විදෙස්

අභාවප්‍රාප්ත දෙවන එලිසබෙත් රැජිණගේ දේහය තැන්පත් කළ ස්ථානයේ ඡායාරූපයක් පළමු වරට බකිංහැම් මාලිගය විසින් නිල වශයෙන් නිකුත් කර ඇත .

එය සොහොන් ගැබෙහි මතුපිටින් විශේෂිත වූ පාෂාණයකින් නිර්මාණය කළ කාල වර්ණයෙන් යුතු සමරු ඵලකයකි.

වින්ඩ්සර් මාළිගයේ 6 වන ජෝර්ජ් රජු අනුස්මරණ දේවස්ථානයේදී රැජිණගේ දේහය ඇගේ නැසී ගිය සැමියා වන එඩින්බරෝ ආදිපාදවරයා අසලින් ම තැන්පත් කර ඇත.

එහි මහ රැජිණගේ දෙමාපියන්ගේ සහ ඇගේ නැසී ගිය සැමියා වන එඩින්බරෝ ආදිපාදවරයාගේ නම සහ ඔවුන්ගේ උපත සහ විපත ද කැටයම් කර තිබේ.

ඒ අනුව, ජෝර්ජ් VI 1895-1952, එලිසබෙත් 1900-2002″යනුවෙන් ද ඉන්පසුව එලිසබෙත් II 1926-2022 සහ ෆිලිප් 1921-2021 යනුවෙන් එහි සටහන් කර ඇත.

එළඹෙන බ්‍රහස්පතින්දා දිනයේදී 6 වන ජෝර්ජ් රජු අනුස්මරණ දෙව්මැදුර අමුත්තන් සඳහා නැවත විවෘත කෙරෙන අතර එදින පටන් ඉරිදා දිනයේ හැර අනෙකුත් දිනයන්හි දේව්මැදුර විවෘතව තැබේ.

එහිදී මහ රැජිණගේ ස්මාරකය බැලීමට මහ ජනතාවට හැකි වන අතර දේවාස්ථානයට ඇතුළු වීමේදී මහ ජනතාවගෙන් මුදල් අය කෙරෙනු ඇත.

මේ සම්බන්ධයෙන් නිකුත්කර ඇති නිල ට්ට්වීටර් පණිවිඩය පහත දැක්වෙයි .

චීන ජනාධිපති ෂී ජින් පිං පසුගිය 22 වනදා බ්‍රික්ස් ව්‍යාපාරික සංසදයේ සමාරම්භක උත්සවයට එක්විය.

වීඩියෝ තාක්ෂණයෙන් සහභාගී වූ චීන ජනාධිපති ෂී ජින් පිං "කාලයේ ප්‍රවණතාව ග්‍රහණය කර ගනිමින් දීප්තිමත් අනාගතයක් නිර්මාණය කිරීම" යන මැයෙන් එහිදී ප්‍රධාන දේශනයද පැවැත්වීය.

ජනාධිපතිවරයා පැවසුවේ ඉතිහාසය අපට පවසන්නේ, සාමය මනුෂ්‍ය වර්ගයාගේ පොදු අපේක්ෂාවක් වන අතර සෑම පාර්ශ්වයක්ම ඒ වෙනුවෙන් උත්සාහ කිරීම සහ එය පවත්වාගෙන යාම අවශ්‍ය වන බවයි.

සෑම කෙනෙකුම සාමය අගය කර, සාමය ආරක්ෂා කරන විට සහ යුද්ධයේ කටුක පාඩම් සිහිපත් කරන විට පමණක් සාමයට බලාපොරොත්තුවක් තැබිය හැකි වේ.එක්සත් ජාතීන්ගේ ප්‍රඥප්තියේ මුල් අභිප්‍රාය අමතක නොකළ යුතු අතර සාමය ආරක්ෂා කිරීමේ මෙහෙවර මනසේ තබා ගත යුතු යැයි ෂී ජින් පිං ජනාධිපතිවරයා පැවසීය.
ඉකුත් ශතවර්ෂය තුළ ලෝකයේ ඇති වූ වෙනස්කම් සහ සියවසේ වසංගත තත්ත්වය එකිනෙකට බැඳී ඇති වර්තමානයේදී, විවිධ ආරක්ෂක අභියෝග එකින් එක මතුවෙමින් තිබේ.

ලෝකය ආර්ථික ප්‍රකෘතිය උදෙසා අරගල කරමින් සිටී. ගෝලීය සංවර්ධනය ද බරපතල පසුබෑමකට ලක්ව ඇත. ජාත්‍යන්තර තත්ත්වය වෙනස් වුවද, විවෘත වීමේ සහ සංවර්ධනයේ ඓතිහාසික ප්‍රවණතාව හෝ අභියෝගවලට මුහුණ දීම සඳහා එකට වැඩ කිරීමේ ආශාව වෙනස් නොවනු ඇත.

අභියෝගවලට මුහුණ දී නිර්භීතව ඉදිරියට යා යුතුයැයි චීන ජනාධිපතිවරයා පෙන්වා දුන්නේය.
නව යුගයේ සංවර්ධනය අත්පත් කර ගනිමින්, සියලු රටවල ජනතාවට ප්‍රතිලාභ ලබා දිය යුතු යැයි චීන ජනාධිපති ෂී ජින් පිං අවධාරණය කළේය.

දිනූෂි ධීරසිංහ

දෙවැනි එලිසබත් මහ රැජිනට අවසන් ගෞරව දැක්වීම වෙනුවෙන් එංගලන්ත පා පන්දු සුපිරි තරුව ඩේවිඩ් බෙකම්, පැය 13 ක් තිස්සේ පෝලිමක රැඳීසිට ඇති බව රොයිටර් පුවත් සේවය වාර්තා කර ඇත ..

දෙවැනි එලිසබත් මහ රැජිනගේ දේහය මහජන ගෞරවයට තබා ඇත්තේ වෙස්ට්මිනිස්ටර් ශාලාවේය.

