පුවත්

එක්සත් ජාතීන්ගේ මහා මණ්ඩලයේ (UNGA) 78 වැනි සැසිවාරයේ උප සභාපතිවරයෙකු ලෙස ශ්‍රී ලංකාව ඒකමතිකව තේරී පත් විය.

ශ්‍රී ලංකාව උප සභාපති ධූරය සඳහා තෝරා පත්කරගෙන ඇත්තේ එක්සත් ජාතීන්ගේ සංගමයේ සාමාජික රටවල් 193ක ඒකමතික තීරනයකිනි.

ඒ අනුව, එක්සත් ජාතීන්ගේ සංවිධානයේ නිත්‍ය නියෝජිත තානාපති මොහාන් පීරිස් විසින් ආසියානු පැසිෆික් කාලාපය වෙනුවෙන් 2023 සැප්තැම්බර් මාසයේ සිට 2024 සැප්තැම්බර් මාසය දක්වා කාලය සඳහා අදාළ තනතුර භාර ගැනීමට නියමිතය.

ශ්‍රී ලංකාවට අමතරව තවත් රටවල් 21ක් එක්සත් ජාතීන්ගේ මහ මණ්ඩලයේ උප සභාපති තනතුර සඳහා තොරා පත්කරගෙන ඇත. ඒ බොලිවියාව, කොංගෝව, එස්තෝනියාව, ගැම්බියාව, අයිස්ලන්තය, ඉරානය, මැලේසියාව, මොරොක්කෝව, නෙදර්ලන්තය, සෙනගාලය, සිංගප්පූරුව, සුරිනාම්, උගන්ඩාව, උස්බෙකිස්තානය, සැම්බියාව සහ ආරක්ෂක කවුන්සිලයේ නිත්‍ය සාමාජිකයන් පස්දෙනා වන චීනය, ප්‍රංශය, රුසියාව, එක්සත් රාජධානිය සහ ඇමරිකා එක්සත් ජනපදය යි.

එක්සත් ජාතීන්ගේ මහ මණ්ඩලයේ 78 වන සැසිවාරය ලබන සැප්තැම්බර් මස 12 වන දින ආරම්භ වන අතර එය සැප්තැම්බර් 25 වනදා දක්වා පැවැත්වීමට නියමිතය.

පාර්ලිමේන්තුවේ සියලුම දේශපාලන පක්ෂ එකට එක් වුවත් මේ මොහොතේ ඒ කිසිවකට 50%ක ඡන්ද පදනමක් නොමැති බවත්, එබැවින් සියලුදෙනා එක්විය යුත්තේ මැතිවරණයක් සඳහා නොව ආර්ථික අර්බුදයෙන් රට ගොඩගැනීමට බවත් ජනාධිපති රනිල් වික්‍රමසිංහ පැවසීය.

තවමත් මෙරට තරුණ පරපුර ඇතුළු ජනතාවගෙන් අතිමහත් බහුතරයක් අතර මැතිවරණ හා දේශපාලනය පිළිබඳ විශ්වාසය කඩ වී ඇති බව ද ජනාධිපතිවරයා පෙන්වා දුන්නේය.
ජනාධිපති රනිල් වික්‍රමසිංහ  මේ බව සඳහන් කළේ නුවරඑළිය ග්‍රෑන්ඩ් හෝටලයේ දී ඊයේ (02) පැවති "2023/ 2024 ජාතික නීතිඥ සමුළුව අමතමිනි.

නීතිය හා සාමය, දේශපාලන සහ ආර්ථීක ස්ථාවරත්වය යළි පිහිටුවීමෙන් අදහස් වන්නේ ශ්‍රී ලංකාව මුළුමනින්ම අර්බුදයෙන් මිදී ඇති බව නොවන බව මෙහිදී පෙන්වා දුන් ජනාධිපතිවරයා මෙම සමස්ත ක්‍රියාවලිය සාර්ථක කර ගැනීම සඳහා ඉදිරියේදී විශාල කැපවීම් කළ යුතුව ඇති බවද සඳහන් කළේය.

මීට මාස දහයකට පෙර රට දැඩි ආර්ථිකය අභියෝගයට ලක් වූ අතර එය ඉතිහාසයේ කිසිදා නොතිබූ තත්ත්වයක් බව පෙන්වා දුන් ජනාධිපතිවරයා එම තත්ත්වය සමනය කර ගැනීමට තමා ඇතුළු කණ්ඩායමට කටයුතු කළ බවත් සඳහන් කළේය.

මෙහිදී අදහස් දැක්වූ ජනාධිපති රනිල් වික්‍රමසිංහ  වැඩිදුරටත් මෙසේද පැවසීය .

ජාතික නීති සමුළුව මඟින් ආර්ථික ප්‍රතිව්‍යුහගත කිරීමේ ක්‍රියාවලිය සහ එහි වර්ධනය කෙරෙහි අවධානය යොමු කරන පළමු අවස්ථාව මෙයයි. ඒ සඳහා නුවරඑළිය සහ මෙම ස්ථානය තෝරා ගැනීම සුදුසු බව මම විශ්වාස කරනවා. එඩ්වඩ් බාන්ස් ආණ්ඩුකාරවරයාට නුවරඑළියේ නිවසක් තිබූණා. බාන්ස් ආණ්ඩුකාරවරයා කියන්නෙ කෝපි වගාව සහ අපගේ වැවිලි ආර්ථිකයේ ආරම්භය ප්‍රවර්ධනය කළ තැනැත්තායි.

අප අද මෙහි හමුවන්නේ අපේ රට අසාර්ථක රාජ්‍යයක් බවට පත් විය හැකි තත්ත්වයක් නිර්මාණය වී තිබි ගෙවී ගිය මාස 10 - 11 කට පමණ පසුවයි. නමුත් මේ මොහොත වන විට අපි රට තුළ නීතිය හා සාමය, දේශපාලන ස්ථාවරත්වය සහ ආර්ථික ස්ථාවරත්වය ස්ථාපිත කර තිබෙනවා.මේ ස්ථාවරභාවය කෙටිකාලීන දෙයක් පමණක් බව අපට වැටහෙනවා. එබැවින් මෙම අභියෝගය ජය ගැනීමට අප තව බොහෝ දුර යා යුතුව තිබෙනවා .

මීට මාස දහයකට පෙර මේ රටේ සමස්ථ ආර්ථියකම දැඩි අභියෝගයකට ලක් වුණා. එවැනි තත්ත්වයක් මිට පෙර රට තුළ ඇති වී තිබුණේ නැහැ.

නීතිය හා සාමය ,දේශපාලන ස්ථාවරත්වය සහ ආර්ථීක ස්ථාවරත්වය යළි රට තුළ ඇති කිරීමට අප ඉකුත් මාස 10 තුළ කැපවී කටයුතු කළ ද ඉන් අදහස් වන්නේ අප ආර්ථික අර්බුදයෙන් මුළුමනින් මිදී ඇති බව නොවෙයි.

තවමත් අපේ ජනතාවගෙන් අතිමහත් බහුතරයක් අතර මැතිවරණ හා දේශපාලනය පිළිබඳ විශ්වාසය කඩ වී තිබෙනවා.පාර්ලිමේන්තුව වේවා, අධිකරණය වේවා, ජනමාධ්‍ය වේවා, පෞද්ගලික අංශයේ පිහිටුවා ගත් වෘත්තීය සමිති වේවා, වෘත්තීකයන් වේවා, අපේ රටේ අති බහුතරයක් ජනතාව සහ රාජ්‍ය පාලකයන් අතර සමස්ත පද්ධතිය පිළිබඳ විශ්වාසයක් නැහැ.

මෙහිදී අදහස් දැක්වූ අගවිනිසුරු ජයන්ත ජයසූරිය,

පසුගිය වසර කිහිපය තුළ අභියෝග රැසක් මධ්‍යයේ වුවද නීතීඥ සංගමය සාමාජිකයන් එක්රැස් කර විවිධ තේමා යටතේ සම්මන්ත්‍රණ පැවැත්වුණා.

2022 වසරේ එහි තේමාව වූයේ නීති වෘත්තියේ ඔරොත්තු දීමේ හැකියාව ප්‍රතිනිර්මාණය කිරීම සහ අනුගත වීමයි. ඉන් පසුව මේ වසර මුලදී අර්බුදයක් හරහා ගමන් කිරීමේ - නීතියේ භූමිකාව තේමාව යටතේ අපි එකට එකතු වුණා.

