය යුතුයි. සුළුතරයකගේ ප්‍රශ්න මෙලෙස විසඳමින් සිටියදී මෙරට බහුතරයක් වන කාන්තාවන්ටත් සමාන අයිතිවාසිකම් ලබාදීමට අප කටයුතු කරනවා.

සිංහල, දෙමළ, මුස්ලිම් කුමන ජාතියකට අයත් වුවද සියලු කාන්තාවන්ට මෙම අයිතිවාසිකම් ලබාදීම වෙනුවෙන් අප මේ වන විට පළමු නීතිය ගෙනවිත් තිබෙනවා. ඒ වගේම කාන්තාවන්ට පිරිමින් හා සමාන අයිතිවාසිකම් ලබාදීම වෙනුවෙන් නීති ගෙන එනවා. ඒ වගේම මෙරට කාන්තා අයිතිවාසකම් දිනා දීම වෙනුවෙන් අප තවත් පියවර රැසක් ගෙන ඇති බව කිවයුතුයි.

මේ පිළිබඳ දැනුවත් කිරීමට රටේ ප්‍රධාන කාන්තා සංවිධාන සහ ගම් මට්ටමේ තිබෙන කාන්තා සංවිධාන නියෝජිනය වන පරිදි විශාල කාන්ත සමුළුවක් ලබන වසරේදී කැඳවීමට අප බලාපොරොත්තු වෙනවා.

අප සියලුදෙනාට හොඳ රටක් අවශ්‍යයි. ඔබේ දූ දරුවන්ට මීට වඩා හොඳ රටක් අවශ්‍යයි. ඊට පෙර අපේ නිවාවල තිබෙන ජීවන බර ඉවත් කර ගනිමින් ඉදිරියට යාමට නිර්පාක්ෂිව එකතුවෙමු. රට දියුණු කරමු කියා මා ඉල්ලා සිටිනවා.

වනජීවී හා වන සම්පත් සංරක්ෂණ සහ වාරිමාර්ග අමාත්‍ය පවිත්‍රා වන්නිආරච්චි

අද මේ පැවැත්වෙන්නේ අතිශය සුවිශේෂී කාන්තා රැස්වීමක් බව පැවසිය යුතුයි. අපි මීට පෙර කාන්තා සම්මේලන පවත්වා තිබුණත් වසර 32ක දේශපාලන ජීවිතයේ බහුපාක්ෂික කාන්තා සම්මේලනයකට මා සහභාගි වන පළමු අවස්ථාව මෙයයි. ඇයි අද අප එකට එක්ව සිටින්නේ? එයට සංවාද, විවාද, තර්ක අවශ්‍ය නැහැ. රූපවාහිනිය ඉදිරියට ගිහින් බංග්ලාදේශයේ තත්ත්වය දැක බලා ගත්තා නම් අපි එකතු වුණේ ඇයි කියන කාරණය පැහැදිලි වෙනවා.

බංග්ලාදේශ රාජ්‍ය නායිකාවගේ නිල නිවස මෙන්ම පාර්ලිමේන්තුව ද අරගලකරුවන් අත්පත් කර ගත්තා. එරට පාර්ලිමේන්තු මන්ත්‍රීවරුන් 20කට වැඩි පිරිසක් මේ වන විට ඝාතනය කර තිබෙනවා. ඒ අරගලකරුවන්ගේ ක්‍රියාකාරකම් රූපවාහිනියෙන් නරඹන විට එදා අප රටේ සිදුවුණෙත් එවැනිම දෙයක් බව පැහැදිලි වෙනවා.
බංග්ලාදේශ අරගලකරුවන් සංචාරක හෝටල්, රාජ්‍ය ආයතන ගිනිතබා විනාශ කළා. මුළු බංග්ලාදේශයම ගිනි ගොඩක් බවට පත් කරනු ලැබුවා. එවැනි තත්ත්වයක් තුළ අද බංග්ලාදේශය ජනාධිපති රනිල් වික්‍රමසිංහ වැනි නායකයෙක් සොයමින් සිටිනවා. එදා අපට එවැනි තත්ත්වයක් උරුම නොවුණේ මේ මාතෘභූමියට ජනාධිපති රනිල් වික්‍රමසිංහ මහතා වැනි නායකයෙක් බිහි වූ නිසයි. ඒ වගේම රටේ හිටපු නායකයා රටින් පිටව ගිය වෙලාවේ, මේ මාතෘභූමියේ කිසිදු ලේ වැගිරීමක් සිදු වීමට ඉඩ නොතබා රාජ්‍යත්වය ස්ථාපිත කරමින් රට නැවත යථා තත්ත්වයට පත් කළේ රනිල් වික්‍රමසිංහ ජනාධිපතිතුමායි. මාතෘභූමියේ නිවැරදි තීන්දු තීරණ ගන්නා කාන්තාවන් ලෙස අද අප පක්ෂ පාට පැත්තකට දමා, එකම පවුලක් ලෙස එතුමාගේ ජයග්‍රහණය වෙනුවෙන් එකතු වී තිබෙනවා.

කාන්තා හා ළමා කටයුතු රාජ්‍ය අමාත්‍ය ගීතා කුමාරසිංහ

රටේ ජීවනාලිය බඳු කාන්තා ඔබට වැදගත් තීන්දුවක් ගැනීමට ඉදිරි ජනාධිපතිවරණයේදී අවස්ථාව හිමිව තිබෙනවා. ඒ වැදගත් තීන්දුව නොගතහොත් රට ආපස්සට යෑම වළක්වන්න බැහැ. මේ රට ඉදිරියට ගෙන යන්න පුළුවන් එකම නායකයා රනිල් වික්‍රමසිංහ මැතිතුමා පමණයි. එදා අපට ගෑස්, ළමයින්ට කිරිපිටි තිබුණේ නැහැ. එදා ආර්ථිකය බංකොලොත් කියන විට මේ රට භාර ගන්න විපක්ෂය හිටියෙ නැහැ. විපක්ෂය හැංගුණා. අපට හුස්ම පොදක් දුන්නේ ජනාධිපති රනිල් වික්‍රමසිංහ මැතිතුමායි.

කාන්තාවක් දරුවකු බිහි කිරීමට නම් ඇය ශක්තිමත් විය යුතුයි. ඒ නිසා තමයි ජනාධිපතිතුමා මාස 10ක් පුරාවට පෝෂණ මල්ලක් ලබා දී ඒ කාන්තාවන් ශක්තිමත් කිරීමට කටයුතු කළේ. මේ රට ශක්තිමත් කරන්න, රට ඉදිරියට ගෙන යෑමට හැකි වන්නේ කාන්තාවන්ටයි.

ජනාධිපතිතුමාගේ නායකත්වයෙන් කාන්තාවන්ගේ ආරක්ෂාවට අණපනත් පාර්ලිමේන්තුවේ සම්මත කිරීමට කටයුතු කළා. 70 දශකයේ සිට මේ රටේ භීෂණය වැපුරුවේ කවුද? තරුණයන් ඝාතනය කර කාණුවල දැම්මේ කවුද? එවැනි අය තමයි අද රටේ බලය ඉල්ලන්නේ. අපට අවශ්‍ය ආපස්සට යන රටක් නෙමෙයි. ඒ නිසා අප සියලු දෙනා එකමුතුව ඉදිරි ජනාධිපතිවරණයේදී රනිල් වික්‍රමසිංහ මහතාගේ ජයග්‍රහණය විජයග්‍රහණයක් කරමු.

ජාතික කාන්තා කමිටුවේ හිටපු සභාපති බියට්‍රිස් දිසානායක

මෙම ශාලාව පිරී ඉතිරී යන ලෙස කාන්තාවන් එක් රැස්ව සිටීමෙන් කාන්තා ඔබේ අපේක්ෂාව කුමක්ද යන්න පැහැදිලියි. මේ රටේ සියලු අම්මාවරුන්ගේ එකම බලාපොරොත්තුව වන්නේ තමන්ගේ දරුවන්ගේ අනාගතය සුරක්ෂිත කිරීමයි. ඒ සඳහා ඔවුන්ට හොඳ අධ්‍යාපනයක් ලබා දීමයි. ඊට අවශ්‍ය පසුබිම සකස් කළ හැක්කේ කාටද යන්න ඔබ වටහා ගත් නිසා අද මේ ශාලාවට රැස්ව සිටිනවා.

