පුවත්

පාර්ලිමේන්තුවේ ඕනෑම කාරක සභාවක රැස්වීම්වලට සහභාගි වන නිලධාරීන් සාකච්ඡාවට භාජනය වන විෂයයන් පිළිබඳ අදාළ දැනුමෙන් සන්නද්ධ විය යුතු අතර කාරක සභාව විසින් ඉල්ලා සිටින විට තොරතුරු සැපයීමට සූදානම් විය යුතු බව ජනාධිපති ලේකම් සමන් ඒකනායක  විසින් දැනුම් දී තිබේ.

ජනාධිපති ලේකම් සමන් ඒකනායක  විසින් කතානායකවරයාට සහ පාර්ලිමේන්තු මහලේකම් වෙත පිටපත් සහිතව සියලු අමාත්‍යාංශ ලේකම්වරුන් වෙත අද (06) ලිඛිතව මෙම දැනුම් දීම සිදු කර තිබේ.

න්‍යාය පත්‍රයේ ඇති කරුණු සම්බන්ධයෙන් කාරක සභාවේ සාමාජිකයින් විසින් මතු කරන ප්‍රශ්නවලට පිළිතුරු සැපයීමට අවශ්‍ය කරුණු ගොනු කිරීම සඳහා පූර්ව රැස්වීම් පැවැත්වීම නිර්දේශ කෙරේ.

කෙසේ වෙතත්, න්‍යාය පත්‍රයට ඇතුළත් නොවන ප්‍රශ්න නිලධාරීන්ගෙන් අසන අවස්ථා වලදී, ඒ සඳහා පිළිතුරු දීමට සහ ප්‍රතිචාර දැක්වීමට සාධාරණ කාල සීමාවක් ඉල්ලා සිටිමින් එම එකඟ වූ කාලය තුළදී ප්‍රතිචාර දැක්විය යුතුය.

අමාත්‍යාංශ ලේකම්වරයා වෙත ආරාධනා කර ඇති රැස්වීමකට ලේකම්වරයාට සහභාගි විය නොහැකි අවස්ථාවක, අදාළ කමිටුවේ සභාපතිවරයාගේ අවසරය ඇතිව නියෝජිතයෙකු ලෙස ජ්‍යෙෂ්ඨ නිලධාරියෙකුට රැස්වීමට සහභාගි විය හැකිය.

තවද, සිය අමාත්‍යවරයාගේ අනුමැතිය ඇතිව ආංශික අධීක්ෂණ කමිටු රැස්වීම් සඳහා නිලධාරීන් සහභාගි විය යුතුය. කෙසේ වෙතත්, සාකච්ඡා කිරීමට නියමිත කරුණු සම්බන්ධයෙන් අමාත්‍යවරයාට ගැටළු තිබේ නම්, ඒවා අමාත්‍යවරයා විසින් ආංශික අධීක්ෂණ කාරක සභාවේ සභාපතිවරයා වෙත දැනුම් දිය යුතුය.

පාර්ලිමේන්තු පරිශ්‍රයේ පැවැත්වෙන රැස්වීමකට විපක්ෂ නායකවරයා රාජ්‍ය නිලධාරීන් කැඳවීමට අදහස් කරන්නේ නම්, ඔහු විසින් එම විෂයට අදාළ අමාත්‍යවරයාව ලිඛිතව දැනුවත් කළ යුතු අතර, ඊට අනුකූලව එම රැස්වීම්වලට සහභාගී වීමට නිලධාරීන්ට අවසර ලබා දෙනු ඇත.

මුදල් හා සම්බන්ධ අධීක්ෂණ කාරක සභා සඳහා මුදල් අමාත්‍යාංශයේ නිලධාරීන් කැඳවූ විට මුදල් අමාත්‍යාංශයේ ලේකම්වරයාගේ අනුමැතිය ඇතිව රැස්වීම්වලට සහභාගි විය යුතුය.

ඉන්දියන් සාගරය ඔස්සේ සිදුවන නීති විරෝධී මිනිස් සංක්‍රමණය සහ මත්ද්‍රව්‍ය ජාවාරම් මැඩපැවැත්වීම සඳහා දැඩි නීති ක්‍රියාත්මක කරන බව ආරක්ෂක රාජ්‍ය අමාත්‍ය ප්‍රමිත බණ්ඩාර තෙන්නකෝන්  පැවසීය.

මේ දිනවල පවතින අයහපත් කාලගුණයෙන් පීඩාවට පත් ජනතාවට සහන සැලසීමේ කටයුතු ක්‍රියාවට නංවා තිබෙන බවත්, ආපදා සහන සැලසීමේදී පවතින චක්‍රලේඛ අවභාවිත වීම වළක්වාලීම සඳහා අවශ්‍ය සංශෝධන ගෙන එන බවත් අමාත්‍යවරයා පැවසීය

ආරක්ෂක රාජ්‍ය අමාත්‍ය ප්‍රමිත බණ්ඩාර තෙන්නකෝන් මහතා මේ බව සඳහන් කර සිටියේ 'ස්ථාවර රටකට සැවොම එක මඟකට' මැයෙන් ජනාධිපති මාධ්‍ය කේන්ද්‍රයේ අද (06) සංවිධානය කර තිබූ මාධ්‍ය හමුවට එක්වෙමිනි.

එහිදී වැඩිදුරටත් අදහස් දැක්වූ ආරක්ෂක රාජ්‍ය අමාත්‍ය ප්‍රමිත බණ්ඩාර තෙන්නකෝන් මෙසේද පැවසීය .

ඉන්දියන් සාගරයේ ආරක්ෂාව සම්බන්ධයෙන් ඉන්දියාව මෙන්ම ලංකාව ද දැඩි අවධානයක් යොමු කර තිබෙනවා. ඉන්දියන් සාගර කලාපයේ ආරක්ෂාව සම්බන්ධයෙන් නාවික හමුදාව ඉතා වගකීමෙන් යුතුව පුළුල් කාර්යභාරයක් ඉටු කරනවා.

රාජ්‍යයක් ලෙස රටේ ආරක්ෂාව වෙනුවෙන් සෑම වසරකදීම ඉදිරි වසර පහක කාලය සම්බන්ධයෙන් වූ තක්සේරු වාර්තාවක් ලබා ගන්නවා. ත්‍රස්තවාදය, අන්තවාදය, නීතිවිරෝධී ක්‍රියා, භූගෝලීය දේශපාලන සහ අපරාධ මැඩ පැවැත්වීම සම්බන්ධයෙන් වූ සමස්තය මෙම තක්සේරුවේදී ආවරණය කෙරෙනවා. මෙම තක්සේරුව අනුවයි රජය ජාතික ආරක්ෂාව සම්බන්ධයෙන් ඉදිරි පියවර ගනු ලබන්නේ.