කොවිඩ් වසංගතය සහ ආර්ථික අර්බුදය හේතුවෙන් පෙර නොවූ විරූ දුෂ්කරතා, සහ අභියෝගවලට අප සියලුදෙනාට මුහුණදීමට සිදු වුණා. නමුත් මෙම තත්ත්වයෙන් මිදී සාමාන්‍ය තත්ත්වයට පැමිණීමට සහ ඉදිරියට යාමට හැකි සෑම උත්සාහයක්ම ගැනීම අප සියලුදෙනාගේ වගකීම කියා අප විශ්වාසය කරනවා .

නීතිඥ සංගමයේ සභාපති නීතිඥ කෞෂල්‍ය නවරත්න,

සාම්ප්‍රදායිකව ජාතික නීති සම්මේලනය කැපවී සිටින්නේ නීති වෘත්තියට අදාළව එදිනෙදා මතුවන මාතෘකා පිළිබඳ සාකච්ඡා කිරීම සඳහා ය. කෙසේ වෙතත්, මෙවර ජාතික නීති සමුළුව 2023/2024 වෙනස් ප්‍රවේශයක් ගෙන තිබෙනවා. රටේ ජාතික අවශ්‍යතා සහ යහපත් අනාගතයක් සඳහා නීති ප්‍රජාවේ කාර්යභාරය පිළිබඳව සාකච්ඡා කිරීමට අපි මෙවර සමුළුව වෙන්කර තියෙනවා .

මෙම ප්‍රයත්නයේදී අපි පාර්ශ්වකරුවන් කිහිප දෙනෙකු සමඟ සම්බන්ධ වී සිටිනවා. අන් කවරදාටත් වඩා දේශපාලනික සහ ආර්ථික අභියෝගයකට අපේ රට මුහුණ දී සිටින බව නොරහක්. එබැවින් අත්‍යවශ්‍ය නීති පද්ධතියක් සහ ස්වාධීන අධිකරණයක් රට තුළ තිබීම අත්‍යාවශ්‍ය යි.

නීතියේ ආධිපත්‍යය පවත්වාගෙන යාම සහ රට අපේක්ෂිත දිශාවට ගෙනයාම සඳහා දූරදර්ශී, විනයගරුක ප්‍රජාතන්ත්‍රවාදයට ගරු කරන සහ අපේ රටේ පුරවැසියාගේ අයිතිවාසිකම් මෙන්ම රටේ ආරක්ෂාව සහතික කරන නායකත්වයක් අත්‍යවශ්‍ය යි.

අපගේ වෘත්තීය ඉතිහාසයේ ප්‍රථම වතාවට, නීති ක්ෂේත්‍රයේ ප්‍රතිසංස්කරණය කළ යුතු හෝ සංශෝධනය කළ යුතු අංශ පිළිබඳව සියලු පාර්ශ්වකරුවන් සමඟ සාකච්ඡා කිරීමට, අපි ජාතික නීති සමුළුව වෙන් කර තිබෙනවා .

රටේ දිගුකාලීන සංවර්ධනය සහතික කරන මෙන්ම ශ්‍රී ලංකාව සංවර්ධනය වෙමින් පවතින රටක සිට සංවර්ධිත රටක් කරා ගෙන යන නීති අපගේ නීති පද්ධතියට හඳුන්වා දීමට හා ඒ සඳහා නීති සම්පාදකයන්ට බලපෑම් කිරීමට අවශ්‍ය සහය සහ දැනුවත් කිරීම මෙම සමුළුව මඟින් ලබා දීම අපේ අරමුණයි.

ජාතික නීතිඥ සම්මේලනයේ සභාපති නීතිඥ ෆයිසර් මුස්තාෆා,

අද ජාතියක් ලෙස අප සිටින්නේ අර්බුදකාරී කාල වකවානුවකයි. මෙය හුදු නීතීඥ ප්‍රජාව එකමුතු කරන සම්මන්ත්‍රණවලින් එකක් නොවෙයි. ප්‍රතිපත්ති සම්පාදකයින්, නිලධාරීන් සහ ව්‍යාපාරික ප්‍රජාව අතර සංවාදයක ආරම්භයක් ලෙස මෙම සමුළුව පැවැත්වීමට අපි තීරණය කළේ රට සහ ආර්ථිකය ගොඩ ගැනීම සඳහායි.

අප ජාතියක් ලෙස දියුණු වීමට නම් නීති අංශ ව්‍යවසායකත්වයේ වැදගත්කම හඳුනා ගැනීම වැදගත්. ඒ වගේම ව්‍යවසාය සහ ව්‍යවසායකයින් නීතියේ ආධිපත්‍යය ද පිළිගත යුතුයි.

මේ සම්බන්ධයෙන් කල්පවත්නා විසඳුම් සෙවීමේදී දේශපාලන නායකත්වය ද ඊට සම්බන්ධ කර ගැනීම ඉතා වැදගත්. එවිට මේ සම්මේලනයේ සාර්ථක ප්‍රතිපල අපට ලබා ගත හැකි වෙනවා.

මහාචාර්ය මෛත්‍රී වික්‍රමසිංහ, නීතිපති සංජය රාජරත්නම්, මුදල් අමාත්‍යාංශයේ ලේකම් මහින්ද සිරිවර්ධන, මහ බැංකු අධිපති ආචාර්ය නන්දලාල් වීරසිංහ, ආර්ථික කටයුතු පිළිබඳ ජනාධිපති ජ්‍යෙෂ්ඨ උපදේශක ආචාර්ය ආර්.එච්. සමරතුංග, හිටපු අමාත්‍ය නවීන් දිසානායක යන මහත්වරුන් සහ ශ්‍රේෂ්ඨාධිකරණ විනිසුරුවරුන්, නීතිඥවරුන් ඇතුළු පිරිසක් මෙම අවස්ථාවට එක්ව සිටියහ.

ගෘහස්ථ ගෑස් මිල හෙට (04) මධ්‍යම රාත්‍රියේ සිට අඩු කරන බව ලිට්‍රෝ ගෑස් සමාගම පවසයි.

--------------------------------------------------------------------------------------------------------------------------------------------------------

ලිට්‍රෝ ගෘහස්ථ ගෑස් කිලෝග්‍රෑම් 12.5ක සිලින්ඩරයක මිල රුපියල් 452 කින් අඩු කළ බව ලිට්‍රෝ ගෑස් සමාගමේ සභාපති මුදිත පීරිස්  අද (4) පැවසීය.

ඒ අනුව කිලෝග්‍රෑම් 5ක සිලින්ඩරයක මිල රුපියල් 181.00 කින්ද, කිලෝග්‍රෑම් 2.3 ක සිලින්ඩරයක මිල රුපියල් 83.00 කින් ද අඩු කළ බවත් නව මිල අද (4) මධ්‍යම රාත්‍රියේ සිට ක්‍රියාත්මක වන බවත් මුදිත පිරිස් මහතා කීය.

එම මිල පහත දැමීමත් සමග කිලෝග්‍රෑම් 12.5ක සිලින්ඩරයක මිල රුපියල් 3186.00 ක් දක්වාද, කිලෝග්‍රෑම් 5ක සිලින්ඩරයක මිල රුපියල් 1281 .00 ක් දක්වා ද, කිලෝග්‍රෑම් 2.3ක සිලින්ඩරයක මිල රුපියල් 598.00 දක්වා ද පහත වැටුණු බව මුදිත පීරිස් වැඩිදුරටත් සඳහන් කළේය. 

අභිමානවත් රටක්, ජාතියක් ලෙස අප ඉදිරියට පැමිණියේ මිහිඳු හිමි දෙසු තථාගත දහම හා අනුදැන වදාළ ජීවන මග ඔස්සේ යැයි ජනාධිපති රනිල් වික්‍රමසිංහ පවසයි.

පොසොන් පොහොය වෙනුවෙන් පණිවුඩයක් නිකුත් කරමින් ජනාධිපතිවරයා පැවසුවේ, විශේෂයෙන්ම වැව, කෙත, දාගැබ මත ස්වයංපෝෂිත වූ ආර්ථිකයකට මග පෙන්වූ ධර්ම සංවාදය ද දේශපාලන සමාජ සංස්කෘතික සංවාදය ද බිහිවූයේ මිහිඳු මහරහතන් වහන්සේගේ ආගමනයත් සමග බවයි.

ප්‍රතිපදාගත ධර්ම මාර්ගයේම යමින් රටේ මතුව තිබු, දැන් ක්‍රමිකව විසඳමින් තිබෙන දේශපාලන සමාජ ආර්ථික වියවුල සමනය කොට ශ්‍රී ලංකාව නැවත දියුණු රාජ්‍යයක් ලෙස ලෝකය හමුවේ ඔසවා තැබීමට අප සියලු දෙනා අදිටන් කර යුතු බව ජනාධිපතිවරයාගේ පොසොන් පණිවුඩයේ සඳහන් විය.

