පුවත්

සර්ව පාක්ෂික රජයක් පිහිටුවීමට එකඟත්වයක් ඇතිවූ වහාම, එකී පාර්ශ්වය වෙත වගකීම් භාර දීමට තමන් සූදානම් බව අග්‍රාමාත්‍ය රනිල් වික්‍රමසිංහ ඇතුළු කැබිනට් මණ්ඩල සාමාජිකයින් පවසයි.

අග්‍රාමාත්‍ය රනිල් වික්‍රමසිංහ, අමාත්‍ය මණ්ඩලයේ පිරිසක් සමඟ අද ‍(11) පෙරවරුවේ අග්‍රාමාත්‍ය කාර්යාලයේ දී විශේෂ සාකච්ජාවක් පවත්වා ඇත.

මෙකී සාකච්ඡාවට සහභාගී වූ සියලුම අමාත්‍යවරුන්ගේ අදහස වී ඇත්තේ සර්ව පාක්ෂික රජයක් පිහිටුවීමට එකඟත්වයක් ඇතිවූ විගස, නව රජයට වගකීම් භාර දීම ය.

එසේ නොවුණුහොත් රට අරාජික විය හැකි බව ඔවුන්ගේ අදහසවී ඇති බවත් වාර්තා වෙයි .

ඒ අනුව වත්මන් කැබිනට් මණ්ඩලය සර්ව පාක්ෂික ආණ්ඩුවක් පිහිටුවන තෙක් කටයුතු කරනු ඇත.

අලුත් ආණ්ඩුව හදන්න අපි සූදානම්! - සජිත්

මේ අතර විපක්ෂනායක සජිත් ප්‍රේමදාස පවසන්නේ ආණ්ඩුවේ ජනවරම අවසන් බවත්, තමන් අලුත් ආණ්ඩුව ස්ථාපිත කිරීමට සුදානම් බවය.

මේ වන විට ඒ වෙනුවෙන් ඔවුන් විශේෂ කමිටුවක් පත්කර ඇති බවත් වාර්තා වෙයි .

ඉන්දීය හමුදා සෙබළුන් ශ්‍රී ලංකාවට යොමු කරන බවට පළවූ සමහර මාධ්‍ය සහ සමාජ මාධ්‍ය ඔස්සේ පළවූ කරුණු තරයේ ප්‍රතික්ෂේප කරන බව ශ්‍රී ලංකාවේ ඉන්දියානු මහ කොමසාරිස් කාර්යාලය පවසයි .

නිවේදනයක් නිකුත් කරමින් ඉන්දීය මහ කොමසාරිස් කාර්‍යාලය මේ බව සඳහන් කරන අතර , නිකුත්කළ වාර්තා සහ අදහස් ඉන්දියානු රජයේ ස්ථාවරය නොවන බවත් පවසයි .

ඉන්දියාව සෞභාග්‍ය සහ ප්‍රගතිය උදෙසා ව්‍යවස්ථානුකූල ප්‍රජාතන්ත්‍රවාදී මාර්ග ඔස්සේ තම අභිලාෂයන් ඉෂ්ඨ කර ගැනීමට උත්සහ දරන ශ්‍රී ලාංකික ජනතාව සමඟ සිටින බව ඉන්දීය විදේශ කටයුතු අමාත්‍යංශයේ ප්‍රකාශකයා පැහැදිලිව සඳහන් කළ බව එම නිවේදනයේ වැඩි දුරටත් සඳහන් කර ඇත .

කඩිනම් මැතිවරණයකට යන තුරු ස්ථාපනය කරන අන්තර්කාලීන ආණ්ඩුවේ අරමුණ හා සංයුතිය අනුව තම පක්ෂයට පැවරෙන වගකීම ඉටු කිරීමට සූදානම් බව ජාතික ජන බලවේගයේ නායක, කොළඹ දිස්ත්‍රික් පාර්ලිමේන්තු මන්ත්‍රී අනුර කුමාර දිසානායක පැවසීය.

රටේ අරගලකරුවන් අපේක්ෂා කරන දේශපාලන හා ආර්ථික වෙනස සම්පූර්ණයෙන් ස්ථාපනය කිරීම ස්ථිර කළ හැක්කේ ලැබෙන ජනතා වරම අනුව බැවින් එතෙක් ජනතාවගේ පොදු වූත් ප්‍රධාන වූත් ගැටලු කිහිපය කඩිනමින් විසඳිය යුතු බව ඔහු පෙන්වා දුන්නේ ය.

මෙම ජනතා අරගලයේ සැබෑ අරමුණ තුළ විශාල ගැඹුරක් තිබෙන බැවින් එය ක්‍රමානුකූලව කළ යුතු බවත් ඒ අනුව ඉදිරි තීන්දු කඩිනමින් දැනුම් දෙන බව ත් මන්ත්‍රීවරයා කීය.

මුලින් ම ජනාධිපති ගෝඨාභය රාජපක්ෂ තව ත් “අලුත් අලුත් ජිල්මාට් නොදා” වහා ම ඉවත් විය යුතු බව ත් ඒ සමග ම අගමැති රනිල් වික්‍රමසිංහ ද විවිධ තර්ක විතර්ක කරමින් බලයේ රැඳී සිටීමට ප්‍රයත්න නොදරා ඔහු ද ඉවත් විය යුතු බව ත් පැවසීය.

විශේෂයෙන් ම රටේ දේශපාලනයේ ත්, ආර්ථිකයේ ත්, සංස්කෘතිය තුළත් වෙනස් විය යුතු විශාල කරුණු රාශියක් අරගලය තුළ තිබෙන අතර ඒවා ඉටු කිරීම වෙනුවෙන් තම දේශපාලන ව්‍යාපාරය ඉදිරියට ඇපකැප වන බව ඔහු සහතික කළේ ය.

