පුවත්

දෙදින නිල සංචාරයක් සඳහා මුදල් අමාත්‍ය බැසිල් රාජපක්ෂ සහ මුදල් අමාත්‍යාංශ ලේකම් එස්.ආර්. ආටිගල සමඟ අද (15) ඉන්දියාව බලා පිටත්ව ගොස් ඇත.

වාර්තා වන ආකාරයට මෙම සංචාරයේ අරමුණ මෙරටට අත්‍යවශ්‍ය ආහාර ද්‍රව්‍ය සහ ඹෟෂධ මිලදී ගැනීමට අවශ්‍ය අමෙරිකානු ඩොලර් බිලියන 1.9 ක්වූ ණය මුදලට අදාල ගිවිසුම අත්සන් කිරීම ය.

එම ණය මුදලින් ඩොලර් මිලිය 500 ක් මූල්‍යමය වශයෙන් ලැබෙන අතර ඉතිරි ඩොලර් බිලියන 1.4 ක මුදල ලැබෙනුයේ භාණ්ඩ වශයෙන් බවත් වාර්තා වෙයි.

අද වන විට ආණ්ඩුවේ යන්ත්‍රණය වැඩ නොකරන තත්ත්වයට පැමිණ ඇති බවත් දෙවන ලෝක යුද්ධ සමයේ දී වත් මෙවැනි තත්ත්වයක් නොතිබූ බව පැරැන්නන් කියා තිබෙන බවත් එජාප නායක , හිටපු අග්‍රාමාත්‍ය රනිල් වික්‍රමසිංහ පවසයි.

ඔහු මේ බව සඳහන් කර සිටියේ එජාප ප්‍රතිසංවිධාන වැඩසටහනක දී අදහස් දක්වමින් ය.

වර්තමානයේ උද්ගතව තිබෙන තත්වයට දේශපාලනඥයන්ගෙන් පිළිතුරු ලැබෙනවා ද නැද්ද යන කාරණය පිළිබඳව ජනතාව කල්පනා කරමින් සිටින බවත් එක්සත් ජාතික පක්ෂ නායක සහ හිටපු අග්‍රාමාත්‍ය රනිල් වික්‍රමසිංහ පැවසීය.

සෞභාග්‍යයේ දැක්ම කියවා මේ ආණ්ඩුව ගැන ජනතාව විශේෂ බලාපොරොත්තුවක් තබා ගෙන සිටි අතර රට අලුත් මාර්ගයක ගමන් කරනු ඇතැයි ඔවුන් බලාපොරොත්තු වු බවද හිටපු අග්‍රාමාත්‍යවරයා කීය.

ජනාධිපති ගෝඨාභය රාජපක්ෂ හෙට (16) පස්වරුවේ ජාතිය ඇමතීමට නියමිත බව වාර්තා වෙයි.

ජනාධිපති මාධ්‍ය අංශය මේ බව තහවුරු කර ඇත.

මෙහිදී ජනාධිපතිවරයා රටේ පවතින වත්මන් තත්වය සම්බන්ධයෙන් අදහස් දැක්වීමට නියමිත බව ජනාධිපති මාධ්‍ය අංශය නිකුත් කළ නිවේදනයක දැක්වේ.

මේ අතර සමාජ මාධ්‍ය තුළ විපක්ෂයේ පාර්ශ්ව විසින් #GoHomeGota2022 යනුවෙන් ද ආණ්ඩුවේ හිතවාදීන් විසින් #WeAreWithGota යනුවෙන් #ටැග් සටනක් දියත්කර ඇත.

රුපියල් 17ක්ව පැවති අවම බස් ගාස්තුව රුපියල් 20 ක් ලෙස ඉහළ දමමින් බස් ගාස්තු මිලත් ඉහළ නංවා ඇත.

ඒ අනුව ජාතික ගමනාගමන කොමිෂන් සභාව  (14) පස්වරුවේදී සංශෝධිත බස් ගාස්තු චක්‍රය ප්‍රකාශයට පත්කර තිබේ.

එහිදී මෙතෙක් රුපියල් 1303ක්ව පැවති උපරිම බස් ගාස්තුවත් රුපියල් 1498 ක් දක්වා රුපියල් 195කින් ඉහළ යනු ඇත.

එම බස් ගාස්තු ඉහළ යාමේ චක්‍රය පහත දැක්වෙයි.

මුදල් අමාත්‍ය බැසිල් රාජපක්ෂ ට එරෙහිව සමගි ජනබලවේගය පක්ෂය විසින් ඉදිරිපත් කිරීමට යෝජිත විශ්වාස භංග යෝජනාව අපරිණත දේශපාලන ක්‍රියාවක් බව දේශපාලන විචාරකයන් පවසයි.

ඔවුන් මේ බව සඳහන් කරන්නේ මීට පෙර මුදල් අමාත්‍ය බැසිල් රාජපක්ෂ ගේ ප්‍රධාන ගෝලයකු වූ පොදුජන පෙරමුණේ ප්‍රධාන ලේකම් පාර්ලිමේන්තු මන්ත්‍රී සාගර කාරියවසම් නිකුත්කළ ලිපියක් පාදක කරගෙන එවකට බලශක්ති අමාත්‍ය ධූරය හෙබවූ උදය ගම්මන්පිල ට එරෙහිව ඉදිරිපත් කළ විශ්වාස භංග යෝජනාව සිහිපත් කරමිනි.

