විදෙස්

නේපාලයේ ප්‍රබල භූ කම්පනයක් සිදු ව තිබේ

වයඹ දිග නේපාලයේ දිස්ත්‍රික් කිහිපයකට බලපෑ ප්‍රබල භූකම්පන තත්ත්වයෙන් මිය ගිය පිරිස තවදුරටත් ඉහළ ගොස් තිබේ.

මේ වන විට පුද්ගලයන් 128 දෙනෙකු පමණ භූ කම්පන තත්ත්වයත් සමඟ සිදු වූ අනතුරුවලින් ජිවිතක්ෂයට පත් ව ඇති බව විදෙස් මාධ්‍යය වාර්තා කර ඇත.

වයඹ දිග නේපාලයේ දිස්ත්‍රික් කිහිපයකට ඊයේ (03) රාත්‍රියේ රිච්ටර් මාපංක ඒකක 6.4ක ප්‍රබලත්වයකින් යුතු භූ කම්පන තත්ත්වය වාර්තා වී තිබිණි.

ඉන්දියාවේ ඊසාන දිග සිකීම් ප්‍රාන්තය වෙත හදිසි ජල ගැලීමක් සිදුව ඇත. සිදුවූ ජලගැලීමෙන් 25,000කට අධික පිරිසක් පීඩාවට පත්ව ඇති බව වාර්තා වන අතර සිදුවූ මරණ ගණන මේ වනවිට 53 දක්වා ඉහළ ගොස් තිබේ.

එමෙන්ම තවත් 140 දෙනෙකු අතුරුදන්ව ඇති අතර 6000 කට අධික පිරිසක් අවතැන්ව ඇති බවත්  විපතට පත්වූ තවත් 10,000කට අධික පිරිසක් මුදා ගැනීමට සහන සේවකයින් සමත්ව ඇති බවත් විදෙස් වාර්තා පෙන්වා දෙයි.

සිකීම් ප්‍රාන්ත රජය පවසන්නේ එම ජල ගැලීම්වලින් නිවාස 1,173කට දරුණු ලෙස හානි සිදුවී ඇති බවය.

සිකීම් ප්‍රාන්තයට හදිසි ජල ගැලීම් තත්ත්වයක් ඇති වූයේ ජලාශයක වාන් දොරටු විවර කිරීමත් සමග ටීස්ටා නදියේ ජල මට්ටම ඉහළ යාම හේතුවෙනි.

සති තුනකට වැඩි කාලයක් ගාසා තීරයේ සිරවී සිටි සිවිල් වැසියන්ට ඊජිප්තුවට පැමිණීමට හැකියාව ලැබුණි.

ඒ, ජනතාවට පිටවීම සඳහා පළමු වතාවට රෆා හරස් මාර්ගය විවෘත වීමත් සමඟිනි.

ඒ සමග 400 කට වැඩි පිරිසක් ගාසා තීරයෙන් පිටව ගිය බව විදෙස් මාධ්‍ය වාර්තා කරයි.

විදේශ ගමන් බලපත්‍ර හිමියන් 335 දෙනෙකු සහ තුවාල ලැබූ ගාසා වැසියන් 76 දෙනෙකුට මේ වනවිට පිටව යාමට හැකි වී ඇති බව පලස්තීන බලධාරීන් පවසයි.

ගාසා භූමියෙන් පිටව ගිය අය අතර බ්‍රිතාන්‍ය සහ එක්සත් ජනපද විදේශ ගමන් බලපත්‍ර හිමියන් ද සිටින බව සදහන් වේ.

මේ අතර, ගාසා තීරයේ සිර වී සිටින ශ්‍රී ලාංකිකයින් 17 දෙනෙකුට රෆා පිවිසුම හරහා ඊජිප්පතුවට ඇතුළු වීමට අවසර ලැබී ඇති බව විදේශ සේවා නියුක්ති කාර්යාංශයේ මාධ්‍ය ප්‍රකාශක ගාමිණි සෙනරත් යාපා පවසයි.

එක්සත් ජනපද ජනාධිපති ජෝ බයිඩ්න් පවසන්නේ හරස් මාර්ගය විවෘත කිරීම “දැඩි සහ හදිසි රාජ්‍ය තාන්ත්‍රිකභාවයේ” ප්‍රතිඵලයක් බවයි.

මේ වනවිට ගාසා හි දුරකථන සහ අන්තර්ජාල සේවා සම්පූර්ණයෙන්ම කපා හැර ඇත.

