පුවත්

ශ්‍රී ලංකාවේ වත්මන් තත්ත්වය සම්බන්ධයෙන් දීර්ඝ පැහැදිලි කිරීමක් සිදුකරමින් විදේශ අමාත්‍ය අලිසබ්‍රි අද (25) එක්සත් ජාතීන්ගේ මහා මණ්ඩලය අමතා ඇත. කර ඇතැයි විදෙස් මාධ්‍ය වාර්තා කළේ ය.

පසුගිය සැප්තැම්බර් 19 වැනිදා ආරම්භ වූ එක්සත් ජාතීන්ගේ මහා මණ්ඩලයේ 77 වැනි සැසිවාරයේ ඉහළ මට්ටමේ සාකච්ඡා වාරය සැප්තැම්බර් 26 වැනිදා දක්වා පැවැත්වීමට නියමිතය.

ඊට සහභාගිවීමට ඇමෙරිකාවේ නිව්යෝර්ක් නුවර වෙත ගොස් සිටින විදේශ අමාත්‍යවරයා, එක්සත් ජාතීන්ගේ සාමාජික රටවල නියෝජිත කණ්ඩායම් නායකයින් රැසක් හමුවී ද්විපාර්ශ්වික සාකච්ඡා පවත්වා ඇති බවත් වාර්තා වෙයි .

ඒ අනුව විදේශ අමාත්‍ය අලිසබ්‍රි අමෙරිකානු ජනාධිපතිවරයා පිරිනැමූ රාත්‍රී භෝජන සංග්‍රහයේ දී ජනාධිපති ජෝ බයිඩ්න් සහ ජිල් බයිඩ්න් හමුව තිබේ .

විදේශ කටයුතු අමාත්‍යාංශය නිවේදනය කර ඇති ආකාරයට , අමාත්‍ය අලි සබ්රි බංග්ලාදේශ අග්‍රාමාත්‍ය ෂීක් හසීනා, එක්සත් ජනපදයේ දේශපාලන කටයුතු පිළිබඳ නියෝජ්‍ය රාජ්‍ය ලේකම්, වික්ටෝරියා නූලන්ඩ් ද හමුවී සාකච්ඡා කර ඇත .

සෝමාලියාවේ විදේශ කටයුතු සහ ජාත්‍යන්තර සහයෝගිතා අමාත්‍ය, අබ්සීර් ඕමාර් ජාමා, නැමීබියාවේ ජාත්‍යන්තර සබඳතා සහ සහයෝගීතා නියෝජ්‍ය අමාත්‍ය, ජෙනලි මාතුණ්ඩු, උස්බෙකිස්තානයේ විදේශ අමාත්‍ය ව්ලැඩිමීර් නොරොව්, සෞදි අරාබියේ විදේශ අමාත්‍ය ෆයිසාල් බින් ෆර්හාන් සහ ආර්මේනියාවේ විදේශ අමාත්‍ය අරත් මිර්සෝයාන් සමග ද විදේශ අමාත්‍යවරයා ද්විපාර්ශ්වික සාකච්ඡා පවත්වා ඇති බවත් එහි සඳහන් ය.

රුපියල් තුන් කෝටි දහ හතර ලක්ෂ හතලිස් දහසක් වටිනා භාණ්ඩ තොගයක් නීතිවිරෝධීව දිවයිනට රැගෙන ආ හිමිනමක් කටුනායක ගුවන්තොටුපොළේදී අත්අඩංගුවට ගෙන තිබේ.

අදාළ හිමිනමගේ ගමන් මලු තුළ රුපියල් අනූ ලක්ෂයක් වටිනා ජංගම දුරකතන 218ක්, රුපියල් එක් කෝටි අනූ පන් ලක්ෂයක් වටිනා රන් බිස්කට් 08ක්, රුපියල් හය ලක්ෂ අසූ දහසක් වටිනා රන් කැබලි 06ක් සහ රුපියල් ලක්ෂ විසි දෙකක් වටිනා රන් මාල 02 ක් හමුවී ඇති අතර ගුවන්තොටුපොළ රේගු නිලධාරීන් විසින් මෙකි අත්අඩංගුවට ගැනීම සිදුකර ඇත .

23 හැවිරිදි මෙකී හිමිනම ඕමානයේ සිට මෙරටට පැමිණ තිබේ.

නීතිවිරෝධීව ගෙන ආ භාණ්ඩ තොගය රාජසන්තක කර ඇති නමුත් දඩ නියම කිරීමකින් තොරව හිමිනමව නිදහස් කර ඇති බවත් වාර්තා වෙයි .

ජපානයේ සහ පිලිපීනයේ නිල සංචාරයක් සඳහා ජනාධිපති රනිල් වික්‍රමසිංහ හෙට (26) අළුයම දිවයිනෙන් පිටත්ව යාමට නියමිතය.

සිය දෙදින ජපාන නිල සංචාරයේ දී ජපානයේ හිටපු අග්‍රාමාත්‍ය ෂින්සෝ අබේගේ අවමංගල්‍ය උත්සවයට ද ජනාධිපතිවරයා සහභාගීවන අතර ජපාන අග්‍රාමාත්‍යවරයා, විදේශ අමාත්‍යවරයා මෙන්ම මුදල් අමාත්‍යවරයා සමග ද ද්වි පාර්ශ්වික සාකච්ඡා පවත්වන බවත් වාර්තා වෙයි .

අනතුරුව ආසියානු සංවර්ධන බැංකු අධිපතිවරුන්ගේ රැස්වීමේ මුලසුන දැරීමට සැප්තැම්බර් 28වන දා ජනාධිපති රනිල් වික්‍රමසිංහ පිලිපීනය බලා පිටත්ව යාමට නියමිතය.

එහිදී ජනාධිපතිවරයා පිලිපීන ජනාධිපති බොංබොං මාකෝස් (Bongbong Marcos) සමග මෙන්ම ආසියානු සංවර්ධන බැංකුවේ සභාපති සත්සුගු අසකාවා (Masatsugu Asakawa) සමග සාකච්ඡා පැවැත්වීමට නියමිතව තිබේ.

ජනාධිපති රනිල් වික්‍රමසිංහ සිය ජපාන සහ පිලිපීන නිල සංචාරය නිමා කර සැප්තැම්බර් 30 වනදා නැවත දිවයිනට පැමිණීමට නියමිතය.

ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක, ජාත්‍යන්තර කටයුතු පිළිබඳ ජනාධිපති අධ්‍යක්ෂ දිනුක් කොළඹගේ, මාධ්‍ය අධ්‍යක්ෂ ශානුක කරුණාරත්න, තිරසර සංවර්ධනය පිළිබඳ අධ්‍යක්ෂ රන්දුල අබේවීර සහ ජනාධිපති පෞද්ගලික ලේකම් සැන්ඩ්‍රා පෙරේරා මෙම සංචාරයට එක්වන අතර ජනාධිපතිවරයාගේ පිලිපීන නිල සංචාරයට මහා භාණ්ඩාගාර ලේකම්වරයා ද එක්වීමට නියමිතය.

එමෙන්ම පිලිපීන නිල සංචාරය සඳහා දිනුක් කොළඹගේ සහ රන්දුල අබේවීර සහභාගී නොවනු ඇති බව ජනාධිපති මාධ්‍ය අංශය පවසයි .

පාර්ලිමේන්තු මන්ත්‍රී මහින්දානන්ද අලුත්ගමගේ සහ, රෝහිත අබේගුණවර්ධන අතර, පහුගිය දවසක, පාර්ලිමේන්තු කැන්ටින් එකේදී, ලොකු බහින්බස් වීමක් සිදුව තිබෙනවා.