ඔබේ ඒ තීරණය නිවැරදියි. ඔබේ දරුවාගේ අනාගතය පිළිබඳව දුර දක්නා නුවණින් කටයුතු කරන බුද්ධිමත් නායකයෙක් අද සිටිනවා. ජනාධිපති රනිල් වික්‍රමසිංහ මහතා නැවත වරක් මේ රටේ ජනාධිපතිවරයා වශයෙන් පත් කර ගත යුත්තේ ඇයි කියන එක මේ රටේ ගෘහණියන් තරම් වෙනත් කිසිවෙක් දන්නේ නැහැ. කාන්තාවන් වශයෙන් එතුමාගේ ජයග්‍රහණය වෙනුවෙන් ඔබ ඔබේ ශක්ති ප්‍රමාණයෙන් කටයුතු කරන බව විශ්වාසයි. එතුමාගේ ජයග්‍රහණය තහවුරුයි.

එක්සත් ලක්වනිතා පෙරමුණේ සභාපති ශාන්තිනී කෝංගහගේ

මහාමාන්‍ය ඩී. එස්. සේනානායක මහතා ආරම්භ කළ එක්සත් ජාතික පක්ෂයේ නායකතුමා අද නිර්පාක්ෂික අපේක්ෂකයෙක් ලෙස මෙවර ජනාධිපතිවරණයට ඉදිරිපත් වී සිටිනවා. මේ රටේ බහුතරය වන කාන්තාවන්ට නිර්පාක්ෂික අපේක්ෂකයෙකුට ඡන්දය දෙන්නේ ඇයි කියන කාරණය අවබෝධ වී තිබෙනවා. ඉතිහාසයේ අඳුරුතම යුගයෙන් කාන්තාව මුදා ගනු ලැබුවේ රනිල් වික්‍රමසිංහ මැතිතුමායි.

අපේ දරුවන්ට, කාන්තාවන්ට බලාපොරොත්තුවක් ඇති කළ එකම නිර්පාක්ෂික අපේක්ෂකයා ලෙස ජනාධිපති රනිල් වික්‍රමසිංහ මහතාට තම ඡන්දය ලබා දීමට කාන්තාව පෙළ ගැසී සිටිනවා . අනෙක් සියලු පක්ෂ නියෝජනය කරන්නේ විවිධ පාට, පක්ෂ බව ඔබ දන්නවා.අප තව දුරටත් පක්ෂ පාට වශයෙන් බෙදී වෙන් විය යුතුද? කාන්තාවන් වශයෙන් අප ඒ බේද සියල්ල පසෙකලා ජනාධිපති රනිල් වික්‍රමසිංහ මැතිතුමා ජයග්‍රහණය කරවීමට ඡන්දය ලබා දෙනවා. මොකද අපේ රට තවත් බංගලිදේශයක් බවට පත් වීමට ඉඩ දෙන්න බැහැ.

එදා අපට උදව් කළ බංගලිදේශයට අද අත්වී තිබෙන තත්ත්වය ගැන කණගාටුවක් තිබෙනවා. ඉදිරි ජනාධිපතිවරණය අපේ ඉරණම විසඳන මැතිවරණයක් බව කිව යුතුයි. මේ රටේ බහුතරයක් වන කාන්තාවන්ට කොන්ද කෙළින් තබාගෙන කටයුතු කරන්න අවස්ථාව ලබා දුන්නේ ජනාධිපති රනිල් වික්‍රමසිංහ මහතායි. ඒ නිසා මේ අවස්ථාවේ අපි අපේ යුතුකම ඉටු කිරීමට නිර්පාක්ෂික අපේක්ෂකයාගේ ජයග්‍රහණය විජයග්‍රහණයක් කිරීම සඳහා එකතු විය යුතුයි.

ශ්‍රී ලංකා නිදහස් පක්ෂ කාන්තා පෙරමුණේ පරිපාලන ලේකම් කුමාරි පතිරගේ

එදා මේ රටේ ජනතාව පෝලිම්වල හිටියා. මව්වරුන්ගේ හදවතේ ගිනි දැල්වෙද්දි ඒ ගිනි නිවන්න අපට නායකයෙක් සිටියේ නැහැ. එවැනි පසුබිමක මේ රටේ පීතෘත්වය තම දෙවුර මතට ගත්තේ ජනාධිපති රනිල් වික්‍රමසිංහ මැතිතුමා පමණයි. එතුමා අපට සුරක්ෂිත රටක් නිර්මාණය කර දුන්නා. අපේ දරුවන් යළි පාසලට යැවිය හැකි පසුබිම සකසා දුන්නා. ඒ වගේම අපේ දරුවන් බඩගින්නෙන් බේරා ගත්තා.

රටම බංකොලොත් වෙලා, ආර්ථික බරින් හෙම්බත් වෙලා සිටිය අපට අලුත් රටක් හදලා දුන්නේ ජනාධිපති රනිල් වික්‍රමසිංහ මැතිතුමායි. අපට තවත් අලුත් නායකයන් අවශ්‍ය නැහැ. අද පුරසාරම් දොඩවන අය එදා රටේ වගකීම බාර ගැනීම ප්‍රතික්ෂේප කරලා හැංගුණා.

ජනාධිපති රනිල් වික්‍රමසිංහ මැතිතුමාට තිබෙන එකම වගකීම මේ රට ගොඩනැගීම පමණයි. එතුමා තමන්ගේ සියලු දේපළත් මේ රටට පරිත්‍යාග කළ නායකයෙක්. අද මේ එකතු වෙලා සිටින කාන්තාවන්ට අවශ්‍ය රජවරුන් නොවෙයි. අලුත් වෙස් මුහුණු ගෙනැත් ජනතාවට යළිත් දුක විකුණන්න ඉඩ දෙන්න බැහැ. අපි යළිත් රැවටෙන්නේ නැහැ. එළැඹෙන ජනාධිපතිවරණයේදී නියත ජනපති රනිල් වික්‍රමසිංහ මැතිතුමා පමණයි. ඒ නිසා අප ඒ වෙනුවෙන් පෙළ ගැසෙනවා.

පාර්ලිමේන්තු මන්ත්‍රී කෝකිලා ගුණවර්ධන

මේ රටේ සතර දෙසින් අද පැමිණ සිටින්නේ කාන්තා ශක්තියෙන් මේ රටේ 9 වෙනි විධායක ජනාධිපතිවරයා පත් කිරීමටයි. ජනාධිපති රනිල් වික්‍රමසිංහ මහතා හැර ඊට සුදුස්සෙකු මෙවර ජනාධිපතිවරණයේ අපේක්ෂකයකු ලෙස ඉදිරිපත් ව නැහැ. මේ රටේ ආර්ථිකය කඩා වැටී, ජනතාවගේ මූලික අවශ්‍යතාවයන්වත් සපුරන්න රජයක් ලෙස අපොහොසත්ව තිබියදී අපට පාර්ලිමේන්තුව හරහා ජනාධිපතිවරයෙක් පත් කර ගැනීමට සිදු වුණා.

ජනාධිපති රනිල් වික්‍රමසිංහ මැතිතුමනි, මා ඔබ වෙනුවෙන් පළමුවෙන් ඡන්දයක් ලබා දුන්නේ එදිනයි. අද මම ඒ ලබා දුන් ඡන්දය ගැන සතුටු වෙනවා. මේ රටේ ජනතාව වෙනුවෙන් මා එදා ලබා දුන් ඡන්දයට වටිනාකමක් ලැබී ඇති බවට වන හැඟීම අද මා තුළ තිබෙනවා.

මේ රට බරපතළ අර්බුදයට පත්ව තිබූ මොහොතේදී රට යළි ගොඩ නඟන වගකීම බාර ගන්න කියලා මුලින්ම ඉල්ලා සිටියේ විපක්ෂ නායක සජිත් ප්‍රේමදාස මහතා ගෙන්. ඔහු එය ප්‍රතික්ෂේප කළා. ඊළඟට අනුර දිසානායක ගෙන් ඉල්ලා සිටියා. නමුත් එදා මේ රටේ ආර්ථික තත්ත්වය දැක ඔවුන් වගකීම බාර ගැනීමට බය වුණා. ඔවුන් ඒ අවස්ථාවේ තෝරා ගත්තේ මේ රටේ අනාගතය නොවෙයි. තමන්ගේ දේශපාලන අනාගතයයි.

නමුත් ජනාධිපති රනිල් වික්‍රමසිංහ මහතා මේ රට ගැන පමණක්ම සිතා කිසිවෙකු බාර ගැනීම ප්‍රතික්ෂේප කළ රට ගොඩ නඟන අභියෝගය බාර ගත්තා. එතුමා පිළිබඳ අප තැබූ විශ්වාස කළ අයුරින්ම රැක තිබෙනවා. එතුමාගේ වචනයෙන් කියනවා නම් අද මේ රට වැල් පාළමෙන් එගොඩ කළ හැකි එකම නායකයා එතුමා පමණක්ම බව ක්‍රියාවෙන්ම ඔප්පු කර තිබෙනවා. ජාති, ආගම්. පක්ෂ, පාට බේදයෙන් තොරව එතුමාගේ විජයග්‍රහණය වෙනුවෙන් කාන්තා අප රොද බැඳ සිටින්නේ එම විශ්වාසය මත බව මේ රැස්ව සිටින මේ රටේ කාන්තා නියෝජනය වෙනුවෙන් මා ප්‍රකාශ කර සිටිනවා.

