පුවත්

ජාත්‍යන්තර මූල්‍ය අරමුදල් මණ්ඩලයේ නියෝජ්‍ය කළමණාකරණ අධ්‍යක්ෂ කෙන්ජි ඔකමුරා දෙදින නිල සංචාරයක් සඳහා ශ්‍රී ලංකාවට පැමිණීමට නියමිත බව මුදල් රාජ්‍ය අමාත්‍යාංශය සඳහන් කරයි.

මුදල් රාජ්‍ය අමාත්‍ය ශෙහාන් සේමසිංහ පවසන ආකාරයට කෙන්ජි ඔකමුරා මෙම මස 31 හා ජූනි මස 01 යන දිනයන්හි සංචාරයක් සඳහා ශ්‍රී ලංකාවට පැමිණෙනු ඇත.

මෙම සංචාරය අතරතුරදී ශ්‍රී ලංකාවේ ආර්ථික වැඩපිළිවෙලෙහි මෑත කාලීන ප්‍රවණතා, ඉදිරියේ දී ආර්ථිකය සවිබල ගැන්වීමට ඇති අවස්ථා හා ඊට ඇති බාධා හා ප්‍රමාදයන් අවම කරගැනීමේ ක්‍රමවේදයන් පිළිබඳව සාකච්ඡා වට කිහිපයක් පැවැත්වීමට ද නියමිතය.

ශ්‍රි ලංකා මහඡන වතු සේවක සංගමයේ හිටපු සභාපති ගුණසිංහ සූරියප්පෙරුම මහතා අද (30) අලුයම අභාවප්‍රාප්ත විය.

කලක් රෝගාතුරව සිටි ඒ මහතා මියදෙනවිට වයස අවුරුදු 77 කි.

ශ්‍රි ලංකා නිදහස් පක්ෂයේ නුවරඑලිය ආසනයේ හිටපු සංවිධායකවරයකු වන ඔහු කඳපොල මහින්ද මහා විද්‍යාලයේ ආදි ශිෂ්‍යයෙකි.

ගුණසිංහ සුරියප්පෙරුම මහතා තරුණයකුව සිටියදී, ශ්‍රි ලංකා නිදහස් පක්ෂයේ නුවරඑලිය හිටපු පාර්ලිමේන්තු මන්ත්‍රී ටී. විලියම් ප්‍රනාන්දු මහතා සමග දේශපාලනයට පිවිසි අතර දිවංගත විජය කුමාරණතුංග මහතා සමග මහජන පක්ෂය බිහි කිරීමට පුරෝගාමී වූවෙකි.

88/ 89 භීෂණ සමයේදී තරුණ තරුණියන් විශාල ප්‍රමාණයක් මුදා ගැනීමට කටයුතු කල මොහු එකල එජාප ආණ්ඩුවේ මාධ්‍ය මර්දනයට එරෙහිව ප්‍රථම උද්ඝෝෂණ රැලිය නුවරඑළියේදී සංවිධාන කළේය.

මධ්‍යම පලාත් සභා මන්ත්‍රිවරයකු හා නුවරඑලිය මහා නගර සභාවේ නාගරික මන්ත්‍රිවරයෙකු ලෙස ද ඔහු නුවරඑළිය ප්‍රදේශයට විශාල සේවයකර ඇති සමාජ සේවකයෙකි.

ගුණසිංහ සූරියප්පෙරුම මහතා, බැංකු කිහිපයකම විධායක තනතුරු හා රාජ්‍ය ආයතන කිහිපයකම වගකීම් දරා ඇති ප්‍රකට සමාජ ක්‍රියාකාරික සේන සුරියප්පෙරුම ගේ වැඩිමල් සොයුරාය.

ගුණසිංහ සූරියප්පෙරුම මහතාගේ අවසන් කැමැත්ත අනුව අවමංගල්‍ය කටයුතු පැය 24ක් ඇතුලත සිදුකිරීමට පවුලේ ඥාතීන් තීන්දු කර ඇති අතර ඒ අනුව ඔහුගේ දේහය පිලිබඳ අවසන් කටයුතු අද (30) සවස 4 ට නුවරඑලිය නාගරික සුසාන භූමියේදි සිදුකෙරිණ.

2023 වසරේ මැයි 28 දින දක්වා ශ්‍රී ලංකාවට පැමිණ ඇති මුළු විදෙස් සංචාරකයින් සංඛ්‍යාව 516,946 ක් බව ශ්‍රී ලංකා සංචාරක සංවර්ධන අධිකාරිය නිවේදනය කර ඇත.

ඊට අනුව 2023 මැයි මස මුල් දින 28 තුළ දී 75,769ක සංචාරකයින් පිරිසක් ශ්‍රී ලංකාවට පැමිණීමත් සමඟම මෙලෙස දිවයිනට පැමිණ ඇති මුළු සංචාරකයින් ප්‍රමාණය පන්ලක්ෂයේ සීමාව ඉක්මවා ගොස් තිබේ.

මැයි මාසය තුළ මේ දක්වා වැඩිම සංචාරකයින් සංඛ්‍යාවක් පැමිණ ඇත්තේ අසල්වැසි ඉන්දියාවෙන් වන අතර එම ගණන 20,971කි.

එසේම රුසියාව 6,872 ක්, ජර්මනිය 6,362 ක් සහ එක්සත් රාජධානිය 5,464ක් වශයෙන් මැයි මාසය තුළ වැඩිවශයෙන් සංචාරකයින් පැමිණි සෙසු රටවල් අතර පෙරමුණේ පසුවන අතර එහි වැඩිදුර තොරතුරු පහත සටහනෙහි දැක්වෙයි.

ජාත්‍යන්තර වෙළෙඳපොළෙහි බොර තෙල් මිල පහළ ගොස් තිබේ.

විදෙස් මාධ්‍ය වාර්තා කරන ආකාරයට එක්සත් ජනපදයේ ණය සීමාව සම්බන්ධයෙන් ඇතිව තිබූ මතගැටුම සමනයවීම ඊට ප්‍රධාන හේතුව වී තිබේ.

එහිදී බොර තෙල් මිල පහළයාම දැක්වෙන ආකාරයට බ්‍රෙන්ට් බොර තෙල් බැරලයක මිල ඩොලර් 75.71 දක්වාද වෙස්ට් ටෙක්සාස් ඉන්ටර්මීඩියෙට් බැරලයක මිල ඩොලර් 71.48 දක්වාද අඩුවී ඇත.

එසේම විදෙස් මාධ්‍ය වැඩිදුරටත් දක්වා ඇත්තේ සමස්තයක් වශයෙන් බොර තෙල් මිල 2%කින් පමණ පහළගොස් ඇති බවයි.

