පුවත්

මුළු රටම හරි මඟට” ගෙනයාම සඳහා වූ යෝජනා ඇතුලත් 'ජාතික ප්‍රකාශනයක්' එළිදැක්වීම අද (මාර්තු 02) අති උත්කර්ෂවත් අන්දමින් සංවිධානය කර ඇති අතර ඉන් අනතුරුව 'නායකත්ව මණ්ඩලයක්' හරහා එම වැඩපිළිවෙල සමාජගත කිරීමට ආණ්ඩුවේ හවුල්කාර පක්ෂවල නායකයින් තීන්දුකර තිබේ.

ආණ්ඩුව නියෝජනය කරන ශ්‍රී ලංකා නිදහස් පක්ෂය, ජාතික නිදහස් පෙරමුණ, ප්‍රජාතන්ත්‍රවාදී වාමාංශික පෙරමුණ, ලංකා සම සමාජ පක්ෂය, ශ්‍රී ලංකාවේ කොමියුනිස්ට් පක්ෂය, ජාතික කොංග්‍රසය, පිවිතුරු හෙළ උරුමය, ශ්‍රී ලංකා මහජන පක්ෂය, විජය ධරණී ජාතික සභාව, එක්සත් මහජන පක්ෂය, යුතුකම ජාතික සංවිධානය යන දේශපාලන පක්ෂ 11 විසින් සකසන ලද “මුළු රටම හරි මඟට” ජාතික ප්‍රකාශනය එළිදැක්වීම අද සවස 3:00ට ශ්‍රී ජයවර්ධනපුර කෝට්ටේ, මොනාක් ඉම්පීරියල් ශාලාවේ දී සිදුවිය.

බැසිල් පිලෙන් ගම්මන්පිලට ප්‍රහාරයක් !

කෙසේ වුවත් මේ වන විට මුදල් අමාත්‍ය බැසිල් රාජපක්ෂ ගේ භක්තිමතුන් ලෙස සැලකෙන ශ්‍රී ලංකා පුවත්පත් මණ්ඩල යේ සභාපති මහින්ද පතිරණ ඇතුළු පිරිසක් ආණ්ඩුවේ අනෙකුත් පක්ෂ 11 නියෝජිතයන් ඉලක්ක කර දැඩි ප්‍රහාරයක් සමාජ මාධ්‍ය හරහා එල්ල කරමින් ඇත.

ඒ යටතේ බලශක්ති අමාත්‍ය උදය ගම්මන්පිල ඉලක්ක කර පුවත්පත් මණ්ඩල සභාපති මෙවැනි සටහනක් සිය ෆේස්බුක් ගිනුමේ තබා ඇත.

"ඇපල් මිදි ⁣ගෙන්වන්න තියෙන ඩොලර් තෙල් ගෙන්වන්න නැහැ කියන එක ගම්මන්පිලගේ තවත් බොරුවක්. ඔහුට කොන්දක් තියෙනව නම්, පෙන්නල දෙන්න ඕන කවද කුමන තෙල් ඇණවුමට ද ඩොලර් දුන්නෙ නැත්තෙ කියල. ඒක ඔහු කරන්නෙ නැ. කරන්න බැහැ. වරද තියෙන්නෙ තමාගේ බව ගම්මන්පිල දන්නව. තෙල් ඇණවුම් නොකළේ ඔහු. අද අර්බුදය තියෙන්නෙ ඒකයි.

 ඇපල් මිදි ⁣ගෙන්වන එකත් කියන්න ඕන. ඒ කතාවෙනුත් තේරෙන්නෙ ගම්මන්පිලගෙ ළදරුකම. ඔහු දන්නෙ නැ අපි කිසියම් රටකින් භාණ්ඩ ගත්තොත් විතරයි අපටත් භාණ්ඩ යවන්න පුළුවන් කියල. අපි අද යුරෝපයට භාණ්ඩ යවනව නම්, අපි යුරෝපයෙනුත් කිසියම් භාණ්ඩ ප්‍රමාණයක් ආනයනය කරන්න ඕන. ආනයනය කිරීම ලංකාව නොසෑ⁣හෙන්න සීමා කරපු නිසා යුරෝපා රටවල් දැනටමත් ලංකාවට අනතුරු අඟවල තියෙන්නෙ. (කමෙන්ටුව තීරුවේ ඇති සබැඳිය බලන්න) ඒ නිසා යම් භාණ්ඩ ප්‍රමාණයක් අපි ගෙන්වනව. කවුරු හරි හිතනව නම් ලංකාවට අපනයනය විතරක් කරල ආනයන සපුරා නවත්තන්න පුළුවන් කියල ඔහු තමන්ගෙ ඔළුව පරීක්ෂා කරගන්න ඕන."

මෙය අන්තිමට පැමිණ තිබෙන තෙල් නැව්වලට ඩොලර් ගෙවීම පිළිබඳ ප‍්‍රශ්නයක් නොවන බවත් මේ ප‍්‍රශ්නය විසඳීමට අදාළ යෝජනා මාස හයක් පමණ තිස්සේ ශී‍්‍ර ලංකා මහ බැංකුව විසින් රජයට ඉදිරිපත් කර තිබෙන බවත් ශී‍්‍ර ලංකා මහ බැංකුවේ අධිපති අජිත් නිවාඞ් කබ්රල් මහතා පැවසීය.

මහ බැංකුව රජයට ඉදිරිපත් කර තිබෙන එම යෝජනා කි‍්‍රයාත්මක කිරීමෙන් රටට නව විදේශ විනිමය ගලාඒම් ආකර්ෂණය කර ගැනීමට සහ රට තුළ පවතින විදේශ විනිමය සම්පත් ආරක්ෂා කර ගැනීමට හේතු වන බව ද මහ බැංකු අධිපතිවරයා සඳහන් කළේය.

‘‘මේ ප‍්‍රශ්නය තෙල් නැවකට ඩොලර් ගෙවීම ගැන ප‍්‍රශ්නයක් පමණක් නොවෙයි. මේක දිගටම තිබෙන ප‍්‍රශ්නයක්. මේ ප‍්‍රශ්නයට උත්තර හොයන්න ඕන තෙල් නැවකින් නොවෙයි. ඒකට අපි උත්තරයක් හොයා ගන්න ඕන. මේක ගැඹුරු ප‍්‍රශ්නයක්. මේ ප‍්‍රශ්නෙ ගැන අපි මාස හයක් තිස්සේ රජයට දැනුම් දීලා තියෙනවා අවශ්‍ය විසඳුම් ලබා දෙන්න කියලා. ඒ නිසා අන්තිමට එන තෙල් නැව ගැන කතා කිරීමෙන් පලක් නෑ’’ යැයි ද මහබැංකු අධිපතිවරයා සඳහන් කළේය.

මේ අමාරු කාලයේ ඩොලර් අවශ්‍ය නම් ඩොලර් උත්පාදනය වන පරිදි කටයුතු කළ යුතු බවත් ඒ එකක්වත් කරන්නෙ නැතුව ඩොලර් මැවෙන්නේ නැති බවත් මහ බැංකු අධිපතිවරයා අවධාරණය කළේය.

‘‘දැන් මාස හයක ඉඳලා තෙල් මිල වැඩි කරන්න කියලා රජයට කියලා තියෙනවා. තෙල් මිල වැඩි කළොත් අඩු තරමින් තෙල් භාවිතය අඩු වෙනවා. එවිට තෙල්වලට ගෙවන්න ඕන ඩොලර් වියදම අඩු වෙනවා. ඒවා කරන්න ඕන’’ යැයි ද මහබැංකු අධිපතිවරයා කියා සිටියේය.

ලේසියට සියලූ දෙනාම බැංකුවලට ගොස් ඩොලර් ඉල්ලා වැඩ කිරීමට උත්සාහ කළත් එසේ කළ නොහැකි බව ද මහ බැංකු අධිපතිවරයා කීවේය.

අත්‍යවශ්‍ය නොවන ආනයන භාණ්ඩ 700 කට පමණ රජය මගින් ඉහළ තීරුබදු පැනවීම, ඉන්ධන මිල වැඩි කිරීම, විදේශ විනිමය පේ‍්‍රෂණය කිරීම හරහා වාහන ආනයනයට අවසර දීම සහ එම වාහන සඳහා රජයට ගෙවන බදු විශේෂිත විදේශ විනිමය පේ‍්‍රෂණ මගින් ගෙවීම අනිවාර්ය කිරීම, සුර්ය හා සුළං බලක්ති ව්‍යාපෘති කඩිනම් කිරීම, විදේශ විනිමය හරහා නව ඉතුරුම් රට තුළට ආකර්ෂණය කර ගැනීමට නව අර්ථසාධක අරමුදල් යෝජනා ක‍්‍රමයක් ඇති කිරීම හා ඒ සඳහා විශේෂ දිරිගැන්වීම් හඳුන්වාදීම, උපායමාර්ගික වශයෙන් වැදගත් නොවන සහ අඩුවෙන් භාවිතා කරන ලද ඇතැම් රාජ්‍ය වත්කම් මූල්‍යකරණය කිරීම සහ කාර්යාල සඳහා ස්වෙච්ඡා නම්‍යශීලී වැඩ කරන වේලාවල් හඳුන්වාදීම සහ නිවසේ සිට වැඩ කිරීමේ පියවර පිළිබඳ නව යෝජනා ක‍්‍රමයක් හඳුන්වාදීම යන ප‍්‍රධාන යෝජනා හතක් (07) ශී‍්‍ර ලංකා මහ බැංකුව විසින් දැනටමත් රජයට ඉදිරිපත් කරනු ලැබ ඇත.