ඒ වගේම රටක නීතියේ ආධිපත්‍ය, එරට ආර්ථික ස්ථාවරය පවත්වා ගැනීමට ප්‍රධාන සාධකයක් වෙනවා. නීතියේ ආධිපත්‍යය තහවුරු නොවු කිසිදු රටක දියුණුවක් අපේක්ෂා කළ නොහැකියි.

2009 වසරේ යුද්ධය අවසන් වීමෙන් පසුව ආරක්ෂක අංශ සාමාජිකයන් ප්‍රමාණාත්මක වෙනස්කම් සිදු කෙරුණා. පසුගිය කාලයේ ආරක්ෂක අංශ සඳහා නව බඳවා ගැනීම් සිදු නොකළත් ඉදිරියේදී යම් සීමාවන් තුළ බඳවා ගැනීම් සිදු කිරීමට පියවර ගන්නවා. මෙම විධිමත් කිරීමේ ක්‍රියාවලියේ දි ආරක්ෂක අංශවල කිසිවකුත් ඉවත් කිරීමක් සිදු වන්නේ නැහැ. මේ වන විටත් හමුදාව හැරයන පිරිස් සහ ඉවත් වී යන පිරිස් සම්බන්ධයෙන් සංගණනයක් සිදුකර තිබෙනවා.

මේ දිනවල පවතින අයහපත් කාලගුණික තත්ත්වයෙන් දිස්ත්‍රික්ක 11ක පවුල් 594ක පුද්ගලයන් 2247ක් පමණ පීඩාවට පත්ව සිටිනවා. ආපදා කළමනාකරණ අංශ සමඟ එක්ව ඔවුන්ට සහන සැලසීමේ කටයුතු මේ වන විට සිදු කරනවා.

ආපදා සහන සැලසීමේදී පවතින චක්‍රලේඛ අවභාවිත වීම වලක්වාලීම සඳහා අවශ්‍ය සංශෝධන සිදුකළ යුතු බව නිරීක්ෂණය වී තිබෙනවා. එබැවින් ඒවා කඩිනමින් සංශෝධනය කළ යුතුයි. 2016 සිට 2021 වසර දක්වා කාලය තුළ ආපදාවලින් විපතට පත් පුද්ගලයන්ට සහන සැලසීමට රජය බිලියන 60ක් වැය කර තිබෙනවා.

ඒ වගේම සිවිල් ආරක්ෂක දෙපාර්තමේන්තුව මේ වන විට සාමාජිකයන් 33,000කින් සමන්විතයි. ඔවුන්ගෙන් විශාල පිරිසක් රටේ විවිධ ප්‍රදේශවල ඉදිකර ඇති අලිවැට ආරක්ෂා කිරීමට යොදවා තිබෙනවා. දැනට මෙරට වන අලි ගහණය 6,000ක් පමණ සිටිනවා. එම වන අලින්ගෙන් ජනතාව ආරක්ෂා කර ගැනීම සඳහා අලිවැට ඉදිකිරීම වෙනුවෙන් මේ වන විට රුපියල් බිලියන 10ක් පමණ වැය කර තිබෙනවා.

උතුරු නැගෙනහිර ප්‍රදේශ නියෝජනය වන පරිදි ජාතික ශිෂ්‍ය භට ව්‍යාපාරය සඳහා සාමාජිකයන් 20%ක් බඳවා ගැනීම රජය සැලසුම් කර තිබෙනවා. එම පිරිස් සමාජ ආරක්ෂාව වෙනුවෙන් යොදවා ගැනීම කෙරෙහි අවධානය යොමු කර තිබෙන අතර, එමගින් ඒ ඒ ප්‍රදේශවල සමාජ බුද්ධි ඒකක ලෙස ඔවුන් යොදවා ගැනීම අපේක්ෂාවයි.

ආරක්ෂක අංශ සාමාජිකයන් විවිධ ආයතන සහ සේවාවල යොදවා ගැනීම මෙතෙක් සිදු වුණා. එම තත්ත්වය ඉදිරියේදී වෙනස්කර ආරක්ෂක අංශවල ගෞරවය ආරක්ෂා වන පරිදි ඔවුන්ගේ සේවාව ලබා ගැනීමට රජය පියවර ගෙන තිබෙනවා.

අන්තවාදී දේශපාලන පක්ෂයක පිරිසක් උතුරේ පූජනීය ස්ථාන මූල් කර ගනිමින් නොවිය යුතු දේ සිදු කරමින් සිටිනවා. ඒවා රටක සිදු නොවිය යුතු දේවල්. උතුරු නැගෙනහිර ඉඩම් ලබාදීමේ කටයුතු විධිමත්ව සිදු වෙනවා. කවුරුන් හෝ සතුටු කිරීමේ අදහසින් ඒවා ලබාදීම සිදු නොවන අතර ඒවා සුදුසු හිමිකරුවන්ට ලබාදීමට පියවර ගනිමින් සිටිනවා.

මේ සම්බන්ධයෙන් විනිවිදභාවයකින් යුතුව කටයුතු කිරීමට රජය කමිටුවක් ද පත් කර තිබෙනවා. මේ වන විටත් උතුරේ ඉඩම්වලින් 80%ක් යළි ජනතා අයිතියට පවරා දී අවසන්. ඒ වගේම කිසිවිටෙකත් කිසිවෙකු සතුටු කිරීම වෙනුවෙන් හමුදා කඳවුරු ඉවත් කිරීමට රජය කටයුතු කරන්නේ නැහැ. නමුත් නිසි විමර්ශනයකින් අනතුරුව අවසන් තීන්දු තීරණ ගැනීමට රජය කටයුතු කරනවා.

අද රටේ ආර්ථිකය ගොඩනැගීමට ජනාධිපති රනිල් වික්‍රමසිංහ  විසින් පැහැදිලි වැඩපිළිවෙළක් ක්‍රියාත්මක කර තිබෙනවා. මතවාදීව වෙනස් වුවද මෙම අවස්ථාව සියලුදෙනා එකට එක්ව කටයුතු කළයුතු අවස්ථාවක් බව කිවයුතුයි.

බැංකු පොලී අනුපාත තීරණය කරන ශ්‍රී ලංකා මහ බැංකුවේ මුදල් මණ්ඩලය විසින් ප්‍රතිපත්ති පොළී අනුපාතය 2% කින් පහළ දමා තිබේ.

 ශ්‍රී ලංකා මහ බැංකුවේ මුදල් මණ්ඩලය ඊයේ (05) පැවැත්වූ රැස්වීමේදී මෙම තීරණය ගෙන ඇත.

මේ අනුව මහ බැංකුව, බැංකු වෙත ලබා දෙන ණය වෙනුවෙන් අය කරන පොළිය හෙවත් නිත්‍ය ණය පහසුකම් අනුපාතිකය (SDFR) 14% සිට 12% දක්වා පහළ යනු ඇත.