අභිමානවත් රටක්, ලෙස අප ඉදිරියට පැමිණියේ මිහිඳු හිමි දෙසූ දහම හා අනුදැන වදාළ ජීවන මඟ ඔස්සේ වන බව විපක්ෂ නායක සජිත් ප්‍රේමදාස  පවසයි.

විපක්ෂ නායකවරයා පැවසුවේ, එය ප්‍රෞඪ ඉතිහාසයක් මෙන්ම දීප්තිමත් අනාගතයක් උදෙසාද අඩිතාලම දමනු ලැබූ බවයි.

බුදු දහමින් ගොඩනැගුණු මහා සංස්කෘතිය, අප මාතෘ භූමිය සිසාරා සෑම ගම් දනව්වකම පැතිර ගියා මෙන්ම අන් ආගම් හා උපසංස්කෘතීන් කෙරෙහි වු සහනශීලි බෞද්ධ පිළිවෙත සමගියේ හා සහජීවනයේ පදනම බවට පත්වූ බව විපක්ෂ නායකවරයා පොසොන් පොහොය වෙනුවෙන් නිකුත් කළ පණිවුඩයේ දැක්විය.

දේශගුණික විපර්යාස පිළිබඳ යෝජිත ජාත්‍යන්තර විශ්වවිද්‍යාලය ලබන වසරේ දී ආරම්භ කිරීමට අපේක්ෂා කරන බව ජනාධිපති රනිල් වික්‍රමසිංහ මහතා පැවසීය.

ජනාධිපතිවරයා මේ බව සඳහන් කළේ දේශගුණික විපර්යාස පිළිබඳ ජනාධිපති ජ්‍යෙෂ්ඨ උපදේශක රුවන් විජේවර්ධන මහතා ප්‍රමුඛ දේශගුණික විපර්යාස පිළිබඳ ලේකම් කාර්යාලයේ නිලධාරීන් සමඟ පසුගියදා ජනාධිපති කාර්යාලයේ පැවති සාකච්ඡාවේදී ය.

දේශගුණික විපර්යාස පිළිබඳ පර්යේෂණ සඳහා ජාත්‍යන්තර පිළිගැනීමකට ලක්වූ විද්‍යාඥයින් 130 දෙනෙකුගෙන් පමණ සමන්විත කණ්ඩායමක් විශ්වවිද්‍යාල ප්‍රතිපාදන කොමිෂන් සභාව විසින් මේ වන විට හඳුනාගෙන ඇති බවද මෙහිදී අනාවරණය විය. එම විද්‍යාඥයන්ගේ ජාත්‍යන්තර සබඳතා මෙම විශ්වවිද්‍යාලයේ ක්‍රියාකාරිත්වය සඳහා දායක කර ගැනීම අරමුණයි.

බිල් සහ මෙලින්ඩා ගේට්ස් පදනමේ දේශගුණික විපර්යාස පිළිබඳ ජාත්‍යන්තර විශේෂඥයින් කණ්ඩායමකට මෙම වසරේ ජුලි, අගෝස්තු මාසවල මෙරටට පැමිණීමට සිදුකර ඇති ආරාධනය පිළිබඳව ද මෙහිදී සාකච්ඡාවට ලක් වූ අතර දේශගුණික විපර්යාස සම්බන්ධව කටයුතු කිරීමට අවශ්‍ය ප්‍රතිපත්ති පිළිබඳ සාකච්ඡා කිරීම, එම සාකච්ඡාවලින් ලබා ගන්නා තොරතුරු ගවේෂණය සහ ගෝලීය පරිසර ගැටලු සාකච්ඡා කිරීම ඔවුන්ගේ සංචාරයේ අරමුණ බව ද සඳහන් කෙරිණි.

යෝජිත දේශගුණික විපර්යාස පිළිබඳ විශ්වවිද්‍යාලය ආරම්භ කිරීම සඳහා සහාය වීමට කොරියානු එක්සිම් බැංකුව ද මේ වන විට ඉදිරිපත්ව සිටින අතර, හාවඩ් සහ එම්.අයි.ටී. (MIT) වැනි කීර්තිමත් ආයතන ද මෙම විශ්වවිද්‍යාලය සමග සම්බන්ධවිමට කැමැත්ත පළ කර තිබෙන බව ජනාධිපති රනිල් වික්‍රමසිංහ මහතා මෙහිදී පැවසීය.

දේශගුණික විපර්යාස පිළිබඳ ජාත්‍යන්තර විශ්වවිද්‍යාලය පර්යේෂණ සඳහා පමණක් වෙන් වන පශ්චාත් උපාධි ආයතනයක් වන බව පැවසූ ජනාධිපතිවරයා දේශගුණික විපර්යාස ක්ෂේත්‍රයේ සියලු ඉදිරි පර්යේෂණ මෙම ආයතනයේදී පැවැත්වීමට කටයුතු කරන ලෙස ද ඉල්ලා සිටියේය.

විශ්වවිද්‍යාලයේ කටයුතු සඳහා දායක වන ඕනෑම රටකට හෝ සංවිධානයකට විශ්වවිද්‍යාලයේ කොටස්කරුවෙකු වී විශ්වවිද්‍යාල පාලක මණ්ඩලයේ සාමාජිකත්වය ලබාගත හැකි බව ද ජනාධිපතිවරයා කියා සිටියේය.

එසේම මෙම විශ්වවිද්‍යාලය තුළ රාජ්‍ය නිලධාරීන් සඳහා කෙටිකාලීන පාඨමාලා පවත්වාගෙන යාමට ඇති හැකියාව සොයා බලන ලෙස ද ජනාධිපති රනිල් වික්‍රමසිංහ මහතා නිලධාරීන්ට උපදෙස් දුන්නේය.

මීට පෙර පැවති සාකච්ඡාවලදී අවධානය යොමූ වූ දේශගුණික විපර්යාස පිළිබඳ කාර්යාලයක් පිහිටුවීම, හරිත ආර්ථිකයක් නිර්මාණය කිරීම, පරිසර හිතවාදී හරිත සංවර්ධනය සහ නවෝත්පාදන කළමනාකරණය යන ක්ෂේත්‍ර පිළිබඳව ද මෙහිදී දීර්ඝ ලෙස සාකච්ඡාවට ගැනිණි.

සමුද්‍ර දූෂණය වළක්වා ගැනීම සහ විදුලි මෝටර් රථ භාවිතය වැනි ක්ෂේත්‍ර කෙරෙහි යොමුවීමේ දී ශ්‍රී ලංකාව දක්වන පසුගාමීත්වය පිළිබඳව ද අවධානය යොමු වූ අතර එම ගැටලුවලට විසඳුම් සෙවීමේ දී පෞද්ගලික අංශය සහ ජාත්‍යන්තර සංවිධානවල සහාය ලබා ගන්නා ලෙස ජනාධිපතිවරයා බලධාරීන්ට උපදෙස් දුන්නේය.

එක්ස්ප්‍රස් පර්ල් නෞකා සිද්ධිය උදාහරණයක් ලෙස ගෙන මධ්‍යම පරිසර අධිකාරිය, සමුද්‍රීය පරිසර ආරක්ෂණ අධිකාරිය (MEPA) සහ වෙරළ සංරක්ෂණ දෙපාර්තමේන්තුව යන ආයතන තනි අධිකාරියක් යටතට පත් කිරීරමේ අවශ්‍යතාවය අවධාරණය කළ ජනාධිපතිවරයා ඒ තුළින් පාරිසරික ගැටලුවලට වඩාත් ඵලදායී විසඳුම් ලබා ගත හැකිවනු ඇති බව ද පෙන්වා දුන්නේය.

ශ්‍රී ලංකාව කලාපයේ ප්‍රමුඛ නාවික කේන්ද්‍රස්ථානයක් බවට පත් කිරීමේ කටයුතු පිළිබඳව ද මෙහිදී සාකච්ඡාවට ලක් වූ අතර ශ්‍රී ලංකාව තුළ ආපදා වැළැක්වීමේ අධිකාරියක් නොමැතිකම බලවත් ගැටලුවක් බවත්, ආපදා අවස්ථාවලදී ඉන්දියාවෙන් ලැබෙන සහාය මත පමණක්ම රැඳී නොසිට රට තුළ ආපදා පෙර සූදානමක් ඇති කර ගැනීමේ වැදගත්කමත් ජනාධිපතිවරයා පැහැදිළි කළේය.

සමුද්‍රීය පරිසර ආරක්ෂණ අධිකාරියේ (MEPA) ව්‍යසන කළමනාකරණ වැඩසටහන කෙරෙහි ද සාකච්ඡා කෙරුණු අතර ඒ සඳහා සහායවීමට යුරෝපීය නියෝජිත පිරිසක් කැමැත්ත පළ කර තිබෙන බවත්, ජාත්‍යන්තරව පිළිගත් කලාපීය ආපදා කළමනාකරණ වැඩසටහනක් ඇති කිරීම සඳහා මගපෙන්වීමට මෙම යුරෝපීය කණ්ඩායම ජුනි 12 වැනිදා ශ්‍රී ලංකාවට පැමිණීමට නියමිත බවත් අනාවරණය කෙරිණි.