– දිවයින

කබ්‍රාල් ගුගුරන්නේ බැසිල්ටද ?

මේ සම්බන්ධයෙන් අදහස් දක්වමින් දේශපාලන විචාරකයන් පවසන්නේ මුදල් අමාත්‍ය බැසිල් රාජපක්ෂ ගේ සහ මහ බැංකු අධිපති අජිත් නිවාඩ් කබ්‍රාල්ගේ මූල්‍ය ප්‍රතිපත්ති වල පරස්පරය මේ වැනි ප්‍රකාශයක් සඳහා හේතු විය හැකි බවයි.

ප්‍රධාන වශයෙන් ආණ්ඩුවේ මූල්‍ය හැසිරීම සම්බන්ධයෙන් ප්‍රතිපත්තිමය තීන්දු තීරණ ගන්නේ මුදල් අමාත්‍යවරයා බවත් මහ බැංකු අධිපති ගේ ප්‍රකාශය අනුව ආණ්ඩුවේ මූල්‍ය ප්‍රතිපත්තියේ ඒකමිතියක් නොමැති බව අනාවරණය කරන බවත් දේශපාලන විචාරකයන් වැඩිදුරටත් පවසයි.

තවදුරටත් වැරදි මූල්‍ය ප්‍රතිපත්තිය ක්‍රියාත්මක කළහොත් තත්ත්වය ඉතා බරපතළ වී ඉදිරි දිනවල දී දිනකට පැය අටක් වැනි විශාල විදුලි කප්පාදුවකට යෑමට සිදු විය හැකි බව මහජන උපයෝගීතා කොමිසම සඳහන් කරයි.

එහි සභාපති ජනක රත්නායක පෙන්වා දෙන්නේ ඩොලරයේ රුපියල් අගය කොතරම් ඉහළ ගියද ඩොලර් අර්බුදයට විසඳුම රුපියලේ අගය නිදහසේ තීරණය වීමට ඉඩ හැරීම බවය.

මේ වන විට ඉන්ධන නොමැති වීමෙන් මෙගාවොට් 700 ක් පමණ නිෂ්පාදන ධාරිතාවක් සහිත බලාගාර අක්‍රීය වීම හේතුවෙන් විදුලි කප්පාදුව සිදු කරන බවත් විදුලිය කප්පාදු නොකර සිටීමට රජයට යෝජනා මාලාවක් ඉදිරිපත් කළ එයා ක්‍රියාත්මක නොවන බවත් සභාපතිවරයා පැවසීය.

විදුලි නිෂ්පාදනය සඳහා සතියකට ඉන්ධන ලබාදෙන ලෙස ඉල්ලා සිටියේ දිනෙන් දින විදුලි කප්පාදුව පිළිබඳ කතා නොකර සතියෙන් සතිය තීරණයකට එළඹීමේ අදහසින් බව ද පැවසූ ඔහු මෙම විදුලි කප්පාදුවෙන් රටේ ආර්ථිකයට විශාල හානියක් වන බව ද කියා සිටියේය.

ඊළඟට ගෙදර යන්නේ ජනක ?

පසුගිය දින කිහිපයක් තිස්සේ මහජන උපයෝගීතා කොමිසමේ සභාපති ජනක රත්නායක දිගින් දිගටම ආණ්ඩුවේ මූල්‍ය ප්‍රතිපත්තිය විවේචනය කරන බවක් මේ හරහා පෙන්නුම් කරයි. එසේම ඔහු රජයේ මුදල් සම්බන්ධයෙන් වගකීම් දරන කිහිපදෙනෙකු ට එරෙහිව නීතිමය ක්‍රියාමාර්ග ගන්නා බවත් පවසා තිබිණ.

 මේ සම්බන්ධයෙන් අදහස් දක්වමින් දේශපාලන විචාරකයන් පවසන්නේ ආණ්ඩුවේ ප්‍රතිපත්තිය විවේචනය කිරීම හේතුවෙන් ඔහු සම්බන්ධයෙන් ආණ්ඩුව අභ්‍යන්තරයේ විරෝධයක් මතුව ඇති බවයි.

මන්ද මහජන උපයෝගීතා කොමිසමේ සභාපති ගේ ප්‍රකාශ හරහා ආණ්ඩුවට නිවැරදි මූල්‍ය ප්‍රතිපත්තියක් නොමැති බව තහවුරු කෙරෙන බවත් බොහෝ විට තනතුර පවා අහිමිවන තත්ත්වයක් මතුවිය හැකි බවත් දේශපාලන විචාරකයන් පවසයි.

ඉන්ධන පිරවුම්හල් අසල මහජනතාව පෝලිම්වල රැදී සිටින අවස්ථාවන්වලදී යම් කලහාකාරී සිදුවීම් ඇතිවීම වැළැක්වීම සදහා සුදුසු ආරක්ෂක වැඩපිළිවෙලක් ක්‍රියාත්මකකළ යුතු බවට දිවයිනේ සෑම පොලිස් ස්ථානාධිපතිවරයෙකුට පොලිස්පති සී.ඩී. වික්‍රමරත්න දැනුම් දී තිබේ.

ගොවි අවශ්‍යතා සහ කෘෂි කාර්මාන්තය සඳහා යොදා ගන්නා උපකරණ සඳහා කෑන් හෝ බූලි මඟින් ඉන්ධන ලබාගැනීමට පැමිණෙන ජනතාවට බාධාවකින් තොරව ඉන්ධන ලබාදීම සදහාත් සංචාරක ක්ෂේත්‍රයට අදාල සංචාරකයින් ප්‍රවාහනය කරන රථවාහන සහ ගිලන් රථ, ගිනි නිවීමේ රථ රෝගී ප්‍රවාහන වෙනත් රථවාහන සදහාත් ඉන්ධන ලබාගැනීමේදී ප්‍රමුඛතාවය මත ඉන්ධන ලබාදීම සදහා අවශ්‍ය සුදුසු පියවර ගන්නා ලෙසද පොලිස්පතිවරයා පොලිස් ස්ථානාධිපතිරුවන් දැනුවත් කර ඇත.

ඉන්ධන ලබාගැනීමට ඉන්ධන පිරවුම්හල් අසල පොලිම් පවතින අවස්ථාවන් වලදී එම තදබදයන් අවම වන තුරු පොලිස් නිලධාරීන් යොදවා රථාවාහන පාලනය කිරීමට කටයුතුකරන ලෙසත් පොලිස්පතිවරයා දැනුම් දී තිබේ.

වත්මන් ආණ්ඩුවේ පීඩාකාරී සහ නොහික්මුණු හැසිරීමට එරෙහිව, එක්සත් ජාතික පක්ෂයට අනුබද්ධ , එක්සත් ලක්වනිතා පෙරමුණ පාර්ලිමේන්තු වටරවුමේ විරෝධතා උද්ඝෝෂණයක් සංවිධානය කර ඇත.

වාර්තා වන ආකාරයට මෙම විරෝධතා උද්ඝෝෂණය ජාත්‍යන්තර කාන්තා දිනය යෙදෙන මාර්තු 08 වනදා පැවැත්වීමට නියමිතව තිබේ.

මේ සම්බන්ධයෙන් අදහස් දක්වමින් එක්සත් ලක්වනිතා පෙරමුණේ සභාපතිනී, ශාන්තිනී කෝන්ගහගේ පවසා සිටියේ, දේශපාලන පාට, පක්ෂ භේදයකින් තොරව රාජ්‍ය , පෞද්ගලික අංශයේ සහ නිදහස් වෙළෙඳ කළාප වල සේවය කරන කාන්තාවන් මෙන්ම සියලු කාන්තාවන්ගේ නියෝජනය මේ සඳහා අපේක්ෂා කරන බවයි.

එහිදී අදහස් දක්වමින් ඇය වැඩිදුරටත් මෙසේද සඳහන් කළාය.

" ජාත්‍යන්තර කාන්තා දිනය සමරන්න නෙවෙයි මේ වෙනකොට මෙරට කාන්තාවන්ට සිදුවෙලා තියෙන්නේ. සියල්ල අහිමිකර උදුරා ගත්තට පස්සේ මොනවද සමරන්න තියෙන්නේ ? අපට අද සමරන්න දෙයක් නෑ. අපට මතකයි, පළාත් පාලන ආයතන තුළ 25% ක කාන්තා නියෝජනය සඳහා අවස්ථාව සැලසීම සිදුකළේ, යහපාලන ආණ්ඩුව තුළ , හිටපු අග්‍රාමාත්‍ය රනිල් වික්‍රමසිංහ ගේ මැදිහත්වීම තුළ. නැත්නම් ඒ තරම් ප්‍රතිශතයක කාන්තා නියෝජනයක් කවදාවත් සිදුවෙන්නේ නෑ. මොකද අතිශය බහුතරයක් කාන්තාවන්ට මැතිවරණ සඳහා වියදම් කරන්න මුදල් නෑ. ඒ නිසා තමයි 25% කාන්තා නියෝජනය අනිවාර්යය කළේ. නමුත් අපිට දැනගන්නට තියෙනවා මේ ආණ්ඩුව ඒ 25% කාන්තා නියෝජනයට හරස් කපන්න හදන බව. අපි ආණ්ඩුවේ මේ උත්සාහයට එරෙහිව නැගී සිටිනවා.

ඒ වගේම තමයි මහින්ද රාජපක්ෂ ජනාධිපති සමයේ අහිමිවූ GSP ප්ලස් සහනය යහපාලන ආණ්ඩුව විසින් නැවත ලබාගන්න සමත්වුණා. ඒ සිවිල් සහ මානව හිමිකම් සුරක්ෂිත කරමින් ශිෂ්ට සම්පන්න පාලනයක් පවත්වා ගැනීම හරහා. අද වෙනකොට වත්මන් පාලනය යටතේ නැවතත් GSP ප්ලස් සහනය අහිමිවීමේ බැරෑරුම් තැනකට රට තල්ලු වෙමින් තිබෙනවා.

