විදෙස්

හමාස් සංවිධානයේ සටන්කරුවන් භාරයේ සිටින ඊශ්‍රායල ප්‍රාණඇපකරුවන් නිදහස් කරන ලෙසට බලකරමින් ඊශ්‍රායලයේ ටෙල් අවීව් නගරයේ දැවැන්ත විරෝධතාවක් පැවැත්වුණි.

විදෙස් මාධ්‍ය වාර්තා කරන ආකාරයට ඊශ්‍රායල සහ හමාස් යුද ගැටුම් ආරම්භවී මේ වනවිට මාස පහක කාලයක් ගත ව ඇති පසුබිමේ මේ විරෝධතාවය පවත්වා ඇත .

කෙසේ වුව ද ඔක්තෝබර් 7 ප්‍රහාරයෙන් පසුව හමාස් සංවිධානය ප්‍රාණඇපයට ගත් ඊශ්‍රායල ජාතිකයින්ගෙන් සියයකට අධික පිරිසක් තවමත් සිටින්නේ හමාස් සංවිධානය භාරයේය.

විරෝධතාකරුවන් ප්‍රාණඇපකරුවන්ගේ සේයා රූ අතැතිව විරෝධතාවයට එක්ව තිබුණි.

ඔවුන් පවසන්නේ දෙපාර්ශ්වය අතර සාකච්ඡා පවත්වා ප්‍රාණඇපකරුවන් මුදා ගැනීමට බලධාරීන් කටයුතු කළ යුතු බවයි.

විරෝධතාකරුවන්ගේ ඊශ්‍රායල අගමැති බෙන්ජමින් නෙතෙන්යාහු ප්‍රමුඛ රජයට ද එල්ල වී ඇත්තේ දැඩි විරෝධයකි.

යුක්‍රේනයේ නැගෙනහිර ප්‍රදේශයට රුසියාව එල්ල කළ ගුවන් ප්‍රහාරවලින් 11 දෙනෙකු මිය ගොස් ඇතැයි විදෙස් මාධ්‍ය වාර්තා කරයි.

නැගෙනහිර යුක්‍රේනයේ ඩොනෙට්න්ස්ක් ප්‍රදේශයට මෙම ප්‍රහාරය එල්ල වී තිබේ.

මිය ගිය පුද්ගලයින් අතර ළමයින් පස් දෙනෙකු ද සිටින බව එරට වාර්තා සඳහන් කරයි.

මෙවැනි ප්‍රහාරවලට ඉදිරියේ දී ප්‍රතිවිපාක විදීමට රුසියාවට සිදුවනු ඇති බවට යුක්රේනය ජනාධිපතිවරයා පවසා ඇත.

මෙම ප්‍රහාරය සම්බන්ධයෙන් රුසියාව තවමත් කිසිදු ප්‍රකාශයක් සිදුකර නොමැත.

බංග්ලාදේශයේ ඩකා අගනුවර මහල් හයක ගොඩනැගිල්ලක ඇතිවූ ගින්නකින් පුද්ගලයින් 43 දෙනෙකු මියගොස් තිබේ.

අදාළ ගොඩනැගිල්ලේ පිහිටි අවන්හලක මුලින්ම මෙම ගින්න ඊයේ(29) රාත්‍රියේ දී හටගෙන ඇත.

පුද්ගලයන් 75දෙනෙකු පමණ දුම් ආග්‍රහනය වීමෙන් සහ පිළිස්සුම් තුවාල ලබා රෝහල් ගත කර ඇතැයි විදෙස් මාධ්‍ය වාර්තා කරයි.

මහල් හතකින් යුතු මෙම ගොඩනැගිල්ලේ ගින්න පැය දෙකක පමණ කාලයකින් පසු පාලනය කිරීමට හැකිවූ බව ගිනි නිවන නිලධාරීන් පැවසීය.

ගින්න මැඩපැවැත්වීම සඳහා ගිනි නිවීමේ රථ 13 ක් යෙදවීමට සිදුවූ බව එරට බලධාරීන් සදහන් කළේ ය.

හමාස් සංවිධානයේ ප්‍රබල නියෝජ්‍ය නායකයා ඝාතනය කිරීම "ලෙහෙසියෙන් අත් නොහරින බව" හිස්බුල්ලා සංවිධානයේ නායක හසන් නස්රල්ලා පවසයි.

අඟහරුවාදා බේරූට්හි දී එල්ලවූ ඩ්‍රෝන් ප්‍රහාරයකින් සාලෙහ් අල්-අරූරි ජීවිතක්ෂයට පත් විය. ඒ සඳහා එය වගකිව යුතු බවට ඊශ්‍රායලය තහවුරු කර නැත.

නසරල්ලා අරූරිගේ මරණය විස්තර කළේ, "අපට නිහඬව සිටිය නොහැකි විශාල, භයානක අපරාධයක්" ලෙසිනි.

