පුවත්

නීති විරෝධී පිරමීඩ ගනුදෙනු සිදුකර තැන්පත්කරුවන්ගේ මුදල් වංචා කළ බවට චෝදනාලත් Onmax DT පෞද්ගලික සමාගමේ අධ්‍යක්ෂවරයෙකු ඇප ලබාගැනීමෙන් පසු රහසිගතව විදේශගතව ඇති බවට විමර්ශන නිලධාරීන් අද (15) අධිකරණයට කරුණු වාර්තා කළේය.

ඒ නීතිවිරෝධී පිරමීඩ ගනුදෙනු සිදුකර තැම්පත්කරුවන්ගෙන් මුදල් වංචා කළ බවට චෝදනා ලත් Onmax DT පෞද්ගලික සමාගමේ අධ්‍යක්ෂවරුන් 6 දෙනෙකුට එරෙහි නඩුව අද (15) කොළඹ ප්‍රධාන මහෙස්ත්‍රාත් ප්‍රසන්න අල්විස් ඉදිරියේ කැඳවූ අවස්ථාවේදීය.

එහිදී අනාවරණය වූ ආකාරයට නඩුවේ 6වන සැකකරු වන Onmax DT පෞද්ගලික සමාගමේ අධ්‍යක්ෂවරයෙකු වන ධනංජය ජයාන් චාමර නැමැත්තා ඇප ලබාගැනීමෙන් පසුව මෙලෙස රහසිගතව විදේශගතව ඇත.

කෙසේ වුවත් එම පුද්ගලයා පිළිබඳ තොරතුරු සෙවීම සඳහා ජාත්‍යන්තර පොලිසියේ සහාය ඇතිව විමර්ශන ආරම්භ කර ඇති බවත් විමර්ශන නිලධාරීන් පෙන්වාදී තිබේ.

මෙහිදී සමාගම් අධ්‍යක්ෂවරුන් වෙනුවෙන් පෙනී සිටි ජනාධිපති නීතීඥ අනුජ ප්‍රේමරත්ත  කරුණු දක්වමින් පෙන්වා දුන්නේ විමර්ශන නිලධාරීන්ගේ ඉල්ලීම පරිදි අධිකරණය විසින් අදාළ අධ්‍යක්ෂවරුන්ට අයත් බැංකු ගිණුම් 58ක් අත්හිටුවා ඇති බැවින් තැන්පත්කරුවන්ගේ මුදල් ගෙවා නිමකිරීමට නොහැකිව ඇති බවය.

එමෙන්ම මෙම අධ්‍යක්ෂවරුන්ගේ දේපොළ අන්සතු කිරීම වළක්වාලමින් අධිකරණ නියෝගයක් නිකුත් කර ඇති නමුත් එවැනි නියෝගයක් නිකුත් කළ හැක්කේ මහාධිකරණයට පමණක් වන බවත් ජනාධිපති නීතිඥවරයා සඳහන් කළේය.

එහිදී කොළඹ ප්‍රධාන මහෙස්ත්‍රාත් ප්‍රසන්න අල්විස්  පැවසූවේ විමර්ශන පවතින අවස්ථාවක විමර්ශන නිලධාරීන් ඉල්ලීමක් කරන්නේනම් විමර්ශන සඳහා සහාය වීමට දේපොළ හෝ බැංකු ගිණුම් තහනම් කිරීමේ හැකියාව තම අධිකරණයට පවතින බවය.

අගතියට පත් පාර්ශ්වය වෙනුවෙන් පෙනී සිටි නීතිඥ ආර්.ඒ. පී රණවක  අධිකරණය හමුවේ පෙන්වාදුන්නේ අදාළ සමාගමේ අධ්‍යක්ෂවරුන්ට අයත් දේපොළවලින් සුළු කොටසකට පමණක් තහනම් නියෝග ලබාගෙන ඇති බවත් විමර්ශනයට ලක් නොවූ තවත් රුපියල් කෝටි ගණනක දේපොළ අධ්‍යක්ෂවරුන් සතුව පවතින බවත්ය.

එවන් තවත් දේපොළ පිළිබඳ ලියවිල්ලක් එහිදී විමර්ශන නිලධාරීන් අධිකරණයට ඉදිරිපත් කරමින් එකී දේපොළ තහනම් කරන ලෙසට අධිකරණයෙන් ඉල්ලීමක් කළ අතර එම කරුණු සළකා බලා අදාළ දේපොළ තහනම් කිරීමට මහේස්ත්‍රාත්වරයා නියෝග කළේය.

අනතුරුව නඩුව මැයි මස 2 වනදා දක්වා කල්තැබීමට ප්‍රධාන මහෙස්ත්‍රාත්වරයා නියෝග කළේය.

මේ අතර Onmax DT ගනුදෙනුකරුවන් අද අධිකරණය ඉදිරිපිට නිහඬ විරෝධතාවක නිරත වෙමින් සිටි අතර චෝදනා ලත් අධ්‍යක්ෂවරුන් අධිකරණයෙන් පිටව යද්දී ගනුදෙනුකරුවන් පැමිණ ඔවුන් ගමන්කරමින් සිටි මෝටර් රථයේ මග හරස් කර විරෝධය පළකළේය.

පසුව පොලිස් නිලධාරීන් පැමිණ තත්ත්වය පාලනය කිරීමට පියවර ගත්තේය.

හිටපු අමාත්‍ය කෙහෙළිය රඹුක්වැල්ල  ඇතුළු සැකකරුවන් 07 දෙනා එළඹෙන 29 වනදා දක්වා තවදුරටත් රක්ෂිත බන්ධනාගාරගත කර කිරීමට අධිකරණය නියෝග නිකුත්කර ඇත .

ඒ ප්‍රමිතියෙන් තොර ප්‍රතිදේහ එන්නත් සිද්ධිය සම්බන්ධයෙන් වූ නඩුව අද (15) මාලිගාකන්ද මහෙස්ත්‍රාත් අධිකරණයේදී යළි කැඳවනු ලැබූ අවස්ථාවේදී ය.

හිටපු අමාත්‍ය කෙහෙළිය රඹුක්වැල්ල ගේ නීතිඥයා වූ ජනාධිපති නීතිඥ අනුජ ප්‍රේමරත්න අධිකරණයට කරුණු දක්වමින් කියා සිටියේ සිය සේවාදායකයා නින්දෙන් හුස්ම හිරවීමේ රෝගී තත්ත්වයකින් පෙළෙන බව ය.

එසේම එම සුවිශේෂී රෝගී තත්ත්වයෙන් පෙළෙන තම සේවාදායකයාට එවැනි අවස්ථාවකදී කෘතිම ව ඔක්සිජන් ලබාදිය යුතු බවද ඔහු පැවසීය .

ඒ අනුව හිටපු සෞඛ්‍ය අමාත්‍යවරයා වෙනුවෙන් ජනාධිපති නීතීඥ අනුජ ප්‍රේමරත්න ඇප ඉල්ලීම් ඉදිරිපත් කළේය.

"මගේ සේවාදායකයා මේ වෙද්දී රෝග ගණනාවකින් පෙළෙනවා. විශේෂයෙන්ම ස්වාමීනි... ඔහුව බන්ධනාගාරගත කළාට පස්සේ.. ඔහුගේ රුධිර පීඩනය විචලනය වෙලා. උදරයේ බඩවැල්වල ව්‍යාකූල තත්ත්වයකින් පෙළෙනවා. ඔහුට වකුගඩුවල රෝගී තත්ත්වයකුත් තිබෙනවා. ඒ වගේම ඔහු දියවැඩියා රෝගයෙන් පීඩා විඳින්නෙක්."

"ස්වාමීනි, ඔහුට තිබෙන රෝග අතර ඔහුට තිබෙන සුවිශේෂීම රෝගී තත්ත්වය තමයි රෑට නින්දෙන් හුස්ම හිරවීම. එය රෝගී තත්ත්වයක්. ඔහුට නොදැනුවත්වම ඔහු ලබා ගන්නා ඔක්සිජන් ප්‍රමාණය අඩු වෙනවා. අන්න ඒ වෙලාවට ඔහුට කෘතිමව ඔක්සිජන් සපයන්න ඕනේ."

"ස්වාමීනි, මේ වෙලාවේ බන්ධනාගාරයේ ඔය කියන රෝගී තත්ත්වයට ලබාදෙන්න ඕන ප්‍රතිකාර නැහැ."

එසේ කී ජනාධිපති නීතීඥවරයා අදාළ රෝගී තත්ත්වය ඇතිවූ අවස්ථාවක පුද්ගලයෙකු නිදාගත යුතු ආකාරය දැක්වෙන රූප සටහනක් මහෙස්ත්‍රාත්වරිය වෙත ඉදිරිපත් කළ අතර ඇය ඊට ප්‍රතිචාර දැක්වූයේ මෙලෙසිනි.

"කිසියම් සැකකරුවකුට රෝගී තත්ත්වයන් තියෙනවා නම් ඒ සම්බන්ධයෙන් අධිකරණයට පිළිගත හැකි සත්‍ය වෛද්‍ය වාර්තා ඉදිරිපත් කළ යුතුයි. නැතුව ෆොටෝකොපි ඉදිරිපත් කරලා ඒවා පිළිගන්න බැහැ. ඒවගේම අන්තර්ජාලයෙන් ලබාගත් රූප සටහන් අධිකරණයට ඉදිරිපත් කළාට ඒවා පිළිගත හැකි සාක්ෂි නොවෙයි. අධිකරණය ඉදිරියේ චිත්‍රපටි පෙන්වන්න අවස්ථාව දෙන්න බැහැ"

දැනට රක්ෂිත බන්ධනාගාරගත කර සිටින සැකකරුවන් 6 දෙනෙකු බන්ධනාගාර නිලධාරීන් මගින් අධිකරණයට ඉදිරිපත් කෙරුණද හිටපු අමාත්‍ය කෙහෙළිය රඹුක්වැල්ල අද දින අධිකරණයට ඉදිරිපත් නොකෙරුණි.

