පුවත්

ගෝල්ෆේස් හී විරෝධතා පැවැත්වීමට වෙන්කර ඇති භූමිය තුළ අරගලකරුවන්ට ඔවුන්ට කැමති කාලයක් රැදී සිටීමට ඉඩ දීමට ආරක්ෂක බලධාරීන්ගේ අවධානය යොමුවී ඇති බව වාර්තා වෙයි .

ඒ උද්ඝෝෂණ පැවැත්වීමට වෙන්කර ඇති කොටස ගැසට් පත්‍රයකින් ප්‍රකාශයටපත්කර ඇති ස්ථානයක් වන නිසාය .

ඒ අනුව ආරක්ෂක බලධාරීන්ගේ අදහස වී තිබෙන්නේ වෙන්කර ඇති ස්ථානයේ කොපමණ කාලයක් සිටියත් කිසිම ගැටළුවක් නොමැති බවය.

එහෙත් එම ස්ථානයට අදාළ නොවන ස්ථානවල ගනුලබන ක්‍රියාමාර්ග සම්බන්ධයෙන් පියවර ගැනීමට ආරක්ෂක අංශ වලට සිදුවිය හැකි බවත් ඔවුන් පවසයි .

මන්දිරවල යකානැටූ 100ක් ගැන හොයාගෙන !

මේ අතර පොලිස් ආරංචි මාර්ග සඳහන් කරන්නේ ජනාධිපති මන්දිරය, අරලියගහ මන්දිරය, අග්‍රාමාත්‍ය කාර්යාලය සහ ජනාධිපති ලේකම් කාර්යාලයට හානි වන ආකාරයෙන් කටයුතු කළ සහ එම ස්ථානවල තිබුණු වටිනා කියන භාණ්ඩ සොරාගත් බව කියන පුද්ගලයින් 100කට වැඩි පිරිසක් ඡායාරූප හා වීඩියෝ මඟින් හඳුනා ගැනීමට හැකියාව ලැබී ඇති බවය .

එම පුද්ගලයින්ගේ අනන්‍යතාවය තහවුරුකර ගැනීමට අවශ්‍ය බුද්ධි අංශ සහය ගැනීම මේ වන විට ආරම්භ කර ඇති බවත් වාර්තා වෙයි . ආරම්භ වී තිබේ.

එම විමර්ශන කටයුතු අවසන් වූ වහාම ඔවුන් සම්බන්ධයෙන් අධිකරණයට කරුණු වාර්තාකර අත්අඩංගුවට ගැනීමට පියවර ගනු ඇති බවත් වාර්තා වෙයි.

එක්සත් ජාතික පක්ෂයේ සභාපති වජිර අබේවර්ධන එම පක්ෂයේ ජාතික ලැයිස්තු පාර්ලිමේන්තු මන්ත්‍රී ධුරයට නම් කරමින් ගැසට් නිවේදනයක් නිකුත් කර තිබේ.

ඒ රනිල් වික්‍රමසිංහ ජනාධිපති ධුරයට පත්වීමෙන් පසු පුරප්පාඩු වූ මන්ත්‍රී අසුන සඳහායි.

පසුගිය සමයේ පක්ෂයේ උන්නතිය වෙනුවෙන් මෙන්ම අර්බුදය සමනය කරන්න නම් රනිල් වික්‍රමසිංහ රටේ ඉහළ නායකත්වයට ගෙනා යුතු බව ප්‍රසිද්ධියේ මාධ්‍ය වෙත අදහස් දැක්වූ අයෙකු ලෙස එජාප පාක්ෂිකයින් වජිර අබේවර්ධන හඳුන්වයි.

එසේම පසුගියදා පැවති ජනාධිපතිවරණය අවස්ථාවේ රනිල් වික්‍රමසිංහ වෙනුවෙන් මන්ත්‍රී ජන්ද සකස් කිරීමට සැලකිය යුතු මෙහෙයක් වජිර අබේවර්ධන ගේ කොළඹ නිවසේ සිට දියත් වූ බවත් දේශපාලන ආරංචි මාර්ග පවසයි .

ජනාධිපති ලේකම් කාර්යාලය නිදහස් කර ගැනීමේ මෙහෙයුම ආරක්ෂක අංශවලට දියත් කිරීමට සිදුවන්නේ අරගලකරුවන් විවිධ කොන්දේසි ඉදිරිපත් කරමින් සාමකාමී ලෙස ඉවත් නොවීම හේතුවෙන් බව පොලිස් මූලස්ථානය සඳහන් කරයි.

මේ සම්බන්ධයෙන් වන නිවේදනයක් පොලිස් මාධ්‍ය කොට්ඨාසය විසින් අද (22) නිකුත්කර ඇත.

අදාළ නිවේදනය තුළ රාජකාරි සඳහා ගිය නිලධාරීන් වෙත අපහාස , පරිභව කිරීම , හදිසි නීති තත්ත්වය , ජනාධිපති කාර්‍යාලයේ වැදගත්කම , එහි ලියකියවිලි වල ආරක්ෂාව , එය අත්පත් කරගැනීම නීති විරෝධී බව ඇතුළු කරුණු රැසක් ආරක්ෂක අංශ පාර්ශ්වයෙන් සඳහන් කර ඇත .

අදාළ සම්පුර්ණ නිවේදනය පහත දැක්වෙයි .

ගාලුමුවදොර අරගල භූමියේදී අද (22) අලුයම සිදුවීමෙන් අත්අඩංගුවට ගත් නීතීඥ නුවන් බෝපගේ ඇතුළු සැකකරුවන් 09 දෙනකු ඇප මත මුදාහැරීමට කොළඹ කොටුව වැඩබලන මහේස්ත්‍රාත් ජයන්ත ඩයස් නානායක්කාර අද (22) නියෝග කළේය.

ඒ එක් අයෙකුට රුපියල් 10,000/=ක මුදල් ඇපයක් සහ රුපියල් ලක්ෂ 5 ක ශරීර ඇප 2 ක් මතය.

මෙම සිද්ධියට අදාළ නඩුව කැඳවා ඉදිරි දිනයේදී සැකකරුවන්ගේ ඇප අධිකරණයට තැන්පත් කිරීමට නියම කල අධිකරණය, ඔවුන් පුද්ගලික ඇප මත මුදා මැරීමට ද මෙහිදී නියම කළේය.

මෙම සැකකරුවන් නවදෙනා අතර සිටි සැකකරුවන් දෙදෙනකු රෝහල් ගතව ප්‍රතිකාර ලබන අතර ඔවුන් දෙදෙනාටද අධිකරණයෙන් ඇප නියම විණි.

