පුවත්

අරලිය ගහ මැදුර ඉදිරිපිට ඉදිවූ ‘නෝ ඩීල් ගම’ ගලවා ඉවත් කර ගෙන ඇති බව වාර්තා වෙයි .

නෝ ඩීල් ගමේ සාමාජිකයින් විසින් ගත් තීරණයකට අනුව මෙම ඉවත් කිරීම සිදුකර ඇති බවත් වාර්තා වෙයි .

ගෝල්ෆේස් අරගල භූමිය ආරම්භ කළ පසු රට පුරා විවිධ අරගල භූමින් ඉදිවෙමින් පැවතුන අතර අරලිය ගහ මන්දිරය ඉදිරිපිට පළමුව ඉදිකෙරුණේ මයිනාගෝගම ය. ඒ අග්‍රාමාත්‍ය ලෙස මහින්ද රාජපක්ෂ කටයුතු කළ අවස්ථාවේ ය.

පසුව අග්‍රාමාත්‍ය ධූරය සඳහා රනිල් වික්‍රමසිංහ පත්වීමත් සමග නෝ ඩීල් ගම ලෙස අරලිය ගහ මන්දිරය ඉදිරිපිට කූඩාරම් ගොඩනැගිණ.

පසුගිය 09 වැනි දා මාධ්‍යවේදීන්ට සිදුකළ පහරදීමට අදාළව වැඩතහනමට ලක්ව සිටි පොලිස් විශේෂ කාර්ය බලකායේ(STF) ජ්‍යෙෂ්ඨ පොලිස් අධිකාරී රොමේෂ් ලියනගේ  අද (21) සිට නැවත සේවයේ පිහිටුවා තිබේ.

පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නීතිඥ නිහාල් තල්දූව  පැවසුවේ, අධිකරණ ක්‍රියාමාර්ග හා විනය පරීක්ෂණවලට යටත්ව මෙම නිලධාරියා නැවත සේවයේ පිහිටුවා ඇති බවයි.

නව රජයේ අග්‍රමාත්‍යවරයා ඇතුළු කැබිනට් මණ්ඩලය ජනාධිපති රනිල් වික්‍රමසිංහ ඉදිරියේ හෙට (22) උදේ දිවුරුම්දීමට නියමිත බව වාර්තා වෙයි .

වාර්තා වන ආකාරයට නව රජයේ අග්‍රාමාත්‍යවරයා ලෙස සභානායක දිනේෂ් ගුණවර්ධන , ජනාධිපති රනිල් වික්‍රමසිංහ ඉදිරියේ දිවුරුම් දීමට නියමිතය.

ජනාධිපති මාධ්‍ය අංශය වැඩිදුරටත් සඳහන් කර සිටියේ මෙම දිවුරුම් දීමේ උත්සවය හෙට පෙරවරු 9.00ට කොළඹ, මල් පාරේ පිහිටි අග්‍රාමාත්‍ය කාර්යාලයේ දී සිදු කිරීමට නියමිතව ඇති බවය.

ජනාධිපති රනිල් වික්‍රමසිංහගේ පෞද්ගලික නිවස ගිනි තැබීම සම්බන්ධයෙන් චෝදනා එල්ලවී සැකකරුවකුව සිටින සහ මේ වන විට රටින් පිටව ගොස් සිටින හිටපු රාජ්‍ය ඇමති පුතෙකුව මෙරටට ගෙන්වා ගැනීමට අවශ්‍ය ලිපි ලේඛන අපරාධ පරීක්ෂණ දෙපාර්තමේන්තුව විසින් ජාත්‍යන්තර පොලිසිය වෙත යොමුකර ඇත .

ඒ ඔහුට එරෙහිව අධිකරණය මගින් ලබාගත් රතු නිවේදන නියෝගයක් ද සමඟිනි.

එම නියෝජ්‍ය අමාත්‍යවරයාගේ පුතා රනිල් වික්‍රමසිංහගේ නිවස ගිනි තැබීමට පසු දින ඩුබායි බලා පිටත්ව ගොස් ඇති බවත් පසුව එහි සිට එංගලන්තය බලා ගොස් තිබෙන බවටත් තොරතුරු ලැබී ඇත.

අපරාධ පරීක්ෂණ දෙපාර්තමේන්තු විමර්ශන වලින් පෙනී ගොස් ඇත්තේ රනිල් වික්‍රමසිංහගේ නිවස ඉදිරිපිටට මහජනතාව රැස් කිරීමට මෙම නියෝජ්‍ය අමාත්‍ය පුතා සම්බන්ධ වී ඇති බවය.

ඔහු ඒ සඳහා සමාජ මාධ්‍ය ඔස්සේ සජීවී වීඩියෝවක් පවා නිකුත්කර ඇති බවත් අනාවරණය වී ඇත.

අපරාධ පරීක්ෂණ දෙපාර්තමේන්තුව විසින් එම වීඩියෝවද සිය විමර්ශන සඳහා සාක්ෂියක් බවට පත්කරගෙන තිබෙන බවත් වාර්තා වෙයි .

සමගි තරුණ බලවේගයේ සභාපති ධු⁣රයෙන් මයන්ත දිසානායක ඉල්ලා අස්වී තිබේ.

ඉල්ලා අස්වීම පිළිබද ලිපිය සමගි ජන බලවේගයේ නායක විපක්ෂ නායක සජිත් ප්‍රේමදාසට සහ සමගි ජන බලවේගයේ මහ ලේකම් රංජිත් මද්දුම බණ්ඩාර වෙත යොමුකළ බව ඔහු පවසයි .

පක්ෂයත් සමග ඉදිරි කටයුතු කිරිම ගැන ඉදිරියේදී සාකච්ඡාවක් කරන බවත් මයන්ත දිසානායක මන්ත්‍රීවරයා වැඩිදුරටත් සඳහන් කර ඇත .

කැරැල්ලක් වෙන්න පුළුවන් තීන්දුවක් !

මේ සම්බන්ධයෙන් අදහස් දක්වමින් දේශපාලන විචාරකයන් පවසන්නේ මයන්ත දිසානායක මන්ත්‍රීවරයා ගේ මේ තීන්දුව සමගි ජනබලවේගය පක්ෂයේ දෙදරායාමක් සනිටුහන් කරන්න ඉඩ ඇති බවයි.

මේ වන විට සමගි ජනබලවේගය පක්ෂයේ මන්ත්‍රීවරුන් පිරිසක් වැඩබලන ජනාධිපති රනිල් වික්‍රමසිංහ ජනාධිපති කිරීම වෙනුවෙන් ජන්දය ප්‍රකාශ කර ඇති බවත් ඔවුන් සිහිපත් කරයි.

එසේම මතුව ඇති තත්ත්වය හමුවේ සජබ බලවේග කළමනාකරණය කරගන්නට පක්ෂ නායක සජිත් ප්‍රේමදාස අසමත්ව ඇති බවක් පෙන්නුම් කරන බවත් ඉදිරියට දුර්වල වන සජබ කේඩරය යළිත් එක්සත් ජාතික පක්ෂයේ කේඩරය ශක්තිමත් කිරීමේ හැකියාව ප්‍රතිකේෂ්ප කළ නොහැකි බවත් දේශපාලන විචාරකයන් පවසයි .

පාර්ලිමේන්තුව වාර අවසාන කිරීමට ජනාධිපති රනිල් වික්‍රමසිංහ තීරණය කර ඇති බව වාර්තා වෙයි .

ආණ්ඩු පක්ෂයේ ප්‍රධාන සංවිධායක අමාත්‍ය ප්‍රසන්න රණතුංග මේ බව සඳහන් කරන අතර අදාළ තීන්දුව ජනාධිපති විසින් පක්ෂ නායකයන්ට බව දැනුම් දුන් බව බවත් පවසයි .

ධම්මික එළියට !

