පුවත්

ඉදිරි ජනාධිපතිවරණ අපේක්ෂකත්වය වෙනුවෙන් අද (06) වන විට 18 දෙනෙකු ඇප මුදල් තැම්පත් කර ඇති බව මැතිවරණ කොමිසම පවසයි.

ජනතා විමුක්ති පෙරමුණේ සහ ජාතික ජනබලවේගය පක්ෂයේ නායක අනුර කුමාර දිසානායක වෙනුවෙන් ද අද එම පක්ෂයේ පිරිසක් ඇප තැම්පත් කිරීම සිදුවිණ.

මේ අතර මැතිවරණ කොමිසම පවසන්නේ ජනාධිපතිවරණයට අදාළව මැතිවරණ පැමිණිලි 99ක් මේ වනවිට ලැබී ඇති බවයි.

ජූලි 31 වනදා සිට ඊයේ (05) පස්වරු 05 දක්වා එම පැමිණිලි වාර්තා වූ බවද කොමිසම වැඩිදුරටත් සඳහන් කරයි.

තමන්ට අපහාසයක් කර ඇති බැවින් ඒ වෙනුවෙන් රුපියල් බිලියන 02ක වන්දියක් අයකර දෙන ලෙස ඉල්ලා හිටපු මුදල් අමාත්‍ය රවී කරුණානායක විසින්, පොදුජන පෙරමුණේ පාර්ලිමේන්තු මන්ත්‍රීනී කෝකිලා ගුණවර්ධන ට එරෙහිව ගොනු කළ නඩුවක් අද ( 06) කොළඹ දිසා අධිකරණය හමුවේ සමථයට පත් විය.

අදාළ නඩුව අද කැඳවූ අවස්ථාවේදී විත්තිකාර මන්ත්‍රීවරිය සිය නීතිඥවරුන් මාර්ගයෙන් අධිකරණයට දැනුම්දී සිටියේ තමන් සිදුකළ ප්‍රකාශය වැරදි සහගත බව තේරුම් ගන්නා අතර ඒ සම්බන්ධයෙන් පැමිණිලිකාර රවී කරුණානායක හිටපු අමාත්‍යවරයා වෙතින් කොන්දේසි විරහිතව සමාව අයැද සිටින බවයි.

ඊට අමතරව රුපියල් දස දහසක මුදලක් ලංකා පිළිකා අරමුදලට පරිත්‍යාග කරන බවද මන්ත්‍රීවරිය වෙනුවෙන් පෙනී සිටි නීතිඥවරයා සඳහන් කළාය.

ඒ අනුව අදාළ නඩුවේ සමථය සටහන් කරගත් අධිකරණය සමථ කොන්දේසි වලට අනුකූලව කටයුතු කරන ලෙස පාර්ශව කරුවන්ට නියෝග කරන ලදී.

රාජ්‍ය සේවයෙහි පවතින විශ්‍රාම වැටුප් විෂමතා ඉවත් කිරීම සඳහා ජනාධිපතිවරයා විසින් ඉදිරිපත් කළ යෝජනාවට අමාත්‍ය මණ්ඩලය අනුමැතිය හිමිවී තිබේ.

රජය විසින් වරින්වර සිදුකරන ලද වැටුප් සංශෝධන මෙන්ම අමාත්‍ය මණ්ඩලය විසින් ගන්නා ලද විවිධ ප්‍රතිපත්තිය තීරණ හේතුවෙන් ඇතැම් විශ්‍රාමික කණ්ඩායම්හට විශ්‍රාම වැටුප් විෂමතා නිර්මාණය වී ඇත.

ඒ අනුව, 2016-01-01 දින සිට 2020-01-01 දින දක්වා විශ්‍රාම ගන්නා ලද රාජ්‍ය නිලධාරින්ට යම් අසාධාරණයක් සිදු වී ඇති බව නිරීක්ෂණය වී ඇති අතර, එකී වැටුප් විෂමතාව ඉවත් කිරීම තුළින් විශ්‍රාමික රාජ්‍ය නිලධාරීන් 83,000ක පමණ පිරිසකට සහනයක් ලබා දීමට හැකි වේ.

ජනාධිපතිවරණය ප්‍රකාශයට පත් කිරීමත් සමග තැපැල් ඡන්දය සඳහා අයදුම්පත් කැඳවීමේ කාල සීමාව දීර්ඝ කර තිබේ.

තැපෑලේ දී සිදුවිය හැකි ප්‍රමාදවීම සහ කොමිෂන් සභාව වෙත කරනු ලැබූ ඉල්ලීමක් සැලකිල්ලට ගෙන එම තීරණය ගෙන ඇත.

නිවේදනයක් නිකුත් කරමින් මැතිවරණ කොමසාරිස් ජනරාල්, සමන් ශ්‍රී රත්නායක  සඳහන් කර ඇත්තේ, අද (05) මධ්‍යම රාත්‍රී 12න් අවසන් වීමට තිබූ තැපැල් ඡන්ද අයදුම්පත් භාරගැනීමේ කාලය අගෝස්තු මස 9 වන සිකුරාදා මධ්‍යම රාත්‍රී 12 තෙක් දීර්ඝ කර ඇති බවය.

ඒ අනුව අයදුම්පත් අගෝස්තු 9 වනදා මධ්‍යම රාත්‍රී 12ට පෙර දිස්ත්‍රික් මැතිවරණ කාර්යාලය වෙත ලැබීය යුතු වේ.

අයදුම්පත් ලැබීමේ දී සිදුවිය හැකි ප්‍රමාදය වළක්වා ගැනීම සඳහා අගෝස්තු 8 සහ 9 යන දෙදින තුළ සම්පූර්ණ කරන තැපැල් ඡන්ද අයදුම්පත් තැපෑලට භාරදීමෙන් වැළකී ඒවා එක් එක් දිස්ත්‍රික්කය අනුව වෙන්කර වෙන වෙනම කවරවල බහා සහතික කිරීමේ නිලධාරී කාර්යාලය පිහිටි දිස්ත්‍රික්කයේ දිස්ත්‍රික් මැතිවරණ කාර්යාලයට අතින් ගෙනැවිත් භාරදීමට කටයුතු කිරීම වඩාත් යෝග්‍ය බවද මැතිවරණ කොමසාරිස් ජනරාල්වරයා නිවේදනය කරයි.

ආණ්ඩුවට සරල බහුතරය තිබෙන බැවින් ඉදිරි මාස දෙක,තුන රජය පවත්වාගෙන යාම ගැටලුවක් නොවන බව ආණ්ඩු පක්ෂ ප්‍රධාන සංවිධායක, නාගරික සංවර්ධන හා නිවාස අමාත්‍ය ප්‍රසන්න රණතුංග පවසයි.

එමෙන්ම අමාත්‍යවරයා අවධාරණය කරන්නේ පක්ෂය නිවැරදි තීන්දුව නොගතහොත් පොදුජන පෙරමුණට දෙතුන් දෙනෙකු පමණක් ඉතිරි වනු ඇති බවයි.

දිවුලපිටිය ආසනයේ පැවති උත්සවයකින් පසුව මාධ්‍ය වෙත අදහස් දක්වමින් අමාත්‍යවරයා මේ බව සඳහන් කළේය.

එහිදී අමාත්‍යවරයා මෙසේද කීය.

ප්‍රශ්නය- ඔබතුමාව ගම්පහ දිස්ත්‍රික් නායකත්වයෙන් ඉවත්කර තිබෙනවා?