තමන් විසින් ඉදිරිපත් කළ පක්ෂ ප්‍රතිසංවිධානයට අදාළ ලියවිල්ලකට, පක්ෂ ප්‍රධානීන්ගෙන් අවධානයක් නොලැබීම ගැන , මහින්දානන්ද අලුත්ගමගේ කියපු කතාවකින් තමයි, ගැටුම පටන් අරන් තියන්නේ..

ආරංචියේ හැටියට කතාව මේකයි..

පොහොට්ටු පක්ෂය මේ දවස්වල එක දිගට ආසන බල මණ්ඩල කැඳවනවා..

ප්‍රාදේශීය සභා මන්ත්‍රීවරු අවම 20ක් උපරිම 50 ක් විදියට කැඳවීම් කරනවා..

මහනුවර ආසන බල මණ්ඩලේ කැඳ වද්දී තමයි ඔය ගැටුමේ .මුල ....

මෙතන කතාව පටන් අරන් තියන්නේ මහින්දානද නැත්තන් මහී ..

'' කෝ මම මහනුවර වැඩේට කට්ටිය කැඳවන වැඩපිළිවෙල ඔයාලගේ පක්සේට එව්වා. තාම මොකුත් වෙලා නෑ නේ ..'' මහී කියල තියන්නේ විවේචනයක් විදියට..

'' නැහැ අපි ඒක රිජෙක්ට් කළා. '' ටිකක් හයියෙන් එහෙම උත්තරයක් දීලා තියෙන්නේ පොහොට්ටු මන්ත්‍රී රන්ජිත් බණ්ඩාර.

මහාචාර්ය රන්ජිත් බණ්ඩාර කියන්නේ, බැසිල්ගේ ගෝලයා. ජාතික ලැයිස්තුවෙන් රන්ජිත් බණ්ඩාර ව පාර්ලිමේන්තු ගෙනත් , මහනුවර දිස්ත්‍රීකය බාරදීල තියන්නේ මහාචාර්ය රංජිත්ට..

මහී , ඔය කතා ව පාර්ලිමේන්තු කැන්ටින් එකේ දී කියනකොට, රාජ්‍ය ඇමති සනත් නිශාන්තත් එතන ඉඳලා.

'' ඇමතිතුමා දැන් ඔබතුම අපේ පක්ෂයේ නෙමෙයිද ? ඕගොල්ලන්ගේ පක්ෂේ කියා කියා අපට හින්ට් පාස් කරන්නේ.. '' සනත් නිශාන්ත , මහීගෙන් අහලා.

හිටපු ඇමති රෝහිත අබේගුනවර්ධනත් කතාව පැටලිලා තියන්නේ මය වෙලාවේ..

දෙන්න ම සද්දේ දාගෙන ගෝරියක් ලු..

වැඩේ දිගට යද්දී හිටපු ජනාධිපති මහින්ද විතරක් නෙමෙයි නාමලුත් මැදිහත්වෙලා.

'' හරි හරි දැන් මෙතන රණ්ඩු එපා. දැන් ඔය කතාව නවතන්න '' එහෙම කියල වැඩේ යටගහල තියන්නේ මහින්ද රාජපක්ෂ හිටපු ජනාධිපති තුමා ..

කොහොම වුනත් පක්සේ මන්ත්‍රීවරු තමන්ව කොන්කරන එක ගැන මහින්දානන්ද ඉන්නේ ලොකු හිතේ අමාරුවකින් ලු..

- දේශපාලන වාර්තාකරු

අ.පො.ස. සාමාන්‍ය පෙළ විභාගයට පළමු වරට පෙනී සිට එම විභාගය සමත්ව අ.පො.ස. උසස් පෙළ හැදෑරීමට සුදුසුකම් ලැබු ශිෂ්‍ය ශිෂ්‍යාවන් වෙනුවෙන් ජනාධිපති අරමුදල මගින් ශිෂ්‍යත්ව පිරිනැමීමේ වැඩසටහන නැවත ආරම්භ කිරීමට ජනාධිපති රනිල් වික්‍රමසිංහ උපදෙස් දී නිකුත්කර ඇත .

ඊට අදාළ ක්‍රියාවලිය සම්බන්ධව පළාත් අධ්‍යාපන අධ්‍යක්ෂවරුන්, කලාප අධ්‍යාපන අධ්‍යක්ෂවරුන් සහ විදුහල්පතිවරු කඩිනමින් දැනුවත් කරන ලෙස ජනාධිපති ලේකම් සමන් ඒකනායක අධ්‍යාපන අමාත්‍යංශයේ ලේකම්වරයා වෙත උපදෙස් දී ඇත.

ඒ අනුව, දිවයිනේ අධ්‍යාපන කලාප කාර්යාල 99ක් අතුරින් එක් කලාප කාර්යාලයකට සුදුසුකම් ලැබූ ශිෂ්‍යත්වලාභීන් 30 දෙනෙකු බැගින් කලාප 99න් ශිෂ්‍ය ශිෂ්‍යාවන් 2,970කට මේ යටතේ ශිෂ්‍යත්ව පිරිනැමීමට තීරණය කර ඇත.

එලෙස තෝරාගන්නා ශිෂ්‍යත්වලාභීන්ට අ.පො.ස. උසස් පෙළ විභාගයට පෙනී සිටින තෙක් මසකට රු.5,000ක් බැගින් මාස 24ක උපරිම කාලසිමාවක් සඳහා ශිෂ්‍යාධාරයක් පිරිනැමීමට අපේක්ෂා කෙරේ.

මෙම වර්ෂයේ අ.පො.ස. සාමාන්‍ය පෙළ විභාගයේ ප්‍රතිඵල ලද පසු අ.පො.ස. උසස් පෙළ අධ්‍යයන වර්ෂය ආරම්භ කිරීමෙන් අනතුරුව මෙම ශිෂ්‍යත්ව ප්‍රදානයට අයදුම්පත් කැඳවීමට අදාළ පුවත්පත් දැන්වීම් පළ කිරීමට නියමිත ය.

පහුගිය කාලෙ රටපුරා තිබ්බ සමූපකාර ජන්ද ගැන, රටේ ලොකු අවධානයක් යොමු උණා.

ඒකට විශේෂම හේතුව තමයි ,මේ වෙලාවෙ පවත්වන එකම ජන්ද වර්ගය සමූපකාර ජන්ද වීම.

ඒ නිසා සමූපකාර ජන්දෙ මහ ජන්දයක් තරම් උණුසුම්.

මේ දවස්වල දේශපාලන පක්ෂවල සහ, දේශපාලනය නායකයන්ගෙ ජන්ද පදනම මනින දර්ශකය තමයි , සමූපකාර ඡන්ද.

පහුගිය කාලෙ තිබුණු සමූපකාර ඡන්ද රැසකින් පොහොට්ටුව පැරදූණා.

ඒ ජයග්‍රහණ ගැන ආණ්ඩු විරෝධීන් ඉන්නේ බොහොම උජාරුවෙන් ...

හැබැයි ඉතින් ඊයේ තිබුණු පානදුරේ සමූපකාර ජන්දෙ නම්, පොහොට්ටුව උඩින්ම ගොඩදාගෙන.

පොහොට්ටුව වෙනුවෙන් ජන්ද සටන මෙහෙයවල තියෙන්නෙ, පාර්ලිමේන්තු මන්ත්‍රී සංජීව එදිරිමාන්නලු.