මේ අතර බැසිල් රාජපක්ෂ ගේ ඉල්ලා අස්වීම හේතුවෙන් පුරප්පාඩු වූ පොදුජන පෙරමුණේ ජාතික ලැයිස්තු මන්ත්‍රී ධූරයට පත්වූ ධම්මික පෙරේරා මන්ත්‍රීධූරයෙන් ඉවත් වීමට තීරණය කර ඇතැයි වාර්තා වේ .

පාර්ලිමේන්තු මන්ත්‍රී ධූරයට පත්වූ ධම්මික පෙරේරා හිටපු ජනාධිපති ගෝඨාභය රාජපක්ෂ විසින් ආයෝජන ප්‍රවර්ධන අමාත්‍ය ලෙස ප්‍රබල අමාත්‍ය ධූරයක පිහිටවූ අතර , පසුගියදා ඔහු එවකට අග්‍රාමාත්‍ය රනිල් වික්‍රමසිංහ දැරූ මුදල් අමාත්‍ය ධූරයෙන් ඉල්ලා අස්විය යුතු බව පවසමින් ප්‍රසිද්ධ මාධ්‍ය හමුවකදී අදහස් දැක්වීය .

එහෙත් ජූලි 09 සිදුවූ එවකට ජනාධිපති ගෝඨාභය රාජපක්ෂ ගේ පලායාමෙන් පසුව එම අමාත්‍ය ධුරයෙන් ඉල්ලා අස්විය.

8 වන විධායක ජනාධිපති ලෙස රනිල් වික්‍රමසිංහ පත්ව දිවුරුම්දීමේ උත්සවය සඳහා සමගි ජනබලවේගය පක්ෂයේ මන්ත්‍රීවරුන් සහභාගී නොවීමට යෝජනා කර පක්ෂ නායක තනිව ඊට සහභාගි වීම සම්බන්ධයෙන් පක්ෂ අභ්‍යන්තරයේ විරෝධයක් මතුව ඇති බව දේශපාලන ආරංචි මාර්ග පවසයි .

සඳහන් වන ආකාරයට අද (21) පාර්ලිමේන්තුවේදී පැවති මෙම දිවුරුම් දුන් උත්සවය සඳහා සහභාගි නොවීමේ යෝජනාවක් මන්ත්‍රීවරුන් වෙත ඉදිරිපත් කර ඇත .

ඒ අනුව කිසිදු මන්ත්‍රීවරයකු ඊට සහභාගි නොවීමට පොදු එකඟතාවක් ලබාගෙන පක්ෂ නායක සජිත් ප්‍රේමදාස ඊට සහභාගි ව ඇත.

මේ අතර සමගි ජනබලවේගය පක්ෂයේ අභ්‍යන්තර ආරංචි මාර්ග සඳහන් කරන්නේ ඊයේ (20) පාර්ලිමේන්තුවේදී පැවති ජනාධිපතිවරණය අවස්ථාවේ සමගි ජනබලවේගය පක්ෂයේ මන්ත්‍රීවරුන් 14 ක් අපේක්ෂක රනිල් වික්‍රමසිංහ වෙත ජන්දය ප්‍රකාශ කර ඇත .

ඒ සම්බන්ධයෙන් පක්ෂ නායක සජිත් ප්‍රේමදාස දැඩි භීතියකින් පසුවෙන බවත් රනිල් වික්‍රමසිංහ ජනාධිපති කැඳවන සර්ව පාක්ෂික ආණ්ඩුවේ අමාත්‍ය ධූර කිහිපයක් සඳහා පක්ෂයේ පිරිසක් එක්වනු ඇති බවට ලැබී ඇති තොරතුරු ද ඊට බලපා ඇති බවත් ආරංචි මාර්ග පවසයි .

පෙරේදා සජිත් අගමැතිට ඇඳලා !

මේ අතර පසුගිය (19) වනදා පැවති සමගි ජනබලවේගය පක්ෂයේ පාර්ලිමේන්තු කණ්ඩායම් රැස්වීම අවස්ථාවේ එක් වරම සුපුරුදු හැසිරීමෙන් වෙනස්ව පක්ෂ නායක සජිත් ප්‍රේමදාස විධාන නිකුත්කරමින් අග්‍රාමාත්‍ය මෙන් හැසිරුණු බවටත් මන්ත්‍රී කණ්ඩායම තුළ චෝදනා නැගී ඇති බවත් වාර්තා වෙයි .

ඉහත ආරංචි මාර්ග සඳහන් කරන්නේ පක්ෂ නායක ගේ ඒ හැසිරීම ඊට පෙර කිසිදිනෙක දැක නොතිබූ හැසිරීමක් බවයි.

වරක් විධාන ස්වරූපයෙන් මන්ත්‍රීවරුන් ඇමතූ පක්ෂ නායකයා තවත් අවස්ථාවක රවුෆ් හකීම් මන්ත්‍රීවරයා දුරකථන ඇමතුමක් ලබාගන්නට එළියට යාම ගැන ආවේගශීලී ලෙස විවේචනය කළ බවත් දැනගන්නට ඇත .

ඒ " ෆෝන් අරගෙන මේවා කරන්න බෑ. ඉස්සරහට ඔහොම වැඩ කරන්න දෙන්න බෑ" කියමිනි.

එහිදී තලතා අතුකෝරළ මන්ත්‍රීවරිය " ජනාධිපතිවරණය දිනන්නත් කලින් මේ අගමැති වෙලා මොකද ?" කියා ඇසෙන ලෙස ඊට ප්‍රතිචාර දක්වා ඇති බවත් වාර්තා වෙයි .

මීට පෙර එක්සත් ජාතික පක්ෂයේ කෘත්‍යාධිකාරී මණ්ඩල සාකච්ඡා අවස්ථා වලදී පක්ෂ නායක රනිල් වික්‍රමසිංහ වෙත දැඩි විවේචන එල්ල කළ අවස්ථා වලදී ඔහුවත් මේ ආකාරයට හැසිරී නැති බවත් මන්ත්‍රී කණ්ඩායමේ ඇතමුන් අදහස් හුවමාරු කරගෙන ඇති බවත් වැඩිදුරටත් වාර්තා වෙයි .

මෙරට 8 වන විධායක ජනාධිපති රනිල් වික්‍රමසිංහ විසින් ජනාධිපති ලේකම් ධූරය සඳහා සමන් ඒකනායක පත්කර ඇත.

අදාළ පත්වීම අද (21) රනිල් වික්‍රමසිංහ ජනාධිපති ධුරයේ දිවුරුම් දීමෙන් අනතුරුව සිදුකර ඇත .

සමන් ඒකනායක මීට පෙර එනම් 2015 - 2019 සහ පසුගිය මාස 2ක පමණ කාලය තුළ රනිල් වික්‍රමසිංහ අග්‍රාමාත්‍යවරයා ගේ අග්‍රාමාත්‍ය ලේකම් ලෙස කටයුතු කර ඇත .

ශ්‍රී ලංකා පරිපාලන සේවයේ විශේෂ ශ්‍රේණියේ විශ්‍රාමික නිලධාරියෙකු වන ඔහු 30වසරක පමණ සේවා කාලය තුළ යෞවන කටයුතු, ක්‍රීඩා, සමෘද්ධි,නිවාස, කර්මාන්ත, විදේශ හා මුදල් අමාත්‍යාංශවල මෙන්ම මැලේසියාවේ සහ ලන්ඩනයේ ශ්‍රී ලංකා මහකොමසාරිස් කාර්යාලයන්හි සේවය කර ඇත.

පේරාදෙණිය විශ්වවිද්‍යාලයේ සිය ප්‍රථම උපාධිය ලබාගෙන ඇති ඔහු ශ්‍රී ජයවර්ධනපුර විශ්විවද්‍යාලයේ රාජ්‍ය පරිපාලනය පිලිබද පශ්චාත් උපාධිය ලබා ඇත .

ශ්‍රී ලංකාවේ 08 වැනි විධායක ජනාධිපති ලෙස රනිල් වික්‍රමසිංහ   පාර්ලිමේන්තු පරිශ්‍රයේදී දිවුරුම් දුන්නේය.