පිලිතුර- මම දන්න විදියට මාව දිස්ත්‍රික්කයේ මැතිවරණ මෙහෙයුමෙන් ඉවත්කර තිබෙනවා.ඒක සාධාරණයි. මොකද අපි පොහොට්ටුවේ අපේක්ෂකයාට සහය දෙන්න නෑ. මම රට ගැන හිතල තීන්දුවක් ගත්තා. මම මගේ තීන්දුවේ ඉන්නවා.

ප්‍රශ්නය- ඒ කියන්නේ පක්ෂය රට ගැන හිතන්නෙ නැද්ද?

පිලිතුර- තම තමන්ගේ පුද්ගලික න්‍යාය පත්‍රවලට වැඩ කරන කොට රට ගැන හිතන්න බැහැ.අද පක්ෂයට වෙලා තියෙන්නේ එහෙම දෙයක්. රට ගැන කැක්කුමක් තිබුණනම් 2022දි පක්ෂයේ නායකත්වය වෙන කෙනෙක්ට දෙන්න තිබුණා. ඩලස් අලහප්පෙරුම ජනාධිපති අපේක්ෂකයා ලෙස ඉදිරිපත් වෙනකොට අපේ නායකයෝ එයාට සහය දුන්නේ නෑ. මොකද ඔහුට ඒ අත්දැකීම නැති නිසා. ඒ නිසා රනිල් වික්‍රමසිංහ මහතාට සහය දෙන්න තීරණය කළේ අපේ නායකයන්.ඒක නිවැරදි තීරණයක්. ජනාධිපතිතුමා රට අමාරුවෙන් ගොඩ ගත්තම අයිතිවාසිකම් කියන්න ගොඩක් අය ඉන්නවා. හැබැයි අත්හදාබැලීම් කරන්න ගියොත් ආපහු ජනතාව පාරට බහිනවා. ඒ නිසා කයිවාරු නොගහ වැඩක් කරල පෙන්නපු මනුස්සයට ආපහු ර⁣ට බාරදෙමු කියල අපි කියන්නේ.

ප්‍රශ්නය- ඔබ ඇතුළු පිරිසක් පක්ෂයෙන් අයින්කළේ ජනාධිපතිතුමා ප්‍රවර්ධනය කරන්න ගිහිල්ලා නේද?

පිලිතුර- නිදහස් පක්ෂය 2015 අපිට මේ විදියටම සැලකුවා.අද ඒ පක්ෂයට මොකද වෙලා තියෙන්නේ.බුද්ධිමත්ව කටයුතු නොකළොත් පොහොට්ටුවට වෙන්නෙත් ඒකමයි. අපි මහින්ද රාජපක්ෂ මහත්තයට ආදරෙයි. ඒ ආදරය නිසාමයි පක්ෂය රැකිල තියෙන්නේ. එතුමා නැතිවුණ දවසට මේ පක්ෂය ඉවරයි.

ප්‍රශ්නය- දැන් පොහොට්ටුවට මොකද වෙන්නෙ?

පිලිතුර- විනාශයක් වෙන්න යන්නේ.මේ වෙන්නෙ තමන්ගේ අපේක්ෂකයෙක් දාල ඩීල් එකක්. පක්ෂයේ අපේක්ෂකයාට දිනන්න බෑ. තරඟය තියෙන්නේ සජිත් – රනිල් අතර. අපිට ඩීල් නෑ. සල්ලිවලට පක්ෂය විකුණන්න දෙන්න බෑ. මේක මිනිස්සු හදපු පක්ෂයක්.

ප්‍රශ්නය- තනතුරු නැතුව ඔබ ඇතුළු පිරිසට මැතිවරණවලට යන්න පුළුවන්ද?

පිලිතුර- පක්ෂය දෙන තනතුරු දේශපාලන මණ්ඩලය වගේ තමයි. ඒකෙ ඉන්නෙ ගෙදර වැඩ කරන අය, තමන්ගේ සිකියුරිටි එක. නමුත් මහ⁣ පොළොව ඉල්ලන්නේ ආර්ථික අර්බුධයෙන් රට බේරාගත්තු නායකයා. අද වෙනකම් මම මේ පක්ෂයේ දිස්ත්‍රික් නායකයා නෙමෙයි. මට එහෙම පත්වීමක් දීල නෑ. මිනිස්සු තමයි ඒ පත්වීම දුන්නේ.බලෙන් දෙන නායකකම් මිනිස්සු කොයිතරම් දුරකට පිලිගනීද කියල බලමු.

ප්‍රශ්නය- පක්ෂයකුත් නැතුව මේ පවතින තත්ත්වය ඔබට ඉදිරිය අභියෝගයක් නෙමෙයිද?

පිලිතුර- නෑ… රනිල් වික්‍රමසිංහ මහතාගේ ජයග්‍රහණයෙන් පසුව පොහොට්ටුව හෝ වෙනත් පක්ෂයක් සමඟ සන්ධානගතවෙනවා. දැන් මේ රටේ තියෙන්නේ අලුත් දේශපාලන සංස්කෘතියක්. සියලුම දේශපාලන පක්ෂ,නායකයෝ,සියලුම ජාතීන් එකට එකතුවෙලා ඉන්නෙ අපේ වේදිකාවේ.මිනිස්සු බළාපොරොත්තු වෙන සිස්ටම් චෙන්ජ් එක අපේ පැත්තෙ තියෙනවා.

ප්‍රශ්නය- පක්ෂය ගත්තු තීරණය පිටුපස ඉන්නෙ කවුද? නාමල් රාජපක්ෂද?

පිලිතුර- බැසිල් රාජපක්ෂ මහතා මේ පක්ෂය එකට තියාගෙන ආවා. තනතුරු දෙනකොට අත්දැකීම් තියෙන කෙනෙකුට දෙන්න ඕන.

අත්දැකීම් නැති අය රට බාරගෙන 2022දි රටට සිදු වුණු දේම තමයි අද පක්ෂයට වෙමින් තිබෙන්නේ.

ප්‍රශ්නය – පොහොට්ටුවෙ බෙදාදීම ආණ්ඩුවට තර්ජනයක් නෙමෙයිද?

පිලිතුර- මම ආණ්ඩු පක්ෂ ප්‍රධාන සංවිධායක ලෙස පහුගිය අවුරුදු දෙකහමාරේදීම ඒ අභියෝගයට මුහුණ දුන්නා. අපිට අවශ්‍ය පාර්ලිමේන්තුවේ මන්ත්‍රීධූර 113යි. අපිට ඉතුරු මාස දෙක,තුන තුළ මේ ගමන යන්න පුළුවන්.අපිට සරල බහුතරය තියෙනවා.

ප්‍රශ්නය- අන්තිමට පොහොට්ටුවට කී දෙනෙක් ඉතුරු වෙයිද?

පිලිතුර- හරි තීන්දුවක් ගත්තොත් අපි පොහොට්ටුව එක්ක ඉන්නවා.වැරදි තීන්දුවක් ගත්තොත් දෙතුන් දෙනෙක් ඉතුරු වෙයි.

ප්‍රශ්නය- පොහොට්ටුවේ ඉන්න අය ජනාධිපතිවරයාට සහය දක්වන්න එකතු වෙන්න ඔබතුමන්ලා සමඟ සාකච්ඡා කරනවද?

පිලිතුර- අපි අපේ මතය කියනවා. එච්චරයි. පක්ෂයේ මතය එක්ක හිටපු ජාතික කැඳවුම්කරු රෝහිත අබේගුණවර්ධන මහතා කලුතර දිස්ත්‍රික්කයේ ජනතාවගේ කීම අහල අපිත් එක්ක එකතු වුණා. මහින්ද මහත්තයට ශක්තියක් වුණ එස්.එම් චන්ද්‍රසේන වගේ අත්දැකීම් තියෙන නායකයන් අද අපේ පැත්තට එනවා.