බන්ධනාගාර නිලධාරීන් වෛද්‍ය වාර්තාවක් ඉදිරිපත් කරමින් අධිකරණයට දැනුම්දුන්නේ රෝගී තත්ත්වයක් මත සැකකාර හිටපු අමාත්‍යවරයාව අද දින අධිකරණයට ඉදිරිපත් කළ නොහැකි අතර පෙබරවාරි 22 වැනිදා වනවිට ඔහුව අධිකරණයට ඉදිරිපත් කළ හැකි බවය.

අනතුරුව හිටපු අමාත්‍යවරයා අත්අඩංගුවට ගත් දා සිට මේ දක්වා සිදුකළ විමර්ශන සම්බන්ධයෙන් රජයේ නියෝජ්‍ය සොලිසිටර් ජනරාල් ලක්මිණී ගිරිහාගම මෙනෙවිය කරුණු දැක්වූවාය.

"ස්වාමිනී, මෙම නඩුවේ 8 වැනි සැකකරු වන හිටපු සෞඛ්‍ය අමාත්‍ය කෙහෙළිය රඹුක්වැල්ල විසින් හදිසි ප්‍රසම්පාදන ක්‍රියාවලියකට යොමුවීම සඳහා ව්‍යාජ ඖෂධ හිඟයක් මවා පා ඇතැයි විමර්ශනයේදී තවදුරටත්‍ තහවුරු වෙමින් තිබෙනවා. 2022 සැප්තැම්බර් 26 වැනිදා ඔහු විසින් කැබිනට් මණ්ඩලයට ඉදිරිපත් කරනු ලැබූ පත්‍රිකාවේ රට තුළ ඖෂධ 182ක හිඟයක් පවතින බවත්, සති දෙකක් තුළ එම හිඟය නොපියවුවහොත් මෙරට සෞඛ්‍ය පද්ධතිය කඩාවැටිය හැකි බව ප්‍රකාශ කර තිබෙනවා. නමුත් ඖෂධ 182ක් කිව්වාට ඒ කුමන ඖෂධදැයි කිසිඳු ලේඛනයක සඳහන් වෙලා නැහැ. ස්වාමීනි ඊට පසුදිනම මෙම නඩුවේ 6 වන සැකකරු වන හිටපු සෞඛ්‍ය අමාත්‍යංශ ලේකම් ජනක ශ්‍රී චන්ද්‍රගුප්ත ඖෂධ වර්ග 285ක් සඳහා හදිසි ප්‍රසම්පාදන ක්‍රියාවලිය යටතේ අභිලාෂ කැඳවා තිබෙනවා. එහෙත් ස්වාමිනී එයින් ප්‍රසම්පාදනය ක්‍රියාවලියට යොමුකර ඇත්තේ ඖෂධ 229කට අදාළව පමණයි. එකී ඖෂධ සම්බන්ධයෙන් ප්‍රසම්පාදනය සිදුකරන අවස්ථාව වනවිටත් ඖෂධ 19ක් හැර සෙසු ඒවා සියල්ලටම අදාළව ප්‍රමාණවත් තොග මෙරට තුළ පැවතී තිබෙනවා. ස්වාමීනී, ඉතිරි ඖෂධ 19න් 9ක් සම්බන්ධයෙන් අද වනතුරුත් ප්‍රසම්පාදනයක් සිදුව නැහැ. ප්‍රසම්පාදනය සිදුකළ ඖෂධ 10ට අදාළව ඖෂධ ලැබී ඇත්තේ මාස 3කට පසුවයි. එබැවින් ස්වාමීනි ඉතා පැහැදිලිව පෙනී යනවා නොතිබූ ඖෂධ හිඟයක් මවා පාමින් හදිසි ප්‍රසම්පාදන ක්‍රියාවට යොමුකර ඇත්තේම රටේ ජනතාවගේ මුදල් රුපියල් බිලියන 2ක් සාපරාධී සාවද්‍ය පරිහරණය කිරීමට චේතනාන්විතව ආධාර අනුබල දීම සඳහා බව."

මෙහිදී ප්‍රමිතියෙන් තොර ප්‍රතිදේහ එන්නත් සැපයූ සැපයුම්කරුට මුදල් ගෙවා ඇති ආකාරය සම්බන්ධයෙන්ද රජයේ නියෝජ්‍ය සොලිසිටර් ජනරාල්වරිය විශේෂ අනාවරණයක් සිදුකළාය.

"ස්වාමීනි, ඉන්දීය ණය යෝජනා ක්‍රමයට යොමුවෙනවානම් අනිවාර්යයෙන්ම මුදල් ගෙවිය යුත්තේ එම මුදල් යෝජනා ක්‍රමයට. නමුත් ස්වාමීනි මෙහි සිදුව ඇති වංචාව පැහැදිලිව පෙනී යන කරුණත් තමයි ඊට මුදල් ගෙවා ඇත්තේ සෞඛ්‍ය අමාත්‍යංශ වැය ශීර්ෂය යටතේ. මුදල් ගෙවූ වැය ශීර්ෂය ලෙස සඳහන් වන්නේ ඔක්සිජන් මිලදී ගැනීම සඳහා මුදල් ගෙවීමක් ලෙසයි."

මෙහිදී මහෙස්ත්‍රාත්වරිය රජයේ නියෝජ්‍ය සොලිසිටර් ජනරාල්වරියගේ ප්‍රශ්න කර සිටියේ ව්‍යාජ ලෙස හිඟයක් මවාපාන ලද ඖෂධ 182 පිළිබඳ සටහන් වූ ගැසට් පත්‍රයට අදාළව ගොනුව පවත්වාගෙන යන ලද්දේ කවුරුන් යටතේද යන්නයි.

ඊට රජයේ නියෝජ්‍ය සොලිසිටර් ජනරාල්වරිය මෙලෙස පිළිතුරු දුන්නාය.

"ස්වාමීනි, සෞඛ්‍ය අමාත්‍යංශයේ ඖෂධ නිෂ්පාදන සහ සැපයුම් නියාමන අංශයේ අතිරේක ලේකම් සමන් රත්නායක යටතේ මෙම ගොනුව පවත්වාගෙන ගොස් තිබෙනවා. නමුත් ඔහුගෙන් මේ ගැන ඇහුවම ඔහු ඊට අදාළ කිසිදු සත්‍ය ලේඛනයක් නොමැති බව සඳහන් කර තිබෙනවා. ඔහු විමර්ශන
නිලධාරීන්ට දී තිබෙන්නේ ෆොටෝකොපි පමණයි. අපිටත් ප්‍රශ්නයක් කිසිම සත්‍ය ලේඛනයක් නැතිව කොහොමද කැබිනට් පත්‍රිකාවට ඖෂධ හිඟයි කියලා යොමුකළේ කියලා."

ඔන්න ඊයේ (14) දසලක්ෂයක් ඡන්ද තියෙන වතුකරයේ ප්‍රබලම පක්ෂ කීපයකුත් එක්ක සජිත් අලුත් ගිවිසුමක් ගහලා.

සමගි ජන බලවේග රජයක් යටතේ ජනාධිපති කාර්යසාධන බලකායක් වෙනමම ස්ථාපිත කර, උඩරට පහතරට වතු ප්‍රජාව මුහුණ දෙන ආර්ථික සමාජීය සංවර්ධන හා දේශපාලන ගැටලු ඇතුළු යටිතල ක්ෂේත්‍රයේ තිබෙන්නා වූ ගැටලු ප්‍රශ්නවලට විසඳුම් ලබා දෙන සම්මුතියකට ගිවිසුම් ගත වූනා කියලා විපක්ෂ නායකතුමා කියනවා.

විපක්ෂ නායක සජිත් ඒ කතාව කියලා තිබුනේ, 14 වෙනිදා සමගි ජන බලවේග පක්ෂ කාර්යාලයේදී උඩරට හා පහතරට වතු ප්‍රජාවගේ අයිතීන් සුරක්ෂා කර දෙන බවට වන ප්‍රතිඥාවක් ලබා දෙමින්, වතුකරයේ දේශපාලන පක්ෂ සහ නියෝජිතයන් රැසක් සමග සමාජ ගිවිසුමකට අත්සන් තබමින් ..

මෙම ගිවිසුම සඳහා සමගි ජන බලවේගය නියෝජනය කරමින් එහි නායකවරයා වන විපක්ෂ නායක සජිත් ප්‍රේමදාස , දමිල ප්‍රගතිශීලී සන්ධානය නියෝජනය කරමින් ප්‍රජාතන්ත්‍රවාදී ජනතා පෙරමුණේ නායක පාර්ලිමේන්තු මන්ත්‍රී මනෝ ගනේෂන්, ජාතික කම්කරු පෙරමුණේ නායක පලනි දිගම්බරම්, කඳුරට ජනතා පෙරමුණේ නායක වී. රාධාක්‍රිෂ්ණන් , කෑගල්ල දිස්ත්‍රික් සමගි ජන බලවේග පාර්ලිමේන්තු මන්ත්‍රී සුජිත් සංජය පෙරේරා , මහනුවර දිස්ත්‍රික් සමගි ජන බලවේග පාර්ලිමේන්තු මන්ත්‍රී එම්. වේලුකුමාර් සහ නුවරඑළිය දිස්ත්‍රික් සමගි ජන බලවේග පාර්ලිමේන්තු මන්ත්‍රී එම්. උදයකුමාර් අත්සන් කරලා තිබුනා.

සජිත් ඔය වතුකරේ අලුත්ම කණ්ඩායමක් එක්ක ගිවිසුම් ගහපුවා වගේ පෙන්නුවට මොකද, ඔය වතුකරේ නායකයෝ කොහොමටත් හිටියේ සජබත් එක්ක.