හැමෝම මුලින් හිතල තියෙන්නෙ, මේ දේශපාලන තත්ත්වය යටතේ පොහොට්ටුව පානදුරේ සමුපකාරෙත් පරදී කියල.

ඒත් පානදුරේදි වැඩේ නියමෙටම සංවිධානය කරල තිබුණලු..

ඒ නිසා ආසන 87 න් 53 ක්ම දිනල තියෙන්නෙ පොහොට්ටුව . විරුද්ධව ලැබිල තියෙන්නෙ 34 යිලු.

පානදුර සමූපකාරෙ අයිති කලුතර දිස්ත්‍රික්කය පොහොට්ටුවේ ලොකු ලොක්කො කීපදෙනෙක්ම ඉන්න තැනක්.

පානදුරේ ජන්දෙ දිනුවම ඇමති විදුර වික්‍රමනායක සංජීව එදිරිමාන්නට කතා කරල "මල්ලි උඹ අපි ඔක්කොගෙම ගෞරවය රැක්ක" ඒකට ස්තුතියි කිව්වලු.

- දේශපාලන වාර්තාකරු

ශ්‍රී ලංකාවේ නවසීලන්ත මහ කොමසාරිස් මයිකල් ඇපල්ටන් සහ නියෝජ්‍ය මහ කොමසාරිස් ඇන්ඩෘ ට්‍රැවලර් , මහජන ආරක්ෂක ඇමැති ටිරාන් අලස් අතර හමුවක් මහජන ආරක්ෂක අමාත්‍යාංශයේදී පසුගියදා (23) පැවැත්විණ.

ගෙවුනු මාස කිහිපයෙහි දේශපාලනික වශයෙන් පැවති මහජන විරෝධතා පිළිබඳවත් වත්මන් රටතුල පවතින සාමකාමී තත්ත්වය ගැනත් ඒ සඳහා ශ්‍රී ලංකා පොලිසියේ කාර්ය භාරය පිලිබඳව මෙහිදී සාකච්ඡා කර ඇත .

මෙහිදී මහකොමසාරිස් මයිකල් ඇපල්ටන් ශ්‍රී ලාංකිකයන් නීති විරෝධී සංක්‍රමණිකයන් ලෙස බෝට්ටු මගින් නවසීලන්තයට පැමිණීමේ අවධානමක් පවතින බවත් එය වැලැක්වීමට සහයෝගය දක්වන ලෙස මහජන ආරක්ෂක ඇමැති ටිරාන් අලස්ගෙන් ඉල්ලා සිටි බවත් වාර්තා වෙයි .

දෙවැනි එළිසබෙත් රැජිණගේ අවමංගල්‍යයට සහභාගි වෙන්න ලන්ඩනයට ගිය ජනාධිපති රනිල් වික්‍රමසිංහ , පොදුරාජ්‍ය මණ්ඩලීය මහලේකම් පැට්‍රීෂියා ස්කොට්ලන්ඩ් අතර හමුවක් සිද්ධ වුණා.

පොදුරාජ්‍ය මණ්ඩලීය ලේකම් කාර්යාලය සහ ශ්‍රී ලංකාව අතර අන්‍යෝන්‍ය සහයෝගීතාව ගැන තමයි මෙහිදී දීර්ඝ ලෙස සාකච්ඡාකරා කියලා ප්‍රෙස්වල ගියේ. මේ කියන්න යන්නේ ඒ කොහෙත් නොගිය එකක් .

දැන් ජනාධිපති සහ මහ ලේකම්වරියගේ මේ සාකච්ඡාව අවස්ථාවේ ෆොටෝස් ගන්නවනේ. ෆොටෝස් ගන්න ගිය වෙලාවේ බලනකොට, ජනාධිපති රනිල් වාඩිවෙලා තියෙන්නේ පොදුරාජ්‍ය මණ්ඩලයේ කොඩිය තිබුන තැනලු. පොදුරාජ්‍ය මණ්ඩලීය මහ ලේකම් පැට්‍රීෂියා වාඩිවෙලා තියෙන්නේ, ශ්‍රී ලංකා කොඩිය තිබුන තැනලු. ඒ පාර එතන හිටපු නිලධාරියෙක් මේ පුටු මාරුව ගැන ජනාධිපතිතුමාව සහ මහ ලේකම්වරියව දැනුවත් කරලා.

ඒ වෙලාවේ ජනාධිපති රනිල් කිව්වලු, "කමක් නෑ නේද ? මේ ඉන්න විදිහෙන් කියවෙන්නේ, මම පොදුරාජ්‍ය මණ්ඩලය වෙනුවෙන් පෙනී සිටිනවා කියලා. ඒ වගේම මෙතුමිය ලංකාව වෙනුවෙන් පෙනී සිටිනවා" කියලා. "ඒක ඉතින් එහෙමනේ" කියලා ජනාධිපතිතුමා කියනකොට මහ ලේකම්තුමියගේ මුණේත් හිනාවක් ලු.

ඒ වගේම තමයි, ජනාධිපති, සැප්තැම්බර් 22 ජනාධිපති රනිල් වික්‍රමසිංහ විදෙස් තානාපතිවරුන් එක්ක සාකච්ඡාවක් පැවැත්වුවා. Paris Club එකට අයත් රටවල් වගේම Paris Club එකට අයත් නොවන රටවල් නියෝජනය කරමින් තානාපතිවරුන් 23ක් මේ අවස්ථාවට එක්වෙලා. සමහර තානාපතිවරුන් මේ සාකච්ඡාවට එක්වුණා කියන්නේ ZOOM තාක්ෂණයෙන්.

ආර්ථික අර්බුදයෙන් ගොඩ එන්න ජාත්‍යන්තර මූල්‍ය අරමුදලේ සහය ගන්න පූර්ණ සහය දෙනවා කියලා ඒ සියලුම තානාපතිවරුන් එකට එකතුවෙලා සහතිකයක් දීලා. ඕවා ඉතින් ප්‍රෙස් වල ගිය කතා. මේ කියන්න යන්නේ එහෙම කොහෙවත් නොගිය කතාවක් .

ලංකාවේ ප්‍රංශ තානාපතිත් මේ සාකච්ඡාවේදී අදහස් දක්වලා, ආර්ථික අර්බුදයෙන් ගොඩ එන්න උත්සාහ කරන ජනාධිපතිගේ වැඩපිළිවෙල අගය කරලා. ඒ එක්කම දූෂණ අවම කරගන්න උපරිමයෙන් මහන්සි වෙන්න කියලත් අවධාරණයෙන් කියලා. ඒ විතරක් නෙවෙයි, IMF සාකච්ඡා සාර්ථක කරගන්න , ණය ප්‍රතිව්‍යුහගත කරන්න වගේම Paris Club එකේ රටවල් වගේම Paris Club අයිති නැති රටවල් එකඟ කරගන්න උපරිම සහය දෙනවා කියලත් කියලා.

ප්‍රංශ තානාපතිගේ මේ අදහස් දැක්වීමේ අන්තිමට කිව්වලු, "ලංකාව මේ යන ආකාරයටම වැඩ ටික සාර්ථකව කරගෙන ගියොත්, දෙසැම්බර් නත්තලට අපි හැමෝටම එකතුවෙලා ලංකාවට ලොකු gift එකක් දෙන්න පුළුවන් වෙයි කියලා හිතනවා" කියලා. ප්‍රංශ තානාපති එහෙම කියනකොට අනිත් තානාපතිවරුනුත් ඒක අනුමත කරාලු.