අගවිනිසුරු ජයන්ත ජයසූරිය  ඉදිරියේ දිවුරුම් දීම සිදු කෙරිණි.

හය වරක් අග්‍රාමාත්‍ය ධුරයෙහි කටයුතු කර ඇති රනිල් වික්‍රමසිංහ  විධායක ජනාධිපති ධුරයෙහි දිවුරුම් දෙන්නේ ප්‍රථම වතාවටයි.

පාර්ලිමේන්තු ඡන්දයෙන් විධායක ජනාධිපති ධුරයට පත්වීමෙන් අනතුරුව පාර්ලිමේන්තු පරිශ්‍රයේදී ම දිවුරුම් දීමට අවස්ථාව ලබා දෙන ලෙස රනිල් වික්‍රමසිංහ  ඉල්ලා සිටියේය.

රනිල් වික්‍රමසිංහ තම දේශපාලන ජීවිතයේ දී පාර්ලිමේන්තු ප්‍රජාතන්ත්‍රවාදය ඉතා ඉහළින් අගය කළ නායකයෙකු ලෙස ප්‍රකටය.

මෙරට 8 වන විධායක ජනාධිපතිවරයා ලෙස තේරී පත්වූ රනිල් වික්‍රමසිංහ හෙට(21) සිය ධුරයේ දිවුරුම් දීමට නියමිතව ඇත.

ඒ හෙට පාර්ලිමේන්තු සංකීර්ණය තුළදී ය.

ජනාධිපති ධූරය සඳහා අද පාර්ලිමේන්තුවේදී පැවති ජන්ද විමසීමේ ප්‍රතිඵල ප්‍රකාශයට පත්කිරීමෙන් අනතුරුව රනිල් වික්‍රමසිංහ මේ වෙනුවෙන් කතානායක මහින්ද යාපා අබේවර්ධන වෙතින් අවසර ඉල්ලා සිටියේය .

එහිදී සිය දිවුරුම්දීමේ අවස්ථාව සඳහා එක්වන ලෙස ජනාධිපති රනිල් වික්‍රමසිංහ සියලු මන්ත්‍රීවරුන් වෙත ආරාධනා කළේය .

රජයේ සහ අනුමත පෞද්ගලික පාසල් ජුලි 25 වෙනිදා නැවත ආරම්භ කෙරුණද පාසල් පැවැත්වෙන්නේ සතියට දින තුනක් පමණක් බව අධ්‍යාපන අමාත්‍යාංශය නිවේදනය කරයි.

ඊට අනුව පාසල් පැවැත්වෙන්නේ සඳුදා, අඟහරුවාදා සහ බ්‍රහස්පතින්දා යන දින තුන පමණය.

බදාදා සහ සිකුරාදා යන දින දෙකෙකි නිවෙස් පාදක හෝ මාර්ගගත අධ්‍යාපනය සඳහා සිසුන් යොමුකළ යුතු බවත් අධ්‍යාපන අමාත්‍යාංශය සඳහන් කර ඇත .

පාසැල් පැවැත්වෙන දින තුනේදී සියලුම විෂයයන් ඉගැන්වෙන පරිදි විශේෂ කාලසටහනක් ද සකස් කළයුතු බවත් අධ්‍යාපන අමාත්‍යාංශය පාසල් බලධාරීන් වෙත දැනුම් දී තිබේ.

සිසු සිසුවියන් සහ කාර්ය මණ්ඩලය නියමිත වේලාවට පාසැල් පැමිණීම අනිවාර්යය වුවත් සාධාරණ හේතූන් මත සිදුවන නොපැමිණීම් සහ ප්‍රමාදයන් සම්බන්ධයෙන් ඔවුන් අපහසුතාවට පත් නොවන පරිදි කටයුතු කළයුතු බවත් ඇතැම් සිසු සිසුවියන්ගේ පාසල් නිල ඇඳුම් සහ පාවහන්වල අඩුපාඩු හෝ ගැටළු හේතුවෙන් ඔවුන්ගේ පාසල් පැමිණීම අධෛර්යයමත් නොකළ යුතු බවත් අධ්‍යාපන අමාත්‍යාංශය අවධාරණය කර ඇත.

Gota go home නමින් ඇරඹි ගෝල්ෆේස් අරගල බිමට අධිකරණ නියෝගයක් හේතුවෙන් තහනම් කළාපයක් සලකුණු වීමේ පුවතක් වාර්තා වෙයි .

වාර්තා වන ආකාරයට කොටුව පොලිසිය විසින් කරන ලද ඉල්ලීමක් සලකා බැලීමෙන් පසුව කොළඹ කොටුව මහේස්ත්‍රාත් තිලිණ ගමගේ විසින් නිකුත්කළ නියෝගයක් මත මෙය සිදුව ඇත.

ඒ අනුව ගෝල්ෆේස් පිටියේ බණ්ඩාරනායක පිළිරුව පිහිටි ස්ථානයේ සිට මීටර් 50ක ප්‍රදේශය තුළ කිසිදු පාර්ශ්වයකට ඇතුළු වීම වළක්වාලමින් අධිකරණ නියෝගය නිකුත්කර ඇත .

පොලිසිය අධිකරණයට වාර්තාවක් ඉදිරිපත් කරමින් සඳහන් කර ඇත්තේ අදාළ පිළිමයට හානි කිරීමේ සූදානමක් පවතින බවට තොරතුරු ලැබී තිබෙන බවයි.

එබැවින් අදාල පිළිමය පිහිටි ස්ථානයේ සිට මීටර් 50ක ප්‍රදේශය තුලට කිසිදු පාර්ශ්වයක් ඇතුළු වීම වළක්වාලීමේ නියෝගයක් නිකුත් කරන ලෙස පොලිසිය අධිකරණයෙන් ඉල්ලා තිබේ.

බෙදුණු අවස්ථාව ඉවර බවත් දැන් සියලු දෙනා එක්ව රට ගොඩනගමු යැයි ජනාධිපති රනිල් වික්‍රමසිංහ පවසයි .

ජනාධිපතිවරයා මේ බව සඳහන් කර සිටියේ අද (20) පාර්ලිමේන්තුවේ විශේෂ ප්‍රකාශයක් සිදුකරමින් ය.

ජනතාව ඉල්ලන අලුත් ක්‍රමවේදයක් බිහි කිරීම සඳහා අද සිටම එකතු වී සාකච්ඡා කරමු යැයි ජනාධිපතිවරයා සියළු පාර්ශවයන්ගෙන් ඉල්ලා සිටියේය.

රනිල් වික්‍රමසිංහ ජනාධිපති ජනාධිපතිධුරයට පත්වූ බව ප්‍රකාශයට පත්වීමෙන් අනතුරුව විශේෂ ප්‍රකාශයක් කරමින් වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය .

කතානායකතුමායි මමයි 1973 දී එකට දේශපාලන ගමන ආරම්භ කළ අය. මට අද විශේෂ සතුටක් තියෙනවා. ඔබතුමා මූලාසනයේ ඉද්දී මගේ පත්වීම ප්‍රකාශ කිරීම ගැන. මම අවුරුදු 45 ක් පාර්ලිමේන්තුව තුළ සිටිමින් දේශපාලනය කරලා තියෙනවා. මගේ ජීවිතය තියෙන්නේ මේ පාර්ලිමේන්තුවෙියි. මේ පාර්ලිමේන්තුවෙන් මට මෙම ගෞරවය ලබාදීම ගැන මම විශේෂයෙන්ම ස්තූතිය පුද කරනවා.