නීති විරෝධී රැස්වීමක සාමාජිකයන් වෙමින් ජනාධිපති ලේකම් කාර්යාලයේ රැඳී සිටිම, පොදු දේපළ වලට හානි කිරීම, සාපරාධී බලහත්කාරය පෑම, රාජ්‍ය නිලධාරියෙකුගේ අණට අවනත නොවීම සහ රාජ්‍ය නිලධාරීන්ගේ රාජකාරියට බාධා කිරීම යන චෝදනා යටතේ මෙම සැකකරුවන් අත්අඩංගුවට ගෙන අධිකරණයට ඉදිරිපත් කළ බව කොටුව පොලීසිය අධිකරණයට දැනුම් දුන්නේය.

අරගලකරුවන් විසින් රාජපක්ෂ තුන් කට්ටුව බලෙන් පහ කර ප්‍රජාතන්ත්‍රවාදයට මං පෙත් විවර කළ නිසාවෙන් තනි මන්ත්‍රී කෙනෙකු ලෙස පාර්ලිමේන්තුවට පැමිණි රනිල් වික්‍රමසිංහට ජනාධිපති වීමට හැකිවූ බවත් එම අරගලකරුවන්ටම මේ ආකාරයට මිලේච්ඡ හමුදා හා පොලිස් ප්‍රහාරය එල්ල කිරීම තරයේ හෙළා දකින බව පාර්ලිමේන්තු මන්ත්‍රී පාඨලී චම්පික රණවක පවසයි.

විශේෂ මාධ්‍ය හමුවක් පවත්වමින් මන්ත්‍රීවරයා මේ පිළිබඳව පවසා සිටි අතර එහිදී වැඩිදුරටත් මෙසේද අදහස් දැක්වීය.

වගකීම ආණ්ඩුව ගන්න ඕන !

“මෙහි වගකීම අනිවාර්යයෙන්ම වර්තමාන ජනාධිපති රනිල් වික්‍රමසිංහ මහතා ප්‍රමුඛ ආණ්ඩුව භාරගත යුතුයි. රනිල් වික්‍රමසිංහ මහතා එක දවසින් තමන්ට ප්‍රජාතන්ත්‍රවාදී නායකයෙක් හැටියට, ලිබරල් නායකයෙක් හැටියට අවුරුදු හතළිස් පහක ඉතිහාසයේ තිබුණු පිළිගැනීම එක දවසෙන් නැති කරගෙන, ජාතික හා ජාත්‍යන්තර වශයෙන් ඉන්න ප්‍රජාතන්ත්‍රවාදී මිතුරන් සියලුදෙනාම තරහ කරගෙන, ඉමහත් අපකීර්තියට පත්වීමක් තමයි මේ සිද්ධ වුණේ.

මේ සිදුවීම සහ මැයි හයවෙනිදා රනිල් වික්‍රමසිංහ මහතාව බලයට ගෙනාපු රාජපක්ෂ පවුලේ ඒ මැරවරයින් එල්ල කළ ප්‍රහාරය අතර කිසිම ආකාරයක අසමානකමක් නැහැ. ඒ දෙකම එක ම සිදුවීමක්.

ඇත්තටම මේ මොහොතේ ඇයි මේ අරගලය මතුවුනේ? රනිල් වික්‍රමසිංහ මහතා මතක තබා ගත යුතුයි ඔහු පාර්ලිමේන්තුවේ තනි මන්ත්‍රීවරයෙක් හැටියට මේ ජනාධිපති ධූරය දක්වා එතුමා පැමිණියේ. මේ අරගලකරුවන් විසින් රාජපක්ෂ පවුල බලයෙන් පහ කිරීම නිසයි. විශේෂයෙන්ම මහින්ද රාජපක්ෂ, බැසිල් රාජපක්ෂ, ඒ වගේම ගෝඨාභය රාජපක්ෂ මේ තුන් කට්ටුව බලෙන් පහ කරලා දාලා, රටේ ප්‍රජාතන්ත්‍රවාදයට මං පෙත් විවර කරපු නිසයි.

අරගලකරුවන් අතරත් පොඩි පොඩි ප්‍රශ්න : ප්‍රචණ්ඩ ලක්ෂණ තියෙන්න ඇති !

අරගලකරුවන් අතර පොඩි පොඩි ප්‍රශ්න, ප්‍රචණ්ඩත්වයේ ලක්ෂණ තියෙන්න ඇති. නමුත් මේ මාස හයක පමණ කාලයක් ලංකාවේ මිනිස්සු පෙලෙන ප්‍රශ්න, කිරිපිටි නැතුව අඬන දරුවෝ එක්ක දුක් වේදනා විඳින අම්මාවරු ඉස්පිරිතාලෙට ගියහම, ඒ වගේම බෙහෙත් ශාලාවට ගියහම, බෙහෙත් නැතුව දුක් විඳින මිනිස්සු, පෙට්‍රල් ටික නැතුව, ඩීසල් ටික නැතුව, භූමිතෙල් ටික නැතුව, දුක් විඳින, මේ රටේ සාමාන්‍ය ජනතාව ආදායම් අහිමි වෙච්ච ගොවියෝ, ධීවරයෝ ඇතුළු මේ රටේ දුක් විඳින ජනතාව මේ සෑම කෙනෙක්ගෙම වේදනාව, වෛරය අද උඩු දුවලා තියෙන අවස්ථාවක සහ ඔවුන්ට තමන්ගේ අනුකම්පාව, සහකම්පනය අනිවාර්යෙන්ම පෙන්විය යුතු මොහොතක මේ පෙන්නලා තියෙන දුෂ්ටත්වය, මේ පෙන්නලා තියෙන අසීලාචාරත්වය ඉතාමත්ම පිළිකුල් සහගතයි.

ඒ වගේම මේ රට පක්ෂ අතර එකමුතුවක් ඇති කරගෙන, සර්ව පාක්ෂික ආණ්ඩුවක් පිහිටුවාගෙන, ප්‍රජාතන්ත්‍රවාදී සීමාවන් පුළුල් කරගෙන, ලෝකයේ ආධාර දෙන ආයතන වලට අත දිගු කරන්න ගිය ඒ සෑම දෙයක්ම මේ වනවිට කෝපයෙන්, ඒ වගේම අපකීර්තිමත් ආකාරයට තරහ කර ගැනීමක් බවට පත්වෙලා. මේය කිසිසේත්ම රටට උචිත තත්වයක් නෙවෙයි.

අරගලකරුවන් භූමියෙන් බැස යමින් හිටියේ !