පුද්ගලික අංශයේ අරමුදල්වල සහාය ඇතිව වෙනම ආපදා කළමනාකරණ ඒකකයක් පිහිටුවීමට සමුද්‍රීය පරිසර ආරක්ෂණ අධිකාරිය (MEPA) උනන්දුවෙන් පසුවන අතර දේශගුණික විපර්යාස හා සම්බන්ධ සාගරය ආශ්‍රිත කරුණු කෙරෙහි උනන්දුවක් ඇති බාහිර ආයතන කිහිපයකින් ද ඒ සඳහා සහාය ලැබී ඇති බවත් සඳහන් විය.

විදේශ කටයුතු අමාත්‍ය අලි සබ්‍රි, පරිසර අමාත්‍ය නසීර් අහමඩ්, ජනාධිපති ලේකම් සමන් ඒකනායක, ආර්ථික කටයුතු පිළිබඳ ජනාධිපති ජ්‍යෙෂ්ඨ උපදේශක ආචාර්ය ආර්.එච්.එස්. සමරතුංග, ජනාධිපති උපදේශක ආචාර්ය ආනන්ද මල්ලවතන්ත්‍රි, විදේශ කටයුතු අමාත්‍යාංශයේ ලේකම් අරුණි විජේවර්ධන, පරිසර අමාත්‍යාංශයේ ලේකම් ආචාර්ය අනිල් ජාසිංහ, ජනාධිපති ජාත්‍යන්තර කටයුතු පිළිබඳ අධ්‍යක්ෂ දිනූක් කොළඹගේ යන මහත්වරු සහ රේඛීය ආයතනවල නිලධාරීහු මෙම සාකච්ඡාවට එක්ව සිටියහ.

රට හරි තැනකට ගැනීම සඳහා ජනාධිපති රනිල් වික්‍රමසිංහ තව වසර පහකට රටේ මුල් පුටුවේ සිටිය යුතු බව දේශගුණ විපර්යාස පිළිබඳ ජනාධිපති ජ්‍යෙෂ්ඨ උපදේශක සහ එක්සත් ජාතික පක්ෂයේ නියෝජ්‍ය නායක රුවන් විජේවර්ධන පවසයි.

2048 වසර වන විට මේ රට සංවර්ධිත රටක් බවට පත්කිරීම වෙනුවෙන් මේ වන විටත් ජනාධිපතිවරයා අඩිතාලම දමාගෙන යන බවද ඔහු සඳහන් කළේය.

දේශගුණ විපර්යාස පිළිබඳ ජනාධිපති ජ්‍යෙෂ්ඨ උපදේශක සහ එක්සත් ජාතික පක්ෂයේ නියෝජ්‍ය නායක රුවන් විජේවර්ධන මේ බව සඳහන් කර සිටියේ පසුගියදා කටුවනදී පැවැත්වූ එක්සත් ජාතික පක්ෂ මුල්ගිරිගල ආසන බලමණ්ඩල රැස්වීම අමතමින්ය.

මුල්ගිරිගල එජාප ආසන සංවිධායක ආනන්ද කුලරත්න මෙම රැස්වීම සංවිධානය කර තිබු අතර රැස්ව සිටි පිරිස අමතමින් ඔහු මෙසේද පැවසීය.

‘අභියෝග බාධා මැද පක්ෂයට විශාල සේවයක් කළ නායකයෙක් මෙතුමා. මේ මුල්ගිරිගල ආසනය ඇතුලු හම්බන්තොට දිස්ත්‍රික්කයේ ජනතාවට විශාල සේවයක් කල නායකයෙක් විදියට ආනන්ද කුලරත්න මැතිතුමා හැදින්විය හැකියි.

පක්ශය පවා නොදි නායකත්වය සමග රැදී සිටිමින් නිහතමානි නායකයෙක් ලෙස එතුමා කටයුතු කරා. මේ රටේ දැවැන්ත සංවර්ධන ව්‍යාපෘති වල මුල් අඩිතාලම යොදමින් එතුමා මේ රටට විශාල සේවයක් කරලා තියෙනවා.

දැන් අපේ පක්ෂය ශක්තිමත් කරගෙන ඉදිරියට යන්න කාලය ඇවිත් තිබෙනවා.ගිය වර්ෂයේ අප්‍රේල්, මැයි මාසවල අපි තෙල් පෝලිම්, ගෑස් පෝලිම් වල හිටියේ අපට සිංහල හා දමිළ අවුරුද්ද,වෙසක් සහ පොසොන් උත්සව නිදහසේ සමරන්න අවස්ථාව තිබුණේ නෑ,රට බංකොලොත් වෙලා දැඩි දේශපාලන අස්ථාවර භාවයකට මුහුණ දීලා හිටියේ.

එවකට ජනාධිපති ගෝඨාභය රාජපක්ෂ මැතිතුමාගේ උපදෙස් පරිදි මහින්ද රාජපක්ෂ මැතිතුමා අගමැති ධූරයෙන් ඉල්ලා අස්වුණා. ගෝඨාභය මැතිතුමා පළමුව විපක්ෂනායක සජිත් ප්‍රේමදාස මැතිතුමාට අගමැති ධූරය බාර ගන්න ඇරයුම් කරා.ඒත් එතුමා කොන්දේසි මාලාවක් ඉදිරිපත් කරලා අගමැති ධුරය භාර ගැනීම ප්‍රතික්ෂේප කරා.ඉන්පසුව ගෝඨාභය මහත්තයාගේ උපදේශකවරු එතුමාට පැවසුවා ආර්ථික අර්බුදයට කළමනාකරණය කළ හැකි සුදුසුම පුද්ගලයා රනිල් වික්‍රමසිංහ මැතිතුමා බව. ඒ අනුව ගෝඨාභය මැතිතුමාගෙන් ලද ඇරයුම පිළිගෙන රනිල් මැතිතුමා අපේ පක්ෂ ජේශ්ඨයින් සමඟ සාකච්ඡා කරලා 2022 මැයි 12 අගමැති ධූරය බාරගත්තා.

දැන් එතුමා IMF සමඟ සාකච්ඡා කරලා රටේ ආර්ථිකය නැවත ගොඩනැගීමේ වැඩපිළිවෙළ එතුමා පියවරෙන් පියවර ඉදිරියට අරන් යනවා. රටේ ආර්ථික ප්‍රශ්න 100% ක් විසඳලා අවසන් වෙලා නෑ. ඒත් රනිල් මැතිතුමා පසුගිය වසරක කාලය තුළ රටේ ආර්ථිකය නැවත ප්‍රකෘතිමත් කරන්න සාධණීය ක්‍රියාමාර්ග රැසක් ගෙන තිබෙනවා. ජුනි මස විදුලි බිලෙන් ජනතාවට දැනෙන සහනයක් ලබාදීමට අපේක්ෂිතයි. ඒ වගේම මේ අවුරුද්ද අවසානයේ එතුමා රටේ ජනතාවට සහන රැසක් ලබාදීමට නියමිතයි. කෙතරම් ආර්ථික ගැටලු තිබුණත් එතුමා රටේ දිළිඳු ජනතාව අමතක කළේ නැහැ. ඔවුන්ට සහල් සහනාධාරය,රු. 5000 දීමනාව වැනි සහන ලබා දීලා ඔවුන්ගේ ජීවන තත්ත්වය සුරක්ෂිත කරා.

රනිල් මැතිතුමා තව වසර 5කට රටේ මුල් පුටුවෙ ඉන්න ඕන රට හරි තැනකට ගැනීම සඳහා. 2048 මේ රට සංවර්ධිත රටක් බවට පත් කරන්න එතුමා දැන් අඩිතාලම දාගෙන යනවා.

මේ රටේ ඉතිහාසය දිහා බැලුවොත් අපට නිදහස ලබා දුන්නේ මහාමාන්‍ය ඩී.එස්.සේනානායක මැතිතුමා, මේ රට කෘෂිකාර්මික විප්ලවයකට යොමුකරමින් බත් දුන් පියා ලෙස විරුදාවලිය ලැබුවේ ඩඩ්ලි සේනානායක මැතිතුමා,මේ රටට විවෘත ආර්ථිකය හදුන්වා දුන්නේ ජේ. ආර්. ජයවර්ධන මැතිතුමා.මේ රටේ දුප්පත් අහිංසක ජනතාවට නිවාස හිමිකම් ලබා දුන්නේ රණසිංහ ප්‍රේමදාස මැතිතුමාය.

