පුවත්

ආහාර හිඟයක් ඇතිවීමේ තර්ජනය හමුවේ කෘෂිකර්ම දෙපාර්තමේන්තු නිලධාරීන් එක්ව ආහාර සුරක්ෂිතතා වැඩසටහනක් සම්පාදනය කරමින් සිටින බව අග්‍රාමාත්‍ය රනිල් වික්‍රමසිංහ පවසයි .

ඒ රටේ වත්මන් ආහාර තත්ත්වය පිළිබඳව අග්‍රාමාත්‍ය රනිල් වික්‍රමසිංහ එක්සත් ජාතීන්ගේ ආහාර හා කෘෂිකර්ම සංවිධානයේ(FAO) මෙරට නියෝජිත විම්ලේන්ද්‍ර ශරන් සහ එක්සත් ජාතීන්ගේ සංවර්ධන වැඩසටහනේ(UNDP) නියෝජ්‍ය නියෝජිත මාලින් හර්විග් සමඟ අද (03) පැවැති සාකච්ඡාවකදීය.

එම වැඩසටහන ලබන මාසයේ එළිදැක්වීමට නියමිත අතර UNDP සහාය සඳහා එහිදී ආරධනා කර සිටි බවත් වාර්තා වෙයි .

මේ සම්බන්ධයෙන් අග්‍රාමාත්‍ය මාධ්‍ය ඒකකය නිවේදනයක් නිකුත්කර ඇති අතර එහි මෙසේද සඳහන් වෙයි.

කෘෂිකාර්මික ක්ෂේත්‍රය දැනට මුහුණ දී සිටින ප්‍රධානතම ප්‍රශ්නය පොහොර සහ ඉන්ධන හිඟය බව අග්‍රාමාත්‍ය රනිල් වික්‍රමසිංහ මෙහිදී ප්‍රකාශ කර ඇත .

ඉදිරියේදී විය හැකි ආහාර හිඟයක් මඟහරවා ගැනීම සඳහා තමන් විසින් ආරම්භ කරන ලද නාගරික කෘෂිකර්ම වැඩසටහන පිළිබඳව ද අග්‍රාමාත්‍යවරයා විස්තර කර තිබේ.

මේ අතර පොහොර හිඟය මගහරවා ගැනීමට ගොවි ප්‍රජාවට උපකාර වන නව්‍ය ගොවි ආධාර වැඩසටහනක් සම්පාදනය කරමින් සිටින බව UNDP පැහැදිලි කර ඇත .

නාගරික කෘෂිකාර්මික වැඩසටහන ආධාර කිරීමට පරිත්‍යාගශීලීන් ඉදිරිපත් වී ඇති බවත්, සාර්ථක ලෙස ක්‍රියාත්මක කිරීමකදී වැඩි මූල්‍ය ආධාර ලබා දෙනු ඇතැයි බලාපොරොත්තු වන බවත් එක්සත් ජාතීන්ගේ ආහාර හා කෘෂිකර්ම සංවිධානයේ(FAO) මෙරට නියෝජිත විම්ලේන්ද්‍ර ශරන් පැහැදිලි කර ඇත .

ශ්‍රී ලංකාව තුළ ක්‍රියාත්මක කළ හැකි ආහාර අර්බුදයට ප්‍රතිචාර දැක්වීම සැලැස්මක් කෙටුම්පත් කරමින් සිටින බව විම්ලේන්ද්‍ර ශරන් ප්‍රකාශ කළේය.

ගොවීන් මුහුණ දී සිටින පොහොර ඉන්ධන ඇතුළු මුලික අවස්ථාවවල හිඟය පියවීමට කඩිනම් ක්‍රියාමාර්ගයක් ගතහොත් දැනට පවතින අහාර හිඟය මාස 5-6ක් ඇතුළත පාලනය කල හැකි බව අග්‍රාමාත්‍යවරයා එහිදී පැහැදිලි කර ඇත .

මල්වාන ප‍්‍රදේශයේ නිවස සම්බන්ධයෙන් හිටපු අමාත්‍ය බැසිල් රාජපක්ෂට එල්ල වී තිබූ චෝදනාවලින් ඔහුව නිදොස් කොට නිදහස් කර තිබේ.

ගම්පහ පූර්වගාමි මහාධිකරණ විනිසුරු නිමල් රණවීර අද (03) මේ නියෝග කළේය.

දොම්පේ මල්වාන මාපිටිගම ප්‍රදේශයේ අක්කර 16ක ඉඩමක් මිලට ගෙන එහි සුවිශාල නිවෙසක් සහ නාන තටාකයක් ඉදිකර ගොවිපොළක් පවත්වාගෙන යමින් රජයේ මුදල් අවභාවිතා කිරීමේ චෝදනා සම්බන්ධයෙන් නීතිපති විසින් අධිචෝදනා තුනක් යටතේ නඩු පැවරීම සිදුකර තිබිණ .

කෙසේ වුවත් හිටපු අමාත්‍ය බැසිල් රාජපක්ෂ සහ තිරුකුමාර් නිඩේෂන් එරෙහිව පවරා ඇති එම නඩුවෙන් එම විත්තිකරුවන් දෙදෙනා නිදොස් කර නිදහස් කිරීමට ඒ අනුව තීන්දුව නිකුත්කර ඇත .

දින 15 කට වරක් බොරතෙල් නෞකාවක් ගෙනෙමින් සපුගස්කන්ද පිරිපහදුවේ කටයුතු අඛණ්ඩව සිදුකිරීමට වැඩපිළිවෙළක් සකස්කර ඇති බව විදුලි බල සහ බලශක්ති අමාත්‍යංශය පවසයි .

සපුගස්කන්ද පිරිපහදුව මේ වනවිට පිරිපහදු කටයුතු සක්‍රීය කර ඇති අතර එහි ඉන්ධන නිෂ්පාදනය කඩිනමින් ආරම්භ කිරීමට පියවර ගන්නා බව ද අමාත්‍යාංශය සඳහන් කර සිටියි.

මේ අතර ඉන්ධන බෙදා හැරිම අඛණ්ඩව සිදුවන බව ලංකා ඛනිජ තෙල් නීතිගත සංස්ථාව සඳහන් කර සිටියි.

කෙසේ වුවත් මේ වන විටත් දිවයින පුරා ඉන්ධන හල් ආශ්‍රිතව පෝලිම් දැකගන්නට ඇත. මේ සම්බන්ධයෙන් අදහස් දක්වමින් අමාත්‍යංශය සඳහන් කරන්නේ විවිධ පාර්ශ්ව විසින් අනවශ්‍ය ආකාරයට ඉන්ධන තොග රැස් කිරීමට පෙළඹ ඇති නිසා මේ ආකාරයට පෝලිම් ඇතිව තිබෙන බවය.

ඇතැම් ඉන්ධන තොග රැස්කරන පිරිස් වැඩි මිලට ඒවා විකිණීමේ මාෆියාවක් දියත්කර ඇති බවත් අමාත්‍යංශ ආරංචි මාර්ග පවසයි .

එවැනි පාර්ශ්ව සම්බන්ධයෙන් නීතිය ක්‍රියාත්මක කිරීමට මේ වන විට සැලසුම් දියත්කර ඇති බවත් ඒ වෙනුවෙන් වන වැටලීම් ඉදිරියට වැඩි කිරීමට නියමිත බවත් වැඩිදුරටත් වාර්තා වෙයි .

20 වන ව්‍යවස්ථා සංශෝධනයට පක්ෂව ඡන්දය දීමට සිදුවීම තමන් කළ එක ම කරුමය බව ශ්‍රී ලංකා නිදහස් පක්ෂයේ මහ ලේකම් දයාසිරි ජයසේකර පවසයි.

ඔහු මේ බව සඳහන් කර සිටියේ පසුගියදා පැවති සම්මන්ත්‍රණයකදී අදහස් දක්වමිනි.

එහිදී ඔහු ප්‍රකාශ කළේ, 21 වන සංශෝධනයට විරුද්ධව යම් පිරිසක් ක්‍රියාත්මක වන බව ය.

එය පරාජය කිරීම සඳහා ක්‍රියා කරන ලෙස මහ ජනතාවගෙන් ඉල්ලා සිටින බව ද ශ්‍රීලනිප මහ ලේකම්වරයා සඳහන් කළේ ය.

එහිදී ඔහු වැඩිදුරටත් මෙසේද පැවසීය .