ඒ නිසා ඔය ඊයේ ගහපු ගිවිසුම මාධ්‍ය සංදර්ශනයක් කියලයි සමහරු කියන්නේ..

ඒ කියන්නේ ඔය විමල්ල කියනවා වගේ සජිත් කරන කරන වැඩේ අල කරගන්නවා කියන එක ද ? ඒ කියන්නේ සජබ කට්ටියට අලුත් අපේක්ෂකයෙක් හොයාගන්න වෙයි කියන එක ද ?

• දේශපාලන වාර්තාකරු

මහකනදරාව වැව මූලාශ්‍ර කරගත් අනුරාධපුර උතුර ජල සම්පාදන ව්‍යාපෘතිය අද (15) පෙරවරුවේ විවෘත කිරීමෙන් අනතුරුව එම ප්‍රදේශයේ ගොවි ජනතාව මුහුණදී සිටින ගැටලු පිළිබඳ සොයා බැලීමේ සාකච්ඡාවකට ද ජනාධිපති රනිල් වික්‍රමසිංහ එක් විය.

එහිදී ගොවි ජනතාව තම ගැටලු සෘජුව ජනාධිපතිවරයා වෙත ඉදිරිපත් කළ අතර ඊට සාධනීය පිළිතුරු ලබාදීමට ජනාධිපතිවරයා කටයුතු කළේය.

ව්‍යාපෘතියට අදාළව මතුව ඇති විරෝධතා පිළිබඳ මෙහිදී අවධානය යොමු කළ ජනාධිපතිවරයා කියා සිටියේ ජල ව්‍යාපෘතිය මේ වන විට ඉදිකර අවසන් බැවින් එය නවත්වන ලෙස උද්ඝෝෂණය කරනවාට වඩා ඉදිරියට ගත හැකි පියවර කුමක්දැයි විමසීම වැදගත් බවයි.‍

ඒ පිළිබඳ ගොවි ජනතාවට තිබෙන යෝජනා සති දෙකක් ඇතුළත ලබා දෙන ලෙස උපදෙස් දුන් ජනාධිපතිවරයා එහි සාධනීය කරුණු කඩිනමින් ක්‍රියාත්මක කිරීමට අපේක්ෂා කරන බවද සඳහන් කළේය.

මෙරට ගොවි ජනතාව වෙනුවෙන් ජනාධිපති රනිල් වික්‍රමසිංහ මේ වන විට ඉටුකර ඇති කාර්යභාරය අනුව මහකනදරාව වැව ආශ්‍රිත ගොවි ජනතාව වෙත ද ලබා දුන් පොරොන්දු ඉටු කරනු ඇතැයි විශ්වාස කරන බව මහකනදරා වැව ඒකාබද්ධ ගොවි ව්‍යාපාරයේ සභාපති සුභසිංහ රත්නායක මහතා මෙහි දී සඳහන් කළේය.

මහකනදරාව වැවට ජලය ගෙන එන බෙදීම් ඇළ මාර්ග ප්‍රතිසංස්කරණය සඳහා අදාළ මුදල් ලබා දෙන්නේ නම් විශාල ජල ධාරිතාවක් ඉතිරි කරගත හැකි බව ඒ මහතා පෙන්වා දුන් අතර ඊට ප්‍රතිචාර දක්වමින් ජනාධිපතිවරයා සඳහන් කළේ මහකනදරාව වැව ප්‍රතිසංස්කරණය වෙනුවෙන් මේ වසරේදී රජය ලබාදී ඇති රුපියල් බිලියනයක මුදල කඩිනමින් ප්‍රයෝජනයට ගන්නා ලෙසයි.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය.

මෙම ව්‍යාපෘතිය ඉදිරියට ක්‍රියාත්මක කරන්නේ කෙසේද යන්න පිළිබඳ අප අවධානය යොමු කළ යුතුයි. මොකද මෙම ව්‍යාපෘතිය දැන් අතරමඟ නවත්වන්න බැහැ. අපි සෑමවිටම ගොවිතැනට ප්‍රමුඛත්වය දී වැඩ කරනවා.

මෙතෙක් කල් හැම ආණ්ඩුවක්ම සිදු කළේ ජල සම්පාදන මණ්ඩලය එක් ඇමතිවරයෙකුට දී, වාරිමාර්ග තව ඇමතිවරයෙකුට ලබාදීම. නමුත් දැන් මේ විෂය පථ දෙකම එක ඇමතිවරයෙක් යටතේ ක්‍රියාත්මක වෙනවා. ඒ නිසා මේ වැඩකටයුතු ඉදිරියට ක්‍රියාත්මක කරන්නේ කෙසේද කියා අප සාකච්ඡා කර තීරණය කළ යුතුයි.

වාරිමාර්ග හා ජල සම්පාදන රාජ්‍ය අමාත්‍ය ශෂේන්ද්‍ර රාජපක්ෂ :

මෙම වැවෙන් අක්කර අඩි 1000ක ජලධාරිතාවක් අනිවාර්යයෙන් ලබා ගන්නා බවට එකඟතාවයක් නැහැ. කෘෂිකර්ම කටයුතු සඳහා මූලිකත්වය ලබා දිය යුතුයි. ගොවි සංවිධානවලට අවශ්‍ය ජල ප්‍රමාණය ලබා දෙන්න. ඒ ප්‍රමාණයන් අනුව පානීය ජලය සඳහා මේ පොම්පාගාරයෙන් කොපමණ ජල ප්‍රමාණයක් ලබා ගන්නවද කියා තීරණය කළයුතුයි. ඒ සඳහා ජල සම්පාදන මණ්ඩලය එකඟ වුණා. වර්ෂාව අඩු වී හෝ කෘෂිකර්මයන්තයට ජලය අවශ්‍ය වුවහොත් මෙම වැවෙන් ජලය ලබා ගන්නේ නැහැ. එම යෝජනාව නීත්‍යානුකූල ලියවිල්ලක් ලෙස සකස්කර ගොවි ජනතාවත් වාරිමාර්ග දෙපාර්තමේන්තුවේ සහ ජල සම්පාදන අමාත්‍යංශයේ නිලධාරීනුත් එක්ව අවබෝධතා ගිවිසුමකට එළැඹිය හැකියි. ඒ සඳහා ඔබේ තවත් යෝජනා තිබෙනවා නම් ඒවාද ඇතුළත් කළ හැකියි.

හිටපු පළාත් අමාත්‍ය එච් .බී .සේමසිංහ :

මෙම ව්‍යාපෘතිය ඉතා හොඳ ව්‍යාපෘතියක්. මේ ප්‍රදේශවල ලොකු ප්‍රචාරයක් ගෙන ගියා කන්න වතුර දෙනවද, බොන්න වතුර දෙනවද කියලා. මෙහි පෙරමුණේ සිටියේ ජනතා විමුක්ති පෙරමුණයි. ඒ නිසා අද මේ ගොවි ජනතාවට අවශ්‍ය වන්නේ ඔබතුමාගේ සහතිකයයි. කෘෂිකර්මයට හානියක් නොවී, පානිය ජල අවශ්‍යතාවයත් සම්පූර්ණ කිරීමට කටයුතු කරනවා කියන සහතිකය ඔවුන් අපේක්ෂා කරනවා.
මේ සාකච්ඡාව සඳහා සහභාගි වෙන්න බැහැ කියලා ජනාධිපතිතුමා කිසිසේත්ම කිව්වේ නැහැ. එතුමා කිව්වේ මම යන පාරේ සුදුසු ස්ථානයක මේ සාකච්ඡාව පවත්වන්න මම එන්නම් කියලා. මේ මහකනදරාවැව ගොවි ජනතාව වෙනුවෙනුත්, අනෙකුත් ජනතාව වෙනුවෙනුත් අපේ ජනාධිපතිතුමා කෙතරම් සැලකිල්ලක් දක්වනවද කියලා අප අවබෝධකරගත යුතුයි. වෙන නායකයෙක් නම් ඒ අයට එන්න බැරිනම් මම මොකටද වෙන තැනකට යන්නේ කියලා යන්න තිබ්බා. නමුත් එතුමා එහෙම ප්‍රකාශ කළේ නැහැ.

හිටපු අමාත්‍ය දුමින්ද දිසානායක :

උද්ඝෝෂණ කළා කියලා ගොවි ජනතාවගේ ප්‍රශ්න විසඳෙන්නේ නැහැ. එම නිසා ජනාධිපතිතුමා ලබා දුන් පොරොන්දුවට අනුව ගොවි ජනතාවත්, වාරිමාර්ග දෙපාර්තමේන්තුවේ නිලධාරීනුත් , ජල සම්පාදනය නිලධාරීන්ට එකතුවෙලා ගිවිසුමක් ඇති කර ගනිමු. එම ගිවිසුම කඩ වුණොත් පාරට ඇවිත් මේ ප්‍රශ්නය විසඳ ගන්න පුළුවන්. එහෙම නැතිව මේ ප්‍රශ්නයට පාරේ විසඳුම් නැහැ.

මහකනදරා ඒකාබද්ධ ගොවි ව්‍යාපාරයේ සභාපති සුභසිංහ රත්නායක :

අපි මේ ජල යෝජනා ක්‍රමයට කිසිසේත් විරුද්ධ නැහැ. වැවේ අක්කර 38000ක ජල ධාරිතාවක් තිබෙනවා. ගොවිතැන සඳහා අක්කර අඩි 52000ක් අවශ්‍ය වෙනවා. මේ ඉතිරි අක්කර අඩි 14000 ලබාගන්නේ කොහොමද? එම ප්‍රමාණය ප්‍රමාණවත් නැතිකොට ජල සම්පාදනයට අක්කර අඩි දාහක් අවුරුද්දකට ලබා දෙන්නේ කොහොමද? මෙම ප්‍රශ්නයට උත්තරයක් තිබෙනවා නම් අපි එය පිළිගන්න සූදානම්.
මහකනදරා වැව ගොවි ජනතාවගේ ගැටලු පිළිබඳ ජනාධිපතිවරයෙක් සමඟ අප සාකච්ඡා කරන පළමුවෙනි අවස්ථාව මෙයයි. ඔබතුමා ලබාදෙන පොරොන්දු හා ගනු ලබන ක්‍රියාමාර්ග පිළිබඳ අපට විශ්වාසයක් තිබෙනවා.