මීට අවුරුදු 31 ට කලින් එනම් 1993 දී අපි මේ ආකාරයටම රැස්වුනා. ඒ ප්‍රේමදාස ජනාධිපතිවරයාගේ ඝාතනයෙන් පස්සේ නව ජනාධිපතිවරයෙක් පත් කරන්න. එදා ඩී.බී විජේතුංග ජනාධිපතිතුමාට තරඟයකින් තොරව පත් කර ගන්න හැකියාව ලැබුණා. එදා එම ඡන්දයට සහභාගී වූ 15 ක් පමණ අදත් මේ පාර්ලිමේන්තුව තුළ සිටින බව මම කියන්න කැමතියි. මේ දෙවෙනි අවස්ථාවේදී ප්‍රථම වතාවට අපට ඡන්දයක් ලැබුණා.

ඒ ඡන්දයේදී අප අතර සාකච්ඡාවක් ඇති වෙලා එක අතකින් අපට පුළුවන් යැයි අප පෙන්නුවා. කිසිම ප්‍රශ්නයක් නැතුව ඡන්දයක් තියලා ජනාධිපතිවරයෙක් තෝරා පත් කර ගන්න පාර්ලිමේන්තුවට හැකි බව අප පෙන්වා තිබෙනවා. ඒ නිසා මට යුතුකමක් තියෙනවා පළමුව මා වෙනුවෙන් ඡන්දය ප්‍රකාශ කළ සියලු දෙනාටම ස්තූති කරන්න. ඊට සමානව මට යුතුකමක් තියෙනවා මෙම ඡන්දයට සහභාගී වූ සියළු දෙනාටමත් ස්තූති කරන්න.

රට අද තියෙන අමාරු තත්ත්වය ගැන අමුතුවෙන් කාටවත් කියන්න දෙයක් නෑ. ආර්ථික වශයෙන් අමාරු තැනක අපි ඉන්නේ. ඒ වගේම තරුණ තරුණියන් ක්‍රමයේ වෙනසක් ඉල්ලනවා. ජාත්‍යන්තරයේ ප්‍රශ්න ගණනාවක් තිබෙන මොහොතක් මේක. අපි ඒවට පැටලෙන්නේ නැතුව යන්න තියෙනවා. රට ඉදිරියට ගෙන යන්න අලුත් වැඩසටහනක් ඉදිරිපත් කරන්න තියෙනවා.

ජනතාව අපෙන් ඉල්ලන්නේ පරණ දේශපාලන ක්‍රමය නොවෙයි. මේ පාර්ලිමේන්තුව එකට එකතු වෙලා කටයුතු කරන්න ඕන කියන තැන තමයි ජනතාව ඉන්නේ. මාත් සමඟ තරඟ කළ අනුර දිසානායක මන්ත්‍රීතුමාටත්, ඩලස් අලහප්පෙරුම මන්ත්‍රීතුමාටත් මම ස්තූති කරනවා. මම ඩලස් අලහස්පෙරුම මන්ත්‍රීතුමාගෙන් ඉල්ලනවා අපි සියළු දෙනාම එකතු වෙලා අලුත් ක්‍රමවේදයක් හදන්න වැඩකටයුතු කරමු.

මගේ මිත්‍ර අනුර කුමාර දිසානායක මැතිතුමාගෙනුත් මම ඉල්ලනවා මේ වැඩපිළිවෙලට සහාය දෙන්න කියලා. මොකද අද රටේ තිබෙන තත්ත්වය ගැන එතුමා ඉතාම හොදින් දන්නවා. මාගේ මිත්‍ර විපක්ෂ නායක සජිත් ප්‍රේමදාස මැතිතුමා ඇතුළු සියළු දෙනාගෙන්ම එම ඉල්ලීමම නැවත කරන්න කැමතියි. අපි සියළු දෙනා එකට එකතු වෙලා අලුත් ක්‍රමවේදයක් හදන්න බලමු. ඒ ගැන අපි සියළු දෙනා එකට එකතු වෙලා සාකච්ඡා කරමු. දෙමළ සන්ධානයේ නායක සම්බන්ධන් මැතිතුමා ඇතුළු සියළු දෙනාගෙනුත් මෙම ඉල්ලීම මම කරනවා.

පොන්නම්බලම් මන්ත්‍රීතුමාගෙනුත්, විග්නේෂ්වරන් මන්ත්‍රීතුමාගෙනුත් එම ඉල්ලීම මම කරනවා. අපි ඔක්කොම එකතු වෙලා මේ වැඩ කටයුතු ඉදිරියට ගෙන යමු. ඒ වගේම ශ්‍රී ලංකා පොදුජන පෙරමුණේ නායක හිටපු ජනාධිපති මහින්ද රාජපක්ෂ මැතිතුමාගෙනුත් එම පක්ෂය වෙනුවෙන් මම මේ ඉල්ලීම කරනවා. මෙතන සිටින හිටපු ජනාධිපති මෛත්‍රිපාල සිරිසේන මැතිතුමාගෙනුත් මේ ඉල්ලීම මම කරන්න කැමතියි. අපි බෙදුන අවස්ථාව දැන් ඉවරයි.

අපිට පැය 48 ක් තිබුණා බෙදෙන්න. ඒ පැය 48 දි අපි බෙදුනා. දැන් ඒ කාලය අවසන් නිසා මම ඉල්ලනවා අපි එකට එකතු වෙලා සාකච්ඡා කරමු. හෙට සිට ඔබ සියළු දෙනා සමඟ සාකච්ඡා කරන්න මම කැමතියි. මට තව ඉල්ලීමක් තියෙනවා මේ සභාවෙන් කරන්න. සභාවෙන් පිට පාර්ලිමේන්තු ගොඩනැගිල්ල තුලදී මට ජනාධිපති ධූරයේ දිවුරුම් දෙන්න අවස්ථාව දෙන්නැයි කතානායක තුමාගෙන් මම ඉල්ලනවා.

මාසයක කාලයක් ඇතුළත නව ජනාධිපතිවරයා ඇතුළු ආණ්ඩුව ගෙදර යවන බව ගාලු මුවදොර අරගලකරුවන් පවසයි .

ඒ අද (20) පාර්ලිමේන්තු ජන්ද විමසීමේදී රනිල් වික්‍රමසිංහ ජයග්‍රහණය නිවේදනය වීමෙන් පසුව මාධ්‍ය හමුවකදී අදහස් දක්වමින් ය.

පාර්ලිමේන්තුවේ දී ජනාධිපති වූ රනිල් වික්‍රමසිංහ අරගලය මර්දනය කිරීමට උත්සාහ කරන බවද පැවසූ අරගලකරුවන් ඊට බිය නොවන බවත් පවසයි .

අරගලය නව මුහුණුවරකින් තවදුරටත් ක්‍රියාත්මක බව ද ඔවුහු සඳහන් කළහ.

රනිල් වික්‍රමසිංහට ජනාධිපති වීමට ඡන්දය දුන් 134 දෙනා ගැන ජනතාව බලා ගනු ඇතැයි ද ඔවුන් අවධාරණය කර සිටියි.

මෙරට අනුප්‍රාප්තික ජනාධිපති තේරීමේ පාර්ලිමේන්තු ජන්ද විමසීම අවස්ථාවේ ඉන්දීය දේශපාලන බලපෑම් සිදුවූ බවට පළවෙන වාර්තා ප්‍රතික්ෂේප කරමින් නිවේදනයක් නිකුත්කර ඇත .

ලංකාවේ ඉන්දීය මහ කොමසාරිස් කාර්‍යාලය විසින් මෙකී නිවේදනය නිකුත්කර ඇති අතර එය පහත දැක්වෙයි .

ඉන්දීය නිවේදනය මෙන්න !

ශ්‍රී ලංකා ජනාධිපතිවරයා තෝරා ගැනීම උදෙසා පැවැත්වෙන පාර්ලිමේන්තු මැතිවරණය සම්බන්ධයෙන් ශ්‍රී ලංකාවේ දේශපාලන නායකයන්ට ඉන්දියාව විසින් දේශපාලන මට්ටමෙන් බලපෑම් කිරීමට උත්සහ දරන ලද බවට පළ වන පදනම් විරහිත සහ සම්පූර්ණයෙන්ම කාල්පනික මාධ්‍ය වාර්තා අපගේ අවධානයට ලක්ව ඇත.