දේහයට ගෞරව දැක්වීමට පැමිණෙන පිරිස් හේතුවෙන් කිලෝ මීටර් ගණනක් දුරට පෝලිම් දකින්න ලැබේ. දස දහස් ගණනක් අව්ව වැස්ස නොතකා පෝලිම්වල සිටින බව වාර්තා වේ.

එලිසබත් මහ රැජිනට ගෞරව දැක්වීමේ දී 47 හැවිරිදි සුපිරි පා පන්දු තරුව සංවේදී වූ බව ද පැවැසෙයි. "එතුමිට මා ආදරෙයි. ඒක ඇත්තට සංවේදී අවස්ථාවක්' යැයි වෙස්ට්මිනිස්ටර් ශාලාවෙන් පිටවෙද්දී බෙකම් මාධ්‍ය හමුවේ පැවැසීය.

-රොයිටර්

ඉන්දියාවේ දිල්ලි නුවර මහල් 04කින් යුත් ගොඩනැගිල්ලක හටගත් ගින්නකින් පුද්ගලයින් 27 දෙනෙකු මියගොස් ඇතැයි විදෙස් මාධ්‍ය වාර්තා කරයි.

එම මරණ සංඛ්‍යාව තවත් ඉහළ යා හැකි බව ද පොලීසිය සැක පළ කරන බවත් වාර්තා වැඩිදුරටත් සඳහන් කළේ ය.

ඒ, මේ වනවිට ගොඩනැගිල්ලේ සම්පූර්ණ තට්ටුවක් තවමත් සෝදිසි කර නොමැති බැවිනි.

40 කට වැඩි පිරිසක් පිළිස්සුම් තුවාල ලබා රෝහල්ගත කර ඇති අතර, 70 පමණ පිරිසක් ගොඩනැගිල්ලෙන් මුදාගෙන ඇති බව පොලීසිය සඳහන් කරයි.

ගින්න පාලනය සඳහා ගිනි නිවීමේ රථ 20 ක් ද යොදාගෙන තිබේ.

මේ අතර, ඉන්දීය අගමැති නරේන්ද්‍ර මෝදි ජීවිතක්ෂයට පත් වූ පිරිසට සිය ශෝකය ප්‍රකාශ කරමින් හා තුවාල ලැබූවන්ට ඉක්මන් සුවය ප්‍රාර්ථනා කරමින් ට්විටර් පණිවුඩයක් නිකුත් කර තිබුණි.

අගමැති මෝදි ප්‍රකාශ කර සිටියේ, ගින්නෙන් මියගිය පුද්ගලයෙකු වෙනුවෙන් ඉන්දීය රුපියල් ලක්ෂ 2ක වන්දි මුදලක් ලබාදෙන බවත්, තුවාල ලැබූවන්ට රුපියල් 50,000ක් ලබා දෙන බවත් ය.

චීනයේ යළිත් කොවිඩ් 19 හිස ඔසවා ඇතැයි විදෙස් මාධ්‍ය වාර්තා සදහන් කරයි.

චීනයේ බීජිං නුවර ස්ථාන රැසක් වසා තැබීමට බලධාරීන් පියවර ගෙන ඇත.

මේවන විට යළි ඉහළ යමින් පවතින කොරෝනා ව්‍යාප්තිය සැලකිල්ලට ගනිමින් මෙම තීරණය ගෙන ඇතැයි විදෙස් මාධ්‍ය වාර්තා කරයි.

ඒ අනුව චීනයේ අගනුවර වන බීජිං හි සිකුරාදා සිට ව්‍යායාම ශාලා, වෙළෙඳ සැල්, සිනමා ශාලා සහ මහල් නිවාස කිහිපයක් වසා දැමීමට බලධාරීන් උපදෙස් දී ඇත.

මේවන විට මාසයකට අධික කාලයක් ෂැංහයි නුවර ද වසා දමා තිබේ. ඊට දැඩි ජනතා විරෝධයක් එල්ලවන බවද වාර්තා වේ.

අන්තර්කරණය පිළිබඳව, ලෝක දේශපාලනය තුළ මෑතකාලීන ඕනෑ තරම් උදාහරණ තිබේ. ඇමරිකාවේ උප ජනාධිපතිනිය වන කමලා හැරිස්ගේ දේශපාලන ආගමනය, නවසීලන්තයේ ජසින්ඩා ආඩන්ගේ ඇමති මණ්ඩලය තුළ ඇති වාර්ගික මෙන්ම ආදීවාසී ස්ත්‍රීන්ගේ සංකලනය ද අන්තර්කරණය පිළිබඳව මෑතකාලීන ලෝක ආදර්ශයන් වේ.

ශ්‍රී ලංකාවේ වත්මන් ජාතික දේශපාලන අර්බුදය තුළ ලෝක ආදර්ශ ලබා දීමට තිබූ අවස්ථාවන් අප විසින් මේ වන විටත් මඟ හැර තිබේ. උප කථානායකවරිය ද ජනාධිපති හෝ අගමැතිවරියකු ලෙස කාන්තාවකට පත්වීමට තිබූ අවස්ථාවන් කැත දේශපාලන ගණුදෙණු නිසා ගිලීහී ගොස් ඇත.

ලංකාවේ පවතින දේශපාලන සංකීර්ණත්වය තුළ දේශපාලනය සඳහා ශක්‍යතාවයක් තිබෙන කාන්තාවකට වුවත් මෙවැනි තනතුරුවලට ලඟාවීමට පහසු නොවේ. එය අසීරු කටයුත්තකි. අප සැවොම එකතු වී එම පරිසරය අනිවාර්යෙන්ම ගොඩනැඟිය යුතුයි.

ඒ නිසා ලංකාවටම ආවේණීක, පාර්ලිමෙන්තු ප්‍රජාතන්ත්‍රවාදයේ විකෘතිය විසින් ප්‍රජාතන්ත්‍රවාදයේ හර පද්ධතිය කුණු කර ඔජස් ගලන තත්ත්වයකට අද පත් කර ඇත. ප්‍රභූ දේශපාලන දවටනය තුළ ක්‍රියාත්මක වන පාදඩ දේශපාලන ආකෘතිය විසින් සියලු සාධනීය අවස්ථා උදුරා දමා ඇත.