මහ බැංකුව බැංකුවල තැන්පතු සඳහා ගෙවන පොළිය හෙවත් නිත්‍ය තැන්පතු අනුපාතිකය 13% සිට 11% දක්වා පහළ දමා තිබේ.

ඊට සමගාමීව ඉදිරියේදී බැංකුවල ණය අනුපාතික හා තැන්පතු අනුපාතික ද පහළ යනු ඇත.

ශ්‍රී ලංකා ආර්ථිකයේ වත්මන් වර්ධනයන් සහ අපේක්ෂිත වර්ධනයන් විශ්ලේෂණය කිරීමෙන් අනතුරුව මුදල් මණ්ඩලය මෙම තීරණයට එළඹ තිබේ.

මෙලෙස සිය ප්‍රතිපත්ති පොළී අනුපාතික පහළ දැමීමට හේතුව ලෙස ශ්‍රී ලංකා මහ බැංකුව පෙන්වා දෙන්නේ පුරෝකථනය කළ මට්ටමටත් වඩා බඩු මිල වැඩි වීමේ වේගය හෙවත් උද්ධමනය අඩු වීම බවයි.

ලාෆ්ස් ගෑස් සමාගම සිය ගෘහස්ථ ගෑස් සිලින්ඩර්වල මිල ගණන් පහළ දමා තිබේ.

අද මධ්‍යම රාත්‍රියේ සිට නව මිල ගණන් ක්‍රියාත්මක බව එම සමාගම පවසයි.

ඒ අනුව, කිලෝග්‍රෑම් 12.5 ගෑස් සිලින්ඩරයක මිල රු. 300කින් පහළ දමා ඇති අතර එහි නව මිල රු. 3,690ක් දක්වා පහළ යනු ඇත.

එමෙන් ම, කිලෝග්‍රෑම් 5 ගෑස් සිලින්ඩරයක මිල රු. 120කින් පහළ දමා ඇති අතර එහි නව මිල රු. 1,476ක් දක්වා පහළ ගොස් තිබේ.

ලිට්‍රෝ ගෑස් සමාගම ද අඛණ්ඩව සිව්වන වරටත් සිය ගෑස් මිල පහළ දැමීමට පසුගිය දා පියවර ගත්තේ ය.

ශ්‍රී ලංකා රජය විසින් මෑතකදී සිදුකල දේශීය ණය ප්‍රතිව්‍යුහගතකරණ වැඩපිළිවෙළ සාධනීය බව ජාත්‍යන්තර ණය වර්ගීකරණ ආයතනයක් වන ෆිච් රේටින්ග්ස් සඳහන් කර ඇත.

මෙම පියවර ලංකාවේ බැංකු ක්ෂේත්‍රයේ අවදානම තුරන් කිරීම සඳහා කැපී පෙනෙන ඉදිරි පියවරක් බවත් එහි සඳහන් වෙයි.

දේශීය ණය ප්‍රතිව්‍යුහගතකරණයේ දී ශ්‍රී ලංකා මුදලින් පවතින බැංකු සතු භාණ්ඩාගාර බිල්පත් අදාල නොවූ බවත් ඊට අදාල වූ විදේශ මුදල් බැඳුම්කර සමස්ත බැඳුම්කර බැංකුවල සමස්ත වත්කම්වලින් සියයට 5.5 ඉක්මවන්නේ නැති බව ද එහි පෙන්වාදී තිබේ.

කෙසේ වෙතත් අවිනිශ්චිත තාවයන් මගහැරුණද වෙනත් ගැටලු නිර්මාණය විය හැකි බවද එම නිවේදනයේ තවදුරටත් සඳහන් වෙයි.

ආගමික සංහිඳියාවට තර්ජනයක් වන සියලු ක්‍රියාවන්ට එරෙහිව ක්‍රියාත්මක වීමට අවශ්‍ය නව නීති ගෙන එන බව බුද්ධශාසන සහ සංස්කෘතික කටයුතු අමාත්‍ය විදුර වික්‍රමනායක  ප්‍රකාශ කළේය.

භාෂණය හෝ ආගමික නිදහසට මුවාවී කිසිඳු ආගමකට අපහාස කිරීමට කිසිවෙකුටත් අයිතියක් නොමැති බවත් අමාත්‍යවරයා අවධාරණය කළේය.

බුද්ධශාසන සහ සංස්කෘතික කටයුතු අමාත්‍ය විදුර වික්‍රමනායක  මෙම අදහස් පළ කළේ, ජනාධිපති මාධ්‍යය කේන්ද්‍රයේ අද (05) පැවති "ස්ථාවර රටකට සැවොම එක මගකට" ප්‍රවෘත්ති සාකච්ඡාවට එක්වෙමිනි.

එහිදී වැඩිදුරටත් අදහස් දැක්වූ විදුර වික්‍රමනායක  මෙසේද පැවසීය

ස්ථාවර රටක් යනුවෙන් බොහෝ දෙනා අදහස් කරන්නේ ආර්ථිකය දියුණු තත්ත්වයකට පැමිණීමයි. නමුත් අප දිගටම ආර්ථික වර්ධනය ගැන කතා කර අවසානයේ දී බංකොලොත් කියන තැනට පත්වී තිබෙනවා. අපට මහා සංස්කෘතියක් උරුම වී තිබුණා. එම සංස්කෘතියට වටිනාකම් ලබා නොදී රුපියල් ශතවලට එම වටිනාකම් ලබා දීම නිසා අද මේ තිබෙන තත්ත්වයට රට වැටී තිබෙනවා.

මේ වන විට අපට උරුම වූ සංස්කෘතියෙන් සහ ආහාර රටාවන්ගෙන් ඉවත්වීම නිසා රෝගී ජාතියක් බවට අප පත් වෙමින් සිටිනවා. රුපියල් ශතවලට මුල්තැන දෙන වටපිටාවක් තුළ ජාති වශයෙන් සහ ආගම් වශයෙන් ගැටුම් නිර්මාණය වීම සුලබ දෙයක්. මත්ද්‍රව්‍ය පිළිබඳ ප්‍රශ්නය එතැනට වේගයෙන් පැමිණ තිබෙනවා. රුපියල් ශතවලට තිබෙන ප්‍රමුඛතාව නිසා ආගමික නිදහසට මුවා වෙලා අනෙකුත් ආගම් හෙලා දකින්න පවා ඇතැම් ජනතාව පෙළඹෙමින් සිටිනවා. ආගමික නිදහසට මුවා වෙලා කිසිම ආගමක් පීඩාවට පත් කරන්න, ආගමික සංහිඳියාවට තර්ජනයක් එල්ල කරන්න කිසිම කෙනෙකුට අයිතියක් නැහැ. ඒ සම්බන්ධව නීතිමය කටයුතු කරන්න අවශ්‍ය නව නීති පද්ධතියක් පැනවීමට අප බලාපොරොත්තු වෙනවා. කිසිම ආගමකට අපහාස කළ නොහැකි ආකාරයට අදාළ නීති පද්ධතියක් සකස් කරනවා වගේම නව පනතක් කෙටුම්පත් කිරීමට ද සැලසුම් කර තිබෙනවා.