ඔක්තෝබර් 7 වැනිදා පුද්ගලයන් 239 දෙනෙකු ප්‍රාණ ඇපකරුවන් ලෙස පැහැරගෙන ගොස් පුද්ගලයන් 1,400 ක් ඝාතනය කළ හමාස් ප්‍රහාරයෙන් අනතුරුව, ඊශ්‍රායලය ගාසා තීරයට බෝම්බ හෙලීම ආරම්භ කළේය.

ඊශ්‍රායලයේ ප්‍රතිප්‍රහාර ආරම්භ වූ දා සිට 8,700කට වැඩි පිරිසක් මියගොස් ඇති බව ගාසා තීරයේ හමාස් පාලනය කරන සෞඛ්‍ය අමාත්‍යාංශය පවසයි.

ගාසා තීරයේ හමාස් සටන්කාමීන් විසින් ඊශ්‍රායලයට රොකට් ප්‍රහාර 7,000ක් පමණ එල්ල කර ඇති බව විදෙස් මාධ්‍ය වාර්තා පවසයි.

ඊට ප්‍රතිචාර දක්වමින් ඊශ්‍රායලයේ අග්‍රාමාත්‍ය බෙන්ජමින් නෙතන්‍යාහු යුදමය තත්ත්වයක් නිවේදනය කර ඇති බවත් එම වාර්තා සඳහන් කර සිටියි.

විදෙස් මාධ්‍ය වාර්තා අනුව ඊශ්‍රායල අගමැති බෙන්ජමින් නෙතන්යාහු සඳහන් කර ඇත්තේ , මෙය හමුදා මෙහෙයුමක් නොව යුද්ධයක් බවය.

කෙසේ වුවත් හමාස් සටන්කාමීන් පවසා ඇත්තේ , ඊශ්‍රායලය අල් අස්කා දේවස්ථානයට ප්‍රහාර එල්ල කිරීමට ප්‍රතිචාර වශයෙන් මෙම මෙහෙයුම දියත් කළ බවය.

හමාස් සටන්කාමීන් ඊශ්‍රායලයේ ගුවන්තොටුපොළ සහ හමුදා ස්ථාන ඉලක්ක කර ප්‍රහාර දියත් කර ඇති අතර ඒ සමග මධ්‍යම සහ දකුණු දිග ඊශ්‍රායලයේ ගුවන්තොටුපොළ වසා දමා ඇත.

විදෙස් මාධ්‍ය වාර්තා වැඩිදුරටත් සඳහන් කරන ආකාරයට , විනාඩි 20ක කාලයක් තුළ රොකට් ප්‍රහාර 5,000 ක් පමණ අඛණ්ඩව එල්ල කිරීමෙන් පසු තවත් රොකට් ප්‍රහාර 2,000 ක් පමණ ඊශ්‍රායලයට එල්ලවී තිබේ.

තවද හමාස් සටන්කාමීන් ඊශ්‍රායලයට ඇතුළුව සිවිල් වැසියන්ට වෙඩිතබන අයුරු ද විදෙස් මාධ්‍ය වාර්තා කර ඇත.

එමෙන්ම ඊශ්‍රායල් වැසියන් පිරිසක් හමාස් සටන්කාමීන් භාරයට ගෙන ඇති අතර ඔවුන් ඊශ්‍රායල හමුදා කඳවුරකට ද ඇතුළුව තිබෙන බවත් සඳහන් වෙයි.

හමාස් ප්‍රහාරවලට ප්‍රතිචාර ලෙස ඊශ්‍රායලය ද ගාසා තීරයේ හමාස් සටන්කාමීන් ඉලක්ක කර ප්‍රහාර දියත් කර ඇත.

ඊජිප්තුවේ වාහන කිහිපයක් ගැටීමෙන් සිදු වූ අනතුරකින් පුද්ගලයන් 32 දෙනෙකු මියගොස් තවත් 63 දෙනෙකු තුවාල ලබා ඇති බව එරට සෞඛ්‍ය අමාත්‍යාංශය පවසයි.

මගී බස් රථයක් සහ අනෙකුත් වාහන සම්බන්ධ වන කයිරෝ සහ ඇලෙක්සැන්ඩ්‍රියාව සම්බන්ධ කරන බෙහෙයිරා ප්‍රදේශයේ අධිවේගී මාර්ගයක අද උදෑසන මෙම අනතුර සිදුව ඇත.

එක් මෝටර් රථයකින් තෙල් කාන්දු වීම නිසා වාහන කිහිපයක් ගිනිගෙන ඇති බව පොලිස් ආරංචි මාර්ග උපුටා දක්වමින් රජයේ අල්-අහ්රම් පුවත්පත වාර්තා කරයි.