ලංකාවේ දේශපාලන දිශානතීය පිළිබඳ උකටලී වි සිටින මොහොතක ඉන්දියාව දෙසින් ඇසෙන අන්තර්කරණ දේශපාලනය (Inclusion Politics) පිළිබඳ සුබාරංචිය ඉවත දැමිය නොහැකිය.

ද්‍රොරපති මුර්මුගේ ජනතා තේරීම සුළුවට තැකිය ද නොහැකිය. පද්ධති වෙනසක් ගැන කතා කරන ලංකාවේ දේශපලානයෙහි විවිධත්වය නියෝජනය කරන ප්‍රජාවන් අන්තර්කරණය සිදු කිරීමට නොහැකි යන මිථ්‍යාවෙන් ද බැහැරව සිතා බැලීමට අවස්ථාවක් ඉන්දීය දේශපාලන සන්සිද්ධිය මඟින් උදා වී ඇත.

ඉන්දීය අගමැති නරේද්‍ර මෝදීගේ ජාතිවාදී, පුරුෂාධීපත්‍ය දේශපාලන භාවිතය බොහෝ විවේචනයන්ට ලක්ව තිබේ. ඒ කෙසේ වෙතත්, ඉන්දියාවේ ජනාධිපති තනතුරේ අධීකාරී බලයක් නොතිබුණත් ආදීවාසී නියෝජනයක් සහිත කාන්තාවක් ශ්‍රේෂ්ඨත්වයට ලඟා කර වීමට පරිසරය සකස් කිරීම පිළිබඳව ඉදිරිගාමී දේශපාලන භාවිතයන් පිළිබඳ විශ්වාස කරන ප්‍රගිතිශීලින්ට සතුටු විය හැකිය.

ඉන්දීය මාධ්‍ හුවා දක්වන ආකාරයට දේශපාලන ගේම් මෙහි කොතෙකුත් තිබිය හැකිය. ඉන්දීයාවේ ප්‍රබල පක්ෂ වන, භාරතීය ජනතා පක්ෂයත් ක්‍රොන්ග්‍රස් පක්ෂයත් ආදීවාසී අනන්‍යතා සහිත ප්‍රජාවන් අන්තර්කරණ දේශපාලනය පිළිබඳ විශාල නැමියාවක් වර්තමානයේ දක්නට තිබේ. එම තරඟය නිසා ද නිදහසින් පසු ද්‍රොරපති මුර්මු වැනි ආදීවාසී කාන්තාවකට ජාතික දේශපාලනය තුළ ජනාධිපතිවීමට අවස්ථා සැලසුණා ද විය හැකියි.

ඉන්දියාවේ පශ්චාත් අධ්‍යාපනය ලැබූ (2012-2014) ලැබුවෙකු ලෙස මා, ඉන්දියාවේ සමාජ ආර්ථික දේශපාලන සංදර්භය තේරුම් ගන්නේ වඩා හොඳ වගේම වඩා නරක දේවල් ද ඉන්දියාව තුළ නිරන්තරයෙන් සිදුවන භූ කලාපයක් ලෙසයි.

තවමත් අන්ත හින්දු ජාතිවාදී, අන්ත කුලවාදී දේශපාලන සංස්කෘතියක් ගොඩනැඟී තිබෙද්දීත් නව ප්‍රජාතන්ත්‍රවාදී ඇගයුම් තරඟකාරී ලෙස ආරෝපණය කර ගැනීමට ඇති උනන්දුවත් ඔවුන්ගේ නිදහස් ව්‍යාපරයේ සිටම දැකිය හැකිය.

එවැනි සංදර්භයක ඉන්දියාවේ වත්මන් අගමැතිගේ ජාතිවාදී මෙන්ම පුරුෂවාදී දේශපාලන නිර්ණායකයන් ද එම කතිකාවට ඔබ්බට ගොස් ඔහුගේ දේශපාලන භාවිතය ද අලුතින් කියවා ගැනීමට ලැබෙන අවස්ථාවක් ලෙස ද සැලකිය හැකිය.

ලංකාවේ ජාතිකවාදී යැයි කියා ගන්නා දේශපාලඥයින් ජාතිවාදී මඩගොහුරේ ගිලී හිරිකිත බල ක්‍රීඩාවේ නිරත වන විට එවැනි මොඩලයේ කෙනෙකු වන මෝදි ගේම ගහන්නේ වෙනස් විදිහටයි.

ඇගේ ජයග්‍රහණය පිළිබඳව මෝදි අර්ථකථනය කරන්නේ සංවර්ධන ගමන ශක්තිමත් කරන විශිෂ්ට ජනාධිපතිවරියක් වනු නිසැක බව සඳහන් කරමිනි."ඇයගේ වාර්තාගත ජයග්‍රහණය අපගේ ප්‍රජාතන්ත්‍රවාදය සඳහා හොඳ පෙරනිමිත්තක්" යැයි ද මෝදි ට්විටර් පණිවුඩයක් මඟින් නිකුත් කළේය.

ලංකාවේ පාදඩ ප්‍රභූ දේශපාලනයට ජනතා අපකීර්තියට පත් වී තිබිය දීත් අඩුම තරමේ ඉන්දීය දේශපාලනයෙන් ආදර්ශ ලබා ගන්න යැයි අවධාරණය කරමි. පොත් කඳු ගොඩගසා ගත් ප්‍රජාතන්ත්‍රාවදී නරුමයන්ට ප්‍රජාතන්ත්‍රවාදයේ සැබෑ අන්තර්කරණ මූලධර්ම යළි සිහිපත් කර දෙමි.

ඉන්දියාවේ 15 වැනි මෙන්ම දෙවනි කාන්තා ජනාධිපතිවරිය ලෙස ද්‍රොරපති මුර්මුගේ චාරිතානූකූලව දිව්රුම් දීම ජුලි 24 වැනි දා සිදු වනු ඇත. එම දිව්රුම් දීමෙන් විශද වන්නේ, ඇය ඒ වන විටත් හුදු ආදීවාසී කාන්තාවක් නොවන අතර සමස්ත ඉන්දීය ජනතාවගේ ජනාධිපතීනිය ලෙස හැඳින්වන බවයි. මෙවැනි ආන්තිකරණයට ලක් වූ ප්‍රජාවන්ට සිදුකළ හැකි ඉහළම ගෞරවාදරය මෙයම නොවේද?

