පුවත්

රනිල් වික්‍රමසිංහ ප්‍රමුඛ එක්සත් ජාතික පක්ෂ නියෝජිතයන් පසුගියදා හමුවු එක්සත් ජනරජ පෙරමුණේ පාඨලි චම්පික රණවක ඇතුළු පිරිස සමගි ජන බලවේගයේ කණ්ඩායමක් සමග ද සාකච්ඡා පවත්වා තිබේ.

කෙසේ වුවත් මෙම සාකච්ඡාව සඳහා සජබ නායක සජිත් ප්‍රේමදාස සහභාගි ව නොතිබීම විශේෂත්වයකි.

ඒ අනුව මෙම සාකච්ඡාව සඳහා සමගි ජන බලවේගය වෙනුවෙන් සහභාගි ව ඇත්තේ මහලේකම් රංජිත් මද්දුමබණ්ඩාර, ජාතික සංවිධායක තිස්ස අත්තනායක, ගයන්ත කරුණාතිලක සහ මුජිබර් රහුමාන් යන නියෝජිත පිරිස ය.

එක්සත් ජනරජ පෙරමුණ වෙනුවෙන් එහි නායක පාඨලී චම්පික රණවක, සභාපති විශේෂඥ වෛද්‍ය අජිත් අමරසිංහ, මහලේකම් බන්දුල චන්ද්‍රසේකර, ජ්‍යෙෂ්ඨ උපසභාපති නීතීඥ ශිරාල් ලක්තිලක, ජාතික සංවිධායක ඉංජිනේරු සුමේධ රත්නායක යන පිරිස ද එක්ව තිබේ.

එහිදී එක්සත් ජනරජ පෙරමුණේ 'දේශය වෙනුවෙන් එක්වන පියවරක්' ප්‍රකාශනයෙහි අන්තර්ගතය සම්බන්ධයෙන් සජබ නියෝජිතයන් සමග සාකච්ඡා පැවැත්වු බවයි එම පක්ෂය නිවේදනය කර සිටියි.

ඒ සම්බන්ධයෙන් වැඩිදුරටත් අදහස් දක්වමින් පාඨලී චම්පික රණවක මන්ත්‍රීවරයා මෙසේ පවසා ඇත .

“අපේ අරමුණ ඉදිරි මහමැතිවරණය, ජනාධිපතිවරණ සඳහා මනුෂ්‍යත්වයේ සන්ධානයක් බිහිකරගන්න. ඒ සඳහා අපි දැනට ශ්‍රී ලංකා නිදහස් පක්ෂය එක්කත්, එක්සත් ජාතික පක්ෂය එක්කත් දැන් අද සමගි ජන බලවේගත් එක්කත් කතා කළා. අපි අනිත් පක්ෂ එක්කත් කතා කරන්න බලාපොරොත්තු වෙනවා."

හම්බන්තොට දිස්ත්‍රික් පාර්ලිමේන්තු මන්ත්‍රී නාමල් රාජපක්ෂ පොදු ජන පෙරමුණේ ජනාධිපති අපේක්ෂකයා ලෙස පත් කළ යුතු යුතු බවට ඉදිරිපත් කෙරුණු යෝජනාවක් එම පක්ෂයේ මාතලේ දිස්ත්‍රික් නියෝජිත හමුවේදී ඊයේ (25) ඒකමතිකව සම්මතවී ඇති බව වාර්තා වෙයි .

දඹුල්ල හෝටලයක මෙම නියෝජිත හමුව පවත්වා ඇති අතර ඊට පොදුජන පෙරමුණේ මාතලේ දිස්ත්‍රික් නායක පාර්ලිමේන්තු මන්ත්‍රී ජනක බණ්ඩාර තෙන්නකෝන් හෝ රාජ්‍ය අමාත්‍ය ප්‍රමිත බණ්ඩාර තෙන්නකෝන් වෙත කිසිදු ආරාධනයක් සිදුකර නොමැති බවත් වාර්තා වෙයි .

කෙසේ වුවත් මෙම රැස්වීමට පොදුජන පෙරමුණ පක්ෂයේ ලේකම් පාර්ලිමේන්තු මන්ත්‍රී නීතිඥ සාගර කාරියවසම්, පාර්ලිමේන්තු මන්ත්‍රී නාමල් රාජපක්ෂ, නාලක බණ්ඩාර කෝට්ටේ ගොඩ, ඉන්දික අනුරුද්ධ , ජානක තිස්ස කුට්ටිආරච්චි රෝහණ දිසානායක යන මන්ත්‍රීවරුන්, මාතලේ දිස්ත්‍රික්කයේ ශ්‍රී ලංකා පොදු ජන පෙරමුණේ නාගරික සහ ප්‍රාදේශීය සභා හිටපු මන්ත්‍රීවරුන් ඇතුළු පිරිසක්ද සහභාගිව ඇති බවත් වාර්තා වෙයි .

නාමල් රාජපක්ෂ මන්ත්‍රීවරයා ජනාධිපති අපේක්ෂක ලෙස පත් කළ යුතු යැයි කෙරුණු යෝජනාවට පළාත් පාලන ආයතන නියෝජිතයන් සියලු දෙනා එහිදී ඒකමතිකව අනුමත කර ඇතැයිද දැනගන්නට ඇත.

පරාටේ නීතිය ක්‍රියාත්මක කිරීම තාවකාලිකව අත්හිටුවීමට කැබිනට් මණ්ඩලය අනුමැතිය ලබාදී ඇති බව වාර්තා වෙයි .

ඒ අනුව 2024 දෙසැම්බර් මස 15 වනදා දක්වා පරාටේ නීතිය ක්‍රියාත්මක වීම අත්හිටුවනු ඇත.

වැඩිදුරටත් වාර්තා වන ආකාරයට අධිකරණ අමාත්‍ය විජයදාස රාජපක්ෂ සහ කර්මාන්ත අමාත්‍ය රමේෂ් පතිරණ විසින් කළ ඉල්ලීමකට අනුව මුදල් ඇමති ලෙස ජනපති විසින් ඉදිරිපත් කළ එම යෝජනාවට කැබිනට් අනුමැතිය හිමිව ඇත.

ශ්‍රී ලන්කන් ගුවන් සමාගම තව දුරටත් පවත්වාගෙන යාමට නොහැකි නම් වසා දැමීමට සිදුවන බව වරාය නාවික හා ගුවන් සේවා ඇමති නිමල් සිරිපාලද සිල්වා සඳහන් කරයි.

අද (26) කොළඹ පැවති මාධ්‍ය හමුවකදී අදහස් දක්වමින් අමාත්‍යවරයා මේ බව පැවසීය .

සමාගමේ සේවකයන් පසුගිය කාලයේ සිදු කළ වර්ජන හේතුවෙන් සමාගමට තිබූ පිළිගැනීම බිංදුවට වැටී ඇති බවද පවසන අමාත්‍යවරයා ඒ හේතුවෙන් සමාගම නොමිලේ දුන්නද භාර ගැනීමට කිසිවකු ඉදිරිපත් නොවන තත්ත්වයට පත්ව ඇතැයි පැවසීය.

මෙරට ගුවන් තොටු‍පොළ ගැනීමට අදානි සමාගම් පමණක් නොව රුසියාව චීනය ඇතුළු රටවල් කිහිපයක් බලාපොරොත්තුවෙන් සිටින බවද නිමල් සිරිපාල ද සිල්වා අමාත්‍යවරයා සඳහන් කළේය .