මියගිය අයගෙන් බොහෝ දෙනෙක් පිළිස්සී මිය ගිය බව එහි සඳහන් වේ. තුවාලකරුවන් රෝහලට මාරු කිරීම සඳහා ගිලන්රථ 20ක් පමණ එම ස්ථානයට පැමිණ තිබේ.

ඊජිප්තුවේ රථවාහන අනතුරු බහුලව දක්නට ලැබේ. මාර්ග බොහෝ විට දුර්වල තත්ත්වයේ පවතින අතර අධිවේගී මාර්ග කේත අනුගමනය නොකිරීම ඒවාට ප්‍රධාන හේතුවකි.

පාකිස්තානයේ සිදු වූ පිපිරීමෙන් මේ වන විට පුද්ගලයන් 50 දෙනෙකු පමණ ජීවිතක්ෂයට පත් ව ඇති බව වාර්තා වේ.

නබි නායකතුමා ගේ උපන්දිනය සැමරීම උදෙසා පැවති ආගමික උත්සවයක් අතරතුර දී මෙම පිපිරීම සිදු ව ඇති බව බීබීසී පුවත් සේවය වාර්තා කර ඇත.

මෙය මරාගෙන මැරෙන ප්‍රහාරයක් බවට එරට පොලීසිය සැක පහළ කරයි.

මේ වන විට එරට හදිසි තත්ත්වයක් ද නිවේදනය කර ඇති බව වාර්තා වේ.

මේ වන විට තුවාලකරුවන් එරට රෝහල් දෙකක් වෙත ප්‍රවාහනය කරමින් පවතින බව ද සඳහන්ය.

ප්‍රහාරයේ වගකීම තවමත් කිසිදු පාර්ශ්වයක් විසින් භාරගෙන නොමැති බව ද වාර්තා වේ.

බංග්ලාදේශයේ දුම්රිය අනතුරක් හේතුවෙන් මගීන් 17 දෙනෙකුට ජිවිත අහිමි වී ඇති බව විදෙස් මාධ්‍ය වාර්තා කරයි.

භාණ්ඩ ප්‍රවාහන දුම්රියක් හා මගී ප්‍රවාහන දුම්රිය එකිනෙක ගැටී මෙම අනතුර සිදු වී තිබෙයි

අනතුරෙන් තවත් විශාල පිරිසක් තුවාල ලබා රෝහල්ගත කර ඇති බව බලධාරීන් සදහන් කරනවා.

භාණ්ඩ ප්‍රවාහන දුම්රිය ඉදිරියෙන් ගමන් කරමින් තිබු මගී ප්‍රවාහන දුම්රියේ පිටුපස මැදිරියේ ගැටී ඇති බවයි දුම්රිය බලධාරීන් සදහන් කරයි

දුම්රිය මාර්ග සංඥාවල දෝෂයක් හේතුවෙන් අනතුර සිදුව ඇති බව වැඩිදුර ආරංචි මාර්ග සඳහන් කරයි.

උතුරු අප්‍රිකානු රාජ්‍යයක් වන මොරොක්කෝ රාජ්‍යයට බලපෑ ප්‍රබල භු කම්පනයෙන් මේ වනවිට පුද්ගලයින් 632ක් පමණ මියගොස් තිබේ.

එහි ප්‍රබලත්වය සටහන් වුණේ, මැග්නිටියුඩ් ඒකක 6.8 ක් ලෙසයි.

ඉන් වැඩි හානියක් සිදුවී ඇත්තේ එරට සිව්වන විශාලතම නගරය වන මරකේෂ් නගරයටය.

එමෙන්ම යුනෙස්කෝ ලෝක උරුම නගරයක් ලෙසද නම් කර ඇති මරකේෂ් හි පැරණි නගරයට ද ඉන් හානි සිදුවී තිබේ.

භූ කම්පනයේ සුන්බුන්වලින් මාර්ග අවහිරවීම හේතුවෙන් සහන සේවකයින්ට බලපෑමට ලක්වූ ප්‍රදේශවලට ළඟාවීමට අපහසුවී ඇති බව විදෙස් මාධ්‍ය වාර්තා කරයි.
මෙය 2004 වසරෙන් පසු මොරොක්කෝවට බලපෑ ප්‍රබලතම භු කම්පනය බව සඳහන් වෙයි.

එමෙන්ම මෙය වසර 120කින් පසු උතුරු අප්‍රිකානු කලාපයෙන් වාර්තා වූ ප්‍රබලතම භූ කම්පනය වීමද විශේෂත්වයකි.

ඊශ්‍රායලය සහ හමාස් සංවිධානය අතර ගාසා තීරය ආශ්‍රිතව දරුණු යුද ගැටුම් පවතින පසුබිමේ ඇමෙරිකන් ජනාධිපති ජෝ බයිඩන් ඊශ්‍රායලයට පැමිණි බව විදෙස් මාධ්‍ය වාර්තා පවසයි.