කඳුරට තරුණ කාන්තා පෙරමුණේ සාමාජිකා කණිෂ්කා මයිකල්

කඳුකරයේ තරුණියන් මේ වන විටත් රනිල් වික්‍රමසිංහ ජනාධිපතිතුමා සමඟ අත්වැල් බැඳගෙන අවසන්. අභියෝගවලට බිය වී පලාගිය නායකයන් අපට අවශ්‍ය නැහැ. එවැනි අය නායකයන් නෙමෙයි. රනිල් වික්‍රමසිංහ ජනාධිපතිතුමා කියන්නේ ජනතාව ජීවත් කළ නායකයෙක් බව කිව යුතුයි. ජාත්‍යන්තර මූල්‍ය අරමුදල විවේචනය කරන අය දේශපාලනඥයන් නෙමෙයි. රනිල් වික්‍රමසිංහ මැතිතුමා ජාත්‍යන්තර මූල්‍ය අරමුදල සමග එකතු වී අපේ රට ගොඩනැඟුවා. රටේ දුප්පත්කම නැති කිරීමට අඩු ආදායම්ලාභී ජනතාව වෙනුවෙන් අස්වැසුම වැඩසටහන ඉදිරිපත් කළා.

එතුමා ජනතාව විඳි වේදනාව තුරන් කිරීමට පියවර ගත්තා. රට ස්ථාවර කර තරුණ තරුණියන්ගේ අනාගතය ආරක්ෂා කළා. රනිල් වික්‍රමසිංහ මැතිතුමා කඳුකරයේ කාන්තාවන්ට ස්වයං රැකියා අවස්ථා උදාකර දී ගෞරවනීය ජීවිතයක් ගත කිරීමට අවස්ථාව උදා කර දුන් නායකයෙක්. එනිසා අපේ සහාය එතුමාට හිමි වෙනවා.

මහාචාර්ය මෛත්‍රී වික්‍රමසිංහ මහත්මිය සහ පාර්ලිමේන්ත්‍රි මන්ත්‍රීවරියන්, පළාත් සභා සහ පළාත් පාලන ආයතනවල හිටපු ජනතා නියෝජිතවරියන් අතුථ පිරිසක් ද මෙම අවස්ථාවට එක්ව සිටියහ.

අමාත්‍ය හරීන් ප්‍රනාන්දු  සිය ධූරයන්ගෙන් ඉවත්වන බව සංචාරක අමාත්‍යාංශයේදී අද (09) පැවති මාධ්‍ය හමුවේදී නිල වශයෙන් දැනුම් දුන්නේය.

සංචාරක, ඉඩම්, ක්‍රීඩා සහ යෞවන කටයුතු අමාත්‍යාංශයන්ගේ සියලු නිලධාරීන් එම මාධ්‍ය සාකච්ඡාව සඳහා සහභාගී වූ අතර ඔවුන් ඉදිරියේ අමාත්‍යවරයා මේ බව දන්වා සිටියේය.

අභියෝග බාරගැනීම තම ජීවිතයේ අලුත් දෙයක් නොවන බවත්, රටට අවශ්‍ය මොහොතේදී අභියෝග බාර ගැනීම තමන් විසින් සිදුකල බවත් අමාත්‍යවරයා මෙහිදී සඳහන් කළේය.

රටට අවශ්‍යයම මොහොතේ දී තමන් සමඟ සිටිමින් රට වෙනුවෙන් විශේෂ සේවයක් සිදුකොට අමාරු අවස්තාවෙන් රට ගොඩ ගැනීම සඳහා සියලුදෙනා සහය දුන් බවත් ඒ වෙනුවෙන් අමාත්‍යාංශ ලේකම්වරු ප්‍රමුඛ සියළු නිලධාරීන්ට අමාත්‍යවරයා සිය විශේෂ ස්තූතිය පළ කළ අතර තව දුරටත් රට වෙනුවෙන් සිය සේවය ලබාදෙන මෙන් අමාත්‍යවරයා මෙහිදී නිලධාරීන්ගෙන් ඉල්ලා සිටියේය.

පොදුජන පෙරමුණේ ජනාධිපති අපෙක්ෂකයා ලෙස නාමල් රාජපක්ෂ ඉදිරිපත් කර රට හිනස්සවන බව ජාතික ජන බලවේගයේ ජාතික විධායක කමිටු සමාජික සුනිල් හදුන්නෙන්ති පැවසිය.

සුනිල් හදුන්නෙන්ති ඒ බව සඳහන් කර සිටියේ ජාතික ජන ජන බලවේගය විසින් දීප ව්‍යාප්තව දිස්ත්‍රික් මට්ටමින් සංවිධානය කරනු ලබන බැංකු මූල්‍ය සංසදයේ නුවරඑළිය දිස්ත්‍රික් සමුළුව අමතමිනි .

මෙම වැඩසටහන ජාතික ජනබල වේගය රජයක් යටතේ ඉදිරියට ක්‍රියාත්මක කිරීමට නියමිත මූල්‍යමය කළමනාකරණ කටයුතු පිළිබඳව බැංකු හා මූල්‍ය ක්ෂේත්‍රවල නියැලී සිටින නිලධාරී දැනුවත් කිරීම වෙනුවෙන් සංවිධානය කර තිබුණි.

මෙහිදි අදහස් දැක් වු හිටපු පාර්ලිමේන්තු මන්ත්‍රී සුනිල් හදුන්නෙත්ති කියා සිටියේ අද හොරු සෙට් එක දෙකට බෙදිලා එදා ඉදන් කරපු හොරකම් මැරකම් ඔක්කොම වමාරනවා හෙට අනිද්දා සහරාන්ට බෝම්බ ගහන්න කිව්වේ කවුද බෝම්බ හදලා දුන්නේ කවුද කියන එක වමාරයි සෙට් එකම, යනුවෙනි .

ගාසා තීරයේ පවත්නා යුදමය තත්ත්වය හේතුවෙන් අවතැන්ව සිටින දරුවන්ගේ මූලික අවශ්‍යතා සැපයීම සඳහා අවශ්‍ය මුල්‍යාධාර ලබා දීම වෙනුවෙන් ජනාධිපති රනිල් වික්‍රමසිංහ මහතාගේ සංකල්පයක් අනුව පිහිටුවන ලද “ගාසා හි ළමා අරමුදල (Children of Gaza Fund) වෙත ලැබුණු තවත් ඇමරිකානු ඩොලර් පන්ලක්ෂ අනූදහසක (590,000/-) මුදල පලස්තීන රජය වෙත නිල වශයෙන් භාරදීම ජනාධිපති රනිල් වික්‍රමසිංහ ගේ ප්‍රධානත්වයෙන් ඊයේ (07) ජනාධිපති කාර්යාලයේ දි සිදු විය.

ඊට අදාළ නිල ලිපි ලේඛන ශ්‍රී ලංකාවේ පලස්තීන තානාපති ආචාර්ය සුහයිර් එම්.එච්. සෙයිඩ් (H. E. Dr. Zuhair M H Dar Zaid) සහ එක්සත් ජාතීන්ගේ සහන වැඩ නියෝජිතායතනයේ (UNRWA) එක්සත් ජාතීන්ගේ ශ්‍රී ලංකා නිත්‍ය නේවාසික නියෝජිත අසූසා කුබෝටා (Azusa Kubota)යන මහත්ම මහත්මින් වෙත ජනාධිපතිවරයා විසින් භාර දෙනු ලැබීය.

ජනාධිපති රනිල් වික්‍රමසිංහ මහතා අමාත්‍ය මණ්ඩලය වෙත කරන ලද යෝජනාවක් අනුව 2024 මාර්තු මස 04 වන දින පැවති අමාත්‍ය මණ්ඩල රැස්වීමේ දී ගාසා තීරයෙහි පවත්නා යුධමය තත්ත්වය හේතුවෙන් එම ප්‍රදේශයේ සිරවී සිටින මිලියනයකට ආසන්න ළමුන්ගේ අත්‍යවශ්‍ය වියදම් පියවා ගැනීම සඳහා මූල්‍යාධාර ලබා දීම පිණිස ශ්‍රී ලංකා රජයෙන් ඇමරිකානු ඩොලර් මිලියනයක මුදලක් ප්‍රදානය කිරීමට අමාත්‍ය මණ්ඩල අනුමැතිය හිමි විය.