“මම 18ට විරුද්ධව වැඩ කරපු කෙනෙක්. මම කරපු එක ම කරුමේ තමා 20ට ඡන්දය දෙන්න ලැබීම. 21 නොකරන්න විශාල ජනමතයකුත් පාර්ලිමේන්තුව ඇතුළේ පක්ෂය ඇතුළේ, සමහර අයගේ පුද්ගලික න්‍යාය පත්‍ර මත මේ වැඩපිළිවෙළක් යනවා අපි ඒකට විරුද්ධ විය යුතු යි. මම මේ රටේ ජනතාවගෙනුත් ඉල්ලන්න කැමති යි ඡන්දය විමසන දවසට කරුණාකරලා හැමෝම තමන්ගේ ආසනයේ ඡන්දය දුන්න මන්ත්‍රීවරයාගේ ගේ ගාවට පොඩ්ඩක් එකතු වෙන්න. එකතු වෙලා කියන්න තියෙන ටික කියන්න මේකට ඡන්දේ දෙන්න කියලා.”

අධිකරණ අමාත්‍ය ජනාධිපති නීතීඥ විජයදාස රාජපක්ෂ සහ ශ්‍රී ලංකාවේ නවසීලන්ත මහ කොමසාරිස්වරයා වන මයිකල් ඇපල්ටන් (Michael Appleton ) මහතා අතර හමුවක් ඊයේ (02) අධිකරණ අමාත්‍යාංශයේදී පැවැති අතර ඉන් අනතුරුව ශ්‍රී ලංකාවේ ඇමරිකානු තානාපතිනිය වන ජූලි චන්ග් (Julie Chung) ද හමුවිය.

ඒ සම්බන්ධයෙන් අමාත්‍යංශය විසින් නිකුත්කර ඇති නිවේදනයේ මෙසේ සඳහන් වෙයි.

වර්තමානය වන විට රට තුළ පවතින දේශපාලන වාතාවරණය හා යෝජිත 21 වන ආණ්ඩුක්‍රම ව්‍යවස්ථා සංශෝධන පනත් කෙටුම්පත සම්බන්ධයෙන් මෙහිදී අමාත්‍යතුමා විසින් මහ කොමසාරිස්වරයා සහ තානාපතිනියන් වෙත දැනුවත් කළ අතර, ශ්‍රී ලංකාව එම රටවල් අතර දිගු කාලයක සිට දැඩි මිත්‍රත්වයක් පවත්වාගෙන යන බවත්, මෙරට ආර්ථික සංවර්ධන කටයුතු සඳහා මෙන්ම ශ්‍රී ලංකාව මේ වන විට පත්ව ඇති දුෂ්කර තත්වයෙන් ගොඩ ඒම සඳහා සහයෝගය අපේක්ෂා කරන බවත් සඳහන් කල අමාත්‍යතුමා එම රජයන් විසින් ලබා දෙන සහයෝගය ඉතා අගය කරන බව ද අධිකරණ අමාත්‍යතුමා මෙහිදී පැවසීය.

මෙම අවස්ථාවන් සඳහා අධිකරණ, බන්ධනාගාර කටයුතු හා ආණෟඩුක්‍රම ව්‍යවස්ථා ප්‍රතිසංස්කරණ අමාත්‍යාංශයේ ලේකම් වසන්තා පෙරේරා ද එක්විය.

රටට අහිමිවූ ප්‍රජාතන්ත්‍රවාදී දේශපාලන ප්‍රතිසංස්කරණ යළිත් දිනා ගැනීමට සූදානම් වෙමින් පාර්ලිමේන්තුවට ගෙන ඒමට නියමිත 21 වන ව්‍යවස්ථා සංශෝධනය සම්බන්ධයෙන් සාවද්‍ය මත සමාජ ගතකිරීමේ තත්ත්වයක් පිළිබඳව දේශපාලන විචාරකයන් අනතුරු අඟවයි .

ඔවුන් පවසන්නේ පොදුජන පෙරමුණේ බැසිල් වාදීන් මේ සඳහා මැදිහත්ව සිටින බව නිරීක්ෂණය වන බවයි.

පසුගිය සමයේ විවිධ ආකාරයට 21 සම්බන්ධයෙන් චෝදනා ඉදිරිපත් කළ මේ නඩය දැන් රට බෙදීමක් සහ සන්ධීය රාජ්‍යක් ඇතිවීමක් ගැන අදහස් දක්වමින් සිටින බවත් ඔවුන් පවසයි .

 දේශපාලන විචාරකයන් සිදුකරන මේ චෝදනාව පසුගියදා පසුගියදා ජනාධිපතිවරයාගේ ප්‍රධානත්වයෙන් ජනාධිපති මන්දිරයේ පැවැති ආණ්ඩු පක්ෂ මන්ත්‍රී හමුවේ දී ද සඳහන් වූ බවත් දේශපාලන විචාරකයන් නිරීක්ෂණය කර ඇත .

එහිදී බැසිල් වාදියෙක් වන පොදුජන පෙරමුණු පාර්ලිමේන්තු මන්ත්‍රී අනූප පස්කුවල් පවසා ඇත්තේ පළාත් සභා ක්‍රමය නිසා රට කැබලි වී සන්ධීය රාජ්‍යයක් බිහි වීමේ අවධානමක් පවතින නිසා පළාත් සභා ක්‍රමය පවතින තුරු ජනාධිපතිවරයාගේ බලතල ඉවත් කිරීමට තමන් විරුද්ධ බවයි .

ජනාධිපතිතුමනි පළාත් සභා ඇති නිසා විධායක බලය අඩුකරන්න එපා !

එහිදී ඔහු මෙසේද පවසා ඇත .

“අතිගරු ජනාධිපතිතුමනි. අපි දන්නවා ජනාධිපති ක්‍රමය ආරම්භ උනේ 1978 සිට. එය ජේ.ආර් ජයවර්ධන ජනාධිපතිතුමා විසින් ඉදිරිපත් කල දෙයක් කියල. අපි 1987 දක්වා එයට එරෙහිව සටන් කලා. සරසවි ශිෂ්‍යයෝ විදිහටත් සටන් කරා නමුත් 1978 ඉන්දු-ලංකා ගිවිසුම හරහා ඇති වූ පළාත් සභා ක්‍රමය නිසා රට කැබලි වීම, වෙන්වීම සන්ධීය රාජ්‍යක් කරා ගමන් කිරීම වළක්වා ගැනීම සඳහා අපට තියෙන ප්‍රධාන ආරක්ෂක යාන්ත්‍රනය තමයි ජනාධිපති ක්‍රමය ඒක නිසා අපිට සිද්ධ වෙනවා පළාත් සභා ක්‍රමය තිබෙන තෙක් ජනාධිපති ක්‍රමය ශක්තිමත්ව ආරක්ෂා කරගන්න. ඒක නිසා අපි 21 වන සංශෝධනයේ ජනාධිපති බලතල ඉවත් කිරීමට සපුරා විරුද්ධයි.

ඒ වගේම ඒ අදහස ප්‍රකාශ කරන කොට අපිට කියනවා නම් අපිට මරනීය තර්ජනයක් එල්ල වෙනව කියල අපි මරණයට බය නෑ කියල කියන්න කැමතියි.

පොහොට්ටු පොඩ්ඩන්ගේ අලි බොරු !

මේ සම්බන්ධයෙන් වැඩිදුරටත් අදහස් දක්වමින් දේශපාලන විචාරකයන් පවසන්නේ 13 වන ව්‍යවස්ථා සංශෝධනය මත කිසිම ආකාරයකට රට බෙදීමක් සිදුනොවන බවත්, එය ජාතිවාදී කොටස් විසින් අවස්ථාවාදී ලෙස පවසන ඓතිහාසික බොරුවක් බවයි .

13 + සඳහා එකඟ බව මහින්ද රාජපක්ෂ ජනාධිපති සමයේ පවා පවසන විට නිහඬව සිටි මේ පිරිස හැමවිටම වෙනත් පාලනයක් පැමිණි විට රට බෙදීමක් ගැන පවසමින් ජනතාව නොමග යවන බවත් සිහිපත් කර සිටියි.

ජාතිවාදීන් ඇතුළු ඊනියා දේශප්‍රේමීන් නිසා වර්තමානය වන විට රට දරුණු මූල්‍ය අර්බුදයක් වෙත මෙන්ම සාගතයක් දක්වා ඇදවැටී ඇති බවත් , විධායකය ශක්තිමත් නම් රට ආරක්ෂිත බව සඳහන් ප්‍රෝඩාව තේරුම් ගන්න ඊට වඩා නිදසුනක් අනවශ්‍ය බවත් දේශපාලන විචාරක මතය වී ඇත .