අනෙක් අතට කෘෂිකර්මාන්තය සඳහා සම්බන්ධව සිටි කාන්තාවන් මේ වන විට බලවත් ආර්ථික පීඩාවකට පත්වෙලා. ඔවුන්ගේ වගාබිම් සඳහා අවශ්‍ය පොහොර නැති කමින්. කාබනික පමණයි කියලා කිසිම වැඩපිළිවෙළක් , දැක්මක් නැතුව මේ පාලකයන් ගත් ක්‍රියාමාර්ග නිසා ඒ කාන්තාවන්ගේ ආදායම් අහිමි වෙලා. අපි මේ කාන්තාවන් කෙරෙහි විශේෂ අවධානයක් යොමුකර තිබෙනවා. ඇත්තටම මේ මතුව ඇති තත්ත්වය තුළ ආහාර හිඟයක් පවා ඇතිවීමේ අවධානම තිබෙනවා. එයිනුත් පීඩාවට පත්වෙන්නේ කාන්තාවන්.

ඔබලාට මතක ඇති , මේ ආණ්ඩුව බලය ගැනීමට පෙර ගමක් ගමක් ගානේ ගිහින් කිව්වා , ක්ශුද්‍ර මූල්‍ය ණය ඉවත් කරනවා කියලා. ක්ශුද්‍ර මූල්‍ය ණය නිසා ග්‍රාමීය කාන්තාවන් රැසක් බරපතළ පීඩාවකට මුහුණදී හිටියේ. දැන් මොකද වෙලා තියෙන්නේ. ආණ්ඩුව ක්ශුද්‍ර මූල්‍ය ණය ඉවත් කරලද ? නෑ. ඒක මේ ආණ්ඩුවේ ජන්ද ගුණ්ඩුවක් විතරක් වෙලා.

ජීවන වියදම අහස උසට යමින් තිබෙනවා. ගෘහනියට බත් මුට්ටිය කළමනාකරණය කරගන්නට බැරි තත්ත්වයක් ඇවිත්. මේ ගැන ආණ්ඩුව තඹ දොයිතුවක තැකීමක් නෑ.

මේ ආණ්ඩුව බලයට ඇවිත් ටික කාලයකින් සිදුවූ මහර බන්ධනාගාරයේ ඝාතනය හැමෝටම මතක ඇති. දැන් ඒ සිරකරුවන් ඝාතනය වෙලා ඉවරයි. නමුත් මේ වෙනකොට ඔවුන්ගේ දරු පවුල් රැකෙන්නේ කොහොමද ? ආණ්ඩුව ඔවුන් වෙනුවෙන් අඩුම ගානේ වන්දියක් දුන්නද ?

ඒ විතරක් නෙවෙයි. ගෘහනියන්ට ආරක්ෂිතම ස්ථානය ලෙස සැලකෙන්නේ මුළුතැන්ගෙය. නමුත් මේ ආණ්ඩුව ඉතාම අපරික්ෂාකාරී ලෙස ගෑස් සංයුතිය වෙනස් කරලා මුළුතැන්ගෙය ගෘහනියන්ට තියන අනාරක්ෂිතම තැන බවට පත්කළා.
කී දෙනෙක් ගෑස් සිලිණ්ඩර පුපුරලා මිය ගියාද ? ජීවිත 13ක් වගේ නැතිවුණා. ගෑස් අනතුරු 1000ක් පමණ සිදුවුණා. ඒ තුළ අසරණ වූ දරුවන් කාන්තාවන් , වින්දිතයන්ට ආණ්ඩුව සැලකුවද ?

මෙන්න මේ පීඩාකාරී , නොහික්මුණු , අපකීර්තිමත් ආණ්ඩුවේ වැඩපිළිවෙළට එරෙහිව තමයි එක්සත් ලක්වනිතා පෙරමුණ තීරණය කළේ, මෙවර ජාත්‍යන්තර කාන්තා දිනය අපි සමරන්නේ නෑ. සමස්ථ කාන්තා ප්‍රජාව වඩාත් දුෂ්කර ජීවන තත්ත්වයක් ඇතිකර තිබෙන මේ ආණ්ඩුවට විරෝධය දැක්වීම සඳහා පාර්ලිමේන්තු වටරවුමට එකතු වෙන්න.

මාර්තු 02 වනදා දිවයිනටම පැය හත හමාරක විදුලි කප්පාදුවක් සිදුකිරීමට නියමිතව ඇති බව වාර්තා වෙයි.

ඒ හෙට දිනයේ දී මුළු දිවයිනටම බලපැවැත්වෙන පරිදි පැය හත හමාරක විදුලිය කප්පාදුවක් සිදුකිරීම සදහා ලංකා විදුලි බල මණ්ඩලය කළ ඉල්ලීමට මහජන උපයෝගීතා කොමිසම අනුමැතිය ලබා දී තිබීම නිසාය.

ඒ අනුව දිවා කාලයේ දී පැය පහක් සහ රාත‍්‍රී කාලයේ පැය දෙක හමාරක් විදුලිය කප්පාදුව සිදුවනු ඇති බව වාර්තා වෙයි.

එක්සත් ජාතීන්ගේ මානව හිමිකම් කවුන්සිලයේ (UNHRC) 49 වැනි සැසිවාරය අද (28) ජිනීවා නුවර දී ආරම්භ වෙයි. ලබන අප්‍රේල් 1 වැනිදා දක්වා සැසිවාරය පැවැත්වීමට නියමිත අතර ශ්‍රී ලංකාවේ මානව හිමිකම් තත්ත්වය පිළිබඳව හා සංහිඳියාව උදෙසා ශ්‍රී ලංකා රජය ඉදිරිපත් කරන වැඩ පිළිවෙල පිළිබඳව මෙන්ම ත්‍රස්තවාදය වැළැක්වීමේ පනත සංශෝධනය ඇතුළු කරුණු රැසක් සම්බන්ධයෙන් මෙවර සැසිවාරයේදී අවධානය යොමුවනු ඇතැයි විචාරකයෝ පවසති.

මෙවර සැසිවාරයේ දී එක්සත් ජාතීන්ගේ මානව හිමිකම් පිළිබඳ මහ කොමසාරිස් මිචෙල් බැච්ලේ ශ්‍රී ලංකාව පිළිබඳ ලිඛිත යාවත්කාලීන කිරීමක් කවුන්සිලය වෙත ඉදිරිපත් කරනු ඇති අතර 2022 මාර්තු 3 වැනි දින ශ්‍රී ලංකාව පිළිබඳ අන්තර් ක්‍රියාකාරී සංවාදයක් ද පැවැත්වීමට නියමිත ය.

ශ්‍රී ලංකාවේ මානව හිමිකම් තත්ත්වය, සංහිඳියා වැඩපිළිවෙළේ ප්‍රගතිය ඇතුළුව වගවීම ගැන මෙහිදී අවදානය යොමු කෙරෙනු ඇත.

මහ කොමසාරිස්වරියගේ වාර්තාව

ශ්‍රී ලංකාවේ සංහිඳියාව, වගවීම සහ මානව හිමිකම් ප්‍රවර්ධනය කිරීම යන මැයෙන් එක්සත් ජාතීන්ගේ මානව හිමිකම් පිළිබඳ මහ කොමසාරිස්ගේ වාර්තාව ඉදිරිපත් කර තිබේ.

වාර්තාවේ දැක්වෙන්නේ, වින්දිතයන්ගේ අයිතිවාසිකම් පිළිගැනීම සහ ශ්‍රී ලංකාවේ අතීත මානව හිමිකම් උල්ලංඝනය කිරීම් සඳහා අඛණ්ඩව වගවීමක් නොමැතිකම ගැන මහ කොමසාරිස්වරිය කනස්සල්ලට පත්ව සිටින බවයි.

ඇය පෙන්වා දෙන්නේ, මිලිටරිකරණය සහ වාර්ගික-ආගමික ජාතිකවාදය සඳහා වන අඛණ්ඩ ප්‍රවණතා, ප්‍රජාතන්ත්‍රවාදී ආයතන අඩපන කිරීමට මෙන්ම, සුළු ජාතීන්ගේ කනස්සල්ට සහ සංහිඳියාවට බාධා ඇති කරන බවයි.

ඒ අතරම, එක්සත් ජාතීන්ගේ මානව හිමිකම් කවුන්සිලය සමඟ සම්බන්ධ වීමේ රජයේ විවෘතභාවය අලුත් වීම සහ සමහර ප්‍රතිසංස්කරණ ආරම්භ කිරීමට ගෙන ඇති මූලික පියවර මහ කොමසාරිස්වරිය හඳුනා ගෙන ඇත.

කෙසේ වෙතත් සැබෑ සංහිඳියාවක් සඳහා වූ පුළුල් දැක්මක් සහ වගවීමේ ක්‍රියාවලියක් කඩිනමින් අවශ්‍ය බව මහ කොමසාරිස්වරය අවධාරණය කළාය.

එමෙන්ම අතීත මානව හිමිකම් උල්ලංඝනය කිරීම් යළි ඇතිවීම වැළැක්වීම සහ දඬුවම් නොලබා සිටීම නතර කිරීම උදෙසා ගැඹුරු ආයතනික හා ආරක්ෂක අංශයේ ප්‍රතිසංස්කරණ ඇති කළ යුතු බවද මහ කොමසාරිස්වරිය සිය වාර්තාවෙන් පෙන්වා දී තිබේ.