ඇයගේ දේශපාලන ගමන් මඟ විමසන විට , 1850 ගණන්වල බ්‍රිතාන්‍ය පාලනයට එරෙහි නැගිටීම සඳහා ප්‍රසිද්ධියට පත් වූ ඉන්දියාවේ පැරණිතම සහ විශාලතම ගෝත්‍රවලින් එකක් වන සන්තාල්හි සාමාජිකාවක් ලෙස හඳුනාගත හැකි බවයි. ඇය උපර්බෙදගේ ගම් සභාවේ සාමාජිකයෙකු වූ සහල් ගොවියෙකුට දාව උපත ලැබුවෙකි. ඇයගේ පියා මෙන්ම සීයා ද ගම්පතියන් වූහ.

කුඩා කාලයේ දුෂ්කර ජීවිතයක් ගත කරමින් පාසලට ගොස් රාත්‍රියේ භූමිතෙල් ලාම්පුවෙන් ඉගෙන ගත් තැනැත්තියක් ලෙස ද ඇය හඳුන්වයි. පසුකාලයේ කාන්තාවන්ට දේශපාලනය පිවිසීම පිළිබඳව තීබු පිළිගැනීම වැනි සාම්ප්‍රදායික අභියෝගය බිඳ දමමින් 1997 සිට භාරතීය ජනතා පක්ෂයෙන් දේශපාලනයට පිවිසි බව ද ඉන්දීය මාධ්‍යයන්හි සඳහන් වේ.

ගුරුවරියක් ලෙස ඇගේ භූමීකාව ද, මෑතක් වන තුරුම ජාර්කන්ඩ් ප්‍රාන්තයේ ආණ්ඩුකාරවරිය ලෙස ද මුර්මු මහත්මියගේ දේශපාලන කාර්යභාරය ඇගේ දේශපාලන ගමන් මඟ පිළිබඳව අවධානය යොමු කිරීමේ දී ඉස්මතු වේ.

උපර්බෙඩා ග්‍රාමයේ, ඇය අයත් ප්‍රජාව තවමත් දර යොදා ගනිමින් උයන, අතින් වතුර අඳින, විදුලි බලය ලැබී නැති ගමක් බවත් ඉන්දීය මාධ්‍යය වාර්තා කරයි. ඇගේ ජයග්‍රහණය සමඟම ඇගේ ප්‍රජාවගේ බලාපොරොත්තු නම් " පිරිසිදු නළ ජලය, රෝහලක් සහ අපගේ නව ජනාධිපතිවරියගෙන් දරුවන්ට වඩා හොඳ පාසලක් බලාපොරොත්තු වන බවයි.

එබැවින් ඉන්දියාවේ ජනගහනයෙන් 10% කට ආසන්න ප්‍රමාණයක් වන සමාජ ආර්ථික වශයෙන් ආන්තික ජනගහනයක් වන රටේ ආදිවාසී ප්‍රජාවන්ගේ පළමුවැන්නා වීමත් ඉන්දීය දේශපාලනය තුළ වැදගත් සලකුණක් සනිටුහන් කරයි.

ඉන්දීය දේශපාලන විද්වතුන් මෙය දේශපාලන නාට්‍යයක් ලෙසද හුවා දක්වයි. හින්දු ජාතිකවාදී පක්ෂයක් වන B.J.P. ඔවුන් ජනගහනයෙන් හතරෙන් එකක් පමණ වන ඔඩීෂා වැනි ප්‍රාන්තවල ගෝත්‍රික ඡන්දදායකයින් සමඟ ප්‍රවේශ වීමට වසර ගණනාවක් තිස්සේ උත්සාහ කරනු ලබන බව දක්වයි.

අන්තර්කරණ දේශපාලනය මුවාවෙන් සිදුකරන දේශපාලන ක්‍රීඩාවක් ලෙස ද දක්වනු ලබයි.විශේෂයෙන් "පහත් කුල, ආන්තික හා ගෝත්‍රිකයන්ගේ පක්ෂයක් බව, ඔවුන්ට ප්‍රවර්ධනය කිරීමට අවශ්‍ය අදහසක් බව" අනන්‍යතා දේශපාලනය පිළිබඳ විශේෂඥ දිල්ලියේ ජවහර් ලාල් නේරු විශ්වවිද්‍යාලයේ දේශපාලන අධ්‍යයන පිළිබඳ මහාචාර්ය හරීෂ් වන්ඛඩේ පවසයි.

අපේ කලාපයේ ලොකු අයියා වන ඉන්දියාව සමඟ ලාංකීය දේශපාලනය සන්සන්දනය කිරීමේ ප්‍රජාතන්ත්‍ර ආයතන වල ඇති ක්‍රියාකාරීත්වය පිළිබඳ පැහැදිලි වෙනසක් දැකිය හැකිය. ඉන්දීය පක්ෂ අතර තරඟකාරීත්වය කොතෙක් තිබුණත් එහි දේශපාලනය හඳුනාගත හැක්කේ, සුදුසු වෙලාවේ සුදුසු වෙනස්කම් සිදුකරන රාජ්‍යයක් ලෙසයි. එයට කදිම උදාහරණය ඉන්දීය ව්‍යවස්ථාව නිර්මාණය කිරීමට අබේකාර්ට අවස්ථාව ලබා දීමත් දැක්විය හැකියි.

මෝදී ඇතුළු භාරතීය ජනතා පක්ෂය ඇයව ජනාධිපතිවරණයට නිර්දේශ කිරීමත්, ඇයට එම අවස්ථාවන් උදාකර දීමත් පිළිබඳව පැහැදීමක් සැබවින්ම ඇතිවේ. තවමත් කුලය ඇතුළු නොයෙකුත් සංස්කෘතික බෙදීම් ගණනාවක් ඉන්දියාවේ පවත්වාගෙන යද්දි, මෙම සිදුවීම මඟින් අර්ථනිරූපණය කරන්නේ අන්තර්කරණය දේශපාලනය පිළිබඳ ඉදිරිගාමී ආදර්ශයක් ඉන්දියාවෙන් සනිටුහන් කරන බවයි.