එම නිසා ඉදිරි තීන්දු කඩිනමින් දැනුම් දෙන බව ත් ඊට කලබල විය යුතු නැති බව ත් මන්ත්‍රීවරයා සඳහන් කළේ ය.

මෙම ජයග්‍රහණය ස්ථිර ජයග්‍රහණයක් බවට පත්කිරීමට නම්, ජනතාවගේ අරගලයේ සැබෑ හරය තේරුම් ගත යුතු බවත් ගෝඨාභය – රනිල් එළවීමෙන් ම පමණක් එය ඉටු නොවන බව ත් ඔහු පැවසීය.

- මව්බිම

කැබිනට් අමාත්‍යවරුන් සියලු දෙනා ම සිය ධුරවලින් ඉල්ලා අස්වීමට තීරණය කර ඇති බව වාර්තා වෙයි .

සර්වපාක්ෂික ආණ්ඩුවට ඉඩ සලසමින් මෙම තීන්දුව ගන්නා ලද බව අමාත්‍ය විජයදාස රාජපක්ෂ අද (11) සඳහන් කළේය.

මහින්දට ජනාධිපති ආරක්ෂාවක් !

මේ අතර වාර්තා වන්නේ කතානායක මහින්ද යාපා අබේවර්ධනගේ නිල නිවසේ ආරක්ෂක විදිවිධාන තරකර ඇති බව ය.

මේ වන විට එම නිවසේ ආරක්‍ෂාව සදහා පොලිස් විශේෂ කාර්ය බලකායේ අමතර බට පිරිස් කැදවා ඇති බවත් වාර්තා වෙයි .

ගෝටාභය රාජපක්‍ෂ ජනාධිපති ධුරයෙන් ඉවත් වීමෙන් පසු මහින්ද යාපා අබේවර්ධන වැඩබලන ජනාධිපති ලෙස පත් කිරීමට නියමිතව ඇත.

විපක්ෂයේ රැසක් : ජනාධිපති සහ අගමැති වෙන්න සූදානම් !

මේ අතර රාජපක්ෂ හිතවාදී දෙරණ මාධ්‍ය ජාලයේ අරුණ පුවත්පත වාර්තා කර ඇත්තේ , පාර්ලිමේන්තුව නියෝජනය කරන දේශපාලන පක්ෂවල නායකයන්ගේ අද (11) පැවැත්වීමට නියමිත විශේෂ රැස්වීමෙන් පසු ලබන බදාදා (13) පාර්ලිමේන්තුව රැස්වීමට ආණ්ඩුව තීරණය කර ඇති බවය.

අදාළ පුවත වැඩිදුරටත් මෙසේද සඳහන් කර ඇත .

කතානායක මහින්ද යාපා අබේවර්ධනගේ ප්‍රධානත්වයෙන් පක්ෂ නායක රැස්වීම අද (11) උදෑසන එකොළහට පාර්ලිමේන්තුවේදී පැවැත්වෙයි.

එහිදී ලබන සතියේ පාර්ලිමේන්තුවේ වැඩකටයුතු පිළිබඳව සාකච්ඡා කිරීම ප්‍රධාන අරමුණ වෙයි.

ලබන බදාදා (13) පාර්ලිමේන්තුව රැස්වී ජනාධිපති ගෝඨාභය රාජපක්ෂගේ ඉල්ලා අස්වීමේ නිවේදනය ප්‍රකාශයට පත්කිරීමෙන් පසු නව ජනාධිපතිවරයකු පත්කර ගැනීමට නියමිතය. මෙහිදී ජනාධිපතිවරයා ඉවත්වීමෙන් පසු මසක කාලයක් සඳහා වැඩ බලන ජනාධිපතිවරයා ලෙස අගමැතිවරයා පත්කිරීම එක් ක්‍රමයකි. එසේ නොමැති නම් මසක කාලයක් සඳහා කථානායකවරයා වැඩබලන ජනාධිපති ධුරයට පත්කිරීමට පාර්ලිමේන්තුවට හැකියාව ඇත. එසේ නොමැති නම් පාර්ලිමේන්තුව තුළින් අගමැතිවරයකු හා ආණ්ඩුවක් පත්කර ජනාධිපතිවරයාට දැනුම් දීම තවත් ක්‍රමයකි.

ඉන්පසු ජනාධිපතිවරයා ධුරයෙන් ඉවත්ව එම ආණ්ඩුවෙන් නම් කරන පාර්ලිමේන්තු මන්ත්‍රීවරයකු ජනාධිපතිවරයා ලෙස පත්කර ගැනීමට හැකිය.

කෙසේ වෙතත් ජනාධිපති ධුරය සඳහා අගමැති රනිල් වික්‍රමසිංහ, ඇමැතිවරුන් වන දිනේෂ් ගුණවර්ධන, මහචාර්ය ජී.එල්. පීරිස්, පාර්ලිමේන්තු මන්ත්‍රීවන් වන සරත් ෆොන්සේකා හා පාඨලී චම්පික රණවකගේ නම් යෝජනා වී ඇති බව දේශපාලන ක්ෂේත්‍රයේ ඊයේ (10) කතාබහට ලක්වී තිබිණ. අගමැති ධුරය සඳහා පාර්ලිමේන්තු මන්ත්‍රීවරුන් වන පාඨලී චම්පික රණවක, ඩලස් අලහප්පෙරුම හා අනුර කුමාර දිසානායකගේ නම් යෝජනා වී ඇති බවට කතා බහට ලක්විය. මේ අතර ශ්‍රී ලංකා පොදුජන පෙරමුණේ මන්ත්‍රීවරු පිරිසක් යෝජනා කර ඇත්තේ මෙම අවස්ථාවේදී ජාතික ජන බලවේගයේ පාර්ලිමේන්තු මන්ත්‍රී අනුර කුමාර දිසානායකට අගමැති ධුරය භාරදිය යුතු බවයි. එහෙත් ඇතැම් මන්ත්‍රීවරු ප්‍රකාශ කර ඇත්තේ පවතින තත්ත්වය මත විපක්ෂයට යාම සුදුසු බවයි.