එහිදී බෙදී වෙන්වී සිටි ආණ්ඩුව විශ්වාස භංගය ජයග්‍රහණය කරවීමට එක්වූ බවත් මේ මොහොතේ ගෙන ඇති ක්‍රියාමාර්ගය ඊට නොදෙවෙනි බවත් දේශපාලන විචාරකයන් පවසයි.

මේ සම්බන්ධයෙන් newstube.lk වෙත අදහස් දක්වමින් දේශපාලන විචාරකයකු මෙසේ පැවසීය.

ප්‍රධාන විපක්ෂය කරන්නේ බැසිල්ට ඕන දේද ?

 " එක පැත්තකින් ආණ්ඩුව අභ්‍යන්තරයේ අමාත්‍යවරුන් ඉවත් කරමින් සිටිනවා. අනෙක් පසින් ඊට විරෝධය දක්වමින් ආණ්ඩුවේ පිරිස් තනතුරු අත්හරිමින් ඉන්නවා. ඒ වගේම ආණ්ඩුවේ තවත් පිරිසක් අභ්‍යන්තරයේ සිටිමින් බැසිල් රාජපක්ෂ විරෝධය තීව්‍ර කිරීමට කටයුතු කරමින් ඉන්නවා. ඒ වගේම තමයි ජනතාව අතර මතුව ඇති ආණ්ඩු විරෝධය. මේ පසුබිමේ අලුත් විශ්වාසය භංග යෝජනා මොකටද ? එක පසෙකින් ආණ්ඩුවේ වැඩ වලට එරෙහිව විරෝධතා සංවිධානය කරන අතරේ, අනෙක් පසින් ආණ්ඩුවේ සමගිය වෙනුවන් විශ්වාස භංග යෝජනාවක් ගෙනත්. මේ මොන පිස්සුවක් ද ? මේක අපරිණත දේශපාලන තීන්දුවක්. නැත්නම් ඩීල් එකක්.

මේ වෙනකොට පසුගියදා අමාත්‍ය ධූර වලින් ඉවත් කරපු, විමල් වීරවංශ සහ උදය ගම්මන්පිල හිටපු අමාත්‍යවරුන් ආණ්ඩුවේ සිටින සෙසු බැසිල්ගේ විරෝධයට ලක්වූවන් අනාවරණය කර තියෙනවා. අමාත්‍යවරුන් වන මහින්දානන්ද අලුත්ගමගේ , බන්දුල ගුණවර්ධන , ඩලස් අලහප්පෙරුම වැනි ප්‍රබලයන් ඒ අතර සිටිනවා. ඇයි මේ අනාවරණ ඇත්තද බොරුද කියලා ඔප්පු වෙන්න නොදෙන්නේ.

ප්‍රධාන විපක්ෂය කරන්නේ බැසිල්ට ඕන දේද කියන පැහැදිලි ප්‍රශ්නය මෙතන තියෙනවා. පුළුවන් නම් කියන්න , මේ විශ්වාස භංග යෝජනාවට තියෙන දේශපාලන වැදගත්කම මොකක්ද කියලා "

ලංකා ඉතිහාසයේ සාමාන්‍ය පෙළ විභාගය අසමත් වැඩිම පිරිසක් ඇමැතිධූර දරන කැබිනට් මණ්ඩලය මෙය බව ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී විජයදාස රාජපක්ෂ පවසයි.

ප්‍රධාන පෙළේ ඇමැතිවරු රැසක්ම සාමාන්‍ය පෙළ අසමත් බවත් මන්ත්‍රීවරයා පෙන්වාදෙයි.

මැදමුලනට කොන්දේසි විරහිතව කඹුරපු ඕනෑම අයෙකුට අත්වෙන ඉරණම විමල් සහ ගම්මන්පිලට අත්වූ බවත් ඔහු පැවසීය.

පාර්ලිමේන්තු මන්ත්‍රී විජේදාස රාජපක්ෂ ගේ මාධ්‍ය හමුවේ වීඩියෝව පහත දැක්වෙයි.

ජාතික ආණ්ඩුවක් රටට අවශ්‍ය නැති බව එක්සත් ජාතික පක්ෂයේ නායක හිටපු අගමැති රනිල් වික්‍රමසිංහ සඳහන් කරයි.

කිරුලපන ප්‍රදේශයේ පැවති පාක්ෂික හමුවකදී අදහස් දක්වමින් හිටපු අග්‍රාමාත්‍යවරයා මේ බව පැවසීය.

එහිදී ඔහු වැඩිදුරටත් අවධාරණය කර සිටියේ , ජාතික ආණ්ඩුවක් බිහි කිරීමෙන් සිදුවන්නේ ඇමති ධුර බෙදා ගැනීමක් පමණක් බවය.

ඒ නිසා සියලු දේශපාලන පක්ෂ එකතුව වසර 15 ක පමණ කාලයක් සඳහා ජාතික රාමුවක්, ශක්තිමත් යකඩ රාමුවක් වැන්නක් නිර්මාණය කළ යුතු බවත් ඒ හරහා ජනතා විශ්වාසය දිනාගෙන ආර්ථිකය ගොඩනැගීමක් කළ යුතු බවය.

මුදල් අමාත්‍යවරයා සහ මහබැංකු අධිපතිවරයා අතර ගැටුමක් නිර්මාණය වී ඇති බවත් ඒ හේතුවෙන් ආර්ථිකය පිළිබඳ නිවැරැදි තීන්දු තීරණ ගැනීමට නොහැකි වී ඇති බවද ඔහු එහිදී පැවසීය.