ඊශ්‍රායලය ලෙබනනයට එරෙහිව යුද්ධයක් දියත් කළහොත් හිස්බුල්ලා දක්වන ප්‍රතිචාරයට “කිසිදු සීමාවක් නැති වේවි” යනුවෙන් ඔහු තවදුරටත් පැවසීය.

අරූරි හමාස් සංවිධානයේ සන්නද්ධ අංශය වන ඉසදීන් අල්-කසම් බලකායේ ප්‍රධාන චරිතයක් වූ අතර හමාස් නායක ඉස්මයිල් හනියේගේ සමීප සගයෙකු විය. ඔහු ඔහුගේ කණ්ඩායම සහ හිස්බුල්ලා සංවිධානය සම්බන්ධීකරණය කරමින් ලෙබනනයේ සිටියේ ය.

ඔහු ඊශ්‍රායලයේ ඉලක්කගත පුද්ගල ලැයිස්තුවේ සිටි බව දන්නා කරුණක් වූ අතර, එරට අගමැති බෙන්ජමින් නෙතන්යාහු හමාස් නායකයින් කොතැනක සිටියත් ඔවුන් තුරන් කරන බවට මීට පෙර ප්‍රතිඥා දී තිබිණි.

හිස වෙනුවෙන් 2018 වසරේ සිට ඩොලර් මිලියන පහක ත්‍යාග මුදලක් නියම වී සිටි අරූරි එක්සත් ජනපද අසාදු ලේඛනයක ද ඇතුළත් විය.

ඊශ්‍රායල ආරක්ෂක බළකායේ (IDF) විශ්‍රාමික කර්නල්වරියක වන මිරී ඒසින් බීබීසීයට පැවසුවේ, හමාස්හි නියෝජ්‍ය නායකයා "ජීවත් වුණේ දහියා ප්‍රදේශය මධ්‍යයේ, බේරූට්හි හිස්බුල්ලා සංවිධානයේ හදවත බඳු වූ ප්‍රදේශයේ," එහේ ඉඳන් තමයි ඔහු "හමාස් සංවිධානය සහ හිස්බුල්ලා සංවිධානය අතර ඍජු සම්බන්ධතා පැවැත්වූවේ."

ඊශ්‍රායලය සමග පූර්ණ ගැටුමක් ඇතිවීමේ අවදානම සම්බන්ධයෙන් තමන් ලෙබනන් ජනතාව ගැන කණගාටු වන අතර, “ත්‍රස්ත කටයුතුවලට සම්බන්ධ පුද්ගලයින්” සමග කටයුතු කිරීම වැදගත් බව ද ඇය වැඩිදුරටත් පැවසුවා ය.

අරූරිගේ මරණයෙන් පසු ගාසා තීරයේ ගැටුම අනෙක් කලාපවලට ද පැතිරීමට ඇති අවදානම ගැන අතිශයින් කනස්සල්ලට පත්ව සිටින බව එක්සත් ජනපදය පැවසීය. පළිගැනීම් නොකරන ලෙස ලෙබනන් රජය හිස්බුල්ලා සංවිධානයෙන් ආයාචනා කළ බව කී එරට විදේශ අමාත්‍යවරයා ද ඒ ආකාරයෙන් ම බිය පළ කළේ ය.

“අපි අතිශයින් කනස්සල්ලට පත් වෙලා ඉන්නේ. ලෙබනන් ජාතිකයන් වගේ ම, හිස්බුල්ලා සංවිධානයට පවා කලාපීය යුද්ධයකට යාමට අවශ්‍ය නැහැ,” අබ්දුල්ලා බූ හබීබ් බීබීසීයට පැවසීය.

එක්සත් ජනපද රාජ්‍ය දෙපාර්තමේන්තු ප්‍රකාශක මැතිව් මිලර් බදාදා (ජන 4) කියා සිටියේ, අරූරී මරා දැමූ බේරූට්හි ප්‍රහාරය ගැන වොෂින්ටනය වෙත පූර්ව දැනුම් දීමක් නොකළ බව ය.

ලෙබනනයේ එක්සත් ජාතීන්ගේ සාම සාධක හමුදාව පවසන්නේ, ප්‍රචණ්ඩත්වය උත්සන්න වීමට ඇති හැකියාව ගැන එය ද දැඩි කනස්සල්ලට පත්ව සිටින බව ය.

ලෙබනනයේ එක්සත් ජාතීන්ගේ අතුරු බලකායේ ප්‍රකාශකයෙකු සියලු පාර්ශ්වයන්ගෙන් සංයමයෙන් කටයුතු කරන ලෙස ඉල්ලා සිටියේ, පුළුල් ගැටුමක් ඊශ්‍රායලය සහ ලෙබනනය යන පාර්ශව ද්විත්වයට ම විනාශකාරී ප්‍රතිවිපාක ගෙන දෙන බව පවසමිනි.

ඉරානය අරූරිගේ ඝාතනය හෙළා දැක ඇති අතර, එරට විදේශ අමාත්‍යවරයා ඊශ්‍රායලයේ "බියගුලු ත්‍රස්තවාදී මෙහෙයුම්" සම්බන්ධයෙන් විවේචනය කරමින් X, (මීට පෙර ට්විටර්හි) සටහනක් තබා ඇත.

