පුවත්

අරගලයේ මූලික ඉල්ලීම වූ ගෝඨාභය රාජපක්ෂ සිය ධූරයෙන් ඉවත්වීමේ ආසන්නතම අවස්ථාව අභිමුව සිටින පසුබිමේ යම් පුද්ගලයෙක් නීතියට පිටින් කටයුතු කිරීමෙන් හෝ එවැනි ක්‍රියාවකට සෙසු පුද්ගලයන් දිරි ගැන්වම බඳු කූඨ උපක්‍රම වලට හසුනොවන ලෙස ලිබරල් සහෝදරත්වය නිවේදනයක් නිකුත්කරමින් පවසයි .

සාමකාමී අරගලයට මුල සිටම සක්‍රීයව දායක වූ කණ්ඩායමක් ලෙස මෙම නිවේදනය නිකුත්කරන බවත් මෙම අරගලයේ පදනම නම් නීතියේ ආධිපත්‍ය ක්‍රියාත්මක වෙමින් ව්‍යවස්ථාපිත ප්‍රජාතාන්ත්‍රීය රාමුවක් තුළ ජනතා අභිලාෂයන් දිනා ගැනීම බවත් අදාළ නිවේදනයේ අවධාරණය කර ඇත.

ලිබරල් සහෝදරත්වය නිකුත්කළ සම්පූර්ණ නිවේදනය පහත දැක්වෙයි .

වහාම රට තුළ නීතිය හා සාමය පූර්ණ ලෙසම ස්ථාපනය කරන්න ලෙස වැඩබලන ජනාධිපතිවරයාගෙන් සහ ආරක්ෂක අංශ ප්‍රධානීන්ගෙන් ඉල්ලා සිටින බව ශ්‍රී ලංකා පොදුජන පෙරමුණ සඳහන් කරයි.

නිවේදනයක් නිකුත්කරමින් එම පක්ෂය මේ බව සඳහන් කරන අතර ඊට අවශ්‍ය පූර්ණ සහය තම පක්ෂය ලබාදෙන බවත් නිවේදනයේ වැඩිදුරටත් සඳහන් කර ඇත .

පොදුජන පෙරමුණ නිකුත්කළ සම්පූර්ණ නිවේදනය පහත දැක්වෙයි .

අද (13) පස්වරුවේ පාර්ලිමේන්තුවේ පක්ෂ නායකයන්ගේ විශේෂ සාකච්ඡාවක් කතානායක මහින්ද යාපා අබේවර්ධන කැඳවා ඇති බව වාර්තා වෙයි .

ඒ රටේ උද්ගතව ඇති අර්බුදකාරී වාතාවරණය සම්බන්ධයෙන් සාකච්ඡා කිරීමට බවත් වාර්තා වෙයි .

මේ වන විට ජනාධිපති මන්දිරය , ජනාධිපති ලේකම් කාර්‍යාලය , අරලිය ගහ මන්දිරය , අග්‍රාමාත්‍ය කාර්‍යාලය මෙන්ම රූපවාහිනී සංස්ථාවට පවා අරගලකරුවන් ඇතුළුව ඇත.

එසේම රටේ කඩාකප්පල් කාරී වාතාවරණය සමනය කරන ලෙස වැඩබලන ජනාධිපති රනිල් වික්‍රමසිංහ ආරක්ෂක මණ්ඩලය දැනුවත් කර ඇති අතර , යළි දැනුම්දෙන තුරු දිවයිනටම හදිසි නීතිය සහ බස්නාහිර පළාතට ඇඳිරි නීතිය ක්‍රියාත්මක කර ඇත .

ඉල්ලා අස්වීමේ ලිපිය අද (13) දිනය තුළ නිකුත්කරන බව ජනාධිපති ගෝඨාභය රාජපක්ෂ පැවසූ බව කතානායක මහින්ද යාපා අබේවර්ධන පවසයි .

අද පැවති විශේෂ මාධ්‍ය හමුවකදී අදහස් දක්වමින් ඔහු මේ බව පැවසීය .

මේ අතර වැඩබලන ජනාධිපති රනිල් වික්‍රමසිංහ ට එරෙහිව විරෝධය පලකරන අරගලකරුවන් අග්‍රාමාත්‍ය කාර්‍යාලය අත්පත් කරගෙන ඇත.

ඒ බව දැක්වෙන සජීවී වීඩියෝ මේ වන විට සමාජ මාධ්‍ය තුළ සංසරණය වෙමින් පවතියි.

ජනාධිපති ගෝධාභය රාජපක්ෂ දිවයිනෙන් බැහැරව සිටින බැවින් එම ධූරයේ වැඩ බැලීම සඳහා අගමැති රනිල් වික්‍රමසිංහ පත් කළ බව ජනාධිපතිවරයා දැනුම දී ඇතැයි කතානායක මහින්දයාපා අබේවර්ධන පවසයි .

ඔහු අද (13) විශේෂ ප්‍රකාශයක් කරමින් මෙසේ පැවසීය.

මේ අතර කලහකාරී ලෙස හැසිරෙන් පුද්ගලයින් වහා අත්අඩංගුවට ගන්නැයි අග්‍රාමාත්‍යවරයා ආරක්ෂක අංශවලට නියෝගකර ඇති බවත් වාර්තා වෙයි .

කලහාකාරී පුද්ගලයන් ගමන් ගන්නා වාහනද අත්අඩංංගුවට ගන්න‌ා ලෙස එම නියෝගයේ සඳහන් බවත් දැනගන්නට ඇත .

බැසිල් පනියි !

තවද හිටපු බැසිල් රාජපක්ෂ ශ්‍රී ලංකාවෙන් පිටව ගොස් ඇතැයි බී.බී.සී පුවත් සේවය වාර්තා කර සිටියි .

බැසිල් රාජපක්ෂ ඇමෙරිකා එක්සත් ජනපදය බලා පියාසර කරනු ඇතැයි ආරංචි මාර්ග ප්‍රකාශ කළ බවත් බී.බී.සී පුවත් සේවය පවසයි .

මේ සමඟ ශ්‍රී ලංකාවේ දශක ගණනාවක රාජපක්ෂවරුන්ගේ පාලනය අවසන් වන බවත් එහි සඳහන් ය.