අමාත්‍යාංශ සහ රජයේ ආයතන පසුගිය ඉෆ්තාර් සැමරුම පැවැත්වීමට වෙන් කර තිබූ ප්‍රතිපාදන ද මෙම අරමුදල වෙත ලබා දෙන ලෙස ජනාධිපතිවරයා කළ ඉල්ලීමට අනුව අරමුදල වෙත ලැබුණු ඇමරිකානු ඩොලර් මිලියනයක මුදල පළමු අදියර යටතේ 2024-04-01 දින පලස්තීන රජය වෙත පරිත්‍යාග කිරීම සිදු කෙරිණි.

එසේම ජනාධිපතිවරයා කළ ඉල්ලීම අනුව ව්‍යාපාරික ආයතන, විවිධ සංවිධාන හා පොදු මහජනතාව විශාල වශයෙන් එම අරමුදල සමඟ අත්වැල් බැඳගනු ලැබීය.

ඒ අනුව 2024 ජූලි 31 දින දක්වා අරමුදල වෙත ලැබුණු ඇමෙරිකානු ඩොලර් පන්ලක්ෂ අනුදහසක (590,000/) මුදල ද මෙලෙස ඊයේ දින පලස්තීන රජය වෙත භාර දීම සිදු විය.

අරමුදල සඳහා දායකවීමේ අවස්ථාව 2024 ජූලි 31 දිනෙන් අවසන් කෙරුණු අතර ඒ සමඟ මානුෂිකත්වයෙන් අත්වැල් බැඳ ගත් සියලු ජනතාවට ජනාධිපති රනිල් වික්‍රමසිංහ මහතාගේ සහ ජනාධිපති කාර්යාලයේ ස්තූතිය පිරිනමයි.

වැඩබලන විදේශ කටයුතු අමාත්‍ය තාරක බාලසුරිය, විදේශ කටයුතු අමාත්‍යාංශයේ ලේකම් අරුණි විජේවර්ධන යන මහත්ම මහත්මින්ද මෙම අවස්ථාවට එක්ව සිටියහ.

හිටපු සෞඛ්‍ය ඇමති කෙහෙළිය රඹුක්වැල්ල සහ තවත් තිදෙනෙක් එළඹෙන 22 වනදා දක්වා රක්ෂිත බන්ධනාගාරගත කර තිබේ.

මේ අතර සෞඛ්‍ය අමාත්‍යාංශයේ හිටපු ලේකම් ජනක චන්ද්‍රගුප්ත සහ සෞඛ්‍ය අමාත්‍යාංශයේ හිටපු අතිරේක ලේකම් සමන් රත්නායක මහතා ඇප මත මුදා හැර ඇත.

ප්‍රමිතියෙන් තොර හියුමන් ඉමියුනොග්ලොබියුලින් එන්නත් මාත්‍රා මිලදී ගැනීමේ නඩුවට අදාළ විමර්ශනවලදී ඉහත සැකකරුවන් අත්අඩංගුවට ගෙන ගැනුණි.

සැකකරුවන් අද (08) මාළිගාකන්ද මහෙස්ත්‍රාත් අධිකරණය වෙත ඉදිරිපත් කිරීමෙන් පසු එම නියෝග නිකුත් කර ඇත.

ඉදිරි ජනාධිපතිවරණය සඳහා ස්වාධීන අපේක්ෂකයෙකු ලෙස ඉදිරිපත්ව සිටින රනිල් වික්‍රමසිංහ ට සහයෝගය ලබාදීමට අමාත්‍ය පවිත්‍රා වන්නිආරච්චි තීරණය කර තිබේ.

ශ්‍රී ලංකා පොදුජන පෙරමුණේ රත්නපුර දිස්ත්‍රික්කයේ බහුතර පාක්ෂිකයින්ගේ ඉල්ලීම මත තමන් මෙම තීරණයට එළඹී බව පවිත්‍රා වන්නිආරච්චි නිවේදනයක් නිකුත් කරමින් සඳහන් කරයි.

පවිත්‍රා වන්නිආරච්චි විසින් නිකුත් කළ සම්පුර්ණ නිවේදනය පහතින් දැක්වේ.

නොසිතූ දෙයක් !

 මේ සම්බන්ධයෙන් අදහස් දක්වමින් දේශපාලන විචාරකයන් පෙන්වා දෙන්නේ, නාමල් රාජපක්ෂ මන්ත්‍රීවරයා පොදුජන පෙරමුණේ ජනාධිපති ධූර අපේක්ෂකයා ලෙස නම් කර තිබියදී පවිත්‍රා අමාත්‍යවරිය , ජනාධිපති රනිල් වික්‍රමසිංහ ට සහාය පළකරමින් මෙවැනි තීන්දුවක් ගැනීම බොහෝ දෙනෙකු අපේක්ෂා නොකළ සිදුවිමක් බවයි.

ඒ අමාත්‍යවරිය සහ ඇගේ සැමියා වන සබරගමුව පළාත් සභාවේ හිටපු සභාපති කංචන ජයරත්න රාජපක්ෂවරුන් සමඟ අතිශය සමීපතම බැඳීමක් ඇතුව කටයුතු කළ නිසා බවත් ඔවුන් පෙන්වා දෙයි.

 කෙසේ වුවත් පසුගියදා ඇගේ පාක්ෂිකයින් නිවසටම පැමිණ ඉදිරි ජනාධිපතිවරණය අවස්ථාවේ ජනාධිපති රනිල් වික්‍රමසිංහ වෙත සහාය පළකිරීමට කටයුතු යෙදීමත්, ප්‍රසන්න රණතුංග අමාත්‍යවරයා ගේ ප්‍රධානත්වයෙන් රත්නපුර පැවති පොදුජන පෙරමුණේ පාර්ලිමේන්තු මැති ඇමතිවරුන් බහුතරය , පළාත් සභාවේ හිටපු මන්ත්‍රීවරුන් සියලු දෙනා සහ පළාත් පාලන ආයතන නියෝජිතයන් බහුතරය ඇතුළු දිස්ත්‍රික්කයේ පක්ෂ ක්‍රියාකාරීන් සමඟ වූ සාකච්ඡාවේදි ද ජනාධිපති රනිල් වික්‍රමසිංහ වෙත සහාය දැක්වීමට එකඟතාව පළවීම යන සිදුවීම් විසින් අමාත්‍යවරිය ඉදිරියේදී තීන්දුවක් ගැනීමට නියමිත බව හැඟුණු බවත් විචාරකයන් පවසයි. නමුත් නාමල් රාජපක්ෂ ජනාධිපතිවරණය සඳහා ඉදිරිපත් වීම හමුවේ ඇය ජනාධිපතිවරණය අවස්ථාවේ නිශ්ක්‍රීයව සිටිනු ඇතැයි ඇතමුන් අනුමාන කළ බවද විචාරකයන් සිහිපත් කරයි.

බම්බලපිටිය ප්‍රදේශයේ පදිංචි කෝටිපති ව්‍යාපාරිකයෙකු වූ මොහොමඩ් ෂියාම් නමැත්තා පැහැර ගෙන ගොස් මරා දැමීමේ චෝදනාව සම්බන්ධයෙන් මරණීය දණ්ඩනය නියම වී සිටි හිටපු නියෝජ්‍ය පොලිස්පති වාස් ගුණවර්ධන සහ ඔහුගේ පුත් රවිඳු ගුණවර්ධන ඇතුළු විත්තිකරුවන් හය දෙනෙකුට කොළඹ ත්‍රිපුද්ගල මහාධිකරණ විනිසුරු මඩුල්ලක් පැනවූ මරණීය දණ්ඩනය ශ්‍රේෂ්ඨාධිකරණය අද (අගෝ. 8) තහවුරු කර තිබේ.

ලබා දී ඇති දඬුවම්වලින් තමන්ව නිදොස් කොට නිදහස් කරන ලෙස ඉල්ලා වාස් ගුණවර්ධන ඇතුළු විත්තිකරුවන් විසින් ඉදිරිපත් කළ අභියාචනා පෙත්සම් නිෂ්ප්‍රභ කරමින් ශ්‍රේෂ්ඨාධිකරණය අද මෙම තීන්දුව ලබා දී ඇත.

විත්තිකරුවන් ඉදිරිපත් කළ එම අභියාචනා පෙත්සම් 2017 වසරේ ශ්‍රේෂ්ඨාධිකරණය විසින් විභාග කිරීම ආරම්භ කර ඇති අතර වසර 7 කට ආසන්න කාලයක් පැවති නඩු විභාගයකින් පසුව මෙම තීන්දුව අද දින ප්‍රකාශයට පත් කරන ලදී.