මේ අතර සමගි ජන බලවේගයේ නායක සහ විපක්ෂ නායක සජිත් ප්‍රේමදාස හා පාර්ලිමේන්තු මන්ත්‍රී ඩලස් අලහප්පෙරුම ජනාධිපති සහ අගමැති ධුරවලට නම් කිරීමේ යෝජනාවකට දේශපාලන පක්ෂ කිහිපයක සහභාගිත්වයෙන් ඊයේ (10) පැවැති සාකච්ඡාවකදී එකඟත්වයට පත්ව ඇත.

නුගේගොඩ ජුබලිකණුව ප්‍රදේශයේ පිහිටි පාර්ලිමේන්තු මන්ත්‍රි තලතා අතුකෝරලගේ නිවසේදී මෙම සාකච්ඡාව පැවැත්විණි. සමගි ජන බලවේගයෙ, ශ්‍රී ලංකා නිදහස් පක්ෂය, මන්ත්‍රි විමල් වීරවංශ නායකත්වය ලබාදෙන දේශපාලන පක්ෂ දහයේ නියෝජිතයන්, මන්ත්‍රි අනුර ප්‍රියදර්ශන යාපාගේ නායකත්වයෙන් යුත් ස්වාධීන කණ්ඩායමේ නියෝජිතයන් මීට එක්ව සිටියහ.

අදාළ නම් දෙක පාර්ලිමේන්තුවේදී යෝජනා කර බෙදීමක් ඇති නොවන පරිදි සම්මුතියකින් කටයුතු කිරීමේ මැදිහත්වීම පිළිබඳවද මෙහිදී සාකච්ඡා කර ඇත. ශ්‍රී ලංකා නිදහස් පක්ෂ සභාපති හිටපු ජනාධිපති මෛත්‍රිපාල සිරිසේන මෙම සාකච්ඡාවට කලින් සහභාගි වන බව දැනුම් දී තිබුණත් පසුව සහභාගි වූයේ නැත.

කෙසේ වෙතත් සාකච්ඡාවෙන් පසු මන්ත්‍රි විමල් වීරවංශ මාධ්‍ය සඳහා ප්‍රකාශයක් ලබාදීමට සූදානම් වූ අවස්ථාවේදී කිසියම් පුද්ගලයකු විරෝධය පළ කිරීම නිසා මන්‍ත්‍රිවරයා සිය වාහනයේ නැගී පිටව ගියේය.

– අරුණ

අරගලයේ ඉදිරි දිශානතිය සම්බන්ධයෙන් නිවේදනයක් විපක්ෂ නායක සජිත් ප්‍රේමදාස විසින් නිකුත්කර ඇත .

ඊට අනුව අරගලයට මුවාවී,කිසියම් අවස්ථාවාදී සහ කඩාකප්පල්කාරී පිරිසක් විසින් සිදු කරනු ලබන දේපල විනාශ කිරීම්,ගිනි තැබීම් සහ ජනජීවිත ව්‍යාකූල කරවන සුළු සිදුවීම් වල නිරතවෙයි.

විපක්ෂ නායක සජිත් ප්‍රේමදාස ගේ මෙකී නිවේදනය අනුව අරගලයේ මූලික කොන්දේසි ආරක්ෂා කරගන්නට නොහැකි තත්ත්වයක් මේ වන විට නිර්මාණය වී ඇත.

විපක්ෂ නායක නිකුත්කළ නිවේදනය පහත දැක්වෙයි .

ප්‍රචණ්ඩත්වය හෙළා දකිමු!

අගමැති රනිල් වික්‍රමසිංහ මහතාගේ නිවස ඉලක්ක කරගෙන කිසියම් කඩාකප්පල්කාරී පිරිසක් විසින් සිදුකළ ගිනිතැබීම අපි පිළිකුලෙන් යුතුව හෙළා දකින අතර එකී සිදුවීමට සම්බන්ධ සියලු දෙනාට එරෙහිව සාධාරණ පරීක්ෂණයක් පවත්වා තරාතිරම නොබලා දඬුවම් ලබා දිය යුතු බව අවධාරණය කරමු.

ප්‍රජාතන්ත්‍රවාදය මානව හිමිකම් සහ සාධාරණත්වය රජයන සමාජයක් වෙනුවෙන් මේ රටේ සමස්ත ජනතාව පුරවැසි අරගලයකට එක්වූ අතර එහි උදාර අරමුණු කිසිම විටක පාවා නොදෙන්නට තරම් ඔවුන් විනයගරුක හා ශිෂ්ට සම්පන්න වූ බව අප තිරව විශ්වාස කරමු.

එහෙත් එකී අරගලයට මුවාවී,කිසියම් අවස්ථාවාදී සහ කඩාකප්පල්කාරී පිරිසක් විසින් සිදු කරනු ලබන දේපල විනාශ කිරීම්,ගිනි තැබීම් සහ ජනජීවිත ව්‍යාකූල කරවන සුළු සිදුවීම් වලට අපි කොන්දේසි විරහිතව එරෙහි වෙමු.