මේ වගේ දැවැන්ත නායකයින් සිටිය රටේ ආර්ථිකය ගොඩනගපු පක්ෂය තමා එක්සත් ජාතික පක්ෂය.ජනාධිපති රනිල් වික්‍රමසිංහ මැතිතුමා මේ රටේ සියලු පාර්ශව එකතු කරගෙන රටේ ප්‍රශ්න විසඳන අවස්ථාවේ එතුමාගේ කකුලෙන් අදින කණ්ඩායමක් තවම ඉන්නවා.

මේ රටේ නැවත ආගම් භේදයක් ඇති කරන්න තවත් කණ්ඩායම් සමාජ මාධ්‍ය උපයෝගී කරගෙන උත්සාහ ගන්නවා.එදා ඩී. එස්. සේනානායක මැතිතුමා මේ පක්ෂය හදලා සියලු බලවේග එක මිටට ගෙන නිදහස දිනාගන්න කටයුතු කල ආකාරයට රටේ සියලු පක්ෂ එකතු කරගෙන මේ රට හරි තැනකට ගන්න රනිල් මැතිතුමා උත්සාහ කරන්නේ. මේ රට සංවර්ධිත රටක් කරන්න නම් අපි ශ්‍රී ලාංකිකයන් වශයෙන් එක මිටට එකමුතු විය යුතුයි .

ලබන වසරේ පැවැත්වෙන ජනාධිපතිවරණයෙන් පසු පැවැත්වෙන මහ මැතිවරණයෙන් එක්සත් ජාතික පක්ෂයට පැහැදිලි ජන වරමක් ලබාගැනීමට ඔබ තමුන් වහන්සේලාගේ සහය අපට අවශ්‍යයි. අපේ පක්ෂය හැරගිය පිරිස් නැවත පක්ෂය වටා මේ වන විට නැවත ගොනු වෙනවා. මුල්ගිරිගල ආසනයේ පක්ෂ සංවිධාන ශක්තිය පෙරටම ගෙන යෑමට ඔබතමුන් වහන්සේලා ආනන්ද කුලරත්න මැතිතුමාට නිබඳ සහයෝගය ලබා දෙන්න’

විකාශන නියාමන කොමිසම පිහිටුවීම පිළිබඳව මෙතෙක් අවසන් තීරණයක් ගෙන නොමැති බව අධිකරණ අමාත්‍ය විජේදාස රාජපක්ෂ සඳහන් කරයි.

ගුවන් විදුලි හා රූපවාහිනී නාලිකා සදහා බලපත්‍ර ලබාදීම ප්‍රමිතියකින් යුතුව නියාමනය කිරීම සදහා ක්‍රමවේදයක් සකස් කිරීමට අමාත්‍ය මණ්ඩල අනුකමිටුව විසින් මේ වන විට යෝජනා මාලාවක් පමණක් සකස් කර ඇති බවද අමාත්‍යවරයා පැවසූ අතර ඒ මාධ්‍ය හමුවකදී අදහස් දක්වමින්ය.

ඉදිරියේදී මේ පිළිබදව සාකච්ඡා කර සුදුසු පරිදි පනතක් සකස් කිරීමට නියමිත අතර ඒ සඳහා මාධ්‍ය ආයතන ප්‍රධානීන්ට තම යෝජනා අදහස් ඉදිරිපත් කළ හැකි බවත් ඊට අදාළව එළඹෙන 07 වනදා මාධ්‍ය ආයතන ප්‍රධානීන් සමග ජනමාධ්‍ය අමාත්‍යාංශය විසින් විශේෂ සාකච්ඡාවක් පැවැත්වීමට නියමිත බවත් අමාත්‍යවරයා වැඩිදුරටත් සඳහන් කර සිටියේය.

පසුගියදා වැලිකඩ පොලිසිය විසින් අත්අඩංගුවට පත්වීමෙන් පසුව රාජකුමාරි නැමැති කාන්තාවක් මරණයට පත්වූ බව සඳහන් සිදුවීමට අදාළ පරීක්ෂණ කටයුතු කඩිනම් කරන ලෙස කොළඹ මහෙස්ත්‍රාත් අධිකරණය අද (02) අපරාධ පරීක්ෂණ දෙපාර්තමේන්තුවට නියෝග කළේය.

ඒ අදාළ පැමිණිල්ල අද කොළඹ අතිරේක මහෙස්ත්‍රාත් බණ්ඩාර ඉලංගසිංහ හමුවේ කැඳවනු ලැබූ අවස්ථාවේය.

එහිදී අපරාධ පරීක්ෂණ දෙපාර්තමේන්තුවේ නිලධාරීන් අධිකරණයට කරුණු දක්වමින් පවසා ඇත්තේ මියගිය කාන්තාව අවසන් වශයෙන් රැඳී සිටි ස්ථානයේ CCTV දර්ශන ලබාදෙන ලෙස ඉල්ලීම් කළත් ඒවා මෙතෙක් ලබා දී නොමැති බවය.

ඒ අනුව අදාළ දර්ශන ලබාගැනීම සඳහා නියෝගයක් නිකුත් කරන මෙන් ද අපරාධ පරීක්ෂණ දෙපාර්තමේන්තුව අධිකරණයට දන්වා සිටියේය.

අගතියට පත් පාර්ශ්වය වෙනුවෙන් පෙනී සිටි නීතිඥ මංජුල පතිරාජ අධිකරණය අවිය කරන් දක්වමින් මියගිය තැනැත්තියගේ දේහය මඟදමා තිබියදී සොයා ගත් බව පොලිස් නිලධාරීන් ප්‍රකාශ කළ ද එසේ මෘත ශරීරයක් සොයාගත් විට අනුගමනය කළ යුතු නීතිමය ප්‍රතිපාදන පවතින බවද පැවසුවේය.

එවැනි දෙයක් සිදු වූ විට අධිකරණ පෝරම සම්පූර්ණ කිරීම, සාක්කු සටහන් යෙදීම, රෝහල් පොලිස් මුරපොළ දැනුවත් කිරීම වැනි කටයුතු කටයුතු සිදුකළ යුතු වූවත් මෙම සිද්ධියේ දී එවැනි ක්‍රියාමාර්ග අනුගමනය කිරීමක් සිදු වී නොමැති බවට සැක පහළ වී ඇති හෙයින් ඒ පිළිබඳව සොයා බලන නියෝගයක් නිකුත් කරන ලෙසද නීතිඥවරයා ඉල්ලා සිටියේය.

ඒ අනුව මියගිය කාන්තාව අවසන් වශයෙන් රැඳී සිටි ස්ථානයේ CCTV දර්ශන හා ජාතික රෝහලේ සටහන් ලබාගෙන විමර්ශන සිදුකරන ලෙස මහෙස්ත්‍රාත්වරයා විසින් අපරාධ පරීක්ෂණ දෙපාර්තමේන්තුවට නියෝග කළ අතර එම විමර්ශනවල ප්‍රගතිය ලබන 21දා වාර්තා කරන ලෙස ද නියෝග කළේය.

2022 වර්ෂයේ ජාතික පාසල් ගුරු මාරු කිරීම් සම්බන්ධයෙන් අධ්‍යාපන අමාත්‍යාංශය විශේෂ නිවේදනයක් නිකුත් කර ඇති අතර ඊට අනුව 2021/12/31 වන දිනට සේවා කාලය සම්පූර්ණ කළ හා ගුරු ස්ථාන මාරු ලිපි ලැබී ඇති සියලුම ගුරුවරු ජූනි මස 12 වනදා වන විට සේවා ස්ථානයට වාර්තා කළ යුතුව ඇත.

එසේම යම් ගුරුවරයෙකුට අභියාචනයක් ඉදිරිපත් කිරීමට අවශ්‍ය නම්, සේවයට වාර්තා කිරීමෙන් පසු විදුහල්පති මඟින් අභියාචනය ගුරු මාරු අංශයට යොමු කළ හැකි බව ද අදාළ නිවේදනයේ සඳහන් වෙයි.

මේ සම්බන්ධව අධ්‍යාපන අමාත්‍යාංශයේ ගුරු මාරු අංශයට පෞද්ගලිකව පැමිණීම අවශ්‍ය නොවන බව ද ගුරුවරුන්ට දැනුම් දී ඇත.

මේ අතර අභියාචනයට යොමු කළ අයදුම්පත් පිළිබඳ අභියාචනා තීරණය කඩිනමින් දැනුම් දෙන බව ද අදාළ නිවේදනයේ වැඩිදුරටත් සඳහන් වෙයි.