21 වෙනි සංශෝධනයට තමන් පූර්ණ සහයෝගය දක්වන බව 43 සේනාංකය පවසයි.

‘විසි එක්වෙනි සංශෝධනය ද? මහ මැතිවරණය ද? ආර්ථික ප්‍රතිසංස්කරණ ද? මැයෙන් 43 සේනාංකය විසින් (2) පවත්වන ලද මාධ්‍ය හමුවක දී වැඩිදුරත් අදහස් දැක්වූ එහි සභාපති, හිටපු අමාත්‍ය කරු පරණවිතාන මහතා පෙන්වා දෙන්නේ රට බරපතල ප්‍රතිසංස්කරණ කිරීමේ හැකියාවක් වත්මන් ජනාධිපතිවරයා සතුව නොමැති බවය. අද ඇතිවී තිබෙන අර්බුදයන්ට මූලික වශයෙන් වගකිව යුත්තේ වත්මන් ජනාධිපතිවරයාය.

අධ්‍යාපන ප්‍රතිසංස්කරණ මුවාවෙන් කොතලාවල ආරක්ෂක වෛද්‍ය පීඨය හමුදාකරණය කිරීම මගින් පෞද්ගලිකකරණය කිරීමට උත්සාහ දැරුවේ වත්මන් ජනාධිපතිවරයා යටතේය. එමෙන්ම ඔහු බලය අවභාවිතා කරමින් බරපතල අපරාධකාරයන්ට ජනාධිපති සමාව ලබා දුන්නේය. අධිකරණය අද මේ තීරණ අනෙක් පැත්ත හරවා තිබේ.

‘දෙවියන්ගෙ නාමයට අධ්‍යාපන ප්‍රතිසංස්කරණ වලට අත තියන්න එපා. ඒවා කරන්න ඊළඟ ආණ්ඩුවක් ආවට පස්සෙ ජනතාවගෙ කැමැත්තෙන්, අනුමැතියකින්. කරපු මෝඩ වැඩවලින් සමාජයට විශාල හානියක් වෙලා තියෙනවා. ඒවා පිළිසකර කරන්න ජනතාවට උදව් කරන්න. අධ්‍යාපනය නම් කාබනිකකරණය කරන්න ලෑස්ති වෙන්න එපා.’

විජේදාස රාජපක්ෂ අමාත්‍යවරයා විසින් ගෙන එන ලද 21 වෙනි සංශෝධනය සම්බන්ධයෙන් අදහස් දැක්වූ පරණවිතාන මහතා සඳහන් කළේ, එම කෙටුම්පත තවත් දියුණු විය යුතු බවය.

‘මේක දියාරු නොකර වඩා ශක්තිමත් කර පාර්ලිමේන්තුවට ඉදිරිපත් කරන්න ඕනෙ. මේක සම්මත කරගන්න මැදිහත් වෙන එක පාර්ලිමේන්තු මන්ත්‍රීවරුන්ගෙ යුතුකම.

පොහොට්ටු පක්ෂයේ පිරිසක් මෙය පරාජය කරන්න කුමන්ත්‍රණ කරමින් ඉන්නවා. ඒවාට නායකත්වය දෙන්නෙ ද්විත්ව පුරවැසි භාව්‍ය සහිත බැසිල් රාජපක්ෂ මැතිතුමා. නමුත් පොහොට්ටු පක්ෂයේ විශාල පිරිසක් ඉන්නවා 21 වෙනි ව්‍යවස්ථා සංශෝධනයට සහයෝගය දෙන්න. මහින්ද රාජපක්ෂ මැතිතුමා දෙවතාවක් බලයට පත්වුණේ අලුත් ආණ්ඩුක්‍රම ව්‍යවස්ථාවක් ගේනවා කියලා. ගෙනාවෙ 18 වෙනි සංශෝධනය. ජනාධිපති ධුරයට තුන්පාරක් එන්න සංශෝධනය කරගත්තා. අයියා කරපු බොරුව තමයි මල්ලිත් කළේ. හොඳ ව්‍යවස්ථාවක් ගේනවා කියලා 20 ගෙනාවා.’

දැන් පාර්ලිමේන්තුවට කළ හැක්කේ ප්‍රජාතන්ත්‍රවාදී සංශෝධනයක් ගෙනැවිත් නැවත 19 තියෙන තැනින් පටන්ගෙන එහි අඩුපාඩුත් හදාගෙන ගැඹුරු ව්‍යවස්ථා සංශෝධනයක් කිරීම බව පරණවිතාන මහතා පෙන්වා දුන්නේය.

‘ද්විත්ව පුරවැසි බැසිල් රාජපකෑ මහතාගේ මුදල්වලට හෝ දේශපාලන බලයට හෝ පාදඩ මැර බලයට හෝ මේ සංශෝධනය වට්ටවන්න ඉඩදෙන්න එපා කියන එක අපි ඒ පොහොට්ටු මන්ත්‍රීවරුන්ගෙන් ඉල්ලා සිටිනවා’

රනිල් වික්‍රමසිංහ මහතාගේ ප්‍රධානත්වයෙන් සාදාගෙන තිබෙන වත්මන් ආණ්ඩුව වෙනස් කොට කෙටිකාලීනව සර්ව පාක්ෂික ආණ්ඩුවක් සෑදිය යුතු බව 43 සේනාංකය මෙහිදී අවධාරණය කළේය.

‘එම ආණ්ඩුවේ රාජපක්ෂලා නොවන ඕනෑම කෙනෙකු අගමැති වුනාට කමක් නැහැ. දැන් තියෙන ආණ්ඩුවම වුණත් සර්ව පාක්ෂික ආණ්ඩුවක් බවට පරිවර්තනය කරලා කාරක සභා ක්‍රමය ගෙනැල්ලා 21 න් ඇතිවෙන්නාවූ ප්‍රජාතන්ත්‍රවාදී සන්දර්භය යටතේ කෙටිකාලීන ආණ්ඩුවක් පවත්වාගෙන යන්න. එතකොට තමයි වර්තමාන ආර්ත්ජික අර්බුදය හමුවේ ජාත්‍යන්තර සහයෝගය, දේශීය වශයෙන් ජනතා සහයෝගය ලබාගත හැක්කේ. අවම දේශපාලන ස්ථාවරත්වයක් ඇතිවෙන්න නම් මේ ප්‍රතිසංස්කරණය වෙන්න ඕනෙ.

අවාසනාවට සමගි ජන බලවේගය සහ ජනතා විමුක්ති පෙරමුණ මැතිවරණ තර්කයේ තවමත් එල්ලිලා ඉන්නවා. අමු සොහොනක කිරුළු දරා පලක් වෙද? මේ වෙලාවෙ කරන්න තියෙන හොඳම දේ තමයි 21 වෙනි සංශෝධනය සම්මත කරලා සර්ව පාක්ෂික ආණ්ඩුවක් හදලා ඒ ආණ්ඩුවෙ වගකීම පාර්ලිමේන්තුවෙ සියළු දෙනාම දරමින් පක්ෂ විපක්ෂ බේදයක් නැතිව තාවකාලික ආණ්ඩුවකට එකතු වෙලා පුළුවන් ලැබෙන පළමු අවස්ථාවේ දීම ජනතාවට තමන් කැමති කෙනෙක් බලයට පත් කරගන්න අවස්ථාවක් දෙන එක.’

මේ අවස්ථාවට එක් වූ 43 සේනාංකය වෘත්තීය සමිති හා බහුජන සංවිධාන ලේකම් බන්දුල චන්ද්‍රසේකර මහතා සඳහන් කළේ 21 වෙනි සංශෝධනය ශක්තිමත්ව ඉදිරියට ගෙනයාමට වෘත්තීය සමිති ව්‍යාපාර සහ බහුජන සංවිධානවලින් ඉල්ලා සිටින බවය.

’21 වෙනි සංශෝධනය සාර්ථකව අපි ජයග්‍රහණය කළහොත් අර ද්විත්ව පුරවැසියාගේ බාධාවලට ඉඩනොදී ශක්තිමත්ව ගෙනාවොත් තමයි අපිට ඊළඟට නියම සර්ව පාක්ෂික ආණ්ඩුවක් මේ පාර්ලිමේන්තුව තුළ ගොඩනගා ගන්න පුළුවන්. 21 වෙනි සංශෝධනයෙන් පිහිටුවන ජාතික සභාව ශක්තිමත් කරලා තිබ්බොත් පාර්ලිමේන්තුවෙ ඉන්න මන්ත්‍රීවරු දේශපාලනඥයන් පමණක් නෙවෙයි වෘත්තීය සමිති නායකයන්ට විද්වතුන්ට මේ සඳහා මැදිහත් වෙලා රටට හිතකර ප්‍රතිසංස්කරණ සිදුකර ගත හැකිවෙනවා’

– Media unit

කොළඹ මහ නගර සභාවේ නාගරික මන්ත්‍රී මහින්ද කහඳගම ව අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන තිබේ.