ජනපති තම ඉල්ලා අස්වීමේ ලිපිය තවමත් කථානායකවරයාට හෝ ජනාධිපති ලේකම්වරයාට යොමුකර නොමැති බව වාර්තා වෙයි .

ශ්‍රී ලංකා වේලාවෙන් රාත්‍රී 8 ට තම අවසන් ගමනාන්තයට පැමිණි පසු එය එවන බව ඔහු කථානායකවරයාට දන්වා ඇති බවත් දැනගන්නට ඇත .

ඒ අනුව ජනාධිපතිවරයාට නිරුපද්‍රිතව පිටව යාමට ඉඩ සැලසීම සඳහා වෘත්තීය සමිති ඉවත් කිරීමට කථානායක පක්ෂ නායකයන් සමඟ කතා කර ඔවුන්ගේ එකඟතාව ලබාගත් බවත් වාර්තා වෙයි .

මේ වන විට තොරතුරු අනුව ගෝඨාභය රාජපක්ෂ මාලදිවයින තුළ එරට රජයේ ආරක්ෂාව යටතේ පසුවෙයි .

පෙරටුගාමී සමාජවාදී පක්ෂයේ ක්‍රියාකාරී නීතීඥ නුවන් බෝපගේ විසින් ශ්‍රීලංකා නීතීඥ සංගමයට සහ එහි සභාපතිවරයාට දැඩි විවේචනයක් එල්ලකොට තිබේ .

ඊයේ දින (12) ශ්‍රීලංකා නීතීඥ සංගමය විසින් ආණ්ඩුක්‍රම ව්‍යවස්ථානුකූල වාදය පිළිගන්නා ලෙසත් නීතියේ ආධිපත්‍යයට සියළු දෙනා ගරු කල යුතු බවත් සඳහන් කරමින් නිවේදනයක් නිකුත් කර තිබුණි.

එමෙන්ම ජනාධිපති මන්දිරය වැනි පෞරාණික වටිනාකමක් ඇති ස්ථාන ආරක්ෂා කර ගැනීම වෙනුවෙන් එම ස්ථාන වගකිව යුතු රාජ්‍ය අංශ වෙත කඩිනමින් භාරදීමේ වැදගත්කම ද ජනාධිපති නීතීඥ සාලිය පීරිස් මහතා මෙයට පෙර අවධාරණය කර තිබුණි.

එම නිවේදනය නිකුත් කර විනාඩි කිහිපයක් ඇතුළත නීතීඥ නුවන් බෝපගේ විසින් සිය ෆේස්බුක් ගිනුමේ සටහනක් තබමින්ය.

'රනිල්ට ඇති ප්‍රේමය මේ මොහොතේ ප්‍රකාශ වන්නේ නීතියේ ආධිපත්‍යට ජනාධිපති මන්දිරයට ඇති ප්‍රේමයේ ස්වරූපයෙනි' යනුවෙන් ප්‍රකාශකර තිබේ.

මෙයට පෙර නීතීඥ නුවන් බෝපගේ ගේ දේශපාලන නායක කුමාර් ගුණරත්නම් විසින් නීතිය යනු අරගලයයි යනුවෙන් ද ප්‍රකාශ කර තිබුණි.

මේ පිළිබඳව සඳහන් කරමින් ජ්‍යෙෂ්ඨ නීතීඥවරයකු සඳහන් කරන ලද්දේ මෙලෙස නීතීඥ සංගමය අවඥාවට ලක් කිරීම නීතීඥ නුවන් බෝපගේ විසින් සමස්ත වෘත්තීයටම සිදුකරන බලවත් හානියක් වන බවයි. නීතිය යනු අරගලයයි යනුවෙන් කුමාර් ගුණරත්නම් ප්‍රකාශ කරන සන්දර්භයක නුවන් බෝපගේ ගේ ප්‍රකාශය නීතීයේ ආධිපත්‍යයේ හෙට දවස පිළිබඳව බරපතල සැක සංකා ඇති කරනු ලබන බව එම ජ්‍යෙෂ්ඨ නීතීඥවරයා වැඩි දුරටත් ප්‍රකාශ කරන ලදී.

විශේෂ වාර්තාකරුවෙකු විසිනි

කොළඹ ගාලු මුවදොර අරගල භූමියේ රැදී සිටි වැල්ලමිපිටියේ සහ මෝදර පදිංචි තරුණ කණ්ඩායම් දෙකක් අතර ඇතිවූ ගැටුමකින් කැපුම් තුවාල ලැබූ 04ක් කොළඹ ජාතික රෝහලට ඇතුලත්කර ඇති බව වාර්තා වෙයි .

ඔවුන් වයස අවුරුදු 20ත් 15ත් අතර පසුවන්නන් බව රෝහල් තොරතුරු අනාවරණය කරයි.

කෙසේ වුවත් පොලිස් ආරංචි මාර්ග සඳහන් කරන්නේ පොලිසිය වෙත මේ සම්බන්ධයෙන් පැමිණිල්ලක් ලැබී නැති බවය.

දිවයින පුරා හදිසි නීතිය හා බස්නාහිර පළාතට ඇඳිරි නීතිය පනවා ඇතැයි රජය නිවේදනය කර තිබේ.

අද දහවල් අගමැති කාර්යාලය අසළ ඇතිවූ සිදුවීමක් මෙම ඇදිරි නීතිය පැනවීමට ආසන්න හේතුව විය.

මේ අතර අද ජනපති ඉල්ලා අස්වීමේ නිවේදනයද නිකුත් කිරීමට නියමිතය.

කලහකාරී පුද්ගලයින් වහාම අත්අඩංගුවට ගන්නා ලෙස අගමැති රනිල් උපදෙස් දී ඇතැයිද වාර්තාවේ.

ජනාධිපති ගෝඨාභය රාජපක්ෂ ,ඔහුගේ බිරිඳ සහ ආරක්ෂකයකු ඇතුළු සිව් දෙනෙකු ගුවන් හමුදාවේ ඇන්ටනොව් 32 යානයකින් කටුනායක සිට අද (13) අලුයම මාලදිවයිනේ මාලේ ගුවන් තොටුපොළට ළඟා වී ඇති බව වාර්තා වෙයි .