2. අප එම වාර්තා තරයේ ප්‍රතික්ෂේප කරන අතර ඒවා සම්පූර්ණයෙන්ම සාවද්‍ය වේ. එම වාර්තා පැහැදිලිවම කවරකුගේ හෝ කල්පනා මාත්‍රයකි.

3. ප්‍රජාතන්ත්‍රවාදී ක්‍රමවේදයන් සහ වටිනාකම්, ස්ථාපිත ආයතන මෙන්ම ව්‍යවස්ථාමය ප්‍රතිපාදන හරහා ශ්‍රී ලාංකික ජනතාවගේ අභිලාෂයන් සාක්ෂාත් කරගැනීම උදෙසා ඉන්දියාව සහයෝගය ලබා දෙන බවට සහ ඉන්දියාව වෙනත් රටක අභ්‍යන්තර කරුණු සහ ප්‍රජාතන්ත්‍රවාදී ක්‍රමවේදයන්ට මැදිහත් නොවන බවට අවධාරණය කෙරේ.

දැන් ජනාධිපති කවුද කියලා රටම දන්නවා. ප්‍රකාශිත ජන්ද 223 යි. ප්‍රතික්ෂේපිත ජන්ද 4 යි. වලංගු ජන්ද සංඛ්‍යාව 219 යි. අනුප්‍රාප්තික ජනාධිපති ජන්දය ජයග්‍රහණය කරන රනිල් වික්‍රමසිංහ ජන්ද 134ක් ලබා ගන්නවා. ඩලස් අලහප්පෙරුම ජන්ද 82ක් ලබා ගන්නවා. අනුර දිසානායක ජන්ද 3යි.

පේන විදිහට සජිත්ගේ කට්ටියත් රනිල්ට ජන්දය දීලා වගේ කියලත් සෝෂල් මීඩියා වල කතා යනවා. ඒ කතා කොහොම වෙතත් , මේ කියන්න යන්නේ වෙන්න ජනාධිපති ගේම ඇතුලේ කවුරුත් නොදැකපු, නොඅහපු ටික.

තීරණාත්මක ජූලි 20 !

ගෝඨාභයගේ පළායාම එක්ක අගමැති රනිල් වැඩබලන ජනාධිපති වෙනවා. ජූලි 20 තමයි ඉතුරු ධූර කාලය වෙනුවෙන් ජනාධිපතිවරයෙක් පාර්ලිමේන්තුවෙන් තෝරාගන්න දිනය හැටියට නම් වෙන්නේ. කවුරුත් බලාගෙන හිටියේ ආණ්ඩුව පාර්ශවයෙන් වැඩබලන ජනාධිපති රනිල් වික්‍රමසිංහ, විපක්ෂයෙන් සජබ නායක සජිත් ප්‍රේමදාස හරි සරත් ෆොන්සේකා හරි. ජාතික ජනබලවේගයෙන් අනුර ඉදිරිපත් වෙයි කියලා.

ඒත් ,මතකනේ වුන දේ. එක පාරටම ඩලස් අලහප්පෙරුමත් ජනාධිපති අපේක්ෂක විදිහට ඉදිරිපත් වෙනවා. ඊට පස්සේ ජනාධිපති සටන ටිකක් සංකීර්ණ වෙන්න ගන්නවා. අපේක්ෂකයන් වැඩි වෙනකොට කට්ටිය කිව්වේ, රනිල්ට වාසිය යයි කියලා. හැබැයි කට්ටියට හීන් දාඩිය දාන්න ගත්තේ විපක්ෂයෙන් පොදු අපේක්ෂකයෙක් කියලා යෝජනාව ආපු එකත් එක්ක.

ඩඩලස් ද ? සජිත් ද ?

මොකද ඒ වෙනකොටත් ඩලස් සහ එයාගේ ටීම් එක ආණ්ඩුවෙන් එළියට ඇවිත් විපක්ෂයේ ස්වාධීන කණ්ඩායමක් හැටියට හිටියේ. ඔතන ඉඳලා තමයි ජනාධිපති සටන උණුසුම් වගේම කාගේ කාගේත් ඇඟ හිරිවැටෙන තැනට පත්වෙන්නේ. වැඩේ පටන් ගන්නේ සජිත් සහ ඩලස් දෙන්නගෙන් එක්කෙනෙක් ජනාධිපති අපේක්ෂක වෙන්න ආපු යෝජනාව එක්ක. දෙපැත්තම සාකච්ඡා මේසෙට එනවා. හැබැයි ඒ එන්නේ ජනාධිපති අපේක්ෂක වෙන්න අනිත් කෙනාගේ සහය ගන්න මිසක්, අනිත් කෙනාට සහය දෙන්න එහෙම නෙවෙයි.

නාලක ගොඩහේවා ගේ දත්ත !

වියත්මගේ කැඳවුම්කරු නාලක ගොඩහේවා තමයි සංඛ්‍යා දත්ත එක්ක ඩලස් පාර්ශවයෙන් සාකච්ඡා පටන් ගන්නේ. නාලකගේ ගණන් හැදිල්ල අනුව එතකොටත් මන්ත්‍රීවරුන් 60 ක් 70ක් ගොඩදාන මට්ටමක් ඩලස්ට තියෙනවා. මෙතැනදී ඩලස් පාර්ශවයේ අදහස වුණේ රනිල් පරද්දන්න නම් පුළුවන් තරම් පොහොට්ටු ජන්ද කඩන්න ඕන. ඒකට පොහොට්ටුවේ හිටපු අපේක්ෂකයෙක් විදිහට ඩලස් තමයි සුදුසු කියලා. ඒ හැර සජිත් ගැන එයාලට පෞද්ගලික අවුලක් නෑ කියලත් ඩලස් පාර්ශ්වය කියලා.

හැබැයි සජබ හිටියේ වෙනත් මතයක. සජිත් ප්‍රමුඛ සජබ හිටියේ විපක්ෂයේ අපේක්ෂකයා සජිත් විතරමයි කියලා. සජිත්ලත් කිහිප වතාවක් පක්ෂය ඇතුලේ සජිත්ගේ නම යෝජනා ස්ථිර කළා. පෙරේදා වෙනකොටත් ඒකයි සජිත් - ඩලස් සාකච්ඡා තීරණයක් නැතුව තිබුනේ.

අරගලයේ පිරිසක් සජිත් හමුවෙලා !

කොහොම නමුත් ඔය අතරේ අරගලයේ පිරිසක් පොහොට්ටුව සහ රනිල් හැර අනිත් දේශපාලන පක්ෂ හම්බෙන්න ගන්නවා. ඒ හමුවේදී සජිත්ට ලොකු බලපෑමක් ආවලු මේ අර්බුදය විසඳන්න ඉදිරිපත් වෙන්න කියලා. එතැනදී සජිත් පොරොන්දු වුනාලු අරගලය වෙනුවෙන් තමන්ගේ පැත්තෙන් ඕන කැපකිරීමක් කරන්න සූදානම් කියලා.

අවසන් සාකච්ඡාව !

හැබැයි එහෙම කියලත් පෙරේදා රෑ 10 ට විතර සජිත් - ඩලස් අතර සාකච්ඡා සාර්ථක වෙලා තිබුණේ නෑ . දේශපාලන ආරංචිමාර්ග කියන විදිහට පෙරේදා මධ්‍යම රාත්‍රියේත් තීරණාත්මක සාකච්ඡාවක් පැවත්විලා. ඒ සාකච්ඡාවට සජිත්ගේ පැත්ත ලීඩ් කරලා තියෙන්නේ, සජිත්ගේ අතිජාත මිතුරා ලක්ෂ්මන් ෆොන්සේකා. ඒ වගේම ඉරාන් වික්‍රමරත්න ඇතුළු කිහිපදෙනෙක්. ඩලස් පාර්ශවයෙන් නාලක ගොඩහේවා ඇතුළු කිහිපදෙනෙක්.