අද (02) අපරාධ පරීක්ෂණ දෙපාර්තමේන්තුවට පැමිණ භාරවීමෙන් පසුව ඔහුව මෙසේ අත්අඩංගුවට ගෙන ඇත.

පසුගිය 09 වැනිදා ගාලු මුවදොර සහ අරලියගහ මන්දිරය අසල ඇතිවූ කලහාකාරී සිදුවීම සම්බන්ධයෙන් මහින්ද කහඳගම අත්අඩංගුවට ගන්නා ලෙස නීතිපති දෙපාර්තමේන්තු විසින් දන්වා තිබිණි.

රජය මේ වසරේ ආපසු ගෙවීම සඳහා ඇමරිකානු ඩොලර් බිලියන 5 ක් ඉලක්ක කරන අතර රටේ සංචිත ඉහළ නැංවීම සඳහා තවත් ඇමරිකානු ඩොලර් බිලියන 1ක් ඉලක්ක කර ගන්නා බවත් අග්‍රාමාත්‍ය රනිල් වික්‍රමසිංහ පවසයි .

අග්‍රාමාත්‍යවරයා මෙසේ සඳහන් කර සිටියේ ඒකාබද්ධ වාණිජ මණ්ඩල සහා ඖෂධ නිෂ්පාදකයන් ගේ සංගමය , සුළු හා මධ්‍ය පරිමාණ ⁣ව්‍යාපාරිකයන් ගේ සංගමය ඇතුළු වෙලඳ සංගම් නියෝජිතයන් සමඟ අද (02)පැවති සාකච්ඡාවකදීයි.

ජාත්‍යන්තර මූල්‍ය අරමුදල සමඟ සාකච්ඡා සිදුවෙමින් පවතින බවත් මෙම මාසය අවසන් වන විට සාකච්ඡා අවසන් වනු ඇතැයි තමන් බලාපොරොත්තු වන බවත් අග්‍රාමාත්‍යවරයා එහිදී පැවසීය .

මූල්‍ය හා නීති උපදේශකයින් පත් කිරීමෙන් පසු ණය ප්‍රතිව්‍යුහගත කිරීම ආරම්භ කර ඇති බව ද අග්‍රාමාත්‍යවරයා පැවසූ අතර අර්බුදය සමනය කිරීමට උපකාර වන ඕනෑම මුල්‍යමය පාලමක් රඳා පවතින්නේ IMF සමඟ එළඹෙන ගිවිසුමක් මත බවත් අග්‍රාමාත්‍ය රනිල් වික්‍රමසිංහ පැවසීය.

එහිදී වැඩිදුරටත් අදහස් දක්වමින් ඔහු ප්‍රකාශ කළේ පරිත්‍යාගශීලී රටවල් සමඟ තවදුරටත් සාකච්ඡා සිදුකරන බවයි.

ජපානය සමඟ සබඳතා බිඳ වැටී ඇති බවත් එම සබඳතා යථා තත්ත්වයට පත් කර ඔවුන්ගේ විශ්වාසය යළි ඇති කර ගැනීමට යම් කාලයක් ගතවනු ඇති බවත් අග්‍රාමාත්‍යවරයා පැවසීය.

ඖෂධ හිඟය සම්බන්ධයෙන් අග්‍රාමාත්‍යවරයා පැහැදිලි කළේ හදිසි අවශ්‍ය ඖෂධ සැපයීම සඳහා වන ජාත්‍යන්තර අයාචනය සඳහා මාලදිවයින හිටපු ජනාධිපති මොහොමඩ් නෂීඩ් නායකත්වය දෙන බවයි.

ආහාර හිඟය පිළිබඳ ප්‍රශ්නය සම්බන්ධයෙන් අවධානය යොමු කළ අග්‍රාමාත්‍යවරයා පොහොර සුරක්ෂිත කිරීම සහ ආහාර සුරක්ෂිතතා වැඩපිළිවෙළක් සැකසීමට එක හා සමාන ප්‍රමුඛත්වයක් ලබා දෙන බව පැහැදිලි කළේය.

කිසියම් අතිරික්ත බෝගයක් සිදුවුවහොත්, අවදානමට ලක්විය හැකි කණ්ඩායම් සඳහා සහනදායී මිලකට ඒවා ලබා දෙන බව ඔහු පැහැදිලි කළේය.

මැයි 25 වැනිදා කෝප් කමිටුව හමුවේ ආචාර්ය රාණි ජයමහ තමා පිළිබඳ කළ ප්‍රකාශ සාවද්‍ය බවත්, පාර්ලිමේන්තු මන්ත්‍රී ආචාර්ය හර්ෂ ද සිල්වා එහිදී කළ සත්‍ය නොවන බරපතළ චෝදනාවලින් තමාගේ කීර්ති නාමයට කැළලක් ඇති වූ බවත් හිටපු මුදල් මණ්ඩල සාමාජික සමන්ත කුමාරසිංහ පවසයි .

ඔහු මේ බව සඳහන් කර ඇත්තේ ජුනි 01 වනදා කෝප් කමිටු සභාපති පාර්ලිමේන්තු මන්ත්‍රී චරිත හේරත් වෙත ලිපියක් ‍යොමුකරමින් ය.

 මෙහිදී ඔහු පවසා ඇත්තේ මුදල් මණ්ඩලයේ අදාළ රැස්වීම් සටහන් ගෙන්වාගෙන තමා සඳහන් කළ කරුණු වල සත්‍යතාවය පැහැදිලි කරගන්නා ලෙස ය.

ඒ සම්බන්ධයෙන් වැඩිදුරටත් කරුණු දැක්වූ ද සමන්ත කුමාරසිංහ විසින් කෝප් සභාපති වෙත යොමුකළ දීර්ඝ ලිපිය පහත දැක්වෙයි .

නොගෙවන බදු හා සඟවන බදු ආදායම් හෙළි කර ගෙන අයකර ගැනීමේ වැඩපිළිවෙළක් සැකසිය හැකි නම් අද ලබන බදු ආදායම මෙන් දෙගුණයක ආදායමක් සෙවිය හැකිවනු ඇතැයි ශ්‍රී ලංකා දේශීය ආදායම් බදු කොමසාරිස්වරුන්ගේ සංගමයේ සභාපති සරත් අබේරත්න ප්‍රකාශ කරයි.

එය දීර්ඝකාලීන ක්‍රියාවලියක් ලෙස සිදුවිය යුතු යැයි ද ඔහු පවසයි .

ආදායම් බදු තුළින් ආදායම් ලබා ගන්නට පියවර ගන්නා අන්දමින්ම පවතින කළු ආර්ථිකයෙන් රට මුදා ගැනීමට ද බලධාරීන් කටයුතු කළ යුතු යැයි ඔහු යෝජනා කරයි.

ලංකා දේශීය ආදායම් බදු කොමසාරිස්වරුන්ගේ සංගමයේ සභාපති සරත් අබේරත්න මෙම කාරනා අවධාරණය කර ඇත්තේ, මැයි 31 දා කැබිනට් අනුමැතිය ලද බදු සංශෝධන පිළිබඳ දේශීය ආදායම් කොමසාරිස්වරුන්ගේ සංගමයේ අදහස කුමක්දැයි ‘මව්බිම’ පුවත්පත කළ විමසීමකදී ය.

ඉක්මනින් මුදල් උපයා ගැනීමේ අරමුණින් රජය මෙම වක්‍ර බදු අයකිරීම් සංශෝධනය කරන්නට ඇතැයි සිතන බව ඔහු පවසයි.

දේශපාලනඥයන්, සුදුසුකම් නැති බදු නිලධාරීන් මෙන්ම වෙනත් නිලධාරීන් ද එක්ව සැදී ඇති චෞර වළල්ලක් විසින් මේ කළු ආර්ථිකය හසුරුවන බවත්, එය බිඳ දැමීමට ඉහළ සිට පහළට රටට ආදරේ ඇති සියලු පාර්ශ්ව කටයුතු කළයුතු බවත් හෙතෙම අවධාරණය කර සිටියි.