ඉතිහාසයේ අපට අහිමි වූ සංස්කෘතික මිනිසා කරුණු සීයක් යටතේ නැවත නිර්මාණය කිරීමට අමාත්‍යංශයක් හැටියට ශක්තිමත් වැඩපිළිවෙළක් ඉදිරිපත් කර තිබෙනවා. මේ සඳහා පෞද්ගලික අංශයේ දායකත්වයත් ලබා ගන්න අප බලාපොරොත්තු වෙනවා.

මෙහිදී මාධ්‍යවේදීන් ඇසූ ප්‍රශ්න සහ අමාත්‍ය විදුර වික්‍රමනායක  ලබා දුන් පිළිතුරු පහත දැක්වෙයි.

මාධ්‍යවේදියා,

ජාතික උරුමයන් තිබෙන ස්ථාන හා ඒ ආශ්‍රිත ජනතාවගේ ඉඩම් හිමිකම අතර ගැටලු නිර්මාණය වෙමින් තිබෙනවා. ඒ සම්බන්ධයෙන් බුද්ධ ශාසන අමාත්‍යංශය වශයෙන් ගන්නා ක්‍රියාමාර්ග මොනවාද?

අමාත්‍යවරයා,

පුරාවස්තු පිළිබඳ ගැටලුවේ දී පුරාවස්තු ආඥා පනතට ඉහළින් කිසිවෙකුට කටයුතු කරන්න බැහැ. එම නිසා පුරාවිද්‍යා ආඥා පනතට අනුව නීතිය ක්‍රියාත්මක කරන්න බලාපොරොත්තු වෙනවා. පුරාවිද්‍යා ආඥා පනතේ යම් අඩුපාඩුවක් තිබුණොත් පාර්ලිමේන්තුවට යොමු කර එය සංශෝධනය කිරීමටත් බලාපොරොත්තු වෙනවා. එතෙක් ක්‍රියාත්මක වන්නේ පුරාවිද්‍යා ආඥා පනතයි.

මාධ්‍යවේදියා,

බෞද්ධ කටයුතු දෙපාර්තමේන්තුව නිකුත් කරන ශාසනික හැඳුනුම්පත මෙහෙණින් වහන්සේලා වෙනුවෙන් ලබා නොදෙන බවට චෝදනාවක් තිබෙනවා. ඒ පිළිබඳ ඔබේ අදහස කුමක්ද?

අමාත්‍යවරයා,

බෞද්ධ කටයුතු දෙපාර්තමේන්තුවට නව කොමසාරිස් ජනරාල්වරයෙක් පත්වී කෙටි කාලයයි. එතුමා මෙම හැඳුනුම්පත ලබා දීමට ඉදිරියේදී කටයුතු කරාවි. නමුත් මෙම හැඳුනුම්පත ලබා දීමේදී මහා නායක ස්වාමින් වහන්සේලාගේ උපදෙස් මත ඉදිරි කටයුතු සිදු වන බව කියන්න කැමතියි.

මාධ්‍යවේදියා,

කුල දරුවන් පැවිදි කිරීමේ වයස් සීමාව පිළිබඳ මේ දිනවල කතාබහට ලක්වෙනවා. බුද්ධ ශාසන ඇමැතිවරයා විදියට මේ පිළිබඳ ඔබතුමාගේ අදහස කුමක්ද?

අමාත්‍යවරයා,

ශාසනාරක්ෂක බල මණ්ඩලයේ විධායක සභාව මේ පිළිබඳ සාකච්ඡා කරලා අවශ්‍ය තීරණයක් ගෙන තිබෙනවා. එය මහා නායක ස්වාමීන් වහන්සේලාට ඉදිරිපත් කරලා අවසන් තීරණයකට එළැඹීමට බලාපොරොත්තු වෙනවා.

මාධ්‍යවේදියා ,

මේ දිනවල සමහර ස්වාමීන් වහන්සේලා සම්බන්ධයෙන් සමාජ මාධ්‍යවල පළවන ප්‍රවෘත්ති සම්බන්ධයෙන් බැලුවොත් ශාසනයට අපහාස වන බවක් පෙනෙන්නට තිබෙනවා. ශාසනයට අපහාස කරන මෙම භික්ෂූන් වහන්සේලා වෙනුවෙන් ගන්නා පියවර කුමක්ද?

අමාත්‍යවරයා,

සෑම ස්වාමීන් වහන්සේ කෙනෙකුටම ගුරු ස්වාමීන් වහන්සේ නමක් සිටිනවා. මහා නායක ස්වාමීන් වහන්සේලා ඉන්නවා . එම නිසා විනය විරෝධී ක්‍රියාවන්ට එළැඹෙන හෝ සාසනයට අපහාස වන අයුරින් කටයුතු කරන භික්ෂූන් වහන්සේලා සම්බන්ධයෙන් මහ නායක වහන්සේලා කටයුතු කළ යුතුයි.

මාධ්‍යවේදියා,

වෙහෙර විහාරස්ථානවල වෙසෙන අලි ඇතුන් සම්බන්ධයෙන් මේ දිනවල කතා බහක් ඇතිවී තිබෙනවා. එම අලි ඇතුන්ට පමුණුවන වද හිංසා පිළිබඳව ඔබ අමාත්‍යාංශයෙන් ගෙන ඇති පියවර කුමක් ද?

අමාත්‍යවරයා,

අපි ගෙදරක සතෙක් ඇති දැඩි කළත් ඔවුන්ට කරුණාව දැක්විය යුතුයි. නමුත් මෙවැනි ගැටලුවක් පැමිණියේ පළවෙනි වතාවටයි. මුතු රාජාගේ සිදුවීමත් එක්ක අපි වෙහෙර විහාරස්ථානවල සිටින අලි ඇතුන් සංගණනයක් ආරම්භ කර තිබෙනවා. ඉන්පසුව එම අලි ඇතුන්ගේ සෞඛ්‍ය තත්ත්වය සොයා බැලීමට කටයුතු කරනවා.

මාධ්‍යවේදියා,

මුහුද අවට තිබෙන පුරාවිද්‍යා වටිනාකමකින් යුත් කොටස් සංරක්ෂණය කිරීමට අමාත්‍යංශය ගෙන තිබෙන පියවර මොනවාද?