විරුද්ධ පාර්ශවයන් විසින් ඉන්දීය අගමැති නරේන්ද්‍ර මෝදීට එරෙහිව ප්‍රතිවිරෝධතා වල ගැබ්වී ඇති ජාතිවාදී ලේබලය යම් මට්ටමක ලිහිල් කිරීමටත් මෙම පත්කිරීම හේතු විය හැකියි. එසේම ප්‍රජාතන්ත්‍රවාදී භාවිතයන් කෙරෙහි යොමු වීම කෙරෙහි ප්‍රසංසාවකුත් ඔවුන් කෙරෙහි ගොඩනැඟීමට අවස්ථාවක් ද විවර වේ.

චන්දිමා ජයසේන

බලයෙන් පහ කළ මියන්මාර නායිකා අවුන් සාන් සුචීට එරට අධිකරණයකින් දූෂණ චෝදනා මත වසර 05 ක සිර දඬුවමක් නියම කෙරිණ.

මේ වන විට 76 වන වියෙහි පසුවන නොබෙල් සාම ත්‍යාගලාභී අවුන් සාන් සුචීට එරෙහිව නඩු 11 ක් පවරා තිබේ.

ඉන් පළමු නඩු විභාගයේ තීන්දුව ලෙස ඇයට එලෙස වසර 05 ක සිර දඬුවම් නියම කෙරිණ.

පසුගිය පෙබරවාරී මස පළමු වැනිදා කුමන්ත්‍රණයකින් මියන්මාරයේ පාලනය හමුදාව යටතට ගැනීමත් සමග විවිධ චෝදනා යටතේ ඇයට එරෙහිව නඩු පවරා තිබේ.

ඉන්දියාවේ 15 වැනි ජනාධිපති ලෙස භාරතීය ජනතා පක්ෂය ප්‍රමුඛ ජාතික ප්‍රජාතන්ත්‍රවාදී සන්ධානය නියෝජනය කරමින් එරට ජනාධිපතිවරණයට ඉදිරිපත් වූ ද්‍රෞපදී මුර්මු තේරී පත්වී තිබේ.

දේශපාලනඥයකු මෙන්ම ගුරුවරියක ද වන ද්‍රෞපදී මුර්මු භාරතීය ජනතා පක්ෂ සාමාජිකාවක් වන අතර 2015 සිට 2021 තෙක් කාලයේ ජර්කාන්ද් ප්‍රාන්ත ආණ්ඩුකාරවරිය ලෙස කටයුතු කර තිබේ.

64 හැවිරිදි ද්‍රෞපදී මුර්මු, ඉන්දියාවේ ඔඩිස්සා ප්‍රාන්තයේ ගෝත්‍රික ප්‍රජාව නියෝජනය කරන කාන්තාවක් වන අතර ඉන්දීය ගෝත්‍රික ප්‍රජාව නියෝජනය කරන කාන්තාවක ජනාධිපති ධුරය ට පත්වීම ඉන්දීය දේශපාලන ඉතිහාසයේ ඓතිහාසික ගතවන සිදුවීමකි.

ඉන්දීය ජානාධිපතිවරණය ආරම්භ වූයේ පසුගිය 18 වැනිදා වන අතර ඡන්ද ගණන් කිරීම සහ ප්‍රතිඵල නිකුත් කිරීම අද (21) සිදුවිය.

ඉන්දියානු ආණ්ඩුක්‍රම ව්‍යවස්ථාව අනුව රටේ ජනාධිපතිවරයා තෝරා පත්කර ගනු ලබන්නේ මහජන ඡන්දයෙන් නොව, පාර්ලිමේන්තු නියෝජිතයන්ගේ ඡන්දයෙනි. ඉන්දීය ජනාධිපතිවරයාගේ ධුර කාලය වසර පහකි. ද්‍රෙෘපදී මුර්මු ලබන 25 වැනිදා ජනපති ධුරයේ දිවුරුම් දීමට නියමිතය.

ඉන්දීය ඉතිහාසයේ ප්‍රතිභා පාතිල්ගෙන් පසු ඉන්දීය ජනාධිපති ධුරය කාන්තාවකට හිමිවුණු දෙවැනි අවස්ථාව මෙය වන අතර ප්‍රතිභා පාතිල් ඉන්දියාවේ 12 වැනි ජනාධිපතිවරයා වූ අතර ඇගේ ධුර කාලය පැවැතියේ 2007 සිට 2012 දක්වාය.

ලොව ධනවත්ම පුද්ගලයා මෙන්ම, බිලියනපතියකු ද වන ඉලොන් මස්ක් ඇමෙරිකන් ඩොලර් බිලියන 44 ක මුදලකට ‘ටිව්ටිර්’ සමාගම මිලදී ගැනීමට සූදානම් වෙයි.

‘ටිව්ටර්’ යනු ලොව බලගතුම සමාජ මාධ්‍ය මෙවලමය. ලොව වැඩි දෙනා පරිශීලනය කරන වඩාත් විශ්වාසවන්ත සමාජ මාධ්‍ය ජාලය ලෙස සැලකෙන්නේ ද ට්විටර් ය. ලෝක නායකයන්, රාජ්‍ය තාන්ත්‍රිකයන්, ව්‍යාපාරිකයන් ඇතුළු ලොව කැපී පෙනෙන පුද්ගලයන් තම තමන්තේ අදහස් ලෝකයා සමඟ බෙදා ගන්නේ ඔවුන්ට අයත් නිල ‘ටිවිටර්’ ගිණුම් ඔස්සේය.

ටිවිටර් සමාගම මිලදී ගැනීමේ අවසන් වටයේ සාකච්ඡා පසුගිය දින කීපය පුරා පැවැත්වුණු අතර, අවසානයේ ඇමෙරිකන් ඩොලර් බිලියන 44 ක මුදලකට ටිවිටර් සමාගම මිලදී ගන්නා බව මස්ක් මාධ්‍ය හමුවේ පැහැදිලි කර තිබේ.