“උරුමය” ජාතික වැඩසටහනින් අපේක්ෂිත අභිමතාර්ථ යථාර්ථයක් බවට පත් කර ගනිමින් ප්‍රජාව වෙත සිය භුමියේ සින්නක්කර අයිතිය භුක්ති විඳීමේ අවස්ථාව ලබා දීමට අදාළව ඉල්ලුම් කිරීමට ක්ෂණික ඇමතුම් අංකයක් හඳුන්වා දී තිබේ.

ඒ අනුව දිනපතා පෙ.ව 8.30 සිට රාත්‍රී 8.30 දක්වා 1908 ක්ෂණික ඇමතුම් අංකය සහ දුරකථන අංක 0114 354600/ 0114 354601 ඔස්සේ ජනාධිපති කාර්යාලයේ, උරුමය ජාතික මෙහෙයුම් කාර්යාලය සමඟ සම්බන්ධ වීමෙන් ජනතාවට සිය ඉල්ලීම යොමු කරමින් ලියාපදිංචි වීම සඳහා අවස්ථාව සලසා ඇත.

www.tinyurl.com/urumaya (ඩිජිටල් ඉල්ලුම් පත්‍රය) පෝරමය පිරවීම මඟින් ද අදාළ අවශ්‍යතාව ඉටු කිරීමට පහසුකම් සපයා තිබේ.

1935 අංක 19 දරණ ඉඩම් සංවර්ධන ආඥා පනත මඟින් ගොවි ජනතාව හා අඩු ආදායම්ලාභීන් වෙත කොන්දේසි සහිත අවසර පත්‍ර/ දීමනා පත්‍ර සහිත රජයේ ඉඩම් කොන්දේසි විරහිත සින්නක්කර අයිතියට පත් කරමින් ජනතාව වෙත ලබා දීම ජනාධිපති රනිල් වික්‍රමසිංහ මහතා විසින් ඉදිරිපත් කරන ලද 2024 අයවැය යෝජනා අතර සුවිශේෂී යෝජනාවකි.

මෙම උරුමය සින්නක්කර ඔප්පු ලබා ගැනීම තුළින් ඉඩම සඳහා නව වටිනාකමක් හිමි වන අතර, එතුළින් ඔවුන්ගේ උරුමය ආරක්ෂා කර ගනිමින් තම පවුලේ ආර්ථිකය ශක්තිමත් කර ගැනීමට අවස්ථාව උදා වෙයි.

කඳුරට දෙමළ ජනතාව මුහුණ දෙන ප්‍රශ්න දෛනික වැටුපට සීමා නොකළ යුතු බවත් ඔවුන්ගේ ජීවන තත්ත්වය නගාසිටුවීම සඳහා නිවාස, ඉඩම්, අධ්‍යාපන, සෞඛ්‍ය හා යටිතල පහසුකම් යන සෑම ක්ෂේත්‍රයක් කෙරෙහිම අවධානය යොමු කළ යුතු බවත් ජල සම්පාදන හා වතු යටිතල පහසුකම් සංවර්ධන අමාත්‍ය ජීවන් තොණ්ඩමන් පැවසීය.

ඇතැම් දේශපාලන පක්ෂ කඳුරට දෙමළ ජනතාවගේ ප්‍රශ්න විසඳීමට යැයි පවසමින් අවබෝධතා ගිවිසුම් අත්සන් කළ ද ජනතාවගේ සැබෑ ප්‍රශ්න විසඳීම සඳහා අවබෝධතා ගිවිසුම් අවශ්‍ය නොවන බව ද අමාත්‍යවරයා සඳහන් කළේය.

ජල සම්පාදන හා වතු යටිතල පහසුකම් සංවර්ධන අමාත්‍ය ජීවන් තොණ්ඩමන් මෙම අදහස් පළ කර සිටියේ “ස්ථාවර රටකට සැවොම එක් මඟකට” යන මැයෙන් අද (26) ජනාධිපති මාධ්‍ය කේන්ද්‍රයේ පැවති මාධ්‍ය හමුවට එක් වෙමිනි.

මෙම වසර තුළ ජල ගාස්තු වැඩි කිරීමක් සිදු කිරීමට අපේක්ෂා නොකරන බව පැවසූ අමාත්‍යවරයා යෝජිත ජල සූත්‍රය හඳුන්වාදීම ජනතාව පීඩාවට පත් නොකරන ආකාරයකට සිදු කරන බව ද පැවසීය.

මෙහිදී වැඩිදුරටත් අදහස් දැක්වූ අමාත්‍ය ජීවන් තොණ්ඩමන් මෙසේද පැවසීය.

“මෙම වසර තුළ අප ජල ගාස්තු වැඩි කිරීමක් සිදු කිරීමට අපේක්ෂා කරන්නේ නැහැ. පසුගිය වසරේ අප හඳුන්වා දෙන බව ප්‍රකාශ කළ ජල ගාස්තු සූත්‍රය සකස් කිරීමේ කටයුතු මේ වන විට අවසන් වී පවතිනවා. නමුත් එම සකස් කරන ලද ජල සූත්‍රය පිළිබඳ අප තවදුරටත් අධ්‍යයනය කරමින් සිටිනවා. ජල සූත්‍රය මඟින් ජනතාවට අනවශ්‍ය බරක් පැටවීමට අප බලාපොරොත්තු වන්නේ නැහැ.

ඇතැම් දේශපාලන පක්ෂ එක්ව කඳුරට දෙමළ ජනතාවගේ ගැටලු විසඳීම සඳහා අවබෝධතා ගිවිසුම් පවා අත්සන් කර තිබෙනවා. කඳුරට දෙමළ ජනතාවගේ සැබෑ ප්‍රශ්න විසඳීමට අවබෝධතා ගිවිසුම් අවශ්‍ය වන්නේ නැහැ. කඳුරට දෙමළ ජනතාව දිගු කාලයක් මෙවැනි සන්දර්ශන දැක තිබෙනවා. දැන් අවශ්‍ය වන්නේ දෙන වචන ක්‍රියාවෙන් සිදු කර පෙන්වීමයි. අප කැපවී සිටින්නේ ඒ සඳහායි.

ඇතැම් දේශපාලන නායකයන්ට අනුව වතුකරයේ දෙමළ ජනතාව මුහුණ දෙන එකම ප්‍රශ්නය දෛනික වැටුප ලෙස රු.1500.00ක මුදලක් ලබා ගැනීමයි. මම මගේ ජනතාව එවැනි පහත් මට්ටමක තැබීමට කැමති නැහැ. ආණ්ඩුව හෝ විපක්ෂය හෝ කවර කණ්ඩායමක් දේශපාලනික වශයෙන් කුමන ස්ථාවරයක් දැරූවද සුළු ජන කොට්ටාසයකගේ ගැටලු විසඳීමේදී දේශපාලනික වශයෙන් බෙදීම් නොපැවතිය යුතු බව ජනාධිපති රනිල් වික්‍රමසිංහ මහතාගේ ස්ථාවරයයි. මගේ ස්ථාවරය ද එයයි. එම ප්‍රජාවගේ දියුණුව වෙනුවෙන් එක්ව කටයුතු කළ යුතුයි.

ජනාධිපති රනිල් වික්‍රමසිංහ අවස්ථා කිහිපයකදී එලෙස එක්වන ලෙස ආරාධනා කළත් අවාසනාවකට මෙන් බොහෝ දෙනෙකු දේශපාලනික පටු සීමා තුළ කටයුතු කරමින් සිටිනවා.