හමුදාකරණය සහ ඉඩම් ගැටළු

පෙර වාර්තාවල නිරීක්ෂණය කළ පරිදි, පසුගිය වසර දෙක තුළ ශ්‍රී ලංකාවේ, සිවිල් රජයේ කටයුතු තුළ හමුදාකරණය කිරීම වැඩි වීමක් දක්නට ලැබෙන බවද එකසත් ජාතීන්ගේ මානව හිමිකම් පිළිබඳ මහ කොමසාරිස්වරියගේ වාර්තාවේ දැක්වෙයි.

ඇය පෙන්වා දෙන්නේ, මෙම පත්වීම් කාර්යක්‍ෂමතාවය වැඩි දියුණු කිරීම සහ නීතියට අනුකූල වීම යන කරුණු මත සිදු කරන බවට රජය විසින් සාධාරණීකරණය කරනු ලබන බවයි.

කෙසේවෙතත්, මේ පිළිබඳව එක්සත් ජාතීන්ගේ මහ කොමසාරිස්වරියගේ අවදානය යොමුවී ඇති අතර, ඇය පෙන්වා දෙන්නේ, සිවිල් තනතුරු සඳහා හමුදා නිලධාරීන් පත් කිරීම ප්‍රජාතන්ත්‍රවාදී පාලනයට සහ රාජ්‍යයේ දිගුකාලීන ස්වභාවයට බලපෑම් එල්ල කරන බවයි.

මහ කොමසාරිස්වරියගේ වාර්තාව මගින් නිර්දේශ කර ඇත්තේ, සිවිල් කටයුතු පවත්වාගෙන යාමට හමුදාව මත යැපීමෙන් වළකින්න ලෙසත් සිවිල් ජීවිතයට හමුදාවේ බලපෑම අඩු කරීමට අවශ්‍ය පියවර ගන්නා ලෙසයි.

එමෙන්ම මානව හිමිකම් උල්ලංඝනය කිරීම් සහ ජාත්‍යන්තර මානුෂීය නීතිය බරපතල ලෙස උල්ලංඝනය කිරීම් සම්බන්ධයෙන් ස්වාධීනව, ප්‍රායෝගිකව සහ ඕනෑම සැක සහිත අපරාධකරුවන්ට එරෙහිව නඩු පැවරීමට හමුදා තරාතිරම, නිල හෝ වෙනත් බලතල නොසලකා නීතිපති දෙපාර්තමේන්තුවට ක්‍රියාත්මක විය හැකි බවට සහතික වන්නැයිද මහ කොමසාරිස්වරිය නිර්දේශ කරනු ලැබ ඇත.

අතුරුදහන් වූ සියලු දෙනාගේ ඉරණම සහ ඔවුන්ගේ තොරතුරු සොයා බැලීම සඳහා පුළුල් ප්‍රවේශයක් ගන්නා ලෙසත් ඒ සඳහා අදාළ හමුදා ලේඛනාගාරය වහාම විවෘත කිරීමට පියවර ගන්නා ලෙසත් වාර්තාවේ දක්වා තිබේ.

බලහත්කාරයෙන් අතුරුදන් කිරීමේ සිද්ධි සම්බන්ධයෙන් සැක කරන සියලු දෙනා සම්බන්ධයෙන් සාපරාධී වගකීම සම්බන්ධයෙන් ස්වාධීනව විමර්ශනය කර බලහත්කාරයෙන් අතුරුදහන් වූවන්ගේ පවුල්වලට වන්දි ගෙවීමට පියවර ගැනීමත් නිර්දේශ අතරට ඇතුළත්ය.

ත්‍රස්තවාදය වැලැක්වීමේ පනතට තවත් මූලික ප්‍රතිසංස්කරණ සිදු කරන ලෙස වාර්තාවෙන් ඉල්ලා ඇති අතර, එය ශ්‍රී ලංකාවේ ජාත්‍යන්තර නීති බැඳීම්වලට සම්පූර්ණයෙන්ම අනුකූල වන බව සහතික කිරීම සඳහා කටයුතු කරන ලෙසද ඉල්ලා තිබේ.

ත්‍රස්තවාදය වැළැක්වීමේ පනත යටතේ රඳවා සිටින සියලුම රැඳවියන් පිළිබඳ සමාලෝචනය කර ප්‍රමාණවත් නෛතික සහ සාක්ෂි පදනමක් නොමැතිව රඳවා සිටින සියලු දෙනා කඩිනම් කර නිදහස් කරන ලෙසද නිර්දේශකර ඇති අතර ප්‍රතිත්‍රස්ත මර්දන ක්‍රියාමාර්ග, ප්‍රජාතන්ත්‍රවාදී සහ සිවිල් අවකාශය අඩපණ නොකරන බවට සහතික කරන්නැයිද ඉල්ලා ඇත.

විදේශ ලේකම් ජයනාත් කොළඹගේ පවසා සිටියේ ත්‍රස්තවාදය වැළැක්වීමේ පනත යටතේ රඳවා සිටි රැඳවියන් 81 දෙනෙකු මේවන විට නිදහස් කර ඇති බවයි.

ඒ අතුරින් 16 දෙනෙකු සිරදඬුවම නියම සිට ජනපති සමාව ලැබූ එල්.ටී.ටී.ඊ රැඳවියන් බවද ලේකම්වරයා සඳහන් කළේය.

මානව හිමිකම් ආරක්ෂකයින්, සමාජ ක්‍රියාකාරීන්, මානව හිමිකම් කඩ වීමට ලක් වූ වින්දිතයින් සහ ඔවුන්ගේ පවුල්වලට හිරිහැර කිරීම සහ පළිගැනීම ඇතුලුව සියලුම ආකාරයේ ආවේක්ෂණ වහාම අවසන් කරන ලෙස සියලුම ආරක්ෂක ආයතනවලට නියෝග කරන්න ලෙසද එක්සත් ජාතීන්ගේ මානව හිමිකම් පිළිබඳ මහ කොමසාරිස්වරිය ඉල්ලා තිබේ.

ඉඩම් ආරවුල් විනිවිද පෙනෙන අයුරීන් හා අපක්ෂපාතී සහ වෙනස් කොට සැලකීමකින් තොරව සිදුකිරීමත් නිර්දේශ අතරට ඇතුලත්ය.

2019 පාස්කු ප්‍රහාරය පිළිබඳ විමර්ශන කොමිසමේ සොයාගැනීම් ප්‍රකාශයට පත් කරන ලෙසත් නිර්දේශ කර තිබේ.

සංහිඳියාවේ සහ වගවීමේ ප්‍රගතිය

එක්සත් ජාතීන්ගේ මානව හිමිකම් කවුන්සිලයේ 40/1 යෝජනාව හා 34/1 සහ 30/1 අදාළ යෝජනාවලට සම අනුග්‍රාහකත්වය දැක්වීමෙන් ඉවත් වීමට ශ්‍රී ලංකා රජය මීට පෙර තීරණය කළේය.

ඒ, දේශීය වශයෙන් සැලසුම් කර ක්‍රියාත්මක කරන ලද සංහිඳියා සහ වගවීමේ ක්‍රියාවලියක් ක්‍රියාත්මක කරන බව පවසමිනි.

වසර දෙකක් ගතව ඇතැත්, වගවීම සහ සංහිඳියාව සඳහා යුක්තිය උදෙසා රජය තවමත් කිසිදු විශ්වසනීය නව මාර්ග සිතියමක් ඉදිරිපත් කර නැතැයි එක්සත් ජාතීන්ගේ මානව හිමිකම් පිළිබඳ මහ කොමසාරිස්වරියගේ වාර්තාවේ දැක්වෙයි.

ශ්‍රී ලංකා නියෝජිත පිරිසේ නායකත්වය විදේශ අමාත්‍ය ජී.එල් පීරිස්ට

විදේශ අමාත්‍ය මහාචාර්ය ජී.එල්. පීරිස් එක්සත් ජාතීන්ගේ මානව හිමිකම් කවුන්සිලයේ 49 වැනි සැසිවාරය සඳහා සහභාගි වන ශ්‍රී ලංකා නියෝජිත පිරිසට නායකත්වය ලබා දෙයි. විදේශ අමාත්‍යවරයා මෙම සංචාරය අතරතුර දී, කවුන්සිලයේ 49 වැනි සැසිවාරයේ ඉහළ පෙළේ අංගය අමතනු ඇත.

ඉන් අනතුරුව, ශ්‍රී ලංකාව පිළිබඳව පැවැත්වෙන අන්තර් ක්‍රියාකාරී සංවාදය අමතනු ඇත. තවද, විදේශ අමාත්‍යවරයා සිය සංචාරය අතරතුර දී එක්සත් ජාතීන්ගේ මානව හිමිකම් පිළිබඳ මහ කොමසාරිස්වරිය ඇතුළු සම්භාවනීය අමුත්තන් හමුවීමට ද නියමිත බව විදේශ අමාත්‍යංශය නිවේදනය කළේය.

මෙවර ශ්‍රී ලංකාවට එරෙහිව යෝජනාවලියක් නැහැ

එක්සත් ජාතීන්ගේ මානව හිමිකම් කවුන්සිලයේ මෙවර සැසිවාරයේදී ශ්‍රී ලංකාව සම්බන්ධයෙන් යෝජනාවලියක් ඉදිරිපත් නොවනු ඇතැයි, විකල්ප ප්‍රතිපත්ති කේන්ද්‍රයේ නීතිඥ භවානි ෆොන්සේකා බීබීසී සිංහල සේවය සමග පවසා සිටියාය.