ඒ කියන්නේ නම් මොකක් හරි සෙට් වෙන්න වගේ යන්නේ..! අර්බුදය විසඳගන්න සපෝර්ට් එකක් ලැබෙනවා නම් ඉතිං , හැමෝටම නත්තල් තමයි නේද ?

- රිපෝටර්

මාධ්‍යවේදීන්ට සැපයූ දිවා ආහාර වේලේ හාල්මැස්සන් බැඳුමක තිබී අඩියක් පමණ දිගැති ගෝනි නූල් කැබැල්ලක් සොයා ගැනීමේ සිද්ධිය සම්බන්ධයෙන්ද පාර්ලිමේන්තු මහලේකම් ධම්මික දසනායකගේ නියෝගයෙන් පරීක්ෂණයක් ආරම්භවී ඇත.

මෙලෙස පරීක්ෂණ අරඹා ඇත්තේ එම සිද්ධිය සම්බන්ධයෙන් පළ වූ මාධ්‍ය වාර්තා සැලකිල්ලට ගැනීමෙන් අනතුරුවය.

මෙවැනි සිද්ධීන් මින් ඉදිරියට ඇති වීම වැළැක්වීමට වහාම ක්‍රියාමාර්ග ගන්නැයි ද පාර්ලිමේන්තු මහ ලේකම් අදාළ අංශයේ නිලධාරීන්ට දැනටමත් උපදෙස් දී ඇතැයිද වාර්තා වෙයි .

මාධ්‍යවේදීන්ට ආහාර සපයන පාර්ලිමේන්තු භෝජනාගාරයෙන් ඊයේ දිවා ආහාරය ලබා ගත් මාධ්‍යවේදියකුගේ කෑම පිඟානේ හාල්මැස්සන් බැදුමක තිබී මෙම ගෝනි නූල් නූල සොයාගෙන තිබිණ. ඒ මාධ්‍යවේදියා එම ගෝනි නූල සෙසු මාධ්‍යවේදීන්ට පෙන්වා ඒ අවස්ථාවේදීම භෝජනාගාර අංශයේ නිලධාරීන්ට බාරදීමට කටයුතු කර ඇත.

පාර්ලිමේන්තුවේ ආහාරවල නොයෙකුත් අපවිත්‍ර දේ තිබී මෙයට පෙරද සොයාගෙන තිබිණ.

ආන්දෝලනයට තුඩු දුන් රුසියානු එයරොෆ්ලොට් ගුවන් සේවාව නැවත ශ්‍රී ලංකාව තුළ සිය මෙහෙයුම් ආරම්භ කිරීමට සූදානම් බව වරාය, නාවික හා ගුවන් සේවා අමාත්‍යංශය පවසයි.

නිවේදනයක් නිකුත් කරමින් එම අමත්‍යංශය සඳහන් කළේ, එයරොෆ්ලොට් ගුවන් සේවාව ශ්‍රී ලංකාව තුළ සිය ගුවන් මෙහෙයුම් එළඹෙන ඔක්තෝබර් 9 වන දින සිට ආරම්භ කිරීමට නියමිත බව ය.

ඒ අනුව කොළඹට ගමන්කරන ගුවන්ගමන් 09වැනිදා සිට මූලික වශයෙන් සතියකට දෙවරක් ක්‍රියාත්මක වන බවද එම නිවේදනයේ දැක්වේ.

රුසියානු ඵරෝෆ්ලොට් ගුවන් සේවය ශ්‍රී ලංකාව වෙත සිදු කෙරෙණ වාණිජ ගුවන් ගමන් අත්හිටුවනු ලැබුවේ ඵම ගුවන් සේවයට අයත් යානයකට ශ්‍රී ලංකාවෙන් පිටව යාම වළක්වාලමින් කොළඹ වාණිජ මහාධිකරණය ඉකුත් ජූනි මස 02වනදා නිකුත් කළ වාරණ නියෝගය හේතුවෙනි.

පාර්ලිමේන්තුවෙන් අටවා ගත් ජනාධිපතිකම ඔළුවට ගහලා රනිල් ගෙන යන වියරු මර්දනය නතර කළ යුතු බව ජනතා විමුක්ති පෙරමුණේ නායක අනුරදිසානායක පවසයි.

ඔහු එබැව කියා සිටියේ, ජනතා විමුක්ති පෙරමුණ ප්‍රධාන කාර්යාලයේ අද (25) පැවති මාධ්‍ය හමුවකදීය.

එහිදී ඔහු මෙසේද සඳහන් කළේය.

''ආණ්ඩුව තමන්ගේ බංකොලොත්භාවය නිසා ජනතාවගේ ප්‍රශ්න විසඳීමට අසමත්වීමෙන් ඇති වී තිබෙන විරෝධතාවයන්ට ම්ලේච්ඡ ප්‍රහාර එල්ල කිරීම දක්වා ගොස් තිබෙනවා. අපේ පක්ෂයට අනුබද්ධ සමාජවාදී තරුණ සංගමය 24 වැනිදා විශාල උද්ඝෝෂණ ව්‍යාපාරයක් පැවැත්වූවා. ඒ උද්ඝෝෂණය ඉතාමත් සාමකාමියි, නීත්‍යානුකූලයි. කිසිදු පොදු දේපළකට හානියක් නොවන ලෙස උද්ඝෝෂණය පැවැත්වූවා.

නමුත් පොලීසිය මංපහරන්නන්ගේ ස්වභාවයෙන් මඟ හරස්කොට ම්ලේච්ඡ ප්‍රහාරයක් එල්ල කර, 84දෙනෙක් අත්අඩංගුවට ගත්තා. හත්දෙනෙක් රෝහල්ගත කර තිබෙනවා. ජනතාවගේ සාධාරණ ප්‍රශ්නවලට විසඳුම් ලබාගන්න සිදුකරන විරෝධයන්, උද්ඝෝෂණයන් පැවැත්වීමට ආණ්ඩුක්‍රම ව්‍යවස්ථාවෙන් ලබාදී තිබෙන නිදහස මුළුමනින්ම උල්ලංඝනය කරමින් මෘග ඒකාධිපතියෙක් හැටියට රනිල් වික්‍රමසිංහ කටයුතු කරනවා.

ජනතාවගේ මේ නැගී සිටීම්, පහරදී, අත්අඩංගුවට ගෙන මර්දනය කරන්න ජනාධිපති කල්පනා කරනවා නම්, එය ඔහුගේ වියරු සිහිනයක් විතරයි. මේ තරුණ තරුණියන්, ගොවි ජනතාව, කම්කරු ව්‍යාපාරය, තමන්ගේ ඇඟේ අමාරුවට පාරට බහිනවා නොවෙයි. ඔවුන්ගේ ජීවිත පිළිබඳ සියලු අපේක්ෂාවන් මේ පාලක කණ්ඩායම් විසින් බිඳවට්ටවා ඉවරයි.

 ඉදිකිරීම් කර්මාන්තය මුළුමනින්ම කඩා වැටිලා. සුළු හා මධ්‍ය පරිමාණ ව්‍යවසායකයන් කඩා වැටී බොහෝ පිරිසකට රැකියා අහිමි වෙලා. තරුණ පරපුරට රට තුළ රැකියාවක් සොයාගත නොහැකි තරමට දරුණු අර්බුදයක් තිබෙන්නේ. රෝහල්වල බෙහෙත් නැහැ. දරුවන්ට හරිහමන් ආහාර වේලක් දෙන්න නොහැකි වීමෙන් පාසල්වලදී ක්ලාන්තවී ඇද වැටෙනවා. ගැබිණි මව්වරුන්ට පෝෂ්‍යදායී ආහාර වේලක් නොමැතිවී තිබෙනවා. මේ කිසිවක් ස්වභාවික ව්‍යසනයන් නොවේ.