2015 වසරේදී යෝජනාවී තිබුණේ නිවාස 14,000ක් ඉන්දීය ණය ආධාර යටතේ ද, නිවාස 10,000ක් ශ්‍රී ලංකා රජය මඟින්ද වන ලෙස කඳුරට දෙමළ ජනාතාව වෙනුවෙන් මුළු නිවාස 24,000ක් ඉදි කිරීමටයි. 2022 වසර වන විට පැවති කොවිඩ් - 19 වසංගතය සහ ආර්ථික අර්බුදය නිසා මෙම නිවාස ඉදිකිරීම සම්පූර්ණයෙන් ඇන හිටියා. ඒ වන විට ශ්‍රී ලංකා රජයෙන් ඉදිකර තිබුණේ නිවාස 1560ක් පමණයි. මෙම නව නිවාස 10,000 ව්‍යාපෘතිය ආරම්භ කිරීමට අපට හැකියාව ලැබුණේ, ඉන්දීය රජය පෙර ලබා දුන් නිවාස 4,000 ව්‍යාපෘතියෙහි වැඩ සම්පූර්ණයෙන් අවසන් කිරීමට හැකි වූ නිසයි.

නිවාස පමණක් නොවෙයි මෙම ජනතාවට ඉඩම් අයිතිය ද ලබා දිය යුතුයි. කඳුකර දෙමළ ජනතාව දිගු කාලයක් පුරා පුළුල්ව පැතිරුණු ගැටලු රාශියකින් පීඩා විඳිනවා. ඔවුන්ගේ නිවාස ප්‍රශ්නය, ඉඩම් ප්‍රශ්නය, අධ්‍යාපනය, සෞඛ්‍ය ඇතුළු අනෙකුත් යටිතල පහසුකම් ලබාදීම ආදී මේ දක්වා නොවිසඳුණු ගැටලු රාශියක් ඔවුන්ට පවතිනවා. මෙම ගැටලු සඳහා තිරසර විසඳුම් ලබාදිය යුතු බව ජනාධිපති රනිල් වික්‍රමසිංහ මහතාගෙත් මාගේත් ස්ථාවරය බවට පත් වී තිබෙනවා. ඒ වෙනුවෙන් අප කටයුතු කරනවා.”

දේශබන්දු තෙන්නකෝන්  මෙරට 36 වන පොලිස්පතිවරයා ලෙස පත්කර තිබේ.

ඒ, ජනාධිපති රනිල් වික්‍රමසිංහ  විසිනි.

පසුගිය වසරේ නොවැම්බර් මස 29 වැනිදා සිට ඔහු වැඩබලන පොලිස්පතිවරයා ලෙස කටයුතු කළේ ය.

දේශබන්දු තෙන්නකෝන්  කොළඹ නාලන්දා විද්‍යාලයේ ආදි ශිෂ්‍යයෙක් වන අතර, කොළඹ විශ්වවිද්‍යාලයේ ආදි විද්‍යාර්ථයෙක් ද වේ.

1998 වසරේදී දේශබන්දු තෙන්කෝන්  පොලිස් සේවයට එක්වූයේ සහකාර පොලිස් අධිකාරිවරයෙකු ලෙසයි.

වැඩබලන පොලිස්පති දේශබන්දු තෙන්නකෝන්ට ලබා දුන් මාස 03 ධූර කාලය බදාදා (28) රාත්‍රී 12 ට නිමාවීමට නියමිතව තිබිණ.

කතානායක මහින්ද යාපා අබේවර්ධන පාර්ලිමේන්තුවේ විශ්වාසයත් ආණ්ඩුක්‍රම ව්‍යවස්ථාවත් උල්ලංඝනය කර ඇති බවට චෝදනා කරමින් සමගි ජන බලවේගය ප්‍රමුඛ සමගි ජන සන්ධානය කතානායකවරයාට විරුද්ධව විශ්වාසභංග යෝජනාවට අත්සන් තැබීම ආරම්භ කර තිබේ.

විපක්ෂ නායක සජිත් ප්‍රේමදාසගේ මූලිකත්වයෙන් මේ විශ්වාසභංග යෝජනාව ගෙන ඒම සඳහා සමගි ජන බලවේගය සහ සමගි ජන සන්ධානය නියෝජනය කරමින් පාර්ලිමේන්තු මන්ත්‍රී එම්. ඒ. සුමන්තිරන්, ලක්ෂ්මන් කිරිඇල්ල, ජී. ඇල්. පීරිස්, තිස්ස අත්තනායක, චන්දිම වීරක්කොඩි සහ ශාන් විජයලාල් ද සිල්වා  ඇතුළු පිරිසක් අත්සන් විශ්වාසභංග යෝජනාවට අත්සන් කර තිබේ.

එම විශ්වාසභංග යෝජනාව තුළින් මාර්ගගත සුරක්ෂිතභාවය සම්බන්ධ පනත් කෙටුම්පතේ 13, 17, 20, 33 (6), 34 (1), 35 (1), 21, 22, 31 වගන්ති සම්බන්ධයෙන් ශ්‍රේෂ්ඨාධිකරණය විසින් ලබා දී ඇති යෝජනා නොසලකා කටයුතු කර ඇති බව මෙහි සඳහන් වේ.

එසේම එම පනත් කෙටුම්පතේ ඇතැම් වගන්ති සම්මත කර ගැනීමේ දී ශ්‍රේෂ්ඨාධිකරණය විසින් ලබා දුන් තීරණ අනුව කටයුතු නොකර ඇති බවත් එසේ කටයුතු නොකිරීම නිසා දැනට එම පනත පවතින ආකාරයෙන් සම්මත කර ගැනීමට අවශ්‍ය ඡන්ද ප්‍රමාණයක් පාර්ලිමේන්තුවෙන් ලැබී ඇත්ද යන්න පිළිබඳ බලවත් ප්‍රශ්නයක් නැගී ඇති බවත් 2024.02.08 වැනි දින කථානායකවරයාට ලිපියක් යොමු කරමින් ශ්‍රී ලංකා මානව හිමිකම් කොමිෂන් සභාව ද සඳහන් කර තිබේ.

එසේම මෙම පනත තුන්වැනි වර කියැවීමේ දී විපක්ෂයේ ප්‍රධාන සංවිධායකවරයා විසින් පැහැදිලි බෙදීමක් ඉල්ලා සිටියත් එම ඉල්ලීමද නොසලකා හරිමින් ඡන්දයකින් තොරවම මෙය සම්මත කර ඇති බවත් මෙවැනි ගැටලු රාශියක් තිබියදී ඒ සම්බන්ධයෙන් ගැඹුරින් සලකා බලන තෙක් එම පනත් කෙටුම්පත නීතියක් වන ලෙස අත්සන් නොකරන ලෙස කථානායකවරයාගෙන් ඉල්ලා සිටියත් එම ඉල්ලීමද නොසලකා හරිමින් කටයුතු කර තිබීමත් මෙම විශ්වාසභංග යෝජනාව ගෙන ඒමට හේතු වී තිබේ.

කථානායකවරයා පක්ෂග්‍රාහීව කටයුතු කිරීම, පාර්ලිමේන්තු ස්ථාවර නියෝග සහ ආණ්ඩුක්‍රම ව්‍යවස්ථාව අමුඅමුවේම උල්ලංඝනය කිරීම, කථානායක ධුරයේ ස්වාධිනත්වය හා ගෞරවය කෙළෙසීම, විපක්ෂයේ මන්ත්‍රීවරුන්ගේ වරප්‍රසාද සහ අයිතිවාසිකම් කඩ කරමින් සිය වගකීම් පැහැර හැර ඇති බව පවසමින් මෙම යෝජනාව ඉදිරිපත් කර තිබේ.