ඇය පෙන්වා දුන්නේ "වාර්තාව පිළිබඳ සාකච්ඡා කිරීම පමණයි වෙන්නේ. මුකුත් යෝජනා වලියක් එන්නේ නැහැ. ඒක ගැන අවදානය යොමු වන්නේ සැප්තැම්බර් මාසයේදී. වාර්තාවේ තියෙන කරුණු පිළිබඳ සාකච්ඡාවෙයි."

නීතිඥවරිය තවදුරටත් පවසා සිටියේ ශ්‍රී ලංකා ආණ්ඩුව තම වැඩ පිළිවෙල මෙහිදී ඉදිරිපත් කරනු ඇති බවයි.

"ආණ්ඩුව එකක් කියයි. මහ කොමසාරිස්වරිය එකක් කියයි. ඇත්තටම විසඳුමක් කියලා දෙයක් එන්නේ නැහැ. ස්ථිර තීරණයක් ගන්නේ නැහැ."

"ආණ්ඩුව තමා කියන්න ඕනේ දැන් ඉදන් සැප්තැම්බර් මාසය වන විට මොකද කරන්නේ කියලා. ආණ්ඩුව මොනවද කරන්නේ, මොකද්ද සැලැස්ම කියලා කියන්න ඕනේ." භවානි ෆොන්සේකා පැවසුවාය.

විදේශ අමාත්‍යංශයේ ලේකම් අද්මිරාල් මහාචාර්ය ජයනාත් කොළඹගේ ද ප්‍රවෘත්ති සාකච්ඡාවකට එක්වෙමින් අවධාරණය කළේ, "මෙවර සැසිවාරයේදී ඉදිරිපත් කිරීමට නියමිතව ඇත්තේ ශ්‍රී ලංකාව සම්බන්ධයෙන් වාර්තාව පමණක් බවයි. අලුතින් යෝජනාවක් නැහැ. ඡන්ද විමසීමක් නැහැ."

වාර්තාවේ කරුණුවලට මේවන විටත් රජය නිසි පිළිතුරු ලබාදී ඇතැයි ඔහු සඳහන් කළේය.

කෙසේවෙතත්, මෙම වාර්තාව සම්බන්ධව මානව හිමිකම් සමුළුවේ සාකච්ඡාවක් ඇති වීමට නියමිත බව විදේශ ලේකම්වරයා පවසා සිටියේය.

මානව හිමිකම් කවුන්සිලයේ ශ්‍රී ලංකාව සමඟ මිත්‍රත්වයෙන් කටයුතු කරන රටවල් ශ්‍රී ලංකාව වෙනුවෙන් හඬක් නඟනු ඇතැයි විශ්වාස කරන බවද ඔහු පැවසුවේය.

මාධ්‍යවේදී නිමලරාජන් ඝාතනයට සම්බන්ධයෙන් සැකකරුවෙකු අත්අඩංගුවට
2000 වසරේදී මාධ්‍යවේදී මයිල්වාගනම් නිමලරාජන් ඝාතනය සම්බන්ධයෙන් සැකකරුවෙකු බ්‍රිතාන්‍ය මෙට්‍රොපොලිටන් පොලිසිය පෙබරවාරි 22 වැනිදා අත්අඩංගුවට ගනු ලැබුවේය.

මැතිවරණ වාර්තාකරණය සම්බන්ධයෙන් මරණ තර්ජන එල්ල වී දින කිහිපයකට පසු 2000 වසරේ දී මයිල්වාගනම් නිමලරාජන් වෙඩි තබා ඝාතනය කෙරුණේය.

ඔහු බීබීසීයේ සිංහල සහ දෙමළ භාෂා සේවා සඳහා සේවය කළේය.

ඔහුගේ ඝාතනය සම්බන්ධයෙන් බ්‍රිතාන්‍යයේ නෝර්ත්හැම්ප්ටන්ෂයර් හි දී 48 හැවිරිදි පුද්ගලයෙකු අත්අඩංගුවට ගත් බව මෙට්‍රොපොලිටන් පොලිසිය නිවේදනය කළේය.

2001 ජාත්‍යන්තර අපරාධ අධිකරණ පනතේ 51 වැනි වගන්තිය යටතේ වැරදි සම්බන්ධයෙන් සැකපිට ඔහුව අත්අඩංගුවට ගත බවට පොලිසිය පසුගිය දා පැවසීය.

ඔහුව අත්අඩංගුවේ පසුවන අතර පසුව විමර්ශන යටතේ නිදහස් කර ඇත.

මේ අතර පසුගියදා පැවැති ප්‍රවෘත්ති සාකච්ඡාවකදී මාධ්‍යවේදියෙකු විසින් මෙම අත්අඩංගුවට ගැනීමේ සිද්ධිය පිළිබඳව හා බ්‍රිතාන්‍ය විසින් යුද අපරාධවලට එරෙහිව විශ්වීය අධිකරණ බලය භාවිත කිරීම සම්බන්ධයෙන් ශ්‍රී ලංකාවේ ප්‍රතිචාරය කුමක් දැයි විදේශ අමාත්‍යංශයේ ලේකම් අද්මිරාල් මහාචාර්ය ජයනාත් කොළඹගේ ගෙන් විමසා සිටියේය.

විදේශ ලේකම්වරයා මෙහිදී පවසා සිටියේ බ්‍රිතාන්‍ය විසින් සැකකරුවෙකු අත්අඩංගුවට ගැනීමේ සිද්ධිය සම්බන්ධයෙන් තමා දැනුවත් නොමැති බවයි.

කෙසේවෙතත් විශ්වීය අධිකරණ බලය ලෝකයේම විවාදයට ලක්වූ මාතෘකාවක් බවද ඔහු පවසා සිටියේය.

වෙනත් රටක පුද්ගලයෙකු ඉලක්ක කිරීම සඳහා ඕනෑම රටකට මෙය නිදහසට කරුණක් ලෙස භාවිත කළ හැකි බව ද අද්මිරාල්වරයා සඳහන් කළේය.

ඔහු පෙන්වා දුන්නේ, "එහි යුක්තියක් නැහැ, එහි සාධාරණයක් නැහැ. කෙනෙකුට දඬුවම් කරන්න හෝ වෙනත් රටක් ඉලක්ක කරන්න ඕනේ නම්, විශ්වීය අධිකරණ බලය භාවිත කළ හැකි බවයි.

-BBC සිංහල

මාර්තු මස 05 ට පසුව විදුලිය කප්පාදුව නතර කිරීමට උත්සාහ ගනිමින් සිටින බව මුදල් ඇමැති බැසිල් රාජපක්ෂ පවසා ඇති බව දේශපාලන ආරංචි මාර්ග පවසයි.

මේ සම්බන්ධයෙන් මාධ්‍ය වාර්තා කිහිපයක්ම පළවී ඇත.

වාර්තා වන ආකාරයට ඔහු මේ බව සඳහන් කර ඇත්තේ පසුගිය (28) රාත්‍රී පැවැති කැබිනට් රැස්වීමේදී ය.

ඒ සදහා විදුලිබල මණ්ඩලයට අවශ්‍ය ඉන්ධන සපයා දීමට මේ වනවිට කටයුතු කරමින් සිටින බවද ඇමතිවරයා සඳහන් කර ඇත.

මේ අතර පෞද්ගලික බස් සඳහාද ලංගම ඩිපෝවවල ඉන්ධන පිරවුම්හල්වලින් ඉන්ධන ලබා දීමේ වැඩපිළිවෙලක් සකස් කරගෙන බව සඳහන් කර ඇති ඇමතිවරයා දුම්රිය දෙපාර්තමේන්තුවේ ගබඩාවලද ඉන්ධන ගබඩා කිරීමේ වැඩපිළිවෙලක් සකස් කරගෙන යන බව සදහන් කර තිබේ.

පවතින අර්බුදය හමුවේ ඉන්ධන පිරවුම්හල්වලින් ඉන්ධන නිකුත් කිරීමේදී සීමා පැනවීමට සිදු වනු ඇතැයිද ඊළඟ ඉන්ධන නැව මෙරටට පැමිණෙන තෙක් වෙළෙඳපොළට නිකුත් කිරීමට සිදු වන්නේ සීමිත ඉන්ධන තොගයක් බවද බල ශක්ති ඇමති උදය ගම්මන්පිල පවසයි.

ඒ හේතුවෙන්, විදේශ විනිමය වැය කිරීමේදී අත්‍යවශ්‍ය භාණ්ඩ සඳහා ප්‍රමුඛතාව ලබා දෙනවා ද? යන්න සම්බන්ධයෙන් ආණ්ඩුව තීරණයක් ගත යුතු බව අමාත්‍යවරයා සඳහන් කරයි.

ඔහු මේ බව ප්‍රකාශ කළේ පසුගියදා පැවති මාධ්‍ය හමුවකදී ය.

“මම ද ඇමතිවරයෙකු වන ආණ්ඩුව දැන් කළ යුත්තේ, ප්‍රමුඛතා හඳුනා ගනිමින් ඇපල්, මිදි, දොඩම් කාලා කළුවරේ ඉන්නවා ද? පිටරටින් වතුර ගෙනැල්ලා බීලා වාහන දුවන්න තෙල් නැතුව ඉන්නවා ද? නැත්නම් ඒවාට කැප කිරීම කරලා, අත්‍යවශ්‍ය භාණ්ඩ වන ඖෂධ සහ ඉන්ධනවලට අපේ සීමිත විදේශ විනිමය වැය කිරීමේදී ප්‍රමුඛතාව දෙනවා ද කියන ප්‍රශ්නය පිළිබඳ ආණ්ඩුව තීන්දුවක් ගත යුතුමයි.