අරූරිගේ ඝාතනයට ප්‍රතිචාර වශයෙන් තවත් ඊශ්‍රායල ප්‍රාණ ඇපකරුවන් මුදා හැරීම සම්බන්ධයෙන් වන සාකච්ඡා අත්හිටුවන බව හමාස් සංවිධානය ඊජිප්තු සහ කටාර් මැදිහත්කරුවන්ට පවසා ඇතැ යි වාර්තා වේ.

ඊජිප්තු අගනුවර වෙත ඊශ්‍රායල දූත පිරිසක් සිදු කිරීමට තිබුණු සංචාරයක් කල් දමා ඇතැ යි ද අරාබි මාධ්‍ය වාර්තා කර තිබේ.

මේ අතර, ගාසා තීරයේ සටන් තවදුරටත් ක්‍රියාත්මක ය. ඉවත් වන ලෙස ඊශ්‍රායලය ජනතාවට දැනුම් දී තිබියදීත් අඟහරුවාදා දකුණු ප්‍රදේශයේ පිහිටි නගරයක් වන ඛාන් යූනිස්හි පලස්තීන රතු අඩසඳ ගොඩනැගිල්ලට එල්ල වූ ප්‍රහාරයෙන් පස් දෙනෙකු මියගිය බව එක්සත් ජාතීන්ගේ සංවිධානය ප්‍රකාශ කළේ ය.

එක්සත් ජාතීන්ගේ මානුෂීය කටයුතු සම්බන්ධීකරණ කාර්යාලයේ (OCHA) ප්‍රකාශිකාවකට අනුව, මියගිය අය අතර දින පහක් වයසැති බිළිඳෙකු ද සිටින බව සඳහන් වේ.

"මේ කුඩා දරුවන් ජීවත් වූ තැනක්. ළමයි ජීවත් වුණු තැනක් මේක," ජෙමා කොනල් පැවසීය.

"බිම ලේ වගිරිලා තියෙන හැටි ඔබට බලා ගන්න පුළුවන්. ලෝකය සම්පූර්ණයෙන් ම භීතියට පත් වෙන්න ඕන. ලෝකය සම්පූර්ණයෙන් ම අප්‍රසාදය පළ කරන්න ඕන."

අයිඩීඑෆ් විසින් "සටන් කලාපයක්" ලෙස නම් කරන ලද නිශ්චිත ප්‍රදේශවලින් ඉවත් වන ලෙස ප්‍රදේශවාසීන්ට අනතුරු අඟවමින් ඛාන් යූනිස් වෙත ගුවනින් අත් පත්‍රිකා හෙළා ඇත.

පණිවිඩයේ සඳහන් වූයේ, ඒ අවට වූ ප්‍රදේශ කිහිපයක ම ඇති ගොඩනැගිලිවලි ඉවත් වීම සඳහා කරනු ලබන “හදිසි අනතුරු ඇඟවීමක්” ලෙස ය.

ගාසා තීරයේ හමාස් සංවිධානය විසින් පවත්වාගෙන යනු ලබන සෞඛ්‍ය අමාත්‍යංශය පවසන්නේ, ඊශ්‍රායලය ප්‍රතිප්‍රහාර එල්ල කිරීම ආරම්භ කළ දා සිට එම ප්‍රදේශය තුළ පුද්ගලයන් 22,000කට වැඩි පිරිසක් මියගොස් ඇති බව ය.

ඔක්තෝබර් 7 වන දා හමාස් සංවිධානය ඊශ්‍රායලයට එල්ල කළ ප්‍රහාරයෙන් 1200 දෙනෙකු පමණ මියගිය අතර තවත් 240 දෙනෙකු පමණ ප්‍රාණ ඇපයට ගනු ලැබිණි.

නොවැම්බර් අවසානයේ එළඹි දින හයක සටන් විරාමයක් අතරතුර ප්‍රාණ ඇපකරුවන් 105 දෙනෙකු පමණ අවසානයේ නිදහස් කෙරිණි.

බීබීසී සිංහල

හංගේරියාවේ ජනාධිපති කැටලින් නොවැක් එම ධූරයෙන් ඉල්ලා අස්වී ඇතැයි වාර්තා වෙයි.

ඒ, ළමා නිවාසයක සිදුවූ ලිංගික අපයෝජන සිද්ධියකට අදාළ නඩුවකදී කරුණු වසන් කිරීමට සහය ලබාදීම සම්බන්ධයෙන් වරදකරු වූ පුද්ගලයෙකුට සමාව දීම හමුවේයි.

එම සිද්ධිය හේතුවෙන් හංගේරියානු ජනාධිපතිනියට ධූරයෙන් ඉල්ලා අස්වන ලෙස දැඩි බලපෑම් එල්ල වූ බවත්, ඒ හමුවේ ඇය දැඩි පීඩනයකට ලක්ව සිටි බවත් විදෙස් මාධ්‍ය වාර්තා කර ඇත.