2024 ජනවාරි පළමු දින හෝ ඊට පසු වයස අවුරුදු 18ට එළඹෙන සියලු තැනැත්තන් ආදායම් බදු දෙපාර්තමේන්තුවේ බදු ලිපිගොනු විවෘත කළ යුතු බවට ජනාධිපති රනිල් වික්‍රමසිංහ විසින් නිකුත් කළ ගැසට් නිවේදනයකින් ප්‍රකාශ කෙරෙයි.

එයට අමතරව, වෛද්‍ය, ඉංජිනේරු, නීතීඥ, ගණකාධිකාරී, බැංකු, වාස්තු විද්‍යා ඇතුළු ක්ෂේත්‍ර කිහිපයක නියැලෙන තැනැත්තන් (ජුනි 1) සිට දේශීය ආදායම් දෙපාර්තමේන්තුවේ ලියාපදිංචි වීම අනිවාර්ය කරමින් ගැසට් නිවේදනයක් නිකුත් කර තිබේ.

මුදල්, ආර්ථික ස්ථායිකරණ අමාත්‍යවරයා ලෙස ජනාධිපති රනිල් වික්‍රමසිංහ විසින් මෙම ගැසට් නිවේදනය නිකුත් කර ඇත.

අදාළ ගැසට් නිවේදනය අනුව මෙලෙස ‌දේශීය ආදායම් දෙපාර්තමේන්තුවේ ලියාපදිංචි වීම අනිවාර්ය වන පිරිස කවුද?

ශ්‍රී ලංකා වෛද්‍ය සභාවේ ලියාපදිංචි වෛද්‍යවරුන්

මීට වසරකට පෙර තිබූ තත්ත්වයට රට යළි ඇද දැමීමට කිසිවෙකුට ඉඩ නොදෙන බව ජනාධිපති රනිල් වික්‍රමසිංහ  පවසයි.

ඒ අනුව ජනාධිපතිවරයා අවධාරණය කළේ තම අරගලය 2048 වන විට ලෝකයේ පූර්ණ සංවර්ධිත රටක් බවට ශ්‍රී ලංකාව පත් කිරීම බවය.

ජනාධිපතිවරයා මේ බව සඳහන් කළේ “ජාතික පරිවර්තන මාර්ග සිතියම” රටට ඉදිරිපත් කරමින් විශේෂ ප්‍රකාශයක් සිදු කරමිනි.

"මම රටේ ආර්ථිකය හැසිරවීමේ වගකීම භාරගත් දින පටන්ම මම විටින් විට ආර්ථිකය පිළිබඳ සැබෑ තොරතුරු හෙළිදරව් කළා."

"මට අවශ්‍ය වුණේ ආර්ථිකයේ සැබෑ චිත්‍රය සෑමවිටම ඔබ හමුවේ තැබීමට."

"රට වෙනුවෙන් සිදුකළ යුතු කාර්යභාර්ය පිළිබඳවත් මම ඔබව දැනුවත් කළා."

"පීඩාකාරී ආර්ථිකයකින් දුක්විඳිමින් සිටි අප දැන් ක්‍රමක්‍රමයෙන් සහනදායී මට්ටමකට එළඹෙමින් සිටිනවා. දුර්වල ආර්ථිකය කිසියම් ස්ථාවර මට්ටමකට පත්වෙමින් තිබෙනවා."

"පසුගිය කාලයේ අපි ක්‍රියාත්මක කළ නිවැරදි පිළිවෙත් නිසා මෙම තත්ත්වය අපිට උදා කරගන්න පුළුවන් වුණා. ඒ වගේම අපි එකතුවී අභියෝගයන්ට මුහුණ දුන් නිසා."

"තව ටික කාලයක් මේ මාර්ගයේම ඉදිරියට යෑමෙන් දුෂ්කරතා සහ පීඩාවන් අවම කරගනිමින් යහපත් ආර්ථිකයක් නිර්මාණය කරගැනීමට පුළුවන්කම ලැබෙනවා. ශ්‍රී ලංකාව දැන් වර්ධනාත්මක සමෘද්ධිමත් ගමනක් යෑමට සූදානම්."

"අපේ ගමන ඉදිරියට යාමට අනුගමනය කළයුතු පිළිවෙත් මම අද ඔබට ඉදිරිපත් කරනවා."

"යහපත් අනාගතයක් ගොඩනැංවීම වෙනුවෙන් අප වර්තමානයේ මෙම පියවර ගතයුතුමයි. මෙහිදී අප ගන්නා තීරණ දුෂ්කර මෙන්ම වේදනාකාරී වෙන්න පුළුවන්. ජනප්‍රිය නොවන්න පුළුවන්."

"නමුත් රට යළිත් ඉහළට ඔසවා තැබීමට හැකිවන්නේ ඒ තුළින්."

"සාම්ප්‍රදායික දේශපාලනයේ යෙදෙන ඇතැම් කණ්ඩායම් ආර්ථීක පුනර්ජීවනය වළක්වාලීමට විවිධ උත්සාහයන් ගන්නවා."

"ආර්ථික ප්‍රතිසංස්කරණ පිළිබඳ බොරු බියක් ජනතාව තුළ ඇති කරන්න වෙහෙස වෙනවා. රට විකුණන්න යනවා කියන සටන් පාටයෙන් තවදුරටත් ජනතාව මුලා කරන්න උත්සාහ ගන්නවා."

"2048 වනවිට ලෝකයේ පූර්ණ සංවර්ධිත රාජ්‍යක් බවට පත්වීමේ අපේ ඉලක්ක ඉටුකර ගැනීමට අපේ ආර්ථිකය හැඩගස්වා ගත යුතුයි."

"බංකොලොත් රටක් පැරණි ක්‍රමවේදවලින් ගොඩගැනීම සිදුකළ නොහැකියි. ඒ නිසා අපි අලුතින් සිතා අලුත් ගමනක් ආරම්භ කළ යුතුයි."

"ආර්ථික ප්‍රතිසංස්කරණවලින් ජීවන මට්ටම ඉහළ යනවා. එය වරදක් ද?. ව්‍යාපාර සඳහා නව අවස්ථා නිර්මාණය වෙනවා."

"රුපියල් මිලියන ගණනක පාඩු පියවා ගැනීම සඳහා ජනතාවට බර පැටවීමේ සම්ප්‍රදාය අවසන් වෙනවා.ලෝකයේ වඩාත්ම වේගවත් වර්ධනයක් සහිත රටක් බවට ශ්‍රී ලංකාව පත්වෙනවා."

"මේ ප්‍රතිසංස්කරණ ඔස්සේ අපේ වෙළෙඳපොළ පුළුල්කර ගැනීමටත් අවකාශ සැලසෙනවා."

"මේ ගමන ලෙහෙසි පහසු ගමනක් නොවේ. බොහෝ අභියෝගවලට මුහුණ දෙන්න වෙනවා."

"මීට වසරකට පමණ පෙර රට ඇදවැටී තිබූ තත්ත්වයට යළි රට ඇද දැමීමට අපි කිසිවෙකුටවත් ඉඩ දෙන්නේ නැහැ."

"දැන් සමහරුන්ට අමතකයි. රටේ ආර්ථිකය -7.8කි ඇකිලුනා. විදේශ විනිමය සංචිතය අන්තිම අඩියට වැටුණා. රට බංකොළොත් වුණා. දින ගණන් පෝලිම්වල ඉන්න වුණා. ආහාර හිඟ වුණා. රැකියා ආදායම් මාර්ග නැති වුණා. විදුලි බල කප්පාදු තිබුණා. ජනතාව නොසන්සුන් වුණා."

"රට භාරගත් වෙලාවේ මට තිබුණු එකම ශක්තිය මේ අසීරු වැල් පාලමෙන් එගොඩ කරන්න හැකි බවට මා තුළ විශ්වාසය හා අධිෂ්ඨානය පමණයි."

"අප මුලින්ම රට දැඩි මූල්‍ය පාලනයකට යටත් කළා. IMF සහාය ලබාගත්තා. ලෝක බැංකුව සහ ආසියානු සංවර්ධන බැංකුව ඇතුළු වෙනත් මූල්‍ය ආයතන සමග එක්ව රටට ණය ආධාර ලබාගැනීමේ වැඩසටහන් ආරම්භ කළා."

"මෙහිදී අපිට අසල්වැසි ඉන්දියාව විශාල ලෙස සහාය වුණා, බංග්ලාදේශය, ජපානය, චීනය, පැරිස් සමාජය අපේ ණය ප්‍රතිව්‍යුහගත කරන්න එකඟ වුණා. අපේ විදේශ ශ්‍රමිකයින් උපරිම ලෙස දායක වුණා."