ඒ නොගැනීම නිසා තමයි, ඇපල්, මිදි ඇත. තෙල් ටික නැත. පිටරින් ගේන මීපැණි ඇත. ඒත් ඖෂධ නැත. මේ මොහොතේ ත් මුහුදේ තෙල් නැව් නවතාගෙන බලාගෙන සිටි යි. නැත්තේ ඩොලර් ය. අපි සතු තොග පහත බැහැලා තියෙනවා. ඒ නිසා ඊළඟ නැව එනතුරු අපිට සීමිත තොගයක් තමයි වෙළෙඳපොළට නිකුත් කරන්න සිද්ධ වෙන්නේ.

එහි අවසාන ප්‍රතිඵලය තමයි ඉන්ධන පිරවුම්හල්වලටත් සිද්ධ වෙනවා සීමිත ප්‍රමාණයක් විතරක් සෑම කෙනෙකුටම ලබා දෙන්න. මේ දුෂ්කර මොහොතේ සැමට සහනය ලැබිය යුතු නිසා තමයි සීමා කිරීමක් සහිතව ඉන්ධන නිකුත් කරන්නේ.”

ඉකුත් අඟහරුවාදා පැවති විශේෂ අමාත්‍ය මණ්ඩල රැස්වීමේදී ඉන්ධන මිල දී ගැනීම සඳහා අඛණ්ඩව ඩොලර් සැපයීමට මුදල් අමාත්‍යංශය සහතික වුවද එය තවමත් ක්‍රියාත්මක වී නැතැයි අමාත්‍යවරයා ප්‍රකාශ කරයි.

මෙම මාසය ඇතුළත ඉන්ධන මිල වැඩි නොවන්නේ ද? යන්න සම්බන්ධයෙන් එහිදී මාධ්‍යවේදියෙකු නැගූ ප්‍රශ්නයකට පිළිතුරු දුන් ඇමති උදය ගම්මන්පිල.

“අවිනිශ්චිත අනාගතය ගැන නිශ්චිත ප්‍රකාශ කරන්න බැහැ. ඒ විතරක් නොවෙයි, තව පැය 24ක්වත් මම ජීවත් වෙනවා කියලා මට සහතික වෙන්නත් බැහැ. ඔබටත් සහතික වෙන්න බැහැ. එතරම් අනිත්‍ය ලෝකේ, තෙල් මිල ගැන විතරක් මගෙන් ඇයි නිත්‍ය ප්‍රකාශ ඉල්ලන්නේ?”

අවුරුද්දකට පමණ ප්‍රමාණවත් වන ඉන්ධන තොගයක් තමන් රැස්කරගත් බව පොදුජන පෙරමුණේ පාර්ලිමේන්තු මන්ත්‍රීනි ගීතා කුමාරසිංහ සඳහන් කරයි.

ඉන්ධන හිගවෙතැනි බියෙන් තමන් මෙසේ කළ බවත් ඇය පවසයි.

මන්ත්‍රීවරිය මේ බව සඳහන් කර සිටියේ බෙන්තර ඇල්පිටිය ශ්‍රී ලංකා පොදුජන පෙරමුණේ කාන්තා බලමණ්ඩලය අමතමින්ය.

තමන් සිදුකළ ආකාරයටම ඇමැතිවරුන් කිහිප දෙනෙකුද ඉන්ධන තොග රැස් කර ඇති බවත් ඇය පැවසුවාය.

ඇගේ අදහස් දැක්වීම ඇතුළත් news 1st video ව පහත දැක්වෙයි.

බන්ධනාගාර ගත කර ඇති හිටපු පාර්ලිමේන්තු මන්ත්‍රී රන්ජන් රාමනායක සම්බන්ධයෙන් ජිනීවා මානව හිමිකම් කොමිෂම හමුවේ කරුණු දැක්වීමට සමගි ජනබලවේගයේ පාර්ලිමේන්තු මන්ත්‍රීවරුන් වන හරීන් ප්‍රනාන්දු හා මනූෂ නානායක්කාර තීරණය කර ඇත.

ඒ අනුව ඔවුන් ජීනීවා බලා පිටත්ව යාමට නියමිත ය.

ඊට පෙර ඔවුන් සමගි ජන බලවේගයේ නායක, විපක්ෂ නායක සජිත් ප්‍රේමදාස හා පක්ෂයේ නීතිඥවරුන් හමුවී මේ සම්බන්ධයෙන් සාකච්ඡා පවත්වා තිබේ.

ඒ බව සටහනක් පාර්ලිමේන්තු මන්ත්‍රී හරීන් ප්‍රනාන්දු සිය ෆේස්බුක් ගිනුමේ තබා ඇත.

එම සටහන පහත දැක්වෙයි.

ආණ්ඩුවේ හවුල්කාර පක්ෂ සිදුකරන වැඩකටයුතු පිළිබඳව තම පක්ෂය ඉතා විමසිල්ලෙන් බලා සිටින බවද ඒ අනුව අවශ්‍ය මොහොතේ සුදුසු තීරණය පක්ෂ ගැනීමට පක්ෂය සූදානම් බවත් පොදුජන පෙරමුණේ ප්‍රධාන ලේකම් පාර්ලිමේන්තු මන්ත්‍රී සාගර කාරියවසම් අවධාරණය කර සිටියි.

ඔහු මේ බව සඳහන් කර ඇත්තේ මව්බිම පුවත්පත වෙත අදහස් දක්වමින් ය.

කෙසේ වුවත් ආණ්ඩුවේ හවුල්කාර පක්ෂ 11 සමග සහයෝගයෙන් වැඩ කිරීමට සුදානම් බවත් ඔහු සඳහන් කර ඇත.

අමාත්‍ය විමල් වීරවංශ ඇතුළු ආණ්ඩුවේ හවුල්කාර පක්ෂ විසින් අද (මාර්තු 02) එළිදැක්වීමට යන “මුළු රටම හරි මඟට” ජාතික ප්‍රකාශනය සම්බන්ධයෙන් සිදුකළ විමසීමකට මෙසේ ප්‍රතිචාර දක්වා ඇති පොදුජන පෙරමුණේ ප්‍රධාන ලේකම් වැඩිදුරටත් පවසා ඇත්තේ , ආණ්ඩුවේ හවුල්කාර පක්ෂ 11න් සාමාජිකයන් කිහිපදෙනකු කැබිනට් ඇමැතිවරුන් නිසා එම පක්ෂවලින් ඉදිරිපත් කිරීමට සැරසෙන “මුළු රටම හරි මඟට” ජාතික ප්‍රකාශනය මුලින්ම ඉදිරිපත් කළ යුත්තේ, කැබිනට් මණ්ඩලයට බවය.

ශ්‍රී ලංකාවේ රැඳී සිටින රුසියානු සහ යුක්‍රේන සංචාරකයින්ගේ වීසා කාල සීමාව, අය කිරීමකින් තොරව මාස 2ක කාලයක් සඳහා දීර්ඝ කිරීමට කැබිනට් මණ්ඩල අනුමැතිය හිමිව තිබේ.

රුසියානු සංචාරකයින් 11,463 සහ යුක්‍රේන සංචාරකයින් 3,993 දෙනෙකු මේ වන විට දිවයින තුළ රැඳී සිටී.

රුසියානු – යුක්‍රේන අතර වර්ධනය වී ඇති අර්බුදය හේතුවෙන් ඔවුන්ට නැවත සිය රට කරා යෑමට නොහැකි තත්ත්වයක් උද්ගතව ඇත.

එම තත්ත්වය සැලකිල්ලට ගනිමින් එම සංචාරකයින්ගේ වීසා කාලසීමාව ගාස්තු අය කිරීමකින් තොරව මාස 2ක කාලයක් සඳහා දීර්ඝ කිරීමට සංචාරක අමාත්‍යවරයා ඉදිරිපත් කළ යෝජනාවට අමාත්‍ය මණ්ඩල අනුමැතිය හිමිව තිබේ.

යුක්‍රේන අර්බුදය පිලිබඳ පෙරටුගාමී සමාජවාදී පක්ෂය විසින් විශේෂ නිවේදනයක් නිකුත්කර ඇති අතර එය පහත දැක්වෙයි.

යුක්‍රේනය ආක්‍රමණය කිරීමේ රුසියානු පිළිවෙතට සහ නේටෝ සංවිධානයේ ප්‍රකෝපකාරීත්වයන්ට එරෙහිව ජනතා සහයෝගීතාවයක් ගොඩ නගමු!

මේ වනවිට රුසියානු හමුදා යුක්‍රේනයට ඇතුළු වී දරුණු ජනඝාතක යුද්ධයකට ආරම්භය ලබා දී තිබේ. යුක්‍රේනය ප්‍රමුඛ නැගෙනහිර යුරෝපීය කලාපය තුළ ඇමරිකා එක්සත් ජනපදය-යුරෝපා සංගමය ප්‍රමුඛ කඳවුරත් රුසියාව ප්‍රමුඛ කඳවුරත් අතර ඇතිවන මිලිටරි ගැටුම් ලෝක යුද්ධයක් දක්වා වුව වර්ධනය වීමේ අවකාශයක් ඇති බැවින් මෙම යුද අන්තරාය බැරෑරුම් ලෙස අවධානයට යොමු කළ යුතුව තිබේ.