''රටට බලපා තිබෙන මේ ආර්ථික අර්බුදයට හේතුව 2019 විශාල ප්‍රමාණයක් බදු ඉවත් කිරීමයි. 2019 වන විට එකතු කළ වාර්ෂික ආදායම රුපියල් බිලියන 1225යි. නමුත් 2019දී බලයට ආ වහාම රජය මේ බදු සංශෝධනය කරමින් විශාල ප්‍රමාණයකින් අඩු කළා. මෙයින් රජයට අහිමි වූ ආදායම රුපියල් බිලියන 1200ක් පමණ වෙනවා. ඒ සල්ලි හොයා ගන්න රුපියල් බිලියන 1700ක් මුද්‍රණය කළා. මේ උද්ධමනයට හේතුව මුදල් මුදා හැරීමයි. රජයේ සේවක වැටුප්වලට පමණක් බිලියන 80ක් අවශ්‍යයි.''

අන්තර් විශ්වවිද්‍යාල ශිෂ්‍ය බල මණ්ඩලය විසින් මහජන පීඩා ඇතිවන ආකාරයෙන් අද (02) කොළඹ දී පැවැත්වීමට නියමිත උද්ඝෝෂණයක් වලක්වාලන නියෝගයක් නිකුත් කරන ලෙස කුරුදුවත්ත පොලීසිය අධිකරණයෙන් කළ ඉල්ලීමක් ප්‍රතිකේෂ්ප වී ඇත .

කොළඹ ප්‍රධාන මහේස්ත්‍රාත් නන්දන අමරසිංහ මෙසේ කුරුඳුවත්ත පොලිසිය සිදුකළ ඉල්ලීම ප්‍රතික්ෂේප කළේය.

ඒ සාමකාමී විරෝධතා ව්‍යාපාර වැළැක්වීම සඳහා අධිකරණය නියෝග නිකුත් නොකරන අතර , මහජනතාවට පීඩාවක් ඇති වන ආකාරයෙන් උද්ඝෝෂණකරුවන් හැසිරුණහොත් පොලිස් බලතල පාවිච්චි කර ඔවුන් අත්අඩංගුවට ගන්නා ලෙස සඳහන් කරමින් ය.

අන්තර් විශ්ව විද්‍යාල ශිෂ්‍ය බල මණ්ඩලය සහ විශ්ව විද්‍යාල සිසුන් ඇතුළු විශාල පිරිසක් කොළඹ නෙළුම් පොකුණ රඟහල ඉදිරිපිට සිට විශ්වවිද්‍යාල ප්‍රතිපාදන කොමිෂන් සභාව ඉදිරියට විරෝධතා පා ගමනක් සංවිධානය කර ඇති බවට තොරතුරු වලින් අනාවරණය වී ඇති අතර එසේ වුවහොත් ඉන්මහජනතාවට පීඩාවක් ඇතිවී මහා මාර්ගවල ගමනාගමනය අඩාල විය හැකි යැයි කුරුඳුවත්ත පොලිසිය අධිකරණයට කරුණු ඉදිරිපත් කර තිබුණි.

ඒ හේතුවෙන් කොළඹ කුරුඳුවත්ත , සී ඩබ්ලිව් ඩබ්ලිව් කන්නන්ගර මාවත, මල් පාර, නෙළුම් පොකුණ වටරවුම ඇතුළු මාර්ග කිහිපයකට ඇතුල්වීම වළක්වාලමින් ආඥාවක් නිකුත් කරන්නැයි කුරුඳුවත්ත පොලීසිය අධිකරණයෙන් ඉල්ලා තිබිණ .

21 වන ව්‍යවස්ථා සංශෝධනය සම්බන්ධයෙන් සමගි ජනබලවේගයේ 2022 මැයි 31 දින, මහලේකම් රංජිත් මද්දුම බණ්ඩාර ගේ අත්සනින් අගමැති රනිල් වික්‍රමසිංහ වෙත යෝජනා 5 ක් යොමු කර තිබු බවත් එම යෝජනා 5 න් 4 ක් ම ව්‍යවස්ථාවට ඇතුලත් කිරීමට තරම් නොවන ඒවා බවත් හිටපු ආණ්ඩුකාර රජිත් කීර්ති තෙන්නකෝන් පවසයි .

නිවේදනයක් නිකුත්කරමින් ඔහු මේ බව සඳහන් කරන අතර අදාළ නිවේදනය පහත දැක්වෙයි .

ජනවරමක් ( People’s Mandate) නොමැතිව ව්‍යවස්ථාවට බරපතල වෙනස්කම් කිරීමට උත්සහ දැරීමත් ප්‍රජාතන්ත්‍රවාදී වන්නේ නැත. නමුත්, සමගි ජන බලවේගය, ජනතා විමුක්ති පෙරමුණ සහ ද්‍රවිඩ ජාතික සන්ධානයට තමන්ගේ අනාගත යහපත් සංශෝධනයකට ඇති කැපවීම පෙන්වීමට 21 වන ව්‍යවස්ථා සංශෝධනය මාවතක් කර ගත යුතුය.

සමගි ජනබලවේගයේ 2022 මැයි 31 දින, මහලේකම් රංජිත් මද්දුම බණ්ඩාර මහතාගේ අත්සනින් අගමැති රනිල් වික්‍රමසිංහ මහතා වෙත යෝජනා 5 ක් යොමු කර තිබුණි. එම යෝජනා 5 න් 4 ක් ම ව්‍යවස්ථාවට ඇතුලත් කිරීමට තරම් නොවන ඒවා වේ.

සජබ විසින් ඉදිරිපත් කර ඇති යෝජනා 5 පිළිබඳ තාක්ෂණික කරුණු මෙසේය.

යෝජනාව 1. ‘ජනාධිපතිවරයාට අමාත්‍යාංශ තබාගත නොහැකි බවට 19 වන ව්‍යවස්ථා සංශෝධනයේ පැවති ප්‍රතිපාදන ඒ ආකාරයෙන්ම ඇතුළත් කිරීම’

මෙය ඉතා යහපත් යෝජනවකි. 44 (2) ව්‍යවස්ථාව පරණ තැනට ගෙන ගොස් ජනාධිපතිවරයා අමාත්‍යාංශය දැරීම නැවැත්විය යුතුය යන්න ව්‍යවස්ථාව ඇතුළත් විය යුතුය. එය දිනාගැනීමට සියළු පක්ෂ එක් විය යුතුය.

නමුත්, 19 සම්මත වූ පසුවත් ව්‍යතිරේකයක් ලෙස මෛත්‍රීපාල සිරිසේන මැතිතුමා යහපාලන රජයේ පරිසර, රාජ්‍ය ආරක්ෂක, මහවැලි අමාත්‍යාංශ දරා ඇති බව ද අමතක නොකළ යුතුය. ඒබැවින් 21 සංශෝධනය ඉවත දැමීමට මෙය කොන්දේසියක් නොකර ගැනීම රටේ අභිවෘද්ධියට හේතු වනු ඇත.

යෝජනාව 2. මහබැංකුවේ අධිපතිවරයාට අමතරව මූල්‍ය මණ්ඩලයේ අනෙකුත් සාමාජිකයින්ද ව්‍යවස්ථාදායක සභාවේ නිර්දේශය මත පත් කිරීම.

ලිපියේ දැක්වෙන පරිදි 'ව්‍යවස්ථාදායක සභාව' කියා එකක් 21 න් යෝජනා කර නොමැති අතර එය 'ව්‍යවස්ථා සභාව' බව නිවැරදි විය යුතුය.

තවද, අර්ජුන මහේන්ද්‍රන්ට මහ බැංකු අධිපති ලෙස දෙවන වාරය ලබාදීමට විරුද්ධව කීර්ති තෙන්නකෝන් විසින් පවරනු ලැබූ නඩුවෙන් පසුව, මුලින්ම මහ බැංකුවේ අධිපති ධූරය ව්‍යවස්ථා සභාවෙන් පත් කළ යුතුය යන්න සමාජගත විය. නමුත්, මුල්‍ය මණ්ඩලය යනු රජයේ දෙපාර්තමේන්තුවකට අනුරූප (සමාන්තර) ආයතන ව්‍යුහයකි. ව්‍යවස්ථා සභාවකින් දෙපාර්තමේන්තු සාමාජිකයින් පත් කරන්නේ ‌නැත. එසේ නම් එය මුල්‍ය මණ්ඩලය නොව යෝජිත ‘මුදල් කොමිසක්’ විය යුතුයි. එවැනි යෝජනා ඇතත්, එය තවම ලංකා නීතිය නොවේ. අනාගතය පදනම් කර ගෙන ව්‍යවස්ථාව ලියන්නට බැරිය. එබැවින් අංක 2 යෝජනාව අතිශයින් අගතිගාමී, සමාන්තර රාජ්‍ය ව්‍යුහයට ද බලපෑම් කරන්නකි.