"2022 වසර හා සසඳන විට මේ වසරේ මුල් කාර්තුවේ විදේශීය ශ්‍රමිකයින් එවන මුදල් 80.6%කින් ඉහළ නැංවී තිබෙනවා. නව බදු ප්‍රතිපත්ති නිසා 2023 පළවෙනි කාර්තුවේ රුපියල් බිලියන 210ක අතිරේක ආදායමක් ලබා තිබෙනවා.

"70%ක් දක්වා ඉහළ නංවා තිබුණු උද්ධමනය දැන් 25.2% දක්වා පහත වැටිලා. මේ නිසා ජීවන බර ක්‍රමක්‍රමයෙන් පහසු වෙලා. සමාජයටම ඒක දැනෙමින් පවතිනවා."

"මෙතැන් පටන් අපි ඉදිරියට යන්නේ, අපේ ඊළඟ ක්‍රියාපිළිවෙත ප්‍රධාන කුලුනු 04ක් මත ක්‍රියාත්මක වෙනවා."

1. රාජ්‍ය මූල්‍ය සහ ප්‍රතිසංස්කරණ
2. ආයෝජන ප්‍රවර්ධනය
3. සමාජ ආරක්ෂණ ජාලය
4. රාජ්‍ය ව්‍යවසාය ප්‍රතිසංස්කරණ

අපරාධ පරීක්ෂණ දෙපාර්තමේන්තුවේ අත්අඩංගුවට පත්, සමාජ මාධ්‍ය ක්‍රියාකාරි බෲනෝ දිවාකර  ලබන 7 වැනි දා දක්වා රක්ෂිත බන්ධනාගාරගත කර තිබේ.
ඒ, අද (01) කොටුව මහේස්ත්‍රාත් අධිකරණයට ඉදිරිපත් කිරීමෙන් අනතුරුවයි.

සමාජ මාධ්‍ය ක්‍රියාකාරි බෲනෝ දිවාකර අපරාධ පරීක්ෂණ දෙපාර්තමේන්තුවේ පරිගණක අපරාධ කොට්ඨාසය විසින් අත්අඩංගුවට ගත්තේ ඊයේ (31) පස්වරුවේදීයි.

පොලීසිය පැවසුවේ, නතාශා එදිරිසූරිය  කරන ලද ප්‍රකාශය සාමාජ මාධ්‍ය වෙත මුදා හැරීම හේතුවෙන් ඔහු අත්අඩංගුවට ගත් බවයි.

ඉතාලියේ රැකියාවල නිරත වන ශ්‍රී ලාංකිකයන්ට මෙරට වලංගු රියැදුරු බලපත්‍රය එරටදී භාවිත කිරීම සඳහා අවසර ලබා දීමට ශ්‍රී ලංකාවේ ඉතාලි තානාපතිනි රීටා මනෙල්ලා  අධිකරණ, බන්ධනාගාර කටයුතු හා ව්‍යවස්ථා ප්‍රතිසංස්කරණ අමාත්‍ය ආචාර්ය විජයදාස රාජපක්ෂ වෙත එකඟතාව පළ කර තිබේ.

ඉතාලියේ රැකියාවල නිරත ලක්ෂ සංඛ්‍යාත ශ්‍රී ලාංකිකයන්ට මෙතෙක් කලක් ගැටලුවක්ව පවතින අන්තර්ජාතික රියැදුරු බලපත්‍ර ලබාගැනීමේ දුෂ්කරතාව මගහැරවීමට අවශ්‍ය පියවර ගන්නා ලෙසට අමාත්‍යවරයා ඉතාලි තානාපතිනියගෙන් කරන ලද ඉල්ලීමකට අනුව එම එකඟතාව පළ කර ඇත.

එමෙන් ම, මෙරට සිටින ඉතාලි ජාතිකයන්ට එරට රියැදුරු බලපත්‍රය මෙරටදී භාවිත කිරීම සඳහා අවශ්‍ය පියවර ගන්නා බවට ද අමාත්‍යවරයා ඉතාලි තානාපතිනියට මෙහිදී දැනුම් දී තිබේ.

අමාත්‍යවරයා හා ඉතාලි තානාපතිනිය අතර අධිකරණ අමාත්‍යාංශයේ පැවති විශේෂ සාකච්ඡාවකදී මෙම එකඟතාවට පැමිණ තිබේ.

මේ සම්බන්ධයෙන් මෝටර් රථ ප්‍රවාහන දෙපාර්තමේන්තුව සමග සාකච්ඡා කර අවශ්‍ය පියවර ගන්නා බවට ද අමාත්‍යවරයා ඉතාලි තානාපතිනියට දැනුම් දී ඇත.

විවිධ රැකියාවල නිරතව ඉතාලියේ ජීවත් වන ශ්‍රී ලාංකිකයන්ගේ සුබසාධන කටයුතු මෙන් ම, පොදු කටයුතුවලදී ඔවුන්ට අවශ්‍ය සහය ලබා දෙන ලෙසට ද මෙහිදී අමාත්‍යවරයා ඉතාලි තානාපතිනියගෙන් ඉල්ලා ඇත.

බොහෝ කලෙක සිට දෙරට අතර පවත්නා මිත්‍රත්වය තවදුරට ත් වර්ධනය කර ගැනීමට ද දෙපාර්ශවය සිය කැමැත්ත පළ කර තිබේ.

සමෘද්ධි බැංකු කාලයක් තිස්සේ විගණකාධිපතිවරයාගේ විගණනයට යටත්වී නොපවතින හෙයින් වහාම එම බැංකුද විගණනයට යටත් කිරීමට පියවර ගන්නා ලෙස රාජ්‍ය ගිණුම් පිළිබඳ පාර්ලිමේන්තු කාරක සභාව (කෝපා ) නිලධාරීන්ට උපදෙස් දුන්නේය.

සමෘද්ධි බැංකු සමෘද්ධි දෙපාර්තමේන්තුව යටතේ ඇති බැවින් ඒවා විගණනයට යටත් කිරීම සුදුසු බව විගණකාධීපතිවරයා සඳහන් කළේය.

මේ සම්බන්ධයෙන් මත දෙකක් පවතින හෙයින් නීතිපතිවරයාගේ උපදෙස් ඉල්ලා ඇතැයි සමෘද්ධි සංවර්ධන දෙපාර්තමේන්තුවේ නිලධාරීහු පැවසූහ.

දමන ප්‍රාදේශීය ලේකම් කොට්ඨාසයේ සමෘද්ධිලාභීන්ට මාලු දැල් ලබාදීමේදී විශාල මූල්‍ය අක්‍රමිකතාවක් සිදුවී ඇතැයි තොරතුරු අනාවරණයවූ බව කෝපා කමිටුව පවසයි.

මීට සම්බන්ධ ප්‍රාදේශීය ලේකම්වරයා සහ සමෘද්ධි නිලධාරීන් ඇතුළු නිලධාරීන්ට දඩුවම් හිමිවියයුතු බැවින් රාජ්‍ය පරිපාලන අමාත්‍යාංශ මට්ටමින් පරීක්ෂණයක් කිරීමට එම අමාත්‍යාංශ ලේකම්වරයාට ලිපියකින් දන්වන බව කෝපා සභාපතිවරයා පැවසීය.

ප්‍රගතිය සමාලෝචනය කිරීම සඳහා සමෘද්ධිය සංවර්ධන දෙපාර්තමේන්තුවේ ප්‍රධානීන් රාජ්‍ය ගිණුම් පිළිබඳ පාර්ලිමේන්තු කාරක සභාව හමුවට පසුගියදා කැඳවා තිබූ අතර එහිදී මෙම තොරතුරු අනාවරණය විය.

දෙපාර්තමේන්තුවට 2023 අප්‍රේල් 30 වනවිට 22646 ක් වූ සමස්ත සේවක සංඛ්‍යාවෙන් 17512 දෙනකු අන්තර්ග්‍රහණය කර ඇතත් ඉතිරි පිරිස අන්තර්ග්‍රණය කිරීම ප්‍රමාද වීම සහ නිලධාරීන් 3027කට විධිමත් පත්වීම් ලිපි ලබාදී නොතිබීම පිළිබඳවද මෙහිදී සාකච්ඡා කෙරිණ. 2015 වසරේ කැබිනට් තීරණයක් අනුව මෙම නිලධාරීන්ගේ පත්වීම් හා විනය බලධරයා සමෘද්ධි අධ්‍යක්ෂ ජනරාල් ලෙස සැලකීම නිසා මෙම අනුමත කිරිම් කළ යුත්තේ රාජ්‍ය සේවා කොමිෂන් සභාවද නැතහොත් කළමනාකරණ සේවා දෙපාර්තමේන්තුවද යන්න ගැටලු සහගතවූ බව නිලධාරීහු පැවසුහ.