ඉදිරි ජනාධිපතිවරණය පිළිබඳව සාකච්ඡා කිරීම සඳහා පොදුජන පෙරමුණ මහනුවර රැජිණ හෝටලයේදී සංවිධානය කර තිබූ රැස්වීමක් අතරමග නතර කර දැමීමට සිදුවූ පුවතක් වාර්තා වෙයි.

ඒ එම රැස්වීම සඳහා පොදු ජන පෙරමුණේ මහජන නියෝජිතයින් අපේක්ෂා කළ පරිදි සහභාගී නොවීම මතයි.

පොදු ජන පෙරමුණේ ජාතික ලයිස්තු පාර්ලිමේන්තු මන්ත්‍රී රංජිත් බණ්ඩාර විසින් මෙම රැස්වීම සංවිධානය කර තිබූ අතර, ඒ රාජ්‍ය අමාත්‍ය ඉන්දික අනුරුද්ධ ගේ ප්‍රධානත්වයෙනි.

කෙසේ වුවත් මධ්‍යම පළාත් සභාවේ හිටපු මන්ත්‍රීවරුන් කිහිප දෙනෙකු සහ හිටපු ප්‍රාදේශීය සභා මන්ත්‍රීවරු කිහිපදෙනෙකු පමණක් ඊට සහභාගි ව සිට ඇත.

වැඩිදුරටත් වාර්තා වන ආකාරයට බලාපොරොත්තු වූ පරිදි ප‍්‍රාදේශීය දේශපාලඥයන් සහභාගී නොවීම මත මෙම රැස්වීම වේලාසනම අවසන් කිරීමටද කටයුතු කර ඇත.

ඉදිරි ජනාධිපතිවරණය සඳහා තරග කිරීම වෙනුවෙන් සමගි ජනබලවේගය පක්ෂයේ සභාපති ගම්පහ දිස්ත්‍රික් පාර්ලිමේන්තු මන්ත්‍රී ෆිල්ඩ් මාර්ෂල් සරත් ෆොන්සේකා වෙනුවෙන් ඇප මුදල් තැන්පත් කිරීම අද (05) සිදුවිය.

ඒ අනුව ඔහු ජනාධිපතිවරණයට ස්වාධීන අපේක්ෂකයකු ලෙස තරග වැදීමට නියමිතය.

සරත් ෆොන්සේකා 2010 වසරේ ද එවකට ජනාධිපති මහින්ද රාජපක්ෂ ගේ ප්‍රතිවාදී අපේක්ෂකයා ලෙස ජනාධිපතිවරණය සඳහා ඉදිරිපත් වූවත් එහිදී පරාජයට පත්විය.

මේ අතර ගම්පහ දිස්ත්‍රික් හිටපු පාර්ලිමේන්තු මන්ත්‍රීවරයෙක් වන සිරිපාල අමරසිංහ ද එළඹෙන ජනාධිපතිවරණයට තරග කිරීම සඳහා අද ඇප මුදල් තැන්පත් කළේය.

සිරිපාල අමරසිංහ ජනතා විමුක්ති පෙරමුණේ ගම්පහ දිස්ත්‍රික්කයේ හිටපු පාර්ලිමේන්තු මන්ත්‍රීවරයෙකි.

ඒකාබද්ධ වෘත්තිය සමිති කේන්ද්‍රය වෙනුවෙන් ස්වාධීන අපේක්‍ෂකයෙක් ලෙස ඔහු ජනාධිපතිවරණයට ඉදිරිපත් වීමට නියමිතය.

ඒ අනුව මේ වන විට 2024 ජනාධිපතිවරණය සඳහා අපේක්ෂකයින් 17 දෙනෙකු මේ දක්වා ඇප මුදල් තැන්පත් කර ඇති බව මැතිවරණ කොමිෂන් සභාව නිවේදනය කරයි.

විචාරකයන් පවසන්නේ මෙවර ජනාධිපතිවරණය වැඩිම අපේක්ෂකයන් සංඛ්‍යාවක් ඉදිරිපත් වූ මැතිවරණය විය හැකි බවයි.

කාලගුණ විද්‍යා දෙපාර්තමේන්තුව විසින් ප්‍රබල අකුණු පිළිබඳව අවවාදාත්මක නිවේදනයක් නිකුත් කරනු ලැබ තිබේ.

එහි දැක්වෙන්නේ, උතුරු සහ නැගෙනහිර පළාත්වලත් පොළොන්නරුව සහ බදුල්ල දිස්ත්‍රික්කවලත් අද (අගෝ. 5) සවස් කාලයේදී හෝ රාත්‍රී කාලයේදී තැනින් තැන ගිගුරුම් සහිත වැසි සමග ප්‍රබල අකුණු ඇතිවීමට වැඩි හැකියාවක් පවතින බව ය.

කාලගුණ විද්‍යා දෙපාර්තමේන්තුව සඳහන් කර ඇත්තේ, ගිගුරුම් සහිත වැසි ඇති වන විට එම ප්‍රදේශවල තාවකාලිකව තද සුළං ද ඇති විය හැකි බව ය.

ඒ හේතුවෙන් අකුණු පවතින අවස්ථාවල ආරක්‍ෂිත පියවර අනුගමනය කරන ලෙස එම දෙපාර්තමේන්තුව ජනතාවගෙන් ඉල්ලා සිටියි.

අදාළ පියවර පහතින් දැක්වේ.

බංගලාදේශ අග්‍රාමාත්‍ය ෂෙයික් හසීනා සිය ධූරයෙන් ඉල්ලා අස්වී රටින් පළා ගොස් ඇති බවට විදෙස් මාධ්‍ය පවසයි.

ඩකා අගනුවර පිහිටි ෂෙයික් හසීනාගේ නිල නිවසට දහස් ගණනක් විරෝධතාකරුවන් කඩා වැදී ඇති බව ද වාර්තා වෙයි

විදෙස් මාධ්‍ය පවසන්නේ, ධූරයෙන් ඉල්ලා අස්වූ අගමැතිනිය හෙලිකොප්ටරයකින් සිය සහෝදරිය සමග ඉන්දියාව බලා පිටත්ව ගොස් ඇති බව ය.

බංගලාදේශයේ පොලිසිය සහ ආණ්ඩු විරෝධී විරෝධතාකරුවන් අතර ඇති වූ ගැටුමකින් අවම වශයෙන් පුද්ගලයන් 90 දෙනෙකු ඊයේ (ජූලි 04) මිය ගොස් තිබේ.

මෙම නොසන්සුන්තාවයට හේතු වී ඇත්තේ, අග්‍රාමාත්‍ය ෂෙයික් හසීනා සිය ධූරයෙන් ඉවත් විය යුතු යැයි බල කරමින් ශිෂ්‍ය නායකයින් පිරිසක් සිවිල් අණ නොපිළිපැදීමේ ව්‍යාපාරයක් ප්‍රකාශයට පත් කිරීමෙන් පසුව ය.

සිවිල් සේවා රැකියා සඳහා වන කෝටා ක්‍රමය අහෝසි කරන ලෙස ඉල්ලා ජූලි මාසයේදී මෙම ශිෂ්‍ය විරෝධතාව ආරම්භ වූ අතර එය මේ වන විට පුළුල් ආණ්ඩු විරෝධී ව්‍යාපාරයක් බවට පත් ව ඇත.

තම නිවාස ගිනිබත් වුණෙත් අතුකෝරළ මන්ත්‍රීවරයාට සිය ජිවිත පුජා කිරිමට සිදු වුවේත් නාමල් රාජපක්ෂ මන්ත්‍රිවරයා ඇතුළු පිරිසේ වැරදි වැඩ හේතුවෙන් බව පාර්ලිමේන්තු මන්ත්‍රි එස්.එම්.චන්ද්‍රසේන පවසයි.