ඉන්ධන ලබා ගැනීමට ඉන්දියාව සමඟ අත්සන් තැබීමට නියමිත ගිවිසුම ප්‍රමාදවීම නිසා වර්තමානයේ ලබාගත හැක්කේ ඉන්ධන නෞකා හතක් පමණක් බවත් නියමිත වේලාවට ගිවිසුමට එළඹුනා නම් ඊට වඩා ඉන්ධන නැව් ගෙන්වා ගැනීමට හැකියාව තිබූ බවත් ඔහු පැවසීය.

මාර්තු 15 වෙනිදා එනම් හෙට දිනයේ විරෝධතාවයෙන් පසුව පවතින ආර්ථික අර්බුදය විසඳීම සඳහා රජයට අවසන් කාල සීමාවක් ලබාදෙන බවත් අනතුරුව “අරාබි වසන්තය” ආකාරයේ විරෝධතාවයකට යන බව සමගි ජන බලවේගය පවසයි.

එම පක්ෂ පාර්ලිමේන්තු මන්ත්‍රී හරීන් ප්‍රනාන්දු මාධ්‍ය හමුවක් අමතමින් කියා සිටියේ , පා ගමනිකින් පැමින ජනාධිපතිතුමා හමුවෙන්න යන බවත් ඒහිදී ඔහුට අවසාන දැනුම් දීමක් කරන" බවත් ය.

“අපිව විවේචනය නොකර අපිත් එක්ක එකතු වෙන්න කියලා ජනතා විමුක්ති පෙරමුණ ඇතුළු සියලුම පක්‍ෂවලට ආරාධනා කරනවා,” ඔහු වැඩිදුරටත් පැවසීය.

බාධා කරන්නේ බලාගෙනයි - මරික්කාර්

මේ අතර මාධ්‍ය වෙත අදහස් දක්වමින් සජබ මාධ්‍ය ප්‍රකාශක එස්.එම්. මරික්කාර් මන්ත්‍රීවරයා සඳහන් කර සිටියේ , හෙට දිනයේ කොළඹදී පැවැත්වෙන සමගි ජන බලවේගයේ මහා ජනරැලිය කඩාකප්පල් කිරීම සදහා විවිධ සැලසුම් ක්‍රියාත්මක වෙමින් පවතින බවය.

එසේ කරන නිලධාරීන්ට එරෙහිව දැඩි ක්‍රියාමාර්ග ගැනීමට සූදානම් බවත් මන්ත්‍රීවරයා එහිදී පැවසීය.

කුමන බාධක පැමිණියද ලක්ෂයක ජනතාවක් සමග හෙට දිනයේදී ආණ්ඩුවට එරෙහිව දැවැන්ත ‌විරෝධයක් සිදුකරන බවද ඔහු පැවසීය.

ජල සම්පාදන අමාත්‍ය වාසුදේව නානායක්කාර තම රාජකාරී වාහන සහ නිල නිවාස සියල්ලම අද (14) ජල සම්පාදන අමාත්‍යංශ ලේකම් ප්‍රියත් බන්දු වික්‍රමට භාරදී ඉවත්ව ගොස් ඇති බව වාර්තා වෙයි.

අමාත්‍ය මණ්ඩලයේ රැස්වීම් වර්ජනය කිරීම සහ අමාත්‍යංශයේ රාජකාරීවලින් ඉවත්වීමත් නිසා තව දුරටත් වාහන සහ අනෙකුත් අමාත්‍යංශයේ පහසුකම් ලබාගැනීම සදාචාර නොවන බැවින් මෙම තීරණයට එළැඹි බව හිටපු අමාත්‍යවරයා පැවසූ බවත් වාර්තා වෙයි.

ඉදිරියට ගමන් බිමන් සඳහා සිය සහෝදරයෙක්ට හිමි කුඩා රථයක් ඉදිරියට භාවිතා කරන බව එහිදී හිටපු අමාත්‍ය වාසුදේව නානායක්කාර පැවසූ බවත් වාර්තා වෙයි.

පක්ෂයේ තීරණය !

කෙසේ වුවත් මීට පෙර මාධ්‍ය හමුවකදී අදහස් දක්වමින් හිටපු අමාත්‍ය වාසුදේව නානායක්කාර සඳහන් කර සිටියේ , දිගටම අමාත්‍යවරයකු ලෙස කටයුතු කරන ලෙස තම පක්ෂයේ මධ්‍යම කාරක සභාව යෝජනා කළ බවය.

කෙසේ වුවත් ආණ්ඩුව අභ්‍යන්තරයේ බැසිල් විරෝධී කඳවුරේ ප්‍රමුඛයකු වූ වාසුදේව මන්ත්‍රීවරයා මේ අනුව පක්ෂ තීරණය වෙනස් කරගෙන ඇති බවක් පෙන්නුම් කරයි.

විමල් ගම්මන්පිල ඉවත් කළාම වාසු යයි කියලා හිතුවා - බැසිල්

මේ අතර පසුගිය සමයේ මුදල් අමාත්‍ය බැසිල් රාජපක්ෂ ගේ ආරංචි මාර්ග උපුටා දක්වමින් මාධ්‍ය වාර්තා සඳහන් කර සිටියේ , විමල් වීරවංශ සහ උදය ගම්මන්පිල අමාත්‍යවරුන් ධූර වලින් ඉවත්කර වාසුදේව ඉවත් නොකර සිටියේ , ඔහු නිකංම ඉල්ලා අස්වීම සිදුකරනු ඇති බවට වන අපේක්ෂාවෙන් බවය.