මේ අනුව මෙම නිලධාරීන්ගේ බදවා ගැනීම හා උසස්වීමේ පටිපාටි රාජ්‍ය සේවා කොමිෂන් සභාවේ අනුමතියට යොමුකිරීමට පියවර ගෙන ඇති බවද එම නිලධාරීහු සඳහන් කළහ.

එසේම දේශපාලනික කරුණු හේතුවෙන් දෙපාර්තමේන්තුවේ පරිපාලනයේ යම් අපහැදිළිතා නිර්මාණයවී ඇති බැවින් කඩිනමින් එම ගැටලු විසදා කාර්යක්ෂම සේවාවක් ලබාදීමේ අවශ්‍යතාව කමිටුව අවධාරණය කළේය.

සමෘද්ධි බැංකු පද්ධිතිය පරිගණකගත කිරීමේ වැඩපිළිවෙල පිළිබදවද අවධානය යොමුවිය. මෙහිදී සමෘද්ධි අධ්‍යක්ෂ ජනරාල්වරයා පැවසුවේ මෙම ක්‍රියාවලිය දැනටමත් දිස්ත්‍රික්ක පහක ආරම්භ කර ඇති බවයි. මේ වසරේ දෙසැම්බර් මාසය වනවිට බැංකු ජාලගත කිරීම අවසන් කරන බවද ඔහු සඳහන් කළේය.

සමෘද්ධි සංවර්ධන දෙපාර්තමේන්තුවේ ප්‍රධානීන් ලබන වසරේ ජනවාරි මාසයේදී කෝපා කමිටුව හමුවට නැවතත් කැඳවීමට මෙහිදී තීරණය කෙරිණ

මෙම සාකච්ඡාවට රාජ්‍ය අමාත්‍ය ඩයනා ගමගේ, පාර්ලිමේන්තු මන්ත්‍රීවරුන් වන මනෝ ගනේශන්, ඩී.වීරසිංහ, ආචාර්ය හරිනි අමරසූරිය ද, සභාපතිවරයාගේ අවසරය මත රාජ්‍ය අමාත්‍ය අනුප පැස්කුවල් සහ පාර්ලිමේන්තු මන්ත්‍රී ජගත් කුමාර සුමිත්‍රාආරච්චි ද එම අවස්ථාවට සහභාගිව සිටියහ.

නතාෂා එදිරිසුරිය බෞද්ධ දර්ශනයට සහ සංස්කෘතියට අපහාස වන අයුරින් කළ ප්‍රහසන වැඩසටහන යු ටියුබ් නාලිකාවට ඔස්සේ අන්තර් ජාලයට මුදා හරිමින් ඇයට ආධාර අනුබල ලබා දුන් බව කියන බෲනෝ දිවාකර අද (31) පස්වරුවේ අත්අඩංගුවට ගත් බව අපරාධ පරීක්ෂණ දෙපාර්තමේන්තුව සඳහන් කරයි.

යු ටියුබ් නාලිකාවක් පවත්වාගෙන යමින් අදාල පුද්ගලයා ආගමික නිදහසට හානි වන ආකාරයේ ප්‍රකාශ ප්‍රචාරය කරමින් එයට ආධාර අනුබල ලබා දීම සම්බන්ධයෙන් අපරාධ පරීක්ෂණ දෙපාර්තමේන්තුව බෲනෝ සම්බන්ධයෙන් විමර්ශන ආරම්භ කර ඇත.

එම විමර්ශනයට අදාලව ප්‍රකාශයක් ලබා ගැනීම සදහා බෲනෝ දිවාකර අද දහවල් අපරාධ පරීක්ෂණ දෙපාර්තමේන්තුව හමුවට කැඳවා තිබු අතර පැය 8 ක ආසන්න කාලයක් ප්‍රකාශ ලබා ගැනීමෙන් පසුව අද පස්වරුවේ අත්අඩංගුවට ගත් බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි නීතිඥ නිහාල් තල්දූව මහතා පවසයි.

අත්අඩංගුවට ගත් බෲනෝ දිවාකරගෙන් ප්‍රකාශ ලබා ගැනීමෙන් පසු ඔහු හෙට (1) දිනයේ අධිකරණයට ඉදිරිපත් කිරීමට නියමිතයි .

ශ්‍රී ලංකාවේ ආර්ථිකය ප්‍රකෘතිමත් කිරීම වෙනුවෙන් පසුගිය මාස 09ක කාලය තුළ රජය ගෙන ඇති පියවර සහ ශ්‍රී ලංකා රාජ්‍යයේ සමාජ, ආර්ථික හා දේශපාලන ප්‍රතිසංස්කරණ වැඩපිළිවෙළෙහි ඉදිරි පියවරයන් සම්බන්ධයෙන් ජනාධිපති රනිල් වික්‍රමසිංහ විසින් විශේෂ ප්‍රකාශයක් සිදු කිරීමට නියමිතය.

එම විශේෂ ප්‍රකාශය හෙට (01) රාත්‍රී 8.00ට මෙරට ලියාපදිංචි සියලුම රූපවාහිනී, ගුවන්විදුලි සහ නව මාධ්‍ය අවකාශ ඔස්සේ සමස්ත මහජනතාවගේ දැනගැනීම සහ අවබෝධය උදෙසා විකාශය කිරීමට සැලසුම් කර තිබේ.

එමඟින් ශ්‍රී ලංකාවේ ජාතික පරිවර්තන මාර්ග සිතියම පිළිබඳ පැහැදිලි අවබෝධයක් මහජනතාවට ලබාගත හැකි අතර, එහිදී අපේක්ෂිත ඉලක්ක සාක්ෂාත් කර ගැනීම සඳහා වන මෙහෙයුම් යෝජනාවලිය ද ඉදිරිපත් කිරීමට නියමිතය.

ජනාධිපති රනිල් වික්‍රමසිංහ සහ ජාත්‍යන්තර මූල්‍ය අරමුදලේ නියෝජ්‍ය කළමනාකාර අධ්‍යක්ෂ කෙන්ජි ඔකමුරා (Kenji Okamura) අතර හමුවක් අද (31) පස්වරුවේ ජනාධිපති කාර්යාලයේ දී පැවැත්විණි.

ශ්‍රී ලංකාව සහ ජාත්‍යන්තර මූල්‍ය අරමුදල අතර වැඩසටහනේ ප්‍රගතිය පිළිබඳ මෙහිදී දීර්ඝ ලෙස කරුණු සාකච්ඡා විය.

එමෙන්ම දැනට පවතින ණය ප්‍රතිව්‍යුහගත කිරීමේ සාකච්ඡා පිළිබඳව ද අවධානය යොමු කෙරිණි.

මුදල් රාජ්‍ය අමාත්‍ය ෂෙහාන් සේමසිංහ, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සහ ජනාධිපති කාර්ය මණ්ඩල ප්‍රධානි සාගල රත්නායක, මුදල් අමාත්‍යාංශයේ ලේකම් මහින්ද සිරිවර්ධන, මහ බැංකු අධිපති ආචාර්ය නන්දලාල් වීරසිංහ යන මහත්වරු සහ ජාත්‍යන්තර මූල්‍ය අරමුදලේ නියෝජ්‍ය අධ්‍යක්ෂිකා ඈන් මාරි ගුල්ඩ් (Anne Marie Gulde), ජාත්‍යන්තර මූල්‍ය අරමුදලේ මෙරට නිත්‍ය නියෝජිත ආචාර්ය සර්වත් ජහාන් (Sarwat Jahan) යන මහත්ම මහත්මීන් ඇතුළු පිරිසක් මෙම අවස්ථාවට එක්ව සිටියහ.

පාර්ලිමේන්තු විවාදයකදී පාර්ලිමේන්තු මන්ත්‍රී චමින්ද විජේසිරි කළ ප්‍රකාශයක් මාධ්‍යවල පළකිරීමෙන් මන්ත්‍රී වරප්‍රසාද කඩවූයේ යැයි විදුලිබල හා බලශක්ති අමාත්‍ය කංචන විජේසේකර ප්‍රධාන මාධ්‍ය සහ සමාජ මාධ්‍ය ආයතන රැසක් වරප්‍රසාද කමිටුවට කැඳවන ලෙස කථානායකවරයාට ලිඛිතව දැනුම්දී තිබේ.

පාර්ලිමේන්තු මන්ත්‍රී චමින්ද විජේසිරි කළ ප්‍රකාශය අසත්‍ය බවත් එම සිද්ධියට සම්බන්ධ සියලු දෙනා පාර්ලිමේන්තු වරප්‍රසාද කමිටුව කැඳවන වන ලෙස ඉල්ලා සිටින බවත් අමාත්‍ය කංචන විජේසේකර ලිපියෙන් වැඩි දුරටත් පවසයි.