එම වාර්තා අනුව ඇමරිකානු ජනාධිපති බයිඩන් පිලිගැනීමට ටෙල් අවීව් නුවර බෙන් ගුරියොන් ගුවන්තොටුපොළට ඊශ්‍රායල අග්‍රාමාත්‍ය බෙන්ජමින් නෙදන්යාහු පැමිණ ඇත.

ඊශ්‍රායල අග්‍රාමාත්‍යවරයා, ඇමෙරිකන් ජනාධිපතිවරයා පිළිගත්තේ ඔහු උණුසුම් ලෙස වැලඳ ගනිමින් බවත් එම මාධ්‍ය වාර්තා වල දැක්වෙයි.

ඇමෙරිකන් ජනාධිපති බයිඩන්, ඊශ්‍රායලය බලා පැමිණියේ හමාස් සටන්කාමීන් සමඟ යුද්ධයකට පැටලී සිටින ඊශ්‍රායලයට ඇමෙරිකාවේ සහාය නොඅඩුව හිමිවන බව පෙන්වමින් බවද විදෙස් මාධ්‍ය වැඩිදුරටත් වාර්තා කර ඇත.

චීන රජයේ නිලධාරීන්ට අමෙරිකානු ඇපල් දුරකථන භාවිතය අත්හරින ලෙස නියෝගයක් නිකුත්කර ඇති බව විදෙස් මාධ්‍ය වාර්තා පවසයි .

මෙම නියෝගය සමග ඇපල් සමාගමේ කොටස් මිල 3%කින් පමණ පහත වැටී ඇති බවත් එම මාධ්‍ය වාර්තා සඳහන් කරයි.

පසුගිය නොවැම්බරයෙන් පසු ඇපල් සමාගමේ කොටස් මිල විශාලතම පහත වැටීම මෙසේ සිදුව ඇති බවත් එහි සඳහන් වෙයි.

මේ සම්බන්ධයෙන් අදහස් දක්වමින් අමෙරිකානු ආර්ථික විශේලේෂකයන් පෙන්වාදී ඇත්තේ චීනය සමඟ හොඳ සබඳතාවක් පවත්වාගෙන යන ඇපල් සමාගමට ද එවැනි තත්ත්වයකට මුහුණපෑමට සිදුවීම බරපතළ තත්ත්වයක් ලෙස ය.

ඇපල් මව් සමාගමේ කොටස් පමණක් නොව චීනය හා සම්බන්ධ ඇපල් සමාගමේ සැපයුම් ජාලයේ සමාගම්වල කොටස් ද මෙලෙස පහත වැටී ඇත.

එවැනි සමාගමක් වන කුවල්කොම් (QUALCOMM) කොටස් මිල 7.2%කින් පහත වැටී තිබේ.

ඇපල් ජංගම දුරකථවලට චීනය තීරණාත්මක වෙළෙඳපොළක් වන අතර, ඇපල් නිෂ්පාදන කේන්ද්‍රය ද වන චීනය, එහි දුරකථන අලෙවි ආදායමෙන් පහෙන් එකකට දායක වේ.

ඇපල් දුරකථවලට පැනවුණු තහංචි නිසා අනෙකුත් සමාගම් සිය ස්මාට් ජංගම දුරකථන චීන වෙළෙඳපොළට වැඩි වශයෙන් ඉදිරිපත් කිරීමට පෙළඹී ඇති බව සඳහන්ය.

කෙසේ නමුත් ඉදිරි සතියේ සිය 'අයිෆෝන් 15' (I PHONE 15) සහ නව ස්මාට් වොච් පෙළ එළිදැක්වීමත් සමඟ දුරකථනවල අලෙවි වර්ධනයක් ඇපල් සමාගම අපේක්ෂා කරන බව වාර්තා වේ.

උතුරු ගාසා තීරයෙන් පුද්ගලයින් 500,000 ක් පිටව ගොස් ඇති බව ඊශ්‍රායල ආරක්ෂක හමුදාවේ (IDF) ජාත්‍යන්තර ප්‍රකාශක ලුතිනන් කර්නල් ජොනතන් කොන්රිකස් සඳහන් කරයි.

එමෙන්ම දකුණට යාමට උත්සාහ කරන අයට හමාස් සංවිධානය විසින් අපහසුතා ඇති කරන බවට ඔහු චෝදනා කර ඇත.