මන්ත්‍රීවරයා මේ බව සඳහන් කර සිටියේ අනුරාධපුර දිස්ත්‍රික්කයේ පොදුජන පෙරමුණ පක්ෂයේ නියෝජිත හමුවකදී ය.

එහිදී ඔහු වැඩිදුරටත් මෙසේද පැවසීය.

“නාමල් රාජපක්ෂ මන්ත්‍රිතුමා ඉතිහාසය දන්නේ නැහැනේ.2005 ජනාධිපතිවරණයට එතුමාගේ පියාට ජනාධිපති අපේක්ෂකත්වය නොදි ඉන්න චන්ද්‍රිකා බණ්ඩාරනායක මැතිණිය සුදානම් වුණ අවස්ථාවේදි මම තමයි ඉස්සරලාම යෝජනා කළේ මහින්ද රාජපක්ෂ මහතාගේ නම.”

“ඒ වේලාවේ මම දැඩි අපහසුතාවයකට පත්වුණා.චන්ද්‍රිකා මැතිනිය මට ජනාධිපති මන්දිරයට එන්න කියලා දැඩිලෙස දෝෂාරෝපණය කළා. ඒ විතරක් නෙමෙයි. එතුමාගේ බාප්පා ජනාධිපති කරන්නත් මම උපරිම උදව් කළා.

ශේහාන් සේමසිංහ ඇතුළු මන්ත්‍රිවරැන්ගේ ගෙවල් ගිනි ගත්ත එක හොදයි කියලා නාමල් රාජපක්ෂ මහත්තයා කියනවා අපි අහගෙන හිටියා. එයාලගේ වැරදි වැඩ නිසා තමයි අපිට ඒ වගේ තත්වයන්වලට මුහුණ දෙන්න සිද්ධ වුණේ. නාමල් රාජපක්ෂ මහත්තයලගේ වැරදි වැඩ නිසා තමයි අතුකෝරළ මන්ත්‍රී තුමා වැනි අයට ඒදා ජිවිතය පුජාකරන්න සිද්ධ වුනේ. ඒදා අරගලය දවසේම රැස්විම් පවත්වලා ඒ කරපු කටයුත්ත නිසයි අපට ඒ තත්වයට මුහුණ දෙන්න සිද්ධ වුනේ.”

“ මම කියනවා නාමල් රාජපක්ෂ මහත්තයට අනුරාධපුර දිස්ත්‍රික්කයේ මගේ පුරප්පාඩුව නම් පුරවන්න හම්බ වෙන්නේ නැහැ.” තමාගේ පුරප්පාඩුව පිරවිමට තමාම සිටිය යුතු බවද පර්ලිමේන්තු මන්ත්‍රි එස්.එම්.චන්ද්‍රසේන මහතා මෙහිදි පැවසිය.

නාමල් රාජපක්ෂ මන්ත්‍රි තුමා මට අභියෝග කරන්න රැස්විමක් තියලා තිබුණා.මන්ත්‍රිවරැ දහයක් විතර හිටියා.මේක දේශපාලනය නෙමෙයි.නැවත කල්පනා කරලා බලලා තියපු කකුල ආපස්සට අරන් රනිල් වික්‍රමසිංහ ජනාධිපති තුමත් එක්ක එකතු වෙලා ඊලග මැතිවරණය ජයග්‍රහණය කරන්න කටයුතු කරන්න”.

ජනාධිපති රනිල් වික්‍රමසිංහගේ ජය තහවුරු කිරීම සදහා කටයුතු කලයුතු බවට වන යෝජනාව පුත්තලම් දිස්ත්‍රික් බල මණ්ඩලයේ දී අද(4) ඒකමතිකව සම්මතව ඇති බව වාර්තා වෙයි.

පොදුජන පෙරමුණේ දිස්ත්‍රික් බල මණ්ඩලය නව සන්ධානයේ මෙහෙයුම් නායක කුරුණෑගල දිස්ත්‍රික් පාර්ලිමේන්තු මන්ත්‍රී හිටපු අමාත්‍ය අනුර ප්‍රියදර්ශන යාපා ගේ ප්‍රධානත්වයෙන් පොදුජන පෙරමුණේ පුත්තලම් දිස්ත්‍රික් නායක හිටපු අමාත්‍ය පාර්ලිමේන්තු මන්ත්‍රී පියංකර ජයරත්න ගේ මාදම්පේ පිහිටි නිවසේදී පැවැත්විණි.

මේ සඳහා පාර්ලිමේන්තු මන්ත්‍රීවරුන් වන ජගත් ප්‍රියංකර, අලි සබ්‍රි රහිම් ද එක්ව සිටි අතර අරුන්දික ප්‍රනාන්දු රාජ්‍ය අමාත්‍යවරයා විදේශ ගතව සිටින බැවින් මේ සදහා සහභාගී නොවීය. පොදුජන පෙරමුණේ අභ්‍යන්තර ආරංචි මාර්ග සඳහන් කරන්නේ ඔහුද මෙම තීන්දුව සඳහා එකඟතාව පළකර ඇති බවය.

ඒ අනුව පුත්තලම් දිස්ත්‍රික්කයේ ආණ්ඩුවට සහයෝගය ලබාදුන් පාර්ලිමේන්තු මන්ත්‍රීවරුන් 6 දෙනා අතරින් සිව් දෙනෙකු මෙම බල මණ්ඩලය නියෝජනය කිරීමද විශේෂත්වයක්.

ඊට අමතරව වයඹ පලාත් සභාව නියෝජනය කල හිටපු පලාත් අමාත්‍ය සන්ධ්‍ය කුමාර රාජපක්ෂ ඇතුළු පිරිසක්ද පලාත් පාලන ආයතන නියෝජිතයින් විශාල පිරිසක්ද මේ අවස්ථාවට එක්ව සිටියහ.

පොදුජන පෙරමුණේ මාතලේ දිස්ත්‍රික් බලමණ්ඩලය අද (04) දඹුල්ලෙදි රැස්වී ජනාධිපති රනිල් වික්‍රමසිංහ වෙනුවෙන් ඉදිරි ජනාධිපතිවරණයේ දී සහය පලකිරීමට ඒකමතිකව තීරණය කරන ලැබුණි.

පාර්ලිමේන්තු මන්ත්‍රී , දිස්ත්‍රික් නායක ජනක බණ්‌ඩාර තෙන්නකෝන් ගේ ප්‍රධානත්වයෙන් , ක්‍රිඩා හා යෞවන කටයුතු රාජ්‍ය අමාත්‍ය රෝහණ දිසානායක ගේ හා ආරක්ෂක රාජ්‍ය අමාත්‍ය ප්‍රමිත බණ්‌ඩාර තෙන්නකොන් ගේ සහභාගිත්වයෙන් එම අවස්ථාව සංවිධානය කර තිබිණ.

මෙම බලමණ්ඩල හමුව සඳහා මාතලේ දිස්ත්‍රික්කයේ පොදුජන පෙරමුණ නියෝජණය කරන සියලු ආසන සංවිධායකයන් සහ කැඳවුම්කරුවන්, හිටපු පළාත් සභා අමාත්‍යවරුන් සහ මන්ත්‍රීවරුන්, හිටපු පලාත් පාලන ආයතන ප්‍රධානීන්, නියෝජිතයන් සහ පළාත් පාලන ආයතන අපේක්ෂකයන් සහ පක්ෂයේ දිස්ත්‍රික් අනුබද්ධ සංවිධාන ප්‍රධානීන් රැසක් සහභාගීව සිටියහ.