ඒ වගේම මේ සාමකාමී අරගලකරුවන් ඇත්තටම ඒ අරගල භූමියෙන් බැස යමින් හිටියේ. ඔවුන්ගේ හිටපු ඇතැම් කොටස් මොන පුරාජේරු කතා කිව්වත් බහුතර ජනතාව ඒ අරගල භූමියෙන් බැස යමින් හිටියේ. ඔවුන්ව සාමකාමී සාකච්ඡා මාර්ගයකින් ඉවත් කර ගැනීමට ඕනෑවටත් වඩා ඉඩ තිබුණා. එහෙම තිබියදී ඔවුන්ට එලව, පහර දෙන්න ආරක්ෂක අංශ යොමු කිරීම මගින් තුවක්කු බලය පාවිච්චි කිරීම මගින් පෙන්නලා තියෙන්නේ අවසානයේ මහජනයාව මේ ආකාරයටම මේ අන්තවාදී කල්ලිවලට තටු දෙන්නද? ආයුධ සන්නද්ධ විප්ලවයක් ගැන සිහින දකින බලවේග වලට, ප්‍රජාතන්ත්‍ර විරෝධී බලවේගවලට තටු දෙන්නද කියන එක අපි මතක තබාගත යුතුයි. මේ රටේ මෙවැනිම ආකාරයේ මර්ධනයන් දියත් කරපු අවස්ථාවල, උතුරෙත්, ඒ වගේම දකුණෙත් මේ හැම තැනකම අපි දැකපු දේ තමයි, ආයුධ අතට අරගත්ත ප්‍රතිවිරෝධතාකරුවන් ඇවිල්ලා තිබිච්ච තත්වෙ තවත් නරක් කරගෙන තවත් බිහිසුණු අගාධයකට ගමන් කරලා දහස් ගණන් ඝාතනය වෙලා ඒ වගේම දස දහස් ගණන් විදේශගත වෙලා ඒ වගේම මුළුමනින්ම පරම්පරා ගානක ජීවිත අඳුරේ තැබීම. ඒ නිසා අද අඳුරු දිනයක් ඒ අඳුරු දිනයේ ප්‍රජාතන්ත්‍රවාදය කරා ගමන් කිරීමට මේ රටේ ප්‍රජාතන්ත්‍රවාදී බලවේග සියලුම දෙනාට කොන්දේසි විරහිතව එකට එකතු වෙන්නෙයි කියලා අපි ඉල්ලා හිටිනවා.

දූෂිත පවුල සහ ඔවුන්ට සහය දුන් නිලධාරීන් අධිකරණය හමුවට ගේන්න !

ඒ වගේම රාජපක්ෂ තමන්ට කරගන්න බැරි වෙච්ච මේ දුෂ්ට මර්ධනය තමන් විසින් බලයට කැඳවා ගත්ත ජනාධිපතිවරයා ලවා කර ගැනීම ගැන අපි කම්පා වෙනවා. ඒ වගේම අධිෂ්ඨානය තවදුරටත් ධෛර්යමත් වෙනවා. අද ඇත්තටම කළ යුත්තේ කුමක්ද? මේ අරගලකරුවන්ට හමුදාව යොදා පහර දීම හෝ නඩු පැවරීම නෙවෙයි. මේ රට බංකොලොත් භාවයට පත් කරන ලද ඒ පාලක දේශපාලන පවුල, ඒ වගේම ඔවුන්ට සහය දීපු මහා භාණ්ඩාගාරයේ ඒ හිටපු ලේකම්වරු, ඒ වගේම මහ බැංකුවේ හිටපු අධිපතිවරයා ඇතුළු පිරිස මේ පිරිස අධිකරණය ඉදිරියට ගෙන ඒමයි. මේ යුක්තියෙන් ඉටුකරලීමට මේ පිරිසට නඩු පැවරීමයි සිදුකළ යුතුව තිබුණේ. විශේෂයෙන්ම අරමුල්‍ය පනත යටතේ මොනිටරි ලෝ ඇප් එක යටතේ වහාම මුදල් අමාත්‍යංශයේ, ඒ වගේම මුදල් මණ්ඩලයේ, මහ බැංකු අධිපතිවරයා ඇතුළු පිරිස් වලටයි නීතිය ක්‍රියාත්මක විය යුතුව තිබුණේ. ඒ වගේම, අර පිස්කල් රෙස්පොන්සිබිලිටි ඇක්ට් එක, ඒක රනිල් වික්‍රමසිංහ මහත්තයාමයි ගෙනාවේ. ඒ අනුව ණය කළමනාකරණය නොකිරීමේ වරදට භාණ්ඩාගාර ලේකම්වරු, මුදල් අමාත්‍යංශ ලේකම්වරු හා නිලධාරීන් අධිකරණය ඉදිරියට යුක්තිය ඉදිරියට පැමිණවීමයි කළ යුතුව තිබුණේ.

කොල්ලකාපු සල්ලි ගේන්න !

රටට වැඩි මිලට ගත්ත බැඳුම්කර මේ ජූලි විසිපස් වැනිදා මහින්ද රාජපක්ෂ ගත්ත මිලියන දාහක ඩොලර් බිලියනයක බැඳුම්කරය එනවා. ඒ බැඳුම්කරවලින් කොල්ලකාපු බිලියන හතකට අධික මුදල විදේශවල සඟවා තිබෙනවා. රට ඇතුලේ සඟවා තිබෙනවා. ඒ පව්කාර සල්ලි අරගෙන මේ රටේ ජනතාව සුඛිත මුදිත කිරීමයි සිදුකළ යුතුව තිබුණේ. නමුත් මේ වෙනුවෙන් හඬ නැගූ පිරිස් වලට, මේ ආකාරයට සැලකීම මගින් බිය වද්දන්න ඉන්නවා නම් ඒක ලොකු වැරදීමක් කියන එක විතරක් අපි මේ අවස්ථාවේ අවධාරණය කරනවා. නැවතත් අපි අවධාරණය කරනවා සියලුම ප්‍රජාතන්ත්‍රවාදී බලවේග වලට, සියලුම වෘත්තීයවේදීන්ට, සියලුම ආගමික නායකයින්ට අත්වැල් බැඳගන්න කියලා මේ රටේ ඊළඟ ප්‍රජාතන්ත්‍රවාදී විප්ලවය ඉදිරියට ගෙන යාමට.”

– Midea unit

මේ වන විට ගෑස් මෙට්‍රික්ටොන් 3700 ක් රැගත් නෞකාවක් කොළඹට ළගාවී ඇති බව ලිට්ට්‍රෝ ගෑස් සමාගම පවසයි.

එහි මාධ්‍ය ප්‍රකාශක වී. කේතේෂ්වරම් සඳහන් කළේ මේවනවිට එහි ගෑස් පරීක්‍ෂාවට ලක්රමින් සිටින බවයි.

එම පරීක්‍ෂණ කටයුතු අවසන් වූ වාහාම ගොඩබෑම ආරම්භ කරන බව පැවසූ ඔහු මෙම මාසය තුළ මෙරටට තවත් ගෑස් නැව් හතක් ළගාවීමට නියමිත බවත් පැවසීය .

මිත්‍ර රටවල් සහ විදේශ ආයතනවලින් ආධාර ලබා ආර්ථිකය යළි ශක්තිමත් කළ හැකි වැඩපිලිවෙලක් සකස් කරන බව අග්‍රාමාත්‍ය දිනේෂ් ගුණවර්ධන පවසයි .