මහකනදරා ගොවි ව්‍යාපාරයේ භාණ්ඩාගාරික තුසිත සම්පත් :

අපි මේ කුඹුරෙ ඉඳලා උද්ඝෝෂණයකට ආවේ ජල සම්පාදන ව්‍යාපෘතිය නවත්වන්න කියන්න නොවෙයි. අපේ ගොවිතැන් කටයුතු සඳහා අවශ්‍ය ජලය ලබාගන්නේ කොහොමද කියන කාරණයටයි. ජනතාවට පානීය ජලය ලබා දෙනවාට අපි විරුද්ධ නැහැ. නමුත් මෙතනින් අඩුවන ජලය අපේ ගොවිතැනට ලබා ගන්නේ කොහොමද කියන එකයි අපි අහන්නේ. දෙපැත්තටම එක ලෙස වතුර දෙන්න පුළුවන් නම් අපි පාරට එන්නේ නැහැ.

රාජ්‍ය අමාත්‍ය ෂෙහාන් සේමසිංහ, පාර්ලිමේන්තු මන්ත්‍රී එස්.එම්.චන්ද්‍රසේන යන මහත්වරුන් ඇතුළු ප්‍රදේශයේ දේශපාලන නියෝජිතයන් කිහිප දෙනෙක් ද මෙම අවස්ථාවට එක්ව සිටියහ.

ජනාධිපති රනිල් වික්‍රමසිංහ සහ ජපාන ජාත්‍යන්තර සහයෝගීතා ආයතනයේ (JICA) සභාපති ආචාර්ය ටනකා අකිහිකෝ අතර හමුවක් ඊයේ (14) පස්වරුවේ ජනාධිපති කාර්යාලයේ දී සිදුවිය.

නව ආර්ථික ප්‍රතිසංස්කරණ සිදු කිරීම දුෂ්කර ක්‍රියාවලියක් වුවද ශ්‍රී ලංකාවේ ආර්ථික ප්‍රතිසංස්කරණ ක්‍රියාත්මක කිරීම වෙනුවෙන් ජනාධිපති රනිල් වික්‍රමසිංහ ගේ කැපවීම මෙහිදී ආචාර්ය ටනකා අකිහිකෝ ගේ ඇගයීමට ලක් විය.

කටුනායක බණ්ඩාරනායක ජාත්‍යන්තර ගුවන්තොටුපොළ පුළුල් කිරීමේ ව්‍යාපෘතිය, සැහැල්ලු දුම්රිය ව්‍යාපෘතිය සහ මධ්‍යම අධිවේගී මාර්ගය ඇතුළු ජපාන ආධාර යටතේ මෙරට ක්‍රියාත්මක, දැනට අතරමඟ නැවතී ඇති ව්‍යාපෘති කඩිනමින් නැවත ආරම්භ කිරීමට තම අවධානය යොමුව ඇති බව ජනාධිපති රනිල් වික්‍රමසිංහ මෙහිදී පැවසීය.

පසුගිය ආර්ථික අර්බුදය හමුවේ ජපාන රජය සහ ජයිකා ආයතනය විසින් ශ්‍රී ලංකාවට ලබාදුන් අඛණ්ඩ සහය වෙනුවෙන් ස්තූතිය පිරිනැමීමට ද ජනාධිපතිවරයා මෙහිදී කටයුතු කළේය.

ශ්‍රී ලංකාවේ ණය ප්‍රතිව්‍යුහගත කිරීමේ කටයුතු අවසන් වූ පසු දැනට අත්හිටුවා ඇති ව්‍යාපෘති නැවත ආරම්භ කිරීමට ජයිකා ආයතනය සූදානමින් සිටින බව ආචාර්ය අකිහිකෝ මෙහිදී වැඩිදුරටත් සඳහන් කළේය.

ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක, ජනාධිපති ජාත්‍යන්තර සබඳතා පිළිබඳ අධ්‍යක්ෂ දිනුක් කොළඹගේ මෙම අවස්ථාවට එක්ව සිටියහ.

ලංකා ඛනිජ තෙල් තොග ගබඩා පර්යන්ත සමාගමේ ඉන්ධන ගබඩා කිරීම සහ ඉන්ධන බෙදාහැරීම් සම්බන්ධයෙන් සිදුකළ වෝහාරික විගණනයේ හඳුනාගත් මුලික කරුණු අද (15) සවස තමා වෙත ලැබුණු බව බලශක්ති අමාත්‍ය කංචන විජේසේකර පවසයි.

අමාත්‍යවරයා සඳහන් කරන ආකාරයට ඔහු 2022 වසරේ දී අපරාධ පරීක්ෂණ දෙපාර්තමේන්තුවට සිදුකළ පැමිණිල්ලකට අනුව අපරාධ පරීක්ෂණ දෙපාර්තමේන්තුව විසින් මෙම වෝහාරික පරීක්ෂණය සිදුකරන ලෙස විදුලිබල හා බලශක්ති අමාත්‍යාංශයට දන්වා ඇත.

ඒ අනුව KPMG නම් අන්තර්ජාතික විගණන ආයතනය සහ ලංකා තෙල් ගබඩා පර්යන්තයේ අභ්‍යන්තර විගණන අංශය විසින් අදාළ පරීක්ෂණය සිදුකර තිබුණි.

ඒ අනුව, 2010 වසරේ සිට තොරතුරු දත්ත ලක්ෂ 13ක් ප්‍රධාන පද්ධති යෙදවුමෙන් මකා දමා හෝ වෙනස්කර ඇති බවද, ඉන් බහුතරය 2022 වසරේදී ඉන්ධන අර්බුදය ඇතිවූ අවස්ථාවේ සිදුවී ඇති බවද වාර්තා වෙයි.

අපරාධ පරීක්ෂණ දෙපාර්තමේන්තුවට 2022 වසරේ සිදුකළ පැමිණිල්ලට පසුව 2023 වසර වනවිට එම දත්ත මකා දැමීම් හෝ වෙනස් කිරීම් අඩුවීමක් ඇතිවී තිබෙන බවද ඉන් සඳහන් කර තිබේ.

2022 වසරේ ඉන්ධන තොග පවත්වාගෙන යාමේ සහ ගබඩා කිරීමේ අලාභය ලෙස රුපියල් බිලියන 28ක් වාර්තා කර ඇති බවත් එය 2023 වසර වන විට රුපියල් බිලියන 4 දක්වා අඩුවී ඇති බවද පැවසෙයි.

පැරණි චක්‍රලේඛ සහ රෙගුලාසි මත මෙහෙයුම් සිදුවන බව සහ ප්‍රමාණවත් දත්ත සහ තොරතුරු නොමැති බවද නිරීක්ෂණය වී ඇත.

මෙහි සම්පූර්ණ පරීක්ෂණ වාර්තාව එළඹෙන සතියේදී KPMG ආයතන විසින් ලබාදීමට නියමිතය.

පසුව එය අපරාධ පරීක්ෂණ දෙපාර්තමේන්තුවට ලබාදීමට සහ අවශ්‍ය ඉදිරි නීතිමය පියවර ගැනීමට කටයුතු කරන අතර මෙම වාර්තාව ඉදිරි අවශ්‍ය කටයුතු වෙනුවෙන් කැබිනට් මණ්ඩලයටද, පාර්ලිමේන්තුවටද, විගණකාධිපති දෙපාර්තමේන්තුවට සහ නීතිපති දෙපාර්තමේන්තුවට ඉදිරිපත් කිරීමට කටයුතු කරන බවද බලශක්ති අමාත්‍ය කංචන විජේසේකර පවසයි.

ජනාධිපති රනිල් වික්‍රමසිංහ ගේ නිර්දේශයක් ව්‍යවස්ථා සභාව විසින් ප්‍රතික්ෂේප කිරීම පිළිබඳව ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සමක් ගොනු කර තිබේ.

වත්මන් අභියෝජනාධිකරණ සභාපති විනිසුරු නිශ්ශංක බන්දුල කරැනාරත්න ශ්‍රේෂ්ඨාධිකරණයට පත් කිරීමට ජනාධිපතිවරයා විසින් කරන ලද නිර්දේශයා පිළිබඳවයි.

නීතීඥ සරිත් මහීපුත්‍ර විසින් මෙම පෙත්සම ගොනු කර ඇත්තේ වග උත්තරකරුවන් ලෙස අග්‍රාමාත්‍යවරයා කථානායකවරයා විපක්ෂ නායකවරයා ඇතුළු ආණ්ඩුක්‍රම ව්‍යවස්ථාවේ සාමාජිකයන් පිරිසක් නම් කරමිනි.

පෙත්සම්කරු පෙන්වා දෙන්නේ ආණ්ඩුක්‍රම ව්‍යවස්ථා සභාව විසින් මෙම නිර්දේශය ප්‍රතික්ෂේප කිරීම අත්තනෝමතික සහ අසාධාරණ තිරණයක් බවය.

ඉදිරි ජනාධිපතිවරණයේ දී වත්මන් ජනාධිපති රනිල් වික්‍රමසිංහ වෙනුවෙන් තම සහය ලබා දෙන බව ආරක්ෂන රාජ්‍ය අමාත්‍ය ප්‍රමිත බණ්ඩාර තෙන්නකෝන් පවසයි.

රාජ්‍ය අමාත්‍යවරයා මේ අදහස් පල කලේ මාතලේ දිස්ත්‍රික්කයේ පළාත් පාලන ආයතන නියෝජිත පිරිසක් හමුවී අදහස් දක්වමිනි.