පරදින බව දැනගෙනම පොදුජන පෙරමුණෙන් අපේක්‍ෂකයෙකු ඉදිරිපත් කරන්නේ ඩීල් එකකට බවත් පොදුජන පෙරමුණ දෙකඩ කළේ ජනාධිපතිරයාට සහාය පළ කරන පිරිස නොව පාක්ෂිකයන් පිළිබඳව කිසිදු තැකීමක් නැති සිය පෞද්ගලික අවශ්‍යතාවයන් වෙනුවෙන්ම පෙනී සිටින සුළු පිරිසක් බවත් අමාත්‍ය ප්‍රසන්න රණතුංග පවසයි.

අමාත්‍යවරයා පෙන්වා දෙන්නේ පාක්ෂිකයන් ගැන නොසලකන මේ සුළු පිරිස පක්ෂය මුදලට පාවා දුන් බවයි‍.

රත්නපුර දිස්ත්‍රික්කයේ පළාත් පාලන නියෝජිතයන් සමඟ පැවැති සාකච්ඡාවකින් අනතුරුව මාධ්‍යවේදීන් මතුකළ ප්‍රශ්න වලට පිළිතුරු දෙමින් ඇමතිවරයා මේ බව සඳහන් කළේය.

මෙහිදී මාධ්‍යවේදීන් මතු කළ ප්‍රශ්න සහ පිළිතුරු මෙසේය,

ප්‍රශ්නය – චෝදනාවක් තියෙනවා ඔබතුමා පක්ෂය කැඩුවා කියලා. පක්ෂය කැඩුවේ ඇයි?

පිළිතුර – මම තමයි පක්ෂය ඒකරාශී කරගෙන මේ ගමන යන්න උත්සාහ කරන්නේ. එහෙම කැඩුවා නම් කැඩෙන්නේ 2022 රනිල්ව පත් කර ගන්නේ නැතිව ඩලස්ව පත් කරගන්න තිබුනා. එහෙම කරේ නැත්තේ රට ගැන හිතලා පක්ෂය ඒකරාශී කරගෙන යන වැඩපිළිවෙලක් තමයි යෝජනා කරන්නේ.

ප්‍රශ්නය – රනිල් වික්‍රමසිංහට කඩේ යනවද?

පිළිතුර – එතුමට කඩේ යන්න අවශ්‍ය නෑ. එතුමා අභියෝග භාරගත්තා. සජිත් ප්‍රේමදාස, හර්ෂ මන්ත්‍රීතුමා එහෙම මුදල් අමාත්‍යාංශයේ ලේකම් එක්ක කතා කරලා රට තියෙන්නේ අවධානම් තත්ත්වයක බාරගන්න බෑ කියලා කිව්වා. මතක ඇති Twitter එකෙත් දැම්මා. එහෙම කියපු වෙලාවක රට බේරගත්ත නායකයාට කඩේ ගියාට වැරැද්දක් නෑ. එහෙම යන්න මිනිස්සු කැමති නිසයි ඒකමතිකව මේ තීන්දුව ගත්තේ.

ප්‍රශ්නය – ඔබතුමාට ආසන සංවිධායකකම නැති වෙනවා. ඒ ගැන දුකක් නැද්ද? ඔබතුමාලා අවදානමක් නේද ගන්නේ. රනිල් වික්‍රමසිංහ පැරදුනොත් ?

පිළිතුර – මම ඒ අවදානම ගත්තේ අද ඊයේ නෙවෙයි. එදා මහින්ද සුළගෙදිත් ශ්‍රී.ල.නි.ප ට විරුද්ධව මම ඔය තීන්දුව ගත්තා. අදත් මම ඒ තීන්දුව ගන්නවා. මොකද රට වෙනුවෙන් ගන්න තීන්දුවක් නරක් වෙන්නෑ.

ප්‍රශ්නය – ඔබතුමා දිස්ත්‍රික් නායකකමින් අයින් කරනවා කියලත් කිව්වා. ඇත්තටම උදයංග වීරතුංග කියන්නේ කවුද?

පිළිතුර – මෙහෙමයි, මාධ්‍ය මිනිහා උස්සලා ගද්දී මිනිහා වීරයා වෙනවා. නාමල් රාජපක්ෂලත් කියනවා ඔහු බොරු කියන්නේ කියලා. චමල් ඇමතිතුමා කියනවා ඔහු පිස්සෙක් කියලා. ඉතින් මම මොකටද ඕක ගැන කතා කරන්නේ. පවුලේ අයම කියනවා ඒ කාරණා. මම ඕවට උත්තර දෙන්න ඕන නෑ. දිස්ත්‍රික් නායකකමින් මාව ඉවත් කරනවා කියලා කියනවා. කවදාවත් මට දිස්ත්‍රික් නායකත්වයවත් ආසන සංවිධායකකමවත් දීලා තිබ්බේ නෑ. දීලා තිබුනේ කැඳවුම්කරු කියලා. මහ ඇමති තනතුර අතෑරපු මට ඕවා අතාරින එක මහ ලොකු දෙයක් නෙවෙයි.

ප්‍රශ්නය – පොහොට්ටුවෙන් අපේක්ෂකයෙක් අන්තිම මොහොතේ දැම්මේ කොහොමද?

පිළිතුර – ඒක දාපු අයගෙන් අහන්න ඕන. එතැන වෙන ඩීල් යනවා. සමහරු හිතනවා එයා ඉදිරිපත් වෙනවා කියලා. ජනාධිපතිතුමා පරද්දන්න පරදින බව දැන දැන පොහොට්ටුවෙන් කෙනෙක් එවනවා. ඊළඟට පාර්ලිමේන්තු මැතිවරණයේදී යනවා සජිත් ගේ පිලට. ගිහින් ඇමතිකම් ගන්නවා. මොකද රනිල් පැරැද්දුවේ එයා කියලා හිතලා. රට ගැන හිතලා නෙවේ හැමෝම වැඩ කරන්නේ පුද්ගලවාදී දේශපාලනයක් තුලයි. එතනයි මේ රටට වරදින තැන.

ප්‍රශ්නය – මේ පරම්පරා ගත දේශපාලනය ඉවර කරලා මේ රට ඔබතුමාලා අතට ගන්න බැරිද?

පිළිතුර – හැමදාම මගේ පරමාදර්ශී නායකයා මහින්ද රාජපක්ෂ මැතිතුමා. නමුත් අද තත්ත්වය වෙනස්. ආර්ථික අර්බුදයෙන් රට බේරගත්ත නායකයාට දේශපාලන වේදිකාවක් හැදිලා තියෙනවා. සාම්ප්‍රදායික දේශපාලනය අපි වෙනස් කරලා තියෙනවා. UNP, ශ්‍රී.ල.නි.ප, මුස්ලිම් නායකයෝ මේ වේදිකාවට එකතු වෙනවා. මේ රටේ 77න් විශේෂයෙන්ම 94 න් පස්සේ මැතිවරණ තියද්දි සන්ධානගත දේශපාලන නායකයෝ තමා මේ රටේ බලය ගත්තේ. ඉතින් අද ඒ බලය රනිල් වික්‍රමසිංහ මහතාට එකතු වෙලා තියෙනවා. ඒක හොඳ ලකුණක්. රට ජාතිය ගැන හිතලා භේදයකින් තොරව වැඩ කරන්න තැනක් හැදිලා තියෙනවා.

ප්‍රශ්නය – පුළුල් සංන්ධානයකින්ද එන්නේ

පිලිතුර – මෙතුමා ස්වාධීන අපේක්ෂකයෙක් අනෙකුත් දේශපාලන පක්ෂ ඔහුවටා එකතු වෙනවා.