ඊශ්‍රායල ආරක්ෂක හමුදාව විසින් ආරක්ෂිත ඉවත් කිරීමේ මාර්ග දෙකක් පවත්වාගෙන යන අතර, මිලිටරි මෙහෙයුම ඉදිරියට යාමේදී ,සිවිල් වැසියන් ගාසා නගරයේ රැඳී සිටීම අනාරක්ෂිත වනු ඇති බව විදෙස් මාධ්‍ය වාර්තා කර තිබේ.

ඊශ්‍රායල හමුදාව විසින් ආරක්ෂිත යැයි හඳුනාගත් මාර්ගයක ගමන් කරමින් සිටි පුද්ගලයන් ඉලක්ක කරගත් බෝම්බ ප්‍රහාරය ගැන ලුතිනන් කර්නල් කොන්රික්ස් සඳහන් කර තිබෙන්නේ ඔවුන් සක්‍රීයව සිවිල් වැසියන් ඉලක්ක නොකරන බවයි.

දකුණු බ්‍රසීලය හරහා හමා ගිය දරුණු කුණාටුවකින් නගර ගණනාවකට ගංවතුර තත්ත්වයක් උද්ගත වී ඇතැයි විදෙස් මාධ්‍ය වාර්තා කළේය.

මේ හදිසි දේශගුණික විපර්යාසය හේතුවෙන් ඇති වූ ගංවතුරට හසු වී පුද්ගලයන් 31 දෙනකු ජීවිතක්ෂයට පත් වී ඇතැයි ද විදෙස් මාධ්‍ය වැඩිදුරටත් වාර්තා කළේය.

දකුණු බ්‍රසීලයේ බොහෝ නිවාස ගංවතුරෙන් යට වී ඇති අතර, ආපදා කළමනාකරණ ඒකකයේ නිලධාරීන් අවතැන් වූ පුද්ගලයන් සොයා මෙහෙයුමක් ද ක්‍රියාත්මක කර තිබේ.

එරට සමාජ සංවර්ධන අමාත්‍යාංශය (MDS) සඳහන් කරන්නේ දකුණු ප්‍රාන්ත දෙකේ අවම වශයෙන් මහ නගර සභා 50 කටවත් බලපෑම් එල්ල වී ඇති අතර Rio Grande do Sul හි Muçum නගරයෙන් 80% ක් පමණ ජලයෙන් යට වී ඇති බවයි.

එමෙන්ම ප්‍රාදේශීය සිවිල් ආරක්ෂක සේවය විසින් ජැකුයි ගඟ සහ ජැකුයි ඩෙල්ටා අවට ගංවතුර අනතුරු ඇඟවීමක්ද නිකුත් කර ඇති බව වාර්තා වෙයි.

දින කිහිපයක් තුළ ඇෆ්ගනිස්තානයේ සිදුවූ තුන්වැනි භූකම්පනයත් වාර්තා වී තිබේ.

ඒ බටහිර ඇෆ්ගනිස්තානයේ හේරට් පළාතෙනි.

එහි ප්‍රබලත්වය රික්ටර් මාපකයේ 6.3ක් ලෙස සටහන්ව තිබුණි.

මීට පෙර ඇති වූ භූකම්පන දෙක හේතුවෙන් 1000කට වැඩි පිරිසක් මියගොස් ඇති අතර ඉන් බහුතරය ළමුන් සහ කාන්තාවන් ය.

පකිස්ථානයේ හිටපු අග්‍රාමාත්‍ය ඉම්රාන් ඛාන්ට එරෙහිව පනවා තිබූ වසර තුනක සිර දඬුවම අත්හිටුවීමට එරට අධිකරණයක් තීන්දු කර තිබේ.

ඉස්ලාමාබාද් මහාධිකරණයේ ද්විපුද්ගල විනිසුරු මඩුල්ලක් මෙම නියෝගය නිකුත් කළේ ය.

අද පැවති නඩු විභාගයේදී විනිසුරුවරුන් නියෝග කළේ, ඉම්රාන් ඛාන් ඇප මත මුදා හරින ලෙස ය.

රජයට ලැබුණු ත්‍යාග අනිසි ලෙස භාවිත කළ බවට චෝදනා කරමින් ඔහුට එරෙහිව නඩු පවරා තිබිණි.

ගාසා තීරයට ඊශ්‍රායලය විසින් එල්ල කරන ලද ගුවන් ප්‍රහාර හේතුවෙවන් ළමයින් 614 දෙනකු, කාන්තාවන් 370ක් ඇතුළු පුද්ගලයන් 1,900ක් පමණ මියගොස් ඇතැයි විදෙස් මාධ්‍ය වාර්තා කරයි.

තුවාල ලැබූ පුද්ගලයන් සංඛ්‍යාව මේ වනවිට 7,500 ඉක්මවා ඇත.