අමාත්‍යවරයා,

නාවික හමුදාපතිතුමා සමඟ සාකච්ඡා කර මුහුද පතුළෙහි තිබෙන පුරාවිද්‍යා වස්තූ එලෙසම තබාගැනීමට සහ එම ස්ථාන සංචාරක ආකර්ෂණයක් ඇති වන ලෙස සංවර්ධනය කිරීමට තීරණය කර තිබෙනවා. ඒ වගේම අපේ රටින් නෙදර්ලන්තය, එංගලන්තය, ජර්මනිය වැනි රටවලට ගෙන ගොස් තිබෙන පුරාවිද්‍යා පුරාවිද්‍යා වටිනාකමින් යුත් වස්තුන් නැවත ලබා ගැනීමට අමාත්‍යංශයක් හැටියට අපි සාකච්ඡා කර තිබෙනවා. එහිදී නෙදර්ලන්ත රජය ඔවුන් සතුව ශ්‍රී ලාංකික උරුමයන් ලබා දීමට එකඟත්වය පළකර තිබෙනවා. ඒ වගේම එංගලන්තය ද ඔවුන් සතු පුස්කොළ පොත් ලබා දීමටද එකඟතාව පළ කළා. නමුත් මෙ පමණ කාලයක් එංගලන්තය, නෙදර්ලන්තය යන රටවල ආරක්ෂා කර තිබුණු මෙම ශ්‍රී ලංකික උරුමයන් මෙරටට ගෙන ඒමෙන් පසුව එම රටවල පැවැති තත්වයෙන්ම ආරක්ෂා කර ගැනීමට හැකිවේද යන ප්‍රශ්නය තිබෙනවා. ඒ නිසා එංගලන්තයේ පුස්කොළ පොත්වල ඩිජිටල් පිටපත් ලබාගැනීමට යෝජනා කර තිබෙනවා.

කොළඹ කොටස් වෙළෙඳපොළ මිල දර්ශකවල ඉහළ යාමක් අඛණ්ඩව තෙවන ගනුදෙනු දිනයටත් අද (05) දිනයේ දී වාර්තා විය.

අද දින සියලු කොටස් මිල දර්ශකය ඒකක 99.49 ක ඉහළ යාමක් වාර්තා කළ අතර දිනය අවසානයේ දී එහි අගය ඒකක 10,176.13 ක් ලෙසින් සටහන් වුණි.

මේ අතර S&P SL20 දර්ශකය ඒකක 40.25 කින් ඉහළ ගොස් ඒකක 3,013.37 ක් ලෙසින් සටහන්ව තිබුණි.

සියලු කොටස් මිල දර්ශකයේ වර්ධනයට හේලීස්, රිචඩ් පීරිස් ඇන්ඩ් කම්පැනි, ජෝන් කීල්ස් හෝල්ඩිංග්ස්, එයිට්කන් ස්පෙන්ස් සහ NDB බැංකුව ඇතුළුව සමාගම් 137 කින් ධනාත්මක දායකත්වයක් ලැබී තිබුණු බව කොළඹ කොටස් වෙළෙඳපොළ සඳහන් කරයි.

රු. බිලියන 4.94 ක පිරිවැටුමක් දිනය තුළ වාර්තා වූ අතර එහිදී දේශීය මිල දී ගැනීම් රු. බිලියන 4.36 ක් ලෙසත් දේශීය විකිණුම් රු. බිලියන 4.80 ක් ලෙසත් වාර්තා විය.

මේ අතර විදේශීය මිල දී ගැනීම් අද දිනයේ දී රු. මිලියන 578 ක් සහ විදේශීය විකිණුම් රු. මිලියන 137 ක් ලෙසින් සටහන් වුණි.

අද දින සාමාන්‍ය ගනුදෙනු හරහා දෛනික පිරිවැටුමට ඉහළ දායකත්වයක් ලබා දුන් සමාගම් අතර කොමර්ෂල් බැංකුව (රු. මිලියන 386), හේලීස් (රු. මිලියන 287), බ්‍රවුන්ස් ඉන්වෙස්ට්මන්ට්ස් (රු. මිලියන 250), කැපිටල් එලායන්ස් (රු. මිලියන 221), එක්ස්පෝලංකා හෝල්ඩිංග්ස් (රු. මිලියන 192) පෙරමුණේ විය.

මීට අමතරව අද දින සමාගම් 7ක ගිවිසා ගනු ලැබූ ගනුදෙනු වාර්තා වූ අතර එහිදී NDB බැංකුව (රු. මිලියන 355), ජෝන් කීල්ස් හෝල්ඩිංග්ස් (රු. මිලියන 352), එක්ස්පෝලංකා හෝල්ඩිංග්ස් (රු. මිලියන 282) සහ කොමර්ෂල් බැංකුව (රු. මිලියන 154) දෛනික පිරිවැටුමට වැඩි දායකත්වයක් ලබා දී තිබුණි.

derana biz

මුතුරාජා හස්තියා යළි ශ්‍රී ලංකාවට ලබා නොදෙන බව තායිලන්ත පරිසර අමාත්‍යවරයා ප්‍රකාශ කර ඇති අතර ඒ මෙරට ස්වාමීන් වහන්සේ නමක් හස්තියා යළි ලබාදෙන්නැයි කළ ඉල්ලීමට ප්‍රතිචාර දක්වමින්ය.

එහිදී තායිලන්ත පරිසර අමාත්‍යවරයා වැඩිදුරටත් සඳහන් කර ඇත්තේ මුතුරාජා නැතහොත් සක් සුරින් තායි රජුගේ භාරයට ගැනීම හේතුවෙන් ඒ පිළිබඳ තවදුරටත් සාකච්ඡා කිරීමට පවා නොහැකි බවය.

තායිලන්ත රජයේ පරිත්‍යාගයක් ලෙස මෙරටට හිමිව වසර විසිදෙකක් මෙරට රැඳී සිටි මුතුරාජා හස්තියා පසුගිය 02 වැනිදා තායිලන්තයට රැගෙන යාමට එරට රජය පියවර ගත් අතර ඒ අසනීප තත්ත්වයෙන් පසුවූ හස්තියාට වැඩිදුර ප්‍රතිකාර කිරීම සඳහාය.

එලෙස රැගෙන ගිය මුතුරාජා හස්තියා එරට ලම්පන් ප්‍රාන්තයේ අලි සංරක්ෂණ මධ්‍යස්ථානයේ මේ වන විට නිරෝධායනයට ලක් කර තිබේ.

තායිලන්ත මාධ්‍ය වාර්තා පවසන්නේ ප්‍රතිකාර ලබමින් පසුවන මුතුරාජා ප්‍රකෘතිමත් වෙමින් සිටින බවය.