ප්‍රශ්නය – අද මේ රැස්වීමට සහභාගී වෙලා මේ තීරණ ගන්නේ කවුද?

පිලිතුර – මෙතනට ආවේ පළාත් පාලන මන්ත්‍රීවරු පමණයි. ඔවුන් එක හඬින් කිව්වේ මැතිවරණයේදී රනිල්ට සහය දෙන්න කියලා.

ප්‍රශ්නය – පොදුජන පෙරමුණේ තව එකතු වෙන්න අය ඉන්නවද?

පිලිතුර – සංඛ්‍යාත්මකව කියන්න බෑ. හෙට අනිද්දට නොහිතන අයත් එකතු වෙනවා අපිත් එක්ක.

– ප්‍රදීප් අනුර කුමාර

මව්බිම ජනතා පක්‍ෂයේ නායක දිලිත් ජයවීර සර්වජන බලය සන්ධානයේ ජනාධිපති අපේක්‍ෂකයා ලෙස නම් කර ඇත.

ඒ එම සන්ධානයේ ජාතික සමුළුව කොළඹ සුගතදාස ගෘහස්ථ ක්‍රීඩාගංගණයේ අද (04) පැවැත්වූ අවස්ථාවේදීය.

මෙහි වඩාත් සුවිශේෂ කරුණක් වන්නේ ශ්‍රී ලංකා පාර්ලිමේන්තුව නියෝජනය කරන ජ්‍යෙෂ්ඨ දේශපාලන‍ඥයන් කිහිපදෙනකු සර්ව ජනබලය සන්ධානය නියෝජනය කරන පසුබිමක මීට පෙර ප්‍රාදේශීය සභාවක් හෝ නියෝජනය කර නොමැති ජයවීර මහතා ජනාධිපති අපේක්ෂකත්වය ලැබීමය.

මේ සම්බන්ධයෙන් අදහස් දක්වමින් සමාජ මාධ්‍ය ක්‍රියාකාරීන් පවසන්නේ රොටී කමින් ව්‍යවසායකත්ව සමාජයක් ගැන කියූ කතා වැඩකර ඇති බවය. එසේම දිලිත් ජයවීර ජනාධිපති අපේක්ෂකත්වය ලැබීමට පෙර සිට ජවිපෙ ප්‍රමුඛ මාලිමාවේ දේශපාලනය දැඩිව විවේචනය කළ බවත් ජනාධිපතිවරණ ප්‍රචාරක කටයුතු කාල සීමාව තුළ එම තත්ත්වය තවදුරටත් වැඩිවනු ඇති අතර එය මාලිමාවේ ජනාධිපති ධූර අපේක්ෂක අනුර දිසානායක ට අවාසි සහගත තත්ත්වයක් නිර්මාණය කරනු ඇති බවත් ය. එසේම දැඩි ජවිපෙ හා මාලිමාවේ විවේචකයකු වන විමල් වීරවංශ මන්ත්‍රීවරයා ද මෙම සර්ව ජන බලය සන්ධානයේ විධායක කමිටුව නියෝජනය කරන බවද ඔවුන් සිහිපත් කරයි.

ශ්‍රී ලංකා පොදුජන පෙරමුණේ ජාතික කැඳවුම්කරු රෝහිත අබේගුණවර්ධන ද ජනාධිපතිවරණයේදී ජනාධිපති රනිල් වික්‍රමසිංහ ට සහයෝගය දැක්වීමට තීරණය කර තිබේ.

කළුතර දිස්ත්‍රීක් ජනතාව, දේශපාලන අධිකාරිය ඇතුළු සියලුම නාගරික, ප්‍රාදේශීය මන්ත්‍රීතුමන්ලාගේ බලවත් ඉල්ලීම හේතුවෙන් මෙම තීරණය ගත් බවත්, ජනාධිපතිවරණයේදී රනිල් වික්‍රමසිංහ ගේ ජයග්‍රහණය වෙනුවෙන් කැපවී ක්‍රියාකිරීමට තීරණය කළ බවත් ඔහු සඳහන් කළේය.

කළුතරදී අද පෙරවරුවේ විශේෂ ජන හමුවකදී ඔහු මෙසේ සඳහන් කළේය.

"රට මේ ඉදිරියට යන ගමන ජනතා විමුක්ති පෙරමුණට මේ රට දෙනවද ? උදේ කියන එක හවස දන්නේ නැති වැඩිපුර කථා කරන සජිත්ට 22 වෙනිදාට මේ රට දෙනවද ? මේ කයිය නායකවරුන්ට රට දෙනවද ? රට වෙනුවෙන් තීන්දුවක් ගන්වද ? ඒ නිසා ඔබට ඇහුම්කං දීලා, රටට ඇහුම්කං දීලා මම ඔබේ මතයට හිස නමමින් රනිල් වික්‍රමසිංහ ජනාධිපතිවරයා මේ රටේ ජනාධිපති කරනවන වැඩපිළිවෙළට මම ලෑස්ති වෙනවා."

රට යළි ගොඩ නැගීම සඳහා ජනාධිපති රනිල් වික්‍රමසිංහ ගෙනයන වැඩපිළිවෙළට තවදුරටත් සහාය දැක්විය යුතු බවටත්, ඒ වෙනුවෙන් ඉදිරි ජනාධිපතිවරණයේදී ඔහුට සහාය දැක්විය යුතු බවටත් අද (03) රැස්වූ පොදුජන පෙරමුණේ වාරියපොල ආසනයේ බල මණ්ඩලය යෝජනා සම්මත කර ගෙන ඇත.

රාජ්‍ය අමාත්‍ය ඩී.බී. හේරත් විසින් පොදුජන පෙරමුණේ වාරියපොළ ආසන සංවිධායක ලෙස ඉදිරි ජනාධිපතිවරණය පිළිබඳ සාකච්ඡා කිරීම සඳහා මෙම ආසන බල මණ්ඩල රැස්වීම අද පෙරවරුවේ කැඳවා තිබිණ.

මේ සඳහා වාරියපොළ ප්‍රාදේශීය සභාව නියෝජනය කළ හිටපු මන්ත්‍රීවරුන්, වාරියපොළ සමූපකාර අධ්‍යක්ෂ මණ්ඩලය, කොට්ඨාස කැඳවුම්කරුවන්, ආගමික නායකයින් ඇතුළු සියළු දේශපාලනික ක්‍රියාකාරිකයින් සහභාගී වූ බව වාර්තා වේ.

කුරුණෑගල දිස්ත්‍රික් නායක ජොන්ස්ටන් ප්‍රනාන්දු මෙතෙක් ජනාධිපතිවරයාට සහාය දැක්වීමට තීරණය කර නොමැති අවස්ථාවක මෙම තීන්දුව සුවිශේෂී බව දේශපාලනික විචාරකයින්ගේ මතය වී තිබේ.

තරුණ තරුණියන්ට රැකියා ලබාදීමේ වැඩපිළිවෙළ ලබන වසරේ සිට ආරම්භ කරන බවත් රාජ්‍ය අංශයේ මෙන්ම පෞද්ගලික අංශයේ ද නව රැකියා අවස්ථා ඔවුන් වෙනුවෙන් උදාකරදීම තම අරමුණ බවත් ජනාධිපති රනිල් වික්‍රමසිංහ පැවසීය.