යෝජනාව 3 ජාතික ප්‍රමුඛතා හා ඇගයීම් කොමිෂන් සභාවක් ස්වාධීන කොමිසමක් ලෙස පත්කිරීම හා ඊට සාමාජිකයින් පත් කිරීම ව්‍යවස්ථාදායක සභාවේ නිර්දේශය අනුව සිදුකිරීම.

‘ජාතික ප්‍රමුඛතා හා ඇගයීම් කොමිෂන් සභාවක් පිහිටුවීම’ පිළිබඳ යෝජනාව අවම වශයෙන් අගමැතිවරයා සමඟ පැවති රැස්වීමේ දී හෝ සජබ ඉදිරිපත් කළේ නැත. ගහෙන් ගෙඩි එන්නා සේ ගෙනෙන යෝජනා රටට විනාශයක් මිස අත්කළ සුගතයක් නැත. නිශ්චිත ආයතනික ව්‍යුහයකින් තොරව කොමිසන් පත් කිරීම තුලින් ‘පිස්සු පුසා කොමිසම වැනි යෙදුම් පවා සමාජ ව්‍යවහාරයට එක්වී සමස්ත ක්‍රියාවලියට විහිළුවක් බවට පත්වූ බව අතීත අත්දැකීමකි.

ජාතික භෞතික සැලසුම් දෙපාර්තමේන්තුව මගින් සිදු කරන කාර්ය ඉක්මවන කාර්යයක් යෝජිත කොමිසම මගින් සිදු කරන්නේ කුමන කේෂ්ත්‍රයන් උදෙසා ද යන්න නිරවුල් විය යුතුය.

යෝජනාව 4. ජනපති, අගමැති, අමාත්‍යවරුන් ,මන්ත්‍රීවරුන් ඇතුළු ජනරජයේ නිලතල හොබවන සියලුදෙනා වත්කම් බැරකම් ප්‍රකාශ ඉදිරිපත් කිරීම අනිවාර්ය කිරීම හා එය පැහැර හැරියහොත් දැඩි දඬුවම් පැමිණවීමට නීති රාමුවක් සැකසීමට යෝජනා කර ඇත.

වත්කම් බැරකම් නීතිය ගැන මෙරට සිවිල් සංවිධාන වසර 11 ක් යෝජනා සංශෝධන යෝජනා කර ඇත. මැතිවරණ කොමිසම විසින් ලබාදෙන වත්කම් බැරකම් ප්‍රකාශ පිටපත් ප්‍රසිද්ධ කිරීමට අවසරය පවා නැත. වත්කම් බැරකම් පනත මගින් සරළව බලාත්මක කළ හැකි සංශෝධන ව්‍යවස්ථාවට ඇතුලත් කිරීමේ අවශ්‍යතාවයක් නැත. වත්කම් බැරකම් ප්‍රසිද්ධ කිරීමට වත්කම් බැරකම් නීතිය වහා සංශෝධනයට රජය/විපක්ෂය/පාර්ලිමේන්තු මන්ත්‍රීවරුන් පියවර ගත යුතුය. ස්වෙච්ඡාවෙන් එය සිදු කර තම කැපවීම ප්‍රදර්ශනය කළ යුතුය.

5. සොරාගත් දේපොළ නැවත රජය සතු කරගැනීම සඳහා ශ්‍රී ලංකා රජය පාර්ශ්වයක් වන ජාත්‍යන්තර සම්මුතීන් අනුමත කිරීමට අවශ්‍ය ප්‍රතිපාදන ඇතුළත් කිරීම.

සොරාගත් දේපල ගැනීමට ලංකා අධිකරණයකින් නඩු තීන්දුවක් ලබා ගත යුතුය. එය කළ යුත්තේ ව්‍යවස්ථාවෙන් නොව මහෙස්ත්‍රාත්/මහාධිකරණයකිනි. ලංකාවේ සොරාගත් මුදල් නැවත ලබාගැනීමට නම්, නීතිපති නඩු පවරා ලංකා අධිකරණයෙන් උසාවි තීන්දුවක් ලබා ගත යුතුය. මෙය ලංකාවේ බලාත්මක නීති මගින් දුෂිතයින්ට දඩුවම් නොකිරීම පිළිබඳ ප්‍රශ්ණයක් මිස, ව්‍යවස්ථාවට අදාල ගැටළුවක් නොවේ. සොරකම් කළ මුදල් ආපසු ලබා ගැනීම ව්‍යවස්ථාට ඇතුළුත් කළ රාජ්‍යයන් නැති තරම් ය. අවශ්‍ය නම් කාබනික වගාව වගේ මේ සංකල්ප අත්හදා බැලිය හැකිය.

සජබ විසින් ඉදිරිපත් කර ඇති නව යෝජනා හතරක්ම හුදු කාලය කා දැමීමක් වනු ඇත්තේය. ජනාධිපතිවරයාට අමාත්‍යාංශ දැරීමට ඇති අවස්ථාව අහිමි කිරීමට වැදගත් අවශ්‍යථාවයකි. නමුත්, එය පදනම් කොට 21 ව්‍යවස්ථා සංශෝධනය ගෙඩිය පිටින් අතහැරීම කිසි ලෙසකින් හෝ සිදු නොවිය යුතුය.

හිටපු ආණ්ඩුකාර රජිත් කීර්ති තෙන්නකෝන්

විධායක අධ්‍යක්ෂ/ශ්‍රී ලංකා මානව හිමිකම් කේන්ද්‍රය

මොනරාගල දිස්ත්‍රික්කයේ සියඹලාණ්ඩුව ප්‍රාදේශීය ලේකම් කාර්යාලය අයත් වත්තේගම කැබලිත්ත කොටියාගල වන සංරක්ෂණ දෙපාර්තමේන්තුවට අයත් ඉතා වටිනා රක්ෂිත වනාන්තර ප්‍රදේශ කාලයක සිට ප්‍රදේශයේ දේශපාලනඥයින්ගේ සහායද ඇතිව හොරෙන්ම අල්ලාගෙන නොයෙක් ආකාරයේ වගාවන් සිදු කිරීම මහා පරිමාණ ව්‍යාපාරිකයින් සහ අතලොස්සක් දූෂිත රාජ්‍ය නිලධාරීන් එකතුව කරගෙන යන්නේ වසර කිහිපයක සිට ය. එසේම ප්‍රදේශයේ පක්ෂ විපක්ෂ දේශපාලනඥයින්ගේ සහාය ඇතිව ( දේශපාලනඥයින් ගේ නම් සඳහන් මූලික සටහන සංස්කරණය කර ඇත ) කරගෙන යන මෙම මහා ඉඩම් කොල්ලය විල්පත්තුවේ සිදු වූ අක්කර 3000 ක වන විනාසය මෙන් අවම වශයෙන් විසි ගුණයකට වඩා වැඩි ය.

කෙසේ නමුත් වන සංරක්ෂණ දෙපාර්තමේන්තුව විසින් මෙලෙස මහා පරිමාණ ව්‍යාපාරිකයින් අක්කර 20 සිට 100 දක්වා වන ඉඩම් අල්ලා ගැනීම ක්‍රමිකව නතරකර අදාල රක්ෂිත සංරක්ෂණය කිරීම සඳහා කටයුතු කරමින් තිබුණි.

එවන් වටපිටාවක ජනාධිපතිතුමා විසින් පත්කළ ආර්ථික කමිටුවේ එවක ප්‍රධානියා වූ බැසිල් රාජපක්ෂගේ අවශ්‍යතාව මත, හිටපු වන සංරක්ෂණ කැබිනට් අමාත්‍යවරයා වන සී බී රත්නායක සහ එවක ඉඩම් අමාත්‍යවරයා ලෙස කටයුතු කළ එස් එම් චන්ද්‍රසේන විසින් පිලිවෙලින් නිකුත්කළ 1/2020 සහ 18/2020 චක්‍රලේඛ හරහා ශ්‍රී ලකාවේ වන ආවරණය තුල පැවතී වන ආවරණයෙන් 3% ක් සහ අවම වශයෙක් හෙක්ටයාර ලක්ෂ 500ක ඉඩම් (අක්කර ලක්ෂ 12කට ආසන්නව) රජයේ රක්ෂිත කැලෑ වන සංරක්ෂණ දෙපාර්තමේන්තුව වෙත පවරාගන්නා ලද අතර, වත්තේගම කැබලිත්ත කොටියාගල රක්ෂිත ඉඩම්ද මෙම රජයේ කැලෑ ඝනයට අයත් වන සංරක්ෂණ දෙපාර්තමේන්තුවෙන් පාලනය කළ වනාන්තර වේ. ඉහත චක්‍රලේඛ මගින් මෙම වනාන්තර අනාරක්ෂිත කිරීම තුල, ප්‍රාදේශීය ලේකම්වරුන් විසින් දේශපාලන අවශ්‍යතා මත හිතුමතේ ඉඩම් බලපත්‍ර සහ ඔප්පු නිකුත් කිරීම සිදුකළ අතර, බහුතරයක් ව්‍යාපාරිකයින් මෙම වනාන්තර ඉඩම් දිගින් දිගටම ග්‍රහණයට ගමින් තිබුණි.