මෑත කාලීනව විවිධ පාර්ශව විසින් ආගමික සමගියට හානිවන අන්දමින් සිදුකරන ප්‍රකාශ සහ ක්‍රියාවන් සම්බන්ධයෙන් ආරක්ෂක අමාත්‍යාංශය නිවේදනයක් නිකුත් කර ඇත.

ඊට අනුව රටේ ආගමික ආරවුල් ඇතිකරමින් පවතින සාමකාමී තත්ත්වය කඩාකප්පල් කිරීමේ අපේක්ෂාවෙන් සිටින විවිධ අරමුණු සහිත කණ්ඩායම් පිළිබඳ ආරක්ෂක අමාත්‍යාංශයේ අවධානය යොමු වී ඇත.

පවතින තත්ත්වය සම්බන්ධයෙන් අදහස් දක්වමින් ආරක්ෂක රාජ්‍ය අමාත්‍ය ප්‍රමිත බණ්ඩාර තෙන්නකෝන් සඳහන් කර තිබෙන්නේ , පසුගිය සමයේ අත්විඳින ලද දරුණු ආර්ථික අර්බුදයෙන් රට ගොඩ ඒමට උත්සහා දරන්නාවූ අවස්ථාවක විවිධ කණ්ඩායම් විසින් රටතුළ තවත් අර්බුදයක් නිර්මාණය කිරීමට උත්සහ දරණ බවය.

එබැවින් යම් පුද‍්ගලයෙකු හෝ සංවිධානාත්මක කණ්ඩායමක් එවැනි පටු චේතනාවකින් කටයුතු කිරීමට උත්සහා දරන්නේනම්, ආණ්ඩුක්‍රම ව්‍යවස්ථාවේ 9 වන පරිච්ඡේදය සහ දණ්ඩ නීති සංග්‍රහයේ 291 (අ), (ආ) අනුව නීතිය දැඩිලෙස ක්‍රියාත්මක කිරීමට පසුබට නොවන බව රාජ්‍ය අමාත්‍යවරයා අවධාරණය කර තිබේ.

කැළණිවැලි දුම්රිය මාර්ගයේ දුම්රිය ගමනාගමනය වේගවත් කිරීම සඳහා කඩිනමින් ඒකාබද්ධ සැලැස්මක් සකස් කරන ලෙස දුම්රිය දෙපාර්තමේන්තුවට සහ මාර්ග සංවර්ධන අධිකාරියට අග්‍රාමාත්‍ය දිනේෂ් ගුණවර්ධන  විසින් උපදෙස් ලබා දී තිබෙයි.

අගමැතිවරයා මෙම උපදෙස් ලබා දුන්නේ පාර්ලිමේන්තු සංකීර්ණයේදී, පසුගියදා පැවති ප්‍රවාහන අමාත්‍යාංශය යටතේ ඇති ආයතන සමග විශේෂ සාකච්ඡාවකට එක්වෙමිනි.

ප්‍රවාහන හා මහාමාර්ග සහ ජනමාධ්‍ය අමාත්‍ය බන්දුල ගුණවර්ධන මෙන්ම කොළඹ දිස්ත්‍රික් පාර්ලිමේන්තු මන්ත්‍රී යදාමිණි ගුණවර්ධනද එක්වූ මෙම සාකච්ඡාවේදී, අග්‍රාමාත්‍යවරයා පැවසුවේ දුම්රිය අවිස්සාවේල්ලේ සිට කොළඹ කොටුවට පැමිණෙන විට, අවිස්සාවේල්ල - කොස්ගම අතර පමණක් 04 වරක් මහාමාර්ගය හරහා ගමන් කරන බවය.

එම නිසා මෙම මහාමාර්ගය හරහා ගමන් කිරීම නැවැත්වීමෙන් මාර්ග තදබදය අඩුකරගෙන, වෙලාව ඉතිරි කරගැනීමට හැකියාව ලැබෙන බවත් ඒ සඳහා එක පැත්තකින් දුම්රිය මාර්ගයත් අනෙක් පැත්තෙන් මහා මාර්ගයත් දිවෙන අයුරින් සකස් කළ නොහැකිදැයි අග්‍රාමාත්‍යවරයා ප්‍රශ්න කළේය.

නව සංකල්ප වෙත යොමුවන ලෙසත්, සංවර්ධනය මහජනතාව වෙත ළඟා කරන ලෙසත් නිලධාරීන්ට දැනුම් දුන්නේය.

අවිස්සාවේල්ල සිට පැමිණෙන විට මහාමාර්ගය හරහා යන පළමු හරස් මාර්ග දෙක වන කිරිවන්දල හා පුවක්පිටිය, අපහසුවකින් තොරව ඉවත් කිරීමට හැකියාව ඇති නිසා ඒ සඳහා ප්‍රමුඛතා කටයුත්තක් ලෙස අමාත්‍ය මණ්ඩල පත්‍රිකාවක් සකසන ලෙස, අමාත්‍ය බන්දුල ගුණවර්ධන මෙහිදී නිලධාරීන්ට දැනුම් දුන්නේය.

පාර්ලිමේන්තු මන්ත්‍රී යදාමිණි ගුණවර්ධන පැවසුවේ, කැලණි වැලි සඳහා තවත් දුම්රිය මාර්ගයක් එක්වනවා නම් පැය 03ක් වන දුම්රිය ගමන පැයක් දක්වා අඩුකරගත හැකි බවත් ඉන්ධන ඉතිරි කරගත හැකි බවය. දීර්ඝ කාලයක් තිස්සේ පමාවී ඇති සංවර්ධන කාර්යයක් වන කැලණි වැලි දුම්රිය මාර්ගය දියුණු කිරීම මෙම අවස්ථාවේ ඉටු කර ගැනීමට උපරිම කැපවීමෙන් කටයුතු කළ යුතු බවද අවධාරණය කළේය.

ආයතන ප්‍රධානීන්ගේ අනුමැතියකින් තොරව ජනමාධ්‍ය වෙත තොරතුරු ප්‍රකාශ කිරීමට හෝ ජනමාධ්‍ය වෙත තොරතුරු සැපයීමට රාජ්‍ය නිලධාරීන්ට නීතිමය හැකියාවක් නොමැති බව ශ්‍රේෂ්ඨාධිකරණය නිගමනය කරනු ලැබීය.

සූරියවැව ප්‍රදේශයේ දරුවන්ගෙන් සියයට 80 ක් පමණ මන්දපෝෂණයෙන් පෙළෙන බවට මෑතකදී ආන්දෝලනාත්මක ප්‍රකාශයක් කළ එම ප්‍රදේශයේ සේවයේ නියුතු රජයේ වෛද්‍යවරයෙකු වන වෛද්‍ය චමල් සංජීවගේ වැඩ තහනම් කිරීමට සෞඛ්‍ය අමාත්‍යාංශය ගත් තීරණයට එරෙහිව ඔහු ගොනු කළ මූලික අයිතිවාසිකම් පෙත්සමක් නිශ්ප්‍රභ කරමින් ශ්‍රේෂ්ඨාධිකරණය මෙම නිගමනයට එළඹ තිබේ.