අධික උෂ්ණත්වය සහිත කාලගුණික තත්ත්වය හමුවේ ඇතිවිය හැකි අහිතකර තත්ත්වයන්ගෙන් පාසල් දරුවන් ආරක්‍ෂා කර ගැනීම සම්බන්ධයෙන් පාසල් ශිෂ්‍ය ශිෂ්‍යාවන් සදහා ලබාදිය යුතු උපදෙස් මාලාවක් අධ්‍යාපන අමාත්‍යංශය විසින් නිකුත් කර ඇත.

ඒ අනුව සෞඛ්‍ය අමාත්‍යංශයේ අතිරේක ලේකම්(වෛද්‍ය සේවා) විසින් 2023.03.10 දින නිකුත් කරන ලද මාර්ගෝපදේශ සංග්‍රහයට අනුකූලව පවත්නා අධික උෂ්ණත්වය සහිත කාලගුණික තත්ත්වයන් හමුවේ ඇතිවිය හැකි අහිතකර ප්‍රතිඵල සහ ඒවායින් අත්මිදීම සදහා පාසල් දරුවන් වෙත ලබා දිය යුතු උපදෙස් මාලාවක් මෙලෙස නිකුත් කර තිබේ.

මේ සම්බන්ධව සියලු විදුහල්පතිවරුන් දැනුවත් කරන ලෙස අධ්‍යාපන අමාත්‍යංශය විසින් සියලුම පාළාත් අධභාපන අධ්‍යක්‍ෂවරුන් වෙත උපදෙස් ලබා දී ඇත.

එම උපදෙස් මාලාව පහත පරිදි වේ.

ජාත්‍යන්තරයෙන් කොතරම් බාධා පැමිණුනත් යුක්තිය මෙහෙයුම නතර කිරීමට කිසිසේත්ම ඉඩ ලබා දෙන්නේ නැතැයි මහජන ආරක්ෂක අමාත්‍ය ටිරන් අලස් අවධාරණය කර සිටියි.

ඔහු එබව කියා සිටියේ, බණ්ඩාරවෙල පොලිස් බල ප්‍රදේශයේ ප්‍රජා පොලිස් කමිටු දැනුවත් කිරීම සඳහා පැවැති විශේෂ වැඩමුළුවකට එක්වෙමිනි.

එහිදී තව දුරටත් අදහස් දැක්වූ අමාත්‍යවරයා මෙසේද පැවසිය.

"අප විසින් යුක්තිය මෙහෙයුම ආරම්භ කරනු ලැබුවේ මාස ගණනාවක් ඒ පිළිබඳ අධ්‍යයනය කිරීමෙන් අනතුරුව රටේ පවතින වාතාවරණය පිළිබඳව පැහැදිලි අවබෝධයක් ලබා ගනිමින්. ඉන් අනතුරුව පසුගිය දෙසැම්බර් මාසයේ දකුණු පළාතෙන් මෙම මෙහෙයුම ආරම්භ කරනු ලැබුවා.

 මත්ද්‍රව්‍ය සහ පාතාල ක්‍රියාකාරකම් හේතුවෙන් රටේ දූ දරුවන් දෙමාපියන් ඇතුළු සෑම ජන කොටසක්ම විශාල කනස්සල්ලකින් පසු උනා. එය කොතරම් උග්‍ර ලෙස ජනතාව පීඩාවට පත් කර තිබෙනවාද යන්න පිළිබඳව මෙම මෙහෙයුම ආරම්භ කරන තුරුම අපට පැහැදිලි අවබෝධයක් පැවතුණේ නැහැ. නමුත් ගෙවුණු මාස දෙකක පමණ කාලය තුළ අපට ලැබෙන දුරකථන ඇමතුම් වලින් ජනතා අදහස්වලින් ජනතාව පීඩනයකට පත්ව සිටියාද යන්න පිළිබඳව පැහැදිලි අවබෝධයක් ලැබී තිබෙනවා. පවුල් කැඩී බිඳී ගොස් දරුවන් අනාථ වී තිබෙනවා. එම තත්වය රට පුරාම පැතිර ගොස් තිබෙනවා.

 මේ පිළිබඳව අවධානය යොමු කරමින් වැඩබලන පොලිස්පතිට සහ විශේෂ කාර්ය බලකාය භාර නියෝජ්‍ය පොලිස්පතිට නීච ඉතාමත් තදින් ක්‍රියාත්මක කිරීම සඳහා අවශ්‍ය උපදෙස් මා ලබා දුන්නා. එහිදී අපේ විශේෂම අවධානය යොමු වූයේ මත්ද්‍රව්‍ය අලෙවි කරන ජාලය සම්පූර්ණයෙන්ම අවසන් කර දැමීමටයි. ඒ අනුව රටේ සෑම පළාතකම ජනතාවට දැනෙන වෙනසක් මේ වන විටත් සිදුව තිබෙනවා. එහිදී මතුවන ඕනෑම බාධකයකට මුහුණ දීමට අප සූදානම්.

අප මේ මෙහෙයුම සිදු කරන්නේ රටේ සහ ජනතාවගේ අනාගතය සුරක්ෂිත කිරීමට. එම නිසා ජාත්‍යන්තරයෙන් කොතරම් බාධා පැමිණුනත් මෙම මෙහෙයුම කිසිසේත්ම නතර කිරීමට ඉඩ ලබා දෙන්නේ නැහැ. ජාත්‍යන්තර වශයෙන් මෙන්ම දේශීයව ද යම් යම් පිරිස් අපට බාධා කිරීම ආරම්භ කර තිබෙනවා. මත්ද්‍රව්‍ය ජාවාරම්කරුවන්ගෙන් මුදල් ලබාගන්නා රාජ්‍ය නොවන සංවිධානවල අතලොස්සක්, නීතිඥවරු අතලොස්සක් මේ මෙහෙයුම් නතර කිරීමට උත්සාහ දරනවා. වැඩ බලන පොලිස්පතිවරයාට එරෙහිව මේ වන විට නඩු හතකට වඩා පවරා තිබෙනවා. ඒ සෑම නඩුවකින්ම ඉල්ලා සිටින්නේ ඔහු පොලිස්පති තනතුරට පත් නොකරන ලෙසයි.

ඒ සෑම නඩුවක්ම පවරා තිබෙන්නේ එකම කණ්ඩායමක්. සමාජ මාධ්‍ය ඔස්සේ එල්ලවන මෙවැනි චෝදනාවලට පිළිතුරු ලබා දිය යුත්තේ ජනතාවයි. 100%ක්‌ සම්පූර්ණයෙන් මෙය අවසන් කිරීමට නොහැකි වුවත් ජුනි මාසයට අවසන් වන විට රට තුළ දැවැන්ත වෙනසක් ඇති කිරීමේ ඉලක්කය වැඩ බලන පොලිස්පති ඇතුළු නිලධාරීන් වෙත අප ලබාදී තිබෙනවා.