මාලේ ගුවන් තොටුපොළට පැමිණි ජනාධිපති ගෝඨාභය රාජපක්ෂ ඇතුළු පිරිසට එරට ආරක්ෂක අංශවල ආරක්ෂාව ලැබී ඇති අතර එරට වෙසෙන ශ්‍රී ලාංකිකයන් මාලේ ගුවන්තොටුපළට පැමිණිය ද විරෝධතාකරුවන්ට ඔවුන්ට ළඟා වීමට නොහැකි වී තිබේ.

තමන් අද දින ජනපති ධුරයෙන් ඉවත්වන බවට මීට පෙර ජනාධිපති ගෝඨාභය රාජපක්ෂ විසින් අග්‍රාමාත්‍යවරයාට සහ කතානායකවරයාට සහතික වී තිබිණි.

එසේ වුවද මෙතෙක් එවැනි නිල දැනුම් දිමක් සිදු නොවුණු පරිසරයක් තුළ ජනාධිපතිවරයා සිය බිරිඳ සමග මෙලෙස රටින් පිටව ගොස් ඇත.

විදෙස් මාධ්‍ය වාර්තා වල සඳහන් වන්නේ ජනපති මැඳුර අරගලකරුවන් විසින් අත්පත් කරගැනීමෙන් පසු දින හතරක් තිස්සේ ජනතාව ඉදිරියට නොපැමිණි ජනාධිපතිවරයා රටෙන් පිටව ගොස් තිබෙන බවය.

මාගේ මතය වී තිබුනේ එක විශාල නැගිටීමට පසු ලඟ ලඟ වඩා විශාල නැගිටීමක් ඇති විය නොහැකි බවය. එහෙත් මාගේ ඒ මතය බොරු කරමින් පසුගිය ජූලි 9 වනදා වඩා විශාල (පරණ නැගිටීම මෙන් කිහිප ගුණයක් විශාල) නැගිටීමක් සිදු විය. ඊට අදාළව මා පළකල තිබුන තවත් නිරීක්ෂණයක් ද තිබුනි. එනම් ජනාධිපති ව්‍යවස්ථාපිත රාමුවෙන් පිටස්තර අකාරයකට පලවා හැරීමට දරන බලවත් උත්සහායක් රටේ තිබෙන සංකීර්ණ අර්බුදය උග්‍ර කිරීමට හේතුවී දැන් සිටින අගාධයෙන් ගොඩ එනවා වෙනුවට ගොඩ ඒම ඉතා දුෂ්කර දෙවැනි අගාධයකට ද රට තල්ලු කිරීමට හේතුවනු ඇති බවය. ඇතිවූ මහජන නැගිටීම මගේ දෙවැනි නිරීක්ෂණය බොරු කරන්නේ නැත.

ජූලි 9 වනදා නිරායුධ ස්වරූපයකින් සිදුවූ තරුණ නැගිටීම ලංකාවේ ජේවීපී ආරයකට සිදුවූ තුන්වැනි නැගිටීම ලෙස සැළකිය හැකිය. එහි පළමු සංස්කරණය සිදුවූයේ 1971 දී ය. එය බොහෝ දුරට තමන් විසින්ම තනා ගත් ආයුධ ඇතිව සිදු කල හා ආරක්ෂක හමුදා විසින් ඉක්මණින් පරාජය කල නැගිටීමක් ලෙස සැළකිය හැකිය. ඉන්පසු එහි දෙවැනි සංස්කරණය ක්‍රියාත්මක වුයේ 1986/89 කාලයේදී ය. එය 71 පළමු කැරැල්ලට වඩා විශාල, අවුරුදු දෙකකට වැඩි කාලයක් අල්ලාගෙන සිටීමට සමත්වූ, විශාල ජීවිත හා දේපළ විනාශයක් ඇති කිරීමට හේතුවූ හා බලය අල්ලා ගැනීමට ආසන්න තත්වයකට පැමිණි පසු ආරක්ෂක හමුදාවන් විසින් අනුකම්පා විරහිතව පොඩි පට්ටම් කරනු ලැබූ ප්‍රබල කැරැල්ලක් ලෙස සැළකිය හැකිය. 2022 ජූලි 09 වනදා සාමකාමි නැගිටීමක ස්වරූපයෙන් සිදුවූ තුන් වැනි කැරැල්ල ජේවීපී දෙවැනි කැරැල්ල මෙන් කිහිප ගුණයක් විශාල මෙතෙක් රටේ සිදුවී තිබෙන විශාලතම මහජන නැගිටීම ලෙස සැළකිය හැකිය. එම නැගිටීම රාජ්‍යයේ හමුදා බලය අභිබවා හිමිකරගත් ජයග්‍රහණය සැබෑ ලෙස පෙන්නුම් කරන්නේ මහජන බලයේ ප්‍රබලත්වයට වඩා දීර්ඝ කාලයක් තුළ ප්‍රතිසංස්කරණ නැතිව ජරාජීර්ණභාවයට පත්වෙමින් තිබූ රාජ්‍යයේ බෙලහීනත්වයේ තරමය. ඇතිවූ එම අර්බුදයේ දී මධ්‍යස්ත තත්වයකින් ක්‍රියා කල යුතු ආයතන පක්ෂපාතව ක්‍රියාකරන තත්වයකට පත්වීමෙන් ද රාජ්‍යය හා එහි ආයතන ක්‍රමය ජරාජීර්ණ වී තිබෙන තරම පෙන්නුම් කරයි. ගෝඨාභය රාජපක්ෂ වැනි අධිචෝදනා තිබුන පුද්ගලයෙකුට ජනාධිපතිවරණයට තරඟ කිරීමට ඉඩ ලැබීමෙන් පෙන්නුම් කෙරෙන්නේ ද රාජ්‍යයේ ඇතිවී තිබුන පරිහානියේ තරමය. නැවත ඒ පුද්ගලයා බලයෙන් පහ කෙරුන ආකාරයෙන් ද දේශපාලන ක්‍රමයේ ඇතිවී තිබෙන කුණු වීමේ තරම පෙන්නුම් කරයි.