අග්‍රාමාත්‍ය ධුරයෙහි දිවුරුම් දීමෙන් අනතුරුව අද (22) මාධ්‍ය හමුවේ ප්‍රකාශයක් කරමින් ඔහු මෙසේ සඳහන් කර ඇත .

කොළඹ අග්‍රාමාත්‍ය කාර්යාලයේදී පැවති මේ මාධ්‍ය හමුවේදී අදහස් දක්වමින් අගමැතිවරයා වැඩිදුරටත් මෙසේද සඳහන් කර සිටියේ ය.

අග්‍රාමාත්‍ය ධුරයේ වගකීම් ජනාධිපතිවරයා විසින් අද මට පවරනු ලැබුවා. අපේ අත්දැකීම් සම්භාරය එක් කර අපේ මාතෘ භූමියේ ජනතාවගේ ප්‍රාර්ථනාවක් ඉටු කිරීමට කැපවීමෙන් ස්ථිර වැඩ පිළිවෙලක් අනුව වැඩ කරනවා. අමාත්‍ය මණ්ඩලය දිව්රුම් දීමෙන් පසු ඉතිරි සති කිහිපය තුළ අය වැය ලේඛණය පාර්ලිමේන්තුවට ඉදිරිපත් කරනවා.

අපේ වැඩ සටහන පැහැදිළිව සකස් කර ගෙන තිබෙනවා. ප්‍රජාතන්ත්‍රවාදී දේශපාලනයේදී ඕනෑම කොටසකගේ වේදනාව වෙනුවෙන් සාකච්ඡා කරන්න අප කැප වී සිටිනවා. අවිහිංසාවාදීව අත්වැල් බැඳගෙන මාතෘ භූමියේ සියළු ජනතාව වෙනුවෙන් සේවය කිරීමට පාර්ලිමේන්තුවේ එකඟතාවය ඇති කර ගැනීමේ පසුබිම සකස් වී තිබෙනවා.

අපේ අර්බුදවලින් ප්‍රධාන වන්නේ ආර්ථික අර්බුදයයි.

අද කැබිනට් මණ්ඩලය දිව්රුම් දුන් පසු අපේ මිත්‍ර රටවල්වල සහ විදේශ ආයතනවලින් ආධාර ලබා ගෙන ආර්ථිකය යළි ශක්තිමත් කළ හැකි වැඩපිලිවෙලක් සකස් කෙරෙනවා. අප ඉදිරියට ගමන් කරන්නේ මහජන සිතුම් පැතුම් සමගයි. දෙවන ලෝක සංග්‍රාමයේදීත් රුසියාව එක පැත්තකත් අමෙරිකාව තව පැත්තකත් බ්‍රිතාන්‍ය තව පැත්තක් මතවාදීව සිටියා. ලෝකය රැක ගැනීම සඳහා පැසිස්ට්වාදය පරාජය කිරීමට ඒ රාජ්‍ය නායකයින් අත්වැල් බැඳ ගත්තා.

විවිධ මත තිබුණත් රටේ ප්‍රධාන ප්‍රශ්න හමුවේ වගකීම් ඉටු කිරීමට ජනාධිපතිවාරයාත් මාත් අතර සුහදතාවය තිබෙනවා. විවිධ දේශපාලන මත තිබුණත් අප අතර කවදාවත් ප්‍රජාතන්ත්‍රවාදී ක්‍රමවේදය මිස වෛරී පුද්ගලයින් වුයේ නැහැ. ජනාධිපතිවරයා අත්දැකීම් බහුල පුද්ගලයෙක්. සය වරක් අගමැති ධුරය දැරූ අයෙක්.

මේ රටේ දේශපාලනය තීරණාත්මක හැරවුම් ලක්ෂයකට යොමුකරන ලද ගාලු මුවදොර අරගල ප්‍රජාව ඉලක්ක කරගෙන ආරක්ෂක හමුදා යොදවා එල්ල කරන ලද ප්‍රහාරය රටේ ප්‍රජාතන්ත්‍රවාදය අගයන හා අපේක්ෂා කරන සෑම පාර්ශවයක් විසින්ම තරයේ හෙලාදැකිය යුතු බව සාධාරණ සමාජයක් සඳහා වන ජාතික ව්‍යාපාරයේ සභාපති , හිටපු කතානායක කරූ ජයසූරිය පවසයි .

සාධාරණ සමාජයක් සඳහා වන ජාතික ව්‍යාපාරයද එකී ක්‍රියාව තරයේම හෙලාදකින බවත් ඔහු සඳහන් කරන අතර ඒ නිවේදනයක් නිකුත්කරමින් ය.

අදාළ නිවේදනය වැඩිදුරටත් මෙසේද සඳහන් කර ඇත .

ප්‍රජාතන්ත්‍රවාදී සමාජයක් තුළ වෙනස් මත දැරීමට හා තම අදහස් පලකිරීමට මෙන්ම සාමකාමී ලෙස විරෝධය පෑමට ඇති අයිතිය ඉහළින්ම ආරක්ෂා විය යුතුය. කිසිදු සමාජ තීරුවකට පොදු සමාජයේ අභිලාශයන්ගෙන් බැහැරව හුදකලා අරගලයන්හි නිරත විය නොහැකි බවද අප සියල්ලන්ම පිළිගත යුතුය. ගාලු මුවදොර අරගලය ඉතාමත් සක්‍රීය තලයක පැවැතියේ එම හේතුව නිසාය. නිදහසින් පසු ලංකා ඉතිහාසයේ අසීමිත බලයක් දරමින් සිටි පාලකයෙකුට පවා ප්‍රථම වරට රට අතහැර පලායන පසුබිමක් නිර්මාණය වූවේද එකී අරගලය හා ජනතා අභිලාශයන් සමපාත වූ නිසා බවද මේ රටේ පාලකයන් තේරුම් ගත යුතුව තිබේ.

අපට වාර්තාගත වන ආකාරයට අරගලකරුවන් අත්පත් කරගෙන සිටි ජනාධිපති කාර්‍යාලයෙන් අද දින නික්ම යාමට ඔවුන්ගේ සූදානමක් තිබී ඇත. එසේ නම් එය ඔවුන් ගත් ඉතාමත් බුද්ධිමත් හා නිවැරදි තීරණයක් ලෙස සැලකිය හැකිය. එවන් පරිසරයක් තුළ සිදුකරන ලද මෙම අමානුශික ප්‍රහාරය යුක්ති සහගත කිරීමට කිසිදු පාර්ශවයකට හෝ හැකියාවක් තිබිය නොහැකිය.