බුවනෙක අලුවිහාරේ සහ ප්‍රීති පද්මන් සූරසේන යන විනිසුරුවරුන්ගේ එකඟත්වය සහිතව ශ්‍රේෂ්ඨාධිකරණ විනිසුරු ප්‍රියන්ත ප්‍රනාන්දු තීන්දුව ප්‍රකාශයට පත් කර ඇත.

ආන්දෝලනාත්මක අනාවරණයකින් පසු වැඩ තහනම්...

2022 වසරේ සැප්තැම්බර් මස 19 වනදා සූරියවැව ප්‍රදේශයේ වෛද්‍ය සායනයක් පැවැත්වීමෙන් අනතුරුව එම ප්‍රදේශයේ දරුවන් ගෙන් 80%ක් පමණ මන්දපෝෂණයෙන් පෙළෙන බවට වෛද්‍ය චමල් සංජීව කළ ප්‍රකාශයක් ජනමාධ්‍යවල පළ වී තිබූ අතර එය මහත් ආන්දෝලනයකට තුඩු දී තිබුණි.

වෛද්‍ය සායනයට සහභාගි වූ දරුවන් ගෙන් 50% ත් 80% ත් අතර සංඛ්‍යාවක් ඔවුන්ගේ වයසට නියමිත බර නොතිබූ බවත් ඒ තුළින් අදාළ ප්‍රදේශයේ දරුවන් අතර මන්දපෝෂණය ඉහළ ගොස් තිබෙන ආකාරය පෙනී යන බවත් මාධ්‍ය වාර්තාවල සඳහන් කර තිබුණි.

ඉන් අනතුරුව පදනම් විරහිත ප්‍රකාශ මාධ්‍ය වෙත නිකුත් කර සෞඛ්‍ය බලධාරීන් අපහසුතාවයට පත් කිරීම සම්බන්ධයෙන් සෞඛ්‍ය අමාත්‍යාංශය විසින් අදාළ වෛද්‍යවරයාට එරෙහිව පරීක්ෂණයක් ආරම්භ කළ අතර 2022 වසරේ නොවැම්බර් මස 01 වැනිදා ඔහුගේ වැඩ තහනම් කරමින් සෞඛ්‍ය අමාත්‍යංශයේ ලේකම්වරයා විසින් ලිපියක් ද නිකුත් කර තිබුණි.

සෞඛ්‍ය අමාත්‍යාංශය විසින් සිය වැඩ තහනම් කර පරීක්ෂණයක් ආරම්භ කිරීමට ගත් තීරණය නීතියට පටහැනි බවත් එබැවින් එය බල රහිත කරන ලෙසත් ඉල්ලමින් වෛද්‍ය චමල් සංජීව විසින් ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සමක් ගොනු කළේය.

දීර්ඝ තර්ක විතර්ක..

නඩු විභාගයේ දී පෙත්සම්කාර වෛද්‍යවරයා සිය නීතිඥවරු මාර්ගයෙන් අධිකරණයට දැනුම්දී තිබුණේ මෙම ප්‍රකාශ හුදෙක් මහජන යහපත උදෙසා පමණක් කරන ලද්දක් බවය.

සෞඛ්‍ය අමාත්‍යාංශය හෝ සෞඛ්‍ය බලධාරීන් අපහසුතාවයට ලක් කිරීමේ චේතනාවක් ඒ තුළ නොවූ බවත් ඔහු සඳහන් කර තිබුණා.

ආයතන සංග්‍රහයේ 30 පරිච්ඡේදය ප්‍රකාරව රාජ්‍ය ප්‍රතිපත්ති සම්බන්ධයෙන් ප්‍රකාශ නිකුත් කිරීමට පෙත්සම්කරුට නීතිමය බාධාවක් නොමැති බවත් පෙත්සම්කාර වෛද්‍යවරයා වෙනුවෙන් පෙනී සිටි නීතිඥවරු අධිකරණය හමුවේ තර්ක කළහ.

නඩු විභාගයේ දී සෞඛ්‍ය අමාත්‍යාංශය වෙනුවෙන් පෙනී සිටි අතිරේක සොලිසිටර් ජනරාල්වරිය අධිකරණයට කරුණු දක්වමින් පෙත්සම්කාර වෛද්‍යවරයා සූරියවැව ප්‍රදේශීයේ දරුවන් 20 දෙනෙකු පමණක් සහභාගී කරගෙන සායනයක් පවත්වා අදාළ ප්‍රදේශයේ දරුවන් අතර ඉහළ මන්ද පෝෂණයක් පවතින බවට ජනමාධ්‍ය ඔස්සේ ප්‍රකාශ කිරීම නීතියට පටහැනි බවට තර්ක කළාය.

එවැනි ප්‍රකාශයක් කිරීමට පෙර පෙත්සම්කරු රාජ්‍ය නිලධාරියෙකු වශයෙන් ආයතන ප්‍රධානීන්ගෙන් ඒ සඳහා අනුමැතියක් ලබාගෙන නැති බවත් දරුවන් විසි දෙනෙකු පමණක් සහභාගි කරගත් සායනයක් හරහා සමස්ථ සූරියවැව ප්‍රදේශයේ ම දරුවන් අතර මන්දපෝෂණය පවතින බවට මතයක් පළ කිරීම තුළ කිසිදු විද්‍යාත්මක පදනමක් නොමැති බවත් අතිරේක සොලිස්ටර් ජෙනරාල්වරිය තර්ක කර සිටියාය.

ඒ අනුව ආයතන සංග්‍රහය යටතේ පෙත්සම්කාර වෛද්‍යවරයාගේ වැඩ තහනම් කොට පරීක්ෂණයක් කිරීමට සෞඛ්‍ය අමාත්‍යංශය ගත් තීරණය නීත්‍යනුකුල බව ඇය අධිකරණය හමුවේ ප්‍රකාශ කර සිටියාය.

ශ්‍රේෂ්ඨාධිකරණ නිගමනය...