විප්ලවයේ ඇතැම් ලක්ෂණ

පළමු හා දෙවැනි කැරැල්ල පිරිසිදු ජවිපෙ කැරලි දෙකක් ලෙස සැළකිය හැකිය. සාමකාමි හා ඉතා බලවත් මහජන නැගිටීමක් ලෙස සැළකිය හැකි තුන් වැන්න පිරිසිදු ජවිපෙ දෙයක් ලෙස සැළකිය නොහැකිය. එය විශාල ප්‍රමාණයකට පක්ෂ දේශපාලනයෙන් පිටස්තර ස්වාධීන තරුණ කණ්ඩායම් විශාල ගණනකගේ දෙයක් වී තිබුන ද අවසාන මොහොතේ එහි ආධිපත්‍යය සියතට ගනිමින් එම නැගිටීම විශාල ප්‍රමාණයකට තමන්ගේ දෙයක් බවට පත් කර ගැනීමට පෙරටුගාමි පක්ෂය සමත් විය. එම පක්ෂය ජවිපෙ දේශපාලන ගර්භාෂයේම ඉපදුන, එම පක්ෂය සමග තරඟ කරන පක්ෂයක් ලෙස සැළකිය හැකිය. ජවිපෙන් කැඩී වෙන්වී තමන්ගේ පක්ෂයක් හදා ගත්දා සිටම මේ පක්ෂ දෙක අතර තරඟයක් තිබුණද ජූලි නැගිටීම දක්වාම එම තරඟයෙන් ඉදිරියෙන් සිටියේ ජවිපෙය. එහෙත් ජූලි නැගිටීම තුලින් පෙරටුගාමි පක්ෂය ජවිපෙ අභිබවා ගිය දේශපාලන ශක්තියක් හා ආධිපත්‍යයක් පෙන්නුම් කිරීමට සමත් විය. එම තත්වය එම පක්ෂ දෙක අතර ගැටුම් ඇති කිරීමට හේතු විය හැකිය. පෙරටුගාමි පක්ෂය පෙන්නුම් කළ ශක්තිය කෙරෙහි එම පක්ෂයේ විශ්ව විද්‍යාලීය ශිෂ්‍ය සංගමය ලෙස සැළකිය හැකි අන්තර් විශ්ව විද්‍යාල ශිෂ්‍ය බල මණ්ඩලය එම නැගිටීම සදහා සටන්කාමි කණ්ඩායම් සුදානම් කිරීම වෙනුවෙන් ඉටු කරන ලද පුරෝගාමි කාර්‍යභාරය ද බලපෑ බව පෙනේ. මේ පක්ෂ දෙක අතරින් ජවිපෙ දැඩි මාක්ස්වාදි රාමුවෙන් ඉවත්වී කිසියම් විශාල ප්‍රමාණයකට සමාජ ප්‍රජාතන්ත්‍රවාදි ප්‍රවේශයකට යොමුවූ පක්ෂයක් ලෙස සැළකිය හැකිය. පෙරටුගාමි පක්ෂය ඊට වඩා දැඩි මාක්ස්වාදි රාමුවක පිහිටා ක්‍රියා කල ද වර්ග, කුල, ආගම් ප්‍රශ්නයේදී එම පක්ෂය දරන අදහස්, නවීන හා ඉදිරිගාමි බව ද කිව යුතුය.

ජේවීපී කැරලි දෙකේම අරමුණ වූයේ ආයුධ සන්නද්ධ අරගලයක් මගින් බලය අල්ලා ගැනීමය. එහෙත් ජනාධිපති ගෝඨාභය එළවීම ජුලි නැගිටීමේ ප්‍රධාන අරමුණ බවට පත්ව තිබීම නිසා එම න්‍යාය පත්‍රයට ගැලපෙන ලෙස ක්‍රියා කරන්නට පෙරටුගාමි පක්ෂයට සිදුවූ බව පෙනේ. ඒ නිසා ඔවුන්ට හැකිවුයේ රාජ්‍යය බලය වෙනුවට දේශපාලන බලයට අදාල සංකේතාත්මක වැදගත්කමක් ඇති ගොඩනැගිලි තුනක් (ජනාධිපති මන්දිරය, ජනාධිපති ලේකම් කාර්යාලය හා අරලිය ගහ මන්දිරය) අල්ලා ගන්නා ප්‍රතිපත්තියක පිහිටා ක්‍රියා කරන්නටය. කෙසේ වෙතත් පෙරටුගාමි පක්ෂයේ නායක කුමාර් ගුණරත්නම් උස් හඬකින් කියන්නේ කරන්න යන හැම දෙයක දීම පාර්ලිමේන්තුව තම අදහස් සැළකිල්ලට ගෙන ඊට අනුකූලව ක්‍රියා කල යුතු බවය. 9 වනදා සිදුවූ නැගිටීම පෙරටුගාමි පක්ෂයට තිබෙන මහජන බලයේ තරම පෙන්නුම් කරන දෙයක් ලෙස සැළකිය නොහැකි වුවද එම පක්ෂය වර්තමාන දේශපාලන ක්‍රීඩාවේ දී නොසළකා සිටිය නොහැකි ක්‍රීඩකයෙකු බව සනාථ කළේය. ලංකාව මුහුණ දී තිබෙන අර්බුදයට විසදුමක් සොයා ගැනීම සදහා වැඩ කරන ජාතික මට්ටමේ දේශපාලන කණ්ඩායම සකස් කර ගැනීමේදී ජවිපෙන් එල්ලවන විරෝධයක් තිබිය හැකි වුවද පෙරටුගාමි පක්ෂයට ද නිසි නියෝජනයක් ලබාදීමට ව්‍යවස්ථාපිත ක්‍රමයක් සොයා ගැනීමට සිදුවනු ඇති අතර ඊට අතිරේක වශයෙන් එම පක්ෂයට සම්බන්ධ නැති තරුණ නැගිටීමට සම්බන්ධ වෙනත් කණ්ඩායම් වලට ද සුදුසු කිසියම් නියෝජනයක් ලබා දීමට සිදුවනු ඇත.

අවසානය කුමක්ද?