මෙහිදි වැඩිදුරටත් අදහස් දැක්වූ රාජ්‍ය අමාත්‍ය ප්‍රමිත බණ්ඩාර තෙන්නකෝන් මෙසේද පැවසීය .

රනිල් වික්‍රමසිංහ මැතිතුමා වෙනුවෙන් සහය පල කිරීමට තමන් තීරණය කලේ ආර්ථික වශයෙන් රට වැටී තිබුණ මොහොතේ රට භාර ගැනීමට කිසිම නායකයකු ඉදිරිපත් නොවූ අවස්ථාවේ එතුමා මෙම අභියෝගය භාර ගෙන මේ දක්වා සාර්ථකව අපේ රට යම් ස්ථාවරත්වයකට පත් කර ගැනිමට අවශ්‍ය නායකත්වය ලබා දි තිබෙනවා.

මෙය මාගේ පෞද්ගලික තීරණයයි. මෙය මා නියෝජනය කරන පක්ෂයේ තීරණය නොවේ. අපේ පක්ෂයෙන් අපේක්ෂකයකු ඉදිරිපත් කරනවා ද නැත්නම් අපි වෙනත් අපේක්ෂකයකු සමග සන්ධානගත වෙනවාද කියලා අපේ පක්ෂය තවම තීරණය කර නැහැ. එම නිසා රට ගැන සිතා මම රනිල් වික්‍රමසිංහ මැතිතුමා වෙනුවෙන් මගේ සහය ලබා දෙනවා.

ශ්‍රී ලංකාවේ අධිකරණවල පවතින නඩු ප්‍රමාදය වැලැක්වීමට  ඉතාමත් සාර්ථක ක්‍රමවේදය වන සමථ මණ්ඩල ක්‍රමය ප්‍රචලිත කිරීමට මේ වන විටත් කටයුතු කර අධිකරණවල නඩු ගොඩ ගැසීම වැලැක්වීමට අවශ්‍ය මූලික පියවර ගෙන තිබෙන බව අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍ය ජනාධිපති නීතිඥ ආචාර්ය විජයදාස රාජපක්ෂ  පැවසීය.

අමාත්‍යවරයා මෙම අදහස් පලකලේ සමථ මණ්ඩල කොමිෂන් සභාවේ කාර්ය භාරය හා 2024 අංක 02 දරණ සමථ මණ්ඩල ( සංශෝධන ) පනත පිළිබදව අධීකරණ අමාත්‍යාංශයේදී අද පැවති මාධ්‍ය දැනුවත් කිරීමේ ප්‍රවෘත්ති සාකච්ඡාවකට එක්වෙමිනි.

1988 අංක 72 පනත මඟින් සමථ මණ්ඩල පනත මඟින් සමථ මණ්ඩල කොමිෂන් සභාව පිහිටුවීමෙන් අනතුරුව 2015 පමණ කාලය වන විට ශ්‍රී ලංකාව තුළ පැවති නඩු කටයුතු වලින් සියයට හතලිස් පහක් පමණ ප්‍රමාණයක් විසදීමට හැකිව තිබූ අතර සමථ මණ්ඩල ක්‍රමය තුල කරන ලද විවිධ ප්‍රතිසංස්කරණ හරහා මෙ වන විට නඩු විසදීමේ ප්‍රතිශතය සියයට හැත්තෑවක පමණ ප්‍රමාණයකින් ඉහල ගොස් ඇති බවද ඔහු සඳහන් කළේය.

අධිකරණය පිළිබඳ විශ්වාසය අඩුවීමට එක් හේතුවක් ලෙස අමාත්‍යවරයා පෙන්වා දුන්නේ අධිකරණයන්හි සිදුවන නඩු ප්‍රමාදවීමයි. එම නඩු ප්‍රමාදය වැලැක්වීමේ එක් ක්‍රමවේදයක් ලෙස සමථ මණ්ඩල ක්‍රමය ව්‍යාප්ත කිරීම කාලෝජිත බව අමාත්‍යවරයා පෙන්වා දුන් අතර රුපියල් ලක්ෂ පහකට අඩු මූල්‍යමය නඩු කටයුතු විසදීමට සමථ මණ්ඩලවලට ලබාදී තිබූ බලය වර්තමානය වන විට රුපියල් ලක්ෂ දහය දක්වා වැඩි කිරීමට කටයුතු කල අතර ඒ හරහා මූල්‍යමඩ ගැටළු සමථකරණය කිරීමට ඇති හැකියාව ව්‍යාප්තවී තිබෙනවා.

ඊට අමතරව විශේෂයෙන්ම උතුරු නැගෙනහිර පළාත්වල ඉතා විශාල වශයෙන් ඉඩම් ආරවුල් පවතින බැවින් ඒ සඳහා එම පළාත් දෙක සඳහා වෙනම ඉඩම් සමථ මණ්ඩල ක්‍රමය හදුන්වා දී තිබූ අතර එය ඉතාමත් සාර්ථක ආකාරයෙන් ක්‍රියාත්මක උනා එම පළාත් දෙකෙන් පිට තවත් දිස්ත්‍රික්ක 16ක් සඳහා මෙම ඉඩම් සමථ ක්‍රමය හදුන්වා දීම කල අතර එය ඉතාමත් සාර්ථක ලෙස ක්‍රියාත්මක වන බවත් ඒතුළින් අධිකරණ වල නඩු විභාගවීමට නියමිතව තිබූ ආරවුල් විශාල ප්‍රමාණයක් සමථයට පත්කර ගැනීමට හැකිවූවා සේම අධිකරණයන්හි ගොඩගැසීමට නියමිතව තිබූ නඩු අවම කර ගැනීමට හැකිවීමත් සමථකරණ ක්‍රියාවලිය තුළින් සිදුවී ඇැති බව අමාත්‍යවරයා විසින් පෙන්වා දෙනු ලැබීය.

වර්තමානය වන විට බන්ධනාගාර තුළ රඳවා තබා ඇති රැඳවියන් සංඛ්‍යාව තිස්දහස ඉක්මවා ඇති බැවින් බන්ධනාගාරවල තදබදයක් ඇතිවී තිබෙන බව සඳහන් කල අමාත්‍යවරයා පැහැදිලි කලේ කුඩා කුඩා වැරදිවලට බන්ධනාගාර තුල රඳවා තැබීමට අධිකරණයන්හි විනිසුරුවරුන්ට ද සිදුවී ඇති අතර එම ක්‍රමය වෙනස් කරමින් එම සැකකරුවන් ලියවිල්ලක් මඟින් තමන්ගේ ඥාතීන්ට හෝ භාරකරුවකු වෙත වගකීම පවරා නිවාස අඩස්සියේ තැබීමේ ක්‍රමය පිළිබඳව අවධානය යොමු කර ඇති බව අමාත්‍යවරයා පෙන්වා දෙනු ලැබීය.

ජනාධිපති රනිල් වික්‍රමසිංහ ජනාධිපතිවරණයට එනවා කියලා තවම නිල වශයෙන් කියලා නෑ තමයි. ඒත් දැන් ලැබෙන ආරංචිවල විදියට රනිල් හීනියට හීනියට කැම්පේන් එක පටන් අරන්..

ලන්සලා එක්ක එක පෙරමුණකින් සටන පටන් අරන් තියන ගමන්, ඇමති ප්‍රසන්නලා ලව්වා පොහොට්ටුවේ ඇතුලේ බලය තහවුරු කර ගනිමින් ඉන්නවා. පොහොට්ටුවෙන් අපේක්ෂකයෙක් නොදා තමන්ට සහය ගන්න තමයි රනිල්ට ඕනවෙලා තියෙන්නේ.

අනිත් පැත්තෙන් වජිරලා - රවීලා - හරින්ලා ලව්වා විපක්ෂයේ උදවිය බිලිබා ගන්න මෙහෙයුමක් පටන් අරන්.

ඔය විදියට රනිල් ගේමට බහිද්දී , '' රනිල්ගේ කැම්පේන් මැනේජර් කව්ද ?'' කියලයි සමහරු අහන්න ගත්තේ. මොකද ඔය කැම්පේන් මැනේජර් වගකීමට ලංකා බැංකු සභාපති , රොනල්ඩ් පෙරේරා පත්කරලා කියලා, පහුගිය ඉරිදා සිළුමිණ ආණ්ඩුවේ පත්තරේ ලොකුවට තිබුනා ..
.
ඊට පස්සේ කතාව ගියේ රනිල්ගේ කැම්පේන් මැනේජර් විදියට නීතිඥ මහින්ද හාරදාස පත්කරලා කියන කතාවක්..

ඔන්න රනිල් ඊයේ (13) හවස UNP මැනේජ්මන්ට් කමිටුවේ කීපදෙනෙක් ගෙන්නලා, ඒ අවුල විසඳලා කියලයි ආරංචි.. ඒ ආරංචිවල හැටියට , සිරිකොතේ ඉඳගෙන රටපුරා UNP කැම්පේන් එක රොනල්ඩ් පෙරේරාට පවරලා. මුදල් කටයුතු හාරදාස් ට බාරදීලා .. ජනාධිපතිවරණ සමස්ත කැම්පේන් එක බාරදීලා තියෙන්නේ ඇමති හරින් ප්‍රනාන්දු ට.. ඒ විතරක් නෙමෙයි, UNP එකේ මුලිකත්වයෙන් අලුත් සන්ධානයක් හදන වැඩේ කැඳවුම්කරු විදියට රවී කරුණානායක ව පත්කරලා.

හැබැයි ඔය කිසිකෙනෙකුට ඒ වගකීම් පවරලා ලියුම් කඩදහි නම් දීලා නෑ කියලයි ආරංචි.

ඒ කොහොම වුනත් UNP සන්ධානේ කැඳවුම්කරු විදියට රවීගේ නම් රනිල්ගේ කටින් පැන්නා විතරයි රවී ගේමට බැහැල කියලයි ආරංචි.