පසුගිය දින කිහිපය තුළ, අරගල කරුවන්, මාධ්‍යවේදීන්,සිවිල් පුරවැසියන් ඇතුළු විශාල පිරිසකට ද ප්‍රචණ්ඩත්වයට මුහුණ දීමට සිදු වූ අතර ඒ පිළිබඳව ද පුළුල් පරීක්ෂණ පැවැත්විය යුතු බව අපි අවධාරණය කරමු.

ප්‍රචණ්ඩත්වයෙන් තොර සාමකාමී රටක් වෙනුවෙන් මෙතෙක් කල් සුරක්ෂිතව රැකගෙන ආ පුරවැසි අරගලයට කළු පැල්ලම් එක් කිරීමට වෙර දරන පිටස්තර බලවේග පිළිබඳව අපි අවධානයෙන් සිටිමු යැයි සමස්ත සමාජයෙන් ඉල්ලා සිටිමු.

මේ එළඹ ඇත්තේ ඉතාම තීරණාත්මක මොහොතක් හෙයින් සංසුන්ව සාමකාමීව,ප්‍රජාතන්ත්‍රවාදය සුරක්ෂිත කරමින් සංහිඳියාව පෙරදැරිව කටයුතු කරන්නට එක්වන්න යැයි සමස්ත පුරවැසියන්ට ගෞරවයෙන් ආරාධනා කරමු.

සජිත් ප්‍රේමදාස
විපක්ෂ නායක

අග්‍රාමාත්‍ය රනිල් වික්‍රමසිංහ ගේ පෞද්ගලික නිවසට ගිනි තැබීම ඇතුළුව දේපළ හානි කිරීම ශ්‍රී ලංකා නීතිඥ සංගමය විසින් හෙළාදැක නිවේදනයක් නිකුත්කර ඇත .

මෙවැනි ක්‍රියාවන් ශ්‍රී ලංකාවේ ආර්ථිකයට හා ජනතාවට විශාල හානියක් සිදු කරනු ඇති බවත් මෙවැනි ක්‍රියාවන් නොකරන ලෙසටද වෙනත් අයට මෙවැනි පහත් සාපරාධී ක්‍රියාවන් කිරීමට ඉඩ නොදෙන ලෙසටද ඉල්ලා සිටින බවත් අදාළ නිවේදනය සඳහන් කරයි.

ශ්‍රී ලංකා නීතිඥ සංගමයේ සභාපති සහ ලේකම් ගේ අත්සනින් නිකුත්කළ නිවේදනය පහත දැක්වෙයි .

ශ්‍රී ලංකාවේ සියලු දේශපාලන පක්ෂ ප්‍රජාත්නත්‍රවාදී,සාමකාමී බල හුවමාරුවකට අවධානය යොමු කළ යුතු බව යුරෝපා සංගමයේ ශ්‍රී ලංකා කාර්යාලය නිවේදනය කර ඇත .

ඒ සඳහා සියලු දේශපාලන පක්ෂ සහයෝගය ලබා දෙන ලෙසත් යුරෝපා සංගමයේ ශ්‍රී ලංකා කාර්යාලය නිවේදනය කර ඇති අතර ඒ, ට්වීටර් ගිනුමේ සටහනක් තබමින් ය.

ශ්‍රී ලංකාවේ උද්ගත වී ඇති තත්ත්වයට විසඳුමක් ලබා ගැනීමට මාර්ගය සකස් කරමින් ශ්‍රී ලංකාව සාමාන්‍ය තත්ත්වයට පත් කිරීම සියලු දේශපාලන පක්ෂ නායකයින්ගේ වගකීමක් බවත් එම සටහනේ දැක්වෙයි .

එසේම ශ්‍රී ලංකා ජනතාවට ලබා දෙන සහාය ඉහළ දැමීම සඳහා ගත හැකි ක්‍රියාමාර්ග සොයා බලමින් සිටින බවත් එහිදී වැඩිදුරටත් සඳහන් කර ඇත .

ඇමරිකානු නිවේදනය !

මේ අතර ශ්‍රී ලාංකික ජනතාවට සෑහීමකට පත් විය හැකි දිගු කාලීන ආර්ථික සහ දේශපාලනික විසඳුම් ළඟා කර ගැනීම සඳහා ඉක්මණින් කටයුතු කරන ලෙස ඇමෙරිකා එක්සත් ජනපදය ශ්‍රී ලංකාවේ දේශපාලන පක්ෂවලින් ඉල්ලා ඇත .

ඇමෙරිකා එක්සත් ජනපද රාජ්‍ය දෙපාර්තමේන්තුවේ ප්‍රකාශකයෙක් මේ ඉල්ලීම සිදුකර ඇත .

එක් දේශපාලන පක්ෂයක අභිවෘද්ධිය සඳහා නොව ශ්‍රී ලංකාවේ අභිවෘද්ධිය සඳහා මේ අවස්ථාවේ කටයුතු කරන ලෙස ශ්‍රී ලංකා පාර්ලිමේන්තුවෙන් ඉල්ලා සිටින බවත් එහිදී සඳහන් කර ඇත .

ශ්‍රී ලාංකික ජනතාවට සෑහීමකට පත්විය හැකි දිගු කාලීන ආර්ථික ස්ථාවරත්වයක් ළඟා කර ගත හැකි විසඳුම් ඉක්මණින් හඳුනා ගනිමින් ක්‍රියාත්මක කරන ලෙස මෙම රජයෙන් හෝ ව්‍යවස්ථානුකූලව පත්වන නව රජයෙන් ඇමෙරිකා එක්සත් ජනපදය ඉල්ලා සිටින බවත් අදාළ ප්‍රකාශයේ වැඩිදුරටත් සඳහන් වේ.