ඒ අනුව දැන් මුදල් අමාත්‍ය බැසිල් රාජපක්ෂ ගේ ඒ අපේක්ෂාවත් ඉටුව ඇති බව පැහැදිලි වෙයි.

සිමෙන්ති මිල ඉහළ දැමීමට සිදුවන බව සිමෙන්ති සමාගම් පවසයි.

මීට පෙර සිමෙන්ති කොට්ටයක මිල රු. 1500.00ක් වූ අතර, රුපියල් 350.00කින් ඉහළ දැමීමට තීරණය වී ඇත.

ඒ අනුව සිමෙන්ති කිලෝ ග්‍රෑම් 50 කොට්ටයක නව  මිල රුපියල් 1850 දක්වා ඉහළ දමන බව එම සමාගම් පවසා සිටී.

පුනර්ජනනීය බලශක්ති උත්පාදන ව්‍යාපෘති සඳහා ඉන්දීය අදානි සමාගම ප්‍රථම අදියර ලෙස ඩොලර් මිලියන 500 ක් ආයෝජනය කල බවත් ඒ සඳහා පුනර්ජනනීය බලශක්ති ව්‍යාපෘතීන් කඩිනම් කිරීම සඳහා පත් කල අමාත්‍ය මණ්ඩල අනුකමිටුවේ අනුමැතිය ලබා දුන් බවත් ඉදිරියේ දී මෙරට පුනර්ජනනීය ව්‍යාපෘතීන් සඳහා අදානි සමාගම තවත් ආයෝජනය කරන බවත් මහාමාර්ග අමාත්‍ය ජොන්ස්ටන් ප්‍රනාන්දු ප්‍රකාශ කරයි.

කිසි ලෙසකත් පැමිණෙන ආයෝජන ප්‍රමාද නොකරන බවත් කිසියම් පිරිසක් මෙම ආයෝජන පමා කරන්නට කටයුතු නරන්නේ නම් ඔවුන්ට එරෙහිව දැඩි පියවර ගන්නා බවත් අමාත්‍යවරයා පවසයි.

නව නිවාස සෑදීම , අලුතින් කර්මාන්තශාල ඇති කිරීම වැනි දෑ නිසා වාර්ෂිකව අලුතින් 5% – 8% ප්‍රමාණයකින් විදුලි බල ඉල්ලුම වැඩිවේ. මෙම අවශ්‍යතාවය සපුරා ගැනීම සඳහා පුනර්ජනනීය බලශක්තිය මඟින් උත්පාදනය කරන විදුලිය ලබා දීම කෙරෙහි අවධානය යොමුකරන බව අමාත්‍යවරයා ප්‍රකාශ කරයි.

හෙට (14) මධ්‍යම රාත්‍රියේ සිට බස් ගාස්තු ඉහළ දැමීමට ආණ්ඩුව අවසර ලබාදීමට තීන්දු කර ඇති බව වාර්තා වෙයි.

වාර්තා වන ආකාරයට බස් සංගම් කළ ඉල්ලීම් සලකා බැලීමෙන් අනතුරුව මේ තීන්දුව ගෙන ඇත.

ජාතික ගමනාගමන කොමිෂන් සභාවේ අධ්‍යක්ෂ ජනරාල් කර්මාන්ඩර් නිලාන් මිරැන්ඩා මාධ්‍ය වෙත පවසා ඇත්තේ , ගාස්තු සංශෝධනය හෙට කැබිනට් මණ්ඩලයට ඉදිරිපත් කර අනුමැතිය ලබා ගන්නා බවය.

අවම බස් ගාස්තුව බොහෝ දුරට රුපියල් 19ක් හෝ 20ක් වනු ඇතැයි ද ඔහු වැඩිදුරටත් සඳහන් කර ඇත.

දුම්රියත් ගාස්තු ඉහළ දැමීමට ඉල්ලයි !

බස් ගාස්තු ඉහළ දැමීම සමග දුම්රිය ප්‍රවේශපත් මිලත් ඉහළ දැමීමට ඉල්ලීමට එහි ප්‍රධානීන් සූදානම් වීමක් ගැනත් තොරතුරු වාර්තා වෙයි.

ඒ අනුව එහි සාමාන්‍යාධිකාරි ධම්මික ජයසුන්දර මාධ්‍ය වෙත පවසා ඇත්තේ , බස් ගාස්තුවලට සමාන ගාස්තුවකින් අදාළ ඉහළ දැමීම සිදුකරන්නැයි, ඉල්ලන බවය.

ප්‍රවාහන අමාත්‍යාංශයේ උපදෙස් ගනිමින්, අදාළ ඉල්ලීම මුදල් අමාත්‍යාංශයට යොමු කරන බව, ඔහු වැඩිදුරටත් සඳහන් කර ඇත.

අමාත්‍ය මණ්ඩලයෙන් ඉවත් කරන ලද විමල් වීරවංශ සහ උදය ගම්මන්පිල හිටපු අමාත්‍යවරුන් හා ඔවුන්ට සහාය දෙන දේශපාලන පක්ෂ ගණනාවක් තමන් සතු ජන බලය පෙන්වීමට ජන රුලියක් පැවැත්වීමට සැලසුම් කර තිබේ.