ඇතිවූ එක් දින මහජන විප්ලවය රටට ලබා දෙන්න යන ප්‍රතිඵල මොනවා විය හැකිද? එය ලංකාවේ දේශපාලන දේහය වෙලා ගෙන තිබූ රාජපක්ෂ පවුල් ආධිපත්‍යය නැමැති බිහිසුණු පිළිකාව කපා ඉවත් කිරීමක් සිදු කළේ යැයි කිව හැකිය. එහෙත් ඒ මගින් පමණක් රටට කිරි ඉතිරෙන්නේ නැත. දේශපාලන තලයේදී අයථා ලෙස ධනය උපයා ගැනීමේ ලක්ෂණය රාජපක්ෂවරුන්ට පමණක් සීමාවූ දෙයක් ලෙස ද සැළකිය නොහැකිය. 78 ආණ්ඩු ක්‍රමය යටතේ බලයට පත්වූ සියළු ජනාධිපතිවරුන් අතින් ද එම බරපතල වරද සිදුවී තිබෙන්නේ යැයි කිව හැකිය. රාජපක්ෂවරුන් ප්‍රමුඛ වන්නේ ඒ අකාරයට උපයා ගත් ධනයේ පරිමාවේ විශාලත්වය අනුව පමණය. උසස් රාජ්‍ය නිලධාරින්ගේ සහාය නැතිව දේශපාලකයින්ට පමණක් තනියෙන් හොරකම් කල නොහැකිය. දේශපාලන තන්ත්‍රය පමණක් නොව නිලධර තන්ත්‍රය ද දූෂිතය. බංකොළොත්භාවය කෙරෙහි බලපා තිබෙන විදේශ ණය ගැතියාවේ තරම ඩොලර් බිලියන 50 කි. නිදහසෙන් පසු රටේ ඇතිවූ කැරලි කෝලාහල හා යුද්ධ ව්‍යාපාර නිසා සිදුවී තිබෙන විනාශයන්ගේ ප්‍රමාණය ගණනය කර තිබෙන්නේ ඩොලර් බිලියන 200 ක් වශයෙනි. රට බංකොළොත් කිරීමට බලපා තිබෙන එකම හේතුව දූෂණය පමණක් නොවන බව ඉන් පෙනේ. අපට වර්ග, කුල, ආගම් ප්‍රශ්නය ප්‍රචණ්ඩ ගැටුම් ඇති නොවන ලෙස කළමණාකරනය කර ගැනීමට හැකිවී නම් රටේ ආර්ථිකයට එකතුවන අතිරේක අගය ඩොලර් බිලියන 200 කි. රාජ්‍යය සේවක සංඛ්‍යාව කොතරම් විශාල ද කිවහොත් හත් ලක්ෂයක් අවශ්‍ය තැනට පහලොස් ලක්ෂයක් සිටින්නේය. රජයේ ගුවන් සේවය, විදුලි බල මණ්ඩලය, ඛනිජ තෙල් සංස්ථාව වැනි සමහර පාඩු ලබන රාජ්‍ය ආයතන, ලංකාවේ ඇති වී තිබෙන බංකොළොත්භාවයට ලබා දී තිබෙන දායකත්වයේ ප්‍රමාණය අති විශාලය.

ව්‍යුහමය ප්‍රතිසංස්කරණ රටට අවශ්‍ය ප්‍රධානම දේ ලෙස සැළකිය හැකිය. රාජ්‍යය තිබෙන්නේද, සමාජ-දේශපාලන ක්‍රමය තිබෙන්නේද, අධ්‍යාපන ක්‍රමය හා සමස්ථ ආර්ථිකය තිබෙන්නේද හොඳටම ජරාජීර්ණ වූ තත්වයකය. ප්‍රතිසංස්කරණ අවශ්‍ය වී තිබෙන්නේ ඒ හැම තැනකම තිබෙන ජරාජීර්ණ තත්වය ජයගනිමින් ඒවා අදූෂිත, කාර්‍යක්ෂම හා ඵලදායි තත්වයකට ගැනීම සදහාය. ප්‍රතිසංස්කරණ විෂය ලංකාවේ දේශපාලන හා නිලධර තන්ත්‍රයට නොතේරෙනම හා ඔවුන් අත ගැසීමට කැමතිම නැති විෂය ලෙස සැළකිය හැකිය. අරගලකරුවන්ගෙන්ද එම විෂයට අලුත් ආලෝකයක් ලැබී තිබෙන බවක් පෙනෙන්නේ නැත. මේ මොහොතේ රටේ පැවැත්ම ගැන උනන්දුවක් ඇති හැම කෙනෙකුම තේරුම් ගත යුතු වැදගත්ම දේ වනුයේ ලංකාව දැන් තිබෙන්නේ බිහිසුණු අගාධයක බවත්, ප්‍රඥාවන්ත ලෙස ක්‍රියා කරන්නට අසමත් වෙතොත් දැන් සිටින අගාධයටත් වඩා බිහිසුණු, ගොඩ ඒමට පහසු නැති තවත් අගාධයට ඇද වැටීමේ හැකියාව තිබෙන බවත් ය. එම අගාධයට ඇද වැටුන හොත් අපට දශකයක පමණ කාලයක් දිවි ගෙවන්නට සිදුවනු ඇත්තේ 19 වැනි සිය වසේය. ඒ සමග ලංකාව ප්‍රඥාව අහිමි කරගත් හා පරිනත නායකයින් නැති රටක් බවද අමතක නොකළ යුතුය. අපි 21 වැනි සිවසේ ජීවත් වෙමින් ඉදිරියට යනවාද නැතිනම් සියවස් දෙකක් ආපස්සට යනවාද යන්න තීරණය වනු ඇත්තේ ඉදිරි දින කිහිපයේදී ය. මේ තීරණාත්මක මොහොතේදීවත් රටේ දේශපාලන නායකයින්ට බලලෝභයෙන්, ආත්මාර්ථකාමයෙන් හා කට්ටිවාදයෙන් තොරව සමගි සම්පන්නව හා එක්තරා ප්‍රමාණයකට හෝ බුද්ධිමත්ව ක්‍රියා කරන තත්වයකට ආ හැකි වේද?◼️

වික්ටර් අයිවන් ගේ ෆේස්බුක් ගිනුමෙනි

ගෝඨාභය රාජපක්ෂ ජනාධිපතිවරයාට විරුද්ධව ජනතාව පාරට බැසීමත් සමගම ජනාධිපතිවරයා තම පදවියෙන් ඉවත් වන බව ප්‍රකාශ ලිපියකට අත්සන් තබා අද ඩුබායි බලා පිටත්වීමට කටුනායක ගුවන් තොටුපලට පැමිණි නමුත් ඒ උත්සාහය ව්‍යර්ථ වූ බව lanka lead වෙබ් අඩවිය පවසයි .

අදාළ පුවතේ වැඩිදුරටත් මෙසේද සඳහන් වෙයි.