ජනාධිපතිනියට ධූරයෙන් ඉල්ලා අස්වන ලෙස බලකරමින් හංගේරියාවේ බුඩාපස්ට් අගනුවර පැවැති විරෝධතාවක් සඳහා දහසකට අධික පිරිසක් සහභාගී වී තිබුණ අතර, එල්ල වූ මහජන විරෝධතා මධ්‍යයේ සිය ඉල්ලා අස්වීම නිවේදනය කරමින් ජනාධිපතිවරිය පැවසා ඇත්තේ අදාළ තීරණය හරහා තමන් වරදක් කළ බවයි.

එබැවින් ජනාධිපතිනිය ලෙස රට වැසියන් අමතන අවසන් දිනය බවත් හංගේරියානු ජනාධිපති කැටලින් නොවැක් ඊයේ රාජ්‍ය රූපවාහිනිය ඔස්සේ ජනතාව අමතමින් පවසා තිබුණි.

ජපානයේ හනෙඩා ජාත්‍යන්තර ගුවන්තොටුපොළට ගොඩබාමින් තිබූ ගුවන් යානයේ ගැටුණු වෙරළාරක්ෂක ගුවන් යානයක සිටි පුද්ගලයින් 05ක් මියගොස් ඇති බව විදෙස් මාධ්‍ය වාර්තා කර තිබේ.

කෙසේ වෙතත් අනතුරට ලක්වූ වෙරළාරක්ෂක ගුවන් යානයේ නියමුවා ඉන් දිවි බේරාගැනීමට සමත්ව ඇති බවද විදෙස් මාධ්‍ය වාර්තා කරයි.

මේ අතර එම යානයේ ගැටුණු හොකයිඩෝ සිට පැමිණි JAL 516 මගී ප්‍රවාහන යානයේ සිටි මගීන් 379කගේ දිවි බේරාගැනීමට ගලවාගැනීමේ කණ්ඩායම් සමත්ව ඇත.

පාකිස්තානයේ සිදුවූ බෝම්බ පිපිරීම් දෙකකින් පුද්ගලයින් 20ක් මියගොස් ඇති බව විදෙස් මාධ්‍ය වාර්තා කර තිබේ.

පාකිස්තානයේ බලොචිස්තාන ප්‍රාන්තයේ හි මෙම පිපිරීම් සිදුව ඇති අතර එරට මහ මැතිවරණයේ ස්වාධීන අපේක්ෂකයෙකුගේ පක්ෂ කාර්යාලයක් අසළ පළමු පිපිරීම සිදුව තිබේ.

ඉන් ආසන්න වශයෙන් පුද්ගලයින් 12 දෙනෙකු මියගොස් ඇති බව විදෙස් මාධ්‍ය වාර්තා කරයි.එසේම දෙවන පිපිරීම Qillah Saif Ullah දිස්ත්‍රික්කයේ සිදුව ඇති අතර ඉන් පුද්ගලයින් 8 දෙනෙකු මියගොස් ඇත.

මෙම පිපිරීම් වලින් තුවාල ලැබූ පිරිස මේ වන විට රෝහල් ගත කර ඇත.

මේ වනතෙක් පිපිරීම් වගකීම කිසිදු පාර්ශවයක් භාරගෙන නොමැති බව විදෙස් මාධ්‍ය වැඩිදුරටත් සදහන් කරයි.

ඉන්දුනීසියාවේ සුලවසි ප්‍රදේශයේ නිකල් කර්මාන්ත ශාලාවක අලුත්වැඩියා කටයුත්තක් අතරතුරේ හටගත් පිපිරීමකින් සේවකයෝ 13 දෙනෙක් ජිවිතක්ෂයට පත්ව ඇති බව විදෙස් මාධ්‍ය වාර්තා කරයි.

ඉන් තවත් බොහෝ පිරිසක් තුවාල ලැබු බව ද වාර්තා වෙයි.

සමාගමට අයත් මෙම නිකල් කර්මාන්තශාලාවේ සිදුවූ මෙම පිපිරීමෙන් මියගිය පිරිස අතර ඉන්දුනීසියානු ජාතකයන් 08 දෙනකු සහ චීන ජාතිකයින් 05 දෙනකු සිටින බව මාධ්‍ය වාර්තා කර තිබේ.

පිපිරීමත් සමඟ හටගත් ගින්න මැඩපැවැත්වීමට පියවර ගෙන ඇති බව ඉන්දුනීසියානු බලධාරීහු පවසා ඇත.

බ්‍රිතාන්‍යයේ චාල්ස් රජු පිළිකා රෝගයකින් පෙළෙන බවට හඳුනාගෙන තිබේ.

ඔහු මේ වනවිට 75 වැනි වියේ පසු වනු ඇත.

 මේ වනවිට රජුට ප්‍රතිකාර ආරම්භ කර ඇති බව බකිංහැම් මාලිගය ආරංචි මාර්ග වාර්තා කරයි.