කොවිඩ් වසංගතය සහ ආර්ථික කඩා වැටීම හමුවේ ඉකුත් වසර 04 පුරා මෙරට තරුණ තරුණියන්ට රැකියා ලබාදිමට නොහැකි වූ බව පෙන්වා දුන් ජනාධිපතිවරයා රට බංකොළොත්භාවයෙන් නිදහස් කර ගැනීමත් සමඟ නව රැකියා අවස්ථාවන් බිහි කිරීමේ වැඩසටහන් ක්‍රියාත්මක කරමින් රට ඉදිරියට ගෙන යාමේ අවස්ථාව උදා වී ඇති බවද කියා සිටියේය.

ජනාධිපති රනිල් වික්‍රමසිංහ මේ බව සඳහන් කර සිටියේ යාපනය වාලම්පූරි හෝටලයේ ඊයේ (02) පැවති තරුණ හමුවට එක් වෙමිනි.

“දීප්තිමත් අනාගතයත් සඳහා වූ ගමනක්” මැයෙන් සංවිධානය කර තිබු මෙම හමුවට යාපනය දිස්ත්‍රික්කයේ තරුණ තරුණියන් විශාල පිරිසක් එක්ව සිටියහ.

මෙහිදී අදහස් දැක්වූ ජනාධිපතිවරයා වැඩිදුරටත් සඳහන් කළේ තරුණ තරුණියන්ගේ අපේක්ෂාවන් රජය කිසිවිටෙකත් අමතක කර නොමැති බවයි.

මූල්‍ය ගැටලු හමුවේ වුවද ගුරු පුරප්පාඩු පිරවීම වෙනුවෙන් මේ වසරේ රජය මුදල් වෙන් කළ බව සඳහන් කළ ජනාධිපති රනිල් වික්‍රමසිංහ ගුරුවරුන් බඳවා ගැනීම වෙනුවෙන් ලබන වසරේ වැඩි මුදලක් ලබා දීමට කටයුතු කරන බවද කියා සිටියේය.

එමෙන්ම ස්වයං රැකියාවල නිරත වීමට කැමති තරුණ තරුණියන් වෙනුවෙන් සහනාධාර ණය ක්‍රමයක් හඳුන්වා දී තිබෙන බවත්, කෘෂි නවීකරණ වැඩපිළිවෙළ සමඟ සම්බන්ධ වෙමින් ඉදිරියට යාමට ද තරුණ තරුණියන්ට අවස්ථාවට උදාකර දෙන බවත් ජනාධිපතිවරයා සඳහන් කළේය.

තරුණ තරුණියන් ඉදිරිපත් කළ ප්‍රශ්න කිහිපයකට ද මෙහිදී සාධනීය පිළිතුරු ලබා දුන් ජනාධිපතිවරයා ඔවුන්ගේ තොරතුරු විමසමින් සුහද කතා බහකට එක්විමට ද අමතක නොකළේය.

මෙහිදී තරුණයෙකු මතු කළ ප්‍රශ්නයකට පිළිතුරු ලබා දෙමින් ජනාධිපති රනිල් වික්‍රමසිංහ මහතා වැඩිදුරටත් කියා සිටියේ ඉදිරියේ දී පෞද්ගලික අංශයේ රැකියා සඳහා බඳවා ගැනීමේ දී පළපුරුද්ද පිළිබඳ නොතකා එම බඳවා ගැනීම් සිදු කරන ලෙස පෞද්ගලික අංශයෙන් ඉල්ලා සිටීමට කටයුතු කරන බවයි.

උතුරු පළාත් ආණ්ඩුකාර පී.එස්.එම්. චාර්ල්ස් , රාජ්‍ය අමාත්‍යවරුන් වන ආචාර්ය සුරේන් රාඝවන්, කාදර් මස්තාන් , පාර්ලිමේන්තු මන්ත්‍රී අංගජන් රාමනාදන්, ජනාධිපති කාර්ය මණ්ඩල ප්‍රධානි හා ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සාගල රත්නායක, හිටපු අමාත්‍ය රවී කරුණානායක , හිටපු රාජ්‍ය අමාත්‍ය විජයකලා මහේෂ්වරන් යන මහත්ම මහත්මීන් ඇතුළු පිරිසක් මෙම අවස්ථාවට එක්ව සිටියහ.

රත්නපුර දිස්ත්‍රික්කයේ පොදුජන පෙරමුණ නියෝජනය කරන පාර්ලිමේන්තු මැති ඇමතිවරුන් බහුතරය මෙන්ම , හිටපු පළාත් සභා හා පළාත් පාලන මන්ත්‍රීවරුන් සියලු දෙනා, එළැඹෙන ජනාධිපතිවරණයේදී ජනාධිපති රනිල් වික්‍රමසිංහ ට සහාය පළ කිරීමට තීරණය කර ඇත.

ආණ්ඩු පක්ෂ ප්‍රධාන සංවිධායක අමාත්‍ය ප්‍රසන්න රණතුංගගේ ප්‍රධානත්වයෙන් අද (03) රත්නපුර ශ්‍රී රම්‍යා හෝටලයේ පැවැති සාකච්ඡාවකදී එම පක්ෂ මහජන නියෝජිතයන් මෙම තීරණයට එළඹ තිබේ.

අද පැවති සාකච්ඡාව සඳහා රත්නපුර දිස්ත්‍රික්කය නියෝජනය කරන පොදුජන පෙරමුණේ පාර්ලිමේන්තු මන්ත්‍රීවරු 08න් හතර දෙනෙකු පැමිණ සිටියහ.

ඒ ජානක වක්කුඹුර, ප්‍රේමලාල් ජයසේකර, අකිල් එල්ලාවල සහ මුදිතා ප්‍රිශාන්ති මන්ත්‍රීවරියයි.

පොදුජන පෙරමුණෙන් තේරී පත් වූ ශ්‍රී ලංකා නිදහස් පක්ෂය නියෝජනය කරන ජෝන් සෙනෙවිරත්න මන්ත්‍රීවරයා දැනටමත් ජනාධිපති රනිල් වික්‍රමසිංහ ට සහාය පළ කරන බව පවසා තිබේ.

මේ අතර වාර්තා වන්නේ පොදුජන පෙරමුණ පක්ෂයෙන් තරග කළ ගාමිණි වලේබොඩ මන්ත්‍රීවරයා දැනට සජිත් ප්‍රේමදාස ට එකතු වීමේ සුදානමක සිටින බවත් ආසන සංවිධායක ධූරයේ ගැටළුවක් නිසා එය ප්‍රමාද වී ඇති බවත් ය.

වාසුදේව නානායක්කාර මන්ත්‍රීවරයා මේ වනවිට අසනීප තත්ත්වය නිසා ඔහු නායකත්වය දැරෑ ප්‍රජාතන්ත්‍රවාදී වමාංශික පෙරමුණ නායකත්වයෙන් ඉවත්ව ක්‍රියාකාරී දේශපාලනයෙන්ද ඈත්ව සිටියි.

රත්නපුරේ පොහොට්ටු දිස්ත්‍රික් නායිකාව වන පවිත්‍රා වන්නිආරච්චි තවමත් තීන්දුවක් ගෙන නොමැති නමුත් පසුගියදා ඇය නායකත්වය ලබාදෙන පැල්මඩුල්ල ආසනයේ පැවැති සිය ක්‍රියාකාරී හමුවකදී ජනාධිපති රනිල් වික්‍රමසිංහට මහතාට සහාය පල කිරීමට බලකෙරී ඇත.

එහිදී සිදුකළ රහස් මත විමසුමේදී සාතිශය බහුතරය එම මතය නියෝජනය කර ඇති බවද වාර්තා වෙයි.