එතැනදී නාලක ගොඩහේවා ගණන් හදලා පෙන්නුවාලු ඩලස් ඇවිත් ජන්ද 130කට වඩා ගන්න හැටි. ඊට පස්සේ තමයි අන්තිම තීන්දුව ගත්තා කියන්නේ, සජිත් ඉල්ලා අස්වෙලා ඩලස්ට ජනාධිපති අපේක්ෂකත්වය දෙන්න. හැබැයි ඒක එළියට දුන්නේ ඊයේ දවල්.

ශ්‍රීලනිප තීන්දුව වෙනස් වුණ හැටි !

ඔය වෙනකොට අරගලකරුවන් පිරිසක් ශ්‍රී ලංකා එකත් හම්බෙලා තිබුනේ. ශ්‍රීලනිප සභාපති මෛත්‍රීටත් බලපෑම් කරලලු රනිල් යවන්න උදව් කරන්න කියලා. ඒ වෙනකොට මෛත්‍රී පක්ෂය දෙකඩ වෙන එක නවත්ත ගන්න කිසිම අපේක්ෂකයෙකුට ජන්දය නොදෙන්න තීරණය කරලා තිබුනේ. හැබැයි බදුල්ලේ ශ්‍රීලනිප මන්ත්‍රී චාමර සම්පත් නම් ප්‍රසිද්ධියේ කිව්වා , තමන්ගේ මනාපය රනිල්ට කියලා. ඒ අස්සේ රනිලුත් පාස්කු කතාවක් කියලා මෛත්‍රීට හීනියට ඇන්නා වගේ වැඩක් කළා. එතකොට ශ්‍රීලනිපය මොකද කරේ ජන්දය අක්‍රීය කරනවා වෙනුවට ඊයේ දවල් වෙනකොට ඩලස්ට සහය දෙන තීන්දුවක් ගත්තා.

මේ සේරම අස්සේ පොදිජන පෙරමුණේ මන්ත්‍රීවරුන්ට පොඩි තගක් දාගෙන වගේ, රනිල් පන්නමු, රනිල්ට දීලා ගමට එන්න එපා. රනිල් දිනවල එන අයව ගමේ කට්ටිය බලාගන්න වගේ පොස්ට් ඇතුලත් තද කැම්පේන් එකක් ගියා. ඒ වගේම සමහරු ඩලස්ට අපේක්ෂකත්වය දුන්නට සජිත්ට ස්තුතිය පුද කරා. තවත් සමහරු ඩලස් - සජිත් සර්ව පාක්ෂික ආණ්ඩුවක් අනුමත කළා.

රනිල් තුරුම්පු අදියි !

ආණ්ඩුව පැත්තට හීන් දාඩිය දාන ගානට ඩලස් -සජිත් සන්ධානයට හැඩයක් හැදිලා තිබුණේ. පොහොට්ටු මන්ත්‍රීවරුන් අතරත් කැම්පේන් එකක් ගියා , ජාමේ බේරගන්න ඩලස්ට දෙන්න කියලා.

හැබැයි ආණ්ඩුවත් නිකං හිටියේ නෑ. සජිත් පාර්ලිමේන්තුවේ ඩලස් ගේ නම යෝජනා කරනකොට, ඒ පාර්ශවයේ පලවෙනි පිපිරවිල්ල සිද්ධවුණා. සජිත් - ඩලස් සන්ධානයට විරෝධය පළකරලා කළුතර පාර්ලිමේන්තු මන්ත්‍රී අනුප පැස්කුවෙල් ඩලස් පාර්ශවයෙන් අයින් වෙලා රනිල්ට සහය දෙන බව කිව්වා. දේශපාලන ආරංචිමාර්ග කියන විදිහට ඒක ඩලස්ලට ලොකු හානියක් වුනා. එන්න හිටපු අය පස්කුවෙල්ගේ තීරණය එක්ක නෑවිත් ඉන්න තීරණය කළා කියලයි කියන්නේ.

ඩලස්ට අතේ තිබුන එක කටේ දාගන්න බැරි වුණේ ඇයි ?

ඒ වගේම තමයි රාජපක්ෂ පාලනය යටතේ හිටපු ජාතිවාදී කියලා හංවඩු ගැහුන පාර්ශව ටික. ඒ කියන්නේ, විමල්, ගම්මන්පිල, රතන හිමි, චන්න ජයසුමන වගේ කට්ටිය ඊයේ ප්‍රෙස් එකක් තියලා ඩලස්ට සහය පළකලා. මේ වෙනකල් සද්ද නැතුව හිටපු නඩේ එළියට ආවා විතරයි වටෙන්ම වැදෙන්න ගත්තා. දේශපාලන ආරංචිමාර්ග කියන විදිහට මේ පිරිස එලියට ආපු එක ගැන මුස්ලීම් සහ දෙමළ ජනකොටස් අතර ලොකු කැම්පේන් එකක් ගිහින් තියනවා. ඔය සේරම ඉතින් ඩලස් ගේ එකවුන්ට් එකට ගියේ.

ඒ වගේම තමයි සජබ මන්ත්‍රී අරවින්ද කුමාර් , එයත් එළියට ඇවිත් ප්‍රසිද්ධියේ කිව්වා තමන් සහය දෙන්නේ රනිල්ට කියලා. ඒ එක්කම කවුරුත් බැලුවේ,ලංකා කම්කරු කොන්ග්‍රසය දිහා. ඒ වෙනකොට ජීවන් තොන්ඩමාන් ඩලස්ට සහය දෙන්න තීරණය කරලා හිටියේ. ඒ වැඩේ හදලා තියෙන්නේ වැලිගම හිටපු නගරාධිපති රෙහාන් ජයවික්‍රම. හැබැයි පස්සේ කොන්ග්‍රසයේ සභාපති සෙන්දිල් තොන්ඩමාන් ඇතුළු පිරිසක් දැඩිව බලපෑම් කරාලු , ඩලස්ට නෙවෙයි, අපේ ජන්දය දෙන්න ඕන රනිල්ට කියලා. ආරංචිමාර්ග කියන විදිහට සුපුරුදු විදිහට ඉන්දියාව මේ තීන්දුවට බලපෑවලු.

පොහොට්ටු එජාප ප්‍රබලයන් රනිල් වෙනුවෙන් සටනට !

ඔය විදිහට රනිල්ගේ පැත්ත උඩට එනකොට ඩලස් - සජිත් පාර්ශ්වය තවත් කැම්පේන් එකක් පටන් ගත්තා. ඒ තමයි පොහොට්ටුව ඇතුලේ බැසිල් විරෝධයක් මතු කරන්න. දේශපාලන ආරංචිමාර්ග කියන විදිහට , ඒ වෙනකොටත් බැසිල් හිටියේ දිස්ත්‍රික්ක මට්ටමින් තමන්ගේ මන්ත්‍රීවරුන් රනිල්ගේ සහයට සම්බන්ධීකරණය කරමින්ලු. ඒ වැඩේට සහයට ප්‍රසන්න රණතුංග නිමල් ලන්සා මන්ත්‍රීවරුන් වගේම එජාප සභාපති වජිර අබේවර්ධනත් මැදිහත් වෙලා හිටියලු. ඒ වගේම තානාපති කාර්යාල දැනුවත් කිරීමට, සුළු පක්ෂ නියෝජිතයන්ට කතා කරන්න සමගි ජනබලවේගය පැත්තේ ජන්ද රනිල්ට අරගෙන දෙන්න එජාප ජේෂ්ඨයෙකුත් මැදිහත් වෙලා හිටියලු. සජබ කට්ටියට කතා කරන වැඩේට හරීන් ප්‍රනාන්දු සහ මනුෂ නානායක්කාරත් බැහැලාම හිටියා කියලයි කියන්නේ. ඒ විතරක් නෙවෙයි, හිටපු මන්ත්‍රී මලික් සමරවික්‍රමත් සහයට ඇවිත් හිටියලු.