පිළිකාව හඳුනාගෙන ඇත්තේ මෑතකදී රජු වෙනත් රෝගී තත්ත්වයක් සඳහා රෝහල් ප්‍රතිකාර ලබා ගැනීමකදී බවත් බකිංහැම් මාලිගය ප්‍රකාශ කළේ ය.

කෙසේ වෙතත් රජුට කුමන ආකාරයක පිළිකාවක් වැළඳී ඇත්දැයි යන්න බකිංහැම් මාලිගය ප්‍රකාශ කර නැත.

කෙසේ වෙතත් රාජ්‍ය රාජකාරි සඳහා රජු සහභාගී වනු ඇති බවත් විදෙස් මාධ්‍ය වාර්තා කළේ ය.

රජු සතිපතා අගමැති රිෂි සුනක් හමුවනු ඇති බවත් විදෙස් වාර්තාවල සඳහන් වේ.

ආපදා පූර්ව අනතුරු ඇඟවීමේ යාන්ත්‍රණය වඩා ශක්තිමත් කිරීම තුළින් ශ්‍රි ලාංකික පුරවැසියන්ගේ ජීවිත සුරක්ෂිත කිරීමේ අරමුණින් ආපදා කළමනාකරණ මධ්‍යස්ථානය, ශ්‍රී ලංකා විදුලි සංදේශ නියාමන කොමිෂන් සභාව හා SLT Mobitel, Hutch, Dialog හා Airtel දුරකථන සේවා සැපයුම් ආයතන එක්ව, ආපදා පූර්ව අනතුරු ඇඟවීමේ නව ක්‍රමවේදයක් එළිදැක්වීම සහ ඒ සඳහා වන අවබෝධතා ගිවිසුමට එළැඹීම ජනාධිපති රනිල් වික්‍රමසිංහ ගේ ප්‍රධානත්වයෙන් අද (19) පස්වරුවේ ජනාධිපති කාර්යාලයේ දී සිදු විය.

මෙම අවබෝධතා ගිවිසුම සඳහා ආපදා කළමනාකරණ මධ්‍යස්ථානයේ අධ්‍යක්ෂ ජනරාල්, විශ්‍රාමික මේජර් ජනරාල් එස්. රණසිංහ හා ශ්‍රී ලංකා විදුලි සංදේශ නියාමන කොමිෂන් සභාවේ අධ්‍යක්ෂ ජනරාල්, මධුශංක දිසානායක විසින් අත්සන් තබන ලද අතර පාර්ශ්වකරුවන් ලෙස ඩයලොග් ආසියාටා සමූහයේ ප්‍රධාන විධායක නිලධාරී සුපුන් වීරසිංහ, ශ්‍රී ලංකා ටෙලිකොම් සමූහයේ ප්‍රධාන විධායක නිලධාරී ජානක ආර්. අබේසිංහ, භාරති එයාර්ටෙල් ලංකා පුද්ගලික සමාගමේ ප්‍රධාන විධායක නිලධාරී අශීෂ් චන්ද්‍රා, මොබිටෙල් පුද්ගලික සමාගමේ ප්‍රධාන මෙහෙයුම් නිලධාරී සුදර්ශන ගීගනගේ, හචිසන් ටෙලිකොමියුනිකේෂන්ස් ලංකා පුද්ගලික සමාගමේ වැඩබලන ප්‍රධාන විධායක නිලධාරී සුමිත්‍ර ගුප්තා යන මහත්වරුන් ඇතුළු පිරිසක් සහභාගී වූහ.

කාලගුණික හා දේශගුණික විපර්යාස මෙන්ම නොයෙකුත් හේතූන් මත සිදුවන ආපදා සඳහා නිසි පෙර සූදානමකින් යුතුව කටයුතු සිදු කිරීම තුළ ආපදා මඟින් සිදුවන ජීවිත සහ දේපල අනතුරු අවම කර ගත හැකි වේ. ඒ අනුව නව තාක්ෂණය යොදා ගනිමින් දුරකථන සන්නිවේදන ජාල හරහා පූර්ව අනතුරු ඇගවීම සිදු කිරීම වඩාත් ඵලදායී කාර්යක් ලෙස හදුන්වා දිය හැක.

ඒ අනුව විශේෂයෙන් සුනාමි ආපදාවන්ට අදාලව ආපදා පූර්ව අනතුරු ඇඟවීමේ යාන්ත්‍රණය තව දුරටත් ශක්තිමත් කිරීමේ අරමුණින් මෙම ක්‍රමවේදය එළිදක්වා තිබෙන අතර දිවයිනේ දිස්ත්‍රික්ක 14ක් තුල සුනාමි අවදානමට ලක්විය හැකි පුද්ගලයින්ගේ මෙන්ම සුනාමි ආපදා කළමනාකරණ යාන්ත්‍රණයට සම්බන්ධවන හඳුනාගත් පුද්ගලයින්ගේ ජංගම සහ ස්ථාවර දුරකථන අංක හැට දහසකට (60,000) ආසන්න ප්‍රමාණයක් වෙත සයිරන් ශබ්දයක් සමග ක්ෂණික පූර්ව අනතුරු ඇඟවීමේ “Ring Tone” නිවේදනයක් යොමු කිරීමට හැකි වන පරිදි මෙය සැලසුම් කර ඇත.