ඊශ්‍රායල් බලධාරීන් පවසන්නේ හමාස් සංවිධානය විසින් ඊශ්‍රායලයේ දී ප්‍රාණ ඇපකරුවන් ලෙස අල්ලාගෙන සිටි පුද්ගලයන් පිරිසකගේ මළ සිරුරු කොටස් හමුවූ බවයි.

පුද්ගලයින් 10 දෙනෙකු මරණයට පත් කරමින් රුසියාවේදී කඩා වැටුණු ජෙට් යානයේ සිටි ගුවන් මගීන්ගේ ලැයිස්තුවේ වාග්නර් කුලී හේවා බළකායේ ප්‍රධානී යෙව්ජීනි ප්‍රිගෝෂින්ගේ නම ද වන බව රුසියාවේ සිවිල් ගුවන් සේවා අධිකාරිය පවසයි.

ඊට පෙර, වාග්නර් බළකායට සම්බන්ධ ටෙලිග්‍රෑම් නාළිකාවක් වන ග්‍රේ සෝන් වාර්තා කළේ, 62 හැවිරිදි ප්‍රිගෝෂින්ට අයත් පෞද්ගලික ගුවන් යානයක් ගුවන් ආරක්ෂක පද්ධතිය මගින් වෙඩි තබා බිම හෙළූ බව ය.

ග්‍රේ සෝන් බදාදා සවස් කාලයේ පළ කර තිබුණේ, "රුසියාවේ ද්‍රෝහීන්ගේ ක්‍රියාකාරකම්වල ප්‍රතිඵලයක් ලෙස" ප්‍රිගෝෂින් ජීවිතක්ෂයට පත්වූ බව ය.

ප්‍රිගොෂින් රුසියානු සන්නද්ධ හමුදාවන්ට එරෙහිව ජූනි මාසයේදී අසාර්ථක කැරැල්ලක් මෙහෙයවීය.

මෙම ගුවන් යානා අනතුර සිදුවූයේ, රුසියාවේ ජ්‍යෙෂ්ඨ ජෙනරල්වරයෙකු වන සර්ගායි සුරොවිකින්, ගුවන් හමුදා ප්‍රධානී ධූරයෙන් ඉවත් කළ බවට වාර්තා වූ දිනයේදී ම ය.

ජෙනරල් සුරොවිකින් ප්‍රිගෝෂින් සමග දැඩි සබඳතාවක් පැවැත්වූ බවට සැලකෙන අතර කැරැල්ලෙන් පසු ප්‍රසිද්ධියේ පෙනී සිටියේ නැත.

අදාළ ගුවන් යානය මගීන් 7 දෙනෙකු සහ කාර්ය මණ්ඩලයේ තිදෙනෙකු සමග මොස්කව් සිට ශාන්ත පීටර්ස්බර්ග් වෙත පියාසර කරමින් තිබිණි.

එය මොස්කව් සහ ශාන්ත පීටර්ස්බර්ග් අතරමැද පිහිටි කුසෙන්කිනෝ නමැති ගම්මානයකට කඩා වැටුණු බව පැවසේ.

ග්‍රේ සෝන් නාළිකාව පැවසුවේ, ගුවන් යානය අනතුරට ලක්වීමට පෙර පිපිරීම් ශබ්ද දෙකක් ගම් වැසියන්ට ඇසී ඇති අතර, දුම් සලකුණු දෙකක් ද දැක ඇති බව ය.

Tass ප්‍රවෘත්ති ඒජන්සිය පැවසුවේ, ප්‍රිගෝෂින්ට අයත් Embraer Legacy යානය බිම ඇද වැටුණු අවස්ථාවේ ගිනිගෙන ඇති බව ය.

ගුවන් යානය පැය භාගයකට අඩු කාලයක් ගුවනේ රැඳී තිබුණු බව එම පුවත් ඒජන්සිය වැඩිදුරටත් පවසා තිබිණි.

ගුවන් බලධාරීන් පැවසුවේ,වාග්නර් බළකායේ ජ්‍යෙෂ්ඨ අණදෙන නිලධාරී දිමිත්‍රි උට්කින් ද මගී ලැයිස්තුවේ සිටි බව ය.

ගුවන් අනතුර සම්බන්ධයෙන් විමර්ශනයක් ආරම්භ කර ඇති අතර, හදිසි සේවා කණ්ඩායම් අනතුර සිදුවූ ස්ථානයේ සෝදිසි මෙහෙයුම්වල නිරත වේ.

තවත් පුවත් ඒජන්සියක් වන Ria පැවසුවේ, මළ සිරුරු අටක් සොයාගෙන ඇති බව ය.