දීර්ඝ කරුණු විභාගයකින් අනතුරුව ශ්‍රේෂ්ඨාධිකරණය කිය තීන්දුව ප්‍රකාශයට පත් කරමින් කියා සිටියේ "ආයතන සංග්‍රහයේ 31: 1: 5 වගන්තිය ප්‍රකාරව රාජ්‍ය නිලධාරියෙකු යම් කරුණක් ප්‍රසිද්ධියට පත් කිරීමට පෙර ඒ සඳහා තම දෙපාර්තමේන්තු ප්‍රධානියා හෝ ආයතන ප්‍රධානියාගේ අනුමැතිය ලබාගත යුතුයි. ආයතන සංග්‍රහයේ XLVII පරිච්ඡේදයෙහි 6 වන වගන්තිය යටතේ රජයේ නිල තොරතුරක් මාධ්‍ය හෝ මහජනතාව වෙත නිකුත් කිරීමට පෙර රාජ්‍ය නිලධාරීන් විසින් දෙපාර්තමේන්තු ප්‍රධානියා හෝ අමාත්‍යාංශයේ ලේකම්වරයාගෙන් අනුමැතිය ලබාගත යුතුයි. එම පරිච්ඡේදයේ 7 :2 වගන්තියට අනුව කිසිදු රාජ්‍ය නිලධාරියකු සිය ආයතන ප්‍රධානියාගේ අනුමැතිය ලබා ගැනීමකින් තොරව පොතක් පළ කිරීම, ලිපි පල කිරීම, ජනමාධ්‍ය සඳහා ප්‍රකාශ නිකුත් කිරීම සිදු නොකළ යුත්තේ ය" යනුවෙන් සඳහන් කර ඇති බවය.

වැඩිදුරටත් සිය තීන්දු ඔස්සේ කරුණු දක්වා තිබෙන ශ්‍රේෂ්ඨාධිකරණය" පෙත්සම්කාර වෛද්‍යවරයා රාජ්‍ය නිලධාරියෙකු බව සඳහන් කළ යුතුයි. ඔහුගේ වැඩ තහනම් කිරීම ආයතන සංග්‍රහය යටතේ සිදු වී තිබෙනවා. ආයතන සංග්‍රහය අනුව රාජ්‍ය නිලධාරියෙකු යම් නිල තොරතුරක් බාහිර පාර්ශ්වයක් වෙත ලබා දීමට පෙර ආයතන ප්‍රධානීන්ගෙන් අනුමැතිය ලබාගත යුතු වුවද පෙත්සම්කාර වෛද්‍යවරයා එසේ කටයුතු නොකළ බව පෙනී ගොස් තිබෙනවා. ඒ අනුව ඔහුගේ රාජකාරි සීමා උල්ලංඝනය කිරීම් පිළිබඳව විමර්ශන සිදුකිරීමට ආයතන සංග්‍රහය යටතේ සෞඛ්‍ය බලධාරීන්ට බලය පැවරී තිබෙනවා. වැඩ තහනම් කළ නිලධාරියෙකුට ආයතන සංග්‍රහය යටතේ යම් යම් නීතිමය රැකවරණ හිමි වී තිබෙනවා. එම රැකවරණය පෙත්සම්කාර වෛද්‍යවරයාට ද ඒ ආකාරයෙන්ම හිමිවෙනවා."ඒ අනුව පෙත්සම්කරුගේ වැඩ තහනම් කිරීමට සෞඛ්‍ය බලධාරීන් ගත් තිරණය තුළින් ඔහුගේ මූලික අයිතීන් උල්ලංඝනය වූ බව සනාථ කිරීමට පෙත්සම්කරු අසමත් වී තිබෙනවා"යනුවෙන් ප්‍රකාශ කළ ශ්‍රේෂ්ඨාධිකරණය අනතුරුව ඔහුගේ පෙත්සම නිෂ්ප්‍රභ කරන බවත් සිය තීන්දුව ප්‍රකාශයට පත්කරමින් සඳහන් කළේය.

තීන්දුව ඔස්සේ වැඩිදුරටත් කරුණු දක්වා තිබෙන ශ්‍රේෂ්ඨාධිකරණ විනිසුරුවරු "රාජ්‍ය නිලධාරියා ඉටු කරන්නේ අතිශය වැදගත් මෙන්ම භාරධූර කාර්යයක්. රාජ්‍ය නිලධාරින් තමන්ට පැවරී තිබෙන බලය මහජන යහපත උදෙසා පමණක් ක්‍රියාවේ යෙදවීමට වග බලාගත යුතුයි. වගකීමකින් තොරව හා නොසැලකිලිමත්ව ජනමාධ්‍ය ඔස්සේ අදහස් පළ කිරීමට යාමෙන් මහජනතාව අපහසුතාවයට පත්වීමට ඉඩ තිබෙනවා" යනුවෙන් ද ශ්‍රේෂ්ඨාධිකරණය සිය තීන්දුවේ වැඩිදුරටත් ප්‍රකාශ කර තිබේ.

බීබීසී

විදෙස්ගත ශ්‍රී ලාංකිකයින්ට නව විදේශ ගමන් බලපත්‍රයක් සඳහා අයදුම් කිරීමේදී සහ විදේශ ගමන් බලපත්‍රය අලුත් කිරීමේදී අන්තර්ජාලය ඔස්සේ අයදුම් කළ හැකි බව ජාත්‍යන්තර සබඳතා පිළිබඳ ආංශික අධීක්ෂණ කාරක සභා රැස්වීමේදී ප්‍රකාශ කර තිබේ.

මෙම රැස්වීමට සහභාගි වූ ආගමන හා විගමන දෙපාර්තමේන්තුවේ නිලධාරීන් පැවසුවේ ජූනි මස 01 වැනිදා සිට එය ක්‍රියාත්මක බවය.

එම නිලධාරීන් පෙන්වා දී ඇත්තේ විදේශගත ශ්‍රී ලාංකිකයන්ට තම රටවල ශ්‍රී ලංකා තානාපති කාර්යාලවලට නොපැමිණ අන්තර්ජාලය හරහා ගමන් බලපත්‍ර සඳහා ඉල්ලුම් කළ හැකි බවය.

හිටපු අමාත්‍යවරයෙකු මෙන්ම ලංකා කම්කරු කොංග්‍රසයේ හිටපු නායක සහ මහ ලේකම් ආරුමුගන් තොණ්ඩමන් ගේ ගුණ සැමරුමට සමගාමීව විශේෂ සමරු මුද්දරයක් සහ මුල් දින කවරයක් නිකුත් කිරීම ජනාධිපති රනිල් වික්‍රමසිංහ ගේ ප්‍රධානත්වයෙන් අද (29) ජනාධිපති කාර්යාලයේ දී සිදු විය.

ජනමාධ්‍ය හා ප්‍රවාහන අමාත්‍ය බන්දුල ගුණවර්ධන විසින් එම සමරු මුද්දරය සහ මුල් දින කවරය ජනාධිපතිවරයා වෙත පිළිගන්වනු ලැබීය.