එහිදී විරෝධතාකරුවන්ට සහ මාධ්‍යවේදීන්ට පහර දීම පිළිබඳ අප්‍රසාදය පළ කළ අතර සෙනසුරාදා විරෝධතාවයේදී ඇති වූ ප්‍රචණ්ඩත්වයද විවේචනයට භාජනය කර ඇත .

සර්වපාක්ෂික ආණ්ඩුවක් පිහිටුවීම සඳහා මේ වන විට දේශපාලන පක්ෂ රැසක් සාකච්ඡා සභා රැසක් ක්‍රියාත්මක කර ඇති බව දේශපාලන ආරංචි මාර්ග සඳහන් කරයි.

ඊට අදාළ සාකච්ඡා සභා කිහිපයක් අද (10) දිනයේ ද පැවැත්වෙන බවත් වාර්තා වෙයි .

ඒ අනුව පක්ෂ 09 කණ්ඩායමේ නායකයින්ගේ හමුවක් අද පැවැත්වීමට නියමිත බව කොමියුනිස්ට් පක්ෂයේ උප සභාපති පාර්ලිමේන්තු මන්ත්‍රී වීරසුමන වීරසිංහ පවසයි .

එහිදී සර්ව පාක්ෂික ආණ්ඩුවක් සම්බන්ධයෙන් දීර්ඝ ලෙස සාකච්ඡා කිරීමට නියමිත බවත් ඔහු පවසයි .

එසේම සමගි ජන සන්ධානයේ විශේෂ පක්ෂ නායක රැස්වීමක් අද (10) පැවැත්වීමට නියමිත බවත් වාර්තා වෙයි .

සමගි ජනබලවේගය පක්ෂයේ මහ ලේකම් රංජිත් මද්දුමබණ්ඩාර මන්ත්‍රීවරයා පැවසුවේ, සර්ව පාක්ෂික ආණ්ඩුවක් පිහිටුවීම සහ මතුවී ඇති දේශපාලන තත්ත්වය, ඉදිරියේදී ගත යුතු කඩිනම් දේශපාලන තීන්දු රැසක් ගැනීමේ අරමුණින් අද රැස්වීම පැවැත්වෙන බවයි.

සමගි ජන බලවේගයේ නායක විපක්ෂ නායක සජිත් ප්‍රේමදාස, ශ්‍රී ලංකා මුස්ලිම් කොංග්‍රසයේ නායක රවුෆ් හකිම්, දමිල ප්‍රගතිශිලි සන්ධානයේ නායක මනෝ ගනේෂන්, සමස්ත ලංකා මහජන කොංග්‍රසයේ නායක රිෂාඩ් බදියුදින් ඇතුළු සමගි ජන සන්ධානය නියෝජනය කරන පක්ෂ නායකයින් මෙම විශේෂ පක්ෂ නායක රැස්වීමට සහභාගිවීමට නියමිත බවත් වාර්තා වෙයි .

ගෑස් මෙට්‍රික්ටොන් 3700 බැගින් රැගත් නෞකා දෙකක් අද (10) සහ හෙට (11) දිනයේදී මෙරටට ලඟාවීමට නියමිත බව වාර්තා වෙයි .

ලිට්‍රෝ සමාගමේ සභාපති මුදිත පීරිස් සඳහන් කරන්නේ අද දිනයේදී මෙරටට ලඟාවීමට නියමිත නෞකාවේ ගෑස් හෙට (11) දිනයේ සිටම බෙදාහැරීමට කටයුතු කරන බවය.

ඒ අනුව ඉදිරි දින දෙක ඇතුළත කොළඹ නගරයේ තෝරා ගත් ස්ථාන 140 කදි ගෑස් සිලින්ඩර් 140,000 ක් බෙදා හැරීමට සැලසුම් කර ඇති බවත් සභාපතිවරයා පවසා ඇත .

මේ වන විට ගෑස් සිලින්ඩරයක මිල රුපියල් 200 කින් පමණ වැඩි කළ යුතු වුවත්, ජනතාව විඳින පීඩාවන් පිළිබඳව අවධානය යොමු කර රුපියල් 50 කින් පමණක් මිල වැඩි කිරීමට තීරණය කර ඇති බවද ලිට්‍රෝ සමාගමේ සභාපති මුදිත පීරිස් වැඩිදුරටත් සඳහන් කර තිබේ.

ඉන්දියාවෙන් මෙරටට ලැබුණු යූරියා පොහොර තොගය ඊයේ (09) මෙරටට ළඟා වූ බවත් අද (10) එය ඉන්දීය මහ කොමසාරිස් විසින් කෘෂිකර්ම අමාත්‍යවරයා වෙත නිල වශයෙන් බාරදෙනු ඇති බවත් වාර්තා වෙයි .

වාර්තා වන ආකාරයට අදාළ පොහොර තොගය මෙට්‍රික් ටොන් 40000කි.

මේ අතර කෘෂිකර්ම අමාත්‍යංශය පවසන්නේ අදාළ පොහොර තොගය 10 ක් ඇතුළත ගොවීන් වෙත බෙදාහරින බවයි .

එම අමාත්‍යාංශයේ ලේකම් රෝහණ පුෂ්පකුමාර පැවසුවේ එම පොහොර ගොවිජන සේවා මධ්‍යස්ථාන වෙත ප්‍රවාහනය කිරීම සදහා අවශ්‍ය ලොරි රථ මේ වනවිටත් සූදානම් කර ඇති බවය.