‘ප්‍රජාතන්ත්‍රවාදයේ මුල් ගල භාෂණයේ නිදහසයි. මනුෂ්‍ය වර්ගයාට නිදහසේ ඔවුන්ගේ අදහස් ප්‍රකාශ කිරීමට ඇති සමාජ මාධ්‍ය මෙවලමක් ට්විටර්. ට්විටර් තව තවත් සමාජගත කරමින්, එය ලොව සැමට සමීප කරවන්න මා උත්සාහ ගන්නවා. නව අංග රැසක් ට්විටර් හා එක් කරන්න මා සූදානමින් ඉන්නවා. ට්විටර් සමාගමට කළ හැකි දේ අසීමිතයි.’ යැයි ටිව්ටර් සමාගම මිලදී ගන්නා බව පවසමින්, බිලියනපති මස්ක් සිය ටිවිටර් ගිණුම ඔස්සේ අදහස් දැක්විමක් කර තිබේ.

ටිව්ටර් සමාජ සමාගම පිහිටුවූයේ 2006 මාර්තු 21 වැනිදාය. ට්විටර් සමාගම පිහිටුවීමට මූලිකත්වය ගෙන කටයුතු කළේ ජැක් ඩෝසි, බිල් ස්ටෝන්, ඊවන් විලියම්ස්, නෝවා ග්ලාස් ය. ට්විටර් සමාගමේ ප්‍රධාන විධායක අධ්‍යක්ෂවරයා ලෙස කටයුතු කරන්නේ ඉන්දීය සම්භවයක් ඇති ඇමෙරිකානුවකු වන පරාග් අග්‍රවාල්ය. ට්විටර් සමාගමේ මූලස්ථානය පිහිටා ඇත්තේ ඇමෙරිකාවේ කැලිෆෝනියාවේ සැන් ෆ්‍රැන්සිස්කෝ නුවරය.

දකුණු අප්‍රිකාවේ උපන් ඉලොන් මස්ක්, ඇමෙරිකන් පුරවැසියෙකි. විද්‍යුත් මෝටර් රථ නිෂ්පාදනයේ ප්‍රමුඛයා වන ‘ටෙස්ලා’ සමාගම, අභ්‍යවකාශ ගමන් බිමන්වලට සම්බන්ධ ‘ස්පේස් එක්ස්’ සමාගම ඉලොන් මස්ක්ට අයත් සමාගම් අතරින් කැපී පෙනෙන සමාගම් ලෙස සැලකිය හැක.

2024 වසරේ දී ඇමෙරිකාවේ නාසා ආයතනය යළි සඳට යන්නේ ‘ස්පේස් එක්ස්’ සමාගම සමඟ අත්වැලි බැඳ ගනිමිනි. 2035 වසරෙන් පසු අඟහරු වෙත මිනිසුන් රැගෙන යෑම සිදුවනු ඇත්තේ ද ‘ස්පේස් එක්ස්’ සමාගමේ මැදිහත් වීමෙනි. තමන් ද අඟහරු බලා යන බවත්, එසේ යන්නේ අඟහරු පදිංචියට බවත්, යළි පෘථිවියට නොපැමිණෙන බවත් මස්ක් අවස්ථා ගණනාවකදී පවසා තිබේ.

50 හැවිරිදි ඉලොන් මස්ක් ව්‍යාපාරිකයකු පමණක් නොව, ආයෝජකයකු, නව නිපැයුම්කරුවකු මෙන්ම ඉන්ජිනේරුවෙකු ද වෙයි. කෘත්‍රිම බුද්ධි සමාගමක් වන ‘ඕපන් ඒ.අයි.’ සමාගමේ හිමිකරු වන්නේ ද මස්ක්ය. ඉලොන් මස්ක් තෙවරක් විවාහ වී ඇත. මස්ක්ට දරුවන් 7 දෙනෙකි.

- lankadeepa

චීන ජනාධිපති ෂී ජින් පිං ලෝක තරුණ සංවර්ධන සංසදයට සුබ පැතුම් පණිවුඩයක් යොමුකරයි.

ලෝක තරුණ සංවර්ධන සංසදය අද(21) බෙයිජිං හිදී ආරම්භ විය. "තරුණ සංවර්ධනය ප්‍රවර්ධනය කිරීම හා පොදු අනාගතයක් ස්ථාපනය කිරීම" එහි තේමාවයි.

ෂී ජින් පිං  සඳහන් කළේ, චීනය සැමවිටම, තාරුණ්‍යය සමාජ සංවර්ධනය සඳහා වන ජීවමාන බලවේගයක් ලෙස සලකන බවයි.

ලෝක තරුණ සංවර්ධන සංසදය, ලොව තරුණ තරුණියන් ගෝලීය සංවර්ධනයට දායක කරගැනීම සඳහා මෙන්ම, ගෝලීය වශයෙන් තරුණ සංවර්ධනය ප්‍රවර්ධනය සඳහා, වැදගත් වේදිකාවක් බවට පත්වනු ඇතැයි බලාපොරොත්තු වන බව, හෙතෙම පැවසීය.

සෑම රටකම තරුණයන් සාමය, සංවර්ධනය, සාධාරණත්වය, යුක්තිය, ප්‍රජාතන්ත්‍රවාදය සහ නිදහස යන, සියලු මනුෂ්‍යයන් සඳහා පොදු සාරධර්ම ප්‍රවර්ධනය කළ යුතු බවත්, එක්සත් ජාතීන්ගේ 2030 තිරසර සංවර්ධන න්‍යාය පත්‍රය ක්‍රියාත්මක කිරීමට සහාය විය යුතු බවත්, ෂී ජින් පිං  එහිදී අවධාරණය කළේ ය.

දිනූෂි ධීරසිංහ

රුසියාව යුක්රේනයට එරෙහිව ආරම්භ කර ඇති යුද ක‍්‍රියාමාර්ගය වහාම නතර කළ යුතු බව ජාත්‍යන්තර අධිකරණය විසින් ඊයේ (16) වහාම ක්‍රියාත්මක වන පරිදි නියෝගයක් නිකුත්කර ඇත.