පාතාලය මැඩ පැවැති මේ මෙහෙයුමද සිදු කිරීම ලෙහෙසි පහසු කටයුත්තක් නොවේ. විශේෂයෙන්ම විදේශීය රටවල සැඟවී සිටින අපරාධකරුවන් අත්අඩංගුවට ගෙන මෙරටට ගෙන ඒමේදී ඒ ඒ රටවල පවතින නීති රීති සමග කටයුතු කිරීමට අපට සිදුවනවා. එවැනි අවස්ථාවල දීර්ඝ වශයෙන් එම රටවල අමාත්‍යවරුන් සමඟ සාකච්ඡා කිරීමට අපට සිදුවී තිබෙනවා. ජාත්‍යන්තර රතු නිවේදන නිකුත් කළ අපරාධකරුවන් හතළිස් ගණනක් මේ වන විට සිටිනවා. කොතරම් අපහසු වුවත් ඒ සියලු දෙනා අත්අඩංගුවට ගැනීමේ මෙහෙයුම් අප සිදු කරනවා. මේ කටයුතු කිරීමේදී අපට මරණ තර්ජන පවා එල්ල වී තිබෙන බව බුද්ධි අංශ වලින්ද තහවුරු කර තිබෙනවා. කොතරම් අපහසු වුවත් ජීවිතය පරදුවට තබා හෝ මේ මෙහෙයුම ක්‍රියාත්මක කිරීමට අවශ්‍ය උපරිම දායකත්වය මා ලබා දෙනවා.

මේ සඳහා අප විශේෂ අවධානයක් යොමු කළ ප්‍රජා පොලිස් කමිටු ශක්තිමත් කිරීම තුළින් ජනතාව සතු තොරතුරු අප වෙත ලබා දීමත් තම ප්‍රදේශවල ජනතාව දැනුවත් කිරීමත් සිදුකර ගැනීම අප විශේෂයෙන්ම බලාපොරොත්තු වෙනවා. එය මෙම මෙහෙයුමේ ඉදිරි කටයුතු සාර්ථක කර ගැනීම සඳහා විශාල ශක්තියක් වන බව මා විශ්වාස කරනවා. ඒ සඳහා ජනාධිපතිතුමාගේ ද සම්පූර්ණ ආශිර්වාදය හිමිව තිබෙනවා. ඒ තුළින් රටේ පැවති ඝාතන රැල්ල යම් පමණකට මැඩ පැවැත්වීමට අපට හැකි වී තිබෙනවා.

මේ සියලු ක්‍රියාකාරකම් තුළින් අපට අත්අඩංගුවට ගැනීමට නොහැකි වී තිබෙන්නේ එක් අයෙකු පමණයි. එම පුද්ගලයාද නුදුරේදීම අත්අඩංගුවට ගැනීමට හැකිවනු ඇති බව මා විශ්වාස කරනවා. ලෝකයේ කොතැනක සැඟවී හිටියත් පාතාල ක්‍රියාකරුවන් අත්අඩංගුවට ගැනීමේ මෙහෙයුම අප නතර කරන්නේ නැහැ. කුමන ආකාරයෙන් හෝ රටේ පාතාල ක්‍රියාකාරකම් සහ මත්ද්‍රව්‍ය ජාවාරම අවසන් කරන බවට මා පොරොන්දු වනවා."

මහජන ආරක්ෂක අමාත්‍යංශ ලේකම් වියානි ගුණතිලක, වැඩ බලන පොලිස්පති දේශබන්දු තෙන්නකෝන්, ජේෂ්ඨ නියෝජ්‍ය පොලිස්පතිවරුන්, නියෝජ්‍ය පොලිස්පතිවරුන්, ප්‍රාදේශීය ලේකම්වරුන් ග්‍රාම නිලධාරින්, රාජ්‍ය නිලධාරින්, ප්‍රජා පොලිස් කමිටු නියෝජිතයන් ඇතුළු විශාල පිරිසක් මෙම අවස්ථාවට එක්ව සිටියහ.

සතිපතා පැවැත්වෙන නිත්‍ය අමාත්‍ය මණ්ඩල හමුවට පසුව දේශපාලන කැබිනට්ටුව (political cabinet) නමින් තවත් අමාත්‍ය මණ්ඩල හමුවක් පැවැත්වීමට රජය තීරණය කර තිබේ.

ආණඩුවේ මෙම තීරණය පසුගිය සතියේ කැබිනට්ටුවේදි ප්‍රකාශ කර ඇත. ජනාධිපති රනිල් වික්‍රමසිංහ සහ කැබිනට් අමාත්‍යවරු පමණක් ඊට සහභාගි වෙති.

දේශපාලන කැබිනට්ටුවට කිසිම රාජ්‍ය නිලධරයකු එක්කර නොගැනීම විශේෂයකි. මෙම දේශපාලන කැබිනට්ටුවේ සාකච්ඡා කරන්නේ ඉදිරි මැතිවරණ හා රජයේ සංවර්ධන ව්‍යාපෘති කඩිනම් කිරීම සම්බන්ධයෙන් පමණි.

පළමු දේශපාලන කැබිනට්ටුවේදී ජනාධිපතිවරයා උපදෙස් දී ඇත්තේ ඉදිරියේ මැතිවරණ සමයක් එළඹෙන බැවින් ලබන ජූලි මාසයට පෙර දැනට ක්‍රියාත්මක වන සියලුම සංවර්ධන ව්‍යාපෘති අවසන් කළ යුතු වගයි. ඒ සඳහා අමාත්‍ය මණ්ඩලය දැඩි ලෙස කැපවිය යුතු වගද පෙන්වා දී තිබුණි.

මෙම දේශපාලන කැබිනට්ටුව ශ්‍රී ලංකාවට නවතම අත්දැකීමක් වුවද අතීතයේ මෙබඳු ක්‍රමයක් මහා බ්‍රිතාන්‍යයේ ක්‍රියාත්මක විය. ඒ ආදර්ශය අනුව මෙම දේශපාලන කැබිනට්ටුව ස්ථාපිත කරන ලද බවද වාර්තා වෙයි.කඩිනම් කිරීම සම්බන්ධයෙන් පමණි.

• deshaya

එළැඹෙන ඔක්තෝබර් මාසයේ ජනාධිපතිවරණය පැවැත්වෙන අතර ඒ සඳහා නිර්පාක්ෂික අපේක්ෂකයා වශයෙන් ජනාධිපති රනිල් වික්‍රමසිංහ ඉදිරිපත් වන බව හිටපු මුදල් අමාත්‍ය රවී කරුණානායක පැවසීය.

සියලු දෙනාටම වියදම් සීමාකර මූල්‍ය පාලනයක් ඇතිකර ගන්නා ලෙස රජය අවධාරණය කර ඇති පසුබිමේ ශ්‍රී ලංකා මහ බැංකුව ඒ කිසිත් නොතකා ඔවුන්ගේ වැටුප් වැඩිකර ගැනීමේ කිසිදු සාධාරණයක් නොමැති බවද ඒ මහතා අවධාරණය කළේය.

හිටපු මුදල් අමාත්‍ය රවී කරුණානායක මේ බව සඳහන් කර සිටියේ අද (25) කොළඹ පැවති මාධ්‍ය හමුවකදී අදහස් දක්වමින් ය.

රට කඩාවැටීමට අදාළව නිලධාරීන් වෙතද වගකීමක් ඇති බව පෙන්වා දුන් හිටපු අමාත්‍යවරයා රට ඉදිරියට ගෙනයාමට නම් නිලධාරීන් ද සැළසුම් සහගතව මීටවඩා මැදිහත්වීමක් කළ යුතු බවත් මේ මොහොතේ නම් එවැනි තත්ත්වයක් පෙන්නුම් නොකරන බවත් සඳහන් කළේය.