2013 වසරේ මැයි 22 වන දා බම්බලපිටිය ප්‍රදේශයේ පදිංචි කෝටිපති ව්‍යාපාරිකයෙකු වන මොහොමඩ් ෂියාම් පැහැර ගෙන ගොස් මරා දැමීමේ චෝදනාව සම්බන්ධයෙන් වරදකරුවන් කෙරුණු වාස් ගුණවර්ධන, ඔහුගේ පුත් රවිඳු ගුණවර්ධන ඇතුළු විත්තිකරුවන් හය දෙනාට කොළඹ ත්‍රිපුද්ගල මහාධිකරණ විනිසුරු මඩුල්ලක් 2015 වසරේ නොවැම්බර් මස 27 වන දා මරණීය දණ්ඩනය නියම කර තිබිණි.

ජාතික ජන බලවේගයේ විධායක සභික හිටපු පාර්ලිමේන්තු මන්ත‍්‍රී කේ.ඩී. ලාල් කාන්ත අපරාධ නීතිය යටතේ අත්අඩංගුවට ගෙන නීතිය ක්‍රියාත්මක කළ යුතුයැයි පාර්ලිමේන්තු මන්ත්‍රී උදය ගම්මන්පිල පවසයි.

මන්ත්‍රීවරයා මේ බව සඳහන් කර සිටියේ අද (07) පාර්ලිමේන්තුවේදී අදහස් දක්වමිනි.

 එහිදී මන්ත්‍රීවරයා වැඩිදුරටත් පෙන්වා දුන්නේ පාර්ලිමේන්තුව අත්පත් කර ගැනීමට සැලසුම් කලේ යැයි ලාල් කාන්ත මහතා ප්‍රසිද්ධියේ ප්‍රකාශ කර ඇති නිසා ඒ මත ඔහු අත්අඩංගුවට ගත හැකි බවයි.

එහිදී ගම්මන්පිල මන්ත්‍රීවරයා මෙසේද සඳහන් කළේය.

අපි තමයි ජනතාවට පාර්ලිමේන්තුවට එන්න කිව්වේ. නමුත් අරගලයේ හිටපු සමහරු මගහැරිය නිසා ඒ දේ කරගන්න බැරි වුණා කියලා ලාල්කාන්ත කිව්වා. එදා පාර්ලිමේන්තුව අත්පත් කර ගැනීමට ජවිපෙ අරගලකරුවන්ට හැකි වූවානම් අද ලංකාවේ ඇතිවෙන්නේත් බංගලා දේශයේ තත්වයමයි. රට තවමත් ගිනි ගන්නවා.

ලාල් කාන්ත මහතා යෝජනා කරපු ආකාරයට අද බංගලාදේශයේ මහපාරේ නඩුව අහනවා. නඩු අහලා මිනිසුන් මරා දමනවා.

ඉදිරි ජනාධිපතිවරණයේදී සමගි ජන බලවේගයේ නායක සජිත් ප්‍රේමදාසට සහය පළ කිරීමට ශ්‍රී ලංකා නිදහස් පක්ෂයේ හිටපු ලේකම් පාර්ලිමේන්තු මන්ත්‍රී දයාසිරි ජයසේකර ඇතුළු පිරිසක් ගිවිසුමක් අද (07) අත්සන් කෙරිණි.

එම ගිවිසුම අත්සන් කරන ලද්දේ පාර්ලිමේන්තු මන්ත්‍රී දයාසිරි ජයසේකර සහ සජබ නායක සජිත් ප්‍රේමදාස අතරය.

මේ සමඟ හිටපු මන්ත්‍රී තිලංග සුමතිපාල සහ ශ්‍රීලනිප හිටපු ලේකම්වරයකු වන රෝහණ ලක්ෂ්මන් පියදාස ද සජබට එක්ව තිබේ.

ඒ අනුව මේ වන විට ශ්‍රී ලංකා නිදහස් පක්ෂය ලෝකවාර්තාවකට හිමිකම් කියන තැනට පත්ව ඇත. ඒ එකම පක්ෂය ජනාධිපති අපේක්ෂකයන් තුන් දෙනෙකුට සහාය දෙමිනි.

ඒ ශ්‍රීලනිප සභාපති අමාත්‍ය නිමල් සිරිපාල ද සිල්වා ප්‍රමුඛ බහුතර පාර්ලිමේන්තු මැති ඇමති පිරිස ජනාධිපති අපේක්ෂක , ජනාධිපති රනිල් වික්‍රමසිංහ ට, ශ්‍රීලනිප සිරිසේන පාර්ශ්වය ජනාධිපති අපේක්ෂක විජේදාස රාජපක්ෂ ට සහ දයාසිරි පාර්ශ්වය සජිත් ප්‍රේමදාස ට වශයෙනි.

රජයේ වෛද්‍ය නිලධාරින්ගේ සංගමය (GMOA) සහ ජාතික ජන බලවේගයේ නායක ජනාධිපති අපේක්ෂක අනුර කුමාර දිසානායක අතර හමුවක් බත්තරමුල්ල පැලවත්ත ජනතා විමුක්ති පෙරමුණ ප්‍රධාන කාර්යාලයේදී ඊයේ (06)පැවැත්විණි.

මෙහිදී මේ වන විට ශ්‍රී ලංකාවේ වෛද්‍යවරුන් විසින් මුහුණ දෙමින් තිබෙන ගැටලුකාරී තත්වය හා එම තත්වයන් වෙනස් කිරීම සඳහා වන එම සංගමයේ යෝජනා ජාතික ජනබලවේගය වෙත ඉදිරිපත් කෙරිණි.

රජයේ වෛද්‍ය නිලධාරින්ගේ සංගමයේ සභාපති විශේෂඥ වෛද්‍යය සංජීව තෙන්නකෝන් සහ ප්‍රධාන ලේකම වෛද්‍ය ප්‍රභාත් සුඛ දාස ඇතුළු විධායක සභාවේ නිලධාරි මණ්ඩලය සමග පැවති මෙම හමුව සඳහා ජාතික ජන බලවේගයේ ප්‍රධාන ලේකම් වෛද්‍ය නිහාල් අබේසිංහ සහ ජාතික විධායක සභික මහාචාර්ය ක්‍රිශාන්ත අබේසේන ද එක්ව සිටියහ.

ඉදිරි ජනාධිපතිවරණයේදී කිසිවෙක් සමඟ සටනක් නොමැති බවත් තමන් පැමිණෙන්නේ තම ප්‍රතිපත්ති සමඟ බවත් ජනාධිපති රනිල් වික්‍රමසිංහ පැවසීය.

ජනාධිපතිවරයා මේ බව සඳහන් කර සිටියේ මාධ්‍ය ආයතන ප්‍රධානීන් සමඟ අද (07) කොළඹ පැවති හමුවකදී ය.

එහිදී වැඩිදුරටත් අදහස් දක්වමින් ජනාධිපතිවරයා මෙසේද සඳහන් කළේය.

''ඇත්ත කියලා රට බේරගන්න ලෑස්තිද නැතිනම් බොරු කියල රට අවුල් කරන්නද කියලා අපි හිතන්න ඕනේ. කැමති නම් මට ඡන්දය දෙන්න''

''මම මේක ඉදිරියට ගෙනියනවා. මම අනෙක් අය වගේ පොරොන්දු දෙන්නේ නෑ. මම කරල පෙන්නලා තියෙනවා. අනෙක් අය පොරොන්දු දෙනවා'' යැයි ද ජනපතිවරයා පැවැසීය.

මට අනෙක් අපේක්ෂකයන් අභියෝගයක් නෙවෙයි. මම එන්නෙ රටේ අනාගතය වෙනුවෙන්. අනෙක් අපෙක්ෂකයන් එන්නෙ ඔවුන් ගෙ අනාගතය වෙනුවෙන් යැයි ජනපතිවරයා වැඩි දුරටත් පැවැසීය.

ඇතැමුන්ට කතා කිරීමට හැකියාව තිබෙන්නේ දූෂණය පිළිබඳ පමණක් වන නමුත් තමා දූෂණය වැලැක්වීම සඳහා නීති රැසක් සම්පාදනය කර ඇති බවත්, අපරාධයකින් උපයාගත් දේපළ පිළිබඳ පනත් කෙටුම්පත ලබන සතියේ අමාත්‍ය මණ්ඩලය වෙත ඉදිරිපත් කරන බවත් මාධ්‍ය ප්‍රධානීන් සමඟ පැවති රැස්වීමේදී ජනාධිපති රනිල් වික්‍රමසිංහ පැවසීය. තමා කිසිවිටෙක දූෂණ චෝදනා ලැබූ කිසිවකු ආරක්‍ෂා කර නොමැති බව ද ජනාධිපතිවරයා එහිදී අවධාරණය කළේය.