ඔන්න ඊයේ රෑම විපක්ෂයේ මන්ත්‍රීවරුන් කීපදෙනෙක් රවී එයාගේ ගෙදර ගෙන්න ගෙන. ටික වෙලාවක් යද්දී ජනාධිපති වික්‍රමසිංහත් , රවී කරුණානායක ගේ ගෙදර ගිහින්.. විපක්ෂ මන්ත්‍රීලා කිපදෙනත් එක්ක පැය දෙකතුනක විතර සීරියස් කතාබහක් තිබුනා කියලා තමයි කනින් කොනින් ආරංචි වෙන්නේ..!

• දේශපාලන වාර්තාකරු

වෛද්‍යවරුන් සඳහා ලබාදෙන DAT දීමනාව ඉල්ලා සිටිමින් සෞඛ්‍ය අංශයේ වෘත්තීය සමිති 72ක් විසින් දියත්කර තිබූ වර්ජනය හෙට (15) පෙරවරු 06.30 ට අවසන් කරන බව සෞඛ්‍ය සේවා වෘත්තීය සමිති සන්ධානයේ කැඳවුම්කරු රවී කුමුදේශ් පවසයි.

සෞඛ්‍ය අමාත්‍යාංශයේ ලේකම් විසින් පවතින ගැටලුව සාකච්ඡා කිරීම සඳහා සාකච්ඡාවක් ලබා දෙන බව ලිඛිතව ලබාදීම හේතුවෙන් මෙම වර්ජන ක්‍රියාමාර්ගය තාවකාලිකව නතර කරන බව ඔහු පවසයි.

කෙසේ වුවත් මීට පෙර මෙම වෘත්තීය සමිති පවසා සිටියේ සෞඛ්‍ය අමාත්‍යවරයා විසින් තම ගැටළුව පිළිබඳව සාකච්ඡා කිරීමට ලිඛිත දැනුම් දීමක් සිදුකරන තුරු වර්ජනය ක‍්‍රියාත්මක කරන බවය.

කෙසේ වුවත් මෙම වර්ජනය හේතුවෙන් දිවයින පුරා රොහල් වල රෝගීන් දැඩි පිඩාවට ලක්ව සිටි බව වාර්තා වෙයි . එසේම සෞඛ්‍ය සේවයේ සියලු අංශ අත්‍යවශ්‍ය සේවා කරමින් ඊයේ (13) ජනාධිපති රනිල් වික්‍රමසිංහ ගේ අණ පරිදි ගැසට් නිවේදනයක් ද නිකුත්කර තිබිණ.

සුළු හා මධ්‍ය පරිමාණ වී මෝල් හිමියන්, වී ගබඩාකරුවන් හා වී තොග රැස් කරන්නන් තම කර්මාන්තය පවත්වාගෙන යාමේදී මුහුණ දී ඇති මූල්‍ය දුෂ්කරතා මඟහරවා ගනිමින් මෙවර මහ කන්නයේ වී අස්වැන්න මිලදී ගැනීම සඳහා “ඔඩපණ” ණය යෝජනා ක්‍රමය ක්‍රියාත්මක කිරීමට ජනාධිපති රනිල් වික්‍රමසිංහ ගේ උපදෙස් පරිදි පියවර ගෙන තිබෙන බව ජනාධිපති ප්‍රජා කටයුතු අධ්‍යක්ෂ ජනරාල්, රජිත් කීර්ති තෙන්නකෝන් පැවසීය.

මහජන බැංකුව, ලංකා බැංකුව හා ප්‍රාදේශීය සංවර්ධන බැංකුව වෙතින් මෙම ණය පහසුකම සපයා දී තිබෙන බව ද ඔහු සඳහන් කළේය. 

ජනාධිපති ප්‍රජා කටයුතු අධ්‍යක්ෂ ජනරාල්, රජිත් කීර්ති තෙන්නකෝන් මේ බව සඳහන් කළේ සුළු හා මධ්‍ය පරිමාණ සහල් කර්මාන්තකරුවන් මුහුණ දී ඇති ගැටලු පිළිබඳ අද (14) ජනාධිපති කාර්යාලයේ පැවති සාකච්ඡාවකදී ය.

අදාළ ණය යෝජනා ක්‍රමය යටතේ රුපියල් බිලියන 09ක ඔඩපණ ණය නිකුත් කිරීමට අපේක්ෂා කෙරෙන අතර සුළු හා මධ්‍ය පරිමාණ වී මෝල් හිමියන් සඳහා රුපියල් මිලියන 50කද, වී ගබඩා හිමිකරුවන් සහ වී තොග රැස් කරන්නන් සඳහා රුපියල් මිලියන 25කද උපරිම ණය මුදලක් ලබාදෙනු ඇත.

ණය ආපසු ගෙවීමට දින 180ක කාලසීමාවක් හිමි වේ. 15%ක් වන වාර්ෂික පොලී අනුපාතයෙන් 4%ක් මහා භාණ්ඩාගාරය විසින් අදාළ බැංකු වෙත ලබා දෙනු ඇත. ඒ අනුව අදාළ ණය ගැණුම්කරුවන් විසින් ගෙවිය යුත්තේ 11%ක වාර්ෂික පොලී අනුපාතයක් පමණි.

ගොවියාට හොඳ වී මිලක් ලබා දෙමින් පාරිභෝගික ජනතාවට ද සාධාරණ මිලකට සහල් ලබා ගැනීමේ අවස්ථාව ලබාදීම මෙම ණය යෝජනා ක්‍රමයේ අරමුණ බව රජිත් කීර්ති තෙන්නකෝන් පැවසීය.

මහ කන්නයේ වී අස්වනු නෙළීම ආරම්භ වීමත් සමඟ ගොවියාට වී කිලෝවක් සඳහා (නාඩු කිලෝවකට රුපියල් 105/-ක, සම්බා කිලෝවකට රුපියල් 120/-ක සහ කීරි සම්බා කිලෝවකට රුපියල් 130/-ක) සහිතක මිලක් ලබාදීම වෙනුවෙන් මෙම ණය ප්‍රදානය කෙරේ.

යෝජිත වී මිලදී ගැනීමේ වැඩසටහන ක්‍රියාත්මක කිරිමට අදාළව මුදල්, ආර්ථික ස්ථායීකරණ සහ ජාතික ප්‍රතිපත්ති අමාත්‍යවරයා ලෙස ජනාධිපති රනිල් වික්‍රමසිංහ 2024.01.24 දිනැතිව ඉදිරිපත් කළ සංදේශය සඳහා අමාත්‍ය මණ්ඩල අනුමැතිය හිමිව තිබේ.

උපරිම දෛනික වී කෙටීමේ ධාරිතාව මෙ.ටො. 25කට යටත් වන සුළු හා මධ්‍ය පරිමාණ වී මෝල් හිමියන්, ප්‍රමාණවත් ගබඩා පහසුකම් ඇති ගබඩා හිමියෙකු හෝ සුළු හා මධ්‍ය පරිමාණ වී මෝල් හිමියෙකු සමඟ ඇති කර ගන්නා ලද වලංගු ගිවිසුමක් ඇති, වී තොග රැස්කරන්නන් මෙම ඔඩපණ ණය යෝජනා ක්‍රමය සඳහා සුදුසුකම ලබයි.

කඩිනමින් තම සංගම්වල සුළු හා මධ්‍ය පරිමාණ වී මෝල් හිමියන් මේ සම්බන්ධව දැනුවත් කර අදාළ බැංකු මඟින් මෙම ණය මුදල ලබා ගැනීම සඳහා අයදුම් කිරීමට ඔවුන් දිරිමත් කරන ලෙස මෙහිදී සමස්ත ලංකා සහල් කර්මාන්තකරුවන්ගේ සංගමයෙන් ඉල්ලා සිටි ජනාධිපති ප්‍රජා කටයුතු අධ්‍යක්ෂ ජනරාල්වරයා පහසු වැඩපිළිවෙළක් මඟින් මෙම ණය යෝජනා ක්‍රමය සාර්ථක කර ගැනිමට සහාය වන ලෙස සාකච්ඡාවට එක්ව සිටි බැංකු නියෝජිතයන්ගෙන් ද ඉල්ලා සිටියේය.

ආර්ථික අර්බුදය සහ කොවිඩ් වසංගතය හේතුවෙන් සුළු හා මධ්‍ය පරිමාණ වී මෝල් හිමියන්ට මූල්‍ය ගැටලු රැසකට මුහුණ දීමට සිදුව තිබූ අතර ඒ හේතුවෙන් කර්මාන්තය ආශ්‍රිතව පැන නැගී ඇති ගැටලු පිළිබඳව ද මෙහිදී දීර්ඝ ලෙස සාකච්ඡා කෙරිණි.

කෘෂිකර්ම අමාත්‍යාංශයේ සහ ආදළ රේඛීය ආයතනවල නිලධාරීන් සහ සමස්ත ලංකා සහල් කර්මාන්ත කරුවන්ගේ සංගමයේ නියෝජිතයන් මෙන්ම මහජන බැංකුව, ලංකා බැංකුව හා ප්‍රාදේශීය සංවර්ධන බැංකුව යන බැංකුවල නියෝජිතයන් ඇතුළු පිරිසක් මෙම සාකච්ඡාවට එක්ව සිටියහ.

ජනාධිපතිවරණය කල් දැමීමට ආණ්ඩුවේ කිසිදු සුදානමක් නොමැති බවත්, ඉදිරි ජනාධිපතිවරණයට වත්මන් ජනාධිපති රනිල් වික්‍රමසිංහ ඉදිරිපත් වුවහොත් ඔහුට සිය සහය හිමිවන බවත්, ආණ්ඩු පක්ෂ ප්‍රධාන සංවිධායක , අමාත්‍ය ප්‍රසන්න රණතුංග අවධාරණය කරයි.