ප්‍රිගෝෂින්ට අයත්ව තිබූ දෙවන ව්‍යාපාරික ජෙට් යානයක් මොස්කව්හි ආරක්ෂිතව ගොඩ බැස්සවූ බව ග්‍රේ සෝන් වාර්තා කළේ ය.

කුලී හේවායන්ගේ ප්‍රධානියා 2014 වසරේදී වාග්නර් බළකාය ආරම්භ කළ අතර, මේ වන විට එහි හේවායන් 25,000ක් පමණ සිටිති.

මෙම සමූහය යුක්‍රේනය, සිරියාව සහ බටහිර අප්‍රිකාව යන රටවල ක්‍රියාත්මක ය. එමෙන් ම කෲරත්වයට නම් දරා සිටී.

ප්‍රිගෝෂින් ජූනි 23 සහ 24 දිනවල කැරැල්ලකට නායකත්වය දුන් අතර, යුක්‍රේනයෙන් තම හමුදා ගෙන යමින්, දකුණු දිග රුසියානු නගරයක් වන රොස්ටොව් ප්‍රදේශයේ බලය අත්පත් කර ගනිමින්, මොස්කව් වෙත ගමන් කරන බවට තර්ජනය කළේ ය.

යුක්රේන ගැටුම සම්බන්ධයෙන් රුසියානු හමුදාපතිවරුන් සමග මාස ගණනාවක් තිස්සේ පැවති මත ගැටුම්වලින් පසුව මෙම පියවර ගෙන තිබිණි.

බෙලරුස් වෙත යාමට හෝ රුසියානු හමුදාවට බැඳීමට වාග්නර් භටයින්ට ඉඩ සැලසීමට එකඟත්වය පළ කෙරුණු ගනුදෙනුවකින් පසු එම ගැටුම සමථයකට පත් විය.

ප්‍රිගෝෂින් බෙලරුස්හි පදිංචියට යාමට එකඟ වුව ද, පැහැදිලිව ම ප්‍රසිද්ධියේ පෙනී සිටිමින් සහ අප්‍රිකාවේදී ගනු ලැබූ බව කියන ඔහුගේ වීඩියෝවක් නිකුත් කරමින් නිදහසේ ගමන් කිරීමට ඔහුට හැකි බව පෙන්වා තිබිණි.

කෙසේ වෙතත්, රුසියාව පිළිබඳ අවධානයෙන් සිටින්නන් කිහිප දෙනෙකු ඔහු සම්බන්ධයෙන් අදහස් පළ කළේ, කැරැල්ලෙන් පසු "ඇවිදින මළ මිනියක්" යනුවෙනි.

රුසියාවේ ආරක්ෂක සංස්ථාපිතයට ඔහු කළ අභියෝගයට ජනාධිපති පුටින්ගේ ආරම්භක ප්‍රතිචාරය ජූනි 24 වන දින වීඩියෝ පණිවිඩයක් මගින් ඉදිරිපත් කෙරුණු අතර, ඔහු එය හැඳින්වූයේ, පාවාදීමක් සහ පිටුපසට පිහියකින් ඇනීමක් ලෙස ය.

ඔවුන් අතර ඇති කර ගත් ගිවිසුම මගින් ඔහු ආරක්ෂිත බවක් අර්ථ ගැන්වුණේ නැත.

ඇමෙරිකානු බුද්ධි ඒජන්සියේ අධ්‍යක්ෂ විලියම් බර්න්ස් අදහස් දක්වමින් පෙන්වා දුන්නේ, "පළිගැනීම යනු පුටින් සීතලට පිරිනැමීමට කැමති කෑමක් වන අතර එය එම බලපෑම ප්‍රකාශ කරන වචන ලෙස අර්ථ දැක්විය හැකි," බව ය.

මේ කිසිවක්, ඇත්ත වශයෙන් ම, ප්‍රිගෝෂින් සහ ඔහුගේ සමීපතමයින් හිතාමතා ම ඉලක්ක කරගත් බවට සාක්ෂි නොවේ.

එහෙත්, පැවති වාතාවරණය අනුව ඔහුගේ වියෝව හදිසි අනතුරකින් සිදු වූවක් බවට කරන ඕනෑ ම ප්‍රකාශයකින් බොහෝ දෙනකුගේ ඇහිබැම ඉහළ යනු ඇත.
ඇමෙරිකානු ජනාධිපති ජෝ බයිඩන් පැවසුවේ, ප්‍රිගොෂින්ගේ අනුමාන කෙරෙන මරණය පිළිබඳ පුවත ගැන තමා "පුදුමයට පත් නොවන" බව ය.