මෙම සිදුවීමෙන්ද පෙනී යන්නේ ශිෂ්ට සම්පන්න ආකාරයට අර්බුද හා මතබේද නිරාකරනය කරගැනීමට අප රටේ දේශපාලන සමාජය දක්වන අකමැත්ත හෝ නොහැකියාවයි. මෙම සංස්කෘතිය රටින් තුරන් කිරීම සමස්ථ සමාජයේම වගකීමක් වන අතර ඒ සදහා අන් සියල්ලන්ට පෙර පෙරමුණ ගත යුත්තේ රටේ දේශපාලන බල අධිකාරියයි.

එබැවින් අප මේ රටේ සමස්ථ සමාජයෙන්ම ඉතාමත් ඕනෑකමකින් යුතුව ඉල්ලා සිටින්නේ අද රට මුහුණ දී ඇති ඛේදනීය තත්වයෙන් මුදා ගැනීම සදහා අන් සියල්ලටම පෙර සියළු ජන කොටස් අධිශ්ඨානශීලීව පෙරට එමින් මෙවැනි ප්‍රචන්ඩ ක්‍රියාවන්ට තව දුරටත් ඉඩක් නොතැබෙන පරිසරයක් නිර්මාණය කරගැනීම උදෙසා පෙළගැසෙන ලෙසය.

ව්‍යවස්ථාවේ ආරක්‍ෂකයකු ලෙස පෙනී සිටින රනිල් වික්‍රමසිංහ එම ව්‍යවස්ථාවට ඇතුළත් භාෂණයේ සහ උද්ඝෝෂණය කිරීමේ අයිතිය බියගුළු සහ නිවට ප්‍රහාරය හරහා අභියෝගයට ලක්කළ බව පෙරටුගාමී සමාජවාදී පක්ෂයේ මහ ලේකම් කුමාර් ගුණරත්නම් පවසයි .

අද (22) මාධ්‍ය හමුවකදී අදහස් දක්වමින් ඔහු මේ බව සඳහන් කළ අතර වර්තමාන පාර්ලිමේන්තුව තුළ ජනමතය නියෝජනය නොවන නිසා ආණ්ඩුවේ මර්දනයට විරුද්ධ සියලුම දේශපාලන පක්‍ෂ සංවිධානය වියයුතු බවත් පැවසීය .

ජනමතයක් නොමැතිව පස්සා දොරෙන් ජනාධිපති ධූරයට රිංගු පුද්ගලයෙක් ජනතාව මර්දනයට සැළසුම් සකස් කරමින් සිටින බවත් පැවසූ ඔහු මර්දනයට බියවී පලා නොගොස් සංවිධානය වන ලෙස සබුද්ධික ජනතාවගෙන් ඉල්ලා සිටින බව ද සඳහන් කළේය.

ගාලුමුවදොර අරගලයට අද අලුයම එල්ල වූ ප්‍රහාරයට සහභාගි වූ ආරක්‍ෂක අංශවල යැයි කියාගත් පුද්ගලයන් මුහුණු ආවරණය කරමින් හඳුනාගත නොහැකි වන ලෙස වෙස්වලාගෙන ප්‍රහාරය එල්ල කළ බවත් එහිදී සමහර ආරක්‍ෂ අංශ සමාජිකයන් වෙස්වලාගත් පුද්ගලයන්ගේ චිරස්ථීන ප්‍රහාර වලක්වන ආකාරය ද දැකගත හැකි බවත් පෙරටුගාමී සමාජවාදී පක්ෂයේ මහ ලේකම් කුමාර් ගුණරත්නම් වැඩිදුරටත් සඳහන් කර සිටියේ ය.

කොළඹ ජනාධිපති ලේකම් කාර්යාලය ඉදිරිපිට අරගල භූමියට අද (22) අළුයම ආරක්ෂක අංශ විසින් මෙහෙයුමක් සිදු කරද්දී එම අරගලයේ ප්‍රධානීන් ලෙස කටයුතු කල සමාජ ජාල ක්‍රියාකාරීන්, නළුනිළියන් හෝ දේශපාලන පක්‍ෂ සංවිධායකයන් රැඳී සිට නැතිවීම සම්බන්ධයෙන් සැකසංකා මතුව තිබේ.

ආරක්ෂක අංශ විසින් එල්ල කරන ප්‍රහාරයකට ලක්ව සිටින අය අතර අරගලයේ නායකයින් සිටින්නේ ඉතාම සීමිත පිරිසකි.

අන් සියලු දෙනාම ඒ මොහොතේ අරගල භූමියේ රැඳී සිට නැත.

මේ අතර සිදුවූ දේ සවිස්තරාත්මක විදියට මෙසේයි.

ගෝල්ෆේස්වල ඇත්තටම මොකද වුණේ?

ගෝල්ෆේස් අරගලයේ ඉදිරි ක්‍රියාමාර්ග පිළිබඳව විශේෂ සාකච්ඡාවක් ඊයෙ (21) ගෝල්ෆේස් අරගල භූමියේ මාධ්‍ය කුටියේදී පවත්වා ඇත.

එහිදී බහුතර පාර්ශවයක් පවසා ඇත්තේ දැනට අරගලකරුවන් අල්ලාගෙන සිටින ජනාධිපති කාර්යාලය වහාම භාරදිය යුතු බවත් ජනාධිපති කාර්‍යාලයේ කටයුතුවලට බාධාවක් නොවන පරිදි අරගලභූමිය ගෝඨා ගෝ ගම පිහිටා ඇති උද්ඝෝෂණ ස්ථානයට සීමා වියයුතු බවත් ය.

එමෙන්ම අලුත් ජනතාවක් පත්කරගැනීමට ජනතාවට අධ්‍යාපනය ලබා දෙන දේශපාලන සරසවියක් බවට අරගලභූමිය පත්කළ යුතු බව ට ද මතයක් ඉදිරිපත් ව ඇත. කෙසේ වෙතත් පොදු මතය වී ඇත්තේ අද (22) සවස 2 ට ගොඩනැගිල්ල භාර දීමටයි.

මෙහිදී ජනතා විමුක්ති පෙරමුණට සම්බන්ධ තරුණ කණ්ඩායම එම යෝජනාව ස්ථිර කර ඇත.

ඔවුන්ගේ මතය වී ඇත්තේ වහාම පරිශ්‍රය භාර දිය යුතු බවයි. හෙට දිනය දක්වා කල්දැමීම අහේතුක බවත් හදිසියේවත් අද රාත්‍රියේ මුදාගැනීමේ මෙහෙයුමක් ක්‍රියාත්මක වුවහොත් ජයග්‍රාගීව ගොඩනැගිල්ල බාරදීමට නොහැකිවන බවත් ඔවුන් පෙන්වා දී ඇත.

එහෙත් පසුගිය දා ජාතික රූපවාහිනියට කඩා වැදුණු පිරිසේ මතය අත හරිනවා නම් අතහැරිය හැක්කේ 22 වන දිනයේ බවත් එයත් පාර්ටියක් දාමා dj එකක් ජනාධිපති කාර්යාලය තුළ පැවැත්වීමෙන් අනතුරුව බවත්ය.