එහිදී වැඩිදුරටත් අදහස් දැක්වූ හිටපු මුදල් අමාත්‍ය රවී කරුණානායක මෙසේද පැවසීය .

රට මීට මාස 22 කට පෙර තිබූ තත්ත්වය අනුව සළකා බැලීමේදී යම් ස්ථාවරත්වයකට පැමිණ තිබෙනවා. නමුත් තව සිදුකළ යුතු දේ බොහෝ තිබෙනවා . කඩාවැටුණු රට යම් කළමනාකරණයකට ලක්කර ගැනීමට එක පුද්ගලයෙන් ඉදිරිපත් වුනා. ඒ ජනාධිපති රනිල් වික්‍රමසිංහ මහතායි. ඔහු බාරගත් වගකීම ඉටුකරන්න සමත් වූ බව කවුරුත් පිළිගත යුතුයි.

එදා රටේ වගකීම ගන්න කෙනෙක් හිටියේ නෑ . බයේ හැංගිලා හිටියේ. ඒ හැංගිලා හිටපු අය අද ඇවිත් විහිලු කතා කියනවා. ඔය විහිලු කතා අහන්න කාලය මිඩංගු කිරීමත් අපරාධයක් .

රට තිබුන තත්ත්වය වගේම මේ ගෙනයන වැඩපිළිවෙළ කඩාකප්පල් වුවහොත් පත්වෙන අවධානම ජනතාව තේරුම් ගන්න ඕන . මේ වැඩේදී ෂොර්ට් කට් නෑ .

එක එක අය විවිධ ප්‍රකාශ කරනවා. මාධ්‍ය ජාල විවිධ ලෙස ඒවා වාර්තා කරනවා. නමුත් ජනතාව පීඩාවට පත්නොවන ආකාරයට රට ගොඩගැනීම ගැනයි අවධානය යොමුකරන්න අවශ්‍ය. ඒක සියලු දෙනා එකතුව කළ යුතුයි. විහිලු කාරයන් විවිධ කතා කිව්වත්, ජනාධිපති රනිල් වික්‍රමසිංහ එළැඹෙන ඔක්තෝබර් මාසයේ පැවැත්වෙන ජනාධිපතිවරණය සඳහා නිර්පාක්ෂික අපේක්ෂකයා ලෙස ඉදිරිපත් වෙනවා. එතුමා ජයග්‍රහණය කරවීමට අපි සියලු දෙනා කැපවෙනවා.

ඒ වගේම තමයි ජනතාව දැනගන්න ඕන , රටේ පසුගිය සමයේ සිදුවූ කඩා වැටීමට රාජ්‍ය නිලධාරීන් ද වගකිවයුතු බව. ඒ නිසා ඔවුන් ජනතාව ගේ පැත්තෙන් සිතා තීන්දු තීරණ ගන්න අවශ්‍යයි.

මේ රටේ ආර්ථික ප්‍රශ්නවලට මුලික ප්‍රශ්න ඇතිකරන්නෙ මහා බැංකුව කියලා මම කලින්ම කිවුවා. මුල්‍ය ආයතන කඩා වැටිලා තියෙන්නෙ ඔහුන් නිවරදිව වැඩ නොකළ නිසයි.

දැන් බලන්න , සියලු දෙනාටම රජය කියනවා මුල්‍ය පාලනයක් කරන්න, වියදම් සීමා කරගන්න කියලා. නමුත් මහා බැංකුව ඔවුන්ගේ වැටුප් වැඩි කරගන්නවා. එය ඉතාම අසාධාරණයි.

මගේ කාලෙත් ඔහොම විවිධ යෝජනා ආවා. විවිධ දේ ගැන සාකච්ඡා කළා. නමුත් අපි එදා අවස්ථාව දුන්නේ සාධාරණ යෝජනා සඳහා පමණයි .

මේ රට බංකොලොත් කියලා කිවුවේ ව්‍යාපාරිකයන් නෙමෙයි. බංකොලොත් කිව්වා මහා බැංකුවෙන් , අඩුමගානේ පාර්ලිමේන්තුවේ අවසරයවත් නොමැතිව.

ඒ වගේම තමයි , පේයි ටැක්ස් එකෙන් 35% වඩා අරන් නෑ. ඒ කියන්නේ ඒ බදු වලින් කිසිම වාසියක් වෙලා නෑ .

මම ඒකයි කියන්නේ , නිලධාරීන් මීට වඩා දෙයක් කරන්න ඕන . එදිනෙදා වැඩටික අතගගා ඉඳලා තේරුමක් නෑ . ඔවුන් මීට වඩා සැළසුම් සහගතව , කාර්‍යක්ෂම ලෙස ක්‍රියාකළ යුතුයි. නමුත් දැනට නම් එවැනි තත්ත්වයක් පේන්න නෑ .

ඒ වගේම විදුලි බිල අඩු කරන්න පුලුවන් කියලා දැන් කියනවා. එම නිසා 20% අඩු කරන්න පුලුවන්නම් වඩා හොදයි.

මුල්‍ය විනයක් ඇති නොවිමේ ප්‍රති විපාක තමයි imf එකට 16 වතාවක් අපිට යන්න වුණේ. ඒ නිසා මේ ආර්ථිකය තිබෙන තැනින් ඉදිරියට ගොඩනැගීමට
ආර්ථික නවන්න නම් දිර්ග කාලින වැඩපිලිවෙලක් අවශ්‍යයි.

මෙරට නිෂ්පාදනය වර්ධනය කළ යුතුයි. ඒ එක්කම මේ බදු ක්‍රමය සහා රුපියල පාවිම නිසා ආනයනය කරලා වෙලදාම් කිරිම ලබදායි වෙලා තියනවා.

ඩොලරය ස්ථාවර වෙලා තියෙන්නෙ. නමුත් අපි තවමත් විශාල ණය ගෙවීම් සිදුකිරීම ආරම්භ කර නෑ . ඒ නිසා
මේ කාලයේදි අපි ඩොලර් ඉතුරු කරගන්න උත්සහා කළ යුතුයි. අපේ අපනයන ඩොලර් බිලියන 20 පමන වැඩි කරගතයුතුයි...

වැඩ කරන රජයේ නිලධාරීන් මුදල් අමාත්‍යාංශය මෙක දැන ගත යුතුයි. හැබැයි දැනගෙන ඔටුවො වගේ ඉඳලා වැඩක් නෑ. ඒ සදහා වැඩ කරන්න අවශ්‍යයි .

ඒ වගේම බලන්න , ගෝඨාභය ශක්තිමත් කරන්න ගිය අය දැන් විපක්ශ නායක ශක්තිමත් කරන්න යනවා. එදා ෆීල්ඩ් මාර්ෂල් නැතුව මුකුත් කරන්න බෑ කියපු අය, දැන් එලව එලවා පහරදෙනවා ...

මේ හමුවේ රටට ඔබින වැඩපිලිවලක් සහ එකට හිතන්න පුලුවන් කන්ඩායමක් එකතු කරගන්න අවශ්‍යයි. මේ මොහොතේ එවැන්නක් සිදුවෙමින් තිබෙනවා . ඒ හමුවේ විපක්ෂය මැතිවරණයක් නෑ කියමින් පොඩි ජොලියක් ගන්නවා . නමුත් ජනාධිපතිවරණය තියෙනවා වගේම එහි නිර්පාක්ෂික අපේක්ෂකයා ලෙස ජනාධිපති රනිල් වික්‍රමසිංහ ඉදිරිපත් කරනවා.