දැනට යෝජනා වී ඇත්තේ මෙම ජන රැලිය මෙම මස 29දා නුගේගොඩ නගරයේදී පැවැත්වීමටයි. සිය මංගල ජන රැලිය පැවැත්වීම සම්බන්ධයෙන් පසුගියදා පැවති මූලික සාකච්ඡාවේදී ශ්‍රීලනිපය, පිවිතුරු හෙළ උරුමය, ජාතික නිදහස් පෙරමුණ ඇතුළු පක්ෂ ගණනාවක් ඊට කැමැත්ත ප්‍රකාශ කර ඇත. එහෙත් සන්ධානයේ සිටින ශ්‍රී ලංකා කොමියුනිස්ට් පක්ෂය, සමසමාජය හා ප්‍රජාතන්ත්‍රවාදී වාමාංශික පෙරමුණ මාර්තුවේ රැලිය නොපවත්වා මැයි මස පළමුවැනිදා මැයි දිනයද සමඟ රැලිය ඒකාබද්ධව පැවැත්විය යුතු යැයි යෝජනා කර ඇත. මේ ගැන අවසන් තීරණය ඉදිරි සතියේ ගැනීමට නියමිතය.

විමල් උදය පිල මේ රැලිය සඳහා නුගේගොඩ නගරය තෝරාගෙන ඇත්තේ බොහෝ පෙරළිකාර දේශපාලන කණ්ඩායම් මෙයට පෙර සිය මංගල දේශපාලන රැලි නුගේගොඩදී පැවැත්වූ නිසා බවද වාර්තා වෙයි.

විමල් උදය කණ්ඩායමේ රැලියට සමගාමීව ආණ්ඩු පක්ෂයද (පොහොට්ටුවද) සිය ජන බලය පෙන්වීම සඳහා දැවැන්ත මැයි දින රැලියක් ගාලු මුවදොරදී මැයි 01දා පැවැත්වීමට සැලසුම් කර තිබේ. ගාලු මුවදොර පිටියට සිය පාක්ෂිකයන් කැඳවා පවත්වන ජන රැලිය මගින් විපක්ෂයට අභියෝග කිරීම ශ්‍රී ලංකා පොදුජන පෙරමුණේ සැලසුමයි.

විපක්ෂ නායක සජිත් ප්‍රේමදාස මහතා නායකත්වය දරන සමගි ජන බලවේගයද සිය ජන බලය පෙන්වීමටත් ආණ්ඩුවට විරෝධය දැක්වීමටත් ලබන 15දා සවස 2ට කොළඹදී විශාල ජන රැලියක් පැවැත්වීමට සැලසුම් කර ඇත. රැලිය පවත්වන ස්ථානය මේ දක්වා ප්‍රකාශ කර නැතත් ඔවුන් පෙළපාලියක් සමඟ ජන රැලියක් පැවැත්වීමට සැලසුම් කර ඇතැයි වාර්තා වෙයි.

- දේශය

හිටපු අග්‍රාමාත්‍ය රනිල් වික්‍රමසිංහ අගමැති කරන ජාතික ආණ්ඩුවක් සම්බන්ධයෙන් වන දේශපාලන ගොසිප් එකක් මේ වන විට පැතිර යමින් ඇති අතර ඒ පිළිබඳ ශ්‍රීලනිප නායක හිටපු ජනාධිපති මෛත්‍රීපාල සිරිසේන ප්‍රතිචාර දක්වා ඇත.

ඒ අනුව ඔහු සිය ෆේස්බුක් පිටුවේ සටහනක් තබමින් කියන්නේ ජාතික ආණ්ඩුවක් සඳහා තම සූදානමක් නැති බවය.

එහිදී ඔහු ආණ්ඩුව වෙතත් දැඩි ප්‍රහාරයක් එල්ල කරමින් පවසන්නේ ආණ්ඩුව ජනතාවට බොරු කීම නැවැත්විය යුතු බවය.

හිටපු ජනාධිපති මෛත්‍රීපාල සිරිසේන සිය ෆේස්බුක් පිටුවේ තැබූ සටහන පහත දැක්වෙයි.

කෙසේ වුවත් රනිල් වික්‍රමසිංහ යළිත් අගමැති කරන ජාතික ආණ්ඩුවක් සම්බන්ධයෙන් වන දේශපාලන ගොසිප් එක තටු ලැබූවේ, පසුගියදා ශ්‍රී ලංකා නිදහස් පක්ෂය සහ ජනාධිපති ප්‍රමුඛ පොදුජන පෙරමුණේ නායකයන් සමග පැවති සාකච්ඡාවෙන් පසුව බව දේශපාලන විචාරකයන් පවසයි.

එහිදී සර්ව පාක්ෂික සමුළුවක් සම්බන්ධයෙන් යෝජනාවක් ජනාධිපති වෙත ඉදිරිපත් කිරීමට ශ්‍රීලනිප පාර්ශ්වය කටයුතු කර තිබූ අතර ඊට ජනාධිපති එකඟතාව පළකල බවත් සඳහන් විය.

අවසානයේදී සර්ව පාක්ෂික සමුළුව සහ ජාතික ආණ්ඩුව සම්බන්ධයෙන් වන ගොසිප් එක පොදු ක්‍රියාමාර්ගයක් බවට ප්‍රසිද්ධ වූ බවත් විචාරකයන් පෙන්වා දෙයි.

එසේම මේ වන විට ජාතික ආණ්ඩු යෝජනාව මහින්ද රාජපක්ෂ අගමැති විසින් හාස්‍යට ලක්කර ඇති අතර එය හිටපු අග්‍රාමාත්‍ය රනිල් මැව් ගොසිප් එකක් බව ආණ්ඩුවේ ඇතමුන් පවසයි.