පෙරටුගාමී සමාජවාදී පක්ෂයත් අත හරිනවා නම් මාධ්‍ය හමුවක් පවත්වා සැමරුමක් කර බාර දිය යුතුය යන ස්ථාවරයේ සිට ඇති අතර ජනාධිපති කාර්යාලය ඉදිරිපිට ඉදිකර ඇති හට් දැන්ම ඉවත්කර නොගත යුතුය යන ස්ථාවරයේ සිට ඇත.

එමෙන්ම පැරණි වාමාංශික සාමජිකයකු සහ තවත් සාමාජිකාවක දැඩි අදහස් දක්වමින් මෙය භාරදියයුතු නැති බවත් රනිල් එළවන තුරු අල්ලාගෙන සිටිය යුතු බවත් ප්‍රකාශ කර ඇති අතර ජනාධිපති කාර්යාලය දැන් අරගල කරුවන් විසින් පාලනය කිරීම භාරගත යුතු බවත් එය ගිණි තැබුවත් කිසිවෙකුට වගකීමක් අවශ්‍ය නැති බවටත් දරුණු අදහස් ඉදිරිපත් කල බවට බුද්ධි අංශ වෙත වාර්තා වී තිබී ඇත.

මේ තත්ත්වය මත වහාම බුද්ධි අංශ මැදිහත්ව අධිකරණ නියෝගය ප්‍රකාරව ලේකම් කාර්යාලය අත්පත් කරගන්නා ලෙසට ආරක්ෂක අංශ වෙත නිර්දේශ කර ඇත.

ඒ අනුව මන්දිරය අත්පත් කරගැනීමට පැමිණි ආරක්ෂක අංශ අරගලකරුවන්ට ඉවත්ව යන ලෙස නියෝග කිරීමත් සමග ඔවුන් දැඩි ස්වරූපයකින් එය ප්‍රතික්ෂේප කරමින් හෙට සවස 2 වනතෙක් එය භාර දිය නොහැකි බව ප්‍රකාශ කර ඇත.

මේ තත්ත්වය මත ඇති වූ ආතතිය නිසා අවසනයේ අරගලකරුවන් සහ පොලිසිය අතර උණුසුම් තත්ත්වයක් උද්ගතවූ අතර අරගලකරුවන් අතර සිටි ජාතික රූපවාහිනියට කඩා වැදුණු පිරිස ආරක්ෂක අංශ වලට අපහාසකරමින් අසභ්‍ය වචනයෙන් බැණ වැදීමත් සමඟ තත්ත්වය තවත් අයහපත් අතට හැරී ඇත.

අරගලකරුවන් අතර සිටි ජාතික රූපවාහිනියට කඩා වැදුණු ra.... g ... නැමැත්තා සහ Dha.. A.. නැමැත්තා බීමතින් සිටි බවට වාර්තා වන අතර ඔවුන් පොලිසියේ ඉල්ලීම අවඥාවට ලක් කරමින් ලේකම් කාර්‍යාලීය පඩිපෙළ මත ගීත ගයමින් නටමින් විනෝද වීම අරඹා ඇත.

මේ තත්වය මත තවත් අයහපත් අතට හැරුණු ආරක්ෂක අංශ සහ අරගල කරුවන් අතර සංනිවේදනය වඩවඩාත් ආතතියක් ජනනය කරමින් ඉදිරියට ගොස් ඇත.

සිදුවූ සිදුවීම පිළිබඳව අදහස් දක්වමින් අප හා අදහස් බෙදාගත් ආරක්ෂක අංශ සාමජිකයින් ප්‍රකාශ කරන් ලද්දේ 'අවසානයේ මිනිස් පවුරක් ලෙසින් ඉදිරියට පැමිණි ආරක්ෂක අංශ ජනාධිපති ලේකම් කාර්යාලය අසල ප්‍රදේශය මුදාගත් බවත් ගෝඨා ගෝ ගම පරිශ්‍රයට කිසිඳු හානියක් නොකල බවත් ය'

එසේම එම ක්‍රියාවලියට බාධා කරමින් ගැටුමක් ඇතිකරගැනීමට උත්සහ කරන ලද අරගලකරුවන් කිහිප දෙනෙකු අත්අඩංගුවට ගත් බව ද එම නිලධාරියා වැඩි දුරටත් පැවසීය.

කෙසේ වෙතත් අරගලකරුවන් සහ ආරක්ෂක අංශ අතර අනවශ්‍ය ආතතියක් ඇතිකරමින් දේශපාලන වාසි ලබාගැනීමට වෙර දරන කල්ලි කණ්ඩායම් ගැන ජනතාව අවදියෙන් සිටිය යුතු බව දේශපාලන විශ්ලේශකයින් පෙන්වාදේ.

(ගෝල්ෆේස් සිදුවීම සම්බන්ධව ආරක්ෂක අංශ සාමජිකයකයන් සහ අරගලභූමියේ ක්‍රියාකාරිකයින් විසින් ලබාදුන් තොරතුරු ඇසුරින්..)

විශේෂ වාර්තාකරුවෙකු විසිනි

අරගලකරුවන් ජනාධිපති කාර්යාලයේ තිබූ රාජ්‍ය ලිපි ලේඛන සියල්ල අද දහවල් වනවිට රහසිගතව පිට කිරීමට සූදානම් වන බවට බුද්ධි අංශ වෙත තොරතුරු ලැබී තිබුණ බව ආරක්ෂක අමාත්‍යංශ ආරංචි මාර්ග සඳහන් කරයි.

ජනාධිපති කාර්යාලයේ සිටි කණ්ඩායම් වලට අද පෙරවරු 6.00 වන විට ඉවත් වෙන ලෙස ආරක්ෂක අංශ දැනුම් දී තිබුණත් ඔවුන් පස්වරු 2 දක්වා කාලය ඉල්ලා තිබූ බවත් ආරක්ෂක අංශ ඊට එකඟව සිටි බවත් කියති.

නමුත් රජයේ බුද්ධි අංශ පසුව වාර්තා කර ඇත්තේ අද දහවල් වන විට ජනාධිපති කාර්යාලය අසලට සෙනග ගෙන්වා කළ කලකෝලාහල ඇති කිරීමට අරගලයේ යෙදෙන පිරිස් සූදානම්ව සිට ඇති බවයි.

ජනාධිපති කාර්යාලයේ මෙන්ම රාජ්‍ය ලේඛන වල ආරක්ෂාව සඳහා ජනාධිපති ලේකම් කාර්යාලයේ අනවසරයෙන් රැඳී සිටි පිරිස ඉවත් කිරීමට පියවර ගත් බව ආරක්ෂක අංශ සඳහන් කරයි.