මේ අතර පොහොර තොගය නිල වශයෙන් බාරගැනීමෙන් පසුව තමන් කෘෂිකර්ම අමාත්‍ය ධූරයෙන් ඉල්ලා අස්වීම ප්‍රකාශ කරන බව කෘෂිකර්ම අමාත්‍ය මහින්ද අමරවීර පවසා ඇත .

 රට තුළ යළි නිතිය හා සාමය ඇතිකරලීමේ වගකීම බාරගැනීමට තමා සුදානම් බව පාර්ලිමේන්තු මන්ත්‍රී  ෆීල්ඩ් මාර්ෂල් සරත් ෆොන්සේකා තම දේශපාලන හිතවතුන් හට පවසා ඇති බව වාර්තා වෙයි .

දේශපාලන ආරංචි මාර්ග සඳහන් කරන්නේ  ජනාධිපති ගෝඨාභය රාජපක්ෂ ලබන 13 දා ඉල්ලා අස්වීමෙන් පසුව මසක් ඇතුලතදී පාර්ලිමේන්තුව තුළ දී පැවැත්වීමට නියමිත ජනාධිපති තෝරා පත්කර ගැනීමේ ඡන්දයට ඉදිරිපත්වීමට මන්ත්‍රීවරයා ගේ සූදානමක් ඇති බවය.
 
එහිදී පාර්ලිමේන්තුව නියෝජනය නොකරන අරගලකරුවන්ගෙ සහය තමන්ට ලැබෙනු ඇති බවට මන්ත්‍රීවරයා විශ්වාසයෙන් සිටින බවත් දැනගන්නට ඇත .

ඊයේ (09) අරගල භූමියේදී, රාජිත සේනාරත්න මන්ත්‍රීවරයා වැන්නවුන් හට විරෝධතා එල්ලවූ නමුත් , පාර්ලිමේන්තු මන්ත්‍රී ෆීල්ඩ් මාර්ෂල් සරත් ෆොන්සේකා හට අරගලය ඇමතීමට පවා අවස්ථාව හිමිව තිබීම කෙරෙහි මේ වන විට සමගි ජනබලවේගය පක්ෂයේ ද අවධානය යොමුව ඇති බවත් දේශපාලන ආරංචි මාර්ග පවසයි . 

ශ්‍රී ලංකාව සමඟ සාකච්ඡා ඉදිරියට පවත්වාගෙන යාම සඳහා ශ්‍රී ලංකාවේ ඇති වී තිබෙන දේශපාලන අස්ථාවරත්වයට ඉක්මණින් විසඳුමක් බලාපොරොත්තු වන බව ජාත්‍යන්තර මූල්‍ය අරමුදල නිවේදනයක් නිකුත් කරමින් ප්‍රකාශ කළේය.

එතෙක් මුදල් අමාත්‍යාංශයේ සහ ශ්‍රී ලංකා මහ බැංකුවේ නිලධාරීන් සමඟ තාක්ෂණික සාකච්ඡා දිගටම කරගෙන යාමට බලාපොරොත්තු වන බව එම නිවේදනයේ දැක්වේ.

එසේම ශ්‍රී ලංකාවේ වත්මන් තත්ත්වය සමීපව නිරීක්ෂණය කරමින් සිටින බවද එම නිවේදනයේ සඳහන් වේ.

ජාත්‍යන්තර මූල්‍ය අරමුදලේ ශ්‍රී ලංකාවේ ජ්‍යෙෂ්ඨ මෙහෙයුම් ප්‍රධානී පීටර් බෘවර් සහ මෙහෙයුම් ප්‍රධානී මසහිරෝ නොසාකි මහත්වරුන් එම නිවේදනය නිකුත් කර ඇත.

ජාත්‍යන්තර මූල්‍ය අරමුදල, අග්‍රාමාත්‍යවරයා මෙන්ම මුදල් අමාත්‍යවරයාද වන රනිල් වික්‍රමසිංහ  සමඟ ප්‍රතිපත්තිමය මට්ටමේ සාකච්ඡා වටයක් පසුගිය දා අවසන් කළ බවත් එහිදී විසඳීමට මූල්‍ය ගැටළු කිහිපයක් තිබෙන බව හඳුනාගත් බවත් විදෙස් මාධ්‍ය වාර්තා කළේය.

ශ්‍රී ලංකාවේ ඇති වී තිබෙන ආර්ථික අර්බුදය හේතුවෙන් ශ්‍රී ලාංකික ජනතාවට විශේෂයෙන්ම අවදානමට ලක් වූ සහ දුප්පත් ජනතාවට එල්ල වන බලපෑම සම්බන්ධයෙන් දැඩි අවධානයෙන් සිටින බවත් තම ප්‍රතිපත්තිවලට අනුකූලව මෙම දුෂ්කර අවස්ථාවේ ශ්‍රී ලංකාවට සහාය දැක්වීමට ඇති කැපවීම යළි අවධාරණය කරන බවත් ජාත්‍යන්තර මූල්‍ය අරමුදල ප්‍රකාශ කළේය.

රටේ සාමය පවත්වාගෙන යාම සඳහා ත්‍රිවිධ හමුදාව සහ පොලීසිය වෙත සහයෝගය ලබාදෙන ලෙස ආරක්ෂක මාණ්ඩලික ප්‍රධානී ජනරාල් ශවේන්ද්‍ර සිල්වා ශ්‍රී ලංකා වාසි ජනතාවගෙන් ඉල්ලා සිටියි.