ජනාධිපති රනිල් වික්‍රමසිංහ  සහ ශ්‍රී ලංකා විවෘත විශ්වවිද්‍යාලයේ නීතිවේදී උපාධි අපේක්ෂක සිසුන් පිරිසක් අතර හමුවක් ඊයේ (06) ජනාධිපති කාර්යාලයේදී සිදු විය.

ජනාධිපති රනිල් වික්‍රමසිංහගේ සංකල්පයකට අනුව පාසල් හා විශ්වවිද්‍යාල සිසුන්ට ජනාධිපති ලේකම් කාර්යාලය, ජනාධිපති මන්දිරය, වරාය නගරය, මහබැංකුව, පාර්ලිමේන්තුව ඇතුළු කොළඹ අවට අධ්‍යාපනික වටිනාකමක් ඇති සුවිශේෂ ස්ථාන නැරඹීම සඳහා අවස්ථාව උදා කර දී තිබේ.

ඒ අනුව ශ්‍රී ලංකා විවෘත විශ්වවිද්‍යාලයේ නීතිවේදී උපාධි අපේකෂක සිසුන් 280ක් පමණ ඊයේ (06) එම ක්ෂේත්‍ර චාරිකාවට එක්ව සිටි අතර ඔවුන් ජනාධිපති කාර්යාලය වෙත පැමිණි අවස්ථාවේ ජනාධිපති රනිල් වික්‍රමසිංහ මහතා මුණ ගැසීමට අවස්ථාව සළසා දෙන ලෙස කළ ඉල්ලීමට අනුව සිසුන් අතරට පැමිණි ජනාධිපතිවරයා ඔවුන් සමඟ සුහද කථා බහකට එක් විය.

ඔවුන්ගේ අධ්‍යාපන කටයුතු පිළිබඳව මෙහිදී විමසා බැලු ජනාධිපතිවරයා ව්‍යවස්ථාදායකය, විධායකය සහ අධිකරණය පිළිබඳ සිසුන් ඉදිරිපත් කළ ගැටලුවල‍ට ද පිළිතුරු ලබා දෙමින් ඒ පිළිබඳව ඔවුන්ව දැනුවත් කිරීමට ද කටයුතු කළේය.

අනතුරුව ජනාධිපතිවරයා සිසුන් සමඟ සමූහ ඡායාරූපයකටද එක් විය.

ජනාධිපති ලේකම් සමන් ඒකනායක, ජනාධිපති නීති උපදේශක බිම්බා තිලකරත්න, ජනාධිපති ලේකම් කාර්යාලයේ සහකාර අධ්‍යක්ෂ මේජර් නදීක දංගොල්ල යන මහත්ම මහත්මීන් ද මෙම අවස්ථාවට එක්ව සිටියහ.

ශ්‍රී ලංකා පොදු ජන පෙරමුණේ (පොහොට්ටුව) ජනාධිපති අපේක්ෂක ලෙස එම පක්ෂයේ ජාතික සංවිධායක පාර්ලිමේන්තු මන්ත්‍රී නීතිඥ නාමල් රාජපක්ෂ නම් කිරීමට තීරණය කර ඇත.

පොහොට්ටු පක්ෂයේ ජනාධිපති අපේක්ෂකයා ප්‍රකාශයට පත්කිරීමේ උත්සවය එම පක්ෂයේ උත්තරීතර නායක, මහින්ද රාජපක්ෂගේ ප්‍රධානත්වයෙන් අද (07) පෙරවරුවේ බත්තරමුල්ල නෙළුම් මාවතේ පොහොට්ටු පක්ෂ මුලස්ථානයේදී සිදුවිය.

එහිදී නාමල් රාජපක්ෂගේ නම යෝජනා කරනු ලැබුවේ ඔහුගේ පියාණන් වන හිටපු ජනාධිපති මහින්ද රාජපක්ෂ විසිනි.

නාමල් රාජපක්ෂ ගේ නම ප්‍රකාශයට පත්කිරීමට අදාල හේතු පාඨය එම පක්ෂයේ මහ ලේකම් නීතිඥ සාගර කාරියවසම් විසින් ප්‍රකාශයට කරනු ලැබිය.

පොහොට්ටු පක්ෂයේ නිර්මාතෘ බැසිල් රාජපක්ෂ ඇතුළු පිරිසක් මෙම අවස්ථාවට එක්ව සිටියහ.

පෞද්ගලික හේතුවක් මත තමා 2024 ජනාධිපතිවරණය සඳහා අපේක්ෂකයෙකු වශයෙන් ඉදිරිපත් නොවන බව පොදුජන පෙරමුණේ නාමල් පාර්ශ්වයේ තේරීම වූ කෝටිපති ව්‍යාපාරික ධම්මික පෙරේරා පවසයි.

ශ්‍රී ලංකා පොදුජන පෙරමුණ මහ ලේකම්, නීතිඥ සාගර කාරියවසම් වෙත ලිපියක් යොමුකරමින් ඔහු එබව දැනුම්දී ඇත.

එම ලිපිය පහත දැක්වෙයි.

2024 ජනාධිපතිවරණය සඳහා අපේක්ෂකයෙක් වශයෙන් ඉදිරිපත් නොවන බව දැනුම් දීම

පළමුව, 2024 ජනාධිපතිවරණය සඳහා ශ්‍රී ලංකා පොදුජන පෙරමුණ නියෝජනය කරන අපේක්ෂකයා වශයෙන් මා ඉදිරිපත් කිරීමට යෝජනා කිරීම සම්බන්ධව පක්ෂ නායකත්වයටත්, ඔබතුමාටත්, අනෙකුත් සියලුම දේශපාලන නියෝජිතවරුන්ටත් මා ගේ හෘදයාගම ස්තූතිය පළ කරමි.

නමුත්, පෞද්ගලික හේතුවක් මත මා 2024 ජනාධිපතිවරණය සඳහා අපේක්ෂකයෙකු වශයෙන් ඉදිරිපත් නොවන බව මෙයින් කාරුණිකව දන්වමි. පක්ෂයේ උන්නතිය සහ ඉදිරි කටයුතු සාර්ථකත්වය උදෙසා මාගේ සුභ පැතුම් මෙයින් එක් කරමි.''

ස්තූතියි මෙයට හිතවත්
ධම්මික පෙරේරා (පා.ම.)

මේ අතර ජනාධිපතිවරණය වෙනුවෙන් පොදුජන පෙරමුණේ අපේක්ෂකයා ලෙස ඉදිරිපත් වන ලෙස එම පක්ෂයේ නාමල් පාර්ශ්වය විසින් අගමැති දිනේෂ් ගුණවර්ධන වෙතින් ඉල්ලා ඇති නමුත් ඔහු එය ප්‍රතික්ෂේප කර ඇති බව වාර්තා වෙයි.

මේ අතර පොදුජන පෙරමුණේ සමාජ මාධ්‍ය ක්‍රියාකාරීන් පාර්ලිමේන්තු මන්ත්‍රී නාමල් රාජපක්ෂ හෝ බැසිල් රාජපක්ෂ පොදුජන පෙරමුණ පක්ෂයේ ජනාධිපති අපේක්ෂකයා වන ලෙස ඉල්ලමින් ප්‍රචාරක ව්‍යාපාරයක් දියත් කර ඇත.

පුනර්ජනනීය බලශක්ති විභවයන් භාවිතයට ගැනීම, කෘෂිකර්මාන්තය නවීකරණය සහ ජල හිඟයට විසඳුම් ලබාදීම වැනි කඩිනම් ක්‍රමවේද ඔස්සේ 2040 වසර වන විට තිරසර සංවර්ධන ඉලක්ක සපුරා ගැනීමට සහ ශුද්ධ ශුන්‍ය කාබන් විමෝචන තත්ත්වය ළඟා කර ගැනීමට ශ්‍රී ලංකාව කටයුතු කරමින් සිටින බව ජනාධිපති රනිල් වික්‍රමසිංහ පැවසීය.

ඒ සඳහා වාණිජමය ආයෝජන හරහා ගෝලීය මූල්‍ය පහසුකම් ආකර්ෂණය කරගැනීමට බලාපොරොත්තු වන බවත්, වැවිලි ක්ෂේත්‍රය වතු ව්‍යාපාරවල සිට කෘෂි ව්‍යාපාර දක්වා පරිවර්තනය කිරීම, තිරසර සංචාරක ව්‍යාපාරය ප්‍රවර්ධනය කිරීම සහ නිෂ්පාදන වැඩිදියුණු කිරීම හා ඩිජිටල්කරණය ඒ වෙනුවෙන් ක්‍රියාවට නංවා තිබෙන ප්‍රධාන වැඩසටහන් බවත් ජනාධිපතිවරයා සඳහන් කළේය.