ඩලස්ගේ පැත්තෙන් මේ වැඩේට බැහැලා තියෙන්නේ, චරිත හේරත්, චන්න ජයසුමන , නාලක ගොඩහේවා , එරාන් වික්‍රමරත්න , හර්ෂ ද සිල්වා සහ රන්ජිත් මද්දුම බණ්ඩාර කියලයි කියන්නේ. ඒ එක්කම සජිත්ගේ යාළුවො කිහිප දෙනෙකුත් වැඩේට එකතු වෙලා හිටියලු. හැබැයි ඉතින් ඕගනයිසින් නම් නිල් කියලයි කියන්නේ. ටෝක් වල තරමට වැඩේ ගියෙ නෑ කියලත් ඒ පැත්තේ හාහොවක් යන්න අරගෙන.

අර්බුදය දේශසීමා පනියි !

ඔය අතරේ කතා ගියා අරගලයට සහ විමල්ලා ඇතුළු පිරිස් වලට චීනයෙන් සල්ලි ලැබුනා කියලා. ඒ වගේම ආණ්ඩුව පැත්තට ඇමරිකාව සහ ඉන්දියාව සහයදීලා කියලත් කතා ගියා. මේවයේ ඇත්ත නැත්ත අපි දන්නේ නෑ. හැබැයි එක දෙයක් පැහැදිළියි. මේ රටේ අර්බුදය මේ වෙනකොට ලංකාවේ දේශසීමා ඇතුලේ කළමනාකරණය කරගන්න පුළුවන් තත්ත්වයක් නෑ වගේ. දැන් වැඩේට ජාත්‍යන්තරය ගැට ගැහිලා.

මං පොර හැසිරීම ඇති !

මේ අනුප්‍රාප්ත ජනාධිපති තෝරන ජන්ද විමසීම ඇතුලේ අපි දැකපු දෙයක් තමයි ගොඩක් අය රට ජනතාව වෙනුවට පර්සනල් අජෙන්ඩා වල හිටියේ. සේරටම වඩා මමත් පොරක් කියලා පෙන්නන්න මහින්සි වුනා මිස අර්බුදය විසඳන්න මැදිහත්වීම් දැක්කේ හරිම අඩුවෙන්. මිනිස්සුන්ට පාර්ලිමේන්තු මන්ත්‍රීවරුන් තිත්ත වෙලා ඉන්නේ. ඒ නිසා දැන්වත් මන්පොර ගාය, මාන්නය පැත්තකින් තියලා වැඩ කරන්න.

සුබ පැතුම් රනිල් : දැන් කියපුවා කරලා පෙන්නන්න !

දැන් ඉතින් ජන්දය ඉවරයි. අනුප්‍රාප්ත ජනාධිපති ලෙස තේරී පත්වුණු වැඩබලන ජනාධිපති රනිල් වික්‍රමසිංහට අපි සුබ පතනවා. ඒ වගේම මතක් කරනවා, ජනතාව පළමු වරට පාරට බැහැලා අරගල කරනවා. ඉතිහාසයේ පෙර නොවූ විරූ අර්බුදයක අපි හිරවෙලා. සහනයක් පේනතෙක් මානයක නෑ. අන්න ඒ අර්බුදයෙන් ගලවන වැඩේ අංක එක කරගන්න කියලා. නැත්නම් මේ රට වැටෙන තැන ගැන හිතන්නවත් බෑ. .

මීටරෙන් ඉන්න !

පළමුවෙන්ම කියන්න ඕනෙ රනිල් රාජපක්ෂ ආරක්ෂා කරන්නේ රාජපක්ෂ කියන පුද්ගලයන්ව. නමුත් ඩලස් රාජපක්ෂ ආරක්ෂා කරන්නේ 'රාජපක්ෂ' කියන මනෝභාවය සහ මතවාදය. දෙන්නගෙ එකම වෙනස ඕක,

මේ දෙකෙන් රනිල් රාජපක්ෂ ආවොත් ඉතිරි අවුරුදු දෙකහමාරට එන්නෙ කිසිම ජනමතයක් නැති, හමුදාව ලොකුවට රෙස්පෙක්ට් කරන්නෙ නැති, වෘත්තිය නිසා රෙපෙක්ට් කළත් කිසිම හමුදා ලව් එකක් නැති, පක්ෂයක් කියලා හරියටම එකකුත් නැති, ඒ නිසාම පක්ෂ වෙනුවෙන් දේවල් එකතුකරන්නත් නැති, ඔය කිව්වට තලේබාන් බෞද්ධයෝ කැමතිත් නැති, කාදිනනලුත් තරහ, දැන්නං ගේකුත් නැති කුජීතම ජනාධිපති කෙනෙක්. එතකොට විධායක සීන් අල්ලගෙන කොච්චර දැඟලුවත් ජනතාව බලවත් රනිල් රාජපක්ෂට වඩා. නමුත් රාජපක්ෂ පවුල ආරක්ෂිතයි.

ඩලස් රාජපක්ෂ ගත්තොත්, රනිල් රාජපක්ෂට වඩා ඩලස් රාජපක්ෂ ඉඳලා තියෙන්නේ රාජපක්ෂ ඇසුරේ. මෙතනදී 'රාජපක්ෂ' කියන්නේ මතවාදයක් මිසක් පුද්ගලයෙක් නෙවෙයි. එතනදී ඩලස් රාජපක්ෂට ප්‍රැක්ටිස් කරන්න වෙන්නෙම ආපහු රාජපක්ෂ ට්‍රික්ස්. ඒකියන්නේ දිනපු ගමම මල් වට්ටියකරං පන්සක් ගිහිල්ලා, ඔසරියක් ඇඳපු වයිෆ් සහ ළමයි පිටිපස්සේ තියාගෙන පිරිත් හඬ මැද්දේ කොලේ අස්සන් කරලා, ඕන්නං පෑන වහල පෙට්ටියටත් දාල තමයි එතුමා පටන්ගන්නෙ මැච් එක. අනික ඩලස් රාජපක්ෂට පක්ෂයක් තියෙනවා ඒ නිසාම අනාගතයක් පේනවා..., සජිත් නිසා SF සෙට් උණොත් හමුදා ලව් එකත් එනවා, තලේබාන් බෞද්ධ කණ්ඩායම කැමතිවෙනවා ෂුවර් එකටම (සරම අඳින, මාතර හාදයනෙ), කාදිනල් කොහොමත් යාළුයි, ගෙවල් දොරවල් තියෙන පුත්තු දෙන්නෙක් එහෙමත් ඉන්න ආපහු MINI රාජපක්ෂ complex එකක්. ඒ කියන්නේ මතවාදය ආරක්ෂිතයි. නමුත් පුද්ගලිකව රාජපක්ෂලා අනාරක්ෂිතයි ටිකක්.....

ඔය යු#ලිවර් වගේ මල්ටි නැසනල් කොම්පැණි වලින් දානවා තමංගෙම product දෙකක් එකම කැටගරි එකට. රින් සහ සර්ප් එස්කෙල් හිතපං. එකම කැටගරි එකේ, එකම කොම්පැණියෙන්, එකම ලොරියෙන් ඇවිත් එකම කඩේ විකිණෙන වෙන brands දෙකක්. එකක් ටිකක් පොෂ්, අනික ටිකක් ගොඩේ. Flower road එකයි මාතර දික්වැල්ලයි වගේ. හැබැයි කෝක විකිණුනත් සල්ලි යන්නෙ එකම කොම්පැණියට.... කොහොමද ටිකිරි මොළ.....

හරි හරි මම දන්නවා ඩලස් හොඳ මනුස්සයෙක්. හිටපු මාධ්‍යවේදියෙක්, ආතල් පොරක්..... මම මේ කියන්නේ කයියක් ගහලා මළගෙදරක නිදිමැරිල්ලක් වගේ එකක් ගැන නෙවෙයිනෙ....... කෙලවිලාම ගිය රටක ගිලෙන මොහොතේ එල්ලෙන්න තියෙන අන්තිම පිදුරුගස් කීපය ගැනනෙ.