එක්සත් ජාතික පක්ෂයේ නායක , හිටපු අග්‍රාමාත්‍ය රනිල් වික්‍රමසිංහ ද මේ ජාතික ආණ්ඩු ගොසිප් එක හාස්‍යට ලක්කර ඇති බවත් වාර්තා වෙයි.

මේ පසුබිමේ ජාතික ආණ්ඩුව සම්බන්ධයෙන් ගොසිප් එක පණක් ලබා ඇත්තේ , අර්බුදය විසඳීමේ හැකියාව රනිල් වික්‍රමසිංහ වෙත ඇති බවට දේශපාලන ක්ශේත්‍රයේ ඇති අවිඥානික පිළිගැනීම නිසා විය හැකි බව දේශපාලන විචාරක මතය වී තිබේ.

මේ සම්බන්ධයෙන් අදහස් දක්වමින් දේශපාලන විචාරකයකු පවසා සිටියේ මෙසේය.

" තුනෙන් දෙකක බලයක් ඇති ආණ්ඩුවක් බලයේ සිටින විට, තනි මන්ත්‍රීවරයකු වන හිටපු අග්‍රාමාත්‍ය රනිල් වික්‍රමසිංහ අගමැති කරන ගොසිප් එකක් නිර්මාණය වීම යන්නම ප්‍රශ්නයක්. ඒ වගේම තමයි ශ්‍රීලනිප ය ප්‍රමුඛ ආණ්ඩුව නියෝජනය කරන පාර්ශ්ව සහ විපක්ෂයේ පවා ඇතමුන් කළබල වීම. රාජපක්ෂවරුන් කිසිම අවස්ථාවක බලය බෙදා හදා ගැනීමකට යයි කියලා වැරදිලා හෝ මේ පිරිස හිතුවේ කොහොමද ? අන්න එතන ප්‍රශ්නයක් තියෙනවා. ඒ කියන්නේ කලබල වෙන උදවිය කාටත් රනිල් වික්‍රමසිංහ අභියෝගයක් බව පෙන්නුම් කරනවා. ඔවුන් බය වෙන්නේ ගෝඨාභය රාජපක්ෂ ජනාධිපති වන ආණ්ඩුවක රනිල් වික්‍රමසිංහ අගමැති වීම වියනොහැක්කක් යන්න ගැන නෙවෙයි. වැරදිලා හරි වුණොත් ඊට පස්සේ මොකද වෙන්නේ යන්න ගැන වෙන්න ඕන. ඒ කියන්නේ ඔවුන් අවිඥානික බියක පසුවෙනවා, රනිල් වික්‍රමසිංහ අගමැති වුණොත් ප්‍රශ්නය විසඳීමට ඉඩක් තිබෙන බව, ඒ විය හැකියාව නිසා හැර මේ ගොසිප් වලට සීරියස් ප්‍රතිචාර දැක්වීම තේරුම් ගන්නේ කොහොමද ? අන්න ඒ ගැන හිතන්න ඕන"

"ඇත්ත ගත්තොත් ජනාධිපති මේ අර්බුදයෙන් ආතල් ගනිමින් ඉන්නේ. වීරවංශ මහත්තයලා, උදය ගම්මන්පිල මහත්තයලා එකතු වෙලා, මහතීර් මොහොමඩ්ට, ලී ක්වාන් යූට, අන්දලා ගෙනාවාට තවදුරටත් මෙහෙම යන්න බැහැ. දැන් ඇති කියන තත්වයට පත්වෙලා තිබෙන්නේ. ආණ්ඩුවේ ඇමතිවරුන් වෙනත් කතා කියලා මේ තත්වය වහන්න බලනවා. මේ අර්බුදය කොවිඩ් නිසා ඇති වුණා නොවෙයි කියලා මොළේ කළඳක් හරි තිබෙන අයට තේරේනවා." යැයි ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා පවසයි.

පක්ෂ මූලස්ථානයේ පැවති මාධ්‍ය හමුවකදී අදහස් දක්වමින් ඔහු මේ බව සඳහන් කළ අතර වැඩිදුරටත් මෙසේද පැවසීය.

ජනාධිපති, අගමැති ඇතුළු ආණ්ඩුව කරමින් ඉන්නේ අර්බුදය පාලනය කරන එක වෙනුවට අර්බුදය ජනතාවට කියන ප්‍රකාශයෙක් වෙලා. ඇත්ත කියන්නෙත් නැහැ. බංකොලොත් වුණාට පස්සේ අත්‍යවශ්‍ය නොවන භාණ්ඩ 367ක් තහනම් කරන්න තීන්දුවක් ගත්තා. මේ තීන්දුව විසින් තව අර්බුද රැසක් ඇති කරනවා. විවෘත ආර්ථික ප්‍රතිපත්තිය විසින් පරිභෝජනවාදී සමාජයක් ඇතිකර තිබෙන යුගයක අත්‍යවශ්‍ය නොවන භාණ්ඩ නම් කිරීමම අර්බුදයක්. මේ නිසා ස්වයංරැකියා ගණනාවක් බිඳ වැටෙනවා. උදාහරණයක් හැටියට රූපලාවන්‍ය මධ්‍යස්ථාන විශාල ප්‍රමාණයක් බිඳ වැටී රැකියා නැතිවෙනවා. ආණ්ඩුව අනුගමනය කරන ක්‍රියාමාර්ග විසින් තව තවත් අර්බුද වැඩි කරනවා. රුපියල කොතනින් නතර වෙයිද කියලා කිසිකෙනෙකුට කියන්න බැහැ. නූල කැඩුණු සරුංගලය වගේ පාවී යනවා. දැවැන්ත ව්‍යසනයකට රට පත්කරලා එයින් පීඩාවට පත්වෙන්නේ මේ රටේ කාන්තාවන් ඇතුළු සාමාන්‍ය ජනතාව. ඉගෙන ගන්නා දරුවන්ට පවා දරාගන්න බැරි අපේ රටේ ඉතිහාසයේ දැවැන්තම ආර්ථික අවපාතයට හෙලා තිබෙනවා.