ඒ රුසියාව යුක්රේනයේ ඩොන්බාස් පළාත තුළ ජන සංහාරයක් සිදු වූවා යැයි කියමින් ආරම්භ කළ යුද මෙහෙයුමට විරුද්ධව යුක්රේනය විසින් පෙබරවාරි 27, එක්සත් ජාතීන්ගේ ජාත්‍යන්තර අධිකරණයේ ගොනු කර තිබූ නඩුවේ තීන්දුව ප‍්‍රකාශයට පත් කරමින් ය.

එහිදී විනිසුරුවරුන් බෙදුණු තීන්දුවක් නිකුත්කළ බවත් විදෙස් මාධ්‍ය වාර්තා කරයි.

ඊට අනුව විනිසුරුවරුන් 13 ක් මෙම තීරණයට පක්ෂව ඇති අතර එක්සත් ජාතීන්ගේ ජාත්‍යන්තර අධිකරණයේ උප සභාපති රුසියානු ජාතික කිරිල් ජිවෝර්ජියන් සහ චීන ජාතික විනිසුරුවරිය අදාළ තීන්දුවට විරුද්ධ වූ බවත් වාර්තා පවසයි.

කෙසේ වුවත් ජාත්‍යන්තර අධිකරණයට නියෝගය ක‍්‍රියාත්මක කිරීමට රුසියාවට බල කළ හැකි ක‍්‍රමයක් නොමැති බව දේශපාලන විචාරකයන් පවසයි.

උද්ධමනය ඉහළ යෑම සහ ජාතික ණය බර වැඩි වීමට විරෝධය දක්වමින් ආජන්ටිනාවේ දහස් සංඛ්‍යාත ජනතාව බුවනෝස් අයර්ස් අගනුවර ජනාධිපති මන්දිරය දක්වා පා ගමනක නිරත වූ බව විදෙස් මාධ්‍ය වාර්තා කළේය. ආහාර මිල ඉහළ යෑමත් සමග දැඩි පීඩාවට පත්ව සිටින එරට ජනතාව රජයට චෝදනා කරමින් මේ පාගමනේ නිරත වූ බව වාර්තා වේ.

සියලු විරෝධතා අවසන් කර මේ අවස්ථාවේ රජයට සහාය දීමට එකමුතු වන ලෙස ජනාධිපති ඇල්බර්ටෝ ෆර්නැන්ඩස් ජනතාවගෙන් ඉල්ලීමක් ද කර තිබේ.

රජයේ වියදම් පාලනය කිරීමට ජනාධිපතිවරයා අසමත් වී ඇතැයි ප්‍රතිවාදී පක්ෂ රැසක් චෝදනා කර ඇති අතර, ජනාධිපතිවරයාට විරෝධතා පළ කරමින් එරට රජයේ කැබිනට් ඇමැතිවරුන් දෙදෙනකුද පසුගියදා සිය ධුරවලින් ඉවත් වී තිබේ.

දකුණු අමෙරිකාවේ සෝයා සහ බඩ ඉරිඟු ප්‍රධාන නිෂ්පාදකයකු ආජන්ටිනාවේ උද්ධමනය පසුගිය මාසයේදී 60%කට වඩා වැඩි අගයක් ගත් අතර, විදේශ මුදල් සංචිත හිඟවීම සහ ගෑස් ආනයන වියදම් ඉහළ යෑම නිසා දැඩි ආර්ථික අර්බුදයකට මැදි වී සිටී.

ජාත්‍යන්තර මාධ්‍යවේදීන් රැසක් මේ වන විට රුසියානු යුක්‍රේන යුද අඅර්බුදයේ වින්දිතයින් බවට පත්ව සිටින බව විදෙස් මාධ්‍ය වාර්තා කරයි.

මතුව ඇති යුදමය තත්ත්වය වාර්තා කිරීම සඳහා යුක්රේනයට ගොස් සිටින මාධ්‍යවේදීන් රැසක් රුසියානු ප්‍රහාර හමුවේ මේවනවිට ජීවිත අවදානමට මුහුණ දී සිටින බව එහිදී අවධාරණය කර ඇත.

ඊට ආසන්න සිදුවීම ලෙස විදෙස් මාධ්‍ය වාර්තා කර ඇත්තේ ප්‍රකට අමෙරිකානු මාධ්‍ය ආයතනයක් වන ෆොක්ස් මාධ්‍ය ආයතනයේ සේවය කළ මාධ්‍යවේදියෙක් සහ මාධ්‍යවේදිනියක් රුසියානු ප්‍රහාරයකට ගොදුරුව මියයාමය.

මියගිය මාධ්‍යවේදියා ෆොක්ස් මාධ්‍ය ආයතනයේ සේවය කළ ජ්‍යෙෂ්ඨ කැමරාශිල්පියෙකු වන අතර මියගිය මාධ්‍යවේදිනිය 24 හැවිරිදි ප්‍රවෘත්ති වාර්තාකාරිණියක බවත් විදෙස් මාධ්‍ය වාර්තා කර ඇත

එම මාධ්‍ය වාර්තා අනුව මේ මාධ්‍යවේදීන් ගමන් කරමින් සිටි මෝටර් රථය කිව් අගනුවරදී රුසියානු හමුදාව එල්ල කළ ප්‍රහාරයකට ලක්වීමෙන් මෙම මරණ සිදුව ඇත.

ප්‍රහාරයෙන් තුවාල ලැබූ ෆොක්ස් මාධ්‍ය ආයතනයේ තවත් මාධ්‍යවේදියෙකු මේවනවිට රෝහල්ගත කර ඇතැයි ද විදෙස් මාධ්‍ය වාර්තා සඳහන් කරයි.

මීට පෙර බ්‍රිතාන්‍ය ස්කයි මාධ්‍ය ආයතනයේ මාධ්‍යවේදීන් පිරිසකට ද යුක්රේනයේ කිව් අගනුවරදී රුසියානු තුවක්කුකරුවන් පිරිසකගෙන් ප්‍රහාරයක් එල්ලව තිබේ. යුක්රේනයේ, ඉර්පින් ප්‍රදේශයට එල්ලවූ රුසියානු ප්‍රහාරයකින් ද ඉකුත් දා තවත් අමෙරිකානු මාධ්‍යවේදියෙකු ජීවිතක්‍ෂයට පත්වු බවත් විදෙස් මාධ්‍ය වාර්තා අනාවරණය කර සිටියි.