ජනාධිපති රනිල් වික්‍රමසිංහ මේ බව සඳහන් කර සිටියේ අද (06) පෙරවරුවේ කොළඹ සිනමන් ග්‍රෑන්ඩ් හෝටලයේ දී ආරම්භ කෙරුණු 2024 පරිසර, සමාජීය හා පාලනය (ESG) පිළිබඳ සමුළුව අමතමිනි.

කොළඹ විශ්වවිද්‍යාලයේ ව්‍යාපාර පරිපාලන පශ්චාත් උපාධි ආදි විද්‍යාර්ථීන්ගේ සංගමය විසින් “පැහැපත් අනාගතයක් සඳහා තිරසර මංපෙත්” යන තේමාව යටතේ සංවිධානය කරන ලද මෙම සමුළුව අද දිනය පුරා පැවැත්වෙන අතර පරිසර, සමාජ සහ පාලනය යන ක්ෂේත්‍රයන්හි විශේෂඥයින් 15 දෙනෙකු පමණ තිරසරභාවය සඳහා පරිවර්තනය වීම වෙනුවෙන් වැදගත්වන දැනුම, අවබෝධය සහ නවෝත්පාදන විසඳුම් බෙදා ගැනීම වෙනුවෙන් ඊට එක්ව සිටී.

මෙහිදී ක්ෂුද්‍ර, කුඩා,හා මධ්‍ය පරිමාණ ව්‍යවසායකයින් වෙත පරිසර, සමාජීය හා පාලනය (ESG) පිළිබඳ විශිෂ්ටතා සම්මාන පිරිනැමීම ද ජනාධිපති රනිල් වික්‍රමසිංහ මහතා අතින් සිදු කෙරිණි.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය,

පසුගිය අවුරුදු තුන පුරා විවිධ සමුළු පවත්වමින් පරිසර, සමාජීය හා පාලනය (ESG) පිළිබඳ කතා කිරීම සම්බන්ධව මම පළමුවෙන්ම ඔබට ස්තූති කළ යුතුයි. විශේෂයෙන්ම පුද්ගලික අංශය ලෝකය වෙනස් වන ආකාරය පිළිබඳ සහ ආර්ථික, සමාජීය සහ පාලනය පිළිබඳ අධ්‍යයනය කළ යුතු බැවින් එය වැදගත් බව මම විශ්වාස කරනවා. අප එය තවදුරටත් ඉදිරියට ගෙන යා යුතුයි.

ඒ වගේම දකුණු ආසියාවේ සියලුම රටවල් අතරින් එසේ කළ හැකි හොඳම රට වන්නේ අප රට බව පැවසිය යුතුයි. මාලදිවයින අප හා සමාන නමුත් එය තරමක් කුඩා රටක්. මම හිතන්නේ අනෙක් රටවල් එයට සූදානම් නැහැ. ඒ නිසා අප මෙහි පළමුවැන්නා විය යුතුයි.

මෙහි දී පෞද්ගලික අංශයේ දායකත්වය පිළිබඳ මා ප්‍රශංසා කරනවා. අද ලෝකයේ භූ දේශපාලනික තත්ත්වය ඉන් විරුද්ධ දිශාවට ගමන් කරන බව ද ඔබ මතක තබා ගත යුතුයි. තිරසර සංවර්ධන ඉලක්ක, පැරිස් දේශගුණික සමුළුව සහ ග්ලාස්ගොව් සමුළුවේ එකඟතාවන් අතරමඟ නතරවී තිබෙනවා. එතැන් සිට අප එතරම් දියුණුවක් ලබා නැහැ.

ලෝකය තවමත් COVID-19 වසංගත තත්ත්වයෙන් යථා තත්ත්වයට පත්වෙමින් තිබෙනවා. චීනයේ ආර්ථිකය තවමත් උපරිමයෙන් ක්‍රියාත්මක වන්නේ නැහැ. ඒ සඳහා තවත් වසර කිහිපයක් ගතවනු ඇතැයි මම විශ්වාස කරනවා. ඇමෙරිකා එක්සත් ජනපදයේ ආර්ථික වර්ධනයක් පිළිබඳ කතා කළ නමුත් ඔවුන් දැන් සඳහන් කර තිබෙන්නේ රැකියා වෙළඳපොළ අතුරුදහන් වී ඇති බවයි. ඒ නිසා අප ලෝකයේ ප්‍රධාන ආර්ථිකය දෙක දෙස අවධානය යොමුකළ යුතුයි. යුරෝපය ඉදිරියට ගමන් කරන නමුත් එහි ද ගැටළු තිබෙනවා. අප තිරසාර සංවර්ධන ඉලක්ක දෙස අවධානය යොමු කරන්නේ මෙවන් පසුබිමක් තුළයි.

අප තිරසර සංවර්ධන අරමුණු ඉටු කර ගන්නේ කෙසේද, අප ඒ සඳහා අරමුදල් සපයා ගන්නේ කොහොමද, රටවල් කොපමණ ප්‍රමාණයකට මේ සඳහා මුදල් වියදම් කළ හැකිද? ඔබ පෙරළියක් අපේක්ෂා කරනවා නම් “පරිසර, සමාජීය හා පාලනය (ESG)” පිළිබඳ කටයුතු කරන්නේ කෙසේද? ඩොනල්ඩ් ට්‍රම්ප් මහතා ඇමරිකාවේ ජනාධිපති ධූරයට පත් වුවහොත් එය විවෘත ප්‍රශ්නයක් බවට පත්වෙනවා.

නමුත් වඩාත් කණගාටුවට කරුණ වූයේ එක්සත් රාජධානියේ සිදු වූ දෙයයි.බොරිස් ජොන්සන් මහතා යටතේ, ග්ලාස්ගෝව් සමුළුව සහ එහිදී එකඟවූ මූලධර්ම සියලු දෙනා විසින් පිළිගනු ලැබුවා. වසර දෙකක් ඇතුළත, ඔහුගේම අනුප්‍රාප්තිකයා බවට පත්වූ රිෂි සුනක් මහතා, අසාර්ථක වූ ප්‍රතිසංස්කරණවලින් දක්ෂිණාංශික ඡන්දය ලබා ගැනීම සඳහා ඒ සෑම දෙයක්ම ආපසු හැරවූවා. අද අප එක්සත් රාජධානිය තුළ නව රජයක් පවතින බව දකිනවා. එය ආපසු හැරවීමට ඔවුන්ට අවශ්‍ය නමුත් එක්සත් රාජධානියට ඒ සඳහා තවදුරටත් මුදල් නොමැති බව අප මතක තබා ගත යුතුයි.

අපට ලැබෙන්න තිබෙන සියලුම අරමුදල් පිළිබඳ අප සාකච්ඡා කර තිබනෙවා. අප COP 27, 28, 29 සමුළු වලදී මේ පිළිබඳ සාකච්ඡා කළා. අප කොපමණ ප්‍රමාණයක් අරමුදල් ලබා දෙනවාද? අප ණය පිළිබඳ සමුළුව සඳහා පැරිස් නුවර දී හමුවූ නමුත් තවමත් අවසන් ප්‍රතිඵලයක් ලැබී නැහැ. එය නරක අතට හැරෙමින් පවතිනවා. මේ අතර, ඇමෙරිකා එක්සත් ජනපදය යුක්‍රේනය සහ ඊශ්‍රායලය සඳහා වැඩි මුදලක් වියදම් කර තිබෙනවා.

එම අරමුදල් අපිට මේ වෙනුවෙන් යෙදවිය යුතුව තිබුණා යැයි මා සිතනවා. යුරෝපය මේ සඳහා වියදම් කර ඇති මුදල් ප්‍රමාණය දෙස බලන්න. ඒ වගේම රුසියාව කොපමණ මුදලක් වියදම් කළාද කියා අපි දන්නේ නැහැ. ඒ අරමුදල් සියල්ලම මේ සඳහා යෙදවිය හැකිව තිබුණා. නමුත් එය සිදුවන්නේ නැහැ. දෙවනුව, මැදපෙරදිග තත්ත්වයත් ඒ හා සමානයි. ඉරානයට ප්‍රතිප්‍රහාර එල්ල කිරීමට අවශ්‍ය බව පෙනෙන්ට තිබෙනවා. ප්‍රතිප්‍රහාර එල්ල කිරීම මඟින් ශ්‍රී ලංකාව ඇතුළු සියලු රටවලට අයහපත් ප්‍රතිවිපාක එල්ල වෙනවා.