ජනාධිපතිවරයා ඇතුළු කණ්ඩායම මේ තත්වය තේරුම් අරගෙන නැහැ. මේ තුළින් ජනතාවට දැනෙන වේදනාව තේරුම් අරගෙන නැහැ. ඉස්කෝලේ ළමයි අධ්‍යාපන චාරිකා යනවා වගේ ජනාධිපතිවරයා එක් එක් ආයතනවලට යනවා. ෆොටෝ ගහනවා. ඇත්ත ගත්තොත් ජනාධිපති මේ අර්බුදයෙන් ආතල් ගනිමින් ඉන්නේ. වීරවංශ මහත්තයලා, උදය ගම්මන්පිල මහත්තයලා එකතු වෙලා, මහතීර් මොහොමඩ්ට, ලී ක්වාන් යූට, අන්දලා ගෙනාවාට ජනාධිපති ළමා මනසක් තිබෙන පුද්ගලයෙක්. තවදුරටත් මෙහෙම යන්න බැහැ. දැන් ඇති කියන තත්වයට පත්වෙලා තිබෙන්නේ. ආණ්ඩුවේ ඇමතිවරුන් වෙනත් කතා කියලා මේ තත්වය වහන්න බලනවා. මේ අර්බුදය කොවිඩ් නිසා ඇති වුණා නොවෙයි කියලා මොළේ කළඳක් හරි තිබෙන අයට තේරේනවා. යුක්රේන් අර්බුදය ලෝක වෙළඳ පොළේ තෙල් මිල වැඩිවීමට කිසියම් ප්‍රමාණයකින් බලපා තිබෙනවා. නමුත් අපේ රටේ තෙල් මිල වැඩිවෙන්නේ යුක්රේන් අර්බුදය නිසා පමණක් නොවෙයි. ලෝක වෙළඳ පොළේ තෙල් මිල වැඩිවීමට අමතරව රුපියල කඩාවැට්ටීම නිසාත් තෙල් ලමි වැඩි වෙනවා. අපේ රටේ රුපියල කඩා වැටීමට යුක්රේන් අර්බුදයේ තිබෙන බලපෑම මොකක්ද? ශක්තිමත් ආර්ථිකයක් තිබුණා නම්, පාලනය කර ගන්න තිබුණා. 2019 ඡන්ද රැස්වීම්වල, මාධ්‍ය සාකච්ඡාවල වීරවංශ මහත්තයලා “ලෝක වෙළඳ පොළේ තෙල් මිල වැඩිවීම නිසා මිල වැඩි කරන්න නම් ආණ්ඩුවක් මොකටද?” කියලා ඇහුව හැටි අපට මතකයි. යුක්රේනයේ යුද්ධයක් ඇති වෙනකොට අපේ රටේ ආර්ථිකය කඩා වැටෙනවා නම් ආණ්ඩුවක් මොකටද? යුද්ධය පෙන්නලා තක්කඩිකමෙන් නොයෙක් ප්‍රචාරයන් ගෙන යනවා.

කොවිඩ් නිසා සංචිත බිඳ වැටුණද? නැහැ. 2019 - 2021 අතර කාලයේ අපට කිට්ටු රටවල තත්වය මාධ්‍යවල පළකර තිබුණා. ඉන්දියාවේ විදෙස් සංචිත 39%කින්, බංගලාදේශයේ 42%කින්, භූතානයේ 35%කින්, පකිස්ථානයේ 33%කින්, පිලිපීනයේ 24%කින්, මැලේසියාවේ 13%කින්, ඉන්දුනීසියාවේ 12%කින්, තායිලන්තයේ 10%කින් වැඩිකර ගෙන තිබෙනවා. හැබැයි ලංකාව 79%කින් අඩුකර ගෙන තිබෙනවා. අපට ඩොලර් ලැබෙන මාර්ග සියල්ලම විනාශ කරගත් නිසා මේ තත්වය ඇති වුණා. අනික් පැත්තෙන් අවුරුද්දකදී ඩොලර් බිලියන 6කට වැඩිය ණය වාරික සහ පොලී ගෙවන්න සිදුවෙලා තිබෙනවා. අපේ රට අනුගමනය කළ වැරදි ආර්ථික ප්‍රතිපත්තිය තක්කඩිකමකින් කොවිඩ් හරි යුක්රේන් යුද්ධය හරි පෙන්නලා වහන්න හදනවා.

විදුලි බිල්පත ඉතාම බරපතළ අගයකින් ඉහළ දැමීමේ සූදානමක් සම්බන්ධයෙන් හිටපු අමාත්‍ය පාඨලී චම්පික රණවක අනතුරු අඟවයි.

සමාජ මාධ්‍ය වෙත වීඩියෝවක් නිකුත්කරමින් හිටපු අමාත්‍යවරයා පවසන්නේ නැති බැරි, දුප්පත් ජනතාවගේ විදුලි බිල 500% කින් වැඩි කරන ප්‍රතිපත්තියක්
බලශක්ති අමාත්‍යංශය යෝජනා කර ඇති බවයි.