විශේෂයෙන් රාත්‍රී කාලයේදී මහජනතාව වෙත සයිරන් ශබ්දයක් සමඟ තම දුරකථන නාද වීම තුළ වඩාත් ඵලදායී පූර්ව අනතුරු ඇගවීමේ යාන්ත්‍රණයක් මෙමඟින් ස්ථාපිත කර ගත හැකි වනු ඇත.

මෙම ක්‍රමවේදය 2023 දෙසැම්බර් 26 වන දිනට යෙදෙන "ජාතික සුරක්ෂිත දිනයට" සමගාමීව ජනගත කිරීමට නියමිත ය.
එමෙන්ම මෙම ක්‍රමවේදය තවදුරටත් ව්‍යාප්ත කරමින් නාය යාම් සහ ගං වතුර ආපදා තත්වයන් වලදී මහජනතාව වෙත මෙම පූර්ව අනතුරු ඇඟවීමේ ක්‍රමවේදය ව්‍යාප්ත කිරීම මගින් බහු ආපදා පූර්ව අනතුරු ඇඟවීමේ ක්‍රමවේදයක් ලෙසද ඉදිරියේදී මෙය දියත් කිරීමට අපේක්ෂා කෙරේ.

ආරක්ෂක රාජ්‍ය අමාත්‍ය ප්‍රමිත බණ්ඩාර තෙන්නකෝන්, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක, ආරක්ෂක අමාත්‍යාංශයේ ලේකම් විශ්‍රාමික ජෙනරාල් කමල් ගුණරත්න යන මහත්වරුන්ද, ආපදා කළමනාකරණ මධ්‍යස්ථානයේ අධ්‍යක්ෂවරුන් වන බ්‍රිගේඩියර් ටී.සී. හරස්ගම, ප්‍රදීප් කොඩිප්පිලි යන මහත්වරුන් ඇතුළු පිරිසක් මෙම අවස්ථාවට එක්ව සිටියහ.



.

ප්‍රවීණ හොලිවුඩ් නළුවෙකු වන කාල් වෙදර්ස් මිය ගොස් ඇති බව විදෙස් මාධ්‍ය වාර්තා කරයි.

1970 දශකයේ මැද භාගයේ රංගන ජීවිතය ආරම්භ කළ කාල් වෙදර්ස් මිය යන විට 76 වැනි වියේ පසු විය

1987 දී ආර්නෝල්ඩ් ෂ්වාස්නෙගර් සමඟින් ‘ප්‍රෙඩේටර්’ චිත්‍රපටයේ ද රඟපෑ වෙදර්ස්, මෑතක දී කුඩා තිරයේ ‘ස්ටාර් වෝර්ස්’ කතා මාලාවට ද රංඟනයෙන් දායක වී ඇති බව සඳහන් ය.

චිත්‍රපට, රූපවාහිනිය, කලාව සහ ක්‍රීඩා සඳහා ඔහුගේ දායකත්වය තුළින් ඔහු නොමැකෙන සලකුණක් තබා ඇති බව විදෙස් වාර්තා සඳහන් කරයි.

වයඹදිග චීනයේ හටගත් භූ කම්පනයකින් අවම වශයෙන් පුද්ගලයින් 111 දෙනෙකු මියගොස් තවත් 220 දෙනෙකු තුවාල ලබා ඇති චීන රාජ්‍ය මාධ්‍ය වාර්තා කරයි.

ඊයේ (18) මධ්‍යම රාත්‍රියේ චීනයේ ගන්සු ප්‍රාන්තයේ මෙම මැග්නිටියුඩ් ඒකක 5.9ක භූ කම්පනයක් ඇති විය.

ඉන් ගොඩනැගිලි සහ නිවාසවලට දැඩි හානි සිදු වූ අතර සුන්බුන් අතර සිරවූ පිරිස් මුදාගැනීම සඳහා මෙහෙයුම් ක්‍රියාත්මකයි.

පළමු භූ කම්පනය සිදු වී පැය කිහිපයකට පසු අද (දෙසැ. 19) දිනයේ ද අසල්වැසි ෂින්ජියැන්ග් ප්‍රදේශයේ තවත් භූ කම්පනයක් සිදුව ඇත.

මැග්නිටියුඩ් 5.5ක ප්‍රබලත්වයෙන් යුතු වූ එම භූ කම්පනයෙන් සිදුවූ හානිය එකවර පැවසිය නොහැකි බව විදෙස් මාධ්‍ය වාර්තා කර තිබේ.

නේපාලයේ ඩාන්ග් දිස්ත්‍රික්කයේ සිදුවු බස් රථ අනතුරකින් පුද්ගලයින් 12 දෙනෙකු මියගොස් තිබේ.

අනතුරින් තවත් පුද්ගලයින් 22 දෙදෙනෙකු තුවාල ලබා ඇති බව විදෙස් මාධ්‍ය වාර්තා කළේය.