මුළු මහත් සමාජයම ඛේදවාචකයකට ලක්කර තිබෙනවා. වැරදි ආර්ථික ප්‍රතිපත්ති හා විනාශකාරී දේශපාලන සංස්කෘතිය විසින් මේ රට පත්කර තිබෙන විනාශයේ ප්‍රතිවිපාක විශේෂයෙන්ම අපේ දුවා දරුවන් සහ තරුණ පරම්පරාව භුක්ති විඳිනවා.

ඊට එරෙහිව උද්ඝෝෂණය කරන්න අයිතියක් නැද්ද?

ජනතාව නිවටව, නියාලුව ඕනෑම ජනතා විරෝධී ක්‍රියාමාර්ගයක් හමුවේ නිහඬව සිටියි කියලා රනිල් වික්‍රමසිංහ කල්පනා කරනවාද? ඒ රනිල් වික්‍රමසිංහලාගේ පැරණි පරම්පරාවයි.

 ජනවරමක්වත් නැති නායකයෙක් හැටියට ඔහු අද ඉන්නේ, අගමැතිවරයා හැටියට ඡන්දය ඉල්ලීමෙන් පසු කොළඹ ජනතාව ඔහුව ගෙදර යැවූ පසුබිමකයි. මේ රට ප්‍රපාතෙට හෙළු ප්‍රධාන චූදිතයෙක් හැටියට සිටින ඔහු පාර්ලිමේන්තුවෙන් අටවා ගත් ජනාධිපති ධුරය ඔළුවට ගහලා ජනතාව මත මර්දනය එල්ල කරනවා.

රනිල් වික්‍රමසිංහ පොලිස් බැරැක්ක, හමුදා බැරැක්ක දාගෙන රට පාලනය කරන්න අධිආරක්ෂිත කලාප නම්කරනවා. ජනාධිපති ලේකම් කාර්යාලය, අගමැති නිල නිවස, අගමැති කාර්යාලය, ඇතුළු තැන් අධිඅරක්ෂිත කලාප හැටියට නම් කර තිබෙනවා. මේ රටේ අධිආරක්ෂිත කලාප තිබුණේ යුද්ධය පැවති කාලයේ.

ජනතාව සාමකාමී උද්ඝෝෂණ කරන විට රනිල් වික්‍රමසිංහට තමන්ටම වූ කුඩා අධිආරක්ෂිත කලාපයක් ඇතුලේ ජීවත්වෙන්න සිදුවී තිබෙනවා. ඔය අධි ආරක්ෂිත කලාප තව තවත් කුඩා කරගනිමින් ඒ තුළට රිංගන්න සිද්ධ වෙන බව මතක් කරන්න ඕනෑ. ජනතාවගේ කලාප ඊට වඩා ලොකුයි. ජනතාවගේ අරගල නතර කරන්න රනිල් වික්‍රමසිංහලාට කිසිසේත් නොහැකි බව අවධාරණය කරනවා.

ජනතාව උද්ඝෝෂණය කරන්නේ පොදු සමාජය මුහුණ දී සිටින මහා අනතුරුදායක තත්වයෙන් මිදීම සඳහායි. ඒ අය මර්දනය කිරීමට දරන ප්‍රයත්නය වහාම නතර කළ යුතුයි. රනිල් වික්‍රමසිංහට සහ ඔහුගේ ගෝල බාලයන්ට අපි අවසාන වශයෙන් කියන්නේ මර්දන ක්‍රියාමාර්ග උත්සන්න කිරීම වහාම නතර කළ යුතුයි කියලා.

මර්දනය කිරීමෙන් රට පාලනය කිරීම දශක ගණනකට පෙර තත්වයක්. වර්තමානයට එය කිසිසේත්ම වලංගු නැති බව මතක තබා ගත යුතුයි. රනිල් බලයට පැමිණි තැන සිට කටයුතු කරමින් සිටින්නේ පාර්ලිමේන්තුවේදී ඡන්දය දුන් කණ්ඩායම ආරක්ෂා කරන්නයි.

ඒ අය සතුටු කිරීම වෙනුවෙන් ගෝල්ෆේස් පිටිටනියේ සාමකාමී උද්ඝෝෂණයට පහර දී එලවා දැම්මා. ඊට පස්සේ උද්ඝෝෂණ ගණනාවකට පහර දුන්නා. අපේ තරුණ සංගමයේ උද්ඝෝෂණයට පහර දුන්නා. එක පැත්තකින් සමාජය බියවද්දා රට පාලනය කරන්නත්, අනික් පැත්තෙන් රාජපක්ෂලාගේ සුරතලෙක්, රාජපක්ෂලාගේ උකුලේ නැලවෙන බලු පැටියෙක් වගේ රනිල් වික්‍රමසිංහ හැසිරෙමින් සිටිනවා.

මේ සමාජයේ ලක්ෂ ගණන් ජනතාව පාරට බැහැලා කීවේ මහජන දේපළ සොරකම් කළ වංචනිකයන්ට, අපරාධකරුවන්ට දඬුවම් දෙන්න කියලයි. එක්සත් ජාතීන්ගේ සංවිධානයේ යෝජනා කර තිබෙන්නේ අපේ රටේ ආර්ථික අපරාධකරුවන්ට දඬුවම් දෙන්න කියලා. අජිත් නිවාඩ් කබ්රාල්ලා, බැසිල් රාජපක්ෂලා, යහතින් වැජඹෙද්දී සාමාන්‍ය ජනතාවට එළව එළවා පහර දෙන පාලනයක් රනිල් වික්‍රමසිංහ ගෙන යනවා.

 කුඩා කුඩා ප්‍රහාරයන්ගෙන්, කුඩා කුඩා බියගැන්වීම්වලින් නතර කළ නොහැකි පුළුල්තම මහජන ව්‍යාපරයක් ගොඩනැඟෙමින් තිබෙනවා. මේ කුඩා ව්‍යාපාරවලට පහරදීම නතර කළ හැකි වුවත් ලක්ෂ ගණන් මහජනතාව කොළඹ නගරය වැටලීම වැඩි ඈතක නොවන බව රනිල් වික්‍රමසිංහ තේරුම් ගත යුතුයි.

දේශපාලන ව්‍යාපාරයක් හැටියට අපි මේ මර්දනයටත් ජනතාවගේ පීඩනයටත් එරෙහිව මේ රටේ සියලු ජනතාව සංවිධානය කරනවා. ජනවරමක් නැති, ප්‍රජාතනත්ත්‍ර විරෝධී පාලනය පළවා හැරීමට ජනතාව ඉදිරියට ආ යුතුයි. මේ ව්‍යසනයෙන් ගොඩඒම සඳහා නව පාලනයක් ගොඩනඟා ගත යුතුයි. ඒ වෙනුවෙන් ජනතාව පෙළගැස්වීමත්, ජනතාව එකතු කිරීමත් ජනතාව සංවිධානය කිරීමත් අපේ නායකත්වයෙන් සිදුකරනවා.

සෑම විරෝධතාකරුවන්ගෙන්ම, සෑම උද්ඝෝෂකයන්ගෙන්ම සහ මේ පිළිබඳව කම්පාවෙන් සහ කෝපයෙන් කතා කරන අයගෙන් අපි ඉල්ලා සිටින්නේ අපේ රටේ ජනතාව පොදු වේදිකාවකට පැමිණිය යුතු බවයි. සෑම දෙනාගෙන්ම අපි ඉල්ලා සිටින්නේ මේ විනාශකාරී පාලනයටත්, මර්දනකාරී පාලනයටත් මේ විනාශකාරී ආර්ථික ප්‍රතිපත්තියටත් එරෙහිව මේ රටේ පුළුල්ම ව්‍යාපාරයට එකතු වෙන ලෙසයි.