අද ඔහුට ජීවිතයේ කිසි දිනයක නොසිතු අකරතැබ්බයකට මුහුණ දීමට සිදු විය. ඒ පිට වීමේ මුද්‍රාව ගැසීමට ආගමන විගමන නිලධාරින් ප්‍රතික්ෂේප කිරීම නිසාය. ගුවන්තොටුපල ආගමන විගමන නිලධාරීන් කියා සිටියේ තම ගුවන් ගමන් බලපත්‍රයක් සමඟ තම ටිකට් එක සහ පාස්පෝට් එක රැගෙන බලපත්‍ර නියමිත කවුන්ටරයට පැමිණෙන ලෙසයි .

එය ප්‍රතික්ෂේප කළ ජනාධිපති ගෝඨාභය රාජපක්ෂ එම ගුවන් යානයට යාමට හැකි ඉක්මනින් අවශ්‍ය නිසා නැවත එය වෙනත් නිලධාරියෙකු අත යවා තිබුණා එම ආගමන විගමන නිලධාරීන් එහි මුද්‍රා තැබීම ප්‍රතික්ෂේප කොට ඇත.

මේ උද්ගත වූ තත්වයත් සමගම ජනාධිපතිවරයාට ඩුබායි බලා පිටත් වන ගුවන් යානය මගහැරී ඇත මේ වන විට ජනාධිපතිවරයා වහාම කටුනායක ගුවන් හමුදා කඳවුරට රැගෙන ගොස් සිටි .

කතානායක කතාව වරද්ද ගෙන !

මේ අතර ජනාධිපති ගෝඨාභය රාජපක්ෂ තවමත් රට තුළ සිටින්නේ යයි කතානායක මහින්ද යාපා අබේවර්ධන ANI ඉන්දීය මාධ්‍ය වෙත පවසා ඇත.

ජනාධීපතිවරයා රටේ නැතැයි තමන් ප්‍රකාශ කළේ වැරදීමකින් බවද ඔහු සදහන් කර ඇත.

කතානායකගේ ටයිමිං ප්‍රශ්නයක් !

කෙසේ වුවත් දේශපාලන විචාරකයන් පවසන්නේ කතානායක ප්‍රකාශය බොහෝ දුරට වෙලාව සම්බන්ධයෙන් ප්‍රශ්නයක් මිස, සිදුනොවිය හැක්කක් නොවන බවයි.

ජනාධිපති ධූරයෙන් ඉල්ලා අස්වීමෙන් පසුව ගෝඨාභය රාජපක්ෂ සතු ජනාධිපති මුක්තිය අහිමි වන බවත් ඒ තුළ ඔහු රටින් පිටවීම හැර වෙනත් තීරණයක් අපේක්ෂා කිරීම දුෂ්කර බවත් ඔවුන් පෙන්වා දෙයි.

මේ වන විට බැසිල් රාජපක්ෂ ද රටින් පිටව තම ඇමරිකානු රටට යාමට උත්සාහ කළ නමුත් එය ව්‍යර්ථව ඇති බවත් , ඒ මාර්ගය මිස ජනාධිපති ගෝඨාභය රාජපක්ෂ ද වෙනත් මගක් වෙත යොමුවීමේ ඉඩ ඉතා අඩු බවත් දේශපාලන විචාරකයන් පවසයි .

ගෝඨාභය රාජපක්ෂ මහතා ධුරයෙන් ඉවත් වී 24 පැයක් තුළ පාර්ලිමේන්තුව මගින් රටට නව ජනපතිවරයෙක් පත් කරදීමට අවස්ථාව උදා කර දිය යුතුය යන්න පාර්ලිමේන්තු මන්ත්‍රී පාඨලී චම්පික රණවක ඇතුළු 43 සේනාංකයේ ස්ථාවරය වී ඇත.

ඒ බව සඳහන් කරන්නේ වර්තමාන අර්බුදය හමුවේ සර්ව පාක්ෂික ආණ්ඩුවක් පිළිබඳව, පසුගියදා 43 සේනාංකය සහ ශ්‍රී ලංකා නිදහස් පක්ෂය අතර පැවති සාකච්ඡාව පිළිබඳ සිදුකර ඇති කරුණු පැහැදිලි කිරීම තුළය.

ඊට අනුව අදාළ සාකච්ඡාව අවස්ථාවේ 43 සේනාංකය විසින් මින් පෙර යෝජනා කළ වහා සිදු කළ යුතු කරුණු 4 ක යෝජනාවලිය සම්බන්ධයෙන් ශ්‍රී ලංකා නිදහස් පක්ෂයේ ද විශේෂ අවධානය යොමු කරවා ඇත .

එම කරුණු 04 නම්,

1. පුළුල් සන්ධානයකට, එක වේදිකාවකට එළඹෙමින් දැනට ඉදිරිපත් කර තිබෙන, 22 වෙනි ආණ්ඩුක්‍රම ව්‍යවස්ථා සංශෝධනය, ප්‍රශස්ත මට්ටමෙන්, හැකි ඉක්මනින් සම්මත කරගත යුතුය.

2. පාර්ලිමේන්තුව තුළ සිටින පක්ෂ, ස්වාධීන කණ්ඩායම් වල නායකයන් එක්ව අවබෝධතා ගිවිසුම් සකස් කරගෙන තිබෙන ප්‍රතිපත්ති පිළිබඳ තීරණ ගැනීමේ සභාවක් පිහිටුවිය යුතුය.

3. වැදගත් ආයතන වලට කාටත් පිළිගත හැකි වෘත්තීය මට්ටමේ නායකත්වයන් පත් කළ යුතුය. අන්තර් කාලීන පොදු වැඩපිළිවෙලක් සකස් කර ගත යුතුය.

4. ගෝඨාභය රාජපක්ෂ මහතා ධුරයෙන් ඉවත් වී 24 පැයක් තුළ පාර්ලිමේන්තුව මගින් රටට නව ජනපතිවරයෙක් පත් කරදීමට අවස්ථාව උදා කර දිය යුතුය.
යන්නය.

ප්‍රභූවරුන් කිහිප දෙනකු මත්තල ගුවන් තොටුපළ හරහා රටින් පිටවීමට සූදානමින් සිටින බවට තොරතුරු වාර්තා වීමත් සමග මත්තල රාජපක්ෂ ජාත්‍යන්තර ගුවන්තොටුපළට (MRIA) අනුයුක්ත ආගමන විගමන නිලධාරීන් සහ කාර්ය මණ්ඩලය අද (12) සිය සේවාවලින් ඉවත් වීමට පියවර ගෙන ඇති බව වාර්තා වෙයි .