අපගේ මිත්‍ර රටක් වන බංගලාදේශයේ දේශපාලනය පිළිබඳ කතා කිරීමට මා අදහස් නොකරන නමුත් ඒ පිළිබඳ යමක් සඳහන් කළයුතුයි. ෂෙයික් හසීනා මහත්මිය අග්‍රාමාත්‍ය ධුරයෙන් ඉවත්ව ගියත්, අප ඉතා අසීරු අවස්ථාවක සිටිදී ඇය අපේ රටට ඩොලර් මිලියන 200ක් ලබා දුන් බව මම සිහිපත් කළ යුතුයි.

ඒ නිසා මේ මොහොතේ ඇත්තටම වැටී සිටින පුද්ගලයෙකු ගැන හොඳ වචනයක් ප්‍රකාශ කිරීම සාධාරණ යැයි මම සිතනවා. කලීඩා සියා මහත්මිය සිරෙන් නිදහස් කිරීම පිළිබඳ මම සතුටු වෙනවා. ෂෙයික් හසීනා මහත්මිය මෙය බොහෝ කලකට පෙර සිදු කළා නම්, ඇයට තවමත් බංගලාදේශයේ අග්‍රාමාත්‍යවරිය ලෙස කටයුතු කළ හැකිව තිබුණා. බංග්ලාදේශයේ තත්ත්වය ඉක්මනින් සමථයකට පත්වේවායි අප ප්‍රාර්ථනා කරනවා. බංගලාදේශ නැවත යථා තත්ත්වයට පත්වෙනු ඇති බවට මට සැකයක් නැහැ.කෙටි කාලීනව යම් යම් ප්‍රශ්න ඇති වේවි, නමුත් මතක තබා ගන්න ශ්‍රී ලංකාවේ අපටත් ඒ දේම සිදුවුණා. බංගලාදේශයේ විශාලතම ආයෝජකයින්ගෙන් අප ද එක් රටක් වන නිසා අපි ඒ රටේ රැකියා අවස්ථා ඇති කර තිබෙනවා.

ලෝකය තුළ පවතින තත්ත්වයන් යහපත් නොවන බව මෙම සිදුවීම්වලින් පැහැදිලි වෙනවා. නමුත් ශ්‍රී ලංකාව මෙම කටයුතුවලින් ඉවත් වන බවක් එයින් අදහස් වන්නේ නැහැ.

මෙම ගෝලීය සන්දර්භය තුළ, ශ්‍රී ලංකාවේ අක්කර 600ක ප්‍රදේශයක ජාත්‍යන්තර දේශගුණික විපර්යාස විශ්වවිද්‍යාලය පිහිටුවීට පියවරගෙන තිබෙනවා. ඒ සඳහා අවශ්‍ය නීති සම්පාදන කටයුතු ලබන වසර මුල වන විට සිදුකිරීමට සැලසුම් කර තිබෙනවා. වාණිජ ආයෝජන කෙරෙහි අවධානය යොමු කරමින් කාබන් අවශෝෂණය සඳහා නිවර්තන කලාප සහ ඉන්දියන් සාගරය යොදාගැනීම සඳහා නිවර්තන කලාප මුලපිරීම ඉදිරිපත් කර තිබෙනවා. පුනර්ජනනීය බලශක්ති විභවයන් භාවිතයට ගැනීම, කෘෂිකර්මාන්තය නවීකරණය කිරීම සහ ජල හිඟයට විසඳුම් ලබාදීම වැනි කඩිනම් ක්‍රමවේද ඔස්සේ 2040 වසර වන විට තිරසාර සංවර්ධන ඉලක්ක සපුරාලමින් සහ ශුන්‍ය විමෝචන තත්ත්වය ළඟා කර ගැනීමට ශ්‍රී ලංකාව කටයුතු කරමින් සිටිනවා.

මේ සඳහා වාණිජමය ආයෝජන හරහා ගෝලීය මූල්‍ය පහසුකම් ආකර්ෂණය කරගැනීමට අප බලපොරොත්තු වෙනවා. වැවිලි කර්මාන්තයේ පවතින වතු ව්‍යාපාරවල සිට කෘෂි ව්‍යාපාර දක්වා පරිවර්තනය වීම, තිරසාර සංචාරක ව්‍යාපාරය ප්‍රවර්ධනය කිරීම සහ නිෂ්පාදන වැඩිදියුණු කිරීම හා ඩිජිටල්කරණය ඒ තුළ ප්‍රධාන අරමුණු බවට පත්වෙනවා. මීට අමතරව, තාක්ෂණික අධ්‍යාපනය සහ නවෝත්පාදනය සඳහා සහාය වීම සඳහා නව තාක්ෂණික විශ්වවිද්‍යාල හතරක් ස්ථාපිත කිරීමට ද කටයුතු සිදු කෙරෙමින් පවතිනවා.

කොළඹ විශ්වවිද්‍යාලයේ උපකුලපති මහාචාර්ය එච්. ඩී. කරුණාරත්න, ශ්‍රී ලංකාව සහ මාලදිවයින සඳහා වන HSBCහි ප්‍රධාන විධායක නිලධාරී මාර්ක් සර්ජනර් (Mark Surgenor) යන මහත්වරුන් ඇතුළු විශ්වවිද්‍යාල ආචාර්ය මණ්ඩලය, ව්‍යාපාරිකයින්, පුද්ගලික ව්‍යාපාරික ක්ෂේත්‍රයේ ජ්‍යෙෂ්ඨ නිලධාරීන්, කොළඹ විශ්වවිද්‍යාලයේ ව්‍යාපාර පරිපාලන පශ්චාත් උපාධි ආදි විද්‍යාර්ථීන්ගේ සංගමයේ නිලධාරී මණ්ඩලය, විද්‍යාර්ථීන් ඇතුළු පිරිසක් මෙම අවස්ථාවට එක්ව සිටියහ.

ඉදිරි ජනාධිපතිවරණය සඳහා අපේක්ෂකයකු වශයෙන් ඉදිරිපත් නොවීමට පොදුජන පෙරමුණේ නාමල් පාර්ශ්වයේ තේරීම වූ කෝටිපති ව්‍යාපාරික ධම්මික පෙරේරා තීරණය කර ඇත.

ඔහු මේ බව සඳහන් කරමින් පොදු ජන පෙරමුණේ මහ ලේකම් පාර්ලිමේන්තු මන්ත්‍රී සාගර කාරියවසම් ට ලිපියක් යොමු කර තිබේ.

එහිදී ඔහු සඳහන් කර ඇත්තේ පෞද්ගලික හේතු මත තමා ඉදිරිපත් නොවන බව යැයිද දැනගන්නට ඇත.

කෙසේ වුවත් පොදුජන පෙරමුණේ නාමල් පාර්ශ්වය ධම්මික පෙරේරා ජනාධිපති අපේක්ෂකත්වය වෙනුවෙන් නම් කිරීමට නියමිතව තිබුණේ හෙට (07) පෙරවරුවේ උත්සවාකාරයෙනි.

එම උත්සවය පැවැත්වීම සඳහා පළමුව කොළඹ නෙළුම් පොකුණ ශාලා පරිශ්‍රය තෝරගෙන සිටියත් පසුව එය පොදුජන පෙරමුණේ පක්ෂ මූලස්ථානයේ පැවැත්වීමට කටයුතු සංවිධානය කර තිබිණ.

එසේම ඒ වෙනුවෙන් අද කොළඹ පුරා පෝස්ටරයක් ද අලවා තිබූ අතර එය පහත දැක්වෙයි.

නාමලුත් ඉල්ලා අස්වෙයි !

මේ අතර පාර්ලිමේන්තු මන්ත්‍රී නීතිඥ නාමල් රාජපක්ෂ ජාත්‍යන්තර සබඳතා පිළිබඳ ආංශික අධීක්ෂණ පාර්ලිමේන්තු කාරක සභාවේ සමාජිකත්වයෙන් ඉල්ලා අස්වූ බව කතානායක මහින්ද යාපා අබේවර්ධන පාර්ලිමේන්තුවට අද (6) දැනුම් දුන්නේය.

නාමල් රාජපක්ෂ මන්ත්‍රීවරයා එම කාරක සභාවේ සභාපති ලෙස කටයුතු කළේය.

ඒ අනුව පුරප්පාඩුවූ එම සාමාජික ධූරයට පාර්ලිමේන්තු මන්ත්‍රී නීතිඥ ප්‍රේමනාත් සී දොළවත්ත නම් කර ඇති බවද කතානායකවරයා සඳහන් කළේය.

ජාත්‍යන්තර සබඳතා පිළිබඳ ආංශික අධීක්ෂණ කාරක සභාවේ සභාපති ධූරයද මේ අනුව පුරප්පාඩුව ඇත.