රනිල් වික්‍රමසිංහට තවදුරටත් බැරැක්ක ඇතුලේ හැංගෙන්න වෙයි. අපි මහජනතාවත් එක්ක මේ ව්‍යාපාරය ගෙනයනවා. රනිල් වික්‍රමසිංහට කිසි ජනවරමක් නැහැ. ලක්ෂ 69න් ආව ගෝඨාභයට රටින් පැනලා යන්නත් එක්වරම හැකි වුණේ නැහැ. ජනතාවගේ ඡන්දයෙන් ආව මහින්ද රාජපක්ෂට අරලියගහ මන්දිරයෙන් පැනලා ගිහිල්ලා නාවුක හමුදා බැරැක්කයක සැලකිය යුතු කාලයක් ඉන්න සිදුවුණා.

මේ සියලු බලයන්ට උඩින් ජනතා බලය තිබෙන බව මේ කරුණුවලින් පෙන්නුම් කර තිබෙනවා. ජනවරමක් නැති, මතයක් නැති පුස් මිනිහෙකුට, හිස් මිනිහෙකුට ජනතාවගේ අරගලය නතර කරන්න බැහැ. ජනතාවගේ නැගී සිටීම් නතර කරන්න බැහැ.

මේ විනාශකාරී, මර්දනකාරී පිළිවෙත නතර කරන ලෙස රනිල් වික්‍රමසිංහට නැවත නැවතත් අපි අවධාරණය කරනවා. එය නතර කිරීම වෙනුවෙන් නීත්‍යානුකූලවත්, ජනතාව පෙළගැස්වීම හරහාත්, ව්‍යවස්ථානුකූලවත් ගත හැකි සියලු ක්‍රියාමාර්ග ගන්නා බව අවධාරණය කරනවා.

බත්තරමුල්ල, දියත උයන සහ අග්ගොන, හීනටිකුඹුර සිට වැල්ලවත්ත දක්වා සූර්ය ශක්තියෙන් ක්‍රියාත්මක වන බෝට්ටු සේවාවක් ආරම්භ කර තිබේ.

කොළඹ නගරයේ දෛනිකව ඇති වන මාර්ග තදබදයට විසඳුමක් ලෙස මෙම සේවාව සැප්. 23 වන දා සිට ක්‍රියාත්මක කළ බවනාගරික සංවර්ධන හා නිවාස අමාත්‍යංශය සඳහන් කළේය.

විෂය භාර අමාත්‍ය ප්‍රසන්න රණතුංගගේ උපදෙස් මත ඉඩම් ගොඩ කිරීමේ හා සංවර්ධන කිරීමේ සංස්ථාව සහ ජෙන්සෝ පවර් ටෙක්නොලජි ප්‍රයිවට් ලිමිටඩ් ආයතනය ඒකාබද්ධව මෙම මගී බෝට්ටු සේවාව ආරම්භ කර ඇත.

මෙම මගී බෝට්ටු සේවාව සූර්ය පැනල මගින් ක්‍රියාත්මක වන මෙරට පළමු බෝට්ටු සේවාව බව මේ සම්බන්ධයෙන් අදහස් දක්වමින් නාගරික සංවර්ධන හා නිවාස අමාත්‍ය ප්‍රසන්න රණතුංග සඳහන් කරයි.

ඉදිරියේදී කොළඹ නගරයේ අභ්‍යන්තර ජල මාර්ගවල මෙවැනි බෝට්ටු සේවා ආරම්භ කිරීමට බලාපොරොත්තු වන බව ත් මෙය දෙස් විදෙස් සංචාරක ආකර්ශනයයට හේතුවක් වන බව ත් ඔහු ප්‍රකාශ කර ඇත.

සූර්ය පැනල මගින් විදුලිය උත්පාදනය කිරීමෙන් වර්තමානයේ රට මුහුණ දෙන ඉන්ධන ගැටලුවලට මෙන් ම විදුලි අර්බුදයටත් විසදුමක් ලැබෙන බව ද අමාත්‍යවරයා වැඩිදුරට ත් සඳහන් කර තිබේ.

බත්තරමුල්ල දියත උයන සහ හීනටිකුඹුර සිට වැල්ලවත්තට⁣ මෙම බෝට්ටු මගින් විනාඩි 30ක් ඇතුළත ළඟා වීමට හැකියාව ඇත.

එමෙන් ම, බත්තරමුල්ල සිට වැල්ලවත්ත දක්වා එක් පුද්ගලයකුගෙන් රුපියල් 200ක මුදලක් අය කෙරෙන අතර අග්ගොන, හීනටිකුඹුර සිට වැල්ලවත්ත දක්වා එක් පුද්ගලයකුගෙන් රුපියල් 300ක මුදලක් අය කෙරේ.

දිනපතා කාර්යාල වේලාවන්හිදී මෙම බෝට්ටු සේවය ක්‍රියාත්මක වන අතර එක බෝට්ටුවක පුද්ගලයන් 08 දෙනෙකුට ප්‍රවාහන පහසුකම් සැපයේ.

තව ද බත්තරමුල්ල හා ඒ අවට රජයේ හා පුද්ගලික කාර්යාල, ගේට්වේ ජාත්‍යන්තර පාසල, නාවල විවෘත විශ්වවිද්‍යාලය, 176, බස් මාර්ගය, 138 සහ 122 බස් මාර්ග, වැල්ලවත්ත දුම්රිය ස්ථානයට මෙම බෝට්ටු සේවය මගින් පහසුවෙන් ළඟා වීමට හැකියාව ඇත.

කංසා අපනයනය තුළින් ඩොලර් උත්පාදනය මේ දිනවල ජනප්‍රිය මාතෘකාවක් බවට පත්ව තිබේ.

මැති ඇමතිවරුන් කිහිපදෙනෙකුම රටට ඩොලර් උත්පාදනය කිරීම සඳහා යෝජනා කරන්නේ කංසා අපනයනයයි.

රාජ්‍ය අමාත්‍ය සිසිර ජයකොඩි සහ රාජ්‍ය අමාත්‍ය ඩයනා ගමගේ දිගින් දිගටම මේ පිළිබඳ තම ස්ථාවරය ප්‍රකාශ කොට තිබේ. එහිදී ඔවුන් අවධාරණය කළේ, ජාත්‍යන්තර වශයෙන් ඖෂධීය ගංජා සඳහා විශාල ඉල්ලුමක් පවතින බවයි.

ඒ අනුව එළඹෙන ඔක්තෝබර් 05 වැනිදා වන විට ඖෂධීය කංසා අපනයනයට අවශ්‍ය නීති ප්‍රතිපාදන සකස් කර දෙන්නැයි අමාත්‍ය සිසිර ජයකොඩි අදාළ සියලු නිලධාරීන්ගෙන් ඉල්ලීමක් කර තිබේ.

අමාත්‍ය සිසිර ජයකොඩි සඳහන් කළේ දේශීය වෛද්‍ය කේෂ්ත්‍රයෙන් ඩොලර් බිලියන 3ක ආදායමක් ඉපයීමට සැලසුමක් ඇති බවයි. ඔහු කියා සිටියේ ආයුර්වේද පනත, පාරිසරික පනත, රේගු ආඥා පනත ආදී පනත් මඟින් ඒ සඳහා දැනට පවතින බාධා වහා ඉවත් කළ ගත යුතුව ඇති බවයි.