යුද්ධය වහා නතර කළ යුතු බවත්, රුසියාව වහාම සිය ආක්‍රමණික හමුදා යුක්‍රේනයෙන් ඉවත් කළ යුතු බවත් අපි බළකොට කියා සිටිමු. නේටෝ සංවිධානය සහ ඇමරිකා එක්සත් ජනපදයත්, ජර්මනිය ප්‍රමුඛ බටහිර යුරෝපා රටවලුත් විසින් කවර ප්‍රකෝපකාරීත්වයක් ප්‍රදර්ශනය කළද එමගින් ආක්‍රමණික යුද්ධයක් යුක්තියුක්ත වන්නේ නැත.

එමෙන්ම යුක්‍රේනයේ වත්මන් පාලනය වන ජනාධිපති ව්ලැදිමීර් සෙලෙන්ස්කිගේ පාලනයේ ජාතිවාදී හා නව නාසිවාදී මර්දනීය පිළිවෙත විසින් පවා ආක්‍රමණික යුද්ධයක් සාධාරණීකරණය වන්නේ නැත. මෙවැනි යුදමය මැදිහත්වීමක් විසින් සිදුවන්නේ රුසියාවේ සහ යුක්‍රේනයේ වැඩකරන ජනතාවන් අතර තියුණු බෙදීමක් සහ පසමිතුරුතාවයක් ගොඩ නැගීම වන අතර එය නේටෝ උපයමාර්ගයේම කොටසක් මිස ඊට එරෙහි විකල්පය නොවේ. එබැවින් යුද්ධයක් සහ යුක්‍රේනය ආක්‍රමණය සඳහා රුසියාවේ ව්ලැදිමීර් පුටින් පාලනය ගත් ක්‍රියාමාර්ගය අපි තරයේ හෙලා දකින අතර යුද්ධය වහාම නතර කිරීමට බල කරමු.

ආක්‍රමණික යුද්ධයක් ඇති කිරීමේ තනි වගකීමක් රුසියානු පාලනයට පමණක් පැවරිය නොහැක්කේ ඒ සඳහා දීර්ඝ කාලයක සිට නේටෝ යුද හවුල විසින් කළ ක්‍රියාකාරකම් වල සම්බන්ධයක් ඇති බැවිනි. ඇමරිකා එක්සත් ජනපදයේත්, ජර්මනියේත්, එම අධිරාජ්‍යවාදී කඳවුරේ අනෙක් රටවලත් උපායමාර්ගය වන්නේ රුසියාව සතුරු රාජ්‍ය වළල්ලකින් වට කර හුදෙකලා කිරීම සහ නැගෙනහිර යුරෝපා රටවල නේටෝ යුද අවි සහ හමුදා ස්ථානගත කිරීමයි. එවැන්නක් රුසියාවේ ආරක්ෂාවට බරපතල තර්ජන එල්ල කරන බවට විවාදයක් නැත. ආසන්න සිදුවීම වනුයේ රුසියාවට යාබද යුක්‍රේනය උතුරු අත්ලාන්තික් ගිවිසුම් සංවිධානයට හෙවත් නේටෝ සංවිධානයට සම්බන්ධ කරගෙන එහි දේශසීමා ඔස්සේ රුසියාවට එරෙහි යුදමය තර්ජනයක් එල්ල කිරීමට ගත් උත්සාහයයි. දැනටමත් ඔවුන් රුසියාවට එරෙහි යුදමය තර්ජනයක් එල්ල කිරීමට නේටෝ සාමාජිකයින් වන පෝලන්තය, රුමේනියාව, එස්තෝනියාව, ලිතුවේනියාව සහ ලැට්වියාව යන රටවල මිලිටරි මැදිහත්වීම් කරමින් සිටී.

ඒ අතර යුක්‍රේනය පාලමක් කර ගනිමින් රුසියාව තර්ජනයට ලක් කිරීම නේටෝ ක්‍රියාමාර්ගය බව පෙනේ. එබැවින් රුසියාවට යුද්ධය නතර කිරීමට බලපෑම් කිරීමේ වියුක්ත සටන්පාඨ වලින් පලක් නැත. නැගෙනහිර යුරෝපා කලාපයේ, බෝල්ටික් ප්‍රදේශයේ හා මධ්‍යම ආසියාවේ නේටෝ සංවිධානයත්, ඇමරිකා එක්සත් ජනපදයත්, යුරෝපා බලවතුනුත් සිදු කරන ආධිපත්‍යධාරී, ව්‍යාප්තවාදී, තර්ජනාත්මක මිලිටරි ක්‍රියාකාරකම් වහා නතර කළ යුතුය. නේටෝ ඇතුළු අධිරාජ්‍යවාදී යුද සංවිධාන විසුරුවා හැරීමට බලකරන ජාත්‍යන්තර ජනතා බලයක්, අධිරාජ්‍යවිරෝධීන්ගේ - ප්‍රගතිශීලීන්ගේ - ප්‍රජාතන්ත්‍රවාදීන්ගේ පුළුල් ජාත්‍යන්තර ව්‍යාපාරයක් අවශ්‍ය වේ.

අන්තර්-අධිරාජ්‍ය ප්‍රතිවිරෝධය සහ ගෝලීය බලවතුන්ගේත්, කලාපීය බලවතුන්ගේත් බල අරගල විනාශකාරී, ජන සංහාරක තුන්වන ලෝක යුද්ධයක් දක්වා වර්ධනය වීම වලක්වාලිය හැක්කේ එලෙස පමණි.

යුක්‍රේනයේ යුද්ධය තුළ අවදානමට මුහුණදී සිටින යුක්‍රේනයේ වෙසෙන ලාංකික ශ්‍රමිකයන්ගේ හා ශිෂ්‍යයන්ගේ ආරක්ෂාව සම්බන්ධයෙන් ලංකාවේ ආණ්ඩුව කරඇති මැදිහත්වීම කිසිසේත් ප්‍රමාණවත් නැති අතර ඒ සියල්ලන්ගේ ජීවිත වල වගකීම ආණ්ඩුව භාරගත යුතු බව අපි තරයේ අවධාරණය කර සිටිමු.

නැගෙනහිර යුරෝපා කලාපයේ මෙන්ම ඉන්දියානු සාගරයද ඇතුළු ලොව බොහෝ කලාප වල උද්ගත වී තිබෙන යුද ආතතිය සමග ලෝක හා කලාපීය බලවතුන්ගේ ප්‍රාග්ධන අභිලාෂයන් සහ ආර්ථික තරඟය සම්බන්ධිතව තිබේ. එමෙන්ම එය දේශපාලන බලය තහවුරු කර ගැනීමේ හා යුදමය වශයෙන් උපායමාර්ගිකව වැදගත් ස්ථාන අත්පත් කර ගැනීමේ බලපොරය සමග සම්බන්ධිතය. ලෝක ජනතාව ජන සංහාරක යුද්ධයක ගොදුරු බවට පත්වීමේ ඛේදවාචකයට තිත තැබිය හැක්කේ මෙකී ආර්ථික-දේශපාලන-මිලිටරි ප්‍රතිවිරෝධයන් මුලිනුපුටා දැමීමෙන් පමණි. ඒ සඳහා වන ජාත්‍යන්තර පරිමාණ මහජන ව්‍යාපාරයක් ගොඩ නැගීමේ පළමු පියවර ලෙස වත්මන් අර්බුදයට ලෝකයේම වැඩකරන ජනතාව ප්‍රමුඛ පීඩාවට පත් වන්නන්, යුද්ධයේ ගොදුරු බවට පත්වන්නන් සක්‍රියව මැදිහත් විය යුතුය.

එමෙන්ම යුද්ධය දිගු කාලයක් පැවතීම නිසා දැනට ලංකාවට පැමිණ සිටින යුක්‍රේන ජාතික සංචාරකයන්ට සියරට යාම අපහසු වන්නේනම් ඔවුන් සම්බන්ධයෙන්ද විධිමත් වැඩපිළිවෙලක් සකස් කිරීමේ වගකීම භාර ගන්නා ලෙස අපි ආණ්ඩුවට බලකර සිටිමු. නේටෝ යුද තර්ජන වලට, ඇමරිකා එක්සත් ජනපදයේ හා බටහිර යුරෝපයේ අධිරාජ්‍යවාදී රටවල මිලිටරි බලහත්කාරයට, රුසියාවේ ආක්‍රමණික යුද්ධයට එරෙහිව රුසියාවෙත් යුක්‍රේනයේත් වැඩකරන ජනතාව ප්‍රමුඛ ජනකොටස් වල සමගිය හා ඒකාබද්ධතාව වර්ධනය කරන ලෙස එම දෙරටේම ජනතාවගෙන් ඉල්ලා සිටින අපි අධිරාජ්‍යවාදී යුද අවදානමට එරෙහි ලෝක පරිමාණ බලයක් ගොඩ නැගීමට ලොව පුරා ප්‍රගතිශීලීන්ට ආරාධනා කරමු. ඒ සඳහා පෙරමුණ ගන්නා ලෙස ලංකාවේ ජනතාවගෙන්ද ඉල්ලා සිටිමු.

මධ්‍යම කාරක සභාව
පෙරටුගාමී සමාජවාදී පක්ෂය
2022 පෙබරවාරි 28

බලශක්ති අමාත්‍යවරයා තවදුරටත් එකී ධූරයෙ කටයුතු කිරීමට එරෙහිව ශ්‍රී ලංකා පුවත්පත් මණ්ඩල සභාපති , කථිකාචාර්ය මහින්ද පතිරණ සමාජ මාධ්‍ය තුළ සටනක් දියත්කර ඇත.

දේශපාලන ක්ශේත්‍රයේ මහින්ද පතිරණ සැලකෙන උග්‍ර බැසිල් රාජපක්ෂවාදියකු ලෙසය.

කෙසේ වුවත් ඔහු එල්ල කරමින් සිටින චෝදනා බරපතළ බව දේශපාලන විචාරකයන් පවසයි.