- the leader .lk

මහජන ආරක්ෂක ආඥා පනත යටතේ මහජන සාමය පවත්වා ගෙන යාම සඳහා ත්‍රිවිධ හමුදාව කැඳවා ඇත.

ඊට අදාළ ගැසට් නිවේදනය ඊයේ (21) ජනාධිපති රනිල් වික්‍රමසිංහ විසින් නිකුත්කර ඇති අතර එය පහත දැක්වෙයි .

ජනාධිපති රනිල් වික්‍රමසිංහ යටතේ නව අන්තර්කාලීන කැබිනට් මණ්ඩලයක් අද (22) දිවුරුම් දෙනු ලැබිණ .

එහි විශේෂත්වය වූයේ එක් වෙනසක් පමණක් සිදුකර පැවති අමාත්‍ය මණ්ඩලයම පත්කර තිබීමය .

ඒ අනුව විදේශ කටයුතු අමාත්‍යවරයා වූ GL පීරිස් ඉවත්කර ඒ වෙනුවට අලිසබ්‍රි එම ධූරයට පත්කර ඇත.

අදාළ අමාත්‍ය මණ්ඩලය පහත දැක්වෙයි .

රාජ්‍ය පරිපාලන ස්වදේශ කටයුතු පළාත් සභා හා පළාත් පාලන අමාත්‍ය – දිනේෂ් ගුණවර්ධන
අධ්‍යාපන අමාත්‍යංශය -  සුසිල් ප්‍රේමජයන්ත
ධීවර අමාත්‍ය – ඩග්ලස් දේවානන්ද
ප්‍රවාහන මහාමාර්ග හා ජනමාධ්‍ය අමාත්‍ය – බන්දුල ගුණවර්ධන
කෘෂිකර්ම සහ වනජීවී හා වන සම්පත් අවසන් රක්ෂණ අමාත්‍ය – මහින්ද අමරවීර
සෞඛ්‍ය හා ජලසම්පාදන අමාත්‍ය – කෙහෙළිය රඹුක්වැල්ල
අධිකරණ බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍ය – විජේදාස රාජපක්ෂ
සංචාරක හා ඉඩම් අමාත්‍ය – හරීන් ප්‍රනාන්දු
කර්මාන්ත හා වැවිලි කර්මාන්ත අමාත්‍ය – රමේෂ් පතිරණ
නාගරික සංවර්ධන අමාත්‍ය – ප්‍රසන්න රණතුංග
විදේශ කටයුතු අමාත්‍ය – අලි සබ්රි
බුද්ධශාසන හා ආගමික කටයුතු සහ සංස්කෘතික කටයුතු අමාත්‍ය – විදුර වික්‍රමනායක
විදුලි බල හා බලශක්ති අමාත්‍ය – කංචන විජේසේකර
ක්‍රීඩා හා යෞවන කටයුතු සහ වාරිමාර්ග අමාත්‍ය – රොෂාන් රණසිංහ
පරිසර අමාත්‍ය – අහමඩ් නසීර්
කම්කරු හා විදේශ රැකියා අමාත්‍ය – මනූෂ නානායක්කාර
මහජන ආරක්‍ෂක අමාත්‍ය – ටිරාන් අලස්
වෙළඳ වාණිජ හා ආහාර සුරක්ෂිතතා අමාත්‍ය – නලින් ප‍්‍රනාන්දු

අද (22) අලුයම ගෝල්ෆේස් අරගල බිමට එල්ලවූ ආරක්ෂක අංශ ප්‍රහාරයට විරෝධය පලකර දේශපාලන පක්ෂ නියෝජිතයන් , සිවිල් සහ වෘත්තීය සමිති නායකයන්, අන්තර් විශ්වවිද්‍යාල ශිෂ්‍ය බලමණ්ඩලය ප්‍රමුඛ සංවිධාන කොළඹ කොටුව ප්‍රදේශයේ විරෝධතා උද්ඝෝෂණයක් පවත්වනු ලැබිණ .

අනතුරුව ඔවුන් ජනාධිපති ලේකම් කාර්‍යාලය ප්‍රදේශයෙන් ගෝල්ෆේස් පිටිය දෙසට පෙළපාලියකින් යාමට උත්සාහ කලද හමුදාව හා පොලිසිය විසින් දැඩි රැකවල් යොදා මාර්ගය වසා දමා තිබේ.

ජනාධිපති රනිල් වික්‍රමසිංහ ධුරයෙන් ඉවත් විය යුතු බව විරෝධතාකරුවන් කියා සිටියි.

කොළඹට අතිරේක බලඇණි !

මේ අතර කොළඹ සහ තදාසන්න ප්‍රදේශ සියල්ලේ ආරක්ෂාව තර කර තිබේ.

අතිරේක පොලිස් හා හමුදා බලඇණි මාර්ග බාධක යොදවමින් මෙලෙස ආරක්ෂාව තර කර තිබේ.

ගාලුමුවදොර අරගල භූමියට පොලිසිය හා හමුදා විසින් ඒකාබද්ධව සිදු කළ මෙහෙයුමකින් අනතුරුව ජනාධිපති ලේකම් කාර්‍යාලය , ප්‍රධාන පිවිසුම ඇතුළු ප්‍රදේශ අත්පත් කරගෙන ඇත .

මේ වන විට ජනාධිපති කාර්‍යාලයේ බාහිර පරිශ්‍රය පෙර පැවති සම්ප්‍රදායික රාජකාරි කටයුතු වෙනුවෙන් සකස් කෙරෙමින් ඇති බවත් අභ්‍යන්තර පරිශ්‍රය ඇඟිලි සලකුණු ගැනීම් ඇතුලු පොලිස් සොකෝ විමර්ශන වලින් පසුව සාමාන්‍ය තත්ත්වයට පත්කෙරෙනු ඇති බවත් වාර්තා වෙයි .

ගාලු මුවදොර විරෝධතාකරුවන් විසුරුවා හැරීමට බලය භාවිතා කිරීම පිළිබඳ එක්සත් ජාතීන්ගේ සංවිධානය දැඩි අවධානයෙන් පසුවන බව එක්සත් ජාතීන්ගේ සංවිධානයේ ශ්‍රී ලංකාවේ නේවාසික සම්බන්ධීකාරක හැනා සින්ගර් හැම්ඩි පවසයි .

ඇය අද (22) මේ බව සඳහන් කර ඇත්තේ සිය ට්විටර් ගිණුමේ සටහනක් තබමින්ය .

සාමකාමී විරෝධතා පැවැත්වීමේ අයිතිය යටපත් කිරීමට උත්සහ කිරීම තුලින් රටේ දේශපාලන සහ ආර්ථික අස්ථාවරත්වය තවත් නරක අතට හැරිය හැකි බවත් එක්සත් ජාතීන්ගේ සංවිධානයේ ශ්‍රී ලංකාවේ නේවාසික සම්බන්ධීකාරක හැනා සින්ගර් හැම්ඩි පවසයි .