හම්බන්තොට ප්‍රදේශයේ යටිතල පහසුකම් සඳහා දැනටමත් සිදුකර ඇති පුළුල් ආයෝජන ජාතික ආර්ථිකයට ප්‍රතිලාභ සැලසෙන අයුරින් සක්‍රීයව භාවිතයට ගැනීමේ වැදගත්කම ජනාධිපති රනිල් වික්‍රමසිංහ අවධාරණය කළේය.

හම්බන්තොට වරාය මියන්මාර වරාය සමඟ සම්බන්ධ කිරීමට සැලසුම් කර ඇති බවත්, එය නැගෙනහිර චීනයේ චොංකිං වරාය දක්වා සහ අප්‍රිකාව දක්වා තවදුරටත් ව්‍යාප්ත කිරීමට අපේක්ෂා කරන බවත් සඳහන් කළ ජනාධිපතිවරයා මෙරට ප්‍රධාන ආර්ථික කේන්ද්‍රස්ථානයක් බවට හම්බන්තොට පත් කිරීමේ හැකියාවද පෙන්වා දුන්නේය.

ජනාධිපති රනිල් වික්‍රමසිංහ මේ බව පෙන්වා දුන්නේ බස්නාහිර, නැගෙනහිර සහ හම්බන්තොට නගර සංවර්ධන සැලැස්ම පිළිබඳ පසුගියදා ජනාධිපති කාර්යාලයේ පැවති සාකච්ඡාවේදීය.

කොළඹ නගරය ඇතුළු බස්නාහිර පළාතේ, නැගෙනහිර පළාතේ මෙන්ම හම්බන්තොට ප්‍රදේශයේ සංචාරක කලාප ආශ්‍රිත ක්‍රමෝපායික සංවර්ධන සැලසුම් සහ නාගරික සංවර්ධන සැලසුම් පිළිබඳව මෙහිදී දීර්ඝ වශයෙන් සමාලෝචනය කෙරුණු අතර ඊට අදාළ නව ආයෝජන අවස්ථා පිළිබඳව ද විමසා බැලිණි.

මොණරාගල ප්‍රදේශයේ පවතින අමතර ඉඩම් අක්කර දහස් ගණනක් ප්‍රයෝජනයට ගනිමින් නව ආයෝජන කලාප ඇති කිරීමේ සැලසුම පිළිබඳව ද ජනාධිපතිවරයා මෙහිදී අනාවරණය කළේය.

එපමණක් නොව, නාගරික තදබදය අවම කිරීම වෙනුවෙන් අවිස්සාවේල්ල සහ ඇහැළියගොඩ ඇතුළු ප්‍රදේශ සතු උපායමාර්ගික හැකියාවන් භාවිතයට ගනිමින් නව නගර සංවර්ධනය කිරීමේ වැදගත්කමද ජනාධිපතිවරයා පෙන්වා දුන්නේය.

නව ආයෝජන අවස්ථා ආකර්ෂණය කර ගැනීම සහ ආර්ථික වර්ධනය වේගවත් කිරීම ඉලක්ක කර ගනිමින් උතුරු කොළඹ වරාය පුළුල් කිරීම සහ කාර්මික හා තොරතුරු තාක්ෂණ උද්‍යාන ඉදිකිරීමේ සැලසුම් ද මෙහිදී සාකච්ඡාවට ලක් කෙරිණි.

ඉන්දියාවේ සහාය ඇතිව ත්‍රිකුණාමලය ප්‍රධාන ආයෝජන කලාපයක් ලෙස සංවර්ධනය කිරීමේ ව්‍යාපෘතිය පිළිබඳව ද දීර්ඝ ලෙස සාකච්ඡාවට ලක් විය. ත්‍රිකුණාමල නගර සංවර්ධන වැඩසටහන් ක්‍රියාත්මක කිරීම සඳහා ඒකාබද්ධ කණ්ඩායමක් පත් කිරීමට ගෙන ඇති පියවර පිළිබඳව ද මෙහිදී සිහිපත් කළ ජනාධිපතිවරයා ආර්ථික වර්ධනය සහ කලාපීය ස්ථාවරත්වය වැඩිදියුණු කිරීම උදෙසා ඉන්දු - ලංකා ද්විපාර්ශ්වික සහයෝගීතාවයේ වැදගත්කම ද අවධාරණය කළේය.

නැගෙනහිර පළාත් ආණ්ඩුකාර සෙන්දිල් තොණ්ඩමන්, ජනාධිපති ලේකම් සමන් ඒකනායක, අග්‍රාමාත්‍ය ලේකම් අනුර දිසානායක, මුදල් අමාත්‍යාංශයේ ලේකම් මහින්ද සිරිවර්ධන යන මහත්වරු ප්‍රමුඛ අමාත්‍යාංශ ලේකම්වරු ආර්ථික කටයුතු පිළිබඳ ජනාධිපති ජ්‍යෙෂ්ඨ උපදේශක ආචාර්ය ආර්.එච්.එස් සමරතුංග  සහ අදාළ දිස්ත්‍රික් ලේකම්වරු, රාජ්‍ය නිලධාරීහු ඇතුළු පිරිසක් මෙම සාකච්ඡාවට එක්ව සිටියහ.

පූර්ව අමාත්‍ය මණ්ඩල අනුමැතියකින් තොරව රුසියානු සහ යුක්‍රේන සංචාරකයින්ට දින 14ක් ඇතුළත රටින් පිටවිය යුතු බවට සිදු කළ දැනුම්දීම සම්බන්ධයෙන් පරීක්ෂණයක් පවත්වන ලෙස ජනාධිපති රනිල් වික්‍රමසිංහ නියෝග කර තිබේ.

ජනාධිපති මාධ්‍ය අංශය අද (25) විශේෂ කෙටි පණිවිඩයක් නිකුත්කර මේ බව සඳහන් කර ඇත .

අදාළ සංචාරකයින් සඳහා මීට පෙර ලබා දී ඇති වීසා දීර්ඝ කිරීම් අවලංගු කිරීමට ශ්‍රී ලංකා රජය නිල වශයෙන් තීරණය කර නොමැති බවත් එහි සඳහන් කර ඇත .

මේ අතර අතර මෙරට රැඳී සිටින රුසියානු සහ යුක්‍රේන සංචාරකයින්ට දින 14ක් ඇතුළත රටින් පිට වන ලෙස දැනුම්දීම සඳහා රජය මෙතෙක් කිසිදු තීරණයක් ගෙන නොමැති බව මහජන ආරක්ෂක අමාත්‍යාංශය ද නිවේදනයක් නිකුත්කරමින් පවසයි. මේ සම්බන්ධයෙන් පුළුල් පරීක්ෂණයක් සිදු කරන බවද එහි සඳහන් කර ඇත .

ශ්‍රී ලංකා මහ බැංකු සේවකයින්ගේ වැටුප් වැඩි කිරීම සම්බන්ධයෙන් පසුගිය පාර්ලිමේන්තු සැසිවාරවල දී මන්ත්‍රීවරු කිහිප දෙනෙක් සිදුකළ අදහස් දැක්වීම් සම්බන්ධයෙන් සිය අවධානය යොමුවූ බව නිවේදනයක් නිකුත් කරමින් මහ බැංකුව සඳහන් කරයි.

අදාළ නිවේදනයේ සඳහන් ආකාරයට මෙම වැටුප් වැඩි කිරීම ශ්‍රී ලංකා මහ බැංකු පාලක මණ්ඩලයේ අනුමැතිය සහිතව වෘත්තිය සමිති හා එළැඹ ඇති එකඟතා ගිවිසුමට අනුකූලව සිදුකර ඇත.