මේ මොහොතේ රටේ ඇතිව තිබෙන අර්බුදකාරී වාතාවරණ සාමකාමීව සහ ව්‍යවස්ථානුකුලව නිරාකරණය කරගැනීම අතිශයින් වැදගත්බව ඔහු පෙන්වාදෙයි.

ජෙනරල් ශවේන්ද්‍ර සිල්වා මේ ඉල්ලීම සිදු කළේ, විශේෂ මාධ්‍ය හමුවකට එක් වෙමිනි.

ත්‍රිවිධ හමුදාපතිවරුන් වන යුද හමුදාපති ලුතිනන් ජෙනරල් විකුම් ලියනගේ, නාවික හමුදාපති වයිස් අද්මිරාල් නිශාන්ත උළු‍ගේතැන්න, ගුවන් හමුදාපති එයාර් වයිස් මාර්ෂල් සුදර්ශන පතිරණ ද එම මාධ්‍ය සාකච්ඡාවට එක්ව සිටියහ.

දින ගණනාවක් ඉන්දියාවේ නිල සංචාරයකට සහභාගී ව සිටි ජනරාල් ශවේන්ද්‍ර සිල්වා ඇතුළු ආරක්ෂක හමුදා ප්‍රධානින් පිරිසක් යලි වහාම දිවයිනට පැමිණියේ ඊයේ (09) පස්වරුවේදීය.

දේශපාලන නායකයින් හැංගිලා !

මේවනවිට ජනාධිපතිවරයා සැඟවී සිටිමින් සිය ඉල්ලා අස්වීමේ දිනය ප්‍රකාශයට පත්කර ඇති අතර අගමැති රනිල් වික්‍රමසිංහ ද සිය අගමැති ධුරයෙන් ඉවත්වන බවක් දැනුම් දී තිබේ.

බන්ධුල ගුණවර්ධන ඊයේ සිය අමාත්‍ය ධුරයෙන් ඊයේ ඉල්ලා අස්වූ අතර තවත් ඇමතිවරුන් කිහිප දෙනෙකු අද දිනයේ සිය ඉල්ලා අස්වීම් ප්‍රකාශයට පත්කිරීමට නියමිතබව වාර්තාවේ.

එසේම මේවනවිට ආරක්ෂක හමුදාවන් හා පොලිසිය මුළුමනින්ම අකර්මන්‍ය වී ඇති අතර මහජන ආරක්ෂාව මුළුමනින්ම බිඳ වැටි තිබේ.

මෙම තත්වය තුළ ඇතැම් මාධ්‍ය රට පාලනය කිරීමේ වගකීම බාරගෙන තිබෙන බවක් පැහැදිලිව පෙනෙන්නට තිබේ.

අරගලකරුවන් කොළඹ කඳවුරු බැඳගනී !

 ජනාධිපතිවරයා ප්‍රමුඛ ආණ්ඩුවට එරෙහිව විරෝධතා පවත්වමින් ඊයේ කොළඹට එක්රැස්වූ අරගලයේ නිරත සාමාන්‍ය වැසියන් බොහෝ පිරිසක් මේවනවිටත් කොළඹ කොටුව සහ අවට ප්‍රදේශවල රැඳී සිටිති.

අද අලුයම සිදුකළ ක්ෂේත්‍ර චාරිකාවලදී නිරික්ෂණය වුණේ එම විරෝධතාකරුවන්ගෙන් විශාල පිරිසක් මේවනවිටත් ගාලුමුදොර අරගලභූමියේ රැඳී සිටින බවයි.

තවත් පිරිසක් කොටුව ජනාධිපති මන්දිර පරිශ්‍රය තුළත්, තවත් පිරිසක් කොටුව ජනාධිපති ලේකම් කාර්යාල පරිශ්‍රය තුළත් රැඳී සිටිති. ඊට අමතරව කොටුව දුම්රිය ස්ථානයේ ද තවත් විශාල පිරිසක් තවදුරටත් රැඳී සිටින බව 'නෙත් නිවුස්' වාර්තා කරයි.

රටේ සාමය පවත්වාගෙන යාම සඳහා ආරක්ෂක අංශවලට සහයෝගය ලබාදෙන්නැයි ආරක්ෂක මාණ්ඩලික ප්‍රධානී ජනරාල් ශවේන්ද්‍ර සිල්වා මාධ්‍ය හමුවක් පවත්වා ජනතාවගෙන් ඉල්ලා සිටියේ මෙවැනි වටපිටාවක් තුළයි.

ජූලි 13 තමන් ජනාධිපති ධූරයෙන් ඉවත්වන බව ගෝඨාභය රාජපක්ෂ පවසා ඇතැයි වාර්තා වෙයි .

කතානායක ආරංචි මාර්ග මේ බව සඳහන් කර සිටියි.

මේ වන විට පක්ෂ නායකයන් ද කතානායක සමග පැවති සාකච්ඡාවේදී අවධාරණය කර ඇත්තේ , ජනාධිපති සහ අගමැති ඉල්ලා අස්විය යුතු බවය.

කතානායක ප්‍රධානත්වයෙන් පක්ෂ නායකයන් විසින් අද (09) ගනු ලැබූ තීන්දුව කතානායකවරයා විසින් ලිඛිතවම ජනාධිපති ගෝඨාභය රාජපක්ෂ වෙත මේ වනවිට දැනුම් දී ඇති බව වාර්තා වෙයි .

වාර්තා වන ආකාරයට කතානායකවරයා අදාළ ලිපියේ සදහන් කර ඇත්තේ ජනාධිපතිවරයා හා අගමැතිවරයා ඉල්ලා අස්විය යුතු බවට මෙම පක්ෂ නායක රැස්වීමේදී තීන්දු කර ඇති බවකි.