ඉහත තත්වය යටතේ 3000 කට ආසන්න ගොවියන් හා ව්‍යාපාරිකයින් (දුෂිත රාජ්‍ය නිලධාරීන්ද ඇතුළුව) ලෙස පෙනී සිටින මෙම සංවිධානය වූ ඉඩම් කොල්ලකරුවන්ට බෙදාදීම පිණිස කිසිවක් සොයා නොබලා අක්කර 25,000 ක් රක්ෂිත ප්‍රදේශවලින් ඉවත්කර සියඹලාන්ඩුව ප්‍රාදේශීය ලේකම් වෙත පවරා ඇත. රජයේ ඉඩම් ආඥා පණත ප්‍රකාරව රජයේ ඉඩම් අක්කර 2කට වඩා ලබාදීම නීතිවිරෝධී ක්‍රියාවකි. ඒ අනුව ගොවිතැනට ඉඩම් දුප්පත් ගොවියන්ට ලබාදුන්නේ නම්, අවශ්‍ය වන්නේ අක්කර 6000 කට ආසන්න ප්‍රමාණයකි. (ලංකාවේ භුමි ප්‍රමාණයෙන් 63% ක් කෘෂිකාර් මික භුමි වන නමුත් අදවන විට ඉන් පලදායී ලෙස භාවිතා කරන්නේ 40% ක් පමණි). ඒ අනුව වැඩිපුර අක්කර 19000ක් වන සංරක්ෂණ දෙපාර්තමේන්තුව ප්‍රාදේශීය ලේකම් වෙත පවරා ඇත.

එසේ තිබියදී, අදා ඉඩම් බෙදාදීමට මිනින්දෝරු දෙපාර්තමේන්තුව අදාළ මැනුම් කටයුතු කරන විට, මෙලෙස අක්කර 50 හා 100 බැගින් ඉඩම් සොරාකා අල්ලාගෙන සිටින ව්‍යාපාරික කණ්ඩායම් අදාළ මැනුම් ක්‍රියාවලිය අඩපණ කිරීමට කටයුතු කර ඇත.

එසේම ඔවුන් තම මුදල් සහ සේවකයින් මෙන්ම ප්‍රදේශයේ ගම්වැසියන් අවුස්සා ඔවුන්ට අක්කර 5ත් 10ත් අතර ඉඩම් ලබාදීමට කටයුතු කරන බව පවසා බලහත්කාරයෙන් වත්තේගම කැබලිත්ත කොටියාගල රක්ෂිත ප්‍රදේශවල ඉඩම් ඇල්ලීමට පොළඹවන ලදී. එසේම මීට ප්‍රදේශයේ භික්ෂුවක් ( මූලික සටහනේ නම සඳහන් නමුත් එය සංස්කරණය කර ඇත ) සහ පසුගිය මහා මැතිවරණයේදී ප්‍රදේශයෙන් තරඟ කර පරාජයට පත් යන අයෙක්ද ඉදිරියට දමාගෙන දිගින් දිගටම අදාල රක්ෂිතයට අනවසරයෙන් ඇතුළුවීමටත්, රක්ෂිතයට හානි කිරීමත් දිගින් දිගටම නොයෙක් අවස්තාවලදී සිදුකරයි.

මෙලෙස ඉඩම් ඇල්ලීමට උත්සාහ කළ අවස්ථා කිහිපයකම එය ව්‍යර්ථ කිරීමට පොලීසිය, විශේෂ කාර්‍ය බලකාය සහ වන සංරක්ෂණ දෙපාර්තමන්තුව එක්ව කටයුතු කළ අතර අදාළ සංරක්ෂණ ක්‍රියාවලියට යුධ හමුදාවෙන් විශාල සහයක් ලැබුණි.

එපමණක් නොව, ගුවන් හමුදාව පවා බීජ බෝම්බ ව්‍යාපෘතිය හරහා වන වගා කිරීමට ඉහත ප්‍රදේශයේ ගුවනින් ගොස් බීජ බෝම්බ හෙලීම පවා සිදුකරන ලද අතර අදාළ වන වගාවන්ට පවා හානිකිරීමට මෙම සංවිධානාත්මක ඉඩම් කොල්ලකරුවන් අවස්ථා කීපයකදී කටයුතු කරන ලදී.

කෙසේ වෙතත් නොයෙක් චෝදනා ලැබුවත් වන ජීවී සහ වන සංරක්ෂණ රාජ්‍ය අමාත්‍යවරයා ලෙස එවක විමලවීර දිසානායක මහතා නිදහස් කළ ඉඩම් හැර වෙනත් කිසිඳු රක්ෂිත හෝ යෝජිත් රක්ෂිත ඉඩමක් අනවසර ඉඩම් කොල්ලකරුවන්ට අලාගනීමට ඉඩ නොදුන් අතර ඒවා රක්ෂිත ලෙස ප්‍රකාශයට පත්කිරීමට අවශ්‍ය කටයුතු ආරම්භ කරන ලදී.

එලෙස ඉතා දැඩි පරිශ්‍රමයකින් ආරක්ෂා කළ වනාන්තර ඉඩම් නැවත වතාවක් ඊයේ සහ අද දිනයේ අදාළ සංවිධානාත්මක ව්‍යාපාරික ඉඩම් කොල්ලකරුවන් විසින් බලහත්කාරයෙන් අල්ලා ගැනීමට කටයුතු කරමින් පවතී. බලෙන්ම සිය ගණනක් ට්‍රැක්ටර් බයික් සහ රථවාහනවලින් රක්ෂිතයට ඇතුළු වී වන වගාව සිදුකරන භූමියත් කැලෑ ඉඩමුත් අල්ලාගැනීමත් භුමිය සකස් කිරීමත් ආරම්හ කර ඇත. අද දිනයේදී අදාළ අනීතික ක්‍රියාවට එරෙහිව නීතිය ක්‍රියාත්මක කිරීමට උත්සාහ කළ වන සංරක්ෂණ නිලධාරීන් හා පොලිස් විශේෂ කාර්ය බලකාය වටකොට බලහත්කාරය පෑමට සහ රාජකාරියට බාධාකිරීමට මෙම කොල්ලකරුවන් කටයුතු කරමින් සිටී.

වන සංරක්ෂණ දෙපාර්තතමේන්තුව තත්වය මැඩපැවැත්වීමට මොනරාගල දිසාව භාර පොලිස්පතිවරයාගෙන් ඉලා ඇති නමුත් ඔහුද අනවසර ඉඩම් ඇත්තෙකු මෙන් අනවසර වගාකරුවන්ට ඉඩම් ලබාදියයුතු යයි පවසා ඇත.

අප විසින් මේ පිළිබඳව දැනුවත් කිරීමෙන් අනතුරුව වර්තමාන වන සංරක්ෂණ අමාත්‍යවරයා වන මහින්ද අමරවීර මහතා ප්‍රකාශ කලේ අදාළ දිසාව භාර පොලිස්පතිවරයා තමා මේ පිළිබඳව විමසා සිටි අවස්තාවේදීද වනාන්තර රකිනවා වෙනුවට ඉඩම් කොල්ලකරුවන් වෙනුවෙන් පෙනී සිටින බවක් ගම්‍ය වූ බවයි. අපට ලැබී ඇති තොරතුරු අනුව පොලිස්පතිවරයා පවා ලිඛිතව අදාළ අනවසර ඉඩම් කොල්ලය වලකාලීමට කටයුතු කරන ලෙස දන්වා ඇතත්, මෙම දිසවභාර පොලිස්පතිවරයා අදාල නියෝගය සහ රාජ්‍ය නිලධාරීන්ට සහයෝගය දෙනවා වෙනුවට තම නිරීක්‍ෂන දන්වා යැවීමක් යයි පවසා අදාල ඉඩම් කොල්ලකරුවන් සාධාරණීකරණය කිරීමට කටටයුතු කර ඇතැයි පැවසේ. ඒ අනුව බොහෝ පාර්ශව සැක කරන්නේ අදාළ දිසා බාර පොලිස්පතිවරයා එක්කෝ අදාළ රක්ෂිත ඉඩමකට කෙළ හලන බවක් හෝ කාගේ හෝ අවශ්‍යතාවකට පරිසර සංරක්ෂණයට අදාළ ආයතනවලට තම සහය නොදී හිතුමතේ කටයුතු කරන බවයි. ඒ අනුව අදාළ රක්ෂිත සංරක්ෂණය සහ ආරක්ෂා කිරීම අදාළ DIG වරයාගේ සහය නොලැබීම මත අපහසු වී ඇති බවයි.