මුතුරාජාගේ ඇසක සුද මතුවී ඇති අතර ඉදිරිපස වම් පාදය නැවීමට නොහැකි බවත් එරටදී සිදුකළ මූලික පරීක්ෂණවලදී අනාවරණ වී තිබේ.

ඊට අමතරව පිටකොන්දේ ආසාදිත තුවාල සහිත බවත්, පතුල්වල සහ නියපොතුවල ආබාධ පවතින බවත් හඳුනාගෙන ඇතැයි එරට වාර්තා සඳහන් කර තිබුණි.

කෙසේ වෙතත් මුතුරාජා ශ්‍රී ලංකාවෙන් ගෙන යාමට පැමිණි පශු වෛද්‍ය කණ්ඩායමේ ජ්‍යෙෂ්ඨතම වෛද්‍යවරයා මුහුණු පොතේ සටහනක් තබමින් අද සඳහන් කර තිබුණේ මුතුරාජා මෙරටින් රැගෙන යන අවස්ථාව වන විට මුතුරාජාගේ සැරව ගෙඩි 90% ක් පමණ සුව අතට පත්කර තිබූ බවය.

එමෙන්ම යටිපතුල්වල හෝ වලිගයේ කිසිදු තුවාලයක් නොතිබූ බවද එහි සඳහන් කර තිබේ.

ඔහු ඒ වෙනුවෙන් දෙහිවල ජාතික සත්වෝද්‍යානයේ පශු වෛද්‍ය නිලධාරීන්ට ස්තූතිය පළකර තිබුණි.

මේ අතර තායිලන්තය මෙරටට පරිත්‍යාග කළ තවත් හස්තීන් දෙදෙනකු සම්බන්ධයෙන්ද එරට රජයේ අවධානය යොමුව තිබේ.

එම හස්තීන්ගේ සෞඛ්‍ය තත්ත්වය සම්බන්ධයෙන් සොයා බැලීම සඳහා පශු වෛද්‍යවරු ඇතුළු කණ්ඩායමක් එළඹෙන සැප්තැම්බර් මාසයේදී මෙරටට එවීමට නියමිත බවත් තායිලන්ත මාධ්‍ය වාර්තා කර තිබේ.

ජපාන රජය විසින් අනුග්‍රහය දක්වන යෝජිත සැහැල්ලු දුම්රිය සංක්‍රමණ ව්‍යාපෘතිය (LRT) නැවත සක්‍රීය කිරීමට රජය තීරණය කර තිබේ.

ඊට අදාළ යෝජනාව ජනාධිපතිවරයා විසින් ඊයේ (04) පැවති කැබිනට් රැස්වීමට ඉදිරිපත් කර ඇති අතර ඊට කැබිනට් අනුමැතිය හිමිව තිබේ.

ඒ අනුව අදාළ යෝජනාවේ කොළඹ ජපාන රාජ්‍යතාන්ත්‍රික දූත මණ්ඩලය සමග සාකච්ඡා නැවත සක්‍රීය කරමින් අදාළ ගිවිසුමට එළැඹීම සඳහා උචිත කාලරාමුවක් සකස් කිරීමට අදාළව කරුණු ඇතුළත්ව ඇත.

මේ සම්බන්ධව අමාත්‍ය මණ්ඩල කාර්යාලය නිකුත්කළ නිවේදනයේ මෙසේ සඳහන් වෙයි.

ජපන් රජය විසින් අනුග්‍රහය දක්වන යෝජිත සැහැල්ලු දුම්රිය සංක්‍රමණ (LRT) ව්‍යාපෘතිය

• යෝජිත සැහැල්ලු දුම්රිය සංක්‍රමණ ව්‍යාපෘතිය ආරම්භ කිරීමට හැකි වනු පිණිස කොළඹ පිහිටි ජපාන රාජ්‍යතාන්ත්‍රික දූත මණ්ඩලය සමඟ සාකච්ඡා නැවත සක්‍රීය කරමින් අදාළ ගිවිසුමට එළඹීම සඳහා උචිත කාලරාමුවක් සකස් කිරීම පිණිස ගරු ජනාධිපතිතුමා ඉදිරිපත් කළ යෝජනාව සම්බන්ධයෙන් අමාත්‍ය මණ්ඩලයේ එකඟතාව ලබා දෙන ලදී.

මෙරට ජල සම්පාදන ක්ෂේත්‍රයේ නව ප්‍රතිසංස්කරණ මෙහෙයුම් වැඩසටහන මෙන්ම ජාතික ජල සම්පාදන හා ජලාපවාහන මණ්ඩලයේ ධාරිතාව ඉහළ නංවා ගැනීමේ ව්‍යාපෘති සඳහා අවශ්‍ය දැනුම හා තාක්ෂණික සහාය ලබාදීමට ආසියානු සංවර්ධන බැංකුව කැමැත්ත පළ කර ඇත.

ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක  සහ ආසියානු සංවර්ධන බැංකුවේ නේවාසික දූත මණ්ඩල අධ්‍යක්ෂ ටකෆුමි කඩොනො  (Takafumi kadono) අතර අද (05) ජනාධිපති කාර්යාලයේ පැවති හමුවේ දී මේ පිළිබඳ දීර්ඝ ලෙස සාකච්ඡා කෙරිණි.

මෙරට ජල සම්පාදන ක්ෂේත්‍රෙයේ සැලසුම්, අධීක්ෂණ රාමුව සහ ඊට අදාළව මේවන විට ගෙන ඇති ඉදිරි පියවර පිළිබඳ එහිදී පුළුල් ලෙස විමසා බැලිණි.

මෙම කටයුතුවල ප්‍රගතිය මාසිකව සමාලෝචනය කිරීමට මෙහිදී නිලධාරීන්ට උපදෙස් දුන් සාගල රත්නායක  වැඩසටහන සාර්ථක කර ගැනීමට ආසියනු සංවර්ධන බැංකුව මගින් ලබාදෙන සහාය පිළිබඳ ස්තූතිය පළ කළේය.

ජල සම්පාදන සහ වතු යටිතල පහසුකම් සංවර්ධන අමාත්‍ය ජීවන් තොණ්ඩමන්, අග්‍රාමාත්‍ය ලේකම් අනුර දිසානායක, ආර්ථික කටයුතු පිළිබඳ ජනාධිපති ජ්‍යෙෂ්ඨ උපදේශක ආචාර්ය ආර්.එච්. එස් . සමරතුංග යන මහත්වරු ඇතුළු අදාළ ආයතනවල රාජ්‍ය නිලධාරීහු මෙම සාකච්ඡාවට එක්ව සිටියහ.

රක්ෂිත බන්ධනාගාරගත කර සිටින නතාෂා එදිරිසූරිය ඇප මත මුදාහරින ලෙස කොළඹ මහාධිකරණය නියම කර තිබේ.