අනතුරුව අග්‍රාමාත්‍ය දිනේෂ් ගුණවර්ධන, කතානායක මහින්ද යාපා අබේවර්ධන, හිටපු ජනාධිපති මහින්ද රාජපක්ෂ, හිටපු කතානායක කරු ජයසූරිය, දෙමළ ජාතික සන්ධානයේ නායක ආර්. සම්බන්ධන් යන මහත්වරු වෙත සහ ආරුමුගන් තොණ්ඩමන් මහතාගේ බිරිඳ වන රාජලක්ෂ්මි තොණ්ඩමන් වෙතද සමරු මුද්දරය සහ මුල්දින කවරය පිළිගැන්වීම සිදු විය.

ජල සම්පාදන හා වතු යටිතල පහසුකම් සංවර්ධන අමාත්‍ය හා ලංකා කම්කරු කොංග්‍රසයේ මහ ලේකම් ජීවන් තොණ්ඩමන්, නැගෙනහිර පළාත් ආණ්ඩුකාර ලංකා කම්කරු කොංග්‍රසයේ නායක සෙන්දිල් තොණ්ඩමන් යන මහත්වරුන් සහ අමාත්‍යවරුන් වන නිමල් සිරිපාල ද සිල්වා, කෙහෙළිය රඹුක්වැල්ල, ඩග්ලස් දේවානන්දා, මහින්ද අමරවීර, නසීර් අහමඩ්, මනුෂ නානායක්කාර, පාර්ලිමේන්තු මන්ත්‍රීවරුන් වන වජිර අබේවර්ධන, මහින්දානන්ද අළුත්ගමගේ, සී.බී. රත්නායක යන මහත්වරු ඇතුළු මැති ඇමතිවරු පිරිසක්ද තැපැල්පති එස්. ආර්. ඩබ්. එම්. ආර්. පි. සත්කුමාර සහ තොණ්ඩමන් පවුලේ ඥාතීහු මෙම අවස්ථාවට එක්ව සිටියහ.

පසුගිය පොසොන් පොහොය සමයේ විසි ලක්ෂයකට අධික පිරිසක් මිහින්තලා පුදබිමට පැමිණි බව එහි විහාරාධිපති හිමියන්ම ප්‍රකාශ කර ඇති බවත් එම බැතිමතුන් පරිත්‍යාග කරන ලද මුදල් කළමනාකරණය කර ගැනීමට හිමියන්ට නොහැකි වූයේ මන්දැයි විදුලිබල හා බලශක්ති අමාත්‍යංශය කංචන විජේසේකර ප්‍රශ්න කරයි.

මෙවරත් එතරම්ම පිරිසක් මිහින්තලා පුදබිමට පැමිනේවා යැයි තමන් ප්‍රාර්ථනා කරන බවත් එම පිරිස හැකි පමණින් උන්වහන්සේට උදව් කරනු ඇති බවත් අමාත්‍යවරයා කියා සිටියේය.

මිහින්තලා පුදබිමට ලැබෙන පඬුරු ආධාර කළමනාකරණය කර ගත්තානම් මෙවර පොසොන් උත්සව පැවැත්වීමට හැකියාව තිබූ බව ද අමාත්‍යවරයා සඳහන් කළේය.

මෙවර ලැබෙන මුදල් ආධාර කළමනාකරණය කරගත හොත් ඊළඟ පොසොන් උත්සවයද හොඳින් පැවැත්වීමට හැකි වනු ඇති බවද අමාත්‍යවරයා කියා සිටියි.

පොසොන් පොහොය නිමිත්තෙන් දිවයිනේ කිසිදු විහාරස්ථානයකට විදුලිය ලබා නොදෙන ලෙස මණ්ඩලයට උපදෙස් ලබා දී නැති බවද පැවසූ අමාත්‍යවරයා මණ්ඩලයේ ගාස්තු ගෙවූ පසු විදුලිය සපයන බවද කියා සිටියේය.

රට පුරා පිහිටා ඇති සම්බාහන මධ්‍යස්ථාන බහුතරයක ඉතා අප්‍රසන්න සිදුවීම් සිදුවන බව දේශීය වෛද්‍ය රාජ්‍ය ඇමති සිසිර ජයකොඩි සඳහන් කරයි.

රාජ්‍ය අමාත්‍යවරයා මේ බව සඳහන් කර සිටියේ බොරලැස්ගමුව ප්‍රදේශයේ පැවති උත්සව සභාවක් අමතමිනි.

මේවායේ තරුණ තරුණියන් පනස් දහසක් පමණ සේවය කරන බවත් එම මධ්‍යස්ථානවල කාන්තාවකට නොව පිරිමියෙකුටද යාමට සුදුසු ඒවා නොවන බවත් අමාත්‍යවරයා පැවසීය.

මෙම තත්වය වෙනස් කිරීම සඳහා ආයුර්වේද සංස්ථාව එක්ව ජාතික සහ ජාත්‍යන්තරව සම්බාහන මධ්‍යස්ථාන ගොඩනැගීමේ වැඩසටහනකට කැබිනට් මණ්ඩලය අනුමැතිය හිමිවූ බවත් අමාත්‍යවරයා වැඩිදුරටත් සඳහන් කර සිටියේ ය.

අත්අඩංගුවට ගත් රාජාංගනයේ සද්ධාරතන හිමි ජුනි මස 07 වනදා දක්වා රිමාන්ඩ් බන්ධනාගාර ගතකර ඇත.

ඒ එම හිමියන් අද (29) කොටුව අධිකරණය වෙත ඉදිරිපත් කිරීමෙන් අනතුරුව මෙම නියෝගය නිකුත්කර තිබේ.

අපරාධ පරීක්ෂණ දෙපාර්තමේන්තුව විසින් රාජාංගනයේ සද්ධාරතන හිමි ඊයේ (28) රාත්‍රියේ අත්අඩංගුවට ගෙන තිබු අතර ඒ ආගමික සහජීවනයට බාධා වන අයුරින් ප්‍රකාශ නිකුත් කිරීම සම්බන්ධයෙන් ලද පැමිණිල්ලක් මතය.

මේ අතර එම හිමිනම අධිකරණ පරිශ්‍රයේ දී මාධ්‍ය වෙත අදහස් දක්වමින් කියා සිටියේ තමන් ඇත්ත කතා කර මැරෙන්න වුවත් සූදානම් බවත් මරණය ජීවිතයේ කවදා වුවත් සිදුවෙන්න නියමිත දෙයක් බවත් ය.

2022 වර්ෂයට සාපේක්ෂව, ශ්‍රී ලංකාවේ ජනගහණයෙන් 17%ක පිරිසක් මධ්‍යස්ථ උග්‍ර ආහාර අනාරක්ෂිතතාවයෙන් තවමත් පීඩා විඳිමින් සිටින බව වාර්තා වේ.

විශේෂයෙන් ම මෙය පවතින්නේ උතුරු, නැගෙනහිර සහ මධ්‍යම පළාත්වලය.