විල්පත්තු වන විනාශය මෙන් විසි ගුණයකටත් වඩා විශාල මෙම වන විනාශය නැවතීමට වර්තමාන විෂයභාර අමාත්‍යවරයාගේ, වන සංරක්ෂණ දෙපාර්තමේන්තුවේ සහ පොලීසියේ වගකීම වේ. ලෝකයේ බොහෝ රටවල්වලට සාපේක්ෂව ලංකාවේ ඇත්තේ ඉතා අවම වන ගහනයකි. එය බොහෝ දියුණු රටවල් හා සංසන්ධනය කිරීමේදී පවා අඩකටත් අඩු අගයකි. ලෝක පරිසර දිනය එළඹීමට ඇත්තේ තවත් දින 5 ක් පමණි. එසේ තිබියදේ ලංකාවේ විශාලතම වනාන්තර ඉඩම් කොල්ලය හමුවේ නිහඬව සිටින්නේනම් ශ්‍රී ලංකාව ආර් තික අර්බුධයට එහා ගිය නීතිය බිඳවැටී රටේ වටිනා භුමි සම්පත් සහ පරිසර පද්ධති මංකොල්ලකරුවන් අතට පත්ව පාරිසරික අර්බුධයක් සහ සමාජීය අරබුධයක්ද ගොඩනැගෙනු ඇත.

ජයන්ත විජේසිංහ

කැඳවුම්කරු

වැසිවනාන්තර සුරකින්නෝ සංවිධානය

මේ පිළිබඳ වැඩිදුර තොරතුරු 0777771348 (ජයන්ත විජේසිංහ, කැඳවුම්කරු, වැසිවනාන්තර සුරකින්නෝ සංවිධානය) ඇමතීමෙන් ලබාගත හැකි බව දැනුම්දී ඇත .

පාර්ලිමේන්තු මන්ත්‍රීවරුන් වන සනත් නිශාන්ත හා මිලාන් ජයතිලක ඇතුළු සැකකරුවන් 13 දෙනා යළි රක්ෂිත බන්ධනාගාරගත කර තිබේ.

ඒ ලබන 08 වැනිදා දක්වායි.

මන්ත්‍රීවරුන් දෙදෙනා මැයි 17 වැනිදා අත්අඩංගුවට ගැනුණේ, පසුගිය මැයි 09 වැනිදා මයිනාගෝගම සහ ගෝඨාගෝගම විරෝධතාකරුවන්ට පහර දීමේ සිද්ධිය සම්බන්ධයෙන් පැවැත්වෙන විමර්ශනවලට අදාළවයි.

ගංවතුර තත්ත්වයන් පිඩාවට පත් ජනතාවට සහන සැලසීමට අග්‍රාමාත්‍ය රනිල් වික්‍රමසිංහ පියවර ගෙන තිබෙන බව වාර්තා වෙයි .

ඊට අනුව මුලික සාකච්ඡාවක් අග්‍රාමාත්‍ය ලේකම් සමන් එකනායක දිස්ත්‍රික් ලේකම්වරුන් අතර සිදුව ඇත .

කලුතර , ගම්පහ , ගාල්ල , රත්නපුර යන දිස්ත්‍රික් ලේකම් වරු සමග පැවති එම සාකච්ඡා දි අග්‍රාමාත්‍ය ලේකම්වරයා සදහන් කර ඇත්තේ ගංවතුරින් අපදා වලට පත් ජනතාව ට සහන ලබාදීමට මහා භාණ්ඩාගාර මෙහයුම් දෙපාර්තමේන්තුවේ මුදල් වෙන් කර ඇති බවයි .

එමෙන්ම අග්‍රාමාත්‍ය රනිල් වික්‍රමසිංහ භාණ්ඩාගාරයට ද උපදෙස් දි ඇත්තේ දිස්ත්‍රික් ලේකම්වරුන් හරහා සහන මුදල් ලබා දිමට පියවරගන්නා ලෙස බවත් එහිදී සඳහන් විය.

මෙරට දරුවන්ගේ මන්දපෝෂණය සීඝ්‍ර ලෙස වැඩි වෙමින් ඇතැයි කොළඹ රිජ්වේ ආර්යා ළමා රෝහලේ විශේෂඥ වෛද්‍ය දීපාල් පෙරේරා සඳහන් කරයි.

ආහාර හිගය මත දරුවන්ට අවශ්‍ය පෝෂණය නොලැබීමෙන් මෙම තත්ත්වය උද්ගත වී ඇතැයි හෙතෙම පැවසීය.

රෝහලට ඇතුළත් කරන ලද ළමයි පනස් තුන් දෙනෙකුගෙන් එකොළොස් දෙනෙකු මන්දපෝෂණය පෙළෙන බව ද හෙතෙම පැවසූ ඔහු ඉන්ද සිවුදෙනෙකුගේ උග‍්‍ර මන්දපෝෂණ ලක්ෂණ පෙන්නුම් කරන බව ද කියා සිටියේය.

ඔවුනට විශේෂ පෝෂණ ආහාර ලබාදීම ආරම්භ කළ ඔහු සඳහන් කළේය.

මේ වන විට වාට්ටුවට ඇතුළත් කරන දරුවන් ගෙන් සියයට 20ක පමණ ප්‍රමාණයක් මන්දපෝෂණ ලක්ෂණ පෙන්නුම් කරන බවද හෙතෙම තවදුරටත් කියා සිටියේය.

Cnews

අමාත්‍ය ධුර ගෙන රජයට එක්වන ශ්‍රී ලංකා නිදහස් පක්ෂයේ මන්ත්‍රීවරුන් වහාම පක්ෂයේ සියලු තනතුරුවලින් ඉවත් කිරීමට තීරණය කර ඇත .

පක්ෂයේ මධ්‍යම කාරක සභාව විසින් මෙම තීරණය ගත් බව පක්ෂ සභාපති හිටපු ජනාධිපති මෛත්‍රීපාල සිරිසේන පවසයි .

ඒ සම්බන්ධයෙන් හිටපු ජනාධිපති විසින් නිවේදනයක් නිකුත්කර ඇති අතර එය පහත දැක්වෙයි .

ශ්‍රී ලංකා නිදහස් පක්ෂ සාමාජිකයන් අමාත්‍ය ධූර ලබාගැනීම සම්බන්ධව !

ශ්‍රී ලංකා නිදහස් පක්‍ෂයේ අවසන් මධ්‍යම කාරක සභාවේදී තීරණය වූයේ පාර්ලිමේන්තුව තුළ විපක්‍ෂයේ සිටිමින් රජය පොදු මහජනතාව වෙනුවෙන් ගනු ලබන යහපත් තීරණ සඳහා පමණක් පක්‍ෂයක් ලෙස සහය දැක්වීමයි.

අදාළ එම තීරණයට පටහැණිව රජයේ අමාත්‍ය ධූරයක් ලබාගන්නා යම් මන්ත්‍රීවරයෙකු වේ නම්, ඔහු ශ්‍රී ලංකා නිදහස් පක්‍ෂය තුළ දරන සියලුම තනතුරුවලින් ඉවත්කළ යුතු යැයි මධ්‍යම කාරක සභාවේ ඒකමතික තීරණය වේ.

ඒ අනුව රජයේ අමාත්‍ය තනතුරු ලබා ගන්නා ශ්‍රී ලංකා නිදහස් පක්‍ෂයේ මන්ත්‍රීවරුන් පක්‍ෂයේ දරන සියලු තනතුරුවලින් ඉවත් කෙරේ.

මෛත්‍රීපාල සිරිසේන
සභාපති,
ශ්‍රී ලංකා නිදහස් පක්‍ෂය