ඒ, ඇයට එරෙහිව සිවිල් හා දේශපාලන අයිතිවාසිකම් පිළිබදව ජාත්‍යන්තර සම්මුති පනත (ICCPR) යටතේ ගැනෙන චෝදනා සම්බන්ධයෙන් වන නඩුව අද (ජූලි 5) දහවල් කොළඹ අංක 4 මහාධිකරණයේදී විභාගයට ගැනුණු අවස්ථාවේදී ය.

ඇය වෙනුවෙන් ඉදිරිපත් කළ ඇප පෙත්සමක් සලකා බැලීමෙන් අනතුරුව කොළඹ මහාධිකරණය විනිසුරු ආදිත්‍ය පටබැඳිගේ මෙම නියෝගය නිකුත් කර ඇත.

එම ඇප ඉල්ලීමට විරුද්ධ නොවන බවට නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් දිලීප පීරිස් කළ දැනුම්දීමෙන් පසුව විනිසුරුවරයා ඇප නියෝගය ප්‍රකාශයට පත් කර තිබේ.

ඒ අනුව, ඇය රුපියල් ලක්ෂයක ශරීර ඇපයක් මත මුදාහැරීමට විනිසුරු ආදිත්‍ය පටබැදිගේ නියම කර ඇත.

චීන ජාතික ගුවන් සේවය වන ” එයාර් චයිනා ” ගුවන් සේවය යළි ශ්‍රී ලංකාව සමග ගුවන් ගමන් ආරම්භ කර තිබෙන බව වාර්තා වෙයි.

එම සේවාවන් ආරම්භ කරමින් එයාර් චයිනා ගුවන් සේවයට අයත් ගුවන් යානයක් ඊයේ (03) රාත්‍රියේ කටුනායක ගුවන් තොටුපොළ වෙත ළඟා වූ බවත් වාර්තා වෙයි.

චීනයේ ෂිචුවාන් ප්‍රාන්තයේ චෙන්ඩු ජාත්‍යන්තර ගුවන් තොටුපොළේ සිට දිවයිනට පැමිණි එම ගුවන් යානයේ මගීන් 142 දෙනෙකු සහ කාර්යය මණ්ඩලය 09 දෙනෙකු පැමිණ ඇති බවත් වාර්තා වෙයි.

වැඩිදුරටත් වාර්තා වන ආකාරයට සෑම සතියකම සදුදා, බදාදා සහ සිකුරාදා යන දිනවල චීනයේ චෙන්ඩු නගරයේ සිට රාත්‍රී 08.55ට කටුනායක ගුවන් තොටුපොළ වෙත එම ගුවන් සේවයට අයත් යානයක් පැමිණීමට නියමිතය. එම දින වල රාත්‍රී 10.15 ට කටුනායක සිට චීනයේ චෙන්ඩු බලා එම ගුවන් සේවයට අයත් යානයක් පිටත්ව යාමට ද කටයුතු යොදා ඇත.

කොරෝනා වසංගත තත්ත්වය හමුවේ වසර තුනක පමණ කාලයක් එම ගුවන් සේවය මෙරටට සිදුකළ ගුවන් ගමන් තාවකාලිකව නතර කර තිබිණ.

අභිනව පොලිස්පතිවරයා පත් කිරීම සම්බන්ධව කොළඹ අගරදගුරු මැල්කම් කාදිනල් රංජිත් හිමිපාණන් විසින් කතානායකවරයා ප්‍රමුඛ ආණ්ඩුක්‍රම ව්‍යවස්ථා සභාවේ සාමාජිකයන්ට පිටු තුනක අතිශය රහස්‍ය ලිපියක් යොමුකර තිබේ.

එමගින් උන්වහන්සේ ඉල්ලා ඇත්තේ එහි නම් සඳහන් පොලිසියේ ජ්‍යෙෂ්ඨ නියෝජ්‍ය පොලිස්පතිවරුන් දෙදෙනාගේ නම් පොලිස්පති ධුරය සම්බන්ධ යෝජනා වුවහොත් ඒ ගැන සලකා බැලීමක්වත් නොකරන ලෙසයි.

මෙම නිලධාරීන් දෙදෙනා පාස්කු ප්‍රහාරය ඇතුළු කාරණා ගණනාවකදී වගකීම් පැහැර හැර ඇත. එනිසාම තමන්ගේ වෘත්තීය ගරුත්වය හා පොලීසියේ කීර්තිනාමය රැකගන්නට නොහැකි වූ මේ අයගේ නම් සලකා බැලීමක් හෝ නොකළ යුතු බව මෙරට සමස්ත කතෝලික ජනතාවගේ නාමයෙන් ඉල්ලා සිටින බව කාදිනල් හිමිපාණන් සඳහන් කර තිබේ.

උන්වහන්සේගේ මෙම ලිපිය කතානායකවරයා ප්‍රමුඛ ආණ්ඩුක්‍රම ව්‍යවස්ථා සභාවේ සාමාජිකයන් 9 දෙනාටම යොමුකර තිබේ. එම ලිපියට පෙර මේ ගැන මෙරට කතෝලික රදගුරු සමුළුවද විශේෂ ලිපියක් යොමුකරන ලද බවත් එහි සඳහන් කර ඇත.

දේශය මේ සම්බන්ධයෙන් ආණ්ඩුක්‍රම ව්‍යවස්ථා සභාවේ ජ්‍යෙෂ්ඨයන් කිහිප දෙනෙකුගෙන් විමසූ විට ඔවුහු එම තොරතුරු සනාථ කළහ. ඒ අතරම ප්‍රකාශ කළේ ශ්‍රී ලංකාවේ පොලිස්පතිවරයා පත් කරන්නේ ජනාධිපතිවරයා ව්‍යවස්ථා සභාවට යොමුකරන නාමයෝජනා ස්වාධීනව සලකා බැලීමෙන් පසුව පමණක් බවය. ඒ සඳහා බාහිර පාර්ශ්වයක උපදෙස් හෝ මැදිහත්වීම ව්‍යවස්ථා සභාවේ ස්වාධීනත්වයට බාධාකාරී වන බවද ඔවුහු සඳහන් කළෝය.

• deshaya

ශ්‍රී ලංකා කාන්තා ක්‍රිකට් කණ්ඩායමේ නායිකාව මෙන්ම සුපිරි පිතිකාරිය වන චමරි අතපත්තු ඉතිහාසයේ පළමුවරට අන්තර්ජාතික ක්‍රිකට් සභා (අයි.සී.සී.) එක්දින පිතිකාරියන් ශ්‍රේණිගත කිරීමේ පළමු ස්ථානය හිමිකරගැනීමට සමත්ව ඇත.