වාර්තා වන ආකාරයට මත්තල ගුවන්තොට භාවිත කරමින් හිටපු දේශපාලන ප්‍රභූවරුන් රටින් පලායාමට ඇති ඉඩකඩ වැලැක්වීමට මෙම තීරණය ගෙන ඇත.

කටුනායක ප්‍රභූ පර්‍යන්තයේ රාජකාරිවලිනුත් ආගමන විගමන නිලධාරීන් ඉවතට !

මේ අතර කටුනායක බණ්ඩාරනායක ජාත්‍යන්තර ගුවන් තොටුපළ තුළ මුදල් ගෙවා ප්‍රභූවරුන් සිය ගුවන් ගමන් පහසුකම් සළසා ගන්නා " සේද මාවත " ( Silk Route ) මගී නිශ්කාශන පර්යන්තයේ රාජකාරී කටයුතුවලින් අද අලුයම 12.00 (00.00) සිට නැවත දැනුම් දෙන තුරු ඉවත් වීමට ශ්‍රී ලංකා ආගමන විගමන දෙපාර්තමේන්තු නිලධාරීන්ගේ සංගමය තීරණය කර ඇත.

ඒ බව එහි සභාපති කේ.ඒ.ඒ.එස්. කණුගල මාධ්‍ය වෙත තහවුරු කර ඇති අතර නිවේදනයක් ද නිකුත්කර තිබේ.

ශ්‍රී ලංකාව තුළ මේ වනවිට පවතින අස්ථාවර , අර්බුදකාරී වාතාවරණය සැලකිල්ලට ගනිමින් සහ චෝදනාවට ලක් වූ හිටපු දේශපාලන ප්‍රභූවරුන් විශාල වශයෙන් රටින් පිටවීමට මෙම සේද මාවත නිශ්කාශන පර්යන්තය භාවිතා කිරීමට ඉඩකඩ ඇති නිසා තමන් මෙම පියවර ගත් බව ඔහු වැඩිදුරටත් ප්‍රකාශ කර ඇත .

ගුවන් තොටුපළ මගී විරෝධය නිසා : බැසිල්ට ගෙදර යන්න බැරිවෙලා !

හිටපු මුදල් අමාත්‍ය බැසිල් රාජපක්ෂ අද අලුයම ඩුබායි ඔස්සේ ඇමෙරිකාව බලා පිටත්ව යාමට පැමිණි අවස්ථාවේ , කටුනායක ගුවන් තොටුපළ තුළ සිටි ගුවන් මගීන්ගෙන් එල්ල වූ විරෝධතාවක් නිසා සිය ගුවන් ගමන අතහැර ආපසු ගොස් ඇතැයි වාරතා වෙයි.

මේ බව කටුනායක ගුවන් තොටුපළ රාජකාරී කළමනාකරු ද තහවුරු කර ඇත .

අද අලුයම 03.15 ට ඩුබායි බලා පිටත්ව යාමට නියමිත එමිරේට්ස් ගුවන් සේවයේ ඊ.කේ.- 349 දරන ගුවන් යානය පිවිසීම සදහා බැසිල් රාජපක්ෂ මහතා කටුනායක ගුවන් තොටුපළ වෙත පැමිණ තිබේ .

එහිදී " සේද මාවත " (Silk Route ) අසළ එමිරේට්ස් සහ ශ්‍රී ලන්කන් ගුවන් සේවා පරීක්ෂණ කවුළු අසළ රැදී සිටි ගුවන් මගීන් , බැසිල් රාජපක්ෂ ගුවන් තොටුපළෙන් බැහැර කරන ලෙස ඉල්ලමින් කෑ ගැසීමත් සමගම ඔහු ගුවන් තොටුපළෙන් ආපසු පිටත්ව ගොස් තිබේ.

අරගලකරුවන් විසින් අත්පත් කරගත් කොළඹ ජනාධිපති මන්දිරය, ජනාධිපති ලේකම් කාර්යාලය සහ කොළඹ අරලිගහ මන්දිරය යන ස්ථානවල තිබූ වටිනා භාණ්ඩ, පෞරාණික බඩු භාණ්ඩ රැසක් හොරුන් විසින් ගෙනගොස් ඇති බව වාර්තා වෙයි .

ඒවායේ ඇති බඩු භාණ්ඩ ඇතැමුන් ඉවතට ගෙන යන අයුරු දැක්වෙන වීඩියෝ ද සමාජජාලාවල වූ හුවමාරු වෙමින් පවතී.

එමෙන්ම එම ගොඩනැගිලිවල තිබූ නාන කාමර, මුළුතැන්ගෙයි ඇතුළු උපකරණ ද විශාල වශයෙන් හානි කර ඇති බව දැක්වෙන ජායාරූප සහ වීඩියෝ ද සමාජ මාධ්‍ය තුළ සංසරණය වෙමින් පවතී.

ඉකුත් නව වැනි දා එම ගොඩනැගිලි පාලනය අරගල කරවන විසින් අත්පත් කරගත් පසු මහජන ප්‍රදර්ශනය සඳහා විවෘතව පවතින අතර ඒ සමගම අතිවිශාල පිරිසක් ඒ වෙත ඇදී එමින් පවතී.

මේ අතර අදාළ ස්ථානවලට අලාභහානි කිරීම වැලැක්වීමට සහ දේපළ සොරා ගැනීම වැලැක්වීමට ගෝල්ෆේස් අරගලකරුවන් හැකි උපරිමයෙන් කටයුතු කරන නමුත් ඒ කටයුත්ත දුෂ්කර වී ඇති බවත් එහි නියෝජිතයන් කිහිපදෙනෙකු පැවසීය .

කථානායක විසින් සර්වපාක්ෂික එකඟතාවක් සඳහා කැඳවීමට නියමිත අරගලකරුවන්' යන හිසින් යුතුව අරගලකරුවන් 25 දෙනෙකුගේ නම් සහිතව සමාජ මාධ්‍ය තුළ සංසරණය වන ලියවිල්ල අසත්‍ය හා සාවද්‍ය ලියවිල්ලක් බව 'සර්වපාක්ෂික අරගලකරුවෝ' පවසයි.