(ෆ්‍රෑන්ක් ගාර්ඩ්නර්, ආරක්ෂක වාර්තාකරු සහ රොබර්ට් ග්‍රීන්හෝල්)

BBC සිංහල සේවය

ඇෆ්ගනිස්තානයේ ඇති වූ ප්‍රබල භූකම්පනයක් හේතුවෙන් පුද්ගලයින් 2,000කට වැඩි පිරිසක් මියගොස් ඇතැයි ඇෆ්ගනිස්තාන බලධාරීන් වාර්තා කර තිබේ.

ඉන් වැඩිම හානිය සිදුව ඇති හෙරාත් නගරය තුළ තවදුරටත් මෙහෙයුම් ක්‍රියාත්මකයි.

බටහිර ඇෆ්ගනිස්තානයට රික්ටර් මාපකයේ ඒකක 6.3 ක ප්‍රබලත්වයෙන් යුතු භූකම්පනයක බලපෑම් එල්ල වුණි.

ඉන් නිවාස ඇතුළු ගොඩනැගිලි රැසක් විනාශ වී ඇති අතර දශක දෙකකට පසුව ඇෆ්ගනිස්තානයේ ඇති වූ ප්‍රබලම භූකම්පනය මෙය බව ද වාර්තා වේ.

සුන්බුන් අතර විශාල පිරිසක් මේ වනවිටත් සිරවී සිටින බව ඇෆ්ගන් මාධ්‍ය වාර්තා කරයි.

ඒ හේතුවෙන් මරණ ගණන තවදුරටත් ඉහළ යා හැකි බව වාර්තා වේ.

කලාපය තුළ මේ වනවිට මුදාගැනීමේ මෙහෙයුම් ක්‍රියාත්මක වුවත් රට තුළ සන්නිවේදන කටයුතු සියල්ල අඩපණ වී ඇති අතර මහාමාර්ග ද අවහිර වී ඇති බව විදෙස් මාධ්‍ය වාර්තා කරයි.

එක්සත් ජනපද භූ විද්‍යා සමීක්ෂණ ආයතනය නිවේදනය කර ඇත්තේ, භූමිකම්පාවේ අපිකේන්ද්‍රය හෙරාත් නගරයට කිලෝමීටර 40ක් පමණ වයඹ දෙසින් පැවති බවය.

ඔවුන් වැඩිදුරටත් සඳහන් කර ඇත්තේ එම ප්‍රදේශය ආශ්‍රිතව තවත් පසු කම්පන දෙකක් ඇති වූ බවය.

ඊසානදිග ඉන්දියාවේ ඉදිවෙමින් පවතින පාලමක් කඩා වැටීමෙන් කම්කරුවන් 26කට වඩා මිය ගොස් ඇති බව විදෙස් මාධ්‍ය වාර්තා කරයි.

ඉන්දියාවේ ඊසානදිග මිසෝරාම් ප්‍රාන්තයේ Sairang නගරයේ මෙම පාලම කඩා වැටීමෙන් තවත් කිහිප දෙනෙකු තුවාල ලබා ඇත. සිද්ධිය වන විට කම්කරුවන් 35-40ක් පමණ එම ස්ථානයේ සිට ඇති බව සදහන් ය.

බ්‍රික්ස් ආර්ථික සමුළුව සඳහා දකුණු අප්‍රිකාවට ගොස් සිටින අග්‍රාමාත්‍ය නරේන්ද්‍ර මෝදි ද මෙම සිදුවීමෙන් මියගිය අය වෙනුවෙන් සිය ශෝකය පළ කර තිබේ.

මේ අතර මියගිය අයගේ සමීපතම ඥාතීන්ට ඩොලර් 2,500 කට ආසන්න මුදලක් සහ තුවාල ලැබූ කම්කරුවන්ට ඩොලර් 600 ක මුදලක් ලබා දී ඇති බව විදෙස් මාධ්‍ය වාර්තා කරයි.

විදෙස් මාධ්‍ය පෙන්වා දෙන්නේ මෙවැනි පාලම් අනතුරු ඉන්දියාවට නුහුරු සිද්ධියක් නොවන බවයි.

පසුගිය වසරේ ඔක්තෝම්බර් මාසයේදී බටහිර ගුජරාට් ප්‍රාන්තයේ මෝර්බි හි යටත් විජිත යුගයේ ඉදිකළ එල්ලෙන පාලමක් කඩා වැටී 135 දෙනෙකු මිය ගියේය. ජුනි මාසයේදී රටේ දුප්පත්ම ප්‍රාන්තය වන බිහාර් හි ඉදිකරමින් සිටි එල්ලෙන පාලමක් කඩා වැටී එක් පුද්ගලයෙකු මිය ගියේය.