ඔහු මේ බව කියා සිටියේ සංචාරක, සෞඛ්‍ය , නීති, රේගු, පරිසර සහ ආයුර්වේද නිෂ්පාදන වගා කිරීම හා අපනයනයට සම්බන්ධ සියලූ රාජ්‍ය නිලධාරින් සමඟ සෞඛ්‍ය අමාත්‍යාංශයේ පැවැති පැවති සාකච්ඡාවකදීය.

අවම ලෙස වසරක කාලයක් මෙම නීති ලිහිල් කර හෝ විදේශ විනිමය ලබා ගැනීමට ඉඩ ලබා දෙන ලෙස අමාත්‍යවරයා මෙහිදී ඉල්ලා සිටියේය.පරිසරයට හානියක් නොවන ලෙස මේ කටයුතු සිදු වන බවට නියාමනය කටයුතු සිදු කරන බව ඔවුහු දක්වති.

ආයුර්වේද කේෂ්ත්‍රයට යොදා ගැනීම හා අපනයනය අරමුණු කර ගනිමින් පමණක් කංසා වගාව හා නිෂ්පාදනයට අවශ්‍ය නෛතික කරුණු සම්පාදනය කඩිනමින් සිදු වන බව රාජ්‍ය අමාත්‍යවරයා වැඩිදුරටත් පැවසීය.

මේ පිළිබඳව නීතිපති දෙපාර්තමේන්තුව, නීති කෙටුම්පත් දෙපාර්තමේන්තුව සමඟ සාකච්ඡා පැවැත්වූ බවද ඔහු සඳහන් කළේය.ඒ අනුව අවශ්‍ය වන පරිදි ආයුර්වේද පනත හා නීති සංග්‍රහය සංශෝධනය කෙරෙනු ඇත.

එළඹෙන ඔක්තෝම්බර් 5 වනදා වන විට හෝ කංසා අපනයනයට අවශ්‍ය වන නීති ප්‍රතිපාදන සකස් කර දෙන්නැයි අදාළ සියලු නිලධාරීන්ගෙන් රාජ්‍ය අමාත්‍යවරයා මෙහි දී ඉල්ලා සිටි බව සෞඛ්‍ය අමාත්‍යංශය සඳහන් කළේය.

අවම වශයෙන් මේ සතිය අවසන් වන විට මීට අදාළ නීති සංග්‍රහය සකස් කර දෙනු ඇතැයි තමන් බලාපොරොත්තු වන බවද අමාත්‍යවරයා පැවසීය.

මෙම විධිවිධාන සකස් කිරීමෙන් 'රටට ඩොලර් ගෙන එන මෙහෙයුම' තමන්ට ක්‍රියාත්මක කළ හැකි බවද ඔහු පැවසීය.

මේ අතර විනෝදාස්වාදයට හෝ දුම් පානයට කංසා යොදාගැනීම ආයුර්වේදය අනුමත නොකරන බවද දේශීය වෛද්‍ය අමාත්‍යාංශය සිසිර ජයකොඩි අවධාරණය කළේය.

බීබීසී සිංහල

මධ්‍යම සංස්කෘතික අරමුදල නීතියට පිටින් ගොස් පුරාවිද්‍යා දෙපාර්තමේන්තුවට සේවකයන් 3000 කට ආසන්න පිරිසක් 2018 සහ 2019 වර්ෂවලදී බඳවා ගෙන ඔවුන්ගේ වැටුප් වෙනුවෙන් රුපියල් කෝටි 106ක් පමණ නිකරුණේ වැය කර ඇතැයි ජාතික විගණන කාර්යාලය පවසයි.

එම ආයතනය මෙලෙස කටයුතු කර ඇත්තේ රජයේ ආයතනයකට වෙනත් ආයතනයක් වෙනුවෙන් සේවකයන් බඳවා ගැනීමට ප්‍රතිපාදන සලසා නොතිබියදී බව ජාතික විගණන කාර්යාලය නිකුත් කළ වාර්තාවක සඳහන් වේ.

පුරාවිද්‍යා දෙපාර්තමේන්තුව සඳහා පුරාවිද්‍යා සහායකයන්( කම්කරුවන්) 2271 දෙනෙකු සහ මුරකරුවන් 1130 දෙනෙකු බඳවා ගැනීමට මධ්‍යම සංස්කෘතික අරමුදලේ පාලක මණ්ඩලය 2017 වර්ෂයේ ඔක්තෝබර් 17 වැනි දින අනුමැතිය ලබාදී තිබු බව එම වාර්තාව සඳහන් කරයි.

ඒ අනුව 2018 දෙසැම්බර් 31 දින වන විට බඳවාගත් මුළු සේවක සංඛ්‍යාව 1089කි.( පුරාවිද්‍යා සහායකයන්713ක් සහ මුරකරුවන් 376ක්)

ඉන් පසු 2019 සැප්තැම්බර් 30 වනවිට සේවකයන් 1487 දෙනකු ( පුරාවිද්‍යා සහයකයන් 934ක් සහ මුරකරුවන් 553ක්) බඳවා ගෙන තිබුණු බව විගණන අංශ පෙන්වා දෙයි.

ඉන් 1415 දෙනකු 2021 පෙබරවාරි මාසය වන විටද පුරාවිද්‍යා දෙපාර්තමේන්තුවේ සේවයේ යොදවා තිබුණු බව සඳහන් වේ.

මේ අතර මධ්‍යම සංස්කෘතික අරමුදලේ පාලන අංශය ඉදිරිපත් කළ තොරතුරු අනුව එහි තත්‍ය සේවක සංඛ්‍යාව 2780 ක් වුවත් ආයතනයේ ප්‍රධාන පරිපාලන නිලධාරී විසින් 2019 වර්ෂයේදී ඉදිරිපත් කරන ලද තොරතුරු අනුව තත්ව සේවක සංඛ්‍යාව 3,500 ක්වූ බව පවසන විගණන කාර්යාලය එම වෙනසට හේතුව පැහැදිලිව ඉදිරිපත් නොකෙරුණු බවද සඳහන් කළේය.

- lankadeepa

ආර්ථික අර්බුදයෙන් දැඩි ලෙස පීඩාවට පත්ව සිටින ශ්‍රී ලංකාව‌ට එක්සත් රාජධානියෙන් පවුම් මිලියන 03 ක ආධාර ලබා දෙන බව එක්සත් රාජධානියේ රාජ්‍ය අමාත්‍ය තාරික් අහමඩ් සාමිවරයා සදහන් කරයි.

එක්සත් ජාතීන්ගේ 77 වෙනි මහා මණ්ඩල සැසියට සමගාමීව ශ්‍රී ලංකා විදේශ අමාත්‍ය අලි සබ්රි සමග පැවැති සාකච්ඡාවකදී එක්සත් රාජධානියේ දකුණු ආසියාව සහ පොදුරාජ්‍ය මණ්ඩලය පිළිබඳ අමාත්‍ය තාරික් අහමඩ් සාමිවරයා ශ්‍රී ලංකාවට ලබා දෙන ස්ටර්ලින් පවුම් මිලියන 3 (ශ්‍රී ලංකා රුපියල් 1,171,841,067)ක ජීවිතාරක්ෂක ආධාරක පැකේජය පිළිබඳ ප්‍රකාශ කර ඇති බව බ්‍රිතාන්‍ය රජය ප්‍රකාශ කළේය.