මේ බව පාර්ලිමේන්තු මන්ත්‍රීවරුන් වන හර්ෂ ද සිල්වා සහ රවුෆ් හකීම් සිය ට්වීටර් ගිනුම් හරහා තහවුරු කර ඇත .

මේ අනුව ජනාධිපති ගෝඨාභය රාජපක්ෂ ධූරයෙන් ඉල්ලා අස්වුවහොත් , තාවකාලික ජනාධිපති ලෙස කතානායක මහින්ද යාපා අබේවර්ධන පත්වනු ඇත.

අරගලකරුවන් පිරිසක් අග්‍රාමාත්‍ය රනිල් වික්‍රමසිංහ ගේ පෞද්ගලික නිවසට ගිනිතබා ඇත.

අගමැති පෞද්ගලික නිවෙසට ඉදිරිපිට පැවැති විරෝධතාවක් වාර්තා කිරිමට ගිය සිරස මාධ්‍යවේදීන් සිවු දෙනකුට පොලිස් විශේෂ කාර්ය බලකායේ භට පිරිසක් විසින් පහරදීමේ සිද්ධිය සම්බන්ධයෙන් 'සිරස' නාලිකාව විසින් ගෙන ගිය මාධ්‍ය මෙයුමෙන් පසු මෙම ගිනිතැබීම සිදුවිය.

අග්‍රාමාත්‍යවරයාගේ බිරිඳ මහචාර්ය මෛත්‍රී වික්‍රමසිංහ මේ දිනවල රෝගාතුර තත්වයෙන් පසුවේ.

අග්‍රාමාත්‍යවරයාගේ පෞද්ගලික නිවස ආසන්නයේ මාධ්‍යවේදීන්ට ප්‍රහාර එල්ල කළ පොලිස් විශේෂ කාර්ය බළකායේ පිරිසට එරෙහිව පොලිස්පතිවරයාගේ නියමයෙන් විමර්ශනයක් ආරම්භ කර ඇති බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නිහාල් තලදුව පවසයි.

මෙම සිද්ධිය සම්බන්ධයෙන් පොලිස්පතිවරයාට සහ පොලිස් දෙපාර්තමේන්තුව කනගාටුව පළ කරන බවද මාධ්‍ය ප්‍රකාශකවරයා කීය

එම පිරිසට එරෙහිව විනයානුකූලව ක්‍රියා මාර්ග ක්‍රියාමාර්ග ගන්නා බවද පොලිස් ප්‍රකාශක වරයා කීය.

මේ අතර පවතින විරෝධතා වාර්තා කිරීමට ගිය මාධ්‍යවේදීන්ට ආරක්ෂක නිලධාරීන් විසින් පහරදීම සම්බන්ධයෙන් අගමැතිද බලවත් කණගාටුව ප්‍රකාශ කර තිබිණ.

ශ්‍රී ලංකාවේ ප්‍රජාතන්ත්‍රවාදය සඳහා මාධ්‍ය නිදහස ප්‍රමුඛ බවත් ප්‍රචණ්ඩ ක්‍රියා වැළැක්වීමට සහ මහජනතාවගේ ආරක්ෂාව තහවුරු කිරීමට සංයමයෙන් කටයුතු කරන ලෙස අග්‍රාමාත්‍යවරයා ආරක්ෂක අංශවලින් මෙන්ම විරෝධතාකරුවන්ගෙන් ඉල්ලා සිටින බව අග්‍රාමාත්‍ය මාධ්‍ය අංශය නිවේදනයක් නිකුත් කරමින් සඳහන් කරයි.

ග්‍රාමාත්‍ය රනිල් වික්‍රමසිංහගේ කොල්ලුපිටියේ නිවස ආසල පොලිසිය සහ අරගල කරුවන් අතර උණුසුම් තත්ත්වයක් හටගෙන ඇත.

අරගලකරුවන් පිරිසක් අග්‍රාමාත්‍යවරයාගේ නිල නිවස ආසන්නයට ගොස් එහි මාර්ග බාධක බිඳගෙන ප්‍රවේශවීමට ගත් උත්සාහයක් වළක්වමින් පොලිසිය ඔවුන්ට ජල හා කදුලු ගෑස් ප්‍රහාර එල්ල කර ඇත.

මෙම ප්‍රහාරවලින් සිරස මාධ්‍යවේදීන් ඇතුළු කීප දෙනෙක්ම තුවාල ලබා ඇතැයි වාර්තා වේ.

මෙම උණුසුම්කාරී තත්වය තවදුරටත් පවතියි.

අග්‍රාමාත්‍යවරයාගේ නිවස අසළදී ප්‍රවෘත්ති වාර්තාකරණයේ යෙදී සිටි සිරස නිවුස්ෆස්ට් මාධ්‍යවේදීන් 04දෙනෙකු ප්‍රහාරයට ලක් වී ඇත.

එහිදී පොලිස් විශේෂ කාර්ය බලකාය(STF) විසින් නිව්ස්ෆස්ට් මාධ්‍යවේදීන් 04 දෙනෙකුට දැඩිලෙස පහර දී ඇත.

මේ වන විට ප්‍රහාරය ලක්වූ පිරිස රෝහල් ගත කර ප්‍රතිකාර ලබමින් සිටී.

වරුණ සම්පත්, සරසී පීරිස්,යූ.ඩී සින්දුජන්, ජනිත මෙන්ඩිස් යන අය  පහරකෑමට ලක්වූ මාධ්‍යවේදීන් අතර වේ.