 සමාජ මාධ්‍ය ජාලවල පළ වී ඇති නම් ලැයිස්තුව ගැන පැහැදිලි කරමින් 'සර්වපාක්ෂික අරගලකරුවෝ' මාධ්‍ය නිවේදනයක් නිකුත්කර ඇති අතර එහි මේ බව සඳහන් කර ඇත .

ඒ අනුව අද (12) පස්වරුවේ ගෝල්ෆේස් අරගලකරුවන් සහ කතානායක මහින්ද යාපා අබේවර්ධන ගේ ප්‍රධානත්වයෙන් පැවැත්වීමට නියමිතව තිබූ බව කියන සාකච්ඡාවක් සිදුනොවන බවත් වාර්තා වෙයි .

මේ අතර අරගලය නියෝජනය කළ සංවිධානයක ප්‍රමුඛයකු වන ලහිරු වීරසේකර ද මාධ්‍ය වෙත අදහස් දක්වමින් පවසන්නේ කතානායක සමග අද කිසිදු සාකච්ඡාවක් නොමැති බවය.

අරලිය ගහ මන්දිරයේ අරගලකරුවන් අතර ගෝරි !

තවද අරලියගහ මන්දිරය අත්පත්කරගෙන සිටින අරගලකරුවන් දෙපිරිසක් අතර අද අලුයම් කාලයේදී හටගත් ගැටුමකින් 10 දෙනෙක් තුවාල ලබා කොළඹ ජාතික රෝහලට ඇතුලත්කර ඇති බව වාර්තා වෙයි .

එහිදී තවත් පිරිසක් සුළු තුවාල ලබා ඇතත් රෝහල්ගතකර නැති බව දැනගන්නට ඇත .

අරගලයේ නිරත කණ්ඩායම් විසින් අරලියගහ මන්දිරයේ කාමර වෙන්කරගෙන සිටින බවත් එක් කණ්ඩායමක් විසින් වෙන්කරගෙන සිටින කාමරයක් වෙනත් කණ්ඩායමක් විසින් අද අලුයම් කාලයේදී නිදා ගෙන සිටීම මෙම ගැටුමට මුල්වී ඇති බවත් ආරංචි මාර්ග සඳහන් කරයි.

ව්‍යවස්ථාව ආරක්ෂා කොට ව්‍යවස්ථාව තුළින් ජන ජනමතයට කන් දීමට තමා බැඳී සිටින බව අග්‍රාමාත්‍ය රනිල් වික්‍රමසිංහ විශේෂ ප්‍රකාශයක් කරමින් අද (11) පැවසීය.

අග්‍රාමාත්‍යවරයා විසින් එම විශේෂ ප්‍රකාශය සිදුකරනු ලැබුවේ, පසුගිය ජුලි මස 09 වනදා ඇතිවූ සිදුවීම සම්බන්ධයෙන් අදහස් දක්වමිනි.

කඩා වැටුණු ආර්ථිකය දවසෙන් දෙකෙන් හදන්නට නොහැකි අතර මූලික පියවර තැබීමට වසරක්වත් ගතවන බව කී අග්‍රාමාත්‍යවරයා, කෙසේ වුවද දැන් රටට සර්වපාක්ෂික ආණ්ඩුවක් උවමනා වී තිබෙන බවද සඳහන් කළේය.

තම පෞද්ගලික නිවස ගිනි බත් කිරීමේ සිද්ධිය සම්බන්ධයෙන් ද අදහස් දක්වමින් අග්‍රාමාත්‍ය රනිල් වික්‍රමසිංහ කිවේ, "ගිනි තැබුවේ මට තිබූ එකම නිවසයි. ලංකාවේ මෙන්ම පිට රටත් මට වෙනත් ගෙවල් තිබුණේ නැහැ. ඒ නිවස අද ගිනිබත් කර තිබෙනවා. මගේ ලොකුම ධනය වූයේ පුස්තකාලයයි. එහි පොත් 2500ක් තිබුණා."යනුවෙනි.

මාධ්‍යවේදීන්ට පහර දීමේ සිද්ධිය සම්බන්ධයෙන් පොලිස් විශේෂ කාර්ය බලකායේ ජ්‍යෙෂ්ඨ පොලිස් අධිකාරි රොමේෂ් ලියනගේ ගේ වැඩ තහනම් කර තිබේ.

පොලිස් මාධ්‍ය කොට්ඨාසය නිවේදනයක් නිකුත් කරමින් පවසන්නේ, වහාම ක්‍රියාත්මක වන පරිදි පොලිස් විශේෂ කාර්ය බලකායට අනුයුක්තව සේවය කරන ජ්‍යෙෂ්ඨ පොලිස් අධිකාරී ආර්. රොමේෂ් ලියනගේ ගේ වැඩ තහනම් කළ බවයි.

පසුගිය 9 වනදා අග්‍රාමාත්‍ය රනිල් වික්‍රමසිංහගේ නිවස අසල පැවති විරෝධතාවක තොරතුරු වාර්තාකරණයේ යෙදී සිටියදී නිව්ස් ෆස්ට් මාධ්‍යවේදීන් පිරිස පොලිස් විශේෂ කාර්ය බලකායේ සහ පොලීසිය පහරදීමට ලක්විය.

පසුව පහරදීම්වලින් තුවාල ලැබූ මාධ්‍යවේදීන් රෝහල්ගත කිරීම සඳහා රැගෙන යාමට එම ස්ථානයට ගිය තවත් නිව්ස් ෆස්ට් කණ්ඩායමකට ද පොලිසිය හා පොලිස් විශේෂ කාර්ය බලකායේ පිරිසක් අමානුෂික ලෙස පහර දුන්නේ ය.

ඒ අනුව පහර දීමේ සිදුවීමට අදාළව සහ එම පහර දීම වැළැක්වීමට කටයුතු නොකිරීම මත පොලිස්පතිවරයාට පැවරී ඇති බලතල ප්‍රකාරව හා රාජ්‍ය සේවා කොමිෂන් සභාවේ ආවරණ අනුමැතියට යටත්ව රොමේෂ් ලියනගේ ගේ වැඩ තහනම් කර තිබේ.

මෙම නිර්ලජ්ජිත ප්‍රහාරයෙන් නිව්ස්ෆස්ට් මාධ්‍යවේදීන් 07 දෙනෙකුට තුවාල සිදුවිය.