එක්සත් ජාතීන්ගේ ආහාර හා කෘෂිකර්ම සංවිධානය සහ ලෝක ආහාර වැඩපිළිවෙල ඒකාබද්ධව සිදුකරන ලද ආහාර භෝග සහ ආහාර සුරක්ෂිතතාව පිළිබඳ තක්සේරු මෙහෙයුම් වාර්තාවට අනුව මෙම කරුණු අනාවරණය වී තිබේ.

එම වාර්තාවට අනුව ජනගහණයෙන් 17%ක් එනම් පුරවැසියන් මිලියන 3.9ක් මධ්‍යස්ථ උග්‍ර ආහාර අනාරක්ෂිතතාවට මුහුණපාන අතර එය පසුගිය වර්ෂයේ ජූනි/ජූලි සමඟ සැසඳීමේදී ආසන්න වශයෙන් 40%ක අඩුවීමකි.

පසුගිය වසරේ දැඩි ආහාර අනාරක්ෂිතතාවයෙන් පෙළුණු 66,000ක පුද්ගල සංඛ්‍යාව මේ වසර වන විට ආසන්න වශයෙන් 10,000ක් දක්වා අඩුවී ඇති බව එම වාර්තාවේ සඳහන් වේ.

ආහාර මිල යම්තාක් අඩුවීම සහ මෙම වාර්තාවට කරුණු අධ්‍යයනය කරන කාලය තුළදී අස්වනු නෙලීම හේතුවෙන් ආදායම් මට්ටම් වර්ධනයවීම තුලින් ආහාර පරිභෝජන රටාවල වෙනසක් සිදුවීම වැනි කරුණු ඊට බලපා ඇත.

කෙසේවෙතත් කිලිනොච්චිය, නුවරඑළිය, මන්නාරම, මඩකලපුව, වව්නියාව සහ යාපනය වැනි ඇතැම් දිස්ත්‍රික්කවල තවමත් ආහාර අනාරක්ෂිතතාව ඉහළ මට්ටමක පවතින බවද එම ආයතන පෙන්වා දී තිබේ.

ඒ අනුව උග්‍ර ආහාර අනාරක්ෂිතතාව වාර්තා වන්නේ, වතුකරයේ තේ වගාකරුවන්ගේ ප්‍රජාවන් අතරින්, සහ සිය ප්‍රධාන ආදායම් මාර්ගය වශයෙන් සමෘද්ධි වැනි සමාජ ආධාර වැඩසටහන් මත යැපෙන දෛනික වැටුප් ලබාගන්නා කම්කරුවන් සහ කුටුම්භ අතරින් බවද එම වාර්තාවේ වැඩිදුරටත් සඳහන් වේ.

තමන් අධ්‍යාපනය ලැබූ එදිනෙදා වටපිටාව සම්පූර්ණයෙන්ම වෙනස් වී නුහුරු පරිසරයක විභාගයට මුහුණ දීම සිසුන්ගේ මානසික නිදහසට බාධාවක් බවත්, සෑමවිටම අධ්‍යාපන අමාත්‍යාංශය සහ විභාග දෙපාරත්මේන්තුව තම පහසුව වෙනුවට ශිෂ්‍යයන්ගේ පහසුව සහ උන්නතිය වෙනුවෙන් කටයුතු කළයුතු බවත් ජනාධිපති රනිල් වික්‍රමසිංහ අවධාරණය කළේය.

ඒ අනුව අවම වශයෙන් සිසුන් 75 දෙනෙකු පමණ විභාගයට සුදුසුකම් ලබා ඇති යම් පාසලක් වේද, එම පාසල විභාග මධ්‍යස්ථානයක් කිරීමට පියවර ගන්නා ලෙස අධ්‍යාපන බලධාරීන්ට උපදෙස් දුන් ජනාධිපතිවරයා මේ වන විට ආරම්භ වී ඇති විභාග කටයුතුවලට බාධා නොවන අයුරින් යම් පහසුවක් සැලසිය හැකි නම් ඒ වෙනුවෙන් ද ඉදිරි දින කිහිපය තුළ පියවර ගන්නා ලෙස නිලධාරීන්ට උපදෙස් දුන්නේය.

ජනාධිපති රනිල් වික්‍රමසිංහ මෙම උපදෙස් ලබා දුන්නේ අධ්‍යාපන අමාත්‍යාංශයේ ලේකම්වරයා, විභාග කොමසාරිස්වරයා ඇතුළු නිලධාරීන් සමඟ අද (29) ජනාධිපති කාර්යාලයේ පැවති සාකච්ඡාවේදීය.

අද (29) ආරම්භ වූ 2023 අධ්‍යයන පොදු සහතික පත්‍ර සාමාන්‍ය පෙළ විභාගයට මධ්‍යස්ථාන 3,568කදී ශිෂ්‍ය ශිෂ්‍යාවන් 472,553ක් පෙනී සිටිති. ඒ වෙනුවෙන් සේවයේ යොදවා ඇති රාජ්‍ය නිලධාරීන් සංඛ්‍යාව 40,000කට ආසන්නය.

නමුත් මෙවර පාසල් කිහිපයකම සිසුන් තමන් අධ්‍යාපනය ලබන පාසල වෙනුවට වෙනත් පාසලක විභාග මධ්‍යස්ථානයකට යොමු කිරීමට බලධාරීන් කටයුතු කිරීම නිසා දරුවන් දුෂ්කරතාවන්ට මුහුණදී සිටින බව දෙමාපියන් සහ දරුවන් විසින් ජනාධිපතිතුමා දැනුවත් කර ඇත.
මේ පිළිබඳව සොයා බැලීමේ දී අධ්‍යාපන අමාත්‍යාංශය සහ විභාග දෙපාර්තමේන්තුව සඳහන් කර ඇත්තේ පවතින ආර්ථික තත්ත්වය හමුවේ විභාග මධ්‍යස්ථාන සීමා කිරීමට තීරණය කළ බවයි.

මෙය සිසුන්ගේ මානසික මට්ටමට සෘජුවම බලපාන තත්ත්වයක් හෙයින් මෙවැනි වැඩපිළිවෙළක් ක්‍රියාත්මක කිරිමේ දී අවම වශයෙන් වසරක පමණ කාලයක් එම පාසල් සහ සිසුන් දැනුවත් කොට එය ක්‍රියාවට නැංවීමේ වැදගත්කම ජනාධිපතිවරයා අවධාරණය කළේය.