ජපානයේ හිටපු අග්‍රාමාත්‍යවරයකු වන ෂෙන්සෝ අබේ, වෙඩි ප්‍රහාරයකට ලක්ව ජීවිතක්ෂයට පත්වූ බව විදෙස් මාධ්‍ය වාර්තා කරයි.

හිටපු අග්‍රාමාත්‍යවරයා වෙඩි ප්‍රහාරයට ලක්වූයේ ජන හමුවකට සහභාගී වී, රැස්ව සිටි පිරිස අමතමින් කතා කරමින් සිටින අවස්ථාවේදීය.

වෙඩි තැබීම කළේ පිරිස අතර සිටි අයර්ලන්ත ජාතිකයකු බවත් ආරක්ෂක නිලධාරීන් වහා ඔහු අත්අඩංගුවට ගැණුනු බවත් වාර්තා වේ.

වෙඩි ප්‍රහාරය අග්‍රාමාතවරයාගේ පපුව පසාරු කළ බවත්, සිහිසුන්ව ඇද වැටුණු ඔහුගේ හදවත නැවැතී තිබුණු බවත් වෛද්‍ය ආධාරකරුවන් ඔහුට ප්‍රථමාධාර ලබා දෙන්න වූ බවත් ජපානයේ එන්.එච්.කේ පුවත් සේවය වාර්තා කරයි.

ජපානයේ වැඩිම කාලයක් අග්‍රාමාත්‍ය ධුරය හෙබවූ තැනැත්තා වන්නේ ෂෙන්සෝ අබේය. 2012 සිට 2020 සැප්තැම්බරය තෙක් අග්‍රාමාත්‍ය ධුරය හෙබවූ අබේ, අග්‍රාමාත්‍ය ධුරයෙන් ඉල්ලා අස්වූයේ අයහපත් සෞඛ්‍ය තත්ත්වය හේතුවෙන් ජනතාවට උපරිම සේවයක් ලබා දීමට නොහැකි බව පවසමිනි.

යුක්‍රේනයේ, මාරියුපෝල් සහ වොල්නොවාකා නගරවලින් පිටවීමට සිවිල් වැසියන්ට අවසර දෙමින් රුසියාව තාවකාලික සටන් විරාමයක් ප්‍රකාශයට පත් කර ඇතැයි විදෙස් මාධ්‍ය සඳහන් කරයි.

ඒ අනුව මරියපෝල් සහ වොල්නොවාකා නගරවල පදිංචි ජනතාවට ඉන් ඉවත් වීම සදහා සටන් විරාම කාලය තුළ අවස්ථාව ලබා දී ඇත.

එසේ වුවද රුසියාව විසින් ප්‍රකාශයට පත් කර ඇති සටන් විරාමය සම්බන්ධයෙන් යුක්‍රේනය විසින් මෙතෙක් තහවුරු කිරීමක් සිදු කර නොමැති බවද විදෙස් මාධ්‍ය වාර්තා කරයි.

රුසියානු හමුදා යුක්රේනයේ සිදු කරන හමුදා මෙහෙයුම කොන්දේසි විරහිතව නතර කළ යුතු බවට එකසත් ජාතීන්ගේ මහ සමුළුව යෝජනාවක් වැඩි ඡන්දයෙන් සම්මත කර ගෙන තිබේ.

ඊයේ (02) මේ සම්බන්ධයෙන් වූ ජන්ද විමසීමේදී එක්සත් ජාතීන්ගේ මහ සභාවේ සාමාජික රටවල් 193 න් යෝජනාවට පක්ෂව රටවල් 141 ඡන්දය ලබා දුන්නේය.

යුක්රේන ගැටුම සම්බන්ධයෙන් මහ සමුළුවේ විශේෂ සැසියක් පසුගිය 28 සහ 1 වැනිදා පැවති අතර ඡන්දය විමසීම සිදුකර ඇත්තේ ඉන් අනතුරුව ය.

සිරියාව,බෙලරුසය, උතුරු කොරියාව, එරිත්‍රියාව සහ රුසියාව මෙම යෝජනාවට විරුද්ධව ඡන්දය ලබා දී ඇත.

සාමාජික රටවල් 35 ක් මෙම යෝජනාවට ඡන්දය දීමෙන් වැළකී ඇත. ඒ අතරේ ශ්‍රී ලංකාව, ඉන්දියාව සහ, චීනය ද විය.

එක්සත් ජාතීන්ගේ මහ සමුළුවේ සභාපති අබ්දුල්ලා ෂහීඞ් මෙම යෝජනාව ඉදිරිපත් කරන අවස්ථාවේ දී සමුළුවට එක් වී සිටි සියලුම තානාපතිවරු සතුටට පත්ව අසුන්වලින් නැගිට අත්පොළසන් දුන් බව විදෙස් මාධ්‍ය පවසයි.

රුසියාව වහාම, කොන්දේසි විරහිතව තම හමුදා සම්පුර්ණයෙන්ම යුක්රේනයෙන් ඉවත් කරගත යුතු බව එම යෝජනාවේ සඳහන් වෙයි. මෙම යෝජනාවට රටවල් 90 ක් අනුග්‍රහය දැක්වූ අතර මෙම යෝජනාව සම්මත කිරීමට මහ සමුළුවේ 2/3 බහුතර කැමැත්ත අවශ්‍ය විය.

“මෙම යෝජනාව සම්මත කිරීම තුළින් අපි දෙන පණිවුඩය පැහැදිලි වාහාම යුක්රේනයට කරන පහරදීම් නවත්වන්න, රාජතාන්ත්‍රික ක්‍රියාමාර්ගයකට පිවිසෙන්න” යැයි සභාපති අබ්දුල්ලා ෂහීඞ් අවධාරණය කර ඇති බවත් විදෙස් මාධ්‍ය පවසයි.