මම නාමල් පුතානං මගේ සපෝට් එක ඩලස් රාජපක්ෂට. හේතුව පුතා දැනගන්න ඕනෙ පුතාගෙ අනාගතේ තියෙන්නේ වන්දිභට්ටයෝ ජාතික රජෙක් ඉල්ලන 'රාජපක්ෂ' මතවාදේ ආරක්ෂා වීමෙන් මිසක් තාත්තලා, මාමලා, බාප්පලා වගේ පුද්ගලයෝ ආරක්ෂා වීමෙන් නෙවෙයි කියලා. ඒකනිසා පවුලට කෙලවෙන්න ඇරලා පුතා ගන්න ඕං තමන්ගේ අනාගතයේ පැත්ත.

මම අනුරයියනං මම ගන්නෙ රනිල් රාජපක්ෂගෙ පැත්ත. හේතුව පුද්ගලයො රැකුණට අනාගතයේ ඒ වගේ අය බිහිවෙන මතවාදය ඉස්සරහට ගෙනියන්න රනිල්ට බෑ. ජේ.ආර් මාම හදලා දීපු අපූරු පක්ෂයකටම අමන්නපු රනිල්ට අනුන්ගේ පක්ස කජ්ජක්ද කියලා පේන නිසා. එතකොට අවුරුදු දෙකහමාර ඉවරවෙනකොට රනිලත් ඉවරයි, රාජපක්ෂලගෙත් සෑහෙන කෑල්ලක් ඉවරයි.

මම සජිත්නං මම ගන්නේ හොඳ වහලෙ කපපු ජිප් එකකුයි, බයිනකියුලර් එකකුයි. අලියො ළඟටම බලන්න.... ඩලස්ගේ සහය තමන්ට අරං තමන් ඉදිරිපත් වෙන්නෙ නැතුව දූවල ගිහින් ඩලස්ලා පිටිප්ස්සේ හැංඟෙනවට වඩා අලිබැලිල්ල හොඳයි.

මම එකපාරකුත් කිව්ව නේද....? ජනාධිපතිවරණයක් කියන්නෙම බහුවරණ ප්‍රශ්ණයක්........දුන්න උත්තර තුනෙන් එකක් යටින් ඉරක් අඳින්න තමයි කොහොමහරි වෙන්නෙ......

ප.ලි
මට රාජපක්ෂ මහත්තයල 'රාවණා' promote කරන්නේ ඇයි කියලා හරියටම තේරුණේ අද...... මූණු අත් හෙණ ගොඩක් තිබ්බට ඒව පාලනේ කරනනේ එක ඇඟයි, එක හදවතයි.....
පොඩි සහසක් කියන්නද...? ඔළු දොළහක් තිබ්බට ඒකෙ මොළ දොළහක් නෑ මට හිතෙන්නෙ. තියෙන්නේ එක මොළයයි main ඔළුවේ, අනික් ඔළු ඔක්කොම Empty cans.....

ප.ප.ලි
මේ රටේ මල් පුප්පනවට වඩා ලේසියෙන් සහරාකාන්තාරේ මැද රෝස හිටවලා තනියෙන් හුජ්ජ කරලා මල් පිප්පුවෑකි..... අම්මපල්......?????

Laka Darmarathna ගේ ෆේස්බුක් ගිනුමෙනි

හිටපු ජනාධිපති මෛත්‍රීපාල සිරිසේන අල්ලස් වරදක් කර ඇති බව දක්වමින් ඒ සම්බන්ධයෙන් අධිකරණ ක්‍රියාමාර්ග ගන්නා ලෙස ඉල්ලමින් අල්ලස් හෝ දූෂණ චෝදනා විමර්ශන කොමිසමට පැමිණිල්ලක් සිදුකර ඇත.

අල්ලස් හෝ දූෂණ චෝදනා විමර්ශන කොමිසමේ අධ්‍යක්ෂ ජනරාල් වෙත මෙම පැමිණිල්ල සිදුකර ඇත්තේ ශ්‍රී ලංකා නිදහස් පක්ෂයේ විවිධායක සභිකයකු ද වන මොන්ටේගු සරච්චන්ද්‍ර යන අය විසිනි.

මෙකී පැමිණිල්ලට අදාළ සිදුවීම වන්නේ කුප්‍රකට රෝයල් පාක් ඝාතනයට වරදකරුව මරණ දඬුවම නියමව සිටි තැනැත්තා හට ජනාධිපති සමාව ලබාදීම ආශ්‍රිත ක්‍රියාවලිය සහ ඒ සම්බන්ධයෙන් පසුගිය දිනක හිටපු ජනාධිපති මෛත්‍රීපාල සිරිසේන විද්‍යුත් නාලිකාවක සම්මුඛ සාකච්ඡාවකදී දැක්වූ කරුණු ප්‍රමාණයක් ය.

අදාළ පැමිණිල්ලේ මෙසේ සඳහන් වෙයි.

මෙම සිරකරු නිදහස් කිරීමට අදාළව වත්මන් පාර්ලිමේන්තු මන්ත්‍රී අතුරලියේ රතන හිමියන් දැඩි ලෙස උනන්දු වූ බව පැවසු ඔහු එකී වැඩසටහන ඉදිරිපත් කරන්නා විසින් ඔහුට යොමු කළ ප්‍රශ්නයකට පිළිතුරු දෙමින් වැඩිදුරටත් පැවසුවේ එසේ උනන්දු වූ අයවළුන් විසින් එකී අල්ලස් මුදල ලබාගත්තා විය හැකි බවය.

මෙම තොරතුරු පිළිබඳව අපරාධ පරික්ෂණ දෙපාර්තමේන්තුවට තමන් දැනුම් දුන් බවත් ඔවුන්ද ඒ පිළිබඳව සොයා බලා ඇති බවත් ඔහු පැවසීය.එහිදී අදාළ සිරකරුගේ පවුලේ අය විසින් ඒ වෙනුවෙන් කාට හෝ විශාල මුදලක් ලබා දී ඇති බව අපරාධ පරික්ෂණ දෙපාර්තමේන්තුව විසින් හෙළිදරවු කරගෙන ඇති බව ද ඔහු තව දුරටත් පැවසීය.

කිසිවකු විසින් අල්ලස් ලබාගැනීමක් හෝ අල්ලස් දීමක් පිළිබඳව දැනගත් විට එය ඊට අදාළ අල්ලස් හෝ දුෂණ චෝදනා විමර්ශන කොමිෂන් සභාව වෙත පැමිණිලි කළයුතු බව වසර 25 කටත් වැඩි කාලයක් රටේ වයවස්ථාදායකය නියෝජනය කළ අයෙකු ලෙසත් වසර 05ක් රටේ විධායක ජනාධිපතිවරයා ලෙසත් කටයුතු කළ ඔහු නොදැන සිටියේ යැයි නොසිතමී. එවැනි අල්ලසක් පිළිබඳ තහවුරු වූ තොරතුරක් අපරාධ පරික්ෂණ දෙපාර්තමේන්තුවට හෝ පොලිසියට දැනුම් දීමට වඩා නීතයානුකූල වන්නේ එකී තොරතුරු අල්ලස් හෝ දුෂණ චෝදනා විමර්ශන කොමිෂන් සභාව වෙත දැනුම් දීම බවත් අල්ලස් සම්බන්ධ තමන් දන්නා තොරතුරු වසං කිරීම බරපතල වරදක් බවත් ඔහු අනිවාර්යයෙන්ම දැන සිටින්නට ඇත.

 මේ ඇතුළු කරුණු 15ක් යටතේ පෙළගස්වා යොමුකර ඇති අදාළ පැමිණිල්ල පහත දැක්වෙයි ..