නවසීලන්තයට එරෙහිව ඊයේ (3) අවසන් වූ එක්දින ක්‍රිකට් තරගාවලියේදී ශතක දෙකක් රැස්කිරීමට සමත් වීම පමඟ මෙසේ චමරිට පළමු ස්ථානයට ඒමට අවස්ථාව උදාවූ අතර ඇය පළමු තරගයේදී නොදැවී ලකුණු 108 ක් සහ දෙවැනි තරගයේදී නොදැවී ලකුණු 140 ක් රැස් කළාය.

ඒ අනුව චමරි අතපත්තු ප්‍රසාද ලකුණු 758 ක් හිමිකරගනිමින් ශ්‍රේණිගත කිරීමේ පළමු ස්ථානයට පත්ව සිටින අතර ඕස්ට්‍රේලියාවේ බේත් මූනි ප්‍රසාද ලකුණු 754 ක් ලබා දෙවැනි ස්ථානයේ ද, දකුණු අප්‍රිකාවේ පිතිකාරී ලයුරි වොල්වර්ඩ්ට් ප්‍රසාද ලකුණු 732 ක් සමගින් තෙවැනි ස්ථානයේ ද, පසුවෙති.

චමරි අතපත්තු මේ වන විට එක්දින ජාත්‍යන්තර තරග 95 කදී ශතක 8 ක් සහ අර්ධ ශතක 15 ක් සමගින් ලකුණු 3,199 ක් රැස්කරමින් වර්තමාන ලෝක කාන්තා ක්‍රිකට් පිටියේ පිතිකාරියන් අතර පෙරමුණේ සිටින්නීය.

අද (04) මධ්‍යම රාත්‍රියේ සිට ක්‍රියාත්මක වන පරිදි ලිත්‍රො ගෑස් මිල අඩු කරන බව එම සමාගමේ සභාපති මුදිත පීරිස් පවසයි.

ඒ අනුව කිලෝ ග‍්‍රෑම් 12.5 සිලින්ඩරයක මිල රුපියල් 204කින් අඩු කර ඇති අතර එහි නව මිල රු 2982කි.

පෞද්ගලික විශ්වවිද්‍යාල සඳහා පොලී රහිත ණය ලබාදීමේ රජයේ වැඩපිළිවෙල සඳහා අයදුම්පත් බාර ගැනීම අද( 04) සිට ආරම්භ කරන බව රජය නිවේදනය කරයි.

මේ අනුව ඒ සඳහා අයදුම්පත් යොමු කිරීමට 2019, 2020 සහ 2021 වර්ෂ වල උසස් පෙළ පෙළට පෙනී සිටි දරුවන්ට අද සිට අවස්ථාව උදාවනු ඇත.

පෞද්ගලික විශ්වවිද්‍යාල සඳහා රජයේ පොලී රහිත ණය ලබා ගැනීමේ අයදුම්පත් www.studentloans.mohe.gov.lk වෙබ් අඩවිය ඔස්සේ මාර්ගගතව යොමු කිරීමට හැක.

ඇමරිකානු ඩොලරය හමුවේ රුපියල අද (04) දින යළිත් ශක්තිමත් වී තිබේ.

අද දිනයේ මහ බැංකු විනිමය අනුපාත සටහනේ දැක්වෙන්නේ ඩොලරයක ගැනුම් මිල රුපියල් 299.87ක් හා විකුණුම් මිල රුපියල් 314.98 ක් වශයෙනි.

කෙසේ වුවත් පසුගිය දින වල ඩොලරයට සාපේක්ෂව රුපියලේ අගය යම් පහළ යාමක් පෙන්නුම් කෙරිණ.

කොළඹ කොටස් වෙළෙඳපොළ මිල දර්ශකවල සුවිශේෂී ඉහළ යාමක් අද (04) දිනයේ දී වාර්තා විය.

දේශීය ණය ප්‍රතිව්‍යූහගතකරණ ක්‍රියාවලිය සඳහා මෙරට බැංකු පද්ධතියට අඛණ්ඩ දින 5 ක විරාමයක් ලබා දීමට රජය පසුගිය දා කටයුතු කළ අතර ඊට සමගාමීව කොළඹ කොටස් වෙළෙඳපොළට ද දින 05 ක නිවාඩුවක් හිමිවිය. ‌

කෙසේවෙතත් එම තීන්දු තීරණවලට මනා ප්‍රතිචාරයක් ලබා දෙමින් ලැයිස්තුගත බැංකු සහ මූල්‍ය සමාගම් සියල්ලකගේම පාහේ කොටස් මිල ගණන් අද දින කැපීපෙනෙන ලෙස ඉහළ යන ලදී.

අද දින සියලු කොටස් මිල දර්ශකය ඒකක 633.69 ක, එනම් පූර්ව ගනුදෙනු දිනයට සාපේක්ෂව 6.71% ක සුවිශේෂී වර්ධනයක් අත්පත් කර ගත් අතර දිනයේ ගනුදෙනු අවසානයේ දී එය ඒකක 10,076.64 ක් ලෙසින් වාර්තා වුණි.

සමාගම් 176 ක කොටස් මිල ගණන් අද දිනයේ දී ඉහළ ගොස් තිබුණි. එහිදී කොමර්ෂල් බැංකුව, සම්පත් බැංකුව, වැලිබල් වන්, HNB සහ LOLC හෝල්ඩිංග්ස් යන සමාගම් වෙතින් සියලු කොටස් මිල දර්ශකයේ වර්ධනයට වැඩිදායකත්වයක් ලැබී තිබුණි.

මේ අතර රු‍. බිලියන 7.41 ක වාර්තාගත ගනුදෙනු පිරිවැටුමක් අද දිනයේ දී වාර්තා විය.

එහිදී දිනයේ සාමාන්‍ය දෛනික ගනුදෙනු හරහා කොමර්ෂල් බැංකුව රු. මිලියන 634 ක්, බ්‍රවුන්ස් ඉන්වෙස්ට්මන්ට්ස් රු. මිලියන 433 ක්, සම්පත් බැංකුව රු. මිලියන 371 ක් සහ නේෂන්ස් ට්‍රස්ට් බැංකුව රු. මිලියන 310 ක් ලෙසින් පිරිවැටුමට ඉහළ දායකත්වයක් ලබා දුන් සමාගම් අතර පෙරමුණේ විය.

මීට අමතරව අද දින ගිවිසා ගනුලැබූ ගනුදෙනු කිහිපයක් ද වාර්තා වූ අතර ඒ අතුරින් ජෝන් කීල්ස් හෝල්ඩිංග්ස් රු. මිලියන 714 ක්, මෙල්ස්ටාකෝප් රු. මිලියන 349 ක් සහ කොමර්ෂල් බැංකු රු. මිලියන 245 ක් ලෙසින් දෛනික ගනුදෙනු පිරිවැටුමට ඉහළ දායකත්වයක් ලබා දී තිබුණි.

• derana biz