මාධ්‍යවේදීන්ට සහ මානව හිමිකම් ආරක්ෂා කිරීමට පෙනී සිටින්නන් හට විරෝධතා සහ එහි ක්‍රියාකාරීත්වය අධීක්ෂණය කිරීමට හැකියාව තිබෙන බවත් එයට බාධා එල්ල නොකළ යුතු බවත් එම සටහනේ ඇය වැඩිදුරටත් සඳහන් කර ඇත .

ජනාධිපති ලේකම් කාර්යාලය අවට ගාලු මුවදොරහි සිටි විරෝධතාකරුවන්ට අද (22) අලුයම කළ පහර දීම තරයේ හෙළා දකින බව ශ්‍රී ලංකා නීතිඥ සංගමය පවසයි .

නිවේදනයක් නිකුත් කරමින් නීතිඥ සංගමය මේ බව සඳහන් කර ඇත

ගාලු මුවදොරට පිවිසෙන මාර්ග අවහිර කරමින් හමුදා නිලධාරීන් සහ පොලිසිය සිය ගණනක් මහජනතාවට එම ප්‍රදේශයට ඇතුළුවීම වළක්වා ඇති බව පෙනෙන්නට තිබුණි බව ද නීතිඥ සංගමය නිකුත් කළ නිවේදනයේ දැක්වේ.

එම ප්‍රදේශයට ඇතුළුවීමට උත්සාහ කළ නීතීඥවරුන් කිහිපදෙනකුම බලධාරින් විසින් වළකා ඇති බව කියන නීතිඥ සංගමය තම වෘත්තීය මට්ටමින් මැදිහත් වීමට උත්සාහ කළ නීතීඥවරුන් අවම වශයෙන් දෙදෙනෙකුට හමුදා නිලධාරීන් විසින් පහර දී ඇති බවට දන්වා ඇතැයි ද නිවේදනයේ සඳහන් කර ඇත .

අදාළ නිවේදනය වැඩිදුරටත් සඳහන් කර ඇත්තේ නිරායුධ සිවිල් වැසියන්ට ආරක්ෂක අංශ විසින් පහර දෙන අයුරු ද වීඩියෝ දර්ශනවල දැක්වෙන බවත්ය .

නව කැබිනට් මණ්ඩලය අද (22) පෙරවරුවේ ජනාධිපතිවරයා ඉදිරියේ දිව්රුම් දීමට නියමිත බව වාර්තා වෙයි .

ආණ්ඩුවට සමීප ආරංචි මාර්ග සදහන් කරන්නේ නව රජයේ මුදල් අමාත්‍ය ධූරය ජනාධිපති රනිල් වික්‍රමසිංහ විසින්ම දරනු ඇති බවය.

ඉදිරියේදී ජාත්‍යන්තර මූල්‍ය අරමුදල සමග දිගින් දිගටම කටයුතු කිරීමට සිදුවීමත්, පවතින ආර්ථික අර්බූදයත් මත මෙසේ මුදල් අමාත්‍ය ධූරය ජනාධිපතිවරයා විසින්ම දරනු ඇති බව එම ආරංචි මාර්ග සදහන් කරයි.

එසේම විදේශ අමාත්‍ය ධූරයේ ද වෙනසක් සිදුවීමට නියමිත බවත් වාර්තා වෙයි .

ලැබෙන ආරංචි මාර්ග අනුව විදේශ අමාත්‍ය ධූරයෙන් ජී.එල්.පීරිස් ඉවත්කර ඒ වෙනුවට අලිසබ්‍රි පත්කිරීමට නියමිතය.

ඒ හැර පැවති අමාත්‍ය මණ්ඩලේ විශේෂ වෙනස්කමක් සිදුනොකෙරෙනු ඇති බවත් වාර්තා වෙයි .

පොලිසිය සහ හමුදාව ,විශේෂ කාර්ය බළකාය එක්ව ජනාධිපති ලේකම්කාර්යාලය අසල රැඳිසිටි අරගලකරුවන් අද (22) අළුයම එම ස්ථානයෙන් ඉවත් කර ඇත.

අරගලකරුවන් අත්පත් කරගෙන සිටි ජනාධිපති ලේකම් කාර්යාලය සම්පූර්ණයෙන්ම සිය පාලනයට ගෙන ඇති අතර , ගාලු මුවදොර බාලදක්ෂ මාවත දක්වා ම වූ භූමි ප්‍රදේශයේ සියලු කූඩාරම් ඉවත් කර එම ප්‍රදේශයේ ද අරගලකරුවන්ගෙන් නිදහස් කරගෙන ගෙන ඇති බව වාර්තා වේ.

එහිදී ඇතිවූ ගැටුමින් නීතිඥවරුන් දෙදෙනකු ඇතුළු ඇතුළු පුද්ගලයන් අට දෙනකු අත්අඩංගුවට ගෙන ඇතැයි පොලිසිය පවසයි.

ජනාධිපති ලේකම් කාර්යාලය දෙසින් දහසකට ආසන්න භට කණ්ඩායමක් අද අළුයම 1.30 ට පමණ අරගල භූමියට ඇතුළු වී අරගලකරුවන් එම ස්ථානයෙන් පලවා හැර ඇත.

මෙහිදී දෙපාර්ශවය අතර උණුසුම් තත්වයක් හටගෙන ඇති අතර එහිදී අරගලකරුවන් පිරිසක් තුවාල ලබා ඇතැයි වාර්තා වෙයි .

ගාලුමෝදරට පිවිසෙන මාර්ග සියල්ලම පිටස්තර පුද්ගලයන්ට ඇතුළුවීමට නොහැකි වන අයුරින් වසා මෙම මෙහෙයුම ක්‍රියාත්මක කර ඇත.

මේ හේතුව නිසා අරගලකරුවගේ සහයට කිසිවකුටත් ගාලුමෝදර දක්වා ගමන් කිරීමට නොහැකි විය.

මෙම ගැටුම් අතරතුර දෙස් විදෙස් මාධ්‍යවේදීන් පිරිසක් ද ප්‍රහාරවලට ලක්ව තුවාල ලබා සිටි අතර මාධ්‍යවේදීන් කිහිප දෙනෙක්ම අත්අඩංගුවට පත්වී ඇතැයි ද වාර්තා වේ.

කිසිදු දැනුම්දීමක් නොමැතිව පැමිණි හමුදා සහ පොලිස් කණ්ඩායම් අරගලකරුවන්ට පන්න පන්නා පහර දුන් බවට අරගලකරුවෝ චෝදනා කළහ .

පිරිසට පහර දෙන ආකාරය අරගලකරුවන් විසින් වීඩියෝ කර සමාජ මාධ්‍ය වෙත ද මුදා හැර ඇත.