මගී බස්රථයක් පාලමකින් ඉවතට පැන ගඟකට පෙරළී යාමෙන් එම අනතුර සිදුවී ඇත.

අනතුරින් මියගිය පුද්ගලයින් අතරින් දෙදෙනෙකු ඉන්දීය ජාතිකයන් වන බව වාර්තා වෙයි.

ඉන්දියාවේ කේරළ ප්‍රාන්තයෙන් නව කොවිඩ් ප්‍රභේදයක් හඳුනාගත් බව එරට මාධ්‍ය වාර්තා කරයි.

JN.1 ලෙස නම් කර ඇති මේ කොවිඩ් ප්‍රභේදය පසුගිය සෙනසුරාදා පළමුවරට ප්‍රකාශයට පත් කර ඇතැයිද වැඩිදුරටත් වාර්තා වේ.

නව ප්‍රභේදය හඳුනාගෙන ඇත්තේ මීට පෙර කොවිඩ් ආසාදනයට ලක් වූ ඉන්ෆ්ලුවෙන්සා රෝග ලක්ෂණ සහිත තිරුවෙන්දපුරම් දිස්ත්‍රික්කයේ පදිංචි 79 හැවිරිදි කාන්තාවකගෙන් බවත් එරට මාධ්‍ය සඳහන් කළේය.

මේ වන විට එම ප්‍රාන්තයේ JN.1 කොවිඩ් ප්‍රභේදය ආසාදනය වූ රෝගීන් 1,324 දෙනකු හඳුනාගෙන ඇතැයිද, පසුගිය දින දෙක ඇතුළත කොවිඩ් මරණ දෙකක්ද වාර්තා වී ඇතැයිද ප්‍රාන්ත මාධ්‍ය සඳහන් කර ඇත.

මේ මරණ වාර්තා වීමත් සමඟ කේරළ ප්‍රාන්තයේ පනූර් සහ කන්නූර් දිස්ත්‍රික්ක තුළ කොවිඩ් නීතිරෙගුලාසි පනවා ඇතැයිද වැඩිදුරටත් වාර්තා වේ.

නව කොවිඩ් ප්‍රභේදය මීට මාස කිහිපයකට පෙර අමෙරිකාවෙන් සහ චීනයෙන් හඳුනාගත් ප්‍රභේදයක් බවද වාර්තා වී තිබේ.

"බුද්ධා බෝයි" ලෙස ප්‍රකට 33 හැවිරිදි නේපාල ජාතිකයා, ස්ත්‍රී දූෂණ චෝදනාවට අත්අඩංගුවට ගෙන ඇති බව විදෙස් මාධ්‍ය වාර්තා පවසයි .

ඔහුට එල්ලවී ඇති චෝදනාවේ සඳහන් වන්නේ සිය ආශ්‍රම තුළදීම කාන්තාවන් දූෂණය කර ඔවුන් අතුරුදන් කර ඇති බවය.

Ram Bahadur Bomjon නම් මෙම පුද්ගලයා වසර කිහිපයක් තිස්සේ තමන් බුදුන්ගේ පුනරුප්පත්තිය බවට පවසමින් ධ්‍යාන වඩමින් සිටි බවත් එසේම අනුගාමිකයින් ද දහස් ගණනක් සිටින බවත් විදෙස් මාධ්‍ය වාර්තා වල දැක්වෙයි .

එමෙන්ම ඔහු ආහාර, ජලය හෝ නින්දක් නොමැතිව මාස ගණනාවක් පුරා භාවනායෝගීව සිටිය හැකි අයෙකු ලෙසට ද ප්‍රකට බව විදෙස් මාධ්‍ය වාර්තාවල සඳහන් වෙයි.

ගෙවුණු වසර කිහිපය තුළ වරින් වර ඔහුට මෙවැනි දූෂණ චෝදනා එල්ලවී තිබුණද, ඔහුව අඅත්අඩංගුවට ගැනීමට පොලීසියට නොහැකි වූ බවත් එම මාධ්‍ය වාර්තා වැඩිදුරටත් සඳහන් කර ඇත .

ඉන්දියාවේ ප්‍රාන්ත මැතිවරණයේ ප්‍රාන්ත 4ක ප්‍රතිඵල මේ වනවිට නිකුත් වී ඇති අතර එයින් ප්‍රාන්ත 3ක බලය තවදුරටත් තහවුරු කරගැනීමට අග්‍රාමාත්‍ය නරේන්ද්‍ර මෝදි නායකත්වය දරන භාරතීය ජනතා පක්ෂය සමත්ව ඇති බව විදෙස් මාධ්‍ය වාර්තා පවසයි .

ඒ අනුව මධ්‍ය ප්‍රදේශ්, රාජස්ථාන් සහ චතිස්ගාර් යන ප්‍රාන්ත මෙලෙස ජයග්‍රහණය කිරීමට භාරතීය ජනතා පක්ෂය සමත්ව ඇත.