කෙසේ වෙතත් දරුවන්ගේ අධ්‍යාපනය සඳහා පවත්වන සියලු විභාග ප්‍රමාදයකින් තොරව පැවැත්වීමට විධිමත් වැඩපිළිවෙළක් අත්‍යාවශ්‍ය බවත්, ඒවා නොපවැත්වීමට හේතු දැක්වීම විභාග දෙපාර්තමේන්තුවේ කාර්යයක් නොවන බවත් පැවසු ජනාධිපතිවරයා සිසුන්ට හුරු පරිසරයේ විභාගයට පෙනී සිටීමට පසුබිම සැකසීම අධ්‍යාපන අමාත්‍යාංශයේ හා විභාග දෙපාර්තමේන්තුවේ ප්‍රධාන වගකීමක් බව ද අවධාරණය කර සිටියේය.

මෙම අවස්ථාවට ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක, ජනාධිපති ලේකම් සමන් ඒකනායක, අධ්‍යාපන අමාත්‍යාංශයේ ලේකම් නිහාල් රණසිංහ, විභාග කොමසාරිස් අමිත් ජයසුන්දර ඇතුළු නිලධාරීහු එක්ව සිටියහ.

ශ්‍රී ලංකාවේ ආර්ථික ස්ථාවරත්වය සඳහා අයවැය සහාය ලබා දීම වෙනුවෙන් ආසියානු සංවර්ධන බැංකුව (ADB) විසින් අද (29) ඩොලර් මිලියන 350 ක විශේෂ ප්‍රතිපත්ති පදනම් කරගත් ණයක් අනුමත කර ඇත.

මෙය ජාත්‍යන්තර මූල්‍ය අරමුදලේ විස්තීර්ණ අරමුදල් පහසුකම මගින් ශ්‍රී ලංකාවට ලබාදුන් මූල්‍ය පහසුකමට සමගාමීව අනුමත කෙරුණු මූල්‍ය පහසුකමක් වේ.

මෙම මූල්‍ය පහසුකම් සම්බන්ධයෙන් අදහස් දක්වමින් ආසියානු සංවර්ධන බැංකුවේ සභාපති මසට්සුගු අසකාවා මෙලෙස සිය අදහස් දැක්වීය.

"රටේ පවතින ගැඹුරු අර්බුදය සහ ශ්‍රී ලංකාවේ ජනතාවට, විශේෂයෙන්ම දුප්පතුන්ට සහ අවදානමට ලක්විය හැකි අයට, විශේෂයෙන්ම කාන්තාවන්ට එහි බලපෑම ගැන ADB සැලකිලිමත් වෙනවා. ආර්ථික ස්ථායීකරණය, තිරසාර ප්‍රකෘතිමත් වීම සහ සියල්ලන් ඇතුළත් කර ගැනීම සඳහා වත්මන් අභියෝගවලට මුහුණ දෙන අතර ශ්‍රී ලංකාව සමඟ නැගී සිටීමට ADB කැපවී සිටිනවා."

රට යථා තත්ත්වයට පත් කිරීම සඳහා දිගු මාවතකට මුහුණ දී සිටින අතර, බදු ආදායම් එකතු කිරීම ඉහළ නැංවීම, රාජ්‍ය මූල්‍ය කළමනාකරණය ශක්තිමත් කිරීම, රාජ්‍ය ව්‍යවසායවල ක්‍රියාකාරීත්වය වැඩිදියුණු කිරීම, මහ බැංකුවේ ස්වාධිපත්‍යය සහ ස්වාධීනත්වය සහතික කිරීම, ආරක්ෂා කිරීම ඇතුළු අවශ්‍ය ප්‍රතිසංස්කරණ ක්‍රියාත්මක කිරීමේදී ස්ථිරව සිටිය යුතු බව ආසියානු සංවර්ධන බැංකුව පෙන්වා දෙයි.

ආගමික භේද ඇති කරමින් ජාතික ආරක්ෂාවට එල්ල වන තර්ජන රජය දැඩිව මර්දනය කරන බව එක්සත් ජාතික පක්ෂ සභාපති පාර්ලිමේන්තු මන්ත්‍රී වජිර අබේවර්ධන පැවසීය.

ජාතිවාදය ආගම්වාදය පැතිරවීමේ ක්‍රියා සක්‍රීය වීමට ජනාධිපති රනිල් වික්‍රමසිංහ කිසිසේත් ඉඩ නොදෙන බව ද මන්ත්‍රීවරයා අවධාරණය කළේය.

කොළඹ දී මාධ්‍යට විශේෂ ප්‍රකාශයක් කරමින් පාර්ලිමේන්තු මන්ත්‍රී වජිර අබේවර්ධන මේ බව සඳහන් කළ අතර වැටුණු රට ගොඩනැගීම රනිල් වික්‍රමසිංහ ජනාධිපතිවරයා රට බාර ගැනීමේ මූලික අරමුණ බවත් සියලු මහජන නියෝජිතයන්ගේ වගකීම සියලුම දෙනා ජාතික එකඟතාවයකින් යුතුව කටයුතු කිරීම බව පැවසීය.

පසුගිය කාලයේ ඇතැම් පුද්ගලයන් පෞද්ගලික තීන්දු තීරණවලට මුල් තැන දෙමින් කටයුතු කිරීම නිසා ජපානයට ලංකාව සම්බන්ධයෙන් ඇති වී තිබුණු සැකය සහ අවිශ්වාසය දුරු කොට නැවත විශ්වාසය ඇති කිරීමට රනිල් වික්‍රමසිංහ ජනාධිපතිවරයාගේ ජපාන සංචාරය ඉවහල් වූ බවද මන්ත්‍රීවරයා අවධාරණය කළේය.

නිදහසින් පසුව වසර 75 ක් රටේ කිසිම නායකයකුට ජාතික වැඩසටහනක් දීර්ඝකාලීනව ක්‍රියාත්මක කරන්න අවස්ථාව උදාවී නැතැයි පැවසූ මන්ත්‍රීවරයා එවන් සෑම අවස්ථාවකදීම කෙටි කලකදී ඒ නායකයා මරා දැමීම නායකයා අකාලයේ දේශපාලනයෙන් සමුගැනීම වැනි දේ නිසා ශ්‍රී ලංකාව අස්ථාවරභාවයකට පත්වී තිබෙන බවද සඳහන් කළේය.

ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී මහාචාර්ය ජී. එල්.පිරිස් කොළඹ දිසා අධිකරණයේ නඩුවක් ගොනු කර තිබේ.

ඒ ශ්‍රී ලංකා පොදුජන පෙරමුණ 2023 අප්‍රේල් 22 වෙනි දින පැවැත්වූ මහා සභා රැස්වීම කිසිම නීතිමය වලංගු භාවයක් නොමැති හා ගත් සියලු තීන්දු නීති විරෝධී හා ශුන්‍ය බවට ප්‍රකාශ කරමිනි.