ඒ අනුව පසුගිය දින කිහිපයක මහින්ද පතිරණ තැබූ ෆේස්බුක් සටහන් කිහිපයක් පහත දැක්වෙයි.

2022- 02- 28

"මේ තරම් අර්බුදයක් ඇති කර තිබියදීත් බලශක්ති ඇමතිවරයා තවදුරටත් ධූරයේ රැඳී සිටීම හා ධුරයේ තබා ගැනීම මෙරට ජනතාවට කරන විශාලතම නින්දාවකි."

2022-02- 27

"ඩොලර් හිගයක් ඇති වන බව දැනගෙන වත්මන් ගෝඨාභය ආණ්ඩුව පත් වූ විගස බලශක්ති ඇමතිවරයාට කැබිනට් මණ්ඩලය උපදෙස් ලබා දී තිබුණේ මැද පෙරදිග රටක් සමග, දිගුකාලීන ගිවිසුමක් මත ඉන්ධන ලබා ගැනීමේ ක්‍රමවේදයකට වහා යන ලෙසයි. එය දුර දිග බලා දුන් වෘත්තිය උපදේශයකි. එසේ කළේ නම් ඩොලර් හිග වුවද Line of credit මත ඉන්ධන සපයා ගැනීමට අවස්ථාව තිබුණි. බොහෝ රටවල් ඉන්ධන ලබා ගන්නේ මේ ක්‍රමයට වේ. එහෙත් ඇමතිවරයා ඊට එකඟ නොවූ අතර, ඔහු සිංගප්පූරුවේ තැරැව්කරුවන්ගෙන් spot purchasing ක්‍රමයට ඉන්ධන ලබා ගැනීම පමණක් තෝරා ගත්තේය. පසුකාලීන ආණ්ඩුවේ දැඩි ඉල්ලුම මත ඕමානය සමග මෙවැනි ගිවිසුමකට යෑමට ඇමතිවරයා එරටට ගිය ද එය සාර්ථක වූයේ නැත. ඊට හේතුව ඒ වන විටත් ලෝක වෙළෙඳපොලෙහි තෙල් මිළ ඉහළ යමින් තිබීමයි. එවන් තත්වයක රටවල් දිගුකාලීන ගිවිසුම්වලට එකඟ වන්නේ නැත. නිසි කලට මෙවැනි උපක්‍රමික තීන්දු ගැනීම සඳහායි අමාත්‍යාංශයක් තිබෙන්නේ. එය පූර්ණ වශයෙන් බලශක්ති අමාත්‍යාංශයේ වගකීමකි. ඩොලර් ලැබේනම් තෙල් ගෙන්වන්නම් යනු පිළිතුරක් නොවේ."

............

"ඉන්ධන ප්‍රශ්නය ඔඩු දිවීමට සැලසීමෙන් ආණ්ඩුව ජනතාව අතර විරෝධයට ලක්වීමට ඉඩ හැර "හරි මග" යනුවෙන් නව යෝජනාවලියක් ආණ්ඩුවට දීමට යන්නේ ඇමති ගම්මන්පිල රෙදි ඇඳගෙනද? හරිමග යන්නේ ඩීසල් නැතිවද? ඇමති ගම්මන්පිල, පළමුව ඔබේ වගකීම ඉටුකරන්න. ජනාධිපතිතුමනි, මේ ඔබේ අවධානය පිණිසයි."

................

"ඉන්ධන ප්‍රශ්නය ඔඩු දිවීමට සැලසීමෙන් ආණ්ඩුව ජනතාව අතර විරෝධයට ලක්වීමට ඉඩ හැර "හරි මග" යනුවෙන් නව යෝජනාවලියක් ආණ්ඩුවට දීමට යන්නේ ඇමති ගම්මන්පිල රෙදි ඇඳගෙනද? හරිමග යන්නේ ඩීසල් නැතිවද? ඇමති ගම්මන්පිල, පළමුව ඔබේ වගකීම ඉටුකරන්න. ජනාධිපතිතුමනි, මේ ඔබේ අවධානය පිණිසයි."

රාජ්‍ය මූල්‍ය අවභාවිතා කිරීමට අදාළ නඩුවකින් මුදල් ඇමති බැසිල් රාජපක්ෂ නොදොස්කොට නිදහස් කර ඇත.

මුදල් අමාත්‍ය බැසිල් රාජපක්ෂ නිදොස් කොට නිදහස් කිරීමට පියවර ගෙන ඇත්තේ සමෘද්ධි අරමුදලේ මුදල් අවභාවිතාවක් සම්බන්ධයෙන් කඩුවෙල අධිකරණයේ විභාග වූ නඩුවකින්ය.

වාර්තා වන ආකාරයට නීතිපතිවරයා විසින් මෙම නඩුව තවදුරටත් ඉදිරියට රැගෙන නොයන බවට කළ දැනුම්දීම හමුවේ මෙම නඩුව අවසන් කිරීමට විනිසුරුවරයා පියවර ගෙන තිබේ.

සහල් කිලෝවක් දෙදෙනෙකු සඳහා සතියට ප්‍රමාණවත් බවත් එසේ නොවේ නම් දන්වන ලෙසත් අමාත්‍ය චමල් රාජපක්ෂ පවසයි.

ජන හමුවකදී අදහස් දක්වමින් ඔහු මේ බව සඳහන් කර ඇත.

අමාත්‍යවරයා එහිදී පැවසුවේ සහල් කිලෝවක් රුපියල් 125ක් පමණ වන බව තමන්ට තිස්සමහාරාමයේ සහල් මෝල් හිමියෙකු පැවසූ බවයි.

එහිදී රැස්ව සිටි ජනතාව අමාත්‍යවරයාට පැවසුවේ සහල් කිලෝවක් රුපියල් 156 ක් පමණ වන බවයි.

පසුව චමල් රාජපක්ෂ අමාත්‍යවරයා සඳහන් කළේ රුපියල් 156 කට මිලදී ගන්නා සහල් කිලෝවක් දෙදෙනෙකුට සතියකට ප්‍රමාණවත් වන බවයි.

එසේ නොමැතිනම් එය පවසන ලෙසත් නොදන්නා නිසා අසන බවත් කියා සිටි අමාත්‍යවරයා කැබිනට් මණ්ඩලයට ගොස් ඒවා පිළිබඳව දැනුවත් කිරීමට හැකි බවද සඳහන් කරනු ලැබිණ.

වර්තමානයේ ඇතිව තිබෙන ආර්ථික අර්බුදය තාවකාලික බවත් ඒ්වා විසඳාගත හැකි බවත් අමාත්‍යවරයා පැවසීය.

පවතින විදේශ විනිමය අර්බුදය හමුවේ විදේශයන්ගෙන් මෙරටට ආනයනය කරන අත්‍යවශ්‍ය නොවන සහ හදිසි නොවන භාණ්ඩ වර්ග 600ක බදු තවත් වැඩි කරන ලෙස ශ‍්‍රී ලංකා මහ බැංකුව රජයට යෝජනා කර ඇත.

එවැනි භාණ්ඩ ආනයනය තවත් අධෛර්යමත් කිරීම සඳහා රජයේ ආර්ථික උපදේශකවරයා ලෙස ශ‍්‍රී ලංකා මහ බැංකුව රජයට බදු වැඩිකිරීමේ යෝජනාවන් ඉදිරිපත් කළ බව මේ ගැන කළ විමසුමකට පිළිතුරු දෙමින් මහ බැංකු අධිපති අජිත් නිවාඞ් කබ්රාල් මහතා ඊයේ (27දා) පැවසීය.

එසේම තෙල් මිල වැඩි කරන ලෙස ද මහ බැංකුව රජයට යෝජනා කර ඇත.

පවතින විදේශ විනිමය අර්බුදය හමුවේ මහ බැංකුව මෙම යෝජනා රජයට ඉදිරිපත් කළත් මේ සඳහා තවමත් රජයෙන් ප‍්‍රතිචාර ලැබී නැත.

මේ සම්බන්ධයෙන් සුදුසු තීරණ ගැනීම සඳහා එම යෝජනා ගැන මුදල් අමාත්‍යාංශය කරුණු සලකා බලාගෙන යන බවත් තවමත් අදාළ භාණ්ඩවල බදු වැඩි කිරීමට හෝ දේශීය තෙල් මිල ගණන් ඉහළ දැමීමට රජය වශයෙන් කිසිදු තීරණයක් ගෙන නැති බවත්, මුදල් අමාත්‍යාංශ ආරංචි මාර්ගවලින් තහවුරු වේ.

මේ යෝජනා ඇතුළු තවත් යෝජනා කිහිපයක්ම මහ බැංකුව විසින් රජයට ඉදිරිපත් කර ඇති අතර පවතින විනිමය අර්බුදය සමනය කර ගැනීමේ අරමුණින් සහ ආනයන වියදම තවත් අඩුකර ගැනීමේ අරමුණින් මහ බැංකුව මේ යෝජනා ඉදිරිපත් කර ඇති බව ද වාර්තාවේ.

මෙවැනි අත්‍යවශ්‍ය නොවන සහ හදිසි නොවන භාණ්ඩ වර්ග හයසියයක පමණ ඒවා ආනයනය කිරීම සඳහා බැංකු මගින් ණයවර ලිපි විවෘත කිරීමේදී සියයට සියයක ආන්තික තැන්පතු අවශ්‍යතාවක් පැනවීමට ද මීට කලකට පෙර මහ බැංකුව විසින් නියම කර තිබූ අතර එය පසුව ඉවත් කරනු ලැබිණි.

- lead news