රනිල් වික්‍රමසිංහ මහතාට සහය ලබා දිය යුතු බව සිය පෞද්ගලික මතය බව අවධාරණය කරන ඇමතිවරයා මේ මොහොතේ ජනාධිපති රනිල් වික්‍රමසිංහ මහතාට තවත් අවස්ථාවක් ලබා දීම පොහොට්ටුව ඇතුළු රටට ආදරය කරන සියලු පාර්ශවයන්ගේ යුතුකමක් බවද අවධාරණය කරයි.

ශ්‍රී ලංකා පොදුජන පෙරමුණ හැම විටම රට ගැන සිතා තීන්දු තීරණ ගත් පක්ෂයක් බැවින් නිවැරදි මොහොතේ සිය පක්ෂය එම තීරණය ගනු ඇතැයි තමන්ට විශ්වාස බවද ඇමතිවරයා සදහන් කරයි.

ප්‍රසන්න රණතුංග ඇමතිවරයා මේ බව සදහන් කළේ අද (14) මහනුවර දිස්ත්‍රික් සම්බන්ධීකරණ කමිටුවට සහභාගි වීමෙන් අනතුරුව මාධ්‍යවේදීන් මතුකළ ප්‍රශ්නවලට පිළිතුරු ලබා දෙමිනි.

එහිදී මාධ්‍යවේදීන් ඇමතිවරයාට යොමුකළ ප්‍රශ්න හා ලබා දුන් පිළිතුරු මෙසේයි.

ප්‍රශ්නය – ඇමතිතුමා අද දිස්ත්‍රික් ලේකම් කාර්යාලයේ මොකක්ද තිබුනේ?

පිළිතුර – 2024 වසර සදහා විශාල සංවර්ධන අරමුදලක් මහනුවර දිස්ත්‍රික්කයට ලැබිලා තියෙනවා. දිස්ත්‍රික් සංවර්ධන අරමුදලත්, කදුකර දශකය වැඩසටහනත්, පළාත් සභා අරමුදල් රජය ගන්නා වු ප්‍රතිපත්ති පදනම් කරගෙන කටයුතු කරන්නත්, ජනතාවගේ අවශ්‍යතාවට සහ ජනතාවට සෘජුවම ප්‍රතිලාභ ලැබෙන විදිහට මෙම ව්‍යාපෘති ක්‍රියාත්මක කිරීමටත් තමයි රජය කටයුතු කරන්නේ. ඒ පිළිබදව දැනුවත් කරන්න තමයි අද අපි ආවේ.

ප්‍රශ්නය – දිස්ත්‍රික් සම්බන්ධීකරණ කමිටුව මාධ්‍යවේදීන්ට වාර්තා කරන්න දෙන්නේ නැහැ. ඇයි ඒ?

පිළිතුර – එක් එක් දිස්ත්‍රික් ලේකම් කාර්යාලවල ගන්නා තීන්දුව අනුව තමයි ඒක කරන්නේ. අවශ්‍ය දේවල් මාධ්‍ය වලට දෙනවා. අනවශ්‍ය දේවල් ජනතාව නොමග යන දේවල් පවා මාධ්‍යවලින් සිදු වෙනවා නේ. ඒ නිසා ද දන්නේ නැ එහෙම තීන්දුවක් අරන් තියෙන්නේ.

ප්‍රශ්නය – ඔබතුමාලා පසුගිය සමයේ දැඩි ලෙස වත්මන් ජනාධිපතිතුමාව විවේචනය කළා. ඔබතුමා එතනින් ඉදිරියෙන්ම ඉන්නවා. දැන් ඔබතුමාලා ජනාධිපතිතුමාට සෙත්කවි කියමින් ඉන්නවා. එතුමාට ආයේ දෙන්න ඕනි කියනවා?

පිළිතුර – අපි අදටත් නියෝජනය කරන්නේ 69 ලක්ෂය තමයි. අපිට 2/3 බලයක් පාර්ලිමේන්තුවේ ආවා. අපේ වෙලාවට කොරෝනා ආවා. රට වහන්න සිද්ධ වුණා. ඔබතුමාලට මතක ඇති කොරෝනා කාලේ වැක්සින් ගහනකොට සමහරු කිවුවා ගහන්න එපා පිරිමින්ට ළමයි හම්බ වෙන්නේ නැහැ කියලා. දේශපාලන පක්ෂවල සමහරු බලාපොරොත්තු වුනේ ලක්ෂයක් දෙකක් මැරෙයි කියලා. නමුත් එන්නත් තුනම ගහලා රට අරින්න හදනවිට එහෙම කරන්න එපා කියලා වෘත්තිය සමිති කිවුවා. මාධ්‍යවල විශාල ප්‍රචාර දුන්නා ඒවාට. රටේ ආර්ථිකය කඩන් වැටෙන්න විවිධ හේතු මුල් වුණා. එදා ජනතාව කිවුවේ යුද්ධය දිනලා දෙන්න වෙන මුකුත් එපා කියලා. මහින්ද මහත්තයා ඒක කළා. දෙවෙනි පාර එතුමට කිවුවේ රට සංවර්ධනය කරන්න කියලා. ඒකත් කළා. ඊට පස්සේ යහපාලනය ගේන්න අවශ්‍ය වුණා. රටේ ආරක්ෂාව ගැන හිතලා ගෝඨාභය මහත්තයා ගෙනාවා. එතුමා ඒක කළා වගේම මිනිසුන්ගේ ජීවිත බේරුවා. අද තියෙන්නේ රටේ ආර්ථික අර්බුදයක්. අපි එදා පක්ෂයක් විදිහට හිතුවා මිනිසුන් අපි ගැන තියෙන විශ්වාසය නැති නම් අපි සියලු තනතුරුවලින් අයින් වෙමු කියලා. ගෝඨාභය මහතා ජනාධිපතිකමින්, මහින්ද මහතා අගමැතිකමින් අපි ඇමතිකම්වලින් අයින් වුනා. අපි ආරාධනා කළා, රට ගොඩගන්න පුළුවන් කෙනෙක් ඇවිත් භාර ගන්න කියලා. අපි උදව් කරන්නම් කියලා කිවුවා. නමුත් කවුරුත් ඉදිරිපත් වුනේ නැහැ. මේක භාර ගන්න කාටවත් කොන්දක් තිබුනේ නැහැ. පාර්ලිමේන්තුවේ තනි මිනිහා වුනු රනිල් මහත්තයා ඇවිත් මේක භාර ගත්තා. කොන්දේසි විරහිතව අපි එතුමට උදව් කළා. අපි අත උස්සන හැම පනතක්ම ජනප්‍රිය තීන්දු නෙමෙයි. අපි වැඩ කරන්නේ රටේ ආර්ථිකය ගොඩ ගන්න. ආපස්සට හැරිලා බලද්දි අපිට සතුටු වෙන්න පුළුවන්. එදා රුපියල් 3000 ට තෙල් ලීටරය ගත්තා. තෙල් ටික තිබුනේ නැහැ. ගෑස් පිපුරුණා. අද එහෙම නැහැ. ජනාධිපතිතුමා වසර 1 ½ ක් තුළ රට යම් මට්ටමකට ගෙනත් තිබෙනවා. මිනිස්සු සාමාන්‍ය මට්ටමට ඇවිත් තිබෙනවා. නමුත් අපි එළියට ඇවිත් නැහැ. තවත් ඉදිරියේදී රට මීට වඩා හොද මට්ටමට එද්දි මීට වඩා ප්‍රතිලාභ ජනතාවට ලැබේවි. මෙම වසර තුළ සංවර්ධන කටයුතු වලට මුදල් ප්‍රතිපාදන වෙන් කරලා තියෙනවා.

ශ්‍රී ලංකාවේ ආර්ථික වර්ධනය වේගවත් කිරීම සඳහා ඉන්දු - ශ්‍රී ලංකා හවුල්කාරිත්වය මඟින් මෙරට රාජ්‍ය අංශයේ ධාරිතාව ඉහළ නැංවීමේ වැඩපිළිවෙළෙ ක්‍රියාවට නැංවේ.

ජනාධිපති රනිල් වික්‍රමසිංහ පසුගියදා සිදු කළ ඉන්දීය නිල සංචාරයේදී දෙරටේම ජනතාවගේ අභිවෘද්ධිය වෙනුවෙන් දෙරට අතර සබඳතා නව ක්ෂේත්‍ර ඔස්සේ ශක්තිමත් කර ගැනීමට දෙරටේ නායකයන් එකඟ වූ අතර විශේෂයෙන් දෙරටේ ජනතාව අතර (people-to-people) සබඳතා ප්‍රවර්ධනය කිරීම කෙරෙහි එහිදී ප්‍රමුඛ අවධානයක් යොමු විය.

මේ වන විට ඉන්දියාව සිවිල් සේවාවන්හි ධාරිතාව ගොඩනැංවීම උදෙසා දැවැන්ත වැඩසටහනක් දියත් කර තිබෙන අතර රාජ්‍ය අංශයේ ධාරිතාව ගොඩනැංවීමේ ඉන්දු - ශ්‍රී ලංකා හවුල්කාරිත්වය මඟින් මෙරට රාජ්‍ය ආයතන පද්ධතිය වඩාත් නව්‍යකරණයෙන් සහ කාර්යක්ෂමව ඉදිරියට ක්‍රියාත්මක කිරීමට අවස්ථාව හිමි වනු ඇත.

මෙම වැඩසටහන ක්‍රියාත්මක කිරීමට අදාළ ජ්‍යෙෂ්ඨ මට්ටමේ සාකච්ඡා සඳහා ශ්‍රී ලංකා රජයේ ආරාධනය පරිදි ඉන්දියාවේ යහපාලනය සඳහා වූ ජාතික මධ්‍යස්ථානයේ (National Center for Good Governance, India) අධ්‍යක්ෂ ජනරාල් භාරත් ලාල් පසුගියදා ශ්‍රී ලංකාවට පැමිණ ජනාධිපති රනිල් වික්‍රමසිංහ සහ අග්‍රාමාත්‍ය දිනේෂ් ගුණවර්ධන හමුවී සාකච්ඡා පැවැත්වීය.