මේ අතර අද පැවැති සාකච්ඡාවේදී අනාවරණය වූයේ රත්නපුර දිස්ත්‍රික්කයේ පොහොට්ටු සංවිධායකවරු 08 දෙනාගෙන් 07 දෙනෙකුම ජනාධිපති රනිල් වික්‍රමසිංහ ට සහාය පළ කරන බවයි.

රත්නපුර දිස්ත්‍රික්කයේ පාලන ආයතන සංඛ්‍යාව 16කි. ඒ මහ නගර එකක්, නගර සභා දෙකක් සහ ප්‍රාදේශීය සභා 13ක් ලෙසයි. රත්නපුර දිස්ත්‍රික්කයේ පළාත් පාලන ආයතන නියෝජනය කරන පොහොට්ටුවේ සාමාජිකයන් සහ මන්ත්‍රීවරුන් සංඛ්‍යාව 160යි. ඉන් 150ක්ම මෙම සාකච්ඡාවට සහභාගී වූහ.

රත්නපුර දිස්ත්‍රික්කයේ පොහොට්ටුවේ සාමාජිකයන් වන පළාත් සභා මන්ත්‍රීවරුන් සංඛ්‍යාව 06කි. ඔවුන් සියළු දෙනාම මෙම රැස්වීමට සහභාගී වී සිටියහ.

මෙම සාකච්ඡාවේදී අදහස් දැක්වූ ඇමති ප්‍රසන්න රණතුංග කියා සිටියේ තමන් තවමත් පොදුජන පෙරමුණ පක්ෂයේ සාමාජිකයකු බවයි.

කිසිසේත් පොහොට්ටුව අත්නොහරින බවත් එක්සත් ජාතික පක්ෂයට නොයන බවත් පැවසු ඇමතිවරයා තමන් මෙය හෘද සාක්ෂියට එකඟව ගත් තීරණයක් නිසා පක්ෂය ගනු ලබන ඕනෑම ක්‍රියාමාර්ගයකට මුහුණ දීමට සුදානම් බවද සඳහන් කළේය.

පක්ෂය යනු පාක්ෂිකයන් බවත් පාක්ෂික මතයට කන් නොදී පුද්ගලික මතයන්ට ඉඩ දි කටයුතු කළහොත් එවැනි පක්ෂවලට පැවැත්මක් නැති බව පැවැසූ ඇමතිවරයා පක්ෂය දැන්වත් පාක්ෂිකයන්ගේ හඩට කන්දිය යුතු බව අවධාරණය කළේය.

“මම රනිල්ගේ ගොට්ටෙක් නෙමෙයි. මම තවමත් හදවතින් පොහොට්ටුවේ. මහින්ද මහත්තයා තවමත් මගේ පරමාදර්ශී නායකයා. පක්ෂය දෙකඩ වුනොත් වාසිය කාටද කියලා මම හොඳට දන්නවා. එහෙමයි කියලා මැයි 09 වැනිදා වෙච්ච දේ ආයෙත් අපේ පාක්ෂිකයන්ට වෙන්න දෙන්න බෑ.” යැයිද ඇමතිවරයා මෙහිදී අවධාරණය කළේය.

රැස්වීම ඇමතූ රාජ්‍ය අමාත්‍ය ජානක වක්කුඹුර සඳහන් කළේ මෙම රැස්වීමට කැඳවුයේ පොහොට්ටුවේ පක්ෂ සාමාජිකත්වය දරණ මහජන නියෝජිතයන් පමණක් බවයි.

දේශපාලන අත්දැකීමක් නැති අයෙකුට පොහොට්ටුවේ ජනාධිපති අපේක්ෂකත්වය ලබා දීමට තමන් දැඩි ලෙස විරුද්ධ ලෙස පැවසූ රාජ්‍ය අමාත්‍යවරයා රට බේරාගත් නායකයාට තමන්ගේ තිබෙන ආදරයේ වෙනසක් නොමැති වුවත් මේ මොහොතේ ජනාධිපති රනිල් වික්‍රමසිංහ ට සහාය පළ කිරීම හැර පොහොට්ටු පාක්ෂිකයන් රැකීමට වෙනත් වැඩපිළිවෙලක් නොමැති බවද කීවේය.

“ඕබේ මතය අපේ මතය ජනතාවගේ මතය රනිල්ට. 29 වැනිදා වෙනකන් පක්ෂයේ බහුතර මතය තිබුණේ ඉදිරි වසර පහත් මේ රට පාලනය කරන්න රනිල් වික්‍රමසිංහ ජනාධිපතිවරයාට දෙන්නයි. නමුත් 29 වැනිදා දේශපාලන මණ්ඩලය කියලා අපි නොදන්නා මිනිස්සුන් ගෙනල්ලා ඒ තීන්දුව වෙනස් කළා. අපි අපේ තීන්දුව ගත්තේ අපේ නායකයා වන මහින්ද රාජපක්ෂ ජනාධිපතුමාව දැනුවත් කරලයි. එතුමා හිටියෙත් අපේ මතයේ. අපේ දිස්ත්‍රික් නායිකාව පවිත්‍රා ඇමතිතුමිය ගතින් එතැන සිටියත් හිතින් අපේ ළඟයි.

පළාත් සභා මැතිවරණය පරණ ක්‍රමයට තියන්න අපි තීරණය කරලා තියෙනවා. ජනාධිපතිවරණයෙන් පස්සේ අපි ඒ සඳහා අවශ්‍ය පියවර ගන්නවා. පළාත් පාලන මැතිවරණය ඉක්මනින් තියලා ඔබේ ප්‍රශ්න විසඳනවා.”

මෙහිදී අදහස් දැක්වූ ප්‍රේමලාල් ජයසේකර රාජ්‍ය ඇමතිවරයා සඳහන් කළේ පක්ෂය කුමන තීන්දුවක් ගත්තද තමන් රනිල් වික්‍රමසිංහ ට සහාය පළ කරන බවයි. ගෙවි ගිය වසර දෙක තුළ රට වෙනුවෙන් ඔහු කළ සේවය අගයමින් මෙය සිදුකරන බවද රාජ්‍ය ඇමතිවරයා කීවේය.

රත්නපුර දිස්ත්‍රික් සම්බන්ධිකරණ කමිටුවේ සභාපති පාර්ලිමේන්තු මන්ත්‍රී අකිල එල්ලාවල සඳහන් කළේ කවුරු කුමක් කීවද රත්නපුර පොහොට්ටුව රනිල් වික්‍රමසිංහ ට සහාය පළ කරන බවයි.

මේ වනවිට පොහොට්ටුවේ සියයට 95ක් ජනාධිපති රනිල් වික්‍රමසිංහ සමඟ බවත් ඉතිරි සියයට 05ද හෙට අනිද්දාම රනිල්ට වික්‍රමසිංහ මහතාට සහාය පල කිරීමට එනු ඇතැයි අපේක්ෂා කරන බවද මන්ත්‍රීවරයා කීවේය.

රැස්ව සිටි රත්නපුර දිස්ත්‍රික්කයේ සියළුම පාර්ලිමේන්තු, පළාත් සභා සහ පළාත් පාලන පොහොට්ටු මහජන නියෝජිතයන් අත ඔසවා ඉදිරි ජනාධිපතිවරණයේදී රනිල් වික්‍රමසිංහ ට සහාය පළ කරන බවට ප්‍රතිඥා දුන්හ.

මේ අතර දේශපාලන ආරංචි මාර්ග පවසන්නේ ඉදිරියේදී පොදුජන පෙරමුණේ රත්නපුර දිස්ත්‍රික් නායිකාව වන පවිත්‍රා වන්නිආරච්චි ද ජනාධිපති රනිල් වික්‍රමසිංහ ට සහාය දෙමින් තීන්දුවක් ගැනීමට නියමිත බවය.