පාඨලී චම්පික රණවක මන්ත්‍රීවරයා ගේ අදාළ අදහස් දැක්වීම සහිත වීඩියෝව පහත දැක්වෙයි.

ඉන්ධන ඒකාධිකාරය ඉන්දියන් ඔයිල් සමාගමටත් විදුලිය ඒකාධිකාරය ඇමරිකන් නිව් ෆෝට‍්‍රස් සමාගමටත් නුදුරේදීම හිමි විය හැකි බව තෙල්, වරාය, විදුලිය ඒකාබද්ධ සන්ධානයේ කැඳවුම්කරු රංජන් ජයලාල්  පැවසීය.

ජනතාව ද සිපෙට්කො ඉන්ධන හල්වල සිට ඉන්දියන් ඔයිල් හල්වලින් ඉන්ධන ගැනීමට කටයුතු කිරීමත් සමගම මෙරට බලධාරීන් සිපෙට්කො හල්වලට ඉන්ධන සැපයුම අඩුකරන බවත් ඔහු කීය.

මේ නිසා සිපෙට්කො සතුව තිබූ ඉන්ධන බෙදා හැරීමේ බලය ඉන්දියන් ඔයිල් සමාගමට නතුවන බවත් මේ ආකාරයෙන් විදුලි සැපයුම ද වැඩි දිනක් යෑමට පෙර ඇමරිකන් නිව් ෆෝට‍්‍රස් සමාගම බත්තලක් සහිත නැවක් මෙරටට ගෙන්වා එල්. එන්. ජී. මගින් විදුලිය ලබාදීමට කටයුතු කරනු ඇති බවත් ඔහු කීය. ඒ හරහා විදුලි ඒකාධිකාරය ද එම සමාගමට හිමිවන බවත් ඔහු කීය.

රටේ විදුලිය අවශ්‍යතාවය වන මෙගාවොට් 2700 ක සම්පූර්ණ ප‍්‍රමාණය ද ඇමරිකන් එල්. එන්. ජී නැවකින් ලබාදීමට හැකි තාක්‍ෂණය ඔවුන් සතුව පවතින බවත් ජයලාල් මහතා වැඩිදුරටත් පැවසීය.

දිවයින

සිපෙට්කෝ සහ ලංකා IOC විසින් සිදුකළ මහා පරිමාණ ඉන්ධන මිල ඉහළ දැමීම හමුවේ පොදු ප්‍රවාහන සේවා ගාස්තු ද අහස උසට යාමේ තත්ත්වයක් උද්ගතව ඇත.

ඒ සම්බන්ධයෙන් අදහස් දක්වමින් සමස්ත ලංකා පෞද්ගලික බස්රථ සම්මේලනයේ ප්‍රධාන ලේකම් අංජන ප්‍රියන්ජිත් පවසා ඇත්තේ ඉන්ධන මිල ඉහළ යාමත් සමග බස් ගාස්තුව 60%කින් පමණ ඉහළ දැමීට සිදුවන බවයි.

ඒ අනුව අවම බස් ගාස්තුව රුපියල් 30ත් 35ත් දක්වා ඉහළ දැමීමට සිදුවන බව ඔහු අවධාරණය කර ඇත.

මාධ්‍යට අදහස් දක්වමින් සමස්ත ලංකා පෞද්ගලික බස්රථ සම්මේලනයේ ප්‍රධාන ලේකම් අංජන ප්‍රියන්ජිත් පවසා ඇත්තේ බස් ගාස්තුව ඉහළ නොදැමීමට නම් පෞද්ගලික බස් රථ සඳහා රජයෙන් යම්කිසි සහනයක් ලබාදිය යුතු බවයි.

“සමහර නගරවල තියෙන්නේ IOC පිරවුම්හල් පමණයි. සමහර නගරවල සිපෙට්කෝ පිරවුම්හල් තිබුණත් තෙල් නොමැතිකම නිසා අපිට සිද්ධ වෙනවා IOC පිරවුම්හලෙන් ඩිසල් ලබාගැනීමට. ඊයේ දිනයෙදීත් අපි එක කළා අද දිනයෙදීත් ඒක කරන්න වෙනවා. එතකොට මෙරතරම් ප්‍රමාණයකින් රුපියල් 93කින් ලීටරයක මිල ඉහළයාම පාදක කරගෙන බස්ගාස්තු සංශෝදනය 60%කින් වගේ ඉහළ යන්න ඉඩකඩ තියෙනවා. රුපියල් 30ක අගයකින් බස් ගාස්තු වැඩි වෙනවා. අවම බස් ගාස්තුව රුපියල් 30ත් 35ත් අතර අගයකින් වැඩිකරන්න අපිට සිද්ධ වෙනවා. ඒ නිසා අපි රජයට කියනවා වහාම ක්‍රියාත්මක වෙන පරිදි අද හෝ හෙට පෞද්ගලික බස් කර්මාන්තකරුවන්ට ඩීසල් සහනාධාරය ලබා දීම සිදු කළ යුතුයි.”

මේ සම්බන්ධයෙන් අදහස් දක්වා ඇති ලංකා පෞද්ගලික බස් හිමියන්ගේ සංගමයේ සභාපති ගැමුණු විජේරත්න පවසා ඇත්තේ ලංගම හරහා ඩීසල් ලබාදීමේ ක්‍රමවේදයක් සකස් කළහොත් මිල සංශෝධනයක් සිදු කිරීමට අනවශ්‍ය බවය.