නඩු අංක DSP 00206/23 යටතේ ගොනු කළ මෙම නඩුව සඳහා මහාචාර්ය ජී. එල්. පීරිස් වෙනුවෙන් පෙනී සිටින්නේ ජනාධිපති නීතිඥ රොමේෂ් ද සිල්වා ය.

පොදුජන පෙරමුණේ ලේකම් සාගර කාරියවසම්, ජාතික සංවිධායක ඇතුළු පක්ෂයේ සියලු නිලධාරීන් මෙම පෙත්සමේ වග උත්තරකරුවන් ලෙස නම් කර ඇත.

සමාජයක ජීවත් වෙනවා කියන්නේ යම් ප්‍රගුණ කලයුතු කුසලතාවක් (skill). සමාජයක තියනවා යම් යම් පිළිගැනීම්, අභිචාර විධි, සමාචාර, නීති රීති, සම්ප්‍රදායන්, වගේම වටිනාකම්. ඒවා අවබෝධ කරගන්න එක සහ ඒවත් එක්ක ජීවත් වෙන එක එක්තරා දක්ෂකමක්.

දැන් මේ ඉහත ලැයිස්තුව කියන්නේ නොවෙනස් වන දේවල් නෙවෙයි. කාලෙන් කාලෙට, සන්දර්භයෙන් සන්දර්භයට, සමාජ අවශ්‍යතා වලට සාපේක්ෂව ඒවා වෙනස් වෙනවා. වෙනස් කර ගන්නවා.

එක යුගයක බණ්ඩාරනායක යුගයේ වේට්ටිය ඇන්ද අපේ අප්පච්චි. නමුත් දශකයකට විතර පස්සේ එයා ඒක ටිකක් වෙනස් කරලා සරම කමිසය ඇන්ද පහසුවටත් එක්ක. නමුත් මගේ යුගයට එනකොට මම ඩෙනිම් වලට ආව. ෆැෂන් කරන්න ආස කළා. අප්පච්චි සරම කමිසයේ නැවතුණා. අප්පච්චි රොක් ඇහුවේ නැහැ. ජාතිකාභිමානී ගීත වලට තමයි ආස කළේ. නමුත් මම ආසවෙන් රොක් අහනවා.

ගිල් ඩෙලස් කියනවා වගේ අපේ පරම්පරා දෙක අතරේ (අප්පච්චි සහ මම) පැල්මක් තියනවා (rupture). ඇතැම් දේවල් සම්බන්ද කරන්න පුළුවන් (bridgeable). හැබැයි සමහර දේවල් එහෙම කරන්න බැහැ.

මෙන්න මේ විභේදනය තේරුම් අරගෙන සමාජයක ජීවත් වෙන එකත් දක්ෂකමක්. කුසලතාවක්. නැත්නම් වෙන්නේ තමන් කියන දෙයින් සමාජය රිදවා ගන්න එක. ඒ ඔස්සේ තමන් කියන්න හදන දෙයට වලංගුතාවක් නැතිවෙන එක විතරක් නෙවෙයි ඒ සමාජයේ පවතින්න පවා බැරිවෙන එක.

ලාංකික සමාජය කියන්නේ යම් හර පද්ධතියක් තියන රටක්. ඒකට ඉතිහාසයක් තියනවා. ඒ වගේම ඒ හර පද්ධතිය වැරදි විදියට යොදාගත්ත තැන් පවා ගොඩක් තියනවා. ඒ වගේ අපේ සමාජයේ අගතීනුත් ගොඩක් තියනවා. ඒවා වෙනස් කරගන්න පවා යම් සටනක් කරන්න ඕනි.

නමුත් යම් ශිෂ්ට සම්පන්න සන්දර්භයක් යටතේ අපේ සමාජයේ තවදුරටත් විවේචනාත්මක අදහස් දක්වන්න පුළුවන් රටක්. ඒක අපි පිළිගන්න ඕනි.

ඒ වගේම වෙනස් වෙන්න දහසකුත් එකක් දේවල් අපේ සමාජයේ තියනවා.

හැබැයි මට නම් බැහැ බුදුන් වහන්සේට හෝ සිද්ධාර්ථ ගෞතමයින්ට ''සුද්ධෝදනගේ පොඩි එකා'' කියන්න. ඒකට හේතුව තමයි බුදුන් වහන්සේ ඉදිරිපත් කළ අදහස් මාලාවේ තියන නැවුම්බව. විමුක්ති අන්තර්ගතය. අදටත් වලංගු ප්‍රයෝගික බව. දේශනාකළ ධර්මය තුළ තියන ලෝකයටත් වඩා විශාල බව (larger than world). ඒ නිසා මට එතුමන් ගැන ගෞරවයක් තියනවා. නොනැසෙන ගෞරවයක්.

සමකාලීන දාර්ශනික-මනෝ විශ්ලේෂණ ප්‍රවේශය පවා සකස් වෙන්නේ මේ ආගම් අතරේ පවතින සමාන ලක්ෂණ එක්ක පොදු ගුණාකාරයක් හදාගන්නේ කොහොමද කියන එක පාදක කරගෙන.

ආගම කියන ප්‍රපංචය නිසා ඉතාම ප්‍රතිචාරාත්මක, සංවේදී සහ ඒ නිසාම ඓතිහාසිකව අතිශයින් බරපතළ ඛේදවාචක අත්විඳලා තියන අපි වගේ සමාජයක 'ඇස් රතුවෙන විහිළු' කියන්නේ පරිස්සමෙන් කළයුතු දෙයක්.

මොකද මේ රටේ ඇනස්ලිල, බර්ටිල, ෆ්‍රෙඩීල, අවම වශයෙන් ටෙනිය පවා ඇත්තටම මිනිස්සු හිනස්සල තියනවා. උන්ගෙන් ඉගෙන ගනිල්ලා.

ඉනුත් විශේෂයෙන් විකුණන්න විහිළු කරන වෙලාවක මීට වඩා අපේ සමාජය ගැන සංවේදී වෙන්න. මොකද උඹලා සල්ලි හොයන්න සියල්ල පොළොවේ ගහන යුගයක සමාජය ගැඹුරු අර්ථයෙන් වෙනස් කරන්න හදන ඉතාම කුඩා පිරිසක් තවමත් මේ රටේ ඉන්නවා. උන් මහන්සි වෙනවා. සල්ලි හොයන්න කොච්චර කෙටි මාවත් තිබ්බත් උන් සමාජ පරිකල්පනයක් සහ ෆැන්ටසි එකක් එක්ක ගමන් කරනවා.

නටාෂා, ඇස් රතුවෙන විහිළු පරිස්සමෙන් විකුණන්න. මොකද මේ රටේ ඉන්නේ උඹල විතරක් නෙවෙයි...
මහේෂ් හපුගොඩ ගේ ෆේස්බුක් ගිනුමෙනි