මේ අතුරින් මධ්‍ය ප්‍රදේශ් සහ චතිස්ගාර් ප්‍රාන්ත ප්‍රසිද්ධව තිබෙන්නේ භාරතීය ජනතා පක්ෂයේ බලකොටු වශයෙන් ය.

එසේම තෙලංගනා ප්‍රාන්තයේ බලයේ සිටියේ භාරත් රාෂ්ට්‍ර සමිති නමැති ප්‍රදේශීය පක්ෂයට එහි බලය අහිමිව ඇති අතර එම ප්‍රාන්තයේ මෙවර ඉන්දීය කොංග්‍රස් පක්ෂයට හිමිව ඇත.

තෙලංගනා ප්‍රාන්තයේ ආසන 119 ක් ඇති අතර එයින් ආසන 63 ක් කොංග්‍රස් පක්ෂය ජයග්‍රහණය කර තිබේ.

මැතිවරණය පැවති ප්‍රාන්ත අතරින් මිසෝරම් හි ඡන්ද ප්‍රතිඵලය හෙට දිනයේ නිකුත් කිරීමට නියමිතව ඇති බවත් විදෙස් මාධ්‍ය වාර්තා වල සඳහන් වෙයි.

එම්මානුවෙල් මැක්‍රොන් නව රජයක් සමඟින් සිය ජනාධිපති ධුරය යළි පණ ගැන්වීමේ අරමුණින් ප්‍රංශයේ මීළඟ අග්‍රාමාත්‍යවරයා ලෙස ගේබ්‍රියෙල් අතාල් නම් කර තිබේ.

34 හැවිරිදි ඔහු නූතන ප්‍රංශ ඉතිහාසයේ ලාබාලතම අග්‍රාමාත්‍යවරයා ය.

1984 දී ප්‍රංශුවා මිටිරන් විසින් සමාජවාදී ලෝහා ෆැබියුස් පත් කරන විට ඔහු 37 හැවිරිදි වියේ පසුවූ අතර ඒ අනුව ඔහුවද අභිබවා යමින් අතාල් එරට ඉතිහාසයේ ලාබලතම අග්‍රාමාත්‍යවරයා බවට පත්විය.

ධූරයෙන් ඉල්ලා අස් වූ එලිසබෙත් බෝර්න් වෙනුවට අතාල් පත් කර තිබේ.

ඇය විසින් මාස 20ක පමණ කාලයක් අගමැති ධුරය දරනු ලැබුවාය.

ඒම කාලය පුරාවටම ඇය පාර්ලිමේන්තුවේ බහුතරය නොමැති වීම හේතුවෙන් අරගලයක නිරත වූවාය.

දැනට අධ්‍යාපන අමාත්‍යවරයා ලෙස කටයුතු කරන ගේබ්‍රියෙල් අතාල් නිසැකව ම ආකර්ෂණීය පත් කිරීමක් වනු ඇත.

ජූනි මාසයේ පැවැත්වෙන වැදගත් යුරෝපීය පාර්ලිමේන්තු මැතිවරණයට ප්‍රංශ රජය මෙහෙයවීමේ කාර්යය ඔහුට දැන් පැවරෙනු ඇත.

BBC සිංහල

ජපානයේ, හචිජෝජිමා දූපතට සුනාමි රළ පහරක් පැමිණ තිබේ.

ඒ, පිලිපීනයේ, මින්දනාඕ ප්‍රදේශයේ ඇති වූ මැග්නිටියුඩ් 7.5 ක ප්‍රබල භූ කම්පනයත් සමගයි. 

සෙන්ටිමීටර 40 ක පමණ උස රළ පහරක් එලෙස ගොඩබිමට පැමිණ ඇති බව විදෙස් මාධ්‍ය වාර්තා සදහන් කරයි.

සුනාමි අනතුරු ඇඟවීම් නිකුත් කිරිමත් සමග එම දූපතේ වෙරළාසන්නව සිටි වැසියන් ආරක්ෂිත ස්ථාන කරා යොමු කිරීමට ජපන් බලධාරින් කටයුතු කර තිබේ.

ඒ හේතුවෙන් කිසිදු ජීවිත හානියක් වී නොමැති බව විදෙස් මාධ්‍ය වාර්තා කරයි.

මුහුදේ යාත්‍රා කරමින් සිටි පිරිස්වලට ද නැවත දැනුම් දෙනතුරු ගැඹුරු මුහුදු කලාපයේම රැදී සිටින්නැයි දන්වා ඇතැයි සඳහන් ය.

පිලිපීනයේ ඇතැම් ජන ශූන්‍ය ප්‍රදේශවලට ද සුනාමි රළ පහර සුළු වශයෙන් පැමිණ ඇතැයි විදෙස් මාධ්‍ය වාර්තා කළේ ය.

මේ වන විට භූ කම්පනයෙන් පැවති සුනාමි අවදානම පහව ගොස් ඇතැයි අමෙරිකානු භූ විද්‍යා සමීක්ෂණ මධ්‍යස්ථානය නිවේදනය කළේ ය.