ශ්‍රී ලංකා ජනගහණයන් තුනෙන් එකක් උග්‍ර ආහාර අනාරක්ෂිතභාවයෙන් පෙළෙන බවත් ඉන්ධන, ඖෂධ සහ බලශක්ති හිඟයකින් පීඩා විඳින බවත් බ්‍රිතාන්‍ය රජය ප්‍රකාශ කළේය.

මෙම සහාය රතු කුරුස සංවිධානය සහ එක්සත් ජාතීන්ගේ හවුල්කරුවන් හරහා ශ්‍රී ලංකාවට ලබා දෙන බව අහමඩ් සාමිවරයා පැවසුවේය.

ස්ත්‍රී පුරුෂ සමාජභාවය මත පදනම් වූ ප්‍රචණ්ඩත්වය සහ ලිංගික ප්‍රචණ්ඩත්වයට මුහුණදුන් වින්දිතයන් ඇතුළුව ශ්‍රී ලාංකිකයන්ගේ මානසික සෞඛ්‍ය නංවා ලීමටත් බෝග වගා කිරීමට උපකාර වන ආහාර, බීජ සහ මෙවලම් ලබා ගැනීමටත් මෙම සහාය ප්‍රයෝජනවත් වනු ඇතැයි සඳහන් වේ.

සෞදි අරාබියේ 92 වන ජාතික දිනය සැමරීමේ උත්සවය කොළඹ ෂැංග්‍රිලා හෝටලේය්දී ඊයේ (23) පස්වරුවේ උත්සවාකාරයෙන් සංවිධානය කර තිබිණ.

අග්‍රාමාත්‍ය දිනේෂ ගුණවර්ධන, කතානායක මහින්ද යාපා, ජනාධිපති ජ්‍යෙෂ්ඨ උපදේශක සාගල රත්නායක ඇතුළු සම්භාවනීය ආරාධිතයින් රැසක් එම අවස්ථාවට එක්ව සිටියහ.

මෙම ජාතික දින උත්සවයේ විශේෂ අවධානයට ලක්ව ඇත්තේ, බොදු බල සේනා මහ ලේකම් ගලගොඩඅත්තේ ඥානසාර හිමි විශේෂ ආරාධිතයෙක් ලෙස මෙම අවස්ථාවට එක්ව තිබීමයි.

මුස්ලිම් අන්තවාදය පිලිබද දැඩි ලෙස ක්‍රියාකල හා අවස්ථා කිහිපයකදීම සෞදි සංවිධාන දැඩිව විවේච්නය කල උන්වහන්සේ ගේ පැමිණීම බොහො දෙනාගේ විමතියට හේතුවි ඇතිබව සමාජ මාධ්‍ය නිරීක්ෂණයේදී පැහැදිලිවේ.

වසර කිහිපයක් බොදු බල සේනා සංවිධානයේ කටයුතුවලින් දුරස්ව සිටි එහි ප්‍රධාන විධායක නිළධාරී කථිකාචාර්ය දිලන්ත විතානගේ ද විශේෂ ආරාධිතයකු ලෙස ඥානසාර හිමි සමග මෙම ජාතික දින උලෙලට සහභාගී වී තිබුණි.

සෞදියේ ඔටුන්න හිමි සල්මාන් කුමරු ඉස්ලාම් අන්තවාදයට එරෙහිව ක්‍රියාකරමින් මැදි පිලිවෙතකට අවතීරණය වීමත් සමග සෞදි තානාපති අංශ වෙනස් ආකල්පවලින් යුතුව කටයුතු කරමින් සිටින බව බොදුබල සේනා සංවිධානයේ නිගමනය වී ඇත.

ඒ අනුව, සෞදි තානාපති නිළධාරීන් හා ඥානසාර හිමි ප්‍රමුඛ බොදු බල සේනා සංවිධාන නියෝජිතයින් අතර පසුගිය කාලයේ සාකච්ඡා වට කිහිපයක් පවත්වා තිබිණ.

ජාත්‍යන්තර වශයෙන් බෞද්ධ හා මුස්ලිම් ගැටලු පිළිබදව අධ්‍යයනය කොට ලෝක සාමය ඇතිකරමින් බෞද්ධ - මුස්ලිම් මිත්‍රත්වය ඇති කිරීමට නායකත්වය ගන්නා ලෙස සෞදි රාජ්‍යතාන්ත්‍රික අංශ ගනසාර හිමිගෙන් ඉල්ලා ඇතැයි ද වාර්තා වේ.

ජ්‍යෙෂ්ඨ ගුරු වෘත්තීය සමිති ක්‍රියාකාරිනී රේණුකා මලියගොඩ, දෙමටගොඩ පිහිටි කොළඹ අපරාධ විමර්ශන කොට්ඨාශයට (CCD) කැඳවා ඇත.

අද (24) දින කොළඹට කැඳවන ලද රේණුකා මලියගොඩගෙන් මේ මොහොත වනවිට කොළඹ අපරාධ විමර්ශන කොට්ඨාශ කාර්යාලයට අනුයුක්ත නිලධාරීහු ප්‍රශ්න කරනු ලබමින් සිටිති.

මේ වන විට වසර 32ක් ගතවන රජයේ හමුදා විසින් සිදු කරන ලද බවට චෝදනා නැගී ඇති තවත් සමුල ඝාතනයකින් මියගිය පිරිස් අනුස්මරණය චාම් අයුරින් නැගෙනහිරදී සිදු කර තිබේ.

ඝාතනයට ලක්වුවන් අනුස්මරණය කිරීම සදහා මඩකලපුව සවුකඩි ගම්මානයේ ඉදිකර තිබෙන ස්මාරකයට ගම්වාසීන් සහ ඥාතීන් සැප්තැම්බර් 20 වැනිදා මලින්, පහනින් උපහාර දැක්වු බව පළාත් බද වාර්තාකරුවෝ පවසති.

1990 සැප්තැම්බර් 20 වැනිදා උදෑසන සවුකඩි ගම්මානයේ දී ඝාතනය කෙරුනු දෙමළ කාන්තාවන් සහ කුඩා දරුවන් ඇතුළු තිස් එක් දෙනකු මෙලෙස අනුස්මරණය කර තිබේ.

මඩකලපුව රදගුරු මයිලම්බාවේලී විවේකානන්දපුරම්හි නිකලස් ජුඩ් පියතුමා විසින් මිය ගිය පිරිස අනුස්මරණය කරමින් ප්‍රධාන දේව මෙහෙය පවත්වා ඇත.

ගම්වැසියන් පවසන්නේ 1990 සැප්තැම්බර් 20 වැනිදා උදෑසන 8.30 ට පමණ ගම් වැදුනු හමුදා නිල ඇදුම් ඇඳගත් පිරිසක් ප්‍රහාර එල්ල කරමින් ගම් වැසියන් ඝාතනය කළ බවයි.

වෙඩි තබා සහ කපා කොටා ඝාතනය කළ ළදරුවන් හා කාන්තාවන් ඇතුළු පිරිස වලකට දමා පුළුස්සා තිබු බව දිවි ගලවා ගත් ගම්වැසියෝ පවසති. ඔවුන් තව දුරටත් කියා ඇත්තේ මුහුදේ මසුන් මරමින් සිටි හත් දෙනකුද වෙඩි තබා ඝාතනය කළ බවයි.

ප්‍රහාරයට වගකිවයුත්තන් හදුනාගෙන දඩුවම් පැමිණවීම මේ දක්වා සිදු කර නොමැති අතර වින්දිතයන්ට යුක්තිය ඉටුවී කර නොමැති බවත් ඔවුහු පෙන්වා දෙති.