මේ සම්බන්ධයෙන් කරුණු පැහැදිලි කිරීම සඳහා ලිඛිතව අවස්ථාව ඉල්ලන ලෙස පාලක මණ්ඩලය කළ දැනුම්දීම අනූව මුදල් අමාත්‍යවරයා ලෙස කටයුතු කරන ජනාධිපතිවරයා වෙත 22 වනදා මහ බැංකු අධිපති ලිපියක් යොමු කළ බවද අදාළ නිවේදනයේ සඳහන් කර ඇත .

එම අවස්ථාව ලැබුණු පසු සුදුසු පාර්ලිමේන්තු කමිටුවක් ඔස්සේ පාර්ලිමේන්තු මන්ත්‍රීවරුන්ව දැනුවත් කිරීමට මහ බැංකුව සූදානමින් පසුවන බව එම නිවේදනයේ වැඩිදුරටත් සඳහන් ය.

මේ සම්බන්ධයෙන් ශ්‍රී ලංකා මහ බැංකුව නිකුත්කළ නිවේදනය පහත දැක්වෙයි .

ජනාධිපති රනිල් වික්‍රමසිංහ ගේ සංකල්පයක් මත පාසල් සිසු දරුවන්ගේ අධ්‍යාපන කටයුතු සඳහා දිරියක් ලබාදීමේ අරමුණින් ශිෂ්‍යාධාර ලබාදීමේ “ජනාධිපති අධ්‍යයන ශිෂ්‍යත්ව වැඩසටහන 2024/2025” ක්‍රියාත්මක කිරීමට ජනාධිපති අරමුදල සැලසුම් කර ඇත.

ඒ අනුව මෙරට 10,126ක් වූ සමස්ත පාසල් සංඛ්‍යාව ආවරණය කරමින් පළමු ශ්‍රේණියේ සිට 11 වන ශ්‍රේණිය දක්වා අධ්‍යාපනය ලබන සිසුන් ලක්ෂයක් (100,000) වෙනුවෙන් වාර්ෂිකව මෙම ශිෂ්‍යාධාර ලබාදීමේ වැඩසටහන ක්‍රියාත්මක කිරීමට සැලසුම් කර ඇති අතර සමස්ත වැඩසටහන සදහා ජනාධිපති අරමුදලින් රුපියල් මිලියන 3600ක ප්‍රතිපාදන වෙන් කර තිබේ.

වර්තමානයේ රට තුළ පවතින ආර්ථික තත්ත්වය හමුවේ අඩු සහ මධ්‍ය ආදායම්ලාභී පවුල්වල දරුවන් මුහුණ දෙන පාසල් උපකරණ සහ අභ්‍යාස පොත් සපයා ගැනීම මෙන්ම ප්‍රවාහන පහසුකම් සලසා ගැනීම වැනි කටයුතුවල දුෂ්කරතාවයන් සැලකිල්ලට ගනිමින් ඒ සඳහා යම් අස්වැසිල්ලක් සැලසීම මෙම වැඩසටහනේ අරමුණයි.

සෑම පාසලකම සිටින ඉතා අවම පහසුකම් යටතේ අධ්‍යාපනය හදාරන දක්ෂ සිසු දරුවන් තෝරාගෙන එම දරුවන් සඳහා පහසුකම් සැලසීම මගින් රටේ දරුවන්ට අඛණ්ඩ පාසල් අධ්‍යාපනයක් ලබාදීමත්, එමඟින් රටේ මානව සම්පත වැඩි දියුණු කිරීම සඳහා ආයෝජනය කිරීමත් ජනාධිපති රනිල් වික්‍රමසිංහ ගේ අපේක්ෂාවයි.

ඒ අනුව මෙම ශිෂ්‍යත්වලාභීන් තෝරා ගැනීමේ ක්‍රියාවලිය සහ මීට අදාළ සියලු තොරතුරු ජනාධිපති අරමුදලේ නිල ෆේස්බුක් පිටුව වන www.facebook.com/president.fund ඔස්සේ ඉදිරි දින කිහිපයේදී දැනුම් දීමට නියමිතය.

ශ්‍රී ලංකා මහ බැංකුව, මහජන මුදල් පිළිබඳ පාර්ලිමේන්තු කාරක සභාවට කැඳවීමට යෝජනා කරන බව මුදල් රාජ්‍ය අමාත්‍ය ෂෙහාන් සේමසිංහ පවසයි .

ඔහු මේ බව සඳහන් කර ඇත්තේ ආන්දෝලනාත්මක කතාබහක් ඇති කළ, මහ බැංකුවේ වැටුප් වැඩි කිරීමේ සිද්ධිය පිළිබඳ කරුණු දැක්වීමක් සිදු කරමිනි.

මහජන මුදල් පිළිබඳ පාර්ලිමේන්තු කාරක සභාවට මහ බැංකුවේ වගකිවයුතු පාර්ශ්ව කැඳවා අදාළ වැටුප් වර්ධක සම්බන්ධ ව මෑත කාලීන ව ඇති වූ මතභේදාත්මක තත්ත්වයන් පිළිබඳ පැහැදිලි කිරීමක් ලබා ගැනීම සුදුසු බව අමාත්‍යවරයාගේ අදහස වී තිබේ.

නිවාස හා නාගරික සංවර්ධන අමාතංශයට අදාලව කැබිනට් අනුමැතිය හිමි වූ යෝජනා කඩිනමින් ක්‍රියාත්මක කිරීම සදහා නාගරික සංවර්ධන හා නිවාස අමාත්‍ය ප්‍රසන්න රණතුංග විසින් ඉහළ පෙළේ කමිටුවක් පත්කර ඇත.

අමාත්‍ය ප්‍රසන්න රණතුංග මේ බව සඳහන් කළේ නාගරික සංවර්ධන හා නිවාස අමාත්‍යාංශය හා ඊට අනුබද්ධිත ආයතන විසින් ඉදිරිපත් කරනු ලැබු කැබිනට් මණ්ඩල පත්‍රිකාවල වත්මන් ප්‍රගතිය සම්බන්ධයෙන් සොයා බැලීම සඳහා පැවැති විශේෂ සාකච්ඡාවකදීය.

එහිදී සඳහන් කෙරුණු ආකාරයට අමාත්‍යාංශ ලේකම් ඩබ්ලිව්.එස්. සත්‍යානන්ද මෙම කමිටුවේ සභාපතිවරයා ලෙස පත්කර ඇති අතර අමාත්‍යංශයේ අතිරේක ලේකම් ඇතුළු තවත් නිළධාරීන් 4 දෙනෙකු එහි සෙසු සාමාජිකයින් ලෙස පත්කර ඇත.

සති දෙකකට වරක් රැස්වී කැබිනට් යෝජනා ක්‍රියාත්මක කිරීමේ ප්‍රගතිය සමාලෝචනය කර තමන්ට වාර්තාවක් ලබා දෙන ලෙසද නාගරික සංවර්ධන හා නිවාස අමාත්‍ය ප්‍රසන්න රණතුංග අමාත්‍යාංශ ලේකම්වරයා ප්‍රමුඛ කමිටුවටට උපදෙස් දී තිබේ .

කැබිනට් පත්‍රිකා ප්‍රමාදයකින් තොරව ඉදිරිපත් කිරීමේ වගකීමද මෙම කමිටුවට පැවරෙන බව ඇමතිවරයා පවසයි .