ශ්‍රී ලංකාවේ රාජ්‍ය සේවයේ ඵලදායී වෙනසක් ඇති කිරීම සඳහා අධීක්ෂණ ක්‍රියාමාර්ග හඳුන්වා දීමෙන් රාජ්‍ය ආයතනවල කාර්ය සාධනය වැඩිදියුණු කරන ක්‍රමවේදය පිළිබඳව එහිදී දීර්ඝ වශයෙන් සාකච්ඡා කරනු ලැබීය.

එම සාකච්ඡාවන්හි ප්‍රතිඵලයක් ලෙස ශ්‍රී ලංකාවේ ඉහළ පෙළේ නියෝජිත කණ්ඩායමක් ඉන්දියාවට ගොස් අදාළ ඉන්දීය ආයතන සමඟ තවදුරටත් සාකච්ඡා කොට සුදුසු ධාරිතා සංවර්ධන සහයෝගීතා වැඩසටහනක් සකස් කර ක්‍රියාත්මක කිරීමට තීරණය විය.

ඒ අනුව අග්‍රාමාත්‍ය ලේකම්, අනුර දිසානායක මහතාගේ ප්‍රධානත්වයෙන් යුතුව රාජ්‍ය පරිපාලන, ස්වදේශ කටයුතු, පළාත් සභා හා පළාත් පාලන අමාත්‍යාංශයේ ලේකම්, තාක්ෂණ අමාත්‍යාංශයේ ලේකම්, අල්ලස් හෝ දූෂණ චෝදනා විමර්ශන කොමිෂන් සභාවේ සභාපති, ශ්‍රී ලංකා සංවර්ධන පරිපාලන ආයතනයේ අධ්‍යක්ෂ ජනරාල්, නීතිපති දෙපාර්තමේන්තුවේ නියෝජ්‍ය සොලිසිටර් ජනරාල්, ශ්‍රී ලංකා ආයෝජන මණ්ඩලයේ විධායක අධ්‍යක්ෂ යන නිලධාරීන් ඇතුළු රාජ්‍ය නිලධාරීන් 14 දෙනකුගෙන් සමන්විත ඉහළ පෙළේ නියෝජිත කණ්ඩායමකට ඉන්දියාවේ යහපාලනය සඳහා වූ ජාතික මධ්‍යස්ථානයෙහි පෙබරවාරි 12 -17 දක්වා පැවැත්වෙන වැඩසටහනක් සඳහා එක්ව සිටී. ඒ සඳහා අවශ්‍ය සියලු පහසුකම් ඉන්දියානු රජය විසින් සපයා දී ඇත.

ඒ අනුව ශ්‍රී ලංකාවේ රාජ්‍ය ආයතන 12ක් නියෝජනය වන පරිදි ප්‍රධාන වශයෙන් විද්‍යුත් ප්‍රසම්පාදනය (e-procurement) ඇතුළු රජයේ ප්‍රමුඛ සේවාවන් සඳහා ඩිජිටල්කරණ නිරාවරණය (Digitalization Exposure in Core-functions), අලුතින් බඳවාගන්නා රාජ්‍ය සේවකයන්ගේ ධාරිතා සංවර්ධනය, දුෂණ විරෝධී පියවර (Anti-Corruption Measures), ආයෝජන පහසුකම් සැලසීම සහ ආහාර ද්‍රව්‍යවල මධ්‍යම මිලකරණ යාන්ත්‍රණය (Central Pricing Mechanism of Foods) යන ක්ෂේත්‍රවල අදාළ ආයතනවල ධාරිතා සංවර්ධනය කළ යුතු ක්‍රමවේදය පිළිබඳ මෙහිඳී අවධානය යොමු කෙරේ.

රාජ්‍ය සේවයේ ගුණාත්මක පරිවර්තනයක් සඳහා මෑතකදී ක්‍රියාත්මක කරන ලද මූලාරම්භයන් හරහා ඉන්දියාව විසින් අත්පත් කරගෙන ඇති ප්‍රගතිය හා අදාළ ඉන්දීය රාජ්‍ය ආයතන විසින් ආර්ථිකය වර්ධනය අරභයා සාර්ථකව ක්‍රියාත්මක කර ඇති ප්‍රතිපත්තිමය, ආයතනික හා මෙහෙයුම් වැඩි දියුණු කිරීම් පිළිබඳව අවබෝධයක් ලබා ගැනීමට මෙහිදී නියෝජිත පිරිස කටයුතු කරනු ඇත.

එමෙන්ම තිරසර ආර්ථික ස්ථාවරත්වයක් ඇති කර ගැනීමට පියවර ගන්නා අතරතුර ශ්‍රී ලංකාවේ ආර්ථික වර්ධනයට දායක වන රාජ්‍ය ආයතනවල ධාරිතාව ඉහළ නංවා ගැනීමත්, අදාළ ඉන්දීය ආයතන සමඟ ඇති කර ගත හැකි ආයතනික සහයෝගීතාවන් හඳුනා ගැනීමත් නියෝජිත කණ්ඩායමේ අපේක්ෂාව වේ.

ශ්‍රී ලංකා දූත පිරිස මෙම සාකච්ඡා සඳහා එක්වන අතරතුර ඉන්දීය විදේශ කටයුතු අමාත්‍ය, පිරිස් පිළිබඳ රාජ්‍ය අමාත්‍ය, මහජන දුක්ගැනවිලි අමාත්‍ය, විදේශ කටයුතු පිළිබඳ රාජ්‍ය අමාත්‍යවරයා සමඟ මෙන්ම අග්‍රාමාත්‍ය ලේකම්, කැබිනට් ලේකම් ඇතුළු නිලධාරීන් සමඟද අදහස් හුවමාරු කර ගැනීමට නියමිතය.

සෞඛ්‍ය සේවයට අදාළ සේවා කටයුතු රැසක් අත්‍යවශ්‍ය සේවාවන් බවට පත්කරමින් අති විශේෂ ගැසට් නිවේදනයක් නිකුත් කර තිබේ.

ජනාධිපතිවරයාගේ අණ පරිදි මෙම ගැසට් නිවේදනය නිකුත් කර ඇත.

ඊට අනුව රෝහල්වල, සාත්තු නිවාසවල, බෙහෙත් ශාලා සහ වෙනත් සමාන ආයතනවල රෝගීන් නඩත්තු කිරීම සහ පිළිගැනීම, රැකවරණය, පෝෂණය කිරීම සහ ප්‍රතිකාර කිරීම සම්බන්ධව අවශ්‍ය හෝ කළ යුතු ඕනෑම විස්තරයක සියලු සේවා වැඩ හෝ ශ්‍රමය අත්‍යවශ්‍ය සේවාවන් බවට පත්කර ඇත.

කෙසේ වුවත් මෙම ගැසට් නිවේදනය නිකුත්කර ඇත්තේ වෛද්‍යවරුන් වෙත ලබාදෙන DAT දීමනාව තමන්ට ද ලබාදෙන ලෙස ඉල්ලමින් වන අතර , සෞඛ්‍ය අංශයේ වෘත්තීය සමිති 72ක් මේ සඳහා එක්ව සිටියි.

මේ අතර රජය පවසන්නේ වෛද්‍යවරුන් සඳහා ලබාදෙන අදාළ දීමනාව රජයේ මාණ්ඩලික නිලධාරීන් වෙත පමණක් හිමිවන්නක් බැවින් රෝගී ජීවිත ප්‍රාණ ඇපයට ගෙන දියත්කර ඇති මෙම වර්ජනය අසාධාරණ මෙන්ම අමානුෂික බවය.

එසේම රාජ්‍ය සේවකයන් වෙනුවෙන් ලබාදෙන රුපියල් 10000 ක ජීවන වියදම මෙම වෘත්තීය සමිති වලට හිමිවෙන බවත් රජයේ පාර්ශ්වය සිහිපත් කරයි.

ජ්ජනාධිපති රනිල් වික්‍රමසිංහ ගේ අණ පරිදි නිකුත්කළ ගැසට් නිවේදනය පහත දැක්වෙයි .

ජනාධිපතිවරණය නියමිත කාලය තුළ පැවැත්වෙන බව අවධාරණය කරමින් ජනාධිපති මාධ්‍ය අංශය විසින් අද (12) විශේෂ නිවේදනයක් නිකුත්කර ඇත.

අදාළ නිවේදනයේ මෙසේ සඳහන් වෙයි.

ජනාධිපතිවරණය නියමිත කාල සීමාව තුළ පැවැත්වෙනු ඇති බවත්, වත්මන් කාල රාමුවට අනුව මහ මැතිවරණය ලබන වසරේදී පැවැත්වෙනු ඇති බවත් ජනාධිපති කාර්යාලය නිවේදනය කරයි.

ඒ සඳහා අවශ්‍ය වන මූල්‍ය ප්‍රතිපාදන 2025 අයවැය මඟින් ලබාදීමට නියමිතය.

මැතිවරණ පැවැත්වීමේ වගකීම මැතිවරණ කොමිෂන් සභාව සතු වන අතර අවශ්‍ය අවස්ථාවන්හිදී රජය මැතිවරණ කොමිෂන් සභාව සමඟ සම්බන්ධ වී කටයුතු කරනු ලබන බවද ජනාධිපති කාර්යාලය වැඩිදුරටත් දැනුම් දෙයි.

කෙසේ වුවත් මේ සම්බන්ධයෙන් අදහස් දක්වන දේශපාලන විචාරකයන් පවසන්නේ විවිධ පාර්ශ්ව ජනාධිපතිවරණය නියමිත වේලාවට නොපවත්වා සිටින බව ඇතුළු ගෙනගිය සාවද්‍ය ප්‍රකාශ හේතුවෙන් මෙවැනි නිශ්චිත නිවේදනයක් නිකුත්කරන්නට ඇති බවය.